mistake 12

MISTAKE (12)

Ziaktu : Toni Râlte

Biteii chuan nui sâng chungin, "Hello, ka hmu che chu ka lawm hle mai" tiin a bân a rawn phar chhuak vah a. Malsawmzuala paw'n a lo vawnsak ve chat a, "A lawmawm e. Chuan, hei ka bialnu Margareth a nih hi, Meg, Biteii hi kan MLA pu Chungnunga fanu a nih hi" tiin Maggie a melh a. Biteii leh pi Mawii te hmel chu a rum nghal ûl mai, Magie lah chuan nui sâng chungin, "I hmelṭha hle mai" tiin a rawn chibai zui ve zat a. A bialpa hi a luck mah mah a ni. Ni e, luck tur pawh a ni reng a, Eizawnna zahawm leh ṭha tak a nei a, a hmel lah a ṭha si, chhungkaw zahawm leh pangngai tak aṭanga rawn seilian a ni bawk nen, Ruihhloin a tibuai ve bawk si lo, hmeichhia kei ka ni inti ve tan chuan bawh zui ruak ruak tham a ni ve tlat a tin ni. Chuvang chuan Magie paw'n ṭanlak a ngai tih a inhai bik lo. He pa hi chân a duh loh chuan..

Pi Mawii chuan, "Maggie i tih fô hi sex video nei kha a ni lo em ni? Hetiangte chu a biak pawh be tawh suh, an hmuh dan che a dang vek ang" zahpah miah lo hian a ti zat zat a. Mampuia'n chang beng bawng hian, "Nî, Ka bialnu hi nula virgin a nih hi, chuan, ka ngaihzawng turah buaina lo nei buai duh suh. Ka neih tur a nia, ka duhthlanna a ni" a ti nghet ta charh a. Biteii mitmeng chu a hnual deuh naa, Magie a melh danah erawh hnuaichhiahna a lang thei. Nia, an dinhmun leh hmel leh incheina zawng zawngah an inthlau ve êm a ni. Mahse, magie chu chutimaia zam bechhe tur a ni bik lo. Malsawmzuala chuan a bialnu chu kaiin Zorina leh Sangteii te lo inkawm mawlh mawlh bul lam a panpui ta daih a. 

Pi Mawii chuan, "Khanglang chuan, Beidawng miah suh aw. Ka awm alawm..in innei ngei ngei ang" tiin Biteii chu a hnem a. Aizawla chhungkaw ropui leh hausa deuhte huang chhungah hian hetiang poltics hri chhia hi a lêng nasa tawh viau. Pi Mawii pawh hian engvangin nge Biteii hi a duh êm êm tih zawhna chu a hma a sial vang tih chu chhanna a ni mai awm e. Biteii te leh Pi mawii te hi office pakhata thawk ho an ni a, Biteii nu chu an chung en deuh bakah a pa MLA a lo ni kher bawk nen, amah a hna a tlin vang êm êm pawh ni loin a rank a sang a. A duhnaah a nelawm thiamin mi tihlawm a lo thiam bawk nen, Biteii hian engtin tin emaw Malsawmzuala hi a rawn ralkhat hriat ve a, a mipa duhzawng tak a lo ni ta si. A stalk-na lamah an thawhpui Pi Mawii chu Mampuia nî a ni tih a hre ta a, a vehthlem chho ṭan ta kha a nia. Pi Mawii lah nu â ni hek lo, Biteii hman ṭangkai tum ranin theihtawp a chhuahpui chho ta a. An chhungkaw chanchin leh Mampuia mizia leh duhzawngte pawimawh tur zawng zawngte chu a hrilh fai vek a. A nihna takah chuan Pi Mawii hi an chhungkaw eizawngtu ber a ni a, an pa hian engmah a thawk lo ti ila huan chhetê a nei ve a, thawhchhuah a nei êm êm lo. Fa pahnih chiah an nei a, a fa upa zawk Mary chu Master degree zo ve tawhin hna a zawng kual ve mek a, an fapa Muanpuia erawh duatsual ni vein zirna a chawlhsan tawh a, ho takin a nung ve mai mai a ni ber. Chuvang chuan Pi Mawii te chhungkua hi Malsawmzuala pate chhungkaw lamah khawsa thei lo ber pawl, a unau ten an puih liam liam ṭhin an ni a. Chutianga awm reng chu Pi Mawii chuan a duh bik lo, tihngaihna erawh a hre si lo, Biteii hmanga a fanu Mary hna hmuhtir chu a tum lian ber a ni ta a ni. Biteii paw'n a pa a biaksak tawh nghe nghe a, MLA satliah tan chuan hnaa thun ngawt a lo harsa ve nen, tihian an la tângkhang rih vel ta a nih hi. Biteii hi Mampuia aiin kum 4 velin a naupang awm e. Nula hnahkhat a ni tawh lo va, Pasal ûmin nau pawh a pai ve hman a, mahse, a chhiat ta hlauh a ni. A pasal ûm chu a chhung ten duh hek lo, nau a chhiat zui ta bawk nen, innei ta lo chuan tihian a nula hnahkhat len ve leh ta a ni. A nung ho ve a, mahse, chutia hmingchhe tur khawpa va inpho langsar lo tawk velin a fing ve tlat thung. 

Biteii chuan, "Saw hmeichhia saw engtin nge a duh theih a?" Ngaihnep hmel zet hian a ti nghat a. 

Pi Mawii chuan, "Ka hre lo, a kherh nasa a niang" a lo ti a. Ani pawh a lungawi loh hmel kher mai. A vahpa hian a thu a awih viau ṭhin , A hmaa a bialnu Remkimi nen pawh khan an inhmelhriat ṭha hle. Malsawmzuala pa Pu Lawmsang te unau hi an hûng ve a, unau 7 lai an ni. An upa ber hmeichhia hi Churachanpurah pasal fanaute nen an khawsa . Midang te erawh Colony khatah an la awm vek a ni. An hûng bawk a, an zahawm bakah chhiat ṭhatah pawh an thawh hlawk ve hle. Pi Mawii kha Mampuia pa te unau zinga a milai a ni. Pu Lawmsang chhang chiah a ni a, sawi leh sawi hnu puih a ngaih deuh avang hian a unaute lakah pawh hrang ta riauin inngai thin. A unau dangte chu anmahniin eizawnna ṭha tak nei pawh nise, an kawppui te pawh hna nei an ni fur a, a pasal chu iai chang a ngah thin mai. Mahse, ṭhen ngawt chi a ni bawk si lo. A fanu Mary'n sawrkar hna a thawh ve theih chuan an kâng chho ve ang a, a unau dangte pawn an ensang ve deuh tawh ang chu..

"I thinrim em?" Magie bengbulah Mampuia chuan a ti sup a. 

"Rim dawn pawn rim vak chhan tur a la awm lo" Magie chuan a lo ti duah a. Mampuia thla hualna chaw eikhawm a lo nih vena laiah an hûng si a, ruaiṭheh tenau a ni ringawt. Tleirawl hmelṭha zet zet lah an tam. A tlangpuiin Malsawmzuala te unau chuan zah an kai bakah an thu an ngaichâng deuh niin a lang. Zorina leh Sangteii pawh chu an inkawm thei phian mai, an sawi duhzawng a lo inang viau mai a; Magie phei chu a lawm ru hle. Inngaizawng daih se te a lo ti rilru a, mahse, Sangteii hian mipa a ngaihsak lo khawp mai a; helam kawngah chuan a bil ve khawp ang. 

Zanriah chu an peih fel ta a, Kawt zau nuam tak an nei bawk a, chhungkaw chaw eikhawm an nei fô tawh a ni bawk a, chaw ei dawhkan an lo hung tlar dal mai. Magie te pawh Malsawmzuala te unau hnih nen an paliin chawhlui chu an kil ho a. Bawihi erawh a cousin dangte bulah a ei thung. Chutia chaw an ei mawlh mawlh lai chuan Pi Mawii leh Biteii te bawk kha rawn lang lehin thleng an rawn chawi a, chair lain an rawn kil ve leh ta chawt mai. Boruak a ṭang ru hle, Biteii chuan, "Dawhkan awl a lo awm mai tawh si lo va, pawi in ti lovang chu maw?" A ti thliam a. 

Zorina zawkin, "Ti lah lo ve..ei ṭeuh r'u" a lo ti vut a. Zorina hi Malsawmzuala ai chuan a hniam hret ang a, a û ang lo taka fai veng, hmul pawh nei vak lo a ni a. Hmeichhe thenkhat chuan a tuai an tih tur ang type kha a ni. Mahse, a tuai lohzia erawh an chiang viau lawi a! A ṭawng duh bakah midang kawm neltu ber a ni. Mikhual an neih paw'n Zorina a awm chuan an zum rei ngai lo. 

Ni Mawii bawk chuan, "Bite, sa i va la tlem ve, Mampui, va lak belhsak teh.." thuneih hmel fê hian a ti lâng lâng a. Mampuia chuan, An makpa Bma lo hawi vual vual chu koin, "Sa min lo pek belh mai teh" a va ti a. A rawn kal vat. Sa chu a rawn dah belh a. Ni Mawii chu a ngawi hmak mai. Maggie chu chaw ei buan buan chi a ni lem lo va, chungte chu, "I va inla no niap niap ve..Biteii te ang hian ei buan buan ta che" a ti deuh khawl khawl mai a. Magiein a chhan hmain, "Nî, buaina rawn siam i tum a nih chuan kan duh lo aw. I over deuh mah mah e" Malsawmzuala'n a lo ti chang nghut. Biteii pawh chuan Ni Mawii chu a mitmei ve deuh, nuam a ti vak lo a nih hmel. An chaw eikham, Mampuia nu te nen an ṭhutho laiin Cindy nu a rawn lut a. A hmelṭhain a hleitling kher mai. A hmel erawh a hlim vak lo, a fanu duatlai natna khumah a mu miau si a. Pi Puii chuan a lo be nghal bawrh bawrh a, "Bawihi pawn hma a sawn deuh e, Mampuia hming a rawn lam a, a remchan chuan zan lamah rawn lang ve se la" Cindy nu, Pi Zaii chuan a ti a. 

Pi Puii pawh chuan, "Awiii! A va lawmawm tehlul êm, Tehreng mai, lo kal rawh se, chuan tunah a nauin em ni awmpui, chaw rawn ei ve lawk mai tur a nia" a lo ti zung zung a. 

"Aw, a nauin a awmpui rih, chaw ei pawh hi ka châk hlawl lo, ka chau tawngkhawng deuh a, ka va mu hahdam lawk ang e" tih leh ngampa taka mikhual room pan a rual a. Pi Puii chuan Magie melhin, "Maggie, va kalpui ve ula tiraw? Cindy hi zawng ka fanu ang riakah hian ka ngai ve a, a rawn harhchhuah ṭan chuan a lawmawm viau mai" a ti leh zung zung a. 

Magie pawh chuan,"Ni e, va lan ve pawh a ṭha" a ti ve mai. A rilru takah erawh Cindy'n midang zawng hrechhuak lo va Mampuia a rawn lam kher kher chu mak a tih bakah hriatreng tur sulhnu an lo nei tawh em mawni aw a ti ru hial, inzawh chi lah a ni rih mang si lo. Tunah chuan hmeichhe pahnih, nalh leh mi naran aia sangte a bitum tawh dawn chu a nia, Malsawmzuala hi a ding nghet reng thei ang em? A pelhe ve leh zuk mai lo'ng maw? Kan hre chho zel ang chu maw..

A tuk lama Lungleia zin tur an ni si a, hmanhmawh deuh a ngai tlat! Magie chuan Mampuia chu a hrilh a, ani pawn a lo hrethiam viau. Mampuia'n car khalh thei rih hek lo, Magie'n Mampuia a phur a, Zorina'n Sangteii, Damdawi inah chuan an peng ta zuai a. Cindy nau mipa chu Magie nen an inrual khat vel awm e. A lo be ve bawrh bawrh hlawm a. Cindy pawh a lo harh ve lai tak a lo nia. Malsawmzuala chu a lo melh ngar ngar mai. Magie paw'n a hmuh hmaih lo chiang hle mai. 

An han ṭhu fel chu Cindy chuan, "Mampui" a lo ti sap.."I ṭha tiraw? Min hria tiraw?" Malsawmzuala chuan a ti a. 

"Umm, nangte chu engtin nge ka hriat loh theih ang che..ka tan i pawimawhzia i hriat kha" chauh hmel angreng deuh hian a lo ti a. Magie a lai deuh hû. Zorina pawh a awm a nawm vak hmel loh. Mampuia chuan a heh liak zauhin, "Hei Magie te hi thlah hawn an ngai a, kan va thlah lawk ang a, kan rawn peng haw leh dawn nia" a ti a. Cindy chuan Magie chu rawn enin, "Tu maw a nih? " A ti hû a. 

"Ka bialnu kha mawle..i la hre chho zel mai ang" Malsawmzuala'n a lo ti a. Cindy a nui lui sak. Eng tak ngaihtuah ang maw? Eng dang sawi tawh lo chuan an chhuahsan leh ta phawt a. Magie a tlai deuh tawh mah mah tlat a ni. 

"Cindy vang khan i rilru tibuai suh aw..Thlamuang deuhin va zin ang che" tiin Mampuia'n a chah mawlh mawlh mai. Magie pawn thinrim hun a ni lo tih hriain insûm hram hram a tum a. Mi dam loh laia lo thinrim vak kha a inthlahrung ve deuh bawk a ni. In an thlen chuan Mampuia chu rawn lut lo mai turin a ti a, a chhan pawh Angeli'n a hmuh leh chuan buaina a awm leh a hlau a ni ber. Sangteii chu Zorina'n a va thlah chhungin Magie leh Mampuia te chuan an garage-ah an lo nghak a. A rei lem lo. A rawn thleng a, awm khawmuang tawh loin an inmangṭha ta a. 

In a va luh chuan, an lo ṭhu ṭhap. A inthlahrung deuh nain han tih vak ngaihna a hre lo. "In la meng ni maw?" A ti ta ringawt a. A pa chuan, "In va chaw einaah in va che chhe viau niawma sawi a awm a, hriatchian kan duh a, kan lo nghak deuh che a" a lo ti a. Magie a hrilhhai hle. 

"Engtia che chhiain maw?" A ti nghat a. 

A nu chuan, "Malsawmzuala nupui hual a rawn kal ve si a, in lo inbakkaih deuh em ni?" A ti ta mai. Maggie a nui hawk. "Tu sawi nge a?" A ti hluai a. 

A pa zawkin, "Hei i û hi Papari'n a rawn hrilh a niawm a. Thudik a ni em tih kan hre duh mai mai mawle" a lo ti dam thluam a. 

Magie chuan, "Papari chu a rawn kal ve pawn ka hre si lo va, thil a hresual nasa a nih chu, eng buaina mah a awm lo. Malsawma'n nupui hual a nei hek lo, A nî erawh chuan hmeichhe pakhat chu a rawn hruai ngei a, mahse, Malsawmzuala a hîp vak lo nge, a ngaihven lem lo. " A ti ve ta mawlh mawlh a. Angeli chuan, "Magie, hmana ka hrilh che kha, nupui hual, MLA fanu ngat a nei ka tih kha..i awih duh lo vel a, nakinah i la chuang lel dawn a nia aw" a rawn ti phar phar a. 

"Malsawmzuala hi ka ringtawk rih e. " magie chhanna chu a tawk tiu teu khawp mai. 

"Ka la insiam zo lo deuh a, ka han intifel zo ang e" ti lehin a pindan lam a pan ta a. Papari te ho idea ṭhing thei lutuk leh lang chhuak leh mai tura dâwt an sawi peihzia a ngaihtuah hian a nuih te lam a za. Tihchhiat hi an tum ve sateh a, an hneawm ve lek lek. A thil la dah fel loh ho a dah fel a, Lungleia zin chu a châk rualin a huphurh bawk. Tumah a la hre ve bawk si lo, Angeli'n a hêk phei chuan tumah reng reng hian an lo be ṭha duh lovang tih a hlau deuh. Mahse, a pa leh Tetea te an awm chuan a zia tak a awm. Tetea hi a che man thei riau a, a ngaina ve tawh khawp mai. 

A mut hnuah Mampuia nen an inbia a, Cindy kha an va tlawh ve leh a. Mahse, rei an awm lem lo a niawm e. Amah Cindy kha a muhil zui ve leh ta bawk nen, "Ka awm loh hlanin i tlawh reng thei dawn a. " Hlauthawng ru deuhin a ti a. Biteii ai chuan Cindy a thîk zawk a nih hmel. Nui hawk hawkin, "I ngaihtuah thui thei ee…Naktuk aṭangin ka hna ka ṭan dawn, Ka nauin min thlah zel mai a niang chu" a rawn ti a. 

"Chupawhnise, hun i ngah lutuk" a la ti hrâm. 

"A mak! A nih inah ka tawm ngar ngar mai ang" a rawn ti leh a. Inhnial a peih loh bakah zin dawna intih taurâu a peih loh avangin Magie chuan, "Ka ringtawk che alawm" a ti ta zawk a. Ngaihtuah erawh a ngaihtuah nasa viau ang. Hlim tak chuan an inthlah ve leh tak kha maw..

A tuk khua a lo var a, Tukṭhuan ei khama chhuak tur an nia, an hmanhmawh tehchiam lo. Hmuni kuta chabi dah chu an ngam chiah loh avangin in pawh an kalh a, Hmuni chu in hnuaiah a awm rih dawn a ni. Chhungkhat tho an nia, an khawsaho thei tho vang chu maw. Lunglei a zin vawikhatna tur a ni a, a muthlu phal lo. Tetea'n motor a khalh a, A hnungah a nu nen Angeli nen an ṭhu ho a, a hawi nasa khawp mai. Thenzawl an thlen chuan thingpui in turin an ding a. An lo lun viau mai. An inei puar zawhah chawl khawmuang lovin an tlan leh ta zar zar a. A nute ho chu an muthlu deuh titih, ṭawng peih mang a bar pawh an awm tawh lo. Kawng a ṭha tawh bawk a, Tlai dar 4 rik hma deuhin an thleng ta a. An chhungte hi Bazar venga khawsa an ni hlawm a, inpuia innghah phawt a ngaih avangin A patea te in lam chu an pan ta dial a. A patea te hian fa pahnih an nei a, a u zawk hian class VIII a zir ve mek a, a nau zawk erawh class V a rawn zir ve mek chauh. A patea nupui Nancy hi sawi tawh angin a pa te an khawsak theih bakah an puibawm nasa a, anmahni vangin harsa lo takin an khawsa thei ti mai ang. A patea hlawh a lo tlem chhe êm êm lo bawk a. An lo lawm thiam hle. Magie te chu an han hmelhriattir phawt a, mize ṭhing tak nei a ni lem lo bawk a, a patea te nupa chu a be ve nghal bawrh bawrh. An in a zau ṭha bawk a, an thawl hle. An intihfai kim meuh chuan zanriah ei a lo hun tawh a, Hlim takin an ei ta a. A patea fate nen chuan an inhmuh hmasak berna a ni naa, an nêl riau mai a. Magie hian naupang han chhawnchhaih vel a thiam tehchiam lo nain naupang pawh hian anmahni duhsaktu chu an hai vak lo a nih hmel. Angeli nen inang viau mah se; Magie'n a sam a tihdanglam tawh avangin an ko sual nulh nulh lem lo. A nî te chhungkua an rawn leng phei ta bawk a. A nî pasal hi Pu Sawma a ni a, sawi tawh angin Inspector a ni. Pa lianpui, dam thluam mai a ni a, a thawhpuite fak a hlawhin a hna a tlin ṭhin khawp mai. A nî te hian fa pathum an nei a, an fa upa berin pasal a nei tawh a, an milai hi nikum hmasaah khan vanduaithlak takin an lui kalnaah tuiah a tlahlum a, an sûn rei hle. An te ber mipa, Tetea te nena inrual khat vel tur Mama an tih mai te nen an chengho ta rek rek a, chuvangin Angeli va awm tur pawh hi an lâwm viau zawk. An khua a har ṭhin si a. Magie pawh chuan a nî te nupa chu nêl takin a lo be ve bawrh bawrh. A nî chuan, "Rawn zin kan tum reng a, Magie in hmuhchhuah tirh te khan, chhungkaw chaw eikhawm te pawh ngaiin kan hria a nia, I pa Sawma hi khawthlang lamah duty turin an rawn ko leh ta si nen..zin hi a harsa ṭhin sia" a ti ve mawlh mawlh a. A ṭawngdan leh a hmelhmaiah Magie pa nen an inang hle. Nu ṭha tak niin a lang. A patea pawh a sual lem lo naa, a ṭawng tam vak loh avangin pawh a har deuh. Ningani-a kal an ni a, a tuk Zirtawpni tlaia chhungkaw chaw eikhawm chu an rel thlu ta a. Inrinniah Lungleia hmun pawimawh deuhte tlawhpui an duh ve deuh nen..

A chauh deuh bakah an lo inkawm tui a talângin Malsawmzuala be miah loin a lo muhil daih pek a! Dar 12 a pel thuak tawh tihin a rawn call harh,.inthiam lo ru deuhin a la a. "I buai viau ang tih chu ka ring a, mahse, min mangṭha hman lo khawp khawpin eng nge i tih?" A rawn ti hriam hraih mai. 

"Ka tihpalh, ka chau lutuk a, ka lo muhil daih a" a ti ta ringawt a. 

"A ṭha e, muhil leh rawh. Muttui" tiin a dah nghal hmak. Va thlem mah se, awmzia a neih a rin loh avangin Magie chuan call let ta lem lo chuan a muthilhsan leh ta a. Zinga a harh rualin msg-in a va wish a. Tukṭhuan ei dawn thleng pawn a la seen lo, a la tho lo a niang a ti rilru a. Call êm chu a hreh deuh. Chaw eina vel a tihfel zawhah a la seen loh chêu avangin a call ta a. Vawi 2 a ring quit ṭhak. "I la titau em ni? Ka tihpalh ka tih kha" tih msg a hnutchhiah a. Nancy pawh School kal loin tlai lama an ei tur a va lam khawm a, Angeli erawh Lunglei lama a ṭhiante nen an leng chhuak leh daih tawh. Tetea erawh inah a tawm ve reng a, phone a khawih deuh reng mai. Chhun lai velah Nancy chu a rawn haw a. A rawn bawr haw hle, Magie chuan a lo pui nghal zung zung a. A rilru kaptu awm mah se, tihlan loh hram a duh. Nancy nen titi pahin rawng an bawl ta a. 

"Angeli rawn awm phei chhanah khan nangmah kha an ti ringawt sia, ka bô êee" Nancy'n a tih chuan, Magie rilru a na deuh. "Chu chu ka nu nge ka pa sawi" a ti sap a. 

"I nuin kan pa bulah a rawn sawi a..i nî te pawn chutiang vek chuan an ngai" a tih chuan a thinrim deuh. Engkim sawi vek a châk hle, mahse, nakin zelah boruak ṭha lo zawk a awm a hlauh avangin, "Chutiang chuan lo ngai mai r'u, a buaithlak êm mai" a ti ta ngawt a. Nancy pawn a sawizui ta lem lo. A nî te rawn thlen lai takin Malsawmzuala call a dawng ta a, pindanah lutin a la vat. "Eng nge i tih?"a rawn tih chuan a sawi a.

"Ka tho chiah, nizan khan ka tlaivar a, zingah dar 7 vel aṭangin ka muhil chauh a" a rawn ti a. 

"Ti nge i tlaivar?" A tih chuan, "Cindy mawle..ka hming a lam sek a, min rawn hruai a, kan inbuaipui leh kual vel mawle" a rawn ti a. 

"Chuan" a ti nghat a. Thinrim nghal viau chu a duh bîk hran lo. "Ka hrethiam tawh bik lo, a pasal ang deuhin min ngai tlat mai a. Doctor te pawn a tider lo an ti bawk sia, awmdan thiam a har khawp mai" a rawn ti hnual rawih mai. Magie chu a ner sak a, "A va mak dawn ve leh!" Tih bak sawi tur a hre lo. 

"Mahse, engmah a thleng lo a nia" a rawn ti a. 

"I chhungten engtin nge an ngaih?" Magie chuan a ti a, a hre châk tlat a ni. 

"Engmah an la sawi lo, Cindy an lainat thu bak..ngaihṭha deuh khan awm rawh. A ṭha ve ṭêp ang" a rawn ti a, Amah Malsawmzuala pawh a rilru mawlhtu an awm tih a ṭawngkam leh a thaw lak danah a hriat deuh. 

"Biteii a rawn dîkdâk lo em ni!" Magie chuan a ti leh a. 

"Min rawn biak a ching a, mahse, ka buai thu ka hrilh mai zel..ani phei hi chu thik tlak a ni lo a nia" inveng takin a rawn ti a. Magie pawh han thinrima han ân vak kha ṭha a ti chiah lo, Malsawmzuala rilru a lo hah ru viau thei tlat. Engkim a rawn hrilh hlauh zawk a, chuvang chuan tun dinhmunah chuan rinngam rih phawt mai hi ṭhain a hria. 

A nute pawh an rawn haw a, ṭhenrual tlawha chhuak kha an nia. An tam viau lo nain an hlim ve viau. Chaw ei dawn tawh lamah Angeli te an rawn lang ta a. A ṭhiante hmeichhe pahnih bakah mipa pathum a rawn hruai tel ve ringawt mai. A ṭhiante lah chu an inchei dan aṭangin inkhawm ngaina tak an nih loh hmel viau, incheina hi midang teh nan rintlak ber ni lo mah se; kan inenna ber chu a ni lawi a! A thian hmeichhia te phei chu an rui tih an mitmeng leh ṭawngdanah a hriat hliah hliah, mipa te erawh mipa an nihnaah an inthunun thei deuh a. A rûkin chaw an va chhum belh leh ta ringawt a, a pa ngaihdan chu a nih loh hmel angreng. Mahse, eng han sawina chi a ni si lo. 

An tum aia tlaiah Angeli te avangin zanriah chu an ei ta a. Chhungkuaa thil han sawiho pawh a theih ta si loh. A nî pawh a lawm loh hmel viau. An chaw ei lah chu an rui nen, an che fel lo hlawm nasa mai a, an nui khek leh ang tuar tuar a, Tetea paw'n a nin hmel kher mai. Dar 9 velah Angeli ṭhiante chu an haw ta hlawm a, Angeli chhuah ve tum chu a pain a lo dang ta chat. A thinur hle mai a, a lo rui deuh bawk nen, "Ka rei dawn lo, ka thlah ringawt dawn" a tih paw'n, "Nilengin i chhuak tawh, kan sawm ni miah lovin i ṭhiante nise i rawn hruai a, awm ve dangte min zahpahna nei hlek loin an rawn che nawi a. A tawk viau,." A pa chuan a ti bur mai si. A lo dry ve char char tawh vawiina a lo rui ve leh si, a thak za i ti mai teh ang, a chhuah châk lutuk chu a ṭap thul, a thinrimin eng eng emaw a paih tau thul. A thawm a na bur bur hle. A nu chuan, "Paa, kan mualpho ang e, chhuak mai se..eng êm a ti dawn em ni?" A ti dêk dêk chu an pain, "Nang lah hi a..nangmah vang a nih hi heti taka kan chelh loh tak, a chhuak dawn lo bur a ni mai. Phuar a ngaih leh ka phuar mai ang" a ti hmiah mai. Hmeichhe sual tawh lailêng chu mipa aiin an tawrhhlelhawm zawk an lo tih hi a dikna chen a awm âwm e. Angeli pawh a chhungte, a pa unaute pawh a zah zo lo, a thau a khawh tih mai turin a za sek reng mai a, a phone a be thul. Eng dang a ni lo, an va chhuah khan sawi leh sawi hnu zu leh no. 4 an va tihpawlh a, tunah a rawn ṭhing leh tawh si chu awmngaihna a hre lo a ni ber e. 

Pu Sawma chuan, "Kan hnenah pawh khawsa mah se; enkawl dan tur a va buaithlak dawn ve aw. Doctor hmuhpuia OST te pawh kan hmuamtir a ngai ang, Etnoc te pawh a theih chuan ei se..chutiang lova a lawng tawpa a tawrh dawn chuan a tan pawh a hrehawm lutuk ang e" a ti chuar chuar a. An nu vahnu chu enkawl a huphurh ru ve hle tih a lang. Lehlamah Pu Ruata te nupa hian Angeli enkawl hi an peih lo a ni bik lo. A awmdan a bawraw chhoh bakah a unaunu ngei chunga hriam hial a lek tawh avangin chhungkua an kehdarh loh zawk nan an tlanchhia i ti mai teh ang, a nî te lahin a tette aṭanga lo duat tawh an nihna laiah an lo lainat a, enkawl an lo inzuam ve bawk si a ni. 

"Naktukah Dr. Ramzaua ka han hmuhpui dawn mawni ka lo ti rilru a,. " A pa chuan a ti a. Pa Sawma pawh chuan, "A ṭha viau tak ang, naktuk hi kei chhuahna tur kan nei leh pek a. Han kal tak teh u" a lo ti ve a. Zan te a rei chho ta bawk a, an ṭin ta hlawm a. 

Maggie leh Tetea te room khatah an mu dun a, khum erawh a hrang thung. Angeli erawh a pa te mutna pindanah an muttir ve a, chhuatah mutna an phah ta mai. Vil zui deuh a ngai bawk nen. An han mu chu Tetea'n, "U Magie, chi ka thlah thei tawh ang em? Kum 18 kuminah ka tling dawn a." A rawn ti phawng mai a. 

Maggie chuan, "Theih tawh awm tak, i mu leak tawh em?" A lo ti puat a. 

Tetea chuan nui ruh ruh chungin, "Mu leak zing mai..ngati nge?" A ti a. 

"I chi a puitling tawh tihna a nih chu, fa i nei thei tawh tihna" a u chuan a lo ti a. He thil hi Maggie hian Zolianthanga te ina a awm laia Class xii a nih lai khan an schoolah awareness an rawn neih ṭuma Doctor pakhat sawi a hriat a ni. Thil reng reng hi chîk taka ngaihtuaha chhinchhiah kar mi a ni ve a, Sex educationte hi ngaihzawng pawh a neih hma khan mi nazawng aiin a hre tamin a hre thûk tawh zawk, zahmawh leh hurna lama a ngaih ve miau loh avangin a chhiar te hi a tîmin a zak ve ngai lo. Mihring nunphunga pawimawh leh kan hriat tur hi lehkha zir sang tak ni lo mah se, a inchhiar peihna azarah a hre viau zel. 

Tetea khi vun vun chu va melhin, "Tea, sex in hmang em ni?" A ti leh hmiah. Tetea a nui tawp chawt.."Aih, hmang lo, a duh lo rapthlak" a ti bah nuaih a. 

"In la hman loh tak tak chuan hmanpui tum miah suh aw. " A ti dam thlap a. 

"Nia, a duhdan ka ngaipawimawh alawm" a lo ti ve sup. Ṭawng tawh lovin an phone an khawih dun ta mial mial a, Malsawmzuala nen chaw eikham hlima an inbiak bak kha an inbe leh rih tawh lo, Cindy an va hmu leh dawn tih kha a rawn sawi a. Chanchin a hre châk ve deuh. 

Sangteii msg a dawn chu phur zetin a hawng a, "Meg, Zorina khan min rawn be ve ngei mawle" a rawn ti a. Magie a khi sak, a duhthusam hi thleng se a ti. Sangteii hi sawi tawh angin mipa ngaihsak lo ve tak, lerh lo hlawm tawp ang kha a ni ve a. Chutihrualin thawmhnaw lamah a lerh a, a hmel a ṭha ngawih ngawih tih tur ni lo mah se, inchei a thiam êm avang hian duhtu a nei ve reng thin. Amah hian a hawi lo thin êm zawk a. 

"Chuan,?" A va ti vat a. 

"Ka zak e, kei chu, mahse maw, a danglam bik ka ti" a rawn ti a. 

"Ni ru. Ni ula ka duh e" a va ti a, Sangteii chuan emoji nui uar uar lai a rawn dah tuar. An inhmuh vawikhatna aṭanga an innel dan leh an sawi duhzawng inan danah Zorina paw'n a hawi ve deuh a nih a ring. 

Mampuia'n a rawn call ta a, inlukhup vutin a la nghal. 

"In ka thleng chiah, Cindy chungchang hi ka rilru a tihah..ka ning ṭan riau" a rawn ti nghal bawl mai. 

"Eng nge thleng leh?" A ti ban chhalh a. 

"Ka nu rilru hi a hmin ṭana hriatna ka nei a, ka pa hi chuan engmah a sawi lo. Amah Cindy hian ṭah a thiam a, pangchan leh ka nute kar dan a thiam bawk si, zanin phei chu ka beng teuh khawp mai" Malsawmzuala chuan a ti ta mai a. Chutiang taka Mampuia aw hriam leh bung chu Magie pawn a la hre ngai lo, a thinrim ve hle tih a lang. 

"Hahdam rih la..nakinah sawi la, tuite kha in rawh, i hahdam loh hmel e" Magie chuan a ti sap a. 

"Zorina hi be rawh aw, kei chuan ka sawi thiam ve lo" tih leh Zorina chu phone pek a rual a niang, Zorina aw hian, "Magie" a rawn ti puam ṭâlh a. 

"Aw , han sawi teh le" a lo ti sep. 

Zorina chuan, "Kan va kal leh a, ka nute pawh an tel ve. Ka û a hmuh rual khan a pawm chawt a, a ṭah khum vel a, 'Ka pasal hi ka lo hai rei lutuk a. Min ngaidam rawh aw' te a tia. Chuan, ka nute leh a nute bulah te khan, 'Mampuia chuan min ngaidam thei tawh lovang, ka harh hun nghakhlel êm êma a awm laiin ka lo hre tawh lo va. Kei zawng ka vanduai a ni..ani chauh hi ka hmangaih a ni asin' a tia..ka nu lah rilru nêm leh zuau chi a ni si, kan hawn kawngah, 'Mampui, khatiang kha kan boruak a ni ta sia, Cindy hi a rilru tihdam a mamawh a ni. Han dam fel se in innei mai dawn em mawni le..Magie paw'n a hrethiam tho lo'ng maw?' a ti ta a. Ka û chu tuman kan be ṭawng zo tawh lo nghal. Ka pa erawh chuan engmah a la sawi lo. Cindy nu leh ka nu bestfriend an lo ni ve kher bawk nen..ka hrethiam tawh lo, Doctor lah hian ' A tider lo, a hun hma lamah Mampuia nen sulhnu eng emaw hriatreng tur an lo neih tawh kha a thluak hian a rawn focus leh a, a zo lo a nih hi' a ti bawk si. " A ti ta mawlh mawlh a. Magie chu a lo insangmar ṭeuh mai. 

" A va mak dawn ve le.." tih bak sawi tur reng reng a hre lo. 

Zorina chuan, "Ka û chu a tih fô dan angin in chung zawlah a chho rih a, nakinah a hahdam hunah a rawn be leh mai ang che. Ama lamah engmah ngaihṭhat loh tur a awm lo aw. " A rawn ti thluam a. An dah ta rih. Magie chuan thawk a la hawk hawk ringawt. Cindy nat dan mawlh chu mak a tiin thil awm theiah pawh a ngai vak lo. A tiderah a ngai tawp mai. A dik ngei pawh a ring. 

A chauh ve tehlul nen, Malsawmzuala vangin a meng rei leh ta phian a. Zing dar 1 pelhah engtin tin emaw a muhil ve thei hram. Thawh a hai reng bawk a. A patea nupui A nute Nancy hi milian chhungkua aṭanga rawn lawi nisi-ah chuan han inlak leh chapona te hi a nei ve lo reng reng. A û te ho a ngaichâng thiam hle. A fakawm ve khawp mai. Angeli erawh chaw ei dawnah a rawn tho ve chhar chhar a. Magie nen an inhriat tirh laia Magie aia hmelṭha leh ngo zawk ni thin kha a thu bêl mai a, a cherin a hmai te chu a duk deuh em mawni, Magie chu hai theih a ni lo tawp tawh. Ruihhlo zunzâm a taksaah a awm ve miau lo va, a ṭha suah reng mai chu a nih hi. A pain damdawi inah hruai a tum tih a hriat chuan Angeli chu a phun nang nang reng a, tuman an ûksak duh der si lo. An eikhamah a pa chuan insiam nghal turin a ti a, insiam lo ngam hek lo. An motor khan Tetea nen Lunglei khawpui fan ve an tum si avangin Apatea'n a han hruai dawn a ni. A pate unau inhmangaihna leh inpeizawnna hi Magie pawn entawntlak a ti khawp mai. A pa te chu an chhuak ta a. A nu leh Nancy ten in an lo nghak dawn a ni. An cousin a patea fate leh a nî fapa te nen an ni chu an chhuak ve a, Malsawmzuala nen an la inbe lo. A rilru tâwt laia va biak sek kha hrehawm a ti a ni. 

Hetih mêk lai hian Mampuia te chhungkaw boruak chu a rit ta riau a, A bân kha a awrh tawh lo va, mahse, thil rit han chawi leh motor han khalh erawh a la ti thei lo. Cindy kha a nu ten an va hruai chhuak a, a putea te an awm ve reng chungin an inah bawk an rawn hruai lut leh ta a. Mampuia ngaihdan a ni tawh lo hle, mahse, a tawpkhawkah lo chuan engmah a sawi ngai lo va, a enliam rih. Cindy inbual hlanin Cindy nu bakah a nau mipa leh Mampuia nute chuan Cindy te chungchang an sawi ta a. 

Mampuia nu hi nu sual leh kheuhbeuh zawng a ni hauh lo, mahse, dik tak chuan a ṭhianṭhaber fanu chu a mo atan hman aṭangin a lo awt ru tawh a, chuvanga an ina awm tura sawm lui tlat kha a ni rêng a, Amah Cindy hian Mampuia a duh tih a hai lo bawk nen. A fapain ngaihzawng a neih tak siah kha chuan an chhungkaw inrelbawl dan ang lo lutuka thil kalpui kha a hreh a, Magie pawh a pawm ve thei mai a nih kha. Mahse, Cindy a han accident a, a hriatna te a'n hloh zui a. Mampuia hming a rawn lam bakah a pasal ang hiala a chhal chhoh takah khan Cindy a lo lainatna nen, a nu nen an inṭhianṭhatna nen a fapa chu engtin tin emaw hmin mai theih a inbeisei a. Tunah a fapa hi la hel viau mah se; Cindy te ang nula hmelṭha leh nalh lutukin pasal anga a en luih tlat reng chuan nem hun a la neih ngei a ring a ni. Cindy nu Pi Zaii pawh hian makpa atan Malsawmzuala hi a lo awt ve ngawih ngawih bawk a.

"Puii, Bawihi awmdan hi zahte pawh a zahthlak ka ti. Engtia tih chi nge maw ni dawn le?" Tiin Pi Puii chu a han thawi kual a. 

"Aa. Tih vak ngaihna chu a awm lo a nih ber hi, Tihian inenkawl chho ila, dam hunte pawh a la nei ve mai ang. A nei ta lo a nih pawhin kan fapa leh fanute chu kan inneihtir mai aniang chu" a lo ti ve a. 

"Mahse, Mampuia hian ngaihzawng a nei a ni lawm ni?"pi Zaii chuan nuamti vak lo hmelpu hian a ti a. 

"Neihte chu a thiang alawm, nupui pasal neih hmate chuan ngaihzawngte chu kan nei deh duah alawm, mahse, amah Mampuia paw'n Cindy lainat hun a la nei ngei ang a, a rilru a thlak mai hi ka ring a ni" Pi Puii chuan a ti ta bawrh bawrh a. Pi Zaii chu a lawm ru viau ngei ang le..

Malsawmzuala erawh an ina awm a nin avangin a papuia te in lamah a phei ta daih a. A papuia te monu bulah a inhrithla ve ta chiam mai. An monu hi Veni a ni a, a felin a hawiharh viau. "Cindy hi ka ringhlel ee, hetiang natna hi a awm ngai ka hre lo..nizanah pawh kan pa nen kan sawi dun a, mak kan ti lutuk" a lo ti ve bawrh bawrh a. 

"Nia, a tihder peih chhung tider teh se. A hmaa farnu anga ka enna pawh a tihluhlâng vek" Malsawma'n a lo ti a. 

"Magie tê kha kei chu a fel reuh bakah a hmel pawh kha a chhe lo ka ti. A zaidam hmel si..a hre ve vek tawh em?" Veni chuan a ti leh a. 

"Ka hrilh a, min tihbuai a hlau rih nge a ngawi rih. Nakinah ka bia ang. An leng khawthawng ve a, an boruak ka tinuam lo palh ang" Mampuia chuan a ti a. An inngaihtuah tawnna hi a hlu khawp mai. 

Magie te pawh Theiriat tlangah te an va leng ve a. Ni a sa deuh naa nuam an ti ve viau, eitur an pai hnem bawk a, an ka a awl lo angreng khawp mai. Pukpui lam erawh an han kal ta lo mai, Maggie'n a ke a bilh pek a, a vûn nasat bakah nâ a ti ve riau a, dar 3 velah an haw ta ringawt. A bai lut an hmuh chuan an lo ngaihven vat hlawm a. Bilh satliah a ni bawk a, ngaihtuahawm êm êm chu a ni lo turah ngai ang. A inbual zawhah damdawi a hnawih a, a tuam lum ta rih. A sam a khuih mek laiin a bialpain a rawn call ta a. Khur lek lekin a la..eng emaw thu thinṭhawng tak a rawn sawi a hlau a ni ber. 

"Meg, ka ṭha e aw. I ṭha em?" A rawn ti dam thlup a. Magie pawh a thaw huai e. 

"Ka ke ka bilh a, a vûng ve deuh a, nat chu a na vak lo" a ti a. 

"A va pawi ve aw, i zin ve chhunah..Cindy pawh a rawn chhuak tawh a. An rualin zanriah ka ei peih lo va, Ka nî te inah ka phei" a rawn tih chuan Magie a tilawm thung si. 

"Ti nge in inah an hruai leh kher le?" Lungawi lo awki hian a ti ve a. 

"Ka nu cheng chawng hi lawm..ka nuin lo ti pawh nise, Nu Zaii te pawh an timak ve ka ti tho" a rawn ti a. 

"Ka sawi theih chu a awm miah lo naa, i nu leh a nute hi an ṭangrual a niang, Engtikah emaw i la neih hi a la ngai lovang maw?" A ti ta hmiah mai. 

A ngawih vang vang hnuah, "Chuvang tak chuan i rawn hawn veleh kan innei ang" a rawn ti nghet ta charh a. Magie a phâwk deuh, "I nu ten an remti nang" a ti a. 

"An neih tur i ni lo a, ka nupui tur zawk i ni. " A rawn ti leh hmiah. Hnial vak a sâwt dawn loh avangin, "Nia, lo haw phawt ila kan sawi ṭha anga tiraw? Hei chaw kan ei dawn a" a ti a. An dah ta a. 

Angeli leh a pa han inentir pawh an rawn hlawhtling thawkhat ti ila, doctor lehkha hmangin Etnoc, suffer damdawi an rawn la thei a. Angeli a suffer dawnah a ei ang a, suffer kha a chhawk dawn a ni. Mahse, tumna tak tak hi a ngai ve bawk a, Angeli te ang hmalam thlir thiam vak lo tan chuan a ho duh viau maithei a ni. Zanriah an ei khamah a chauh bakah a rawl deuh ṭhûm avangin khumah a va tluzal mai mai a, Sangteii nen an inbe leh char char. Zorina nen chuan an inbe regular ve viau tawh a niawm e. 

Apuia pawn msg a rawn thawn a, "Zorema'n zu in a ching tlat mai a, a nun khwhar lutuk vang a nia. Nizanah ka va leng a, Zawmi kha Zorema hriat lohin ka'n chhimbudawi kual vel a, a hmin riauin ka hria a, nangman ṭan lo lakpui la, keinin Zorema kan lo bei ve ang" a rawn ti a. Magie duhthusam kha a ni chiah reng a. Zorema chu a nuṭa ang tak taka a en avangin chutia zu leh saa a tlan leh tur chu a ngaingam lo, a fate an la tê bawk si. Zawmi'n a iai loh phawt chuan mi sawi dan tih vel mai mai chu care vak ngaiah a ruat lo. 

Dar 8 a pel tawh tihin number ringawt hian a rawn call a, tu tak ni ang maw tiin a la a. 

"Hello, Maggie, Mampuia nu ka nia..i dam em?" A rawn tih chuan engtin emaw a awm nghal. 

Pangngai takin, "Aw ka ṭha e, min lo call ve tehmial a?" A va ti a. 

A aw a thian tê tê a, "Ih, englo ania, Magie, Kan boruak vel chu i lo hriat vek tawh ka ring a. Cindy hi doctor te sawi hmangin hetia a hriatna rawn kir leh dan anga a nun a hman loh chuan zawi zawiin a hriatna hi a hloh tial tial dawn niin an sawi a, i hriat angin Mampuia hi a pasal angah a ngai tlat mai si a. Kan han sawiho a, chhungkua kan inrâwn a, Inneihtir mai hi kan rilruk ta deuh a ni. Mahse, rawn hrilh hriat loh che kha nuam ka ti lo va, i mi hriatthiam kan ngai takmeuh a ni" a rawn ti dap dap a. 

Magie chuan harsa ti fê hian, "Mampuia'n eng nge a sawi ve?" A ti sap a. 

"Ani pawn pawi a ti lo a nih hmel.." a rawn tih chuan a nghing dawt. A ngawih tak daih avangin Pi Puii chuan a dah ta daih a. Magie chuan chunglam a melh ngat ngat..Tlaiah khan nghet taka a la awm thu kha a hre si a..tunah darkar tam pawh a liam hmain a thutiam a sût leh a maw?! Malsawmzuala number a hmetchhuak a, a call..switch off..! A phone a switch off ve nghal hmak a, rilru buai zetin a mu kawm ngal mai..