mistake 10

MISTAKE (10)

Ziaktu : Toni Râlte

Magie chuan rang takin facebook chu a lut ta a. Amah an mention-na a lo awm nual mai. A'n luh nak chuan, Vani Hauhnar tih hian a thlalak post-in, Captionah "He nu Maggie Hmingthansiami hi nau titla tawh, mi pasal pawh kawp hreh lo, Officer choice a ni a, ka pasal pawh a lo kawp a, chuvangin ka rawn timualpho a nih hi" tih thu a hmang. Magie chu a nui hawk ringawt. Comment a rapthlak ṭek ṭek khawp mai. Chhiar pawh a chhiar zo duh lo. "A hma paw'n a video a viral tawh kha..he nu hi ka hria, a thawhna workshop pawh ka hria. " Tih angreng. Amah ṭanna thu chhakchhuak an vâng pharh mai. Maggie chuan a pa chu enin, "Tunah hian defamation case file turin ka kal dawn. Social mediaah tihmualpho leh dâwta puhin ka awm mêk a ni. Ka ngawi thei tawh lo" a ti ta nghat nghat a. Angeli leh a nu an lo meng phâwk viau. A pa chuan, "Khaw maw" a ti vut. Tetea a rawn lut ve chiah bawk, "U Magie, facebooka i chungchang an post kha i lo hmu tawh em?" A rawn ti lut nghal a. Magie a bu nghat. A pa pawh chuan a chhiar ve vek a, a chek hluk hluk mai. "Kal ang" a ti rum ûl a. Pi Thanpuii'n, "Case file kher a ngai lo. Mizo te chu kan sawi hluai a, a reh leh mai ang" a lo ti a. 

Magie chuan a nu leh Angeli melh tawnin, "Kan in chhung amite ngei pawh hian an tawrh a ngai tawh ngei ang le. He thu post tu hi Zolianthanga fanu, Vanhlupuii fake account a ni a, hetianga ti tur hian rawih a ni. Pawisa a dawng nual alawm, a tihtirtu pawh Angeli ngei a ni e. Engkim hi a bulṭhut aṭangin ka hai chhuak tawh dawn. Ka tuar thei ta bik lo." A ti ta charh charh a. 

Angeli biang a ri nghal thlawp, a pain a fanu kut a thlak vawikhatna a ni hial awm e. Ṭap pur chungin, "Ka ni awzawng lo. Pa, he nu vang hian kut min thlak a maw? Eng nge a niha he nu hi" a ti tuar tuar a. A nu pawh chuan, "I va mak ve a, Kut hmawr pawha i ben phal ngai loh kha Maggie vang hian i beng a maw? Margareth, ka tuar thei tawh lo, ni e, i nu pawh ka lo ni a ni mahna. Mahse, ka fanu atan ka duh lo che. Ka tan i thi tawh, i pianhlima i thi emaw kan tih khan ka sûn daih tawh che. A tawk" a lo ti khur hlawk hlawk a. Magie chuan a hmui pet fân fân chungin a nui lui hak a. Mittui tling ṭeuhin, "Ka hria e, nu, a tir phat aṭang khan min lawm lo tih pawh ka hria. Angeli aiin ka tlaktlum i hlau tih pawh ka hai lo, mahse, nu, i fanu i thisen ngei ka ni ve asin. I hnute tuia i chawm seilen ka nih ve loh vang em ni hetia min en hran bik? Ka tette aṭangin tihduhdahna leh enhranna karah ka lo seilian a, chhungkaw diktak ka hmu ta tiin ka lawm ve êm êm a. Angeli ai hian ka tlatlum thei ngai dawn lo tih pawh ka hai lo, pawi ka ti hek lo, fanu chanvo nei ve ila ka duhtawk chauh asin. Mahse, Angeli'n Malsawmzuala a lo ngaihzawn ve vang maiin tihian ka chungah in ti duh a nia. Angeli rilru hruai sualtu pawh hi nangmah i nih hi..ni e, ka chenpui thei tawh lo che u, ka chhuak ang" a ti ta mawlh mawlh a. An in chhung boruak zet chu a hahthlak ta kher mai. 

A pa chuan, "In chhuahsan kha chu sawi tawh suh u, tumah in chhuak dawn lo. Magie, ka fanu i ni a, kan bulah i khawsa ngei tur a ni. Chuan, i nu leh Angeli'n heti taka an lo rapbet che hi min va hrilh har zawk ve, i dikna chanvo chu i hmu ngei ang" a lo ti nghet charh a. Tetea paw'n, "U Magie, nang lehzel i chhuah chuan a hrehawm lutuk ang. Nu, inngaihtuah chiang rawh u, U Maggie hi i fanu a nih ve tho hi..U Angeli nen an inkarah gap awmtir tawh suh" a lo ti ve a. 

Maggie'n khati taka a han ṭawngkhum takah chuan Pi Thanpuii pawh a lo ṭawng duhâm chu a inchhir ve nge, a ṭhu hnawk a. A hmai hup chungin , "Paa, Magie, min ngaidam teh u. Angeli ka lainat leh hei aia thûka sual kawng a zawh ka hlauh êm vang hian Ka fanu Magie ngei pawh ka lo enhrang a, ka thiam loh vek a ni. Case pawh chu va file rawh u. Angeli chuan a tuhrah a seng ngei tur a nia lawm" a ti ve ta tlawk tlawk a. Angeli'n, "Nuuu.." a lo ti tuar. 

"Angel, duhtawk tawh rawh. I nau lakah hian rilru chhia pu tawh lo hram rawh. Chhungkaw hlim tak ni tawh ang u..khawngaihin" A nu chuan a lo ti a. Angeli erawh tau-in a pindan lam panin a pen chho pâwk pâwk mai. Maggie leh a pa te pawh Police station-a kal turin an chhuak ta a. Tun ṭum zawng tlawm a tum ta lo bur mai. Station an va thlen chuan a pa hmelhriat te pawh an lo awm hlauh mai a. Constable chuan report a ziahsak a, Amah Magie'n a chian ngam êm avangin cyber crime lam pawh rawih an tum lo a nih hmel, a hmaa Vanhlupuii a bula a lo inphawrhna te kha a sawi fai vek a; Police te pawh chuan zing kara Vanhlupuii va lak chu an tum ta a. Social media lama an post pawh group admin te be pawpin an delete tir ta bawk. Mi ṭhenkhat anga Social mediaah bawk ngaihdam dilna thu post satliah ringawt kha Maggie duhdan a ni ve lo. A tâng ngei tur a ni a ti hmiah, A hmain Vanhlupuii bulah Defamation a file dawn tih sawi lawk lo pawh a ni lo va, hrereng chunga tisual lui kha ngaihdam a tum lo bur. Mi ṭhenkhat, media lama rak tamte paw'n an sim phah ve mahna. Thil hrechiang mang si lova zeldin kan ching te, post hmasa nih kan châk huam zel te hi kan society tinuam lotu a ni ve a, Smart phone hum tam zawkte hi chu kan la smart tawk lo viau mai. Chuvang chuan hetia thil sual titu te hi ngaidam ngawt zel lo hian hremna pek zel tur..Mipa ṭhenkhat hurherh tak tak te'n hmeichhe ṭhenkhat hnena an sazu pic an han thawn ngawt zel te, ṭawngkam bawlhhlawh zet zeta an be ṭhinte pawh hi hremna dan a awm vek tih kan hre ṭhin lo nge kan block a, kan ngawi zui mai zel a. Kan Kristianna vangte pawh hi a ni mahna le..

Maggie te pawh an haw ve leh a, Malsawmzuala call a dawng kal reng a, Stationa an la awm avang khan a pick up duh rih lo kha a nia. Amah zawkin a va call ta a, "I ṭha em?" A rawn ti nghal. 

"Aw, Police station aṭangin kan chhuak fel chiah e" a ti a. 

"A ṭhat nasat chu, chet i la lovang tih ka lo hlau lutuk a. Ka chhugte pawn an hriain an hmu tawh a, mahse, engkim ka hrilhfiah tawh e. Chhiat kan tawh avangin kan inhmu remchang thei rih si lo va, Naktukah i hna chawl la, ka rawn kal ang" a ti zung zung a. 

"Aw le, boss" a ti sap a. 

An dah ta rih. In an va thlen chuan A nu leh Pi Rini te nupa an lo awm a. Angeli erawh a roomah a la awm a ni maithei. Chanchinte an han inhrilh a, Pi Thanpuii chuan, "Hmuni, thingpui va lum rawh. Maggie, lo ṭhu teh, ka bulah hian.." a lo ti sawk sawk a. Maggie pawh a ṭhu ve mai a. "Ka lo tisual nasa lutuk a, in kal hnu khan Tetea pawn min zilhhau hrep a, ka inchhir takzet a ni. Ni e, ka chawm seilen leh ka puak len i nih loh vang nge rilruah eng emaw a awm ṭhin a. Ka lo â êm mai. I hun hmasa lama i lo tawrh nasat vei nen, keini nufa lahin sual kan chhuah zel a. Min ngaidam hram rawh aw. Tun aṭang chuan nu ṭha ber nih ka tum tawh ang" a ti dam diai a. Maggie pawn a nu chuan a tider lo niin a hria a, a lawm ru kher mai. Tunah chuan nu hmangaihna a tem ve ṭan dawn niin a lang. "Ka hrethiam che alawm, puitlin tawh hnuah kan inhrechhuak chauh a, inhmangaih nghalte chu a har ve alawm..ni e, chhungkaw hlim tak nih hi ka duh ber a ni" a ti ve a. Hmuni chuan thingpui a rawn dah a, Pu Liana'n a han in chu a chhak chhuak nghal ṭhawt. "Lalhmuni mai mai chu aw, i thingpui siam hi a al vek alawm" a ti hluai a. 

Hmuni lah chuan nui hawr hawr chungin, "Muthlu chunga ka siam a nih vang a nih kha.." tiin no chu a seng leh a. Maggie'n, "Va mu rawh, ka rawn lum ang" a ti a, a tho nghal bawk. Zan tir lamah an boruak a alh hluai naa zan a rei a, boruak a nuam chho ta hle. Hetia a nu pawh a danglam chuan Angeli pawh an la hneh vat a rinawm. A sual laklawh a, a tlawm hreh mai mai zawk niin a lang. Angeli ringawt bitum chu Magie tan pawh a harsa vak lovang chu..A mut pawh a tui e. 

A tukah chuan Police te chuan Vanhlupuii chu an va hruai ta a. A pain a kalpui bawk. Tukṭhuan ei khamah Magie pawh koh a nih angin Malsawmzuala nen Station lam an va pan ve a. Vanhlupuii leh Zolianthanga te chu an lo meng rum ûl mai. Maggie lahin a hlau hlek si lo. Zoliana chuan, "Hmingthansiam, Engvanga Hluteii hi mantir ngawt nge i nih a? I pawi eng nge a sawi? " A lo ti nghal tûn tûn mai. Magie a khi sak a, "Amah kha zawt la ti nia" a ti nghat a. 

Police te chuan Hluteii chu thil an han zawt a, dâwp vak pawh a lo ngai lem lo. Kha thil posttu kha amah a nih thu leh Maggie a huat êm vanga post a nih thu a sawi. Angeli hming a lam ri miah lo chu Maggie chuan mak a ti deuh. Mahse, Angeli'n a vau lawk sa pawh a ni ve thei tho mai. Maggie dik lo taka a tihmualpho avangin Vanhlupuii chuan a tuar dawn ta, Pawisa chawitir theih a nih laiin an harsa ve bawk nen, Pu Zoliana chuan pawisa chawi aiin a tân hun chhung pawhsei mai nise a duh zawk a. Lohtheihloh avangin Hluteii chuan jail bang a zût ve a ngai dawn ta. Pawisa ît lutuk hi zawng a pawi a ni. Jail tan inhuama kha thil kha ti a ni bawk a, A nihna takah chuan Maggie vauna kha hrethiam lo a ni bik lo. A ṭhiante anga thawmhnaw leh mamawh chi hrang hrang nei ve tho a ni a, Angeli sum pek tur kha a tlem chhe lo bawk si, Tuar inhuam ru chung leh Maggie'n a report loh beisei ru chungin tikhan a che ta tawp kha a nia. Angeli'n, "Maggie chu ka hup bet thei ang, FIR a thehluh ring suh" a lo ti ve kher bawk nen. Mahse, Maggie dawhtheihna ramri kham a pel ta hret a, tihian a tuar dawn ta a ni. Maggie te'n report an va thehluh hlan khan Angeli'n va biain ,"Ka hming lam ri lo la, ka rawn bail vat ang che. Pawisa pawh ka pek belh ang che" a lo va ti diam tawh bawk. 

Maggie dikna chu Media lamah pawh puanzar a ni ve leh ta bawk a. Mi ṭhenkhat dazâtzia hi chu aw..Maggie mualpho laia diriam chiam chiamte khan an han fak leh chiam a. Vanhlupuii an demin a na thei ang berin an sawi leh bawk, a âwm ve tho mai ti tawh mai ang. 

Angeli tih loh chu an hlim e. Khami tlai Police station-a an kal tlaiah khan Malsawmzuala'n an inah a penpui a. A chhungte nen a hmelhriattir a, Malsawmzuala nu chu a hmelṭhat bakah a vun a nalh hle. A pa erawh a lo awm lo va. Cindy pawh a awm lo. Zorina nen an han inchibai chu Zorina chuan, "I sam hi tidanglam la, i mualpho zel loh nan" a lo ti chat mai. 

"Ni ngawt mai" a ti ve ringawt a. Mampuia nu pawh chuan, "Ni e, tidanglam ngei ngei rawh. Color la.." a lo ti ve a. An nelawm nufa khawp mai. Bawihi pawh an hawn dawn a ruaiah a rawn haw ve a, "U Maggie chu i lo leng a law?" A ti sar sar a. A lo la hre ve reng chu niin..Maggie pawh chuan, "I rawn haw har lutuk a, ka haw ṭêp tawh asin" a lo ti ve a. 

Nu berin, "Chaw te ei ve law law ṭha tur a nia" a lo ti ve mêk a. 

"Aa..nidangah chaw chu" tiin a nui sen sen a. Malsawmzuala nu, Pi Puii pawh chuan Maggie chu hetia han en mai paw'n mi sual tak niin a hre lo, a zia a zawih bakah a dam raih mai a; a rilrua awm ang ang sawi chhuak mi a ni lo bawk. A fapain a sawi zing tawh bawk a; a taka an han hmu ta chu an lawm ve hle. Malsawmzuala sawi tawh ang khan a nu leh pate hi ngaihzawng chungchangah an khirh êm êm hran lo. "In thlan sual leh in vanduai a ni mai" tih chu an thutlukna a ni tawp. Bakah an fate an naupang tawh lem lo bawk a, tin, mi pangngai tak tak bak an ngaizawng ngai lem lo bawk. Zorina erawh a vanduai deuh a, Tiang kha a tawk ta chu a nia. Mahse, Sawi tawh angin Pathian a belbul chawt mai a, mite ngaih ang êm êmin a tuar lem lo. A hmel hmuh pawh a hahdam viau. An ṭawngṭaipui nasa bawk nen. 

Maggie paw'n a thurawn dawn angin a sam chu tihdanglam a tum ta a. Malsawmzuala'n, "Tibuang thûng suh aw. Ka duh lo a nia" a ti sek mai. Coffee rawnga color a tum ta a, Parlour lar lem lo takah kalin a sam chu tlem cut hlek bawkin a va color ta a. A inhmeh kher mai. Tin, Angeli te ina a awm aṭang hian ei ṭha te a ei a ni bawk a, a vun pawh a mam zualin a ngo te pawh a ngo belh ta bawk. Malsawma'n, "Hei ai hian tlemin khal belh leh la chu ka duh mang e, thil ei tam hi zir rawh" a ti fô bawk. Mahse, ei thei tak a ni hran si lo va, bakah thau ai chuan tlema cher deuh lam hi a inhmeh zawk awm e. A dikna pholan a ni ta bawk a, zalen takin a hna pawh a thawk ve ta zel e. 

Sunday a ni a, an inkhawm bang gate-a a din laiin Mampuia'n a rawn bia a, "Ṭhianpa Zomuana kha an nu a rawn zin a, a hmu ve châk che sia, zanin tlai chu chaw va ei leh ang hmiang" a rawn ti a. 

"Ka nute ka lo dil ang aw" a ti a. Chutih lai tak chuan an KṬP Secretary Sangtea hian, "Maggie, in inah ka kal dawn asin. Phei rual ila" a rawn ti a. Malsawmzuala'n pawr zetin, "A rual khan phei hlek suh. Mipa zawng zawng ka thîk" a rawn ti hlur a, Maggie nuih a za hle. Sangtea bulah chuan,"Pen lawkna tur ka nei a, lo va kal mai rawh" a ti ta nge nge a. Sangtea pawh a kal ve mai. Maggie hi Sunday zingah bak a inkhawm ngai meuh lo va, an kohhranah pawh ṭhian êm êm a la nei lem lo. Amah hian a tlei tawk ve bawk a. Khatia a hmingchhiat vak hnua hnehna a chan leh vang kha ni maw mi mit erawh a la deuh, a sam a lo tidanglam ve tawh bawk nen. Tun hnuah chuan an hai nulh nulh tawh lovang chu maw..

In a thlen chuan Sangtea a rawn chhuak ve chiah a, Eng dang a ni lo a hawn hmain Dikteii nen an inkawm zuai vangin a rei leh ta deuh a ni. Dikteii leh Tetea te chungchang hi a nu khan a pa chu a hrilh tawh ngei a. Mahse, a pa chuan eng êm êm a sawi lo. "A upa ang a, an la inthlah ve mai ang, lo philî chûk ṭhin suh u" a ti ta daih zawk a. Sawi leh sawi hnu a pa hi mi haua fate zilh malh malh chi a ni lem lo va, a dawhtheih loh tâwpah ri nghal ṭhak chi kha a nia..a nu nen hian an inang vak lo. 

A nute bulah Malsawmzuala sawmna chu a sawi a, a pa zawkin, "Va kal rawh, i hna i thawh bak hi i chhuakvak ngai si lo va, va leng harh ve rawh" a lo ti var a. A nu paw'n, "Ni e, a ṭha reng alawm" a lo ti ve a. A nu fel ta lutuk hi a awm thiam lo lek lek. Angeli erawh an inhmu khat angreng khawp mai. Nizanah pawh Papari te inah a riak daih a, chaw an eiho vak ngai bawk si lo. Pawi pawh a ti hran lo. A insiam nghal zung zung a. Inchei vût si loin Malsawmzuala chu a lo nghak ta a, tun ṭum chu bullet a rawn khalh a, Zomuana te in lam panin an inkhalh phei ta a. Zomuana nupui Biaki hi naupangtê mai a ni ve a, Maggie te nena inkawm rual lek a ni, a hmel pawh a chhe lo reuh. A lo be nghal siam siam a, a fate a rawn hruai lo bawk a, an zalên viau mai. Zomuana chuan uisa a lo lei chu niin, Malsawmzuala nen chuan an siam ta rak rak a, Maggie hi a dangdai khawp a, saah hian arsa a ei lo va, a bak chu ramsa thlengin a ei vek thei a ni. Biaki nen an titi mawlh mawlh laiin, Malsawmzuala a rawn kal a. Inthlahrun hmel lek lek hian, "Bawih, Tlem ka lem ve sek dawn aw" a rawn ti a. Zu hi haw viau mah se; Malsawmzuala te zu in dan hi chu eng emaw tihpui leh an stress deuh chang hian a nih avangin a lo remti ve mai. Rui khawpin a in dawn lo bawk a. 

Biaki chuan, "Awii! Haw miah lo la maw, Mampuia hi ka hmuh hmasak ber chuan ka star rap mawle" a ti sar sar a. Maggie nuih a za hle, a bialpa eirawngbawl lai chu chhuang zetin a va melh a. A khi sak mai. 

"U Zomuana nen hian engtin nge in nih ve dan? Zep loh chuan in kum a inthlau ve sia" tiin a zawt ve ta phawng. Biaki chuan nui ar ar chungin, "Thawnthu ngaihnawm tak a tling ang mawle..tak taka U Zoa te inah hian an awmpui angin ka awm ṭhin a. Ka vanduai a, ka pa hian kum 3 ka nihin min boralsan a, ka nu lahin pasal a um leh daih bawk si. Ka patea te bulah ka awm reng a, mahse, Patea pawh a damrei ta lo va, chhungkhat hnai belh tur ka nei ta si lo va, U Zoa pa ka pa hi ka pu te nen inṭhianṭha tak an ni ve ṭhin a, min khawngaih chuan an inah min awmpui ta ringawt mai a ni. Chuan, u Zoa nen chuan kan inngaina chho ta a, frank deuhin sawi tawp ila, ka pa te zin hlanin a rui kha ka bulah a rawn riak a, kei lahin a ruka ka lo star ve kha a ni bawk nen, kan chesual ta a, nau ka pai ta mai bawk si, kan innei ta chûk chûk a ni" a ti ta mawlh mawlh a. Magie chuan ngaihnawm a ti reuh hle. Zomuana lah hian a duat hmel nasa mai si a, Biaki chu a vannei khawp mai. 

Malsawmzuala phone charge lai chu a rawn ri a, choka aṭangin, "Meg, lo la lawk mai" a rawn ti thum dût a. Cindy a lo nia. Tîm ru deuh chungin a la a, "Khaw nge Mampuia" a rawn ti nghal tâwng a. 

"Eirawng a bawl a, a laklawh a niang, ka lo hrilh dawn nia" a ti a. 

"Pe vat teh, buaina ka tawk" a rawn ti hlar a. A aw a hlauhthawn deuh avangin Magie chuan phone chu keng pheiin speaker a on a, Mampuia'n "Aw, Cindy" a ti a. 

"Min lo hruai vat teh, Hetah Falkawnah ka awm. Ka thawhpuite nena chaw eikhawm kan tum kha an intibuai a, ka awm peih lo. " Thupe aw angreng deuh hian a rawn ti a. Mampuia a ner sak, "Ka buai rih lutuk, bakah chaw ka ei chhuak dawn a. Zorina bia la" a ti a. 

"A mak! Min va ngaihtuah lo ve" a rawn ti a. 

"Ka bialnu bulah ka awm bawk si, kan awmdun khât êm hi, min hrethiam zawk rawh. Scooty ken tur che nia, taxi hman tur a awm ka ring,. " A ti zung zung a. 

Cindy chu a insût hraih a, ngui zet hian, "I bialnu ai khan ka pawimawh lo maw?" A rawn ti a, a lungchhiat hmel deuh, Maggie melh zauh chungin, "Number 1 a nia ani te chu..hei ka inkhawih berh rih sia, Zorina chu be lawk mai teh, ka dah aw" tiin mitmeiin magie chu off turin a ti a. Magie pawn a off nghal. Mampuia melh ralhin, "Awm lo ila i va hruai tho ang" a ti sap a. 

"Zeldin suh. " A lo ti nghut. Magie pawh Biaki bulah a va phei leh a, han thinrimna tur êm êm a awm rih lo bawk a, Cindy thisen erawh a sang a ti ve deuh. Malsawmzuala hi a ngaizawng tih a hai hauh lo. Mahse, Mampuia a rin rih phawt hi chu a ngai a ni. Dar 6-ah zanriah chu an ei ta a, an eitui tlâng hle. An titi bawrh bawrh bawk a, an sawi duhzawng lah a inang tlang bawk si. Magie pawn Zomuana te nupa bula awm chu nuam a ti khawp mai. 

Dar 8 velah an haw phei ve ta a. Malsawmzuala pawh a leng nghal dawn. Angeli erawh hmuh tur a lo awm leh tawh lo. Hmuni'n tv a lo en a, Khua a lum deuh bakah a thawveng zawk tiin bathlarah an va chhuak ta daih a. Inngheng rialin an ṭhu dun a, tlema a lo kainam deuh vang nge Mampuia kut chu a hlei riau mai a, an inkhak leh zauh ṭhin. "Tunah chuan boruak a nuam chho ṭan tawh dawn niin a lang a, buaina pawh i tawk tawh lo turah ka ngai..Nakkumah kan innei thei tihna" Malsawmzuala chuan a ti tehdaih a. 

"Nih innei ila workshopah ka la thawk thei ang em?" Magie chuan a ti a. 

"Ka hre lo, nangmah hian hawng zawk la, i pui ve chauh zawk ang a" a ti a. Magie pawn a châk ru hle. 

"Nia, a hunte lo thleng phawt se" a ti ringawt a. Malsawmzuala'n, "Mahse, kan fate chuan a hmei a pain motor an lawm dawn mang e" a ti fiamthu a. 

"A pawi lo daih zawk. " magie chuan a lo ti hlak a. Malsawmzuala phone a ri leh tawh, Tehsek a na. Cindy bawk a lo nia. Magie a tum hmak. Malsawmzuala pawh chuan rum nghut chung hian, "Teh fô chuan aw" a ti sup a, a la ta tho. "Aw" a ti satliah a. 

"Lo haw tawh la; i leng nghal mi?" A rawn ti ham ham a. Cindy hi a rui deuh a nih a ring hial. 

"Ngati maw? Ka la leng tui..pawimawh a awm em ni?" A ti nghut a. 

"I ngaihawm tawh alawm. Inrim reng kher pawh a ngai lo" a rawn ti ngher ngher a, Mampuia a ner nawk. A ei vak lo a nih hmel. "Ka dah aw" tih leh dah a rual a. 

Maggie chuan,"In ina a awm ve chhung chuan ka ngaih a ngam theih pawh ka ring lo" a ti nghat a. 

"Nia i rilru tur ka hria. Ka nu alawm awmtir a duh tlat saw ka hrethiam lo" a ti ve mai a. 

"A beisei reng dawn che a nia, ka ngei" a ti leh hlak hlak. Zaidam zeta rawn nuihin a biangah a piai a, "Kan inngaizawng hi kan tleirawl ṭha leh a ni ringawt. Lalduhawmi i nih hi" a ti sup a. Magie pawh a nui ve ringawt. Malsawmzuala hian a deal thiam riau..a changin a naupangchhe chei a, a changin a ngai puitling leh êm êm a, inanna pakhat an nei. An thîkthu a chhe dun lutuk hi..chân an inhlauh tawnna hian harsatna a la siamsak ang nge a phuar nghet zawk ang tih hriat va ni suh. Dar 10 pelhah a haw ta a. A bike a start dawn lai takin Angeli a rawn haw a, Bike-in tuin emaw a rawn thlah a ni. Mampuia a hmuh chuan a ding chat a, rawn melh râw râwin, "Tenawm dun lutuk" a ti nghat a. Malsawmzuala erawh chuan hre awm pawhin a awm lo. A tlanchhuak tur chu a rawn au zui leh kher a, a ding deuh a, "Min nei lo thei lo turin ka la siam dawn che alawm..Angeli ka nih hi" a ti lâwng lâwng a. Malsawmzuala a nui hak, "Tum ringawt te chu a pawi hran hleinem.." a ti nghut a, Angeli ṭawng leh hmain a tlan ta daih a. 

A pindana Angeli a lut chu khumah a bawk thlawp a, a ṭap khur ngat ngat mai. A phone phawrh lehin Papari a call a, "Par, kei zawng ka nun hi ka ning êm mai, Ka chhungte lah tumah ka lamṭang an awm tawh si lo. Ka vanduai tiraw?" A ti hlawp hlawp a. A rui lungpuam a ni bawk a, a ṭap nuam hle. 

Lehlam zawnga ngaihtuah chuan Angeli hi lainatawm tak chu a ni ve a. A hun hmasa lam ngaihtuah chuan hetia a che na viau hi demawm lohna chin a awm ve a. Fanu duatsual a lo ni ve kher bawk nen, a duh duh nei theia inngai, a mipa duhzawng pawh hneh mai thei tura inngai kha a ni miau a. 

Pi Rini nau tlangval kha a rawn thleng ta a. An ngenna angin Magie chuan hna chu a zawhsak a, Rinpuia hawn a lo tum ve bawk nen, Zorema paw'n lak mai pawi a ti ta lo va. Maggie rualin a kal ve ta a. A hming chu Lawmkima a ni. Tlangval hâng lam, kuhva heh ve deuh, mahse, a û ang lo taka zawiawi deuh mai a ni a. Maggie pawh a zahthiam hle. Zorema mawlh hi a lunglen khawhar a inṭan dawn chauh chu a ni si a; a thawhpuite bakah an ṭhenawm khawvengte pawn an ngaihtuah ru thei khawp mai. Zawmi pawh an bulah a la awm ve zel a, a tel lo chuan Zorema te pafa tan awm ngaihna a awm lo a ni. Tlani kal hma lutuk chu a pawi telh telh dawn a nih hmel. Apuia rawn kal loh nîin LPK Engine down ngai an rawn dah lut a. Zorema leh Lawmkima te'n an khawih ta a. Lawmkima chu an rin ai daihin hna a lo thiam a, Zorema pawh a lawm ve hle. Maggie erawh chuan Eco van a lo khawih ve mêk thung. An buai mawp mawp laiin Maggie phone a ri a, Angeli a ni. Mak ti ru deuh tak chungin a la a. 

"Magie, Malsawmzuala te accident kha i hre tawh em? " A rawn ti ta mai a. Maggie chu a mit sulh mai. 

"Eng a?! Engtin?" A ti tuar a. 

"Papari an rawn hrilh a, ih Tuirialah an kal a. Cindy nen khan, chuan an tlan liam a. Tunah an lo phur chho mêk" a rawn ti a. A âwm a dawm vung vung ringawt. Nia, Zingah khan, "Cindy nau, Delhi-a awm a rawn chho dawn a, kan zu hmuak dawn a. " A rawn ti a nih kha. Engtin nge accident chu an tawh theih le? A rui awm si lo va. A tha a khur titih a, Zorema te motor siam lai chu va panin, "U Zorem, Malsawmzuala te an accident" a va ti tâwng a. A ṭhawng ve hle a niang, Zorema pawh a meng phawk hle. 

"Haw hma mai rawh..khawih tur a tam chuang lo" a lo ti var a. Mampuia chhungte number a nei bawk si lo, khawi damdawi inah nge an dah dawn a hre mai bawk si lo. A rilru a buai hle. Zomuana a be ta ringawt a. Ani pawh a hnathawhna aṭanga chhuah a lo tum mêk a, ani chuan Mampuia nu no a lo nei hlauh a, A va be tawh a. Maggie pawh chuan an dahna tur a hre thei ta. Damdawi ina inhmu tur chuan an inbe fel a. Maggie pawh a intifai thuak thuak a, a kal ta nghal. A rilruin a ṭawngṭai mawlh mawlh mai. A va thlen chuan an lo awm nual tawh a, Angeli te pawh a hmu. Zomuana'n a rawn ngaihven ta vat a. Mampuia nu chu a ṭap pur reng mai, Bawihi pawh a mittui a hru zauh zauh. An na viau ang em le tih bak Magie chuan ngaihtuah a nei lo. Cindy te chu a haw lek lek hial, rawn awm lo se Tuirialah kal a ngai awm tawp si lo. Maggie va phei aṭanga 20 mins velah Malsawmzuala te chu an rawn thleng a, nikhua an hre lo ve ve a niawm a. Cindy phei chu a lû a thi nasa hle. A pawp a ni maithei. Mampuia erawh hliam êm êm a nei lo ti ila a ban veilam chu a vûng bur a, a kawi deuh bawk, a tliak a ni maithei ni. Rang takin an dah lut ta nghal a. Doctor leh nurse te an che nghal rap rap mai. An lu an sawh ve ve avangin nikhua an hre lo nia sawi an ni. An lungphû a ṭha a, ngaihṭhat lohna êm êm tur a awm vak lo. Mahse, anmahni ngainatu te tan chuan enliam ngawt chu a har ve mahna. Maggie leh Zomuana te paw'n an va hmu ve a, an harh si lo va, han inbuaipui dan êm êm a awm lo khawp mai. 

Pi Puii chuan Maggie a hmuh chuan, "I va fel ve, rawn hrilh hriat ngaihna che kan hre si lo va.." a ti var a. 

Maggie chuan a hriat dante chu a sawi ve a. Mampuia nî, A pa chhang chiah Pi Mawii chuan, "Nang hi hman deuha video siam kha i ni tiraw? Engtin nge Mampuia te nen in inhriat a?" Nelawm vak loh hian a rawn ti nghal bawrh bawrh a. Magie a îp deuh, a ṭawng ve hmain Pi Puii chuan,"Leh ringawt a che. Amah a ni lo, a phirpui zawk alawm" a lo ti ta vat a. Maggie a lawm hle. Pi Mawii chuan, "Chupawhnise, a hmingchhe tho alawm. " A la ti ṭâlh a. Chhan enah pawh a en ta lo. A mitmeng a kha riau a, a nel vak lo khawp mai. Cindy thawhpuite pawh an rawn lang ve hlawm a, an lainat thu an sawi ve sap sap mai. 

Tihtheih nei rih hek lo Zan lama kal leh turin Maggie chu a haw ta ringawt a. In a thlen chuan Hmuni'n chhuat a lo nâwt mêk a, a phun hlak hlak bawk. "Ninwm lutuk, rawn lut sek hlawm mai. An rawn rap bal zel a, hna min siam vak ringawt" tiin. Magie chuan a chhang lem lo. A nun a nguai a, a za hlawl lo a ni e. Tlaia a nu leh pate lo bâng bulah chanchin chu a lo sawi ve bawrh bawrh a, "A va zia lo tak êm..mahse, chutia a hmuna an thih loh chuan an damchhuak dawn a niang" A nu chuan a ti a. Zanriah ei hun thleng paw'n Tetea leh Angeli te an lo la haw si lo. Angeli hi chu ngaiah an nei deuh tawh a, an ngaihven vak lo. Tetea ber chu a ni. Phone a la thei bawk si lo. A nu mangang chuan Dikteii be turin Magie chu a hrilh ta ringawt a. 

Dikteii a va biak chuan, "Maggie, ka rilru a hah lutuk, Tetea hi kan inah a awm tlat, a school bang kha a rawn kal a. A rui lutuk a, ka nu a awm lo bawk a, mu harh turin ka tia, a rawn harh hnu pawn hawn a tum lo reng reng..lo hruai mai r'u" a rawn ti ta a. Magie chuan a nute a hrilh vat, a nu chu a sa leh ta kher mai. "Muanzuala mai mai chu aw..a va zahpuiawm tak, naupangtê si.." a ti bawrh bawrh a. Tihngaihna awm hek lo, Maggie chuan zuk hruai a tum ta a. Kawla nen an zuk inphur ta a. Kawla hi sawi tawh angin ṭawng duh ve tak a ni a, Misual tak erawh a ni lem lo. Magie nen an han inphur pawh chu amah a ṭawng nghal char char. 

"Hman zan Angeli nena zu kan innl dun chu, a beidawn thute a nun siamṭhat a châk vezia te a sawi nasa mai a. Ka khawngaih reuh tak tak a ni" a ti mial mial a. 

Magie chuan, "I khawngaih chuan zu pe tawh suh, nia..khawngaihthlak deuh a ni. Engtia tih chi nge mawni dawn ni" a ti ve a. 

"Ka pe pawh a ni lo, amah zawk hian a lei a, ka inah a rawn keng ṭhin alawm, ka lo duh ve tho sia" tiin a nui huah huah a. 

"Ti daih ila, U Kawl, in khaw lamah hawn i tum hnai em" Magie chuan a ti a. 

"Tum vak nang, ti nge? " A ti a. 

"Ka ti mai mai" a ti ringawt. 

"Nupui rûk leh ka tum a, a rei tawh lovang, a fel sia, nang pawn ṭha i ti ngawt ang" Kawla chuan a ti lûng lûng a. Dikteii te in an thlen tak avangin an ngawi ta rih. An zu luh chuan Dikteii te chhungkua chuan Tetea chu an lo en ṭhap a, Ani Tetea lah luhlul hmel zetin a ṭhu hmuk a, a meng no vak lo bawk. A û chuan, "Tea, haw ang, heti ringawt zawng a chi loh"tiin kaihthawh a tum a. 

"Aih, inah chuan ka lo haw dawn rih lo, ka nuin a rilru a thlak hma loh chuan" a tu nghet charh. 

"Ka nu te chu a fel tawh êm saw" magie chuan a ti sap a. Tetea a nui hawk hawk, "A fel e a..Dikteii te hri hrilh ve rawh. Nizanah inkhawm banah Dikteii nu a lo hmu a, a ṭawngkhum vak a, ka lawm lo. Ka zak bawk" a ti ta a. Magie pawh chuan mak a ti hle.

Dikteii chuan, "Aa..kha lam kha chu kan lungawi lo pawh a ni lo a nia. Tete, va haw phawt rawh. Kan sawi ṭha dawn nia" a rawn ti ta var a. A nu pawh chuan,"Ni e, in pahnih inkarte chu a chhe hleinem, keipawn i nu cuu ka hrethiam lutuk a nia . Kei pawh ka ni ve tho vang" a lo ti ve vat a. Chutiang nâ nâ nâ chu Teteii pawn a hnial ngam bik lo nge, a tho ve ta nge nge a. Bike a ken lo lh ni a ni bawk a,Motorah a chuang ve a. A tum bûr mai. Magie chuan, "Ka nu chuan eng nge a sawi hrim hrim a" a ti a. 

"An sawi ṭha duh vak lo, mahse, i fanu hi i lo control loh chuan in tan a la pawi thei ang ti lamin a lo sawi a niawm e. " Tetea chuan a ti ve mai a. Magie a ngawi rih. A nu mai mai chu aw, a va ṭul lo tak. Fate thunun thei si lo hian mi fate control kan tum ta thin a, a dik hlawl lo. Tin, mi induh ve te inkara kan inrawlh hi a ṭulna a awm tampui lo, an chhungte kan ni emaw ni lo emaw an pahnih an induhtawn chuan a tawk viau, mi ngaihzawngte hi kan lo tehin duh kan lo thlansak ve zut zut a. Kan kuang lo hi kan nawr na mah mah zel, thil pawi zawk a thlen phah fô.

In an thlen chuan a nuin a lo ânkhum nghal a, Tetea erawh ngawi rengin a pindan lam a pan hmiah. A nu pawh ân rengna chhan tur awm hek lo, a ngawi zui ve mai. Zanriah an ei a, nidang aiin an ei tlai. Hmuni hian a awlsam e a tih vang ni maw artui hi a kang deuh reng mai a, Magie chuan a hne deuh tawh. Mahse, a sawisel duh hran lo. An ei kham chiah tihin call a dawng a, Zomuana a lo ni. "A rawn harh tawh, lo chho ve leh lawk ta che..i remchan chuan" a rawn ti a. Magie a lawm kher mai. A insiam sawk sawk a, a chuak zui nghal. A han thlen chuan Zomuana'n a rawn ngaihven leh vat a, Doctorin luh huk a remtih loh avangin pahnih tê têin an va hmu a lo nia. Magie te pawh chu Zomuana nen an lut ve nghal. Malsawmzuala bân chu an lo cher khawng ut mai a, a lo tliak tak tak a lo ni. Malsawma chuan a lo nuih sâng a, Magie hlauh ruk deuh, a lu lam a sawh avanga a hriatna lam chian loh a hlauhna chu a bo duak mai. 

"Ka rin ai takin i ṭha" Zomuana chuan a ti a. 

"Nia, a lawmawm, Cindy zawk a vanduai a nih hi, an sawi hmangah a hriatna lam a khawih deuh a niawm a. A pawi tak tak a ni" Mampuia chuan a ti a. Magie rawn melhin, "I va hlauhthawn hmel loh, min ngaihtuah vak lo nimaw" a ti a. Magie a phu zuk ,"Hmm, ka hlauthawng reng aw. I zak lo" a'n ti ngawt a! 

"Awm pawh i awm rei lo vang a" Zomuana bawk chuan a ti leh a. 

"Awm rei loh hram ka duh, hna ka chawl rei deuh tawh nen" a lo ti a. 

"I bân chu a na viau em?" Magie chuan a lo ti ve a. "Na ve e, mahse, ka hman thiam loh lam a ni hlauh a, a zia.."a lo ti vat a. Awm rei an phal chiah si lo, Mampuia chuan Magie chu a ui hmel hle. "A theih chuan tlai ban pahin rawn peng ṭhin la.." tiin a ngen a. 

"Lutuk" a lo ti ve vat. An tlanliam chhan kha Malsawmzuala hian a sawi ṭha duh mang tlat lo va, eng emaw tak zawng a ni ngei ang. Magie pawh awm ve reng kha awmzia a awm lo bawk a, a haw ta a. 

Khatla kâwna a tlan lai chuan Footpath-a Hluteii niawm tak amah chauha kal chu a va hmu a. A rawn hnai tial tial a, Vanhlupuii ngei a ni. A lo chhuak tawh a maw?! A va mak dawn ve leh..a ding ta ringawt a. Hluteii chuan a rawn hmu ve lo, a phone a hmet pah deuh bawk a. A va pan ta nal nal, a kutah a kai lawk a, kawng pêng pakhatah a kalpui ta hmiah. Tlemin a lo reh deuh bawk a, Hluteii pawh chu a tal lem lo. 

An indinchilh hnu chuan, "Engtin nge i lo chhuah theih?" Magie chuan a ti ta thâwr a. 

Hluteii chuan elsen zeta nuihin, "Min bail alawm" a ti nghat a. 

"Tuin? I pate chuan an bail che ka ring lo hul hual" Magie chuan a ti hlak a. 

"Ele! Nangma nu leh i û ten mawle..chutah sum ṭhahnem tham tak min la pe cheu bawk. Vannei tak ka ni, ka duh duh ka lei thei tawh" Hluteii chuan a ti lâng lâng a. 

"Ka nu a tel ve a maw?" Magie chuan a ti ṭhawt. 

"Amah vekin alawm ukilte pawh bia..nangmah hringtu hian a hmangaih vak lo che a nih hmel" a ti leh hmiah. Magie pawh a hrilhhai ta deuh a. Eng dang sawi tawh loin a scooty awmna lam a pan leh ta dâwr dâwr a. A nu mai mai chu aw..a danglam tawh emaw a lo tia, hetiang a nih chuan fimkhur a ngai leh dawn a nih hi..in a thlen chuan chanchin an lo zawt vat a, a hrilh ve zung zung. 

A inthlak zo a zu chhuk leh chu Pi Rini a lo ṭhu leh tawh. A lo ṭawng mial mial mai. "Palai an rawn tir mang si lo, hetia tlan dun leh ringawt hi ka ngaihdan a ni lo, U Liana pawh a zahawm, palai rawn tirin lo rem lo ni ila ka hrethiam, Lalthanzuali pawh ka thin a tirim takzet a ni" tiin. 

A nuin, "Mipa nu leh pate kha kei zawng an thîp râm mai ka tia, palai an rawn tirh duh tak si loah chuan mipa thinrim khan a rawn ru chhuak leh a ni mai.." a lo ti a. 

"Khaw nge an awm pawh kan hre bawk si lo, a buaithlak eee" Pi Rini chuan a ti vawng vawng a. Khawngaihthla a la khawp mai. Inrûk mualpho tawh hi chuan mi pangngai hi chuan palaite tirin hmeichhe lam paw'n an duh vak loh pawh ni mah se; an lo rem ve mai ṭhin a ni ngai a. Khirh zual bîk hi zawng an awm a ni. 

Magie mu chu a muhil thei lawk lo, a chhing hlek a, a harh lehnghal zel a. A va zung zo a mu leh chu a chhing vang vang a, Malsawmzuala a ngaihtuah mêk. A pindan kawngka hi palh a awm thei tih hriain a kalh ngai mang lo va. A room kawngka inhawng riai riai erawh a hre lo. Mahse, mihringin hriatna danglam bik kan neih avangin a pindanah chuan amah chauhin a awm lo tih a hre thei. Huai leh hrâng a hlau lem lo va, vawilehkhatah a meng ta thut. A khum bulah Angeli leh Mipa a la hmuh ngai loh, sek angreng tak hi an lo ding dun reng chu niin…