Mistake 2

MISTAKE (2)

Ziaktu: Toni Râlte

Thil danglam leh maksak em em tawng leh tawh rih loin a hun chu a hmang chho ve zel a. Zonuna nen pawh inngaizawng ang chuan an awm zui a. A tirah thian anga an lo inkawm silawn tawh avangin Maggie pawh a zak em em bik lo va. Infawh aia thui kal erawh a duh bau lo. Tunlaiah inngaihzawn chuan sex hi hman ngei ngei tur emaw ti an tam tawh laiin, ani erawh hi chuan a theih chin chinah inven a duh ve tlat a ni. Zan khat a chaw ei kham chu a thaw a rawn hah ringawt a, a'n thu hahdam a, a awmdan chu mak a ti hle. A taksa te chu a na thuam thuam bawk. A taksa pangkhing chu a ze ti mai ang, a mu chuah chuah bawk. Zonuna lo lut pawh chuan a awmdan chu a dik lo tih a hria a niang, a zawt vat a. 

Tawng pawh a tawng tha thei lo. Zonuna mangang chuan, "Damdawi inah kal ang aw" tih leh pawm a rual a, amah Magie a lo lian tehchiam lo bawk nen, a pawm chho a, a motorin an kal nghal. Lucy'n a kalpui bawk a. An va thlena doctorin a han en vel pawh chuan, "Engmah dik lohna i neih awm ka va hre lo ve aw. I nerve lamte pawh a ni thei ang chu" tiin damdawi a chawh a. An haw leh ringawt. Mahse, dar 9 velah chuan a zia chho ta a. Zonuna chuan a awmpui ngat ngat, Maggie pawh a lawm hle. A rawn thutchhuah ve theih takah chuan, "Han dam tha la, tun sunday chawhnuah hian Sairangah zu leng ve ang hmiang. I chhuak vak lo lutuk a, a tha lo" a ti a. 

Amah zonuna a zah ve avangin phur vak lo mah se; "Nia, kan kal dawn nia" a ti ve mai a. A rawn fawp a, a lo chhang ve mai. Mahse, Zonuna chuan zu rim a lo nam leh a, "Ti nge zu i in leh thin a. KTP-ah committee member i nia, a zahthlak,." a ti hlak a. 

"Aa..pawn lamah ka in chuang hleinem" a ti ringawt. 

"Mihring chu i bum thei, Pathian i bum thei lo" a lo ti nghat a. "Min zilh reng suh, zu hi sual pawh a ni lo" Zonuna chuan a ti a. 

"Ni lo pawh nise, in ngaihte a sam phah a, sual tihna hmanrua a nia lawm" a ti let ve hmak. A rawn hnaih hrut hrut a, a fawp leh ta. Zonuna hi tlangval kan han ti tak naa, kum 2 liamta khan nupui a ru ve zuai a, a nupui ruk kha tawng mawi lo ni lo se mi inthlahdah ve tak, an phurhkual mai mai theih ang chi kha a ni a. Zonuna chhungte hian an duh lo a ni. Amah Zonuna hi a luck pawh a luck ve reng, mahse, hmeichhia han ngaihven chiam chi a lo ni lem lo va, Magie erawh a duh ve riau a nih hmel. Magie duh aiin a kal thui ta tlat mai (Maggie hi Magie tia ka lo ziah pawn hrethiam r'u, type a buaithlak thin aw 🤣) an in nam leh khat khat thin. Zonuna lah chu a duhthawh ta viau mai a. Magie ngaihdan a ni ta lo. "U zonun, duhtawk teh. I kal thui mah mah" a han ti a. 

."A ho e, kan innei dawn tho. Ka chhungte pawh ka hrilh vek dawn,. Nakina la hman tur tho tho" a lo ti mai si. Magie lah a hmaa a awmdan avangin a lo chau deuh si nen, a hneh tha mang lo va. Mahse, a la tang ve hram hram tho. 

"ka duh lo ka tih chuan ka duh lo a ni mai. Min tilui suh" tiin a theihtawpa nain a nam ta dàwrh a. Zonuna pawh a tlu rawk rawk mai. Thinrim zetin, "Hmingthansiam, mipa zawk kut min thlak a maw? Kan in luah i nih hi hre rawh" a ti ta mai a. 

Magie chuan mak a ti deuh, "Ka hria e. Mahse, in in ka luah vang hian min khawih theihna i nei lo. " a ti ve a. Zonuna chu thinrim takin a haw tau ta hmak. A rawn be duh ta miah lo va. Magie chuan nuam lo ti deuh mah se; sex hman ai chuan pawi a ti lo zawk. Ni 2 lai Zonuna chu a reh, va biak hmasak tumna erawh a nei tawh lo thung. 

Maruti 800 a siam mek laiin tlangval lian lam, hmel pawh chhe vak lo hi a rawn kal a. A bike engine chu ensak lawk turin a ti a, Apuia'n a ensak vat. Magie a rawn hmuh chuan, "Angeli teh daih chu! Hetah te i thawh ve a.."a rawn ti a. Magie chuan a hre ngai hauh lo, a hmuh vawikhatna a niawm e. 

" min hai a niang, thianpa, Angeli ka ni lo" a ti sap a. Makti zetin a rawn melh tha leh a. "A va mak ve, a unaunu em ni i nih? " a ti hluai a. Zorema te pawn an lo en ve reng. 

"Ka hre lo le. Angeli chu khawi vengah nge a awm" Magie chuan a ti ta a. He thil hi ngaihven a hun tan tain a hre tlat a ni. 

"Sawtah Ramhlun south-ah mawle. A mak hle mai a..in inang thlawt" a ti a. Magie ngaihtuahna a kal thui hle. 

Chu pa kal hnu chuan Zorema chuan, "Meg, ngaihven teh. Eng emaw a thlen leh hma hian..phirpui i nei ru reng a nih ka ring tlat" a lo ti thuai a. 

"Nia ka ngaih a tha vak lo. Zawn chhuah ngei a thain ka hria" a lo ti ve a. Kha pa kha Angeli number te a lo dil lo kha pawi a ti leh hnuhnawh ngei mai. A hamhaih ve deuh bawk a tin ni. Zanah Zonuna a rawn leng leh ta a, "Ka thei lo, min ngaidam la, bul tan tha leh ang" tiin a ngen a. Magie pawn a vawikhatna a nia tiin a lo pawm ve leh mai a. Lehlamah Zonuna hi a duh ve viau tawh a, a bula awm a nawm bakah chhuahvah a ngaih changin a tawiawm thei zel bawk nen. A tukah Sairanga kal an tum kha a nia. Zuk intihhlim ve pawh thain a hria. Tawm tlawk tlawk hi chuan rilru a chawl duh si. A tukah chuan inkhawm banah a insiam nghal mawlh mawlh a, Zonuna thiante pawh tumah hriat a la nei lo. A rawn lenpui ngai lo bawk nen. A rawn sawm a, an chhuak ta a. Zonuna car-in an kal a, a thiante pawn bike-in an rawn zui hlawm. Sairang chu a lum huam huam hle, mahse, lui an zu thlen thlak chuan a zia ta deuh. A thiante chu panga an nia, an felin an polite hlawm viau. Hmeichhe pahnih an tel ve bawk a, Magie nen pawh an innel ve nghal mai. Eirawng an bawl nghal sawk sawk a, hetia outing hi thalaite chuan an mamawh ve thin reng reng bawk a, Magie chu tuiah a cheng ve ngam mang lo. A hlau tlat,tui hleuh thiam hek lo le..eirawng a lo bawl a, kal ve dang pawh an awm nual mai. 

Zuali'n,"Magie, lo cheng ve rawh, hei a thuk lo lutuk" tiin a rawn au lauh lauh a. A lu a thing ringawt. Zonuna a rawn kal a, "Va inchiah dai ve rawh. A lum si, a hlauhawm loh" a rawn ti ve bawk. Lehlamah tui hleuh an thiam vek bawk a, lo tla palh ta hlauh pawh nise an chhar thei mai ang chu maw ti rilru chungin a va inchiahdai ve ta a. A thuk laiah erawh a kal ngam zán lo chu a ni. Zonuna thianpa Renga zu rui petek chuan Magie chu a va su hlauh mai a, tui lah a lo bir vut mai bawk si, Magie hlauhlawp lah chu a hamhaih tawh si, tuiah chuan a tla ta a. A inhai nasatna lamah a thuk lamah tui lah chuan a len reng zel bawk si, Hmeichheho an rak tuar tuar a, Zonuna leh Opa te an va phei nghal vat, Magie chu a inhai chiam chiam a, a chak hrep bawk si. An ni lah an lo kai nam tawh sia, an ni pawh chu an tla ve dawn titih ta mai. Renga erawh han hleuh chi ziazang a ni lo, a rui mah mah tlat. Mangang zeta an au vak vak lai chuan an chhaka kal ve zing ami mipa lian thelh thawlh chu rawn tlan thlain a dive lut nghal a, Magie lo zawi tan tawh mek chu a va pawm ta nawlh a, a hleuh chhuahpui ta a. Leiah muttirin a a awmah a nem a, a khuh bawrh bawrh a, tui a hak nasa hle bawk. A hnungzangah a beng leh thek thek a. Magie chu a chau kher mai, a mit lah a sen ràm bawk. 

"I tha em?" Ti thum chhaktu chu melhin a bu nghat a. 

Chu pa chu a hmuh vawikhatna a ni. A sam a dum hlap a, a kir lek lek bawk. A hnar ngul a sang vah bawk a, a khabe ruh kual dan pawh a dik zaih mai. A hmui chu a chhah tia sawi theih ni si lo hian a pan lem em em lo bawk. A mitmeng mawlh chu a huatthu kan sawi ang a min melh rum ang tih hlauhawm khawpin a fiah a, a mitmu a dum bawk, khabe hmul a nei a, a biang tawn tawnah hmul tawite te a to ve far bawk. Magie mipa ngaihsak lo leh star nei ve ngai reng reng lo paw'n, "A va han pa em em" a ti rilru ve hial mai. Zuali leh Puii te pawn an lo melh char char. 

Magie buk khum leh nghutin, "Fimkhur tawh ang che" a ti sup a. A tho a, an awmna lam a pansan leh ta a. Zonuna chuan a rawn ngaihven ve vat. Magie erawh chuan ruak huaiin a inhre tlat nia. A lo tlai ve ta deuh bawk nen, chaw ei an siam ta nghal a. A ei tlem angreng, han ei teuhna chi a ni lo bawk a. An eikhama an inseng fel zawh chuan muangchangin an haw ve ta a. Magie chu tawng pawh a tawng tha peih meuh lo, a chau ve deuh bawk nen, Zonuna kai phur lah a rak hlut bawk si, a zo lo lek lek. In an thlen veleh a inbual nghal a, mut daih a chak, mahse, Zonuna a rawn chhuk leh si. Tui vak lo chuan an inkawm a, a leng rei ta lo hlauh. Sunday zingah bak a inkhawm ngai meuh lo, inkhawm loh changte pawh a nei thin. Kar tluanin hna a thawk a, a hah ve thin bawk a ni. 

A tuka hna a kal chuan nimin lama a chetsual dante a sawi a, kha pa lakah khan lawmthu a sawi miah lo tih a hrechhuak nghal. Mawl a ti ngawt ang a ti rilru neuh neuh mai. Thla tawp ni a ni bawk a, hlawh an han la sap sap a, a hawn lamin vawksa a lei haw ve nghal. Ina a luh hma deuhin hmeichhe pahnih a tawk a, "Awii Angel, khutah i chhuk tawh emaw tia.." Pakhat chuan a ti hlut a. 

"Min hai a niang thiannu, Angeli ka ni lo" nelawm takin a ti a. Mak an tih dun hmel hle. Remchangah lain, "Mi hian min hai fo alawm, a pawi lo. Chuan khawngaihin Angeli number chu min pe thei ang em le? Hmuh ve hrim hrim ka duh a" a ti ta ngawt a. Pakhat chuan a phone a phawrh vat. Angeli number chu a pe ta a, lawmthu a hrilh zawhah a kalsan. Eirawngte a han bawl zo a, a inbual a. Chaw te a eikham fel hnu vekah hahdam taka thuin Angeli number chu a hmetchhuak ta a, call tawp mai chu thaa a hriat avangin a call ta tawp mai. A ring ral ral a, a ring ral tep tihin hmeichhe aw tliang lam fiah zet hian a rawn chhang ta a. 

"Angeli a ni em aw?" A han ti te te a. 

"Aw ni e, tu nge aw" a rawn ti liam puat a. 

"Angel, ih, Magie ka nia maw..englo a nia, mi hian min hai nasa thei lutuk a, kan inang a niang. Chu chu mak ka ti deuh a, ka rawn be tawp che. An hai ve ngai che em?" A ti ta mawlh mawlh a. A reh dat hnuah, "A ni maw? Awii kei pawh min hai nawlh nawlh zel asin. Niminah phei chuan i nau anga insawiin min hai a, hnehsawh zet zetin min tawngkhum a, ka thinrim tawp" a rawn ti ve ta bawrh bawrh a. 

An sawi dun ta zel a, Magie chuan inhmuh a duh thu a sawi hmiah. Zep loh chuan amah vanga lo mualpho hrep tawh kha a nia, mahse, Angeli chu a haw hran lo. Angeli pawh chuan, "Naktukah hian Delhi-ah ka zin dawn a, ka lo hawn veleh inhmuh chu kan tum dawn nia. Kar khat bak ka cham dawn lo" a ti ve a. An chhungkaw dinhmun thenkhat an han sawi dun khan MAgie chuan Angeli te chu an hausa tih a hre mai. A pa pawh Department pakhata Director a ni a, a nu erawh DC-ah a thawk thung. Unau pahnih chiah an ni a, Angeli nau mipa leh amah Angeli an ni mai. Magie pawn tlem azawng chu a hrilh ve. Mahse, a zawng zawng chu phone kaltlanga sawi chi-ah a ngai lem lo. Tichuan, inhmu tura intiam chungin an dah ta rih a. Zonuna a rawn lut ve chiah, Magie chuan phur zetin a lo hrilh ve a, Zonuna paw'n, 'Han inhmu ula, eng emaw inphum ru te hi a lo awm maithei asin" a ti ve a. Phir an ni ang em tih chu Magie tibuaitu a ni. Zonuna chuan chumi zan chuan a hma ang bawk khan a fight leh ta a, tun tum phei hi chu amah a chak si a, Magie kawr pawh a pawh thlersak nghe nghe. Magie thinrim chuan a hmaiah a beng ta a. Zonuna chuan tlu rawk khawpin a beng let ve bawk. Tun hnaia Zonuna chetdan hi a mak viau, a hma kha chuan ti em em hian a sual ngai lo,. Eng nge maw a hriat tak ni. Magie chuan, "U Zonun, min chhuahsan rawh. I lo mak em mai. Hetiang mipa ka duh lo. Kan inkar pawh ka titàwp nghal e" a ti ta siah saih a. 

"Ve khanglang che chuan, chhungte hnawhchhuah kan lo khawngaih che a, mi aia tlawmin in kan luahtir che a, hetiangte chu min tilawm hiam hiam tur zawk i nia sin. Nupuia ka duh tak tak che hi i ring em? Ngaihzawng nghet hmeltha leh chhungkaw pangngai tak ka nei reng e aw. Nawmchen nan bak ka ti lo che..chuan, in hi i chhuahsan bawk ang" a ti ta hrep mai a. Magie chuan a chhang tawh lo. Thinrim takin Zonuna chuan a chhuahsan ta a. Magie chuan a dinhmun chhiatzia leh hmuhsitna a tawh zozaite a ngaihtuah a, a tap zawih zawih mai. Thawm an rawn neih loh danah Zonuna chuan engmah a sawi bik lo a ni maithei. Mut pawh a muhil tha thei meuh lo a ni e. A tukah Zorema bulah a ruk deuhin Zonuna nen an chungchang bakah in pawh chhuahsan mai a duh thute a sawi ta tawp a. Zorema chu a chek tlat tlat mai. 

"A va timak ve mawle. Ka lo zawng dawn nia, Zonuna chu a pangngai hle khan ka hria asin le aw" a ti vawng vawng a. Zonuna chhungten hnawtchhuak lo mah se; a rawn tihbuai sek a hlauh avangin in dang luah vat chu a duh a ni. Chhe deuh zawk pawh nise..

Chumi zan chuan Zonuna pawh a rawn leng lo hlauh. Thinthi erawh chuan a awm lo. Hma deuhah a mu a, mumang mak angreng tak mai a lo nei. A mangah chuan kha pa tuia a tlaka chhanchhuaktu nen khan an lo bazar dun a, an inkai rial bawk. Mahse, mi an tam êm avangin an inbo ta hlauh mai a, Chu pa zawng a hawi kual ruk ruk lai chuan, a la hmuh ngai loh mipa cher lam hian, "I bialpa i zawng em ni? Saw en rawh" tih leh an sira dawr chu a kawk vû a, a va hawi phei nak chuan Chupa leh amah anh em em hmeichhia te hi hlim taka inkaiin thawmhnaw an lo en dun a, va pan a tum mek laiin a harh ta daih. Mak a ti ru viau mai. Kha pa kha vawikhat tal hmuh leh a chak khawp mai, a aw leh a hmel zawng zawngte kha a inchawih vek bawk si. A tuka hna a kal chu a mi tawhte'n an melh hrek hrek zel chu mak a ti ru viau, eng nge thleng le a ti rilru a. Sachin a lei ziahna eichawp dawrtêa a va lut chu a nghaktu tleirawl chuan a lo melh hrek hrek bawk, "Mami, ti nge tikhan min melh hrek hrek a" a ti ta hmiah a. 

"I la hmu ve lo mi? I video a viral kha" a lo ti ta mai. 

"Awii! Eng video maw?" A ti hliai a. Mami chuan a phone a hmet nghal mawlh mawlh a, Magie hmaah chuan a rawn dah ta a. Magie lungphu chu a thlawk chhuak lo chauh. Chu video-ah chuan saruak ngalngatin mipa nen sex an lo hmang a nih chu! Amah ni lo mah se; a zak ngawih ngawih. Chu hmeichhia chuan a hnute chung deuhah hian tatoo a nei a, Magie aiin a sam a sei hlek bawk. "Keimah ka ni lo" a ti thàm tiak a. Mami chuan a awih hmel vak loh. Workshop a va thlen chuan Zorema chuan,"Maggie, i ti mah mah tawh e. Sex video hial siam ngam i ni hi mak ka ti..ka hnuaia hnathawk tur chuan i tha tawk ta lo a ni e" a lo ti nghal hmiah hmiah mai a. A chil lem khawlhin, "U Zorem, video kha chiang takin han en tha leh teh u, a àwmah tatoo a neih kha, ka sam aiin a sam a sei bawk. Tatoo ka nei hleinem" tih leh a kawr hlim a rual a, a nei lo reng bawk a. Zorema pawh chuan video chu a han en tha leh a, Magie chu a rawn melh leh zauh zauh bawk. "Tatoo pawh a ni lo thei, a ziak rang satliah a ni ve thei" a ti ringawt a. 

Magie a insum zo tawh bik lo, "U Zorem, i hnuaia ka thawh chhung hian mipa laka ka chetdan leh ka hmachhawn danah mawi lo i hmuin i hre tawh em ni? U Zonuna pawh ka beng hial a nia.." A ti ve ta tán tán a. Zorema pawh a lo tawng duhthawh deuh kha a inchhir ve deuh nge, "Nia, ka hmuh thut khan in hmel a inang si a, ka lo tawng duhám deuh a nih kha..Mahse, i mualpho tel ve zel sia, chet i lak chu a ngai" a ti ta a. 

"Ka be tawh e, amah pawh. Angeli a nia, Khatla-ah an khawsa..Delhi-ah a zin rih a, a lo haw veleh inhmuh kan tum alawm" a ti a. A aw pawh a pangngai ve tawh. Apuia chuan,"Mi hoin nangmah anga ngaia an diriam che chuan FIR thehlut hmiah ang che" a lo ti ve a. 

Chumi ni pawh chuan Magie chuan fiamtu a ngah hle. Engahmah ngaih loh erawh harsa a ti ve, mahse, a ngawi tawp mai zel a. Pa pakhat mit nghal zet phei chuan, "Pay ila" a beng bulah a ti ru sur sur a. Ben nawk a chak kher mai. Angeli chu a hua, ni e, amah vangin vawi 2 a mualpho ta chu a nia. Zoram titi siamtu nih chu a duh hlawl lo a ni. Zorema bulah pawh ni 3 chawlh a dil ta tawp a, A lo hrethiam khawp mai a, a phalsak ve mai. Tlaiah pawh a ban hmatir ta nghe nghe a, a in lam a pan ta hnak hnak a. A va thlen chuan a in kawngka bulah Lucy leh a nu an lo ding ran mai, an hmel pawh hmuh a nuam vak lo.

"Eng nge ni ta?" A ti a. 

Lucy chuan,"A hma pawn i mualpho tawh a, i intlip mawi a, tunah sex video hial i siam leh a. Hetiang mi chu kan in luahtu a tan kan duh lo ve. I luah man lah kan hniam che a, kan tan pawh a zahthlak tawh em em e" a lo ti bawrh bawrh mai. A chhing sawk a, Zonuna avang paw'n in dang luah mai kha a duh tawh kha a nia. Mahse, inhnawhchhuah ang zawnga kal erawh a duh bik lo asin le aw. 

"Keimah ka ni lo asin. " a ti sap a. Lucy nu chuan,"I tih leh kha kan ring reng alawm, mahse, kan awihsak zozai tawh lo che. Zanin chu i la riak thei a, naktukah i chhuak dawn nia" a lo ti hmak mai. Zonuna a rawn chhuk ve a, "Hnawtchhuak lo mah ula; chhuahtir ka lo tum sa hrim hrim a. In lo chhuk chu a tha e, min timualpho lutuk" a rawn ti ve nghal bawrh bawrh a. Magie chuan, "U Zonun, engkim i hriat kha, ka hrilh che kha..Angeli nen kan inang alawm, Delhi-ah a zin a, a lo hawn veleh inhmuh kan tum ka tih kha" a lo ti ve vat a. Zonuna a ner sawk ringawt. A duh duha a tihkawi theih loh Magie chu a mamawh ta lo hle a nih hmel. A tuka chhuak ngei ngei tura an hrilh leh hnuah an chhohsan ta a. 

Inah lutin Zorema a be nghal, thil awmzia te a han sawi a, Zorema a chek hluk mai. "In luah tur i zawn chhung chu kan bulah khawsa rih mai rawh. Kan vengah hian a váng riau bawk sia" a ti a. Magie tan pawh inthlahrun hleihtheih a ni ta lo. Veng dangah pawh zawn mai a rilruk a ni. A han intifai a, rawngte a bawl zui nghal. Call a dawng a, Hluteii a lo nia! A chhuah atang khan a nuin vawi 2 chu a rawn be ve a, Buanga'n a rawn be zeuh zeuh bawk. Midang chuan thi bo mah se, engahmah an ngai lo a nih hmel.

A han lak chuan,Hluteii chuan, "Tenawmnu, i hurzia kha. I video pawh a hmuhnawm khawp mai. Kan inah chuan la awm la; ka pain a sawisa hlum duh ang che. Min tihzah zia hi, ka u i ni tih hria ten min zawt sek lehnghal a. I zak miah lo mi?" A rawn ti táwn tâwn a. Magie chuan,"E" tih leh dah a rual nghal. 

Angeli a call ta ngawt a. Ruih hmel zet hian a rawn chhang a, "Angel, i video vang khan ka mualpho hle mai. Engtia tih chi nge pawh ka hre ta lo ve" a ti ram hmak hmak a, a thin a tâwt ve tawh êm a ni. 

"Nia, a zia lo khawp mai. Engtia darh nge a nih pawh ka hre bik lo, ka pa ten hmalak an tum alawm" a rawn ti satliah a. A ngaihpawimawh loh hmel viau. 

"I lo haw vat a ngai" Magie chuan a ti a. 

"Naktukah ka rawn thlawk haw dawn e, ka pa ten haw turin min ti sia..kha video kha chu maw thla khat liamta ami kha a nia. "thutak deuh zawk hian a rawn ti a. 

Zanriah pawh a ei tlem kher mai. Tah loh hram zel hi a duh a, a pa hrual chhel tawh a ni bawk a, a tap khát thin. Mahse, chumi zan a han mu chu a inkhawngaih ta ngawih ngawih a. A retheihna chu thuhran, a chhugkua te ngei pawn an hmangaih loin an en hrang chu a ni si a. Tihsual a neih a hre si lo, " Ti nge ka lo pian ve kher kher le.." A han ti leh vawng vawng thin. Tunah zoram titi a tling leh tawh bawk si, bakah a mualpho dan hi thil zahthlak táwp a ni bawk nen, a rilru mang thut leh beidawng bawk si chu a tho thut a, A hriau bawma blade chu va la chhuakin a ban chu a'n tin ta ran a. Mahse, a zuk zai hma chiah chuan a rilruah , "A harsat lai ber kha i beidawn loh hun tur a ni si a" tih thu Mother Teresa sawi kha a bengah a rawn ri ta tlat mai. Mittui luang ngiai ngiai chungin blade chu a dah thla leh ta zâl zâl a. A hmai a va phih a, darthlalanga inmelh vang vang chungin, "I tithei a nia, Margareth, i chak tawk aw" tiin amah leh amah a infuih ta a. Zan dang zawng aiin a mutui lehnghal. 

A tukah chuan a bungraw tlemtê chu a khung khawm a, puitu a nei si lo va, a buai ve hle. Bungrua a ngah lem lo bawk a, a insiam rei vak lo. Zorema'n taxi a lo chahsak a, Chawhmaah a in chu a chhuahsan ta. Zorema te inah chuan a innghat ta phawt a. A bungrua pawh a mamawh zualpui tih loh chu a pack ngai ngaiin a dah a. Zorema te in a lian bik vak lo nen,. Zorema nupui hi Tlani a ni a. Nu tê lam, tawng duh deuh, ri ve huat huat chi a ni. Zorema'n engkim a lo hrilhfiah tawh bawk a, a lo dawngsawng vat vat a. An fa te zawk hi School kai rual a la ni lo deuh a, A u zawk erawh KG 1 a kal ve tawh. Magie chu Tlani nau an awmpui thin an khaw lama a haw lai a ni bawk a, chumi roomah chuan a indah lut a. 

A han intihfel zawh chuan eirawngbawl a lo hun leh ta mai bawk a, Tlani chu a pui ve nghal zat. 

"Kei chu nangmah ang deuh nu hi ka ngei e, amah vangin i mualpho zel sia" Tlani chuan a ti mawlh mawlh a. 

"Ni ngawt mai, a buaithlak a nih hi" a lo ti ve mai a. 

"Bakah a thuhrimin i in luahna te pawh an timak ka ti..an fel hmel tehlul nen" a ti leh a. 

"Min ring zo tawh lo a niang" a ti ringawt. Rel zui vak a duh lem lo, lehlamah chhungkaw zahawm tak an nia, an demawm em emin a hre lo. Zonuna erawh a hmel huat ve viau, a tihdan kha a ngeiawm ve bawk êm a ni. A hmuhsitna kha a hre ve reng tawhin a ring. Zorema rawn hawn hnu reivak lo-ah zanriah chu an ei a. Eikhamah Zorema chuan in luah tur hre awm deuh a thiante a call kual ta a. Vaivakawnah chuan hria chu an lo awm ta ngei e, Mahse, a tlabirh ve deuh a, luah man pawh a to lem lo. Magie chuan a luah awm tawk lek niin a hria a. A tuka zuk en a rilruk ta a ni. Angeli'n a rawn call a, A hawn tawh thu a rawn sawi. A tuk chawhnua inhmu turin thutlukna an siam ta a. Magie chu a helhhawlh nge a mawng te chu za deuh sek hian a hria a, Angeli nen han inhmu se eng nge maw thildang hriatbelh tur te pawh a awm maithei asin. Mihring phir ni si lo, hmel inang lutuk chu a mak tih loh rual a ni bik lo a ni. Phir te pawh an lo ni maithei bawk a,an awmdun loh chhante pawh an la hrechhuak ve mahna le..

Zingah a harh rualin a tho nghal a, Eirawngbawl vak a ngai lem lo. Tlani pawh mit nuai chawt chawt chungin a rawn tho ve a, Zorema erawh thawh hma lam hi a thei vak bik lo nen a la mutui hle. Tlani te in chu zingkarah a tihfaisak vek a, an lo chhangchhe ve deuh nen, chubakah Tlani hi in chhung chet lamah a taima vak lo nen, an in chu a han tihfai chuan a nuam sawt mai.Zorema rawn tho pawh chuan, "Tlani, Maggie ang hian in chhung chet lam hi uar ve teh, hei in thar ang mai alawm.." Fiamthu titakin a ti nghe nghe. Tlani pawn a ngai haw lem lo. Tukthuan ei khamah Magie chu a chhuak ta a, Zorema thianpa nen in ruak chu an zu en dawn a niawm e. Zorema thianpa Valpuia chuan a lo nghak reng tawh a, Magie a hmuh rual chuan, "Nang maw? " tiin a lo khi nghal tháw a. Video chungchang a ni tih Magie pawn a hai lem lo. "Nakinah ka la hrilhfiah ang che" a ti ringawt. In chu an zu en ta a, Veng mawng lam deuhah a awm nen, Magie chuan hla a ti angreng hle. Assam type hnuai a ni a, a te fel rin ren viau, an sakna a la rei lo bawk a, chhe tak chu a ni hran lo. In neitute chuan video kha an la en lo nge ni engmah kha lam chungchang kha an sawi ve lo va, Magie pawh a lawm hle. In luah man chu 1500 an ti zet a, Valpuia khan, "1000 ti mai r'u, a thui tham ve bawk sia, kan nulai hlawh a tam vak bawk si lo" tiin a lo dilpui ve a. An inrem thei ta. A tuka insawn turin ruahmanna an siam ta a, Magie te pawh an haw chho leh ta hnak hnak. Valpuia chu a tlawmngai bawk a, Magie chuan lunch tal treat ve thaa a hriat avangin thingpui dawr lun vak loah an lut a. 

Valpuia chuan,"Sawifiah tawh la, video kha.." Nui chung hian a ti a. 

"Video kha ngun taka i en chuan hmeichhia khan tatoo a neih kha, ka nei ve hleinem, ka sam a tawi hlek bawk. Mi hian min hai fo reng a ni, Angeli a nia, chawhnu lamah hian kan inhmu dawn. Ani pawh keimah emaw an lo ti ve fo a niang" a ti ta mial mial a. Valpuia chuan a hriatthiam loh hmel angreng, mahse, ringhlel tlat mah se; Magie chuan pawi a ti hran lo. A nunah hian mi pawimawh an awm em em lo bawk a, Zorema'n a rin chuan a lawm tawk. A eizawnna ve ber a ni si a. Thil an ei zawhah an kal hrang ta a, Magie chuan Angeli a be nghal vat. 

"Ka nu te pawn an hmu duh che a, kan inah i rawn kal thei mai ang em? " a rawn ti a. Pawi a ti lem lo. An in awmna lai chiang taka an inhrilh hnuah Magie chuan taxi a la a, Khatla lam panin an tlan ta vang vang mai. Taxi driver chuan a en danah video kha a en ve tih a hrethiam, a hmelhriat loh bula insawifiah vel chu tul a ti lem lo. Angeli te kawtah a ding ta ran mai. An in chu lian tak a ni, chhawng thum a ni bawk. A nalhin a changkang a, an hausa tih chu an in atang ringawt pawn a hriat theih. Thinphu dup dup chungin door bell chu a hmet ta tlang tlang a, Kawngka chu a rawn inhawng ta, Nu ngo sen suah leh la thatlai hmel tak nen an inmelh dun ta ran a. Chu nuin MAgie a hmuh rual chuan a hmui a hup a, mak a tihzia chu a mitmeng leh hmelhmaiah a lang chiang ngawih ngawih. Magie paw'n Angeli nu a ni ngei ang a lo ti rilru ve a, "Ka pi, Angeli hmu tura lo kal ka nia, ka lo lut thei ang em?" A ti sap a. 

"Awii. Ka hamhaih lutuk alawm, lo lut rawh..Magie pawh i hming" a ti ta zung zung a. Thutna tur a kawhhmuhah chuan a thu fel thak a, "Aw, magie ka ni e. Angeli nu i ni ang tiraw?" A ti sep a. "Aw ni e,." Tih pahin in chung lam a melh a, "Bawihi, Lalbawih, Magie chu a lo thleng tawh e" a ti láng láng a. Kailawn a rawn ri thla thlep thlep,Magie pawh a lo ding a, Angeli nen chuan an inhmachhawn ta ran mai. Mak an ti dun nasa, tawng nachang pawh an hre lo. An danglamna chu MAgie aiin Angeli a ngo zawk deuh a, a sam chu a sei hlek bawk. A bak chu an inang vek tihtheih mai tur a ni. Pi Thanpuii pawn a lo melh ve tlawk tlawk a, thil eng emaw ngaihtuah hmel a pu bawk. Magie chu a harh chhuak hmasaah a tang a, "Angel, a mak hle mai tiraw?" A ti hlawl mai. 

Angeli pawh chuan,"Nia..a mak em mai, Nu, eng nge a awmzia?" Tiin a nu a melh a, a mitmengah chuan zawhna a tel bawk. An han thu fel a, Pi Thani chuan,"Ka hrethiam ta hauh lo mai. I pa ka'n be phawt ang e. " a ti ta daih a. An pa chu a call nghal, "Paa, lo haw lawk mai teh, thilmak lutuk a thleng. Magie kha a rawn kal a, Bawihi nen danglamna an nei lo reng reng." A ti chul a. Pu Ruata pawh a rang aranga rawn hawn a tum thu a sawi ve nghal. 

Angeli chuan,"Nu, phir kan ni tiraw? Kan ni chiang" a ti leh a. Magie erawh chuan sawi tur a hre ve mang lo. 

Pi Thani chuan,"Phir in ni ngei ang. Thil tihsual a awm a ni. Bawihi hian phirpui a nei a, mahse,a tuk zingah a lo thi fel der tawh a.. Damdawiinah khan eng emaw a thleng a ni chiang..ngawi rawh, i pa a lo thleng tep ang" a ti mawlh mawlh a. 

Pu Ruata pawh kar loah a rawn thleng ta, an in leh an office hi a inhlat lem lo bawk a. Angeli te pahnih lo thu dun a hmuh chuan anmahni ang bawk khan a hamhaih a, a melh tawn ta sek mai. "Eng nge a awmzia hei" a ti phawng mai. An nu chuan,"Damdawiinah khan eng emaw a thleng a nih ka ring, Bawihi phirpui thi kha midang fa nen an thleng a niang" a lo ti hmiah. Pu Ruata pawh chuan, "A ni ngei ang. Va kal vat a ngai a nih chu,.engkim hi finfiah nghal zel tur..a la hma tho, i va kal teh ang u" a ti hluai a. Magie pawn pawi a ti lem lo. A pain a haw em em leh a enhran bik chhante pawh kha a ni maithei asin. Angeli chu a han insiam nghal sawk sawk a. Pu Ruata chuan, "Magie, kan fanu vangin i lo mualpho ve zel thin tihte kan lo hria a, pawi kan ti takzet a ni. Phir in lo ni emaw ni lo emaw i mualphona man hi chu ka pe ang che" a ti mawlh mawlh a. Pwisa hian engkim a lei thei emaw a ti a ni mahna. 

"A ngai lo, kha lam kha chu..nia, mahse, a hrehawm ve thin khawp mai" a ti ve ta hmiah a. Pi Thani chuan,"A zahpuiawm ngawt mai. ANgeli hi chu" a lo ti ve hlak. An insiam zawh chuan an chhuak ta dial a, Magie te pianna damdawi in chu an pan ta. An va thlen chuan Pu Ruata chuan thil awmzia a han sawi ta malh malh a, nurse bakah awm ve dangte pawn Magie te pahnih chu an en duh khawp mai. Nau nei ho record kum 19 liamta ami kha en an dil a. He thil hi phal a ni miah lo nain, Pu Ruata chuan pawisain thil a tihtheihzia a lantir leh ta mai. Record chu a felfai hle, khami ni an pian ni taka nau nei ve ho chu an chhinchhiah ta a. Magie nu Pi Chawii leh Pi Thani te bakah Nu pakhatin a lo nei ve. An piang rual tihna a nih chu. Khatihlaia anmahni viltu nurse kha hriatchhuah a ngai niin a lang. Mahse, hriatchhuah ngaihna a váng tawh si. Magie chuan, "DNA kan test mai dawn em ni? Ka nu in Angeli pian ni khan min hring ve tho niin a lang a, emaw naute a nei ve tho a, naute dahna lamah nurse ten min hai ang a, a dik lo zawkah min muttir a ni thei ang em le" a han ti a. Chu bak kawng dang chu a váng khawp mai. Pu Ruata paw'n DNA test mai chu tha a ti ta a, Mahse, Magie pa Pu Zoliana pawh a tel ve a ngaih hmel. Magie chuan a be hreh khawp mai a, Pu Ruata'n, "Haw phawt ila, in atangin i pa chu keiman ka be dawn nia. I chanchinte pawh hriat a chakawm alawm" a ti a, An ngaina nghal viau lehnghal. Magie erawh a la tîm deuh. Tichuan, an haw leh ta phawt a. Zanriah ei ve nghal tura an sawm tlat avangin Zorema te a va hrilh leh te te a, a chanchin an hriat chák êm avangin engkim chu a sawi fai ta vek a. A pain a enhran bikzia leh a unaute nen an inan lohzia te pawh. Tin,hnawhchhuah a nih thu bakah Angeli video avanga a in luah atanga hnawhchhuah a tawh lehzel dante pawh a zep buai duh ta lo. Pu Ruata te nupa chuan an lainat hmel kher mai. 

Angeli chanchin pawh a hriatbelh leh ta a. College a kal ve mék a, hetia a nun khawloh chhoh tanna chhan chu a tet lai ti ila kum 12 mi lek a nih laiin a pa te zin hlanin an mistiri chhawr, an ina khawsa ve rih chuan a lo khuaikhem a niawm e. A sawi chhuah chuan thahah a vau a, thanthi a lo nei hman tawh si, nau a pai ta hial mai a. A nuten an hriat chuan rapthlak an ti hle, nau pawh chu a rang arangin an paih ta a, mistiri pawh rape case vangin tunah pawh jail-ah a táng reng a ni. Kha thil khan a tha lo zawngin a nun a kaihruai a, pawisak em em a nei lo chho zui a. Mipa a hre riau a,a lo hmelchhe bik lo bawk nen. A nute pawh hian thil thleng avang khan hriatthiamna chin an nei tawp mai a, hauh erawh an hau ve reng. Mahse, a la sim hleithei lo chu a nih hi..

A pa chu Pu Ruata chuan a call ta a, a rawn lak chuan a han insawi hmasa te tê a. "Hei in fanu Magie leh ka fanu Angeli hi phir niin kan hria a, an pian lai khan eng emaw tihsual a awm a nih kan ring, finfiah ngaihna a awm tawh si lo va, DNA test mai loh chu, naktukah i rawn kal thei ang em?in nu zawk pawh a pawi lo.." Zaidawh deuh hian a ti a. Pu Zoliana a rum nghut, "Kha mihring kha ka fanu a nih ka ring lo rêng a ni. Amah vang khan a u pawh ramtuileiloin a awm phah a, ka hmuh rualin ka khawih duh mai ang" a rawn ti tûn tûn a,. 

"Ekhai! Inbengdai rawh. Engkim kan lo hre vek tawh e. Naktukah chuan rawn ti thei hram la kan va duh ve, a senso chu ka tum vek ang" Pu Ruata chuan a ti duam duam a. 

Pu Zoliana pawh chuan,"Nia, ka lo tum dawn nia. Civil Hospitalah maw?" A rawn ti a. An inhrilh hnuah an dah ta rih. Angeli nau Tetea pawh a rawn haw ta a, a u te pahnih chu a dinchilh ang set sawt a, a melh tawn sek mai. A u chuan,"Ka phirpui a nih hi" a lo ti fiamthu a. 

"A tirah khan tu nge ka u zawk ka hre lo tep alawm le..zawng thing phel ang chiah an tih kha in nih chiah chu" a tih chuan a pa a lo nui hawk hawk a. "Zawng thing phel an ti lo vang, Zawng fian phel alawm" a lo ti dam thlup. Magie chuan Pu Ruata chu a ngainatawmin pa zaidam tak niin a hria. Pi Thani pawh a fel em em tho a, mahse, a nel vak lo thung. Zanriah chu hlim takin an kil a, chawhmeh an ngahin a tui hlawm kher mai. Magie pawn a ei ve teuh. A mualphona thlentu mah nise, Angeli chu a ngaina a, a khawngaih bawk. A thil lo tawn tawhte avang khan..

Zanriah ei khamah riak ve mai turin an sawm nasa a, mahse, ni em ema a hriat bik loh avangin Tetea chuan a va thlah ta a..Zorema te bulah engkim a sawi vek a, in pawh a la luah lut thei rih dawn lo a nih hmel. A muhil thei mang lo lehnghal, a ngaihtuahna buai nuaih nuaih chu hrehawm a ti. 

A han chhing ve zawk chuan mumang mak deuh a lo nei a, Nau neihna ward-ah hian Angeli nen an lo ding dun a, an hmaa nu pakhat an la hmuh ngai loh hian nau a vei mek a, a na ti chu a vial ngawlh ngawlh reng mai. Naute tap ri ngêk ngêk thawm an hre ta nghal a. Phir an ni..Chung nau pianghlimte chu nurse ten buaipui nghalin naute bawmah an muttir a. Hun chu a kal thut, zan a lo ni leh daih..zanlaiah doctor thuama inthuam hi a rawn lut a, chung nausen phir te chu thawm dim takin a pawm chhuak ta daih mai. Angeli nen mangang taka naute nu kaihthawh an tum lai takin a harh hlawl mai..