Rinsangkimi 2

RINSANGKIMI (2)

Ziaktu: Toni Râlte

Valtea chuan min ko tuar tuar a, ka mit sulh sulh thung. Eng rulin nge min chuk pawh ka hre bawk si lo, Valtea chu a hamhaih chhung a rei lo. Hmanhmawh takin ka chawn chu a tawn khalh ta a, A chemte sei reng ruang chuan a hmuamhma chu a zai kak nghal. Thisen duk zet a rawn chhuak ta tuam tuam a. Mei a tan a, "Hîp vat vat rawh, na deuhin, muhil miah lo bawk la" a ti leh zung zung. A tih ang chuan ka lo ti ve mai a. Zial ka han zuk chuan tlemin ka harh ta deuh. Ka mut erawh a rawn chhuak deuh, mahse, Valtea chuan min ko mawlh mawlh reng a, min muthilhtir chu a tum loh hmel khawp mai. Tu emawni a call a, ka nu a ni maithei. Min kuah a, "I kal thei ang em?" A ti a. Ka chhang thei lo, ka thaw a sak tlat si. Ka awmdan a hmuh chuan kal thei chi ziazang ka nih loh avangin min thutpui a, "Ka pate an lo kal dawn, lo nghak mai ang. Mei kha zu reng rawh aw" a ti a. Ka ngawi reng, ka mu zangthal a, ka thaw kàwk kàwk ringawt. 

An rawn kal chàk hle a niang, ka beisei aiin an lo thleng hma. Ka u pawh a rawn tel ve a, Min zawnna tur an siam lai chuan, "Muangchang chuan ka kal thei ang" ka ti tham tuak a, zawn haw nih ngawt kha ka hreh ve deuh bawk a ni. Min kuah pah chung chuan zawite te chuan kan chho ta bek bek a. Thlen pawh kan thleng har khawp mai. Ka nu bakah in chungte leh thenawmten min lo hmuak a, hmanhmawh takin damdawi in kan pan ta nghal a. Ka chau lutuk chu a men pawh ka meng peih lo. Damdawi in kan thlen chuan U Feli'n min lo jection nghal a. Vanneihthlak takin rul tur thahna damdawi chu nimin piahah a lo thleng chu niin, Chu chuan min jection ta nghal bawk a. Ka dam sawng sawngin ka hria mawle. Hnathawh kawr nen ka la nih tup avangin ka nu chuan nachhawknain min chhawk laiin bathroomah min luhpui a, ka thawmhnaw chu a thlak ta nghal a. Ka nu min riahpui ka ngen tlat avangin min riahpui dawn a, ka u chu amaha a riah ngam loh vangin Valtea'n a lo riahpui thung ang. Ka mutui angreng, khawsik leh engilo ka nei ta lo bawk a. Ka chau hle chu a ni mai e. Zingah ka u-in chaw a rawn dah a, chawhma lamah chuan chhuah theih mai ka inbeisei. Ka pa lah kha zinga U Hruaia min rawn kanin Aizawl an refer thu a la sawi zui a. Nu Rami chu a sa viauin ka ring. Doctorin ward a rawn fang a, rul chukna hmuamhma te chu a han en kual a, a lo hil duak mai. Mahse, Valtea'n a zaina lai kha a pun hlauh thuah damdawi hnawih tur min chawh a. Dr. Saidingpuii chu biak a nuamin a zahawm, a nui sáng reng bawk si. A pasal hi a va vannei tak êm. A fanu ka hmu chak zual a, mahse, a rawn kal a rinawm si loh. Chawhnu lamah ka zia deuh chuan kan chhuah theih mai a rin thute pawh a sawi ve kha. Pathian zarah ka hrisel ve a, damdawi in ka luh vawikhatna a ni hial awm e. Ka u erawh hi chu a lut deuh reng zel. Valtea pawh a rawn lang ve leh a, Amah vang liau liaua damkhawchhuak thei ka ni tih ka inhai lo va, a chungah ka lawm takzet a ni. Valtea rawn kal lai remchangah lain ka nu pawh a haw ve rih a, ka pa chanchin a hriat khan a thawng deuh nge a ngui rawih mai a, ka khawngaih hle. Mei zuk an phal lo naa ka zu chàk ngang si, a rukin ka zu ta ngawt a, tumah damdawi ina awm ve an awm chuang lo bawk a. Nurse te lah an rawn lut zen lo bawk nen, Valtea chuan, "Rulngàn chu ni se kan inchhan hman pawn ka ring lo. Rul vankai a ni thànin ka hria, ka that hman ta bawk si lo" a ti suam suam a. Valtea hi kuhva duh ve tak a ni a, kuhva a han ei a mei an zu hlat hlat hi chu a tui hmel bik hliah hliah zel. 

"I zarah ka dam leh thei a, ka lawm tak tak a ni. Nia, eng rul nge ka hre chak kei pawh" ka ti a. 

"Doctori a rawn kal tawh ang tiraw? A fanu hian a la tluk lo zawk ka ti, a chhiat loh dan khi, an sawi danin a pasal hi a driver a ni thin a niawm e. Vannei lel lawl tak a ni" a ti a. 

"Aw rawn kal tawh e, hmeltha ka ti khawp mai. A vun nalhzia mawlh mai kha, A fel bawk si. Mahse, ka mitah chuan Rinsangkimi a la tha zawk tho" ka lo ti ve a, kan nui hawk hawk. Chutia kan titi mual mual lai chuan Sangkimi û Sawmpuia kha an rawn kuah lut ta mai a. Sangkimi pawh a rawn tel ve, U Zuali'n a lo jection nghal mawlh mawlh a, a ngaihna hre lo zetin kan lo melh ve reng ringawt. Doctori pawh a rawn lut a, a fapa chala dekin, "I pang chu a sat loh hi, Chakai hi i duh ve si a, i huat tehlul nen, ei tawh reng reng suh, tikhan mu hahdam rawh" a ti siam siam a. Sawmpuia pawh chu an jection vang kha nge na nei awm pawn a lang lo. Dr. Saidingi chhuak tur chuan Sangkimi chu melhin, "Bawihte, tikhan i u kha lo awmpui rih mai rawh aw. Ka han chho leh phawt ang e, hnathawkte pawh thingpui lumsak an ngai tawh" a ti leh a, Sangkimi a bu nghat. Doctori chhuah hnu chuan Valtea chu a va thu phei ve a, "Ngati nge i u chu?" A ti a. 

"Chakai a eisual lehpek a nih hi, a duh ve sia a eisual zing thei si" a lo ti ve mai a. Sawmpuia erawh a maimichhing daih a. Sangkimi chuan kei chu min rawn melhin, "Ti nge nang pawh chu?" A ti he haw a. 

"Nizanah rulin min chuk a mawle, mahse, hei ka zia tawh e" ka lo ti vat a. 

Valtea bawk chuan, "In inah te i u chu mut zawk awm, i nu pawn a enkawl thei tho awm sia" a lo ti a. 

"Choka cabinet an siam a, an thawm a bengchheng sia, ka nuin heta muttir hi a duh zawk mawle" a lo ti sam leh êt a. Damdawi in leh an quarter hi a inhnaih over lo. Sangkimi chuan, "Nizanah khaw nge in kal a? A van mak..Rul hi chu a hlauhawm ka ti e, thah pawh ka that ngam lo" a ti a. 

"Chakai kan chhit mawle, tlema tlemah kan thianpa kan chán têp alawm" Valtea chuan a lo ti vat a. Ka lo nui ringawt. 

"Chuan, hetah i la awm dawn mi?" Keimah min rawn melhin a ti a. 

"chawhnu lamah chuan kan chhuah theih ka ring." Ka lo ti vat a. 

"Zingah khan ka nuin a sawi tak alawm, Mahse, nangmah i ni tih ka hre lo reng reng. I thi lo chu i vannei hle mai" a ti siam siam a. A nuih zawnga a ha uingho zum lek lek rawn lang chuan a tilang duhawm kher mai. A ngo vang nimaw a fai piak zel a, Kan khuaah amah aia ngo ka hre miah lo. 

Thu ho reng na na na chu kan titi ve ta chiam hlawm a. Valtea chuan an chhungkaw chanchinte hial a zawt ngam bik a, keiin ngun em emin ka lo ngaithla thung. Sangkimi hi kum 18 kuminah a tling chiah a, a u hi kum 24 a ni thung. An inthlau ve deuh a nih chu. 

"Thla 7-ah ka piang a, chuvang a niang ka hrisel lo em em a. Ka tetlai atangin damdawi in hi kan lut deuh reng zel. Ka nu hi doctor a ni hlauh zawk a, Kum 4 liamtaah khan ka TB a, kan hre hma hlauh a, kan inenkawl ta char char a, ka dam ve leh mai a. Mahse, ruhseh ka neih bakah ka lung hi a tha lo bawk a. Mipui huhàng te hi ka zo thin lo. Tin, ka no em em bawk, ka no ka tih awmzia chu hauh te, vin leh hrawkte ka dawl lo thin. Class 10 ka zir laiin kan mathematics teacher hian min vin vak a, ka khawng phah hial a ni. Chutiang ka nih avang chuan ka pa ten zirna pawh chhunzawm tawh lo mai turin min tia, mahse, Ka duh bik lo. Class 12 tal pass ka duh a, ka bei ve tang tang a, ka u hi chu lehkha a thiam khawp a, kei erawh ka sak em em thung. Pawl 12 pawh 2nd div-ah ka pass ve tàwk a ni mai e. College kha chu ka nuin kal a phal ta lo. Ka hriselna a pan zual bawk nen, kei pawn ka hnial ngam ta lo va. Mahse, graduate ve hram ka duh si avangin tunah hian IGNOU ah ka zir ve leh mek a, class kal te a ngai ve lem lo bawk a, a zia viau. Tawipuia kan rawn phei dawn hian ka pite chuan phei ve lo mai turin min duh a, mahse, ka nuin a hmuh phak loa ka awm a remti lo, bakah khawpui aiin thingtlangah ka hriselna te pawh a that zawk a beisei ve a ni. Chutiang vel chu kan ni" a tihte chu ngaihnawm ti leh amah khawngaih ru em em chungin ka lo ngaithla a. Valtea lah hi a ri ve leh phawng zel a, "Unau in tlem sia, a khawharthlak thei viau lo maw?" A ti a. 

"Ih, a û nen kan inkar ami tur hi a chhiat a. Khua chu a har ve reng, A u lah kan bulah a awm khàt sia" a ti ve leh mai bawk a. 

Valtea ta pek chuan, "Ka lo hriat danin i pa hi a hmain i nu driver thin a ni maw?" A ti ta mai a, ka mitmei a, a hrethiam si lo. Sangkimi chuan a chil a lem a, "Umm ni thin e, Pasal ka neih ve chuan apa ang hi ka nei ang" a ti ta a. Ka lo thaw huai mai. 

Ka û a rawn thleng a, Nurse bulah kan chhuah duh thute a han sawi a, ka tha ve tawh tho bawk nen, a lo phal ve mai bawk a. Damdawite a lam khawm leh hnuah kan chhuak dawn ta a, "Sangkim, i u pawh a tha vat mai ang. Kan inhmu leh dawn nia" ka ti zauh a. Zaktheilo hlein ka inhria, mahse, "Nia, kan inhmu leh dawn nia, lo dam zel rawh" a ti ve mai a. Fel ka ti reuh e, khawpui nula doctor fanu neihchhun ni mahse, induhna leh han inlakna a nei miah si lo. Kan phak ang tawka min kawm a thiam bawk si, a nu leh pate hian an enkawl thiam viau a nih ka ring. U Hminga Auto-in kan haw ta a. In ka thlen veleh tuilumin ka inbual nghal. Zanriah chu Valtea ei ve tura kan sawm avangin a rawn chhuk a, kan ei ta nghal a. Vawksa hi chu mizo kaah chuan a lo tui deuh a ni, damkawr e ti lo chuan antam nena chhum vawksa thau tak avangin chaw ka ei leh teuh mai. Chaw ei khamah Nuteii ka call ta a, ka nu tan ka pa va la ngaihven reng kha thil nuam a ni bik lo nen. Nuteii chuan, "Tawipuiah kan rawn haw leh phawt ang a, i patea te nen pawh sawiho a tha. Aizawla kan kal dawn chuan i u emaw nang emaw tal tel ve thei la ka duh khawp mai. Rami hian chhete mahin a ngaihsak lo" a rawn ti hmiah hmiah a, a ap ve ngang tawh a nih ka ring. Nuteii hi Tawipui khua tho a ni a, chhungkaw pangngai tak atanga seilian a ni bawk a, a pasala chhungte hi an pa ai mahin a ngaihsak emaw tih tur a ni thin. Ka nu leh pate inthen hnu thleng pawn ka nute hi a la mi hrang en lo reng reng a, ka fak ve thlawt a ni. 

"Nia, dam chuan keiman ka kalpui dawn nia..lo haw phawt r'u, ka pa chuan thil te a ei thei reng reng em?" Ka tih chuan, "A tuiril lam bak hi a la ei meuh lo, drip an khai reng bawk a. Thawhtanah kan lo haw ang" a rawn ti a. Kan dah ta. Ka pain ka nu a tihnat dante, keini unau thlenga ser min hnutchhiah tawh dante ngaihtuah chuan ka pa chu ensan mai pawh a awl ve ang, mahse, a chhe ber kan han tawh hi chuan thisen inzawm na nà na hi chu inensan reng hi a lo har a niang e, ka pa pawh chu kan ngaihtuah ru viau mai. 

A tukah chuan ka harh tha tawh viau a, a hmuamhma hi tuia tih huh hian tlemin a la na ve deuh a, chu zawng chu a ni mai e. Inkhawm ngei pawh ka tum, Sangkimi ka hmu dawn miau a. Valtea a rawn thleng thla hma leh viau. Kei pawh ka insiam zo a, kan chhuak ta a. Ka u hi a mit a lerh ve a, ka thawmhnaw hi ama min thlansak deuh vek a ni. Tleirawl hoin a ruka min sawi dan chu, "U Tluanga hi chu a figure hi a dik a, kamiz te hi a inhmeh bik e" tih a ni. A lawmawm ve duh viau. Biak in kan thleng a, a kawtah kan han thu khawmuang leh te tê a, An zai zawh dawn lamah kan lut ve ta a. Sangkimi te chhungkua chu BKHP lane tlar hmasa berah an lo thu thap mai. Ka en ning thei mawlh lo, a nalh lutuk tlat. A inchei dan a simple bawk si, a sam a thlah hniang a, a puan bih pawh a tlang zeh a ni. A pa chu ka hmuh vawikhatna a niawm e. Pa hmeltha tak, ruihhlo ti ngai lo tih a hriat ngawih ngawih. Kan Kohhran Chairman-in lawmluh programme chu a hmang ta a. An hmuhnawm bawk a niang, mipui mit an chungah a fu thup mai. Sangkimi chuan thusawitu a en kar reng mai a, a zahawm kek kàwk hle. Kan bang ta a, kan Kohhran hi chu kan dangdai deuh a, inkhawm banah hian thingpui kan in thin. Ni danga in ngai hlei lo khan ka han dawh ve a, Sangkimi ka zawng ru char char bawk. A nu te bulah a awm si a, ka be ngam lo. Amah zawk chuan min rawn hmuin min rawn nuih seih a, ka nuih ve ringawt. A number neih dan hi awm se aw. Ka zawt ngam der si lo. Sunday School-ah kumtirah hming ka ziah tawh loh avangin ka kal ta lo, Valtea erawh a kal a. Ka haw chho ta hnak hnak. In ka thlen veleh tihtur awm ta lo chu Pubg ka khel a, games hi ka atchilh bur chuang lo naa, time pass nan ka hmang ve thin. Ka pro em em lem lo bawk. Ka nute rawn haw chu Valtea'n a rawn zui haw ve a, a nui sûng reng chu mak ka ti deuh. Ka bulah rawn thuin, "Lawmthu sawi nan naktukah chow sa tui leih, CLS Hotel ami ngei min leisak thei" a'n ti ngawt a. Ka hawi à hu mai. 

"Nge awmzia?" Ka ti a. 

A phone phawrhin a hmet a. "Whatsapp kha en rawh" a ti sup a. Ka en ve mai bawk. Ka beisei loh lutukin Sangkimi number min lo thawn a nih chu! Ka nui hawk a, ka lawm takzet a ni. "I dil leh hmiah ami?" Ka ti a. 

"Umm, Chuan pubg pawh a khel ve thin a nia aw" a ti zauh a. A mitko a san àk àk bawk. 

"Chow mai nilo, chaw i ei ang, i phu e" ka ti chul a. A fel ve ngawt mai, ka duh rukzia hi a hrethiam pha ve a ni maithei. A mood a rawn inthlak thut a. "Taka Ruati a rawn haw a" a ti a. 

"Engtikah? In inhmu mi?" Ka ti vat. Ruati chu kum 4 chhung zet a lo kawp ve tawh, Ruati chhungten an duh loh avanga inthen ta an nia. Ruati tak pawh hian a la theihnghilh bik lo, Lungleiah puanthuiin a zuk awm char char thin a. Tuikhur veng lam daih a ni thung, an khawsa nuam ve a, Valtea te lah an harsa ve bawk nen, Ruati chhungte chuan an makpa atan chuan an lo iai deuh a niang e. 

"In la intheihnghilh thei chuang lo, ni leh r'u, ka sawipui ang che" ka ti hluai a. 

A lu a thing nur nur, "Min duh lova min hmusittu te nen inzawmna neih ka duh lo. Pathian zarah ka phutawk chu ka la hmu ve em em ang" a ti hmiah mai. Ka ngaisang letling. A chapo vang erawh a ni hauh si lo. 

"Nih chuan mi dang hi melh ve tan tawh la, Diki pawn a mitmei ve reng che alawm,." Ka ti a. Diki chu Minpui veng an ni. 

"Nia, Diki nen chuan kan inbe ve fo alawm. MAhse, midang nei tur hian ka la inpeih lo deuh a ni" a ti ve mai a. 

"Kum chanve dawn a liam tawh alawm, theihnghilh kher kha tum lo la, hrereng chunga hlat kha a man zawk" ka ti a. A nui hak ringawt. Thingpui kan in zawhah a haw chho ve ta a. Kei erawh mood fuh ngawih ngawihin ka inbual a, ka faifuk rût rût mai. Ka inbual zawhah fai vangin khumah ka mu ta thên a, Sangkimi dp te chu ka en ka en mai, ka va be tawl dawn chu a nia. Min lo ngei ang em aw. Mawihnai taka va biak dan tur ka ngaihtuah vung vung laiin ka u a rawn lut a, "Vengthar ami Pi Siami kha a boral a nih chu" a rawn ti ta mai a. Ka tho hluai, a va mak! Chawhma pawh khan a inkhawm reng sia. A lam darh darh kha a nia.."Ngati nge?" Ka ti hluai a. 

"Stroke a niang, a thi thut ringawt. Damdawi in pawh an thlenpui hman lo, zuk kal ve ila" a ti a. Sangkimi pawh be ta chuang lo chuan kan unau chuan Vengthar lam chu kan pan thla ta a. Pi Siami hi kum 70 dawn a ni ve tawh a, a fapa hi Middle School zirtirtu a ni bawk a, an awmthei ve pangngai. A fapa te chhungkua nen an khawsa a, an pa pawh a boral tawh a ni. An lo awm leh nual hman tawh a, kan che ve nghal sawk sawk. Thalai kan pungkhawm chak kher mai. Amah Pi Siami hi BKHP hruaitu hlun a ni ve bawk a, a felin mi biangbiakte hi a peih a, suntu pawh a ngah viau. A monu pawh a tap nasa mai. Kan han intihfel zawh meuh chuan zanriah ei a hun dawn ruai mai a. An bialtu Upa Zirliana'n tawngtaina a nei a, a tawngtai zawhah Pi Siami fapa U Malawma chu rawn dingin a nu boral thut dan velte chu a sawi ve a. A vawk chaw chhum tura a tho chu a luhai thut vangin a pai deuh nawk nawk a, mahse, ngaihthat lohna an nei lem lo, Vawk chaw chhumna ina a va lut chu vawk chaw bel bawk rawk khawpin a va tlu ta mai a. An va kaihthawh dawn chuan a rum hràwk hràwk a, a kal a ni deuh mai a niawm e. A pawi khawp mai. Upat tawh lamah a zun a lo thlum ve kher bawk nen..Ka u nen chuan kan haw chho leh ta a, Valtea ka hmu miah lo chu mak ka ti deuh. Zanriah kan ei nghal a. Ka nu chuan Pi Siami a ui thu leh a thih dan chu runthlak a tih thu a sawi siam siam a, ka lo ngawi reng ringawt. Eikham veleh Valtea ka call nghal, "Ti nge tlaiah khan i rawn chhuk loh?" Ka ti nghal a. 

"Nia, Ka lo muhil daih a, ka chhung ten min kaihthawh nachang an hre lo bawk nen, zanin chu kan tlaivar ang chu tiraw? I inzuam tawh em?" a rawn ti a. Nawm lohna em em ka nei tawh lo bawk a, min lo sawm thla turin ka ti a. Kan dah ta. Sangkimi number bawk ka hmet chhuak leh a, "Ka number hi min lo save sak ve la. Tluanga ka nia" ka va ti ta pawp mai. Nuteii'n a lo call zui ta bawk nen, ka'n lak chuan, "Awiii Lalramliani han tenawmzia hi, A chhuak bo vang vang a, a rawn rui haw a, I pa a ankhum chiam mai. Mi pawn an en duh lutuk, he mihringnu hi ka haw em mai" thinrim tih hriat ngawih ngawih hian a rawn ti a. Ka ner sawk. 

"A va mak thin ve mawle, ka pa chuan a chhang lo mi?" Ka ti a. 

"Chhang lo, a zak ve hle niin ka hria. Naktukah kan rawn hawng ang a, kan inah i pa pawh awm rih rawh se, an inenkawl hlum ang tih a hlauhawm. " a ti hlaih hlaih a, Nuteii meuh ti taka a thinrim chuan Nu Rami chu a dik lo hle a nih ka ring. Kan inbiak zawhah ka whatsapp-a ka luh chuan, Sangkimi msg a lo awm va mai. Rang takin ka open nghal a. 

"Aw le, ka save nghal e. Zanin tlaivar in tum em?" A rawn ti a. Ka khur vel nia mawle. Ti em ema min tizàm thei hmeichhia ka la tawng ngai lo. 

"Aw kan tum a, nangni zawk?" Tiin ka reply a. 

"Aw..Nungi te nen kan lo kal ve ang, kan inhmu dawn nia" a rawn tih chuan ka nui vur vur mai. 

"Aw le boss" ka han ti a, smiley a rawn dah tuar. A nuam chho tan e. 

Ka pa te chungchang vel chu ka nute ka hrilh ve a, ka nu pawh a chek tlat tlat mai. Ka u erawh chuan, "Ka pa pawh a phutawk chiah alawm. A nupui fanaute aia a thlan zawk kha a nia, tuar ve rawh se" a ti hmiah. Hmeichhia a ni na vang vangin kei ai mahin ka pa lakah hian a hel a, lohtheih loh tawpah lo chuan a be ngai lo bawk. Ka nu chuan, "Rami chu zu kha a in tawh lo emaw ka tia sin le. A va pawi em aw, an fate an la te si" a lo ti ve a. Valtea a rawn luh tak avangin titi dang kan sawi ta daih. Kan hmanhmawh lem lo bawk a, kan han thu khawmuang leh te té a, Dar 9 pelh hlekah ka va insiam ve ta a. Ka u erawh thenawm nula nen an kal tawh. Muangchang chuan kan chhuk ve ta a. Valtea chuan, "Zanin chu Diki nen inhmuh fal kan tum ve deuh a, remchang min dapsak ang che" a ti a. 

"A va tha ve, lutuk tlat" ka lo ti ve vat. Thalai lam chu an lo thu ve nual tawh a. Sangkimi te an kal tawh ang em tih bak rilruah a awm lo. Va thlek dûk dûk lah a mawi chiah si lo, kan branch President U Jerry chuan min lo hui lauh lauh a, kan va lut ve ta. Lumen zanah hi chuan mipa leh hmeichhia kan inthutpawlh ve mai zel a. Tlar hnung lam panin Diki te thianho bulah chuan mawng kan hung ve ta a. Kan khuangpu U Lawma aw a lian tha bawk a, zai kaihhruai hi a thiam bawk nen, zai pawh a nuam dawn hlein ka hria. A rukin ka mit chu la len a. Sangkimi te ka hmu hauh lo, an la kal lo a nih hmel. Nge kan hnunglamah an thu zawk? Hawi let hû hû chi lah a ni der si lo. Rilrua eng emaw awm chung chuan ka zai ve ta a, Zai hi ka thiam lem lo naa, nuam ka ti ve viau. Lengkhawm hla lam hi ka hre tam lutuk lo va, Solfa-a zai hi nuam ka ti ber mai. Kan luh atanga hla pathumna kan sak mek laiin Sangkimi leh Nungi te chu an rawn lut ve ta ral ral a, ka thaw suai suai mai. Mahse, zuitu an nei tlat. Kan nurse Pi Rengi fapa kei ai chuan a nau hlek maithei, chu pa leh Minpui tlangval Chhuana te an ni. Nungi leh Chhuana hi an inzui ve deuh thinin ka hre nghe nghe. Peka avang chuan ka mood parh hûrh kha a hniam rawk rawk thei mawle. Peka hi a rawn awmna a pa rei lo va, Pi Rengi hi an pain a boralsan tawh a, Peka bak hi fa an nei lo a niawm e. Peka chu Lungleiah lehkha zirin a awm char char a, tun hnaitêah a nu bulah a rawn awm ve a ni. Sangkimi te nen an inhnaih si, bakah Peka te chu Hnahthial khua daih an ni a, Khawpuia awm reng reng a lo ni ve bawk nen, a vunte a mamin kan veng tleirawlho pawn an lo star leh tawh hlawm kha a nia. Ka sava hual chu min perhsak ang tih ka hlau ta riau mai. Zai pawh ka zai tha peih ta meuh lo va, Valtea chuan ka awmdan chu hai hek lo, ka beng bulah, "Lungngai vak suh. An ni lovang" a rawn ti sur sur a. Ka nuih a za deuh bawk sia, nuih thaw kha a mawi bawk si lo. Sangkimi pawh chuan min rawn hmu ve, a nui deuh a, mahse, ka lo nuih let si lo chu a hrilhhai hmel deuhin ka hria. Peka nen lah an insi rial bawk si. Ka ning , ka hah. Dar 12 a la ri lo deuh tihin kan chhuak a, Vengthar hi kan section an ni lem lo va, eitur kan siam ve lo. Kan zun lai chuan, "Peka hian a bem dawn chiang lutuk, ka hria" ka'n ti ngawt a. Valtea a nui huk. 

"Sangkimi'n a duh kher lo ve thei, hlauthawng mah ta che" a ti a. Diki te pawh kan rual khan an chhuak tel ve a, "U Mapuii te an kaihthawh theih ang, thil va lei ila, Diki nen chuan duh leh School tlangah kan han chho rih ang a" a ti leh a. Chance an mamawh ve tak e. Luh leh pawh ka phur tak vak loh avangin dawr lam chu kan pan ta a, Diki thiannu Teteii nen chuan kan kal dun a, kan innel tehchiam lo. Hmeltha ka tih chi a nih loh bakah ka hrechiang bawk si lo va. Amah pawh chu a ngawi tluan thak, a zak ve deuh nge mawni. U mapuii te chu kan kaihthawh pawh ngai loin an lo inhawng a, hmawmsawm kan lei a, kan let leh lamah Valtea leh Diki te chu School tlang lamah an peng ta a. Teteii nen chuan Mitthi in lam kan pan dun leh. 

"Tete, Diki te nen in inhnaih em khah?" Ka ti a. Biak loh tawp kha ka hreh ve deuh a ni. 

"Hnaih ve tho, hnaih over lo" a ti mai a. Sawi leh tur vàng ka ti hle. Mitthi in kan thleng têp tihin Sangkimi te pali pawh kan tawk ta hlawl mai. Amah zawk chuan, "Tluanga te chu dawrah in kal ve mi?" A ti a. 

"Aw a nih hi" ka ti nghut. Nungi chuan, "Tluanga chu a lo inzêp thei hle mai a..ehem" a ti vel a. Ka rilru hria se chutiang thu chu a sawi hauh lo vang mawle. Sangkimi ka va melh zawk a, a meng hnual deuh niin ka hria, ka ngaihbel pawh a ni mahna. "I zak lo, Lalrinnung" ka ti ve zauh a. Kan inpel fel ta. 

Teteii chuan, "Kan doctor fanu hi a chhelo e tiraw? A fel reuh bawk sia" a ti a. 

"Peka nen khan an inzui ve deuh mi?" Ka ti hmiah. 

"Ka hre bik lo, Peka hi chu a leng thin an tia..hman zana ka u te han leng pawh khan an sawi. A inti neitu viau a niang" a ti ta a. Ka na zawk zawk thei. 

"An inhmeh khawp alawm" ka ti ringawt a. Chhungrilah min tham er ertu a awm. Ka sawifiah thiam lo. Mahse, thudik ni lo hram se tih beiseina erawh ka la nei ve a, beiseina chaurau tak erawh a ni e. Kan lut zui nghal a, kan thutna hmasa hnung chiah a lo awl avangin kan insawn ta daih a. Kan hla hriltu Baby hi mipa mah ni ila ka ei vak lo. Mi pasal ngaihzawn a ching an tia, Doctor lo awm ve zuai nen pawh sawi hat an kai dun a nih kha, a nupuiin transfer a kherh ta hmiah a, rei awm loin an insawn leh ta kha a nia. Chu lo pawh Bualte khua ami nen an sawi leh bawk, ka nu luahlan a nih tawh avangin mi pasal pawmlai ngaizawng thin chu ka tan an danglam lo thei lo. Tin, mipate pawh hian kan zir lo ve bawk a, an chhungkua an nupui fanaute phatsan thei mipa hi hmeichhiain a zir hle a nih loh chuan ka dem takzet bawk. Ka pa pawh khan a zir èm a, Nu rami lah pawisak nei tawh miah lo a lo ni a, ka pi lahin a tihpui thawthang a ni mai a. Tikhan kan kehdarh chu a ni ta mai e. 

Eitur sem hma deuhin Valtea leh Diki te pawh an rawn thleng ve ta a, Valtea hmela hnehna chang inti hmel ka hmuh chuan ka nuih a za deuh. Ruati ka hmu miah lo va, an veng a hla deuh a, a rawn kal ve lo a ni maithei. Valtea te pahnih chu hmu ve se ka duh hle. Dik tak chuan Ruati pawh hi demawm ka ti, kum 4 tal tawp an inzui ve tawh a, Valtea hian a phak ang tawkin a duatin a ngaihsak hle bawk. A tir phat atanga Ruati te lamin an duh loh êm avangin an inah a leng ngai lo thung. Kan inah te pawh an inhmu ve fô mai. Chutianga dodalna karah pawh kum 4 chhung an inzui ve thei a nia. Mahse, Vawikhat an inhmu dun chu Ruati nuta hian lo hmuin, Valtea pawh kut a thlak nghe nghe, Valtea erawh chuan a khawih duh lo. Khami hnu atang khan Ruati chu a danglam chho ta a, Valtea chu a be tlem tial tial a, an thenawm tlangval nen an inkawp tih thawmte kan hre chho a. Mahse, Valtea chu a beidawng duh chuang lo, Ruati chu biak pawh a tum tang tang tho a. A hnuah engkim sawi dun a dil ta tawp a. Ruati paw'n a lo hnial ta lo nen, an inhmu ta a. Chutah chuan Ruati chuan, "Inthen mai ang, ka chhung ten engtikahmah an pawm dawn chuang lo che. " a ti ta a ni. Na ti hle mah se, Valtea chuan a duhthlanna chu a zahsak a. An inthen chu a ni ta reng mai. Tikhan Lungleiah Ruati a awm thla ta a. Valtea pawh zawi zawiin a zia chho a, an inthen tirh kha chuan kan riak dun thin a, Vawikhat phei chu a mittui a tla ve hial a ni. Lainat hle mah ila, han hnem vak dan ka hre si lo, a va hrehawm thin tak. 

Sangkimi te pawh an rawn lut ve tawh a, Ka melh duh lo lui tlat! Eitur kan ei zo a, Zai kan tan lehnghal. Ka zai tha peih meuh lo a ni e. Tlawmngaih a ngai ve bawk si. Khua chu var har ka ti khawp mai. Muthlu miah loin kan meng tluan zak a, khua pawh a rawn var tan ta. Thenawm hnai nu leh pate an rawn lang ta tiam tiam a, Zing dar 5-ah tawpna hun siamin kan tin ta a. Kan veng lamah kan chho nghal nal nal. Tlaivar nen mood off nen, ka awm a nuam lo viau. Ka nu a la tho lo va, ka mu ve nghal. Tlem tal ka chhin ve loh chuan. Mahse, ka muhil lawk thei chuang lo, ka mitthlaah Sangkimi a rawn lang zel. Ti nge hetiang taka ka vei em em le? Ka nuna a vawikhat nana thil thleng a ni a, awmdan ka thiam lo. Tin, a hma chuan Valtea te pahnih atanga rilru ka neih chu inhmangaih takte hi chu dinhmun vang mai maiin an inthen lo vang, Phu loh hi an awm tak tak lo tih ngaihdan ka nei thin. Mahse, Sangkimi a rawn lan atang hian ka cho loh leh phu loh énin ka en a, chu chuan min tihrehawm zual a ni ber e. Ka hriat loh karin ka lo muhil ve ta nge, ka harh chuan dar 9 a lo ri lek lek tawh a. Thlan lai tur hian dar 10 velah kan chhuak khawm thin. Ka tho a, ka tlaivar vang ni maw rul min chukna hmuamhma kha a rawn na ta riau mai a, nachhawkna ka hmawm ta hmiah. Tukthuan kan ei a, eikhamah thlan lai turin kan chhuak lehnghal. Thlan laih hi thil nuam tak ni lem lo mah se, a hlimawm ve phian zel a. Thlan lai e ti lo hian kan nui leh hawk hawk zel chu a nih hi, Pathlawi zâng hàng U Zda'n fiamthu phawkphawhraw pui pui te a'n thawh leh a, kan ri leh mam mam tawh. Thlan khurah vawi 3 ka lut ve hman. Kan thahnem deuh bawk a, kan lai zo rang phian. Tleirawl hoin thingpui an rawn sem a, U Zda ta pek chuan, "An chhungte an awm lem lo bawk a, kan doctori leh a fanu khi chu zan khat na na na kawl ve a chakawm ngawt mai. An fanu khi chu a la no deuh a, hràwm vak chi a la ni dawn lo va, kan doctori erawh ka daisulêp rang viau ang.." A ti lehpek a. Kan nui leh ham ham mai. Midang pawh chuan an lo sawi ve luam hlawm a, Damdawiin tlanga khawsa ve tho U Mawia chuan, "Kan thudang alai chuan hmanni-a Mamte khawpa an rawn kalpui boral ta kha a hràng an tia, Zaiteii khian a sawi tlat. Hman zan a duty khan thawm eng emaw chu a hria niawm tak a ni. A hlau viau a niang. La fiah chi a ni" a ti ta mai a. Kan ngawi duk mai. Mahse, Rinliana'n , "Damdawi inte hi chu hráng a mual mual a awm ve ang, a mak vak lo ve. Mamte pa khan thih a sual nasa an tia, a damlaiin a nun a lo chhe ve deuhte pawh a ni maithei asin" a ti chuar chuar a. Ruang nghah pah chuan thlahrang leh huai lam an lo tawnhriat tawhte chu an sawi ta liam liam a, kei tiang lam hi ka ngaithla peih khawp a, ka huai em em vang erawh a ni lo. Ruang pawh a rawn thleng ta a, kan inphum fel hnu thlan kan vur leh vek hnuah muangchangin kan haw ta a. Ka inbual fai a, ka muzal leh ta mai mai. 

Sangkimi ka text chak ta tlat a, ka zak vak duh tawh lo. A hriat miah lohin a lakah ka tau ve ngawt a, mak min ti viau ngei ang. 

"Eng nge i tih?" Ka va ti thàwr a. 

Min rawn reply ve zat, "Ka mu mai mai. Nang zawk?" A rawn ti. 

"Ka ngai mek che" ka'n ti piap mai a. Ka lei ka chhuah zuk mai. Ngam leh ngam loin min reply-na chu ka chhiar ta a, "Eng nge a awmzia?" A rawn ti he haw. Ka sawifiah duh ang em aw..a nih nih kan ni tawh mai ang tiin , "Min huat phah nan khawngaihin hmang lo la, Ka hmuh tirh phat che atang khan ka vei che. Ka rilruah i awm reng a, ka zak ve lutuk tho a nia, mahse, ka sawi ta tawp mai aw..Peka nen in ni tih ka hre tho a nia" ka ti ta a. Ka lungphu a rang ngei mai. A typing char char a, a rawn thleng ve leh ta. 

"Peka nen kan ni lo. Chuan, i thil rawn sawi hi mak ka ti vak lo, i hmelah hian a lang vek zel alawm. Mahse, kei chu bialpa nei ve chi ka ni lo a" a rawn ti ta a. Peka nen an ni lo a nih chu! Ka thu chhuak a, zial ka'n tan ngawt a. Ka phur nge ka na nge ka inhrethiam tawh lo. 

"Ngati maw? " ka va ti a. 

"Ka hrisel si lo va, ka damrei pawh ka ring lo. Ngaihzawn ka nuam lovang, ka damlo reng zel sia" a rawn ti ve duah a. Hmm, chhuanlam a tling lo ka tan chuan. Min haw lo tih erawh ka hria, chu chauh pawh chuan min tilawm. 

"Chutiang chhuanlam a tling lo, Min duh loh vanga min hnarna mai mai a nih loh chuan, ka tan chuan i tha ber zel ang" ka ti a. Ka ngampa sawt ta viau e. 

"Ka haw lo che a, i bulah hian kei pawh ka danglam thin alawm. Mahse, ka lo inngaihtuah ang" a rawn ti ta a. Ka va lawm tak êm. Hlawhtling tia sawi theih la ni lo mah ila, hma ka sawn tho. Ka duh tih a hre ta pawh chuan min tithawveng hawk tho. Kamtu nei run chunga awm reng kha nuam ka ti hlawl lo a ni. 

Zanriah kan ei a, ka û chuan a khup a nat leh thu leh khawhar ina kal ve a peih loh thu a sawi a. Ani pawh hi Sangkimi ang bawka hrisel lo, ruhseh nei a ni a, hna rim thawk chi pawh a ni lo. Eikhamah Nuteii ka be leh a, an lo thleng tawh a, ka pa chu a sawi ang khan an inah an awmtir ta rih. Nu Rami leh an fate erawh anmahni inah an awm thung. Ka pa pawh a harh that thu leh chaw pawh tlem a ei ve thu a sawi a, ka lawm ve viau. Valtea nen bawk khawhar in lam kan pan ta a, Sangkimi khan tlaiah khan, "Ka kal lovang zanin chu, ka nuamsam lo" a ti kha a nia. Peka te nena an kal dun leh ai chuan inah awm se ka lawm daih zawk. Mipa thutna lam kan pan nghal a, Khuang pu hnung chiahah Ruati pawh a lo thu ve vang mai. Lunglei a ngeih vak lo nge ka hmu cherin a thu riauin ka hria. Ban veleh Diki te thian dun thlahin Minpui lam kan pan lehnghal. Ruati te chu kan hnungah an thenawm tlangval Puia nen an rawn kal ve ral ral a, Diki leh Valtea kut inkai rial pawh a hmuhhmaih bik hauh lovang le. An runluih pawh a ni hran lo. Diki hian a duh ve riau a, a kuah chawt zel mai. Bazar kan pel fel a, damdawi in peng thlen hma deuhah chuan Peka leh Sangkimi te inphur thla kan tawk ta a, ka ték chhawk mai. An ni pawn min rawn hmu, Sangkimi chu a dam that hmel viau si. Ka na leh ta ngut ngut a, ka tawng tawh miah lo bawk. Kan haw phei lamah Valtea pawh chuan, "An ni ve deuh tak tak em mawni le? An inhnaih sia, Peka lah hi a zei hmel bawk si" a ti ta a. 

"ka hre bik lo" ka ti ringawt. Ka tawng chàk ngang lo tih a hriat vang nimaw min be zui ta bik lo va. Ngawi rengin kan kal dun mawp mawp. A remchang tho a, a la tlai chhe lo bawk nen tiin Patea te inah kan peng kawi a, ka pa chu a lo mu tawh. Nuteii chuan kan luh rual rualin, "Awii lo thu r'u, Rami te an chhuak chiah, kha kan inhauh leh kha" a lo ti bawh bawrh a. 

Kan thut hnuah, "Rami hi ka ten êm mai, kai phét pháwtin a rawn lut a, 'Min timualpho lutuk, engdang a ni lo, in ina in la lut hi miin an rawn kanna sum in duh vang a nih hi' a rawn ti nghal hlawih hlawih a. I patea'n tha zaia a lo dawr paw'n a pawr hlar reng a, I pa chu lak phei a tum a. Kan remti si lo chu kan buai ta deuh a ni. Ka namchhuak ta a nih kha..sum ringawt hi a atchilh a,i pa hi chhete pawn a ngaihtuah lo. " a ti ta mawlh mawlh a. 

"A va ngeiawm thin e aw. Aizawl pawh hi kal a tum lovang a.." Ka tih chuan, "A teuh lo, 'Aizawla kalpui turte khan min lo beisei ang e, a inenkawlna senso zawng zawng pawh in tum vek ang, kal hman ka ni lo, a fate pawh an awm alawm, kal rawh se' a ti sa vek tawh. Phût pawh kan phût lo. " a ti a. Ka ner sawk. Nupui hming chu a pu ve chu a ni sia maw?!

Patea chuan. "Engpawhnise, A ziaawm deuh hunah Aizawl pawh chu kan pheipui a ngai dawn a. Nang emaw i û emaw tal chuan min kalpui ve loh chuan,. Duh leh a tukah in haw leh mai ang a, I nuteii leh Mateii te'n an awmpui mai dawn a ni. Sum leh pai kha chu hei i papuia leh i nite ho te pawn tlem azawng chu an rawn thawh thei ang a, chhungkua kan tanrual a ngai dawn a nih hi." A ti charh charh a. Ka pawm viau, tlanchhiat bik chu ka tum lo. Ka û hi chu a kal duh ka ring chiah lo va, keimah ka va kal ve zawk mai ang chu. Thingpui hàng kan in leh hnuah hawn zai kan rel ve ta a. Valtea chuan, "Nu Rami hi chu aw, a nuthlawi tirh heta a rawn haw pawh khan an sawi duh êm kha. Zu te pawh a zuar ve hman an tia..i pa nen an lo intawng hi chu a pawi ngawih ngawih a ni e. " a ti mial mial a. 

"Pawi tak a ni. Ka pa pawn zir bik hek suh" ka ti a. Inah a rawn peng kawi tawh lo va, ka luh chuan ka nuin puan a lo zai mek a. Ka pa chungchangte chu ka sawi ve a, a lainatzia a mitmeng atangin ka hre thei. Ka û chuan, "Rami te chuan ka pa hi thi daih mah se, pawi a ti awm lo ém mai. Tunah pawh damdawi a vawrh an tih leh tawh kha, sum men khuan a meng a, hmelchhe ropui si" a lo ti hlak hlak a. Ka nu chuan, "An fate khu a ni lainatawm, an bal thei si, i pa a boral phei chuan an khawngaihthlak dawn em mai" a lo ti ve a. Kei erawh Sangkimi msg ka lo bih mek thung, "Ka nuin min tirh avangin Peka kha ka inhruaitir lawk a nih kha. Engmah a thleng lo a nia" a rawn ti. Engmah ka zawt tawp si lo va, chutia a rawn insawifiah ta mai chuan min thawng deuh. Ka mitmei a lo veng ve deuh niin a lang. 

"I u pawh a awm reng a, tirh mai awm. Bakah i nuamsam lo khan ka hre sia" ka va ti ve ngat a. 

"Nachhawknain min chiu a, ka tha tawh alawm. Ka u chu Lawngtlaiah a kal daih alawm" a rawn ti leh a. 

"Sangkim, min duh em? Tlang takin sawi tawp teh. Laklawha awm hi ka thiam lo" ka ti ta hmiah a. 

"Aw duh" a rawn ti ve ta. Ka phone ka thlauh lo chauh, ka nui huk chu ka nu chuan, "Tihian phone hi in bih a, mi á ang mai hian in nui leh huk zel a" a rawn ti hlak a. Ka chhang lem lo. Ka mu ta daih a. Mut hma zawng Sangkimi nen kan inbe ta. A va nuam êm, Kei hmeithai fapa, hnathawh mumal pawh nei lem lo tan chuan a tha ve mah mah a ni. Kan chhungkaw chanchinte pawh min zawh ve avangin zep nei lem loin ka hrilh ta vek a, ka pa damloh thute chenin, "I nu chu ka khawngaih hle mai. Mahse, a ngaihsanawm, tikhan a tulpui tawp che u a nia. Zah hle rawh" a rawn ti ve ngial a. Ni e, ka nu hi zah loh ngam a ni lo. Amah vanga damkhawchhuaka tun hun thleng thei hi kan nia. 

Mut pawh a tui e, zingah pawh ka tho harh ta vák mai. Dawr ka nghah leh tawh a ngaih avangin zingkarah ka chhuk a, chaw hi chu ka u school kal tur hian min rawn ken pah mai zel. Mood fuh em emin dawr chu ka nghak ta a, Sangkimi nen kan inbe zeuh zeuh bawk. Chawhnu lam sumo ho rawn thlen vel laiin bazar kawnah tak chuan an ri deuh luai luai mai a. Kei hawkdak tih takah ka va chhuak ve, Khai leh! Patea hian Sangkimi zawi nen mai chu a lo pawm kang mêk a, An bulah scooty a let bal bawk. Rang takin ka va tlan phei a, thinphu zawih zawihin thil awmdan ka zawt hlawm a. Nungi pawh a bàn leh a chawn vel pilh hrut hian a lo ding ve reng mai. 

Pu Sanga chuan, "Hei Sangkimi leh sumo hi an intai deuh a, Sangkimi hlauthawng lutuk a thidang deuh a nih kha" a ti ta a. Patea te inah ka tlan lut nghal rawp, Nungi pawn min lo zui ve. Sangkimi chu thutthlengah an lo mut a, an ko mawlh mawlh bawk. Lung tha lo a ni a, khatianga an han intai thuak khan a hlauthawng lutuk a ni ngei ang. Ka va ko ve nghal a, Tui ten an han dep a, a lungphu chu ka han dek a, a phu rang kher mai. A rawn phu leh zawk zawk zel bawk. Nungi chuan, "Tuikhur vengah ka thil chah min lamsak turin ka sawm a mawle. A pawi ém mai.." A lo ti ve mawlh mawlh a. Doctori te nupa hmel a rawn lang ta, Sangkimi pawh a rawn meng ta diar diar a, tah chhuak insum tih hriat ngawih ngawiha a nu lo melh táwk táwkin, "Nuu" a ti hawk a. Dr. Saidingpuii chuan rawn thut hnaih pahin, "Bawihte, engkim a tha aw, hlauthawng tawh suh le..i tha vek a nia. " a ti seuh seuh a. Sangkimi pawh chu a hahdam hmel ta deuh. A pa chuan zo zetin a pawm a, an chhuahpui ta a. Veranda thleng ka va chhuak ve, Patea te nupa pawn an rawn thlah ve a, Dr. Saidingpuii chu ka bulah a rawn ding dat a. Ka lo melh zawk, chiang leh fiah taka min melhin, "A bialpa thar chu em ni i nih?" A ti ta a. Ka zámzia kha..

"Aw" ka ti thei hram. 

Hmalam melh leh daihin, "Ka fanu hi tina miah suh ang che. " a ti hniam raih a.