mistake 13

MISTAKE (13)

Ziaktu : Toni Rálte

A zing tho chu a rit bûr mai. A phone a on nghal a, data a on rual chuan whatsapp msg a rawn lut zut zut a, a la en duh rih lo. A va intifai tê tê phawt a, Sunday a ni naa inkhawm an tum lem lo. Dress pawh kha a keng lo rêng a. A ke pawh tlem chuan a zia deuh tawh, mahse, a la rap ṭha ngam meuh lo. Tukṭhuan an kil laiin A patea chuan, "Naktukah chuan maw hawn phei in tum?" Tiin a û chu a melh a. A pa chuan, "A nih mai loh chuan, hna kan ngah tawh angreng nen, Angeli erawh sawi tawh angin kan hnutchhiah ang a" tiin Angeli ngawi reng chu a va melh zauh a. A hlim loh hmel viau. Mahse, engmah a sawi hran lo. Chaw ei khamah an intihfel zawh vekah Long chair-ah hahdam taka ṭhuin a phone chu a check ṭan ta a. Malsawmzuala msg hmuh tur awm lo chuan a tihnual rawih mai. A lo rin ang kha a ni tak tak a ni maw? Mak tihna leh rinhlelhna chuan a la khat a, mahse, va biak hmasaka va zawh kual vel erawh a tum bik lo bur. Number a save loh aṭangin msg a dawng nual a, "Maggie, Keimah Zorina. I phone i off tlat sia, lo biak che ka tum a nia. Ka nuin a lo bia che tih ka hria, ka û paw'n a hria a, tunah pawh a la rawn haw lo" tih te, "Ka û awmna chu ka hre tawh e, a ṭhianpa U Zomuana inah a awm a nih chu.." tih te leh, "Ka nu thusawi kha engahmah ngai suh aw, ka pa pawn engmah a hriatpui lo a nia" tihte a ni. 

Zomuana hnen aṭanga a dawn ve thung chu, " Magie, thudik a nih ka ring lo naa, Mampuia nu bulah engtak nge i lo sawi le? Ṭhianpa hian engmah a sawi duh bawk si lo, zu a in char char ringawt" tih a ni. Hlauhthawnna a nei ta thut. A hriat miah lohin eng emaw kal dik lo a awm a nih a ring ta deuh a, Mampuia'n a rawn biak loh ngawt danah khan eng emaw hriat a nei a nih a ring. Mahse, Mipa puitling a ni a, fiahna nei lo va chutia a ngawi tawp chu a ngei ve deuh. Loh theih lohna avang zawkin Zomuana chu a call ta ringawt a. 

"U Zomuan, tunah engtin nge a awm?" A va ti nghal tâwng. 

"A muhil rih a, ka kai tho dawn em ni?" A rawn tih chuan, "A ngai lo, mu rawh se, nizan chuan engmah a sawi lo maw?" A va ti leh a. 

Zomuana chuan, "A rawn lut a, a ngawi reng ringawt sia, ka zawh tak sekah chuan, 'Ka nuin engkim a tikhaw lo vek' a ti ringawt a. Ka zawh chian lahin, 'Magie paw'n min thlah' a ti leh tawp ringawt a, zu a in nghal ta char char a, ka enliam ve ta tawp mai a ni" a rawn ti mawlh mawlh a. Magie a thaw kâwk, "A lo harh veleh min rawn be rawh se aw" tiin a chah ta ringawt a. Zorina chu a inkhawm a rin avangin a call duh ta rih lo. 

Tihtur êm êm a nei lo bawk a, a tuka buai chung ai chuan tiin a thawmhnaw vel a va thlep ṭha a, tlai lamah a nî te in lamah chaw an ei ve dawn thung a, Angeli pawh a riak zui nghal dawn a ni. Angeli sawi takah chuan damdawi tak hi a la ti nasa hman lutuk lo va, chuti tehchiam chuan a suffer pawh a na lem lo, mahse, zu zawk kha zantin deuhthaw a lo in tawh avangin chutia a han dry ve takah chuan thil a ei ṭha lo nen a kua a ṭha lo zui a. A zawiin kulcho ang dawn dawn ten a awm bawk. Drip khaisak a duh bawk si lo va, enkawl vak dan a awm lo. A pain chhuah a phal bawk si lo chu a tawm ve ta ngat ngat a, ngeiawm zawng pawn a awm tawh bik lo. Magie pawn a be lem chuang lo va, biak dan tur a hre vak lo a ni. Apuia rawn biakna kha hrechhuakin Zorema a call ta a. 

Reifê hnuah a rawn la ve chhak, a ṭawng danah ruih nei niawmin a lang. 

"I rui law?" Magie chuan a ti satliah a. 

"Rui chhe hran lo ve, tlem bak ka lem lo" a rawn ti a. A chauh hmel angreng. 

"Zawmi te an awm em?" A ti leh a. 

"Naupangho a inkhawmpui a. Naktukah maw i lo hawn dawn?" A rawn ti thluam a. 

"A nih ka ring, ngah nge zu te i lo in a? A ṭha lo êm mai" Magie chuan a ti a. 

Nui hakin, "Aa..ka in tam chuang hleinem, khua a har ve êm a" a ti ringawt. Magie chuan thutak deuh zawkin, "U Zorem, ka û ang tak taka ka en che i nia, ka khawngaihzia che pawh i hria. I fate an la te si, nu an mamawh a ni. Zawmi nen hian innei mai teh u..thil awm lo pawh a ni lo va" a ti ta tawp a, tlem chuan a zâm ve deuh. 

Zorema chu a nui hawk hawk a, mahse, a nui lui ve deuh tih erawh a hriat. 

"I â em mai a, Zawmi te ang nula hnahkhat te chuan a û pasalte chu engtin nge min duh se i tih reng reng" a rawn ti hluk hluk a. Magie rilru a zâng hawk zawk, a chhan chu Zorema chuan Zawmi chu a iai bik lo niin a hre tlat, Zawmi duhthlanna zawk a ngaipawimawh niin a lang. 

"Aa..tihah te chuan a û kalsan tak a pasal kha i nia, in fate pawh ama fate ang ve tho a ni. Aman a duh phawt chuan innei r'u, Zawmi chu ka lo sawipui ang" a ti ta zung zung a. 

Zorema chuan, "In hmanhmawh lu deuh a ni, amah Zawmi paw'n lo remti tehreng se, Tlani thlarau a zahawm ka la ti rih, nia, ka fate hi chuan enkawltu an mamawh khawp mai." A rawn ti chuai raih a. Tlani thlarau chu a zahawm khawp tak mai. Mahse, naupang an khawngaihthlak, Midang mitmei veng reng renga hun hman ai chuan thil hi ti bawrh zel ila, min sawi rei peih tak tak lo. Tlani pawh hian sawi ve thei nise, mi hrang daih neih ai chuan a laizawnnu neihtir chu a duhdan a ni zawk ngei ang. 

Chhun thingpui in dawnah Nancy'n a rawn ko va, a va chhuah chuan a nu chuan, "Mampuia nen in boruak a ṭha vak lo em ni? I ngui riau" a lo ti fiamthu a. Nui chungin, "Chu lam pawh a ni lo" a ti ringawt. Angeli chuan chauh hmel zet hian, "Nu, pa hi hrilh la, hetah chuan ka awm lo mai ang. Ka hreh ee" a lo ti a. A pa hi a chhuak rih a. 

Nancy zawk chuan, "Ngah nge maw i hreh viau le? An duat tehlul che nen..Aizawl aiin nuam i ti zawk ngei ngei ang" a lo ti ve a. 

"Min duat tho a, mahse, Aizawla ka ṭhiante ka ngai dawn asin, bakah hetah chuan inkhawm te, inlak felte kha a ngai dawn si" Angeli chuan a ti nang nang a. 

A nu chuan, "Nangman i pa chu be rawh, kei chuan engmah ka sawi duh tawh lo" a lo ti thung. Nia, a nu hian an pa hi ngam viau angin han lang ṭhin mah se, a tawpkhawkah chuan a hlau ve viau zel a, pu Ruata thinrim a hlauhawm ve bawk nen. Thingpui an in zawhah Magie chuan a ke chu a han phelh a, a vûng pawh a lo nep sâwt viau mai. A tuam ṭhat leh mêk laiin Malsawmzuala call a dawng ta a. 

"Aw" a ti hul hak. 

"Maggie" a rawn ti thâm ṭuak a. Magie chu roomah a bai phei ta vat. "Aw, eng nge thleng a? I nu sawi kha a dik em?' a ti nghal zung zung a. 

"Engmah a thleng lo, thleng turin i duh em ni?" A rawn ti hlur a. A la rui deuh pawh a ni maithei. 

"Ti nge zu te i lo in reng reng a,. A chi loh êe " a ti hlak a. 

"Ka nuin a lo biak che khan engvanga min rawn hrilh lo nge i nih?" A la rawn ti zawmah a. 

Magie chu inbengdaiin, " I switch off tlat sia lawm"a ti sap a. 

"Ka off lo, a va mak ve"a ti hû a. Magia chuan, "Aa. Engpawhnise, Cindy nen chuan in innei dawn tiraw?" A ti nghat a. 

"A sawi pawh i sawi peih, hmeichhe ho thuhla mai mai kha chu engahmah lo ngai suh. Naktukah rawn haw la, engkim kan tifel ang" a rawn ti leh hmiah. 

"I nute rilru a hel vek tawh ang" a ti ve tlat a. 

"Chulam a pawimawh lo, min ring la, min zui la a tawk" A ti chhum hmak a. Cindy chungchang han sawipui vak theih pawh a ni mai mai lo. A rin aiin Malsawmzuala chu a rilru a la puitling lo. Ama sawi dan takah a nau Zorina a tluk lo deuh a nih hmel. Mahse, lehlamah Malsawmzuala te unau hi tette aṭanga nu leh pate thu hnial hreh an ni ve a, Mampuia pawh khati khawpa insual hrat leh nula lama hlei a nih lai pawh khan a pain a han hrin deuh kha chuan a tlawm ta hmiah kha a nia, tihian nu leh pate na nâ na chuan thil an lo thlir thui zawk bawk a, eizawnna tha ve pangngai tak a neih theih phah ta chu a nia. Hengte avang hian an nu leh pate hi an zah bakah an thu hnial an hreh si a, Tuna Cindy vanga an buaina pawh hi hotê anga lang mah nise; Malsawmzuala nun a nghawng lo thei bik lo a ni. An inbiak zawh chuan Angeli a rawn lut a, inkiltawih hmel a pu deuh. A nau bulah chuan, "Meg, ka pa chu sawipui ve teh, nang chu a ngaipawimawh che a, heta awm ai chuan Aizawla Home-a awm pawh ka duh zawk" a ti leh ta ngher ngher a. A û a nihna laiah a khawngaih ve bawk si , "Nia ,ka lo sawipui dawn nia" a ti ta ringawt a. A pa rilru an sawhsawn theih erawh a ring chiah lo, Angeli chuan engvanga duh leh lo thar ta viau nge maw a nih dawn ni. 

"Taka! Mampuia te kha an innei dawn tak tak em ni? Cindy nen khan" a tih chuan Magie a phu zawk a. Mahse, inthunun leh vatin, "Dawn lo ve, A nute duhthusam mai mai a nih kha" a ti ta ringawt a. Angeli chuan nui chungin, "Malsawmzuala hi chu ka chuhpui tawh lovang che. Ka beidawng tawh, Ṭha deuhin inkawp rawh u" a ti a. A rilru tak tak pawh ni vein a lang, Magie pawh a lawm hle. 

Tlaia a pa rawn haw bulah chuan Angeli vel chu a thuphungin a sawi a, A pa pawh inngaihtuah hmel a pu ve, lehlamah an fanu a ni a, chhungte kuta han dah ngawt kha a tlawmthlak bakah a zahthlakna chen te pawh a awm ve lo thei lo a ni. An inbual zawhah a nî te in lamah an phei ta dial a, a nî te hian quarter an luah reng thin a, mahse, Pa Sawma rilru neih azarah in ding lai chu man to vak loin an lei thei ta a, an chhungkua an tlem sia, an thawl hen hawn hle. An zanriah ei pawh chu Angeli awmdan avang nge an hlim tehchiam lo. A tuar zo ta ngang lo nge, "Pa, inngaihtuah rawh, i fanu hi i farnu te kutah i dah ang maw? Ka nî te bula ka awm peih loh vang ni loin hetah pawh awm ila ṭhian ka ngah si, ka nî te rilru tihahtu leh timualphotu ka ni mai mai zawk dawn, Aizawlah phei ila, Home-ah min dah zawk mai rawh, kei pawn rilru ka siamfel ang a, ka rawn ṭha chhuak êm êm ang" Angeli chuan a ti ta bawrh bawrh a. An en ṭhap ringawt. Muangchangin a pa chuan, "Home-a awm chu i duh tak tak a maw?" A ti a. 

"Aw..ṭhat ve hi ka duh tawh, ka nun hi ka ning" a lo ti a. A nî pawh chuan, "Mate, i ti tak tak a nih chuan a ṭha lutuk alawm, ni e, i sawi ang khan hetah pawh awm la, ṭhian i ngah si a, tumna tak tak i neih loh chuan i ṭha dawn chuang lo, Home te angin kan khuahkhirh thei dawn bawk si lo che a" a lo ti ve mial mial a. 

A pa pawh chuan, "Ni e, Fate midang kuta dah hi nuam ka ti chiah lo. Amah a inhuama nun sim tak tak duhna rilru pua a luh dawn chuan Home chu ka be dawn nia" a ti ve ta a. Angeli leh a nu an thaw huai mai. Magie pawh tlem chuan a hahdam deuh. 

An va kal chhan ber pawh chu a hlawhtling ta chuang lo chu a nia, mahse, a pa chhungte nen an inhre pawp a, a lawm reng reng tho e. Zanah mut dawnah Mampuia nen an inbia a, Zorina kha chawhnu lamah a va call tawh a, a la buai deuh avangin eng êm êm an sawi hman lo. 

"I pa i hrilh ngam ang tiraw? Thawhleh zanah palai ka rawn tir ang" a rawn ti ta mai a. Magie chu a chiâi ve deuh. 

"Malsawmzual" a ti nghek a. 

"Aw..ka rawn tir dawn a ni mai. Lo hrilh hria la aw. Zaninah ka nu biak ka tum bawk e. Tunah chuan Cindy te a la buaipui rih a. Ka pa erawh naktukah ka sawipui ang" a rawn ti a. 

"I hmanhmawh lutuk" a ti ringawt. 

"A ngai tlat, He Cindy lemchan thiamna hi cho chhuah belh ka duh tawh lo,. Ka tina duh mai dawn" a rawn tih chuan Magie chuan a hrethiam ta deuh. Cindy zet chu aw. 

"Ka lo hrilh dawn nia" a ti ta ringawt a. Malsawmzuala chuan a nu biak a la tum avangin an dah ta rih. Magie chuan a kum a han ngaihtuah a, a rilru a buai. Kum chu tling tawh mah se; a tetlaia a lo suangtuah leh duhthusamte kha engmah tihlawhtling hman loin pasal a nei ang maw? Han in ui thei chu a ni miah lo nachungin hma chu a la ti ve a ni. A tlem berah kum 23 tal kha a lo dream thin dan kha a ni ve a. Mahse, a bialpa kum lama upa ve thawkhat tawh si hian neih a tum bur si a, Malsawmzuala bak pasal atana a duh bik si lo a nih chuan a thu a hnial thla thei dawn si lo. Rilru buai takin a mu meng kar mai. Mampuia nu khan a rawn biak leh a rin nen, a ngawi zui ta vang vang sia..amah lahin a be hreh tawh bawk si. 

A tukah chuan tukṭhuan ei khamah bawk Aizawl lam chu an pan leh ta a. A pa remruat danin an thlen zan chu Angeli pawh a la riak ve ang a, a tukah Home-ah a awm nghal ang tih a ni. Tuman an hnial ngam lo. 

Thenzawla thingpui ina an chawlh lai chuan tlangval lian lam, hmel pawh chhe lo tak hian an dawhkan lam chu a rawn melh reng mai a. Magie pawn a hmu reng, amah leh Angeli chu rilru buai hmel deuhin a melh tawn sek tih pawh a hria. Angeli hmelhriat a nih a ring, ani chuan a hmuh vawikhatna a ni tlat. An chhuak tur chu Tlangval chu kawngka zawnah a lo ding a, a tu amah pawh en bîk lo chuan, "Maggie" a rawn ti thut mai a. An hawi rual ṭhawt. 

Magie chuan, "Eng nge ni ta?" A ti hâ a. Angeli erawh lehlam hawiin tui a in a. 

"Ka pawisa min laksak kha min rul tawh la tiraw!" Pangngai deuhin tlangval chuan a ti a. 

"I eng pawisa maw? Kan inhre ngai em ni?" Magie pawh chuan theihtawpa insûm chung chuan a ti a. 

Tlangval chuan nui sângin, "I hriat vek kha. Thil zawng zawng min sawichhuahtir tum suh. A tha lo zawk ang" a ti sup a. 

"Ka ti tak tak, ka hre ngai lo che. Maggie chu ka ni ngei bawk sia..i sawi chiang deuh thei em?" A ti a. A aw pawh a nelawm vak tawh loh. A nu chu rawn kal hnai vein, "Engzat nge a laksak che a" a rawn ti a. 

Tlangval chuan, "Tam phei zawng a ni lo va, mahse, khatia inbum kha a ngeiawm ve êm a, zanah hotelah kan riak dun a, a tukah ka thawh hmain a tho a, ka pawisa kawl lai ₹23000 a la fai vek a, mualpho deuhin ka awm phah alawm" a ti a, ani pawh a ṭawngkam a nem fahran tawh bîk lo. A nu chuan, "A mualphothlak êm tak a nih chu, a nu ka nia, ka lo peksak ang e" tih leh a purse phawrh a rual a. Magie chuan a lo dang vat, "Ṭhianpa, keimah ka ni lo. Saw zawk saw a nia, Maggie chu ka ni ngei a, mahse, ka phirpuinu sawn ka hmingin mipa a mutpui thin, buaina pawh ka tawh tam phah viau. Chuan a pawi ka ti hle mai, i pawisa a lo ru chu" a ti ta hmawk hmawk a. Angeli chu hawi pawh a rawn hawi ṭha ngam mang lo, a bâna tatoo chu a showl tê bah chuan a hliah ṭâwk tâwk a, tlangval chuan a va en vâng vang, Magie nu chuan Magie rum deuha melh pahin, "Ṭâng ṭâng zel che hian aw, i û hi tiang hian puh zel ṭhin suh. I â êm mai. Kha tlangval la rawh" tiin pawisa pek a tum a. Tlangvala erawh chu an rin loh ang takin Angeli lam panin a pen phei pâwk pâwk a, a showl tê chu a va phihthlaksak ta a. Maggie hi chuan kawr ban tlawn dum a ha hrim hrim sa a. Angeli bâna tatoo a hmuh rual chuan, "Nangmah ngei hi i lo nih hi.." Tlangvala chuan a ti hriam hraih a. A mitmeng pawh a nelawm vak loh. Pu Ruata te pawh an rawn kal hnai a, mikhual dangte erawh chuan an rawn ngaihven vak lo. Thil awmzia an han inzawt a, Pi Thanpuii lah chuan Magie zawk chu puhluih ṭâlh a lo tum ve sek a, Mahse, Tlangvala chuan, "Ka pi, hei zawk hi a nia hotela ka riahpui chu, ani hi chu a âng ka ti vak lo rêng a. Engpawhnise, pawisa chu ka laksak rih lo ang che u, amah ngei hian min pe rawh se" a ti ta a. Angeli erawh a ngawi hmak. Magie paw'n engmah a sawi tawh lo. Chupa chuan Angeli thla chu a laksak a, "Ka lo kawl ṭha ve ang" a ti nghut a, a kal vang vang. An kal leh hnuah Pi Thanpuii chu a âng ta chiam chiam a, "Mualpho lova tihfel theih reng, Hmingthansiami hian a rawn tichhe leh vek alawm. Khatia tih kual vel kha a ṭul lo lutuk, keinin engkim kan hriatthiam chuan a tawk. Inlak fel tum thlak lutuk" tiin. Magie erawh chuan, "Nu, la virgin ta la, hotela mipa i riahpui lo chungin riahpui angin i lang ang maw? Ka thei ve lo. Ka tihsual ni miah loah engmah ka tuar tawh dawn lo" a ti ram hmak. 

A pa pawh chuan, "A dik, dikna hi chu pholan zel a ṭha..Engmah sawi zui tawh suh u" a lo ti ve a. An ngawi zui ta. Malsawmzuala chungchang kha chu zana sawiah a khêk rih a ni. 

Aizawl pawh tluang takin an thleng a, Rawng inbawl chawp tur an nih avangin Magie pawh a buai nghal char char, a ke a rah ngam ve deuh tawh bawk a. Zan dar 7 ah zanriah chu an ei ve hman hram e. Zanriah ei kham tlema an ṭhut khawmuan deuh hnuah Magie pawh a inbual fai ve thei ta chauh. Angeli chhuah châk a za leh ṭan tawh. Tun ṭum chu a pa a inrawlh lo, a nuṭa Tetea a ṭang na ngang mai. 

"Ka û mah nila; ka farnu i nih angin kut pawh ka thlak hreh dawn miah lo che a nia. I chhuak a nih chuan ka tihtur chu i rin phak bak a niang" a ti hmiah mai si. Angeli paw'n Tetea hmel a han en chuan a pallui ngam ta lo nge, a roomah a lut ta zâl zâl a. Magie erawh a inbual zawhah chhuk lehin a pate chu thingpui hâng a lumsak a, Tetea pawh awm ve rawh a tih avangin a ṭhu ve. An ṭhut khawm hnu chuan, "Pa, ih, Malsawmzuala'n palai lo tirh a tum a" a ti ta tawp a, a vawikhat hmachhawnna a ni a, han sawi mai dan tur pawh a hre bik lo a ni. A nu leh pate chuan an rawn melh hâw a, mak an ti tih a lang reng. A nu zawk chuan, "A va mak ve" a ti hluai a! A hmelhmaiah engmah hmuh tur erawh a awm lo thung. 

A pa erawh chuan, " A va hmanhmawh tut tut ve" a lo ti a. Engkim sawi vek mai chu ṭhaa a hriat avangin Cindy chungchangte chu a sawi ta vek a, a nu bawk chuan, "A tihchi dawn em ni? Mi pasal tur lo neih ve ngawt chu" a ti a. A nu ṭawng duhdan hi chu a ngei thei, "Cindy pasal tur a ni hleinem, Cindy hian a ngaizawng a, lem a chang mai mai alawm. Cindy vang zawkin min neih hi a hmanhmawh ta chûk chûk a ni" a ti ve ta hmak a. A pa chuan, "Ka hrethiam e. Mahse, a chhungte lam rilru te hriat ve a va ṭha ve, in innei tê tê ang a, i chan a chau leh si ang tih ka hlau" a ti a. Hei hi chu a dikna chen pawh a awm. Cindy te an la awm ve reng phei chuan. 

"Kei pawh chu chu ka buaina a nia. Engpawhnise, naktukah hian inhmuh kan tum a, ka lo sawi ṭha leh ang. Kei pawn hma ka la tia, nulat rih ka la duh ve tho" a ti a. 

A nu bawkin, "Nia, nulat tluk hi a awm lo a nia. Bakah i û te pawh han dam felin a rilru te pawh siam chho se, ngaihngam takin nang pawn i nei thei ang a" a ti a. A dik reng mai, Angeli a la mumal loh laia inneih lo sawi kha an chhungkaw boruakin a tuar leh thei dawn tlat. A û hian rilru mumal a pu hlawl si lo va. 

Mut dawnah bawk an inbe leh a, mahse, thil zawng zawng an sawi lo, a tukah hmaichhana sawiah an khek ve a ni ber. Magie mut a chhuak tawh bawk nen, an inmangṭha ta vat a. Magie pawh a mutui kher mai. A tukah pawh harh vâkin a rawn tho a, Hmuni a pui ve nghal. Hmuni chuan, "In zin zan khan Numami te chu an lo haw a. Niminah khan mipa lamin an fapa chu an rawn hruai haw ve chiah"a lo ti ve nuah nuah a. 

"Numami nen khuan in inrual em?" Magie chuan a lo ti daih a, "Kei aiin a thlain a naupang. A huaisen e, a la naupang sia" a ti a. Nia, tunlai ṭhangtharte hi an huaisen mah mah tawh a, an dai buakah an tâng fô reng a ni. A nu leh pate chuan Angeli an hruai dawn a, Angeli chu Mizorama Addiction Home changtlung ber leh senso pawh tam berna hmun Mizoram Kohhran hrang hrangte insuihkhawm pawlin an din, Durtlangah an dah dawn a, he Home hi chu Addiction centre dang ang a ni ve lo va. Tharum thawhna te, Inchhawr luihna te a awm ve lo. Ruihhlo ngaite hi a nihna takah chuan damlo an ni a, enkawl ngai, dimdawih taka enkawla Pathian thu nena zawimuanga khalh chi an ni. Tihluihna hmanga dawra simtir theih hi an awm a rinawm loh. Khawi lai Home emaw Centre hmingpu ve si, tu te emaw sumdawnna ang hi chu inenkawlna a chhiat bakah ei leh in a chhe êm êm a, damlo tana han ṭhatpuina chi rual a ni lo. Chutakarah ruang chhuak an awm fô lehnghal a, tharum thawhna lah a hluar si. A enkawltu te zawk hi enkawl ngai khawpa rilru piangsual an awm nual bawk. Kan sawi pawp ta sa sa, Mi thenkhat chuan, "Hetiang hmuna dah lo tur hian fate chu enkawl ṭhat mai tur" an ti châwk, an thlirna zawn hi a dik lohna sawi tur a awm hran lo. Mahse, mihring kan inang vek lo va, fa enkawl thiam hi thil harsa tâwp a ni ve a, kan fanu kan fapa an nih vang ngawtin engkimah kan thunun thei bik lo. Sual leh ṭha indo rengna karah kan tu leh faten an lo bawhchhe vein an lo pelhe ve thei. Sap ramah pawh hetiang hi chu an tam mai. Mahse, an inenkawlna erawh a ṭha viau zel a, sawrkar lamin an ngaipawimawh bawk a. Mizoramah chuan NGO lian tak tak te pawh kan beisei an phak lo fô. Kan veng kan khua felfai zawk nana ruihhlo ngaite kan thawnbo theih chuan kan lawm tawk viau ringawt zel. Mahse, chu chu ṭhat hlenna a ni ngai si lo. Ruihhlo a bikin damdawi avanga chhungkaw buaina leh harsatna hrethiam phak lo te hi chu vannei tak an ni. A chenchilh chhungkua ami te hi chuan sawi tur an ngah ang,. Han ensan ngawt dawn se, an lainatawm ngawih ngawih bawk si, chhungkua an rawk a, an chhungrila damdawi hnathawh khan engmah pawisaktir a nei tawh si lo. An hreh êm êm thil pawh ti lo thei lo va thunun an ni hi Pathian aṭanga thlir chuan mi khawngaihthlak tawpkhawk an ni. Sawi tur tam tak a awm âwm e. (A ziaktu hi lo hrethiam ru 🤭 

Angeli pawh beiseina sang tak nen an han hruai ve ta a. Ani pawh a ṭang bik lo. An neihin a tlin bawk a, Room an book-ah pawh a to ber chi an book sak a. A course hi thla 9 a ni dawn thung. Inkan hun erawh thla khatah vawi hnih a ni a, A rawn ṭhachhuak hram turah ngai ang. He ta thawkte hi mi piangthar satliah an ni mai lo va, ruihhlo vanga harsatna tawpkhawk lo tawk tawh, tawnhriat lo nei tawh te deuh vek an ni. Tin, a man a to kan han ti ngawt tak naa, donation an dawng nasa bawk a. Mi rethei, awmna man nei lo te pawh a thlawna awmtir an ngah mai. Tunah hian an awmna buildingin a zawh tawh loh deuh avangin a piah lawkah building sak tumin ruahmanna an siam leh mêk a ni. 

A pain an kal dawnin, "Mate, theihtawpin kan lo ṭawngṭaipui ang che. Rawn ṭha chhuak hram rawh aw" a ti sup a. Angeli pawhin, "Min ngaihtuah suh u..fanu thar hlak ka rawn ni tawh ang. Magie pawh kha ṭha takin in lo enkawl dawn nia" a ti a. Ngaihṭha takin an hawsan ta a. 

Magie pawh Zorema bulah a sawi lawk tawh bawk a, Malsawmzuala nen an chhuak dun ta a. Motor a khalh thei tawh a, mahse, vawiin chu lenvah vak pawh an ti lem lo. Zomuana in lam an pan dun leh ta mai. Zomuana'n chabi a lo dahsa a, amah chu hnaah a kal. Long chairah insi rialin an ṭhu dun a, an inngai ve tawh bawk nen, an infawp deuh reng mai. 

"Ka pa chuan a hma a tia, bakah Angeli kan dahbo rih nen, a awm loh laia thiltih chu ka duh bik lo bawk a. Cindy te in bula an chen tawh loh hunah leh i nu rilru a hmin hunah ti zawk ila" Magie chuan a ti malh malh a. Naupang mah se; Mampuia bula thil sawi zah vak hi a nei tawh bik lo. 

"Nia, nizanah Zorina nen kan sawi dun a, ani pawn i sawi ang deuh kha a nia a sawi. Kei Cindy te nufa ka mil loh luatah ka lo hmanhmawh khu ruai ve deuh bawk a, i tih dan dan a ni mai. Nia, ka nu nen pawh kan inbe tlem rih khawp mai" a ti a. 

"I nu hi mak ka tihzawng tak a ni. Cindy hian a hneh thiam a niang. Bakah a hmain Cindy hi a lo duh ru sa ve hrim hrim a niang" a ti nghat a. A zep buai peih tawh bik lo. 

"A dik ang, mahse, ka nu chuan min nawr na ngam dawn lo. Tuna ṭha ber chu Cindy te chhuahtir khu a ni. " A ti a. 

"Engtin?" A lo ti vat. 

"Han inhrilh dawt hi a nuam lo va, an chhuah mai takin tiin an rualin chaw te ka han ei lo va, ka han awm bo deuh reng a, mahse, ka nu vang nge chhuah lam reng reng an sawi duh si lo. Keimah ngeiin Cindy nu bula sawi mai ka tum ta a ni" a ti ta a. Magie chuan ti suh pawh a ti duh tawh bîk lo. A ngei ve tlat tawh a ni. Mi ina fanute damlo dah reng te chu zah pawh an zak lo mawni ka ti. 

Malsawma chuan, "Chuan, Doctor kha enthlak emaw chhui ruk ka châk, Cindy nu te nen hian engtin tin emaw an lo inbe thiam a nih ka ring. Ka nu hi chu a tel ve ka ring chiah lo va, a lo tel ve a nih chuan ka na ngawt ang" a ti dam thlup a. 

"Nia, enteh, khatiang natna kha a awm ka hre ngai lo reng reng, mahse, Doctor khan an pahnih inkarah sulhnu hriatreng tur an lo nei tawh a niang te kha a ti sia..thudik sawi teh, eng emaw thleng hi chu a awm tawhin ka ring, ka thinrim lo vang" a ti ta mawlh mawlh a. Mampuia a khi suk ringawt. Magie chuan a zawt leh sek sek a, "A va mak e aw. Pathian hmingin engmah Cindy nen kan inkarah a thleng lo. Farnu angin ka en..a bak a awm lo" a ti nghet ta charh a. Magie pawh a hahdam huai mai. 

Hmalam hun sawi dunin, Malsawmzuala'n indanpui nghal mai a tum dante a sawi a. Lehlamah chhuak tur tho tho an ni bawk a, chhuat vat mai kha a felfai zawk. "Mechanic hna hi chu i tui tih ka hre tho va, Pathian zarah ka hlawh a tam ve thawkhat tawh a, inah fate enkawl la ka duh zawk mang e" inthlahrun hmel lek lek hian a ti a. Magie pawh chuan, "Fa neih hnute chuan ka thawk reng thei nang..khalamah chuan buai suh" a ti ve mai. Nilêngin hun nuam tak an hmang dun a, thianghlim tak si hian fianrial hun a lo hman theih a, rui lo hai lo pawn nuam hi a lo chen ve theih tho a lo ni. 

Zanah erawh Magie chuan call danglam tak a dawng leh ta tlat mai. 

"Margareth i ni em?" A rawn ti a. A aw chu a hriat hnu a ang. 

"Aw ni e" a ti sap a. 

"Cindy ka nia. Ka pasal Malsawmzuala nen hian in lo inbe ṭhin niin ka hria a, lo be tawh lo la ka duh khawp mai. Ka dam lo bawk si a, min khawngaih theih chuan ka lawm ngawt ang" a ti sar sar a. Magie a nui hawk. 

"I dam mah mah a nih kha" a ti ve salh a. 

"Eng maw?! Min hria em ni? Kei chuan ka hre lo che, mahse, ka nuin i number hi min pe a. Call tur chein min tia.." a rawn ti vei luam a. 

" Tu i nu maw?" A lo ti hâ a. "Aw..ka nu, Mampuia nu mawle" a rawn ti a. 

Magie a nghawng deuh, mahse, "Amah chu ka lo bia ang e" a ti dam thlap a. Cindy chuan, "I va huangtau ve, i bialpa nupui ka ni tihah hian chiang la a tawk..zaktheilo lutuk, mualpho i duh mi?" A rawn ti êrh a. Magie chuan an inbiakna chu a record ta zauh. 

" tder i va thiam ve..i pasala nu biak i phal loh danah thup i nei chiang" a ti a, a thinrim duh miah lo bawk. 

"Tenawmnu, khatin min ti reng reng suh. Malsawmzuala hi ka ta chauh a ni. Amah hnaihtu te apiang chu ka hnawtbo zel ang. Lo be tawh lo la a ni mai" a ti leh hlawih hlawih a. Magie chuan, "Hei tunah pawh min rawn call mêk asin. Min tihdan hi ka hrilh chuan a lawm vak lo vang" a ti a. Tahzet chuan Cindy chu a thinrim tawh ngang a niang, "Zawngi, zahna i va tlachham tak êm, nangmah vangin damni hmel ka hmu dawn lo a nih hi..hmana social mediaa i mualpho ang khan mualpho leh i duh mi? Mi pasal kawp hreh lo, mi hur i nih kha, i phirpuite i puh kual leh vel a. Mampuia nu te pawh ka hrilh vek dawn" a rawn ti ta buan buan a, Magie a khi sak, "Cindy, ka lawm e. Muhil der kaihthawh hi chu an harsa rêng a ni. der tawh suh..mangṭha rih mai" tiin a dah ta a. A lo record chu a lawm ngei mai, a duhdan ang takin Cindy chu a chhaih kawlh ta bawk nen. A ât loh chianzia chu Magie a hria a, phirpui a nei tih pawh a hria. A nui ta var var a. Chu a thil record chu Malsawmzuala a thawn nghal. 20 mins velah a rawn call a, "Ka va chhuang che ve, Duatpui" a rawn ti hluai a. 

"Tikhan engkim chu a chiang tawh mai lo'm ni?" A va ti a. 

"Chiang viau e, ka nute ka va ngaihthlaktir ve lawk ang e. Ka rawn be leh ang che" a ti a. A dah ta rih. 

In hnuai lamah thawm a rin deuh avangin a zu chhuk ve a. Tetea leh a nu an lo indinchilh ran mai. Tetea hmel chu a tak ran mai a, a thinrim mitmeng pawh na ngat ngat tak a ni. A nu pawh a sa hle tih a biang taih hlar danah a lang. 

Apa a awm si lo..a rilru a hah deuh. A nu chuan, "Muanzual, mi pallui a nih chuan he in aṭang hian i chhuak ang. I hria em? Saw hmeichhia saw ka duh lo, min phû hlawl lo" a ti hlak hlak a. 

Tetea chuan dam deuh hian, "I duh emaw duh lo emaw i duh loh thu an bula sawi fô kha eng nge a ṭulna? I tina a, zak takin i siam asin. Aw, saw hmeichhia saw ka nei ang, A ṭul tul ka thawk mai ang. In aṭang chuan ka chhuak mai ang. Nang ang ramhuainu ka lo nei che hi mi vanduai ber ka nih hi" a ti a. A insûm nasa hle tih erawh a lang. Ani rawlthar luhlul lai, an tih tawh lam ti nghut chi a ni si a, a nu hian chu chu hrethiam se zaidawh deuh zawk se a fuh tur. Tetea chhuak tur chu Magie chuan a lo chelh vat, "Tea, kal suh, hetiang zawng chuan awm loh tur..ka pa a awm bawk si lo" a ti a. 

"Engmah i hre lo a nih kha U magie, ani sawn vawiinah Dikteii kawngkal lai lo ko dingin mi zawng zawng hmuh laiin a lo hau asin. A zak lutuk a, a ṭap tawp asin. Khatianga tih kha eng nge a ṭulna? Ka rilru a tihel mai mai zawk" a ti ta bawrh bawrh a. Magie paw'n a nu chu a thiam miah lo, mahse, "Engpawhnise, in chhuahsan a ngai lo. A mualphothlak..nakinah ka nu pawn a hrethiam ve mai ang" a ti ngial a. Tetea pawh chuan chutitaka a û in a chelhzui takah chuan a zah ve deuh nge ni, a pindan lamah a chho ta daih a. Magie chuan a nu chu khak a tum lo, amah aiin a nu a nasa leh dawn tih a hai lo. A phone a rawn ri ta bawk nen, Mampuia a ni a, phur zetin a la ta a. 

"Ka nu ngaihdan pawh a dang ta daih e. Naktukah Cindy te chu awm hrâng rih turin a ti dawn ta a nih chu. " A rawn tih chuan Magie lawm chu a khi var var mai. An tan kawl a eng ve dawn ta e. Ngaihṭha takin zan hun pawh a hmang liam ve ta. 

A tuk aṭangin a hna a zawm leh ta a, Lawmkima nen an inphur leh ta, Lawmkima nen hian inkawmngeih tia sawi theih ni lo mah se; an inhaw hran lo. Zorema pawh a rawn kal a, a rui lo niin a lang. Zawmi vel chu chhun chawlh laiin an sawi chhuak leh a, Thutak deuhin Zorema chuan, "Amah Zawmi hi be phawt u la. Kei ringawt min hrilh a" a ti ta a. Engkim chu a ṭha chho ṭan ti mai ang, Zawmi biakna remchang atan tiin a tuk tlaiah Zorema te ina chaw eikhawm an rel thlu ta nghe nghe a. Maggie te inphur haw chu Malsawmzuala'n a lo hmu ni tur a ni. "Kha pa kha phur tawh suh ka tih che kha.ka thu i va awih lo ve" a rawn ti pek a! Lawmkima takngial pawh a thîk chu a nia. A va hahthlak thin tak. 

"A khawngaihthlak ve lawm" a ti mai a. 

"Hmeichhia phur reng ila i duh bik dawn mi?" A rawn ti hlur a. 

"I naupangchhia thei sia maw..a mak..Lawmkima chauh hi chu enliam ve rawh" a ti a. A nui kar kar bawk. 

"Cindy te pawh an chhuah tak kha. Lungawi lova in chhuahtir kan duh lo va, ka nuin, 'Mikhual kan nei dawn si a, an tam tham nen, mikhual neih chhung chu i pute inah in va awm rih mai dawn mawni' a tia.. mahse, an hriatthiam vek tho ka ring" a rawn ti a. 

"A ho êm mai, a pasal zawn dan a ṭhing si" Magie chuan a lo ti. An han nui dun leh rih. Angeli lah a hnawksak pha tawh si lo, Biteii kha chu Magie tak pawh hian enghelh thamah a ngai hran lo. Tunah chuan Pathian leh Kohhran hote hmaah inneih thutiam an chham hun chauh chu an thlir ve thei ta..

Hetih mêk lai hian Tetea leh Dikteii te nunkawng erawh a bumboh chho tial tial ta mai. A nu chu a pa pawn han hau thin mah se; khap daih a harsa tlat. A fapa neihchhun tan chuan nula amah aia naupang, khawsa thei ve pangngai a duh tlat si. Nia, mi nute zawng zawng duh pawh a ni mahna..mahse, a fapa hian a naupan ngaihtuahin tih takzetin Dikteii hi a hmangaih tih a hre lo a ni ngei ang. A tuk tlaia Zorema te ina chaw eikhawm tura an kal khawm laiin Tetea'n a rawn call a, "U Magie, ka la naupang viau naa, Dikteii ka ru dawn" a rawn ti ta mai a. 

"Awii, tete, ni lul lo ve. Kum pawh i la tling si lo,. A ṭha lo. Khawngaihin keimah vang talin ṭhulh rawh, ka nu chu ka bia ang. Theihtawp ka chhuahpui ang che" a ti mawlh mawlh. A ngawih vang vang hnuah, "Aw le, kumin chhung hi ka nghak ang a, nakkumah chuan ka puitling ve leh hlek ang a, ka nei ang" a rawn ti ta a. Magie pawh a thaw huai mai. Zana a hawn hunah a nu chu sawipui a tum nghe nghe. An chaw eikhawm chu an hlim ve dar dar khawp mai. Zawmi pawh an fiam leh nak nak a, fiamte hi a dawl a nia. Eirawngbawl zawh tawh, an âwl lai takin Magie chuan Zawmi chu a titipui ta a. 

"I û fate an ni a, i hmangaih êm êm tih a lang. I û ai i awh hi a ngai a ni. U Zorema nen hian innei mai rawh u. Thil âwm lo pawh a ni lo va" a ti ta a. Thu zep ṭit ṭet neih hi a thiam vak lo a ni. 

"Awii, ka zak e. Miin min sawi duh dawn asin" zawmi chuan a ti a. 

"Mi sawi tih mai mai, chhungkua a pawimawh zawk. I û fate hi i khawngaih lo mi? Mi dang nuhrawn hrawntir i phal mi?" Magie chuan duhthawh zetin a ti a. 

"Phal miah lo" a lo ti hmiah. "A nih chuan innei ru, tun tut tutah a ngai chuang lo , U Zorema pawh kan be tawh aw" a ti a. Zawmi chu a hmin ta tih a hai lo. A lawm kher mai. Tichuan, hlim takin zanriah chu an kil ho ta a..an haw tur scooty a start laiin Cindy'n a lo call a. Lak loh a tum zet naa, a laksak hram. 

"Hello" a ti sap a. 

"Maggie maw? Keimah Cindy nu ka nia. Zaithanchhungi..naktukah i remchan chuan hmuh che ka va duh ve" a rawn ti a. Magie pawh chuan mak a ti deuh. Mahse, ṭha takin, "Hun ka lo insiam dawn nia" a ti sep a. An dah zui nghal…