Mistake 5

MISTAKE (5)

Ziaktu: Toni Râlte

Magie chu a dang titih, a lai deuh bawk nen. Hmalam bih ngar chungin, "Chutin i ti ngawt thei lo vang" a ti sap a. 

"Kan thei" a beng bulah a rawn ti sup a. A za chuaiin a hria. Harh thut niawm takin, "Kal ang..hawn ka duh" a ti vat a. Malsawmzuala pawh chuan hnialna a nei bik lo nge, an in lam chu an pan dun leh ta a. An in kawt an thleng a, "I lo peng dawn em?" Magie chuan a ti sep. 

"i phal chuan" a lo ti nghut a, Magie a buk nghat danah phalsak a ni tih a lang. Hun dang chu nise an ina luhtir loh hram dan a ngaihtuah ngei awm si a. A u chetdan khan a rilru a tihel chiang ve êm a ni. In chhung an luh chuan Papari leh Asangi te pawh an lo la awm a. ANgeli chuan a nu bulah eng eng emaw a lo sawi mek bawk. An ni pahnih an han hmu thut chu an ngawi ṭhap mai a, Angeli phei chu a ding hluai nghe nghe. Magie erawh chuan zaidam hmel zet hian, "Min hawnsan daih sia, Hei Malsawmzuala hian min rawn thlah ta ringawt a nih hi. A lo awm ve reng a, khalai hmunah khan" a ti lâng lâng a. Angeli hmela huatna lo lang zawk chu a hmuhhmaih lo kher mai. Mahse, a ngaipawimawh duh bik lo. An hawnsan khanglang a nih kha..a nu chuan, "Ti nge hawnsan ngai khawpa i awm reng reng le" a lo ti a. Hrethiam lo zetin a nu chu a va melh a. Angeli'n eng tin emaw a lo sawi tih a hrethiam mai. 

"An zu sehhmeh ka senghawi laiin min tlansan daih a.." namnul zet hian a ti puat a. Malsawmzuala pawh a ṭhu tawh. Papari chuan, "Kha lai hmunah khan i lo awm ve reng a maw? Ti nge i rawn lan duh loh a?" A lo ti hlar a. 

"Rawn lanna chi em ni? Khawtlang hruaitu te in dolet ngam a nia. Magie awm lo phei se chuan Police kutah in awm ran tawh maithei a ni" a lo ti hmiah. Papari a ner vak ringawt. Pi Thani chuan, "Thil awmdan han sawi chiang teh, Magie" tiin Magie a en a. 

Hahdam hmel zeta ṭhu chungin, "Zu an in a, Khawtlang hruaitu ten in lo tur leh hmun danga in turin an rawn ngen a, zawm duh loin an in lui a, Police call an tum takah chuan Car-ah ka hnawhlut ta hlawm a, sawi tawh angin an sehhmeh ka senghawi laiin min tlansan ta daih a nih kha" a ti ta mawlh mawlh a. 

Angeli a ri phat, "A nih loh khaa..i û hi kut min thlak a nih kha, mi zawng zawng hmuh leh hriat laiin, 'Sex video nei tawh i nih kha' te min tia..min timualpho lutuk" a lo ti ta mai a. Magie a hrilhhai letling. Malsawma chuan chhan a ngai tih hriain, "Ka awm ve reng a, chutiang thu Magie'n a sawi awm ka hre hauh lo mai. Angel" tiin Angeli chu a va melh a. 

A nau laka a thikthu kal tluang laklawh tawh bawk si leh tihngaihna hre tawh bawk si lo chu a thinur hlur tawh a, Magie chu seh tum mai hmel a pu hial. Magie pawn a hai hauh lo. A hlau chhete bik lo thung. Papari chuan Angeli awmdan hai hek lo, "Haw ila, Mampui, Asangi nen min thlah haw lawk mai ta che" tiin Malsawmzuala a en a. Magie mitmei avangin Malsawma pawh chu a tho nalh a, "Kal ila ni mai lawm. A nih Magie, kan va haw ang e, lo inenkawlṭha la aw" a ti a. Kawngka bul thlengin Magie chuan a va thlah ve. An tlanliam hnuah Angeli chuan Magie chu a dinchilh sauh sauh a, "Kan zarah hausa nun i tem ve dêk dêk a, i û hi min hnuaichhiah ta mai a ni maw?" A ti ta khar khar mai le..

Magie chuan a û chu melhin, "Ka hnuaichhiahna che sawi tur i hriat chuan sawi rawh." A ti chang ve ta fak mai. 

"Sawtah khan tharum hmangin motorah min nam lut a, min zah lohzia i pholang chiang viau. Chuan, ka bialpa ni mai tur lo thlem kualin kan inah ngei i rawn hruai lut bawk" Angeli chuan a ti ta phiar phiar a. A nu erawh ngawi rengin a lo ṭhu a, a lo thlir reng ringawt. 

Magie chu a khi sak a. "Tihluihna hmangin khatiang khan che ta lo ila; In mualpho dan tur leh Police kutah hial in awm dan tur i hria alawm..a thuhrimin ka pa hming chhala mi dang chaldelh kha a ṭulna ka hre lo, thil mawi a ni hek lo. Malsawmzuala chungchangah erawh amah zawkin min rawn thlah a nih kha..ka sawm lo" a ti a. Dâwt a sawi hlek chu nuam a ti viau lo nain a ṭul tlat a tin ni. 

"Vawikhat mah lo be ve tawh suh ang che. Ka chanpual, ka ta tur a nih hi..ka ta a nih hma loh chuan ka bei zel ang" Angeli'n a tih lai chuan a pa a rawn haw ta a. An ngawi ta. Chhungrilah erawh indona a inṭan chho mêk chu a ni si a. Magie chuan hrehawm a ti ve tho, an mipa duhzawng a lo inang kher kher chu. Chutimaiin Malsawmzuala hi Angeli kutah a hlan thei bik si lo. An zanriah ei pawh ṭawng pawh an ṭawng lo, pa ber chuan boruak a dik chiah lo tih hriain, "Eng nge thleng a? In hawiher a va dik lo hlawm ve" a ti ta nghe nghe a. 

An nuin, "An chau zawi a niang, an va leng kha" a lo tihsak hlauh a. A sawi zui ta bik lo. Eikhama Magie inbual tur a pindana a lut chu Angeli'n a rawn zui lut a, korean product a leisak kha a bawm chawpin a pawm chhuak leh hmiah, "Hmang ve tlak i ni lo" a ti! Magie chuan pawi a ti lo nasa mai. Khatiang tel lo pawh khan a hmelṭha thei tho tih a chiang. Bakah hmelṭhat tehchiam pawh hi eng nge maw a ṭangkaina le? Nunmawi tak leh zahawm tak nei se a tawpna a hlimawm zawk dawn tho tho. A ho êm mai. A mut hmain Mampuia'n a lo call a, "In inbakkaih em?" A rawn ti a. 

"Aih, ka pa a lo haw hlauh a. A tumruh khawp mai, Angeli chu" a ti ve mai a. 

Malsawmzuala chu a nui hak a, "A va â mai mai tak e aw. Ani chu ngaipawimawh rih lo phawt ang. Naktukah hnaah i kal ang tiraw?" A ti a. 

"Aw kal ang" a tih chuan, "I boss ka dil ang a, khawi hmunah emaw kal ang hmiang. Chawlh ka la bawk ang a" a rawn ti a. He pa hian belhchian a duh ve tak takah a ngai thei ta. Hmeichhe dang a hmu zo lo nge amah Magie hi a danglam bik ni ang aw..

"Ka hre lo le, nuam ka ti lo êe" a ti ringawt a. 

"Nuam ti rawh. Engmah a thleng dawn hleinem." A rawn ti dam thlup a. Magie a hneh riau. A kal ta sa sa, a ti ta sa sa a, Angeli chetdanin zir hek lo le, a û chu ngaihpawimawh loh mai a tum ve ta..nge le hmangaihna leh indonaah thiang lo a awm lo an tih kha maw. 

"Aw le..a ṭha lawm" a ti ve ta a. An inmangṭha a. Ani pawn a phone a hmet zui tawh lo. A hlim veng veng mai, Pu zoliana te khan lo hnawtchhuak lo se Mampuia hi a tawng ang em le? Zonuna nen khan inngaizawng lo se, Sairangah khan a kal ang em? Tui kha tla lo se Mampuia nen hian an intawng tho ang em? Vanduainaa kan ruat hi awmze nei veka thlengte pawh a lo nih dawn hi a. 

Tukṭhuan an ei thleng paw'n Angeli a rawn tho lo. A nu chuan, "I û rilru i tina hle a ni. Ngaihdam dil la a ṭha ang, ani hi chu a vei tawh chu thlaksak theih a ni tawh lo va, i thawidam vat a ṭha.." a ti a. A rilru te tein, "Keipawh ka seh tawh ka thlah ngai bik hleinem, i fate inkarah gap awmtir suh" a lo ti ve a. Mahse, "A ni maw? Ka lo ti lutuk deuh a niang, ka han hmu ange" nui sâng chungin a ti a. A nu hi chuan a û zawk a ṭan zel dawn tih a chiang viau tawh. Tetea leh a pa hi chu mipa tih takah engmah an chîk tak tak lo va, an hrethiam ve vak lovang. Angeli pindan kawngka chu a kik kârh karh a, Lut tura sawmna a dawn rualin a hawng a, a lut ta nghal a. Dressing table hmaah thur bâm hian a lo ṭhu a. A tûm bûr bawk. A va kal hnai a, "Ka u,.nimin kha ka lo ti mah mah deuh niin ka hria a, i rilru na tawh lo se ka duh hle mai. " Khuma ṭhut pah chuan a ti a. 

A ngawih vang vang hnuah, "Ka nuin em ni rawn tir che?" A ti ta khauh a. 

"Aw" a lo ti ve hmak. 

Magie lam rawn hawiin, "Magie, ka no tiraw? Ka â ngawt mai. Û zawk mah ni ila, duatsual ka nihna hi a lang leh thin a. Min hrethiam zawk teh" a ti ta mawlh mawlh a. Magie pawn hrethiam takin, "I zia ka hria a, a mak hran hleinem. I la naupangchhia ve bawk nen, chuan intifai la, chaw ei la, class kal rawh aw" a ti seuh seuh a. Mak deuh chu phir an nih vang nge eng emaw chang chuan han haw dawnin han ngei viau dawn ṭhin mah se; Angeli inthiam lo hmel emaw hrehawm ti hmel a hmuh chuan a nem leh zel, phir hi chu pumkhat ang an ni ve miau a, a demawm lem loh. Lehlamah Angeli hian a lakah rilru chhia a pu bikin a hre lo, a mipa duhzawng laka a huamhap vangah a ngai. An inkara ding mipa hi mualphopui tlak khawp mipa a ni ve miau si a. 

Ani pawh a insiam nghal mawlh mawlh a, Mampuia nen an chhuah daih dawn vangin inthlakna tur thawmhnaw a keng ru ṭât a, a kal dawn chuan Angeli pawn tukthuan a ei ve mek. An in bye bye a, an workshop lam a pan ta vang vang a. Inrinni an ban tawh hnua an lo dah Bike pakhat chu a bitum leh ta chat a, Engine oil leak a khawih mêk laiin Malsawmzuala a rawn lang ta luah mai. Zorema bula va kal nghalin a va be sur sur a, eng nge an sawi a va hre ve lem lo naa ama chungchang bak a nih a ring lo. 5 mins velah Zorema chuan a rawn ko ta a, a thil siam lai a laklawh deuh vangin a phei lawk lo, a siam zawh fel hnuah a va phei ta vat a. 

"Vawiin chu hei i hun a rawn dil tlat si che a. I kal poh a niang chu..len khawthawn te pawh i mamawh ve alawm.." a lo ti mial mial a, a lawm ru viau nain a langah chuan," In buai viau ang em? " A ti khawmawi ve a. 

"Buai êm êm lovang, 2 wheel lam kha chu kan lo khawih lo tawp mai dawn nia, an hmanhmawh chuang lo bawk a" Zorema chuan a ti a. Magie pawh an workshop hnung lama pindan tepenah chuan va lutin a thawmhnaw a va thlak a, a lo la inkhawih bal hman lutuk lo bawk a. Hmuh a hahdam hle. Apuia te hoin an lo fiam sap sap a, a zak duh bik lo. Tichuan, Malsawmzuala car lam pandunin, Reiek lamah an tlan ta vang vang a. Magie kal vawikhatna a niawm e. Kawng a ṭha tawh bawk a, kar loah an thleng phei ta a. Ni a la sat deuh avangin a reiek tlang taka kal loin park lamah an peng ta zawk a. Tlawh ve dang pawh an lo awm nual. An han inpark fel a, an lut chho ve ta a. A dai riai mai a, boruak a nuam hle. Zo khua lamah an phei a, mi an tam vak loa an hriat vang a ni. Malsawmzuala chuan a rawn kai a, a kut chu a lum thar thar mai. Magie pawn a thingthla phal bik lo. In tawp ber sumhmunah chuan an ṭhu dun ta a. Thlifim a thaw heuh heuh mai.

"I ril a ṭam em?" Tih pahin Mampuia chuan eitur a phawrh a, a lo inlei lawksa vek a nih hmel. A tuihnai êm êm lehnghal. Beer cane 2 a tel ve ṭât bawk. A hawng a, "I duh ve em?" A ti leh sup, a lu a lo thing a. "Ka ring renga, a ṭha.." tih leh coke phawrh a rual a. Magie chu a pe ta a. 

"I chanchin ka hre châk , i phal chin chin min hrilh la ka duh a ni" a ti ta a. Magie chuan a tette atanga a vawiin hun thleng a han ngaihtuah a, sawi chhawn leh pawh zahthlak khawpa nunhlui hrehawm nei a ni. Mahse, nakin zelah pawh eng emaw a la thlen a hlauh avangin Malsawmzuala chu a chhungkaw hmasa te kara a seilen dan a hrilh ta mial mial a. Zonuna chungchang erawh a sawi lo. Sawi kher ṭula a hriat loh vang a ni. Ngun takin a lo ngaithla a, a bu leh nghut ṭhin. A chang leh Magie chu ngaihsan leh chhuan hmel takin a lo en a, a chang leh lainat hmel takin..a sawi zawh meuh chuan a dang a ro hial mai. 

Malsawmzuala pawh chuan a eizawnna te, an chhungkaw chungchang leh a rawlthar chhuah atanga a tlangval tak tak hnu thlenga a hun hman dan te a sawi ve a, Magie pawn ngaihnawm a ti khawp mai. 

"Englo, sawi nuam chu a ni lo maithei a, mahse, i nau nupui neih tur vel kha in ṭhulh ta sia, engtin nge ni ta zel?" Inthlahrun hmel tak hian a ti a. 

"E..kha kha maw..nia, Rinawmi khan a inzep zo ta lo va, a chhungte chuan an lo hriatpui vek tawh a, an lo thup pui mai mai zawk a lo nia. Ka pa lung a awi lo riau a, kan ṭhulh ta a nih kha. Zorina ka khawngaih khawp mai" a ti ve luam a. 

"Hmeichhe fel deuh tawng se" Magie chuan a lo ti ve a. 

"A tawng leh mai ang, ani chu ka tluk lo lutuk. A puitling zawk kei aiin" Mampuia'n a lo ti ve a. 

Inngheng riala ṭhu reng ta na nâ na chu Mampuia chuan a fâwp châk si, an chhakah mi an awm ve bawk si nen, a beng bulah, "Ka fâwp dawn che" a ti sup a, Magie inrin hma hmain a lamah a kuai hnai a, a fâwp zauh. A rei lem lo bawk a, magie pawn a ngai haw lem lo. Thâwk la hawkin, "Angeli ka ngaihtuah a ni. Buaina eng emaw tak hi ka la hmachhawn dawn tlata hriatna ka nei a ni" a hma lam thlir pahin a ti sap a. 

"Thil i ngaihtuah tam lutuk a, i buai a nih kha. A nih angin awmtir ve mai mai rawh. Angeli chuan pawm hun a la nei êm êm ang" Mampuia chuan a ti dam thlup a. Magie pawh a zia deuh hawk. Kamtu erawh a la nei tho. 

"Eheu! Magie chu, hetah tehdaih" rawn titu aw a hriat rual chuan Magie chu a insangmar nghal zawt. Zonuna bawk a ni. He pa hi hmuh fô a duh lo asin le. Hmeichhe dang dang lah hi a kalpui a, a luck viau a ni ngei ang. 

"Nia, hei ka leng ve nih hi" Magie chuan a ti ve mai a. Rawn kal hnaiin, "I len duhna hmunte pawh a dang ta hle mai a, he pa hi i bialpa em ni?" Thawven hmel zet hian a ti leh a  

"Aw a nih hi" Magie aw chu a fiah kêk kâwk hle. 

Zonuna hmel chu a hnual deuh a, mahse, inlak eng emaw tum zet hian, "Wow! I pa rual zet tur a nih hi mawle, gold digger han tih dawn chein ani hi a hausa awm bawk si lo, in inhmeh hnek hnek hle mai" a ti leh phar phar a. 

Magie lah lo duai lo, "I nula hruaite khan an dig kang tawh che hial lo maw? Dig tur i awm tak loh vang em ni? Hmeichhe hrang hrang i kawp kual tak" a ti ve ngat. Zonuna hruai hmeichhia chu a meng kal râlh râlh a, engmah chu a sawi chuang lo. Zonuna chuan thinrim hmel lek lek hian, "Ka hmeichhe kawpte chungchangah sawi tur i nei lo, ngawi mai mai teh, nang michhe fa" a ti hlur a. 

Magie a nui hak, "Chu! Kan indraw, ka mipa kawp chungchangah lo buai ve vak duh tawh lo mai rawh aw. I hmeichhia ka ni ve lo tlat, mi hlawhchhampa" a ti ve ngat. Zonuna hmai chu a sen ṭul tawh a, Mampuia erawh chuan ngawi rengin a lo thlir reng ringawt. 

"Kha pa kha eng nge a nih a? Chuti taka i duha i zui duan duan tak?" Zonuna awki chu a sang lam hret a ni. 

"Ele! Ka bialpa..ka bialpa nen te chuan kan inzui ve bawk ang chu" a lo ti mai si. Magie a nui sâng reng leh a thinrim ve duh miah lo chuan a run zual a niang, "Video i siampui leh dawn em?" A ti a. 

"Inneih zanah te chuan siampui ve mahna" a lo ti leh tawp. Zonuna ṭawng leh hma chiahin Malsawmzuala a rawn ding chhuak a, "Meg, kal teh ang, a bengchheng lêng lûng êm mai.." tih leh Magie kaih a rual a, an kalsan ta daih. Zonuna hrilhhai thinrim bawk si chuan thingkungte chu a hnek nghek nghek ringawt. Eng dang a ni lo, Magie laka a hlawhchham kha paidam harsa a la ti êm a ni. Ani Magie lahin engah teh vak a ngai tawh bawk si lo. Nun hi chu aw..

Khua a tlai tak tak hmain an hawng ta a. Kawngah an titi ve nasa . An kum inthlau viau mah se; Mampuia hi a â lo bawk a, a kum mil tawka Magie kawm chu a thiam riau. 

"Inah chuan rawn leng lo la ka duh, buaina tichhuaktu nih ka duh lo. Angeli bulah ka chungchang sawi pawh a ngai lo. Tihian awm ve tawp rih ang, mipa a duh deuh a la tawng mai ang" tih chu Magie thuchah a ni. Mampuia pawn Magie tan buaina siamsak a duh bik lo va, bakah an ina va len kha a nuam tehchiam lo. Angeli zawkin a lo dawngsawng daih si a. Workshop an thleng a, zan lama inbe tura intiam chungin an in vailiam ta. Zorema ten an lo zawt ve sap sap a, hre tura a duh chin a hrilh ve hlawm bawk. Apuia chuan, "Mi ṭha tak niin ka hria, a dam thlup mai a. Mahse, Meg, fimkhur la, veng uluk hle rawh. A hmel kha hmeichhe ho duh chi a nia..tunlaiah hmeichhia pawh hi zaktheilo tak tak an tam tawh a nia, an chhuhsak daih mai ang che" tiin a fuih ve sauh sauh a. Magie pawn dik a ti hle. 

Sangteii a call a, ani hi kan sawi lang khât tak naa, Magie nen hian zantin an la inbe ziah ṭhin a, an chanchin engkim a hrilh hriatna ber, a thurûk leh ngaihzawng thlenga a hrilh ve awmchhun a la ni reng. Tuna a call chhan pawh Mampuia khan a nau Zorina te inneih an ṭhulh tak avang khan an inneih ni-ah khan Zorina tan liau liau chhungkaw picnic an huaihawt dawn a, ṭhiante erawh sawm ve an phal a, tel ve tura a sawm vang a ni. Sangteii bak kalpui tura duh a nei si lo va, a va be lâwk sa duh a ni. Sangteii pawh a lo phur viau mai a, kal ngei tura inchahin an titawp ta rih. 

In lam pana a inkhalh haw kawngah Hluteii, Pu Zoliana fanu leh tlangval cher lam, ruih nei niawm tak inzui hi a va hmu fuh a, Hluteii pawh a inchei parh viau. In a chhuahsan aṭanga a hmuh leh hmasakna ber a niawm e. An rawn hmu ve lo bawk a, a tlanpel ta mai. A nu kha engtin tak la awm zel ang maw? Nu nêp leh derthâwng lutukin pasal vaupung nâ leh kutram tak a nei hi a mak ngawt mai. Lehlamah innei tur rêng niawm tak pawh an ni ve. Nu huaisar leh pasalte chhang ve ngam han ni na se zawng, hmel a lawi pawh a nei tawhin a ring lo. In a thlen chuan Angeli pawh a lo haw ve tawh a, a mood pawh zing lam ai chuan a zia ta deuh e. Zanriah an kil laiin Mali chuan a pi melhin, "Pi, ka nau workshop-a thawk kha a damlo va, tunah Civil Hospital, Lungleiah a awm mek a, awmpuitu a nei si lo va, rem in tih chuan ka va phei lawk dawn mawni le ka tia" a ti ta mawlh mawlh a. 

A pi chuan, "A va zia lo ve aw, i awm loh hi chuan kan chhungbuai zel tawh ṭhin si a, ka va hrethiam lo ve mawle" a ti a. 

A pu erawh chuan, "Chutiang dam lohna te chu kal loh chi a nih loh chu, va kal rawh. Ngaihṭha deuhin va awmpui rawh, helam chu Angeli leh Magie te pawh an awm alawm" a lo ti zung zung a. Mali a lawm hle. A pu remtihna ber a la tawh bawk a, chaw eikhama a intihfel zawhah a insiam ta sawk sawk a. A tuk zing sumo-a chhuah a tum a ni. Magie chuan In chhung chet leh eirawngbawl chu a kut a ni tih a hai lo, Angeli chuan engmah a thiam dawn lo tih pawh a chiang hle. A huphurh lem lo, a lo tihṭhan tawh kha a ni bawk a. Zanah a thawmhnaw ṭhenkhat a thlehfel laiin Angeli a rawn lut a, khumah a ṭhu hnawk. A chauh hmel angreng. 

"I va chauh hmel ve" a nau pawh chuan a lo ti a. 

"Ka rilru a nâ, enteh, Meg, Malsawmzuala khan nupui hual a lo nei reng alawm. Papari'n a sawi a. Amah Papari paw'n a hriatna a la rei bik lo" a ti ta mai a. Magie chu a barakhaih ve deuh. 

Inthunun vatin, "A ni maw?! Tu nge niang le? " A lo ti ve vat a. 

"Kan MLA Pu Bualkunga fanu an tia, hmuh pawh ka la hmu ve lo. Ka thîk lutuk,. Zorina te an inneih tak si loah chuan an innei maithei, kuminah an tia" a ti leh bawrh bawrh a. Magie chuan thang a ni thei tih hriain fimkhur takin, " A ni maithei, bakah amah hi a upa ve tawh a ni lawm ni? Ka hrechiang ve vak lo a.." a ti ta ringawt a. 

"Papari aṭang vekin ka hria a, kei pawh. An hausa a, amah hi MZU-ah a thawk a, hmeichhia chu a duh leh duh loh an ni mai. Tin, A nu leh pate hi mi kherkhiap ve tak, hmeichhe satliah leh eizawnna ṭha tawk tak nei lo chu hnawl zel mi an nia, Rinawmi Zorina nupui tur pawh kha a tirah an duh vak lo, ani te phei kha chu High School teacher a ni a nia, zirtirtu hna te chu hna zahawm a tling ve a nia. An mit a sang lutuk a ti Papari'n " a ti leh bawrh bawrh a. Chu thu erawh chuan Magie a ti nghing deuh. A nihna leh eizawnna a hai si lo. 

"Fate nupui pasal tura mit lo tihsan ve vak pawh chu" a ti niah niah a. 

."Nia, ka ngei. Mahse, ka beidawng dawn chuang lo, an inneih hma chuan ka kherh zel tho vang" a ti leh tân tân a. Magie tan a nuam lo thin teh e. Angeli hian Mampuia hi lo hmu hmasain lo duh hmasa nise chuan a kian thei mahna. Mahse, Angeli hriat aia hmasain a lo hriain a lakah feelings a lo nei hmasa zawk miau a, chutimaia awlsama a duhzawng ve liau liau ken chu a thei bik hlawl lo a ni. Bakah kian tehreng pawh nise, Amah Malsawmzuala'n eng atanmah a lo tih loh chuan nâ an insiamsak tawn mai mai dawn tlat! 

Angeli chhuah hnu lawkah Mampuia chuan a rawn call a, Magie hian an inngaihzawn aṭangin vawikhatmah a la ko lo. Mahse, " Nupui hual i neih thute ka lo hria a, Sawmzual" a ti chang ta fak a. Lehlam ami a nui hak, "Angeli sawi a nih ka'n ring ngawt a" satliah zetin a rawn ti a. 

"A sawitu lam a pawimawh lo, thudik a ni em tih a pawimawh zawk" thutak fahranin a lo ti a. 

"Thudik ni ta se, engvangin nge ka nau aia nupui ka neih hmasak zawk loh ang?" A rawn tih chuan Magie pawh a thaw huai mai. A tir aṭang khan a ring vak lo sa ve hrim hrim bawk a. 

Eng em em an sawi lo,. Inngaizawngah pawh reitak inzui tawh ang maiin ṭhian ang maiin an inkawm a, an inpawh bakah engkim an duhzawng leh ngaihdan a lo inrem thlap zel chu a mak ngawt mai. Mampuia chhungte chungchang erawh hmaichhana sawi atan a khêk a, Phone kaltlanga thu pawimawh sawi hi uiawm a ti deuh tlat. 

Angeli erawh zing dar 1-ah pawh a la khi var var reng mai. Papari nen an plan chu a kal dik ngei a beisei tlat a ni. Papari nen hian college aṭang chauha inkawm ṭan an ni naa, an mizia a lo inan fuh êm vang nge ṭhianṭha ber anga inchhal tawnin tihian an la inzui ta ngat ngat a. Papari nen an inkawm nasat nen, a cousin Malsawmzuala a hmu ve lâwk lo leh a hre ve lo chu mak a ti fô..lehlamah Papari sawi dan takah Malsawmzuala hi chu a danglam bik a, chhungte han tlawh kuala han pawh vel hi a tih ngai loh a ni a, "Thisena inzawm inlaichinna chu tihthara tihnun fô a ngai lo. A hunah a rawn lang mai" tih ngaihdan nei tlut mi a ni roh a. Chuvangin Papari te inah pawh a ṭul tawpah lo chuan a chuangkai zen lo. Amah Papari lahin bialnu a neih lai a nih avangin a ṭhiante bulah a lo sawi ngai bik lo bawk nen..Angeli chuan a tlai ta deuh niin a inhria. Mahse, a nau laka a mipa duhzawng hloh chu tlawmna tawpkhawkah a ngai a, Mampuia a duh ngawih ngawih vang lam ai mahin rethei taka lo seilian, an inhmuhchhuah vanga an chhungkaw mi leh sa lo ni ta Magie laka tlawm a hrehna zawk hian a tum a tiruh ni maiin a lang. A nunhluia a thil lo tih tawhte a hrechang tawh lo va, Magie pawh a duh a nih chuan kei a phirpui hi hmelṭha min ti ve tho tihna a nia, ka mizia lah mipain duhawm an ti thei si, ka nau ai hian min duh zawk ngei ngei ang tih ngaihdan a nei tlat a ni. Malsawmzuala hian hmel aiin chhungril nun a ngaipawimawh zawk tih a hre lo va, a vannei nge vanduai zawk ni dawn ni. 

Magie chu zing tawkah thoin Mali pawh a thlahliam hman thlap. Tichuan, Mali ai chu a awh ta a, eirawngbawl pahin in chhung a tifai a, a bâl lem lo bawk a, tihfai tur a tam hran lo. A nu a rawn tho a, "I û zawng phût mah ila, engmah a thiam leh awm si lo, i lo awm chu ka va lawm tak" a ti ve suam suam a. Angeli pawh nidang aia hmain a rawn tho, mut erawh a kham lo hle. A nuin a rawn kaihthawh sek vanga tho a ni. Tukthuan an ei a, Magie eisiam chu tui an ti tlâng hle, Tetea phei chuan, "U Magie, i hna bansan la, Apa hi inpuihtir la, Restaurant siam daih rawh. I siam tui êm mai" a tih ve hial kha. Mahse, sawi tawh angin a tuina ber a ni tlat lo a ni. Eina zawng zawng a tihfel leh vek hnuah a insiam ta chauh a. Nidang ai chuan a thleng tlai ta deuh. Nilêngin hnaah a bur ngar ngar a, nitin hi a tan inzirna zel a ni bawk a, engmah lo maiah a chantir ngai lo. Motor lian lam pawh la khawih theih ngei a tum tlat a ni. Chhun chawlh laiin Angeli leh Papari te an rawn kal hlawl mai. Inang an ti khawp mai a, an entawn sek mai. 

"Teh hlawl che u chuan, eng nge in rawn tih dawn?" Magie chuan a lo ti sawk sawk a. 

Angeli chuan, "Papari scooty khu a ri nasa lutuk a, a englai nge kan hre si lo va. " A ti a. An aw thlenga a inang chu mak an ti viau. Thil a ei sawk sawk a, Papari scooty chu a ensak ta a, a siamsak mek laiin a bula ṭhu chungin a hriat phak ngei turin Malsawmzuala chanchin an sawi dun a. 

Papari chuan, "Nizana ka biak kha chuan , 'Ka duh lo pawh a ni lo, mahse, ka laklawh rih êm a..' a tia. Nang pawh dawhthei ve deuh la maw" a han ti vel a. 

"Nia, tunah phei chuan ka biak hmasak a ngai tawh lo, amah zawkin min rawn be zel tawh" Angeli chuan a ti ve niah niah a. Magie chu a rukin a nui. A awih lo lutuk tlat a ni. 

"Chuan, kartawpah an inah chaw kan eikhawm dawn a, i lo kal ve a ngaih kha aw. Ṭhiante sawm an phal a. Awii, nuam dawn turu" Papari lah chuan a ti ham ham a. 

"Kha chu chiangsa..kawr thar ka neih leh a ngai a nih chu, mahse, maw ka nu pawh hian a ngaina ve a niang, amah vang a nih chuan engmah ui a nei miah lo mawle" Angeli pawh chuan a ti lâwng lâwng a. A siam zo ta. "Ka zo e " a ti lauh a. 

Chutihlai tak chuan tlangval pahnih chhe vak lo hi an rawn lang ve chiah a, Magie biak an tum lai takin Angeli chuan, "Tlaiah i haw hma a ngai aw. Eirawngbawl i ngai. " A rawn ti deuh fak a, Magie pawh a hamhaih deuh, Tlangval pakhat chuan, "Magie, ka ṭhianpa ka rawn kalpui ve, i khawih kher ka duhpui ve sia" nui sâng chung hian a lo ti a. Angeli zawk a meng rum daih. A nau hi amah aiin a luck tur a ni lo tih a rilruah a rawn lang leh a. Chung tlangval pahnih lah chu an la upat loh bakah an changkang ru riau a, Angeli chuan lansarh tum takin, "Ka nau hi chu a thiam a nia. Ka train chhuah ngat a nih hi..lo pan zel rawh u..chuan, Meg, ka sawi kha..tlaiah i hawn hmaa ka eitur i buatsaih a ngai. A chiang em?" A ti leh nghat a. Magie nuih a lo za, mahse, insûm chungin, "Ka hria e" a ti thei hram. 

Tlangvala pawh chuan Magie nuih insûm chu a hrethiam nge, "I nau hi ka star tawp..kan ṭhianho crush a nih hi" a lo ti ve hmiah mai bawk a. Angeli a meng tâl tawp tawp a ni ber. Magie a kal tak daih avangin han inhrikthlak vak dan tur a hre tawh bawk si lo. Tum bûrin an kal ta a. 

Angeli mize diktak chu Magie chuan a hrechiang chho ta telh telh mai. A sual vang erawh a ni hran lo tih a hria. Kha chen an lo mal khalh tawh a, duat chikimin an duat a, tihsual nei ve thei lo khawpin an siam a nih kha. Tunah elpui tur Magie a nei ta a, Magie lah an rin aiin thil a lo titheiin a mizia lah a lo ngeng ve ngalh bawk si, amah aia ngaihsak leh ngaihven a hlawh khan Angeli rilru a na ta ṭhin a, thikthu vangin a phirpui ngei pawh a ngeih hleithei ta lo chu a nih hi..a bul ber erawh Malsawmzuala vang a ni. Ani hi awm ta lo se phir unau inngaina leh inhmangaih tak an nih dawn vei nen..Angeli hian a duh duh dana Magie a thunun theih loh vangin Magie hi a ngaithei lo pakhat bawk. Ni e, Magie zawng hruihrual leh tairawtiang hmanga hrual fîp tawh, Kum 19 mi lek ni chunga mahnia tla hranga Hmeichhe thawh tur pawha an ngaih loh mechanic kha a ni miau a, hmeichhe naran zawng a ni mawlh lo a ni. Hetia han en mai chuan derthawng leh nunnêm tak, mi pawisawi lo, duh duha hruai kual theih mizia nei angin a lang a. A belchiangtu te mak tih tur khawpa mihring sak leh vawt a lo ni daih thung si. A seilennain a zir loh miau avangin a dawhtheihna a zawh chinah kut thawh mai a pawisa lo va, kut a thawh vek vek chuan hmana a u pasal bialnu emaw titu pawh a rehhlum ṭêp nghe nghe kha..khatiang hmeichhia kha Angeli chu a ni ve leh si lo thung. A langah chuan hmeichhe paurau, hlauh nei lo, vaupung tina tak, mi hmai eng zah lo chu a ni nameuh mai. A tak tak chinah erawh dâwihzepna riau nei, no tak, tuidul tak a ni lawi a! Mi dang zawng aia lansarh te, a ṭha zawng emaw chhe zawng emawa mite ai bak nih hi nuam a ti bawk. A nun khua a har ru êm êm bawk. "A ho êm mai" tia an sawi dan han palliam chang nei mah se: a muthmuna a ngaihtuah tam zawk a ni tho tho. Mi chak nih a duh a, chak tura kawng zawh ngai a pehhel tlat lawi si a ni. 

Magie chu khaw thim dawnah in a thleng chauh, a û thusawi kha a ngaipawimawh tehchiam lo a nih hmel. Angeli pawh a lo la haw chuang bik lo va, a nuin rawng a lo bawl a, bawl vak a ngai lo hrim hrim bawk nen, Magie pawh a inbual sawk sawk a. A nu a zu pui ve ta vat a. A nu chuan, "Mali hi engtia rei nge a thang dawn kan hre si lo va, lânga kal awmpui hi kan be rih mai dawn em mawni le" a ti niah niah a. An inhuam phawt chuan pawi tihna a nei lem lo. An haw tlai thei hlawm angreng si a. 

"Biak tur in hriat chuan a ṭha reng alawm" a ti ve a. 

"Ka thawhpuinu hian a hria ang, zanah ka lo be dawn nia..e chuan, Magie, Malsawmzuala nen khan inzawmna in nei em? Thudik tak min hrilh la aw" nelawm taka a fanu melh chungin a ti ta a. A nu melh let ve ranin, "Kan inṭhian a..a bak a awm lo" a ti sap. A nu hi Angeli lamṭang tih a hriatchian êm vanga dâwt sawi ta mai a ni. 

A nu hmel chu a hlim sawt mai. "A ṭhat chu, i û hian a atchilh bur mai si a, ka hriat theih chinah tun hi mipa laka a buai ve awmchhun a ni hial ang" a ti mawlh mawlh a. A chhang tawh lo. Hunin an awmdan tur chu a hril mai a niang chu. Angeli a rawn haw thei miah lo mai, an call a la thei bawk si lo. A nu chu a mangang ṭan ta deuh nge, a ṭhiante ho a va be kual a, an lo hre bawk si lo. Angeli lah chuan a phone a off hmiah tawh bawk si. 

Zan dar 9 a ri ṭêp tihin Magie chuan Malsawmzuala call a dawng ta a, a la vat. 

"I û hi ka rawn hruai haw dawn e" a rawn ti a. A dah lehnghal. A nute bulah a sawi ta vat a. Mampuia ber kherin a rawn hruai tur chu mak a ti deuh, eng tak thleng ang maw..darkar chanve hnu velah an thawm an hre ta a, an va chhuak vat. Malsawmzuala chuan a rawn pawm phei a, Angeli chu a chatthla tih a lang. Sofaah chuan an han mut a, Pu Ruata chuan, "I tilawmawm hle mai. Kan fanu hi zawng hetiang hi a nia..a buaithlak a nih hi maw..engti tiha lo hruai haw thei nge i nih le?" A ti a. Mampuia pawh chu a ṭhu ve a. 

"Chawhnuah khan kan ṭhianpa nupui neih lawmna kan ṭhianho hmingin kan nei a, Ralte villaah sawn, an ni hi Papari te ho nen an lo kal ve chu niin, duh aii zu a in tam deuh a, chaw pawh a ei ta loin ka hria. Papari nen cottage book sak ka tum laiin an duh bawk si lo va. Thlah haw an duh tlat a, ka rawn thlah haw ta mai a ni. Programme pawh a la zo lo a, ka lêt lehnghal mai ang. Kei pawh. A harh veleh chaw lo eitir rawh u, a chau lutuk ang e" a ti zung zung a, a ding nghal hluai bawk. Magie chu vawikhatmah a melh lo va, a be hek lo. A awmdan chu mak a tiin a hrethiam lo takzet a ni. 

A nu chuan a motor thleng a va thlah a, chak zetin a tlan chhuak nghal. Magie a lawm lo ta hle, a û lah chu a rûm ṭiah ṭiah reng a. A lute an han tihhuhsak a, a rawn harh chho ṭan ve deuh. A nuin chaw ei a siamsak a, mahse, "Ka ei peih lo" a ti tlat. Magie chuan a pindan lamah a kuah chho ta a, a mut ṭhattir vek a, puan pawh a sintir thlap. Magie kalsawn dawn lai tak chuan, Angeli chuan aw fiah fai tak hian, "Meg, ka lawmzia hi, ka ta a ni tawh. Malsawmzuala nen kan ni tawh" a rawn ti ta a. A ding chawt. Mahse, a insehruh a, muangchanga hawilêtin a nui sâng a, "Tak tak em ni? Ka va lawmpui che ve" a ti sap a. 

"Ka theihtawp ka chhuah dawn ka tih kha..mipa ka mutpui tawhah a la zei ber awm e..ka hlim lutuk, khawvelah ka hlim ber ang" tiin a tal ar ar a. Magie chuan, thinlung na ngawih ngawih chungin, "Ka hlimpui a che. Tui deuhin muhil rawh aw".tiin a nuih sak a. A pindan lam a pan ta. 

Magie chhuah rual rualin Angeli chuan a phone a hmet a, Malsawmzuala a call nghal. 

Mampuia aw-in, "Hello" a rawn tih rual chuan, "Tunah khan in a chhuahsan chiah, call mah la a pick up ka ring lo. Phatsan mai mai tur atan chuan i uiawm asin mawle"..a ti no ngher ngher a..

Malsawmzuala erawh chuan a steering a chum bur.." Margareth, min fiam ve a maw? Angeli thangkam mai mai nise ka duh laiin hetiang hian min kalpah a maw? Ngawi tak rawh..i bialpa lu kha ka la dawn" a ti ta chher chher mai le..