Rinsangkimi 7

RINSANGKIMI (7)

Ziaktu: Toni Râlte

Mami te in hnuai hi luah an awm ve thin a, mahse, tun lai tak hian an luah lo a ni maithei. In atangin min rawn hmu ang tih hlau takin in sir atang chuan ka hêl a, ka chhuk ta. Mami chu a lo thu ran tawh a, min hmu duh mai chu mak ka ti viau naa ka lawm tho bawk si. Amah hmachhawn zawng chuan ka thu ve nghal a. 

"Min hua em?" Ka'n ti te tê phawt a. 

A lu a thing ringawt. "A nih chuan engvangin nge khatiang thil kha i tih? " ka ti leh a. 

"Ka rui em a ni" a ti ringawt. Ka va hnaih deuh a, "A ni lo, i ruih vang a ni hauh lo. Tihtirtu che an awm vang zawk a ni. A dik tiraw?" Ka ti ta hmiah a. A ang zuau a, a hmui a chip leh daih. 

"Sawi vek rawh, i sawi si loh chuan defamation case kan file dawn a nia. Pawisa in chawi a ngai dawn,." Ka ti ta a. A kun chhal a, insût hraihin, "Aw ni e, Peka min tihtir a ni e. Ka sawi vek ang. A tirah chuan ngaizawnga mutpui hial tur chein min ti a, khatih lai khan sum ka mamawhna a sang em em a, Peka khan engkim min tumsakin pawisa pawh min pe thin. Chuvang chuan a thu ka awih lo ngam lo a ni. Nang chu hnaih theih dan che ka zawng tan a, mahse, min ngaihven lem si lo. Peka lahin min nawrseh nasa tawh si, tichuan, hman zan khan ruahmanna a siam ta a, khatianga chet la tur khan. Mahse, timualpho ringawt tur che ka nih laiin Police hial ka chhungten an pun ta si, bakah medical exam kan han nei ang a, man chhuah ka ni dawn tih ka hre ve kar sia, Tiang khan case kan withdraw ta mai a nih kha. A pawi ka ti khawp mai" a ti ta dap dap a. Ka rin ruk mahnise a taka ka han hriat meuh chuan Peka ka huatna chu a sosang ngei mai. 

"A tha e, Engkim i sawi avangin. Case pawh kan file lo vang, thlamuang deuhin awm rawh. " ka ti a. Ka khawngaih lek lek zawk, a dinhmun a laklawh ve êm a ni. Ka kalsan ta a, tlan pah chuan ka inhrosa nasa mai. Vawikhat na nà na chu ka kuttum hi a la dawng ve ngei dawn e. In ka thlen chuan ka mu nghal a, Sangkimi ka be zuai bawk. A nawmsam vak loh thu a sawi a, nà a neih hian a chang chuan a lo inzep zawk thin a lo nia. Ka laka a inthlahrun avangin, ka khawngaih reuh êm mai. 

Valtea te pawh Tawipui North lamah an inru ta. Ka lawmpui khawp mai. Ni 3 an awm hnuah an zu hruai ta a, palai an tir zui nghal rap. Nau an lo pai ve tawh si avangin rem loh theih ni hek lo le, thla thar ni 17-a innei turin an inrem ta mai a. Inbuatsaihna hun pawh an ngah tawk lo hle. Mipa lam hi chu inbuatsaih em em hi a ngai lem lo zawk a. Keini pawh U Muana nen Silchar zu dawr tur chuan kan chhuak dawn ta, ka kal hma zanah ka han leng chho a, ka leng rei viau. Kan inning thei ngai lo leh kan inhnè thei ngai miah lo hi a mak zawk ka ti. A nu leh pate nen lah kan inpawh tawh si. Peka erawh Mami nen kan tlangthan lai vel khan Lungleiah a lo zu zin daih a, a la rawn haw lo a niawm e. Chet hun zawng ka la nei mawlh ang. U Muana nen kan liam ta vuah vuah mai, kar khat lai kan cham dawn avangin ka lungte pawh a leng ve deuh. Aizawlah zan khat kan riak a, Niteii te inah kan thleng. Mateii pawh a la awm rei loh nen khawpui boruak a ngeih hle a niang, a lo maih ve káng tawh a, a vunte pawh a mamin a lo êng tawh hle. Nula hmeltha tak a la ni dawnin ka hria. A tukah Silchar lam chu kan pan leh ta a, ka sawi hmaih pakhat chu Nu Rami te kha Thingfalah an phei tawh a, an in erawh patea nen an kalhsak a. Bena hmingin a la awm zui ta zel a ni. Nakinah dama ka awma ka tih ve theih hunah dawr atana la luahte pawh ka rilruk ve. Silcharah chuan U Muana hmelhriat tha tak, a zuk dawr fo thin vai a ni tih pawh hriat loh khawpa mizo tawng thiamte inah kan innghat a. Hotela man chawia awm ai chuan zia tak a ni. Bungrua pawh chu kan han lakhawm tan a, a biakfel sa vek tawh a nih avangin a harsa hran lo. Zep nak emaw Hindi hi ka thiam hlawl lo, Achha leh Are tih deuh tlawng leh Bhaia kitna tih a ni deuh mai. Mark pawh ka hmu tha ngai lo rêng a. Englishin an biak vek theih hlawm bawk si loh, U muana'n a hnehsawh hlauh a, ka ring tawp mai. Ka lung pawh a leng ta viau, Darkar 2 dawn dawnte kan inbe thin a, zan 3 kan riah hnua ka han be tur chu call a reject ta hmak hmak mai le! Mak ti zetin ka call leh ta ngat ngat a, a hnuah phei chuan min block ta daih. Teh thut a aw..a va mak ve mawle. Whatsapp atanga biak ka tum chuan min lo block der tawh a lo nia. Ka lum pup pup a, ka thaw hawk mai. Zahtheih lohna zawng zawng sawm khawmin Pa Ruatpuia ka be ta tawp mai a, a rawn lak chuan, "Pa Ruatpui, Sangkimi a awm em le? Min block vek a, ka be thei si lo, eng nge a awmzia le?" ka ti ta ràwih a. 

A aw thian kharhin, "A pawi ka ti khawp mai. I bansan mai a ngai a ni. Peka nen an inzui tlat mai" a ti ta mai a! Ka puakdarh lo chauh. Engtin nge a nih theih? Nizanah chuan a mutchhuah thu a sawi avangin kan inbe rei lo va, zan hmasaah erawh reitak kan la inbia a nih kha le. Ni hnih khat maiah engtin nge a danglam theih? Peka ber kher maw? Khumah ka let thla tawp a, chunglam ka melh reng ringawt. Ka awih thei thlawt lo va, Min prank a niang ka la ti rilru tho. Thil ni thei a ni lo, Peka a huatzia leh ngeizia ka hre ve reng, engtin nge tunah a zui theih? Ka tihngaihna hre lo chuan lukham chu ka hnek chawrh chawrh a, U Muana chu ka thawm hriain a rawn lut a. 

"Eng nge thleng a?" a ti vat. 

"Engmah. Ka chau, ka mu dawn" ka ti hul hak. A ngaih a tha chiah lo tih erawh a lang. Ka maimichhing ta ngawt a, ka tah a chhuak ut ut, mipa ka ni a, ka tap lo mai mai zawk a ni. Ka mittui erawh a tla. Ka zep lo ang. Min block vek kher chuan min tibeidawng ngawih ngawih bawk si,. A chhan hriat chak em emin zan chu ka tum tawi a, chhin khat mah ka chhing lo. 

A tukah pawh ka chhuak phur lo em em a, ka nguizia leh ka ze zawihzia U Muana chuan a hria a ni mahna. "Lo awm hahdam mai rawh. Khaw lum i tuar lo deuh a nih kha" a ti ta mial a. Ka zahpuiawm ngawt mai. Tlangvala pumpa hmeichhia vangin ka chau hluah hluah chu a ni si a. Ka thei ta ngang lo va, Pa Ruatpuia bawk ka be leh. 

"A chhan tal ka hre duh a ni. Khawngaih takin min zawhsak thei ang em? Peka ber kher lehnghal" ka ti ta hmiah a. Ka zah buai duh tawh lo. 

"Tluanga, intipachang hram hram mai rawh. Peka hian a lo hmangaih si a, Mateii pawn a hnar reng thei ta lo a ni ber" a ti ta a. Ka hmet hlum nghal. Kei hian ka hmangaih ve lo em ni? Peka chuan kei aiin a hmangaih zawk a maw? Nge mi rethei kan nih vang zawk. Zawhna hlir zawhna hlir. Sangkimi chu ka la haw thei chuang lo va, Thil ka hrechhuak thut. Natna eng emaw tak a vei ang a, min hnar nan a hmang ta a niang, tiin. Doctori zawk ka call ta a, a lak rual rualin, "Sangkimi chuan eng natna nge a vei? Min hrilh rawh u. Chuvang chuan em ni? Min then a tum.." ka ti ta tawl tawl mai. A ngawih dat hnuah, "Eng natna mah a vei lo. Tluanga, hrethiam hram ang che. Keini pawn a duhthlanna hi zahsak hle lo ila chuan kan pawmsak miah lo vang" a rawn ti dam thlap a. Ka phone ka paih lo chauh. Rinsangkim leh! Engtin nge hetianga min thlauhthlak theih? Ka hmangaih che i ti a ni lawm ni? Bang ka hnek leh dawp dawp a, "A ni lo, a ni thei lo. Ka chán phal lo che..ka hmangaih che asin" ka ti a, ka kun tlawk tlawk mai. Zanriah pawh ka ei peih lo va, U muana ngaihtha lo chuan min zawt sek lehnghal, thudik sawi kha ka ngam tlat lo. "Sangkimi nen kan inthen a" ka ti mai a. A chhan min zawh lahin, "Kan inhnial ve deuh a, min then tawp mai a ni" ka ti leh tawp. Ka u pawn hreh tak chungin, "Mam, ka sawi hreh viau naa, hre ve la ka duh bawk sia. Sangkimi leh Peka hi an inphur nasa thin khawp mai. " a rawn ti ta hial mai. Min phatsantu chu huat a hnêkin ka la ngai em em reng a, inlamlet se rawn let leh se ka duh takzet a ni. Peka ka huat dan chu a nunna lak thlengin ka ngaihtuah thei nia! Mahse, chu êm zawng nunna siamtu ka nih miau loh avangin ka ti lo vang. Mahse, kawng tinrenga min nghaisakna phuba chu ka la ang. A tukah kan haw ta a. Kan khaw thlen pawh ka chak zawk zawk lo viau, Kan khati ve tawh a, Peka'n min luahlan avangin sawi sep sep ka kai leh ngei dawn si. Nà ka va ti ngai êm aw. Hawn kawngah pawh ka ngawi kar reng mai a, Umuana lakah pawh ka inthlahrung viau mai. Aizawlah riak tawh loin kan tlang a, kan khua chu zing dar 3 bawr velah kan lut a. Bungrua unload nen, kan inpeih fel meuh chuan khua a var a ni mai. Hlawhfa ruaiin vawiin chu bungrua an remfel dawn a, ka mu nileng thei tihna a ni mai. Mut ka hmuh tlem bakah thil ka ei tha lo nen ka chau ngawih ngawih a ni ber e. Tukthuan chu bar hnih thum vel ka bar a, ka kaah hian eng thil mah a tui thei lo. Valtea inhlawh tur a rawn peng a, roomah kan inzui lut. 

"A mak tih bak sawi tur ka hre lo a ni. Thianpa, Sangkimi pawh biak ka tum nasa, biak theihin a awm duh lo reng reng" a ti mawlh mawlh a. Valtea bulah meuh chuan ka insum zo ta lo, a darah ka lu nghatin ka mittui chu ka hru mawlh mawlh a, Ani pawn min hrethiam khawp mai. "Ee..a na ang, a na viau ang. I duh ve êm a, i tuar tur pawh a ni e" a ti charh charh a. 

"Zaninah min han lenpui ta che, i peih ang em?" ka tih chuan, "Tehreng mai. Engkim kan han hrechiang ang chu le" a ti ve mai a. Min chhuahsan ta rih. Ka inbual fai hnuah ka mu ta daih a, ka nute pawn engmah min zawt lo. An hrethiam ve ni turah ka ngai. Chauh tawngkhawng tawh chuan ka muhil ve ta a, nileng deuhthawa ka han muthilh chuan ka harh ta deuh e. Zanriah erawh tihtham ka la ei meuh lo. Taksa nà ni lo, chhungril natna hian mihringte hi min lo khawih na thei viau zawk a nih hi a. Ka insiam mawlh mawlh a hmuh chuan ka u-in, "Len i tum em ni?" a ti a. Ka bu nghat ringawt. 

"A chi dawn mi? Peka a lo awm ve phei chuan in buai leh ang e" a ti a. Min ngaihtuah tih ka hrereng. 

"Buai miah miah ila a tha zawk. " ka ti nghut a. Valtea pawh a rawn lang ta, ka nute remti vak lo chung chu ka chhuak lui ta a. Ding takin Sangkimi te in kan pan nghal. Peka nen an lo thu dun rial a, Doctori te pawh an lo awm. Thingpui háng an lo in mek a. Sangkimi'n min han hmu chiah chu a dáng var pap mai. Ka zin hma ai khan a lo cher zawk bawk. Kan thu ve ta hmiah a, Pa Ruatpuia'n min lo be bawrh bawrh, kan zinna kan tluan leh tluan loh velte, tha takin ka chhang ve zel a. Doctori pawh chuan, "I pute lo awm khu chu a vanneihthlak teh e, Lunglei leh Lawngtlai kal kher ngai loin engkim a lam khawm theih a" a lo ti ve siam siam a. Sangkimi erawh a ngawi tlat. Keimah zawk chuan intihuaisen luiin, "Sangkim, i lo dam em?" ka ti a. 

A bu nghat a,"Aw" a ti tham tiak. Peka mitmei chu ven thamah ka ngai lo, ka veng bawk lo vang. Pa Ruatpuia chuan Valtea chu enin, "Ni 17-ah maw in inkutsuih dawn tak?" a ti a. 

"Aw a nih kha" Valtea chuan a ti a. Peka chuan, "I phu loh pui i nei dawn a nia, i lawm awm. " a lo ti deuh kher a, Valtea chhan hmain, "A phu mah mah zawk. Phu loh an awm lo, mipa tan" ka lo ti ve ngat. A hmui a tipawrh zauh a. Reivaklo kan thut hnuah Peka chuan, "Sangkim, dawrah zu kal lawk ila, noodles te chu zuk lei ila" a ti ta a. Sangkimi pawh chuan, "Nia, kal ila" tih leh thawh a rual ta mai a. Ka lai a na vawng vawng. Mahse, Pa Ruatpuia'n, "Zanah chhuah ka remti lo, kal lovang" a lo ti ta hmak mai le. An thu leh ta a, Pa Ruatpuia te chu damdawi inah an koh avangin an chhuk thla a. Kan pali chuan kan thu ta ran mai. 

"Peka, min lo hrethiam la, sangkimi hi biak fal lawk ka va duh ve" ka ti ta hmiah a. A ner nàwng mai. "Eng atan maw? Mi bialnute lo biakfal tum..i thisen a va sáng ve. Kan sawisakna che kha a la tawk lo fò a ni maw?" a ti pawr hlur a. 

Keia thinrim sa, lo inkhek khal tawh chu ka sa ta phat mai. "I bialnu a ni emaw ni lo emaw ka ngaipawimawh lo e. Tin, Nang nen pawh hian thil tihfel tur kan la nei aw. Zaninah pawh hian fair takin kan tithei e" ka ti hriam ta hraih a. Sangkimi bulah chuan min hlau lo nasa mai a, Sangkimi'n, "Duhtawk r'u, Tluanga, nangni pawh haw rawh u. Kan sawifel tawh kha. Nang leh kei hian inzawmna kan nei tawh lo" a ti fiak thak a. Ka melh ngawih ngawih ringawt. Haw thei ila ka va duh êm, a mitmeng tak ngalah chuan eng emaw inphum ru a awm chuan ka hria, mahse, eng nge a nih ka hre thei si lo. 

Peka lah chuan, "In nula rim berin haw rawh u a tih chuan haw ve mai ula. In va cheap ve mawle" a lo ti ve sek bawk. Chutah Valtea nen chuan kan tho a, Peka chuan Sangkimi chu kuahin a biangah a nul thuak thuak a, "Ka ta a nih hi, ka bialnu" tiin min rawn melh chho a. Ka insum zo ta ngang lo, Peka bek chu a ri no ta chhawk a, Sangkimi a rak nghal tuar, Peka rawn tho kang tur chu ka theihtawpa nain a biangah ka lo beng pawp a, a tlu leh zui nghal. Valtea chuan min lo chelh vat a, Sangkimi chuan "Chhuak rawh u, min chhuahsan rawh u. Police ka koh hma hian, Tluanga, vawikhatmah rawn kal tawh ngai suh ang che. Kan inzawm tawh lo. I hrethiam em?" a ti tuar tuar a, a mittui a rawn luang nghal bawk. Amah hmachhawna va ding siahin, "Peka vangin i mittui a luang a maw? Rinsangkim, Hetiang hmeichhia hi maw i lo nih a? I va mak êm" thinlung na ngawih ngawih chungin ka ti ta a. Min rawn melh kiau a, a mittui kar atang chuan, "Chhuak rawh..Zothantluang..kal mai rawh" tiin min nam a. Peka chu va en lehin, "I bat i la tlak fel lo a nia aw. Hmun dangah kan la titha leh ang" ka ti sup a. Kan chhuak zui ta nghal. Ngawi rengin kan tlan chho nal nal. Valtea a rawn peng ve leh a. An inneihna tur lam an sawiho ta daih. Kei chu ka tawng peih hlawl lo. Ka thin a rim tawh zawk a, tawrh dam dan a awm zawk ang chu. Sangkimi huatna chuan ka khat a, kha mittui kha Peka tan a luantir a nia! Kha khan min khawih na êm a ni. Ka zeldin kual a, Peka te min sawisak pawh kha a tihtir a nih ka ring ta rum rum mai. Mahse, chu êm zawng ni lul suh se. Ka nun chu mumang ang ruai a ni chho ta a. A tuka dawr ka nghah laiin vai ho rawn chawl chuan Asenchi a case-a an zawrh thu leh hralhna zawnpui turin min ngen a, Valtea ka call hman tep. Mahse, zu chu ka in ve chak ta tlat mai. Hetiang reng renga tawrh tlawk tlawk ai chuan harhfima hmachhawn loin tuar ta ila, a tawrh pawh a nawm deuh ka beisei a ni. Setana hi chu a va chak si êm. Case khat chu a to ve deuh si avangin Valtea ka bia a, inconpuiah ka sawm ta ngawt a. Ani pawh an inneih ni vela thiante han sem tur te a duh ve dawn bawk nen, "Thianpa, zu hi chu in lo la ka duh mang e. Harhfima engkim hmachhawn hi a tha zawk asin" a ti naa, ka tih tawhna lama kal ve vut chi ka ni tih a hrechiang bawk nen, min tilui ta vak lo. Ka pawisain zu chu ka la ta a. Customer awm loh laiin pakhat chu ka in nghe nghe. A hmaa vawihnih ka in bak ka in leh ta si lo va, in a har ngàng ngàng hle. Hnar te chu ka'n hup khawmawi a, ka uak tuar tuar mai. Mahse, no khat bak ka in duh rih lo. Dawr hnunga bungrua kan dahna hmunah zu chu ka thukru ta a. Pakhat ka hawn tawh sa kha ka ak hawng bawk. Zanriah ei hmain ka in leh a, tlem chuan ka tithei ta deuh. 

Ka nute chuan min rinhlelh loh vang nge a rim a na vak lo zawk, an hre miah lo. Zanah Valtea nen ka roomah a rukin kan lem leh ta a, a confi tawk velin Diki te in lam kan pan ta. Damdawi in tlang lamah chuan len chhoh ka tum ta lo. Diki pawh chu kan rim rei lem lo, in leng an ngah thei dur dur sia, min ti ipik tlat. Kan hawn lamah Peka, Nungi leh Sangkimi te hi dawrah ka va hmu a, Sangkimi dáng lutuk leh cher ta em em chuan ka ngaih a titha lo leh ta. Natna eng emaw tak hi zawng a vei a niang. Mahse, min rawn hmu ve lo bawk a, kan tlan tlang. Kan in thlang lam bathlar hi khaw hawina nuam tak a ni ve reuh a, chutah chuan thu dunin titi pahin kan thil chu kan lem leh ta khalh khalh a. Kan pahnih chauhin um khat kan fai thak mai. Kei pawh ka mut lai pawh ka hre mumal lo. A tuka ka harh chuan fel tak chuan ka lo mu ve mai bawk a. Mahse, ka nuin min lo hau nghal. 

"Nizan khan i va han rui em em ve mawle, khatiang kha chu ka duh miah lo a nia, Mama, i pa pawh zu vangin a boral tawh a, nang lehzel chuan in ve suh" a ti hlak hlak a. Ka ngawi reng. Zan danga muhil thei lo va let let thin khatia mumang bo thak khawpa ka muhil thei pawh kha ka lawm viau. 

Kha hun atang khan zu nen chuan kan inchiahpiah chho ta a, khawtlanga ka nihna kan section secretary atangin ka inresign bawk. Thiante ho leh TKP-a kan hruaitu te pawh an rawn leng thin. Mahse, zu ruih nawmna ka pawh laklawh a, sim mai ka la tum rih lo. Sangkimi chu Aizawlah a phei a, a rawn haw leh haw loh pawh ka hre lo, ngaihven tawh loh hram ka duh a ni. Valtea te inneih ni phei chu hunserh hman lai chiahin ka harhfim, a thian ka ni ve bawk nen, lo ruih phút kha thil tihchi ni hek lo le. Inneih inkhawm zawh tawh lamah erawh ka tlak leh pup pup tawh. Keimah vangin Valtea pawh hian a in tam phah ve niin ka hria, ka inthiam lo viau nain amah nen lo chuan ka in duh bawk si lo. Min hmu apiangin, "Tluanga, i fel tehlul nen aw. Ti nge maw i pa hnung i zui mai le" tiin min ui thu an sawi ve vawng vawng thin. Kei chuan, "Tunah pawh ka fel tho lo em ni? Zu hi sual a ni hleinem" tih tanin ka tang thin. Ka nu mawlh mai hi a tap ru lai vawi li lai ka phàwk tawh. Sunday tlaiah chaw ngheiin ka tan a tawngtai ziah bawk. 

"Nu, zu ngawlvei ka tum hleinem, tunah chuan nang ni tih loha ka hmangaih berin min phatsanna hi a na rih êm a, ka tawrh dam hun a awm em em ang. " tiin ka lo hnem ve luklak a. Ka u pawn min hau zing ta malh malh viau. Min hmangaiha min duhsaktu te chuan min hmuhna hmun apiangah min zilh a ni ber e. Mahse, ka zu in dan hi zu ngawlvei ang tak chu a la ni lo va, tlaiah chaw ei hmain no 2 te ka in a, mut dawnah chutiang zat vel bawk chu. Zingah leh chhunah chuan ka rui duh tawh lo, kulcho a na êm mai. Ka pute pawn min zilh reng zel a, ka dawr nghah a la tibuai lem lo naa an tupa ang tak taka min ngaih avangin an rilru a na a ni. U Zuali phei chuan, "Sangkimi avanga hetianga han khawsak, thihpui tlak a ni em ni? Mipa i ni a, pa takin awm ta che" a ti hial. Ni e, ka pa tawk lo a ni maithei. Mahse, indem ngawt chi a ni bik lo a nia, nà kan tawrh theih chente hi a inang lo va. Ka mihring huat em em Peka ber kher min zuisan leh Peka'n min hmusit hi natpui tham a tling lo a nih chuan kei chu mi pangngai ka ni lo a ni ngei ang. Mipa ka nih avang tak hian ka thiltawn hi a na zual asin. U Zuali ka atangin Sangkimi chu Aizawlah a la awm char char a niawm e. Eng tak va ti ang maw? Tawipui chu nuam a ti ta lo te pawh a ni ve ang. A awm lo hi lehlam zawng tak chuan ka tan pawh min tichheltu a ni ve a, a hmel hmuh reng kha chuan a thar zel si a, a hrehawm êm mai. Zu lah chu vai hoin min hre pawp laklawh tawh nen, kan inpe kan inpe ta mai a. Valtea erawh nupui a nei ta bawk nen, engkimah kan inlungrual thei ta vak lo. Taka! Khatia Diki nen an inruk hnu lawk khan Ruati'n a rawn be leh vel a niawm e. A rilru nat thu a la rawn sawi ngam nia! Tenawm..Valtea erawh chuan a hawi ta lo khawp mai. Diki chu Valtea chhungten an fak em em a, chet a peihin a che fel bawk si, a mawng a zangin Valtea nu nen phei chuan an inngaina nghal em em a, mo fuh cher cher tak a ni. 

Sangkimi nen thla khat dawn kan inthen hnuah min betu ka tawng ve leh hlauh mai. Ka lo enliam mai mai thin, Sangkimi aia ú hlek tur Baby a ni. Ka pute in bul maia awm an ni nghe nghe a, Chhungkaw pangngai tak an ni bawk. Min rawn be ve nawlh chu mak ka ti khawp mai a, mahse, "Zothan, ka mumangah ka hmu zing lutuk che a.." tih vel atanga bul rawn tanin zing leh zanah kan inwish chho tan a, Zothan tia min kotu hi an tam hran lo. Chutia inbiak ve reng na nà na chuan midang anga enliam leh palliam mai theih a ni ta bik lo va, keia khawhar lai a lo ni chhap nen, Baby nen chuan khaw khat nisi inhmu lutuk si loin kan inbe ta tluk tluk a. Baby hi sa nghet lam, khal kan tih ang chi hi a nia, a sang hran lo bawk. A mawng khal têrh chu an sawi ve fo zel. A hmel tak hi chu a chhe hran lo, mahse, hmeltha ka tih zawng a ni vak lo. Han inbiak tak tlut tlutah chuan inngainatna a lo piang lo thei lo va, ka khawhar a hnem ve phian bawk. Zu in tawh lo turte pawn min ti ve nasa. Mahse, nghei mai thei dinhmunah ka la ding chiah lo a ni. Sunday zanah vawi khat chu ka va leng ve ta a. A nu leh pate nen pawh inbe ve fo thin kan ni bawk a, min lo be nghal bawrh bawrh a, Baby erawh a lai deuhin ka hria. Kei tak pawh tlem lem sek lo ila chuan ka lai chhe leh viau maithei a ni. Thingpui a va lum a, a rawn dah pahin ka bulah a thu nghal. A nute erawh chuan tv lam an ngaihven daih a, "Naktuk eng nge i tih dawn?" ka ti a. Sawi tur hi váng ka ti thin. 

"Kan group kan hnatlang dawn a, ka kal ve ang" a ti ve mai a. 

"Eng nge in tih dawn?" ka tih chuan, "Sachek kan siam dawn a, min dawr ve ang chu" tiin min rawn melh a. Keia kai ve deuh tawh si chuan ka hmu hmeltha viau mai. Mahse, a chhungte an awm a, eng han tihtheih pawh a ni lo. Ka haw tur pawh kawngka bul thleng min thlah ngam táwk. Ka mut hnua kan inbiak leh hnuah ka whatsapp status-ah, "Hmalam pan hi a tha" tih ka update a. Sangkimi'n Min lo unblock tawh tih ka hre lo reng reng, ka check ngai tawh bik lo bawk a. Ka status viewer te ka han en chuan a hmasa lamah a lo view ve vang a, rilru a tithar hle mai. Status hi ka nei ngai mang lo va. 

A hnu lawkah status rawn nei vein, "Lawm zel ka tum ang" tih chauh a ni. Keimahah ka inngaihbel lo thei si lo. Ka ning mang e aw. mahse, enliam ka tum ve hrim a. Ka va be hran lo. Khati khawpa na khan min siam a, a hlim a niang chu ka ti mai. Aizawla a la awm char char erawh mak ka ti deuh, Peka hi ka hmu zauh zauh a, ka ex Ruthi nen pawh vawi hnih an inphur lai ka hmu tawh. An ni hi an lo inthen leh tawh te a ni thei ang em? Chuvang em ni ang Sangkimi hi a rawn hawn duh tawh loh. Aaa..ka ngaihtuah tur a awm lo ve. Zu pawh in tlem ve deuh ka tum chho ta a, mak ve deuh chu zu hi in tirh chuan 'Sual a ni lo. Zu in mi aiin rilru chhia te, dawhehte, eirute leh a dangte hi an sual zawk' kan ti pàng pàng thin. A'n rei deuh a, zuin kan taksa a han rún tak tak tan a, hnathawh a buai a, thluak a fim lo chho a, nitin maia zu bak ngaihtuah tawh loh chinah chuan, "Zu hian thatna pakhatmah a nei lo va, fakna tur a awm lo" rilruin kan ti ru rauh rauh zel, zan lamah kan han rui ngheng a, Chaw ei a sak chho talh a, kan melh ngai melh run run rengin, 'Zu hi ka in tawh lo vang' kan han tia. Chhun a lo nia, 'Zu hi ka hua, min tichhe lutuk" kan han ti leh a. 3 thirsty a rawn rik leh meuh chuan "Zanin tlai chauh" kan ti leh nge nge zel. Kei pawh a tirah khan in thiam ka inti viau kha a nia. Khatiang reng kha a lo ni thei awkawng lo. Kei pawh ka in in ka duham tial tial a, rui nuam tawk an tih ka pelh chhoh tak zelah chuan a nawmna tak tak pawh hre tawh lem loin taksain min nawr miau avangin ka in leh nge nge zel chu a nih hi. Mahse, a kuma kum zu in te pawn an nghei theih chuan ka theih lohna chhan tur reng ka hre lo. Ka zu ruih dan hi lehlamah khawlaia buaina siam leh mi mit la zawngin ka khawsa lo hlauh a, a zia tak a awm. 

Baby chu ka bem lo va, ani pawn min bem chuang lo, kan inbe ve tawp a nih ber mai chu. Mahse, min duh tih ka hai lo. Kei ang nun tlachhe lutukte min lo duh ve chu ka lawm viau rualin tih tak taka ka nuna hmeichhe dang lalut tur chuan inpeih ka la inti lo deuh a ni. Mut dawnah ka lem sek avangin phone khawih nuam titawk velin ka kai a. Kei leh kei lo ang takin Sangkimi'n a lo view ve vang nge status update nuam ka ti thar a. Thlalak ka ngah lo hle nain ka lan that vena Valtea te inneih nia suit nena ka induan ve zarna chu hmangin, "Mi pali kha pathum kan lo ni ta" tih captionah ka hmang bawk. Sangkimi pawn a lo view ve leh chiah e. A reaction ka hre chak mang e, ni e, kei leh Valtea, Sangkimi leh DIki te khan picnic hialte pawh kan sawi ri hman kha a nia. Engkim chu Sangkimi'n a thaichhe ta vek kha a nia. Diki pawh hian kan inhmuh a zatin min fuih thin, "Tluanga, i hmelchhe lo, lehkhathiam i ni bawk a. Zu hi nghei la nupui tha tak i hmu em em ang. Hetiang ringawt zawng a dik lo" tiin. Ka e aw liam mai thin a. Rilru a harhfim lai chuan, "Zothantluang, mi nèp pa, I hmangaih pawh i chelh thei lo va, chuta karah a hmuhsit theih turin nun tlakchhiat lam kawng i zawh zui a. Harhchhuak rawh" te hi ka inti khawl khawl zel. A sarhu laia na nget nget, tlawm intihna leh Sangkimi beiseina beithamtê ka neihna kha chu a reh ve tan tawh a. Peka tak pawh ka enliam thei tan. Mahse, min unblock-a ka status a lo view zat zat hian rilru a tithar lo thei si lo. Huiham, nun hi a va hahthlak thin êm..Kei lah kalna lam leh tuina lamah chuan kal hlawm tawp thin ka lo ni si, Sangkimi min phatsanna hian mipa rilru pawh a tinêm zo ta a nih hi. Tuar miah lo ni ila ka hmangaih lo tihna a ni dawn a, tuar lo anga lan ka thiam ve der bawk si lo. Ka tuar chhuak ve têp tawh ang chu maw..

Baby'n ,"Naktukah Lunglei kal thut ka ngai a, Ka mutsan ang che aw , thawh hma a ngai sia" a rawn ti a. Kan inmangtha zui nghal. Sangkimi chu a la online vú a, thla khat deuhthaw Aizawla a awm takah chuan a hriselna te pawh a tha chho ta a ni ngei ang. Status ho ka view kual laiin msg a rawn lut a, Sangkimi a ni tlat! 

"Zu i rui nasa em ni?" tih chauhtê hi. 

Ka reply ang nge reply lo vang tih ka ngaihtuah nasa mai a. Mahse, "A pawimawh em ni?" ka ti ve ngat. Min rawn reply tawh lo chiang kher mai. Ka be zui duh bik eih lo. Kalpah ve deuh a ngai. A tuk ka dawr nghak chu nidang aiin ka harh ve deuh, Kan veng nula senior U muanpuii a rawn lut hlawl mai a, ani hi wada lamah hian a thawk ve a, Hiv Aids chungchang hi a vei ve thin khawp mai. An chhungkaw mamawh a rawn lam khawm a lo nia, a titi nghal suam suam bawk. "Tluanga, nang hi nula lamah te hian i nghal ru zêk lo maw? Fimkhur a ngai a nia" a ti zauh a. Ka lo nui hawk. Kan khaw nula tumah ka la mutpui lo tih hria se min ngainep zawk maithei a ni. 

"Bialnu pawh nei lo napui chuan, ..pasalte hi neih i tum lo mi?" ka ti hluai a. 

"Pasalte chu mite neih tur a lawm" a ti deuh ngei,. Kan nui dun hawk hawk a. U Muana rawn lut ve chuan, "Kha..Muanpui, hmanni thisen test runpui neihah khan HIV kai an awm ve a ni maw? A mak hle mai" a ti ta mai a. 

"Nia mawle, Tluanga pawh fimkhur turin ka lo hrilh mek hi. Mahse, an tam lem lo hlauh a,." a ti ve mai a. An hming sawi chi ni hek lo le,. Rei awm loin a chhuak ta a. U muana chuan, "Peka hian a vei an ti a nia, Sangkimi pawh a ngaihtuahawm khawp mai. Kan nula ho lah hi a phur kual ve reng lehnghal. Ka ngei riau a nia" a ti ta mawlh mawlh a. 

"Engtin nge a vei tih an hriat a?" ka lo ti hú thung. 

"I U zuali hian a damdawi thenkhat a lo hmu fuh a, mahse, midang bulah chuan sawi darh vak chi a ni lo a nia" a ti ta a. Peka chu a la naupan nen, damdawi a ti ngai lo va, sex vanga kai a ni ngei ang le. A nih chuan Sangkimi chu a va ngaihtuahawm si êm. Ngaihtuah loh ka tum pawn ka thei lo a chha a ni e. Sex an hman dun êm chu ka ring lo va, an infawh chuan a ka chhungah pem leh hliamte nei ta se..Nilengin ka ngaihtuahna a chawl lo. Ka lo hmangaih dan hi aw. 

Zanriah kan kil hma deuhin Valtea a rawn peng a, Satliah zet hian, "Sangkimi pawh a lo haw kha" a ti a. Ka beng a verh zak mai. Mahse, inthup tum takin, "A chamrei hle mai" ka ti ringawt a. 

"Hmu ve la chuan mak i ti viau ang. A dánzia leh a cherzia chu aw. Ka khawngaih reuh lutuk" a tih chuan chhuna ka ngaihtuahna nen ka lo thlunzawm kawkalh a. A hrisel lo sa sia, HIV a pai a nih vaih chuan a taksaah a lang chhuak hma hle dawn niin ka hria. 

Zanriah pawh ka ei tui loh phah vek. Zanah pawh ka leng chhuak ta lo, bathlarah ka lem leh khalh khalh a, kan kawmchhakte makpa a boral a, khualkhua mah nise ka nu chu a han leng ve a. Ka u erawh hla a zir, ani hi chu Bial zaipawl member lai a ni ve a. Ka tluk lo tak tak a ni. Zai ka play a, a moodah ka cheng hle a niang, Damdawi in tlang lam chu ka thlir vawng vawng a, ka hmangaihna kha a la ngai reng si..dam tha se, nula dangte angin hrisel leh thothang tha tak ni ve se ka duhpui takzet a ni. Ka nu lo hawn hmain ka mu ta daih a, ka in tlem ve deuh tak telh telh avangin ka taksa pawh a chhe em em hran lo. A tukah chuan dawr kharin YMA hnatlannah ka kal ve a. Ka u a tel thei si lo. U muana te pawn min hrethiam viau. Damdawi in an zauh dawn avangin ban khur tur laih a ngai dawn aniawm e. Ni e, kan khaw damdawi in hi Mizorama PHC ah a upa ber an tiin ka hria. An chei tha deuh ve ta zeuh zeuh a, zauh hi chu a ngai ve tawh bawk a ni. Sangkimi te veng a nih vanga kal pawh ka ni chiah lo, ka hmu hreh zawk mah. In khat atanga hnatlang pakhatmah awm loh kha chu tiin ka nuin min nawr zawk a ni. Kan innghah khawm laiin Dailova, Chapo ve angreng tak hian ka lo tawng lai takin, "Tluanga te ang, hmeichhe pakhat avanga zu bawiha lut lo tur vela ka lo fing hi ka lawm mang e" chaltlai zetin a ti a. Ka thin a khei zak naa fiamthuah la luiin, "Nia, kei ang hian mawl muk tlat loh tur" ka lo ti ve a.

"Mipa min timualpho " a ti leh kher chu paidam harsa ka ti ta deuh a, "Dailo, ka hmeichhe tawn ang khi tawng ve la, i thihchilh duh hialin ka ring. I hmu zo ve miau si lo va. A pawi ngawt mai. Sualpui tham khawpa hmeichhe tha a nih khi. Chuan, Hmangaihte avanga natna hi mualphona a ni lo" ka ti chang ta fak fak a. Awmkhawm kan la tlem hrim a, hria an tam vak lo. 

A nui lui hak a, "Pa lo em mai" a ti leh kher..Valtea tawng tum chu ka khap vat a, "Ka pa leh pa loh i hriat duh chuan insual ang hmiang, a nih loh pawn i farnu khi rawn riahtir la" ka ti nghut nghut a. Thinrim awrawl erawh ka chhuah duh lo lui tlat. A ner sak a, "Ve a..Peka te sawisak rawn i nih kha. Insual thu vel chu sawi ve suh" a ti leh hram. Valtea'n, "Chhang tawh suh, hetiang mi ang lo te chu..i hrethiam mai lawm ni? Sangkimi rim hmasa bertu, Sangkimi'n a biak that peih loh kha a nia. A tluk lo lutuk che a rak ve vak vak a nih hi" a lo ti ta hrep a. Dailova thinrim chu a meng ling hrú mai. Ka pawisa der si lo. Ka ngawi zui ta a, amah chuan a la phun bul bul a, ka ngaihven duh ta lo. Buaina hi ka ngah tawk tawh a, insiambelh chi ka ni tawh rih lo. Kan kim thawkhat ta bawk a, Damdawi in tlang lamah chuan kan chho ta dul dul a. Doctori leh a staff te pawh an lo kim thap, nui sáng chungin min lo dawngsawng a. Pa Ruatpuia pawh hna semzai dan tur ruahmanin Pa Rina nen an tei vut vut mai. Keini group chu paruk kan ni a, Zuala te ho awm loh lai a nia, an ni hi an chak tha asin le aw. Kan han lai tan a, a lo lem thin leh thin lo kan hriat tan. Ka hah hma ta em em a, ka tui lah a hal reng bawk. Valtea ka awmpui hlauh a, min hliahkhuh hram hram a ni e. Chhun chawlh laiin Nurse ho bakah Nungi leh Sangkimi ten eitur an rawn sem ta a. Ka mur er er nia. Ngaihven lo anga lan ka tum luatah ka hah vek thei. Valtea sawi ang khan Sangkimi chu a biangte a ki vek a, ruhin a tuam der der chauh ni mai hian a lang, a ngo êm zawk a a hmai dáng lutuk chu a fiah lo mai mai zawk. A mitkhurte chu a tla dâk mai. Hetia ka hmuh hi chuan ka khawngaih bawk si,. Ti nge maw a hrisel loh em em le. Kan lamah an rawn sem lo hlauh a, kekawr thawl hek hawk a ha a, a tshirt chu a lian lam a ni bawk. A sam chu a chhipah a zial khawm a. Ka bula thu U bawiha -a phei chuan, "A va han cher ta em em ve le. Tluanga, nangmah vang pawh a ni ve thei tho a nia. " a ti zawi sup a. Chhan dan tur ka hre lo, keimah vang a nih chu ka ring lo hulhual. No an sengkhawm lai chuan min rawn melh zawk a, kan mit a intawng têk chhuai, kan intawnna hmasa ber ang chiah khan ka awm mawle. Kan mit kan la dun vat a. Lungphu a rang dat dat viau. Chawhnu lam phei chu kei ka zawi tawh em em a, U Bawiha bawk chuan, "Tikhan lo thu rawh. I chau a nih kha..hei Valtea te, Lianmawia te ho an chak alawm. " a ti hial. Tlangvala pumpa thiante phak loh lutuk chu ka zak ve bawk si. Zu vang vek a ni. Ka in tawh lo ang chu ka la ti chuang der lo. Mihring luhlulzia hi aw. 

Kan bang ve ta hram e. Zawi em emin in ka thleng a, ka inbual zo chu tlemin ka harh deuh, rawl damdawi in leh a ngai a ni. Chaw ei hmain ka va lem leh puat a. Valtea pawn min rawn dil ve a, lo chhuk turin ka ti nghal. Ani zawng an nu hian a siamtha bik ngawt mai. Ka nute pawn min enliam deuh tawh ni maiin ka hria. Zantin chhung inkhawm erawh kan la nei a, Ka u leh ka nuin an inhman chhawk thin. Ka zah em em nachungin ka la nghei phal lo a ni ber e. Zanah Baby ka rim ve leh a, thian aia thuk deuh si, inngaizawng si loin kan inkawm a, a eng emaw ti nawm riau zawk. Amah pwn min nawr bik chuang lo. Ka haw hma a, ka haw chho tur kan in panna peng ka thleng chiah tihin Peka leh Ruthi te rawn inphur hi ka tawk a, Peka a khi sáwng mai. Ruthi chu aw. Peka'n a natna a kai teh chuan a nasa lo teh ang chu. Va hrilh ngawt chi lah ni lo chuan..Ka phone a rawn rik zui tak avangin ka ding leh a, Romawia a lo nia. A lo haw a niang. "Bro, thil ka va mamawh ve, i nei mial em?" a rawn ti. Ina ka dahsa bak ka neih tawh loh avangin, "Lakna i hriat chuan ka con ang che" ka ti a. 

"Local a awm a, i duh tho em?" a tih chuan, "A tha em?" ka ti vat. 

"Tha ang, buh zu chu an tia.." a ti ve mai a. Buh zu pangngai tak hi chu a senchi satliah ai chuan ka duh zawk. Inhmuhna hmun tur kan sawi a, ka let leh ta a. A hriatna lam chu kan pan ta vat. Aman a va la a, in na mai tur a vàn avangin Minpui tuikhur kan pan a, a thianpate no a va hawh a. Sehhmeh tel lo chuan kan in dun ta a. Ka luak a va chhuak tak. Mahse, luah hi ka hreh êm a, ka insum thei hram hram e. A la tlai chhe lo bawk a, Aman min sawm luih tlat avangin Damdawi in tlanga U Mamawia te nau, Theiriat khua rimpuiah min sawm a. Amah pawh ka hre ve si lo, mahse, a la hma tho tiin ka zui ve ta thàwr a. Kan nula rim chu hàng ngaihnobei kan tih ang chi hi a nia. A chhe hran lo. Romawia duh chi tak a ni. A bialnu nen an intihthinur lai a ni bawk a, A zei hrawt hrawt hle. Kei erawh sawi tur mang ka hre ve lem lo. U mamawia nen kan inkawm deuh ber zawk. Dar 10 a ri dawn hnai tihin hawn ka rawt a. Kan chhuak a, bike ka tihnun lai takin kein Sangkimi leh Nungi te hi an rawn chho ta a. Tlan mai ta lo chuan ka lo ding, keia rui tawh chuan, "Rinsangkimi chu i rai a ni lo maw? I cher hle mai. Nge natna tha lo i vei zawk? " ka lo ti piap mai a. A ding dat a, Nungi tawng tum chu khapin, "Tluanga, i va rui ve..ti nge hetia i awm a?" a ti dam thlap. 

"Ka nun a nia, ka duh leh ka rui ang a. Nangmah vang erawh a ni lem lo a nia, min lo khawngaih duh suh. " ka ti ta zêk a. 

"Rui tawh suh. Keimah vang a ni emaw ni lo emaw nun tlakchhiatna bul a nih kha.." a ti leh a. A mita melh ranin, "I bialpa Peka lah chuan midang a kawpsan leh daih che sia, chuvang a niang i cher tak em em ni..i tuar awm hle mai. " ka ti leh hmiah. Mittui tling deuh piau hian, "Mangtha le.." a ti sep a. An kal ta daih. Romawia chuan, "La duh lo la tiang khan i be lo vang, engahmah kan ngaih lohte hi chu biak pawh kan be peih tawh lo, renew leh la" a ti a. Ka nui lui nghek nghek, "A teuh lo mai. Ka tlawm nawn dawn lo.." ka ti ro halh. Engmah sawi zui tawh loin kan tlan thla ta nghal a. Mut hmunah erawh amah bak ka ngaihtuah leh thei si lo. Ka tawngkam kha na a ti viau ang em? Mahse, ka laka a lo tawng tawh dante ka ngaihtuah let chuan a la na tawk lo zawk niin ka ngai leh thul..Rinsangkim, min va tibuai tak êm..

Ka zing tho ka phak chuap mai a. Ka thaw lah a rimchhe si. Ha ka nawt sawk sawk a, dawr lam ka pan zui nghal. Dawr ka hawn atanga 15 mins velah Nungi call ka dawng ta a. Tehdaih chuan ti rilru chungin ka pick up a. 

"Zothantluang, i va sual ve. Khatia tawngkhum kher kha a ngai em ni? Engmah i hre lo" a rawn ti nghal chiam a. 

"Engmah hriat tur ka nei lo, min hrilh lo bawk a." ka tih chuan, "A tana a harsatzia hi hria la chuan aw" a rawn ti vang vang a. Ka ngaihtuahna a buai ta deuh. Mahse, intipaukhauh luiin, "A harsa lo a niang, khati khawpa na khan min siam thei alawm le" ka ti leh hmuk. 

" A tawk a nih chu..inchhir miah suh" tih leh dah a rual daih. Eng nge maw sawi a tum le? Lalrinnungi chuan le..!