Mistake 7

MISTAKE (7)

Ziaktu: Toni Râlte

Engpawh nise, a dikna hi chu hailan zel a duh. Angeli chet nat ang zela chet nat ve mai bak kawng dang neiin a inhre lo. Zorema te chhiat tawh avangin workshop pawh ni eng emaw chhung chu an khar rih a ngaih hmel a, Magie erawh chuan Zorema te va puih zeuh zeuh a tum. In lamah tihtur em em a nei lo bawk nen. Bakah an in chhung boruak rit ru riau chu a ning deuh. Sunday chawhma inkhawm banah Zorema te ina phei turin a insiam a, Malsawmzuala rawn kal ve a tum bawk a, a phur ve deuh. Angeli pawh a inchei parh leh viau tawh. Khawilamah tak chhuak leh ang maw..a nu leh pate erawh chawhnu inkhawm turin an insiam thung a, Tetea erawh a leng. Angeli a roomah a rawn lut a, "Magie, Malsawmzuala te inah kan leng dawn a. Min han en vang vang la, ka mawi em? " A ti sar sar a. Magie nuih a za deuh,Mampuia nen an inkar engmah a la hre lo a nih hmel. "I mawi lutuk e" a lo ti a. 

A phone a rawn rik vangin Angeli lam chu a ngaihsak ta lo. Number ringawt bawk a ni, "Hello" a tih rual chuan,"Leng ila vawiin chu.." a rawn ti teh ngawt. A hmaa lo betu putar kha chu a ni lo phawt a. A aw a la ṭhalai viau.

"Khawiah maw?" A ti nghat a. 

"Aw..i duh duhnaah, kan pahnih chauhin" a rawn ti lung lung a. Magie a ner sak, "Ka hman lo" tih leh dah a rual nghal. Angeli pawh a chhuak tawh a, ani pawh darthlalangah inen leh zuaiin a chhuak zui ve nghal. Zorema te in hi a lian lem lo bawk a, Sunday te a lo ni bawk nen, an lo khat ve hmûr mai. Zawmi a pui ve nghal a, an inkawmngeih ve ta riau. Tlani ang deuha ri ve phawng phawng chi a ni a, lian êk ûak, hmel pawh chhe lem lo tak a ni. Zorema nu te pawh an rawn kal ve a, Liansanga hmel chu a hlim vak lo hle, an nu Zuii erawh a inchei parh viau. Fa pakhat an nei a, a rai leh thei tawh lo nge a thau tûrh a, a îtawm tawk lek an tih ang deuh kha a ni. Malsawmzuala pawh a rawn lang ve leh ta hlawl. A kamiz chu a inhmeh takzet. A rawn smart viau mai. Magie te bulah ṭhuthmun a rem ve nghal chawt a, Magie chuan zawitê hian, "Angeli te kha an rawn leng dawn sia, i lo kal daih bawk sia" a ti a. 

"Zorina te nen an lo inkawm ve tawh mai ang chu, ka sawm an ni hleinem" a lo ti hmuk. 

Thingpui an va sem a, ṭhenawm hnai nula ho pawh an fel thar thar hle. Magie let leh chuan Zuii leh Mampuia lo inbe mek chu a va hmu a, Zuii chu a nui har har mai a, inhmelhriat ṭha takte pawh an ang alawm le. Mampuia chuan, "Magie, ṭul zualpui i tih zawh chuan Chawnpuiah min va kalpui lawk ta che" a lo ti var a. 

"Umm, thingpui no hi ka'n silpui leh phawt ang e aw" a lo ti ve mai a. Zuii chuan, Mampuia melhin, "I number min lo pe. " A lo ti ve mêk bawk. 

Number an inpek zawh chuan Mampuia chu Magie te thil silna bulah a rawn phei ve a, Zuii erawh tu emaw a be mêk thung. A biak mêk laiin a pasal a rawn chhuak a, an indinchilh ran mai. A tira zawi te têa an ṭawng kha a rei a, an ṭawng ring ta tial tial mai. Thingpui lumna hi Zorema te in piah deuh hleka awm a ni a, an thawm chu lengkhawm ho chuan an hre kher lo maithei. Liansanga chuan, "Be rawh, ka hriat lai ngeiin be rawh" a ti nghek nghek a. Zuii lah diau duh hek lo, "ka be bawk lo vang. I thu thua awm tur ka ni lo ve" a lo ti hmiah mai si. Liansanga insûm zo lo chuan a nupui phone ken lai chu chhuhsak thutin a lek kang vak a, a hmet nghal zawt zawt bawk. Zuii chuan, "Liansang, hmela, i va zak lo ve, khawi rawn la rawh. Tenawmpa..ka phone a nih kha" tih pahin a ban ṭâwk ṭâwk a. A ban pha meuh si lo, an lo thlir ṭhap ringawt. Phone chu a ring ral ral a, mipa aw hian, "Vawiin chu ka hman lo ka tih kha.." dawhtheih loh hmel zet hian a rawn ti a. 

Liansanga chuan, "A pasal ka nia, a bialpa i ni ang chu tiraw?" A ti a. A reh vang vang hnuah, "Ngati nge min lo biak a? Khaw nge Zuii" a rawn ti a. 

"Ka bulah a awm e. Chuan, vawiin tlaiah i bialnu hi rawn hruai chhuak rawh. Ka ma dawn" Liansanga chuan a ti rum ûl a. A dah nghal. Phone chu Zuii pek pahin, "I thawmhnaw va siam ang le.." zaidam zetin a ti ta a. Zuii pawh chu a hrilhhai hmel kher mai. Liansanga dawhtheih chin a pel ve ta a ni maithei. Ni e, a nupui vangin a naute nupain rilru na takin in an chhuahsan tawh a. Tunah an chhiat tawh hmang ṭangkaia a nupuiin nuam a leng vel hi a ngaithei ta bik lo a niang e. Zoram khawvelah hian thil tenawm tak tak hi a va tam tawh tak êm..kan rin loh pui pui, mi ṭha leh rinawm nia kan ngaihte pawh hian puanhnuai thil eng emaw an lo kawl fur zel mai. Mi nu leh mi pa inngaizawng tawk lah bo lo, Kawppui nei chunga ngaihzawng neih chu sual angah pawh an ngai lo nge, an kalpah titih ringawt tawh lehnghal. Kan rapthlak zozai tawh khawp mai. Pasal nei reng chunga pasal um lah bo lo, nupui nei chunga ngaihzawng neia nupui fanaute thlim ziai ziai tawk lah an kat nuk bawk. Kan hahthlak tlang mang e. 

Magie te pawh an intihfel zawhah Malsawmzuala nen Chawnpui veng lam chu an pan dun ta a. Mampuia ṭhianpa, amaha in luah an tlawh dawn a lo ni. Remchang a zawng thiam ve hle mai. Magie pawn hnial a sâwt lo tih hriain thuawih takin a zui ve zel a. Step thui angreng fâ an zawh hnuah Malsawma ṭhianpa Zomuana in chu an zu thleng ta a. A lo hriatlawk tawh avangin ngampa takin an lut a. Zomuana hi Champhai khua niin, Hnathawkin hetah a rawn parawl a, Tlangval awmin a awm ve leh mai a, a nihna takah chuan nupui neiin fa pahnih a nei tawh. An nu te nena heta han awm kha in pui lamah an buai ve si avangin tihian a rawn parawl a, an nute an rawn zin zeuh zeuh bawk. Lehlamah mipa dangte anga han lerha nula han kawp mi a ni lem lo va, an nu pawh a ngaih a ṭha thawkhat viau a nih hmel. 

Magie pawh chu a lo be ve bawrh bawrh a, a nelawm suah suah hle. A hmain Malsawma'n a lo hrilh zauh nge an luh aṭanga 5mins hnu veleh "In lo kal ta rau rau, zanriah ei ve nghal r'u aw. Chawhmeh ka han dap ang e, sunday a ni na a, Vawksa rêp nei an awm leh ang" tiin a chhuak ta nulh mai a. Magie chuan ei ringawt chu a hreh deuh. A vawikhat lenna a ni bawk nen . Zomuana a chhuak fel ta maw tihah Malsawmzuala'n kawngka a va kalh sauh sauh a, Long chair-ah chuan a chêp thei ang berin an ṭhu dun ta a. Magie pawh hi Zonuna bak bialpa la nei miah lo a ni nachungin Mampuia bulah hian han laiha han zah vel hi a nei bik miah lo, Amah Malsawnzuala hian a zir viaute pawh a ni mahna. A rawn kuah vei hnâp a, "Hun thawl hi kan mamawh takzet a ni" tih pahin a lamah a kuah hnai a, a fâwp vawng vawng mai. Magie paw'n zei vak lo chungin a lo fâwp let ve a. A insit ru hle. Malsawma a zei nasa si..mipa ta na nâ na chu taksa lum han innâwk tak rengah chuan Malsawmzuala pawh chu a danglam ṭan ta a, Magie hnutê Zonuna paw'n a thawi takmeuh chauha a lo dehsak chu a kawr chhanah a sâwk tâwn tâwn mai. Magie lah chuan a kut chu laksawn a tum bik lem lo. Malsawmzuala hi a ringtawk a, Zonuna anga thapui thawha sual tum chi niin a hre bik lo a ni. Thâwk lain an han chawl a, "I hriat tur chu kei chu sex hman ka duh lo" Magie chuan a ti thâm ṭiak a. Na lo têa a bianga piaiin ,"Ka hria e, mahse, ka bulah chuan ṭang ṭeuha awm kha a ṭul hran lo aw. Hahdam la" a rawn ti nghut a. A nui var var bawk, a hmel hi zawng a ṭha thlawt a ni. Magie hi eng ti tiha duh ve viau nge maw a nih dawn ni..

Insi rial chung chuan hmalam hunte an sawi dun a, Magie chuan a sawi hreh deuh, sawi a duh bawk si, Malsawma chhungte chungchang Angeli'n a sawi kha a sawi chhuak ta nge nge a. Mampuia chu a rum nghut a, "Rin aiin kua an hreuh thûk zêk a'h! Chuan, i lo awih leh thliam em ni?" A ti dam thlup a. 

"Awiha awih lo tur paw'n i chhungte ka la hmu ve bawk si lo va, bakah i cousin Papari sawi angin a sawi bawk sia" Magie chuan a ti a. 

"Papari hi i û uitê a ni tih theihnghilh lo la..Ka chhungte tluka khirh lo hi an tam vak lo maithei. Nupui pasal, ngaihzawngah an inrawlh ngai lo, kan duhthlanna min zahsak a, kan thlan sual leh kan vanduai a ni mai.." a ti ta a. Magie a dam huai mai. 

"Ka eizawnna hi i duh lo viau em?" A ti a. 

Nui chungin, "A man alawm, nupui man deuh hi ka duh, kan ṭhenawmpa nupui back kick ngam tur" a ti a, an nui dun hawk hawk. 

Malsawma bawk chuan, "I la naupang tih chu ka hre tho a, mahse, nakkum lamah chuan neih che ka duh. Mi thikthu chhia ka ni a, Angeli vangin buaina kan hmachhawn deuh reng bawk si..kan tum loh deuhin kan inṭhen ang tih ka hlau" a ti ta duah a. Magie pawn a thlirna zawn chu dik a tihpui ve viau. 

"I lo upa tawh kher kher a, Nulat ka la duh ka tih kha" titau lek lek hian a ti a. 

"Chutia tihah chuan mipate chu kan kum a tam tak tak thei lo. Mahse, Zorina'n a nei ta bawk si lo va, ka nu te pawn min beisei ru tih ka hrereng" Mampuia chuan a lo ti a. 

"Min duh lovang, i chhung ten" a ti sap a. 

"Thla tharah ka nu birthday-ah i rawn kal ve ang, inhmelhriattirna kan nei dawn nia. I hming chauh zawng an hre vek tawh e" a lo ti nghut a. Magie chuan a melh vawng vawng ringawt. He pa hi a nihna takah chuan a phû lo a ni, a hmelṭhatna te, a hnathawh te lam chu thuhran ni se; Magie chuan a seilenna chhungkua leh tuna a nun kal zel te a ngaihtuahin chhungkaw pangngai taka lawi tur chuan insit rukna a nei tlat! Mahni inkhawngaih te, insit te hi eng anga harsaah pawh a duh ngai miah lo kha a nia. Malsawmzuala lakah meuh chuan a thup bo hleithei lo chu a ni.

Zomuana pawh a rawn haw a, vawksa rêp a rawn hawn tak tak. Magie chuan, "Awii! A zahthlak e, vawikhat lennaa chaw ei ngawt chu" a ti hluai a. 

"A ho lutuk, a hranin min rawn tlawh leh khât tawh dawn êm mai " Zomuana chuan a lo ti zung zung a. Magie pawh chuan a nu a call a, "U Zorema te inah ka ei ve nghal mai ang" a ti thung. Tun hnaiah dâwt a sawi ta zauh zauh a, nuam lo a ti ru ṭhin viau. Zomuana chuan bawkbawn a lo nei remchang bawk a, Magie chuan a bai sak ta a. Malsawmzuala phone a rawn ri ta , Papari a lo nia. "Khaw nge i awm a? I mak ee, kan rawn len chhan ve êm êm che a, Angeli pawh i tihrilhhai lutuk alawm" a rawn ti hlak hlak a. 

"Ka leng..ti nge in lo len? Ka sawm si lo che u a" a ti hmiah. 

"Aw. Kan hmu châk che a ni mai lawm..khaw nge i awm? Kan lo kal ang" a la rawn ti ta deuh deuh. 

"I ho e a. Hmeichhia kan mamawh lo" a ti a, a dah hmak. Papari avang hian Angeli pawh a ngampat phah tih a hai lo va, Papari pawh la zilhhau a tum ru deuh. Magie eirawngbawl zo thlansa chu a va insil dai a, chutihlai tak chuan a phone a rawn ri, Malsawmzuala chuan a lo laksak a, putar âw hian, "Bawihte, room chu ka book fel tawh aw. Zu pawh a changkang ber chi ka chah tawh e, dar 7-ah kâwnah min lo nghak dawn nia" a rawn ti zung zung mai. Malsawmzuala a ner sawk, "Pû-a, i biak tum hi ka bialnu a ni tlat.." a ti thum chhak a. A tir kha chuan a thinrim ṭêp a, mahse, angeli a hrechhuak ta vat a. Angeli tel vena thil a ni ang tih a ring nghal. 

"Tu nge i nih a? Maggie kha phone pe rawh, ka nula a nih kha" a la rawn ti ngam nia! Maggie hming a lam chian êm avang chuan ani thikthu chhe ta reng reng chu a sa ta phat mai. Magie chu a ko nghal a, hruk pawh a inhruk hul hmain, "He Tar hur hi tu nge? Engvangin nge i hming a lam? Be rawh, ka hriat lai hian" Malsawmzuala chuan a ti ta khur khur mai le..

Magie chuan a hrethiam nghal a, thinrim lem lo hian, "Hello ka pu, i biak tum kha ka ni lo. Magie chu ka ni ngei a, mahse, hman zana i mutpui kha ka phirpui Angeli a ni e. A number ka rawn sawi ang aw..lo chhinchhiah rawh" a ti ta mawlh mawlh a. Zomuana leh Malsawma ten an lo thlir reng ringawt. Angeli number chu a pe ta a. "Lo call tawh lo la ka lawm ngawt ang" tiin a dah ta hmak a. 

Malsawmzuala melh chungin, "Mipakhat pawh a la awm" a ti sap a. 

Zomuana a awm ve avangin kha lam han sawi vak kha ṭha an ti chiah lo nge, thil dang an sawi ta rih a. An zanriah ei pawh chu an hlim phian mai, Magie bai chu tui an han ti khawp a, Thlan tla hluamin an hâwp hruih hruih reng mai. Magie pawh a puar ve hle. Eikhamah a sengfelin a sil leh vek a. Dar 7 a ri hnai ta thuak mai. Reivaklo an ṭhut khawmuan leh hnuah hawn lam an hnaih ta a. Zorema te inah an peng leh a, Magie scooty a la awm ve bawk si. Zorema te in aṭang chuan an inthlahliam ta ringawt. 

In a thlena kawngka a hawn rual chuan thinrim âng thawm a hre nghal. Angeli a ni. Magie a hmuh rual rual chuan, "Zawngi, ka number kha engvangin nge putar i lo pek a? I tihsual leh i hurherhna hi ka chungah leihbuak i tum em ni?" A ti piap piap mai. A nu leh pate pawh an awm ve reng. Magie chu a inthunun hram hram a. 

"Kha putar khan nangmah emaw min tih vangin i number ka pe, tin, a ninawm êm a, ka hre ngai lo va, mahse, ani chuan mu dun tawh treat-in min treat a, nang hian ka hming hawhin i lo mutpui a nih ka ring deuh" a ti ta sak sak a. A nuin ring zetin, "Magie,i va nasa reuh ve a, i û chu dâwt muhluma i puh ngam le..putar chuan i hming a hriatchiana i number thlenga a neih theih chuan in mudun tihna a ni mai lawm, ti nge phatmar i tum a?" A lo ti zêk a. Magie rin lawksa tho mah nise, nâ a ti ve deuh. 

"Nu, mipa tumah ka la mutpui lo, nula virgin ka nih hi" inringtawk zet hian a ti a. 

Angeli chuan elsen tih hriat zetin a lo nuih vel a, "Ka virgin e a! Hui,z…i virgin chuan ka lu ka tan ngam" a ti vel a. Magie lah a tumlum si, "Chuti chu naktukah va test ila, i lu chu tan ngei ngei rawh aw" a ti vawt raih mai. A nu chuan, "Mawli, i rilru hi a va chhe ve, i û virgin tawh lo pawh i hmusit hle mai maw? Kan ina kan lalut che hi awm chintawk i hre dawn tlat lo mai" a lo ti leh tuar. 

A pa a rawn inrawlh ta a. "In thu leh hla ka ngaihthlak hian Magie a dik zawk niin a lang. Chu putar chu block ve ve ang che u. Angel, buaina ka duh tawh lo aw.. magie, nang pawh fimkhur ang che. Mu tawh r'u.." a rawn ti ta duam duam a. A nu ṭawngkam avang khan Magie chu a lungawi si lo..a pa avang chauhin a ngawi ta a. A pindan lam a pan nghal. A rilru te tein, "Keimaha ka awm leh te pawh a ngai maithei..hetiang a nih reng dawn chuan a ṭha zawk" a ti a. Vanduai bîk anga inngaih chu duh lo hle mah se; a vanduai tih erawh a chiang viau lawi si. Tunah chuan Malsawmzuala bak innghahna a nei ta lo. 

An boruak a ṭha lo chho zel a, Magie a hnaah a la kal thei si lo. Ina a awm paw'n a zalên hlawl lo va, a nu leh a û ten an be ṭha duh bawk si lo. A pa lah inah a awm khât si, Tetea lah ṭawng tlem ropui si. An awmpui Dikteii nen chuan an inkawm thei ta deuh ber. Mali lah kha an khaw lamah a haw zui ve leh ta daih a, thla thar lamah daih rawn phei a tum bawk si. 

Nilaini chhunah in chunga a nu pangpar khawi ho tui a han pe zo ina a lut leh chu Dikteii a hmu ta mai si lo va, a chhuak lawk a niang ti rilru chungin thingpui a lum a. A lum deuh vangin a kawr a han thlak zuai bawk, room atanga a chhuak chiah chu, Tetea room aṭangin an pahnihin an rawn chhuak ta mai a! Mak a tiin a hamhaih hle. Amah aiin an la hamhaih ve lehchhawng a, Tetea phei chu a sen ṭâwn ṭâwn thei. Thil awmzia hrethiam lo rual a ni lo bawk a. 

"A ho lutuk. " A'n ti ngawt a! Dikteii a nui tet tet. In hnuaiah chhukin thingpui an in ho ta a. Tetea'n, "Duh ka nei, mak i ti viau ang' a tih kha Dikteii hi lo ni lek chuan! A mak hle tak mai. Tetea chuan, "U Maggie, nu te hrilh suh aw, khawngaihin" a ti sur sur a. 

"Nge maw ka hrilh ngawt ang le" a ti ve mai. Mi kamtam a ni lo bawk a, a sawichhuah vangin hlawkna a tel dawn hek lo. 

Tetea chu a nuin a thil chah lam tura a rawn call avangin thingpui in zawhah a chhuak zui nghal a. Tun lai hi exam chawlh an neih ve lai a ni hrim hrim a, class an ṭan leh ṭêp tawh maithei a ni. Chutia Dikteii nen chauh an awm takah chuan Dikteii chuan an chungchang bakah an chhungkaw dinhmunte a sawi ve ta keuh keuh a. 

Hetiang hian,.."I hriat tawh angin he lai vengah hian kan awm tho a, mahse, kan awmna erawh a mawng deuh. Ka nu hoin kan awm a, ka pa hi kum 3 ka nih laiin a boral tawh, hriat pawh ka hre ve hman meuh lo, unau pathum kan nia, ka naupangber a. Kan upa ber hian nupui neiin an nu hian a hneh khawp a, an nute in hnuai luahin in hrang an chang ve tawh a. Ka û chiah hi pasal neiin an inṭhen ve leh a, a fapa nen kan awmpui a. Kei hi ka ni leh tawp a. A hmingin ka graduate ve tak naa, tunlaiah hmelhriat ṭha neih loh chuan leh thiam chungchuang nih loh chuan hna a van zia i hria ang a. Ka nu duhdanin nakkum lamah B.ed te hi ka training ve ang ka tia, E chuan, vanneihthlak deuhin ka pa a boral khan a thawhna PHE lam khan ka nu chu a aiah an la ve a, mahse, kan upa ber mipa khan a thawk ta zawk a. Tihian an in dan hnuah pawh ka nu chuan lalêt duh loin a la thawhtir ta zel a. A hlawh erawh siki them pawh kan chang ve ngai lo. Tin, kan vanduai ve lehna chu ka pa a boral khan Tuirialah huan puitling a nei hman a, mahse, a han boral khan ka patea ten huan chu engtin tin emaw an hmingin an lo dah daih a, kan chân ringawt a nih chu..ka nu hian Pathian a ṭih êm zawk a, engmah kan sawi buai lo mai mai a ni. Tihian ka û nen in lamah puan an ṭhui ve a, kan ei bêl ber a ni. Ka nu tak hi chuan a ṭhui vak thei tawh lo va, a hriselnain a tuar ṭhin bawk nen, mahse, a zai chu amah vekin a la zai a, ka û in a ṭhui ṭhin. Tihian kei hi lângin mi inah ka thawk bawk a. Kan awm ve naw naw a nih ber chu. 

Tetea nen kan nih dan chu maw, Kohhran khatah kan lawi ho a. Tetea ai hian kum 5-in ka upa a, naupang ena ka en ṭhin a nia. A tet laite pawh ka hre ve. Mahse, a mak khawp mai, Sunday vawikhat kha ka kal tlai lutuk a, a chhungah ka lut ngam tawh lo kha pawnah ka ṭhu a, Tetea te ṭhianho pawh an ṭhu ve a. Kan mit hi a intawng thei tawp a, kei chuan engah teh vak ka la ngai lo. Mahse , zan inkhawm ka kal kha kâwnah a lo ding a, "Ka va thlah ang che aw. I tlai leh palh ang" a lo ti ringawt a. Amah aiin ka lai zawk. Mahse, ka inthlahtir lo. Khami zan aṭang khan whatsapp-ah min rawn be ta fô a, a tir chuan naupang ka tih êm vangin ka be ṭha duh lo. A reia han inbiak ve tak fô-ah chuan kan inngaina chho ta a, an awmpuinu a zin khan an ina lânga kal turin min ti ta a, a nu bulah a lo sawi bawk, tihian kan ni chu a ni ta mai. Kei pawn ka hnar thei tawh lo, a fel reuh bakah a hmelṭha reuh sia..mahse, a chhungten an hriat erawh ka hlau khawp mai..i chungchangte pawh ama min hrilh vek a nia" tiin. 

Magie chuan ngaihnawm a ti hle. Dikteii chu an dinhmun vangin a lainat ve lehchhawng a, ani chuan nu ṭha leh amah hmangaihtu a la nei tal alawm le..

Zanriah an ei laiin, Angeli chuan, "Magie, i nau hmeichhia kha call girl a ni maw? Kan ṭhianpa pakhatin a ṭhian ve lehchhawng tan a dawr tlat" a ti a. 

"Ka hre bik lo le" a ti ringawt. I nau a han ti kher te chu a tan chuan ngaihthlak nuam a ni vak lo. 

Angeli bawk chuan, "I seilenna in chhung ngaihtuah chuan nang pawh i lo fawr ve zuai a nih chuan i dem awm loh" a ti leh kher a, a nu lah chuan, "Ni ngawt mai" a lo ti. Magie a insum buai peih ta bik lo va, "I seilennain a zir tehlul nen, i nundan hi a mak ngawt mai, nang pawh" a ti ve hmak. A nu a meng rum nghal a, a ngaipawimawh duh bik lo. A pa chuan, "Ti nge maw in inkhik khak reng le..a tawk, chaw kha ngawi rengin ei r'u" a rawn ti a, an ngawi ta rih. 

Thinrimna leh lungawi lohnain a tuam a ni bawk a, a thleng sil zo chu Malsawmzuala a text a, "Rawn leng rawh." A va ti hmiah. Angeli te nufain hnehsawh zet zeta an ṭawngkhum reng hi a kham tawh. Angeli runluih chu a châk ve tlat, a la naupang ve bawk a, thil tih âwm lo pawh a ni bik lo. Malsawmzuala lah chuan, "Yes boss" a rawn ti hmak bawk. 

Dar 8 rik hma deuhin a rawn thleng a, Angeli erawh roomah a awm lai a ni. A nu chuan a lo be vat a, A mawi tawkin Mampuia pawn a chhang ve zel. Tetea a pindana a chho tur chu a nu chuan, "Tebawih, i û kha hei inleng a nei tih rawn hrilh ta che" tiin a chah a. 

Malsawmzuala'n rang fê hian, "Maggie zawk hi a nia ka rawn rim ni. " A lo ti hmiah. Magie lam hawiin, "Engtik nge hna in ṭan ang?" A ti zui zat a. Pi Thanpuii hmel nur nâng chu an pawisa vak lo a nih hmel.

"Karleh aṭangin a nih hmel..kan buai viau ang, a inhnawhtawng dawn sia" magie chuan a lo ti mai a. Tetea khan a lo hrilh tho nge ni Angeli a rawn chhuk thla ve a, Malsawmzuala bulah a mawng a hûng nghal chat. 

" I lo len dawnte chuan lo sawi lâwk ve ta che" ngam zet hian a ti a. 

"Maggie ka hrilh alawm.." a lo ti mai si. 

Angeli chuan a thinrimna a tilang duh ṭhak lo, "Meg, thingpui va lum la,." A ti fak a. 

"A la hma, a la in duh lo vang" Magie chuan a lo ti ve hmak bawk. An boruak rihzia chu aw. 

"Lum rawh ka tih chuan lum mai rawh, Mali ai i awh tih i theihnghilh ta mi?" Angeli'n a ti leh kher, Malsawmzuala, bialnute thlavang hauh tina zet chuan, "Nia, hawh Meg, va lum ang, thingpui sial tawka lum dan ka hrilh ang che..kan inah chuan thingpui lumtu ber ka nih hi aw" tiin a inhum sek a. Magie chuan phur zetin, "Ni maw? Thingpui hi ka lum sial thiam ve thlawt lo..va lum ila" tih leh thawh a rual a, Mampuia a ding ve zat bawk. Angeli leh a nuin rum elkhena an melh chu haiderin chokaah an inzui lut ta daih. 

An va lum ta rak rak a. Malsawma'n a beng bulah, "An fanu i ni, khatianga awmpui ang leka an treat dawn che a nih chuan nangmahin khawsa rawh. Ka phal reng reng lo" a ti chhum hmak hmak a. Magie pawh chuan, "Ka chhuahsan lovang tih pawh a sawi theih loh" a ti ve sap. An lum zo va, Living roomah an inzui phei leh ta a, a nu leh Angeli pawh a pe ve. 

"Magie, kha putar khan ti nge i hming leh number kha a hriat theih le? A mak ka ti" Angeli chuan huat theih hlek si loh aw phawi hian a ti a. 

"Ka hre bik lo, inlarna a hmu a niang" a lo tihsan. 

"Hmanni ami kha mi? Putar chu" Mampuia'n a lo ti var a. 

"Umm" a ti ringawt.

"Khatiang mihring kha an tam tawh a nia aw. Hmeiche ṭhenkhat lah hian an dig hreh lo bawk si..a aw aṭang ringawt pawh khan a naupang tawh lo tih a hriat viau" Malsawmzuala chuan a ti mawlh mawlh a. Angeli chuan mak tih hmel fê hian, "I lo hre ve tawh ni maw?engtin nge i hriat tehdaih a" a ti a. 

"Magie a rawn call a, ka lo pick sak mawle..a la pawr êm êm zui" tiin a nui hak hak a. Angeli inhumruh chu a mitsirin a hmu reng, a thil plan flop chho mêk chu han lungawipui chi ni hek lo le..a nu chuan, "Mate, vawiinah chuan Magie nau chu i hmu ve em ni? Call girl te kha i ti ringawt a, i chiang a maw?" A lo ti a. Magie a ner ru sak. 

"Hmu e, taxi-a an chuang dun pawh ka hmu. Magie nau tih ka hriatna chhan pawh Magie nen kan inhmuh hma hian amah emaw tiin min hai a, min ankhum hrep a..ka ngeizia chu aw" Angeli chuan a ti hlak hlak a. 

"Engtin nge a ankhum che a?" A nu bawk chu..

Angeli chuan Magie va melh zawk pahin, "Aa. A zahthlak, a sawi ṭeuh mai. 'I nau tihtlak te kha hre lo turah min ngai a..ka hre vek. I fa paina pawh addict..' tih vel a nia. Magie tan hriat a nuam lo palh ang" a ti niah niah a. Magie sa phat a kut humruh chu Malsawmzuala'n a lo humsak ve chawt, a rukin an inelh nasa. Pakhatin insûm rih turin a duh si. Magie pawh Mampuia avang chauhin a insûm thei hram. Angeli dâwt theihzia tal an hrechhuak a, a lawmawm lamah ngai mai ang. 

Mampuia chuan, "Fridayah programme i nei lo tiraw?" Magie en chungin a ti a. 

."neih pawh ka hre lo" a lo ti a. 

"A ṭhat nasat chu, Papuia te huanah kan kal dawn nia, dil sangha man tur pawh a awm tawh. Chawlh a ni bawk a, i thei ang tiraw?" A ti a. 

"Thei ang, awii a nuam ngawt ang. Nghakuai chiah chu ka châk tawp" a lo ti ve hluai a. Angeli leh a nu inmelh ralh ralh chu a runluih ve pah bawk a ni. 

"Ka va phei ang e, ka nuin min lo call sek a, pawimawh a awm a ni maithei" Tiin Mampuia chu a tho a. Maggie chuan a va thlah a, an inchuks zauh. 

"Buaina i tawh chuan a hmasa berah keimah aw" Malsawmzuala chuan a ti sup a. Magie tan a thlamuanthlak teh e. In chhung a va lut leh chu Angeli'n a lo dinchilh nghal rap, a inrin hmain a rawn beng ta ṭhuai a. Mahse, a ti let ve duh lo.

"Hmeli, Malsawmzuala ka duhzia leh veizia i hria, tikhan ka hmuh lai ngeiin i awmpui a maw? I lo va zaktheilo ngai ve. Nang hi ka unaunu pawh i ni hrep lo vang e. " A ti hlawih hlawih a. A nu erawh a ngawi reng, Magie chuan mak a ti lo. Nufa mak tak zawng an ni e. 

"Û, pawi ka ti lutuk, amah khan min duh sia, ka lo duh ve tho bawk nen, kan inngaizawng ta mai a ni. " Zâm hlek lo hian a ti a. 

"Tenawmnu, chutimaia ka thlahfal che u ring duh suh. Ka tihtheih ang ang ka ti dawn. I hre viau ang. Kan inah pawh hian i awm hlen thei lo vang, hetiang mihring kan awmpui duh lo. I lo lan hma kha chuan ka hlim asin, l rawn awm ve aṭangin engkim a buai vek. I la hre dawn khawp e. Friday te kha e i kal nguar ang. " A ti leh chiam chiam a. Magie chuan zawitê hian, "Aw le, i duh duh ti rawh. Engpawhnise, ka chau, ka mu dawn. Muttui u" tiin a û chu a kalpel a, in chung lam a pan nghal. 

"Ka thawmhnaw pek zawng zawng che kha rawn dahchhuak vek rawh. Nang ai chuan mi dang pe ila ka lawm zawk ang" a la rawn ti hram a. Magie chuan a pindan a luh rualin Angeli thawmhnaw pekte chu a khungkhawm nghal mawlh mawlh a, a pindan kawngka bul pawnlamah a va dah ta a. A mu nghal thlawp. A ṭah a chhuak lo va, a thin pawh a rim hek lo. A rilru a mang i ti mai teh ang. A buai nuaih nuaih mai. He in hi a awmvena tur chi niin a hre lo. A tette aṭanga enkawl a dawn lohna in chhungah chuan a lal thei ngai dawn lo. Lal hi a duh ber pawh a ni lo, chhungkua tak tak angin inpawh leh a ṭul huna inhauh maite pawh pawi a ti lo, a chhungte chu chenpui nuam tak ni se a duh ber a ni. Hetia endawng leh tihduhdah, hmuhsit a tuar leh dawn a nih ai chuan rethei taka zalên a thlang zawk. Pathian zarah chaw ngheiin a awm bik lo vang. 

A tukah Dikteii a pui ve leh a, Midang chhuah bo hnu vekah inbunruah a mamawh êm vangin Dikteii bulah a inbunruak ve a, a mi rinzawng tak a ni bawk nen, a thawl hawk nghe nghe. Dikteii pawh chuan, "Tetea hian a sawi thawi zauh tawh alawm. 'Anu leh A û te hian u Maggie hi an hmumawh tlat a, a chhan pawh u magie bialpa hi U Angeli'n a lo duh ve a,.' a ti tawh. I chhungte chu an ni naa, sawi ta mai mai ila, Mali an awmpui hmaa an awmpuinu paw'n a sawi alawm. "Angeli te nufa aia sualthiam leh rilru chhia ka la hrawn ngai lo, mi rethei chu an ke hnuaiah an dah nghal, tlema khawsa thei deuh erawh a ei zo lo chauh thung a. Pu Ruata hi pa pangngai tak chu ni lo se an mualpho daih tawh ang" a ti hial alawm. Chu chu a nia Tetea nen kan chungchangte hi an hriat kan hlauh êm êm " a ti ve mial mial a. 

Hriatchhuah hun an la nei ngei awm si a, Hmabak a kô duh ngawt ang. Magie hi chu han tiduhdahin han tâwng viau pawh nise, fanu nihna chanvo nei kha a ni ve miau a, an duh ang thâl chuan an hrual thei dawn hauh lo. Dikteii te zawk chu a lo vengthawng veleh chhawng a. 

A inbual zo, a sam a chhem ro lai chuan a hmaa rawn betu tlangval zawk khan a rawn call leh. 

"I reh e, ka ngai che, ih maw, ka vei zui char char che. Zanah ka rawn leng tawp dawn" a rawn ti ta mai. 

"Ṭhianpa ,ka sawi tawh kha, i mi hmuh kha ka unaunu ka phirpui a nia, amah khan ka number a pe zawk che a ni. Kei chuan bialpa nghet ka nei reng alawm" a ti charh charh a, han thinrim vak pawh ṭha a ti lo, Angeli thiamloh vek a ni miau a. 

Chu pa lah chu beidawng duh hek lo, "I zak em ni? Kan chetsual avang khan inthlahrun phah suh, ka ngaihdan che a dan phah lo reng reng, kei chuan bialnu tak tak atan ka duh che a ni" a la ti ta deuh deuh. 

"Thianpa, kar tawpah kan inhmu dawn nia, ka nih lohzia i hre mai ang. Nih phawt" tih leh dah a rual ta a. 

Dina erawh a tum a ruh ngang mai. Maggie hmel chu a mitthlaah a châm reh thei lo va, sex an hman dan a ngaihtuah apiangin a la zauthau ziah bawk. Mi te chuan nula easy, zu rui mi chuti khati tiin sêl mah se, a tan chuan duhawmnaa khat hmeichhia, mi nun khawhar tak a ni tlat. Chuvang chuan an ina lenchilh rap mai chu a duhdan a ni tawh. An in te chu zawn theih mai a nia..A inngaihtuah buai lai mêkin a nauin a rawn ko a, a ṭhianpa Zuala a rawn kal tawh a lo ni. A va chhuah chuan a û ṭhianpa an zah rûk êm êm ṭhin Malsawmzuala a lo ṭhu ve khur a. Thawk khat lai khan Malsawmzuala nau Bawihi nen hian an lo inzui ve dat dat tawh nghe nghe. 

"Dina, kan va inhmu khât ve, i ṭha a maw?" A lo ti a. 

"Umm ṭha e, ka chhuak vak lo, tunlai chu.." a tih mêk laiin, Zuala'n, "Maggie zûna a uai a chinah chuan keini pawh min chiauau peih tawh lo" a lo ti lûng lûng a. Dina chuan a melh rum ngang mai. Malsawma chuan eng emaw ngaihtuah nei niawm tak hian, "A tu Maggie tak ni ang maw? Ka hriat Maggie te hi a lo ni lo maw?" A ti hû a. Dina chu a zak viau tawh. Zuala bawk chuan, "Khatla ami a niah..one night stand pawh hi a lo daihrei phian a nih hi" a ti leh zung zung a. Dina chuan, "I va ṭawng thei aw, Zualek" a lo ti nghut. 

Malsawmzuala erawh a thutak ta riau, "Ka hriat pawh Khatla ami tho..hmel fel rin ren, sam tawi kha a ni em?" A ti leh a. Dina pawh chuan zêp buai a hun tawh lo tih hriain, "Ni chiang e..a chhe lo tiraw?" A ti ta nge nge a. 

Mampuia chu a nui suk a, "Chhe lem lo. Chu! Chutianga vei te chu i va rim mai lo a nih chu mawle.." a ti a. 

"Aman phal hek lo, min hre ṭha duh vak lo lehnghal a. Va lenchilh rup hunte pawh a la awm ang chu" Dina chuan a ti ve nang nang a. 

Zuala nen an chhuah hnu lawkah Malsawmzuala pawh chu a tho nulh a, "Ka nuamsam mang tlat lo, tlai aṭang khan ka dik tawh lo va , ka va haw ang e" tiin a inphamar a. 

Pawna a chhuak chiah chu a thaw hawk hawk mai. A rilru chu a buai nuaih nuaih mai, Dina khan Maggie a lo flirt tawh tihna em ni? Rin loh hram a duh a, Angeli thiltih ni zawk se a duh takzet bawk. Motora a luh hnuah Magie number chu a hmet chhuak ta a. 

"Hello" a rawn ti a. 

"Inhmuh ka duh" a ti nghal hlur a. 

Aw thâm chil chel tê hian, "Ka thei lo, ka dam lo va" a rawn ti! 

"Margareth, Zodinpuia nen eng nge in lo tih dun tawh? Chu chauh chu sawi teh" a ti nghal tuar. 

"Engmah, Zodinpuia pawh ka hre lo..ka pum a nâ êm mai, ka dah rih aw" tih leh dah a rual a. Malsawmzuala a harh chhuak zawk, Maggie a damlo maw? Engtin? Naktukah huanah kal an tum kha..

Hmanhmawh zetin a call leh, "Meg, min hrethiam rawh. Ka tihpalh, i eng nge nâ? Engtin nge?" A ti zung zung a.

"Zanriah ei kham aṭang khan ka nuam lo nghal. Ka pum leh ka tai hi a na lutuk a. " Thei leh thei lo hian a rawn ti a. 

"Ka rawn kal" tiin a dah nghal. Chak zetin Maggie te in lam chu a pan ta a. In chhung a va luh chuan Pu Ruata pawh a lo awm ve a. 

"Khaw nge maggie chu?" A ti nghal thâwr. 

A nu chuan, "A pindanah a awm a nih kha. A damsam lo va, inleng kawm thei pawh a ni lo" a lo ti a. 

"Ka hria alawm, chuvang alawm ka lo kal..damdawi inah ka hruai dawn" tih leh in chung panna stepa lawnkai a rual nghal. Pi Thanpuii a ding vat a, "Keini pawn kan hruai thei tho asin. Intibuai duh lo mai rawh,. Eng êm a ti lovang" a ti a. Pu Ruata pawh rawn ding vein, "A na riau em mawni le..khaw nge i han en teh ang" tiin an nu a melh a. Malsawmzuala chuan Maggie pindan kawngka chu kik khawmawi loin a hawng hmiah a, a lut zui nghal. Maggie chu a khum bul chhuatah ṭhingṭhiin a lo luak mek a lo nia. A va pan vat. A luak te chu a thi hial! Malsawmzuala chuan a pawm vat a, A zawi nen mai. Pu Ruata chuan, "Ehe! Maggie leh! Nuamlo satliah ringawt i ni emaw ka tia..a va zia lo ve. Thanpui, Kawla call rawh rang takin kalpui nghal ang u" a ti ta zung zung a. Angeli a la rawn dîkdâk miah lo. Malsawmzuala chuan Maggie chu a pawm nawlh a, in hnuai lam panpuiin, "Ka motorin kal mai ang u" a ti a. Pu Ruata'n a rawn zui ve nghal hlawk hlawk..pi Thanpuii erawh a ding ngawi reng a, Angeli number hmetchhuakin, "Damdawi inah an hruai dawn..i che na mah mah a ni. A pawi thei maithei a nia..i pain a hriat vaih chuan kan nasa lo khawp ang" a ti chang ta rât a..