Mistake 4

MISTAKE (4)

Ziaktu : Toni Rálte

In an thlen chuan ngawi rengin an pindanah ve ve an lut a, ngaihtuahna an kawm mawlh mawlh a ni ber e. Magie chuan Malsawmzuala hmel kha a mitthla a, a ngaihven dante kha a'n ngaihtuah chian chuan an rilru hi a lo inang ve reng em ni ang le tih te chu a ngaihtuahna a ni. Mahse, beisei phak rual niin a inhre lo. Pu Zoliana vanga a chhawm mahni insitna a neih tlat hi tihbo thei nise a duh takzet a ni. Angeli anga confi taka midang hmachhawn ve a chak. Angeli a ngaihtuah rual chuan Malsawmzuala a en dan kha a hrechhuak nghal. A u hian a duh tih a hai miah lo. Kherh thluk kha a tum ruh nasa si a, a thaw a ipik tlat..chet lak ve dan tur a hre bawk si lo. Angeli nen an inkawp a nih chuan a na viau ang le..

Zingah a harh hma bawk a, Mali a pui ve leh. Angeli erawh tlai tawkah a rawn tho ve chhar chhar a. Class an kal dawn lo a nih hmel. Tetea erawh a insiam mawlh mawlh a, Magie hi a la be pawh lutuk ngam lo nge a la zak ve deuh ni, an in be em em lo. Tukthuan an kil laiin Angeli chuan, "Kha pa kha a number ka neih ngei a ngai a ni. Meg, min puih a ngai ang" a ti a. Magie a lo hawihai nasa. A nu chuan, "A tu leh ngawt ngawt chu maw?" A lo ti vat a. 

"Malsawmzuala a nia, a hmelṭhatna kha chu thuhran, ka mipa duhzawng ber chiin a khawsa a ni" a ti hmiah mai. A pa erawh chuan, "A duh ve dawn ngawt che mawni le?" A lo ti a. 

"I fanu hi tuman an hnar thei tak tak lo aw" nui har har chunga a tih chuan, Magie thinlung a na zawk zawk thei. A hlauh ruk ang ngeiin a u nen an mipa duhzawng a inang ta ngei e. A tan chuan kawng a ping ta hle mai. Mahse, chutimaia tlawm chu a tum bik lo. Malsawmzuala'n a melh dan leh a treat dante a hai bik lo bawk a. A u pawh chu a chhang tawh lem lo, A pain thudang a rawn sawi daih bawk nen..a insiam nghal mawlh mawlh a. Tiffin a pai mai zel tawh a, a zia viau. A hlawh pawh a khawl hnem ve thei tawh ang chu. Traffic jam-ah tang hlek hlek mah se; a hunah chuan a thleng hman hram e . Apuia a rawn kal si lo va, an indaih lo ngei mai. Magie pawh awl lai a nei hleithei meuh lo. Scooty ke a thlak lai chuan, "Magie" a rawn ti thum leh ta chhak mai. A inher zawk a, tun ṭum chu hmeichhia nen an ni tlat! Chu chuan Magie a tihnual deuh, mahse, a va nuih ve sak tho a. 

"I buai hle mai a.." a rawn ti a. 

"Buai ve angreng, vawiin chu, khawiah nge in kal dawn?" A lo ti khawmawi ve a. 

"Hei ka nau hi ka thlah dawn a. Bawihi, hei Magie chu" tiin a bula ding nula hmelṭha zet chu a melh a. Chu nula chu a nui sàng a, A u nen pawh chuan an inang deuh. A kut a rawn pharchhuak a, "Ka hmu che chu ka lawm hle mai" a ti sap a. Magie pawn a lo vuan ve vat. A tira a lo hnual rukna kha a kiang duak duak mai. An kal dawn chuan Malsawmzuala chu rawn kal hnaiin a beng bulah, "Zanah ka rawn leng dawn" a ti sup a. Magie chhan let hmain a kal daih! A lungphu chu a inthum rawn nghal tluk tluk mai. Nilengin a mood a ṭha. Hah pawh a hre ṭhak lo. Amah pawn mak a inti. Tlaiah pheikhai zang vahin a haw a. Angeli leh a nu pawh an lo awm tawh. A pa erawh hna thilah a zin thut a niawm e. 

Inchei tia sawi theih si loh, inchei lo ni chiah si loin a inthuam a. A rilru tibuaitu erawh a awm..Angeli..Malsawmzuala a rawn kal a nih chuan ama inleng emaw a ti maithei. A tan lo ṭhut ve reng kha a nuam chiah lo vang. Angeli'n boruak a ngam si a. Mahse, han hmachhawn zel phawt teh se. Dar 8 a la ri lo deuh tihin door bell a ri ta tlang tlang a, Mali'n a va hawnsak. Malsawmzuala ngei chu a rawn lut ta zàn zàn mai. Magie chu a lo inrin sana zawng zawng a bo fai leh ta vek. Angeli pawh a hamhaih tih a lang. A ding uaih a, "Nang maw?! Engtin?" A ti bah nak a. Malsawma a lo nui suk. Ṭhu tura ngenna a hmuh rualin Magie bulah a mawng a rawn hung ve ta chat a. 

"Engtin nge kan in i hriat?" Angeli chuan a ti nghal chung chung a. 

"Hriat harsa tak a ni lo a niang" a lo ti nghut. Pi Thani chuan, "Mate, tu nge i inleng chu?" A rawn ti ve a. 

"Ka sawi tawh kha, Malsawmzuala kha a nih hi, Malsawm, hei ka nu aw. Ka nau chu i hriat tawh kha" Angeli'n a tih mawlh mawlh lai chuan, Magie erawh nuam lo ti zetin a lo ṭhu a. A nuin Angeli inleng anga a lo treat nghal ngawt pawh kha hrehawm a ti tawh. 

"Nu in nei hmelṭha hle mai. " Malsawma chuan a ti ve a. Pi Thani pawh a khi ve sak mai. Magie lam hawiin, "Karleh ningani-ah hian ka nauin nupui a nei dawn a, rawn tel ve thei ula a lawmawm viau ang" a ti a. Angeli zawk chuan,"Magie chu a hman ka ring lo, lo tel theih ka tum dawn nia. Ani kha chu hna ringawt a atchilh a" a lo ti leh zung zung. Malsawma chal chuar näng danah a lawm chiah lo niin a lang. 

"In pahnihin in rawn tel ang chu le.." a ti zawi sup a. Pi Thani chuan chìk takin a lo en ve reng a, a mitmengah chuan hriatthiam theih loh eng emaw ni a chàm..

"Nia, ka u sawi ang khan hnaa ka kal a ngai ang. Chawlh kan nei ve thei si lo va" magie chuan a lo ti ve a. Mali'n thingpui a rawn dah..

Angeli chuan Malsawmzuala number chu a dil leh thàwr mai. Dil na ná na chuan a pe lo thei bik lo nge, a pe ve mai a . Magie chu insangruh ṭeuhin a ṭhu ve ngawt ngawt. Dar 9 pelh hlekah Malsawma pawh a haw ve ta a. Magie ni loin Angeli'n a thlah. Magie chu chet pawh a che ngam lo. Mu turin in chungah a chho nghal a, a lungawi hlawl lo. Angeli chu a han haw viau dawn a, mahse, a lo duh ve a ni mai a. A thunun theih a ni bik si lo. A mu te chu a let tawn sek a, Angeli te ina a let ve leh kher kher te chu pawi a ti hnuhnawh ,amah khan khawsa mai mai se, an zalen ngei awm si a. 

Hetiang a nih mek lai hian Angeli pawh a lo inngaihtuah ve mek a, Malsawmzuala'n Magie a en dan a hai hlawl lo, amah ni loin Magie a rawn rim zawk tih pawh a hria. Mahse, a nau nen inlaichinna an neih a phal lo. Dik tak chuan nun ho tak leh tladah takin a lo tal chho a, mahni pawh inhlut zo lo khawpin leh zahawmna pawh nei tawh lo anga inngaiin khawvel lamah a nasa thei ang berin a tlan thin. Mipa tam tak a tawng a, mi inang lo tak tak te an ni. Mipa nihnain a kentel a hriatchian em em chu sex a ni. Chu chu hriain an tan ui nei loin phal takin a inhlan ṭhin a, amah pawn nuam a ti. Mahse, a chhungril khawhar rûkna erawh tu mipa mahin an phuhru zo ngai lo. Samua hi a tan a danglam ve deuh a, mahse, neih tak tak atan chuan a iai ru tho. Malsawmzuala a han hmachhawn chiah khan a khawhar rukna nuaibosak thei tur niin a hria a, vawmbei ang thlawrh a ni a nih kha. Chuvang chuan chhuah a tum lo bur, a mipa duhzawng nei tur chuan eng thil pawh a hmachhawn mai a niang chu..a unaunu ngei pawh na dawn mah se; a pawisa lo. Malsawmzuala hi a ta a ni ngei ngei tur a ni tihah hian a chiang ve tawp mai a ni. 

Malsawmzuala chuan ner nàng chungin a msg dawn chu a chhiar a, "Ka duh che. " Tihtê ringawt hi. Tu dang ni loin Angeli a ni. Reply pawh reply loin a out leh nghal a . Ina a lut chiah chu a nau nupui nei mai tur leh a nu leh pate chu khunkhan deuhin an lo thu a. An hmel landan a danglam deuha a hriat avangin a va ṭhu ve a. A pa chuan, "Kan lo nghak che a, hei thil dik lo a thleng niin kan hria a" a lo ti vat a. 

"Eng thil?" A ti nghut. 

A nu zawk chuan,"Vanlali sawn nau a pai niawma sawi a awm tlat a. A sawitu pawh tudang ni loin ṭhenawm nurse Ateii a ni. I nau nen an chesual si lo va, engtia hmalak chi nge maw ni dawn le?" A lo ti mawlh mawlh a. Mak a ti hle. 

"Hriatchian vat a ngai a nih chu, Ateii chuan engtia hria nge a nih a?" A ti a. 

A nau chuan, "An hospitalah nimin khan an va inentir a niawm a. A pum lam chiang lo kha chu amah paw'n a sawi fo a, an va inentir tih pawh ka hria. Mahse, an va pan doctor khan Ateii bulah, 'Dan thianghlima pasal nei tur ni si, nau a pai bawk sia, a pasal tur pawh in veng a mi a ni lawm ni kha?" A lo ti a niawm a. Ateii chuan min hrilhhriat loh chuan a awm a nawm theih loh thu leh kan chesual tawh em tihte min zawt bawk a. A chian ngam danah tihsual a awm lo ni chuan ka hria, nau thla 2 mi a pai a ti" a lo ti charh charh a. A awka leh hmel landan atang paw'n a thil hmachhawn mek chu a harsa hle tih a lang. 

"A nih chuan, inneih ṭhulh a ngai a ni mai alawm." A lo ti awlsam èt a. An ngawi ta rauh rauh hlawm mai. 

Malsawmzuala hi Mampui tia koh a ni ve ṭhin bawk. A nu leh paten la dampuiin Dawrpuiah an khawsa a. Hardware dawr lian zet an neih bakah amah hi MZU Political Department-ah associate professor a ni. Kum 34-na a hmang mek tawh a, nupui nei lo rual chu a ni tawh bik lo. Unau pathum an ni a, amah hi a upa ber a ni. A nau chiah mipa hi Zorinpuia a ni a, an te ber hmeichhia erawh Lawmawmi a ni a, Bawihi ti bakin an ko ngai lo. Zorina hian ama pualin phone dawr a nei ve bawk a, ani hi chu puitling tak, rilru nei tak a ni. An te ber erawh a piang tlai ve deuh bawk a, college a la kal ve leih leih chauh. Duatsual ve deuh kha a ni ve bawk a, Magie nen an inrual vel awm e. Malsawmzuala hi a tlangval chhuah chuan che na ve tak, insual lam pawh tithei fù, an hunlaia street fighter tia an koh rùk lo ni ve zàn tawh a ni. Ruihhloah pawh a tlan ve zuai hman a. Mahse, a pa hi pa khauh leh tumruh zet, a ṭul chuan fate hrem hreh lo a ni a. A fapa upa ber chu eizawnna ngelnghet neihtir a tum bawk a, theihtawp chhuaha an nupaa an han ṭan dun takah chuan an fapa chu khaichhuakin zirna lamah a nawr takmeuhin an nawrkal leh a, Malsawmzuala pawh hun a rei takah chuan a nundan ho tak takte chu bansana chhungkaw din lamte pawh a ngaihtuah ve ta a, A sual vanglai kha zep nàk emaw nula lamah a thei riau a. A tla na a niang chu maw..ngaihzawng nghet a nei ngai mang lo, a kawp theih a kawp a, a duh loh hnuah midangah a pakai leh a, hmeichhe tam tak rilru pawh a tina viau ngei ang. Ngaihzawng nghet chu hna a neih hnu hian a nei ve a, MZU-a thawk ve tho a ni. Remkimi niin, nula hleitling zet zawt, Chapchar Kùt miss hialte pawh lo ni ve tawh a ni. Mahse, thla 5 vel an inzui hnuah Malsawma chu a tui leh ta tlat lo va, Remkimi chu a hne ṭan ta der mai. Chutiang na nà na chu inrem reng ngaihna awm hek lo, an inṭhen ta nge nge a. Tun hi a thleng ta hial. A zei zawng a zei, sum leh paiah a buai lo, mahse, a nun a ruak. Han kawp lawr rual a ni tawh mang bawk si lo, a nauin nupui a neih khalh dawn ta nge nge a, mahse, hei zaninah thil duhawm lo tak an hmachhawn leh ta si. A nau chu a khawngaih ru viau, Rinawmi hi a duh ve èm mai a, Rinawmi te hi an veng ṭhenawm lawka awm an ni a, an khawsak pawh a sang viau. Anmahni ai mahin an hausa ang. Kum 2 zen zawn a nau nen hian an inzui ve tawh a, Zorina hian neih mai a duh tak avangin palai an tir ta kha a nia. Inremin karleh lawka innei mai tawh tur an ni. Sawi tawh angin Malsawma hi chuan a lo daisual tawh a, a vanglai hun ṭha te mi dang tihnat nan a lo hmang tawh a, chuvang chu ni maw..Zorina hi a felin zuk leh hmuam pawh engmah a ti lo a ni. A nau chu tluk lo a inti ṭhin hle. 

Maggie a chhanchhuah ni kha a thawhpuite nena an kal ve ni a ni a. A chhanchhuah nula hmel a hmuh rual khan a sawi thiam loh thil eng emawin a rawn deng dawt a nih kha..mahse, chutimaia hmeichhia umzuia ngaihven chi a ni lo. Mipa induhtawk leh inthunun thei tak a ni miau a ni. Mahse, a hnu lawkah video kha a viral ta a, kha ta hmeichhia kha Magie ngei kha niin a hre ta si. A rukin pawi a lo ti ve ngawih ngawih. A hnua workshop-a a hmuh leh khan tihdanglamin a la awm cheu a, mahse, ngaihven zui loh law law a tum thung. Mipa ṭha tak ni lo mah se; mizo mipa tam tak te ang bawkin nupui leh ngaihzawng nghet atan meuh chuan Zoram titi siamtu leh a kumkar zawng zawng pholang ngam hmeichhia chu a hnawl rih a ni. Mahse, phirpui a nei tih a hre leh ta a. Magie chu belhchian chakna a nei chho leh ta chauh a nih kha. A beisei loh deuhin Angeli a rawn inrawlh ve tlat a, mahse, hei hi chu chinfel harsa niin a hre lo. 

Magie zing tho chu a rit bùr mai a, a mu tlem èm tak a ni. A nu chuan, "Mut i va hmu ṭha awm lo ve, i mit a sen rèm mai a" a lo ti var a, "Nia, ka harh sek a, ka ninzia" a lo ti ve puat. Tukthuan ei laiin Angeli bawk chuan,"Nu, zanina ka kawr hak tur chu.." tiin a nu a melh a, a pangchang thiam hle. 

"Aw ka card i keng dawn nia" a nu chuan a lo ti awlsam èt a. Magie chuan,"Khawiah nge i chhuah dawn?" A lo ti ve a. 

"Papari birthday kan lawm ṭha dawn. A flop ta sia, sawtah Ràlte villa-ah kan ti dawn. Ka duhpa pawh a rawn kal ngei ang" a ti ham ham a. Magie a na leh ta zawk. Mahse, a hmelhmaiah tihlan loh hram a tum. A nu chuan, "Magie chu kal ve tawh lo mai rawh se, nangni angin nuam a ti ve dawn si lo" a lo ti a. 

Angeli pawh chuan,"Nia, bakah an hna an bang tlai ve bawk sia, a chau ang" tiin a rawn melh a. 

"Khatiang boruak kha ka zo ve vak lo.." magie pawn a lo ti ve hmak. An nufa rilru chu a ngaihbel nge an hmumawh ṭan ni tlatin a hria a. Malsawmzuala a hmuh leh veleh rawn lang tawh hauh lo tura hrilh a tum a ni. A chhungkaw laka a hran leh dawn ai chuan Angeli leh Malsawmzuala chu inkawp mah se pawi a ti lo. Enhran leh thlim nih hrehawmzia kum 18 chhung a lo tem tawh a, a chhungkaw tak takte lak atanga khatiang dawng leh tur chuan a chak tawk tawh lo e. 

Apuia pawh a rawn lang ve thei ta a, tlemin an zangkhai ta deuh. Hna a thawh mawlh mawlh laiin Zonuna leh hmeichhe pakhat an rawn lut hlawl mai a! Tlem chuan a nghawng ve deuh. Mahse, hre lo niawm takin a thil tih lai a tihzawm hmiah hmiah thung. Zonuna chuan a rawn melh zauh zauh tih a hria, Zorema bulah, "Hnathawktu i duh uluk lo mang e ka ti..nge a lo khilai ve tawh zawk che" a ti lung lung a. Magie a ner sawk.

Zorema chuan, "I rin ang hmeichhia a ni lo hi a lawmawm mang e. A phirpui nen an chendun tawh thute kha i lo la hre ve na nge?" A ti chang ve fak a. Magie hi a farnu ang thalin a en tawh a ni. A thlavág hauh pawh a tina tawh riau. 

"Wow! Phirpui chu in burbun ta vek mai a ni maw? A zia viau alawm" Nuihzat hmel zet hian Zonuna chuan a ti leh a. 

"Nang meuh pawh i hlawhchhamna hmeichhia hian sex video a siam ngam ring suh. I hlawhchham vang khan em ni hetia i rawn deusawh kual" Zorema aw pawh a dik ta lo. Apuia chuan, "Ka zo e. Buaina lian zawk a thlen loh nan kal vang vang r'u, kan nula hi nangni kamchhe tleuh nan mai mai kan phal hlek lo a nia" a lo ti ve hmuk hmuk a . Zonuna chu thinur viau mah se; an sawi kha thudik a ni miau bawk si, Magie melh rum bak tihtheih dang a nei ta vak lo. An chhuah hnuah Rinpuia'n, "A à peng pung èm mai. Lehkhathiamte pawh hi an lo fing vek lo a nih dawn hi" a ti zui hlak. Magie erawh a ngawi reng, a ṭhian ten chutitaka a thlavang an hauh chu a lawm hle thung. Hna a thawh mawlh mawlh lai paw'n zan lama Angeli te party tur chuan a rawn mawlh leh ṭhin. Tihtheih a nei bawk si lo, a mood pawh a chhiat phah hle. A chang leh, "Ti nge a duh ve che emaw i intih ngawt? Nang mechanic mai mai hi ani ang mipa ṭha lutuk chuan engatan mah a ti lo vang che" tiin a mah leh amah te chu a inhau thul. Ṭawng pawh a ṭawng tlem phah kher mai. Nidang aia hmaah an bang a, in a thlen chuan Angeli chhuak tur nen an intawk chiah. A nalh lehpek kher mai. "Nuam deuhin va hmang r'u aw" a ti zui hram. 

"Lutuk, ka hrilh ve ang che" a rawn ti a. A chhuak nghal. Khumah a mu zangthal thlawp a, ceiling chu melh kur mah se; a ngaihtuahna chuan Angeli a zui char char. "A va ṭha lo tak" ti nghat chungin inbual turin a inbuatsaih ta daih a. A han inbual zawh chuan a zia ta deuh. A inthlak laiin a phone a rawn ri a, number ringawt.."Hello" a ti zawi sap a. 

"Keimah Malsawmzuala" a rawn tih chuan a lungphu a rawn rang leh sauh. 

"Aw. Eng nge ni ta?" A ti thei hram. 

"Zaninah hmuh che ka duh ang. " A rawn ti nghal tàwng a. 

"Ka chhuak peih lo" a ti hmak. Nge maw a lungawi loh ve ringawt ni. 

"I chhuak dawn lo maw?" A rawn ti a. 

"Umm" tih chauhin a chhang. Malsawmzuala chuan phone a dah nghal daih. A hrilhhai letling. Mali'n chaw ei a siam tawh thu a rawn sawi takah chuan inthlak vat vatin a zu chhuk ve a. Nidang aiin a ei tam lo. A nu chuan a chìk reng niin a hria a, veh leh uap nih reng chu a kham èm avangin Mali a puih zawhah a chauh thu sawiin mu turin a pindan a pan ta daih. 

Call a dawng leh. Amah bawk. "In in kawtah ka awm" a rawn ti ta mai! 

"Hey, lo kal suh. Lo kal miah suh aw. A ṭha lo" a ti nghal mawlh mawlh. 

Hriatthiam loh hmel fê hian, "Ngati maw?" A rawn ti nghut a. 

"Chi loh, ka nu a awm a. Nuam ka ti lo. Haw rawh" a ti a. 

"Aw le" a rawn ti teh tawp. A dah leh daih. A mak ee, a duh chin a sawi a, dah nghal hmak. Mipa a be hmasa ngai miah lo nain, Malsawmzuala chu biak ngaiin a hria a. Whatsapp-ah chuan , "Khawngaihin lo kal tawh suh aw. Engkim a chhe vek ang. Ka nu leh ka ù te nen inhmelmak ka duh lo. I hriatthiam ka beisei. Ka u hi ngaizawng rawh" a va ti tawp mai. Mahse, a ruka na nget nget a nei tho. 

A seen ta lawk bawk si lo. A thinrim ṭûn mai. Zorema'n a rawn text a, "I haw hnu lawk khan mipa pakhatin i number min rawn dil ringawt a, a pawimawh hmel sia, ka pe ta a nih kha" a rawn ti. Malsawmzuala ngei a nih a ring. Chutiang lo chuan a number neih ngawt dan a awm lo. Party-naah a kal ve dawn emaw a ti kha a nia, tunah a reh leh ta daih sia, a va kal leh hnuhnawh a ni maithei. A nih nih ni teh se ti rilru chunga a data off a tum lai tak chuan, msg a rawn lut a. A chhiar ve leh hram. Amah a ni. 

"Ka hrethiam e. Mahse, i û chu ka ngaizawng kher lo vang. " Tih tê ringawt hi. Magie pawn a reply tawh bik lo. A beisei loh deuhin a mutui phian a, Angeli rawn haw lai pawh a hre miah lo. Zinga in hnuaia a zu chhuk chu A nu leh Angeli hi meng sen rûm chungin an lo ṭhu dun a. Angeli'n a thawh khalh chu mak a ti deuh. A mood lah chu a chhiat hmel nasa si. 

"Nizan khan i lo hawn lai ka hre miah lo mawle..ka mutui ve khawp mai" Magie chuan nui chung hian a ti a. Angeli erawh a nui hauh lo. "Magie, nizanah Malsawmzuala'n a lo bia che em?" A ti chang fak a. Magie a hamhaih deuh. 

Thudik a sawi chuan buaina a thlen a hlauh vangin, "Be nang, ka number pawh a nei lo vang" a ti ta tawp a. Angeli hmel hmuh chu a nuam leh ta deuh. Magie chuan hriatthiam loh hmel takin, "Ti nge a? " A ti hâ a. 

Angeli chuan hul hak hian,"Nizanah a rawn kal ve lo va" a ti ta a. Magie erawh a lo thaw huai thung, an hriat erawh a hlau ru viau. Inrinniah pawh chawlh an nei ve thei si lo va, a insiam leh mawlh mawlh tawh. Pheikhawk hi a nei tlem deuh a, a hlawh lak veleh lei ve a tum. Inkhawm pheikhawk pawh pahnih chiah a nei. Chu pawh a ṭhing ve tawh lam an nia, inkhawm ngaihsak ta vak lo leh lerh lem lo chuan a lo ngaihthah deuh a tin ni. Tunah chuan inkhawm ve ziah a ngai tawh dawn sia, ngaihtuah ve deuh a ngai a ni. A nute a dil hreh deuh bawk si. A nu hi a nu a ni nachungin a nel tak tak thei lo. Amah pawn mak a inti, sual pawh a inti. A pa erawh a ngaina a, a zin chhung ringawt pawn an inah chuan mikhual riauin a inhre ṭhin. Angeli pawh bazar turin a chhuak ve leh a, a nalh leh viau. Magie chhuak tur chuan a nu bulah zahtheih loh tâwp chhuahin, "Nu, inkhawm pheikhawk hi ka nei ṭha lo lutuk a, hlawh lak a la hun si lo va, min leisak thei ang em?" A ti ta tawp a. A tuk chawlhni a ni tawh si a, a rilru a hah ve deuh a ni. A nu chuan, "I va inthlahrung tak, i â êm mai. Kha hei ka card hi la rawh, i duh zat zat rawn lei rawh" tiin a fanu samah chuan a chûl a, "Kawr te pawh i duh chuan rawn en nghal rawh, kan Kohhranah incheina a sang ve viau a nia" a ti leh zat bawk. A nu a lo hlat rûkna chu a kiam deuh duak, "Ka va'n lawm tak..hlawh ka lak veleh thil ṭha tawk ka leisak ve ang che" tiin a nui sâng a, a nu pawh a nui ve. Phur leh thatho takin workshop lam a pan ta a. Inrinni hi chu chawhma bak an thawk ngai lo va, Magie paw'n pakhat a khawih zo hman ṭâwk a ni e. An lun loh ber ni a la niawm e. An bang a, ani pawh bazar lam panin a inkhalh phei a, hnathawk haw a nia, a fai em em lem lo. A zak hran lo bawk a. Pheikhawk chu a en kual a, dawr changkang ve fâ-ah hian a lut a, a lo lûn lem lo. Dawr nghaktu nula chu nula hmelchhe lo tak, sa nghet lam a ni a. Magie a hmuh chuan hmuh theih khawpin a hnual tih a lang. "Lo en rawh" a ti ringawt a, Magie hnunga rawn lut nula pahnih nalh zeta incheite chu a lo dawngsawng ṭha hle si. Magie pawn a hai lo va, mahse, a en lui ve tlat. Pheikhawk sang hi a ngaina vak lo naa bun ṭhana neih ve ngai dawna a hriat avangin a enkual dan dan a. Pakhat chu a kaih niin a sexy riau a, a sang over lo bawk. A bun chhin châk ta a, a pheikhawk a phelh lai chuan dawr nghaktu kha a rawn phei a, "Hey,.bun chhin suh aw" a rawn ti teh ngawt a! Magie chuan hrethiam lo zetin a lo melh kâwk ringawt. 

A pheikhawk lak kha rawn laksakin nula pahnihte bulah chuan a keng phei a, "Hei hi lo thleng thar ber a nia."tiin a lek lang vâ a. Pakhat zawk chuan a lo ban vat a, "Ka bun tawk ang em aw..ka ke hi a tê lutuk a" a ti sar sar a. Dawr nghaktu chuan, "bun chhin rawh" a ti a. 

Nula chuan a bun chhin a, a tawk chiah mai. "Engzat man nge?" A ti a. 

"8000 a nia, mahse, 7500 in ka lo pe ang che" tiin a lo chhang a. Nula chuan, "Awii, 2000 man vel lek a nih ka ring a. A to em mai, ka la lo mai ang. Tei, ka rilṭam, sanpiau zuk ei ang" tih leh a ṭhiannu kaih a rual a, an chhuak ta daih mai. Dawr nghaktu chu a phun hlak hlak a, "Nalh leh changkang zet zet hian in inchei a, pawisa nei mang si lo" tiin. Magie a rawn hmuh chuan, "Hei chu i duh mi? La rawh" a ti a, a aw pawh a nem ta deuh. Magie hi a duh hunah chuan nghal thiam ve tak a ni a, nui chungin, "Mi bun hnu ka lei ngai lo" a ti hmak a, A nuin a rawn call ve chiah bawk, a la vat a. "I duh ang i hmu em?" A rawn ti a. "Hmu a, mahse, dawr nghaktu hian retheih hmel min ti deuh a niang, bun chhin pawh a phal lo va, ka budget hi 30000 a ni tih hria se a phal mai tur, dawr dangah ka'n en leh ang e" a ti zung zung a. A nu chu a rawn nui hawk hawk mai. A nu nen an inbiakna hre pha tawk chiahin dawr neitupa a rawn kal ta bawk si, a dawr nghak nula chu a melh no lo ngei mai. Magie chuan a chhuah hmain, "Tun hnuah an pawnlam landanah tumah teh tawh suh aw.." a ti sap a. A chhuahsan vang vang. A pu khan engtin tak hau ang maw? 

A chhak lawka dawrah chuan a lut leh a, an lo fel em em thung a. Lei loh inthlahrunawm khawpin a ni an lo polite..magie pawh a lungawi khawp mai. Sunday pheikhawk tur pahnih leh kawr pakhat a lei ve a , hlim takin a haw ta. A pa pawh a rawn haw tawh a,. A thil leite chu a han dah fel a, a inbual ta sar sar a. 

A inthlak laiin Angeli a rawn lut a, a inkhai bawr hle. "Thil ka lei ve che a, kha.." tiin bag khai pakhat hi a pe a. Magie chuan a hawng nghal. Korean product cosmetic set hi a lo nia! A u melh chungin, "Awiii, ka lawm sia, mahse, hman dan ka thiam hleinem" a ti hlut a. 

"Ka hrilh dawn che nia, zanah. Tunah chuan ka chau rih" a ti a. A chhuak nghal. Magie chu a lawm khawp mai, Malsawmzuala vanga Angeli a lo ngei rukna te pawh an bo duak mai. Make up hi uar vak lo mah se; hman ve chhun kha a ṭha law law nise a duh ve a, tunah a duhthusam tak a û in a rawn leisak ta chu a nia. A to viauin a ring a ni. 

"Malsawmzuala naute innei tur kha an ṭhulh leh daih asin" Angeli chuan hrilh bik pawh nei lo chuan a ti a. An lo hawihai hle. Magie chuan Malsawmzuala'n a rawn be leh tawh miah lo tih a hrechhuak chhunzawm nghal. A nu chuan, "Ngati nge a?" A lo ti var a. 

Bai tui a hâwp hraih hnuah, "Monu tur khan midang fa a lo pai reng alawm. A zahthlak dawn e..Papari sawi dan chuan thla 2 vel a ni tawh a, a naupai chu. Mipa lam tan ṭhulh lohna chi ni hek lo le" a ti ta mawlh mawlh a. 

"A va mak" Magie pawh chuan a lo ti ve a. Papari nu leh Malsawmzuala pa hi unau an ni a, engkim an hre ve vek a ni. 

"A lo kawp reng tihna a nia..a thei e, inneih dawn dawnah te" Angeli chuan a ti leh a. An chhang tawh lo. 

Ni e, Zorinpuia nupui hial Rinawmi chuan a bialpa hlui fa a pai leh miau a, Zorina tan neih duh chi a ni tlat lo a ni. Finfiahna ṭha tawk nen palaite an han leng leh a, Rinawmi chhungte lam pawn an thup zo ta lo va, inneih an ṭhulh ta ringawt mai a ni. A chhungten an hriatpuia an thuppui pawh hi a tenawm tawh reng reng mai. A bialpa hlui hi Addict a ni a, Rinawmi nen hian kum 10 dawn an lo inzui ṭhin a, an in hmangaih lutuk. Mahse, Rinawmi chhung ten makpa addict neih an duh si lo va, a bialpa lahin sim a tum bawk si lo. Rinawmi chuan a kalsan ta a, Zorina a kawpsan ta a. Chutia mipa dang laka a han her takah chuan a bialpa hlui Fela chu inchhirin, ruihhlo sima Rinawmi neih let leh a tum ta a. Kum khat zet Home-ah a awm ta a. A rawn chhuah aṭangin Rinawmi a hel leh ta chat a. Ani Rinawmi lah sex hial a lo hmanpui tawh, kum 10 tal tawp harsatna kara a lo vawn ve thin chu a hnar rei thei ta lo rêng a. A rukin an inkawp leh ta a lo nia! Zorina te ang mipa rilru tluang chuan kawp a ni tih ring hek lo. Ngaihṭha takin a lo awm ve ringawt a niawm a. Mahse, lang lo tura thuhrûk hi engmah awm hek lo le..a mualpho thei zawng berin inneih hmain midang fa a pai tih hriatchhuah a ni a. A tawpna chu mualphona leh diriamna a ni ta chu a nih hi..midang kan bum emaw kan tih hian mahni kan inbum a lo ni ṭhin. A pawi ngawt mai. 

Zanah chuan a bazar teivahna vang nge a chawn a na ṭhûm mai a, a mu hma ta ringawt. Angeli'n a make up thar hman dante a lo hrilh tawh bawk a, mite anga nalh leh vun man no tak neih ve theih a inrin loh laiin a unaunu zarah a nalh chho ve dawn ṭanin a hria a, a lawm hle. Angeli mu tur rawn lut kawi chuan a phone lek vah pahin, "Malsawmzuala call ang aw" a ti teh ngawt a. 

Aw pawh a pawh hmain a call ta hmiah. A ring ral ral a, a rawn la ve ta hram. A aw pawh a pa ngaiin a la pa reng mai. 

"A pawimawh viau a nih loh chuan min lo be tawh suh ka tih che kha, ka buai" a rawn ti hlur a. 

Angeli chuan zak map lo hian, "Aw..i ngaihawm êm alawm. Naktukah chuan aw.." a han ti a. 

"Ka hman lo" a rawn ti hmuk. 

"I hman tur a ni, Magie hi Reiekah a la kal lo va, hruai harh ve a ngai alawm. I hoin kal ang u…a ṭha em?" A ti nghal zung zung a, Magie lo ṭawng tum chu a lo khap vat. Reiek-a an kal tur thu engmah a hre tawp si lo va. Angeli chetdan chu mak a ti viau. Malsawmzuala chuan, "I awm alawm, i nau chu nangman hruai harh la ti nia..ka dah aw..hun ka nei lo" tiin a dah ta hmak. Angeli chu a thinrim a rin tehlul nen, a hlim hmel zawk daihin a hria. A chhan tur awm reng reng erawh a hre pha lo. Magie bulah ,"Ka fiah a nih kha.." a ti ta a. Magie a fiah ta kuar mai. Angeli hian Magie leh Malsawmzuala a ringhlel a, an inkarah awm a awm em tih hriat nan Magie hming a lamri tihna. Mahse, a rin loh deuhin Malsawmzuala'n a lo chhang ta si a, chu chuan a tihlim zaw mah a nih hmel..

Magie mu chu a meng kar reng a, zan hmasaa a muttui nen..zanin chu engin emaw a kap rûn mai. A awm thiam lo. Malsawmzuala dp te chu a en a en a, status a nei em tih a han en a, a hmu lo. Nia, ani ang mipa chu status velah a luangliam lo tawp ang. A induhtawk ropui si. Va biak hmasak a châk ut ut a, mahse, Angeli anga huaisenna a nei ve hlawl si lo. Thâwk a han la kâwk a, a maimichhing ta vang vang. A phone rawn nghawr dat dat ri chuan mumang ram aṭangin a rawn kaiharh hlawl mai.. Ner sak chungin phone chu a en a, a ner nasa lehzual. Zonuna lo ni reng chuan, zing dar 2:47-ah hian a lakah eng nge a duh ang? A delh sual palh a nih ringin a hmet hlum nghal a. Mahse, a rawn call leh tho. A pawimawh viau a nih ringin a la ta a. 

Ruih hmel zet hian, "Magie, ka ngai lutuk che a" a rawn ti a. Magie ngei lutuk chuan a dah leh hmak, a number pawh chu a block ta nghal a. A rawn tiharh tingtang a, a muhil leh mai thei tawh si lo. Zonuna chu a rilruin a hau mawlh mawlh mai. A phone chu a hmet êng a, whatsapp-ah a lut zui nghal. Data a han on chuan a beisei loh lutukin Malsawmzuala hnen atangin msg a lo dawng reng chu niin, Dar 12:17 ah a ni. A mu ta daih kha a nia, data a off bawk nen. 

"Angeli fin kha chelh tum ang che. Venhim che ka tumna lamah tihnat chang che pawh ka nei fô ang. I hrethiam em?" Tih a ni. Hmm, a bialnu chei ve ringawt a nih chu..Magie ngaihdan a ni vak lo. A duh lo chu a ni lo, mahse, chutia inkalpah lutuk chu a duh bik lo a ni. A reply leh ta chuang lo. 

Sunday zing a ni bawk a, an buai ve deuh. Chaw eikham veleh a insiam nghal sawk sawk a, a kawr lei thar leh pheikhawk lei thar bakah a nuin puan nalh zet a bih tura a rawn dah a han bih chuan amah a ang lo a inti, nalh a inti a, a in en ning hleithei lo. Make up Angeli hrilh angin tam vak lo a inhnawih ve bawk nen..mawi a va inti tehlul èm. Vawiinah Kohhranah lawmluh Programme an hmang dawn bawk a, a zak deuh naa, a pa ten ṭul an ti miau si a, a hnial ngam lo a ni. An chhungkuain Biak in lam an pan ta dial a, An in atangin a hla lo bawk a, an thleng thuai mai. A nuin tlar hmaah a ṭhutpui a, mi mit a chungah a fu ṭhup tih a hai lo. A zak êm êm naa zak deuh anga awm chu a tum bik lo. Kohhran chairman-in lawmluhna chu a nei a, a sawi thui ve hret bawk. "Hei, Upa Ruatliana fanu naupang zawk, Angel Malsawmhlui phirpui Maggie Hmingthansiami chu vanneihthlak takin dam takin an han hmuchhuak leh ta chu a ni a. A lawmawm êm êm a, Maggie pawh he Kohhran hi i ta a ni tih hria la, Ṭhalai pawlah pawh i theihtawp chhuaha rawn inhmang zel turin kan beisei tlat che a ni" tiin. Inkhawm banah chuan chibaitu a nei ve nual mai. Angeli nen an haw dun ta a, an mi tawhte apiang chuan an thlir zui vawng vawng zel a, an ni pahnih lah an titi tui êm êm thung. 

Chawhnu lamah Angeli sawmna angin chhuakvak turin a insiam ve a, a inchei lutuk lem lo. Papari an sawm phei leh a, Asangi a rawn tel ta bawk. WBR lamah tlanin, Angeli te chuan a senchi an lam a, Magie chuan ṭha a ti vak lo. Sunday ber khera zu an in ṭhin hi..Khaw thlirna hmunah chuan mi an tam vak lo bawk a, a remlaiah an va ṭhu bial ve ta laih a. Sehhmeh atana an thil lei chu an han chhawpchhuak a, Asangi chuan a tih fô dan angin beer a dawm leh ran tawh. Maggie erawh chuan coke bawk. Tuman zu in turin an tilui lo bawk a, tilui pawh nise in a tum lo bur. Angeli leh Papari ten an thlit kerh kerh lai chuan, Pa pakhat zahawm tak hi a rawn kal a. "Nula te u, hetah chuan zu in lo hram ang u aw. Hmun dangah va in ula, nakinah rawn kal leh zawk mai ta che u" a rawn ti ta a. Magie chu a zak kher mai. Midang te erawh zak ang pawn an awm lem lo. Angeli chuan, "He lai hi i pa ram em ni?" A lo ti nghat a. 

"Ni lo ve, mahse, kan humhalh lai a nia, vantlang mipui ten zalen taka khua an chuan nan leh an hahdam nana helai hmun hi siam kan nia..khawngaihin kan thupek chu min zahsak hram zawk rawh u" a rawn ti leh ta dap dap a. 

Magie chuan, "Ka pu, kan tihpalh a ni e. Kan lo hre lo a ni. Min lo hrethiam hram rawh u aw..kan kalsawn ang e" tiin a ding a, a ṭhiante chu a ngaichâng a. An chechâng si lo, "Angel, insiam ta che u. Kal ang u. A zahthlak" a ti a. 

"A ho lutuk, ṭhu mai mai rawh. Tu ram mah a ni lo, putara kha engmah a ni lo.." tih pahin a zu chu a tlak pap mai. Kha pa kha a kalsawn ta vut a, Magie a hlauthawng ṭan. "Angel, midang a pun dawn a nih kha..kal ang u. A chi loh, hei midang pawn an in ve loh hi" tiin a u chu a han nawr leh a. 

"I ninawm teh sek, ṭhing tak khan awm ziah suh. Khawpui nun la tem ngai lo ang mai hian.." Angel chuan a ti let ta êrh a. Nichina rawn hautu leh mipa pahnih an rawn lang ta a. Tlangval ber niawm tak chuan, "In kalsawn dawn lo a nih chuan Police kan ko dawn asin" a ti ta hmak mai le. Chulai hmuna awm ve dangte lah chuan an rawn en ṭhup tawh si..

"Tu nge ka pa tih i la hre lo a ni maw? In duh phawt chuan ko r'u" cho zet hian Angel chuan a ti a. Magie dawhtheihnain a tlin ta lo, ani hi chu a zaidam laia a thuawih a fuh ber ṭhin rêng a. A û chu a kuah tho lawk a, Angel'n 'leh' pawh a tih hmain nghet zeta kaiin carah a hnawhlut hmiah hmiah, "Hmingthansiam, hmeli, engvanga hetianga awm nge i nih a? I va zak lo ve. Ṭhingi,.." Angel chuan a ti tuar tuar a. Asangi pawh carah a lut ve, Papari erawh a la ṭhu ngal a, Magie chuan, "Haw san i duh loh chuan carah sawn lut rawh" a ti ro hak. Nêk luih chi-ah a ngai ta lo nge ngawi rengin a lut ve ta zâl zâl a. Heng a chetdan zawng zawngte hi midang zawng khan ngawi rengin an lo thlir ṭhap ringawt mai a ni. An sehhmeh vel a sengkhawm lai chuan Angeli chuan car chu tinungin a nau chu an tlansan ta daih mai. Magie chuan a thlir liam tawp. Phir an ni bawk a, an luhlul dan pawh a inchen hmel viau e. Khawtlang hruaitu te chuan Magie chu thlah an tum a. "A ngai lo, ka haw thei mai ang, kan tihsualah ngaihdam ka dil e" a ti dam thlap a. A rui ve lo tih an hria, tin, zahawm rûkna riau a nei bawk. 

A han ṭhu ve ren rawn a, mipa ṭhenkhat amah thlah beiseia rawn hnaihtu an awm dawna a hriat vangin tu emaw a biak a ngai tih a hria. Angeli chetdan a ngei ve hrim hrim bawk avang khan Malsawmzuala number a hmetchhuak ta a. A call ta hmiah. 

A ranga rangin a rawn tlan a, an in lam panin an tlan chhuak nghal. "Angeli rual hian vawikhatmah chhuak tawh suh" a ti zawi raih a. 

"Tel ta lo ila, ennawm an siam hle zawk dawn asin" a lo ti ve thung. 

"Kan inkar hi sawifel ang" a rawn ti leh tawp. Magie pawh zah hun a ni lo tih hriain, "sawi rawh" a lo ti sap a. 

"I hria alawm" a ti teh tawp. 

"Ka hre lo" a ti ve tlat si. A ding ta nge nge a, "Hriatchian chea belhchian che ka duh. Chuan, ka bialnu i ni tawh" a ti nghet ta charh a…