Rinsangkimi 5

RINSANGKIMI (5)

Ziaktu: Toni Râlte

Min rawn hnaih rual chuan ka theihtawpa ringin, "Valte" ka ti ta tuar a. Pi Rengi pawh chu a ding ve chawih. Valtea rawn tlan lut chuan ngaihthat loh hmel zet hian min melh a, "U Feli be rawh. Aman min jection rawh se" ka ti nghal tàwng. Pi Rengi chuan aw dam deuh hian, "Ngati nge ka chiu chu i duh loh? Ka kut a dam viau asin" a ti a. 

"Peka nu i nih vang hrim hrim pawn ka ring lo che. " ka lo ti hmiah. Valtea chuan U Feli chu a be mek a, damdawi in thlang lawka awm a ni bawk a, a rawn chho ve mai. A rawn luh chuan, "Eng nge ni ta? Buaina awm mi?" A rawn ti lut a. 

Kei chuan, "Peka nu jection hi ka duh lo, chuan damdawi hi a thar min hmansak teh, khawngaihin" ka lo ti vat. Ka hmelhmaiah ka tilang nge ni dawn ni, engmah sawi ta bik lo chuan a chhuak vut a, Pi Rengi pawh a chhuak ve nghal. Hlauhthawnna mak takin min tuam reng avangin, "Valte, va zui la, damdawi an thlak em tih va en teh" ka ti nghal. A chhuak ve nghal a. A hnuah U Feli leh Valtea te chu an rawn lut a, Valtea chuan buk nghut pahin, "Engkim a tha e" a ti zauh a. U Feli pawh chuan min chiu zui nghal. A ruk deuh hian, "Eng emaw ngaihthat lohna tur deuhte a awm em ni?" a ti sap a. 

Pi Rengi awmdan leh a thil sawi zawng zawngte chu ka sawi ta vek a. A chek hlak a, "Engmah a ti tak tak ngam lo vang, a fapa hi a duat ve êm a, hlauthawng miah suh. Thil thleng a awm chuan min lo be vat dawn nia" a ti a, thla a muang ta deuh. U Feli hi kan khuaah kum 7 zet a thawk tawh a, khaw mi leh sa ang vekin kan en tawh a ni. Nula senior ve tawh tak a ni a, bialpa lam hi a ngaihsak tehchiam lo niin a lang. A fel bakah a kut a dam a, a tlawmngai thei bawk nen, khaw mite pawn U Zuali nen hian kan koh tam pawl an niawm e. Min chhuksan hnuah Sangkimi'n a lo call a, kan inbia a. Tihhlauhthawn ka duh loh avangin Pi Rengi vel chu engmah ka hrilh lo thung. Pi Rengi a ngeizia thu a sawi niah niah a, "Ka zun a în a, anuin beer min pe a, ka rui deuh a nih chu" a rawn tih chuan ka nuih a za deuh. Nia, beer te, zu tuitlingte hi zun in atan a tha ve riau a. 

"A na viau em?" Ka tih chuan, laih hmel zet hian, "Na ve e. I ninawm" te chu a rawn tia..zun a in chuan khawi lai nge na kan hriat vek thin kha maw..hehe..

"I kai sia, muhil tawh la" ka tih chuan a vin thak a, "Ka kai kher lo aw. Zothantluang" a rawn ti hlar. 

"Beer ngawl kha i vei ang e aw" ka ti leh hram a, "Beer chu englai pawn kan fridge-ah a awm. Ka in peih lo" te chu a rawn tia. A aw a mutchhuah hmel tan tak avangin kan inmangtha ta a. Valtea chu ka khum bul khum ruakah a mu a, "Ka tlaivar ang, muhil rawh. Kan muthilh lai ten a rawn chet a hlauhawm" a ti a. 

"Tlaivar a ngai lo, kawngka saw kan kalh hmiah zawk dawn nia..ka na a chhuah ka ring tawh rih lo" ka ti a. Kawngka a ri rak a, Pi Rengi chu a rawn lut leh a. 

"I inenkawlna senso kha kan tum tur a ni a, in lo chhut dawn nia. " a rawn ti a. Ka ngawi reng. 

"Enteh, Tluanga, ka fapa a nih vanga ka tan ni loin nang pawn dik lohna i nei ve tho ang, Sangkimi nen an inkarah i tlazep a, ka fapa hian Sangkimi khi a atchilh êm a, rilru fim a hmang hman lo a nih kha.I inenkawlna lah kan tum vek dawn a nia, lawm hle rawh u" a ti ta zêk a. Zak thei lo hi ka va ti tak e aw. Ka chhang duh chuang lo. Titau titih hian a chhuak ta ringawt a. Valtea chuan kawngka a va kalh nghal, zun bur pahnih kan inchhawp tho. Kei pawh damdawiin hna a thawk tan a, mutchhuakin min zêm tan. Valtea pasaltha thawnthu play ngaithla chung chuan ka muthlu ta duar duar a. Eng ém ti lo chuan zan hun pawh kan hmang liam ve thei ta a. Ka harh chuan Valtea a lo la hnàr sûk sûk mai. Tihharh hlau takin ka inbeng kang a, ka nàk na avangin ka insehruh nasa hle thung. Zun bur chu lain ka inpaihthawl ta hem hem a. Ka zàng hawk thei nia. Valtea pawh ka thawmah rawn harh vein a rawn tho nghal thuai a, kawngka chu a va hawng nghal. Vawiinah chhuah ka dil ang ka ti rilru a, in lamah inenkawl ila, ka zia deuh hunah Lunglei lama liamthlak leh chu ka tum a ni. A chhan chu damdawi in chu ka tan a ralti tlat! Bakah engtin em em min enkawl chuang lo va, venflon an vuah tho a, Damdawia min chiu mai kha chu ka nu pawn a ti ve thei mai. Sangkimi ka hmu khát tur erawh chuan min tihnual deuh. Chhun lam duty tur Nu Zaiteii a rawn thleng ta bawk a. Thaw a veng huai e. A rawn luh chuan a nui sáng a, Nizan eng nge ka an te min zawt ve luam a. Pi rengi vel chu ka sawi duh ta lo. Valtea hawn hnu lawkah ka u pawh a rawn lang a, chhuah chu min dilpui turin ka ti a. School banah a rawn pen tur thu a sawi, tlai a hlau sia a kal zui nghal. Ka kut veilamin zei lo zetin fiante chuan ka ei a, Sangkimi a rawn lut hlawl. "Khawi" tih leh min barh a rual a, "EI ve rawh" ka tih chuan, "Ka ei tawh alawm. EI teuh rawh aw" a ti siam siam a. Chaw ei pah chuan chhuah dil ka duh thute ka sawi a, a hmui tipawrhin, "Hmm, min van ngai lo tak" a ti sar sar a. 

"Ngai lutuk, mahse, Peka te ho an lo hawn phei chuan ka la che tha thei meuh si lo va, ka tan inven reng kha a buaithlak alawm. " ka ti ta a. A hrethuam ve a niang, "Rawn haw teh se, ka be lo chak tawh" a ti nghat a. 

"Tihnat mai che pawh hi a hrehin ka ring lo, fimkhur la, zanah phei chuan chhuak suh" ka ti nghet charh a. A bu nghat nghat. 

Ka ei kham kam ka thuah laiin ka thian dangte ho, Zuala, Hriatpuia leh Romawia te ho an rawn lang ta a. An ni hi kan buai lai khan an awm lo va, Thingfalah inhlawhin an kal a. Nizan tlai tawh takah an rawn thleng ve chiah a niawm e. Thil awmdan a kip akawia an han hriat takah phei chuan an tha a za hlawm bawk a, "Kan lo awm lo chu aw..Rawn haw teh se, mikhual tlangval lakah khawtual val kan zàm lo ve. An hre viau ang" tiin an inhrosa ve nasa mai a. Sangkimi hi chuan a hre vak hlawm lo naa, an ni ho hi chuan an hre viau. Mahse, an zah ru deuh niin a lang. Mahse, Sangkimi a fel hlauh a, a lo be ve nghal bawrh bawrh. Khuaah hian an awm tlem hrim a, Class chawlh lai pawn an inhlawh ve deuh reng mai a ni. Sangkimi'n ka tiffin a va sil chhung chuan, Zuala chuan zawi deuh sup hian, "Bro, i va zei awm ve a, i kherh thlu tha bik e" a ti sur sur a. Ka nui ringawt. Romawia chuan, "Ani te zawng a tihdan a hria alawm, nangte chu i che nghal ut ut zel a" a lo ti a. Kan nui ham ham mai. A ni lah taka Zuala hi chu lerh pawh a lerh, luck pawh a luck, Hriatpuia erawh cool deuh tak, a ruka lerh ang chi kha a nia. Romawia hi chuan ngaihzawng nghet a nei a, an rinawm dun viau. 

"E taka! High school zirtirtu nula a rawn awm thar dawn an tia..kei aia upa pawh nise ka bem dawn" Zuala chuan thawveng zetin a ti a. 

"Khawi mi nge? Thil hi i hre thei" ka lo ti vat.

"Tukinah ka nuten an sawi ka hre tlat, Pu Hmuaka te in hnuai a luah dawn an tia. Tawipui khua leh tuiah khan ka awm si lo va, an post an tih kha" a ti a. 

"Hmelchhe deuh ni ta se" Hriatpuia'n a lo ti zauh. 

"Ho lutuk, a hlawh a tam dawn sin" a ti lehpek. Sangkimi a rawn luh chuan kan lo ngawi thap sia, a lai deuh nge, "Min rel a ni maw?" a ti a. 

Romawia'n, "I felzia thu kan lo sawi zawk mawle" a lo ti zauh. An leng ve ta reng a, Sangkimi erawh in tihfel bakah insuk te a ngaih avangin a haw chho rih a. Doctori pawn damlo inentirte a en zawhah ward a rawn fang a, "I khawsik a awm tawh lo a ni maw? Lu na i la nei em?" A ti mawlh mawlh a. Ka neih tawh loh thu ka lo sawi a. "Vawiinah hian a theih hram chuan chhuaha in lama inenkawl ka duh khawp mai. A khawharthlak ve lutuk a, ka zia deuh veleh x-ray tur chuan Lunglei ka kal mai ang a te ka lo ti ve a" ka ti ta ràwih a. Min rawn melh zauhin, "I inhuam tawh a maw? I ban kan cherna hi kan phelh chuan i fimkhur a ngai dawn a nia" a ti a. 

"Aw ka fimkhur thei ang" ka ti ringawt. 

"Engpawhnise, i chhuah dawn pawn tlai lamah ni rawh se, tlaiah ka rawn kal leh hunah kan sawi tha dawn nia" a ti siam siam a. U Zaiteii'n antibiotic-in min jection nghal, an chhuak ta a. 

Hriatpuia chuan, "A va han chhe lo tak, Dr. Saidingpuii hi chu..nuthlawi se ka duh sa" a ti a. 

"A kum a tam ve tawh ang, Sangkimi pawh kum 18 a tling tawh a nia" ka ti thung. Thiante nen chuan engkim hi a hahdamthlak vek mai, zial kan zu ru thul. Sangkimi te lo awm atangin ka luh vawihnihna a ni ta. Chupawh ka vanduai vang zel. Dam that ver vawr ka chak takzet a ni. Thiante ho chu chawhnuah an haw ta hlawm a. Zanah ka chhuah pawn kan ina an rawn len tur thu an sawi kha maw. Mahniin ka awm leh ta. Khua a lum deuh bawk nen, ka mut a chhuak, ka muhil ta a. Ka u thawmah ka harh leh, serthlum min khehsak a, ka ei mawlh mawlh. Doctori chuan a sawi lawk tawh angin tlai dar 4 rik hma deuhin min rawn hmu leh a. Vawiina ka awmdan te ka sawi takah chuan, "Ni e, hetah awm ve dang an awm si lo va, a hrehawm ve ang. In chhuak mai dawn nia, damdawi erawh ka chawh nual dawn che. I u khan va lamkhawm se la, In bill hi chu Rengpuii te pek tur ni khan ka lo hria a, amah ka lo pe mai dawn nia" a ti ta a. Ka lawm hle. 

Ka u chuan, "A ngai lo, doctor,keimah niin kan intum thei ang, ka nu duhdan a nia. Nakin zelah sawi a awm loh nan senso chu kan tum zawk mai ang" a lo ti a. Ka nu nen an lo sawi dun tawh a nih hmel. Doctor pawh chuan nawr luih ngam chi a ni lo tih hriain a hnial ta lem lo va. Ka u pawh chuan damdawi a va lam khawm ta zung zung a. Kan haw hmaa hmuh leh ka duh sia, Sangkimi ka call ta ngawt a. 

"Hei kan haw dawn a, min lo thlah ve la" ka ti a. 

"Lo chhuk ka lo tum ve chiah a" a rawn ti. Ka dah nghal a. A rawn thleng rang viau, ka bed sheet leh rizaite chu min thlehfelsak vek a, bungrua em em kan nei lem lo bawk a; kan bawr tehchiam dawn lo. U muana'n an car-in min rawn hruai thei dawn a, a tihzia viau. Ka u pawh chuan hun thawl min pek ve a tum nge nurse bulah a va phei daih a, khumah chuan kan thu dun ran a, ka fawp ngam lo, ka ka a rimchhiat ka hlau. A kut ka vawnsak a, "Sunday chawhnuah lo leng la" ka ti sup a. 

"Ka hre lo le, ka lo tum ang aw. Mahse, kalpui tur ka nei lo e" a ti a. Nungi hian Peka tihpui a tum tlat avangin an inkawm ta vak lo nen, "Diki nen in lo kal dawn nia, Ka lo hrilh dawn nia. Mahse, nangman scooty khalh lo la" ka ti a. A bu nghat. 

"Ka ngai dawn che" a ti sep a. 

"Kei deuhin..Kan inbe reng dawn tho alawm, chuan ka tha vat ang" a kut vawn ngheh sauh pah chuan ka ti a. 

U muana car rawn thleng chu tukverh atangin ka va hmu a, "Kan kal ang aw. Thlen veleh ka lo bia ang che" ka ti a. Ka u pawh a rawn lut. Kan bungrua chu a keng a, kan inzui chhuak ta hlawm. Khaw hran daiha kal tur pawh kan ni lo naa, veng kar a inhlat ve deuh avangin kan inthlahlel lo thei lo a ni e. Kan inthlahliam ta a. Peka te in kan tlan pelh chuan, U muana chuan, "Peka pawh a rawn haw kha, lukawlha kha Zonuna an tiin ka hria, a putea fapa a lo nia. Ka beng chak ngawt mai" a ti nghut nghut a. Ka u chuan, "A rawn lawr ngam rih pawn ka ring lo, kan veng tlangvalho an thinrim êm mai" a lo ti ve a. Ka thlavang hauha kan veng tlangval thinrim chuan min tilawm. Mahse, a ruka chawh min titu tur chu ka hre tho. Sangkimi bialpa ka nih avanga min thiktu te ngei chu. Ka pawisa lo e. In kan thleng a, kan han indahfel hnuah inbual ka chak tawh êm vangin tuilum chi-alin ka inbual ta a. Ka ban dinglam chu ka la hmang tha ngam chiah si lo, ka ti hleithei lo va, ka nuin min bual ta ngawt mai. Ka harh huai nghe nghe. Zanriah ei a la hun chiah lo bawk a, thutthleng seiah ka mu zal mai mai, Sangkimi nen kan inbe pah bawk. Eirawng a bawl avangin ka dah ta rih a. Ka nu chu ka bulah rawn thuin, "Mama, Kei chu ka rilru a nuam thei lo. Sangkimi ka duh loh vang ni loin nakinah buaina lian zawk hi kan la tawn ka ring tlat nia.. Rengi te lah a unaute hoin thil an tithei si, fimkhur hle teh aw" a ti seuh seuh a. 

"Hlauthawng suh, khawtual zawk kan nih hi, min tantu pawh a tam zawk an ni. Eng boruak mah an nei zui ngam lo vang" ka lo ti a. Nute hi chu an hlauthawng hma ve bawk a, ka hrethiam reng mai. In chungpa pu Vana te nupa an rawn chhuk a, an nu Nu Hmingi hi ruh khawih thiam a ni ve a, "Ka lo khawih chhin dawn che mi?" A tih chuan, "Ka nàk hi min han dapsak teh. A na reng chuang lo va, mahse chet hlek hian dik lo chu a awm a ni" ka lo ti vat a. Tel a va la a, a kutah tam tham deuh chulhin an nuai lum te tê a, ka nàk chu a khawih ta a. A dapna lai nazawng a na lo va, a na lai a khawih chuan ka eu zawk zawk mai. 

"A auh deuh em mawni le? Nge khi a awm a ni maithei" tih pah chuan a zut a zút a. A hmet kalh relh relh bawk. Na viau mah se, ka rum duh bik lo va, a'n hmet zo chu ka dam huaiin ka hria. Ruh tam tak a lo zut dam ve tawh bawk a. Pu Vana chuan, "Fimkhur hle tawh rawh. Rengpuii te chhungkua hi an sawi hmangin thil an titheiin pawisak an nei vak lo an ti tlat. Thawkkhat lai pawh khan a pasal ve angreng deuh nia an sawi hi a ruang an chhar tawh a nih kha, an zeldin thu nge hriat va ni suh, Rengi nen khan sum chungchangah nasa takin a hma zanah an lo inhnial tawh a, a tuk zanah a ruang an hmu ringawt mai a ni. Mahse, Police lamah an chhungkhat an tam a, tun thleng pawn tu nge a thattu tih an la chhui chhuak lo chu a nih hi.." a ti chuar chuar a, a tuibur hmuam chu tukverhah a va pik nghal zuai bawk. Tuibur hi a heh thawkhat ve a, a hmuam reng ni maiin ka hria. Nu Hmingi pawh chuan, "Tlema tlemah kan chán lo chauh che a nih kha, mahniin tla hrang tawh suh. I nu leh i u heti hi an nia" a lo ti bawk a. Min hlauhthawnpuina chu min duhsak vang a ni tih ka hria. 

An chhoh hnu lawkah zanriah kan ei a, ka nuin, "Naktuk tlai chu i pu Ngura'n a thla hual nan arpui tuilai ka talhsak dawn e a tih che kha. Kan zuk ei thla dawn nia" a ti a. Ka pu hi chu a tha ve ngawt mai. Amah bak belh tur hi kan nei lo reng bawk a. Zanriah ei khamah tv ka en mai mai. Phone pawh han type vel a awlai rih si lo va, ka khawih peih rih lo. Thiante ho an rawn lang ta ngei a. Fiamthu thawhin kan nui dar dar reng mai. 

Romawia chuan, "Peka chu ka hmuin ka hria, tlaia dawra ka kal khan. Amah ni thànin ka hria" a ti a. 

Zuala'n, "Ti nge i hnek nghal lo mi? " a lo ti zauh. Kan han nui leh rih. 

Hriatpuia'n, "Lukawlha pawh kha rawn zin leh se ka ti ngei mai, ka kuttum a dawng ve ngei dawn sia" a lo ti thung. Chutiang lam hawi chuan kan titi kan titi hlawm a, ka nu ngawi renga puan lo zai chuan, "Khatiang kha a sawi pawh sawi tawh suh u. Lehpek awmtir hian thatna a nei thin lo, a inchherchhuan chho zel thin" a lo ti nem diai a. Kan ngawi thap. A hlauthawng tih ka hre mai. Mipa a ni ve lo miau a, min ngaihtuah vang tih pawh ka hria, mahse,mipa rilru atang chuan a tlawmthlak bakah rilru a na tel a, chhungrilah hian min kher ngat ngat mai a ni. Hman deuha Aizawl tlangval pakhat, tu ten emaw an pawngsual niawma sawite kha awmhmunah kan lo thinrimin kan lo inhrosa kûk kûk mai asin. Mipa rilru tur kha kan dàwnpui thiam tlat a, kei pawh Peka te kutthlawn ka bat hi tlak ngei ka duh a, ka tum bawk. Eng thil mahin min dal ka remti lo. 

Thingpui vawi hnih lai an in zawh hnuah min tinsan ve ta a. An rawn len tawh chuan ka û hi a ang hlak hlak zel, an innel vek bawk a, an ngam si, "Thingpui lum rawh" an ti deuh sek zel a, a ning ve thin a ni. Kei pawh khumah insawn pheiin ka mu zangthal at a, mut zangthal hian ka nàk chu a na lo thei ber. Sangkimi ka call a, hritlang aw lêk lêk, aw thàm chhil chhel hian min lo chhang a. 

"Ti nge i hritlang elo?" Ka ti vat a. 

"A mak lutuk, ka aw hi a rawn chhang ringawt, na engmah ka nei chuang lo" a rawn tih chuan ngaihthat lohnain min tuam nghal. 

Mahse, ka sawi hlauhthawnpui duh lo va. "Tiang kha a awm ve alawm, ka u pawh a ni thin" tiin dawt ka sawi ta ringawt. 

"Naktukah Anu in bial a fang dawn a, Apa nen chiah kan awm dawn sia, apa lah hi a leng peih ve bawk si, Peka hi a lo kal ang tih ka hlau e" a rawn ti a. 

"A va buaithlak e aw..Nungi riahpuiah sawm la, mahse Peka te nen an inzurà sia tiraw?" Ka ti a. 

"Chu reng, thian em em ka nei bawk si lo. Nang lah leng chi i la ni bawk si lo va, mahse, ka ngaihtuahawm loh aw. I lo hlauthawng vak ang e" a ti hnuhnawh a. Kan inngaihtuah tawn thei teh e. A chauh deuh bakah keia tak pawh mut ka mamawh bawk nen, rei vak kan inbe lo, kan inmangtha ta a. Mahni khumah nge nge chuan mut pawh a tui e. 

Dawra kal thei ka la ni lem lo bawk a, ka tho hma hran lo. Ka nu erawh Vengthar lama an vawk talh leiin zing tawkah a tho tawh a. Ka muhil leh daih. Ka harh meuh chuan dar 8 a lo pel duai tawh a, muangchangin ka tho a, ka inphihfai a. Tlai lamah ka pute inah kan ei dawn avangin chawhmeh pawh mai kan leh ba bai leh hmarcha deuh tlawng kan hmeh. Tawipui south buaina ve ber chu chawhmeh a vàng ve thin hi a nia. Lo neia eizawng hi an tam lutuk lo va, thlai thar han hralh chhuah tur nei phei chu tlemtê an ni a. Khua a lian ve bawk nen, kan inchan meuh lo thin. Ka u hian "Hrisel deuh ila chuan chawhmeh zawrh hi ka chàk" a ti fo mai. Kan khua chu thil hralhte hi a nuam viau zel bawk nen, Hotel awm vang hian pawisa lengvàk a lo tam ve bawk a. A hma khan tui hi kan harsa nasa thin a, zep nàk emaw kan khaw tlangdung pheiah hian kan khua hi tui harsatna ber khua a ni hial awm e. Mahse, kan khawtlang hruaitute an felin an chak bawk a, an hmalakna azarah tunah chuan hman sen loh a luang ve ta ti mai ang. Ka û pawh chaw eikhamah a insu nghal char char a, Ka nu hian pawisa hman a thiam bawk a. Kan indan tirha eng thil liantham vak nei lo kha tunah chuan fridge, TV, washing machine chenin kan nei ve tawh a. Hmeithaia khawsa mah ni ila, in chhung bungruaah chuan midang kan awt bik lem lo. Ka u chuan, "Mam, thut mai mai pah khan chhuat nawhna hi lo vet nghet lawk teh" tih leh min pek a rual nghal a, ka lo vêt ve mai a. Ka'n sawi leh hram duh chu ka u hi a hrisel viau lo nain a che peih em em a, a chang chuan ka ning thin. Ka nu uapna hnuaia seilian chuan chhuat bal te, bungbel ûng te leh bathroom hing leh tawpte hi kan hmu thei vak lo. Kan in a fai lutuk zel hi vawi khat mikhual sangha rêp rawn zuar te phei chu an rawn lut ngam lo hial tawh. Hei vang hi nimaw, kei pawh nula kan han rim chang hian a rukin an an chet fel leh fel loh ka lo en thin. Hmeichhe che fel ka chhinchhiahna hmasa ber chu an tui khawihna leh eirawngbawlna a fai leh fai lohah a ni thin. Mipa tam tak hi ka rilru ang pu an ni ve fur ang. 

Ka u chhuat nawh lai chuan Ka ni, vengthlang ami kha a rawn lut hlawl mai a. Ka nu chuan a lo be nghal siam siam. "Tluangpuia lah damdawi inah ka kan ve hman ta si lo va, ka inthiam lo êm mai tiin Pu Lenga te ina kal pahin ka rawn peng lawk a nih hi" tiin min rawn melh a. 

."I fel thin" ka lo ti ve nghut. 

A han thu thlandai a, ka chungchangte min han zawt chiang ve a, "A pawi êm mai. An insawi thiam ropui si, mikhual zawk lehnghal. Ka ngei teh mai a nia" a ti ve hlak hlak a. 

Kan chhan hma hmain, "Taka kan Ramliani chuan sawi a kai leh tawh kha. Thingfal ami pathlawi nen an inngaizawng an tia. Thingfalah chu pa chuan zu a bilh thin a, chung a zu te chu Rami hian va lain hetah a hralh thin a niawm e. I pa mitmu êm pawh a la keh lo va, ka thin hi a dam thei lo" a ti ta a. Kan lo hre ve lehpek lo. Mi chanchin hi kan ngaihven tehchiam lo va, kan benghawng lo thin khawp mai. 

Ka u chuan, "Nei daih se la ti nia. Tichuan, Patea ten hnawtchhuak se, Mama hmingin in pawh a awm thei ang a" a lo ti zung zung a. 

Ka nu chuan, "Lateii lah hi aw. Ri phawng phawng thin suh. Mama hmingin awm se, Bena te khu an lo puitlin hnuah engtin nge an khawsak ang a" a lo ti vat. 

Ka ni chuan, "I patea te nen pawh kan sawi ho deuh a, pasal hi a nei a nih chuan Mateii chu i niteii te bulah phei se, Bena chu i patea ten fapa an nei chuang lo bawk a, enkawl an inhuam viau kha" a lo ti a. Lung a dam ta deuh. Ramliani mai mai chu aw..

Ka ni hawn hnu lawkah ka inbual a, Ka inbual hmain Nu Hmingi ka han inzúttir leh lawk a, ka ngaihbel nge chet vel a nuam tan riau. Ka u anga inbual rei thin nula hi awm ve tak maw? A inthiarte hi nghah chi a ni lo. A hnuhnung berah a lut reng zel bawk a. Ka u inbual zawh meuh chuan ka pute ina chhuk a hun der tawh. Kan nufa thum chuan kan chhuk ta ral ral a, kal nghawr zawngin ka nàk chu a rawn nat leh zawk thin avangin ka nu kokiah ka kuah pah a. Kan zu thlen thlak chuan an lo inpeih vek tawh. Bathlarah chhuakin Sangkimi ka bia a. "Inah keimahin ka awm a. Kawngka ka kalh hmiah, Apa chu Pa RIna te inah a kal a" a ti a. 

"Peka i hmu tawh reng reng em?" ka tih chuan, "Tukina Anu ka thlahin ka hmu, a thawven hmel khawp mai. Ka vaw thlu tawp chak" a rawn tih chuan ka nui hawk hawk. Kan chaw ei tur thute ka sawi a, "Eng nge thla hual chu?" a ti hú mai. An ni ang tan chuan hriatthiam a har ve te pawh a niang e.

"Thla hual chu mi tu emawin vanduaina emaw chetsualna a tawk a, thi mai thei dinhmuna ding siin vanneihthlak takin a damchhuak a, chumi avang chuan a thla kha hualsakin ar an talhsak thin..chutiang bak chuan ka sawifiah thiam lo" ka ti a. 

"Mizo tawng hi maw a har reuh lutuk a, thildangah pawh ka la rawn ang che" a la ti deuh deuh. Ka thiam bik tawp si lo. 

Chaw ei hmain ka puin hunserh a hmang a, chaw chu kan ei ta. Arpui tuilai ngei mai buhchiar ei hi chu zopa tan chuan manhla tak a ni e. Puar êl euha ka'n ei chu le..na pawh ka hrechang tawh lo. Chaw eikhamah dawr chungchang ka puin a sawi ta a, "Han dam chho la, i u Muana nen silchar zu dawr u la, bungrua pawh kan inlak kim ve leh deuh a ngai. Chuan, I U Muana bike chu i duh dawn chuan han inpek ngawt aiah 25000 in i la dawn nia, vawikhata rulh pawh a ngai lo. Tlangvalte in ni ve a, tunlaiah lirthei hawl chhuah tur awm lo chu a buaithlak. Chuan, dawr hi thahnemngai takin nghak la, nakinah chinchangte i hriat ve viau tawh hnuah mahni te pawn i la siam ve dawn nia. " a ti ta dap dap a. Ka pu hi chu aw..pa fel tàwp chu a ni vein ka hria. A nupui fanaute lah hian engkimah an support tha thin bawk si. 

Ka nu chuan lawmthu a sawi mawlh mawlh a. Kei pawn ka lo tuihnih ve bawk. Dar 9 velah kan haw chho a, kei pawh ka leng ta lo mai. Ka la dam chiang lo deuh nen. Ka mut hnuah Sangkimi nen kan intext a, "Naktukah chuan lo kal hram ka tum ang, Diki chu i be tawh em?" A ti a. 

"Be tawh e, a rawn sawm ang che. Ban veleh" ka ti a. DIki te Minpui lam an ni sia, an ban hun a inrual dawn lo a ni. Mahse, tihdan a awm mai ang chu maw. 

"Mahse, ka zak ve deuh" te chu a rawn tia. 

"Zah tur a awm lo, ka nu phei chu a fehchhuak daih ang" ka lo ti ve. Kan intext rei lo. A tuk nghakhlel takin ka mu ta a. ka mutui viau. A tukah ka nu leh ka u te chu an inkhawm a, in ka lo nghak. Facebook video ka en mai mai. Ka phone a rawn ri sek a, ka save loh number a nih avangin ka la lawk duh lo a rawn tih zin êm vangin ka la ta a. 

"Zothantluang, Sawisak belh i duh loh chuan Sangkimi hi lo thlah hmak tawh ang che" a rawn ti ta mai a. Ka tho hlawl mai. 

"Tu nge aw" pangngai takin ka ti hram a. 

"Tu nge ka nih i hriat a ngai lo, ka kuttum i dawng leh duh a nih loh chuan Sangkimi kha hlat ang che" a rawn ti khur khur a, Peka aw chu a ni lo, Lukawlha kha a nih ka ring ta deuh. 

."Thianpa, awm mai mai teh, ka bialnu hi ka thlah dawn lo, ka nei dawn" ka ti chang fak a. 

A nui lui nghek, a rui deuh niin ka hria. "Kan en ang chu..eng nge kan tihtheih hi i la hre mawlh ang. Zawnga" a rawn ti a. 

"Ka dah aw. Ka hlau therte lo che, rawn zin leh la, harhfim takin kan inhmachhawn leh dawn nia. " ka ti nghut a. Ka dah nghal. Ka lungphu pawh a tidanglam ve deuh, Peka hian Sangkimi chu a lo atchilh viau dawn a nih hi. Ka ta chu ka ta a ni miau si a. Inkhawm an rawn bang a, Nghah ka nei kar. Ka nu chu BKHP fehchhuahnaah a kal a, Ka u pawh fellowship turin a insiam mek. Kawngka an rawn kik ta a, lut turin ka au a. Diki leh Sangkimi te chu an rawn lut ta zan zan mai. Sangkimi chu a lo inthlak tawh a lo nia, Simple takin a rawn inchei a, ka bulah a rawn thu chat a, Valtea pawh a rawn chhuk tepin ka ring. Ka u chuan, "In va fel ve," a lo ti ve a. 

Diki'n a lo chhang ve vat. Ka u a chhuah hnuah Valtea pawh a rawn chhuk a, a rawn nui hui mai. Kawngka ka kalh sauh sauh a, Sangkimi chu ka roomah ka luhpui ta a. Valtea te tan pawh chance a ni ve mai. Khumah chuan kan mu dun a, "Ka zak e , anuin hria se min hau nasa ngawt ang. Mipa khumah te ka mu a" a ti a. 

"Engmah kan ti dawn chuang hleinem." Tiin a biangah ka fawp zauh. A phone a ri a, number hlang a ni. A'n lak chuan, "Zothantluanga kha i hlat loh chuan a nunna khan a tuar ang, i hrethiam em? " a rawn ti a. Nichina min rawn betu tho kha a niin ka hria. 

"Ngawi mai mai teh" tiin Sangkimi chuan a off daih. Kan inen a, kan nui dun. 

"Inthen mai ang hmiang, min vau reng sia" ka ti uang a. 

"I ngam chuan min then la, ka rawn luhkhung ang che" a ti mauh mai. A uang ve tho tih chu ka hria. Ka fawp ta ngawih ngawih a. 

Valtea te thawm kan hriat chuan kan inmelh zawk a, hmui hupin kan nui khur ta ngat ngat mai 🤣

(A tawi deuh maithei, ka buai lutuk aw 😍