Rinsangkimi 16

RINSANGKIMI (16)

Ziaktu: Toni Râlte

Khami zan atang khan Sangkimi chu a danglam tan a. Hlauhnain a bual á ka ti mai, A zan mu laite hi a harh a, khumah a thu ngawt ngawt zel. Light off a duh miah lo bawk. Bawihteii pawh a ngaihsak hman meuh lo a ni e. Tha ka va ti lo e aw. Midang zan leng leh eng emaw avanga haw tlai thinte paw'n Peka thla an hmuh thin thu an sawi ta zauh zauh mai. Damdawi in lamah phei chuan thawm te hial neiin, Nurse ho pawh an riak tha ngam ta tlat lo va, 4th grade hoin an riahpui thin. A chang leh pahnihte an duty bawk. Ka nupui mawlh chu a ni, Han tih vak ngaihna ka hre si lo. A lungphu tha lo a rawn chhuak zui leh ta nghal bawk nen, ka pi te pawh an mangang ve hle. Kar khat zet chutia mumala a khawsak tak loh avang chuan kan mangang chuan Psychiatrist kan zu hmuhpui ta tawp a. Ngun takin a lo kawm a. Amah Sangkimi chuan chaw ei hleithei lo le, a cherin a tla dûk tawh a. A hmai pawh a hriam hraih tawh mai. 

A sawi ngun ber chu, "Peka hian zantin min rawn tlawh a, rapthlak takin min chhiatkhum thin, min reh hlumte a tum bawk thin. Ka harh thei ngai si lo va, ka mangang thin lutuk.." Tih a ni. Tin, "Eng lai pawn min zuitu leh min enthlatu an awm reng zel a, khawi hmunah mah ka zalên hlawl lo" a ti bawk. Ka khawngaih sia, han tih vak dan ka hre bawk si lo. Doctor chuan, damdawi eng emaw chu a chawh ve a, a tan pawh thlarau lam chu tih vak ngaihna a váng ve viau ang. Kan hawn zanah kan ngenna angin kan pastor a rawn leng a, tawngtaina te a nei a. A thlamuanthlak thin e. Ka rin danin Sangkimi hlau thlabar lutuk hian a ngaihtuahna chu a tak tak emaw a ti thin niin ka hria. A mang ramah peka chu a lo hmu tak tak pawh a ni maithei. 

Kan han mu a, damdawi ka eitir a. Bawihteii erawh hnute a hne lo bawk a, Ka nuin a mutpui daih. A tlei mual mual êm mai a, a nu awmdan a nih thut thut avang hian a harh thin a. Chuvanga a piin mutpui ta a ni. Ka kuah hlán a, "Muthilh tum rawh. I bulah ka awm reng a nia aw. Engmah hlauh tur a awm lo a nia" ka ti mawlh mawlh a. 

A damdawi eiah khan mut duhna a lo tel bawk nen, kar loah a muhil ta bawrh bawrh a. Kei pawh ka tawngtai zawhah ka nupui kuah ran chungin ka muhil zui ve ta a. Zinga ka harh chuan kan nu chu a lo tho tawh a, choka lama a tawng láng láng chu ka hre thei. Zinga a thawh hma loh chhung kha rei ka ti hman viau a nih kha. Ka va thawh ve chuan ka nu eirawngbawl a lo pui a. 'Tluang, nizan chu mumang bo thakin ka mu a, ka lawm tak tak a ni" a lo ti var a. A lawm tluk zetin ka lawm ve. Tukthuan ei dawna Thenawm naupang rawn tlan lut chuan a baloon ken lai chu a bawh keh ta hlauh mai a, a ring hle. Bawihteii a tap zui nghal, kan nupain mak ti zetin kan inmelh a, tunah khan Bawihteii khan ri a hria tihna em ni ang? Sangkimi chuan a hma ang bawk khan plate a va la a, Bawihteii tap lai beng bulah a khawng ta vak a, Bawihteii phu zawk leh tap nghal tuar tuar chu makti em emin kan thlir thap. Sangkimi chuan lawm vanga mittui tling pam chungin ,"Tluang, bawihteii a dam..Lalpa, ka va lawm tak êm..nangma tihdam a ni chiang lutuk. " tiin a pawm a, a fawp kual dan dan mai. Kan lawm lutuk leh makti bawk si chu chaw pawh kan ei tha thei meuh lo a ni ber e. Kan tawngtaina Pathianin a chhang a, kan chhungkua hian a malsawmna kan va dawng nasa mawlh mawlh tak êm. Dawra ka kal pawh ka mood a fuh nileng a ni e. 

Bawihteii dam lawm nan tlaiah Ka pi te chhungkua chaw eiah kan sawm a. Ka nuin a zo ar vulh lai a talh a, hlim takin kan ei ho ta. Sawmpuia erawh nimin khan Aizawlah a phei a. A fapa te chu a va ngaihven ve dawn a ni maithei. Nge a bialnu a swi ve ziah kha a va hmu dawn zawk ni..Chaw eikhamah an thu khawmuang a, Thenawmpa Pa Sanga a rawn leng phei ve bawk a. Peka thlahrang vel chu a sawi ta bawrh bawrh a, "Nizan khan minpui lama ka u pumna avangin kan tlan chho a, dar 2 bawr velah nachhawknain a chhawk avangin kan haw thla leh ta a. Kei chu ka scooty-a kal ka ni a. Mamawia te in thlang thim chinah khan min hnungchhawn zawngin a lo thu run mai a. Ka ding ang nge ding lo vang tih ka ngaihtuah chhungin ka tlan pel ta a, ka tlan pel chiah tih khan mak tak maiin mi phurh nei niawm takin ka scooty hnung chu a rit sawt mai a. Ka han lehhawi a, ka hmu bawk si lo. Patlinga pumpa hlauhlawpa han rak chhiat kha ka hreh êm zawk a, zep nak emaw ka hlau..in ka thlen dawnin a záng ta chauh a ni..a mak khawp mai" a ti ta mial mial a. Sangkimi ka lo vengthawng deuh. Mahse, eng ém a ti tawh lo vang chu maw..

Thlahrang lam chu sawi ka duh tawh loh avangin thudang ka sawi ta daih a. Ka pute pawh dar 10 dawnah an haw chho. Kan han mu chu ka nupui a dik lo leh tan. Amah pawn a zung ngam lo va, ka va zunpui a. "Muhil rih suh aw" a ti sap a. Ka lainat em avangin, "I muthilh hma chu ka menpui ang che" ka ti a. 

"Tluang, Peka hi a sual tiraw? A thih hnuah lehzel pawh min la tibuai zel chu a ni sia. " a ti sêp sep a. 

"Amah tak tak a ni nang, thlarau sual ho hnathawh a nih hi. Pathianin a ngam vek" ka lo ti vat a. 

"Ka ke hi a sa thei sia, ka hlauh vang hian ka dah chhuak ngam bawk si lo" a ti a. 

"Duatpui, i hlauh chang hi chuan min kaitho tawp zel rawh. Inthlahrung suh" ka ti a. 

Pawisawilo zeta min melh kiau chu ka tuar hleithei ta lo va, ka fawp ta mial mial, a mumal loh atang khan nupa nun kan hmang ngai tawh lo va, ka lo phur ve ta deuh pawh a ni mahna. Nupa nun kan hman lai chuan Sangkimi chu thlabar zetin a rak tuar tuar a, ka tawp ta vat. Kawngka lam a kàwk a, a khur der der bawk. "Peka a ni..min en reng" a ti a. Tumah ka va hmu ve bawk si lo. 

"Tumah an awm lo, ka duat" ka ti a. 

Min kawih cháwih cháwih a, "Kal bo rawh, Peka..rawn lang tawh suh" a ti khur dar dar a. Ka thin hi a va rim tak em aw. 

"Ka'n tawngtai ang e aw" tih leh kan nu lu chunga kut nghah ka rual a. Ka tawngtai ta mial mial a, a phu leh zawk thin. Mahse, ka tawngtai zawh chuan tlemin a ziain ka hria. Damdawi a ei atanga darkar chanve velah a muhil ve leh ta a. A manganthlak khawp mai. Engtia chinfel chi nge tih lah ka hre si lo. 

Sangkimi chu a ni telin a tha lo ta telh telh mai le..ti nge buaina hi ka tawh bik reng mai le?! Ka fanu a dam chauh a, a nu buaipui ngaiin a han awm zui ve leh a. Bawihteii pawn a nu awmdan chu a hai lo nge, nausen nisi hian a ngaina mang tlat lo. Ka nu leh ka u ten an chang deuh tawp mai. Peka thlarau hi thah nawn theih nise ka chansawm barh ngei ang mawle. Ka pi te pawh an mangang vein Aizawla hruai maite an han rilruk a, amah Sangkimi'n a duh lo bur bawk si. Duh lo na na na chu han kaihluih chi ni hek lo. A awmdan a bawraw chho ta telh telh mai. Zan laia thawha tei sek te a ching a, Zan khat Valtea pizawn dam lo kan va kan a, kan leng rei deuh, a zual ve leh deuh si nen. Dar 12 bawrah ka haw a, kan in panna stepah chuan a sam thlah hnuang hian a lo thu run mai a. A tirah phei chuan Sangkimi a ni lo emaw ka ti hial, mahse, chiang leh fiah zet hian, "Zothantluang" a tih chuan ka ding chawt mai. A rawn hawi chhuak a, a ràpawm lek lek nia! 

"Ngah nge hetah i awm? Ka rawh, lut ang" tiin ka kai a, a ding ve mai bawk a. Kan luh hnu chuan sitting roomah a thu reng a. "Mu ang aw" ka ti a. 

"Tu nge i nih a?" A ti ta mai. A mitmeng pawh a ti deuh riai a, a thluak a fim lo tih a hriat hle. "Keimah i pasal" ka ti a. Ka kuah tho a, ka luhpui a. Baiwhteii chu ka nuten an lo mutpui leh tawh a niang. Khumah chuan ka muttir a, a khuh kharh kharh a, tui ka laksak vat. A in khawlh khawlh a, harh ta huai niawm tak hian, "Ka va mu tui awm ve" a ti ta daih a! Ka maktihna chu ka thup hram hram a ni ber e. Ka rilru a na tel bawk. Ka duhtak ka nupui ka hmangaih hi eng thilin nge maw tibuai le? A tukah zingkarah ka pite inah ka han tlan chho a, thil awmdan zawng zawng chu ka sawi ta a. Ka pi hmela thlabarna pawh ka hmuh hmaih lo. Ka pu chuan, "Tluangpui, Duh lo er teh mah se; Aizawl lam hi kan panpui a ngai a ni" a ti dam thlup a. 

."Ni e, tha in tih ang ang kha a ni mai" ka ti ve mai a. 

Chutih mek lai chuan ka nuin min lo call a, "Mama, rawn haw vat teh, Sangkimi awmdan hi a dik lo reng reng. Bawihteii bang den nana hman a tum lai takin ka va hmu hman hlauh a, lo haw thuai teh" a rawn ti khur ta dat dat a. Thil awmzia ka sawi puat hnuah chak zetin ka tlan thla a. Ka zuk luh chuan Sangkimi chu inkuangkuahin a lo thu thán a. Thuawih deuh hmel a pu bawk. Ka nu chuan kan pindanah min ko lutin, "Lateii te an hnatlang sia, Bawihteii hi a thenbawmah ka mut a, rawng ka bawl a. Ka va en leh chu a lo awm ta hauh si lo va, in pindanah ka lut a, Sangkimi chuan bawihteii chu bang den nan hman a lo tum mek chu niin, Bawihteii hlau lutuk lah chu a tap tuar tuar a. Mama, ka monu hi a dik lo, eng emaw ti teh" khur ru der der hian a ti a. Bawihteii chu a paw tawh. Ka thinlung natzia kha aw..ka nupui chungah hian eng nge maw thleng ta le..Aizawl chu naktuka kal rum rum ka duh ta mai. Ka pite pawh ka han bia. Ka piin bial a fan dawn avangin ka pu nen kan va kal ang, Saw lamah Sangkimi chhungte an tam bawk a, a buaithlak loh. Bawihteii erawh hruai tel ve theih a nih loh hmel. Rilru a va chawl lo tak êm. Dawr pawh Esi te kutah ka dah ta tawp rih mai. Ka nu chuan amah chauha Sangkimi lo awmpui chu a ngam tlat lo. Ni e, a chet duh dan hi a rawva lam rawng a kai tlat a tin ni. Tin, inbual hi a hreh em em a, hmeichhe invawng fel leh tawp ngaithei hlek lo kha a tawp hnik hnek ta hle. A sam te lah khuih awm lo chu a thur bám reng a. A mitkhur a tla dûk a, a mit hnuai lam a val dum kulh bawk. A cher thiak bawk nen, ka lainat si, ka mang a tiang bawk si. Tuilumin bual ka tum ta a. A tang nasa ngang mai. Mahse, mipa zawk na na na chu min hneh hek lo, bathroomah ka nawrlut thei ta a. Tui a hlau riaute chu mak tak a ni. A lu ka suksak lai chuan, "Misual lutuk i nih hi" a ti mawlh mawlh reng a. Ka ngaipawimawh duh lem lo. Ka nupui hian natna mak tak a vei a, chu chu ka pawmthiam a ngai tih ka hria. A sam balh dante chu aw. A hmai ka phihsak lai chuan, "Ka la that vek ang che u" a ti leh a. Ka rum nghut ringawt. Nidanga kan inbual dun nen chuan a inang ta lo hle mai. Saruak vekin awm mah se, îtna ka nei lo va, ka khawngaih ngawih ngawih zawk. A taksa ka han bual a, ka nawt khawk ter tuar mai. A lo bal hle tawh a lo ni. Ni e, mutnaah pawh hian rim a nei thin hial reng a..chutia a han fai ta vák chu amah chuan nuam a ti leh si nge, "Ka mawi tiraw? Ka nalh asin" tiin ka hmaah chuan a han inpose kual leh vel a.."Ni e, i nalh lutuk, i mawi ber" ka lo ti ve mai a. Ka hrukhul lai chuan, "Khaw nge Bawihteii hi? " fiah zet hian a ti a. 

"A piin a pua a niang" ka ti a. 

Thawmhnaw ka haktir pah chuan, "Naktukah Aizawlah i pi leh puten an ngai che sia, ka va hruai ang che aw. " ka ti a. A ngawi reng. 

"I pa te nen kan pathumin kan va kal dawn nia" ka ti leh a. A tal thut, chhuatah chuan a ding to a, kekawrte nen chauh. "Min hruaibo in tum..ka duh miah lo. Jail-a min khung in tum" a ti tàn tán a. A va manganthlak thin êm. 

"A teuh lo, i piten an ngai tawh lutuk che a, lo zin r'u an ti reng a..kan zin dawn alawm" ka ti dam thlup a. Chhuatah chuan naupang chhe nawrh takin a'n nuar leh ta mai a. Aw…duatpui, i damlo nasa lutuk a ni tiraw? Engtia han tih chi nge maw i nih le..ka zuk pawm a, ka kuah bet a, "Ka hmangaih che" tih bak ka sawi thei lo. Ka hnuk a ulh ve tlat si. Chutia ka han thlem heuh heuh chuan a bang ve ta hram a. Kekawr ka haktir ta vat a. Chaw lah hi a ei tlem thin si, mahse, chumi tlai chu a ni leh ni lo angin a ei ve teuh mai. Ka nute pawh an lawm hle. Bawihteii ka pawm a, a hmel lah hi a tha telh telh a, a chum reuh bawk si. A nu avangin duat pawh ka duat hman meuh lo va, ka nute hi awm lo se engtiang takin heng buaina hi hmachhawn ang i maw..A tukah zin kan tum avangin ka u in min insiampui a. Sangkimi pawh mut hmapui ka tum. A hmaa doctorin a chawh damdawi kha ka ei luihtir a, Tha tetea dawr hi chuan thu a awih ve mai zel. Vin leh hrawk chuan a buai zual zel zawk a, insum theih a ngai khawp mai. Ka kuah chial a, kei pawh ka chau deuh a, ka ni lûk mai. Ka lo chhing siar siar tawh ang tihin thaw ri ham ham avangin ka harh ta hlawl a. Karei! Sangkimi chuan chawhmeh channa chemtea min vih tumin min lo tin uaih chu niin, ka thu vat a, a kut chu ka chelh bet nghal bawk. Kan inelh ngat ngat a, thawm kan neih vak chuan ka nuten an hria ang a, an hlauthawng dawn tih ka hre si. 

A chemte ken chu ka laksak thei ta hram a, ka dahbo ta daih. Khumah ka nam thu a, "Duatpui, ti nge min tihhlum i duh? I rilru ka tina em ni?" Ka ti sup a. Ka ngaihtuahna erawh kal thui tak a ni. 

Min melh run run a, "Min hruaibo i tum a nih kha..i bulah chauh ka awm duh alawm..khawiah mah ka awm duh lo" a ti hliam hliam a. A tap faih faih bawk. Ka kuah bet a, "Khawiahmah ka kalsan dawn hleinem che. I kiangah ka awm reng dawn alawm..Ka hmangaih che a, ka hmangaihna che hi chutimaia tawp thei a ni lo..Hlauthawng suh aw" ka ti mawlh mawlh a. 

."Tluang..ka hmangaih che..ka sual tiraw? Thah che kha ka duh tak tak lo asin" pangngai taka a tih chuan a dam emaw ka ti hman. Mahse, ka han muttir leh hnu chuan, "Min si hlek suh. Mi bawlhhlawh i nih kha" a ti leh hlar a. A pangngai tak tak lo tih ka hre leh. Mut pawh ka muhil ngam tawh meuh lo, a muhil fel tihin ka chhing ve chauh. Tawngtai dan tur pawh hi ka hre zozai tawh lo. Chhum zing hi a chhah mah mah a ni. Mahse, Pathian leh Kohhran hote hmaah, 'A nuamah pawh, a hrehawmah pawh' tiin ka lo intiam tawh a. Rinsangkimi chu ka phatsan thei ngai lo vang. Heng zawng zawng huam hian a ni lawm ni ka neih..chak taka ka awm a ngai tih ka hria..mahse, a awlsam lo khawp mai. 

A tukah Sangkimi ka thawh khalh a. Ka nute pawn " Va kal phawt ula, Mama, kei zawng a chhul lam hi a nih ka ring ru riau mai" ka nu chuan a ti a. Ni e, Ka pi te nen pawh kan lo sawi ruk tawh kha a ni a, a chhul tha lo hnathawhte a nih chuan enkawl dan dan a la awm thei ang a. Chutiang ni lo a rilru lam a nih vaih chuan ka nupui ho dam reng chungin ka sûn dawn niin ka hria. Sangkimi pawh a rawn tho a, Bawihteii chu a pawm a, ka veng ru ran naa engmah a ti bik lo. Bawihteii pawh a ngawi ve reng. Tukthuan kan ei khamah chuan ka insiam a, Sangkimi pawh chu ka ko nghal. Luhlul zetin a thu tlat thung si. Ka pi leh pute pawh an rawn thleng thla a. A nu leh pate chu lo biak nachang pawh a hre lo. Lainat fê hian an melh vawng vawng mai a ni. Ka tur ka tur a, a insiam duh si lo chu ka pi thin tertek a chhuak leh ta nge, "Tluanga, i dim mah mah a nih kha. Hetiangah dim vak a ngai lo. Lo kal rawh, Sangkim" tih leha fanu chu pawh thawh a rual a, Sangkimi a lo rak thawt. Pindanah chuan an inpawt lut a, Sangkimi chuan, "Tu nge i nih a? Ti nge kan pindanah i rawn luh ve..chhuak vat rawh. Tluang, he nu hi chhuahtir rawh" a ti hlak hlak a. Ka pi chuan, "Ka fanu i ni a, i dam ngei a ngai. Chuvang chuan ka tih ang apiangin i awm tur a ni" tih pahin a thawmhnaw chu a phelh nghal mawlh mawlh a. Keiin Sangkimi hak tur ka lo la chhuak vat. Ka pi nen chuan kan thlak thei hram e. A sam chu ka chelhbeh chhungin ka pi chuan a chhipah a bawksak a. Hmuh pawh a nuam e. Eng chen nge kan cham dawn tih hriat ni hek lo e, bawr deuh tak chuan kan kal ta a. Ka pu hian jection a thiam ve tho bawk a, Mut duhna damdawi kan pai bawk. Kalkawnga kan buai chuan chiu mut a ni tawo mai. Kal kawngah kan buai em em lo va, tukverhah a dak vauh vauh a, naupang chhia deuhin kawnga kan mi tawhte a piang chu a bye bye lauh lauh zel a. A tihzia viau zawk e. Tlai dar 5 velah Aizawl chu kan lut a, A pu Valtea'n min lo hmuak. Sangkimi pute in lam chu kan pan ta nghal a. A pi leh pu ten an hmu chu an rilru a na tih hai theih a ni lo. Ani lah chuan a melh run run duh chauh a, zahzum hmel takin ka bulah a tàp chawt bawk. Mikhual roomah kan mu a. Sangkimi chu a chau ve deuh nimaw damdawi a ei bawk nen, kan buai ta lo hlauh e. A tukah chaw erawh a ei duh tlat lo, a pi te leh midang hoin an han biak ngial pawn hre awmin a lang duh lo tawp. Rilru a tina thin mang e, dam tha pangngai nise hlima a pi leh pute kuah chûk chûk tur a nih vei nen a aw. Tukthuan kan ei khamah Sangkimi chu ka siam mawlh mawlh a, "Vawiin chu mi hmuh tur kan nei a, mi tha tak a nia, a kawm ve chak che a, kan va hmu dawn a ni" ka ti a. 

"hmm, dawt sawi kher a ngai lo, Doctor bulah min hruai dawn a ni lawm ni?" a ti leh lawi si. Ka dang titih deuh a, "Ni e, i dam lo a, Sangkim, nasa takin i dam lo a ni. Chuvang chuan doctor i hmuh ngei ngei a ngai aw" ka ti ta tawp a. Tlang taka hrilh mai kha thaa ka hriat vang a ni. Ani pawh chu a ngawi vung vung a, "Min zêm tlat rengtu eng emawni hi a awm a. Ka sawi thiam lo.." A ti ve ta hlawl mai. A mitmeng pawh nidang ai chuan a fim ve tlat nia. 

"Kha thil kha Doctor ten an lakbosak daih dawn che a ni. Thuawih deuhin awm ang che aw" tiin a biangah ka fawp a. A mittui a parawl kiang a, "Ka bulah i awm zel ang em?" A ti tiau. 

"Lutuk, ka kalsan dawn reng reng lo che" ka ti a. A bu ve ta nghat. A pute Valtea leh Sawmpuia te pawn min rawn tawiawm ve thei a, Sawmpuia pawn a nau chu a lainat hmel kher mai. "A mak a ni. A tette atangin a bawrhsawm chho a, enkawl ngai reng, thiante pawh kawm hleithei loin a hun a hmang a. Nu a nih hnuah talte chuan a hrisel ve ka lo ring asin le..ka khawngaih êm mai" a ti ve mawlh mawlh mai. Chung a u thusawite chu hria ang pawn a lang lo, pawn lam a thlir daih a. A hnu deuhah, "Pa, motor tamzia hi tiraw? A nalh hlawm bawk si" a rawn ti hlut a, ka pu chu nui luiin, "Ni ngawt mai. Mihring zat zet an nih hi" a lo ti ve a. Ka nupui chu aw..Lalpa, i tidam dawn tiraw? 

Dr. Rohmingliana, Hmeichhe lam specialist lar leh tha em em kan pan a. A lo tha duam duam khawp mai, Ka pu nen pawh an lo inhre viau mai a. Ka pi vangin kan ngampa sawt mai. Sangkimi chu a han kawm vel a, a thusawi inkalpah nuaih te chu a tuartu tan a nuihzathlak miah loh. 

"Bawihteii kan rawn hruai ve lo va, Hman zanah Ama a lo tia, E chuan, u julie pawn fapa a nei tawh a. Mahse, a u hian a nei duh tlat lo va. Tluanga lah hi Malsawmi nen an lo tawm dun thul, ka phàwk zing khawp mai. Peka pawh Ruthi u in a vih hlum hmiah kha" tih thu te a ni a sawi ni. A thil vei zawng a zeldin kualna atangin a rawn chhakchhuak tihna a ni mai. Doctor chuan dawhthei takin a lo ngaithla a. A sawi zawhah keimah zawk chu hetianga a awm tan dan velte min zawt a, ka sawi ta vek a. A chhip leh a ke hmawr a sat thin thute pawh ka sawi. A bu nghut nghut mai. "A awmdan vel i sawi atang khan admit phawt a thain ka hria. In lama inenkawl a buaithlak takin " a ti ta a. Cabin min sawi hmawrhmuh avangin kan book ta chûk chûk a. Sawmpuia te pawh mamawh lamin an haw leh ta nghal. Ka pu pawn min la champui ve thei dawn a, a lawmawm. Thla a muang. Tawipui lam pawh chanchin ka va hrilh ve ta vat a. Sangkimi chu an chiu muhil rih a, a chau bawk nen, a muhil bawrh bawrh mai. A taksa chhiat chakzia ka hmuh hian na ka ti lo thei lo a ni e. Pachang taka awm ngai bawk si hian ka phur a tirit zual. Bawihteii pawh a tlei viau a niawm a, a la te si a, a nu pawm lohin a thanglian dawn chu a nia aw. Tlai lamah a thisen an rawn la a, naktukah test neih a ngai dawn bawk. A chhul lam chu Doctor te pawn an ringhlel tih a lang. Zanah buaina em em kan nei lo ti ila zing dar 3 bawr velah, "Chu! Min ko! Ka kal dawn" tiin a tho thut mai a. Ka pawmbet vat, "Mn thlah rawh, min ko alawm" tiin a tal nasa mai a. A chak hrep lehnghal, nurse a rawn lut hlauh a, kan inpawhbuai dan a hmuh chuan let leh vatin Sangkimi nghawngah chuan rem leh rem lo hian a chiu ta a. A zal ta raih raih mai. A tuka Doctor rawn lut chuan kan buaina chu a lo hre vek tawh a. Sangkimi a la muhil bawk a, "Phuarbeh a ngaih hunte pawh a la awm maithei a ni. Ngaih loh lamah i ngai lo hram a niang chu" a ti a. Ka nupui phuarbeha a awm tur ka mitthla hian ka na vawng vawng mai. Mahse, a tlanchhuah a hlauhawm si a. 

Sangkimi a rawn harh a, ka inthiarpui a. Tenna ka nei lem lo bawk. A zai a zai a, Pathian hla leh love song a sak pawlh nuai bawk, ka lo nui ruh ruh mai. A chang chuan a awmdan hi a hlimawm thin phian a! Mahse, chhungril takah lainatna a awm tho. Tukthuan pawh Sawmpuia'n min rawn pe a, a nau bulah, "Mate, niminah i ei tawh si lo va, ei teuh rawh aw.." A ti seuh seuh a. A u chu a melh ang run run a, "I nupui sual sual nen" a ti ta daih. Sawmpuia a hrilhhai hle..mahse, a inthunun vat thung. Chaw chu ka ei luihtir tlat a, Ei hram se ka duh êm vangin a hrawk pawh ka hràwk..a a na leh si, a mittui a tla ta chiah a. Ka pawisa duh lo. A chak a ngai tlat a tin ni. Ei kham chhun bawr velah test chu an nei ta a. Chhul tha lo treat-in an treat tawh a, damdawi pawh an eitir kal reng tawh. Tlai lamah Doctor chuan min rawn ko va, result lam tur chuan ka va lut ta a. Thu tura min tih chuan ka thu ta vat a. 

"A chhul hi paih mai a ngai dawn niin a lang. Cancer zungzam kan hmu tlat mai a, mahse, chutia nasa a la ni lo, Kan paih a nih chuan fa a pai thei tawh dawn lo tih i hria ang a. Chhungkuain lo sawi ho u la, in duhthlanna a ni e. Amah Sangkimi hi rilru lamah buaina leh harsatna a lo tawk bawk nen, thlahrangin a tibuai nia in hriatna pawh kha a nihna takah chuan a chhul tha lo intanna a nih vang a nih kha. Tin, ani hi chu a nulat lai pawha ka hriat than, bawrhsawm reng renga hun hmang kha a ni ve a, heng a damlohna te nen a rilru hi a dam lo em em bawk a ni. Dimdawih taka enkawl a ngai" a ti ta dap dap a. 

 Ka bu nghut ringawt. 

A hnu deuhah, "A nih Doctor, a chhul chu paih lo ta ila enkawl dam theih a ni tho em ni?" Ka ti a. 

"Risk a ni. Tin, hetah chuan enkawlna tha kan la nei tawk lo va, paih in duh loh chuan phai lam ka refer ang che u" a ti a. Ngaihtuahna a tawi tup mai. Zanriah tur chu Ka pu bakah sangkimi pi leh puten min rawn pe a, chhungkuaa sawiho a ngai ve tlat a tin ni. Tawipui lam pawh ka bia a, Ka nu chuan, "Mama, i thlah kal zel tur mipa fa i nei dawn lo tihna a nia, mahse, damna aia hlu hi a awm lo. Cancer zungzam an hmuh tawh chuan enkawl pawh nise nakinah hlet a la rawn nei leh tho lo'ng maw?" A rawn ti a. A dik khawp mai. Ka pi erawh chuan, "Tluanga, keini a nu leh pate chuan sawi tur vak kan neiin ka hre lo. A pasal angchhungah a awm tawh a, a chungah thu i nei ber e" a ti thung. Ka rilru a buai takzet a ni. Sangkimi pi leh pu bakah ka pute pawh chuan ka thutlukna an ngaicháng thap mai si. Bathroomah ka va lut, ka va tap ta zawih zawih a. 

Ni e, Zep thu a cheng lo, fapa hi ka awt ve alawm. Unau pahnih kan ni a, mipa awmchhun ka ni bawk, ka pa lah a boral tawh bawk si. Fapa nei lo va mual ka liam tur chu mihring rilru tak chuan a harsa ve lutuk a ni. Mahse, ka nupui hi a dam a ngai si, ka nu sawi ang khan nakinah kan buai leh ang em tihte thlengin ka ngaihtuah a. Ka han tawngtai, ka hul in ka ro ngawih ngawih. "Lalpa, ka tihtur min hrilh rawh. Khawngaih takin" ka ti a. Bangte chu ka chum dawt dawt mai. Ka rilruah he thu hi a rawn lang ringawt nia. "Pathianin mihring a siam chu a en a,tha a ti hle mai a" tih lai te chauh hi..a va mak e aw. Tichuan, thutlukna ka siam fel thei ta. Ka hmangaih ka nupui hian fanu chauh pawh min hrinsak ang hmiang, eng nge pawi? Ka chi, ka thlah kal zel tur chu lo mang mai mai rawh se..ka ropuiin ka ropui loh phah chuang lo. Sangkimi chhul hi kan paihtir ngei ang a, dam varin Aizawl kan chhuahsan ang. Tichuan, chhungkaw nuam leh hlim tak kan din thar leh dawn a ni. Ka thutlukna chu ka hrilh ta hlawm a. Ka pu chuan min hmer vawng vawng ringawt. Sangkimi taksa a la chak loh deuh avangin a tukah pawh an la zai ngam lo va, Thisen chaw an pek reng bakah chaw pawh buhhawp tlem tal ei hlek hlek turin min chah a. A mu tam thin bawk a, a nun a nguai thin hle. Phuar beh pawh a ngai lo. An damdawi pek kha a thawk ve ta deuh pawh a niang. Tichuan, kan awm atanga ni 4-naah Sangkimi chhul paih tur chuan ka nupui chu OT-ah an nawrlut ta a. Kan lo nghak ta thap mai. Engmah thil fel lo leh dik lo awm loin a chhul chu an paih ta a. Ka nupui chuan nau a pai thei dawn ta lo. A pawi lo, amah a dam that phawt chuan. Zanah chuan a rawn harh hlawl mai a. Tui bak engmah ei in theih a nih loh avangin tui ka lo intir vat a. A chau viau naa, a mitmeng a fim tlat! A tawng peih lo thung. Engmah na leh tawrh hrehawm a nei lo va, a lawmawm tak tak a ni. Kar khat tling lo deuh kan awm leh hnuah Doctor chuan, "A that viau tawh hi a..in lama inenkawl pawh a pawi tawh lo vang. Long run erawh chuan la tlanpui lo ula" a ti a. Ka lawm hle. Amah hian damdawi in a ning ve tawh êm a, ka khawngaih deuh a ni. Bill pawh a sang leh far far khawp mai, mahse, Sangkimi puin "Ka tum loh zawngin ka lungawi dawn lo" a ti mauh si a. Engmah kan chawi ve ta lo. In lamah kan inphur phei ta a, Pu Valtea nupui Pi Nupuii a fel thar thar thin khawp mai. Sangkimi chuna duat hle. Buhhawp a la ei a, Chawhmeh pawh a tuiril lam deuh bak ei kan la phal vak lo. A tuk zingah chuan ka biangah a rawn chûl a, ka harh nghal káwk. Mutmu ka tuah tha hman thin lo a ni bawk a, ka lo mutui hle a niang. "Mamawh i nei em ni!" Ka ti vat a. A lu a thing a, a mittui a rawn tla ringawt.

"Ngati nge? Duatpui, i mumang a tha lo deuh em ni?" Tiin ka tho deuh uaih a. 

"aih, min lo hmangaih lutuk hi ka lawm êm a, ka tap lo thei lo a ni" a ti ta a. A baw hawk mai. Ka lo kuah vat a. "Nang pawn min hmangaih alawm..i dam hi ka lawm takzet a ni. Engman an tibuai tawh lo che tiraw?" Ka ti mawlh mawlh a. 

."Aw..eng emawni min delh runtu kha a bo tawh. Khatih lai ka bawraw lai pawh khan ka rilru a fim lai chuan nasa takin ka inchhir thin a. Mahse, ka hneh zo bawk si lo..Tluang, min neih avangin ka lawm e aw. Ka tibuai nasa thin che sia tiraw?" A ti melh melh a. 

"Min tibuai reng reng lo..I damlo a ni mai a. Khatin inthlahrun a ngai lo" ka ti a.

"Chuan, min then ang tiraw? Tawipuia kan hawn phei hunah" a tih chuan makti deuh hian, "Eng a?! Ngati maw?" Ka lo ti nghek a. A heh pet fan fanin a nui lui hak a, "Fa ka nei thei tawh dawn si lo va" a ti chuai raih. A lu-ah ka va chul vat a. "I á lutuk, fanu duhawm lutuk min hrinsak tawh a, a dang an ngai tawh hleinem" ka ti a.

"Duhthu te kha kan lo sàm ve a, a tlem berah 7 talte kha ka lo ti a. Hmalam hun hi kan va hre lo tak" a ti niah niah a. 

"Ni ngawt mai, mahse, Pathian remruatah hian lungawi zel hi tum a tha" ka ti a. 

"Ka hmangaih che, ka hmangaih lutuk che.. " tiin min kuah a, ka sam karah a kutzungtangte chu a rawlh lut a. Tunah zawng ka nupui ka hmu leh thei ta. Buaina engmah tawk tawh lo ila ka va duh ngawih ngawih tak êm..

Han hawnsan rih dawnin min thlahlel ve bawk si a, Ka nuin, "In duh chen chen cham rawh u. He lam chu ngaihtuah a ngai lo. " rawn ti mah se; dawr enkawl bakah Bawihteii enkawl nen, a hah hle dawnin ka hria. Ka u lah school a kal a ngai bawk si. Rilru chu a nuam vak lo. Kan chutih mek laiin Sawmpuia'n nupui a rawn ru ta mai! Ka pu a sa kher mai le. A bialnu a tih ve fo kha a ni. Ka pi sawi ang deuh khan ka ngaihbel nge ni, a mitmeng chu a thîp rám mai a, a thinchhia ang tih pawh a hmui pan dan te, a aw atang hrim hrim pawn a hriat. Mahse, mi hi pawnlam landan atang chauha lo inteha ngaihdan lo siam hi a tha ber lo. Mi tha tak pawh a lo ni ve thei tlat. Sawmpuia hi Software engineer a ni a, mahse, tun hnaiah eng emaw thil avangin a chawl rih a ni. A nupui rawn ruk chu Senteii an ti mai a. Kulikawna khawsa an niawm e. A inchei dan leh landanah mi khawsa thei tak an nih a rinawm. A hmel pawh a chhe lem lo, mahse, Sawmpuia aiin a upa hlek maithei. Ka pu chuan pindanah Sawmpuia chu a ko lut a, "Malsawmpui, rilru i tina hle mai. I nauin laklawhna avangin dan puitlingin pasal a nei thei tawh lo va, tunah nang lehzelin i rawn ru leh ta bawk nen, i nu leh pate min chawimawi lo hle mai. Nang phei chu fapa nei, inneih hmabaka awm i ni kan ti mawlh mawlh a. Min va zah lo ngai ve" a ti nghut nghut a. Ka pu thinrim ka hmuh vawikhatna a ni hial awm e. 

."Pa, ka zah loh vang che u a ni lo. Julie chungchang pawh amah Senteii pawh ka hrilhsa vek a, min iai bik lo. Julie hi chu Pa, ka hmangaih theih ka ring lo a ni. Vawi khat chiah kan chesual a, a rai ta mai kha a nia. Kan inkarah inngaihzawnna engmah a awm lo, min hrethiam hram zawk teh u" a ti ve a. 

Lehlamah mipa ka nih angin ka hrethiam ve deuh. Mahse, hman ni lawkah Julie'n fa a nei a, tuna lo ruk thawt thawt chu a hmanhmawhthlak deuh chu ka ti. Ka pu a ding ta hluai a, "Kha kha lawm i buaina chu, in tetlai atangin vawitam ka zilhhau che u. Thianghlim takin khawsa ula, nupa nih hma chuan sex hman loh tur tih vawitam ka sawi lo em ni? Kei i pa pawh hian virginin nupui ka neih theih chuan engvangin nge i theih loh bik ang? A rang thei ang berin va dah let rawh. " a ti ta hmiah mai le. Chuti taka a pa thinrim chu a la hmu ngai bik lo nge Sawmpuia pawh a meng khup zúl zúl mai. "Pa, dah let ringawt chu..min khawngaih hram mai rawh" chu a ti hram. Ka pu erawh a ngawi hmak tawh si. Sangkimi pi leh pute an rawn lut a, Sawmpuia hi an duat lawtlak a, an bula khawsa reng reng a ni bawk nen, "Ruatpui, insum teh. Thil a nih tur ang a ni zo vek tawh. Hetiang tur a ni lo ve, Senteii pawn mualpho huamin a rawn zui tawh a. Ruahmanna kan neih vat a ngai zawk a nih hi..in rilru chu a na ang tih kan hria alawm. Mahse, rilru fim takin ngaihtuah a tha" Sangkimi pu chuan a ti chuar chuar a. Ka pi tawngkam ka hre ve chak khawp mai. A thinrim ve dawn hian ka hre êm mai. Chutianga an han tih takah chuan ka pu pawh a inbengdai ta deuh a. A lung erawh a la awi famkim lo viau. Sangkimi chuan engmah a sawi ve lem lo. 

Senteii chu kan la awm laiin an rawn hruai haw a. Palai tirh dan turte an rel ho ta a. Ka pi pawh a rawn phei ve. A thinrim viau naa, tihngaihna awm tawh hek lo le..palai chu an va tir ta a. An lo inruk ve tingtang tawh si avangin Senteii te lam pawh an lo rem ve mai. Thla hnih hnu lamah inneih chu an tithlu ta a ni. Julie te pawh sawn man an pe ta a. Sawmpuia fapa pawh an va en nupa a, an thlahthlam loh tur thu leh engkima an tawiawm zel tur thu an sawi kha. Keini pawh kan nu a kàng chhoin a tha ve ta deuh bawk a. Dawr leh bawihteii ngaihtuah a na tawh bawk si nen, hawn lam kan hnaih ve ta. Amah Sangkimi ber ber chuan hawn a chak tawh. Ka hrethiam hle. Ka pu te motor bawkin kan haw phei ta a. Ka dar nghengin a muthlu phei char char. Rilru a hlim tawh a, engkim chu ka hmu mawi vek tawh. Tawipui kan han thleng chu thenawm khawveng, then leh rualte an rawn lang nghal sap sap a, Sangkimi chuan bawihteii a pawm hmasa ber..a biangah nen a chalah a hnarah a fawp mawlh mawlh mai a. "Bawihte, ka va ngai tawh che êm..tunah chuan ka dam tawh aw.." tiin a be mawlh mawlh bawk. Dama kan han haw leh chu min lawmpuitu an thahnem hle, Kohhran te tawngtaina kan dawng nasa bawk a, an tawngtaina chhanin a awm a nih dawn hi..

Nun pangngai chuan kan han nung chho ve leh ta a. Kei pawh dawr lamah ka buai chho nghal mawlh mawlh. Esi chu a hah deuha ka hriat bakah in hnuai lam viltu pawh kan mamawh tih hriain Teteii Vengthar ami kha ka rawih belh a. Pathian zarah hlawh hi ka pe chhe hran lo va, chhungkaw chawmna khawp chu a tling kher lo maithei, mahse, Kan khuaa dawrah chuan ka rawihte hlawh hi a sang ber a ni. Chuvangin thawh an chak thin rêng a. Mahse, taima tan lo chuan thawh peihna chi a ni lo, chet reng a ngai a, chhun reh lai bak mawng an hung ve hman meuh lo a ni. Teteii chuan in hnuai a vil pah ta bawk a, ani pawh mi biangbiak a thiam bawk a, ngainat a hlawh thuai mai. Whatsapp lamah hian uang zet zetin kan inbe thin a, a frank bakah zahmawh han sawi maite hi a hrat zêk a, a takah a fair hle thung si. Zan khat ka inkhawm hlanin ka phone a lo check chu niin, Teteii nen kan inbiak fiamna te chu a lo chhiar vek a. 

Ka lut chiah chu, "Apa, siali nu hmmm hi a tui i ti ve em?" a ti teh ngawt a. Apa tiin Teteii hian min ko fiam thin. Ka bangbo nasa mai a. "Nge awmzia?" ka ti nghut. Ka inthlak laiin , "Apa, kan dawr hi picnic ve ila.." a ti leh. Tah chuan Teteii nen kan inbiakna a chhiar tih ka hre ta a. 

Za mang lo zeta nui chungin, "I ho mai mai e a" ka ti ringawt. Ka bulah a rawn thu a, "Ka ho lo. Khatianga inbiak fiam velna atang khan alawm mite hi an inngainata a tawpah an induh phah hial thin ni..a dik em?" cho zet hian a rawn ti a. 

A thikthu chhia hi chu a reh ngai dawn lo a nih hi. 

"Teteii te chu i hre vek alawm. Chutiang rilru a pu lo, DInmawia nen an inngaizawng" ka ti ta ngawt a. An inngaizawnga ka hriat deuh vang a ni. A ner sak a, "Dinmawia pawn a thik ang che. Be tawh suh" a ti nghat. 

"Heti em ema thikthu chhiat hi a tha ngai lo. Ka tan pawh a zahthlak" ka ti a. 

"Thik tur chi leh chi loh ka hre ve bawk" a ti khauh. Ka ngawihsan ta daih a. A tukah Teteii nen pawh eng boruak tha lo mah kan nei lem lo. A nui duh si a, a bula awm hi a nuam ve reuh êm a ni. Tlaia ka haw chu ka inbual zo room-a ka lut chiah chu kan nu chuan rang zetin a phone biak lai chu a dah a. Ka hmu hman vek. Mahse, ngaihven lo angin ka awm tlat thung. Zanah bawihteii kan mutpui tawh a. A laiah kan la muttir.. Pasaltha thawnthu ngaithlain ka muhil ta bawrh bawrh a. Ka zun chhuak vangin ka harh leh, Sangkimi a lo la meng nia! Ka chek hluk a, "I va meng rei ve" ka ti sup a, min chhang lem hlei lo va. Ka zun zawh pawh chuan a lo la khawih reng a. A nui leh hak thin. Zingah thawh a hai phah ta chiah a. A muttui leh lai chuan a phone chu ka ban de de a, ka la ta a. Hawn ka tum chu password chhut luh a ngai, kan birthday ve ve kan hmang thin a, ka'n chhu ngial a, a dik thei lo. Ka lakah zep a nei a amw? Duh duh huna ka phone a khawih theih laiin ka thei ve lo a maw? A rawn thawh chuan, "Nizan ang khan mengrei tawh suh ang che. Tu nge i biak reng reng a" ka lo ti a. 

Ngaihsam hmel zet hian, "Aw..Lalrikcy-a..ka thianpa mawle" a ti satliah a. Ka beng a verh zawk..tawng ka tum lai takin bawihteii a rawn tap ta si a. Ka sawi hman ta lo.