Mistake 1

MISTAKE..(1)

Ziaktu : Toni Râlte

"Pa, a na a nia..khawngaihin, keimah ka ni lo" a ti tâwk tâwk a. A pa mitmeng rum ul chu melh pawh a melh tha ngam meuh lo. 

"Kum engzat nge i nih? Margareth?" A pa chuan pawr fê hian a ti a. 

Zûm zet hian, "Kum 17" a ti tham tiak a. 

"Kum 17 mi lekin hotelah mipa i luhpui ngam a maw?tenawmnu, ka fanu i ni lo takzet a nih hi..mipa i nel mah mah e" tiin a tairawtiang ken lai chuan a fanu malah a hlap leh thak. Maggie a rak tuar a, A nu chuan, "Paa, duhtawk tawh teh, a tawk. Khatianga kutthlak vak khan awmzia a nei lo asin" a lo ti ve a. A pasal chuan rum zeta lo melhin, "A thlavang hi lo hauhsak ve ziah suh. Nang chawp chawp hian ka hlap nghal loh che u" tiin a tiang chuan a tin uaih a, a hlap ta êm lo. Maggie chuan tap hlawp hlawp chungin, "Nu , keimah ka ni lo. Vawiinah te chuan Sangteii nen a pu thlanah kan kal alawm. Hotelah ka kal lo tak tak asin" a lo ti a. A nu chu a ngawi reng ringawt. Pasal hlau lutuk chi a lo ni ve bawk si. 

Ni e, Margareth Hmingthansiami hi Pu Zolianthanga leh Pi Chawimawii te fa upa ber dawttu a ni. An upa ber mipa hi drugs addict a nih avangin Home-ah a awm mek a. Maggie nau chiah hmeichhia chu Vanhlupuii niin Class 12 a zir ve mek a. An te ber mipa hian pawl 10 a zir mek bawk. Maggie erawh pawl 12 a pass khan a pain college kal a phalsak ta lo va, zirna chu a chawlhsan ta a ni. Aizawl Dinthar vengah an khawsa ve mek a, a pa hi An veng High schoolah peon hna chelh mek a ni a, a nu erawh chuan puan a tah thin. Chhungkaw awmthei tak an ni lem lo. An fapa addict khan a rawk nasa ve bawk nen. Pu Zoliana hi pa maksak zet mai a ni a, pawnlamah chuan mi nelawm tak, mi biangbiak pawh thiam tak a nih laiin in chhungah erawh sakei a ni ti ila kan sawi sual awm lo ve. A kut a ramin Maggie phei hi chuan a kut a tuar zing bik hle. Nu ber erawh nu derthawng ve tak, pasalte hlau em em chi, engmah a ngaihdan leh duhdan pawh sawi ve ngam ngai lo a ni thung. A pa hian Maggie hi a haw bik emaw tih mai turin thil dik lo eng emaw thleng se Maggie chungah a tla vek thin. A chhan chu Maggie hi a danglam bik vang a ni, a unau dangte aiin a ngo a, a nu leh pate chhunna a nei lo va, a mizia thlengin a danglam. Nikhua a hriat theih tirh ata a pa duatna leh ngaihsakna a dawng ngai lo. Naupangtê a nih lai pawhin a pa hian kut a thlak hreh ngai lo. A tirah chuan chutia fate theuh theuh zinga tihduhdahna a tuar bik chu mak a ti thin a, a unau dangte English medium-a an kal laiin an veng sawrkar schoolah zirna bul a tan bik a. Lehkha a thiam thei êm zawk a, pakhatna a ni chho zar zar thin. A nu chuan a lo lawmpuiin a lo fuih sauh sauh thin naa a pa chu a lawm ve ngai mang tlat lo. Maggie nau Hluteii erawh zirnaah a bil khawp a, pass tàwk táwk thin mah se,; a pa chuan a lo lawmpui em em tho zel. Enhran a nih tlat avangin a unaute pawn an hmuh dan a dang chho a, an te ber mipa Buanga leh a nu tih loh chuan Maggie chu an hmusitin tawngkam chhe tleuh nan an hmang fó. Kum 15 a nih kumah khan a nu leh pa te inhnial thawm a hria a, a ngaithla ru ta. 

A pa chuan, "Pa ber emaw nu zawk emaw blood group an chhawm thin. Hmingthansiami hi engvanga AB ni bik nge a nih?midang zawng O+ kan nih laiin..he nau hi ka fa a ni lo. Tu laka i neih nge? I lo uire a maw?" Tiin a nu a hrawk khur khur a. A nu chuan, "Pathian hming chhalin ka sawi e, tu lakah mah ka uire lo. Maggie hi kan fa ngei a ni" a ti ve tlat. Khata tang khan a pain a huat bik chhan chu a hrethiam chho ta a. A nu bulah pawh, "Nu, a pa fa ka ni ve lo em ni?" A ti hial. A nu erawh chuan, "Ni lutuk e, i pa hian thil a hresual zawk a ni e" a lo ti awlsam êt thung. Ngaihthat lohna nen an inah chuan a khawsa ve ta zel a. A pa tihduhdahna pawh ngawi rengin a tuar mai zel. Zirna chhunzawm phalsak a nih tak loh atang khan rilru a siam fel a, "Ka puitlin hunah ka chhuahsan ang" tiin. 

Maggie hi a te chhe vak lo, a vantlang tawk vel a ni a. A cher lek lek em aw tihtheih tur a ni naa, mawi lo khawp erawh a ni hran lo. A sam hi a zuah ngai mang lo va. Put nuam a tih zawk vangte pawh a ni ang chu. Zuk leh hmuam engmah a ti lo va, a fresh vang reuh zel. A va hmeltha êm tia enzui vawng vawng theih tur chi a ni lo naa, duhawm rukna erawh a nei. Mi hmelchhia a ni hek lo. Mi pawi a sawi ngai lo va, a pa avangin thian a kawm tam lo viau bawk. Sangteii nen khan an inkawm ve deuh a ni mai. In lama a awm takah chuan an thenawm lawka motor workshop-a thawkte tan eitur a siamsak thin a, chu chu a sum thawhchhuah ve a ni mai. Workshopah chuan a kal zing bawk a, thawktute nen pawh an innel ta viau. U Zaua a tih mai thin an boss ber nen phei chuan an sawi duhzawng a lo inang bawk nen, an inkawm thei ta phian a. Kal reng ta na na na chu an motor siam dante chu chîk taka enin a hriatthiam lohte chu U Zaua a zawt mai zel a. Tjil siam lam hi a tuizawng a ni hrim hrim bawk nen, an washing machine a chhiat tum pawn a nute awm loh hlanin a hawng a, risk lain a siam ve ta ngawt a. A tha ve ta mai. Kha khan a tiphur chho a, amaha a awm ni chuan an tv chhe hlei lote chu hawngin a khawih thin. A kalna tur lam nia a hriat avangin a tui ru ta ém em a. A pa te bulah erawh engmah a sawi ri ngam lo thung. A u Remsiama'n damdawi a han khawih ve a, a ruih sual changa a thinrim inhrikthlakna chu Maggie bawk. A nu lah an hlau si lo, Remsiama chuan a rawk reng mai a, Vawikhat Maggie thiannu Sangteii'n a birthdaya a present ve Purfume manto ve tak a roh ve em em chu a lo ruksak chu niin a lo hralh daih mai a. Maggie rilru na lutuk chu a tap tawp. A pa lah chuan, "Midang thil a ruk ai chuan a pawi lo zawk". A tihsak hmiah a. A tuar zo ta ngang lo va, " Misual tak i nia, i fapa a addict pawh hi a mak lo ve. I chawh" tiin pindanah a lut ta daih a. Mahse, a chhipsamah rawn kek thoin a hnungzàng vual tût khawpa nghaisak a tawk leh a ni. Nghaisakna a tuar thang tawh bawk a, ngaiah a nei titih tawh hial, a rilru a hel telh telh bawk. A nu chu a lakah sual lo mah se; nep a ti. Ti em ema pasal leh fate pawh han hlauh chu. Chhungkaw pawisa lah a pa vekin a kawl a, an thenawm khawvengte pawn chuti em ema Maggie an tirethei chu mak an tiin an lainat ru ve em em thin. A thianpa U Zaua pawh hian a khawngaih em avangin Rs. 500 pek tawp changte a nei thin. Hmeichhia a ni a, mamawh a ngah ve thin si, Stayfeee eng ilo man takngial pawh a pa a dil ngam ngai lo. A nu hian a ruka a lo kawl ve hi a pe thin. Hluteii lah chuan a u zawk mah nise a hlau chhete lo va, tawngkam chhe tak takin a be thin. Chutiang chhungkua atanga rawn seilian ta chu Maggie pawn an zia chhawm loh theih loh chinte a lo nei ve a, a tawngkam pawh a hriam ve hraih zel. In lamah hna a thawk nasa a, in chhung chu a kut a ni tawp mai. Pahrawn hrawn hi ang a inti thin. Remsiama chu Kumpuan duty ten vawihnih lai an man avangin Home nge Jailah a luh tih an zawt a, Home a thlang a, chutah te chuan Pu zoliana chuan kumpuan ho zuk dem a! A fapa chu an michhiat vanga man bik ang ten a sawi daih. A rilru hi ramhuai rilru ti ila kan sawi sual awm lo ve. 

Vawiinah khan chawhnu lam a awl ve deuh laiin Sangteii'n a pa thlan tlawhpuiah a rawn sawm ve a, a thiantha ber leh lainat thintu a ni bawk a, a pa ten an hriat leh hlau ru takin a kalpui a. Tlaia a pa lo hawng chuan Maggie leh mipa hotela an lut dun lai a hmuh thu sawiin tikhan a sawisa ta ringawt a ni. A bangbo em em a, a pa chuan a sual vang hrim hrima nghaisa a nih a ring hmiah. Zanriah pawh a ei peih lo va, a khua a sik ru er er bawk, a malpui leh a chawnte chu a duk thluah hlawm a. Kal pawh a kal tha thei meuh lo a ni e. Nachhawkna a hmawm a, a mu ta daih a. Zing lamah pawh a lu a nat bakah a taksa pum chu a nat chhuah vek avangin a tho thei lo va, Hluteii rawn lutin, "Hmingthansiam, ka tiffin pai tur rawn siam vat rawh. Thatchhe lutuk, mu reng mai" a rawn ti hlak hlak a. A pa endanin zir hek lo, ani pawh hian hmusit tak a ni. Laizawnte chu kan intan thin a ni ngai a. "Ka tho thei lo, lo insiam mai rawh" a ti sap a. Hluteii chu a chhuak tau sawk sawk a, a hnu lawkah a pa rawn lut vein a rawn pawt tho lawp a, Maggie a rak thawt. A ner sak sak a, a na lutuk a tin ni. "I nau hi kan chhungkaw innghahna a ni tih i hria em? Rawn tho la, va siam rawh. I nu a hman lo" a ti ram hmak a. 

"Ka thei lo. Pa" harsa ti zetin a ti a. Buanga rawn lut hlauhin, "Keiman ka siamsak tawh e. Muttir mai rawh u, a khua a sik a nih kha" a rawn ti ta a. Nilengin a mu a ni mai e. Eitur pawh a siam peih lo va, a nu chuan a rawn en zauh zauh a, chawhnu lamah tuilum chi al-in a rawn dep ta a, a zia ta deuh. Tlaiah a nuin puan a tah a ngai si, peih lo chung chungin eirawng a bawl a. A mittui a tla ve zawih zawih, a dinhmun rapthlakzia hi a ngaihtuah duh lo lui thin, awmzia a neih chuan loh avangin. Mahse heti em ema a han tuar bik hi chu a pa sawi ang khan a nu uire fa te hi a lo ni tak tak a niang a ti hial mai. A unau dangte aiin a danglam em em bawk si. A tuk atangin a hna ngai a thawk leh tan a, U Zaua te eitur a va pe chu, "I va kal bai ve, na i nei em ni?" A lo ti var a. 

"Bathroomah ka tlu a, nimin pawh kha ka rawn kal thei lo a nih kha" a ti ringawt. Mahse, niminah khan an thenawm pitar hnen atangin Zaua te chuan thil awmzia an lo hre vek tawh. Zawh chik erawh amah Maggie a zah an hlauh vangin an zawt zui duh ta lem lo. 

Maggie chu an ei chhung a thu ve a. "U zau, hmeichhia hi mechanic a nih ve theih tho em?" Mawlmang takin a ti a. Zaua a nui hawk hawk a, "Nge a theih loh ang? Sap hoah pawh an tam em khu..i chak ve deuh em ni?" A lo ti a. Zaua hi nupui neiin fa pawh pakhat an nei ve tawh. Pa nelawm leh a hnuaia thawh nuam tak a ni. 

"Ka tui zawng tak niin ka hria. Mizoramah hian an la awm pawn ka hre lo va..ka hreh deuh mawle" a ti a. 

"I tuina a nih phawt chuan zir rawh, lehkha pawh i thiam thei an tia, i thiam chak ngawt ang" tiin a lo sawi phurpui a. 

"Mahse, apa te hi…" tiin a kun daih a. Thil awmzia an hrethiam nghal vek. Zaua chuan insum zo loin, "Maggie, a harsa a ni tiraw? Kum i tlin veleh in dang daih rawh" a lo ti hmiah. 

A bu nghat a, tumruh hmel taka hmalam melh ran chungin, "Ka tumdan chiah a ni. Chuan motor siam chu min zirtir ve rawh aw" a ti a. 

"Tehreng mai. Beidawng lo ila kan hmalam hun chu a eng ve zel a nia" a lo ti vat a. 

Kum khat a liam a, kum 18 a rawn ni ve ta. A ruka pawisa khawl a hun tain a hria a, eitur chu a siam tam ta deuh a, an veng a suartluan ta thin. A tirah a pa chuan "I leplerh vang" a ti naa, a sum hmuh thenkhat te a pa kuta a han hlan fo takah chuan a sawisel ta lem lo. Sum áta a ta ngang chu. Remsiama pawh a rawn chhuak ta a, a thau ve káng mai. Mahse, a chhuah tlai la lain a rui lehnghal. Mahse, a inthup ve a, magie chuan a hre hnehsawh si, mahse, engmah a sawi duh lo. An in chhungah a lal loh em avang hian a ngaihdan a sawi ve ngai lo. An tih ang angin a awm tawp mai a ni. Sundayah hi chuan a inkhawm ve thin a, Pathian hi a awm a ring a, mahse, A tan bik a awm ve lo a nih a ring. A tleirawl lai khan Salvation campingah a lut ve a, khatihlai kha Pathian a hnaih ve ber lai a niawm e. Tihduhdahna a tuar chho a, vawitam a tawngtai thin. Ama tan pawh a dil ngai lo, a pa chu a pianthar theih nan a dil tawp mai a ni. Mahse, a tawngtaina chu chhan tikni a awm si lo va. Pathian hming pawh a lam ri ngai ta lo. Sundayah pawh a mawihnaiah a inkhawm ve mai mai a ni. Mitthi an neihin a pain kal a remti lo bawk. Mipa hmua fianrial hun an hman a hlau! Chuvang chuan veng chhungah pawh amah hria an tam lem lo. A tawmîm bawk nen. An inkhawm bang gate bula an din zawk lai chuan a hriatchian vak loh Sangteii te thenawm ami Rinhlua hian nui sûng chungin, "Nizan kha a va nawm hmel ve " a rawn ti hlawl mai a. Mak a ti hle, bangbo takin, "Eng nge nuam tur" a ti hà a. 

"Ehh, an zep vel a'h! Inpa pawh a chhiat loh kha..mahse, nupui nei lai ber kher chu" tiin a ner deuh a. Sangteii nen chuan an inmelh zawk mai. Nizanah khawiahmah a chhuak lo, dar 8 velah a mu daih tawh. 

"Min hai a niang, ka chhuak reng reng lo" a ti a. Rinhlua chu a nui vak vak ringawt. A kal hnu chuan Sangteii chuan, "A hriatchian hmel angreng sia, a tawng thei si, a pawi e" a ti a. 

"Ka nih miau loh a hnu. A mak e ka ti, Sangte, mi hian min hai nawlh nawlh zel, kha class xii kan kal lai paw'n min hai nasatzia kha.. Keimah ang deuh hi a awm ve a nih ka ring e. Hmanni eitur ka zawrh kual paw'n veng chunga pu Zawna te khi min dawr ziah sia ka tia ka han pan táng táng a, an fanu nula senior deuh khan, " Maggie, zanah hian i va chhuak nasa awm ve. Kan tlangval pawn nizanah rui deuhin ka hmu a tih che kha" a lo ti ringawt tawh bawk. A mak e" a ti niah niah a. Sangteii chuan a chal chuar náng chungin, "Phirpui i nei a niang" a ti thut a. 

"I va á tak, nei ila kan bulah a awm ve ang chu" a lo ti hlar a. Sangteii chuan, "I pa a sual sia, a hralh a niang, " a ti ringawt. An sawi zawm ta lo. Maggie chuan miin an hai fo chu mak a ti chho tan ta a, amah ang tak hmeichia zan lama che chhuak thin a awm a nih a ring ta deuh. A duh dan a ni lo hle. Miin amah angah an ngai vek bawk si. Engtia han chet tur nge tih a hrethiam ta hauh lo mai. A la naupang ve bawk si. A nute han zawh tawp lah a ngam chiah si lo. A pain RInhlua thusawite kha a hriat a hlau zek zek. 

Remsiama chu inthup reng thei hek lo le, thil a bo leh ta zeuh zeuh a. Maggie chuan a pawisa khawl rukte chu a lo la ang tih a hlauh êm avangin an thenawmnu Pi Zari a kawltir tawp mai. Pi Zari te hi an khawsak a harsa ve naa Pathian tih mi tak an nih bakah an fate pawh fel leh taima tak tak vek an ni. MAggie hi an khawngaih ve thin em em a, vawikhat a pain a sawisak lai paw'n Pi Zari pasal Pu Thanga a rawn inrawlh hial tawh. Mahse, a pain, "Thanga, ka in chhung buaina hi chu midang inrawlh vena chi a ni lo. Rawn inrawlh tawh suh" a ti fak mai a, an rawn dîkdàk ngam ta lo a ni. A pawisa khawl pawh 6000 a tling khawm ve tawh a. Nakinah in dang a luah ve huna hman atan a ti ve a ni. Remsiama'n a pa te almira ami an pawisa dah that a ruk avangin a pain a nu leh amah chu a beng leh a, In nghaktu in nia, in veng hneh lo ti ang zawngin a áng leh buan buan mai. Maggie chuan a rilru te tein, "U Remsiam, i pate hi rawk da vek rawh. Kutdawh turin siam rawh" a ti mawlh mawlh. Rilru tha put reng chu a thei zozai tawh lo a ni ber. A thil hlu ve deuh ho pawh Pi Zari te inah a thiar lut ta zauh zauh a, a nuin a tahsak a puan duh em em a hralhsak leh a, chuvang chuan a puan ho pawh a awngphah hnuaiah a phah ta vek. A kawr ho chu a mawi hlawm loh bakah an hlui ve tawh nen, a khawihsak duh a ring chiah lo. Hluteii rangkachak thi, a pianchama a pain a leisak a lo ruksak lehpek a. Hluteii a têk leh. A pa pawn a fanu thil a bo ta a ni bawk a, Remsiama chu a hau hrep. A hralhna an zawtchhuak a, an va khul lehnghal. Maggie thil chu ni se khulh chu khawilamah..tiang chuan Remsiama a che na tial tial a, Buanga a lo lian ve tawh deuh bawk nen, a ruihsual tuma Maggie kut a thlak leh chu ngaithei loin a u chu a hnek ve ta hmiah a. A pain Buanga zawk chu a tim hrep, "Mahni ute pawh sual ngam chu i va huaisar ve" tiin. Buanga chuan, "Pa, ti nge u magie hi in hmuhmawh em em bik? In pawi a sawi pawh a ni si lo va, i fa a ni ve lo mi? " a ti bawrh bawrh a. 

"Ngawi hmak rawh. Ka tan e te i lo tih khanglan chu le..aw. ani hi ka fa a ni ve lo, i nu uire fa a nih hi. Chuvang chuan ka hua" a ti ta phiar phiar a, an nuin, "Ngawi teh, U Zo, dawt chu sawi lo teh. Vawikhatmah ka uire lo. Magie hi i fanu a nih hi..tiang em ema i han sual mai le" a lo ti ve a. 

"Nang kha ngawi rawh. Bang den nan ka hmang mai ang che. Hmingthansiam, nangmah vang hian kan buai ziah. Ka ning tawh khawp mai. Pasal hi nei daih la a tha ang. " a ti a. Pasal! Chu thu a ngaihtuah zawng ringawt pawn a khur thei. Bialpa takngial pawh la nei ngai lo a ni a. A dinhmun avangin a nei ngam lo, betu leh duh dertu te chu a hmu ve, an school kal lai pawn tihtakzeta ngaizawngtu a nei ve fo, mahse, a pain a hriatchhuah hunah a sawisa hlum thei mai ang tih hlauin a nei ngam ngai lo. Tin, a pa rapthlakzia a hmuh hian pasal neih a tum lo tawp bawk. 

Zirtawp zan a ni a, current an neih loh avangin leh thima mut a thiam loh avangin bati chhi turin a tho a. Gas on-a bati a chhit mek lai chuan a hnunglam atangin tu emaw hian a rawn kuah thut mai a, a phu chiang kher mai. Remsiama lek chu lo niin, a kuah nghet bawk si, a tal chhuak thei lo, "Min thlah vat rawh" a ti tuar a, "Ka unau dik tak pawh ni hlei lo chu ka duh duh danin ka ti thei che" a rawn ti zui. An in elh ta ngat ngat a, a tal chhuak thei hram, let leh vat a tum laiin a samah a rawn kek a, Magie a rak leh thawt. "Buanga, tho teh..Remsiama hi" thlabar zetin a ti a. Chhuatah Remsiama chuan a namthlu ta a, a rawn bawh nghal ruak bawk. A thaw huam huam a, zu leh damdawi a tih pawlh a ni ngei ang, zu rim a nam huam mai. Mahse chutimaiin Maggie chu a tlawm lovang. Remsiama bengah te a hmaiah te chuan a lo sawk táwn táwn a, a mit a kawm vak vak bawk. Remsiama chuan a hmaiah a rawn hnek ta chawrh a, na a ti kher mai. A kekawr chu a kek thla zui nghal a, Magie chu a auin a au a ni ber. Tumah an rawn tho thei si lo. Remsiama chu a theihtawpa nain a kapah a han tlawhsak ta a, a tlu rawk rawk mai. Aw tial ruan hian. "Pa, nu, Hmingthansiami'n ka kapah a pet a nia" a ti a. Kar loah a chhungte chu an rawn tho, Buanga erawh hemi zan hian a thianpa te inah a lo riak daih a lo nia! Maggie mut tawh hnua chhuak a nih avangin a lo hre lo a lo ni. Maggie au rin tehlul nen tumah an rawn tho chhuak duh lo kha thilmak pawh va ni suh. Tenawm hlawm hian aw. Maggie chuan a hnar thi chu a sil vat a, Pu Zoa chuan, "Hmingthansiam, tenawmnu, i u kut i thlak a maw? A mipatna a chhe thei tih i hria em?" Tiin a hnar sil zo chu a lo beng leh thuai mai a. Magie a pai awt awt. "min pawngsual a tum alawm. Engvangin nge ka inven nan chuan ka chet ve mai loh ang?" A ti chang ve ta fak mai. Nidangah a pa hi a chhanglet ngai lo. Mahse, tunah kher chuan a ni em em tawh lo a ti ve tawh a niang e. 

"Min chhang ngam ka ti, a nau i nia engvangin nge a pawngsual ang che? I hmumawh a, hnawk i ti a, i tilui tih hriat reng reng" a ti hmuar hmuar a. Hluteii leh a nu chuan Remsiama chu an buaipui a, a thlanfim pawh a tla tek tek mai. A khur zawih zawih bawk, Maggie khan a tha táwp a hmang bawk a, nat zawng a na viau ang le. Mu tura a pindan lam a pan lai chuan, "Aw..a tawk ta e. Hmingthansiam, ka in hi chhuahsan tawh mai rawh. Ka chawm peih tawh lo che.." A pain a rawn tih chuan a ding chawt. A nu chuan, "U zo, khawiah nge kal se i tih? I timak em mai" a lo ti a. 

"Lo inrawlh suh. A upa zel ang a, kan chhungkaw tan a la tawrhhlelhawm telh telh dawn,.hei tunah a u ngei pawh ramtuilei loin a siam lovang tih pawh a sawi theih loh hi. Va insiam rawh, zanin la la hian chhuak ang che" a ti leh pûng pûng a. 

Maggie chu muangchang hian a inher a. Nui sáng chungin, "Tehreng mai. He hremhmun chhuahsan tur hian englai paw'n ka inpeih e. Ka lawm e, ka pa" a ti sap a. An melh hû hlawm mai, Pu Zoa pawh a hrilhhai tih a lang, chutia Maggie lo huaisen ta sawt leh chhuah a hreh lo lutuk chu. 

Maggie chuan a thawmhnaw neih ang angte chu lakhawmin bag pawh a neih loh avangin rambo polythene-ah a khung a, a pa chu rawn kal lehin, "I thawmhnaw ho kha chu i ken ka phalsak hram ang che. Khang pawh ka leisak vek che a ni. " a rawn ti a. Remsiama chu thutthleng seiah an muttir tawh a, a thaw hlawi hlawi mai. Maggie chuan a pa chu a chhang lo. A insiam mawlh mawlh ringawt. Thawmhnaw a ngah lo bawk a, a insiam zo a ni deuh mai. A inkhai chhuak a, a nu chuan, "Khawiah nge i kal ang.. Naktuk zingah kal mai ta che" tiin lo dan a tum ve a. A nu chu enin, "Nu, engkimah ka lawm e. Mahse, ka rilru ka thlaka pasal ka nei ve te a nih ngai chuan nangmah letling hi ka ni ngei ang" a ti hniam raih a. A pa chu melh lehin, "Thih nuamin i thi lo ang. I nun a chhe êm mai" a ti hmiah. A pain a chhan hmain a chhuak ta vang vang. Dar 10 a pel hlek tawh a. Pi Zari te chu an mu tawh naa a dinhmun a laklawh êm avangin a kai tho ta tawp a,an rawn hawnsak vat. A pawisa kha a va dil a, a thil hlu ve deuh a kawltir chu a la bawk. Pi Zari chuan, "A tlai tawh si, riak mai rawh" tiin a chelh a. 

Sangteii a call tawh avangin a lo nghak si a, a hnar ta hram. A pawisa pawh 10200 a lo tling ve tawh a. Pi Zari chuan, "I U puii hrisel loh luatah damdawi manah kan insêng nasa si a, han pek tam che pawh ka duh viau a, ka nei bik si lo. Kha hei hi la rawh" tiin Rs. 1000 a pe ta mai a. Maggie chuan, "Aih, Nu zar, a ngai reng reng lo. In harsat vezia ka hria alawm..ka lawm lutuk, engkimah min pui tawh alawm" tiin a lo hnar a, mahse, a ah luihtir tlat si. Maggie hnuk pawh a ulh nasa..Khawngaihtu te hi a thinlung phekah a chhinchhiah kar reng mai a ni. Sangteii te in a han thlen chuan Sangteii chuan a lo nghak reng tawh a, An ni hi zawng a pa hian huan puitling tawh neiin pa taima rumrut a ni a, a nu lah College lecturer a ni bawk. Sangteii leh a nau Faka te chauh fa an nei bawk nen, an khawsa thei hle. Sangteii nu leh pate hian Maggie an khawngaih thin êm avangin an ina rawn awm mai tur te pawn an ti thin. Mahse, maggie chuan a hreh ve bawk si. Mi tha chhungkua an ni. Sangteii roomah an mu dun a, "Ka thian, i vanduai a ni tiraw? I pa khu a thih hunah ka nui ang" Sangteii chuan a ti hial. A thinlung tak takin a thiannu chu a khawngaih tih a lang. Mahse, Maggie chuan, "Ka zalen tawh alawm, keimah chauhin khawvel ka hmachhawn tawh ang a, engtikah emaw chuan ka la hlawhtling ve em em ang" tumruh zet hian a lo ti a. Tui takin an muhil ta. 

Sangteii pa, Pu mawia chuan an hnena khawsa turin a ngen nasa a, an nu Pi Rini pawh chuti tho. A dinhmun siam nan chuan reivaklo a awm rih chu a ngai reng reng a. Eizawnna tur hi ngaihtuah phawt a ngai a ni. Pu mawia chuan, "Eisiam i thiam a, kan kawtah hian zuar ve la, zan lamah te hian..i hralh thei viau ang" a ti a. Mahse, a nihna takah chuan eisiam hi a thiam naa a tui reng reng lo. A pa te nawrluih vanga siam a ni zawk. Machanic nih a chakna kha a la reh thei reng reng lo va, Mahse, tuin nge zirtir ang tihah a buai a ni. Zaua a tih dawnin an in nen a inhnaih si a, a pa hmel hmuh a duh tawh bawk si lo. A inkháp buai ve nasa thin. Zaua chu a be ta chawt a, ani chuan a dinhmun lo hriatsakin a thianpa a biaksak ta a. Tuikual lam mi a ni thung. Zaua anga mi fel leh mi hriatthiamna ngah tak mai a lo ni a. A hnuaia thawka training lo pek chu a hreh ta lo. Maggie a lawm takzet a ni. A thil zir chhung chuan Sangteii te ina awm a ngai rih dawn a, a inthlahrung hle. Sawi hmaih loh tur chu a nu leh pate hi Thingtlang atanga Aizawla pem an nih avangin chhungkhat hnai tumah Aizawlah an nei lo, han belh ve dawn paw'n. Pu mawia te chuan an lo phurpui phian a, inthlahrung lo turin an hrilh chamchi bawk. Mahse, Maggie hi a á bik lo va, mi thatchhia a ni lo bawk, zing tawkah thoin chhunlama a chet ai zawng zawng in chhung tihfai chu midang thawh hmain a ti vek a, eirawng a bawl vek bawk. Pi Rini hian, "I inthlahrung em thin mai, in chhung phei chu kar khatah vawi hnih bak tihfai a ngai lo" a ti thin. Mahse, a ti zel tho a. Tlai lamah an ban tlai deuh avangin Sangteii leh a nuin an lo bawl ve thung. Sangteii hi class a la kal ve a, Kumin hi a final year a ni. Faka erawh a tawng tlemin an hmu ngai mang lo, roomah a tawm deuh chawt zel. Maggie nen pawh an inbe ngai mang lo. A thil zirna neitu chu Zorema a ni a, a felin a tawng duh hle, ani pawh hi fa pahnih nei tawh a ni. A hnuaiah thawk pangngai mi pathum an awm a, Maggie chiah hi zirlai a ni. A tirah chuan thawktu te chuan hmeichhia ve si tiin mak an lo ti viau a. Mahse, a thiam chakzia leh a tui zawng a nihzia an han hmu chho a, mak an ti ta vak lo. Kar khat a zir atang chuan an innel hlawm tawhin an infiam bawrh bawrh a, Phawk zet mai Apuia a awm a, fiamthu a thiam si, an nui leh ham ham thin. Maggie chu thawk ve pakhat Rinawma hian a star nghe nghe. Mahse, Maggie chuan mipa a ngaihsak map si lo, a patil a niang an ti ru fô mai. A tawng tam vak bawk si lo va, a zirlaiah a rilru zawng zawng a pe thin. Zorema pawn a fak hle, "Han inzir zo la, i duh leh i thawk ve nghal dawn nia. Hei Hminga leh Rinawma hian ban an tum deuh sia" a ti thin. Maggie pawn remchang a ti hle. Thla khat bak a zir a ngai ta lo. Thawk tawhte ai mahin a hnehsawh tawh tih mai tur a ni, marawhchu, hmeichhia a lo nihnaah a thahrui hmanna ang chi-ah chuan a chhawr tlak lutuk bik loh a. Tunah chuan thawh pangngaiin a thawk ve thei ta. Motor siam chauh lo pawh thildang siam theih a la tum bawk. A duhàm ve deuh loh chuan tunlai khawvelah sum hian thil a tithei tawh si a. In luah tur a melh chho tan ta a. 

Zorema te workshop hnaih deuh a duh avangin chu lai bawrah chuan a melh tan ta. Zorema'n a lo zawnpui ve bawk a, vanneihthlak takin an workshop atanga 10 mins kal vel lekah in hnuai te fel rin ren an hmu ta a. Luah man erawh a hmun a laili ve deuh nen a to phian. 6000 lai a ni a, mahse, Zorema'n in neitute chu a hmelhriat tha bawk a, a dinhmun zawng zawng a hrilh ta vek a. Mi tha tak chhungkua an lo ni bawk nen, an khawngaih ta em em a. Inpek loh ngawt aiah tiin 2000 lekin an luahtir thei ta. Maggie pawh lawm tak a ni. Sangteii te'n ui hle mah se, ama duhdan a nih ve miau avangin a insawn dawn ta a. Pi Rini'n a ngaihna a hai lo bawk a, bungbel bakah maggie tana tangkaipui theih tur thahnem takin a indan a ni. Maggie mittui pawh a tla zawih zawih thei. Tichuan, amah chauha khawsaa damkhawchhuak ve turin in chu a luahlut ve ta rup a. In neitu ten an khawngaih bawk a, bungraw thenkhat an lo dahsak sa vek a, thutthleng pawh a sei pahnih leh chair pahnih lai an lo dah a, chaw ei dawhkan tur chhuata thu chunga ei theihna an dah tel bawk. Khum pawh single an hunsak ve thlap bawk. Hemi tum hi chuan maggie pawn,"Pathian chu a lo awm ngei a nih hi" a ti ve hial. 

A hnaah a kal chho a, inren takin a khawsa. Mamawh a la nei ve nual si a, inkhawl ve bek bek a ngai tlat. Chawhmeh pawh chi khat chauh hmeh changte a nei. A vannei a, a ei ve thei mai zel a. In chungte nen pawh an inpawhna a thain an fapa Zonunpuia phei chu zantin deuhthaw a leng thla thin. A in luahna hi Pu Remmawia niin an nu hi Pi Zuali a ni bawk. An fate pathum Lucy, Zonuna leh Teteii te nen an khawsa a. Lucy hian thawmhnaw dawr a nei a, Teteii erawh MA a zir mek, Zonuna erawh phone dawr a nei a, an in chhak lawkah a ni nghe nghe. An khawsak chu sang ve thawkhat tak a ni. An in chhung pawh a ropui. Maggie chuan hmeichhia a nihnaah harsatna han tawh zauh chang a nei thin, pa chimlim leh nu khermei deuh te'n, "Hmeichhe siam ka duh lo" an tih thin vangin. Zorema hi a thinrim thei, mahse, Maggie chu a thinrim duh ngai lo, hlim sàng hian, "A ni maw? Aw le" a ti mai zel. Mahse, pa thenkhat thung chuan a ma siam te, a ma motor ke thlak kherte an duh thin. Tikhan a sir atangin an lo chhaih fiam ve thin a, nuam an ti ve a ni. A pa tihduhdahna hnuaia kun ta lo chu a rilru a lo hlimin phurrit em em a nei ta lo bawk nen, a hmel pawh a tha sawt sawt mai a, an hnathawhin zir hek lo, han inchei chiam chi a ni lo bawk nen, make up a hmang ve vak lo a, chuti chung pawn lo startu leh a danglam deuh avanga en biktu a tawng ve deuh reng mai. Rinawma pawh kha amah vang nimaw a bang ta lo va, a bem hial tawh. "Thian ni zawk ang, kan inthen hunah a hrehawm lutuk ang" a ti mai zel. 

An workshop hi a laili bawk a, thawktute an felin an hawihhawm bawk nen, a lun mep mep thin viau. Motor parts an nei chikim bawk nen, an hlawk ve thin hle. Apuia hi head mechanic a ni bawk a, a hlawh a sang fal deuh. Maggie pawh thla khata 10000 a han lakluh ve takah chuan a dinhmun pawh a kàng chho ve tan e. Tlai khat scooty pakhat ke thêp chu a lo pump sak a, a khalhtu chu nula khal lam, sam sen thar mai a ni a. A thiannu nen an ni nghe nghe, Maggie chu melh vang vangin, "Nang hi tiraw ka u pasal bialnu kha" a ti ta mai a. Maggie chuan a han melh káwk a, "Min hai a niang thiannu" a ti sap a. 

"Ka hai awzawng lo che. I zaktheilo khawp mai, nangmah vangin ka u saw rilru na takin a awm mek asin. Mi kawppui te lo ngaizawng duh hmeichhia hi chu an hur tih a hriat ngawih ngawih" a ti hlawih hlawih a. An lo thlir thup mai. Maggie chuan zaidam takin, "Nangmah ang bawk hian mi hian min hai thin. Keimah ang tak a awm a nih ka ring. Min hrethiam la, amah ka ni lo. Zanah ka chhuak ngai hek lo" a ti a. Chu nu chuan a rawn kek ta buan buan mai, maggie a lo inring hman si lo. A thiannu khan dan a lo tum ve naa, a khalin a chak si, Maggie pawh a dawhthei ta lo nge chu nu kut chu theihtawpa nain a thinthlaksak a, a hrawkah rekin bangah a nawrbet hmiah, a pa nghaisakna hnuaia seilian rilru hi a kawlh ve hle tih an hre lo a ni. Zorema te'n a pawi hmain an rawn thelh ta vat a. Chu nu chu a khuh bawrh bawrh mai. "Ka ni lo tih mawlh mawlh pawha khatianga i chet mai le.. Ka ngam nasa lutuk che a nia" a ti fiak thak a. Chu nu chuan a rawn kawk a, "Zawngi, i hre khawp ang. Ka u nen kan rawn kal leh ang " a ti a. Zorema kuta pawisa pein an tlan chhuak nghal. An customer pakhat chuan a lo cover chu niin chumi zan la la chuan video chu a darh nghal. Sawi zui a hlawh ta hle. Captionah, "Mi pasal ngaihzawn ching leh a bialpa nupui nau" tih a hmang kher bawk si. Maggie pawn a lo hmu ve a, tih vak ngaihna a awm tawh si lo. A thang mawi ta lo khawp mai. Thenkhat inti hrechiang fe fe lahin, "He nu hi ka hre lutuk, a zia a zawih hmel tehreng nen, a lo va tenawm ve. Motor siam mai mai se a tawk" tihte, "Zanah hian mi pa tih hriat deuhte nena an ride ka hmu zing mai. Hetiang mi tenawm ho hi chuan an sim thei lo" tihte a ni. Mahse,thenkhat video en ngun deuhte chuan, "Khi nu khian a hai zawk a ni lo maw? A tang na êm mau. A ni lo a niang" te chu an ti. Maggie chu Pu Rema ten an ko chho a, thil awmdan an zawt a. 

"Ka hrethiam lo, a mak ka ti kei pawn. Kan ina ka awm lai pawh khan min hai fo mai. Keimah ang deuh a awm a nih ka ring ve tawp zel a, ka rin aiin a serious tan tlat. Zana ka chhuah ngai lohzia chu U Zonuna hian a hria ang. A rawn leng ziah alawm. Tin, bialpa ka nei ngai lo" a ti nghet charh charh a. Pu Rema te pawh an bu nghat nghat mai. 

Lucy chuan, "Maggie, phirpui i neite hi a ni lo maw ka ti..khatia an hai fo che chuan a dik lo. An hai thina nu che lah hi a che hraw ve hle tihna a ni mai a. I mualpho fo dawn tlat. Ngaihtuah ran a ngai a nih chu" a ti a. 

"Ni e, ngaihtuah ran ka lo tum ang, sundayah bak hmun dangah ka chhuak ve thei bawk si lo va" a ti mai a. 

Sangteii te pawn an lo bia, "Meg, thil dik lo a awm a ni. Chhui ang, ka pui ang che" a rawn ti hial. Sangteii felzia hi chu aw. Zorema te pawn Maggie an hriatchian em avangin amah Maggie an dem lem lo. Mahse kha nu, an haina thin kha hriat an chak khawp mai. Maggie a lar tak viauah chuan amah hmuh chian chak vang hrim hrima dawrtu an rawn pun phah ta lel a, Zorema phei chuan fiamthu hian, "Lar belh leh la a va tha ve" a ti nghe nghe. 

Zonuna hian Maggie hi a ngaizawng ti dawn ila engmah a sawi si lo, a leng mawl ve tawp a, a duh lo ti dawn ila a leng reng bawk si. Bialnu te hi a nei lo zawk em mawni. Maggie pawn a ngaina ve ta viau, a khawhar a hnem bakah Zonuna chu mi bright tak a ni bawk a, a hriat loh thil tam tak a hriat phah thin a, a lawm. Zan khat chu zu rim a rawn nam ve teh tlat a. Maggie chuan nel takin a lo hau bawrh bawrh, "Ka rilru i hriat loh vang a nih kha" a ti mai a. Maggie chuan mak a ti deuh. 

"Eng nge i rilru?" A han tih chuan, "Meg, ka duh che a ni. Nupui atan pawh ka duh che. Kan in i rawn luah atang khan ka thinlungah i thi thei tawh lo" a ti ta mial mial a. Maggie a ngawi ta ran mai. Zonuna chu tlangval hmeltha pangngai tak a ni , an neinungin ama pualin dawr a nei bawk a. Zu a in ve zeuh zeuh tih loh chu ruihhloah a fihlim bawk, Maggie tan phei chuan a sang mah mah zawk hial ang. 

"Min duh ve em?" A tih chuan, "U Zonun, min hrethiam rawh. Kan dinhmun a inthlau sia. Bakah bialpa ka nei ngai lo va, ka zei lo si" a ti ta a. 

"DInhmun ka thlir lo. Khawngaihin min duh ve rawh, Maggie" a ti ngawih ngawih a. Maggie chuan a rilruin, "A vawikhat nan ka nei ve dawn mi le" a ti a. 

Zonuna chu melhin, "Aw ka duh ang che. Mahse, mawi lo taka khawsak ka duh lo aw" a ti ta a. Zonuna chuan a rawn kuah thawk, maggie tan thil thar a ni. Engtin emawni a awm..Zonuna nen hian tluang takin an inngaizawng thei ang em?!