Rinsangkimi 8

RINSANGKIMI (8)

Ziaktu : Toni Râlte

Ka call duh ta lem lo. Ka hriat tur a awm a nih chuan min hrilh tur a ni. Min then chhan takngial pawh hre loin engkimah block ka ni nghal vek a, Ka mihring huat ber Peka nen min runluih zui zat a. Tuna awmze neihtir tum leh vel kha a ho tlat tawh. Ka tan pawh a harsa ve tho..hmangaihte hi chu kan tina thei lo. Min hmangaih lo a, min tina a ni mai. Chutiang rilru ka put tak vang nge runluih te chu ka chak ve ta ut ut a. Baby min wishna chu chhang letin, "Ni ve tawh mai ang hmiang" ka va ti tel a.

A hnu lawkah , "I ti tak tak em?" a rawn ti. 

"Yes" ka va ti leh a. 

"I ex runluih nan min hman i tum tiraw?" a rawn ti leh. Ka rilru a buai deuh, "Tak taka Baby, ka la move on tak tak thei lo va, min duh ve anih chuan ka inpeih hun min nghak ta che" ka ti ta a. Rinsangkimi theihnghilh nana Baby-i ngaihzawn chu ka duh lo, nakinah tihnat hunte ka la neih takin. Single hian ka tuar leh rih phawt mai a niang chu. Baby pawn min hrethiam takin, "Ka hrethiam che alawm..ka nghak thei che" a rawn ti. Fel ka ti reuh. 

Baby nena sunday inkhawma kan thlalak dun ve chu statusah ka hmang zui zat a. "Mifelnu leh min hrethiamtu" ka ti leh kher..Viewer hmasa ber chu Rinsangkimi a ni. Status a up em tih ka en nghal a, a up lo. Mahse, chaw ka ei khama ka en leh chuan, "Ka tawngtaipui reng ang" tih a lo hmang. Tu a sawina ni tak ang maw?! Rilru nuam vak lo chuan dawr chu ka nghak a, ka vai thiante pawh an rawn lang leh ta. A case-in an nei leh a, mahse, pawisa ka ui ve deuh tawh a, ka dil tlawm a, um 5 ka laksak hram. Lehlamah ka batsak changte pawh a awm a, min ringtawk ve ni fahmiang ka ti mai, min pe ve zel mai. Ka rilru a ipik deuh avangin chawhnu dar 2 velah dawr hnungah ka va in ta hmiah a. Chhun tuk hi chu a lehpek zel a ngai thin a, ka ti vak ngai lo a nia. Mahse, Sangkimi vangin ka in leh a nih ber chu. 

Ka lu lam a kai tan ta bawk a, min dawrtute lakah ka lo polite hiam hiam hle. An hrethiam vekin ka ring. Tlai dar 4 velah Sangkimi leh a nu an rawn lang ta mai a! Kei ka lo no 3 der tawh si, ka meng sí sep tawhin ka ring. Ka rim erawh whisky a ni bawk a, a nam em emin ka ring lo. Doctori chuan, "Tluanga, hei ka list ho hi min lo lak khawmsak ta che" tiin lehkha min pe a. Ka lam khawmsak ta zung zung a. Doctori chu a phone a rik avangin dawr kawtah chhuakin a va be ta daih a. Ka ruih deuh tawh avangin Sangkimi bulah chuan ka lai hran lo. Ani erawh a ding zúm zút a, a kut a hmalamah a suih thán bawk. Naupang fel deuh a ang tawp. Ka lak khawm zawh chuan a bag-ah a khung mawlh mawlh a. "Sangkim, i dam tha em?" ka ti nghut a. Min rawn melh zawk a, ner sak chungin, "I rim chu leh!" a ti sep a. Kan inhnaih deuh nen a lo hria a nih hmel. 

"A ho eee..single tan chuan zu ruih hi a nuam ber" ka lo tih khum sak a. A ngui rawih niin ka hria. 

"Mawh, i dam lo em ni?" ka ti leh a. 

"Ka dam hi..dam lo ila; ka kal thei dawn mi?" a ti vin ve hlar a, ka nuih a za deuh. "peka nge zei keimah" ka ti zauh a, min melh no lo khawp mai. 

"In zei lo ve ve..Chuan, bialnu pawh i nei chhe lo khawp mai" a ti a. Ka status kha a sawi chhan tih ka hre mai. 

"Ka bialnu a la ni chiah lo, mahse, nihtir ka tum" ka ti nghet charh a, ka melh ran bawk. Nui hmel pu chung hian, "A tha lawm, hlimna hi a tha ber" a ti sap a. A nu a rawn luh tak avangin kan ngawi zui daih. A man min pe a, Dr. Saidingi chuan, "Tluanga, zu i in nasa hle a niawm a. A tha lo a nia, in tawh suh aw" a ti a. 

Nui hul hakin, "Nia..in tawh lo têp ang" ka ti sup. Min chhuahsan ta a. Ka ruak huai mai. Sangkimi hi ka lo la haw tak tak miah lo tih ka hrechhuak nghal. Hetiang taka hmangaihtu a tina hi nakinah a inchhir ve ang em le? 

Tlaia ka haw chu ka nuin, "Mama, Ka u boral thu ka hre chiah. Engtin nge mawni dawn le?" thlabar hmel tak hian a lo ti a. 

"A va zia lo ve..engtin nge niang? Ka u nen zuk kal ula" ka ti a. Dawr bakah in nghaktu neih loh hrim hrim kha a tha chiah si lo va, kei talin in ka lo nghah kha a tha. Ka nu pawh chuan, "Ni e, an lumen dawn a. Kan zuk nang hman tho ang. I pu ka bia a, an motorin min hruai thei dawn a, a zia khawp mai" a ti sawk sawk a. Ka nu te hi unau pali an ni a, tuna boral hi an upa ber a ni. A dawt chiah hi ka nu a ni a, ka nu nauteah mipa leh hmeichhia an la awm bawk. Ka pu chu vawi hnih chiah ka la hmu. Zep nak emaw sawi leh sawi hnu Tlabungah daih an awm avangin kan inpawh tehchiam lo va, keini lah han zin dawnin hun kan nei vak bik si lo. Phone atanga inbiak a ni deuh tlawng mai. Ka nute pawh chuan zanriah an bar sawk sawk a, an insiam nghal. Ka u pawn principal a lo be ve a, thihna thil a ni bawk a, a lo hrethiam khawp mai. Kei erawh ka inbual a, chaw pawh ei rih loin ka nute chu ka zuk thlah ve a, Ka pute driver Hminga'n a hruai dawn a ni. Kan invai liam hnuah ka chho leh ta hnak hnak a, mahni chauha awm chu khawharthlak dawn êma ka hriat avangin Romawia ka bia a, Valtea erawh an nu rainoin sangha a ei chak êm avangin zan len a deng dawn thung. Zanriah chu keimahtê chuan ka ei ta rek rek a. Ka puar ve tho mai. Thleng ka sil laiin Romawia te pawh an rawn kal ta a. Hriatpuia nen an ni. Zuala hi khuaah a awm leh tawh lo a ni maithei. Mamawii a birh deuh pawh a ni mahna. Hriatpuia chuan. ,"Ni engzat nge an cham dawn? I nute chu" a ti a. Ka lo zawt miah lo, ka hre hauh lo mai. "Ka hre lo, an awm ve deuh rih ang" ka ti ringawt a. 

"That chu an awm loh chhungin hetah nupui ka rawn ru dawn" a ti ta mai a. Kan mengphawk teh e. Bialnu a neih awm kan hre si lo. "Tu" Romawia nen kan ti rual thawt. A nuk hak a, "Tawipui North ami ka ex nen khan kan ni leh tawh a, inruk a rawt fo a, ka ru hmiah dawn" a ti a. A ex chu Muanzuali a ni. Engtin nge Muani hian a duh kan tihruk fo thin a nia. A chhan chu Muani chu a hmelthat bakah a fel a, Kohhranah pawh inhmang tak a ni. Kan Hriatpuia erawh a awm chuan lem ve thei mai, hmel erawh chhe bik lo a ni thung a, Kohhranah a inhmang lem lo bawk. 

"Ngati nge inruk a rawt a?" ka lo ti vat. 

"A chhungten min duh hek lo. A rilru a lian sia maw. Min zui duh tak tak ang" a ti a. 

Romawia'n " Umm, ruk hmiah tur..ho em mai. Buhfai thlak belh a ni mai" a lo ti liam puat. Kei erawh chuan inla thutak fahran hian, "A ni ngawt lo a nia aw. Hriatpui, hnathawh engmah i la nei lo va, inhlawhna awm anga la inhlawh ve ringawt i nia ka hmuhsitna che ni loin..Hetiang ringawt chuan engtin nge nupui fanau i chawm ang? Chaw nghei loh ringawt hi chawm zo a ni lo, Mizo society-ah tuman thenawmte chaw kan ngheitir duh lo. Mahse, tunlaiah thiamna a sang zel a, fate pawh nei ula, School thaah luhtir in duh dawn. Rualawt tura fa neihte hi chawm zo lo tihnaah ka ngai kei chu" ka ti ta duah a.

Mak tih hmel deuha min melhin, "I va sermon tha reuh ve. A dik alawm tak tak a, mahse, amah zawk hian min duh ve êm a..ka khawngaih tawh mawle" a ti ve mual mual a. 

"Khalam kha chu i thu thu aw. Kan ina rawn luhpui i duh pawn hnialna ka nei hran lo" ka ti hnuhnawh a. Ka thil thuhrúk ka va phawrh ta zâl zál a, an hlim hmel mawlh mai kha. Kan birh ta tlut tlut mai. Ka nu pawn a khat tawkin chanchin min rawn hrilh ve reng a, titi duhzawng a dang tan a. Kan pathum chauh pawn kan hlim ve kher mai. Sangkimi chungchang pawh kan sawi lo. Kan inah an riah ve tak ngawt kha..

Ka harh chuan dar 8 a lo ri vah tawh. Hmanhmawh zetin ka tho a, zu chuan min tibuai tan ta hle mai. Ka intihfai zawhah chaw ka bar puat puat a, tiffin siam leh vel kha ka peih lo a ni. Romawia te pawh an lo tho a, kan chhuk thla ho ta a. Ka nute nen pawh kan inbia, an thleng tawh a. "Chaw te kha i lo ei lo ringawt ang e, eirawng i bawl peih loh pawn i pute inah emaw i patea te inah emaw ei ang che" a rawn ti hram hram. Min ngaihtuah thei lutuk hi aw..nileng deuhthawin ka zawi. Pentawng zet hi chu aw..thil ei lah a har si..Baby pawh ka be tha peih meuh lo, chawhnuah a rawn phei ta nghe nghe a. A thu ve ta reng mai. Kawm tur lo awm na ná na chu ka intiharh ve thei ta deuh. Chutia kan inkawm tui lai tak chuan Sangkimi leh Nungi te hi tuikhur veng lam panin an rawn inphur phei a, Baby pawh chu an rawn hmu niin ka hria. An tlan liam hnuah Baby chuan, "I melh danah khan i la duh chiang" a ti sap a. Ka nui nghek ringawt. "Inzep duh suh" a a ti zel a. 

"Duhtir min tum zawk a ni lo maw?" ka ti ta khauh a. A hmel lah chu ka duh aiin a thutak. Nuam ka ti ta lo hle. "Baby, dik tak chuan ka lo duh ve êm a, kan inthen dan lah khati kha a nia. Ka tan chuan palliam mai a la har rih a, chuvang alawm nang pawh risk ka lakpui duh loh che. Tihnat che ka hlau alawm" ka ti ta mawlh mawlh a. Min rawn melh zawk a, "Ka hrethiam alawm..ka sawi ve mai mai a nih kha" chu a ti lawi a. A haw phei ve nghal. Rilruin Sangkimi te rawn phei leh lam chu ka chang ru tlat a, ka va ning tak. Min kam rún si. Darkar chanve hnu velah an rawn phei ta ngei, dawr katah a ding dat a, ka lo thlir reng. "Spicy 2x zawk kha pahnih aw" tiin pawisa min pe nghal. "Lo la mai ta che" ka ti sup a. A va la a, Nungi chuan, "Knor soup hi la tel ang. Tluang, Tomato a awm em?" a ti a. Ka lo kawhhmuh vat, Sangkimi chuan min rawn enin, "Tluanga, khawngaih takin zu in tawh suh. Kha i hmelah pawh a lang tawh" a ti ta a. Sawi mai tur ka haihchham deuh, "Nia. " ka ti ringawt. 

"Sualpuia tlakchhiatpui tlak ka ni lo. Keimah vanga zu in i ni tih ka hai lo. Khawngaihin in tawh suh, thian kan ni thei alawm" a ti dam thlap a. Nui hul hak chungin, "Ngawi teh, thian chu ni lo zawk teh ang. Min tihnatna te kha ka theihnghilh dawn si lo va" ka ti chang fak mai. 

A mitmeng chu chawp leh chilhin a hnual nghal rawih thei. Mahse, chutia keimah vanga hrehawm a ti hmel chu hmuh nuam ka tih bakah ka la tina ve thei tih ka hriatna chuan min tiphur tlat. Nungi chuan a rawn kai a, "Kal ang. Kha mimawlpa khan engtikahmah a hrethiam chuang lo vang" a ti nghat a. An chhuak tur chu ka auzui hram, "Hrilh ka nih loh chuan engtin nge ka hriatthiam ang?" ka ti a. Nungi chu a rawn lehhawi a, "Sangkimi hi maw.." a tih laiin, "Nungi, a tawk" Sangkimi'n a lo ti tuar. An tlan zui ta daih a. Ka rilru a nuam lo leh ta. Rinsangkimi mai mai chu eng nge maw ka rilru tibuai zawnga a khawsak tlat le..min thena min phatsan kha duhtawk ve mai awm. Hetia min la chhaih kual vel hi ka hne tan ta tlat. Bialnu neih ve ka ngai ta niin ka hre ta hial a. Mahse, nei tur tak tak anga ka han inngaihruat hian Sangkimi nen ka compare zel dawn tih ka hria a, an tan a nuam awm lo ka ti rilru thin. Kan inngaihzawn chhung reilotea min ngaihtuah thinzia, chaw ka ei tha em tihte, khawrh engzat nge ka ei tih thlenga a hre duh thin te, mut ka hmuh that loh changa a damdawi ei ang min eitir ve thin te, aa..engkimah khan min duat a, ka pangchang hman hle nghe nghe a nih kha. 

Ka nu te awm ta lo chu a khawharthlak tho rualin sual rawng ka lo bawl ve thung a. Zu ka in mawlh mawlh reng mai. Eirawng ka bawl peih si lo, Chaw ka ei chhuak peih bawk si lo, Noodles te ka chhum a, ka ei ta vel mai mai. A puar theih ve tho e. Ka nute bulah erawh chaw ei tha angin ka insawi tlat thung. In chintawk ka hre lo lutuk chu ka kulcho deuh titih ta a, chaw ei loh bawk nen. Valtea te nupa ka ko thla ta ngawt, damdawi ina chhoh chu ka duh lo va. Sangkimi te hmuhsit ka duh lo a ni ber. Vengthar ami Nu Hriati Health worker chu drip min khaisak turin an zu ngen ta ngawt a. Dawr pawh ka hawng thei ta lo. Ka pute pawh an zahawm ta khawp mai. Nu Hriati chuan min khaisak ta a, ka zia turah ngai ang. Valtea chuan ka muhil lai pic chu status-ah a lo hmang pek a, "Thianpa hi tawngtaipui ang u aw" tih nen. A va tul fahran lo tak. Mahse, ka tana engkim an nih avangin ka ngai haw duh lo. Baby pawh zanah a rawn chho ta hial a, "Chaw tlem tal ei rawh aw. Ka'n chhum ang e" tiin a va chhuang sawk sawk a. Valtea ten an chawhmeh an rawn la thla nual bawk. Drip zawh hun law law kan nghah laiin ka beisei loh lutukin Sangkimi leh Nungi an rawn lut ve ta phut mai. Thutthleng seiah ka mu kha a nia, Baby ka piah chiahah a thu bawk. Kan ni hú mai. Sangkimi chu ka ep chiahah a thu a, " Valtea status kan hmu a" a ti ringawt. Baby ka va melh a, ka khawngaih deuh. 

"Nia, a lo hmang ringawt a, ka tha reng" ka ti ve mai a. 

"Zu vang a ni tiraw?" tiin chiang zetin min rawn melh a. 

"Ka hre lo. A pawimawh em ni?" ka ti leh ngat. Drip khai chu a zo a, Baby chu melhin, "Chaw ei chu min siamsak la" ka ti sup. A tho nalh a, min va siamsak ta rak rak a, Sangkimi erawh ka melh duh lo lui tlat. Nungi leh Diki te chu an lo titi a, Nungi hi mil harsa ka la ti riau. 

Chaw chu ka ei tui vak lo nain ka ei lui ve deuh a, Kulcho ngawt mai chu a zahthlak ve deuh êm a ni. Ka ei khamah Baby chuan a tifel leh vek. Ka va thu phei ve leh a, "In fel hrim hrim e" ka ti hnuhnawh. Sangkimi erawh chuan chhuat lam a melh ran a. "Zu hi chu in tawh lo la ka va ti tak êm..khawngaihtakin" thaw hawk chungin a ti a. 

Ka nui lui a, "Ka in tawh lo têp..saw pawh sawn a phal lo a" tiin Baby ka kawk zauh a. Ni e, ka runluih..ka puitling tawk lo tih ka hria e. Ka ná ten min la kiansan si hleinem. Na tuar mitmengin min rawn melh a, "A lawmawm lutuk, ani vang pawh sawn nghei rawh. " a ti sap a. 

"Ni e, ani chuan min phatsan ve lo turah ngai ang aw" ka ti leh ngat. A aw a thian kharh a, a mittui a khap per sak lai chu ka va hmu hman, "Nung, chho tawh ila,." tiin Nungi a melh a, Nungi pawh a tho ve nghal. Kawngka thleng ka va thlah ve hram a. "Muttui u le.." ka tih chuan, Nungi zawkin, "Lo dam rawh. Muttui le" a ti a. Sangkimi erawh a rawn hawi let tawh lo. Kun chhal chungin a chho nal nal. An han kal leh tak siah chuan ka va ruak leh huai si em. Ka ning ka awmdan hi. Zu hi ka nghei ang. Engmah ka thatpui lo. Ruih chhungtêin min tithawvengin min tingaihsam a, hlêp a awm lo. Ka sim a ngai ta a nih hi. Keimaha min riahtir ngawt chu dikin an hre lo nge, Valtea chuan min riahpui ta a. Hriatpuia lah chuan nupui lah chu a rawn ru ta si lo. A tukah chuan dawr pawh ka nghak peih ve ta. Ka zu laksa chu tihral a ngai dawnin ka hria. In tawh loh ka tum si. Mahse, ka han en thin, "Hengho ka in zawhah ka nghei tawh ang " ka ti leh ta nge nge a. A mak khawp mai. Thenkhat sawi danin thisenah hian a inthlahchhawn ve theih an ti ve tlat. Ka pa khan zu a duh em em a, Pa a nih tawh hnu ngaihzawng a neih atang khan a in leh ta kha a nia, ka pa ka chhun nge zu chu ka duh riau mai si a, Rilru a hah. Mahse, chung ka neihsa ho ka in zawh chuan nghei chu ka tum ve khawp mai. Hmalam hun erawh hriat va ni suh. 

Kulcho la reh fel chiah lo chung chuan dawr chu ka'n nghak chho ve ta a, ka nute pawh min ngaihtuah vang nimaw vawiinah an rawn haw dawn a ni. Tlaia ka inkhar dawn laiin Baby a rawn phei a, "Zanah lo leng la" a ti a. 

"Ka lo tum dawn nia" ka ti ringawt. Baby hi a fel riau, Sangkimi ten min rawn kan pawh khan tha takin a lo dawngsawng a, ka bulah lah engmah a sawi lo bawk. Thík chu a thik tih ka hrereng, bakah kan awmdan hi inngaizawng tak tak kan la ni lo va, chutia thikthu tihchhiat vak theih pawh a ni lo. Ka haw chho a, in ka thlen hnu reivakloah ka nute pawh an rawn thleng ve a, rawng ka lo bawl ve bawk a, an ngaih a that hmel. Chaw erawh ka la ei tha thei vak lo. 

Ka pu chungchang vel chu ka zawt a. Ka nu chuan, "Kar khat vel kha awm nuam vak loin a lo awm a, damdawi in kal pawh ngai a ti lo va, mahse, a rawn zual ta thut sia, Damdawi in chu an panpui naa an chhan hman ta lo a nih kha. A fate an puitling tawh a, a zia phian. An nu lah hnathawh nei a nia, an harsa lem lo vang" a ti a. Thihna hi chu kan dang thei si lo va, kan tana ruat a ni miau si. Zu ka in nasat hnu hian thi thut tur ang te hian ka inngaihtuah fò mai. Zan khat phei chu hman kuma boral tawh U Marini , kan ngamtlak em em mai kha ka mumangah ka lo hmu a, "Tluanga, ka awmna chu a nuam asin. Lo kal ve ta che" tiin a kut hi a rawn phar chhuak a, amah ka ngai ve bawk nen, ka lo vuan ve vat a. Min kalpui a tum lai takin ka phone a rawn ri ta a, ka harh ta zawk mai. Khatahte khan lo kalpui ta ila ka thih ka ring. Mumang ring chi ka ni lo naa a mak ve êm a ni. Ngaihtuahna te hi a tawi tup mai a. Nileng hian awm nuam lo, na sawi ber tur awm si lo hian, luak a chhuak a, kan ni nghulh reng mai chu a nih hi. Zanah chuan Hriatpuia nen Baby kan rim a, a nute an lo awm lo hlauh. Kan inkawm thei ta viau e. Mahse, ka la bem chuang lo. Sawi tur a hria a, a bula awm a nuam. Khawhar a hnem fú, zu te hi ka'n nghei fel ve ang a, fim taka inngaihtuahin kan chungchang chu ka la ngaihtuah ang chu. Len erawh kan leng rei lo. In ka thlen hnu reivakloah Doctori call ka dawng ta tlat mai. Mak tiru deuh chungin bathlarah ka chhuahpui a. 

"Tluanga, i lo chho lawk mai dawn em ni le? Mateii a zual deuh a, a hmu duh che a" a rawn tih chuan ka sa chhuak vek thei. Ka khur titih thei hial, a zual deuh kha a ti mai a. A dam loh thu pawh ka hre lo reng reng. 

"Aw le, ka lo chho nghal e" tih leh chhuah ka rual a. Ka nute pawh ka hrilh hman lo. Chak zetin ka tlan chho ta a. Ka thin a phu dep dep mai. An ina ka chhoh dawn lai chuan Pa Ruatpuia'n min lo bia a, "Damdawi inah rawn tlang mai rawh aw" a rawn ti leh si avangin damdawi in lam chu ka pan ta nghal a. Pa Ruatpuia chuan min lo dawngsawng vat. Min luhpui ta nghal a. Sangkimi chu oxygen an lo híptir a, a lo mu bal mai. Nungi te chhungkua bakah nurse te pawh an kim thap. Doctori chuan a fanu kut chu a chelh ran a. Kan va luh chuan thutna min lo kian sap sap hlawm a. Ka thut rual rual chuan, "Sangkim, ka lo kal e. " tiin a kut chu lain ka humsak vawng vawng a. Ka va lainat tehlul êm. A rawn meng diar diar a, mitmeiin a nu chu oxygen chu phawi turin a hrilh a. An phawisak vat. Thei leh thei lo hian min rawn melh a, ka kut chu rawn hum lêtin a theihtawpa tangin a chawikang a, ka beisei loh lutukin a hnute dinglam chungah chuan ka kut chu a nghat ta mai a. A mittui luang chuan a lukham te chu a far val kulh kulh a. Thawk la hawkin, "Hnute ka nei tawh lo" a ti sep a. Ni dawn tak e, a cher êm avangin a hnute pawh a sáwngtêah ka lo ngai mai kha a nia. Hamhaih zeta ka melh tlawk tlawk lai chuan, "Ka fanu hi a hnutê a cancer a. Thla hmasa khan kan va zaitir a, Reitak kan inenkawl a ni. Tunah chuan cancer zungzam chu paih a ni tawh nain, a lehlam kha a rawn bawk leh tan niin kan hria a, ka fanu i thlah a ngaih nachhan tur chu tikhan i hrethiam ang tiraw?" Dr. Saidingpuii chuan a ti ta a. Reifê ka kun tlawk tlawk hnuah hnukulh teuhin, "Min hrilh la, i bulah ka awm zel mai tur.. Natna vang chuan inthen lo vang ka ti a ni lawm ni? Ti nge min hrilh loh? Mawh" tiin Sangkimi chu ka melh a. Ka chhungrilah min hnawh up uptu a awm. 

Sangkimi chuan chau aw deuh hian, "Nu, Tluanga hi a fala biak lawk ka duh a ni" a ti sap a. Awmve dangte chuan min chhuahsan ta dial a. Min rawn melh ngawih ngawihin, "Natna vang a ni lo, kan inthen kha. Thildang a awm tel vang a ni. Tluanga, chumi ka sawi hma chuan zu hi i nghei ang tih min tiam rawh. Khawngaihtakin" a ti ngawih ngawih a. Chuti taka min ngenna chu zahawm ka tih bakah min la hmangaih reng tih ka hriatna chuan zu chu min huattir dawn ta mai. Hmangaihna chakzia hi chu aw. 

"Aw..ka nghei ang, naktuk atangin far khat mah ka in tawh lovang" ka ti nghet charh a. A khi sak mai. A la nuimawi reng asin le. 

"Umn ka lawm e. Ka lawm lutuk, Kan inhriat tirha Tluanga kha ni leh rawh aw. Chuan, ni e, Silchara in zin lai khan incheck up turin Christian Hospital, Serkawnah ka nu nen kan va kal a. Test hrang hrangte kan neih hnuah Aizawl min refer ta a. Ka ngaih a tha tawh lo nghal. A hma khan i hlauhthawn ka hlauh avangin ka sawi duh lo va, ka hnute hnuai lamah hian bàwk a awm a, a na lem lo bawk a, ka nute pawh ka hrilhna a la rei lo, ka hrilh takah chuan a lo ngai serious viau mai a. Tikhan kan va kal ta chúk chúk a nih kha. Lunglei atanga kan hawn zanah ka nute chu damdawi inah emergency avangin an chhuk a, keimaha ka awm laiin Peka a rawn lut ta a. Chhuak tura ka tih pawn a duh si lo. Ka nute lah an rei si. Ganja min zuk khum a, kei ka thawhah a zual ta a. Ka khuh bawrh bawrh bawk, ka khawng leh mai dawna ka hriat avangin ka nute bula chhuk tumin ka ding a. Mahse, Peka chuan min namthu hnawk a, min bawhbet ta mai a. Ka au thei si lo, ka aw a chhuak thei lo a ni ber, ka thaw a hah êm avangin inhaler ka mamawh thu ka sawi hram, mahse, ka ka a la rawn hup zui a. Nikhua ka hre lo ta a ni. Ka harh chuan ka nuten min lo buaipui mek a, Peka chungchang erawh ka la sawi duh lo, ka pa thinrimin a that duh mai dawn si a. A tukah Peka chuan msg dengkhawng tak min rawn thawnin, " I virgin ka hawng tawh e. Ka ta i ni tawh. Tin, HIV ka positive a, i kai ve bawk ang. Tikhan tumah midang i ngaizawng thei tawh lo" a rawn ti ta a. Ka buai leh ta vek mai. Na ka tiin awmngaihna reng reng ka hre ta lo va, ka nu ka hrilh ta nge nge a. Nikhua ka hriat loh lai khan min lo sual a ni ngei ang. Mahse, na engmah ka nei lo. Virgin hawnte chu ná an ti thin sia. Ka pa phei chu ka nuin a hrilh ngam lawk lo, ka tuar ta tlawk tlawk a, A hmasa berah nangmah ka ngaihtuah che. Peka sawi kha thudik a nih ngai chuan virgin tawh lo, cancer nia rinhlelh leh Hiv + chu i tan ngaihzawn tlak ka ni ta lo tih hriain tikhan engkim ka rawn titawp ta mai a nih kha..

(A hah deuh vangin a'n chawl te tê a, tui ka intir bawk. A sawi zawm leh a.)

Ka nu nen inentir tur chuan Aizawl chu kan pan ta a, nang pawh i lo haw tawh kha. I lo hawn zana ka mittui tla kha nang ka khawngaih vang che a nia sin. Min hua la, min bansan hlen la ka duh avangin Peka kawp ang khan ka awm ta mai a nih kha, mahse, vawikhatmah kan infàwp lo. Aizawl kan va thlen chuan Biopsy an la nghal a, rin ang ngeiin ka hnutê chu a lo cancer ta a ni. Mahse, kan inentir hma avangin a zungzam a lo la tai darh nasa hman lo hlauh a, min zai nghal ta chúk chúk a ni. Ka hnute chu an paih ta a, Chemotherapy te pawh ka la bawk. Tikhan ka cham ta reng a nih kha. Englaimahin nang chu ka theihnghilh ngai lo che. Tin, Ka nuin Peka thilsawi kha a rinhlelh tlat avangin leh ka thisen an test khan ka positive si loh avangin medical exam min neihtir a, ka lo la thianghlim pial mai a. Ka lawmzia chu aw..nangmah bawk ka hrechhuak leh che. Mi ka atangin zu i in nasat thu te ka lo hre ve a, tihtheih ka la neih tak mialin tiin ka pite remti vak lo chung ka rawn haw lui a, ni e, i hmel ka hmuha ka rilru natzia kha. Zu in i taksa a tihchhiatzia te ka hmuh khan ka inthiam loin ka inchhir ta ngawih ngawih a. Mahse, ka hmangaih vang chea ti ka ni asin. Khatihlaia ka dinhmun kha a khirh êm a ni. Tunah chuan ngaihzawn tlak ka ni tawh lo va, thiantha chauh tal zawng kan la ni thei ang tiraw?" Tiin..

Ka mittui ka khap per sak sak mai. A chal ka va dawm a, "Ka duat, keimah kha ka la ni reng alawm. Nangmah hmangaihtu kha ka la ni rêng. Bul kan tan leh ang a, i dam reng bawk ang" ka ti mawlh mawlh a. A mittui a rawn luang nghal..

"Aih, hei tunah pawh ka that loh hi, hetiang chu tuman mo atan pawh an duh lovang. Ka tina che a, ka phutawk ka hmu a nih hi..thian bak ka phut ngam lo" a ti sêp sep a. 

"A teuh lo, ka bialnu i ni dawn. Thian nih ai chuan hmelma nih pawh ka duh zawk. Ka nei ngei bawk ang che. Beidawng suh, i dam leh dawn" ka ti nghet charh a. 

"Bialnu chu tha deuh i neih kha" a ti leh a. 

Ka nui suk a, "A tak a ni lo. Kan inngaizawng hleinem" ka ti nghut. 

"Ngaihdan ka siam thiam lo, ka nu leh pate thu thu a ni e" a ti ta a. 

"Ka bia ang, i nu leh pate pawh. Chuan, Aizawlah va inentir leh phawt ula, dam takin rawn haw ang che. Kalpui dawn chein mi hnuaia inhlawh ve mai ka ni sia..enkawl che chu ka chak lutuk" ka ti duah a. 

"A ngai lo, keimah vanga i buai ka duh lo. Ka ziaawm deuh hunah Aizawlah chuan kan kal ang. " a ti a. Doctori te nupa an rawn lut ta a. Kan bulah an rawn thu ve, "Ka pi, Sangkimi hi neih ka duh a ni. " ka lo ti tawl mai. Min melh ren rawn a, Dr. Saidingpuii chuan, "Tluanga, mipa tha tak i ni tih ka hria. Mahse, kan fanu hi neih tlak niin a lang tawh lo. Mi dang tana phurrit ni ringawt tur chuan kan kaltir thei lo a ni" a ti ta a. A sawi àwm tak pawh a ni ve a. 

"Ka tan phurrit a ni lo. Chuan a dam leh dawn, ka chiang. A dam veleh min neihtir rawh u, khawngaihin" ka ti leh hmiah. Hmangaihnaah chuan zahna hi lakbo ang a ni thin. Pa Ruatpuia a rawn tawng ve ta a, "Mateii hi chu kan bulah awm reng se, keimahni ngeiin enkawl ila ka duh ber a. Amaherawhchu, Tluanga,i zahawm ka ti khawp mai. Kan fanu hetiang taka i lo hmangaih hi. Kei chuan Mateii duhthlannah ka dah e. A ni lawm ni? Mateii nu" tiin an nu a melh a. Doctori pawh chuan, "Pa berin i tihte chu kan hnial ngam nang" a ti sap a. Sangkimi kan melh ta thap a, "Ih, ka hrethiam lo. Inneih chu ka hmanhmawh lo. Mahse, Tluanga hi kei pawn ka hmangaih êm a ni" a ti ve ta tawp a. Kha lai damdawi in kha Sangkimi nen bul kan tan thar lehna a ni ta. 

Ka hawnsan ta phawt a. Mahse, tihtur ka la nei. Peka lakah tihtur hmabak ka la nei tlat. Ka ti lo a nih chuan engtikahmah ka rilru a nuam dawn lo. A hun atan naktuk zan ka intiam nghe nghe. Kan khaw nula ho a chhaikual reng pawh hi ka mit a kham tawh. Ka hmangaih Sangkimi nena dáwt thu hmanga min pawt thentu, na theihtawpa min siamtu Vanlalpeka hi a phutawk hremna ka pe lo a nih chuan Zothantluanga ka ni lo vang. A tuk atanga zu nghei ka tum tak avangin ka zu kawlsa te pawh tihral dan ngaihtuah a ngai dawn a ni. Han paih ngawt chu a man a to ve sia, ka phal chiah si lo. A in mite hnenah tlawm te tea leitir mai ka rilruk ta a. Zan dang zawng aiin ka mutui e. 

A tukah dawr nghah pahin ka zu kawlsa hralhna tur chu ka zawng ta a. Thiante ho ka be kual ta zung zung, an lo lawm tumhrang a. Valtea tan pakhat erawh ka dah. Ani chu a pekin ka pe ang. Vengthlang ami Pu Lawmkima a rawn leng reng a, ani hi kar hmasa khan a ke ruh a tipelh a, hna a thawk thei rih lo a ni. 

"Tluanga, kan khaw tlangval hi in lo fel ka ti mang e. Khi Nurse Rengpuii fapa Peka an tia mi..kha khan kan khaw nula a duh duh hi a phur kual a, nula ho lah hian a lo hausa deuh nge an lo pák ve huam zel bawk nen, amah a chapoin a uangthuang roh si a, kan tlangval lai kha chu nise kei ka bin zak zak tawhin a nia ka rin ni" a ti chuar chuar a, a vaihlo zial chu a pak talh talh a. Khuva a thial pah bawk. 

"A ni ngawt mai tiraw? Kei pawh ka mit khamna a rei tawh khawp asin. Mahse, kan nula ten an duh ber a hnu, lo tihbuai kha kan hreh tlang a ni ber ang chu" ka ti ve mai a. 

"A nu pawh khi Mualcheng ami Hunropuia nen khan an sawi ve deuh kha. Ropuia pawh a awm deuh reng khi, a luhkhung nge mawni dawn ni" a ti leh a. Ka lo ngaihven loh lam tak a ni. A leng ve ta reng a, Nu Rami te chanchinte kan sawi kai a. 

"Ngawi teh, a pasal hmasa nen an inthen chhan pawh a uire vang a nia. I pa nen an inneih lai pawh khan zep nàk emaw sawi ta mai mai ila; Minpui pathlawi Tea nen khan sawi an kai tlat tak asin. A uire lai tak chu hmu lo mah se, rinhlelhawmin an awm miau si a. Pawi ber mai chu a nu leh i pite inlungrual kha a ni. I pa lah tihian rin aia hmain a kal ta bawk nen, i patea te hi awm lo phei se chuan an chan a chau viau ang" a ti charh charh a. 

"Tuna a pasal hi eng mi nge ni reng reng le?" ka tih chuan, "Aw pathlawi tho mawle, a fate a nuin a awmpui hlauh a, Rami a vannei letling. Fa hrawn tur a nei lo hlauh a" a ti leh a. A tunu a rawn kal tak avangin an inkaithla ta hnak hnak a. Sangkimi ka neih let leh tak avangin ngaih a ngam ta deuh bawk a niang, Baby msg ka dawng a. "i va reh ve, min biak pawh i tum lo" a rawn ti a. 

"Min hrethiam rawh. Sangkimi nen kan tha leh a, khawngaihin thinrim suh aw. " ka va ti a. 

"Ehe! A ni maw? Ka lawmpui a che. Hlim dun ang che u" a rawn ti a. Nuam ka ti vak lo. Mahse, kan inngaizawng chuang lo bawk a, ka thiam lohna em em ka hre hran lo. Midang tha tak a la hmu em em ang. Tlaiah thiante ho an rawn lang ta sap sap a, Zu chu an lei chhawng ta hlawm a. Manhla an ti ngei mai. Zep loh chuan nitin zantin thla 2 dawn ka in tawh a, chutia han nghei thut chu a hrehawm khawp mai. Tlai ka haw in ka thleng phei chu ka suffer tan ta hial a. Lem tawh miah loh ka duh si. Sangkimi ka call ta a, Phone a la khawih peih rih loh vangin msg chu kan inthawn rih lo. Chau aw takin min lo chhang a. "Enteh, Duatpui, vawi leh khata nghei thut hi a har ve e. Chaw ei dawnah no khat hi ka lem zuai dawn. Tikhan zawi zawiin ka nghei mai ang" ka ti ta a. A nui hak mai. "Ka hrethiam alawm. I in regular sia, a dik ang. Nia, tlemtê tein i in ang a, i nghei mai ang" a ti a. 

"Eng nge i an reng reng? Chaw te i ei peih ve ang em?" ka tih chuan, "Hei nizan ai kha chuan ka zia, kan inah ka chho tawh a. Chaw chu buhhawp min chhumsak dawn a" a ti a. Ka va khawngaih reuh tak. 

"Zanah ka rawn chho dawn em?" ka ti a. 

"ka kawm thei vak che pawn ka ring lo. Drip min khaisak reng bawk sia. Lo chho lo mai rawh" a ti a. Ka hnual hran lo. Zanriah kan ei a, chaw pawh ka ei thei ve ta deuh e. Ka nute bulah thil thlen dan chu ka sawi ta vek a, ka u chuan, "Awii Peka tenawmzia hi aw. Ka haw ngawih ngawih, Sangkimi chu a va khawngaihthlak ve leh" a ti ve nasa mai a. Ka nu pawh chuan, "Ni ngawt mai. Va inentir vat teh se, Hnute cancer te hi chu paih hian a dam ve leh thei mai alawm. Chhulte pawh" a ti a. 

"Nih nu, dam tha ta se, neih ka duh a, remtih lohna in nei em?" ka ti ta a. Sawi zaha lak chi pawh a ni lo. 

"Ekhai! A innei tur ber ten in duh phawt chuan keini lo hnial theih a ni hleinem. I u zawk hi a ni mipa tha lo deuh a tawng ang tih ka hlau, a hrisel lo si" a ti a. Ka u lah chuan, "Neih pawh ka lo tum hran hleinem, tihian kan nufain kan awmho reng ang chu" a ti mai a. 

"Pasal hi chu neih ngei ngei tur, kawppui te hlutzia chu upat hnuah hian a hriat telh telh, dammawh hritlan nikhuaah ber hian, kawppuite angin fate emaw unau te chuan min dawm thei tak tak lo" ka nu chuan a ti mawlh mawlh a. Ka nu chu melhin, "Nih chuan nang pawh hian nei ve leh la" ka ti pek a! 

"Akhai! Hmeichhia hi chu mipa tel lo pawh hian fate nen chuan kan tlei thei mai zel. Mipa ber hi hmeichhe tel lova awm thei lo in nia" a ti a. A sawi dik zet mai. Pathian min siamdan a ni miau a, Mipa a siam a, a kawppui awm mi amah tihlim tur Hmeichhia a siam leh a nih kha. Hmeichhe tan mipa hi chu siam kan ni ve chiah lo a nih hmel..ka pute thenawm ami kum 60 pel zet tawh Pu Dinga paw'n tar alamah nupui a nei leh a nih khu, a nupui boralna a rei ve thawkhat bawk a, a fate pawh an fing ka ti khawp a, an pa khawharzia an hria a, an kawm hlim hman tak tak bawk si lo. Chuvang chuan a nupui tur an zawnsak deuh tawp mai a. Nu fel em em mai, pasal sún ve tawh tho a fate pawh puitling vek tawh nen an innei ta a. Tikhuan an hlimin Pu Dinga fate lah an fel bawk a, chhungkaw zahawm tak an ni ta rêng bawk. Ka nu pawh hian duh nise nei mah se; pawi ka ti hauh lo. Tun laiah nuhrawn pahrawn an sual vak tawh lo bawk a.

Valtea a rawn chhuk a, a thil ka hawnsak chu no khat ka insak ve leh. Pawisa min pek a tum ngial a, ka duh der si lo. An nu a nawmsam loh avangin rei a awm lo. Kei pawh nizana ka intiam tawh ang khan zaninah ka thutiam ka hlen dawn a ni. Peka chu ka pawng zawn deuh tawp mai ang. Insual inpeih ranin ka chhuak ta a, Ruthi te inah a awm beiseiin Tuikhur veng ka pan ding nghal. A lo awm ngei e. Engtin nge ka tih ang aw tih ngaihtuaha ka buai laiin Ruthi nau tleirawltê hi naute pawm chungin a rawn chhuak a, "Tete, khawngaihin Peka saw min koh chhuahsak lawk ta che. Thil pawimawhah biak lawk a ngai a" ka ti ta a. A let leh vut a, Peka chu a va ko. Mahse, darkar khat ka nghah hnuah pawh a rawn chhuak duh der si lo, Bazarah pheiin shed-ah chuan ka lo nghak ta tawp mai a ni. A leng rei phian lehnghal a. Mahse, ka intiam tawh a, tlaivar thak pawn ka nghak mai ang chu. Dar 10 a pel tawh tihin a rawn tlan phei ta a. Ka lo ding lang a, "Peka, ding lawk teh, inbiak lawk a ngai" ka ti a. A tlan tlang. Ka umzui ve nghal vat. Damdawi in pengah chuan a bike chian loh vang zawkin a ding ta chut a, chuveleh va tlan phei nghalin , "Ding rawh ka tih kha..ti nge i hlau em ni?" ka ti tuar a. A bike chu a thlêk dúk dúk a. 

"Rawn chhuk rawh, inbia ang" ka ti leh. 

"Eng nge i duh a?" pawr zet hian a ti ve zat. A kawr awmah thàmin bike atang chuan chhuk lo thei loin ka siam ta a. 

"I thiltih dan tenawmzia ka hre vek tawh. Engtin nge kha thil kha i tihtheih? Nangmah vangin kei leh Sangkimi'n tawrhna kan hmachhawn asin. Tunah chuan i phutawk ka hmuhtir ve tawh dawn che" ka ti fak fak a. 

"Eng nge ka tih a? Mawh, Zawnga" tih leh a kut vai a rual a, ka inhnektir mai mai tawh dawn lo. Ka thle zauh a, a banrekah humsakin ka theihtawpa nain ka herh ta a, a ri rawp mai. A aiah ta tuar a, ka hnek leh siah. A luhai chu a pai khat khat a, midangin min hmu lo se ka duh avangin ka nam chho dawr dawr a, U mamawia te in thlen hma thim chin deuhah chuan a hmaa min nghaisak ang chiah khan ka bei ve ta miah miah mai. A hnar a thi pur tawh a, a mitko pawh a rawn thi ser ser. A nákah chuan ka chhuih tawk a, a dulah ka tum ve bawk. Rum pawh a rum thei tawh lo. Ka inkhawih tui êm avangin ka khawih hlum mai ang tih ka hlau ta deuh a, tuihawk luankawrah ka sawn phei a, rem zeta muttirin ka kalsan ta daih. 

Inah haw nghalin ka mu nghal daih. Dar 1 bawr velah ka phone a rawn ri ta. Sangkimi a ni. Ngaihtha vak lo chuan ka la a. 

"Peka i khawih em ni? A thi têp a nia" thlabàr hmel zet hian a rawn ti ta a. 

."Aw, a thi lo chiah chiah tawk velin ka sawisa a nih kha. A phutawk chiah" ka ti chhum hmuk a. 

"Anuin police a call a sin" a rawn ti leh. 

"Ka tàng rei awm lo em mai. " ka lo ti leh. 

"Tluanga, criminal chu ka chhungten neih an phal dawn em ni?" a ti khur dat a. 

"Lungngai suh. I damna tur chiah kha ngaihtuah rawh..a tha em? " ka ti a. Ka aw pawh a dam ve ta deuh. A dah ta daih a. A hma khan kei pawh ka thi lek lek alawm le..Peka pawh hian case a awrh ve thei. Hiv a positive tih inhre reng chungin hmeichhia a mutpui a, thiam a chang thei dawn hauh lo. Zu ka va in chàk tak.. 

Ka nuin min rawn sawi nawk nawk avangin phak chuapin ka tho a. Zinglamah ka muhil ve leh chauh kha a nia. Ka va chhuah chuan Police an lo thu ran mai a. Pakhat chuan, "Nang bawk maw? Kan va inhmu zing ve. Min zui a ngai" a ti nghut a. 

Min handcuff a tum chuan, "Ka pu, handcuff kher ka ngai lo. Ka tlanbo lo vang" ka ti a. Min handcuff ta bik lo. Police motor chuan kan khua chu kan chhuahsan ta vung vung a.