Rinsangkimi 4

RINSANGKIMI (4)

Ziaktu: Toni Rálte

Thinphu dep depin thupuan chu kan ngaithla a, "Tun mai dar 8:43-ah khan Pu Lalchawimawia kum 53 chu, Thin cancer vangin anmahni inah a boral a, A ruang hi lumen tur a ni e" tih thu chu. Ka pa leh! A va rang teh thut ve! Ka ring pha miah lo asin le, Ka kha a chih a, ka tawng thei tawh lo. Valtea pawh a mangang ve takzet tih a lang. Tlanchhuaha damdawi in lam zuk en a tum lai mekin Dr. Saidingi te nupa an rawn lut ta hlawl mai a. Sangkimi erawh a la harh hleithei lo, rang takin a nu te chuan an rawn buaipui a, A nu chuan tung tho lawpin, a hnungzang chu a chulsak heuh heuh a, a awm vel chu a pain a lo dawm bawk. A rawn khuh ta kharh kharh a, thawk la hawk hawkin zawi zawiin a rawn harh thei ta a. Doctori chuan, "Tluanga, i pa khati kha a nia, zuk chhuk r'u, kan lo buaipui ang. I pa lumennah erawh a rawn lang ve thei dawn lo a nih hmel" a ti dam thlap a. Valtea'n min rawn kuah a, kan chhuak zui ta nghal. Kawngah chuan min fuih malh malh a, "I pa pawh na tuar rei lo zawngin tihian mahni in lumah ngei a kal a, lehlam zawng chuan a vanneihthlak tho asin. Thianpa, a na ang tih chu ka hria, mahse, pachang taka i awm a ngai aw. " tiin. Ka chhang lo. Ka kal mawp mawp ringawt mai a ni. Kan zuk thlen thlak chuan an lo phu mur mur tawh a, ka pa dawmhlum lova ka bialnu bula ka lo awm chu ka inchhirna leh inthiam lohna min siamsaktu a ni. Ka va luh chuan an lo tap bawrh bawrh hlawm a. Ka u pawh ka va hmu..Ka nite leh Nuteii te chuan tah hla nen min lo hmuak a, Mateii pawh kil khatah a lo tap ve keuh keuh mai. Ka pa chu a thawmhnaw leh amah hrim hrim chu han chei mawi ve deuha han thlak fel a ngaih avangin an pindan ril lamah an zawn lut a, U Zuali'n a sawngbawl ta a, an lo pui ve bawk. Nu Rami pawh a tap ring fû mai. Thihna hial an han tawh takah chuan hrehawm a ti ve viau a niang e. Ka pa an buatsaih zawh chuan pindan chu thiatin khumah an zalh ta ran a. An in hi hotela an hman thin kha an luah chho tawh a, in hnuaiah chuan naupang ho an mu ve thung a ni. Ka pa hmel chu ka han en thin, putar deuh tawh hmel chiah chiah a ni. A mitkhur a tla dûk a, a hmai a dang luap bawk. Mahse, tui taka muhil hmel erawh a pu. Ka pa hian vanram a kai ang em? Thih hnu piahram chu kan hrelawk thei si lo. A thlarau chan tur ka ngaihtuaha ka zeldin chuan ka pa ka chánna aiin chu chuan min vilh na zawk a. Vanram kai zoa ka hriat lohna chuan chhungrilah min khei hlawk hlawk a ni ber e. 

Patea rawn dingin a thih dan bakah a nat tan dante a sawi a. Aizawla kan va inbuaipui dan zawng zawngte, ka pa chu Valtea nen kan chhuahsan hnu pawh khan a la zia viau a. Rawn meng harh deuhin artui a ei chàk thu a sawi mauh mai a. A ei chak apiang chu tihsak zel a pawi tawh loh avangin Zo artui pum 2 an chhumsak sawk sawk a, half boil kher a duh avangin Nu Rami'n fiantein a barh ta a. Pum 2 chu a ei zo thak a nih chu. An lawm rualin patea ngaih chu a lo tha vak lo a, Upa te'n 'Van kai chaw' an tih te kha a nih a rin ruk thu a sawi chhuak nghe nghe. Tuite a han in leha a han mu leh chu a irhfiak ta a, tui a in leh a. A reh tawh lamah a thaw a rawn sak chho leh a, nachhawknain an jection hman naa, fiah taka rawn mengin, "Min chawlh hahdamtir tawh mai rawh u. A na êm mai" tiin a thin a dawm vang vang a. A muhil chu an kaitho zo ta lo nghal mai a niawm e. Chutiang chu ka pa hun hnuhnung a ni. Ni e, a tawrh kha a na ém a, chawlh hahdam a mamawh ve ta aniang e. Thalai leh nu leh pate an rawn lang tha hle mai a. Ka pa hi lehlamah chuan zu ngawlvei mahnise; chhiat thatah hian mi a làwm ve em em a, chu chu mite paw'n an lo hre ve reng a ni ngei ang. Ka pa ruang chu dar 12 dawn thleng ka kil a. Ka mawng a kham deuh tak bakah intiharh turin ka chhuak a, Kan branch huamchhung a nih avangin Valtea erawh a che buai pawlah a tang a. Bakah tunah rih chuan keimaha awma inngaihtuah vang vang ka duh zawk. Ka pa te in piah kham chhawrdawh, bawlhhlawh an paihna hmun hlui sirah chuan ka ding vang vang a. Thli lah chu a thaw vûk vûk reng bawk. Meizial zuin ka han hîp vang vang a, rilru a chawmawlh a ni ber e. Fim taka han ngaihtuah theih pawh a ni lo. Ka phone a rik chuan ka phu zawk a, Patea a lo nia. Ka la vat, an ina phei lawk turin min rawn ti a. Eng emaw buaipui ngai a awm ve bawk a ni. Ka phei nghal vut a, ka va luh chuan papuia pawh a lo awm tawh a, Thingfal atangin a zan azanin an rawn tlan nghal a nih hmel. Lut chhuak an awm deuh reng avangin kan pathum chuan Patea te pindanah kan lut a. 

Patea chuan, "Rin aia hmain chhiat kan tawk ta sia, Tluangpui, chhungkaw aiawhin thu i sawi thei ang em? I huphurh deuh chuan ka sawi thei tho a. " a ti ta a. 

"Aaa. Sawi zawk mai rawh, lehlamah kan dinhmun heti hi a nia, miin mak an ti palh ang, Nu Rami te pawh an lawm lo ve thei" ka ti ta vat a. A bu nghut mai. 

"Chuan, In leh lo kha i nu nen chuan in lo sawidun ta em le? "A ti leh a. 

" Pate, Bena kutah awm mai teh se. Inrawlh ka duh lo a ni. " ka ti ta tawp a. 

"Ni e, in dinhmun tlanghriat a nia, ka hrethiam lutuk che u, Mahse, i niteii chuan Bena kuta dah nghal ngawt a tum lo. Rami te enthlak rih phawt a tum deuh a niawm e. I pa hun hnuhnung lama Ramliani khawsak dan hian kan rilru a tina êm a ni" Papuia chuan a lo ti ve dap dap a. Ka hrethiam lutuk, ka pate unau hi ka rinphak bakin an lo inhmangaih a, ka pa a han chet khawloh deuh vang khan reivaklo kha chu an han ensan titih a, mahse, sawi leh sawi hnu thisena inzawmna hi chu a thûk êm a ni. Nuteii a rawn lut a, a hmai a sen vek, a tap nasa hle tih a lang reng mai. 

"Ramliani nu tah hla chham dan sawn ka mittui a kirtir vek nia. An va mak tak e aw" a ti nghal bawrh bawrh a. Patea chuan, "Eng thu nge a chham lehpek?" A lo ti nghut a. 

"Awiii…'Mawia, mi rethei chu i va ni êm..i huntawpah pawh i thisen zawmpuite ngei tan pawh mi hrang ang mai i ni sia tiraw? Rami hi i ngaihtuah lo mi? Nangmah mualphopuia i huntawp thlenga dawmtu che hi" tih vel..ka luak a tichhuak" a ti ta mai a. Lungchhiat nak alaiin kan han nui leh rih. Kan hahthlak tlang a ni e. 

Ka va phei leh chuan eitur an lo sem dawn mek a. Ka ril chu a tam deuh naa ka va ei chàk lem lo tak. Tlemte chu ka ei ve, kaah a tui hlawl lo. Eitur an ei chhung chuan ka phone ka lo bih ve zuai a, Sangkimi msg chu ka hawng nghal, "Min hrethiam rawh aw. Ka bestie a boral a..Aizawlah naktukah ka phei a ngai dawn a. Khawngaihtakin thinrim suh aw" a rawn ti! Chuvang a nih chiah chu khatia a khawng ni. Thu thinthawng tak a dawn vang khan a buai zo ta a nih hmel.

"A va pawi ve, engtia thi nge?" Ka ti a. A la online kulh avangin ka inthlahrung duh lem lo. 

"A inawkhlum a, chu chuan min thawng êm a ni. " a rawn ti a, "A va pawi tak êm aw. Nia, i kal ngei ngei a ngai a nih chu, i chhungten an kalpui thei dawn che em?" Ka va ti leh a. 

"Apa nen kan kal ang,. Chuan i pa thihnaah ka tawrhpui takzet che. I bulah pawh min mamawh lai takin ka awm thei lo va, hrehawm ka ti lutuk" a rawn tih chuan ka khawngaih letling zawk. 

"Kei deuhin hrehawm ka ti, ka hnem thei bik si lo che a. Engpawhnise, Naktukah in kal dawn sia, muthilh tum la..i chau lutuk ang e" ka ti a. Kan inngaihzawnna la rei lo teh mah se; kan inzawmna hi a thuk riaua hriatna ka nei. Mipa zaidam tak ka ni hran lo va, mahse, Sangkimi laka dawhthei tur khawp chuan chak tawkin ka inhre ve tlat nia. 

"Aw le, kan tum ang e aw. Zingah ka kal hmain ka lo bia ang che. A rem chuan..Bye" a rawn ti a. Ka ruak leh ta sawt niin ka hria. Kil khata Mateii lo muthlu làwp làwp ka va hmuh chuan ka lainat ta riau a, Ka va dek zauh a, a rawn men chuan, "In hnuaiah zuk mu rawh, Mate, a nih loh paw'n patea te inah. I chau a nih kha" ka ti a. A tho ve nalh mai. Bena erawh Patea faten an pawm phei tawh a. Nileng deuhthawin Aizawl atangin kan tlan sia, an ni ang tleirawl tan chuan chauh a na duh dawn êm a ni. Keia tak pawh zep nak emaw chau ve tak ka nia, mahse, ka pa huntawp a nih avangin ka insangmar hram hram zawk a ni. Zai chu a nuam phian a, thalai han muthlu awm pawh ka hmu lo. A khat tawkin ka nite bakah Nu Rami chu an tap leh zauh zauh thin. Chutianga hun hmang chuan khua pawh kan nghak var ve ta mai a. Thalaite tin hnuah pawh ka la thu khawmuang thung. Ka u erawh a haw chho ve nghal a. Tihtur tul zual leh buaipui tur neuh neuhte chu ka han tihpui ve nawk nawk hlawm a, Kan Branch Secretary U Duhawma chuan, " Han chawl hahdam rih rawh. In chauh dawn tehlul nen, kan buaipui thei alawm" a ti thluam a. Patea te ina ka pen leh zawk hnuah ka haw chho a. In ka thlen chuan ka nu a lo tho der tawh, ka u chu a mut rih thu a sawi a. Ka nu mit bui làk danah nizanah khan rawn lang ve lo mah se; a tap nasa hle tih a lang. Mahse, hre awm angin ka lang duh lo. 

Kei pawh ka tluzal ve nghal a. Ka mutchhuak lutuk mit thip bawk si chuan min tirit lûk mai. Ka muhil ta bawrh bawrh a. Ka nuin min rawn kaihthawh chuan dar 9 a lo ri tép tawh a. Thawhphan pawh nei loin ka tho nghal vat. Ka phone ka en chuan Sangkimi miscall 3 a lo awm a. Ka lo silent daih bawk nen, ka lo hre lo a ni. Ka call back ta vat a, a tlang thei lo. Signal awm lohna laiah an tlan mek a ni maithei. Ka intifai sawk sawk a, chaw kan eizui nghal. Kan insiam leh nghal zung zung a, kan pathum chuan ka pate in lam chu kan pan thla ta a. Ka nu pawh kal lo thei a ni bik lo a ni. Kan zu thlenthlak chuan hruaitu te'n ruang kilna lamah min hruaiin ka nu pawh chuan a kil ve ren rawn a. A insum nasa hle niin ka hria, han tah bawrh bawrh kha a hreh ve deuh bawk si, Mahse, Niteii te rawn lut nen an han inhmuh takah chuan a insum thei ta ngang lo nge, a tap ve rawih rawih a, Ka pa hmai chu chulin, "U mawi, a mak ka ti êm mai. I fate an la te si, i ngaihtuah lo em ni?" A ti mawlh mawlh. Ka pa fate chu a lainat takzet aniang. Nu Rami erawh a tap ta miah lo, tah chhuak hmel pawh a pu lo. Ka nu chu a melh leh zauh thin. Ka nu pawn a hai bik lo nge, vui hma deuh chuan a thutna a sawn ta daih a. Mipui zingah a va thu ta. Ka u nen erawh kan la kil ve zel a, Mateii pawh ka bulah a thu ran mai. Nu Rami fanu Mami pawh mit dum huamin a thu ve kur a, a tap eih lo. 

Chhungkaw aiawhin Patea'n thu a sawi a, Nu Rami te'n ka pa chhungte an sawi dan dik lo a awm vang nge ni, engkim a chinchhuakin a sawi leh vek a. "Kimi pawh ka fakin ka u khan tikhawp khan tina mah sela, khatiang meuh kan han tawn takah chuan Rs. 10000 laiin min rawn pui ve a, chhungkaw aiawh pawhin lawmthu ka'n sawi ve reng reng a ni" tih thu a telh ve zauh bawk. Nu Rami leh a nu inmelh zauh lai pawh ka hmu. A ho mai mai, ka pa a nia ka nu pasal hlui a ni. 

A tawi zawngin vuina hunserhte kan hman zawhah thlate kan han lakpui ve a, ka nu hoin keini pawn kan lakpui ve. Thlan thlengin ka pa chu ka zui ve a, Thlan lai pawh an lo tam hle. Tiang chuan ka pa lei taksa chu lei hnuaiah phumin a awm ta. Pa ka nei ta lo. Peng khawmuang loin inah ka haw nghal a, ka mu nghal thlawp. Ka muhil bawrh bawrh a. Dar 5 velah ka harh chauh. Khawhar in kal leh a behbawm chu sawi kilh kelh lo mai ila, thalai leh nu leh pa an fakawmin kan tan an tha khawp hlawm mai. Niteii te pawh ka pa thihcham thleng law law an cham dawn a, Ka pate chhungkua an lo hung ve bawk a. An han awmkhawm chuan an zahawm khep khup viau. Thalai lam len hun a zo a, Nu Rami leh a chhungten in hmun an sawi ri chho tan ta. Ka pa khan ziakin engmah a dah fel bik lo va, Nu Rami chuan, "Tunah chuan he in neitu hi ka ni ta. Tuma chuhbuai theih loh ka ni..Ka hralh ang a, Lawngtlaiah ka pem dawn" a lo ti niawm tak a ni. Ka nite leh ka patea ten an hriat chuan an thinur khawp mai a. Rami chu ko nghalin khunkhan takin in leh lo chungchang chu an sawi ta a ni. 

Kei pawh Sangkimi nen kan inbe zauh zauh a, thihna tuar ve ve kan nih avangin han inhnem tur chuang awm ta lo chu kan inbiak dan pawh a ril tehchiam lo. Kan la inngaihsak hman tak tak lo a ni ber e. Doctori pawh a rawn leng ve zeuh zeuh a, fel ka ti khawp mai. Sangkimi te naktukah an lo hawng tawh dawn a, ka awm pawh a nuam chho ta deuh. Mahse, Nu Rami te avangin sawi neuh neuh kan kai reng a, ninawm ka ti ru viau. "Kimi hian englai pawn a la beisei a, U Mawia khan a duh tawh si lo, tikhan in leh lo chan an duh luatah a hun tawpah hmangaih ber niawm takin an rawn awm kual vel a. Nupui hlui chu nupui hlui a ni tawp" tih vel, a buaina hi chingfel vat se ka duh takzet a ni. A chang phei chuan min sawi ta rau rau tia suahsual chhuaha chuhpui ve rap maite ka chak ut ut fô, ka nu hian min khap zel zawk a. Mahse, mi pangngai chuan thil nihdan an hai chuang lo va, kan tana nuam lo tur khawpin an awm ngai lo. Niteii khan a in chu Benjamin-a tan chuan a dah ta hmak a. Nu Rami satzia leh rapthlakzia chu aw. Mahse, sawibuai theih a nei si lo, ka pa in anga ngaih theih ka niteii hminga la awm vek kha a ni miau a. Papuia'n Nu Rami bulah, "Bena te i tulpui emaw i hlamchhiah loh chuan i ta tho alawm, buai viau mah ta che. Amaherawhchu, i fate i hlamchhiaha i enkawl theih loh chuan thutlukna dang pawh kan siam leh mai ang chu" tiin thutawp a siam ta hmiah a. Nu Rami chhungte pawn tihtheih an nei ta lo. 

Dawr ka nghak leh tawh a. Sangkimi nen kawng lakah kan inbe zeuh zeuh, sumo an rawn thleng tan a. Ka lo thlek leh dûk dûk thin. A tawpa tawpah Sangkimi te chu an rawn thleng ta. A pa nen dawrah an rawn peng a, A pa hi a va nelawm suam suam tak. Sangkimi chu a hma ai khan a dáng leh hlek niin ka hria. Khua a lum deuh bawk a, ice cream ka lo eitir a, "Zanah lo chho rawh aw. " a ti sap a. 

"Chiang sa" ka lo ti sup. 

"Sawi tur a tam rapthlak. Kan chho phawt ang, Anu in min lo nghakhlel tawh sia" tiin kan invailiam a. Rilru a phur sûrh mai. Valtea nen bawk zanah kan chhuak a, ani Minpui lamah a kal tlang a, kei damdawi in tlangah. Ka han thlen chhoh chuan a sam a lo khuih dalh dalh a, a inbual zo hlim a nih hmel. A va fresh ngawih ngawih tak. A nute erawh Pa Rina te in lama an len thu a sawi a. A u hi Aizawlah a phei leh tawh bawk a ni. Sofaah chuan thu dunin kan insi rial a, a tho thut. A roomah va lutin bawm lian vak lo hi a rawn keng chhuak a, "Hei ka lo hawn che a" tiin min pe nghal. Sana a lo nia, a to ngawt ang. Amah chuan min buntir nghal a, ka sana hlui chu bawmah a khung nghal. Ka sana hi ka roh ve riau a, a to hran lo nain ka birthday-a ka U min chahsak ve ngat kha a nia. Mahse, Sangkimi min leisak chu ka ngaihlu zawk..lehlamah keimah vanga a inseng chu ka inthlahrung tho bawk si. 

"Ka lawm lutuk aw, a to dawn sia, ka inthlahrung.." Tiin ka melh a. Nui sen sen chunga min rawn enin, "I rin aiin ka lo duh che mi?" A ti ta daih a. Ka nuih a za deuh. 

"Chulam a ni lo.mahse, hmeichhia zawkin thil min tihsak fo chuan mipa inti ve tan chuan a nuam lo ve lawm. Tun hi a tawpna aw. Eng emaw hunpui leh ni bîkah chuan thuhran" a ti duah a. 

"Umm, Mipa thenkhat chuan an bialnu te neih eisak an tum thin asin. I ni ve lo hi ka lawm.." Fawh cho zeta min rawn melh chung hian a ti a, ka insum buai peih lo. Ka fawp ta a, kan duhthawh dun viau. 

Kan infawh zawhah, "I thiannu chu engvanga inawkhlum nge a nih i hre thei em?" Ka ti ta a. A thu tha a, chhuat lam melh ranin, "Chu chu lawm sawi tur a tam ka tih. Ka thiannu chu Daisy a nia, Kan inthenawm bawk a, tette atanga inkawm inthlah leh tawh lo kan nia. Laizawn ang maiin ka en thin. A lehkha hnutchhiah a nuin min chhiartir a, ka khawngaih lutuk kha ka tap nasa alawm. Ih, a lehkhaah chuan tiang hian a lo ziak a, " Ka damchhunga a vawikhat nan hmangaih ka tawng ve a, ka hlimin khawvel hi nuam pawh ka ti. Kum khat lai kan inzui ve hnuah min ngen nasat leh min nawr nasat tawh êm avangin ka lo insum reng thei bik lo va, min hmangaih veah ngaiin ka thianghlimna ka hlan ta. Khami hnu khan rei tak chhung chu kan la inzui ve. Mahse, min lo kawp reng tih ka hrechhuak ta a, ka na em em a, ka then ta a. Mahse, thingthia ngaihdam min dilin a mittuite a tla a, ka lo hmangaih ve tawh êm vangin ka ngaidam a. Pangngai takin kan ni leh tan a, zan khat chu chaw kan ei chhuak a, a thiante inah a ni nghe nghe. A thianpa roomah chance nei lehin thil dik lo mah nise, kan lo hman tawh tho avangin sex kan hmang dun leh a, Camera a lo kam ru tih reng ka hre lo. A hnuah min lo kawp leh tih ka hrechhuak a, ngaihdam pawh min dil eng ang mah se; ka then lui ta a. Thla khat hnu velah rei tak min lo ngaizawng ve tawhtu chu ka chhang ve ta a, bialpa ka nei tih a hriat rualin a ex chuan a thianpa rooma kan mutdunna video chu min lo thawnin, 'Mipa dang i zui a nih chuan a darh ang, i hmel a lang chiang si a. I ngam chuan ngaizawng rawh' a rawn ti a. Ka kehdarh vek a ni ber e. Mualpho ka hlauh luatah ka bialpa pawh chu na taka siamin ka then ta a. Ka ex chuan video hmanga min blackmail zuiin, ka neihsain a daih tawh loh chinah ka pa Kohhran pawisa kawl thlengin ka ruksak tawp mai a ni. Ka nun chu hremhmun a ni ta a ni ber, ka thianthaber pawh ka hrilh ngam lo. Ka zak êm a ni. Tichuan, nimin piahah khan chhuahpuiah min sawmin min mutpui a tum leh a, ka duh lo chu min vau leh a, pawisa a ngiat leh bawk. Mahse, engmah pawisak ka neih tawh bik loh avangin tidarh mai turin ka ti ta a. Ka rin ang ngeiin vawiin tlaiah khan kan video darh chu ka thian veng dang ami ten min rawn pe ta a. Chutia ka han hmuh leh tak siah chuan ka nu leh pate nihna leh kan chhungkaw dinhmunte avangin chhungkua timualphoa keimah vanga ka chhungte an chirhtheh ai chuan tiin khawvel chhuahsan mai ka tum ta a ni. Ka chhungte chungah ngaihdam ka dil a, ka best friend Sangkimi lakah pawh ngaihdam ka dil e. Hei bak kawng dang ka nei lo a ni. Mangtha vawng vawng u le" tih a nia. 

Ti nge ka bulah khan a lo zêp aw ka ti. Min hrilh vek nise a nunna hi a la miah lovang. Mahse, Khatia Daisy inawhhlum chhan an hriat takah chuan Police an pun nghal a, rang takin a ex chu an va man ta a. Central jail-ah an thawn liam tawh. A case a rip ve zêk ang. Ka tan chuan kha pa kha tualthattu a ni. Ka thiannu beidawnga siama thih duh khawpa siamtu kha khaihlum se ka duh takzet a ni. " A sawi chhung zawng chil pawh lem tha ngam loin ka lo ngaithla a. A mittui luang ngiai ngiai chu dimtein ka hruk faisak a. A chalah ka fawp zauh bawk, "A va thinrimthlak ve le'h! Chu pa chu mipaa chhiar tlak pawh a nih chai loh chu. Mipa min timualpho hle mai. I thiannu chu vanduai ka ti takzet a ni" ka ti a. 

Mizote kan changkang tawh a, a tha zawng leh tha lo zawng pawhin khawthlang ho style kan la nasa. Mizo sex video leak out hmuh tur a awm reng a, mipa hi an hmel hmuh tur a awm ve vak ngai lo. Hmeichhia pawh demawmna chin an nei ve ang, video-a cover kher loh tur hi a nia. An lo cover a nih pawhin hmeichhe tih leak out erawh a ni lo tlangpui. Sex hi kan ramah a mikhual tawh lo va, tleirawlte te inngaizawngte hian hman ngei ngei tur emaw an ti tawh ni mai ten a lang. Hei hi a tha lo takzet a, chutih rualin an duhthlanna a ni a. An lo hmang ta a nih pawhin chirhtheha kawhzui chiam hi a tul hran lo, kan tu leh fate hi veng tha ila, chhungkuaah infuih tam ila khawtlang leh ram nuam kan siam mai dawn a ni. Sangkimi thiannu pawh a hmangaih ber mipain a nawra ngen a ngen takah chuan a insum theihna hlohin a tan a inpe ve a ni mai. A thianghlimna a hlan tak mipa kha mipa dik tak ni se la zawng hlim takin an la inngaizawng ngei ang. An thianghlimna min hlan phal thlap hmeichhia hi mipa pangngaiin kan hmusit ngai lo. Kan hrereng thin. 

Min rawn ngheng hnaiin, " Nang chu ni ve suh aw" a ti sap a. 

Ka nui hawk, "Ngaihtuah pawh ngaihtuah buai duh suh" ka ti nghut a. 

"Daisy àtna chu mualpho a hlauh luatah police pun a ngam tlat lo va, tunlaiah an chhui chhuah ran tawh nen, report hmiah tur a nia" a ti sep sep a. 

"Ni ngawt mai. Vai ho ang deuh hian mualpho te hi kan hlau leh lutuk a, a hnuah kan mualpho lehzel tho. Thil tisualtu hi chu mantir hmak zel hi a fuh" ka lo ti ve a. A ni lah taka..Pawngsual thenkhat pawh an nu leh paten mualpho an hlauh luatah thupbo an tum fó, thingtlang lamah hian kan la ni zual. Tha ka tih loh ber pawl a niawm e. Misual vulh lenna a ni ka ti mai. 

"Ka la virgin asin" pangchang aw zet hian a ti a. Ka rinsa a nih avangin mak ka ti hauh lo. 

"Inneih zan atan kan khek thei ang.." tiin a sam ka chul zauh a. 

"Inneih hi chu ka ngaihtuah ngam lo, Anu phei chuan, " Mi mo ni tur chuan ka ngaihtuah êm mai che. Ka hmuh phakah hian awm reng la ka duh ber" a ti thin. Ka hrisel lohna bawk hi a ni" a ti leh siam siam a. 

"Pathian zarah dam hun i la nei ve maithei asin. Ka u pawh khi ruhseh nei a nia, mahse, a zia chho ve tawh lutuk ania" ka ti a. 

"Ka lung ber hi alawm. Phaiah pawh kan kal zing tawh. " beidawn hmel zeta a tih chuan ka khawngaih ta em em a. Ka pawm a, "I hriselna lam chu kei chuan ka ngaipawimawh ber lo, ka duh che a, ka bialnu ni reng la ka duh a ni mai. I hrisel lohna hi kan inkar tihnawk tur atan chuan hmang lo vang aw" ka ti dap dap a. A hnuk a ulh deuhin ka hria. 

"A mak e, kan inngaihzawn tirh phat atang khan kan inthlahlel reuh sia tiraw? Pathian ruat kan ni a niang" a ti a. Duh em emin ka lo fawp leh, pawn lama tawng thawm kan hriat avangin kan thu tha ta sawk sawk a. Doctori te nupa an rawn lut a. Min hmuh rual chuan, "Tluanga chu i rawn chho peih a ni maw?" Dr. Saidingi chuan a ti a. 

"Peih ve mai zel e" ka lo ti a. An rawn zin haw hlim a ni ve bawk nen, a chau ve dawna ka hriat avangin kei pawh chuan hawn lam ka hnaih ve ta a. Veranda thleng min rawn thlah a. Kan inmangtha ta. Damdawi in pen chhohna kawng ka thleng thla tep tihin Peka leh mi pahnih hi an rawn inzui chho a, Pakhat chu Chhuana kha a nia, pakhat chu ka hrechiang lo. Ka la hmuh awm pawh ka hre lo. Ka bul an rawn thlen chuan Peka chuan min rawn dinchilhin, "Thingtlangpa, Sangkimi khi lo ngaizawng ve tawh suh" a ti nghal tháwr mai a! Ka hamhaih deuh. Ka hriat loh pa kha lukawlh met mut, thau lam lek lek, kei ai pawha upat hmel a ni a. Chu pa chuan, "Ehe! He pa hi maw i elpui chu? A va tha tehchiam lo ve" tiin min melh kual vel a. Zu rim an nam huam bawk. Khawia zu tak in ang maw? Chhuana erawh a ngawi reng thung. 

"Min lo hrethiam u la, intihbuai mood-ah ka awm rih lo tlat" tia kalpelh mai ka tum chu Lukawlha chuan min rawn pawt lawp a, thahrui a nei phian aniang, ka pai khut khut mai. 

"Ka nau bialnu i lo chuhpui ve man ka pek phawt loh che chuan i kal thei lo" a ti pawr huar a. Kan awmna laiah chuan in a awm mai lo va, a thim deuh bawk. Insual lam hi ka misa vak lo va, ka tetlai pawn vawi hnih bak ka insual lo. Mi pawisawi hi ka hlau ve viau nen, tuman hetiangin min la cho ngai lo bawk. A kut chu phihthlain, "Thianpa, i nau bialnu chu a ni lo deuh ang a. Ka bialnu a nih khi..ka nupui tur" ka ti ve ta ngat a. Lukawlha kut rawn vai chu ka bum hman ta lo, ka bek a ri no chhawk mai a, tluk erawh ka tlu êm lo. Mahse, a na lo ka tih chuan dawt ka sawi ang. Ka bek ka dawm laiin ka hnarah a rawn hnek leh nghal sawk a, ka hnar a lum nghal puat. Peka lah chuan min rawn bawh titih a, tuihawk luankawrah min bawhthluin min thutbet sauh sauh a, min hnek ta siah siah mai. Ka kut ka han vai ve dawn lahin Chhuana leh Lukawlha khan min chelh bet hneh nasa si, ka thisen a lum chho a, tha a za ve ta zak mai, ka theihtawpa ka ke leng awrhin Peka chu ka ke titawmin ka nawr thlu a, Chhuana chu ka han tlawh nghal pawp bawk. A kapa tlawh ka nih avangin a vial nghal ngawih ngawih a, Lukawlha chuan min rawn bawhbeh tumin chet a la nghal a, mahse, ka lo tlawh ve zel avangin min bawhbet thei mai bik lo. Ka thu chhuak ta a, ka chapal pawh khawnge a awm ka hre tawh lo. Ka hnar lah a thi nasa bawk si, Peka min rawn hnek leh tur chu lo kun zauhin ka chhoh dàwm ve ta nghek a, mahse, ka tukhum a ri pawp a, Lukawlha kuttum ka dawng a lo nia. Ka luhai chu ka petek titih a, remchangah la vatin Lukawlha chuan kawng chhak koah min nawr betin a theihtawpa nain min hnek leh ta. Ka che hleithei ta lo. Ka zawi hnawk a ni ber e. An pathum chuan min chhir, min hnek,ka taksa chu na lo lai reng a awm ta lo. Kan thawm a lo ring lo thei ta lo va, Damdawi in peng bula awm U Ruata te rawn tlanchhoin an rawn thelh tih chu ka hre rei ruai. Ka dula an tumna leh ka naka an chhuihna chuan ka thawk a tisak a, ka mut sulh sulh mai. Thawm chu a ri nuai nuai a, tu te emaw hian min zawn kang niin ka hria. Tlemin ka hriatna chu an rawn fim chho a, damdawi in lam min panpui tih ka hre thei, ka lu lah a la hai bur mai a. Ward-ah min zawn lutin min muttir a, Nurse rawn tlan lutin ka thisen velte chu a rawn hru fai sawk sawk a, ka banbulah a rawn jection bawk. Ka taksa pum chu a na vel vek niin ka hria. Nachhawknaah khan mutduhna a lo tel nge, ka mut chu a rawn chhuak a, ka chhing diar diar tawh ang tihin, Rinsangkimi aw ngei mai hian, "Tluanga, Tluang" a rawn ti ta a. Ka meng nghal káwk. 

Ka khumah chuan thuin mittui tla par chungin min lo melh tlawk tlawk a, tawng ka tum a, ka tawng chhuak thei lo. Doctori aw niawm tak hian, "Bawihte, muthilhtir rih rawh. Muhil se a rawn harh hunah chuan a dam sawt mai ang" a rawn ti a. Mahse, Sangkimi àwn thla riai riai chu chiang lo ruai hian ka va hmu a, ka che thei der si lo. An ri hak a, Sangkimi chu an pawm chhuak ta a. Kei pawh mutchhuak namen lova ka mut a chhuah a vangin ka muhil ta daih a. 

Ka harh chuan ka lu chu a na ngut ngut a, ka ban dinglam chu an lo cher khawng tlat bawk. Ka nu ka hmu hmasa ber a, ka harh tih a hriat rual chuan, "Mama, ka va lawm êm, i tui a hal em?" Tih leh tui lak a rual a, min rawn intir a. Ka hmai bakah ka mitte chu a vûn deuh avangin ka hmu fiah thei vak lo. 

"Ka lu leh ka nák a na " ka ti tham tuak a. U Zuali a rawn lut a, syringe a keng và bawk. Min chiu chung chuan, "Engah nge mi bialnute i lo ngaihzawn ve reng reng le aw. A pawi lutuk,." A ti sap a. 

Thei leh thei lo hian, "Mi bialnu a ni lo" ka ti hram a. 

"Amah Peka'n, 'Ka bialnu nen kan inkarah a lo inrawlh ve a, hma ka la mai a ni' a ti alawm. A thuhrimin in dinhmun hria la, Sangkimi te chu kan phu ve lo" a ti leh a. Ka chhing sawk ringawt. 

A hnu deuhah, "An man em? Peka te chu" ka ti a. 

"Aw an hruai thla tawh" a ti mai a. 

Khatiang taka mipa inti ve min han sawisak rawn kha tlawmthlak ka va ti êm. Ka taksa na ai chuan nghaisak rawn ka nihna hian min tina fê zawk. Valtea chu awm se khatiang em em kha chuan min khawih thei bik lo vang mawle. U Zuali kal hnu chuan ka nu chuan, "Mama, I u Zuali sawi kha a dik alawm. Kan dinhmun a inthlau lutuk, bakah Peka nen inzawmna an lo neih ve tak tak phei chuan kan tan zahna tur vek a ni" a ti mawlh mawlh a. 

"Nu, amah Sangkimi i la kawm zawk dawn nia, ka sawifiah peih lo" ka ti hmuk. Ka bialnu hi ka ringtawk miau alawm le. 

"Nu, Peka te chu ka ngaidam dawn hauh lo a nia" ka ti leh a. 

"Ngaihdam pawh min dil hleinem, A nu lah khan , 'Amah Tluanga'n a hmumawh êm a, aman buaina a siam hmasa zawk' a tih vel kha. Nurse Rengpuii hi chu a chapo ve êm a, kan la buai chho maithei a ni" a ti ve bawrh bawrh a. Khua a rawn var zui ta bawk a. Ka nà te pawh a zia sawtin ka hria. Ka ril lah chu a tam em em mai a. Ka ban dinglam chu a auh a lo nia. Mahse, Kan doctori hi a lo thiam riau a, a zawm thei niin ka nu chuan a sawi a, an la cher khawng rih a ni. Ka nàk na leh ka dul thuar vel na thûm bak chu chu lai chu a na han tih chat chat tur ka nei lem lo. Ka hmel ka hmu chak mang e, ka hmelchhe ngawtin ka ring. Dar 8 velah ka u leh Valtea ten chaw min rawn pe a. Buhhawp chu a tui mawh kher mai. Mahse, fian li vel chu ka ei ve kha maw. Ka nu chu a haw a. Ka u pawh school kal a ngai si, Valtea'n min awmpui ta rih a. A hnu lawkah patea te nupa leh an fanu Eli te an rawn kal ve a. 

Patea chuan, "Police lam pawh verification ti turin an rawn kal dawn kha. Ka thin hi a rim teh mai a nia. A na thei ang berin hremna an hmachhawn tur a ni ringawt" a ti tûn tûn a. Valtea pawh chuan, "Ka khawih ve hmain an lo hruai hrang tawh a, pawi ka tihzia hi a..an la pawr em em zui" a lo ti ve bawk. 

Nuteii chuan, "Pi Rengi kha chu a buai loh khawp kha maw.." Hmeithai fa ve ve, ngam leh ngam an insual a, a hneh loh avanga police han pun. Ngawi tak r'u, SP khu ka makpa a nih khu. Tihtheih kan nei ve ang' te a lo ti aniang, an sawi duh khawp mai." A lo ti ve mawlh mawlh a. 

"A thuhrimin Sangkimi nen chuan in lo inngaizawng ve reng reng em ni?" Patea chuan a ti a. 

"umm..Thla a tling ve tep" ka ti mai a. 

"Peka te kha chuan nangman i tihbuai zawk thu hlir an sawi a. Mahse, ka ring lem lo. " a ti a. 

Nuteii bawk chuan, "Ruata te khan rawn hmu lo che u se la, an sawisa hlum deuhthaw maithei che a ni. Mi pathumin pakhat han sual rawn reng reng, a thing lutuk" a ti hmarh hmarh a. 

Sangkimi leh a nu an rawn inzui lut a, kan lo thlir thap. Sangkimi hmel chu a dava riai mai a, mut hmu tha lo hmel a pu. A nu chuan min han en vel a, "I nàk hi X-ray a ngai dawn a ni. Hetah kan tithei si lo va, i zia deuh hunah in zuk in x-ray mai a ngai ang, i dul thuar vel hi chu an tumna che kha a nia. I kawchhung a khawih pawi lo turah chuan ka ngai a, mahse, Ultrasound tih tho chu a tha. Engpawhnise, i zia vat turah ngai ang aw. A zia lo êm mai. Police te pawh an lo thleng dawn tawh ang" a ti dap dap a. Thla a timuang thin e. A nu a chhuak a, Sangkimi erawh a rawn thu ve. 

Ka kut an cher khawng tlat chu rawn chulin, "Pawi ka ti lutuk. Khatiang thil kha a thlen ka ring phak miah lo asin. Peka te chu ka haw em mai" a ti sep sep a. Midang awm ve mah se, min duhna leh min khawngaihna a lantir hreh lote chuan amah min duh zualtir. 

"Ka tha vat dawn alawm" ka lo ti a. 

Patea chuan Sangkimi chu ngun taka melhin, "Sangkim, lo ngai haw lo la..kan fapa hi i duh ve tak tak em? A nihna takah chuan nangmah vanga hetianga nghaisak tawk a ni a, kan tan chuan a serious khawp mai" a ti ta a. Ka khap thei si lo. 

A chil a lem khalh a, "Ka pu, Tluanga hi ka duh a, Peka nen khan eng inzawmna mah kan nei lo. Min ngaizawng thin a, mahse, ka duhzawng a ni ve lo. Tluanga pawh hian a hria" a ti fiah kák a. Patea hmel pawh a dam deuh huai hian a lang. Eli chuan, "A thuhrimin Peka chu kimkimi nen an ni khan ka hre sia, kei chu a zia hi ka ei hlawl lo, chapo ropui si" a ti ve hlak hlak a. Eli hi Sangkimi aiin a u hlek awm e. 

Police an rawn lang ta a. Uluk takin thil thlen dan chu min zawt ta a. Hmaih nei miah loin engkim ka sawi ve ta vek a, Ka sawi zawh chuan pakhat zawk chuan, "An sawi hmangah a bialnu nen an inkarah i lo inrawlh ve a niawm e. Tin, kha intihbuaina kha nangma cho chhuah angin an sawi bawk a, thuhretu i nei bawk si lo nen" a ti a. Ka sa zak mai. 

"Sir, thuhretu chu ka nei thei lo alawm, keimahin ka ni miau a. Tin, ngaihzawng intawm tih lamah chuan a bialnu anga a chhal chu hei Sangkimi hi a ni e. Amah pawh hi in zawt thei ang. Peka te kha ka cho hmasa lo va, kalsan ka tum tawh hnuah min pawt lui zawk a ni. Insual mi ka ni lem lo bawk. " ka ti ve ta hmak hmak a. An inmelh ralh, Sangkimi pawh chu Peka nen an inkar an zawt a. "Peka hian a rawn awm tirh phat atangin min ngaizawng tawh a. Kan inhnaih avangin a rawn leng fó mahse, vawikhatmah mitmei ka hmuh ngai lo, beiseina pawh ka siamsak ngai hek lo. Thian angin ka en a, Tluanga nen kan inngaihzawn hnu phei chuan ka ngei tawh zawk, ka hne thin. Engtikahmah inzawmna kan nei ngai lo va, kan nei ngai lo bawk ang" inringtawk zet hian a ti ve ta fak fak a. Kan thaw huai hlawmin ka hria. A remchang tho e tih thuah U Ruata leh U Zova, min rawn thelhtu te kha an ko chho ve nghal a. An ni pawh an rawn thleng hma viau. Thil thlen dan an han zawh chuan, U Ruata chuan, "Zurui tawng thawm niawm tak kan hre phawt a, mahse, a rei tak hnuah intibuai leh inhrosa thawm niawm takte kan hriat avangin kan tlan chhuak a. Kan han thlen chhoh chuan Tluanga hi a lo let hlawm reng a, Peka te khan an lo chhuihin an lo hnek nasa mai a, kan thelh zui ta a ni. Chuzawng chu a ni e kan thil hmuh" a ti a. Ka chhing sawk, ka tlawm takzet a ni. 

Kei chu min rawn melh lehin, "Zu i rui tiraw? Nizan khan" pakhat chuan a ti a. Ka nui hawk, mi dang pawh chu an lo phu deuh suauin ka hria. "Ka pu, Zu ka in ngai lo. Nizanah khan engmah ka rui lo" ka ti chang fak a. 

U Zoa chuan, "Sir, ka lo inrawlh ve lawk ang e. Ni e, Tluanga hian zu a ruih emaw a in emaw kan hre ngai lo. Kan khaw tlangval fel leh nungchang tha tak a ni e. Peka te ho zawk kha an rui khawp mai" a lo ti ve bawk a. Ka lawm viau. Police te pawh chu an bu nghat nghat a, "Chanchin kan hre thuai ang chu..a lawmawm e, lo dam zel rawh" pakhat chuan tiin an chhuak a, ka medical record an la tel bawk. 

Ka muhil zui ta daih a, Sangkimi chu min kalsan lo turin ka chah lawk hram bawk. Ka harh chuan tlai lam a lo ni tawh a, Valtea leh Sangkimi an lo la thu. Ka zun a chhuah êm vangin thei leh thei loin ka thu chhuak a, Valtea'n min lo pui vat. Kuah kher ngaiin ka inhre lo naa, keimaha ka han kal dawn chuan ka khel bawr vel na thuam thuam avangin ka kal hleithei ta lo va, Valtea chuan min hruai ta a. Ka zun lai chuan, "Zanah ka rawn riahpui ang che" a ti a. Ka tan hian he pa hi a va hlu tehlul êm..thiantha hi chu rangkachak hlawm an ni ringawt. Kan let leh chuan Sangkimi chuan phone a lo hmang a, "A that nasat chu, a phutawk ve reng a hmu a, ka lawm hle mai. " a ti a. A dah zui nghal. Mitmeiin ka zawt a, "Daisy ex kha jail chhungah a lo inawkhlum ve a. Chawh hi ka ti lutuk" a ti hmiah mai. He hmeichhia hi nu zêm anga lang siin a lung a lian phianin ka ring a ni. Ka u-in chaw a rawn dah leh a, Valtea nen an haw lehnghal. Ka u chuan meeting a nei sia, Valtea chu lo riak lo thei lo a ni ve tlat .Duh pawh ka duh zawk. Buhhawp leh arsa ti bakah antam tuihàng a lo nia. Sangkimi chuan min barh a, ka kut dinglam ka hmang thei miau si lo. "Han dam tha ver vawr la, Peka chu fair takin la hmachhawn la ka duh. Hnek hrep ang che" a tih chuan ka chaw ei ka hak lo chauh, ka nuih a tizain a cute lutuk. Chaw chu zing ai khan ka ei tam ta deuh. Antam tuihang chu ka hawp zo vek bawk. "Chaw han ei ve phawt rawh. I nute ngaihdan pawh a ni lo vang" ka tih chuan, "Apa a thinrim rapthlak, Peka ten keimah vanga an khawih che hi. Nia, ka han chho ang a, inbualte pawh ka duh. Ka rawn chhuk leh vat ang" a ti a. Kan inbye bye. 

Ka khua a har nghal vawng vawng mai. A reh angreng bawk sia. Ka kut veilamin thiam leh thiam loin phone chu ka han khawih a, Video te ka en ta vel mai mai. Peka te chanchin lah kan la hre bawk si lo. Sangkimi sawi ang deuh khan inlak fit zek zawk hnuah Peka chu ka hmachhawn chak khawp mai. Ka hlau eih lo, kei aia naupang zawk lehnghalin a thiante zara min sawisa ve kha e ka lung hi a dam hlawl lo a ni e. Ka nu call ka dawng a, "Ka rilru a na khawp mai. Peka te chu an rawn chhuak leh ringawt a niawm e. Police lamin case tling loah an ngai a niang, " Tiang insual buaina te hi chu a awm fo alawm, tlangval hawklak an nia" an tia. Chuan i inenkawlna senso erawh anmahni tum turin an rawn sezawl chhuah leh tawp mai a ni" a rawn tih chuan ka têk chhawk thei. Ka lum pup pup a, au vak vak ka chak kher mai. Ka lung pawh a chhe tel bawk. Pi Rengi sawi ang khan Police lama a makpa ten kua an hreuh a ni mahna le. 

"A va mak ve" tih bak ka sawi thei lo. Ka hmet hlum nghal a, ka mittui hnàm sawk chu ka khap lut sak sak mai. Rilruin tum ka nei ve ta ran a, "Ngawi tak rawh u, ka'n dam fel ang a, Na lua awm loin in fapa hi ka la nghaisa ve dawn alawm. Chutih hunah chuan, " Tlangval hawklak insual" min ti nge ti lo kan hria ang chu..ka che dawn khawp e, Peka, lo inring ang che" tiin ka thinlung chu thu ka tiam nghal mawlh mawlh. Ka thinur insanmar vang nge ka nàk chu a rawn na leh zawk thin a. Mahse, tawrh tlang rih ka duh. Chhel ka la mamawh dawn chauh nia ka hriat avangin. Valtea a rawn kal ta a,Diki a rawn hruai ve bawk. Peka te chungchang chu ka lo hrilh vat a. A chek tlawk tlawk mai. "Thianpa,lungngai mah ta che, i thiantha ka la awm ve e. Han damtha ver vawr la, kan hmachhawn ang chu.." a ti nghet charh mai a. Rilrua ka tum dan nen a inan chiah avangin ka thawl huai nghe nghe. Sangkimi pawh a rawn lut ta zàn zàn a. Diki nen a hrana an la inhriat vak loh avangin ka han inhmelhriattir a, an inkawm nel thei nghal mai. Peka te chungchang chu Pi Rengi'n Doctori a rawn hrilh atangin a lo hre ve tawh a, a thinrimzia leh a pa pawh a lungawi lohzia a sawi ve keuh keuh mai. Kan dam lo tlang a ni e. 

Kan titi mam mam laiin Peka nu Pi Rengi kha a rawn lut ta a. Rawn melh kualin, "Tun hi inkan hun a ni tawh lo. Riahpui tur chauh kha awm tawh r'u" a rawn ti fiak thak a. Pi Rengi hi nu vantlang tak, hmel pawh chhe lem lo a ni. Mahse, kan nurse zinga biak hrehawm an tih leh an pan hreh ber a ni. Diki chuan, "Nia, Sangkim, hawh haw ila" tiin a ding a. Diki hian scooty a nei tho a, thlah a ngai lo turah ka ngai. Sangkimi pawh chuan Pi Rengi rum zeta melh pahin min rawn hnaih a, ka bianga rawn fawp zauhin, "Lo Dam vat rawh aw ka duat" a ti sak. Pi Rengi a elsen tih ka hria, mahse, ka lawm ru viau thung. 

An chhuak chu Valtea pawn tual thleng a va thlah ve a, Pi Rengi chu rawn kal hnaiin, Syringe a rawn lek kang vaa, verther zeta min melhin, "Ka fapa nun chawk buaitu apiangte chu ka hnawhbosak thin.." A ti zawi dap a. A syringe chu ka han melh a, Hlauhthawnnain min rawn bual nghal…