Rinsangkimi 6

RINSANGKIMI (6)

Ziaktu : Toni Râlte

Valtea rum nghut nghut leh Diki ngik feih feih chu kan ngaithla a, ngaihthlak loh tum paw'n beng a luh laklawh tawh si. Kan nuih a za bawk nen, Sangkimi phei chu a insum zo ta lo a nui khuh ta tuar tuar a. Ka khap vat. Tui a in a. Ka beng bulah, "Ti ve lovang aw" a ti sep a. 

Ka uang chak tlat. "Ti ve ila..hawh" tih leh ka lama pawh hnaih ka rual a, "Hey, i à lutuk" tih leh min keh a rual a, ka lu a lo buk ve bawk nen, "A ho lutuk, ka chak ve alawm" tiin ka pawt lui tlat. Ka nui duh miah bawk si lo. 

"Zothantluang, i ti tak tak lo tiraw? Awm mai mai teh" a ti ta hlak hlak a. A thinrim mai dawna ka hriat avangin, "A nih inneih zanah i virgin ka hawng ang" ka ti a. 

"Kha chu chiang sa" a ti sap a. Kan tih ve theih tawk infawhah bawk kan tuan leh a. Sex hmang ve lo mah ila ka lungawi a, ka hlim tawk viau. Valtea te an zawh hnuah kan va chhuak phei ve a, an thil lo ken pasta te chu an va siam a. Diki chuan fiamthu hian, "An chi bur dahna te kha chik takin en rawh aw. Nakinah i buai loh nan" a ti zauh a. An nui vak vak mai. An inkawm thei ve viau chu ka lawm mang e. Pasta kan ei lai chuan Valtea chuan, "Tluanga dam that hunah khaw hluiah han picnic ang u" a ti hluai a. Kan khaw hlui hi Hermon lamah awmin a tlang a han sang deuh a, a hla lem lo. Hmun nuam leh thengthaw tak, han len vel nana nuam ve tak mai a ni a. Tui pawh lak theihin an siam tawh a, eirawngbawlna thuk velte kha an dah sa vek a ni. YMA lamin an humhalh tha bawk a, sava pawh an tam hle. 

"Awii ka chak tawh" Sangkimi chuan a ti nghal var a. 

"Nia, a chakawm. Tluanga, dam vat teh" Diki pawh chuan a ti ve a. 

"Damdawi mum lian bula ka awm chuan na ka nei tih ka hre ngai lo reng reng" ka lo ti vel a, Sangkimi a sen ap ap mai. A lawm tho tih erawh ka hria. Ni e, a bulah hi chuan ka dam sawng sawng zel chu a nih hi maw. Kan han inei puar zawh chuan hawn lam an hnaih tan a, len rei lutuk pawh an chhungte mitmei an veng lo thei bik si lo va, ka chelh lui duh ta bik lo. Valtea nen thutthleng seiah kan mu a, "Ruati chu vawiin khan an thunun chiah" a ti a. Ruati hi zawng a la theihnghilh thei ngang lo a nih dawn hi. 

"I rilru a na viau em?" Ka tih chuan, "Ih maw, sual pawh min ti mai la. Ka na hran lo, mak ve deuh chu maw tu emaw kan tihnat hian a hnuah phuba hi kan dawng leh ngei ngei zel mawle. Tumah hi a thlawnin a tihnat theih loh" a ti ta a. Dik ka ti khawp mai. 

"Ni ngawt mai, Pathian hian ro a rel thiam asin aw" ka lo ti ve a, Kei chuan Peka te ho ka lo mitthla daih thung. Keimah ngeiin ka phuba hi ka la dawn a ni. Ka nu a rawn hawn takah chuan Valtea pawh a haw chho ve a, ani hi zu han in ve zauh a ching thin a. Sunday tlaiah hi chuan a in ve deuh ziahin ka hria. Ka hau duh lem lo naa a ruk hi chuan min zah tih ka hrereng. Ka bulah a in ngai lo bawk. Tunah pawh khan a zawng ngei ang. Pianthar miau loh chuan lo in pawh nise ama thawhchhuah atangin a ni tho a, ka dem em em lo. Mizo ten zu kan ngaihdan hi sual hlawm, sual bul ni berin ka hria. Khap leh huat kan ngah lutuk hian sual kan tipunlun zawk nia hriat changte pawh ka nei fô mai. Zu te pawh hi ni e a thatna han sawi tur chu vàng tak a ni a, marawhchu, miin zu a lo in ve emaw a lo ruih ve hian kan hmu misual lutuk thin a, amah pawh inkiltawihin zawi zawiin zu bawihah a tan phah thin ni te pawn ka hre ve thin. He lamah chuan kei chu ka rilru a zau ve phian. 

Ka nu chuan ka duh em em tam-um a lo tlan a, tui hi ka'n ti khawp a. Rawng a bawl nghal mawlh mawlh. Ka u pawh a rawn haw ve ta a,ka nu a pui nghal. Ka u hian ka hriat chinah bialpa pakhat chiah a la nei. Chupa lah chuan sàwn a thlaksan a, a tuar ve em em a, bialpa a nei duh tawh lo nge a neih leh awm ka hre miah lo. Zanriah kan ei lai chuan, ka u chuan "Ramliani chuan a bialpa chu a lalut ta nge nge a niawm e. Patea te pawn chet an tum kha" a ti a. Nu Rami pawh hi a ti duh lo, Ramliani a ti ngat zel. 

Ka nu chuan, " A va zia lo tak em aw. A fate ka khawngaih mang e" a ti sap a. Kei chu ka ngawi reng, an awm awmin awm mai mai teh se ka ti rilru tawh. Ka pa fate erawh chuan rilru an mawlh lo thei lo. Zanah pawh an inkhawm ve leh a, tlaiah khan ka han inzuttir leh a, ka zia sawt lutuk chu Lunglei pawh hi kal a ngai lo vang a ka ti rilru hial. Ka ban lah ka hmang thei ve viau tawh bawk nen. Mahse, x-ray hrim hrim chu tha ka ti tho. Nakin zel atan pawh. Sangkimi nen kan inbe char char a, "Tlaiah chaw kan ei laiin Peka nu a rawn kal a. Pawisa in chawitir loh vel te kha a lungawi loh thu a rawn sawi kual a, 'Peka phei chuan 'Min cho hmasa lo se la chuan engtimah ka ti awm si lo va, na tuar turin min cho tlat a, a pawi khawp mai' a tia te kha a ti vel a. Apa pawn a chhang duh thak lo. " a ti a. 

A fapa thiam lohna hi a hre duh reng reng lo mai chu a nia , zahte pawh a zak ve lo em mawni le. 

Hun a kal a, Thil danglam em em thleng a awm rih lo. Kar tawpah Lungleiah chuan ka nu nen kan zuk kal a, Civil Hospitalah kan zuk inentir ta a. Min lo x-ray ta a, ka nàk ruh chu chhetein a lo khi ve deuh a lo nia. Mahse, ruh pawimawh tak a nih avangin a nachhuak lo thei lo a ni. Damdawi min chawh bakah thil rit lam chawi vak lo turin min hrilh a , kan haw leh ta mai. Sundayah pawh ka inkhawm ve thei ta. Sangkimi nen kan chanchin chu Thingtlang ngang a la ni bawk a, an hre deuh vek tawh a. Pawi ka ti hran lo. Tumah hian ngaizawng ve lo se ka duh zawk. An inah pawh ka leng ka leng leh thei ta a, keimaha ka kal chu a lo hlauthawng thin. Peka te pawisak neih lohzia a hriat avangin ka nunna atan pawh fimkhur turin min chah reng mai. Peka erawh an inah tak chuan a leng ngai ta lo. Eng dang a ni lo, Sangkimi pain a han len ve tumin,"Ka fanu avangin buaina insiam a, Tluanga pawh insawisa hlum têp a nia. Chuvang chuan ka inah hi chuan rawn lawr fo lo la ka duh" a ti ta hmiah a. A lut ngam ta chiah lo a nih hmel. Dawr pawh ka nghak leh tawh a, hna ngai nitina thawh hi chu a ninawm ve lek lek zel. Kan khuaah hian Higher Secondary a ding ve tawh a, Addhoc aided a ni ve nghe nghe tawh. MA ka zawh veleh ka nuin thawh dil ve turin min ti thin. Chuti ngawta thawh theih pawh a ni si lo. Bakah teaching line lam hi ka tui vak lo. Tawngkam ka thiam lo bawk nen. Sawi tawh ang khan kan High School miss pawh chu a rawn awm ta a, Mamawii a an tiin ka hria. A hmel pawh a chhe vak lo, keini aiin a u deuh hlek ang. Zuala te ho chuan an rim thin a , Kei erawh midang laka pelhe thei ka ni lo. Nu Rami pawh sawi tawh angin a bialpa khan a rawn luhkhung ta si a, an nupain zu an bilh thin niawm tak a ni. YMA lam pawn an enthla ru ta reng a. Patea te chuan thla khat chhunga in chu chhuahsan turin an ti a , a la zàm lo ham ham viau. A fanu Mami pawh khan a nu chu a hau nasa ve viau a niawm e. A awm ang lo ve êm bawk a ni. Vawikhat phei chu min rawn be nawlh tawh, "Tluanga, ka nu awmdan hi chu a zahpuiawm ve a ni tiraw? I nu ang kha neih ve ka chak" a rawn ti tawl tawh a ni. A pa te bul Thingkahah kar khat vel chu a va phei ren rawn a, mahse, a pa nupui a lo tha vak bik lo nen a rawn haw leh a, Nu Rami nute bulah a awm ta a. Mateii pawh Patea'n Aizawlah a va hruai a, Bena pawh an inah an la phei ta hmak. Patea faten an duat bawk a, hrehawm a tih hmel vak loh. Thla tharah U Muana nen silchar zuk dawr chu kan rilruk a, ka la kal ngai lo va, a phurawm viau. Ka thutiam kha chu ka la vawng reng, remchang a la awm rih lo va, ka la tihlawhtling lo mai a ni. 

Zana Sangkimi ka han rim chu a kekawr hlim chhoin a chawn duk thluah chu min entir a, ka chek tlat tlat mai. "Ngati nge?" ka ti a. A lu thingin, "Ka hre bik lo, tukin atang khan a rawn duk ringawt" a ti mai a. 

"A na em?" ka ti leh a, "Na hran chuang lo. Anu paw'n mak a tih hmel khawp mai" a ti a. A hmain a aw a chhang ringawt tawh bawk a, tunah a chawn a duk leh bawk. Eng emaw natna tak chu a nei a nih ka ring, doctor ten an la hrechhuak lo mai mai zawk a niang. Amah pawh chuan, "Natna eng emaw tak hi chu ka vei a ni. Ti em ema han hrisel loh chu aw" a ti vawng vawng a. Ka khawngaih bawk si. Ka kuah hnai a, "Remchang hmasa berah Aizawlah va incheck up teh. Tawrh tlawk tlawk ringawt chu a tha lo" ka ti a. 

"Nia, Apa pawn a sawi a, Kan la kal ang" a ti ve mai a. 

Ka hawn thlak lamah Peka nen kan intawk a, remchang ka ti viau, mahse, chak zeta min kalpelh avang chuan ka khawih hman ta lo. Ka ui khawp mai. Chhuana pawh la piai deuh hrim hrim chu ka tum. Hun a liam zel a, U Muana bike ka lei tak avangin khawi iloa han chhuahvah pawh a nuam thin ta viau. Valtea'n lui kal a rawt leh tan a, ka nu hian a remti vak tawh lo naa a chakawm ve bawk si. Zan len deng turin kan kal leh ta poh a, Pathian zarah eng êm kan ti lo e. Sangha kan man ve nual mai. Hawn kawngah Valtea chuan, "Diki'n a period loh thu a rawn sawi a. A rai mawni ka ti deuh" a ti a. A hah vang chuan a thaw hlawi hlawi bawk. 

"Hrechiang vat se, inru u la" ka ti a. 

"Nia, nupui neih mai pawh hi ka hreh tawh lo, ka nu lah a saitica a chhuak deuh reng bawk si, in lama chetu tur hi kan mamawh tawh a ni" a ti ve mai a. Valtea te unau hi pali niin an upa ber hmeichhia hian Lawngtlaiah pasal a nei a, a dawt leh chiah mipa erawh a la tlangval a, hmeichhe ngaihsak reng reng lo, hnathawh atchilh bur chi a ni ve a. Valtea nau hmeichhia hian nikum khan Thaizawlah pasal a nei ve bawk, a nu chiah in lama che tu an nei ve tawh a, an buai lo thei lo. 

"Amah DIki hi chuan a hreh ka ring lo va, a duh ve che êm a, mahse, a chhungte hi eng nge an an awm?" ka tih chuan, "Ka va len hi chuan min be tha thei viau mai. Keini aiin an khawsak a lo tha a, Ruati ang bawk khan min iai leh maithei a ni" chu a ti lawi a. 

"Aa..dinhmun chu an care tehchiam ka lo ring lo asin. A pa saw pa tha tak kha a ni ve a" tiin ka thlamuan a. A ni lah taka Diki te hi Minpui vengah na na na chuan chhungkaw lar ve pawl an ni a, a chhan pawh lut chhuak hi an awm ve reng a, an zauin in leng han kawmte an thiam riau a. An rual ve bawk nen. DIki te pawh unau 5 an nia, mipa 2 chiah an awm. Diki hi an naupangber dawttu a ni a, a pa hi Primary School headmaster pension tawh a ni. An neinung thawkhat a, mahse, hausa over erawh an ni lem lo. Valtea nen chuan innei se ka duhpui khawp mai. Diki lah a fingvarin chet a peih bawk si. In kan thlen chuan 11 a ri thuak tawh a. Ka nuin min lo la nghak. Kan sangha man chu hralh tham a tling ve a, hnahthial kan laksa chuan a fun nghal mawlh mawlh. Sangkimi te leh ka pute pek tur ka dah hrang bawk a, ka intleuh thuak thuak a, kan mu zui nghal. Ka chau bawk nen, ka mutui ngang mai. A tukah Dawr lam ka pan leh a, ka pute pawh sangha chu ka pe a, an lawm thiam hle. Zawrh tur kha chu ka nuin thenawm hnaiah a lo hralh ve tawh mai ang chu. Sangkimi a rawn chhuk dawn a, phur húrhin ka lo nghak. A nuin scooty khalh a phalsak ve ta bawk a, a rawn tlan thla ta a. 

"Tukin ka tho chu ka luak vak ringawt mawle. " a tih chuan, "I raino niang" ka lo ti zauh a. 

"Tuin nge min rai ang?" a ti hà a. Ka nuih a za hle. 

"Chuan nizanah Lukawlh bawk khan min rawn be leh a, 'Zothantluanga thih hi i duh tak tak a ni maw? Bansan rawh" a rawn tia. 'I hmelchhia' ka tia ka dah daih. Ka block hmak tawh. " a ti niah niah a. Teh fo chuan aw. Ka ning ta hle mai. Remchang hmasa berah Peka chunga chet chu ka tum ta ran a. Palh awm thei a nih avangin midang erawh hrilh ka tum lo. 

"I duk leh em?" ka ti a. 

"Duh tawh rih lo, ka pum vang a niang a tia a nu chuan" a ti mai a. 

"Thla tharah silchar kan kal dawn tak asin" ka tih chuan, meng hnual rawihin, "Naa, ka va peih lo. I awm loh chuan ka awm peih bik lo, incheck up pahin a pite bulah ka phei ve daih ang" a ti a. Pawi ka ti vak lo. An in bul sam fai tur hlawhfa an ruai sia, thingpui lumsak te a ngaih avangin ka sangha pek nen chuan a haw chho leh ta a. Ka lung hi chu a tiawi a ni. Zanah ka han leng chho leh a, Doctori'n kan sangha pek avangin lawmthu a lo sawi mawlh mawlh mai. A nuam thin e, kan inpawh ve thawkhat tawh bawk a. Ka tana awm nuam lo tur khawpin an awm ngai lo. Pa Ruatpuia phei hi chuan min be thain min titipui te hi nuam a ti ve riau a, Doctori tak hi chu kei pawn ka la nel lutuk lo. Amah hi ka sawi thiam danin a tak..

An nupain U Mamawia te inah an zu leng ta daih a. Kan inngheng leh rial tawh. 

"Tun hnai ka awmdan hi maw a mak lutuk, ka rilru hi a let but zel ka ti mai. A chang leh ka phi chung a, a chang leh ka zawi em em bawk. Ka pms chu a ni si lo va,.na sawi reng pawh hi ka ning" a ti siam siam a. 

"I BP te check tir ve la, HB te pawh..a lo che ve deuh te a ni thei asin" ka ti a. A bu nghat ringawt. 

"Engtin nge i pms hian i awm ve thin?" ka ti a. 

"Aa..a inang lo. Tawrh miah loh changte pawh ka nei, ka period a inthlak dawn hian ka tuar na bik. Thla hmasa kha chuan Ambulance driver U Lawma khu ka ngei ngawih ngawih ringawt, chuan ka zaidam lo hrim hrim nain ka thinchhiat belh leh thin bawk. Mi ka ngei thin hi hrehawm ka ti ber" a ti a. 

"Min ngei ve ta la a hrehawm awm" ka ti zauh a. 

"Ka ngeih theih che pawh ka ring lo" a ti sap a. A hnarah tuaisakin ka fawp zauh a. 

"Tlaiah damdawi ina ka zuk kal khan peka nen kan intawk a, 'Ka ta i ni têp' a ti sup a. Ka kalsan hmawk hmawk" a tih chuan ka ter at mai. Mahse, ka insúm leh a, "He pa hi chu khawih zal deuh chu a la ngai dawn a nih hi" ka ti a. 

."Mahse, fimkhur rawh aw. Hmanrua te a hmuh chuan a that hreh miah lovang che" a ti a. A rukin ka kut ka hum ruh a. Zaninah ngei hian chet ka duh ta rum rum mai. 

Ka hawn thlak chuan Peka tawh inbeisei em emin ka kal a, mahse, ka tawk si lo. Ka phone a rik chuan ka phu zawk mai. Ka rin loh deuhin Nu rami fanu Mami kha a lo nia. 

."Tluanga, ka rilru a hah lutuk, khawngaihtakin min lo hruai thei ang em? Nangmah bak koh tur ka hre si lo va, Lodge-ah ka awm a. Nakinah a bak chu ka hrilh ang che. Khawngaihin i lo kal thei ang em?" a ti ta mial mial a. Lodge-ah daih daihte eng nge maw a tih le. Ka puih nachhan tur a awm miah lo nain a hma pawn a nu vangin min lo be ve zuk zuk tawh a nih kha, chutia min ngentu na nà na chu tiin ka inher a, Lodge lamah chuan ka tlan phei ta a. Lodge hi khaw pawn deuhah a awm a, hla tak erawh a ni lem lo. Ka va thlen chuan ka call a, kawta ka awm thu ka sawi chuan, "Hetah intêah khan ka awm. Lo kal lawk mai teh a" a ti ta zel a. Ka chhuk ve mai. Intê lam chu ka pan a, ka va luh chuan Mami chu thutthleng seiah a lo thu ran a. Vai pahnih an lo awm ve bawk. Zu rim a nam rum rum mai. 

"Kal ila" thut pawh thu loin ka ti a. A tho ve mai, vai tawng hian a vai awmpuite chu a bia a. An inthlah ve a ni mahna. Mami chu a pai khat khat mai, a in ve nual a ni maithei. Lehlamah a dinhmun hi a hrehawm ve bawk nen, a pite in lamah lah a putea nupui hi a tha vak bik lo va, an inmil chiah lo a niawm e. Mami lah a lo taima zawk zawk bik si lo nen, nu Rami te bulah let leh dawn sia an ni pawh patea te hnawhchhuah hmabak an ni a, Thingfal lamah an va awm daih a ngaih hmel bawk si, chuvangin a rilru ipikin zu te chu a in ve a ni mahna. Kal pah chuan, "Ka bialpa nen kan chhuak a, kan inhau a, min hawnsan daih alawm. Khang vaite kha chu awm lo se ka rethei ngawt ang" a ti mawlh mawlh a. Bialpa a neih awm pawh ka lo hre lo va, mi hi ka ngaihven lo khawp a kei pawh. Bike-a a lawn tur chu a lawn thei lawk lo zui. Min chelh chungin a rawn thu ve thei hram. Kan tlan nghal a, Minpui tuikhur kan thlen chuan, "Tluanga, ka luak a chhuak em mai, ka luak lawk dawn" a ti leh a. Ka dinpui a. Tuikhur lamah tlan pheiin a va luak báwrh báwrh a. A hmaite phihin a taksa thenkhat pawh a tihuh. A rawn phei leh tur chu a inchhuih deuh nge a tlu ta mai a, ka chhuk vat, ka va tlan phei a, kaihthawh tuma ka'n kuah chu min rawn pawt let vak a, kei ka lo inring chiah si lo, ka zuk bawh titih a, chuveleh Mami chu a sarak ta chiam mai a, "Min pui r'u, min pawngsual a tum" a ti ta vak vak mai. Ka hamhaih lah chu ka tho mai thei lo, amah lah chuan min pawt tlat bawk si. Tuikhur chhaka U Mawia te chu an nupain an rawn tlan chhuak nghal a, "Eng nge ni ta?" an ti chul a. Kei pawh Mami kut chu phihthlaksakin ka tho vat a, Amah lah chu a tap hlawp hlawp mai. U mawia chuan, "Eng nge a awmzia? Tluanga" hlauhthawn hmel zet hian a ti a, "Ka hre bik lo" ka ti ringawt. Mami chu rawn thuchhuakin, "Ani hian min pawngsual a ni. Lodge-ah. Chuan tunah khan a tum leh a" a ti ta mai a. Ka kàng zawk ni maiin ka hria. Engtin nge dàwt chiang lutuk a sawi theih? U mawia te chuan min melh tawn zak zak a, "Aa. Engpawhnise mi an rawn punkhawm tak tak hmain kan inah lo lut phawt teh u" tih leh Mami chu kaih a rual a. U mawia nupui Rinpuii nu te hi Nu Rami nute nen unau an ni nghe nghe. U mawia te inah chuan kan lut a, Mami authawm lo hre ve dangte pawh an rawn lang tuam tuam mai. Mami chuan, "Medical test pawh ka ngam e. Dawt ka sawi lo, ka nu awmdan avangin Tluanga nen hian kan inbe ve zauh zauh thin a. Kan sawidun ve thin, min khawngaih viau emaw ka tih laiin tiang hi a thleng leh si, Lodge-ah ka bialpa nen kan kal a, kan inhauh avangin min hawnsan a, amah hi ka be ta a, min lo hruai turin. Chuan min lo hruai a, mahse, Intê-ah pindanah min namlutin kei lo rui zawi ve tawh bawk si chu min pawngsual ta a ni. Chuan, kan rawn haw a, ka luak a chhuah êm vangin tuikhurah sawn ka luak a, a nihna takah chuan U mawia te inah hian tlanchhiat ka rilruk a, mahse, ka kalbo a hlau nge min rawn zui zel a, tuikhurah ngei pawh min sual a tum leh ta a ni. " a ti ta zat zat a. Sawi mai tur pawh ka hre lo. Mi mit lah chu ka chungah a fu thup mai si. 

"A ni lo..a va mak e aw. Mami, ti nge dàwt i sawi a?" Ka ti thei táwk. Rinpuii lah chuan, "U Mawi, Police be nghal rawh. Ka duh lo reng reng, U Rami laka phuba lak nan Mami i hmang tihna a nia. Hetiang hi chu ka palzam mai mai dawn lo, ka nute pawh ka'n be ve ang e" tih leh a phone phawrh a rual a. U Mawia pawh chuan police a be ta nghal. 

Ka thinrim hle naa, han insawifiah vak dan ka hre si lo. "Aw, a tha. Police kha be rawh u, an bulah engkim ka sawi zawk ang e. Tuna in bula insawifiah hi a tulna ka hre lo. Mami, inchhir hlek suh ang che. " ka ti ta a. 

"Medical exam an nei ang a, an hre vek dawn alawm..ka chungah hetiang i tih hi ka ring pha lo" a lo vel a, "Ni e, medical exam chu nei mawlh teh se, ka chi a nih leh nih loh kan hre mai dawn alawm. " ka ti ve ngat. Chutah erawh a hmel landan a danglam ta daih a. Mahse, a lo insawi awk tawh si, a ngawi ta daih a. U mawia chuan, "A zan a zanin an rawn chho nghal dawn e. Tluanga chu ka rin i ang lo hle mai. Kan nau hi a dik bik lo tih chu kan hria, mahse, hetiang zawnga intihnat hi chu a case a sang a nia aw" a ti a. Ani hi chu mi pangngai tak a ni bawk a, a awih hreh ve deuhin ka hria. Rinpuii erawh chuan an chhungte a be kual a, a leila zawngin a'n sawi ngei bawk a. Kei chuan, "A nih ka han haw phawt ang e, Police te chuan kan inah min rawn lam thei ang, lo kal vat vat teh se" ka ti leh hmak a. Pu Zaua chuan, "Ni e, han haw rawh. A pawi hle mai" tiin min rawn zui chhuak a, ka kokiah rawn kuahin, "I dik zawk ngei ka ring e. Hlauthawng miah loin engkim i sawi vek dawn nia" a ti dam thlup a. Ka lawm thin e. 

Ka inkhalh haw ta vang vang a, Nu Rami te nupa bakah a nute ho ka tawk nghe nghe. Patea te inah ka peng a, thil awmzia chu ka sawi a, an lo hre leh daih tawh zawk a, Nu Rami ang thawm avangin. Nuteii chuan, "Hlauthawng reng reng suh, i dikzia kan lantir hunah defamation case kan file ve rap dawn nia" a ti hmiah mai. Patea chuan, "Ngah nge Mami chuan chutia a tih ang aw ka ti zawk. Ama ruahmanna a nih ka ring hreh mang e, tun hnaiah Peka nen hian an inzui ve zauh zauh a, Peka te hian an tihtir em mawni dawn aw ka ti" a ti thung a. Ka lo ngaihtuah pha miah lo. A ni maithei ve tlat. Lehlamah mami chuan a hranpaa min huatna chhan tur a nei lem lo, amah ngei pawh a mualpho tel ve theihnaah dawta min puh ngawt ka ring lo. Peka te an inrawlh a nih ngat chuan ka nasa teh ang chu. Sangkimi'n min lo call a, tap tiau hian, "Ka thu hriat hi eng nge a awmzia?" A ti a. A insût zui nghal hlawp hlawp. A tu chuan nge maw lo hrilh leh hman ni. 

"Dawt vek a nih kha, ngaihtha takin awm rawh aw. I hriselna te khan a tuar ang e. Police an rawn kal ang a, ka dikzia an hre mai ang" ka ti mawlh mawlh a. 

"Umm ka ring che alawm. Hetiang hi chu i ti duh lo vang. Mahse, ka khawngaih che alawm" a ti a. 

"Tuma bulah engmah lo sawi ve lo la, lo nghak tawp rawh aw" ka ti nghet charh. 

Ka nu pawn min rawn be ve nghal, "Ka lo haw dawn, ka rawn sawifiah ang" ka ti a. Ka pute ina pen leh chu ka duh viau naa a tlai ve tawh nen, ka haw tlang ta a. Ka nute bulah chuan engkim a kip a kawiin ka sawi ta a. Ka nu chu a hlauhthawn êm avangin ka u nen kan hnem a, "Nu, i fapa ka nih hi. Engtin nge hetiang te ka tihtheih ang? Min ring rawh" ka ti a. 

A mittui hruk pahin, "Kan vanduai a ni. I hmingchhe lutuk tur hi ka ngaingam thlawt lo. Hmeithai kan nih vang hian ti nge maw min zuam em em le" a ti a. Eng emaw han tawh chang hi chuan kan nihna leh dinhmun vang emaw tih hi a awl ve fo thin reng a ni. Mahse, hmeithai fapa ka nihna hi inbawhbehtir ka duh lo. Muthilh theihna chi pawh ni hek lo le, Police te chu ka lo nghak ta ngat ngat a. An rawn tlanchak bawk a niang. Ka rin aiin an lo thleng hma a, min rawn lam ta ngei a, min handcuff ta. Kutkawl hi ka la bun ang tih ka ngaihtuah phak ngai lo asin le. Mami pawh a nuin a kalpui a, kan thu ho ta ran mai. Ramliani tehsek lah chuan min ankhum reng mai a, "Uichopa, ka fanu i khawih man hi i tel dawn khawp e, i nu te thleng khian man phiar che u se la ka ti. Jailah i hun tha zawng zawng i hmang dawn, hre rawh aw" a ti piap piap mai a. Police te pawn an khap ta hial. An nufa chuan zu rim an nam huam lehnghal a. Ka va ning tak. Mami erawh a tira a phur ang hûrh khan a phur tawh lo, a ngawi tluan zak mai, a inchhir leh te pawh a niang e. Station kan thlen meuh chuan khua a var titih tawh a. Stationa ka luh vawikhatna a ni hial awm e, ka bo hû mai. Thil thlendante chu min han zawt tan a. Mami chuan a tira a sawi ang khan a sawi a, Tlem erawh a dang hret. Tuikhurah kha chuan sual ka tum tawh lo va, ka namthlu ang zawkin a sawi leh daih. Ka nuihte pawh a za deuh. Kei chu min han sawitir ve ta a, min lo call atanga engkim mai chu fiahfai takin ka sawi ta vek a. Police pawh a bu ve nghut nghut mai. Chutah Nu Rami chuan rem leh rem loin, "Ka pu, Tluanga pa hi ka pasal a nia, min boralsan tawh a. In leh lo hi an ît em em a, tin, a nu ka lan avang hian min haw bawk. Chuvang chuan phuba lak nan ka fanu hi an hmang a ni" a lo ti ve sek a. A sawi ngai a sawi nawn zing bawk si, Police pawh chuan, "In nufa hian in rui hle mai a. Kha ka pi phei chu men pawh i meng peih ngawr ngawr a nia. In dik vek chu ka ring chiah lo" a ti ve ta fawk a. Mami chuan, "Ka pu, dawt kan sawi lo. Engtin nge hetiangah dawt ka sawi duh ang" a lo ti vat. 

Kei chu min rawn melhin, IO chuan, "I pawngsual lai chuan a la rui viau em?" A ti a. Ka nui tawp, "Ka pu, ka sual lo. In chhungah ka va lut a, vai pahnih pawh an lo awm ve tak e ka pu. An ni khan an hrechiang viau ang, Tunah pawh an la awm ka ring" ka ti ta chul a. A tirah khan engvanga ngaihtuah chhuak lo nge maw ka nih le. IO pawh chuan a lo ngaipawimawh viau mai a, "Chu! Mami pawn chung vaite chu thuhretu atan i hmang thei dawn a nih chu. A rang thei ang bera han hmuh a ngai a nih chu" a ti ta zung zung a. Mami erawh chuan, "Vai an awm lo, tumah an awm lo. Lodge nghaktu ka dil a, khatah khan Tluanga chu intêah khan ka lo nghak a ni. Midang an awm lo" a ti ve leh a, mahse, ka sawi chian êm avangin Policete chuan kan VCP no min dil a, ka pe a, a save ta hmak mai. Nu rami pawh a rui a reh chho a, a pentawng chu a zal tawh hle, a thaw leh hawk thin. 

"Tihian nakinah doctor kan va hmu ang a, exam ka te kan nei phawt ang chu. Chumi hma chu zothantluanga pawh lock upah i awm rih a ngai dawn a ni" a ti ta a. Ka hreh lem lo, ka ril erawh a tam dawn tan ta. Ka phone kha an hren rih avangin hman ka dil ta tawp a, Lungleia ka thianpa biain ka chanchin chu ka sawi thuak thuak a, chaw min rawn pe turin ka ti ta ngawt a. Kan inkawm nasa ve bawk a, ka zak lem lo. Ani pawh chu ka rin aia hmain a lo thleng a. Chawhmeh lah chu a rawn dah tha hlawm ngang mai. Lockupa awm e ti lo chuan ka ei teuh mai. Ka thianpa bulah chuan a kimchang deuh zawkin ka hrilh ve leh a, "Nang meuhin hmeichhia i pawngsual a nih chuan khawvel a chhe tawh hle tihna a ni mai" a ti lung lung mai. Min rintawknaah ka lawm khawp mai. Tlai lama min ngaihven leh tur thu a sawi a, an in sakna lama an buai em vangin min hawnsan ta a. Ka khua a har ve deuh. Lockup pawh chu a rimchhe hran lo, faina lama hma kan sawn tawh bawk a. Awm ve dang an awm lo va, a ninawm angreng. Dar 11 a pel tawh tihin constable pakhat hian min rawn la chhuak a, "Case an withdraw leh a nih chu, tikhan i haw thei" a ti ta mai a! A va ho leh si ve aw. Lawm nachang pawh ka hre vak lo. Thudik kha pholan ka chak zawk mah a nia. Mami chuan a ngam leh ta lo a nih ka ring ber. IO khan min rawn hmu a, "Kha an nufain an rawn kal leh a, case laklet leh mai an duh thu an sawi a nih kha, thu i ngam danah an ngaingam leh si lo a nih hmel. Defamation case i file dawn em?" A ti dam thlup a, a nelawm reuh phian mai. 

"Ka va hrethiam lo ve aw, ka chhungte ka'n rawn ve phawt ang e, ka patea te chuan an duh ngei mai a. Mahse, ka nu duhthlanna ka zahsak ber thung. Chuan ka pu, sawi chi a ni em ka hre lo va, tuna kan case hi amah Mami hian a duhthu leh min tihmualpho a duh vang hrim hrimah ka ngai thei lo, tihtirtu a nei a nih ka ring. Tuna case an laklet leh chhan pawh hi a hlauhthawn vang a ni bawk ang" ka ti ta ràwih a. A bu nghut nghut mai. "A tawp han thleng law law ila a tha tur a nia. Kan tunlai dana hmeichhe humhalhna nasa lutuk hi kei ka rilrem mang bar lo va, kan nau pakhat pawh jailah a luh phah hial tawh a, tianga dawta inpuh hi ka huat zawng tak a ni" a ti ve ta mawlh mawlh a. 

Kei pawh ka chhuak ta a, pawn boruak chu ka hîp vang vang a, ka thianpa kha ka chin ka va hrilh ve leh a, "Riak la, naktukah haw mai la" te chu a rawn tia. Ni theia ka hriat loh avangin ka hnial thei hram. Ka nu ka be leh a, a lawm khawp mai. "Tuman i tihsual an ring lo, i thiante phei chu an rawn leng reng a, an thinrim nasa mai. Kan vcp pawh a rawn leng ve nawlh mai a, a awih lo khawp mai" a ti mawlh mawlh a. 

"Nu, defamation case hi kan awrhtir ve mai dawn em ni? " ka tih chuan, "Akhai! Mama, thil chhe ber hi chu thlen loh hram zel a tha ngai e. A lehpek a awm zel thin ka tih kha. I rawn chhuak tawh tho a, lo haw vang vang zawk rawh" a ti a, ka rindan chiah a ni. Ka nu nen kan inbiak zawhah Sangkimi ka bia a, a lawm lutuk chu a tap deuh par mai. "Lo haw vat la, zanah lo chho hram rawh aw" a ti a. Ka e aw ve mai. Kan khaw sumo counter lam ka pan ta vang vang a, ril a tam rih lem lo bawk a, chawlh pawh ka chawl lo. Kawmthlangte sumo a lo la awl hlauh a, seat ka chang ve hram e. Chanchin min zawt sap sap hlawm a, ka hrilh ve mai. Ka bul a ni bawk a, min tan zawng vekin tawngka an cheh a, driver phawk zet mai Zodina chuan, "Tlema tlemah dailuah leh alu i zuk hmeh ve tep a nih chu. Táng ve ren rawn la, lo kan chea chhangthawp ngei mai rawn pek che ka chak nen" a ti a, kan nui dar dar mai. Kawng lakah ka chauh deuh vangin ka muthlu bawrh bawrh a, kawng a tha tawh bawk a, khua pawh kan lut har lo ve. Patea te inah pen zuai ka duh avangin bazarah ka chhuk a. Ka nu pawh a lo awm ve reng mai. Ka luh rual rualin patea chuan, "Ngah nge case i rawn file ve nghal law law loh le aw. Han inchapchar law law a chakawm asin le" a ti nghal tûn tûn a. 

"Ka nu hi lawm" ka ti ringawt. Ka nu chuan, "A tha ber lo alawm. Kan chhungkaw dinhmun heti hi a nia, Rami te lah an rapthlak ve bawk si, Kha lam kha chu sawi ri tawh suh u" a lo ti dam diai a. Bena chuan min rawn pawm cheng cheng a, ka luh zin ve avang hian min ngaina ve tawh viau. Thil leina ka pe ta ringawt a. A tlanchhuak nghal vang vang. Patea bulah, "Amah Mami hi kawm ka la duh, tu nge he thil hi tihtir ka hriat a ngai. Peka a nih vaih chuan na lua awm loin ka che ve dawn a nia" ka ti ta a. 

"Ni e, be ngei ngei ang che. Ama rilru puakchhuak a nih hi ka ring hlawl lo" a ti ve bawk. Ka nu nen chuan kan chhuak a, ka pute kan tlawh ve leh zuai, an ni pawn Mami biak ngei chu tha an lo tia. U muana'n, "I fimkhur hle a ngai a ni. Hote anga langah pawh thiam loh i chang thei a nia. Ti nge maw i vanduai theih em em ni?" A ti a. Dik ka ti khawp mai. Mi min sawina mai mai chu eng he huah ka ngai duh lo, Sangkimi'n min rin chhung chuan tupawn min ensan mah se, ka buai lo ve. In kan thleng a, ka inbual phawt. Chaw kan ei zui ta a. Ka u chuan, "Ramliani a rak nasat nen, tunah chuan an ngawi ve dâk tawh ang chu. Mami pawh a chhuak vak ngamin ka ring lo" a ti a. 

"Ka bialpa te kha a ti ve ngawt a, bialpa pawh a nei tak tak mawni le, ka hre ve miah lo" ka ti a. Ka u bawk chuan, "Tuikhur veng ami Sawma nen khan tlem lai kha chuan an nih ve kha..Chuan Peka nen an inphur hi ka hmu zauh zauh bawk" a ti a. Kei chuan ka lo hmu ve ngai lem lo. Peka nen daih daiha an inzui hi thil pangngai a ni tlat lo, a hma zawnga an inbiak ngai pawh ka hre si lo va. 

Valtea a rawn lang a, "Jailah i tang daih tawh ang chu tih nak alaia" tiin a rawn fiamthu hlut a. 

"Pawngsual kher pawh a ngai lovang, a easy hmel êm mai" ka lo ti liam puat. Ka nuin, "Zanin te chu leng lo ve ula, zahte pawh a zahthlak alawm" a lo tih chuan, "Changtunu pawh khi a na ngaih ngaih em mai. Bakah zah a ngai lo. Langsar taka awm zawk tur" Valtea chuan a lo ti zung zung. ka insiam a, kan chhuak dun leh ral ral a. 

"Diki chu a lo rai tak tak alawm. Vawiinah a intest a" a ti ta sup a. 

"Chuan" ka lo ti var. 

"Remchang hmasa bera tlan dun kan ti ta a nih kha. Ina luhpui nghal kha a zak ve sia, Tawipui North-ah ka nite bulah kan zuk tlan ang ka ti deuh a" a ti mawlh mawlh a. A tha ka tihpui viau. 

"Pa i ni tawh dawn bik chu a ni siah. Ka va lawmpui che ve" ka tih chuan kan nui dun hawk hawk a. Mami biak ka duh thu pawh chu ka hrilh ve a, tha a ti khawp mai. Mahse, fimkhur turin min chah a, keimah chauha biak ka duh avangin ka sawm ta lo mai. Sangkimi te in ka han thlen chuan tlem chuan ka zak ve deuh, a nuam miah lo a nia aw. Pa Ruatpuia'n min lo be var a, "I chanchinte ka lo hria a, a zia lo hle mai. Ka tlangval lai te min hriatchhuahtir alawm le" a ti a. 

Sangkimi chuan, "Pa, sawi teh, tiang ang hi i tawng ve tawh mi?" A lo ti vat a. Doctori chuan, "I pa phei chu an buai rei angreng alawm. Kha tah khan kan inngaizawng tawh em kha'h" tiin an pa chu a melh a, Pa Ruatpuia chuan nui vur vur chung hian, "Ngaihzawn tawh kha, i thik theih êm kha mawle. Amah vang khan min va ankhum zing tak,." A ti a. Kan lo khi tháw hlawm mai. Sangkimi bawk chuan, "Mawh, Pa , sawi teh" a ti leh a. A aw a then te te hnuah, "Ka ni fate nena inkawm ve thin kei phei chuan nau ang thawthanga ka en ve a nia. Zan khat a zu rui chu amah hruai turin Tluanga tawn ang chiah khan min ngen a, a rui bawk si an ina hawn a hreh si kha kan inah a riak ta ringawt a. A tukah a nu in a rawn lam a, a àng nghal chiam chiam bawk. An hawn hnuah ka pawngsual angin an sawi ta a ni. Aizawlah te medical exam neiin kan kal hial a, kei lah zep nák emaw ka virgin pial si..hnehna ka chang ta a ni. Chuvang chuan Tluanga dinhmun hi ka hrethiam khawp mai. Hetianga inpuh hmingchhiatna hi a thleng ta fo mai a, thenkhat hi chu an sum duh vangte pawh niin ka hria" a ti ta charh charh a. Mak ka ti hle. Pa Ruatpuia nen kan thil tawn inang lutuk chu, mahse, ka lawm ru angreng. A chhan chu a lo tawn ve tawh avangin min hriatthiamna thui tak a nei dawn tlat a ni. 

Doctori chuan, "Ani zurui i lo buaipui vang kha a nia. Tluanga, nang pawn hrereng rawh, thang a ni fo a nia, i tawng tawh a, inbumtir tawh reng reng suh" a ti ve mawlh mawlh a. Ngaihthlak a nuam thin e. An mut hnuah inthlahlel takin kan infawp vawng vawng a, "Peka ngeiin min lo thawn a. 'I bialpa chuan a nuhrawn fanu a pawngsual ' tiin..ka buai zui leh a, min thawng êm a tin ni" a ti melh melh a. Peka chu ka ringhlel ta telh telh mai. 

"Min ring tiraw?" Ka ti sup a. 

"Lutuk" a ti ve mai a. 

"I rin ang ngeia awm ka tum alawm. Khatiang thil tenawm ka tih duh ring suh. Sangkim, ka hmangaih che" ka ti ta thláwt a. Hmeichia ka hmangaih che ka tih hmasak ber a ni. 

"I sawi har ka lo ti lutuk a, sawi hmasak ka hreh sia. Kei pawn ka hmangaih che. Intawng tur diktak kan ni i ti ve em?" a tih lehzel phei chuan ka tuiral titih. Lungchim takin ka fáwp leh ta a. 

Ka haw thla chu Mami ka call ta nghal, vawi hnih ka call hnuah a rawn la ve hram a. Tah aw deuh hian min chhang, "Mami, mimal takin ka haw lem lo che. Nang pawn min huatna chhan tur i nei lo. Thil thlen dan kha kan hre ve ve a, thil eng emaw sawipui lawk che ka duh a ni. I hman em?" Ka ti a. 

"Tunah maw?" A rawn ti há. 

"Aw..ka lo pan zawk dawn che nge " ka ti leh a. 

"Aw lo kal la, in hnuaiah ka lo awm ang" a ti ve ta mai a. Ka lawm hle. Engkim hriatchian vek duhin Mami te in lam chu ka pan ta nghal a.