Mistake 11

MISTAKE (11)

Ziaktu : Toni Râlte

A ngaihna hre mang lo zeta Magie'n a melh reng lai chuan, Angeli chuan nui chungin, "hlauthawng mah ta che. Kan tina dawn lo che" a ti sar sar a. Mahse, Magie tan awm nawmna chi erawh a ni hauh lo. Mipa chu Angeli chuan signal zauhin chu palian zet chuan a kekawr ipte aṭangin Syringe a rawn phawrh ta a, Mahse, Magie hi chutimaia chiâia philî chi a ni lo tih an hre lo. Chu pain a rawn hnaih rual chuan a khum bul dawhkan chunga a chemte lei thar, englai pawha a kawl reng chu a chuh ve phat, ring zetin, "Tete, beih ka tawk" a ti tuar bawk. Au vak mah se; a nu leh pate pindan chu in hnuaia awm a nih bakah sound proof a ni khanglang a, an hriat phak a ring lo. Tetea pawh hian a hre pha a nge maw..mahse, beiseina erawh a nei. Angeli chuan a rawn vuan chat a, Magie nghawnga paliana'n syringe vih luh a tum lai takin Magie chemte a phe zawk, Chu paliana hrawk chu a thi nghal puat a, syringe chu thlauhin a let nghal huang, "Tete.." a ti leh tuar a. Angeli hamhaih lai chu a bânah mansakin a chemtê ken chuan a tin ta ran mai. A duh loh thleng thlengin an nawr ta a ni ber. Tetea pawh a rawn tlanlut ve a, thil thleng a hmuh rual chuan chhuak leh nghal vutin in hnuai lam a pan nghal. A nute a zuk kaitho a ni maithei. Paliana hrawk chu a ri bawrh bawrh a, Angeli lah a khurh nasat êm vangin khumah a ṭhu hnawk ringawt. Maggie thisen lum chho ta chuan rilru fîm a puttir ta daih zawk a, paliana bulah va ṭhuin a bawihsawm nghal a, a chemte kha a vai satliah mai kha a nia, a hrawkah kher kher a vai ang tih ngaihna a hre bik lo a tin ni. Thih êm zawng a thi lo ve, mahse, a rang lama Hospital an kalpui a ngai ang. A nute pawh thawhphan nei hlek loin an rawn lut ta a. 

"Eng thil nge i tih tak? Tual i that a maw?" A nu chuan thlabar hmel zet hian a ti a. Magie chuan, "A la thi lo, Pa, a rang lama kan kalpui a ngai" a lo ti zawi raih. Thil thlen dan inzawh kual hman a ni rih lo. Chhuata syringe let reng chu Maggie chuan a ban zauh a, a ak ta hmak mai. Nakinah a la pawimawh dawn tlat. Tetea leh a pa nen paliana chu Damdawi inah an hruai ta a. Thisen a hloh hnem deuh vangin a chau zual hle. Doctor in a lo en nghal vat a, thil thlen dan a zawt hman rih bik lo. Thisen chhuak chu tihtawp phawt a ngai a ni. Lehlamah Magie khan a lo zai thûk lo hlauh a, paliana a vanneih phah ti tawh mai ang. 

Thisen pawh an pe nghal chûk chûk a, Sek ṭul e ti lo chuan a dâng lup mai a, a chau ngawih ngawih bawk. An han intihfel zawh meuh chuan zing dar 2 a ri thuak ta. Doctor chu rawn kalin Police a phone thu a rawn sawi ta a. Enquiry an lak a ngaih vang a ni. Magie chuan doctor hnenah, "Doctor, he syringe chhunga damdawi hi eng nge a nih ka hre duh a ni. He thil hian min jection a tum a, ka lo invenna lamah thil a kalsual ta a nih kha" inringtawk zetin a ti a. Doctor pawh chuan a lo la vat a, "Naktuk lamah ka lo zir chiang ang e" a ti a. 

Police te pawh an rawn thleng a, Paliana chhungte lah an hre si lo, han hrilh hriat dawn paw'n..Magie chuan thil awmzia chu dik takin a sawi a, Mahse, Magie thusawi ringawt kha fiahna a tling thei bik lo va. Paliana harh hun leh a biak theih hun nghah chu a ni mai. Hetih mek lai hian in lamah Angeli leh a nu an lo inhau ve mêk a. 

"I rapthlak zozai ta, i â vek tawh a nih hi. Angel, engtin nge hetiang hian i awm theih?" A ti hlawk hlawk a. 

Angeli chuan ṭap pur chungin, "Ka hre lo, engmah ka hre lo..Nu,ka rilru hi a buai vek tawh a ni. Harhfim lai ka nei lo va, chhungrilah hian min nawr tet tettu a awm reng a. Magie hi thah kan tum pawh a ni lo, damdawia chiu-a ka ṭhianpa kha mutpuitir ka tum mai chauh a ni. A virgin hi ka duh lo alawm" a lo ti ve bawk a. Paliana thisen kha Magie pindan chhuatah a tling tun mai a, hrufai ta nge pawh an ti lem hlei lo. 

"Angel, i tâng ngei ang. Police ten thudik an hriat chuan ka tan pawh chhanhim ngaihna che a awm dawn lo..i pa phei chuan a kut a sil ngei ang" hlauthawng takin a nu chuan a ti leh a. Fate na nâ na hi zawng an sualnaah pawh ṭan a lo na a niang e. Angeli chuan a nu chu bawhin, "Nu, Jail tan ka duh lo, ka hlau..min ṭanpui rawh" a ti ngawih ngawih a, Nu tan chuan lo palliam ngawt chu a har ve khawp ang le. Sual teh mah se; a fanu a thisen kha a ni ve bawk si, a rilruin ar bô a zawng nasa mai a. Engtin nge Angeli chu a insawi fihlim ang tiin. 

Chutah, "Engpawhnise, Eng ang pawhin insawi fihlim tum mah la, i mi rawihpa kha a inpuang a nih chuan i tel lo thei dawn lo. Tihian ti mai rawh, â der tawp mai rawh..Angel, tichuan, Jail-a lut lovin Damdawi inah an dah lut ang che" Pi Thanpuii chuan a ti ta mawlh mawlh a, mangan lai hian rilru a lo chak duh a niang e. 

Angeli erawh awmngaihna a hre mang lo va, a ṭap reng ringawt. Nia, kawlhrawng tak anga lang siin a lo nem viau mai si. A hlauthawng leh hnuhnawh a ni ber e. Tih vak ngaihna lah chu a awm der si lo. der leh tur chuang pawh a awm lo, a fim lo tih tunah pawh a hriat ngawih ngawih tlat! He rilru maksak leh chhe tak a neih hi engtik aṭanga inṭan nge tih a hre bik lo, A harhfim lai chuan Magie chu heti takin a haw ngai bik lo. A sawi ang deuh khan thah tumna rilru êm chu a pu lo, mahse, hrai ruiha kha pa nena mutduntira video-a cover a tum kha a nia. A mi rawih lah kha tlangval ṭhalai leh sek pui ni chung sia neih nei lo, da êm êm reng, zu duh ve tak a ni a. Angeli ṭhiannu Asângi te in hnuai luahtu te an nu, chutaṭanga Angeli nen pawh inhre pawp an ni. Zorama a ni a, ruihhlo duh ve tak, a bik takin Ganja addict a ni. Mahse, sawi tawh angin an khawsak a harsat bakh amah hian hna a thawk vak peih si lo va, an veng chhungah phei chu a chak awm tehlul nen an chhawr duh mang lo. A thatchhia an ti zel a niawm e. Angeli chuan a thil duh tihpuitlinna hmanrua atan ṭha dawnin a hria a, harhfim hlei loin tikhan a ruai ta ringawt a nih kha . 

Maggie leh a pa ten in an rawn thlen lai chuan dar 4 a pel tawh a. Maggie chu a chauh deuh avangin a mu leh hram. Tlem tal a chhin loh chuan a ti. Mahse, thinthiin a muhil thei tlat lo..Zorama khan thi hnuang chunga a rawn ban ṭawk tâwk lai a mangphan zel vang a ni pakhat. Tlem azawng chauh zawng a chhing ve hram e. Dar 8 dawnah a tho a. A nu leh pate chu khunkhan zetin an lo ṭhudun a, Angeli chungchang an sawi dun a nih hmel. A thawh aṭanga reivakloah Police lam pawh rawn langin Angeli chu thu zawhfiah tura rawn lak an tum a. Pu Ruata te pawn eng êm êm an lo sawi hran lo. Angeli pawh an kai tho ta nghal a, ngawi rengin an hruai ta. Maggie pawh chhun lam chu hnaa kal a tum lo, Zorema te pawn an hrethiam bawk a. Nizan khan damdawi in an thlen hnu khan Malsawmzuala chu thil awmzia a hrilh ve kha a nia. Mahse, Mampuia tan rawn kal ve ngaihna a awm si lo va, an awmna Hospital a inang bawk si lo nen..Maggie chuan a thawh rual khan chanchin a va hrilh leh nghal tho a ni. 

An tukṭhuan ei chu an hlim lo kher mai. A pa chuan, "I nu nen kan lo sawi dun a, tun ṭuma i ûte chetdan hi i tan pawh ngaihdam a har viau ang tih chu ka ring a, mahse, a theih hram chuan report hi ziak lut lo mai la ka duh a ni. Angeli hi intiamkamna neihtir ka duh a, hun eng emaw ti chhung chu i nî te bulah va khawsa rih se kan tia, i nî pasal hi Inspector a ni bawk a, a palliam ngam dawn lo va, i nî te pawh ka be tawh a. An remti a. Nang tak hi chuan kan chhungte hriat i la nei mang lo va, zinte a lo harsa bawk nen, Angeli hruai pahin Lunglei lamah kan chhungkuain va zin khawthawng ila ka tia..Zorama pawh kha a enkawlna senso kan tumsak a ngai dawn tho tho a. Eng nge i rilru ka hre duh a ni" a ti ta dap dap a. Magie a ngawih dat hnuah,"Ṭha in tih ang chu ka pawm e. Mahse, Angeli chuan a nun sim ngei se ka duh. Tihi chuan amah ngeiin a tawrh hun a la awm dawn" a ti ve thei ta a. A rilru chhungril takah chuan ngaihngam lohna riau chambâng mah se; a pa berin chutiang thu a sawi takah chuan zui ve rih phawt mai a tithlu a ni. Lehlamah FIR te thehlutin Angeli te pawh han man rup rup se, chhungkaw mualphona a nih piahlamah an chhungkaw boruakin a tuar dawn tih a hai bik lo. Thil pawi engmah a thleng lo bawk nen, a nu leh pate thutlukna chu a pawm lo thei bik lo a ni ber. 

Dar 11 velah Angeli chu a rawn haw a. Police lamin tihvak ngaihna an hre lo a nih hmel, a pa an hrilh leh danin, "In fanu hi rilru lam doctor enkawl chi niin a lang. A thluak a fim lo" tih a ni tawp. A nu sawi ang khan a va â derte pawh a ni mahna le. Zorama harh thu an hre leh ta a, a chhungte an hrilh hre tawh tho naa, va hmuh veleh hrim hrim chu ṭhaa an hriat avangin a pa nen bawk an va kal leh a. Zorama chu rin ai takin a lo harh ṭha. Magie pawh a lawm ru hle, loh theih loh vang mah nise; tualthah ngawt kha a duh bik lo a tin ni. Zorama chhungten FIR thehlut pawh nise, mahni inchhan nan a lo beilet tih kha a ni mai dawn a. Court hmaah thiam a chang lel thei tih a lang ruak. Zorama pa leh a pa pawh an inbe nghal a, Report thehluh an lo tum lo a lo nia. An thehlut dawn a nih pawhin Angeli lakah zawk thehluh an duh tur thu an sawi daih. An fapa hmang ṭangkaitu chu an mil vak lo a ni teh chêk ang chu..Chutiang tehnuai an nih avang chuan Police lam pawn tihtheih an nei ta bik lo va, Zorama chu chesual palh anga sawi a ngai ta a ni ber. Pu Ruata'n an inenkawlna senso a tumsak dawn tho bawk a, Zorama chhungte pawh chu an hmin ta hle. An fapa zia an hrechiang ve bawk nen. 

Magie chuan a remchang tho tiin zan lama doctor kha a clinic-ah a va pan leh ngat a. Syringe chhunga damdawi an thun kha eng tak nge a nih hriat a duh tlat a ni. Kha thil kha Police lam hian rawn ngaihven se chuan Zorama leh Angeli te tan a pawi thui thei maithei. Doctor chuan a lo dawngsawng vat a. Maggie chuan a kal chhan a sawi zui nghal. 

"A ni tak maw? Nizan la la khan ka zir chiang nghal a, Mizoramah hian 1% bak a awm lovang tih theih tur damdawi a lo nia. Hmun dang aṭanga an lakluh pawh a ni maithei. Clozapine a nih kha..Natna vâng tak, Schizophrenia damdawi a ni a. He natna vei lem lo mihring taksa leh rilru hrisel pangngai thisena tam tak thun a nih chuan thihna hial a thlen thei. Kha damdawi khan lo chiu hman che chu nise, i taksa a zawiin i lu a hai ang a, i luak a chhuah bakah i lute pawh a nâ ang. I hriatna thazâm hnathawh a zawih telh telh dawn avangin nikhua i hre lo hial maithei. Chu lai tak chu remchanga hman an tum a nih hmel. Anmahni ngeiin he damdawi an hmuh dan hi sawi se zirchian lehzual te pawh a châkawm nen, Mahse, tikhan case siam loin in intifel thei ta hlauh a, a lawmawm nge lawmawm loh tih erawh ka hrethiam ve lo. " A ti ta mawlh mawlh a. Maggie chu a dâng lep a, a ngaihtuahna avang pawh chuan a khur titih thei hial. Schizophrenia natna chu a lo ralkhat hriat ve tawh a, Alzheimer nena inang tak, mahse, danglamna nei si a ni thung. An hriatna an hloh thut thut a, Multiple personality kan tih mai nen pawh cousin niawm vel an ni. Zawi zawia hriatna hlohin, a changin an rawn fing leh êm êm thung a; a chang erawh chuan buaina nasa tak pawh an thlen ve thei..anmahniah mize hrang hrang a awm i ti mai teh ang. Chutiang damdawi tam tham tak a thisena kah luh a ni hman lo chu vannei a inti takzet, chutihrualin Angeli a huatna ser a rawn insiam ṭan chiah thung. Mi luhlul tak a nih avangin a û hi thinlung takin a pawm leh thei ang em a hre lo, Pathianin a hria ang chu..

Lawmthu te a sawi zawh hnuin ,Malsawmzuala tlawh turin an awmna damdawi in a pan leh ta a. Cindy nau hmuak turin an kal a, Lengpui lama kal zawk awm tak si, Tuirial lama an accident daih kha a chhan hriat ngei a duh a ni. Mampuia khan a sawi ṭha duh lo riau bawk nen, eng emaw tak a awm a nih a ring deuh. Cindy nau pawh a rawn thleng tawh a, a nu pawh vawiin lamah a rawn thleng dawn a nih hmel. A serious deuh avangin Cabin lamah an dah lut tawh a. Magie tak phei chuan a la hmu ve lo. Malsawmzuala awmna ward a luh dawn lai mekin Mampuia nu coffee lam tur nen an intawk a, "Awii, a va ṭha e, i lo kal chu..coffee ka zu lam lawk ang e, lo awmpui rawh aw" a ti chul a. Hlim takin a va lut. Malsawmzuala hmel pawh hmuh a nuam ta hle. A bân a la na tih mai loh chu..a lo nuih sâng a, thlahlel zetin a lo vuan nghal chat bawk. Magie lah chu a rilru kalding bawk si kha eitur leh eng emaw tal pawh a lo lei miah lo chu niin, inthlahrun hmel takin "Engmah pawh ka rawn keng lo" a ti sap a. 

"Damdawi mum thawk chak ber chi i rawn kal a, a tawk mai alawm" a lo ti sup. Magie chuan ner nâng chungin, "Inla zei thei.." a ti nghat a. 

Pi Puii a rawn lut, Magie pawh a rawn lam kep ve nghal a lo nia. Amah chuan coffee no keng chungin, "Magie,i lo awmpui thei ang tiraw? Cindy ka va tlawh ve leh lawk ang e aw" a ti a. Magie pawn pawi a ti lem lo. A nu chhuah hnuah, "Vawiin hi awm leh ila, naktuk chawhnu lamah min chhuahtir tura ngen ka tum, ka ning tawh" Mampuia chuan a ti a. 

"Nia, a ṭha reng alawm" a lo ti ringawt. Malsawmzuala chuan zan lama thil thlen dan chu chipchiar takin a zawt leh ta vek a, phone-ah hi chuan sawi kim vek a lo har ṭhin bawk nen, Magie pawh chuan zêp nei loin a sawi vek a, Damdawi thleng khan. Mampuia hmel chu a rum sawt mai. "He hmeichhia hi Angeli ni tlak pawh a ni hrep lo ve, Demon a nih hi..ngawi teh, a rilru lam hi a buai tak tak tawh a niang" a ti hluai a. Police ten a pa an chahna thu te kha a hrilh ve a, "A dik ang, Psychiatrist chu hmuhpui ula a ṭha viau ang. Mahse, Meg, eng ang pawhin lo insiamṭhain lo danglam mah se maw..an bula i khawsak chhung chu ka ngaih a ngam thei chuangin ka ring lo" a ti ta hmiah mai. Maggie pawn a rilru tur a hrethiam hle. In dan a sawi lahin a pain a remti lo bur si, a dik e, ni e, mahni in chhung ngeiah pawh inven rûk reng reng ngaia awm chu thil nuam tak a ni miah lo. Hun ṭha beisei bak tihtheih a nei rih lo a ni e. 

Malsawmzuala chu chiang kel kawla melhin, "Ka chungchang chu thuhran lo ni ta se; zawh duh che ka nei a, thudik takin min chhang rawh aw" thutak zet hian a ti ta a. Malsawmzuala chuan, "Sawi teh" a lo ti nghut. 

"Cindy nau hmuak tura kal nisi, Engvanga Tuirialah accident daih nge in nih?" A ti chang ta fak a. A mitmenga rinhlelhna pawh hmuh hmaih chi a ni lul lo mai. Mampuia chuan a mit a khap fuk fuk a, a aw thian kharhin, "Hre lo la a ṭha zawk" a ti thawp sup. Magie lahin a hre châk telh telh bawk si. Sawi hmaih loh tur bawk chu Mampuia motor kha a lum thui lutuk lo va, an accident tûkah khan an va la chhuak nghal a, a chhe nasa deuh a, siam chhung pawh a rei angreng viau ang. 

"I sawi dawn lo maw?" Magie chuan a ti leh a. Lungawi hmel a pu hlek lo bawk. Malsawmzuala chu a han zi mar leh te te a, "Aw le, ka sawi ang. Mahse, thinrim lo la" a ti a. 

"Sawi vat mai rawh, ka thin tirim thei a nih chuan ka thinrim ang" a lo ti hlak. Nui deuh chungin, "Zaidam lo ve siah..ka tihlauthawng lui mai mai che a nih kha. Tak taka khamini khan kan kal hma a, a chhan pawh Cindy khan, 'Tuirialah peng lawk ang. Ka pawisa batu a awm a, kum khat dawn a ba tawh a, a tam tham sia, ka ṭhing duh' a tih avangin kan kal a nih kha..kan haw lamin a nia kan accident tak. Pawisa pawh chu a dil ngei a, a zatve chiah a lo pe. An inhau deuh nghe nghe. Kha nu lah kha Lengpuiah kal ve tho a lo tum a niawm a, chuan ve min la dil zui a, Cindy'n a remti tlat lo va, a chuang ve lo kha a vannei ta lel a nih hi. Chuan, chu chu a ni mai" a ti a. Magie chuan a chîk êm avangin eng emaw la awm tlatin a hria a, hriatchian a duh leh hle bawk. "Motor khalh thiam lo i ni lo va, i rui lo bawk. In tlanliamna hmun lah an sawi hmangin kawng zim lai pawh a ni lo. Engvang nge?" A ti leh ta chat chat. 

"I va detective ṭan ve mawle..aw ni e, Meg, pawi ka ti. Mahse, ka duh vang reng a ni lo. Cindy khan min rawn nêkin ka inkhalh reng laiin min duhzia te, min neih a tumzia te a sawi mawlh mawlh a, ka chhang lo. A thin thawk thut nge ka hrethiam tawh bik lo, steering kha min rawn herhpui vein, 'Ka ta i nih dawn loh chuan thi dun law law ang' a ti a. Kei ka lo inveng hman ta bawk si lo kha kan tlanliam ta ringawt mai a ni. Kan inkara awm hmeichhe ho toxic lutuk avang hian buaina kan ngah zual a nih hi.." a ti dam ta thlup a. Magie pawn a awih ta thlap mai. Cindy chu Angeli nen inkawp se an rapthlak dun ngawt ang. Heti êm êma mipa atchilh mai chu..

"Chuan Cindy chu tunah eng nge a chanchin?" A ti pangngai ve leh ta thliam a. 

"A la ngai reng a niang, hma a sawn lo va, a tlahniam lo bawk. A kawchhung lam a sawh na lo hlauh a, a lu ber saw a ni mai e" a ti a. 

"Ka kan ve lo mai ang, ka hmu châk lo" a ti sap a. Nui chungin, "A phût kher che pawh ka ring lo" a lo ti ve a. An nui dun. Inkan hun a tawp takah chuan magie pawh a tho a, "Awmpui pawh i ngaih êm êm loh kha, i nu pawh a khawngaihthlak, hawntir daih rawh" a ti a. 

"Ka ti reng alawm, mi hi a ngaihtuah leh lutuk a..Naktukah chuan ka chhuak a nih chuan tlai lamah zanriah rawn ei ta che.."..Mampuia chuan a ti a. "A hunte lo thleng phawt se aw" tiin an inthlah ta a. Pi Puii nen pawh an inhmu leh ta lo. Cindy an dahna hmuna va lan kha a duh chiah lo nen..in lam panin a inkhalh haw ta vang vang a. 

Zanriah an ei laiin a pa bawk chuan, "Naktuk hi chu thil eng emaw chinfel tur a la awm a. Inbuatsaih nan pawh hmang ila, a tuk lehah Lungleiah chuan kan kal ang. Naktukah Angeli leh a nuin Dr. Hrekima va hmu bawk se la" a ti chuar chuar a. 

Tetea chuan, "Kei chu ka zin ve lo mai ang. In ka lo nghak ang" a lo ti vat. A nuin, "Kan kal vek ang, Hmuni erawh A nu Rini te inah a lo khawsa rih ang a. Sunday kan va cham ang a, mondayah kan haw leh mai dawn a, a rei lo..i nî te bakah i patea te pawh kan tlawh khât lutuk" a lo ti nghal zung zung. Amaha awmtir chu an tum loh hmel khawp mai. Angeli erawh ngawi rengin chaw a ei mial mial a, a melh ngai a lo melh leh veng veng thin. Magie pawn biak a tum hran lo. Sawi tawh angin Pu Ruatliana hi Lunglei khawchhuak a ni a, a nu leh pate hi an damrei lo naa an unau hi an rilru a puitling hlawm a, Pu Ruata hi an upa ber dawttu a ni a, an upa ber mipa hi Champhai lamah sumdawnna neiin a inbengbel a, Pu Ruata chhang chiah hi Angeli va awmna tur chu a ni, ani pawh hnathawh nei lem lo mah se; a pasalin hna ṭha tak a thawk a, an khawsak a ziaawm viau. Chumi nau leh chiah an naupangber inpui nghaktu hi Lunglei Govt College-ah Librarian a ni a; an nu te lam hi an khawsa thei a, A pate School-ah a thawk ve a, an khawsak a ṭha ve viau bawk. Pi Thanpuii te lam hi chu Sairanga khawsa hi chu Inpui nghaktu Pi Thanpuii nuṭa hi a ni mai a, a bak chu Reiek-ah te, Zawlseiah te an awm hrang thluah hlawm a. An ni lawm hi chuan an rawn zin changin an la rawn tlawhpawh zauh zauh zel a. Pu Ruata te lam hi zawng zin an harsat ve deuh nen, an inhmu zen zen thei lo a ni. Maggie pawn tumah a la hmuh loh avangin huphurh rûkna leh phurna a nei kawp a, a pa te lam hi chu sual leh khirh tak an awm a ring lo, a pa rêng hi a dam thlup mai si a. 

Chanchinthar an ngaihthlak mêk laiin an branch KṬP OB te an rawn lut thut mai. An lo dawngsawng vat vat hlawm a, An leader Pu Rema chuan, "Aa..kan rawn sawi lawk lem lo va, kan han inrawn khawm a, kan rawn leng thut a nih hi..ngaih loh lamah lo ngai lo ula" a ti a. Pu Ruata chuan, "Ekhai! In tiṭha lutuk, ni e, tunlai kan chhungkua hian hetiang zawnga kawm leh lenpui hi kan mamawh khawp mai" a lo ti ve duam duam a. Angeli pawh a nuin a han ko thla a, tum bûrin a rawn chhuk ve. Tetea pawh a la ṭhu ve a. An Secretary Sangtea khan ,"Ni e, in boruakte kan lo hre thawi ve a, a zia lo khawp mai. Angeli leh Maggie te pawh ka ngamtlak ve ve in nia, KṬP programme-ah in rawn lang khât lutuk a, eng nge in chanchin pawh kan lo hre har fô thin. Keini chuan englai paw'n kan lawm che uin kan lo inhawng reng tih kha min lo hriatsak u la..thu tam rawn sawi pawh kan tum lem lo. Ṭawngṭaina rawn neih chauh kha kan tum a. Kan Treasurer Tv. Siamtea hian ṭawngṭaina min neihsak se la..chhungkaw lam aṭang pawh khan in sawi duh apiang in sawi thei reng a nia" a ti dap dap a. 

Angeli chuan pawr angreng fê hian, "Kan eng boruak nge in hriat a? Zorama vel kha maw? Tuin nge sawi a? Ṭhenawmte takngial pawn an hre lo a nia, Maggie, i sawi lehpek em ni?" A ti tân tân a. Magie chuan, "Sawi nang" a lo ti sap. 

A nu chuan, "Aa..hetiang thilte chu hre loa kan ngaihte hian an lo hre ve vek zel alawm. Chutianga buai a ngai lo" tiin bengdaih a tum a. Pu Rema khan, "Aa..englo a nia, Zorama te aṭanga kan hriat a ni zawk a. An ṭhenawm hnaite ka aṭang zawka hria kan ni e, engpawhnise, a thleng tawh a, pawi kan ti a. Rawn len hi ṭul kan ti tlat bawk nen, eng emaw zawngin lo ngai lo hram rawh u" a ti ta zung zung a. Pu Ruata'n, "Kan lawm lutuk zawk e. Inthlahrung reng reng suh u" a lo ti ve thluam. Tv Siamtea rawn dingin ṭawngṭaina chu a nei ta a. Angeli awmdan leh thiltihte sawi si loin Angeli chian loh dan chu a pawh riau kan ti dawn nge, a hre ril tlat. Chulam hawi chuan a ṭawngṭai a, a la naupan nen ṭawngkam pawh a thiam khawp mai. Magie pawh a hahdam suai suai thei..Angeli erawh a che sek a, Hmuni meng ru chuan Angeli ner nasa lutuk leh a changa Siamtea a lo chhiatkhum thin chu a va hmu ta a, a hlau ta hle. A meng ngam ta lo. A han ṭawngṭai zawh chuan an inchibai liam liam a, Magie chuan, "Thingpui ka'n lum ang e, in fel êm mai" tiin choka lam a pan nghal a. Angeli erawh, "Ka mu dawn" tih leh a rooma chhoh a rual zui. Hruaitute pawn tih vak ngaihna an hre lo. 

Zep loh chuan an chhungkaw boruak tu khaw khain an hre lo emaw an tih thin hi an lo hre ve lehzel, engtia hria nge an nih erawh tuman an sawi ngai lem hlei lo va. A ruka sawi sep sep an kai tawh hial a, Pu Ruata lah an Kohhrana an khaipa ber a lo ni ve bawk nen, hmaichhana han hrilh dawt ngam an awm lo a nih hmel. Pi Thanpuii lah Hmeichhe pawlah a langsar si a, a ruka rel leh a fanu pawh ama tihkhawloh vek anga sawi awm thin mah se; a langah chuan tuman an be chhe ngam lo mai ni loin an tlawn emaw tih mai tur a ni hial ṭhin. Hei tak hi kan mutan a ni fô, Pu Ruata te nupa hi an ṭha e ṭha lo e tih lam ni loin, an fanu hian a timualpho zing ve tawh viau a, anmahni in enlet te pawh a hun thawkhat ve viau tawh a ni. Mizo chu kan ze pakhat ṭha lo deuh chu eirûkna te, mi tu emaw thil dik lo tih te kan sawi peih viau a, Social mediaah pawh a haw ber pawl kan ni fur zel. A tak ramah khang eirûk vanga lian ta te, thil dik lo an ti tih kan hriat reng te pawh kha kan haw ngam leh mang bar lo va, kan be ṭhain an mit tlun kan la tum ang sauh sauh a, Kohhranah nise lawm an hlawhin, duhsakna an dawng nasa a, Sawma pakhat an chhung lut tam thin miau bawk nen..Khawtlangah hrim hrim pawh YMA te pawn kan do ngam chuang lo. Sum faia YMA tana ṭanpuina chhunglut pha chinte ngat phei chu an hlawh phû lova che lian ni mah se, kan pathian biak lo chauh chu a nih tawh hi. Hetiang hrim hi chuan eirûkna te hi chu engtik khawtikah mah kan do rem lul lo vang. 

Kan han peng ta duah a, a ṭul ṭhin a niang e. Maggie thingpui lum tui ti taka an in hnuah an ni pawh chu ṭinzai an rel ve ta a. An hawn rual rualin Hmuni chuan, "Awii, api, Ṭawngṭai lai khan U Angeli a insiamchhe nasa lutuk a, ka hlau tawp" a ti ta roh a. 

An hamhaih deuh. A pu zawk chuan, "Chu! I lo meng ru tihna em ni?" A lo ti khauh a. Inthlahrun hmel deuh hian, "Aw..ka meng ru châk tlat a." A ti ve ringawt. Pi Thanpuii chuan, "I ngaihbel mai mai a nih chu, Angeli hi chu a harh êm alawm. A tet lai pawn a maimichhing duh ngai lo. Bakah KTP te pawh kan sawm ni miah lova rawn kal ve leh tawp..over polite thlak lutuk" a ti hlak hlak a. 

An pain, "I zahpuiawm mai mai e a. Sawm ngai lova an rawn lang kha a lawmawm lutuk tlat, khatianga a nachang an hriat loh vang a nia ṭhenkhat hian an dem let hlauh zawk thin ni.." a lo ti ve hmuk hmuk a. 

"Tih tak takah te chuan Angeli aia ṭawngṭaipui tur hi an tam ve e. Kha an leader Pu Rema farnu te pawh kha eng a ni bîk lo, pasal pathum ûm tawh, a fate pawh ngaihtuah lo a nih kha..zilh ve ang hmiang" a nu chuan a ti leh hlawih hlawih. 

Pu Ruata chuan beidawn hmel zetin, "A va beidawnthlak êm aw..hetiang rilru i put tlat vang hian a nia i fate i tihhel vek thin. I nihna te, i chanvo te hi hrechiang rawh." A ti ta zêk a. 

Tetea lah hi a lo sual thiam thei, "Pa, hrethiam rawh. nu hi chu fa hmangaih a tina lutuk a, a ngai sual ve thei lo alawm, nakkum aṭangin Kohhranah nihna nei tawh lo va a fate min enkawl pawh a tum kha" a rawn ti ve a. Magie a nui deuh, a nu chuan rum fêa melhin, "Muanzual, i chimawm thin ngawt mai. Nihna hi ka duh êm êm lo, min thlan miau chuan kan pawm lo thei lo a ni mai..ka nihna hi sawi ve sek suh" a ti hlak hlak a. 

"Kohhrana nihna nei ter tuar nu te hian fa enkawl an thiam lo zawk mahin ka hria..kei chu nupui ka neih ve paw'n, member ṭangkai tak bak nihtir ka tum lo bur, nu chuan fate enkawla in chhung uap lum tur a ni rinngawt" Tetea lah hi a la naupan ang ai hian mi hnial a thiam riau. A nu chuan, "Nanga bialnu hmeithai fa te kha chuan engtik khawtikahmah nihna a nei pha ve lovang e" ngeiawm zet hian a ti leh a. 

A pain, "A tawk, i ṭawng duhâm thin. Hmeithai fa han tihte kha a ṭulna a awm lo, kei hi ka boral chuan hmeithai hmabak in ni mai..khatiang khan ṭawng tawh hlek suh" a ti ta hrep a. An pa thin a rim ta deuh nen, a chhang zui ngam ta bik lo a niang, ngawi rengin an pindanah a lut ta daih. Maggie pawh mu turin a inbuatsaih a. Hmuni'n Angeli awmdan a sawi kha a ngaihtuah zui rauh rauh mai. Ani hi a kawchhungah ramhuai te hi an lut em mawni dawn le tih thlengin a ngaihtuah, chutiang a nih chuan a û chu a lainat thei maithei. Natna chi khat vang a nih erawh chuan amah Angeli cho chhuahah a ngai thung ang. A ngaihtuah mêk laiin Malsawmzuala'n a rawn call a, "Zaninah ka lo sawi nghal a, naktukah chuan ka chhuak thei dawn a nih chu..tlai chu aw" a rawn ti a. 

"Nia, ka pate ka lo dil ve ang. A tukah khan Lungleiah kan zin dawn lehnghal" a ti a. 

"Ka va ngai dawn che ve, i lerh ang em?" Naupangchhia zetin a rawn ti a. 

"Lerh ve zuai ang, inzir nan" a ti zauh a. 

"Margareth, fiamthu pawn sawi tawh suh. " A rawn ti hrâwk. 

"Cindy bulah lo awm lo la a ni mai" a ti ve a. 

"Taka Cindy chu a rawn harh chho ṭan a niawm e. A chenpui a chhungte chu a hre rei ruai a, keini ho chu min la hriat loh hmel, zawi zawia hriatchhuah tur an tia..a lainatawm ve reng" a rawn ti mawlh mawlh a. 

"Ama cho chhuah alawm" Magie chuan a lo ti hmak. A chang chuan a nunrawng lek lek hian a inhre thin. Mahse, dik tak chuan Malsawmzuala hi chân a hlau ve tawh bawk a ni. Ani anga deal thiam a tawng tawh awm si lo va. Malsawmzuala chu an jection dawn avangin a dah ta rih a. Msg erawh a bân avangin a la type thei lo. Voice msg a rawn thawn tluk tluk zel. 

Magie chuan phone dah mai a tum laiin Angeli msg a dawng ta a, a open vat. "Nangmah vangin Lungleiah ka chhungkua hmu phak lovin ka awm dawn a nia, Engkim hi nangmah vang a ni. Ka rilru tibuaia heti taka min awmtirtu pawh hi nangmah. Ti nge i lo pian ve le? Ka hua che, ka haw lutuk che" tih a ni. Magie chuan a reply lo. A pindan kawngka a va kalh nghal zat a, phone dahin a chhing ta vang vang mai. 

Zing dar 3 bawr velah Angeli rak tuar tuar avangin a harh kâwk a, a thu chhuak nghal. Angeli ṭawng ri chu a hre ṭha thei meuh lo, mahse, thlabâr awrawl zawng a ni chiang e. Rang taka thoin a pindan aṭangin a tlanchhuak a, Angeli room kawngka chu a chum nghal dawt dawt. Angeli ṭawng pawh a hre thei ta. "Ka duh lo, min kalsan r'u, Min pui r'u, nu , pa, Magie..ka hlau a nia..hei an lo kal leh tawh" tih vel a ni. Tibuaitu eng emaw tak zawng a nei chiang mai. Tetea a va kaitho ta vat a, A nute a zuk kaitho nghal bawk. A pa leh Tetea ten Angeli room kawngka chu an nêk nghek nghek a, a sak nasa si. Pi Thanpuii erawh kil khatah a lo ding khur zawih zawih, Hmuni erawh chuan engmah a hre lo a nih hmel. Mipa pahnihin theihtawpa an han beih takah chuan kawngka kalhna chu an tichhe thei ta hram a. An lut nghal huk, An thil hmuh avang chuan an ding chawt hlawm mai. 

Angeli chu a khum bul chhuatah kekawrtê leh bra chauh hain a lo tal hiat hiat mai a, a room tukverh thlanglam a inhawng bawk. Parda chu thliin a chhem leng vawn vawn a, Angeli khum chungah chuan damdawi mum var lian vak lo a lo awm thluah bawk. A pa chu a harhchhuak hmasa ber nge a fanu chu a va pawm chawt a, a tal nasain a chak kher mai. "Min rawn lak an tum" a ti mai a, mak deuh mai chu a tider miah lo tih hriat takin Angeli chu hmuh theih loh eng emawni hian a hnuk lui ti mai ang, hnehsawh zetin a kailui ti tawh mai ang. Tetea leh a pate chuan an bawhbet ta ringawt a; Pu Ruata chuan ring angreng tak hian, "Ramhuai bawlhhlawh leh tenawmho, ka fanu hi chhuah vat rawh u..kal bo turin Isua Krista hmingin thu ka pe a che u" a ti ta ṭhak ṭhak a. Chutia vawi 3 lai a au hnuah chuan Angeli pawh chu a zawi ṭan ta a, a chauh hmel kher mai. A harhfim lo tih hriat takin a meng â ruai a; a mit a sen râm bawk. Magie chuan a thawmhnaw a lo laksak vat a, a haktir nghal mawlh mawlh bawk. Hah hmel deuha thawk la hawk hawkin, "An kal tawh e..mahse, an rawn let leh ngei ngei ang" a ti ṭiau a. A nu a rawn ṭap chhuak nghal phawng..Magie paw'n a phirpui chu a lainat ve ta..khumah an zawn chho a. Damdawi kha bar a tum nge mawni dawn ni. Magie chuan a la khawm mawlh mawlh a, A pa chuan, "Mate, engmah hlauh tur a awm tawh lo aw..a ṭha vek tawh e. An rawn kal tawh lo vang.." a ti dam thluam a. Pi Thanpuii erawh chuan, "Ka fanu, i va vanduai tak êm, ka va lainat tak che êm.." tiin a lo ṭahkhum bawrh bawrh thung. 

Amaha a mut ngam tawh loh miau avangin Tetea'n a riahpui dawn a ni. A roomah sofa an hung tho a, tah chuan a mu mai a niang chu..Tetea chuan Angeli hriat phak lohin, "Pa,in rilru tihah lutuk suh u. Ka u hian zu leh damdawi a tihpawlh nasa lutuk a, hetia a nghei thut hi a taksain a zo lo a nih hi..Zu ngawlvei te pawn ramhuai an hmuh fô hi, tiang kha a ni mai.." tiin a thlamuan a. Magie rindan pawh a ni. A pain Angeli pawn chhuah a phalsak tak si lohah chuan damdawi leh zu a nghei a ngai ta si a, vawi leh khata nghei thut kha a zo lo a nih hmel. Ruihhlo tih hi chu a pawi vawng vawng a nih hi maw..

An han mu leh tak naa, Magie chuan muthilh leh harsa a ti hle. A hlauh vang ni miah loin amah uap runtu eng emaw awm tlatte hian a hria a, lo bihthlaa lo vil rengtu an awm ve niin a hria. Mahse, Angeli nen phir kan ni si a, ka feel pui ve a niang, kei chuan hetiang hi ka hlau ve lo..tiin a infuih a. Mi dawihzep tak a ni lo hrim hrim bawk nen..dar 5 rik hma deuhin a muhil ve leh ta hram. A thawh chuan Hmuni chiah a lo la tho a, Magie a hmuh rual rual chuan, "Awii, U Maggie, lo kal teh, nizan ti ila zing lam a ni tawh ang chu, mumang nge a tak pawh ka hrethiam lo. Ka khum mawngah U Angeli hi a lo ding run a, ka zuk en chuan a hmuiah a kutzungchal dahin a lu a thing a, ka hlau lutuk kha au ka tum a, ka au chhuak thei si lo, mahse, chutia ka buai chhung chuan U Angeli chu a lo bo daih mawle..kei chu ka hlau eee.." a ti khur dar dar a. A hlau tih pawh a hmelhmaiah a lang thei. Magie chuan, satliah thei ang berin, "Maimizialin i awm a nih chu, ka awm nasa thin alawm kei pawh" a ti a. Hmuni thil tawn erawh mak a ti ru viau tho. 

Ngawi rengin rawng an bawl zui a, a nute pawh an rawn tho a. Angeli an han ngaihven nghal. An beisei loh deuhin harh pangngai takin a rawn tho chhuak a. A hmel hmuh pawh a hrehawm loh. Vawiin lamah Dr. Hrekima an va hmu dawn kha a nia. Apa leh Pu Hrekima te hi inhmelhriat ṭha tak an ni bawk a, hun a lo siamsak thei hlauh a, a lawmawm tak tak a ni. Tukṭhuan pawh hlim tlang takin an kil a, Maggie chuan Angeli chaw eikhamah a nu te bulah, "Malsawmzuala a chhuak dawn, tlai lama zanriah eipuiah min sawm a..in remti em?" A ti a. Angeli hriat laia sawi kha nuam a ti lo a ni. 

A nu chuan, "Naktukah kan zin dawn sia, insiam te i ngai dawn asin" a lo ti a. 

A pa zawkin, "Aa..vawiinah eng em em mah a ti dawn chuang hleinem, lo insiam lawk se, va ei rawh se..a zinsan daih dawn bawk si" a lo ti a. A lawm ngei mai, a nu pawn a sawi buai tawh lem lo. Zorema te pawn a chawlh lak chu an hrethiam viau a. Lawmkima bakah thawktu thar an lak belh bawk a, an buai hran lo. Lawmkima pawh a la thawk tluang ve zel a, Zorema mit a tlung riau a, a ṭawngtam si lo, a hna a thawk mawlh mawlh zel a, a duhzawng tak a ni tlat. Pi Rini pawh thurâwn an pek angin chawhmeh a khar chhawng ve a, veng chhungah a zuar kual thin. Hlawk tak ni lo mah se, chawhmeh leh eng ilo man a lo daih chuan a ṭha reng. Numami te lah kha A bialpa nuteii te khua Kanghmun south-ah an lo tlan dun daih chu niin, koh haw ngaihna an hre rih lo a nih hmel. A hun laia an induhna hian damchhung daih se a ṭha ngawt mai. 

A nu leh Angeli te chhuah hnu lawkah Tetea a rawn haw a. School kal turin a chhuak ve kha a nia. A inthlak sawk sawk a, "Naktukah ka zin dawn sia, vawiin chu kan leng dawn" a u bulah a ti a. A hlim hmel hle. A û pawn a hrethiam..Ani pawh in chung lam a singsa a, a pa sawi ang khan a zinnaa ken turte a thliar fel a, a khung ṭha ta thlawp. A intihfel zawhah fai takin a inbual a, Malsawmzuala te pawn damdawi in an chhuahsan tawh a, Zorina rawn hruaitir a tum naa, amah Magieiin, "Ka rawn kal ve mai ang.." a tih tlat avangin a rawn tir ta lo. A inthlak laiin a nute an lo haw a, chanchin a hre ve châk nen, a inthlak sawk sawk a, a zu chhuk a. Angeli hmel hmuh chu a nuam lo hran lo. 

"Nu, eng nge chanchin?" Magie chuan a ti a. 

"A ṭha vek kha chu a tia, marawhchu, a inngaihtuah nasa ṭhin deug a, hei hian a tibuai deuh niin a sawi. Damdawi a chawh nual a, han ei se, a ṭha vat mai ang" Angeli en pah chuan a ti a. 

Magie chuan, "Nia, dam vat rawh aw, Angel.." nelawm tak hian a ti ve a. Angeli pawh chuan, "Lungleiah boruak tharte kan va hîp ang a, ka zia vat mai ang. Nia, rilru hahdam ka mamawh a nih hi" puitling takin a lo ti ve a. 

Magie pawh a inpeih ta bawk a, A bialpate in lam chu Sangteii nen an pan ta. Amah chauha kal a hreh ve deuh a, Sangteii a sawm ta ngawt mai a ni. An va thlen chuan an lo ri ve laih laih a, Malsawmzuala chuan a bân awrh chungin a lo dawngsawng vat a. A chhungte dang, an chenpui ni lem lote chu hmelhriattirin an inchibai hlawm a. Chutia an hlim viau hlawm lai chuan Mampuia Nî Pi Mawizuali leh nula pakhat, sam buang thâng mai, zen zeih zawih, a taksa rem thlap kawrfual dum ha, hmelṭha zet hi an rawn lut a. Magie leh Mampuia te ding dun bulah chuan rawn ding dunin, "Ka vahpa, Hei Biteii chu aw..i nupui tura ka hual ngat kha" a rawn ti bawrh bawrh a…