Rinsangkimi 9

RINSANGKIMI (9)

Ziaktu : Toni Râlte

Police stationah a vawi hnih nan ka lut leh ta. Thil thlen dan chu min han zawt chho ta a, Sangkimi atanga tanin min khawih rawnte pawh ka sawi tel vek, a chinchhuaka ka han sawi takah chuan min hruaitu pakhat zawk chuan zawi sup hian, "Phutawk hi kan hmu nawlh nawlh fo reng a ni" a lo ti zauh a. Pakhat erawh chuan, "I case hi a sang maithei a nia. Attempt to murder case a ni ve thei tlat" a lo ti a. 

"Sir, a hmaa min khawih rawn pawh khan ka thi tèp ve tho asin. Mahse, nangni chuan tlangval hawklak insual tiin keite kha thiam lo zawk dawn dawn ten min puh a. An ni pawh kha ti nge Attempt to murder case in awrhtir ve loh" ka ti hmiah mai. A dang ta nge a ngawi ta dúk a. Lockupah min khung leh a, Ka thianpa ka be lawk tawh tho a, chaw pawh min rawn pe leh mai ang chu maw. Ka ril lah a tam viau tawh si. Dar 11 velah chaw chu a rawn dah a, ka ei nghal duak duak. Zu ka nghei hlim a ni bawk nen, la buai ka hlau deuh. Ka thianpa hi Bsa a nia, a bulah pawh ka sawi fai vek a. "I la sawisa na tawk lo ngawt zawk alawm" a ti ve hmiah. Tlai lamah chaw min rawn pek leh tur thu sawiin min kalsan ta a. Ka khua a har angreng, mahse, rei ka awm hmain mi pakhat hi an rawn dah lut ve a, engvang tak ni ve ang maw..Kei ai chuan a upa deuh fê ang, a inzuah buk viau mai bawk a. Amah zawk chuan min rawn be hmasa ta a, ka awm chhante min zawt ve a. "Nizanah kan insual a, ka lo khawih na deuh alawm le" ka ti mai a. A nui hawk. "Kan va inang awm ve. Kei pawh kan inhnuai tlangval nen kan insual a, ka lo tui deuh aniang, damdawi in an panpui ta hial sia.." a ti ve a. Ka ngaina ta sawt mai. Hmingte inhrilhin, Rema a nih thu a sawi a. Lunglei Rahsivenga awm an nih thu leh an in hnuai tlangval nen an buaina te chu a sawi ve bawrh bawrh a. 

"Englo mawle..tunlai chu ka dry e ka tia, mahse, nizan khan kan tlangval chuan a senchi a rawn hawn pek a, kan in dun leh a. Ka farnu a ít thu leh a bialpa a huatzia te a sawi vel a mawle. Keia rui hi chu a tha za zawng hian ka rui roh thin a, kan inhnial chho ta a. Min cho ve kha kha bawk a, ka'n tukzal deuh hlek a nih kha" a ti ta a. Kan nui dun hawk hawk mai. Kei pawh chuan, "Ka bialnu hi a lo tibuai ve sek a, amah vangin thla 3 dawn kan inthen phah a. Rilru na taka min siam bakah a hmain a thiante nen min khawih rawn hrep tawh a, phuba ka la e ka tia, ka lo inkhawih tui deuh a nih hmel" ka ti ve ta a. 

"A tha, mipa hi chu tiang thak kha nih zel mai tur" a ti nghut nghut a. Tlai lamah ani pawh a chhungten chaw an rawn pe ve. Bsa pawh a rawn kal hma viau. Chawhmehte chu in suah tawnin kan pahnih chuan kan ei ta a, a chaw lak a tha bawk a, thahrui pawh a nei khawpin ka ring. Zanah chuan khua a lum deuh tawh tho a, puan pawh kan sin lem lo. Ka zu nghei bawk chuan min rawn thing a, ka let ka let mai. Rema erawh a hnar súk súk mai a, a awhawm mang e. Jail lamah min dahthlak ka ring a, a chhan chu SP hi sawi tawh angin Pi Rengi makpa a ni tlat. Ka thiltihah erawh inchhirna chhete mah ka nei lo thung. Ka lungawi a, a ruka ka pai reng, ka lung dam thei hlek lo kha a bo duak thei nia! Mipa hi chu kan heti nge nge zel. Mahse, Sangkimi erawh ka ngaihtuah takzet thung. A damloh lai kher khera a rilru ka han tihhah belh leh hi hrehawm chu ka ti ngawt mai. A nu leh a pa te min ngaihdan a dan phah te pawh ka ring deuh. Mahse, Sangkimi hi neih ka tum a, ka nei dawn tho tho. Jail tang chhuak min iai loh phawt chuan. Amah hi chuan min thlauhthlak ngawt ka ring bik lo. Harsatna kan tawk dun reng a, kan lo paltlang tam tawh. Chutimai chuan ka thlah dawn hauh lo. Zing lamah ka chhing ve sek ringawt. Kan pahnih chuan min rawn ko chhuak a, "District Jail lamah in chhuk thlak phawt a ngai" an ti ta. Jail-a vawikhat mah la kal lo ka ni a, ka zàm ru ve deuh. Ka sawi rêng kha maw, A khawihtu zawka ka han tan ve meuh chuan, "Tlangval hawklak insual" chu min ti ta hauh lo mai. Kan ram hi chu heti hi kan la ni a, a ngaihna kan awm lo chu a ni e. Rema nen kan ni hlauh a, ani pawh jail la tang bik lo a ni ve bawk a. Thian neisaa luh chu a zia deuh ang chu. Court-a kan han inlan hmain ka nute biak ka dil a, min phalsak ve mai. Ka han be ta a, "Awii Mama, a va pawi thui tak êm. An dah thlak che u chuan, naktukah i u nen kan rawn kal ang e, i lo ti tawh a, tihngaihna a awm tawh si lo. Jailah pawh nungchang tha takin zuk awm ang che, kan lo tawngtaipui reng ang che" a rawn ti dap dap a. Ka phone pawh hi lo lam ngei ngei turin ka chah bawk. 

Court lamah chuan kan chho ta a. Magistrate hmaah ka ding ta ran mai. Ka tan thil thar vek a ni a, a zamawm duh viau. Ka case chu Police sawi ang khan a sang ta vak lo, mahse, min convict ta tho a. Thiam loh chantir ka ni ta. Bail theih ka ni dawn bawk si lo. Thla 3 chhung táng turin ka chungah thutlukna chu nghah a ni ta a ni. Rema pawh thla 3 chhung tho. Thla 3 chu a rei em em lo bawk a, ka tlin ve thei mai ang chu maw. Ka nu te naktukah an rawn kal dawn tho a. A zia deuh e. Attempt to murder a ni lo va, lawm tak ka ni. Tichuan le, Chawhnu lamah prison van-ah Rema bakah chuminia rawn court ho te nen chuan Sazaikawn lam kan pan ta vuah vuah a. District jail hi sawi tawh angin vawikhatmah ka la kal lo, Kalna chhan tur ka nei lo miau a. Kan thleng thla ta a, Jail chhung kan han lut chu ka zalênna pawh lakboin a awm ve nghal tih ka hai lo. Kan lo ralkhat hriat danin lo awm rei tawhte hian lut tharte hi an lo tiduhdah ve deuh thin nia sawi a ni a. Chutiang thil chu tawn ka duh lo khawp mai. Kan ward turah min hruai lut a, mutbu pawh ka nei ve rih si lo, Rema'n "Lungngai suh, kan mu dun dawn nia" a ti hlauh zawk a. Ka nuten ka mamawh chu an rawn hre turah ka ngai. Kan thlen tlai deuh avangin chaw dawh a lo hun reng tawh a. Zúm zetin kan va intlar ve. Min melh run run hlawm mai. Sual hmel fe fe, sek fe fe karah ngawihchawih hmel tak te, ze zawi ve tak takte pawh an awm. Hmelhriat an váng pharh mai lehnghal a. Kan khua hi kan fel angreng a, jail hial lut khawpa dan lova thil ti hi kan tam lem lo a ni. Chaw lah chu a'n rum em em khawp a, dailuah fi relh rulh leh alu a ni tlawng mai. Kan ei khamah ward-ah kan lut leh nghal a. Kan ward leader chuan kan tan chhan leh khawi khua nge kan niha tu nge kan hmingte min zawt ta chat mai. Ka sawi hmasa a, "Chu! Insual vanga lut maw i nih?" a ti há a. Ka bu nghut. Min han thlêk kual a, a nuam vak lo. Amah lah chu a sek tul mai a, a háng ren run si. Rema'n a han sawi ve leh a, An zavai chuan an nui thàw hlawm mai. "A tha e a tha e. Insual case te chu an tang rei ngai hleinem. " leader chuan a ti a. Amah pawh chuan a hmingte a sawi ve a, a hmel bumro ang aiin a nelawm ta phian a. A hming chu Chungnunga niin, a hnua kan hriat leh danin Tualthah thubuai avanga táng a lo ni. Tu nge a thah tih erawh an hre bik lo nge an sawi lem lo. Kum 6 a tanna a ni tawh. Convict kan nih vangin tihduhdahna leh a indeuna lam kha kan tawng miah lo lehnghal. Bakah kan case kha a ho ve riau bawk nen. Ka nu te pawn a tukah min rawn tlawh ta a. Mutbu tlem bakah eitur leh meizial thahnem tak an rawn keng a. Pawi an tih thu bak sawi tur an hre lo. Ka khawngaih takzet naa, "Nu, ka tan avang hian misual ka ni tihna a ni lo. Phuba ka la a ni mai. Lo zak reng reng suh u. Sangkimi te chanchin in hria em?" ka ti a. 

"Naktukah hian Aizawla phei an tum thu an sawi tak kha mawle..an va inentir dawn a niawm e. Pi Rengpuii lah chu a tawng nasa mai a. Min hrilhtu hi an awm ve zel thin si. Kum 10 chhung a tang dawn te a lo tia.." a ti bawrh bawrh a. Ka nui tawp. Ka táng chu a lawm khawp ang le. Inkan hun chhung a rei lo bawk nen, hun a tawp ta mai a. Inenkawltha tura inchah mawlh mawlh chungin kan invai liam ta. Ka nu mawlh chu ka khawngaih avangin a vawikhat nan Peka ka lo sawisa na deuh chu ka inchhir ve ta deuh. Mahse, a thleng vek tawh a. Tihngaihna a awm lo. Kar khat zen zawn jail-a ka awm hnu chuan an inrelbawl dante chu ka hre ve chho zel a, Rema nen kan inkawp chawt mai. Pawngsual case vanga lutte hi an vanduai deuh ber a, tihduhdah mai bakah hmuhsit an tuar deuh. Zu case hi chu an ngai holam viau. Murder case erawh an ngaisang letling emaw tih turin an thu hma viau bawk. Lehlamah kum 20 chuang tàng turte chu Ward leader an ni tlangpui a, a lal pawh an lal. Heng zawng zawng chunga roreltu a la awm chêu a, Damchhung táng tur an ni tlangpui. All Dicipline an ti mai a. Kan awm ve lai khan mi 3 thattu Vanlalmuana chu All dicipline -ah an thlang a ni. Ani hi damchhung tàng tura convict a ni. Tin, Convict ho bik hi kan lal deuh zawk bawk. Hna kan thawk chho a, a tira zu vanga ka buai ru deuh kha a zia sawt khawp mai. Thlante kan han titla a, chaw ei pawh a tui chho tan. Ka nu ten kar hnihnaah min lo kan leh a, Eitur leh vaihlo zial chawp tur min rawn kensak a, zial hi a hek ve êm bawk a ni. Sangkimi chanchin ka lo zawt leh vat a. 

"An zai leh ni khan an sawi a, i phone-ah khan hman zanah a rawn call a, a rawn tap tiau mai a. Ka lainat tak tak a ni" ka nu chuan a ti a. Ka thinlung a na vawng vawng mai. "Nu, thla 3 chauh alawm ka awm dawn. Sangkimi pawh a lo dam fel hman tawh ang. A chhungten harsatna an neih loh phawt chuan ka nei ngei ngei dawn" ka ti mawlh mawlh a. 

"I chanchin pawh an sawi duh khawp mai. Mahse, nangmah tan zawng zelin an sawi ve a, a hmaa Peka te tan ve loh laia nang i tàng bik hi mak an tih thu an sawi nasa.." a ti a. 

"Dawr chu U muana'n em ni nghak" ka tih chuan, "Aw..Zuali nau Zorina rawn hawn lai a ni bawk a ,a rawn pui ve bawk" a ti mai a. 

"Nu, in tan a harsa mai mai. Rawn kal reng a ngai lo. Thla tharah lo kal ula a tawk mai. Vaihlo a tam hi chuan a tawk mai aw" ka ti a. Ka inthlahrung ve deuh a ni. 

"Mama, engpawhnise, tha takin lo awm la, inenkawl tha bawk la ..lehlamah chuan tihian ka ngaihtuah a, Zu i nghei theihna hmanrua atan te pawh jail-a i awm hi a tha zawk dawn a nih hi ti ten..chuvang chuan min lo ngaihtuah lutuk suh. " a ti dam ta thlap a. Ka thaw huai nghe nghe. Rema pawh a chhung ten an rawn kan zing phian a, an tan chuan a lo awlsam ve bawk nen. Engkim kan eiin kan in dun a, inhuphurhna kan nei lem lo. Kei aiin kum 2 chauhin a upa a, Thian tha tak ka chhar bawk a, engkim ka hloh vek lo e. Rema pa hi officer niin, a nu pawh Health worker a ni. An khawsa thei viau a niawm e. Amah hi an unau zinga a milai a ni a, a sual ve ber a nih chu. Bialnu a neih leh neih loh ka zawh chuan, "Ka ngaihsak lo khawp a, ka rawlthar chhuah tirh khan ka nei ve a. Min bialtu Pastor fanu a ni nghe nghe, ka duh ve khawp mai. Mahse, vanduaithlak takin motorin a su hlum a, khata tang khan bialnu chu pahnih ka nei leh tawh nain engah teh vak ka ngai hran lo. Ka serious thei tak tak lo a ni e. " a ti ta a. A vanduai ve hle mai. Kei pawh Sangkimi chân mai thei dinhmunah ka ding mek si a, ngaihtuahna a kal thui kher mai. A ngaih pawh ngai tak ka ni. Min theihnghilh chu ka ring phal bik lo. Bul kan tan thar leh chiah a, tihian jail-ah ka lut leh tawh bawk si. A rilru chu ka tihah ve khawpin ka ring. A nih nih kan ni zo tawh si. 

Thla khat zet ka han awm takah chuan ka maih ve ta màng mai. Hunbi neia chaw ei hi taksa hian a lo ngeih riau a nih dawn hi. Hmelhriat leh thian pawh ka nei ve ta nual a, ka thian chhar thar Zodina chu ka khawngaih ngawt mai. A nupui ruk khan kum a lo la tling lo chu niin rape case a awrh phah ta hial a nia! "I bialnu pawh chu a tang ve eih lo mi? Court hmaah te pawh" ka tih chuan, "A chhungte a hlau a niang. Engmah a sawi ngam lo" a ti mai a. Amah anga tàng ve dang pawh an awm fur mai. Mipa tan hian fimkhur a va ngai tak êm. Kum tling lo chuan eng ang pawn min zarin min ti huam mah se, insumtheih tum tlat hi a finthlak. An chhungten an hriat vaih chuan, pawngsual angin a kal zel thei si a. Zodina pawh chu a táng rei zêk dawn lehnghal a, Non-bailable a la ni zui bawk si. 

Tlai khat kan hnathawk zo ka intihfai zawh chuan zial zuin khaw thlir theihna laiah chuan ka thu vang vang a. Hauruang khua pawh a lang iar mai. Ka lung chu len namên loh hian a leng a, a mak zawk, ka vai deuh ruai ni maiin ka hria. Ka ngaihtha lo chu Sangkimi hian eng emaw tak a tawk em ni ang? Nge ka nu leh ka u te zawk tihte ka ngaihtuah chho a, biak theih an ni der bawk si lo. Rilru ipik takin zial chu ka han híp leh káwk thin. "Zothan" tia min kotu an awm avangin ka lehhawi vat a, kan ward leader Chunga a lo nia. Khi vun vun chungin a rawn phei a. 

"I lung a va len hmel ve" a ti nghut a. 

"Umm a leng thlawt" ka ti tawp mai. Dawt sawi kual ka peih lo. Ka bulah rawn thu vein ka chanchin diktak chu min zawt ta a. Hmaih nei miah loin engkim ka sawi ta vek a. A chek tlat tlat mai. "I va dawhthei rei zawk ve aw. I pa ka ti khawp mai. Mahse, i bialnu damlo chu pawi ka ti..". A ti sup a. Ngaihthlak a hrehawm lem loh. 

"Nang i remtih chuan min han hrilh ve teh" ka ti ta hlawl a. Hun khawhral nan a tha phian ang. 

A aw an thian leh te tê a. "Ni e, ka chanchin tuitang lo zet i hriat chak te chuan kan sawi mai ang chu.. Haulawngah kan awm thin a. Kum 12 ka nihin ka nuin min boralsan a. Ka pa chuan kum khat pawh a ral hmain nupui dang a nei leh nghal a. Unau hi pahnih chauh kan nia, kei hi ka naupang zawk. Ka u chu mipa tho a ni. Ka nuhrawn chuan fanu a rawn chhawmtel a. Hlim takin kan khawsa ho dawn emaw tih laiin ka nuhrawn chuan min ngeih ta tlat lo va. A fanu lah chu keini aiin a u hlek bawk nen, an sual nufa em em mai a. Ka pa lah nitin inhlawhfain a chhuak thin si. Naupang mai kan la ni bawk nen, a mi tihduhdahna chu kan tuar ta tlawk tlawk a. Sawi vek sen a ni lo, A fanu pawh chuan min tiduhdah tho. Ka pa hriselna a lo hniam takah chuan zu kan zuar ta ngawt a. Keini unau pawh school min bantir bawk. A hnu deuhah ka u erawh ka nuteii ten an awmpui ta a. Ka mal tan ta. Ka nuhrawn duh ber chu in leh lo a ni. Mahse, ka pa chuan ka hmingin a dah ve tlat si. Tikhan an innghirngho chho a, ka lo upa ve zel a, A hmaa min tihduhdah ang khan min tiduhdah thei ta bik lo. Inhlawhna awm ang angah ka inhlawh chho a, zu pawh zuar tawh lo turin ka hrilh thin. Keia thusawi mai maite chu engahmah ngai hek lo le..an zuar lui zel tho a. Tichuan, kum 24 ka nih kumah ka pa chuan chawkawng cancer vangin min boralsan leh ta a. Sawi tawh angin a nupui chuan in leh lo chu ama hminga dah a tum ngar ngar a, thuneitute tham lungawiin an lo thlak fel daih a lo nia. Kei chu min hnawtchhuak ta a ni. Tah zet chuan ka tuar thei ta lo va, ka nuhrawn chu a upa ve tawh bawk a, bang den nan ka hmang a, a rawn tho leh tur chu ka chempuiin a nghawngah ka lo sat ta sawk mai a. A thi nghal. A fanu tlanchhuak tur chu va kekin a ring ruh ka thuai tliak ta a. Ka tha a zat bakah ka fit em em a, ka chak bawk. Tichuan, Police kutah ka inpe zui ta nghal a ni. Kan khawmi min hrechiangtu te chuan, "A thlentir har khawp zawk alawm. An sual nufa êm a ni" an ti hmiah. Mahse, dan chu dan a ni miau a. Tihian jailah ka hun chu ka hmang ta a. Kan in erawh ka u-in min lo enkawlsak thung. Chutiang vel chu a ni e" a ti ta dap dap a. Khawvelah hian vanduai ber emaw kan intih lai pawh hian keini aia vanduai hi an lo la awm ve zel thin. Khawvel tak hi chu aw..

Chaw ei a hun tak avangin chaw dawh turin kan kal ta a. Chaw ei lah hi a tui thei phian a. Kan chaw ei lai chuan kan piaha thukhawm zinga mite thawm chu a ring ta viau mai a. Kan va hawi phei nàk chuan Rinawma leh Chhana te an lo insual chu niin, an ni pahnih hi an inngeih thei hlawl lo. Eng dang a ni lo, Chhana farnu leh Rinawma te hi an lo inru ve zuai tawh a, Rinawma chhungten Chhana farnu an duh loh êm avangin Rinawma fa pawh tihtlaktir an lo tum a niawm a. Chutiang vel chu kan nia. Kan hahthlak tlang thei a nia aw. A nuam phian bawk si. Ni e, jail tan nuam ka tih vang ni loin nuih tur leh hlimpui tur apui hi a tam ve riau a. Lungngaih pui turte pawh an kat nuk tho. Engpawhnise, Class XII -a kan zir thin 'Lung in malsawmna thurúk' H. Lallungmuana ziah kha ka hrechhuak lo thei lo. Misual rual awmkhawm angin mite chuan min hmu mahna. Mahse, misual tia kan kawh rawn tam tak rilru tha em em, an dinhmunin a zir thlawt loh avanga sual kawng zawh ta hi a tam zawk an ni. Induhsakte hi kan tina ve em em a , kan neih ang ang kan ui ngai lo. Tin, mipa kan ni bawk a, a tha em phei zawng ka hre lo va. Tual hial that tawh te, rukruk hrat, ruihhlo ngawlvei tam takte hian kum tling lo pawngsualtu kan lo huatzia ka hmuh hian mizo hmeichhe thenkhatin, "Mizo mipa chuti khati' an ti thin hi a dik lo tih ka hre ve tlat. Mipa zawk hian haw tak kan ni. Rape case vanga rawn lutte chu an zúm dúk a. Ti em emin an awm a ni ber mai. Misual tawrawt takte pawh hian naupang pawisawilo hi chu kan lo lainat tlangin kan zah ti mai ang, chutiang chu a ni. Zirchhuah ka ngah viau mai. Kan ramah langsar taka eiru tún tún, an eiru tih kan hriatreng pawh awrphiar tâwng tâwnga tan pawl an awm laiin jail chhungah chuan, " Kan chhuah hunah chuan hel pawl din ang u" te kan han tia! Kan theihtawkah theuh ram tan thahnem kan ngaih ve zia te ka ngaihtuah hian ka hnuk a ulh hial thin. Zahawmna hi suit hak te, inkhawm taimak te, virginity hmangtea teh tur a lo ni ber lo va. Sual kan huat danah leh thudik avanga kan huaisen leh huaisen lohah ka teh thin. Ka jail tanpui thenkhat chu zahawm ka tih rúk pawh an awm tlat nia! Tu pawimah sawi ngai lo, midangte mamawh pe chhuak thei reng, mi chanhaite lo tuamhlawma an in ang maia ngaia muang taka an awm theih nana lo dawngsawngtu te, damlo an awm changa kan neih ang ang kan inpekhawm ve thin te, court huna kan chhungte min call sak tura kan chah ten kan duhna ngaipawimawha min lo call sak hram hramtute hi ka tan chuan mi zahawm an ni ve tlat. H. Lallungmuana ang maiin ka jail tang chu ka hlawkpui i ti mai teh ang. 

Thla a thar takah chuan ka nu paw'n min rawn kan leh ta. Ka mamawh zualpui a rawn keng leh a. Ka khawngaih thin mang e aw. Ka zawh ngai loin Sangkimi chungchang chu a sawi ta a, "A hnute veilam bawk kha an paih tawh a niawm e. Aizawl lamah an inenkawl rih dawn a niang. Anu chuan a rawn hawnsan rih a. Chuan, Peka leh Ruthi te kha an inru a" a ti mawlh mawlh a. 

"Sangkimi chuan a rawn call leh em?" ka ti a. "Nizan hmasa khan a lo call a, min lo biak rawh. Ka tha viau tawh e tiin min lo sawisak la, jail atanga a lo chhuah hunah law law ka rawn haw ang a ti lo ti rawh a tia" a ti a. Ka lawm ru hle. Min lo la hre ve reng chu. Ka va nei dawn chiang tak e aw. Mipa alawm ka nih le..ka nu pawh rei a awm leh thei lo. Vaihlo tam zet leh lehkha thlersa vek tam tham tak a dah a, eitur neuh neuh hi chu ka mamawh em em lo zawk. Zial nghei hi a hlauhawm ber zawk a. Rilru a nuam chho tan ta a. Peka leh Ruthi te inru pawh chu a lawmawm. Rin aiin a dam tha leh hma a ni maw..ka tan chhan kha a ni ve a, ka tan hun chhung tal chu han silawng ve se a tha tur. Rilru tha hi Peka lakah chuan put a har êm a ni. 

Chutianga hunbi tin chhiara thla hnih pumhlum thak ka awm takah chuan thian pawh ka ngah ve ta hle a. Ka vannei a, mi ngainat ka hlawh ve thei zêk a. Zanah mut hma hian kan chhuah huna Zoram chhan nana hel pawl din dan tur kan han ruahman vel thin a, kan ti hlawhtling dawn lo a nih pawhin a nuam ve hrim hrim. A tawi zawngin sawi tawh mai ang. Thla thumna kan thleng a, ni 20-ah chuan jail atanga chhuakin mi zalên ka lo ni leh thei ta. Rema pawh a zalên ta bawk. Kan chhuah tlaiah chuan kan khaw sumo ka nang hman tawh si lo va, Rema te inah min ngen nasat êm vangin ka innghat a. An fel kher mai. A nu mawlh mai chu ka nu nen an inang khawp mai. Inthlahrung miah loin zan chu ka tum tawi thei ve ta a. Rema nen a khumah kan mu dun leh a, Kan lo inpawh tawh hle a niang, kan khuaa zin tur te pawn ka sawm ve a. A chak thu a sawi ve nuah nuah kha maw. A tukah ka nu a rawn kal a, kan nufa chuan mamawh lamkhawmin kan bazar nghal a. Chawhnuah kan khua thla 3 chhung zet ka hmuh tawh loh lam panin kan tlan ta vang vang mai. Kan sumo chuanpuite pawn min be ve luam hlawm a, ka thu deuh tih lohah chuan ka sa a thain ka sek ta deuh. Thu loh theih loh ni hek lo, nisa hnuaiah hna kan thawk ve reng si a. Kan driver Atea chuan, "An thil lo tih tawh dan ngaihtuahin kei i sawisa kha mak ka ti chhete lo, i dawhthei rei zawk khawpin ka hria a. Tlangkam atanga ka lo hriat ve danin, " Sangkimi a chhuhsak tawh a, a ex Ruthi lehzel a kawp leh hi Tluanga hian a hmu thei lo a niang. " tih vel a nia. Thil hi an zeldin peih bawk sia maw..engpawhnise, zak duh reng reng suh. Mi pangngai chin chuan thiam loh kan chantir miah lo che a nia" a ti suam suam a. Ngaihthlak a nuam e. Kan hnunga thu Pu Khuma chuan, "A nu pawh sawn chhuak tura khawtlang hruaitu ten nawr an tum tihte kha a awm tak kha mawle. Peka chet duhdanah khawtual tlangval mit a kham ta deuh pawh a niang e. Bakah Pi Rengi khi biak a harin a induh ve lah mai a, a chapoin a chaltlai thei bawk si. Khaw mipuite pawh hian kan ngei ru thúm a ni awm asin" a lo ti ve chuar chuar a. Ka nu erawh chuan engmah a sawi ve lo, inven ran hi a ngai ve bawk nen. Tawipui North 1-ah truck lian a lo chhe tlat mai a. Kawng a dal tlat mai si. Kan nghak ta reng a. A va ninawm tak, motor pawh kan intlar thui tawh khawp mai. Ka nu khan ka phone kha min rawn kensak bawk a, Sangkimi ka biak chák tawh êm avangin sumo atanga chhukin mi awm lohna laiah ka va phei a. Ka call ta. 

"Aw Tluanga mi!" a rawn ti nghal a. A aw pawh a fiahfai hle. 

"Aw, Sangkim, i lo dam em? Vawiinah ka chhuak asin" ka ti sup a. 

"Awii! Ka va lawm tak êm. Hei Aizawlah ka la awm rih a. Naktukah rawn phei ka tum ang." a ti ve zung zung a. A rilru a la thlak lo tih ka hriatnain min tihhlimzia kha. 

"I dam that loh chuan rawn hawn vut kha a tul ber lo a nia aw" ka ti a. 

"Aih, ka tha tawh lutuk. Ná pawh ka nei tawh lo, chuan ka thau ve deuh tawh bawk a. " a rawn tih chuan ka lawm kher mai. "Chaw kha ei teuh teuh ang che. Ka ngai tawh lutuk che" inkawkalh zet chuan ka ti a.

"Kei deuhin, mahse, harsatna kan tawk dawn tih hria la aw" a rawn tih chuan a ngaihna hre lo tak hian ka ni húih a. "Eng harsatna maw?" ka ti vat. A ngawih dat hnuah, "Ka nu hi a hel laklawh a. 'Criminal makpa neih ka duh lo. Insum thei lo lutuk mipa chu engtin nge ka pawm theih ang?" a tia..ka rilru a hah e" a rawn tih chuan ka ner sawk. Doctori tan chuan ka tling tawk ta lo a nih hmel e. A thlirna zawn atanga ka thlir chuan dik ka tiin ka dem hran lo. Mahse, Sangkimi ka neihna daltu atan chuan ka phal lo. Hneh hun ka la nei tho ang. Ka beisei tlat a ni, ka kal ta sa sa a, hawikira let leh thei ka ni tawh lo. 

Motor pawh chu a tlang ve thei ta hram a. Thim hnuah in kan thleng chauh. Ka u in min lo hmuak a, bawr zetin kan inak chho a. Min betu neuh neuh an awm reng a, a ninawm lek lek zawk. In kan thlen chuan ril a tam tawh bawk a, zanriah kan ei zui nghal. 'I ráwp awm sia ka tia, hotel ami vawksa plate ka zuk lei ringawt alawm. Vawk talh an awm si lo va" ka u chuan a ti a. A sawi dik, ráwp tak ka ni. Ka lim ta nghek a. Chaw eikhama zial ka han zuk leh vang vang hnuah phei chuan ngaih hi a ngam suai suai a ni ber e. Valtea hmel ka han hmu leh thei ta te chu a nuam veng veng nia mawle. An nu pawh a lo rai lian ve tawh hle a, Amah Diki a nu tê lo bawk a, rai chu a inhmeh phian. An leng ve ta reng a, thian dangte erawh Thingfalah inhlawhin an lo kal leh daih a lo nia. An ngaihawm tehlul nen. 

Jail-a ka tan chhunga ka thil tawn chi hrang hrangte chu ka'n sawi ve a, ngaihnawm an tih hmel viau. Valtea chuan, "Chuan, Sangkimi chu naktukah maw lo hawn a tum?" a ti a. Ka bu nghut. 

"Peka te lah an lo inru ve kawisawi sia, Ruthi pa a sat teh kha. Peka kha a lo ngaina tehchiam bik lo a nih hmel" a ti a, a nui ruh ruh bawk. 

"Chuan, an hruai haw tawh em ni?" ka ti a. 

"Hruai daih tawh e, mahse, an inneihtir ka ring. An inru mualpho ve tawh si a" a ti mai a. Nia, innei teh se. Nupui te nei se a hnawksak lo deuh mahna. 

"Thi têp angte khan an han sawi vel a, duh aiin i khawih na lo mah mah ka tia, i khawih tak rau rauah chuan..A tam zawk hi chuan, 'A va chawh ve, Peka chu, a chapo man a hmu ve a nih chu' an ti hmiah zel mawle. Sangkimi nen in inkara a tlakzeh dan zawng zawngte kha hre phei se la chuan an hnawtchhuak duh hial maithei a ni" a ti nghut nghut a. A hunah hi chuan khaw in lungrual tak kan ni ve rêng a ni. An hawn chhoh hnuah tuilumin fai takin ka inbual a, ka zàng vah mai. Mut pawh a la chhuak lem lo. Mahse, ka mu ta tho va. Sangkimi nen kan intext. A hnute lehlam kha a bawk an paihsak nghal a, cancer intanna chu a lo nih hmel. Doctor te chuan cancer zungzam awm zawng zawng an paih fai vek thu an sawi a, a lawmawm mang e. 

"Buaina deuh ka nei a" a rawn tih chuan, "Ih maw, innei theiin innei ta ila, naute te pawh kan nei ve ngei ang a, engtin nge hnute ka pek ang?" a rawn ti. A ngaihtuah danah chuan a awm ve rêng bawk a. 

"Hnute tui kher lo pek tur a tam lutuk. Lungngai lo la" ka va ti a. 

"Ka nu mawlh mai hi" a rawn ti leh. Rilru tihzangkhai nan, "A hma kha chuan Ànu kha i ti thin sia, tunah ka nu..i va puitling tawh ve" ka va ti a. 

"Ka pain min hrilh alawm, 'Min koh chuan i duh duh danin min ko thei, mi bulah min sawiin Ka nu ka pa tih zel tur' a tia. Ka zir ve ta a nih hi" a rawn ti a. Pa Ruatpuia hmel nelawm leh dam thlup mai ka hrechhuak nghal. 

"I pa chuan kan chungchang engmah a sawi ve lo em ni?" ka ti a. 

"Sawi ve lo. Ani hi chuan a hrethiam che a ni maithei" a ti a. Lawm ruknain min tuam nghal. Dar 11 pelhah kan inmangtha ta chauh a. Kei pawh phone khawih chhunzawm tawh loin ka muhil zui ve ta nghal. 

A tukah chuan awm hahdam pahin ka thawmhnaw ho ka su a. Ka la chhuak peih vak lo. Ka nu chu a hnatlang a, ka u erawh a ngaitein school a kal. Dawr pawh naktuk atanga nghah mai ka tum deuh. Ka pute pawh ka hrilh sa vek tawh a,. Lehlamah an tan pawh ka hlut vena chu engkimah ka tihzangkhai phah ve em em a , ka bel tawhin buaina ka nei lem lo nen. Mahni infakna lam ni lo se, sumah lah ka rinawm ve em em a, chheprelh engilo ka nei ngai lo te chu an tan chuan a lawmawm ve dawn êm a ni. Damtea ka awma ka tluan ve deuh chuan kum thar lamah chuan mahnia inrelbawl te pawh ka sawi ri ve ang ka ti deuh. Mahse, ka chák deuh erawh Restaurant changkang ve pangngai siam a ni daih. Ka nuin ei siam a thiam si, chhawr tur chu an awm nual dawn tih a lang reng bawk.

Sangkimi nen kan inbe zeuh zeuh a, A u nen an lo haw dun a niawm e. Rin aiin an rawn kal sàwt a, khua pawh an rawn lut hma angreng. Zan lama inhmu turin kan intiam ta a. Ka hmuh chak tawhzia hi sawi ngaihna pawh ka hre lo. Ka nute pawh an lo bang a, a eirawngbawl ka pui ve a, Jail-ah khan Chunga vang liau liauin vanneihna ka dawng ti mai ang, thla khat ka tan hnu khan chokoah min thawhtir ve ta mai a. Eisiam lam chu ka thiam ta viau. Amaherawhchu, a siam tur kha a tlem hrim a, Alu leh dailuah a nih loh chuan bekang sà a ni leh tlawng a. Alu ka fry a, ka nu chuan mak min ti deuh tih ka hria. Ka faifuk rút rút a. Ka hlimin ka phur súrh bawk. Ka u pawh rawn haw vein a intihfai zawhah zanriah chu kan ei ta a. Chaw ei a tui a, ka pum lamin a tuar loh ka hlauh avangin pum damdawi ei ngei ka duh. Eikhamah pawh thleng seng leh hmunphiahte chu ka pui vek a. Thleng erawh ka sil lo. Ka uin, "Mama chu i jail tang chu kan hlawkpui hle mai a. I che súrh súrh mai a" a ti fiamthu hlut a. Ka nuih a za hle. Leng tur chuan ka insiam zui nghal a. Ka nuin, "La inlar tam vak lo mah la a pawi lo asin le" a ti a. 

"Sangkimi a rawn haw sia, ka hmu chak tawh em mai" ka ti hmiah. Keimahin ka bialnu te in lam chu ka pan ta vang vang a. An lo ei kham ve tawh a, thingpui háng an lo in mek. Sangkimi chuan a lu a lo la tuam a, a inbualna a la rei lo a ni maithei. Zum angreng deuhin ka thu a, Doctori chu ka zah thar thut a ni ber e. Pa Ruatpuia zawk chuan, "Ekhai! I hmel kan hmu leh thei ta maw? I zuk dam tha em?" a ti luam a. Tha takin ka chhang ve mai. Sawmpuia erawh a pindan atanga rawn chhuakin, "Ka leng lawk dawn" tih leh chhuah a rual a. Sangkimi chuan, "Hmelhriat a la neih awm pawh ka hre si lo va, tu nge maw a rim dawn ni?" a ti sap a. 

Chhan ka tum lai takin Dr. Saidingpuii chuan, "Tluanga, i la rawn leng ngam hi a mak ka ti! Khatiang khawpa mualpho leh hmingchhia khan i awm tawh a, Mi zawng zawngin ka fanu vanga Peka kha i khawih angah an ngai bawk. Buaina a awm ve apianga ka fanu hming lo ri ve sek pawh hi ka kham zozai tawh. Nang chu i inthunun theih loh vanga thiam loh chang, tual hial thar hreh lo i ni tlat mai a. Chuvang chuan ka fanu hi chu engti kawng mahin i nei thei lo vang. A tirah pawh khan ka rilru a hel tawh sa a, Mateii leh a pa vangin ka inbengdai tawh zawk a. Zu pawh i in leh lovang tih kan sawi thei lo. Tin, Mateii a hrisel lo a, i hria. In khawsak dinhmun ka hmuhsitna ni loin rethei taka a hun hmang turin ka phal lo. Min hrethiam la, rawn lang tawh lo la a lawmawm viau ang" a ti fiak ta thak thak mai le..Ka zak a, ka tlawm ngawih ngawih mai. Sawi tur ka hre hlawl lo. Sangkimi chuan, "Nuuu, i ti mah mah lo maw?" a lo ti hlar a. 

"Ti mah mah lo. Thingtlanga i damchhung hun hmang tur leh eizawnna mumal pawh nei lo bulah chuan ka kaltir dawn lo che. I duh leh i lengtar thei ang" a ti hmiah mai. 

Pa Ruatpuia'n a aw a thian kharh a, "Saiding, i kal thui mah mah e. Kan fanu bawrhsawm tak hmangaiha tuam hlawm duh hi zah ve deuh hlek rawh. Thingtlang tlangval tho ka ni e kei pawh. Peka chungchangah pawh Mateii laka a chetdan kha ngaihtuah let teh, Tluanga tan insum zawh rual em ni? Fim takin thil ngaihtuah rawh" a ti hriam ta hraih a. Kei erawh ka hrilhhai em avangin ka ding a, "Ka pi, i fanu neih tlak tur khawp hian ka bei ang. I rilru i la thlak leh ngei ang, ka beisei.." ka ti nghet charh a. Ka chhuak nal nal. Sangkimi tap hawk ri chuan ka beng verh hle mah se; ka hawi let lo vang. Dr. Saidingpuii makpa nih tling tur hian ka bei dawn a ni. Ka thawhrim a ngai dawn hle tih ka hai lo. A pawi chai hleinem. In ka thlen chuan ka chau ráwih mai. Ka mood chhe lutuk chu thup ka tum hram hram a, min chík bik lo nge an hrethiam lo niin ka hria. Ka mu ta hmak a. Ngaihtuahna tam tak ka nei a, duhthu pawh ka sam nasa e. Ka duhthusam tihlawhtling tur chuan rim taka ka thawh a ngai..Ka hmangaih ka bialnu hringtunuin min tawngkhumna kha tlawm nan hman ka tum lo. Sang taka invawrh ka tum zawk a ni. Sangkimi chu biak pawh ka tum lo. 

A tuk atangin dawr pawh ka nghak chho leh ta a, jail tàng chhuak hmuhin min hmu vak hlawm lo va, pangngai takin min be zel a, ka lawm takzet a ni. Ka pu pawh ka titi pui tawh a, Dawr hawn thar ve ka tum chungchangte pawh chu min lo tuipui viau mai a. 

"Dawr nghak tur fel tak kan hmuh veleh i dawr hawnna tur khawp chu a púng awm loin ka puktir ang che. Ni e, mahnia sumdawnna bultan hi a pawimawh takzet tawh tunlaiah. " a ti chuar chuar a, ka va lawm ber tak êm. Ka nuin eng emaw zatin min pui thei bawk ang a. An dawr nghaktu tur fel tak chu ka zawnsak chho tan ta nghal a. Tlema harsa ve deuh, mahse, lehkhathiam ve pangngai ni thei se ka duhpui a. Kan khaw hmawr atangin rilruin in tin ka lut lawr chho ta a. Ka duh ang ka hmu mai thei si lo. Ka dap zel ka dap zel a, kan veng chhoah chuan han ti awm mi ka hre lo. Hermon lamah ka tuan chho leh a, Dinmawia ka hrechhuak ta hlauh mai le. Ani hi chhungkaw harsatna vanga zir zawm thei tawh lo a ni a. BA chu a chhuak ve a, an veng naupangho tuition a pe thin. Chu chu an ei bêl ve ber a ni awm e ti ila a pa hi pa taima tak a ni a, hmarcha hmunte siamin an hralh hnem ve thei riau zel a, Dinmawia hi tangval fel leh ruihhloa fihlim, Kohhranah pawh inhmang tak a ni. A pa leh a u hmeichhia leh a nau mipa te nen an khawsa ve a, a nu hi an tet laiin a boral tawh a ni. A u Mali pawh Hotelah a inhlawh ve thin a. An naupang ber erawh zirna an chhunzawmtir ve zel thung. Dinmawia chu a biak pawh theihna number ka zawng ta nghal a. Ka hmu ta vat mai. 

Zanah ka call ta a. Naupang a la zirtir laklawh avangin an zir zawhah ka call leh ta a. Dawr vel chu ka sawi a, chhun lamah hian a pa nen an feh thin a, ram hnathawh ai chuan dawra thawha thla bi hlawh neih kha a tan pawh a ziaawm zawk daih dawn a, a pa te a lo ràwn tur thu sawiin kan dah ta rih a. Sangkimi call ka dawng zui zat, "Tluang, a hrehawm..ka nu hi ka hua" a rawn ti tawl mai a. 

"Ekhai! Duatpui, mahni hringtunu te khatin an ti ngai lo..engkim a tha leh vek mai ang" ka ti a. 

"Chulam a ni lo, Aizawla a thiannu fapa nen min sawirem phèt a tum alawm. Chu pa chu zin tur ten a chah kual vel a, ka pa pawh a thinrim lutuk" a ti ta mai a. Ka khur deuh. 

"Tu nge chu pa chu?" ka ti vat a. 

"Danny a nia..kan tleirawl lai atangin min duh tawh. A kawmte pawh kan inkawmngeih ve thin..mahse, kei chuan unau ang deuhthawin ka en a,." a ti mawlh mawlh a. 

"I nu hian ka chungchang thu dik tawk lote hi a hre zawk em mawni dawn le? " ka ti ringawt. 

"Ka hre lo, a mak lutuk. Hetia ka dam that ve tak deuh hnu hian a danglam ka ti mai. A thu lah a duh si, a luhlul si. " a ti ve mai a. 

"Engpawhnise, Inenkawl tha la, kei pawh theihtawpin ka tang dawn alawm.. I nu rilru hi kan la thlaksak thei em em ang. Lungngai lo phawt ang aw" tiin ka fuih ve ngial a. 

"Ka ngai che e. Inhmuh ka chak" a rawn tih chuan, an ina ka lenluh a rem tawh si loh avangin, "A ruka kan inhmuh a ngai tawh dawn a..engtin nge niang aw" ka ti a. 

"Tihdan ka hria, Zanah chuan ka chhuak thei dawn lo sa a, naktukah dawrah rawn kal hram ka lo tum ang. Keimahin" a ti ta sar sar a. Hmeichhia hi an duhnaah chuan an huaisen thei viau mai. Amah zawkin a ngam phawt chuan kei chuan lawm takin ka lo dawngsawng ngei ang. A tuk nghakhlel takin ka mu ta a. 

A tukah ka pu chu DInmawia chungchangte chu ka'n sawipui leh a, U muana paw'n a lo khawngaih viau mai a. Dinmawia ten thutlukna an siam dan azirin keiman ka enpui dawn a ni. Sangkimi msg ka dawng a, "Ka lo chhuak dawn chiah e" tih a ni. Ka han intuai mam thuak thuak a, ka thu lutuk pawh kha a zia ta deuh. Pum damdawite ka ei tan ta bawk nen. Customer awm loh lai takin Sangkimi chu a rawn lut ta zân zân mai..ka lo thlir ngawih ngawih a, a hmaa a cher lutuk kha a zia chho ve tawh a, mawngtam te pawh a nei ve leh tan. Kekawr loose hek hawk a chawn thleng vel a buang a ha a, chapal kaih a kesir no zet leh a kethiah mawi zet tilangsar thei tur a bun thlep thlep bawk. Kawr dum body fit zaih a ha bawk a, a sam chu sang takah a tawn kawh vah. A va nalh chungchuang êm..

Mi reh lai tak a ni bawk a, ka bulah rawn thuin , "Min ngai ve lo si" a ti sap a. A banah ka lo vuan vat, "Ka ngaih loh che chuan ka á tawh a niang" ka ti ve sup a. Ka fawh chák tawh êm avangin ka lamah pawt hnaiin ka fawp ta a. "Mi an lo kal ang. A tawk" tiin min namlet a. Ka tum lui bik lo. A nu chungchang sawi ka remti rih lo, kan hunawl remchang chu kan pahnih pual atan chauh hman ka duh a ni. Chutia hlim leh inthlahhlel tawn taka thu ho mai mai kan sawi lai chuan, Dr. Saidingpuii a rawn lut ta mai a! Mitmeng de sawr sawr chung hian a fanu bulah chuan, "Rinsangkim, rawn haw vat rawh. He pa hi i hmu leh a nih ngat chuan, i nu hian ka nasatzia ka hmuhtir ngei ang che" a ti vawt raih mai…