Rinsangkimi 3

RINSANGKIMI (3)

Ziaktu: Toni Râlte

Aw khur lek lek hian, "Ka tina ngai lo vang" ka ti a. Ani pawh kal ve nghalin an motor chuan an in an pan ta nghal a, Peka'n scooty chu a khalh hawsak thung. Peka te nen hian an inpawh awm hle mai. A la hnawksak tlat dawna hriatna ka nei. Kei pawh dawr lamah ka let leh a, dawr ka thleng tep tihin Nu Rami ka tawk a, min dinchilh ang ren rawn a, "I pa chu va enkawl ang che u, sum leh pai engmah ka seng tawh dawn lo a nia" a ti tháwr mai. Chhan dan tur ka haihchham deuh, mahse, "Aw..lo awm tawp rawh, nang a nupui chu" ka ti hmuk a, ka kalsan zui nghal. Sangkimi hlir rilrua a lan avangin dawr nghahah pawh rilru ka pe hleithei lo. A la that loh deuh ka hlauh avangin ka call ngam rih bawk si lo. Dawr ka khar laiin amah zawkin min rawn call ta mial a, rang takin ka la nghal. 

"Ka tha tawh aw. A zia lo tak tak a ni. " a rawn ti a, "Ka va lawm, ka lo hlauthawng lutuk a, i taksaah hliamte i nei em?" Ka tih chuan, "Nei lem lo, ka banrek hi a na deuh a, chu zawng chu ni mai, i haw tawh em?" A rawn ti a. 

"Haw dawn chiah. A thuhrimin in lo chhuk dawnte khan min lo hrilh ve tur che alawm" ka ti a. 

"Nia, Nungi khan min rawn sawm thut bawk sia, phone khawihna hun ka nei tawh lo lawm, lo pen ka tum tho a" a ti ve mai a. 

"Zaninah lo leng ila a pawi ang em?" Ka ti sup a. 

"Pawi lo ve, anu pawh ka hrilh vek tawh" a rawn ti a. A nuin min warning dante kha chu ka sawi duh bik lo. Zana inhmu tura intiamin kan dah ta rih a. Ka hlim chho leh vur vur khawp mai. Zanriah ei laiin ka nu chuan, "Mama, i pa i va hruai ve dawn chuan i pute pawh hrilh hre rang la aw. Chuan, Rs. 10000 i keng ve dawn nia, i pa a nia, kan puih a mamawh a nih hi" a ti mawlh mawlh a. 

Ka u chuan, "Singkhat em emte chu a..papuia leh ka nîte ho pawn an pui dawn tho alawm. " a lo ti lehpek. A kawm viau vang lam aiin ka pa vanga a natna kha a la dam fel lo a ni zawk. Ka nu erawh chuan, "I nîte chuan an pui tam thei dawn lo, an khawsak a harsa ve tho sia. I patea te phur a rit dawn lutuk asin." A ti mai a. Ka nu chu ka melh a, ngaisang takin ka thlir reng ringawt. Ka nu a ni hi ka va lawm tak êm. Ka u pawn eng a sawi zui ta bik lo. Zan dang aia ka inchei deuha an hriat vang nge, "Khaw nge i kal dawn?" An ti hû a. 

Nui chungin, "Ka bialnu ka rim dawn" ka ti nghut a. 

Ka u chuan, "Tu?" A lo ti leh há. Hrilh vek mai chu thaa ka hriat avangin, "Rinsangkimi mawle, nizan atang khan kan ni ve alawm" ka ti ta a. Ka nu nen mak tih hmel deuhin min melh. A hnu deuhah ka u bawk chuan, "Peka nen an ni an ti emaw ka tia, " a ti a. Ka thaw hawk. An nih loh thu ka sawi a. Ka nu chuan, "Mama, kan tan chuan an sang deuh lo maw? Bakah in la inhrechiang si lo, nakinah i la na ang e" a ti a. Hei chu a sawi ka ring sa hrim hrim. 

"Nia, kan inhrechiang chho zel dawn alawm, dinhmun thuah chuan tunlaiah khatiang lam kha kan thlêk vak tawh lo. Pathian zarah keimaha sumdawnna ka tan ve theih hunah phei chuan kan khawsak a kàng chho ve mai ang" ka ti a. 

"Ni ve tho mai. I sawi takah chuan nimin khan kan VCP ka sawipui leh a, Vengthar lamah in hmun chu min pek ve theih mai tur thu a sawi tak asin. Mahni in leh lo ngeia khawsak te pawh hi a chakawm tawh. " a ti a. Kei pawn ka duhthusam a ni. Tuna ka pate awmna an hotel hmun khi ka niteii Aizawla pasal nei khan a lei a, mahse, a hnuah ka pa a pe ve leh ta kha a nia. Khu in khu chu ka pa fa hnuhnungte pual a nih dawn avangin kei hian in hmun ka nei ve miah dawn lo tihna a nia. Chutia VC te'n min sahthlaksak theih chuan a lawmawm viau ang. Valtea a rawn chhuk har deuh avangin ka call a, ani a vawk chaw zawng a rei deuh a, chaw an lo eikham deuh chiah a lo nia. Ka lo nghak a, mahni chuan ka la leng ngam lo. Mipa a ni bawk a, ka rin aiin a rawn thleng thla leh hma lawi a. Kan chhuak ta. Kea chhoh chu sawi tawh angin a thui tham ve bawk si nen, U Muana bike bawk ka hawhsak leh a, kan tlan ta vang vang mai. An kawngka bulah kan han ding ren rawn a, ka zàm ru viau. Doorbell chu hmetin, reiloteah Sangkimi ngei mai chuan a rawn hawng ta a. A nui sáng bawk. Ka rin ang chiahin Peka pawh a lo thu vang mai. Ka hnual hman deuh naa ka bialnu zawk alawm le tiin ka infuih thar leh. Doctor te nupa pawh an lo awm a, Sawmpuia erawh ka hmu lo. Sangkimi chuan a banrek chu a tuam a, a ulh ve deuh a ni maithei ni. Kan thu fel chiah tihin Sangkimi pa Pu Ruatpuia chuan, "Tluanga, i pa chu eng nge a an zel?" A ti a, min hria chu mak ti ru deuh takin, "A zia ve sàwt khawp mai. " ka ti a. Doctori chuan, "I bulah chuan sawi ta mai mai ila, i pa khu ka'n en vel khan a thin a tha tawh lo khawp niin ka hria. Aizawl in han pheipui ang a, Enkawlna tha zawk han dawng se, thinte chu a dam har lem lo va, a tha vat mai ang" a lo ti ve a. Vawiin lama a nelawm vak loh nen, a hmel hmuh a nuamin min titlangnel nghal hle. Peka chuan a phone bih chungin, "Miss Mizoram an thlang leh dawn a nih hi, Sangkim, tel ve la" a ti a. 

Nui hawk hawk chung hian, "Awiii ka duh teuh lo, a sawi ringawt pawn ka zak sa" tiin a lo chhang a. 

"I tling maithei asin, tel ve rawh..ka ti tak tak" Peka chuan a ti leh a. 

"I ninawm, ka duh bawk lo" a lo ti hlak. 

Peka tawng leh hma chuan, "I banrek chu engtin chiah nge a awm a?" Ka ti a. 

"A ulh ve deuh a niang, a na reng chuang lo" a ti ve mai a. Valtea chu melhin, "Vawiin chu hna i thawk leh mi? " a ti a. Ka rin aiin inlengte kawm a thiam reuh. 

"Thawk leh e, ni a sa sia, lum bawk si.." Valtea chuan a lo ti ve vat a. 

"I u chu a la zin mi?" Ka tih chuan, "Umm, naktukah a lo hawng ang" a ti sap a. 

Peka chuan ngampa zet hian, "Sangkim, thingpui lum teh" tiin Sangkimi kokiah a va khawih zauh a, a tho nalh a, "A hang nge in duh? A thlum" tiin min rawn melh kual hlawm a. Peka tih loh chuan a háng kan thlang. Peka chuan, "Thingpui hàng hi chu upa lam deuhte hian tui hi an tithei. Kei chu a tuina hi ka pawh pha lo reng reng" a ti a. 

Valtea chuan, "Chhawl hal a tizia bik alawm" a lo ti a. Doctori te nupa chu an roomah an lut ta daih, "Kan dîp palh ang che u. Kan va mu ang e" Pu Ruatpuia chuan a ti a, a nui huah huah bawk. Pa nelawm tak a ni. Sangkimi pawh tray-a thingpui rawn chawiin a rawn phei a, ka bulah a rawn thu nghal zat. 

"Vawiin kha chu maw driverin min hràwk khur khur a, Nungi hlauthawng lah a lo rak tuar bawk nen, ka buai vek alawm" a ti siam siam a. 

"In insu na lo hlauh a, a zia zawk. Kawng hi a tha tawh sia, sumo ho pawh hi an tlan chak thei lutuk a" ka ti a. 

Peka chuan, "Naktuk chu bike min va silpui la" tiin ka bialnu chu a melh ralh a. A inla neitu vel lutuk chuan ka mit a tikham tan ta deuh, Mahse, Sangkimi'n, "Aih, Two wheeler-a chuan an phal tawh rih lo, Apa ten" a tih takah chuan ka thêp suai suai. Peka chu a meng hnual ruih tawh, Valtea chuan, "Sangkim, naktuk chu len ka deng dawn asin, Sangha i ei ngai em? I ei chuan ka pe ve ang che. I thla hual nan" a ti a. Lawm hmel tak hian, "Sangha chu ka duh lutuk, i man tam chuan aw..Anu te pawn an duh rapthlak" naupangchhia tak hian a ti a. 

Peka ve sek lah chuan, "Sangha te chu a ruh a tam si, bakah Tawipui lui sangha te chu an lian awm lo em mai" a ti deuh nghat a. 

Valtea chuan, "Tui i tih ve loh vang khan sawisel kher a tul hleinem, lian tak chu an ni lo, mahse, a ei ve tlak viau a nia" a ti ve ta ngat. Kan boruak chu chhungrilah a alh hlep hlep ni maiin ka hria. Peka lah a haw duh si lo, a thu ve tlat. 

"Taka naktuk tuk lehah Lungleiah ka zin dawn asin. Eng nge ka lo hawn ang che" Sangkimi bulah a ti leh tawh. Ka nuihte pawh a za tan ta deuh, Sangkimi lah chuan, "Ka hre bik lo, i duh duh ni mai" a ti ve mai a. Valtea'n hmun leh hmunah min lo text chu niin, "He nau hi ka beng thle lawl lawl chak" tih a ni. Ka chhiar chu ka nui huk a, min melh thap, "Engmah a ni lo" ka ti ta ringawt. Peka'n hawn a tum miau loh avangin leh Sangkimi chu kan men hrep dawn avangin hawn lam kan hnaih ta a, an pahnih chauha an awmdun tur erawh ka ngaihtuah ru deuh. Mahse, Sangkimi hi ka rin phawt a ngai. Veranda thleng min lo thlah a, a ngaihna hria Valtea a lo zu chhuk hmasa a, Inhmatawna ding dunin ka chhuk melh run a, min melh kiau, a pawisawi lo hmel lutuk ka hmuh chuan ka insum thei ta lo va, a biangah dawmin ka fawp ta a. Mahse, rei infawhna chi ni hek lo, a zei tehchiam lo va, a fresh hle thung. 

Kan infawh zawhah, "Saw pa saw hawntir vat rawh aw" ka ti sup a. A bu ve nghat mai. Kan inmangtha ta a. Valtea ka zuk pawh hnu chuan, "Ka beng chak tak tak" a lo ti hmanhmawh. 

"Ben hunte pawh a la awm maithei asin. " ka ti ve a. 

"Taka! Ruati rai thu kha i hre ve tawh em?" A ti hluai a. 

"Hre nang, tu fa nge?" Ka ti vat a. Za lo zeta nui hul hakin, "A puanthuina dawr neitu pasal fa mawle. " a ti zawi raih a. 

"A va mak awm ve aw. A chhungte an sa leh awm" ka ti a. 

"An sa vak lo a niang, A puanthuina nu lah khan a pasal mizia hrechiangin Ruati te chu pawisa a pe nual zawk a niawm e. Mahse, naute a lo pian hunah pawh tibuai zui tawh lo turin a intiamtir thung a" a ti ta nuah nuah. A mak thin teh e, kan khawvel zet hi chu. Ruati chu ka khawngaih hranpa miah lo lehnghal. Tunah chuan amah hmangaih em emtu ka thianpa hnawltu khan mi pasal lakah sàwn a pawm dawn ta chu a nia! Dinhmun hi chu a inthlak thei viau a nih hi. Bazar kan thleng thla chu inhau thawm niawm tak kan hre ta a, hmanhmawh deuhin kan pen phei nghal hlawk hlawk. Bazar shed bulah chuan Nu Rami leh Nuteii an lo indinchilh ran mai a, mak ka ti vak lo. Nu Rami chu a rui hle tih a lang. 

Nuteii chu a lo ankhum mek a, "Nangmah vang vek a nih hi, inpa i fuih khawlo a, ka pasal kanna sum i awt a, in inah i la phei a. Ka pasal hi a thih chuan kan in leh lo saw neih in tum bawk, ka hre vek" a ti ta phiar phiar a. Nuteii chu a thinrim kher mai, "Ramlian, khatiang khan min ti hlek suh. I pasal kan hmangaih vang chauha kan ina enkawl kan nih hi. Sum leh pai hi maw kan mamawh tawk chu kan nei ve e, Damdawi in a luh phat atangin Tawipuiah pawh enkawl chu sawi loh vawi khat chiah i rawn lang a, chuta karah i pasal damlo nikhua pawh hre mang lo i ankhum thul, Lungleiah nise tuin nge a zun leh ek thiarsaka a mamawh lamkhawmsak thin. Nang chu i rui reng a, buaina i rawn siam bawk. I pasal hi hmangaihna chhete mah i nei lo, tunah pawh i fate khawngaihthlakzia hi..i fabik lah hian ngaihsak hek suh,.i lo tenawm em mai" a ti ve ta nghat nghat a. Nu Rami ang êm chuan a rak ring lo thung. 

Nu Rami chu kawisawi zeta dingin, "A nih mai mai tak chu, chuti taka ka fate in khawngaih chuan an ni pawh saw enkawl u la ti nia. Engpawhni rawh se, kan in leh lo saw chu min chuhpui hlek lo ang che u" a la ti piap piap ngam nia! Nu Rami û U Khuma lo awm ve reng chuan a farnu chetdan chu a lutuk a ti ve ngang a niang, a va pan hnai set sawt a, a beng let tawp mai. Mahse, an lo chelh vat hlawm a. "Ramlian, i va zakthei lo ngai ve le! Eng mihring nge i nih a? I chhungte hi min va timualpho ve, haw la i fate va uap rawh. Tikhawp hian U Chunga te chhungkuain an hmangaih che uin an tuamhlawm che u a, lawm tak aruanga hetiangte a in tawng reuh le..Kal rawh ka ben leh hma che hian haw vat rawh" a ti ta bawrh bawrh a. Nu Rami chu pai khat khat chungin a rawn tho a, "Zawmlian le! Ka nu ka hrilh khawp ang" tih leh kal chu a rual ve mai bawk a. Kan thaw huai hlawm mai. Rilru a hrehawm duh ta viau, ka pa dinhmun lah sawti saw a nia. A fate mawlh hi a ni. Tawngthu chhe loah ka pa hi boral ta se tuin nge enkawl ta ang? Nu Rami hian a enkawl peih ka ring miah lo. A fabik lah engmah a ni bawk si lo va. Hmalam hun ngaihtuah chuan rilru a ipik ta viau. In ka thlen hnu pawn ngawi rengin ka mu a, Sangkimi lam pawh ka ngaihtuah thei meuh lo. Chhungkaw kehdarh hi chu a va pawi lungrun tak êm. Keini unau erawh Pathianin nu tha tak min pe a, ngaihtuahawm kan ni bik lo. Ka pa fate erawh engtiang miin nge an rawn seilen chhoh ang le?! 

Ka phone ka'n en chuan Ka bialnu msg pawh pahnih a lo awm a. 

"I thleng tawh em? Ka mu chiah" tih leh "Min va reply thei lo" tih a ni. Ka reply ta vat a. Kan haw hnu lawkah a mutchhuah thu leh a chauh thu sawiin Peka chu a lo hnar haw a niawm e. Ka nuih a za deuh bawk si. Peka chu a thinrim ru viau ang. 

Amah Sangkimi pawh chuan, "A chang chuan ka ning lek lek zel, a rawn kal reng bawk sia. Anu leh apa te hi a be tlawn peih sia, mi bulah lah min inla neitu thei si. Khak fawk hi ka hreh ve deuh a, ka duhzawng a ni lo hrim hrim, a mizia hi. Bakah a rui thin tlatin ka hria" a rawn ti ve duah. 

"Rui dawn mi? A fel chu a fel viauin ka lo hria a" ka ti a. 

"Nang, zu te hi i lo in ve lo maw? " a rawn tih chuan ka nui hawk a, "College kal lai khan vawi hnih vel chu ka in ve. Ka nu leh pate hi zu vang a ni pakhat a, an inthen chhan kha, kha vang khan ka nu hian min hrilh nasa bawk nen, ka in leh ta miah lo. Chak pawh ka chak ngai lo. Zial erawh ka heh" ka va ti ve luam a. Ka sawi hi tak tak a ni chiah bawk a. Tunlai angah chuan thalai lam hi kan fel tawh hrim hrim a, lo lem ve hlek thinte chu awm mah se, khawlaia rui buai leh mawi lo khawpa in an awm ngai meuh lo. Tin, Tawipuiah hian a hranpa taka zu zuar an awm hauh lo bawk. YMA bakah NGO hrang hrangte hi an tang bawk a. Thawkkhat lai khan No.4 hi ti an awm ve zauh a, a ti thinte khan tlem azawng an vawrh ve thin bawk. YMA lamin hma la vatin Counselling an neihpui phawt a, a tul a niha an duh phawt chuan OST laksak thlenga an inhuam thute pawh an sawi hial. Thenkhat la ti rei hman lo te chuan an sim phah ta reng a, mahse, a ngawl lo vei ve tawh si te erawh chuan an ti leh ta tho. Lunglei lamah an zuk la thin a, an zin chang chuan YMA duty ten tlaivar zak paw'n an lo chang mai. An man ziah reng bawk a, warning pein a vawikhatna chu an chhuah phawt a. A vawihnihnaa an man leh erawh chuan Home-ah an dah lut ta hmiah hmiah a. Tunah chuan ti pawh ka hre ta lo, a ruka ti tawkte chu an lo awm mahna. Ka'n sawi leh lawk ang a, kei pawh college ka zawh atang khan pangngai takin Khawtlangah ka inhmang chho ve a, Kohhran tak hi chu inkhawm hi ka taima vak bik lo va, sunday zing hi a ni deuh mai. Khawtlangah erawh tunah pawh hian kan section-ah Secretary ka ni ve a, Branch-ah Committee member ka ni ve bawk. Ka hun neih hian a zir loh êm avangin thiante ka pawl pha lutuk lo zawk a, A inthlahrunawm thei viau. 

Sangkimi chuan, "Anu chuan maw ka hrilh tirh chuan, 'I hrisel si lo va, in la buai ang e aw. ' a tia. I chanchin te ka hrilh ve a, 'A tihnat loh hram che besei ang' a ti leh ta a. Apa chuan tiang lam hi a ngaihven vak lo" a rawn ti a. 

"ka tina lo vang che. Ka tina phal lo che" uar zetin a va ti. A mutchhuah deuh tak avangin kan inmangtha a. Kei pawh youtube ka ngaithla leh tan. Ka hriat loh karin ka lo muhil ve ta a. Mumang mak angreng tak mai ka nei ta a, Luiah hian kei Valtea, Sangkimi leh Ruati te hi kan lo kal ho a. A hmaa chakai kan chhitna lai vel bawr kha a niawm e. Chutia len kan han deng chu sangha tam deuh mai hi a hlawm hlawmin kan lo man a, Sangkimi te pawh an hlim kher mai. Chawfak tura kan han thut bial laih lai chuan Dr. Saidingpuii ngei mai hi a rawn lang thut a, A fanu chhipsamah chuan thàmin, "I pasal neih ni-ah luiah i kal a maw? Rawn haw nghal rawh" tih leh kaih a rual nghal a, Mak ti zetin kan lo melh hu ringawt. Sangkimi chu a tap tuar tuar a, ka lo pawt ve bawk. Doctori chuan vawt raih hian, "Tluanga, engtikahmah ka makpa i ni thei lo. Mi bawlhhlawh i nih kha" a ti ta mai a. Sangkimi chu kai luiin a hawnpui ta, Sangkimi tap vawn vawn chu ka benga cham reng chungin ka mumang mak zet chu ka thangharhsan ta a. Ka thu chhuak hlawl mai. Ka thaw káwk a, ka hah hluah hluah mai. Mumang mai mai pawn min tibuai kher mai. A tak takah thleng ta se ka ngaihtuah zawng pawn min hnawh up up thei nia. Hmalam hun lah hriat ni hek suh. Muhil leh thei lawk loin ka let ka let a, zing dar 3 velah chuan ka muhil ve leh ta hram. 

Ka pa pawh a ziaawm chhoh tak deuh avangin test hrang hrang neia a nat chhan tak hre turin Aizawl lama kal tur chuan kan inbuatsaih chho tan ta a. Ka nu chuan a ac atangin Rs. 10000 a la chhuak a, papuia te'n Rs. 7000 zetin an rawn pui ve bawk, ka nite pahnih erawh an khawsak a chuti lua bik lo nen, 2000 ve ve bak an rawn ti thei lo. Bakah ka'n sawi leh hram ang a, ka nite hian ka pa hi an ngei ve em em a, khatia ka nu a tina leh Nu Rami a lalut kha, reitak chhung an be duh lo nghe nghe a ni. Ka ni pakhat zawk hi chu Minpui lamah pasal neiin kan inhmu zen thei lo va, pakhat lah vengthlang a ni bawk nen, ani hi chu bazarah mamawh lama rawn chhoh zeuh zeuh a nei ve a, tlem chuan kan inhmu zing deuh. Biak hmasak an ngai ngai lo, "Mampui" ti ngatin min la ko zel a, demna tur ka hre lo. Tichuan, Nuteii leh ka pa fanu fel tawh tak Mateii leh patea te nen chuan sumo hire-in ka pa chu Ningani-ah Aizawl kan panpui ta a. Sangkimi nen pawh engkim kan inhrilh tawn a, a fel reuhzia chu ka zin hma zana ka han len chuan ka pa kan nan tiin Rs. 3000 lai min pe ve a ni. Ka la duh chiah si lo va, min ah luihtir a ni. A seilennain a zir bawk a, ka hriatchian poh leh ka ngaisang telh telh, aia upa tupawh a hriat ngai loh pawh Ka pi/ka pu/ ka ni tiin a ko thlap zel a, tin, ran a ngainain a duat em em bawk. Zawhte pawh Aizawlah chuan paruk lai a vulh thin a, mahse, a hriselna lamin a tawrh phah an hlauh vangin a rawn hawn phei lo a ni. Ui erawh pathum an vulh a, a roomah an riak dial zel bawk. Ran ngaina leh duat tak hi chu mi rilru chhe tak an ni ngai lo khawp mai. Vanneih asiamin ka zin dawn zana ka han len chuan Peka Lunglei lama a riah zan a ni hlauh a, Valtea chuan DIki a rim thung. Hun thawl kan nei ve thei ta bawk a, kan inngheng dun rial reng a, a u lah a pindanah games a khel daih bawk. Sawi tur em em kan hriat tawh loh hnuah Pubg te chu kan han khel dun leh a, a lo pro zêk a, nuam hi kan va ti tak. 

"Ti nge min duh ve?" Ka ti tawl mai a. Min melh kàwk chungin, "Ka duh che" a ti ringawt a. 

"Kan hausa bawk si lo, ka hmel lah a tha bawk si lo, engtin nge min duh theih le?" Ka ti nuah nuah a, ka benga rawn pawt zauhin, "Tawipui tlangvalah i hmeltha ber..i fel ber bawk" a ti sar sar a. Ngaihthlak nuam lo a ni miah lo. Ka khi sûng reng mai. Dar 10 velah ka haw thla ta a, "Cham rei suh aw. Chuan va lerh lo la, nula te kha va melh vak vak lo la" a ti ngei. Ka duh ber leh ka vei ngawih ngawih ka ngaizawng tawh a, midang hi chu ka kawpsan lul lovang. Fawh pawh kan infawp rei, ani pawh a thiam ve deuh tawh a, a hmasa berah kha chuan a àng deuh phuau ni mai khan ka hria. Hlim sûrhin ka haw ta kha a nia. 

Sangkimi'n a sawi danin, "Ngaihzawng hi nang tih loh chu pakhat chiah ka la nei, chu pawh class XII ka nih lai a nia, fawh pawh kan la infawp ngam lo, amah kha zakzum ve chi tho a ni sia, vawi hnih chu kan inkai ve " a ti a nih kha. A dik ka ring hmak, infawh a thiam loh danah khan. Tunlai thangtharte an han zei hàwrh háwrh tawh nen a, A lerh vak loh bakah a hrisel lohna hian a uairit ve êm a, hei vang hi a ni pakhat. Patea te an la men avangin ka peng leh zuai a, Ka ni te pawh an lo la awm ve a. Tukthuan ei khamah muangmara phei an ti a, Zing kal kha kan va inentir hman dawn chuang lo bawk a, a tul tehchiam lo ve bawk a ni. Kawng a tha tawh tho a, kan thleng hma viau tho ang. Rei pawh awm loin ka haw chho a, Sangkimi'n ka pa a kanna kha nuteii ka pe bawk, fel an ti ve hle. In ka thlen chuan ka u-in ka thawmhnaw a lo siam mek a, a va fel thin tak. Ka nu chuan, "I u damdawi te pawh i rawn lei nghal ang a, chuan thawmhnaw te pawh rawn inlei ve la, pheikhawk pawh i neih ho hi an hlui ve deuh tawh. " a ti mawlh mawlh a. Ka um e liam ringawt. 

A tukah chuan nidang aia hma deuhah chaw chu kan ei a. Eikhamah min thlah turin Valtea a rawn thleng ve bawk. Kan vaiin bazar lam kan pan ta a. Nuteii te pawh an lo inpeih tawh a, ka pa chuan zawn a duh loh avangin patea nen kan kuah chhuak a, a rem thei ang berin kan thuttir. A fapa Bena tê khan a ngen tlat lehnghal, a la nau deuh sia, hruai chi a ni si lo. A u a awm loh phei chuan a ngaihtuahawm deuh avangin ka ni vengthlang amite leh patea faten an lo ngaihven deuh dawn a ni. Min thlahtu te pawh an awm ve nual mai. Ka pa thian tha tak Pa Zaia chuan, "Dam takin i rawn haw leh dawn nia. " a ti chuar chuar a. Nu Rami pawh a rawn lang ve hlawl mai. A thing rim a nam nasa, Ka nu chu a zak ve deuh nge ni patea te verandaah a ding daih a. Ka nu chu a va hmu a ni tehchêk ang chu, va pan nghal thàwrin, "Nunkim, i pasal hlui chu i rawn tlawn leh deuh tihna mi? A in leh lo i duh avang sawn" a va ti leh ta. In leh lo-ah ringawt a buai, hetiang hmeichhia hi ka la hre ngai lo e a. Ka nu chuan, "Rami, i ti-ang lo êm mai. I pasal saw ngaihven zawk ta che, in leh lo hi eng atanmah ka ti lo ve" a lo ti ve a. Patea a inrawlh ta vat a, "Rami, tun dinhmunah khatiang sawi sawi chi em ni? In pa hi rawn thlah ve ta che" a ti a. 

"Khatiang a duhthlanna ngeia zu in, damlo kha ka buaipui peih lo, ka beidawng tawh" a ti hmiah. Lehlamah chuan Nu Rami tan pawh ka pa awmdan kha a beidawnthlak ve viau tho chuan ka ring, an inneih that hnu thla li nga vel kha chu a nghei ve reng a, Nu Rami paw'n a in ngai lo. Mahse, a han beih chhoh leh takah khan Nu Rami tan pawh a ngeiawm ve viau ang le. Aaa. Mihringte hi chu kan dinhmun kan inhriatsak phawt loh chuan indem ngawt chi pawh a ni bik lo. Dam taka hawn leh inbeiseiin Tawipui chu kan chhuahsan ta a. Ka pa bulah Nuteii nen kan thu a, Mateii erawh tukverh bulah a thu thung. Tleirawl zakzum leh tawngtam lo tak mai a ni reuh a, ka khawngaih letling, kan innel em em bawk si lo. Thualthu kan thlen chuan ka pa chuan a luhai thu sawiin kan han ding ren rawn a, tukverh bulah kan sawn ta bawk. A dak vauh vauh reng a, a hmel ka en hian ka huatna te kha an kiam hret hret hian ka hre thin, mi khawhar tak, hlimna zawnga hmu si lo hi ka chan ber a, a hmai a zûrin zuin a ei nasa bawk a, a mawng a dêp em em bawk. Amah a sang si a, a zawr ngawih ngawih a ni ber e. 

Lungleiah pawh chawl khawmuang loin kan tlan ta zel a. Kan driver Dina chu tlangval tawng tam lo ve tak mai a ni bawk nen, kan ngawi thup a ni ber e. Haulawng kan thlen chuan ka pa chu a luak ta a, kan dinpui leh, zing lama a chaw ei ve tlemte chu a luak chhuak leh ta si a, a chau dawn êm mai tiin ORS leh eitur tlem azawng ka leisak a. A luak zo chu a thu hle hle mai. Chau aw tih hriat ngawih ngawih hian, "Tluangpui, ka thaw hi a sak riau mai" a ti ta a. Hlauthawng ru takin seatah chuan kan muttir a, a awm te chu ka nemsak pah bawk. Reivakloah chuan rawn zia ta deuhin, a thu ve leh thei ta a. Min rawn melh táwk táwkin, "I nu leh nangni ka tihnatna che u phuba a nih hi, thi tawh mah ila pawi ka ti lo, i nu ka hmuh khan ka thla a muang tawh" a ti ta mai a. 

"Thih thute chu sawi suh, i dam leh vat dawn alawm..muthilh tum la a tha" ka lo ti vat a. Kan tlan leh ta. Thenzawlah thingpui kan in a, ka pa paw'n tlem a ei in ve a, a lawmawm e. Aizawl chu dar 4 rik hma deuhin kan thleng ta a. Ka niteii te in lam kan pan zui nghal. Ka niteii hi an vanglai chuan Tawipui south-ah a hmeltha ber tih ve thin a ni a, a vannei a, pasal fel leh hnathawh tha tak nei a nei zui ta a. An pa nen hian fanu pahnih leh fapa pakhat an nei ve a, ITI-ah an khawsa ve a ni. Kan han thleng chu ka pa chu a mu nghal a. Niteii chuan, "Tluangpui, i rawn tel ve thei chu a lawmawm hle mai" a lo ti sawk sawk a. A hahdamthlak thin e. Kan han intifai a, Mateii chu a zum em em a, a vawikhat kalna a ni bawk si. Niteii te fa naupang ber nen an inrual khat vel a, Rosy chu a lo fel reuh hlauh a, a kawm tlangnel chho ta a. Rosy u Mama erawh Hostelah a lo awm daih a. An upa ber Vli pawh an college excursion-a an zin lai a ni bawk. Niteii pasal Pa Kunga pawh chuan min lo welcome tha viau,.zanriah pawh ka pa chuan a ei peih lo va, a motor chuang chau nen, a lo rui ve deuh bawk si chu a tuar lo deuh a nih hmel. Mama roomah ka mu a, Harsatna tawk loin zan hun chu kan hmang liam thei e. A tukah ka pa chu Niteii te taxi-in Nuteii leh Patea te nen Damdawi in lam kan pan ta a. An lo admit nghal a, Test pawh a theih ang angin an nei chho bawk. Biopsy an la bawk a,Result erawh a tuk lamah ngaihven tur a ni thung. Ka pa chu keiman ka riahpui dawn a ni. Kan cham rei ve dawn loh avangin Nuteii te chu ka chhawk ve duh rih a ni. Ka pa chu a muhil deuh reng a, a rawn harh pawn a tawng mang lo. Inthiar a hunah ka kuah chhuak mai zel a. Min tibuai lo kher mai, a inthlahrung em mawni ka ti hial zawk. Zanah erawh a thin bawr vel chu nà a tih avangin a tal a tal a, nachhawknain an rawn chiu a, na dang chu a nei lem lo a nih hmel. Ka nute nen pawh kan inbe reng a, ka bialnu nen phei chuan darkar khat dawn dawn kan inbia. 

"Peka'n " Tluanga te chu a lerh lutuk an tia, fimkhur rawh aw' min ti khanglang a, "Lerh lo se kan inngaizawng thei nang" ka lo ti hmiah a" tih vel a sawi chuan kan nui hawk hawk mai. Peka tactic chu a thing ka ti viau. 

"A lakah khan fimkhur a ngai zawk, a hnaihah awm tam suh aw" ka tih chuan, "Awii enteh, Peka nu lah hian min be thain min tlawn thei si, anu leh apate hi a ti huam a, ka ei thlawt lo. " a rawn ti lang lang a. Peka nu Pi Mawii chuan a fapa tan a kherh ve tihna a nih hmel. 

"Kan nghin phah chuang lo vang, ka ringtawk che alawm" ka ti mai a. 

"Kei pawn ka ring che lawm, e chuan, vawiina bazara ka kal chu i û nen kan inbe ve a, ka zak rap" a rawn ti. A va hahthlak e aw. A la naupangchhia mai sia aw. 

A tukah chuan ka pa result chu ka va lam ta a, Doctor chuan thu turin min ti a. A aw thian leh kharhin, "A fapa maw i nih!" A ti nghut a. Ka lo chhang a. 

"Aw..i pa dinhmun hi a tha vak lo chu a ni. Englo a nia, a thinah hian cancer zungzàm kan hmu tlat mai a. Tin, a thin hi a chhe tawh viau bawk. Keini lam chuan tihtheih kan nei tampui lem lo va, Ka'n sawi tlang tawp ang a, i pa hi chhan theih niin a lang tlat tawh lo" a ti ta a. Ka vir muai muai mai. Cancer êm kha chu ka lo beisei lo asin le. Zu vangin a thin a ralin a lo chhia a nih chuan ka hrethiam. Sawi tur reng reng ka hre lo. Amah bawk chuan, "Phai lam inrefer pawh a sáwt dawn chuan loh avangin ka refer lo law law ang che u. Tihian a theih ang angin kan inenkawl a ngai a ni mai. A nunna chu kan pawtsei ve thei hlek chauh tawh ang" a ti leh a. 

"Doctor, amah saw chuan hre lo se kan va duh ve" ka inrin hmain ka ti hawk a. A bu nghut a, "Ni e, hrilh in remtih loh chuan kan zep thei alawm, kha lamah chuan buaina a awm lo ve" a ti dam thlup a. Ka pa result keng chung chuan ka chhuak leh ta a. Min hnawh up up a, awmdan pawh ka thiam lo, bathlarah chuan ka ding vang vang a, ka pa bulah engtin nge ka sawi ang tih ka ngaihtuah. Ka bangbo êm avangin patea ka call ta ringawt a. Engkim chu ka sawi ta, a thawng ve hle a niang, a ngawi dat a. A khuh kharh kharh hnuah, "A va mak dawn ve aw. Aa. Ni e, Tluangpui, tawrh theih tum ang aw. Amah chuan hre lo se a tha ber, i thin a lo ral tan a ti tawp mai ta che" a rawn ti a. 

Ka nu ka call dawn lai chuan ka khur der der, ka nu chu engtin tak thawng ve ang maw? A fate pa hi a la hmangaih reng tih ka hre kar si a. A ring ral ral a, "Aw mama" a rawn ti sap a. Hnukulh teuh hian, "Nu, ka pa chu a thin a lo cancer a" ka ti thei hram. Ani pawh a ngawi rei viau, "A va pawi ve aw. Chutiang em em chu ka ring phak lo asin le. Mama, intipachang hram hram rawh aw" a rawn ti a, a aw pawh a lawi deuh. 

"Nu, ka pa hi ka haw thin viau naa, hetiang em em a thleng chu ka khawngaih lutuk" ka ti leh a. 

"Ni e, kei pawn ka khawngaih takzet a ni. " tih bak a sawi thei bik lo. Ka dah ta ringawt a. Patea'n midangho chu a hrilh kual tho ka rin avangin ka call duh ta lo hlawm a. Ka bialnu number ka hmetchhuak leh , "Sangkim, ka pa a cancer" ka ti ràwih a. 

"Awii! A va pawi tak êm..ka khawngaih e i pa chu" a ti sep a. Sawi tur a vàng nghal ngawih ngawih. 

Ka va luh leh chuan ka pa chu a lo harh tawh a, thei leh thei loin tui in a lo tum a. Ka va laksak a, ka intir ta vat. 

"Tluangpui, eng nge ka result chu?" A ti ta chiah a. Inhumruh chungin, "A tha a ni mai, i thin a lo ral ve tan a, mahse, a insiamthar leh hma lutuk a tia..rei pawh awm a ngai lo vang" ka ti ta hmiah a. A hmel hmuh a nuam sawt mai. A chang chuan kan beidawn leh mangannain min han tlak buak tak tak hi chuan thi daih mai ila te hi kan ti fó, mahse, a taka thihna kan han hmachhawn dawn meuh chuan tumah hian lawm takin kan dawngsawng thei lo chu a nih hi maw? Thihna lo awm kher kher hi chu aw..

Zanah pawh ka riahpui leh a, mahse, ka tlaivar titih. Ka pa pum chu a puar chak si, a thinah a hnawh a, a thawk a sak bakah a pum velte chu na a ti em em reng a. Nachhawkna chak ber chiin an chiu ta tawp, a taksa a chhe sia, a zawh lohte pawh a hlauhawm. Khawvar dawn lamah reilote chu ka chhing ve ta sek a. Tukthuan min rawn pek pahin Nuteii chuan a awmpui ve nghal dawn a ni. Ka zawiin ka chau em em a, rilru lamin min uairit bawk si. Nuteii chuan ka pa chu lainat hmel takin a melh tlawk tlawk a, Ka haw tur chu min rawn thlahin, "Nizan lamah chhungkua kan inbe ràwn hlawm a, hetianga chhan theih a nih tawh si loh chuan a la zia lai hian phur phei leh mai ila, mahni inah ngei a hun hnuhnung chu hmang zawk se te kha kan tia. Chuan, i patea hian a ngaipawimawh khawp a, an in leh lo chungchang saw, nang pawh biak che a tum tak kha. Ngun takin thil i ngaihtuah dawn nia, In saw i pa kutah i niin dah mah se, i nî hming vekin a la awm a, Mahse, hetiang kan nih takah chuan fapa pahnih a nei ve che u a, Rami kutah chuan hlan a tum lo bur, nang emaw Bena kutah emaw dah a tum a, chung vel chu ngaihdan fel tak nei rawh aw" a ti mawlh mawlh a. 

"Nia, in sawi ang khan phurh phei mai pawh kei chuan pawi ka ti lo. He laiah chhungkhat kan nei tlem bawk si, in saw chu Bena kutah awm se ka duh" ka ti a. 

"Chutin ti ngawt suh, Aaa..i patea nen inbia ula i hrethiam mai ang" a ti niah niah a. Ka kalsan ta. 

Niteii te in ka thlen thlak chuan Niteii leh patea te chu an lo thu ran a. 

"Lo thu rawh, Tluangpui, thil sawi ho a ngai" niteii chuan a lo ti nghal. Ka thu ve mai a. Phurh phei leh phei loh chungchang kan sawi phawt a, phurh phei ka duh thu ka sawi ve. In leh lo chu an sawi ta a. Bena kutah dah tura ka tih chuan, Patea chuan, "Khatin ngaihdan siam mai suh. Ramliani leh a chhungte fin kherekzia saw ka hre tawh a, Bentea kuta a awm chuan ani naupang mai mai chu an pawisa dawn teuh lo a nia, Rami te ta a ni nghal mai dawn a ni. Ngaihtuah teh, tihian mi in luahin in khawsa a, mahni in leh lo neih tluk hi a awm lo asin. I nu pawh ka lo be tawh a, ani pawn Bena kutah dah turin min tia, a tan chuan khatia sawi àwm tak pawh kha a ni rêng a. I pa pawh hian a kal mai dawn tih hre sa se, i kuta a dah hi ka ring. A nupui mizia saw hre lo a ni bik lo miau a" a ti chuar chuar a. Ngaihdan ka siam thiam ta lo khawp mai. Ka pa in leh lo chuhpui anga lan ka hreh rualin Nu Rami te kuta a awma an han intithei vel tur chu mihring tak chuan ka ngaingam meuh bawk si lo. Ka pa fapa ka ni ve miau bawk si, "Aa, Pate, ka hrethiam tawh lo. Ka nu te nen pawh kan sawiho ve phawt ang a" ka ti ta ringawt a. An ni pawn an pawm. 

Niteii chuan, "Chuan, sawi leh sawi hnu i pa fate hi an lainatawm hle dawn mai a. Tunah pawh ngaihsak an ni si lo. Chuvang chuan Mateii hi chu kan bulah khawsa se, Bena hi i patea te bulah awm mai se te kan lo ti mai mai a. An lo hreh ve viau thei bawk a, Mateii hi chuan a hreh lutuk ka ring lo, Rosy nen an inkawm thei bawk nen.." a ti siam siam a. Ka pa khan a unaute hi timangangin tizak viau mah se, thisena inzawmna hlutzia hi an tifiah ka ti ngawih ngawih, unau inhmangaih takte hi chu a zahawm pawh an lo zahawm nge nge e. 

Chawhma chhung zawng ka muhil ta a. Ka mutui phian. Chawhnu dar 2 bawr velah ka harh a, ka inhnawhpuar zawhah eng emaw thleng thut thei kan nih avangin ka hman tawh loh takin tih thuah bazar lam ka pan ta a. Smart show ka duh tak chi ka lei ve a, Ka nu leh ka u bakah Valtea leh Sangkimi pawh thil hotê ka hawnsak ve hlawm. Ka u damdawi ka lamkhawm leh meuh chuan a lo tlai viau tawh a, hmanhmawh takin ka haw ta a. Pa Kunga pawh a lo haw tawh, Mateii leh Rosy te'n Nuteii te chaw an han pe a, kan lo nghak. 

"Mateii hian a hre ve em?" Ka tih chuan, Niteii'n , "Fimkhur a ngai kan lo tih mek chu, hre lo se a tha. Tleirawl an nia a la na lutuk palh ang" a lo ti vat a. Ka ngaihdan chiah a ni. 

"Nu Rami hian a hre ve tawh ang em le?" Ka ti leh a. 

Patea chuan, "A theih chen chen lo zêp rawh u, a hriat vaih chuan in leh lo bakah ralna sum thleng khan a nia a ît leh dawn ka va tih kha" a ti a. 

"Anih Pate, ka pa hi kan hawn hunah khawiah nge kan luhpui ang?" ka ti ta a. A hmel a buai ve deuh, "Aa..in a nei ve tho a, a inah kan luhpui ve phawt ang chu. Rami awmdan azirin a lakchhuah dan a awm tho ang. Mite min ngaihdan tur pawh ven ve a tha, kan inhnaih tho bawk a, kan va buaipui vek thei ang" a ti a. 

Mateii te lo hawn takah chuan zanriah kan ei zui ta nghal a. Ka eitui vak lo, rilrua mawlhtu neih hi chuan engmah hi a tui thei tak tak lo a ni e. Ka bazar kal kha ka chau ve deuh bawk nen, ka mu hma khawp mai. Nuteii te chu ka ngaihtuah deuh a, ka han bia a, ka pa chu a muhil rih a, a lawmawm e. Sangkimi nen kan intext a, Nungi te inah a len thu leh Peka a nin thu bawk a rawn sawi leh. Amah ka biak hian tlemin ka rilru lama ka phurrit pawh a nep deuhin ka hre thin. Ka pa chungchangte chu kan sawi dun ve a, ani pawn, "Nia tawngthu chhe loah a thih dawn rau rau chuan mahni in lum ngeia thih kha amah pawn a duh zawk ang. Anu te pawh ka hrilh ve a, an khawngaih khawp mai" a rawn ti a. A frank thei reuh mai sia aw. A bula awma kuah vawng vawng ka chak tawh. A tukah Nuteii ka han chhawk veleh a, vawiin hi kan han awm leh ang a, a dinhmun azirin naktukah hawnpui kan rilruk deuh. Aizawla khawsa Tawipui welfare lam ten min rawn kan liam liam a, an fel ngawt mai. Tawipui khua nih a nuam thin e. Mak ve deuh chu khawpuiah emaw hmun dangah hrim hrim kan han zin hian, kan khuaa kan biak ngai em em loh pawh hi han hmu ila kan inbe chul zel, Khua leh tui hi chu kan inhlut tlang thin a ni. Kan tawngtai nasa bawk a, ka pa pawh ka beisei ai daihin a harh tha a. Thilte pawh a ei a ei ve mai. A sakhat lam erawh ei an phal lo va. Tlaiah Patea leh Niteii te an rawn kal ve hlawl a, chaw an rawn dah pah bawk. Ka pa pawh chuan a lo be ve thei a, awm erawh an awm rei lo. Zanah pawh Pathian kaihhruainain eng êm kan ti lo. A ná a chhuah rual hian an chiu nghal zel bawk a. Kawnglakah kan buai loh nan nachhawkna pawh kan inlei lawk a ngai ngei ang. Nuteii hian a jection thiam tho bawk a. Tichuan, a tukah chuan patea ten doctor an be lawk tawh bawk a, damdawi in chu chhuahsanin niteii te in atangin sumo bawkin kan hawng leh ta vang vang a. Ka pa bulah erawh, "Damdawi kan chawh ang a, in haw thei ang. " an ti kan ti thung. Ngaihthat lohna erawh a nei ve maithei a ni. Kawnglakah vawi hnih kan buai a, mahse, kan chiu nghal zel a, chutiang chuan tlai dar 5-bawr velah Tawipui kan thleng leh ta. An inah kan kuah lut a, Patea faten in vel an lo tihfelsak vek a. A hahdamthlak deuh e. Nu Rami pawh rui lo hai loin a lo awm ve khiah a, Bena chuan ka pa chu a lo bawh ruak ruak a, an la hrang vat. Niteii khan Mateii nen thil a lo leisak nual a, a thil thar te a han hmuh chuan a hlim lutuk chu a zuang thoh thoh reng mai. Kei pawh thu rei loin ka bungrua te nen ka haw chho ve ta a. 

Ka han intifai sawk sawk a. Ril a tam tawh bawk a, chaw kan ei nghal. Ka pa chungchang bak sawi tur kan hre lo, ka u pawh chuan a ngei hleithei ta meuh lo a niang, a lainat thu a sawi ve siam siam kha maw. Valtea pawh a rawn lang vat, ka thil hawnsak chu ka lo pe var a, a lawm thiam ngang mai. Chau ru viau mah ila, Ka pa kan pahin Sangkimi han tlawh zuai ka duh sia, kan chhuak leh ta nge nge a. Ka pa te inah chuan lut chhuak an la awm deuh reng avangin Sangkimi han tlawh phawt chu ka duh ta a, kan chho leh nghal. Damdawi in peng kan thleng a, street light an chhit loh avangin a thim deuh. Sangkimi te in kan thlen chuan a ui te nen an lo infiam mek a. A nute erawh an awm lo nge ni ka hmu lo. Ka thil hawnsak chu ka pe a, hotham viau mah se, a lawm thiam ngei mai. He hmeichhia hi a fing a nih hi. Thingpui háng kan in laiin Sangkimi phone chu a ri a, a la a. 

"Eng a?!" Tih leh tluk a rual ta mai a, Ka lo dawm vat, ka kut lehlamin thingpui no ka keng bawk si. Sofaah chuan a let hlawl a, a ngik feih feih bawk. 

"Sangkim, Sangkim, i tha em?" Tiin ka sawi nawk nawk a, a kut humruhin a hmui chu a pet tlat bawk a. A khawng a ni ber mai. Valtea nen chuan kan hmet nawk nawk a, A harh hleithei si lo, ka va mangang tak..Valtea chuan, "A nu number i nei em?" Mangang zet hian a ti a. 

Ka lu ka thing ringawt. A taksa hmeh leh koh mawlh mawlh bak kan thiam ve bawk si lo, chutia kan buaipui lai mek chuan YMA information centre atangin "Chhiat tawh thu kan han puang ang e" an rawn ti ta mai a..