Rinsangkimi last

RINSANGKIMI (LAST)

Ziaktu : Toni Râlte

Dawrah pawh ka ngaihtuahna a chawl miah lo. Kei hi ka ngaih a tha a, Sangkimi hi ka ringtawk em em bawk nen. Khatianga ka hriat loh hlana thil a awm kha ka hrethiam lo mai ni loin ka ring phak miah lo. Ka awm a tinuam lo ta hle mai. Kan hlim dawn chauh a, buaina bawk. Ka hne, ka chau. Teteii te pawn ka mood tha vak lo chu an hrethiam nge ,"Nizanah i nghei chiang, i tum bûr danah" a han ti leh phawng mai a. Ka nui ringawt. Malsawmi a rawn lut a, mood chhiat nak alai chuan aw! 

"Zothan, enteh, Lalrini khan pasal a nei dawn. Zuk kal ve ang hmiang. Naktuk tukleh a nia" a ti hlut a. "A ni maw? Tu nge a neih dawn a" ka lo ti vat. Lalrini chu kan puarak a ni thin. Lu zo veh vawh, ri bawrh bawrh chi a ni ve. 

"Thansanga kha mawle, a bialpa rei tak a then tawh kha..an ni leh a, an lo puklawk ve ngei a" a ti a.

"A nih chu..kal ve a tha khawp mai, mahse, dawr hi ka enkawl lo rei tawh sia" ka tih mek laiin Sangkimi a rawn lut a. Mahse, ka lung a tihawi loh avangin ka vengthawng duh hran lo. Malsawmi chuan, "In nu a awm tho alawm..a lo nghak ve thei ang chu..kal ang,min beisei ve nasa si" a ti leh mawlh mawlh a. 

"Nia, kan tum dawn nia..ka bike in kal mai ila, kawng a khu chuang lo va" ka ti a. Sangkimi'n min melh reng tih ka hria a, ka ngaipawimawh duh lo lui. 

."Nia, a zia zawk ang. I thulh leh vaih" Malsawmi'n a tih mek laiin, Sangkimi chuan, "Eng maw?" Ngaihnobei vak lo hian a lo ti a. 

"Aa. Hei kan thiannuin pasal a nei dawn a, kal ve ang kan lo tia" Malsawmi chuan a ti ve mai a. 

Min rawn enin, "I kal lo nasa viau ang" a ti hmak a. A chhuak nal nal. Malsawmi chuan, "A thikthu hi a va chhe tak" a ti zui nghat a. Kei erawh a ngawi reng. Tlaia ka haw chuan Sangkimi ka hmu lo va, Bawihteii pawh a awm chuang lo. Ka nu ka zawt a, "A nute inah an han leng chho ve a nih kha, hei an rawn haw har riau" a ti a. Ani hi a tlan ve deuh roh em mawni le..

Chaw ei a hun mai dawn si a, ka call ta a. "Ti nge chaw ei nghal i tum mi?" Ka ti nghal tháwr a. 

"Ka hlu ta lo hle mai tiraw?" A rawn ti teh ngawt. 

"Eng nge a awmzia?" Ka ti a. 

"Engmah..chaw ka ei dawn hetah, ka riak nghal bawk ang" a ti nghat a. 

Ka lungawi bik lo nen, "Aw le. " ka ti a. Ka dah ve hmak. Ka nu chuan, "In lo inhmu thiam lote hi a ni lo maw?" A ti a. 

"Chutiang pawh a awm lo" ka ti ringawt. Rilru erawh a nuam zàn lo. Kan eikhamah Valtea nen Romawia te in thar lawm turin ka chhuak ta daih a, an ni hi in hrang an chang ve tawh a. Ka la leng lo a ni. An nu hi a la naupang naa a fel reuh khawp mai. Thingpui hàng min lo chhawpsak leh vat a. "Kan huanah khawi bu lian zet mai a awm a. Naktuk zingkarah zuk la ang u hmiang," Romawia chuan a ti a. Valtea phur zawng tak a lo nia. Kei pawh ka la la chiah lo naa, khuai no hi chu duh hluam hluam tak ka ni. Ba lung, tuai lung tih vel erawh ka ei ngam mang lo thung. Ka phone a rawn ri a, Sangkimi nu a ni. Pawnah chhuakin ka bia a, "Tluangpui, eng nge maw a awmzia le? Mateii lah hian a sawi duh si lo va, a rawn tlan ve deuh nge zan riah te a tum bawk si, zan riak meuha tlan hi ka duh dan a ni lo asin" a rawn ti a. Ka thaw hawk. 

"Ka hre bik lo, dawra ka hawnin a lo awm tawh lo va, eng nge a lungawi lohna ka hre bik lo" ka ti a. 

"Lo hruai rawh, hetiang ringawtte chu a.." A rawn tih takah chuan, "Ni e, ka rawn hruai ang e" ka ti ve mai a. Valtea te ka hrilh a, ka chho ta a. Sangkimi pate in ka han thlen chuan Bawihteii chu ka piin a lo awi dárh dárh a, " Khaw nge kan nu chu?" Ka ti nghal. Room lam a kawk zauh a. Ka va lut ve hmiah. 

Khumah a lo bawkkhup a, phone a lo hmet malh malh bawk. "Haw ila" ka va ti thut chu a phu nasa kher mai. "Min va tiphu nasa tak..ka rawn haw dawn lo" a ti nghat a. 

"Eng nge i awmzia hi?" Tiin ka thu ve a. Rawn thu chhuakin, "Fa ka neih theih tawh loh vang em ni hetia min thlahthlam?" A ti a. Ka ner sawk. 

"Ka thlahthlamna che sawi tur i hriat chuan han sawi teh. I rilru hi a dik lo, engkim i ngaikawi a, i thikthu lah a chhe si" ka ti ve ta a. 

"Dik tak chuan Teteii nen in inbe reng a, vawiinah Malsawmi nen Lungleia kal in tum bawk a. Ka lungawi i ring mi?" A ti a. 

"Nang pawn biak i neih tho kha..i password i thlak bawk a, ka lawm bik i ring mi?" Ka ti ve nghut. 

"I be reng a, i thik ve nan ka be der a nih kha" a tih chuan, a hnungah a beng thak a. "Sangkawi leh" ka ti a. A nui a, kei pawh ka nui ve. 

"Haw ang le.." Ka ti a. A tho ve mai. Bawihteii chu a piin, "Zanin chu kan lo riahpui ve mai ang. Bawnghnute kan kawl tho" a tih ve tlat avangin kan riahtir ta ringawt. Lehamah Bawihteii hi a hrisel loh ngaihtuahin a tlei reuh êm a, hnute a hne thei lo hi a vanneihthlak letling. Sangkimi hnute hi a tang ve nasa thin, nu leh fa inzawmna thûkzia hi aw..Bawihteii'n hnute a chak apiang hian a hnute hi a tang ve vak zel a, a hne thei bawk si lo. Kan inphur thla ta a. Peka hmuh leh ka inrin nen kan hmu ta lo. Muthmunah chuan a phone chu ka hawntir a, password-ah Bawihteii birthday a lo hmang a lo nia. Ricky nen an inbiak dan ka chhiar chuan ka nui hawk hawk. 

"Ka pasal thik nan inbia ang deuhin awm ang" a lo va ti vel. A va ho e aw. Ka kuah thawk a, "Min ring ngam la ka duh a ni. Ka pelhesan ngai lo che. Nia, Teteii pawh ka be tawh lovang. Malsawmi pawh ka kalpui lo vang. Nupa hlim tak nih hi ka duh ber a ni" ka ti mawlh mawlh a. 

"Tawngkaa inbiakte chu ka hrethiam, phone-a mipa leh hmeichhia inbiak reng chuan eng emaw a awm thin. " a ti a. A sawi dik. Ni e, kei pawh hi ka lo ngaihsam ve deuh a, kawppui kan neih tawh chuan thiante pawh a zawng zawnga kawm te a theih tawh loh, kawppuite rilru dáwn chung zela kan insiamrem thiam hi a ngai tawh a ni. Hringnunah hian zir tur hi a va tam tehlul êm..zir zawh lah a awm thei si lo. 

Nunphung pangngaiin kan han awm chho leh a, vanduaithlak takin ka nu zun a lo thlum ve a. Ani kan awm awltir ve deuh si kha a ni ber ang chu. Mahse, chutia a sugar pawh han sang em em a ni hran lo. Sangkimi hi ka fak thlawt. Ka nu chu zing tin a walk pui a, chawhmeh lah nise a huphurh vang ni loin sa hring eite a phalsak lo va. Engkimah a veng a ni deuh tawp mai. A hnuah phei chuan atta a nuaisak thin a, ka nu chuan chawah a ring chho ta a, a zia pawh a zia phah hle. Dawr lah hma kan sawnin a hlawkna pawh kan tel chho ve zel a, VC te'n in hmun min pekah khan kan inkhawl ngah hunah in tha ve pangngai tak din ka tum ve ran a. Mahni ngeia in leh lo neih aia hlu a awm lo bawk a ni. Ka u leh Rema te pawh harsatna tawk loin an la inzawm tluang ve zel a, Rema a rawn zin zeuh zeuh bawk. Ka nu hian an chetsual a hlau bawk a, Rema chawp chawp hian a hrilh chamchi. Rema lah a lo phawk ve bawk nen, "Ka pi, i fanu hi a hrisel lo in ti in tia, a chak êm mai , a hrisel a niang..chetsualte chu khawilamah ka bet rawk rawk zel" a ti pek a, kan nuihpui nasa. Sawmpui te pawh Aizawl lamah an in kutsuih a, a senso pawh a pute lamin an tum vek a ni. Keini nupa pawh Bawihteii hruaiin kan va kal ve a. Senteii te chu an hausa bawk a, a thil chhawm luh pawh a turu viau mai. Sawmpuia hlim lah hi a khi vur vur reng mai a, nupa hlim tak ni se ka duhsak ngawt mai. Aizawla kan cham chhungin Sangkimi nen a best friend Daisy thlan te kan va tlawh a, ka hmu ve hman lo naa, ka nupui hian a hming a sawi zin êm vangin ka ngaina ve tawp. Bawihteii lah chu Pu Valtea faten an chang a ni tawp mai, a nu pawn a khawih chang ngai lo. 

Sawmpuia pu te ina Senteii chu han lawitir reng thu a awm bik lo va, a bungraw thenkhat te nen Tawipui lamah an rawn phei ve ta a. Mahse, an awm rei lo vang, Sawmpuia'n a hna a tan leh têp tawh a. Senteii pawh hi School-a inhlawh ve reng reng a ni a, Aizawl lama awmhmun an benbel chu a ngai dawn tho. Hetih lai mek hian Julie, Sawmpuia sàwn thlakna khan accident a tawk ta hlauh mai a, a ke dinglam tan a ngai ta si. Julie te hi lehlamah an khawsak a sang bik lo va, a pa hi damlo bawksawp reng a nih piahlamah a nu in hnathawh nei bik hek suh, bazarah chawhmeh zuarin a in pho ve thin a. Julie nau hmeichhia hi lehkha zirtir ve zel an duh avangin an ti ve hram hram a. Julie u mipa hian nupui nei ve tawhin a nupui lah chuan a la hrang zui a, an nute in hnuai luahin a chhungte a kalsan ta bawk si. An dinhmun a tha vak lo. Julie nu mangangin ka pu rawn biain naute chu enkawlsak mai turin a rawn ngen ta a. Ka pute chuan Sawmpuia te nupa an han bia a, Senteii chuan, "Sàwn a lo thlak pawh engtia tih thu loh, a fa lehzel kan enkawl ten" a ti hmak mai. Ka pi ngaihdan a ni lo khawp mai a, mahse, a fapate nupa berin chutia an tih tlat si avang chuan thutlukna pawh an siamfel hleithei lo. Sawmpuia chuan enkawl a duh lo pawh a ni lo, a nupuiin a duh lo fithla thak si, a nawr ngam lo a ni mahna. Ka pu chuan, "Saidingi nen kan enkawl mai ang e. Hetah in awm reng dawn chuang lo bawk a, Seni pawh in awm chhung chuan sual i chhuah lo a niang chu..chu chu ka thutawp a ni e" a ti ta hmiah a. Ka pi pawn a lo pawmpui thlap. Naute chu an va la a, Sawmpuia a chhun bawk a, a hmelthain a duhawm tûrh tûrh viau. Bawihteii aiin a u hlek chauh a, an len hunah pawh an inkawmngeih viauin ka ring. A hming chu Ramluahpuia a ni a, Ka pute chuan Bawihpui an ti mai zel. An han awmpui ve ta ren rawn a, a tirah chuan a la hmuh ngai lohte an ni hlawm si a, a tlei lo viau mai. A ni Sangkimi erawh a ngaina phian a, bawnghnute an pe ve mai a. Ka pi ai mahin ka puin a khawih tam zawk awm e. Ka pi chu a eizawnna avangin inah a lo awm tam vak lo nen. An putu hian an rawn leng thla deuh reng zel. Senteii chuan vawikhatmah a pawm lo va, a bulah zung mah se, a thlak ngai lo bawk. Kan lo rinlawksa ang khan a tha ta vak lo hle. An neihnun a chhuang ka ti mai a, ka pu te chu hnuaichhiah lek leka tawngkhum a ching tlat! Sawmpuia lah hi ek chauh a ni. Nep zel zul lutuk. 

"Mo thain chhungkua a huikhawm a, mo sualin a lengdarh" an tih ang deuhin Senteii chu Tawipuia thla khat erh awrh an han awm ho takah chuan a ze diktak a lang chho tan ka ti mai. A thatchhe bawk si, zingah dar 9ah te kaihthawh a ngai a, eirawng a bawl ngai lo bawk. A insuk ve pawn an pa nen an thawmhnaw chiah a su a, ka pi a hah ta hle. Nau an pawm tha leh bawk nen, ka puin eirawng a bawl chang pawh a tam mai. In chhung lah tifai hmingpu ve siin a lang chin chiah a tifai a, in lengte lah lo biak leh lo dawnsawn chu sawi loh, chungtlak taka lo tawngkhumte a ching a niawm e. Sunday tlai khat chaw kan han ei chho pawh, "Sa in hmeh ve ngai lo mi? Sa hmeh apianga in rawn ei chhoh" a ti ham ham a. Ka puin Pa Rina makpa kah Sazuk a lei a, min duhsak vanga min sawm a ni reng sia. Sangkimi a duai ta lo, "I zaktheilo perh pawrh e a. Kan in a nih hi..kan duh hun hunah kan lo ei thei" a ti let ve sak. Ka rin aiin ka pi hi a insum thei. A monu chu rel pawh a rel ngai lo. Kan bulah takngial pawh. 

Sawmpuia'n, a nupui thlavang a lo hauh vat, "Sangkim, khatin i u ti suh. Khanglang a che" a lo ti hlur a. Ka puin, "Ngawi hmak ula, chaw ei rawh u" a tih takah chuan an ngawi ta a. Ka pi hi a hlim lo tih a hriat ngawih ngawih. Engmah a sawi ve ngai bawk si lo. Kan ei kham rual rualin Seni chu an roomah a lut nghal a, Sangkimi leh ka piin kan eina vel chu an tifel a. Bawihteii leh Bawihpuia te erawh walker-ah an thu a, an hlim ve hle. Thleng sil tur chu Sangkimi chuan sil ta mai lo chuan, "U Sen, thleng hi va sil rawh" a ti a. Ka piin, "Ka'n sil ang e.." A lo ti vat. Sangkimi'n, "A tul lo, mo kan nei alawm, damlo pawh a ni lo. Sil rawh se..engmah tih tum reng reng lo mai" a ti nghat nghat a. Zep loh chuan ka pite hian sawi chhuak ngai lo mah se, an ina chuangkai thinten Seni awmdan hi an sawi nasa thin a, Sangkimi pawh hian a hre ve vek a ni. 

Sawmpuia a rawn chhuak a, "Nangman sil mai la ti nia. Nge maw in phut em em le? Mo nih vang mai a" a rawn ti a.

A u chu melh vang vangin, "Hmeichhia hian mipa rilru hi an va hruai kawi thei tak. Nepa" a ti ta hmiah. Sawmpuia a thinur ta hle mai a, a nau chu ben a tum ta a, mahse, ka piin, "Malsawmpui, ti hlek suh. A tawk.. I nau khan a sawi dik chiah, mipa nêp lutuk ka lo hring che hi thilmak a ni" a ti fiak thak. Seni chu a rawn chhuak a, tum bár chungin thleng chu a va sil tau sawk sawk a, a thawm a ring hle. 

A sil zawh chuan, "In neih hi ka ei lo chiang lutuk a e. Engkim hi ka tih vek tur a ni lo.." A ti hlaih hlaih a, rapthlak ka lo ti ru viau. Sangkimi tawng tur chu ka khap vat. Boruak tha lo kan nei vak palh ang tih ka hlau tlat. Bawihpuia chuan ek a lo cheh chu niin a tap ta a. Sangkimi chuan a va sil vat, Seni chuan, "kha nau lah kha ek cheh zen mai. " a ti leh a. Ka pu a insum zo ta lo nge, "Seni, i va duhthawh ve mawle.. Ngawi hmak rawh" a ti ta a. 

Sawmpuia'n, "Ka ning, Aizawlah kan phei tawh mai ang. Ka nupui in ngeih hlawl si lo va, a thil sawi ve apiang in lakawi zel a. Kan phei vang vang ang" a rawn ti ta a. Ka piin, "A lawmawm viau ang, rawn let leh pawh a ngai tawh lo, In tel lo hian kan hlim zawk" a lo ti hmiah. 

Seni chuan, "That ve ka tum reng, kan innei chauh a, Julie fa in lalut a, lungawi se min ti mi? Kha Julie her hawr khan min tihbuai a chak ve hrim hrim a nih kha. Bakah he lai thingtlang khaw thing lutukah hian ka á thei takngial dawn.." A ti bawrh bawrh a. Tawng vena chi lah a ni si lo. Hmeichhe nasa tak chu a ni e.

"Malsawmpuia'n fa a nei tih hrereng chunga nei i ni. Julie dinhmun i hria, an harsatzia te, kan tupa hi kan thlauhthla dawn reng reng lo. " Ka piin a lo ti ve a. 

Ka pu chuan, "Aa..ni e, hetia innghirngho reng hi a tha lo ve. Sawmpuia pawn i hna i tan leh tawh ang a, Aizawlah i pi leh pute bulah tha takin va awm ang che u" a ti ta a. Thutawp a sawi a nih chu. 

Sawmpuia chuan, "Ka pi leh pute bula va awm pawh kan lo tum chiah tawh lo va, Hei Seni te in hnuai hi luah ve mai ila kan lo tia. Nakinah in dan tho a la ngai dawn nen.." Tlema inthlahrun ve hmel deuh hian a ti a. Sangkimi a ri leh phat, "Awii, in inneihna a la rei loh loh nen, api leh apute pawn an thlahlel ve ang che u. In hrang chan nghal te chu a" a lo ti a. A kut ka va humsak, tawng ve tawh rih lo se ka duh a ni. 

Sawmpuia bawk chuan, "Nang lah hi pasal nei tawh i nih kha..he lamah thuneih rawn tum ve vak suh. He in chhung ami i ni tawh lo. Tikhan, Tluanga te inah zuk inti thu hlur la a tawk.." A lo ti hmuk a. Ka piin, "I va tawng thei e aw..ti nge i nau chu i táwng i táwng a..kan fanu leh i farnu a nihna a la bo reng reng lo. I pi leh puten i zirna senso zawng zawng an tum a, fa in neih hlan lah an nghakhlel bawk. Thla hnih khat tal chu va awm rawh u. Bakah Seni te in hnuaiah ni loin i pi te in hnuaiah in in dang ang. " a ti ta chat chat a. 

Seni'n, "In va thu hlawm rem rem ve..In fapa chu a thu lo ber a nih kha" tiel zet hian a lo ti a. 

"Thu e a..kan fapa hi kan tuithlar i duh loh chuan kaipeng tawh suh. " ka piin a lo ti hmiah. Awm ve rengna chi nia ka hriat loh avangin hawn ka rawt a. Sangkimi chuan bawihteii a paw nghal. Kan chhuak tur chu Seni'n, "Tikhan zuk haw ve leh hnang hnang r'u, in dawr chhete kha chhuang takin zuk sawi leh u la" nuihsawh zet hian a ti a. 

Sangkimi a let vut, "Seni, in hausak avang khan midang hmusit suh. Eggmah i ni lo, eng atan mah ka ti hek lo che. Eiruk vanga hausak ai chuan mahni thawhrah senga a rualpawl tawk nih ka thlang zawk..per pur che hian a..I zu heh heh nen..ka beng let tawp mai ang che.." A ti ta phiar phiar mai a. 

"Lo kal rawh, chhang chhang suh..haw ang" tiin ka va kai a, Sawmpuia rawn kal hnai chuan dan hman lohin ka nupui chu a beng ta a. Ka insum zo ta lo, Sawmpuia biangah ka hnek ta chawrh a. Ka nupui hian tu kut thlawn mah a tuar dawn lo reng reng. Ka piin min chelh a, ka puin Sawmpuia a. 

."chhuak vat rawh u, rawn kal tawh ngai suh u. Nangni michhe fa, mi rethei ho hi" Sawmpuia chuan a ti chiam chiam a, chuti em ema a lo danglam tawh chu mak ka tiin awih harsa ka ti lutuk. A rilru tha leh pawisawi lo lutuk kha kaihhruai a lo awlsam hle a nih dawn hi. Ka puin a fapa chu a beng ta a. "Malsawmpui, ka fapa i ni ta na nge? I rui a ni maw? Tlai atang khan zu rim in nam ka ti reng a ni. Fapa laktlak loh lutuk ka lo nei che hi awih harsa ka ti. Naktukah in bungrua zawng zawng nen Aizawlah in phei ang, he inah hian mamawh in ni ta lo ve.." A ti khur dar dar a. Hrehawm ka ti, keimahni vanga chutia an chhungkua an buai chu. Sangkimi lah a insum zo thin bawk si lo. Seni chuan, "Kan phei ang a a ni mai lawm, infapa hi a lal lo êm mai. Sawma, insiam ang, an fa i ni ve lo a niang..ka ten hlawm lutuk" a ti hlawih hlawih a. Ka piin, "Nang te hir her kha ngawi rawh. Nanga zu rui pal mai mai theih kan ni lo aw. Hmeichhe nasa tak i lo nih hi..i nu leh pate pawh eng mi nge tih a hriat theih ta mai e. Malsawmpui, Ka lak atangin i tla ta vawn vawn mai. Hmeichhe kaihhruai theih tawk lekin a hmingin mipa i lo ni ve a ni maw? Tluanga te chu tluk lo vai vai tak i ni..hria ang che..i nu leh pate hi min mamawh hun a la awm dawn..harhchhuak vat ang che" a lo ti fiak thak thak a. Sangkimi ka kai a, ka chhukpui ta vang vang. In kan thlen hnu pawn Sangkimi chu a la ang char char a, nu a nih hnu hian án te hi a thiam ve tawh riau. Ka nu te bulah a vui a, a nu leh pate a khawngaih thu a sawi a sawi mai. Muthmunah pawh, "Tluang, ngaih loh lamah ngai lo la, hetia ka chhul paih a ni te, bawihteii kan neite hi ka lawm zawk. Mipa fa chuan nu leh pate an hmangaih lo em mai. An nupuite an ngam lo bawk si. " a ti mial mial a. Pathian remruat hi kan hrethiam lo fo reng a ni. 

"A dik alawm. Sawmpuia chu mak ka ti hle mai. Zu inte a chin phah bawk a. Mipa theuh theuh kan va inang lo tak" ka ti ve a. 

"Nangin min han ngam siah siah nena tiraw? Ka u chu a tlangval lai pawn a ni hrim hrim, a bialnute hian a neih an eisak nasa thei si, anu te pawn an zilh ve nasa thin. A pi leh puten an duat sual zo ka ti mai.." a ti ve mawlh mawlh a. 

"Nang chuan a tha lo zawngin min kaihhruai i tum ve ngai hleinem, min zah a, min chawimawi bawk. Ka nei che hi ka lawm ngawih ngawih" ka ti a. 

"Kei pawh ka lawm..hmanniah apa paw'n, " Tluanga i nei hi chu i nu nen pawh kan sawi dun thin a, kan lawm thin. I u heti hi a nia, Tluanga hi chu makpa ang pawn kan en lo, fapa angin kan en tawh " a tia..nakinah an rawn upa ve zel ang a, keini bak ngaihsaktu an nei dawn lo a nia. Tluang, min ngaihsakpui ve rawh aw" a ti sauh sauh a. 

"Khate chu sawi pawh ngai lo thil chiangsa alawm. Bawihpuia pawh khi kan la enkawl tur tho a nia.. Kei chuan pawi ka ti lo nasa, ka fapa a ni mai" ka ti a. Lawm em em hian min rawn kuah a, "Ka hmangaih che" a ti sep. 

Chutiang tehnuai chu kan boruak a nih tak avangin Sawmpuia te chuan motor lian hire-in Aizawl an pan ta a. An lo sawisa tawh ang ngeiin a pute ina rei an awm hmain Seni te in hnuai chu an luah ta a. A chhungkua a hlat ta hle mai. A inchhir hunah a tlai tawh si ang tih ka hlauhpui. Kan tawngtaipui ve ta ziah a. Pawimawh deuh sawi loh a tana uiawm deuh mai chu, Sangkimi chhul an paih atang khan kan nupa hian Pathian pawlna kan dawng thar ve nasa a. DIk tak chuan tlangval lai te kha chuan ruihhlo kan khawih lo va, kan inkhawm mawl ve tawp a, mi ngaihah mi tha ni mah ila, chhungril nun a ruak tlat thin. Tunah erawh Pathian nen inpawlin kan chhungkuaah pawh hlimna a thleng thar a, Sangkimi chu nau pawm a nih avangin zan lam hi chu a inkhawm vak lo va, kei erawh inkhawm zan apiangin pelh loin ka inkhawm ve zat zat, thiante pawn min lawmpui hle. Kan nupa inkarah pawh a laiah Isua a awm tak avangin han inhnial leh inbah fuh loh chang awm thin mah se; a tawpah kan nui dun leh thei zel a. Kan la naupang a, mi thenkhat chuan, "An innei hlen lo tawp ang. Fa an nei thei tawh bawk si lo, nulat tlangval an kham dawn lo" an ti fo. Mahse, hmalam hun hre lo mah ila; Nupa nih zel hi kan duh dan a ni a, thihna chauh lo chuan min pawh then ka ring lo. 

Bawihteii pawh kum khat a lo ni ve dawn ta reng mai. Bawihpuia birthday kha lawm lo in bawihteii birthday-ah i telh ve mai ang u kan ti kha a nia. Kum khatna hi chu ropui taka lawm kan tum ve hrim hrim. Ka nu ber ber chu a phur phurah a tang a. Kan in chu a zim deuh zawk bakah han chet vel a buaithlak avangin dawra lawm kan ti a. Bawihteii leh Bawihpuia thlalak lianpui kan tar kulh a, a nuin a piancham atana a kawr leisak chu a ha a, aw khawvel naupangah hian a va tha chungchuang tak êm. Bawihpuia pawh a rawn nalh hle. An unau chuan an ding dun a, an inkawmngeih ve lutuk hi a buaithlak chang a awm thin. Kan inhlat ve deuh bawk nen. Cake kan order lian deuh mai chu Sangkimi'n a zaipui a, mi kan sawm tam ve bawk a, kan ri hluah hluah mai. Ka pu Ngura'n hunserh a hmang a, tlai dar 4 velah sa chikim nen ruai chu kan ei ta a. Tawipui khuaa birthday lawm ropui ber kan niawm e. Thenkhat chuan tul lo an ti maithei, mahse, nu leh paten tul kan tih chu a tul a ni mai. Kan neihchhun hi chu a tha thei ber tihsak zel kan tum bur mai a ni. Sawmpuia te lah khan nau an pai thei reng reng lo mai a. An chanchin hi kan ngaihven vak lo nen, kan hre mang lo. An la innei ve zel chu a niawm a. Julie erawh ka pite hian an ngaihsak khawp mai, pawisa thawn changte pawh an nei. An tupa hrinsaktu a ni a, an ensan thei ngawt lo a ni. Amah Julie pawh hian a fapa chu a ngai ve thin a niang, a rawn video call deuh reng zel a, Bawihpuia lah naupanga thuchang a lo hre mang tawh lo va, mahse ka piten, "I nu a nih hi" tiin an hrilh thlap zel. A rawn thanglian ve zel ang a, a nu pawh a la enkawl ve thei ang chu..

Rema te pawn palai an rawn tir ta a. Ka nu pawn lo rem loh chu an innghak rei ve tawh bawk a tiin chhungkhatte kan han inrawn khawm a, kan rem ta a. Ka u hi a hma atang tawhin mi dang tihbuai vak ai chuan tiin a lo intuak ve táuh táuh a, a hlawh pawh a vaiin ka nu a pe tawh bik lo. Ka nu pawn a hrethiam. Ni e, mi thenkhat hi chu man te hi an eitir hnem lutuk a, an man pawh hian a daih thin lo. Chuta karah man eitu te bulah, "Chumi khami chu min lei rawh" an han ti táwng zel bawk a. A zia lo deuh chu a ni. Karkalak zau nana man ineitir te hi chu tihdan fo pawh a nia, mahse, an in hmelhriat tha pawh ni lo tlema neinung deuhte man an han eitir ngawt zelte hi pawh hi..vai ho kan ang tan tlat tawh. Thuam chhawm lah hi mi thenkhat hian an lo ngaihven em em bawk a. Kan kal dan hi a fuh tawh chiah lo…ka'n ti ve duah a nih chu. Ka u pawh mamawh a nei ve nual a, Ka farnu neihchhun a nih bakah mi neinung takte ina lawi tur a nih avangin ka theihtawpa thuam mawi ve pawh ka tum khawp mai. Sangkimi lah a lo phur bawk. Ka û te inneihna tur kar hnih lekin a dal tawh tihin tuk khat ka nu zing tho chu, "Ka bing mum mum reng mai a, ka lute lah hi a hai em em bawk si. Ka tho fuh tlat lo" a ti a. A sugar a sang a nih ka ring. Thu hahdam turin kan ti vat a. Chhunah pawh a mu a, mahse, a muhil thei chuang lo. Kan kawmthlangah hian vawk pahnih a vulh ve a, "Vawk vulh loh zawng ka khua a har " a ti tlat si. Tlaia a vawk chaw pe tur chu a petek palh nge a lum ta a. Kan kawmthlang hi a awih lutuk lo naa, ka nu chu ka pute bolder dahah a lu a zuk tauh ta hlauh mai a. Hetih lai hian Sangkimi'n Bawihteii a hrai mek a ni. Ka nu thawm a hriat chuan a zuk en vat a, hlauthawng takin min rawn bia. Bawihteii chu kalsanin ka nu chu a zuk pan vat a. Ka nu chu a lu a sawh bawk nen, nikhua a lo hre lo a. Ka zuk thlen chuan mangang takin Sangkimi a lo tap mek a ni. Pa sanga te pafa nen ka nu chu kan zuk zawn chho ta a, hlauhthawnnain min bual hlup hlup mai. Rem takin kan han muttir a, kan ko mawlh mawlh bawk. A chal thite chu kan hrukfaisak a, a harh mai thei si lo va, a rang a rangin damdawi in kan pan pui ta a. Ka pite pawh an lo che nghal mawp mawp. Ka nu BP leh sugar chu a lo sang hle mai a. A lum chhan pawh kha a luhai vang a nih ka ring. Dar 7 a pel hlek tihin ka nu chu a rawn rum káwk a, a hrawk a ri bawrh bawrh bawk. Tlabung lama ka pute ka biak mek lai a ni. Sangkimi thlabar ri avangin ka va phei vat a. Ka nu chu a lo chat fel der tawh. Ka phone ka thlauh tawp a..chhuatah ka thu thla hnawk. Ka u leh Sangkimi bakah ka pite leh midang te chu an tap nghal hawm hawm a..ka nu a awm tawh lo. Hei hi dáwt nise ka va duh êm..Ka dawm hlum lohin ka nu a kal a maw? A rang teh thut lutuk a, rin harsa ka ti. Ka u chuan, "Nu,, a theih loh..pasal ka neih dawn kha..i tel lo chuan engtin nge ka neih theih ang? Ka duh lo, ka phal lo..nu, lo tho leh rawh.." A ti táwk táwk a. Sangkimi paw'n, "Nu, a mak em mai. Min tihrilhhai lutuk. I fate hi min ngaihtuah lo mi..mawh.." A lo ti ve bawk. Kei chu ka hul vek, ka mittui pawh a tla lo. Ka mawlh hûih a, ka mang vek a ni mai. Thu sawp nuaih chungin ka nu ruang an sawngbawl lai chu ka thlir tlawk tlawk ringawt. Ka nu hi a thi ve thei ang tih ka lo ngaihtuah ngai lo asin. Ka la inpeih hlawl lo, ka nu rorelna hnuaia awma ka nu uapna hnuaia awm kha ka la thlahlel asin. Ani kha ka nu a ni a, ka pa a ni bawk. A hmangaih a pasalin phatsanin thinlung na takin a siam a, mahse, a fate avangin khawvel a hmachhawn a, harsa tak chungin nun bul min tanpui a. Kan tana hrehawm turin a rilru natna kha a hrithla ngai hek lo. Mi fate awt lo turin kan tan rim takin a thawk a, kan tan eitur tuihnai a siam a, kan tan bang loin a tawngtai a, A fate tan a nun pum kha a hlan ral thak a ni. Hmeithai a nih vanga hmuhsitna te pawh tawk lo a ni bik lo va, amah hnaih duha a pasal ni duh pawh a hmai bik lo. Mahse heng zawng zawng pawh hi keimahni vangin a beng a hupsan a, nikhua ka hriat tirh ata ka nu demna tur leh sawiselna tur hi pakhatte mah ka hre lo. Nu, mawhphurhna min pek hi kei chuan nang angin ka hlen zo ve dawn em ni? Nang angin ka chak ve thei dawn em ni? Ka nu ruang chu kan phur thla a, miin ruahmanna min siampui an tum pawn ka hawi ka hawi ringawt. Sawi tur leh tihtur reng reng ka hre lo. Ka pu a fel êm a, aniin pa chan changin engkim a rel fel a, ka pu Ngura te chhungkuain an tawiawm tha hle bawk. Kan in a tet ve deuh si avangin kan in ep chiaha ka pute bungraw dah khawmna chu bungrua senghawiin thut theih nan an ruahman ta a. Rawn lut apiang chuan ka nu chu an rawn tah ni maiin ka hria. Uitu leh suntu a va ngah êm. Ni e, mi pawi hi a sawi lo ve êm a ni. Ka nu lu lamah ka thu ran a. Reitak damlo a ni lo bawk a, muhil ang mai a ni. A chang chuan ka awih lo thut a, a thaw nge thaw lo tih te ka han en leh vung vung thin. A thaw bawk si lo. Thalai tlaivar an thahnem kher mai. Ka beisei phak piahlam a ni. A nat dan leh kal dan vel han sawi tur pawn ka rilruah engmah a awm si lo. Ka pu bawkin ka ai min awhsak ta a. Ka pi pawh ka nu ruang kilin a thu tlaivar ve zak. An fanu chungah ka nu hi a tha bawk a, a ui ve khawp ang. Sangkimi chu a tap khawng thin a, an han buaipui leh rih thin. Zing lamah chuan Sangkimi chuan min rawn enin, "Tluanga, tap ve ta che. Tap bawrh bawrh rawh, ka nu hi tun bak kan hmu tawh dawn lo asin. A hun hnuhnung a nih hi..ti nge i ngawih tlat reng a" a rawn ti tiau a. Ka lo melh hû ringawt. Tlabung lama ka nu unaute pawh an rawn thang mek a, ka pa te lam pawh an kim thap mai. Patea rawn dingin ka nu thatzia leh an mihrang en lohzia te a sawi ve a. A ding apiangin ka nu fakna an sawi a, nia, ka nu chanchin hi sawi reng se ka duh. Khaw var tawh hnuah Bawihteii an rawn pawm thla a, Esi te'n an mutpui a ni. Bawihteii'n ka nu ban chunga, 'Pipi' a tih meuh chuan pa hi ka insum zo ta lo. Ka puakkeh ta ráwih a. "Nu, a la hun lo a ni…khawngaihin" tih bak erawh ka sawi thei lo, awrawl chhuaha ka han tap chu ka thawl ta hawk a, awm ve dangte ka vel tap bawk. Ka zak lo, ka zak reng reng lo, ka nu hian min hmangaih asin. Bawihteii lah chu a hrihhai si, kan tah vek avangin a tap ve ta ringawt a. A pi hian a duat êm a, a nu ai mahin a khawih tamin zante kha a riahpui tam zawk thin. Chuvangin bawihteii hian a nu awm mah se, a pi zawk hi a pan hmasak a ni fo. Nikhua rawn hriain a pi in a hmangaihzia te hi a takah hmu ve se ka ti mang e aw. Chhungkaw aiawha thusawi a ngaih avangin patea te inah ka han inbuatsaih a. A harsa mang tak e aw..ka nu.

Ka nu thih sarhu lai chuan inleng pawh kan ngah thin viau. Marawhchu, kan lo buai tlang tawh a, kan hman reng lo bawk nen, a thihcham bak kha chu thenawm hnai bak inleng pawh kan nei ta lo va. Kei pawh dawrte pawh ka nghak ve leh tan a. Ka u leh Rema chungchang pawh ngaihtuah that kan ti ta. Ka u chuan a hun sawn hlat a duh rih tlat. A awm ve tho mai. A la sarhu ve êm bawk a ni. Rema te nen tha takin kan sawi a, thla thar lamah kan titlu ta a ni, an ni lam pawn min hrethiam khawp mai. Ka nu vuiniah pawh Rema bakah a nu leh pate pawh an rawn kal ve hial a ni. Ka nu awm loh chu a hriat chho ta hle, inah han hawng ila, a eirawngbawlna hmun ka thlir a, a lo awm tawh si lo. Zan mut dawna a tawngtai ri lah kan hre ta ngai lo. Sangkimi'n eirawng chu a bawl tawh a, ka u chuan, "Sangkimi a buai êm mai, nau nen a ni bawk si. Ka kal tawh lo mai ang" tiin a hna a bansan ta a. A zia deuh ang chu..

Ka u te inneih ni pawh a lo inherchhuak ve ta reng mai. Bsa pa kha kan zuk pazawn ve tawp mai. Mi hrang daih han tih ai chuan a zia zawkin ka hria. Pathian zarah tluang takin inneih hunserh pawh kan hmang a, ka u chu a inhru zauh zauh, ka nu a ngai tih ka hre mai. Sangkimi pawh a mittui a tla reng mai. Tawipui lam atangin tawiawmtu an thahnem ve hle mai a, Kan khaw nula fel pawla sawi a lo ni ve bawk nen. Thilpek pawh an dawng tha ngiang mai. Dan puitling ngata an han innei thei chu ka nu min zilhna rah ka ti lo thei lo. Rema pawh a zu nghei atang khan a hmeltha sawt sawt mai a, zahpuiawm lo tak a ni. Tichuan, ka u chu Rema te inah a lawi lut ta a. Ka nu zirtirna dawng a ni bawk a, ka ngaihtuah lo. Rema te chhungkua lah mi pangngai tak an ni bawk nen. Nupa hlim tak ni reng se ka duhthusam a ni. 

"Sawmpuia a rawn haw a, rawn leng chho ta che u" an tih avangin kan chhungkuain kan han leng a. Ka bike hi ka hmang rim bawk nen, Motor lei ve theih hi ka chak ngawt mai. A leite pawh kan la lei ve thei turah ngai ang. Sawmpuia ka hmuh chuan ka hai têp a ni. A cher lutuk, a thu that bawk a. Zu a in nasa hle a niang, a dul a kiar in a mawng a dêp em em bawk. Ngui takin a lo thu bur mai a. An nu a rawn hruai lo chu mak ka ti deuh. Ka pu chuan, "Kha..an rawn inthen a nih kha..Seni'n a lo uiresan a niawm a. Rilru na takin a rawn hawng a ni. I pute inah a lut ngam tawh bawk si lo va, a pawi tak tak a ni" a lo ti a. Mak ka ti vak lo. Ka pi chuan, "Mama, thil awmdan chiang zawkin han sawi teh" a lo ti a. 

A heh a liak zauh a. "Aa..Kan indan atang khan a chhungte zawng zawng nen min chhiahhlawh chei ka ti mai. Engkim min tihtir a, ka hna pawh thawk hleithei lo khawpin. Zu in tawh loh ka tum pawn amah Seni hian a in reng sia, ka lo hnar thei bawk si lo. Nau lah a pai thei si lo va. A nu lahin hnuaichhiah tak takin min tawngkhum reng a, Seni lah thatchhe si, engmah tih a tum lo, thil thar a lei reng ringawt a. Eirawng takngial pawh ka bawl chang a tam zawk mah ang. Mahse, ka lo nei laklawh tawh a, ka nu leh pate remti lo chung ka neih a nih avangin ka dawh zel a. Insiamthat hunte a la nei ve mahna tiin. Mahse, thla hmasa atang khan mi ho hian 'I hnaa i kal hlan hian a bialpa hlui a lut zauh zauh a nia' tiin min hrilh thin a. Ka uksàk duh vak lo. Mahse, a awmdan pawh a danglam nasa a, phone a khawih reng a, kei chu min ngaipawimawh tawh lo a ni ber. Tichuan, ka fiah ta a, hnaa kal tur anga ka chhuak chu thenawmte inah ka peng a,ka chàng ta a. Dar 11 bawr velah mipa pakhat hi kan inah chuan a lut ta a, thenawmnuin, " Aw saw pa ngei saw alawm kal thin" a tih takah chuan kan in lam ka pan ta a. Kawngka an lo kalh avangin kan mikhual room tukverh atang chuan ka lut ta a, ka kal dawn khan ka va hawng sa hrim hrim a. Kan roomah ngei kan nupa khum ngeiah chu pa nen chuan an lo mudun ta a ni. Sahhlum ve ve ka tum a, mahse, an tlan chhe ta a. Seni nu chuan, "Zu i heh si a, pasal tlak ni hek lo che. Hengte chu enliam mai mai rawh" a ti a nih chu! Eng ang chhungkua nge maw an nih ni..a nu pawh hi tlem lai khan an driver nen sawi hat an kai tawh tho. Tichuan, chumi tlai la la chuan ka chhuak a, ka pute nen kan boruak a that loh em avangin ka pan ngam si lo va, thiante inah ka tam tal a. Heti ringawt zawng tiin ka rawn haw phei ta a ni" a ti ta mial mial a. Vanduaina a tawha a'n beidawn meuh chuan nu leh pa bak pan tur a nei leh chuang miah lo. Hei hi a ni nu leh pate thuawih loh rah chu, ka khawngaih viau naa, hremna te pawh a ni tel vein ka hria. Ka pi chuan, "Hetah i awm ang a, i hna pawh chawl mai rawh. Ranvulh i tui tho a, VC te ka dil ang a, kan in chhak zawlah khian ran vulh ve la, kan hmuh phakah i khawsa tawh ang. Han fel chho la, Julie kan nei ang. Rualban lo ni tawh mah se, im fapa hi a lainatawm lutuk. Nu leh pa kar ngei atangin seilian rawh se.." A ti a. Ka lo pawmpui hle. Tichuan, an sawi ang khan Sawmpuia chu a awm ve ta reng a, Aizawlah a pa nen a bungraw thenkhat an va la a, Seni te lam chuan an lo ankhum nasa mai. Kha pa a uirena kha a lo lalut nghal a niawm a. An tluan erawh ka ring lem lo. Ka pi sawi angin vawk leh ar a vulh ta a. A lo timi phian mai. 

Keini chhungkua pawh boruak chhia nei lem loin kan la khawsa ve zel a. Bawihteii hi kan hlimpui ber mai. Tawngte a rawn thiam chhoh hunah phei chuan aw..kan duat khawloh te pawh ka hlau deuh. Ka nu thlan pawh kan tlawh deuh reng mai. Bawihtei'n kum 3 a rawn tling ve ta. Hun hi a kal chak mang e. Ka u te pawn an fa hmasa ber mipa an nei tawh a. Tin, Sawmpuia leh Julie te pawh inneiin Bawihpuia'n nu leh pa a nei ve ta. Julie chu ke lem an vuahsak a, Seni nen chuan lei leh van ang vel an ni. A fel bakah a taima em em a, eisiam a thiam bawk si. Ka pi leh pute mit a tlungin an lungawi hleuh hleuh khawp mai. Ka lawmpui e. Seni kha kan hriat leh danin a uirena pa khan ngaihzawng dang a neihsan a, a luhkhung san daih nghe nghe. Tichuan, Seni rilru na chuan Sawmpuia te chu a rawn beisei leh kual a, Sawmpuia chhanna hian ka nuih a tiza thin "Phuihnam kungah lawn rawh. " tih chauh a ni. Kan chantawk hi he leiah hmuhtir kan ni zel a nih hi. 

Bawihteii nu lah hi a ngo suah a, a thau ve hmán bawk nen, a îtawm tawk chauh a ni. Pathian zarah a hriselna lamah harsatna kan tawk leh ta miah lo va, Bawihteii a tet laia a dam loh vak bak bawrhsawmna a nei ta lo. Kan nupaa Pathian kan tih dunna rah ka ti mai. Ka dawr pawh Hotel nen Restaurant nen ka tikawp ta a, kan extend bawk. Ka awh em em kan lei phak ve tawk Bolero ka nei ve thei ta bawk. Hringnunah hian chhum chhah pui pui hmachhawn fó mah ila; a tawpah Pathian thilsiam mihringte chuan hnehna kan chang leh nge nge zel. 

"Bawihteii kha timu vat teh..zan thum min ngheitir tawh.." Ka ti hlur a. Rum zeta min rawn melhin, "Za sek suh. Min kham theilopa" a ti nghat a. Ka lei ka chhuah khum zauh. Bawihteii a muhil fel ta maw tihin ka hna ka tan a. He hmeichhia hi kham tikni ka nei ngai dawn lo a nih hi..a laklawh lai takin Bawihteii a rawn tap ta.."Aw..bawihte, a va hun lo tak" ka ti sup a. 

Rinsangkimi erawh a lo nui awr awr..

A TAWP TA.