Mistake 3

MISTAKE (3)

Ziaktu: Toni Râlte

A tiril a khur der der mai. Tui a in khawlh khawlh a, a mumang kha a tak tak ang mai niin a hria. Angeli leh amah kaihhnawih thil a ni ang em tih te a ngaihtuah a. A rilru a buai tulh tulh. "Naktukah a chiang mai ang" tia phun sepin a maimichhing leh ta vang vang a. 

Thawh a hai, mahse, a tlai chhe lem lo. Tlani chuan a lo be nghal bawrh bawrh a, ani paw'n a pui ve nghal zung zung. Zorema a rawn tho a, tukthuan pawh an ei zui nghal mai. Eikhama a tihfel zawhah a insiam nghal a. Angeli te pawn an inpeih tawh thu an lo hrilh. Insiam rei chi a ni lem lo bawk a, a inpeih ve nghal mai. Tlani nen chanchin inhrilh tura intiamin a chhuak ta a. Taxi a lo awm remchang bawk a, Civil Hospital lam chu an pan ta vang vang. A va thlen chuan an lo kim thap tawh a, Pu Zoliana an la nghak. Pu Ruata chuan a'n call a, "Aw hei ka rawn chhuak chiah e.." A rawn ti ve a. A pa hmuh chu a ruk tak chuan a chák hlawl lo. Mite chuan an en duh nasa mai a, hmanni lawkah video a viral bawk nen, tu zawk hi nge niang an ti rilru hlawm a ni maithei. Pu Zoliana pawh chu a rawn thleng a, Magie te pahnih a rawn hmuh chuan a en tawn sek a, A hamhaih ve hle tih a lang. "A tu zawk hi nge Maggie" a ti ta hlawl a. Pu Ruata chuan Magie chu kawkin, "Hei hi" a ti nghut a. 

"Tehchai che hian, min tihmualphozia hi i hria em? In i chhuahsan hnuah kan chhiatna tur i zawng ngar ngar tihna a nia.." A ti ram hmak hmak a. Pu Ruata chuan, "Insûm teh aw..magie hi i fanu a lo nih loh hlauh phei chuan a chunga i chetdante avang khan hma ka la maithei a ni" a lo ti dam thlup a. Pu Zoa chu a ngawi chiang hle. An tihtur te ti turin damdawi inah chuan an lut ta hlawm a, DNA test pawh ni khatah a lehlan theih vek tawh a, thudik an hre thei dawn ta e. Mahse, result chu tlai lama lam a ngaih avangin an haw darh ta rih a, Pu Zoliana chu a tum bûr reng mai. In a zuk thlen chuan an nu bulah, "Thil fel lo chu a awm a ni. Kan fanu a nih ka ring ta hauh lo mai. I neih lai khan phir nei kha an awm chiang a tiraw?" A ti a. 

An nu pawh chuan, "Awm kha khum pakhat chiahin min kardan nghe nghe, mahse, engtin nge a nih theih ang? An thlakthleng tihna em ni ang?" A lo ti ve a. Hlauhthawnna mak tak a nei bawk. 

"An duh vang renga thlakthleng chu an ni kher lo maithei. Ka hrethiam tehnuai tawh lo e a" a ti hmuk a. 

An nu chu a chhing vang vang a, hrechhuak thut niawm takin, "Taka..phir neite kha an naute pakhat zawk a thih tak kha..a nu pawh a tah fap fap kha mawle" a ti hluai a. Pu Zoa chuan,"Ni tak e, mahse, aa..ka ngaihtuah peih tawh lo, tlaiah thudik chu kan hre mai dawn alawm..min chhunna pakhatmah a nei lo va, kan fa a ni lo tihna a ni mai. A pawi lo, min timualpho ém mai" a ti duah a. 

"A phirpui khawsak dan zawkte pawh a ni ve thei tho asin" an nu chuan a lo ti ve vat a. A chhang zui tawh lo. Sawi tawh angin an fapa Remsiama kha Magie tlawhna avangin a mipatna a hmang zui thei tawh lo va, a rilru na beidawng chu a sual zual lehnghal a. Magie chu zawn chhuaha thah a chak zek zek reng mai a ni. An khawsak a harsa chho ta bawk si, inenkawl tur pawn sum leh pai thahnem tham tak a ngai zel si a, a farnu pawngsual a tumna chuan a nun a tichhe zui chiang khawp mai. 

Pu Ruata te pawh inah haw nghal loin Police station an pan a, Angeli video tidarhtu lakah FIR an thehlut kha a nia. An va ngaihven leh a ni. Police lam pawn theihtawp an lo chhuahpuiin, Cyber crime lamin an lo chhui kal reng bawk. A mutpui pa kha chu a tang na hle a, bakah a delete daih tawh thu a sawi, fiahna an neih miau loh avangin an man ngawt thei si lo a ni. Angeli nen an inthenna a rei tawh a, amah pawn ngaihzawng a nei leh daih tawh, "Kei pawh ka hmel chiang takin a lang vek a, engtin nge ka tihdarh ngam ang?" A ti ve tlat a ni. A dikna chen pawh a awm ve bawk a, Angeli han be zuia tibuai zui a ni bawk si lo. Tu tak chu ni ang maw? A pawi a ni, kan khumlaizawl nun lehzel kan han cover thin hi chu..a tawpna chu mualphona leh hmingchhiatna a ni thin tawh si. Angeli pawh a zak lo a ni bik lo, mahse, amah hi pawisak em em nei tawh lo, ni mai mai teh se ti chi kha a ni ve a, a palliam thei mai mai zawk a ni. An veng chhungah an hausak avangin tuman an be chhiain a langin an hmusit ngam chuang hauh lo. Lang lo ruamah erawh an sawi nasa thei viau lawi a! Kan mizia hian a kengtel chu ni maw..

Magie pawh mamawh lamin bazarah a chhuak a, Pheikhawk a mamawh tawh avangin a lei ve a, pawisa ren a ngai bawk si nen, Workshop-a hak tur chi kawr a lei leh a. A haw ta mai. Workshop a tlawh kawi a, an lo ngai ve tawh hlawm nge ni an lo lawm hle. Chumi ni ber kher lah chu customer an ngah nasa mai a, Engine lam chiangkuang lo an tam bawk si. Magie khawih tam ber a ni bawk a, a kawr ban a thlep sauh sauh a, A thiante chu a pui ve ta zung zung a. Motor lian lam hi chu Zorema leh Apuia te hian an khawih deuh bik thin. Two wheeler phei hi chu Magie hian a chang deuh tawp zel a, 4 wheel pawh an in daih loh chang chuan a pui ve tho thin. Taxi pakhat a khawih mek laiin an zawn kawngpuiah chuan Taxi leh Bolera an insu dawt mai a. An ri nghal hak..Bolera-a chuang hmeichhia chu an zawn chhuak a, a thi nasa khawp mai. Harh erawh a harh, driver erawh hliam em em a nei lem lo, a chal erawh a kak ve a, Taxi lam atang erawh chuan a passenger phurh nula niawm tak chu a lungphu lam that loh vang nge a hlau lutuk chu nikhua a hre lo zui ta mai a. Ani pawh zawn chhuakin damdawi in lamah hliam tuarte chu an phur ta chuk chuk a, Tu nge dika dik lo zawk tih sawi hleitheih pawh a ni lo. Driver te pahnih an pangngai hlauh a, thinrima inhnialna leh han invauna an nei lem lo, Police an rawn lang ta bawk a. Motor erawh a pahniha a chhiat nasat deuh avangin engtia inremsiam tur nge tih ngaihtuah turin Station lam an panpui ta a, an motor pawh Magie te workshop-ah an dah lut nghal, khawih erawh an la khawih lo vang. Magie paw'n a lo thlir ve reng a, chutia a lo melh veng veng lai chuan, "A va hmuhnawm awm ve aw" a rawn ti thum chhak a. A hawi let rang kher mai. A hmaah chuan mipa lian zet a lo ding run a, a kekawr ipte a zen tát bawk. Magie chu mitmeng na zet hian a lo melh a. "Aa..ih, nia" a ti bah nak a. 

"Ka nu scooty saw niminah a rawn dah tawh sia, in va khawihsak har ve" a lo ti hmuk a. Magie chuan a koki pawh a chen pha lo., Denim dum a ha a, a ban erawh a thlep, a sana bun lai pawh chu a man a tlawm lo tih a hriat hliah hliah, a kut zungchalah zungbun lawk lam lek lek, silver a bun a. A thi pawh silver tho niin a hrawl angreng, a fual lem lo thung a. A denim hnuaiah tshirt dum a ha a, jean kekawr pawl dak hlarh a ha thung. Magie chuan a hmaa ding palian zet chu melh zauhin, "Ka chawl rih a, chuvang a niang. Vawiinah chuan ka pui ve lawk zawk" a ti a. A rilru te tein, "Hmuh tawhna ka nei a ni" a ti a. Mahse, tunhnaia a thiltawn ten an tihbuai ém avangin fim takin a ngaihtuah thei lo. 

"A nih chuan ka nu scooty chu i khawih lawk mai dawn em ni? A rap ka ngaithla peih tawh lo" a lo ti nghut. Magie chu a rukin a nui a, a nu chu a hlau ve hle dawn a nih hi a ti rilru. A palian ringawt a, a la upa vak lo maithei. Mahse, Magie ai chuan a upa zawk ang tih erawh a rin theih. 

"Nia, ka'n en ang e, tlai lamah lam theih turin " Magie chuan a ti sap a.

"Ka nghak mai ang. Tihian" a lo ti sup. A mi uap a na roh si a, Magie chuan nghak lo zawk se a ti ru hle, a sawi ngam chiah si lo. Scooty chu a han en vel ta a, siam harsa lo chi a lo ni hlauh a, a lawm hle. Taxi a khawih lai pawh chu chhunzawm rih loin scooty chu a khawih ta mawlh mawlh a, Kha pa lah khan a vil run reng a, a lo thlir uluk nasa bawk si, a zám lek lek. 

"Ka zo e" Magie chuan a ti hawk a. A rawn kal hnai vat, Magie chhuk melh run chung hian, "Ka lawm e. Chuan, hmuh tawhna che ka nei chiang, Sairanga tui tla ka chhanchhuah kha i ang ka ti..mahse, kha hmeichhia kha chuan video tenghneng tak a nei theiin ka hre si lo" a ti nghut nghut a. Magie a ner sawk. Insawifiah erawh tul a ti hran lo, a hriat ngai pawh a ni lem lo bawk a. Mahse, a tui tla chhanchhuaktu kha chu a ang a ti ve tho.

"Min chhanchhuah avangin ka lawm e.." Ti chiahin a chhang. 

"Ka la rawn kal leh ang.." Tih pahin pawisa a pe a, scooty chu a nawr chhuak nghal. Magie chuan a en zui vawng vawng mai. Danglamna eng emaw tak zawng a nei chiang mai. Taxi bwk kha a va khawih chhunzawm leh ta a. Zorema hawn hmain bal nen nuanin a haw phei ve leh ta. A inbual sawk sawk a, Tlani a pui ve leh nghal. Result chu an lam tawh a ring a, mahse engmah an la rawn sawi si lo. Helhhawlh ang deuh hian a awm a ni deuh ber. Zorema rawn hawn hnu a inbual laiin Pu Ruata'n a rawn call ta a, thinphu dup dup chungin a la a. 

"Hello, Magie, ka fanu ngei i ni e" a rawn tih ruala a khurh nasatzia kha..hriatthiam theih si loh hian a tiril a vawt raih raih kan ti dawn nge a lum pup pup zawk, chutiang chuan a awm. Sawi mai tur a haihchham deuh a, "Ka..ih, engtin?" A ti tham tiak a. 

Pu Ruata hian a DNA a test ve tho a ni. 

"Zolianthanga fanu ni loin, keima fanu i ni. A awmzia chu in sen laia nau thi kha Zoliana te fa zawk a ni a, Nurse ten an mutna haiin nangmah kha chu naute bawmah chuan khung chein, Angeli phirpui thi ta nia kan ngaih kha Zoliana te fa zawk a lo ni tihna a ni mai. Engpawhnise, thil thleng hian min la thawng tlang rih bawk nen, Naktukah kan ina awm turin kan rawn hruai ang che" a rawn ti ta dap dap a. Magie chu lungchhiatna hian a bual nghal a, a mittui a hnám nghal tiam tiam bawk. 

"In bulah maw?" A ti khur dar dar a. 

"Um, kan fanu i ni a, kan bula i awm a ngai alawm.." A rawn ti a. 

"Mahnia khawsak hi pawi ka ti vak lo asin" a ti a. An bula awm a hreh vang em em pawh a ni lo, mahnia lo khawsa rei tawh a ni a, chhungkua han neih leh kha puitlin tawh hnu a ni bawk nen, a remchang vak loin a hre deuh a ni. 

Pu Ruata chuan,"Nangmaha khawsak chu rem ka ti thei lo, kha chen rethei leh hrehawm reng rengin hun i lo hmang tawh a, tunah chuan i in leh i chhungkaw diktak te bulah i cheng ve tawh ang. Angeli pawh a lawm lutuk a nia" a rawn ti a, Magie pawn hnial vak a hreh si a, a pawm ve ta mai. 

Zanriah an ei laiin a sawi ta a, Zorema chuan, "Ka lawmpui hle mai che. I chhungkaw diktak te bulah i cheng tawh dawn a. An khawsa thei bawk a, Workshopah pawh i rawn thawk duh tawh lovang a" a ti hlut a. 

"Min chhawr duh chhung chu ka bansan dawn teuh lo, ka eizawnna tur a nia.." Magie chuan a lo ti vat. 

"College an zawmtir leh mai lo'ng che maw?" Tlani chuan a ti a. 

"Ka duhthlanna te chu an ngaipawimawh ve ang chu" a lo tih san. Mechanic chu nih zui zel a tum ruh khawp mai. Lehlamah zirna lam a chawlhsan rei tawh a, lehkha thiam tak ni mah se, a zir chak vak tawh lo, rilru a lo chawl ve tawh bawk a ni. 

Zanah chuan a meng rei lo. A bungraw ho thenkhat hi chu a mamawh tawh dawn chuang lo va, hnutchhiah mai pawi a ti lem lo. Phurna leh huphurhnain a khat a, mi hausa te nun a tem ve tur chu a zo lo ang em tih thlengin a ngaihtuah ve. Engpawhnise, huaisen taka a hmalam hun chu hmachhawn ve tawp mai tur tiin thutlukna a siam ta ngawt mai. A chauh deuh vang nge a muhil hma ve viau a, thawh pawh a hai ta èm lo ve. Chaw eikham dar 11 bawr velah Pu Ruata leh Angeli te chu an rawn kal ta a. Magie pawh a lo inpeih fel sa tawh bawk a, Pu Ruata chuan Tlani bulah, "Hei ka fanu in lo tuamhlawm a, kan lawm em em a ni. Hei hi mamawh atan lo hmang ve r'u aw" tiin Rs. 10000 lai a pe ta mai a. Tlani chua,"A ngai lo, a ngai reng reng lo, amah zawk hian min pui char char alawm..ka la dawn lo" a lo ti ve tlat. Mahse, a dah lui ve tlat thung. Magie khan a bungbel leh bungraw thenkhat a hnutchhiah bawk a, Tlani chu a lawm ngei mai. Tichuan, a chhungkaw diktak te bula khawsa ve tawh tur chuan Zorema te in chu a chhuahsan ta. Angeli chuan, "Ka room min tawm ve mai la tha tur, mahse, ka nuin i duh a ring chiah lo va, Tetea nen kan room inkarah kan dahsak che. Magie, lehlamah chuan ka lo chetsualna te kha a tangkai ka ti, khatiang kha thleng lo se kan inhmuchhuak awm si lo va" a ti sar sar a. Magie pawn dik a ti hle, mi in hai fo lo se, Phirpui a nei tih a inhre miah dawn lo bawk. Tin, an in a chhuahsan kha a lawm bawk, an inah kha chuan a tawm tlawk tlawk ringawt kha a nia. Haitu pawh a tawng vak lo kha a nia. A tha vek mai e. In an thlen chuan Tetea leh a nu ten an lo hmuak a, Pi Thanpuii hmel hmuh pawh a nuam hle. Tetea hi la naupang mah se; a pa aiin a sang tawh zawk a, a hmeltha reuh bawk a, a luck phian mai. Mahse, a lerh chi a nih loh bakah zirlai a la ni bawk nen, a ngaihsak vak lo. Magie bungrua te an han khai lut a, In chung lamah a room tur chu a awm a. Angeli leh a nu ten an pui a, a thawmhnaw neih tlemzia a nuin a hmuh chuan a khawngaih hle. Angeli pawh chuan, "Thawmhnaw lamah i lerh vak lo a ni maw? Ngawi tak rawh, i u hi ka lerh alawm, i ngah vat ang" a lo ti a, an han nui leh rih. Angeli hi a chhuak hmasa zawk a nih angin û zawk chan a chang ve a ni. A thawmhnaw thenkhat a hak vak tawh lohte chu a va la khawm a, Magie thawmhnaw rawn ken ai mahin a tam ang. An intiat dun bakah an cher dan pawh a inang thuak a, a ha tawk vek ang chu. Pheikhawk erawh Angeli aia a ke a lo tet vangin an inpe thei lo. A pa a hausa a, a ngah chho ve vat mai ang chu maw..nilenga an inrem fel hnuah chuan a chau ve hnáp mai. Fai takin a inbual a, mi hausa bathroom-a a inbual vawikhatna a ni hial awm e. Engkim chu a tan thil thar vek a ni. A hman dante pawh chu a zawt hreh lem lo a, a thiam ve zung zung mai. Awmpui nula an nei a, che fel leh mawngzàng zet. Kum 5 lai an lo awmpui tawh nghe nghe, chhungkua ang an ni tawh mai. Mali tiin an ko mai a. Pu Ruata driver hian an in hnuai ber a luah a, chaw pawh an inah hian a ei tam zawk. An in hnuai chiah luahtu te hi Pi Thanpuii te chhunglam an ni a. An ni erawh an rual ve deuh. Pu Ruata hi Lunglei atanga Aizawla pem a ni a, Pi Thanpuii pawh Sairang khawchhuak a ni. Aizawlah chhungkhat tak tak an nei bik lo a nih ber chu. 

Zanriah an ei a, an driver Kawla pawh a rawn ei ve. A lem hlek nge ni a tawng duh phar phar viau. Magie te chu a fiam ve zuk zuk a, misual tak ni chuan a lang lo. Ani hi Zawlsei atanga rawn awm a ni tehdaih bawk. Thawkkhat lai khan nupui ka ru ve e a tia, mahse, an nu kha amah ai aia in thei a lo ni sia, an inthen leh ta mai a. Tihian amaha khawsa vein a hlawh zatve a chhungte a thawn ve thin. Pu Ruata hi hrawn a hrehawm lem loh a niang, Kawla pawh kum 6 zet a driverah a tang tawh a ni. Mali chuan eisiam a lo thiam khawp mai a, Magie pawn a ei teuh mai. A rilru a thlamuang tawh bawk a. Chaw eikhamah Pu Ruata chu dingin tawngtaina te a nei a, "Hei, in unaunu kan han hmuchhuak a, tette atanga kan chawi loh a ni a, ani tan pawh mi thar ang kan ni a. Chhungkua tak tak anga min en theih nghal a rinawm loh a, kan dawhtheih ve te pawh a ngai dawn a ni. Keini chuan hetia kan fanu a thi tawh emaw kan tih kan han hmu leh thinlung tak takin kan lawm a, hlim taka kan chenho zel ka beisei a ni" a ti a. Magie pawh a bu nghat nghat mai. Tawngtai zawhah Magie zirna chhunzawm dan tur an sawi a. 

Magie chuan,"Pa, rem intih chuan workshop-a thawh zui zel hi ka duh zawk a ni. Ka tuina ber a ni a, zirna chu ka lo chawlhsan rei ve tawh bawk nen, ka chhunzawm hreh deuh" a ti ta tawp a. A nu chuan, "Mechanic nih ringawt te chu a" a lo ti nghat a. 

Angeli pawh chuan,"Nia, Meg, kan college-ah i lo kal ve ang a, nuam dawn sin" a lo ti ve a. 

"Aa..zir zawm mah ila, kan tuina ber hna tluk hi awmin ka hre lo a ni" a lo ti a. A pa chuan,"I sawi dik khawp mai. Kan tuina a nih loh chuan hna sang tak pawh thawk mah ila; kan nun a hlim chuang lo. I duhthlanna chu ka zahsak ang che. I thawk zawm dawn nia. Marawhchu, a panna a thui tham tawh a, scooty emaw bike emaw i mamawh dawn a ni. Naktukah kan va en dawn nia". A ti ta mai a. Magie chu a lawm kher mai. A pa hi chu a hma pawha a lo ngainat sa tawh kha a nia. Fel a ti tulh tulh mai. A nu pawh a sualna chu a hre hran lo, mahse, hnambei loh rukna riau a nei, a hnute tui a hnek ve loh vangte pawh a ni mahna. An khawsa ho rei ang a, an inpawh mai a beisei. Mu tura room lam a pan lai chuan, Angeli'n, "Meg, zanin chu riak dun ang, ka roomah..hawh" a rawn ti tlat si. An riak dun dawn ta. 

Mahse, an mut a chhuak lo bawk a, an titi char char. Phir na nà na chu an inngaina nghalin an inpawh nghal em em a. An duhzawng erawh a dang deuh maithei. An mizia a dan deuh vangin..

Angeli chuan, "Bialpa i nei em?" A ti a. A lu a lo thing. Zonuna a hrechhuak nghal. Zonuna chhungte khan tuna an awmdan te hi rawn hre ve se engtin tak ngai ang maw..an hnawhchhuah phah hial kha a ni sia. Angeli chuan,"Nei ve la..kei chu tunah hian pathum ka nei" a ti ta mai a. Magie a nui hawk, "em em a che, an hrechhuak lo che mi?" A ti a. 

"Thluak tlemtê ka nei ve alawm. Mahse, tla na deuh erawh a awm. Midang hi chu ka kalpah, ka taksa leh ka sum chiah duh an ni bawk a." A ti leh hmiah. Magie chuan Angeli ngaihdan chu mak a ti khawp mai a. 

"Angel, sex hmang tawh lo la, rai te i hlau lo mi? Bakah a tha lo e..natna tha lo te i kai palh ang. " a han ti ve ngial a. Nui hawk hawk chungin Angeli chuan,"A dik alawm. Mahse, ka chhe vek tawh alawm. Sex hi ka addict chu ka ti lo, mahse, sex tel lo inngaihzawnna chu a ho riau..lo hman tawh chuan..kei chu hmangaih tak tak pawh hi ka neih ve theih ka ring lo. Tuna danglam bik ka tih kha Samuela a nia, ka duh ve ber a la niang. Ani chuan sex leh sum a duh ve huam lo va, min fuihin min nawrkal tum chi a nia. A zah pawh ka zah. Ka video a darh hnuah pawh min then duh miah lo..an khawsa thei vak lo thung a, ka khawngaih thin avang hian pawisa te ka pe thin. " a ti mial mial a. Lehlamah a thil lo tawn tawhte ngaihtuahin a ngaihdan chu a dik ve anga ngaih theih a ni bawk si. Magie pawn a hau na vak duh lo. 

"Chu pa chauh chu ngaizawng la, midang chu then rawh" a ti a. 

"Ka then zing lutuk, an thei lo zel. Then ka har ve aniang. " nui har har chungin a ti a. A zia hi a ngainatawm bakah kawm a nuam a, a thilphal bakah a thawveng halh mai a. A rilru pawh a tha ngawt ang. 

"Meg, star te i nei ve lo mi?" A ti leh thut. 

Kha pa, a tui tla chhanchhuaktu kha a mitthlaah a rawn lang zawk. A nui sak a, "Nei ve deuh. Mahse, a hming pawh ka hre lo" a ti ta a. 

"Hmm, chutiangte chu a..ngawi rawh, ka thianpa Muanawma nen hian ni teh u, in zia pawh a inang..a chhe lo tawp aw" a ti leh ham ham. 

"Naa, ngaihzawng lam ngaihtuah thei pawh ka nih loh hi" a ti a. Bakah Zonuna atang khan inngaihzawnna chu a ngai tenawm riau. Amah ang vek kha mipa an nih chuan ngaihzawng neih a chak hlawl lo. 

"Nih leh zu i in ve tawh em?" Angeli chuan a ti leh sur sur. 

"In nang" a lo ti mai a. 

"Kei chu a awm chuan ka drinks ve thei mai. Mahse, fathera hi a ham strict thei tawp a, ruihhlo lam chu ka ti vak lo" a ti leh mawlh mawlh. Rei tak an titi hnuah an muhil ve ta hram. 

An menrei vang ni maw thawh an hai nghe nghe. Mali hi a mawng a zang em a, a awl hneh viau. Pi Thanpuii hi a kal hma a ngaih deuh thin avang hian Zing lam chu an ei hma deuh. Pu Ruata erawh chuan kar khat chawlh a la a. A zia viau. Dar 10 velah a pa nen scooty en tur chuan an chhuak ta a. Khalh zir leh hranpa a ngai lo bawk a, a zia khawp ang. An inlak fel hnuah pawimawh tih ngaite an ti leh zung zung a, in lam panin an inkhalh haw leh ta. Angeli erawh chuan a nu car hi a hawl chhuak mai zel a. Tetea'n bike a nei thung. Inah Mali nen an awm a. An innel nghal hle. 

Mali chanchinte chu a zawt ve a. Thingtlang atanga rawn awm a ni a, An chhungkua an harsa lutuk a, a pa lah a ke a tliah tawh avangin hna rum engmah a thawk thei si lo, a nuin chawhmeh kharchhawngin chhungkua a chawm ve a, an unau lah 8 lawih an lo ni si. Mali hi a upa ber dawttu a ni a, an upa ber chu pasal a nei tawh a, Mali nau chiah mipa hi Singapore-ah hnathawkin a awm ve bawk a. Chumi nau leh mipa pawh workshop-ah a lo thawk ve a lo nia. Mahse, Aizawlah a ni lo thung. A dang zawng chu Mali te hian an chawm ve tihna a nih ber chu. Zirlai an la ni ve bawk a. Tunah chuan a nau singapore-a awm hlawh kha a tam tham ve ta bawk a, a nute pawh an harsa em em tawh lo. Amah hi chuan a hlawh hi a khawl ve a, thla khatah 10000 a hlawh ve tawh a, a ac-ah a dah lut ve zel a ni. 

Mali chuan tihian a ti, "Ka awm tirh chuan zep loh chuan hrehawm ka ti lutuk. Ka pi hi a nelawm vak bawk si lo nen, Angeli te unau hi chu an awm tam lo hrim a, bakah an sual lo bawk. Ka pu pawh a fel, ka pi kha a strict-in engkim kha a dahna thlap thlap leh tihfai hun thlap thlap te kha a siam vek a. An in a lian si, ka hah thei a nia aw. Mahse, kan retheihzia ka hria a, ka tuar tang tang a. Tunah chuan anmahni zawk hian ka chhuah an hlau tawh. Ka nute phei chuan, 'Lo haw tawh mai rawh. Dawrte i siam ve ang a, kan bulah khawsa ve tawh rawh' an ti reng. Mahse, ka puten min ui ve ngawih ngawih sia, bakah hlawh khawl ve zel a, nakinah bultan nante hman ka duh ve sia..ka la awm a nih hi..ka pi chu ka rel thil ni loin i hre chho zel mai ang. I nu a ni tak nain i la nel vak bik loin ka hria a, ka sawi mai mai a nih chu. A duhsak zawngte lakah chuan a fel tawp, a mi hmuhsit te lakah erawh a tawrhhlelhawm lutuk. Angeli pawh hi amah vanga hetia khawsa chho hi a ni ve deuhin ka hria. A duat leh lutuk a, a awm khawloh emaw a rawn ruih haw pawn ka pu a hrilh duh ngai lo va, a zeppui zel a. Tihian tun hun hi an thleng ta a nih hi, Angeli video te kha, 'An siam ve chak a ni mai lawm. Mi fate pawh eng nge an nih bik?" A ti hmiah..chutiang vel chu a nia..tlawn ve deuh ngai ang chi kha" tiin. A dik ngei ang tih Magie pawn a ring. Mahse, a nu a ni miau si a. 

Tlaiah Mali chu a pui ta vel mai mai a. A tuk atangin hnaah a kal ve tawh dawn a ni. Ina nilenga awm ngawt kha ninawm a ti hluah hluah. An rawn haw khawm sap sap a, Angeli video tidarhtu an man tawh thu an rawn sawi ta a. Lalmuanpuia a ni a, Angeli bialpa hlui phone a hack-sak a, a chhan pawh a bialnu nen a rinhlelh vang a niawm e. Muanpuia leh Angeli ex pawh chu thiantha pangngai tak an niawm asin, a hack-na lamah video chu a lo hmu ta si a, amah a inthawn a, a dahtha ta reng a. Angeli ex -in a delete tawh hnuah pawh a la kawlsak zel a, A rin ang ngeia a bialnu nen an lo inbiak ve thin avangin tun hnuah a rawn tidarh ta niin a insawi. A buaithlak thin teh e. Jail lamah an nawrliam ta a niawm e. Lehlamah Angeli ten hma an la ngam hi an fakawm, thenkhat chuan kan mualpho zau mai mai tiin misual tan kawng an tihzau sak fo. Dan bawhchhia chuan hremna an hmu ngei ngei tur a ni ringawt. Zanriah an ei laiin an in hnuai nu a rawn lut a, "Awiii ka nina ka ninzia hi, kan mikhualte khu haw tawh se ka ti êm mai" a ti nghal hlawih hlawih mai a. Pi Thani chuan, "Ngati lehpek nge?" A lo ti vat a. 

"An chaw heh lutuk te,aa..a tam mai. Kan pa lah hian a be tha duam reng a, ka hne" a ti leh hlak hlak a. Magie chuan mak a ti deuh, Pu Ruata chuan,"I mak thin mang e, Rini, mikhual neihte chu vanneihna an ti a ni ngai. In pawi an sawi pawh ni hlei lo, in pa chhungte lam an nih vang mai mai a nih kha..i chhungte lam an rawn zinte chuan i pák huam alawm.." A lo ti hmiah mai. 

Pi Thani chuan rum angreng taka an pa melhin,"Ve leh ngawt zel che hian, an lo che tawp te pawh a ni thei a. Thingtlang mikhual neih chu ninawm deuh sin. An bal thei si, manners hre bawk si lo. An chaw lak a tha chang ringawt a" a ti ve hmuar hmuar a. 

"Nang pawh thingtlang khua tho alawm i nih. Engah nge i pian seilenna chu i hmuhsit tak mai" A pa chuan a lo ti nghut. 

Pi Rini chu an fanuin a rawn ko a, an chhuak zui nghal. Pi Thani chuan an pa chu a hau nghal bawrh bawrh, "I tawngkam a na si, Patling inrawlhna chi pawh a nih loh kha..mikhual neihte chu ninawm ve deuh asin" a ti a. 

"Aa..mai mai a. Rini zia ka hriat vang zawk a nih kha, an pa chhungte lam an ti dâk zel te khu tha ka ti ve lo. An lal hle tur a ni ringawt. " a lo tihsan hmiah. 

Angeli'n, "In ninawm, inhnial reng s'u, Nu, zanin chu Magie nen chuan Papari birthday party-ah chuan kan kal dawn a nia aw" tiin a nu a en a. Magie chuan a lo hre ve miah lo. A hawihai hle. 

"Aw va kal u la, mahse, rawn haw tlai suh u" a nu chuan a ti a. 

A pa pawh chuan,"Zan lamah hi chuan chhuak lo ula ka duh mang e. Mahse, Magie pawn thian siam nan a hmang ve thei ang a, zanin chauh chu ka phalsak ang che u" a lo ti ve a. Magie chuan a peih lo ru hle, mahse, a pa sawi ang khan thian siam ve te pawh thain a hria a, party tih vela a vawikhat kalna tur a ni hial awm e. 

Eikham veleh Angeli chuan a kai chho a, "keiman ka chei ang che" a ti a. Kawrfual dum, nghwng zau lam hi rawn la chhuakin "Ha rawh" a ti a. 

"Angel, a chhing mah mah e, ka awm thiam lo, tiang ka ha ngai lo" a ti nang nang a.

"Ka hria alawm, ngaiah i la nei ve mai ang. Tiangte kha thiam a ngai, vantlang chunglam kan nih hi" a ti mauh mai si. A tap lo chauh, a kawr chuan a khup a khuh pha si lo va, a tan chuan a chhing tawpkhawk a ni e. A pheikhawk sang ve euh, a uk chu a bun a. Angeli pheikhawk a bun tawk si lo. A confi hlawl lo a ni e. Angeli erawh a kawr aia chhing mah a ha a, a nalh kher mai. Heel sang zet a bun bawk. Magie hmai chu a chei a, amah a ang ta lo tawp mai. Mahse, a hmel lo thatzia a lang kuar ti mai teh ang. Hand bag lian vak lo a kentir bawk. A nu car chu Angeli'n khalhin chu chuan Papari te in lam chu an pan ta a. An lo zi nuai nuai tawh. In chung zawlah party chu an huaihawt a, Gift an va pek ve chuan, "Tu zawk nge Angeli" an lo ti hû mai. An innuih tawp. Angeli chuan, "Keimah..ka tatoo pawh i hmu reng sia" a lo ti a. Magie pawh chu an han chibai a, an felin an zau hmel hlawm kher mai. Magie pawh karloah a tlangnel ve thuai a. An thianhoah Angeli chu a leng halh bik mai a, an boss en deuh a ni maithei. Midang pawh an rawn kal ve zel a, Angeli chuan mi pakhat hi rawn kaiin a nau bulah, "Hei hi Samua chu a nih hi..Samu, ka nau Magie" tiin a inhmelhriattir a, Samu pawh chuan a melh tawn ve sek mai. An inang ve bawk ém a tin ni. 

Angeli thiante zinga Magie ngainat zawng tak mai chu Asangi a ni. An zia a inang ve deuh bawk nen, an in zui ta chawt a. Angeli erawh music remin a su nghawng nghawng tawh. A lem sek tih pawh hai rual a ni lo. Asangi pawh chuan beer a in a, Magie chuan coke. In chung chu a zau bawk a, boruak nawm vanglai tak a lo ni bawk nen, thaw a veng hle. Asangi nen an inkawm melh melh lai chuan, "Sawtah nangmah, hetah pawh nangmah tho.." Rawn ti nghuttu lam chu an hawi rual thawt. Kha pa ngei kha a lo ding leh zan mai. Magie chu a ding ringawt, a lai vel vek a ni ber. Asangi chuan, "Malsawmzual, i lo kal ve law" a lo ti chul a. Malsawmzuala maw a hming..

"Lalrinsang, hawrawppuiin mi ko bawl bawl zel suh" a lo ti hlur a. Magie a melh  daih tho. Magie pawh chuan a lo melh ve kar, Asangi chuan hrethiam lo zetin an pahnih chuan a melh tawn sek a. Malsawmzuala chuan, "Tu nge i nih? " a ti leh nghut a. 

Asangi zawk chuan, "Magie a nih hi, Angeli kha i hria em? Khami phirpui kha" a lo ti zung zung a. Chu thu a hriat ruala Malsawmzuala hmelhmai inthlak danglam daih chu Magie chuan a hmuh hmaih hauh lo. Hahdam huai hmel a pu tlat! A kut rawn phar chhuakin, "Maggie, ka hai che avangin ngaihdam ka dil e" tiin a nui hawk a. A vei nuih zui! Magie pawh chuan lo ban ve vatin, "A pawi hleinem" a ti ve sap. A khur ru deuh thung. Angeli te ang chu nise zawng an inhnaih nghal ruak thei tur a nia. Malsawma chu an bulah a rawn thu ve ta a, Eng zu nge a in Magie chuan a hrethiam ve lo. In erawh a in tam hran lo. 

"Angeli chu ka la hre ve lo a nih dawn chu" a tih chuan Asangi chuan,"Nia i hre lo tak ang, ka theihnghilh daih alawm, papari cousin i ni tih.." A lo ti ve a. 

"A ninawm hup hup ka ti" a ti leh sup. Huau huau a lawm vak bik lo a nih hmel. Asangi chu inthiar turin a kal a, an pahniha an han awm takah chuan Magie chu a zám ngawih ngawih a ni ber. Lam ho lam chu a hawi ngat ngat a, pakhata lahin a lo thlir ve vawng vawng thung. 

Angeli leh Papari te rawn phei a hmuh chuan Magie chu a thaw huai mai. Papari chuan, "Babe, hei hi lawm ka unaupa Malsawmzuala, misual tak chu..Chuan, Sawmsual, hei hi ka bestie Angeli aw..inchibai r'u, Magie hi Angeli phirpui" a ti zung zung a. A tawng sehchilh danah a kai ve deuh tih a hriat hle. Angeli'n Malsawmzuala a hmuh ruala a hmel landan khan Magie awm a tinuam lo takzet. Angeli chu a hmaa mipa lakah chuan a luangliam zawih zawih ni mai hian a lang tlat a ni. An inchibai te chuan Malsawmzuala kut chu a vawnsak rei hle, a mit a la sawn miah lo bawk. Malsawmzuala zawk chuan a kut lain, "Phir piang tawhah in la inang ber mai awm e. Engtin nge kan hriat hran dawn che u" a ti a. 

Angeli chuan nui hak chungin, "Kei chuan tatoo ka nei, ani chuan a nei ve lo.." Tih pahin a tatoo chhut thar a ban veilam ami chu a kawk zauh a. Malsawma pawh a bu ve nghut. Angeli mit lasawn thei reng reng lo chuan Magie awm a tinuam lo takzet tawh. A thinlunga a lo ngaihtuaha a lo vei ruk ve rauh rauh kha a u hian a chhuhsak mai ang tih a hlau a ni. Asangi a rawn let a, "Magie, hawh va lam ve ang" a ti a. Magie chuan a hreh ngei mai, "Ka lam ngai lo, min hrethiam rawh" a ti ngawih ngawih chungin a kai lui tlat si. Lam tualah chuan an inzui lut ve ta, Asangi chu a rin aiin a lo zei phian a, ani erawh han suk ve ngaihna a hre map lo. A che ve deuh hrut hrut tih mai loh chu. Chutia an lam luih luih lai chuan tu tih hriat lohin a mawngtam a rawn thamsak ta mai a, a vir zawk mai, mahse, a bula mipa te chu an su nghawng nghawng bawk si. A han hawi let leh a, mahse, mipa zu rim nam huam hian lampui phet tumin a rawn kuah bet a, a tal nasa ngang mai. Chupa lah chu a phur telh telh emaw tih mai tur hian a beng bulah te chuan a thaw huam huam a, A luak a chhuak hle. A mawngtama a rawn thamsak leh tak avang chuan a thatáwpin a nam vak a, chu pa chu ding nghet hek lo, a tlu ta tual mai a. Lam ve dang an til ta hak, rang taka rawn tho lehin, "Zawngi, ka duh lo e te i tih khanglan a" tih leh Magie pawm beh chu a rual ta mai a, music pawh an titawp nghal. Magie chu a tal chhuak vat a, chupa hmaiah chuan a beng ta a. 

"min rawn hnaih hlek suh.." A ti vawt raih bawk. A thinrim mitmeng chu a ling hlar a, a hmeltha zual sauh zawk emaw tih mai tur a ni. Chupa chuan a biang dawm chungin nui lek lek hian, "Eheu! Mi beng ngam ka ti..uichonu leh" tih paha hnek a tum chu kut tha chak takin a rawn chelh ta tlat mai. Malsawmzuala chuan a mitah tak melh ran chungin, "Thianpa, mipa min timualpho suh. Hei i tihlau alawm.." A ti dam thlup. A kut chu thingthlain Magie chu a va kai a, "He lai hmun hi i awm vena chi a ni lo. Ka thlah haw dawn che" tih leh kalpui a rual nghal. Angeli a che ve phat, "Min lo nghak r'u, ka haw ve duh" a ti a. A umzui ve nghal. Papari'n zu rui pa chu rum zeta melhin, "Kan boruak i rawn tichhe vek mai. Hmela leh, haw vang vang rawh" a ti fiak thak. 

Ford car sen tak zet bulah chuan an ding ran a, Angeli pawh a rawn thleng chawpchilh ve nghal. Anmahniin motor an ken ve tho avangin Malsawmzuala chuan, an car kawngka chu hawnsak ve vein, "Fimkhur takin khalh ang che" Angeli melh chungin a ti nghut a. Angeli chuan, "Lo leng nghal la..kan in pawh i la hre nang" a lo ti thawp sat. Magie erawh chuan hmalam a melh daih. 

"Tunah chuan ni lo ve. I nau kha enkawl tha la aw..kal r'u le" a ti sup a. Amah zawk chu a carah lutin a tlan chhuak nghal. Angeli chuan thawk la hawkin, "In inhria em ni?" Tiin a nau a melh a. 

"Hre ngai chiah lo, Sairanga tui ka tlak tumin min chhar a..kei chuan ka lo hre tawh lo zawk a" pehhel zetin a lo ti a. 

Verther taka nuiin, "A lawmawm e, ka nau nunna chhanchhuaktu a nih vang hrim hrim paw'n ka chhuah dawn hauh lo. Ka theihtawp ka chhuah dawn a ni. Angeli taksa deh nawmzia hi ka hriattir ngei ang" a ti hniam raih a. Magie erawh chu a lo chhing sawk, a kut a humruh hle bawk. A rilruah erawh hei hi a awm ve. 

"Unau kan indo a ngai dawn a nih chu" tih thu hi..