Mistake 6

MISTAKE (6)

Ziaktu : Toni Râlte

Eng thil nge maw thleng chiah le? Engvanga Malsawmzuala hian Angeli thusawi chu ring nge maw a nih ang le? Finfiahna ṭha tak a nei tihna em ni ang? Magie lah chuan engmah a hre ve hauh lo lehnghal. Chumi zan a mu pawh chu awmngaihna reng reng a hre lo va, a rin ai daihin Malsawmzuala chu a lo ngaina tawh a nih hmel. Angeli'n an inzawm tawh thu a sawi khan a kehdarh ṭêp a nih kha..mahse, mi inthunun thei tak a ni a, a insûm thei hram zawk a. Muthmunah erawh a tal a tal a, Mampuia va biak pawh lah a induhtawknain a phalsak bawk si lo. Angeli confi danah zaninah khan eng emaw tak chu a thleng tih a lang reng mai. Malsawmzuala chu a rin ang a lo nih loh avangin hrehawm a ti a, huat a duh a, a haw thei ngawt bawk si lo. Zing lamah a chhing ve sek tih mai loh chu a rilru lamin a chawl hahdam hman meuh lo a ni e. Phak chuapin a tho a, Mali a awm bawk si lo, a nu lahin lânga rawn kal tur kha a la be fel bawk si lo, za lo zetin a tihtur a ti mawlh mawlh a. A nu rawn tho vein a rawn pui ve zawk a, a mood chu chhe fia fia tak a ni. An tum dan kha chuan vawiinah Malsawmzuala te chhungkaw picnic-ah Sangteii nen va kal ve tur kha an nia. Mahse, a aiah Angeli a kal zawk dawn ta a nih hmel e. Angeli pawh a rin ang ngeiin zan lamah rui viau mah se; a rawn tho hma ve phian a. 

"Vawiinah chhungkaw picnic-ah sawm ve ka nia, ka va lan ve loh chuan" a ti sauh sauh mai a. Magie tan chuan ngaihthlak nuam tak a ni lo hrim hrim. Chaw ei khamah a insiam sawk sawk a, hmanhmawh zetin workshop lam a pan nghal. 

Sangteii a bia a, engkim thil awmzia a hrilh ta vek a, Sangteii chuan, "Malsawma chu ka lo be ve chhin dawn mi? Chutiang ringawt te chu a..eng nge thil awmzia pawh kan hre si lo" a ti a. 

"Ngai lo, tihian ngawi mai ang. An awm awmin awm rawh se..Tlaiah chaw ka rawn ei ang" Magie chuan a ti a. Sangteii a lo lawm tumhrang. 

Ngawi rengin a hna a thawk mawlh mawlh a, chhun chawlh laia a phone a han en ve zawk chu Angeli status-in a tina zui leh nghal. Swimming pool sira Malsawmzuala nen an ṭhutdunna chu rawn hmangin, "He's mine" tih captionah a hmang! A lungphu chu thlawkchhuak mai dawna a hriat avangin phone chu a hmet thim nghal. Malsawmzuala a lo ring kha a tihsual lian ber a niin a hria. 

Hetih mek lai hian Malsawmzuala pawh mood chhe zetin a chhungte avangin a nui lui ve hram hram a. A rilruah hmeichhe pakhat chiah a awm. Chu lah a hmuh phakah a awm si lo. Papari'n Angeli a lo sawm ve kher chuan a tilawm lo zual a. He hmeichhia hi Magie phirpui mah nise a mil hlek lo. Mahse, Magie'n a bumna tarlansaktu a nih angin a lakah a mawihnai tala ṭhatna lantir ve a ngai si a, a nuih luihnaah a biang pawh a kham ṭhûm tawh. A khua a har a, tu emaw awm ve se tia duhthu a sâm laiin kha thlalak khan a duhna leh suangtuahna te an rawn hliah leh si ṭhin. Ni e, nizana Angeli leh Papari te a thlah khan Angeli te chuan Magie'n a kawp thu leh an kal thui tawh thu an hrilh a. Angeli te thusawi a nih vang pawhin a awih duh lo. Mahse, thlalak an rawn phawrh a, Magie te workshop kawtah ngei mipa la upa lo tih hriat tak leh Magie te inthlakhlelh hmel taka an ding dun a hmuh takah khan a sa pup pup a, a zaidamna a rawn nêk pawp ta hial a nih kha.. mahse, chumi hnuah pawh Magie zawkin a rawn biak pawh hun a la nghak zel a, a reh tlawk tlawk si, chuta karah Angeli'n a chhuah thu a la rawn sawi zui a! Ani ang mipa inti ve tawk tak tan chuan sawi zui tur a awm ta lo kha a nia. Angeli te hian an lo sawi dik a ni ngei ang tih ngaihdan a nei ta hial rêng a. Amah ang tak Angeli hmuh fô pawh chu hrehawm a ti a ni. 

Magie pawh hah hnèpa a thawh zawhah zanriah ei turin Sangteii te in lam a pan ta a. A nu a be lawk tawh tho a, Sangteii te chuan an lo lawm hle. A inbual fai nghal a, Sangteii kawr a haksak. Zanriah ei laiin a phirpui nena an inhmuhchhuah dan vel chu kimchang deuh takin a sawi ve a. Sangteii nu chuan, "Awii video a viral te khan awmhmunah ka lo ṭang ve ṭeuh zel a, i ni lo tih hi ka chiang sia maw..ka thin a rim hlur alawm" a ti ve bawrh bawrh a. Magie paw'n Sangteii te chhungkua chu a chhungkhat hnai ber leh awmchhun ang thawthangin a ngai tawh a ni. An ni leh Zorema te bak han belh vak tur a hre lo. Sangteii chuan riak turin a sawm nasa a, mahse, a nute a venthawn vangin a hnial hram. 

Pu Zoliana te chhungkaw chungchang a zawh chuan, Sangteii pa chuan, "Aaa..Zoliana chu a tuhrah a seng ka ti mai. A khawngaihthlak viau nain khawngaihthla a la vak lo. I hriat angin Remsiama kha a pa thei lo zui a, a pa thei ang tih a hlauhawm mah zawk, a sual si, thatchhe si, ruk ruk leh dawt sawi bak tihthiam a nei mang si lo va. I nu han ti ila, Zoliana nupui lah khi ṭi dâk reng mai, pasal hlau leh lutuk a ni bawk nen, Buanga chiah khi a rintlak leh an innghahna a nih mai tak khu, Vanhlupuii lah khu call girl te an tih mai mai kha..a ni mahna, thawhchhuah nei mang si lo khuan a incheina a sang thei êm mai. Pu Zoliana hlawh hi chu Remsiama ruihna a ni mai e, harsa tak an ni.." a ti chuar chuar a. Magie chuan khawngaih ngial a han tum a, a thei mang tlat lo. Zângkhua hian bungbut hun a lo nei chiang e. Buanga erawh a lamṭang ṭhin kha a ni a, eng emaw ti tala puih ve theih a châk viau, kawng a la awm ve mai ang chu maw..Dar 8 rik dawnah an in lamah a inkhalh phei ta a, Sangteii te ina chaw a ei chu a rilru thlengin a zangkhai phah hlein a hria. In a thlen chuan Angeli a lo la haw lehpek lo va. 

An call lahin a switch off bawk si. A nuin, "Papari ka be tlang thei bawk si lo, Magie, Malsawmzuala number kha i nei tiraw? Ani kha a kal vein ka hria, call mai teh a" a tih chuan a call hreh viau. Mahse, hnial chi niin a hre bik si lo. Khur dar dar chungin Mampuia number chu a hmetchhuak a, a call ta a. 

"Hello" a aw chu a nelawm fahran loh hle. 

"Aw..ih, ka u hi a lo la haw lo va, a awmna chin i hre mial lo maw?" Magie chuan a ti niah niah a. 

"Hre lo. A lo haw daih tawh kha" a ti chhum hmak. 

"Aw le" ti ve sapin a dah ve hmak. Engvanga amah chu hua nge maw a nih ve ringawt le? Amah Magie zawk hian haw tur a nia sin. Engmah sawi loin a rehsan ringawt a nia. Khanglang a..

A nu mangang chuan Papari te inah Tetea nen a va kaltir ta ngawt a. Papari pawh a la haw bik lo. An lo buai ru ve viau a niawm e. Khawiahtak awm ang maw? Han zawnna tur lah an haihchham bawk si. A khât tawkin an call reng a, dar 10 pelh tawhah Angeli chu a rawn lut ta hlawl mai. Kal pawh kal ṭha thei lo khawpin a rui a ni. A pai ṭiang ṭiang a, long chair-ah a tlu hnawk. A pa mitmeng a nelawm ta loh hle. A nu pawh tun ṭum chu a sa ve hle tih a lang. 

"Malsawmhlu, tho vat rawh. Engvangin nge i rawn ruih haw leh a? Nizanah lah tikhawp khan i rui tawh bawk a, tho teh" tiin Angeli lu chu a sawi nawk nawk a. Pa ber inhrosak hma ngeia a fanu chu a harh a ngai tih a hai lo te pawh a niang e. Angeli lah a rum ṭiah ṭiah reng a. Magie leh Tetea'n an kuah a, a pindan an panpui ta. Magie chuan a hma ang bawkin a mut ṭhattir leh vek a, A pa a rawn chho ve. A vei tuak sek a, Chang beng bawng hian, "Malsawmhlui mi pal dan êm êm hi chu..ka ngaizam thei tawh lo. Naktuk khua lo var se, Home-ah kan indah lut ang. Heti ringawt zawng kan mualphona khua a sei mai mai dawn" a ti nghut nghut a. Tuman an chhang ngam lo. A nute ho chhuah vek hnuah Magie chu a la awm a. 

Angeli tui a chhawpsak lai tak chuan a û phone chu a rawn ri ta a. Malsawmzuala a ni. A na zawk zawk mai. Mahse, intipachang luiin a aw thian kharhin phone chu a la ta a. 

"I nauin i awmna chin min zawt a, ka hriat loh thu ka sawi a. Khaw nge i awm a? I haw tawh em? Magie chu a chhuak leh tawh em ni?" A rawn ti nghal mawlh mawlh a. 

Magie chu a inngaihtuah buai hman deuh. Angeli anga chhan chu a duh ta a. "Hei ka haw tawh. Magie maw chhuak lo e..ti nge a?" A ti hâ a. Ṭawngsual erawh a hlau hle. 

"A chhuah leh ka ring deuh mai mai. Chuan, i thlen tawh chuan a ṭhat chu, ka mawhphurhna in nihna chen a awm ve sia, nuam ka ti lo va" tia dah a tum mêk lai chuan, "Malsawmzual, in va thleng thui tawh awm ve. Tenawmpa..hei vang hian a ni maw? I lo ngawih hmak ni. Tuna i biak hi Magie a ni e. Ka duh ka hre ta a, ka lawm e. Dam takin le" a ti khur dat dat a, a hmet hlum nghal. Second tam pawh a liam lo vang tihin ama phone-ah Malsawma chuan a rawn call ta a. A la nguar ang. Thinrim inhumruh chungin a pindan a pan a. Tui taka muthilh a châk tehlul nen, mutchhuak reng reng a awm thei lo. Malsawma lah chu a beidawng duh dêr lo, a rawn call ngat ngat mai a ni. A block ta hial a! A û nen inlaichinna an nei reng chungin engvangin nge a la rawn call ngam ni..a û-in a sawi kha chuan a û sawi a nih vang khan a la ringngam duh lo va, eng emaw a awm thei tiin a ngaichâng kha a nia. Mahse, kha zaninah a duh chu hmu tain a inhria. A tawk viau e. 

Dina leh Vanlala te chu hlawhtling inti zetin an inkhalh haw a, Dina phei chuan a hmeichhe mutpui kha a vei zui viau. A zei dan kha a tawk chiah reuh a, experience a lo nei ve tawh tih a hriat viau nain kha nula kha a duhzawng tak a ni tlat. Ni e, dar 8 bawr vela an ṭhian dun leng khawthawng chuan nula pahnih ṭap lo inthlem dun an va tawng a. An lenvahna hmun hi khawthlirna atana remchang tak, fâl over ni bawk si lo a ni. An lo kamnam ta bawk nen, an va pawh ve râwih a, an zu la neihte chu an in ho a. Ṭap zawk kha amah Dina hian a hauh ta deuh a, a chhiat loh bakah a awmdan leh chezia chuan a hîp miau a ni. A hming pawh Magie a nih tak kha..hming mawi tak niin a hria. Mechanic a nih thu leh Tuikualah workshop pakhatah a thawh thu te chenin a hrilh kha a nia. An vawikhat inhmuhnaah lei eden an chen dun nghal a, an duhtawk an hmu dun bawk. Vanlala te pawh hlim lo an ni bik lo. Dina hi Magie te aiin kum 4 velin a upa âwrh ang, MA a zawh hlim, thawven lai a ni a, a hmel pawh chhe lo tak a ni. Ngaihzawng nghet nei ngai lo, thlak zung zung mi a ni ve a, Magie kha ngaihzawng nghet atan pawh a iai hran miah lo. A number a la hman lo erawh pawi a ti hle. Mahse, an workshop zawnchhuah theih a la ni tal alawm tiin a inhnem a. Tui takin a muhil siai siai mai. 

Hetih mek laiin Malsawmzuala erawh rilru buai zetin hun a lo hmang ve bawk a. Magie chu a be pawp thei tawh bawk si lo. Chetlak dan tur a vân hle. A rawn ânkhum danah khan Angeli zawkin dâwt a fah a ang a, chu chu a hriatchian ngei ngei a ngai..Magie erawh zan hmasa lama a muttlem hrim hrim vang nen zan dang ai chuan a muhil hma ta deuh a, a lawm khawp mai. 

Zirtawpni hi chu zep loh chuan ni zawng zawnga ni nuam ber ti ila kan sawisual awm lo ve, Magie pawh chawlh nei lo mah se; Zirtawpniah hi chuan a eng emaw ti thawven ve deuh ṭhin. A nuin lânga rawn kal tur chu a lo be fel tawh a. Eirawng a lo bawl mial mial, Magie te nena inrual khat vel tur, sam sen lek lek, ngo tak, cher lam deuh a ni a. A hmel pawh a chhe lo. Tin, Thingtlang khua a nih hmel loh bawk. A incheina pawh a to ve thawkhat tlat! Tin, a fai a, a lang zahawm ru riau. Magie a rawn hmuh chuan, "I lo tho tawh ni maw? Thingpui i duh em?" A lo ti vat a. 

A lu a thing nar nar a. Thingpui hi chhunah bak a in meuh lo. Chu an maid thar chu Dikteii a ni a, An veng chhung ami tho a lo ni. Magie tan erawh mi thar a ni thung. Midang pawh an rawn tho ve sap sap a, Angeli erawh class a kal dawn lo a niang, Tukthuan ei thleng pawn a la rawn dîkdâk lo. A pa paw'n eng em em a sawi leh rih lo, mi hrang an awm ve rih bawk nen. Magie pawh eikhamah a insiam nghal a, a chhuak tur chu Tetea'n, "U magie, ka bike a chiang lo tlat mai a, min lo thlah ve lawk mai dawn mi le?" A rawn ti a. In khata khawsa ho an ni na vang vangin inbe khât ve tak an ni. An ṭawng tam lo dun ve êm bawk a. 

."Tehreng mai, i hman mi? Tikhan" a lo ti var a. 

A rawn chuang nghal. Inbe lem lo chuan an tlan dun ta char char a, traffic jam-a an tan laiin, "U magie, saw sawlai scooty khalh saw i hmu em? Saw sawn min bem nasa thei rap" Tetea chuan a rawn ti sur sur a. Magie nuih a za deuh, Chu hmeichhia pawh chuan Tetea te school uniform a ha ve tho a, class khatah an awm a ni maithei. A hmelṭha reuh zêk bawk.

"A chhiat loh êm saw, i duh lo mi?" A lo ti a. 

"Aih, duh tâwk ka nei alawm..a mak tawp a ni mai, nakinah ka hrilh ang che. Mak i ti ve ngawt ang" a la ti ta deuh deuh. Tunlai ṭhangtharte zingah inngaihzawnna hian hmun a chang tam ta khawp mai a, indem chi pawh a ni lo. Khawvel hi a hmanhmawh tawh êm a, sual kawng zawh lo tura kan inzirtir ngun a ngai a ni mai. Ngaihzawng neih hi sual a ni lo va, mahse, Ngaihzawngte nena Pathian phal loh thil tihdun hi sual a ni thung. Chu kawng zawh lo tura chhungkuaa kan inzirtir tam hi a pawimawh khawp mai. Magie mak tih deuh chu a chhungkaw tharte mizia hi a ni. A pa chu mi ṭha tâwp, pa zaidam leh rorel thiam tak mah nise, fate zilha han thunun mi a ni lem lo. A thin a thawh thut hunah na lua awm lo va nghaisa duh mai tur chi niin a hria. A nu lah nu zahawm, a eizawnna pawh hna zahawm tak a ni nachungin a fate sualnaa zilh chu sawi loh a pa laka la zeppui duh mi, mi fate chesual leh lo pelhê erawh sawi nuam ti viau lawi si a ni thung a. Chuvangin Angeli heti taka a han tal ho pawh hi âwm tihna chen a nei tlat. Fa enkawl hi thil harsa tak tur zawng a ni, Pu Zoliana lah a strict luatah a fate a tikhawlo lawi a! A tâwk tê hi a lo awm ve a nih dawn hi..

Tetea chhuk hnuah lêt lehin a hnathawhna hmun a pan ta a. Nimin lam ai chuan hmuh pawh a nuam ta deuh e. Ngawi rengin a hna a thawk leh ta mawlh mawlh a. Lunch break laiin Zorema nupui Tlani nau khan Zorema a rawn call a, "A û hi a thaw a rawn hah thut a, lo haw mai teh, ka mangang lutuk" a rawn ti ta. Zorema a tho nghal vat a, Magie pawh a ding ve phat, hmanhmawh takin Zorema in lam an pan dun a, Ṭhenawm hnai an lo awm nual tawh a, Tlani chuan boruak a khawpkham lo tih hriat takin thawpui a lo la hulh hulh mai, Zorema remruat angin rang takin Damdawi in hnai ber an panpui ta nghal a, Tlani nau hi Zawmi a ni. Magie pawn a zui ve zel a, a baihvaih laia lo dàwma lo puitu te chu tlanchhiatsan a tum bik lo hul hual. 

Doctor in a lo en zung zung a, a hmain insawiselna a nei tawh em tihte an han in zawt a. Zorema chuan, "A pum hi a rawn puar vak zel a, thawkkhat lai phei kha chuan a rai emaw kan tia, a test khan a rai bawk si lo. Kan ngaihṭha awm ve ringawt a. Zanah hian a thin a hnawh ṭhin thu chu a sawi zeuh zeuh, doctor kan rawn a, damdawi min chawh a, khami a han ei kha a ziapui viau, mahse, tun hnai deuh khan a pum a rawn puar leh a, chaw a ei ṭha thei lo bawk, a helh zel avangin..tihian tunah a awm ta a nih hi" a ti a. Tlani chu oxygen an pe nghal a. Doctor chuan, "Chutia hlauhthawn lutuk tur pawh a ni hran lo a nia. A kâl lam hi a ni maithei, han awm ve rih u la, naktuk lamah test te kan nei chho ang a, a awm rei pawh a ngai lo vang" a lo ti mawlh mawlh a, thâwk khat chu a veng ta deuh. Zorema leh Magie te chu lêt lehin Zorema chu a intifai sawk sawk a, a ken tur vel Zawmi ten an lo lakkhawmsak a, in lamah Zawmi'n naupangte a awmpui a ngai sia, Zorema'n an nu chu a awmpui rih dawn a ni. Magie pawh Zorema kal hnuah workshopah a chho leh a. Rilru a kânghlâng a, ban an ti ta vat mai. A scooty a tih nun mêk lai chuan, "Magie" mipa aw hian a rawn ti a. A hawi let vat. A hriat ngai loh mipa hian a lo nuih sâng mai. A ngaihna hre vak lo va a melh reng lai chuan chu pa chu a awmna lam panin a rawn pen chho ta pâwk pâwk a. Amah ai chuan a û hlek ang, mipa hmelṭha leh duhawm tak a ni. Mahse, Magie chuan chutiang zawng pawh chuan a lo melh ve lem lo. 

"Vawiin chawhnu khan ka rawn kal a, i lo awm lo va" nêl deuh hian a ti bawrh bawrh a. 

"Nia, damdawi inah kan kal alawm mawle, eng nge ni ta?" A ti hâ a. Mak ti awm pawha awm lo hian, "Nizanah i number min pe lo va, biak pawh ngaihna che ka hre si lo va" a ti ringawt a. 

Nizan! Eng nge maw thleng lehpek le. Buai ru deuh hian, "Engtia nizan maw? Nizanah eng nge thleng!" A ti ta a. Dinpuia chu a hawihawi hle. Nizan khan a rui êm a, a hre tawh lo a nih dawn hi a ti rilru a, "Aa..nizanah maw eng vak thleng lo ve, i number chu min pe lawk la, khu min nghak sia" tiin a ṭhiante a kâwk a, magie pawh chuan hriatzawm a duh ruk avangin a pe ve ta mai. A hriat loh hlan hian thil thleng a awm ve ziah. Muangchangin a inkhalh haw ve ta a. Dikteii'n rawng a lo bawl leh malh malh, Angeli erawh chuan uluk zetin nail polish a lo inhnawih thung. Magie a hmuh rual chuan, "Meg, zanin chhuah ka duh sia, ka pa ka dil ngam tawh bawk si lo, min dilsak la, nang pawh i lo kal ve ang a" ngenngawl zet hian a lo ti a. 

"Aa..ka dil ngam bik hleinem, a thinrim êm kha. Chhuak tawh lo mai rawh" tiin a û chu a melh a. 

"Aih, chhuah ngei ngei ka ngai alawm.. please -in min dilsak hram teh.." a ti leh ngawih ngawih a. Chuti taka pawimawh a nih chuan tiin Magie chuan a pa dil mai chu a hnial ta bik lo. A inbual fai ta vâk a, A inbual zawh veleh Zorema a va bia a, an chin a va zawt a ni. 

"Hei a zia reng ti ila mut duhnain an jection a, a muhil bawrh bawrh reng mai. Lo ngaihtuah lutuk suh u" a rawn ti a. Magie pawh a thaw huai e. 

Zanriah an ei lai chuan Angeli'n a rawn signal nasa tawh si, zak chung chungin, "Pa, vawiinah kan boss nupui thawhah vangin damdawi inah an lut a, chhungkhat hnai an nei vak bawk si lo va, zan rei hma deuhin ka va kal ve dawn mawni ka tia, ka û nen kan va kal ve ang chu" tiin a pa chu a melh ta ran a. A nu chuan rinhlelh hmel lek lek hian, "A eng nâ nge ni a?" A lo ti zauh. 

"A thaw a rawn hah thut a, doctor kha chuan a kâl lam a nih a rin thu a sawi , naktukah test an nei ang" a lo ti zung zung a. A pa chuan a rawn melh a, a û a melh veleh. A inngaihtuah buai deuh a nih hmel. Mahse, "Chutia dam lohna thil a nih chuan va kal rawh u, Angel, nizan leh zan hmasa ang khan i rawn awm tawh tur a ni lo. Khatiang kha a thleng leh a nih chuan na lua a awm lovang. Magie, i û hi vil rân ang che" a ti ta charh charh a,. Thutawp tih a hriat mai. Angeli chuan ngaihsam hmel zet hian, "Nia, awm tawh lovang,nizan kha chu Papari ṭhiannu vang alawm..chi loh tawp" a ti niah niah a. Eng nge thleng tih tuman an hre ve lo. 

Eikhama an intihfel zawhah an insiam a. Angeli pawh a inchei em em lo. Magie scooty-in an kal ta a. Tlani chu a lo la muhil la, drip an khai bawk. Zorema chuan an rawn kal chu mak a ti deuh niin a lang. Angeli pawh chu a be ve luam a. Dar 8 bawr velah chuan Tlani chu a rawn thaw ri hrâwih hrâwih a, Nurse an va ko vat ,a'n en vel chuan a hmel chu a dik ta tlat lo. Rang takin doctor an ko a, Doctor lah chu a duty tih a hre lo nge a rei êm em lehnghal a. Tlani mitmeng leh hmel chu a dik hlawl lo, Zorema pawh a thlaphang tih a lang. Magie lah chuan han tih vak ngaihna a hre si lo. Doctor chu a rawn thleng a, Tlani chu a han bawihsawm a, mahse, a tlai ta a ni maithei. A biak theih loh chhunzawm nghal a, Oxygen an vuah reng nachungin a thaw a zawi tial tial a, a kal a ni ta deuh mai. Zorema chuan a lo melh ngawih ngawih ringawt. A mak êm a ni. Tlani te ang hmeichhe harhvang leh hrisel hmel tak, hetia nat lâwkna êm êm pawh nei lo va a han kal thut mai chu! Nurse te'n a ruang an sawngbawl chhungin Magie chuan Apuia te ho a lo hrilh ve a, Angeli lah chu a hmu ta hauh lo. Khawiah emaw a kal a ni mahna, a ngaihven duh lo. A pa te a va bia a, a tlaivar ve dawn thu a va sawi a, a û awmna an rawn zawt ta ngei a, a pa te rilru hah a hlauh avangin, "Ka bulah a awm e" a ti ta ngawt. A tisual ang em aw a ti rilru naa, a rilru a buai rih êm a ,a ngaihtuah thui vak duh lo. Zorema lah a chiâi vek avangin han biakrawn tlak ni hek lo le, Apuia te ho rawn kal chuan ro an rawn rêl ta ringawt mai a ni. Zorema chhungte pawh an rawn lang ve naa, Chhungkhat an ni tih pawh a hriat loh. Magie chuan a hmaa a lo hriat tawh avangin mak a ti vak lo. Ṭhenkhat ngaihdanah Zorema chu inpui luah tur a ni naa, tunlaiah inpui luah tur e tur lo e sawi theih a ni tawh lo va, a remchan dan angin an in dang zel mai tawh a. Zorema te erawh a remchan vang lam ai mahin an chhungkuaah buaina ril tak a awm vang a ni ve a. 

Zorema leh Tlani te kum khat an inneih hnuah Zorema û Liansanga'n nupui a nei ve leh a, a nupui hi nuthlawi lungfing tak, eizawnna ṭha tak nei sa a ni a. A tlatlum nghal hle. A fate a rawn chhawm lut lo chungin a fate an rawn len chang paw'n zorema fa te ai mahin an lal zawk ṭhin a niawm e. A langa innghirngho êm êm si loin chhungrilah an intai ru tial tial a, Tlani lah nu mawlmang ve tak, ṭawng phawng phawng chi a lo ni ve bawk nen, Liansanga nupui Zuii te chu fin lamah khalh mawlh hek lo, An nu leh pate an inbiak thiam hleih êm êm a. Tlani'n in chhungkhur thil zawng zawng a enkawl a, rawng a bawl bawk a, chuti chung chuan a nu chuan sêlna tur a la hre tho. Zuii erawh a hna kal loh niah pawh a mu der der a, a nu a tlawn thiam si. Tlani dinhmun chu a hniam ta hle a, Hetihlai hian Zorema hi tuna a workshop-ah hian head mechanic-in a la awm ve rih a, an hlawh a la beitham ve si nen, an nupa chu an tla na lo dun khawp mai. Zan khat Aizawl daia motor lian siam turin an hire a, ruahsur karah a va siam a. A va siam chhungin a nu leh Liansanga ten a nupui Tlani chu an lo hnawtchhuak daih mai a lo nia. Tlani chu a pazawnte inah a tlan lut a, Zorema chu a be ta a. Rang taka hawin a thinurna rei tak a lo up tawhte chu sawichhuak ve ta phiar phiarin an inhau ta hrep a, Liansanga nen pawh an insual nghe nghe. An monu Zuii thluak vek a ni ang tih a hrereng a. Zuii pawh a kamkhat ve nghe nghe. Tichuan, loh theih loh avangin in hrang an chang ta a. Zorema te boss hian a khawngaih êm êm a, bakah phai lamah awmhmun bengbel an ngaih tak avangin workshop chu Zorema kuta dah a tum nghe nghe. Mahni ta ni lo enkawl zui chu Zorema chuan a hlawk tak tak lo tih hriain Tlani pazawnte zarah loan a puk ve ta tawp a, workshop chu lei chhawngin, tun dinhmun hi an thleng ve ta chu a nia. An nei lê lû lo naa, chhungkaw hlim tak an ni ṭhin asin mawle. Pathian pawh hian ti nge misualte hi a lak hmasak zawk mai loh le tih mai a awl ṭhin ngawt ang. Mahse, Liansanga te chhungkua chu an hlim zui vak lo, a nupuiin ngaihzawng a neih tak fô vangin, hei hi a ni lawm ni 'Tuhrah' tia an sawi ṭhin kha..

Kan han peng ta duah a, Kan tunlai mo leh a lawina te chungchang ṭhenkhat kan tarlanna ni mai se la. Tichuan, Tlani ruang chu an in lamah phur pheiin Zawmi'n a lo ṭah khum hliam hliam a, a fate lah an la tê si, a û zawk chuan a hrethiam ve deuh tawh nge a lo ṭap ve nasa a, a nau zawk erawh ṭhenawm nula ten an lo paw mu tawh. Tlani hi fing vak lo mah se, a nun a tlawm reuh a, ṭhenawm khawvengte a tlawh peihin chawhmeh eng ilo fahran pawh suah peih deuh mai a ni bawk a, rin ai takin uitu leh sûntu a ngah. Puan pawh dawng hnem tak a ni. An khua aṭangin a tuk lamah an rawn lang ve leh bawk ang a..Zorema a ni khawngaihthlak ta ber chu, upain, "Nupa ṭang ṭhen chu koki lehlam sahthlak ang a ni" an lo ti mathlawn lovin, Zorema chuan a tuar takzet a ni tih a hmelah a lang ngawih ngawih. Hnem tum vak paw'n awmzia a neih rih dawn loh avangin a awm awmin an awmtir rih a. Khuarei te hi a awm tak tak a nih ngai chuan dam ni zawng a la nei ve chêk ang chu maw..

Magie pawh zing dar 3 velah intiharh turin a va chhuak ve a, hmelhriat êm êm a nei lem lo. A zung zo thingpui lumna lam pana a kal mêk lai chuan, "Maggie chu..nichin deuh khan Chanmari-ah ka hmu che sia" a hriat ngai pawh ni lem lo hian a rawn ti a. 

"Ka phirpui a nih dawn chu" a ti sap a. Zonuna û Lucy kha a lo awm hnai remchang kher chu niin, "Tikhan awm lo napui hi a puh ringawt zel..a hmingchhe ve thei lo" ngeiawm zet hian a rawn ti a. A chhang buai duh lo. A lu a hai deuh avangin boruak tharlam dawn tumin a han chhing vang vang a, thâwk a la hawk hawk bawk. 

A banah a rawn vuan chat a, a meng kâwk. "Inbia ang" ti nghutin a kai phei ta dawr dawr a, a chak si, Magie lah a lo meng zawi sa ve deuh nen, a zui ve ta tawp..a car chhungah a nam lut a, amah pawh a rawn ṭhu lut ve nghal. 

Hmalam melh ran chungin, "Mipa min kawpsan emaw ka ti a, i thlalak nen lam ka hmuh avangin" a ti sup a. 

"Chu chauh chu maw i sawi duh..ka kal dawn. Ngawi renga inbansan kha a ṭha zawk" Magie thin rawn ur ṭha leh chuan a ti hmak a, chhuah a tum nghal bawk. A rawn kuah bet vat a, "I laka ka thikthu chhiatzia hi hria la, min namnul hauh lovang" a ti hluk a. 

"Thil hrechiang mang si loin engvangin nge i ngawih hmak reng ni..Angeli thusawi áwih âwm tâwk hi in lo awm a" ngeiawm zetin Magie chuan a ti ve leh a. 

"Ka awih lo alawm, thlalak nen lama an rawn phawrh takah chuan hreh tak chungin ka awih a, mahse, biak che ka la tum tho. Mahse, khami zan la la khan i bialpa hmu tura i chhuah thu Angeli hnen atangin ka dawng leh a, ka mangang sahalin ka rawn pawng zawn tawp che a. Bike-a in inphur lai chiang takin ka rawn hmu ta che u a ni. Angeli anga ngaih tum sateh mah ila; ani chu a rui lutuk a, a chatthla tawh tih ka hre si. Ka rawn umzui ṭêp che u a, mahse, ka chaponain a remti ta lo zawk a nih kha" Malsawmzuala chuan a ti ta hmiah hmiah a. Magie a hrilhhai kher mai. 

"Min hmu a maw? Ka va awih lo tak..ka chhuak hauh lo mai" a ti a. 

"Lo chhuak ta pawh ni la, nizana Angeli emaw tia ka rawn biak che khan mipa dang i kawp lo tih ka hre tawh tho alawm..mahse, kha pa kha a pawimawh viau chu a nia nga tiraw?" A ti leh hram. 

"A tu phiangsen nge maw i sawi ve ziah chu le?" A lo ti hlar a. 

."He pa hi mawle" tih pahin a phone a rawn pe a. A lo en vat. A melh vang vang hnuah a hmaa Angeli te awm ve laia tlangval pahnih rawn kal zinga pakhat, amah nêl deuhtu kha a ni tih a hre thei ta a, a nui hawk ringawt. "A hming pawh ka hre lo, a bike min rawn siamtir a, ta ṭanga inhre ve chauh kan ni" a ti ta a. Malsawma hmel a buai deuh. 

"Chuan, khami zana i chhuahpui kha amah a ni lo i tihna em ni!" Tiin a rawn melh kar a. 

"Khawiahmah ka chhuak lo, Angeli'n i rinna hruai khawloh a tum vangin a daikhalh che a nih zawk kha. I â em ni?" A lo ti let zêk, mahse, Malsawmzuala a lawm tlat lawi si. Hmel hmuh hahdamthlak deuh hian, "Ka lo upa ve ta deuh a, bum ka awlsam ve ta deuh a nih dawn hi..phir in ni tih ka lo theihnghilh ṭhin zauh bawk nen..tun aṭang chuan tuman min bum tawh lo vang" a ti ta fak fak a. Magie a ner nâng ringawt. 

"Min unblock nghal rawh" thupe aw zet hian a rawn ti leh a. 

"Naktuk aṭangin le..zanin chu ka hrem ang che. I ât vangin" a lo tihsan. Duh lutuk hian Magie chu a melh ngawih ngawih a, a lamah kuai hnaiin, "Buaina a tam zel hmain neih che ka duh a ni. Nupui nei lo rual ka ni tawh lo. " A ti ta thlâwt a. 

"Nulat ka la duh, tin, ka la naupang a.." a lo ti sap a. Magie duhna chu a hrethiam tho. 

"A ṭha e. Tun aṭang chuan ka vil rûn tawh dawn che a nia. I nu leh pate pawn hre vek rawh se. Angeli leh i nu vengthâwng tawh suh, ka venghim thei che. A ṭha em?" Magie sam chulsak pahin a ti a. Magie pawh inla ngeng deuh rih mah se, a chhungril a lawm viau. An buaina kha chinfel a ni leh ta mai bawk nen..nia, thil hnawk lutuk kha a nih a ring vak lo sa hrim hrim a. 

An infawh hnuah an pahnihin Zorema te in lam chu an pan dun leh ta a. Magiein engtin nge hetah a awm tih a hriat a zawh khan, "Kan thawhpui nu pa damlo ka zuk tlawh ve a, khulai lawk khu a nia. He tah hian an lo ri mam mam sia, mi ka han zawh khan Zorema nupui boral thu an sawi ta sia, i awm ve ngei ringin ka lo chang ta ngat ngat che a ni. Engkimah min block sia, biak ngaihna che awm hek lo" a ti kha a nia. Inṭhen hlen lo tur na nâ na chu an intawng ve leh mai bawk a. 

Khawvar thlengin Mampuia chuan a awmpui ve a, Inrinni a ni tho a, hnaah a kal dawn bik lo nen. Khawvar chian hnuah an va inthlah ta a. Angeli a call nasa, a tlang thei si lo, tihngaihna awm hek lo le an hawnsan ta ringawt mai a ni. Malsawmzuala sawi ang deuh khan midang mitmei ven vak a tum tawh bik lo. Midang lungawina a zawnsak vanga amahin lo tawrh daih kha a tum tawh bik lo bur. A nu leh Angeli te chuan lo ngaithei lo mai mai teh se. Tumah an lo la tho lo va, Malsawma pawh a lêt nghal. Angeli room a va bih dâk dâk a, a lo mu lo. A pa a thinrim ngei awm si a, nuam a ti vak lo hle mai. Mahse, a thiam loh pawh a ni lo va, a ho êm mai. A chau bawk a, khum a deh rualin a muhil bawrh bawrh mai. 

A harh chuan dar 9 a lo ri vah tawh a. Chhun lamah vuina hunserh te a va hman ve leh hram loh chuan tiin tho lo zetin a tho a. A intifai nghal mawlh mawlh. In hnuai a chhuk dawn lai takin an ri hak mai, a pen rang sawt. Angeli a rawn lut mek a, a pai leh ṭiang ṭiang mai. A pain ben a lo tum a, a nuin a lo dang mek thung. Dikteii pawh a awm ve reng. 

"Malsawmhlu, i zahpuiawm zozai lutuk ta. Vawi tam ka sawi a ni lawm ni? Ti nge a mualpho zawng ngawta i chet a" A pa chuan a ti mawlh mawlh a. Magie a hmuh chuan a nu chuan, "Magie, nang pawh i û enzui tur chein kan chah che a ni lawm ni? Ti nge amaha i awmtir a, i va ngaihsak lo ve.." a lo ti nghal tâwn tâwn a. 

Zaidam takin, "U Tlani a boral mai ta sia, kan buai êm alawm, ani lah biak tlang theih a ni bawk si lo va" a ti a. Angeli a pindan lama kuah chhoh pahin, "I lo awm ve aṭang hian kan chhungkaw boruak hi a rit sawt mai. Eng nge maw a awmzia ni dawn ni?" A ti nghat a. Magie bengah a ring hle thung. Chhan let erawh a tum lo. A chhungril a na nget nget thei. A nu rilru chu hrechiang thawkhat tain a inhria. A pa tal hi a lamah a ṭang thei ang em le? Ni e, a nu pawh dem lohna chen a nei, a tette aṭanga a enkawl loh a hnute tuia a chawm seilen ni ve lo chu chuti maia hmangaih thut a har ve pawh a niang. 

Chaw pawh a ei tlem ngang mai. Tumah a be lo va, tuman an be bik hek lo. A insiam mêk laiin call a dawng a, number ringawt. "Bawihi, i mu mêk em ni?" Patling aw hian a rawn ti a. 

"Mu lo ve, tu nge aw?" A ti satliah a. 

"Akhai! Min va hre lo hma ve..lalzeinu, i duhawm si..zaninah hun chu lo insiam leh rawh aw..kha aia hmun nuamah khan kan kal ang" a rawn ti huah huah a.

"Min hai a niang. Ka pu" a ti chang fak a. 

"Akhai! Engah nge maw ka han hai ang che le aw, nangmah ngeiin i number pawh min pe a ni lawm ni? Room chu ka lo book ang aw, zu pawh a changkang ber chi ka lo chah ang.." A rawn ti leh phei chuan, Magie a sen awp awp tawh. 

"Putar, keimah ka ni lo." A ti vawt raih a. 

Chu tar hurpa lah chu a rawn nui huah huah a. Magie chuan ten hmel zetin a hmet hlum nghal. A û chuan amah angin chet a la ta a ni maw? Umm, a ṭha vek e, Angel, i duh tak tak a ni maw? Zolianthanga hrual fîp tawh, tihduhdahna leh hmuhsitna kara ṭhanglian hmeichhia hi i hneh ngût ang e maw chu le..