Rinsangkimi 15

RINSANGKIMI (15)

Ziaktu: Toni Râlte

"Hello, khawtlang mipuite hriat atan chhiat tawh thu kan han puang ang e. Tun mai khan Vanlalpeka , Pi Lalrengpuii fapa chu PHC, Tawipui south-ah a boral a. Khawtlang mipuite kan han inhriattir a ni e. A ruang hi Hnahthial lama phurh phei tur a ni a, Thalai te'n thlahna neih tur a ni e" tiin. Lungphu a rang ve det mai a! Lalmama lah khan a rawn sawi chipchiar lo bawk si. Engvang taka thi nge a nih ang aw. Chaw eizawm leh pawh a har ta deuh. Sangkimi erawh chuan, "Mi nun chhe lutuk, midang nun infiam nana hmangtu chu a damrei kha ka ring vak lo reng a ni" a ti hmiah mai. Valtea a rawn lut a, ani chuan chanchin a lo hre thui deuh nge nge e. 

"Mamuani a kawp hnuah Ruthi a va hêl kual leh vel a niawm e. Ani Ruthi lah chuan, 'Nangmah vangin ka thisen a thianghlim loh phah a, ka nun i tichhe vek, mamuani pawh ka hrilh vek kha..kan khaw nulate hi tichhe tawh suh' a lo ti nek a niawm e. A chumi la na chu zu a rui a, Minpui tuikhurah a bike va silin insu ve te bucket leh an thawmhnaw sukte kha a pal darhsak vel a, chu chu tuichawi ho tlangval khan an en liam thei ta lo va. An hnawt haw a. A la lungawi ta lo fo a, bazar lamah rawn pheiin saw lai bawlhhlawh paihna bulah sawn , " Tawipui nula ho hi HIV ka kai vek dawn..a khawpum hian ka tichhe vek dawn che u" a lo ti vel a niawm e. Bazar tlangval ho chuan an lo ngaithei tawh lo sa nen, an enliam thei ta awzawng lo. Hmuna nen an insual a, Peka chu a putea khan a rawn chhan a, an inphek sual zui ta a ni. Kan veng tlangval ho an inkhawih tui ta deuh a, Peka chu nikhaw hre loin a tlu ta a, a putea pawh a na khawp mai. Mit an tihkhamna a rei lulai tawh a, tlangval thinthawk an cho chhuak ka ti mai. Damdawi inah an kalpui nghal a, an chhan hman ta lo a ni. Nangni chhung lah hi in benghawng lo lutuk, in hnaih tehlul nen, an thawmte pawh hriat ve awm che u" a ti ta mawlh mawlh a. Lehlamah kan in hi in hnuai a nih bakah a ûp riau reuh a, pawnlam thawm kan hre vak ngai lo. 

"A va zia lo ve aw..han thlah ve te pawh a that chu" ka ti a. Sangkimi'n, "A va tul lo tak, Pi Rengi'n a mawhpuh leh che nge" a lo ti vat. Ka nui a, "Tel vena ka nei hleinem. Pi Rengi chu a sa viau tak ang a..Police lam pawh an rawn kal vat dawn chu" ka ti a. Ka inthlak sawk sawk a, Valtea nen chuan bike-in damdawi in tlang lam chu kan pan ta a. An lo tam tawh hle, khawtlang hruaitute pawh an vei thuak thuak mai. Hnahthial lama phurh phei dan tur an rel mek a ni maithei. Pi Rengi a tap ràwih ràwih a, a fapa a enkawl thiam tlat lo va, a dik lohnaah pawh a tan zel a, a tawpna chu a rapthlak ta hle a nih hi. Pawi vawng vawng tak a ni. Peka ruang chu kan va hmu ve hram a, a hmai a la vûn bakah a duk cher chur mai a, ka hmelma a ni naa, thihna meuh a han hmachhawn takah chuan tlem chuan khawngaihna chu ka nei ve lo thei lo. Amah kutthlaka sawisa hlum hialte hi demna erawh ka nei lo, mipa thinrim thisen lum tawh hi chu chutimaia han reh duak nghal thei kan ni lo miau a. Amah Peka lo huatsa tawhna nen, kan khaw nula a tihmualpho zin tawh bakah keimah vanga lo ngei ve em emtu te kha an ni miau a. Pi Rengi chuan ,"Ka fapa, ka duatpui, tu pawi mah i sawi loh nen chuan aw tiraw? I tawp dan hi ka duh thei lo. Nangmah tinatu te hian hremna an pumpelh hauh lo vang. I nu hian i phuba ka rawn laksak ang che. Thlamuang takin chawl rawh aw" tiin a tap ràwih ràwih a. A thu chham duh dan te chu aw..a fapa thihna hian a nun siamtha se lo tih ruk ve nen chuan. Ka pi ka hmu miah lo va, ka pu erawh a mawihnaiah tiin a rawn lang ve. Ka pi hi zawng a lung a lian êm a, khati khawpa Pi Rengi'n a puhchhiatna te avang khan a rawn lan ka ring lo reng a ni. Ambulanceah chuan Peka chu an zawn lut a. Pi Rengi chu U Feli leh Nu Zaiteii ten an zui ve, Pa Rina te pawn an zui ve duh thak lo. Zuitu an tlem êm vang chuan hruaitute chuan nuam an ti lo nge ni, tlawmngai thei an zawng ta tawp a. Mi 5 vel an hmuh belh. Chutiang tak chuan Pi Rengi te chuan huat an lo hlawh chu a nia. Inngaihtuah ve se ka ti khawp mai. FIR a thehluh avangin Police pawh an rawn lang a, hruaitu te bawkin an lo dawngsawng a. Tlangval panga chu an phur thla ta phawt a. Mahse, an tan rei ka ring vak lo, tihtheih kan nei ve te pawn ka ring. Chutiang chuan Vanlalpeka, mi dang nun tichhetu leh mi chapo tak mai chuan a hun tawp a hmang ta a ni. Kan damlaia kan nundan hi a lo va pawimawh tehlul êm..Ka nu sawi ka la hriatreng chu, "Kan tleirawl chhuah laia kan thiannu pa hi pa tawrawt tak, sual leh kutram zet mai a ni a. A nupui phei chu a hmelhmai hi hmuh tlak a awm lo fo zel, a nupui mai bakah a fate thleng pawn a dim chuang lo; thil an lei thar ve te hi a sahsawmsak loh leh a halral sak thin. Ka thiannu pawh chu kan uniform pawnfen hnuaia fen tur fenhnuai a mamawh ve sia, a pa a dil ngam si lo. Ka pa bulah ka sawisak a, ka pa chuan a leisak ta ringawt a. Hlim em emin a haw a, mahse, a pa chuan a lo satsawm leh vek a. Kan bulah phei chuan, " Apa hi thi daih se kan hlim zawk ang" a ti hial a ni. Tichuan, hun a kal ve zel a, kan nulat chhuah hnuah a pa chu a damlo ta a, a thih sualte chu a rapthlak a nia aw. A meng pual a, a chhiatkhum vak vak a, damlo si kha bangah te a hmai a tauh chawrh chawrh a, rapthlak tak a ni. A thi ta a, a nupui chu a mawihnaiah a tap ve a, a fate tumah an tap lo. Mi nun chhe lutukte hi chu an thih pawn thih dan pangngaiin an thi ngai vak lo" tih hi..a dik khawp ang. 

Peka chanchin chuan sawi a hlawh rei tehchiam lo. Kan ui lo tlang a ni ber e. Tumah hian thih chu kan phu lo naa, thihna cho chhuak hi a awm ve thei ka ti tlat. Kan nu pawh a dul a len ve tak deuh avangin dawra kal ka remti ta lo va, in a nghak thin. Ka pite inah pawh kan leng khàt angreng. Kan dawr pawh Pathian zarah kan tluang chho ve zel a, dawr hnuai pawh a lun ve ta viau. Nikhat chu Bti kha a rawn lang leh hlawl mai a. Thil a ei a, min rawn be nghal bawrh bawrh a, "I whatsapp no i thlak nge ti nge ka hmuh theih tawh miah loh che a" a tih chuan Sangkimi'n a block tih kha ka hrechhuak chiah. "Thlak lo ve, kan nuin a block che a ni lo maw?" Ka ti mai a. Min beisei zui zel ka hlau deuh a ni. 

"A thikthu a va chhe awm ve" a ti nghat a. "Chhe ve thawkhat e" ka ti a. 

An kal dawna pawisa min pek pah chuan, "Ka number dang atangin ka lo bia ang che, fimkhur tawh la " a la ti hram. A hmel a fel tehlul nen, a rilru a piangsual deuh em mawni aw ka ti deuh. "Aa..pa nih tawh chuan nula hi ka be vak duh lo va. Min hrethiam zawk rawh" ka ti ta hmiah a. Mi pangngai a nih chuan a hrethiam ve turah ka ngai. Malsawmi pawh hi a khat tawkin a rawn lawr sek a, ka tlangval laia luck vak si lo kha pa ka nih hnua ka han luck thar vel chu mak ka ti deuh. Malsawmi hi chu min duh em em vang pawh niin ka hre lo, amah aia hmeltha leh fel zawk nupuia ka nei hi tlawmah a la ni mai ten ka hria. A chapo ve deuh bawk nen..a inah pawh ka la kal miah lo, kalna chhan tur ka nei lo bawk a. Ka u in kan zanriah ei laiin, "Rema'n palai lo tirh a tum a" a ti a. Kan meng pháwk hlawm viau. 

Sangkimi'n, "Ngai rih lo, nau ka neih hunah ka buai dawn sin, i awm ve loh ten" a lo ti. A va hahthlak thin e aw. 

Ka nu pawh chuan, "Lut leh chhuak awm hi a tha lo an ti asin. Bakah a la hma deuh lo maw? Kum khat te han inzui ve phawt ula mawle" a ti ve a. Ka u pawh chuan, "Ka sawi reng alawm, amah hi a hmanhmawh ut ut a, min ngaih vang a niang. A nute min biaktir thul..a nute pawh an lawm ve lutuk, zu a in tawh loh bakah workshop a nei a, a pain bul a tansak ta bawk nen,.." A ti ve luam a. Rema chu ka lawmpui hle. 

"Kei pawn ka lo kawm hrim hrim dawn nia, pasal hi nei lo reng la ka duh mah zawk kei chu" ka ti a. Nia, unau pahnih chiah kan nihnaah kan unau hi kan inngaiin kan inthlahlel ve êm a ni. Rema pawh chu a hnuah ka titipui ta a, "Aa. Thianpa, ni e, ka lo hmanhmawh deuh a niang. Ka ngai thin êm a tin ni..ka farnu in pasal a nei ve tawh si nen, mo kan mamawh sia, ka nu hian a sawi a sawi a, chuvang mawle" a ti ve mai a. La innghak hram hram turin kan inchah tak ringawt kha. Kan Romawia paw'n a bialnu a hmaa a then zuai kha a lo ru ve a niawm a. Valtea nen kan zuk leng ta vat a. A tha, nupui hi nei se rilru te pawh a puitling ve deuh nge nge e. Hriatpuia lah kha rukte kha a sawi zuk zuk a, tunah chuan Lalrinnungi nen an ni leh daih tawh. Zuala erawh Mamawii nen an la nghet ve viau a niang, hmuh pawh kan hmu khat. A vil deuh reng ni maiin ka hria. 

Ka nupui dul puar luah tawh hnu chuan zan lama chet pawh ka duh tawh lo va. A kawng kham hmehsak leh a pum chulsak chu ka hna a ni deuh mai e. Sangkimi mang chhiatzia hi aw, kan inneihtirh te phei kha chuan ka nghawngah te zuk khan thin a! A mawng lam tipoh vaka mut te a ching a, pa zawk hi ka tla lek lek fó. A nau neih hun pawh a rawn thleng ve ta. Aman a duh tlat si a, Christian Hospital Serkawn kan pan ta a. Kal kawngah a la na em em lo va, a lawmawm hle. Damdawi in kan thlen hnu lawkah a rawn na tan ta a, a ner leh sak thin. Na tuar thang, nulat lai zawnga bawrhsawm reng reng kha a nia, a chhel viau mai. An neihtir ta mai bawk si lo chu ani na ti tawh lutuk a hmui pet nasa lutuk chuan a hmui hnuai lam sir pawh a seh thi thei hial. Awrawl erawh a chhuah duh hauh lo thung. Ka piin a han chul heuh heuh a, a nu kokia a lu nghatin a khur ngat ngat mai, "Nu, a va na ve le.." Tih bak a sawi thei lo. Ka pi lah chuan a fanu duat tih takah a lo khawngaih lutuk chu a mittui te a parawl kiang mai. A tawpa tawpah an rawn lam ta a, nau neihna wardah an nawr lut ta. An luh dawn chuan, "I vei rei viau dawn ai chuan inzai tir mai rawh aw" ka ti hram. Ka khawngaih êm mai. Nau neih hi zawng a na thawkhat ang. A rorum zawk mipa hian hring ve thei zawk ila, tawrh dan dante a awm zawk tur. Hmeichhe chhelzia hi aw. Sangkimi te hi ka ti, hrisel lo tak ni chungin min hmangaih êm vangin risk la takmeuhin min nei a, an ina a duh duha awm thei kha pasal leh chhungte thuneihna hnuaiah awmin, a tih ngai loh pui pui a ti a. Vuina reng reng nei loin nuam a ti zawk emaw tih mai turin hmel hlim takin a hlen thei zel a. Ka pi leh pute hian kan inneih dawn khan an zilh nasa viau a nih ka ring. Ka pu hi zopa ve tak, rilru nghet tlut mai a ni bawk a. Ka pi ai mahin a fate hi a zilh tam ka ring zawk. Ka tei sek a, nupui te nau vei laia thil lo ei chu thil theih a ni lo reng reng. Darkar hnih dawn a vei hnuah nurse a rawn chhuak a, a mask chu phelhin, "Fanu i nei e" tiin min rawn en a. Ka tlu tawp lo kha a mak zawk. Neih pangngai ngatin ka nupuiin fanu min hrinsak a nih chu! Ka pi leh pute pawh an lawm kher mai. Ka nu pawh a mittui a tla hial. A mal tetein naute chu kan va en a. Ka fanu chu 4kg lai a lo la ni zui. A no chek mai a, a va hmeltha tehlul êm..ka fawp vawng vawng a, Pa tel lova enkawl, harsatna hrang hrang tawk ve reng thin Zothantluanga hian hetiang fa duhawm lutuk hi Rinsangkimi lak atangin ka nei ang tih ka ring phak ngai lo asin. Pathian hnenah lawmthu ka sawi mawlh mawlh mai. Ka nu chuan, "Bawihi nu leh pate leh Mama te'n min lo hrethiam se, ka tu hmuh hmasak ber hi a hming sak ka duh tlat a ni. Pathian min pek ka ti mai a, Ka rilruah a awm reng thin. Pa tel lo va kha chen ka enkawl ka fapain fanu a han nei ve ta mai hi ka lawm êm a, Pathianin min theihnghilh ngai lo tih ka hria a, chuvang chuan a hmingah, " Vanlalhriatpuii" ni teh se.." A ti a. Kan pawm tlang hle. 

Sangkimi chau tak, hlim hmel tak si chu ka zuk chul a. "Ka lawm e aw , Duatpui..ka hmangaih che" ka ti vawng vawng mai. Paho chauhin ka thinlung lawmna kha min hriatthiamsak ang. Sangkimi chu mipa awmpui phal a ni si lo va, ka nuin awmpui a tum zet a, aman a duh zawk ka rin avangin ama nu zawk ka pi chu awmpui mai turin ka ti a. A lo lawm tumhrang a. Keini erawh kan haw ta rih. Mahse, a inhliam nasa vak lo bawk a, ni 4-naah an lo haw ve ta mai. Chhungkua kan punbelh ta a. Nun hi a va nuam si êm..

Ka fanu chu ka thlir ning thei thlawt lo va, a muhil laite hi ka lo en leh reng zel thin. Sangkimi hi nau lawm viau e ti lo chuan nau khawih vel a zei hlawl lo va. Bual pawh a bual thiam lo, "Ka thlauh ang" a ti deuh tlat zel. Ka nuin a bual thin. A hmaa kan lo buai rukna a hnute chu buaina a tling ta vak lo, Naute pianghlim te tana eitur bik bawnghnute kan lei mai zel a, a nu hnute hne miah loin ka fanu chu a seilian ve dawn ta chu a nia. Puak theih a rawn ni chho chu, ka nu leh ka u hi an intithinrim lo chauh zel,an puak inchuh hi. Amah kan nu lah nau puak zei hek lo, a lawmah a lo tla a. Ka nute awm loh chuan a pawm mu tawp zel. Chutiang reng renga kan nautein kan nun a tihhlim lai chuan zan khat chu kan nu a titau ta deuh tlat mai a. A chhan tur awm ka hre si lo. Min hnungchhawn zawngin a mu hmak a, Bawihteii pawh a ngaihsak lo. A tapbelh lo êm zawk a, a muhil chiah chiah reng mai. 

"Duatpui" ka han ti a. A che deuh naa min chhang lo. Ka va khawih a, "I ninawm" a ti hlar a. A ngaihna ka va hrethiam lo tak e aw. 

"Eng nge ka tihsual leh tak?" Inthlahrung zet hian ka ti a. 

A rawn inher a, "Bawiteii ringawt i ngaihsak a, min ngaihsak tawh lo. Eng atan mah min ti tawh lo" a ti ta a. Khai aw! A fanu a thîk leh ta..a va buaithlak e aw.

"Aw..ka ngaihsak ve reng che lawm. Bawihteii te chu naute a la nia, ngaihsak a ngai ve alawm" ka ti a.

"A pi leh a niten an ngaihsak a, i lo duat ve huam huam pawh a ngai lo. Hem huam che hian" min ti ta zêk a. Ka nuih a za si, ka nuih vaih chuan, "Min nuih elo? Ka thinrimna pawh engahmah i ngai lo" a ti leh dawn si, ka insum tang tang a. 

"Nih nangmah chiah ka ngaihsak tawh ang che aw..a tha em" tiin ka va chul a.

"Ka ning, ka muhil dawn" a ti hlar a. A nau neih inhliamna vel kha a la reh fel ka rin loh vangin nupa nun pawh kan la hmang miah lo va, nupa nih chuan hengte hi thil naran a ni lo va, kei pawn ka lo ngaihthah deuh em aw ka ti. Bultan thar leh chu a ngai a nih hi. 

 

A tukah Bawihteii hlanna kan neih dawn avangin ni dang aiin kan inchei ve deuh a. Nau puak zir tura ka nawr nasat vangin hmathlak zawnga puak chu a thiam ve tawh a, bawihteii a hmathlak a, Biak in lam kan pan ta a. Kan naute chu an en duhin , "A chhun kawp che u a nih hi, a va hmeltha tak" an ti zel a. A nuam ve khawp mai. Kan ban chuan ka u in thingpui a lum a, Sangkimi chuan Roomah bawihteii a thlak fel a, kei erawh ka inthlak tawh. Kawngka rawn hawngin, "Tluang, lo kal lawk teh, Nuu, lo kal lawk teh u' hlauhthawn hmel deuh hian a ti a. Kan lut vat hlawm, " Bawihteii thawk dan hi a dik loin in hre ve em? A pang hi a lum bawk a" thlabar hmel zet hian a ti a. A fanu thik mah se, nu na na na chuan fate chu an lo ngaihtuah deuh a ni. Ka nu chuan a han dap vel a, ani pawh chuan, "A nih hi, Rang takin damdawi inah chho ang u. I u muana han be rawh" tiin min rawn melh a. Ka tlan chho nghal a, a lo awm remchang hlauh bawk a, hlauthawng zetin damdawi in chu kan pan ta a. Ka pi ka be bawk. Damdawi inah ka pu nen an lo awm a, Bawihteii chu a en ta vat a. Nachhawkna a pe phawt a, a khua a sik ve tlat avangin. A thaw lak dante chu a han chîk deuh a, Bawihteii chu hnàr ang deuhin a thaw ri sêk sêk a, mahse, ngaihthlak chian chuan thaw tha thei lo, boruak kham khawp lo a ang zawk. Ka pi hmelah chuan thlaphanna ka hmu tel tlat bawk nen, ka ngaih a tha hlawl lo. Ka pi chuan, "Khawsikpui te hi a ni thei ang em aw..khawl kan nei tha si lo va, Tluangpui, Lunglei panpui mai teh ang u" a ti ta a. Ka mang a va ang tak. Ka pi leh pu nen, keini nupa nen Bawihteii chu Lungleiah kan phur thla ta chûk chûk a, ka nute erawh ka pi ten, "Kan lo buaipui ang, in lo nghak zawk r'u..Sawmpuia khi rawn awmthla ve rih mai se. Eirawng a inbawl thiam leh dawn si lo va" an ti a. An kal ve ta lo. 

Kalkawngah Bawihteii chu a rawn khuh bawrh bawrh a, kan dinpui vat. Aw chhàng tîp têp hian a rawn tap chhuak ta a, ka va lainat tak êm. Sangkimi thlaphang tawh mangang bawk si chuan, a nu melhin, "Nu,, ka thiam lo" a ti tiau a. Ka piin a la ta vat a, a chul hliau hliau a, a hnungzangte chu a ben sak thlep thlep bawk, nachhawkna kha kan paisa bawk a, damdawi ina a pek khan a chhawk lo em maw tih turin a pang a sa reng si a, kan pe leh ta ngawt a. Serkawn bawk kan pan leh. Khua a thim tawh a. Casualty-ah kan tlan luhpui a, ka pi hmelhriatte pawh an lo awm bawk a. An lo ngaipawimawh khawp mai. An han en vel a, min admit ta phawt. Rilru a buai duh hle. Kan riah mai a ngaih dawn avangin Rema ka be ta a, rawn tlan chhoh ve a tum naa, tul ka ti lo. An ina kan riah tur thu ka hrilh a, zanriah pawh kan la ei si lo. Ka pi chuan, "Kei chu Thangi te rawn keng turin ka hrih mai ang, I pu nen khan zu chhuk rawh u, keiman zanin chu ka'n riahpui ang e" a ti a. Bawihteii chu a tap muhil tawh a, a chala fawp zauhin, "Bawihte, lo dam vat rawh aw" ka ti sup a. Kan chhuksan ta. Thla 2 mi lek tawrh a tan chuan na ka ti. A tawrh aite hi tuar thei zawk ila aw. Ka pu nen pawh kan tawng tam lo dun kher mai. Rema te in kan zu thlen chuan min lo be nghal siam siam hlawm a, ka pu pawh a tlangnel ve nghal mai. Chaw pawh an lo chhum belh leh a, tlai deuh takah kan ei. An mikhual roomah ka pu nen khum hran ve veah kan mu a, Han phone sek kha an buai takin tiin ka ngam lo deuh a, chanchin ka hre chak bawk si. A tawpa tawpah a vawi 3 nan ka call leh ta nge nge a. 

"A thisen an la, test hrang hrangte pawh neih a la ngai maithei..tunah chuan Anuin a awi a, a tap reng sia, a inthlahrunawm lutuk" Kan nu chuan a rawn ti a. 

"Chaw i ei em?" Ka tih chuan, "Ei a, ka ei tam thei lo, bawihteii hi ka khawngaih em mai" a rawn ti tiau a. Ni e, rilru a hrehawm duh takzet. Kan fatir a nia, kan zuau ve deuh pawh a ni mahna. Fa hmangaih hi a lo na êm a lo nih hi..zingah pawh ka harh hma hle, ka mu tam miah lo nain. Tukthuan ei kham velah chhoh kan tum. Tukthuan ei lai chuan Rema pa chuan, "Tluanga, i fanu nat lai a ni na chungin sawina hun remchang a awm tawh loh takin..Hei i hmuh angin kan pa thuau mai a, mo kan mamawh bakah Rema hi kaihhruai loh hlek chuan pelhe leh mai thei a ni ve si a, i u hi min neihtir tawh mai rawh u" inthlahrung takin a ti a.

"Ni e, a dik khawp mai. Mahse, ka nu khian a la remti chiah lo niin ka hre deuh a, Rema a duh loh vang ni loin, kum khat te inzui ve phawt se a ti ve deuh tlat a. Hun hi han kal deuh se neih zawng an la innei em em ang" ka ti ta ringawt a. An ngaih pawh a that hmel ta deuh. 

Damdawi in kan han chhoh chuan, an ni pawn chaw an lo ei tawh a. Bawihteii chu zan khat lekah pawh a lo tla dûk mai. A dang bel mai bawk si. A hnarah pipe an vuah tup a, ka va lainat ngawih ngawih tak êm..Sangkimi tak pawh chu dam tha lo hmel a pu, mut a hmu tha lo tih a lang reng, a thur bám bawk. Ka pi erawh a la che zangkhai viau, amah zawk hian nau pawh a khawih ber zawk. Kan awmdan tur kan han ngaihtuah a, Bawihteii a tah reng vangin kan ward ami te lakah a inthlahrunawm deuh avangin ka pu chuan cabin a va book a, Kan lo la chang hram. Kan han insawn ta rum rum a, a zia ta deuh. Ka pu chuan, "Saidingi'n programme a nei lem lo bawk a, Tluanga nen kan han haw leh phawt ang a. Mamawh te han lamkhawm se la, rawn chhuk leh mai rawh se. Kei erawh in ka lo nghak ang. Awm teuh kha tihtheih kan nei chuang lo bawk nen, Tiang chuan ti mai ang u aw" a ti a. Kan pawm tlang viau. Tichuan, kan haw ta a. 

Ka rilru ipik lutuk chu ka rum leh nghut thin, ka pu chuan, "Tluangpui, i rilru tihah lutuk suh. Eng êm kan ti lo vang. Tlang hrileng a kai ve te pawh a ni maithei asin" a ti a. 

"Nia., ka lainat êm a ni" ka ti ve ringawt. Khua kan thleng a, chanchin min zawttu an tam ve hle, ka rin aiin an lo ngaihven ve a lo nia. Zanin chu ka riak ang a, naktuk zing sumo-ah ka chhuk leh mai ang ka ti. Kan khum zau puia keimaha ka han mu chu ka khua a harin ka tahte pawh a chhuak lek lek. Sangkimi'n, "Bawihteii inthlakna tur pawh rawn keng rawh aw. I rilru kha tihrehawm lutuk suh. Pathian a awm alawm" a rawn ti a. 

"Nia, nang pawh chaw te kha ei tum hram hram rawh aw, i chauh chuan a buaithlak" ka ti ve a. A nu hirsel lohna te hi a chhawm ve dawn em niang tihte thlengin ka ngaihtuah. Nizanah ka mu tawh mang si lo va, zanin chu ka mu ve hlek e. A tukah chuan bawr zetin ka chhuk ve leh ta a. Serkawnah ka tlang nghal. Ka va luh chuan a lo tap leh nasa mai a, a aw pawh a chhuak hleithei tawh lo. Ka'n pawm ve a, Bawihte, i tawrh ai hi tuar thei ila aw ka ti rilru vawng vawng mai. A tawpa tawpah nachhawknain a hneh ta nge a tap bang ve ta hram a. Ka pi chuan, "Khawsikpui chu a lo ni ngei e. Mahse, tun laiah khawsikpuite chu an enkawl dam zung zung tawh a, lungngai lutuk suh u" a ti a. Sangkimi mawlh hi ka ngaihtuah ru riau, a awmdan a danglam lutuk ringawt. A melh ngai melh reng te, tawng nachang hriat miah lohte a ching a. A fanu natna chuan a hneh ka ti mai. A pawm pawh a pawm duh lo, a khawngaih luatah a tahpui dawn zel si a. Ka pi kan tihah khawp mai. Ani doctor a lo ni bawk nen, engkim chinchang a hria a, a enkawl dan thlengin. Amah ka pi pawh chuan, "Tluanga, naute chu ka kutah dah la, in nu zawk hi buaipui teh..a awmdan hi ka ngaih a tha tlat lo. Kawm hlim tum rawh. A theih phei chuan pawnah te va leng chhuak daih r'u" a ti ve nghe nghe. Kei pawh chuan Sangkimi chu va inbual faia inthlak turin ka ti a, a kal ve mai. A awm rei tak em avangin ka ngaih tha lo chu ka va ko a, a reh veng veng. Kawngka ka kik dawt dawt a, ka ko pah bawk. Reife hnuah a rawn hawng a, a hmai a sen vek, a va tap hrep tih a lang. Ka àwmah a rawn bei thlawp a, "A nu min chhun dawn a niang, ka fanu hi a thi dawn lo tiraw? Thihtir suh aw.." A ti mawlh mawlh a. Ka lo chul heuh heuh, "A dam leh vat dawn alawm. I ngaihtuah nasa lutuk a, i rilru a buai a nih kha. Ngaihtuah vak vak tawh suh, a thi dawn lo reng reng. Pathian kan nei i tih kha nang pawn. Chak taka i awm a ngai" tiin ka hnem a. Ni e, zep loh chuan kan la naupang dun si a, fa hmangaih tina chi kan lo ni ve kher bawk nen, Bawihteii hetianga a han awm ta mai hi dawnsawn thiam a har ve bawk êm a ni. Ka chhuahpui a, thil te ka eipui ta a. Tlem chu a ei ve. Ka rin loh deuhin kantu kan nei ve deuh reng a, Rema te pawh an rawn lang ve deuh reng, Bsa te pawh mamawh kan nei em tih min zawt reng bawk a. Mite hi an va tha thin e aw. 

Karkhat zet Bawihteii chu a awm ta. Ka pi pawh kan tawngtai nasat avangin khi lamah damlo serious an nei lo hlauh a, min awmpui ve zel, bawihteii kan dah luh chamah chuan kan chhuah theih tur thu an sawi ta a. Amah Bawihteii pawh rin aiin a tha chak reuh a, pipe vuahsak pawh a ngai tawh lo. Tah pawh a tap khàt ta deuh. Nurse leh doctorte an felin an hawihhawm em em a, Christian Hospital Serkawn aia thawktu te felna hi a tam ka ring vak lo. Dam loh nan pawh a nuam ber ang. Damdawi min chawh nual a, bill pawh a sang ve deuh, cabina awm kan ni bawk nen. Ka pi chuan, "Tluanga, ka lo pe ang. Hei ka card hi la rawh" a ti a. 

"Khai, a ngai reng reng lo, Pathian zarah Bawihteii awm man tur na na na chu kan nei ve alawm. I hah tehlul nen" ka ti ve tlat a. Keiman ka pe ta. Ka puin min lo hruai a, Hlim takin Tawipui kan pan leh ta a. Kal lam nen chuan a inang ta lo deuh. Bawihteii pawh a nu nen an inchhaih nui iar iar reng mai. Hmuh an va nuam nufa tak. In kan thleng a, thenawm khawvengte an rawn lut sap sap a, Dam taka kan chhuak chu min lawmpui thu an sawi chamchi mai. Ka awm loh chhung khan dawr chu ka nuin a lo vil a, a lo ti ve thei mai. Ka chauh deuh avangin ka inbual zawhah ka muzal mai mai a. Sangkimi inbual zo a han inhruk vel lai chuan, "Nupa nun kan hman lohna a rei tawh e" ka ti sup a. Min rawn melh zawkin, "I chák ami?" A ti a. 

"Tunah chuan ka chau rih, naktuk atangin bung leh tan ang aw" ka tih chuan a nui ver ver a, "I zakthei lo eew" a'n ti ngawt a. Nupa karah hian zahna hi awm lo mah se, a pawi vak lo. Inzahtawnna te, inhriatthiam tawnna te erawh a dang leh daih tih in hre tho ang chu. Nupa tam tak inhamtawng lo kan tih mai, innghirngho reng te hi chîk chîk ila, an khumlaizawl nun atanga buaina chhuak a ni duh viau asin. Intih lawm tawn lohna khan kua a hreuh thûk zel a, lungawi lohah a tlak a. A nihna ang bawl bawla sawi chhuah an hreh ve bawk si hi thildang hmangin an lungawi lohna an tilang ta thin. Inhauhna te hi chu thil pangngai a ni. Sex hi a pawimawh ber lo kan han ti tak naa, nupa nunah erawh hmangaihna nen a pawimawh dan hi a inang rengin ka hria. Va hur vang lam a ni lo. Khumlaizawl nuna kan lungawi dun tlat chuan buaina thenkhat hi chu chinfel a harsa lem lo. Tu emawin nupa nun hmang thei lo tura ngaih, tawng huatthu suhah rualbanlo kan tih a han neiha kan ngaihsanzia atang hian sex hi a pawimawh hle tih a lang. Ka thianpa Bsa khan a sawi thin, a bialnu nen khan han inhmu thiam lo deuh thin mah se; an inthen hlen thei reng reng lo va, Bsa chuan, "Ngawi teh, Tluanga, sual a ni tih chu ka hre tho a, Rebeki nen hetia kan inthen theih lohna chhan hi maw sex kan hman dun vang ni berin ka hria, sex hian kan inzawmna a tinghet a, inbansan hi har kan ti ve ve tlat.." a ti thin. A dik thawkhat viau ang, chumi a nih avang erawh chuan sex hman hi a tha e ka tihna a ni lo a nia. Sangkimi nen pawh thianghlim takin kan inzui a, loh theih loh vanga kan inruk ve si avang khan Dan puitling kan tlin thei ta lo kha a nia. Hei tunah rih chuan nupa hlim tak leh inpawh tak kan la ni ve zel e.

A tukah dawr lamah ka kal ta a. Lei tur pawh a lo awm ta nual mai. Ka pu ten an neih thenkhat chu ka va la a, Dinmawia a lo fel thar thar ngei mai. Vengthar nuthlawi Teteii a lo leng a, kan titi hlut mai. Teteii hi nuthlawi ka'n ti tak naa, an tlan dun ve zuai ringawt a, an innei leh ta si lo, a hming chauhin a thlawi ti mai teh ang. 

"Dinmawi, nuthlawi zunah i uai dawn tlatin ka hria" tiin ka fiam a. A nui suk duh chauh. Teteii lah chuan, "Awii Zothantluang, nuthlawi zuna uai a na hi an ti teh cháwk a, ka zuna uai hi a na ve lo a niang, ka bialpa te hian min lo kawp leh nge nge zel" a ti láng làng a. 

"Aww..englo i tihpui duh lo a niang" ka ti uang zauh a. Ner sak chungin, "Nuthlawi kan nih avang hian duh duha sex hmanpui theih emaw hi min tia, a ni lo nasa aw. Tih tak takah chuan fa loh vanga thlawi lo an tam ee, rai lohna an ei a, chhungril nuthlawi siin virgin len hian an leng a" a ti leh ham ham a. A sawi dik ka ti ve tlat. Ni e, ka han fiamthu hlut naa, Teteii hi a fair an ti reuh tlat, a lo zuamawm fahran lo a ni maithei ni. Kan society-a nuthlawi kan endan hi chu thlak a ngai ve tawh hlein ka hria. Nuthlawi an ni tih kan han hriat hi chuan a hma pawha chhai ngam hleilo khan kan han zuam ve tháwr zel a, min lo duh loh leh, "Nuthlawi te te si" kan han ti leh kual a. Inchei deuh se, 'A chhang siam a hun a ni maw' kan tia, an tawp deuh leh, 'Thlawi tak avanga han intih tawp kher' kan ti bawk si. An dinhmun hi khawngaihthlak ve deuh a ni. Chutihrualin nuthlawi thenkhat, ka nuthlawi tawh tho tih changchawia nun tlachhia, easy leh rui ve thei tak tak, mi pasal kawo hreh lem lo an awm ve bawk a, heng mite hian an hmeichhiatpui an timualpho khawp mai. Mipa thenkhat ngaihtuahna tawi ho chuan khatiang mi an hmuh khan midang pawh ni ve mai turah an ngai thin. A tha lo khawp mai. 

Dawra ka let leh chuan Sangkimi leh bawihteii te an lo awm ve a. "Ngah nge i rawn chhuahpui, a hritlang ang e, a la damkawr bawk si" ka ti vat a.

"Tawm reng ka ning alawm.." A ti mai a. Esi'n Bawihteii chu a pawm a, a chhawnchhaih bawk. Bawihteii fel vena chu duh loh hi a nei vak lo, an la thei zel mai. Tei thleng hruk hul tum chuan a lo chelh nghet lo nge a thlauh darh ta chuai mai, a ring si, kan phu dáwrh hlawm mai. Kan chhar ta vat vat a, Sangkimi chuan thleng pahnih chu rawn lain bawihteii bulah a va kalpui a, a beng bulah thleng chu a vaw ta a, a bengchheng ngei mai. A chetdan chu mak ka ti deuh, hlauthawng zeta min rawn enin, "Tluang, bawihtei hi a phu ve miah lo mawle" a ti ta a. Ka man ta chiah. Ka tho vat a, a beng bulah plate chu ka va khawng ve chiam a, ka thawm siam vang ni loin a bula ka va kal vang zawkin muangchang hian min rawn en a, "Ri a hre lo" ka ti hul hak a, Sangkimi'n a hmui a hup nghal, kei pawh ka awmdan a danglam nghal vek. Esi te pawh chu an lo hlauthawng em em a. Bawihteii chu ka pawm a, a bengte chu ka'n ensak ringawt thin. Dik lo a awm si lo. A va mak dawn ve aw. Ka pi ka call a, thil awmdan chu ka hrilh a, "A khawsikpui effect a ni ngei ang. A la dam leh maithei asin. Naktukah zuk in checkup teh u" a rawn ti a. Hetah hian a ni fate chu an hmel a tha emaw tha lo emaw, fuke kim leh engmah dik lo awm lo va an lo piang lawmawm dan hi.. Bawihteii chuan ri a hriat tlat loh chuan engtin nge a tawng theih ang? Patling ka mangang leh ta. Zanah pawh kan hlim hleithei lo. A hmel ka han thlir thin, beng ngawng ni ringawt tur chuan ka phal hlawl lo. 

A tukah U muana te rualin kan kalpui ta nghal a. Serkawn bawk kan pan leh, amah enkawltu Doctor Lianmawii kan va hmu a. Thil awmdan kan han sawi chuan, "A khawsikpui kha a la na reuh êm a, chumi nghawng chu a nih ka va ring em. A beng chhung en phawt ila" a lo ti a .Bawihteii beng chu an ensak ta a. Rei deuh an en hnuah, Doctor chuan, "A pawi ka ti khawp mai. A beng dar a lo pawp a, han enkawl chi niin a lang tlat lo. Bengdar erawh a hman theih ka beisei" a ti ta mai a! Sangkimi a inhup nghal. 

"A nih ka pi, Ri a hre thei dawn si lo va, tawng lamah harsatna a nei ang em le?" Ka ti a. 

"Nia hei hi a pawimawh khawp mai. Nangmahni lamin enkawl dan in thiam leh thiam lohah a innghat ang. Bengdar hi a vuah hma chuan beiseina chu a la awm thei ang chu..mahse, in hriat tur chu bengdar hi hman nasat lutuk chuan beng chhung a khawih pawi ve thei a, a pawi ka ti khawp mai" a ti ta a. Beiseina a va chaurau ta ve le..Ka fanu hian, "Apa" tia min koh theih hun ka lo nghakhlel tawh asin le..

Rilru mang takin kan haw a. Sangkimi chuan, "Tluang, Bawihteii hi kan tawngtir ngei tur a ni. Ka phal lo, a damchhunga anu tia min ko lo tur hi" a ti a, a hnuk a ulh bawk. A kut humsakin. "Ni e, kan tawngtir ngei tur a ni. Lo thanglian se, a rang lamin beng dar kan vuah dawn nia" ka ti a. Pathian hi kan va mamawh zing bik tak êm. Zanah ka pite pawh an rawn thleng thla ve a, a beidawnpui ang zawngin tawngkam an nei duh lo. Tun laiah thiamna a sang tawh a, Bawihteii pawh engtin tin emaw enkawl dan a la awm maithei asin tihah ka innghat. 

Hun a liam a, Bawihteii pawh a thang lian ve zel a. Sangkimi nen kan nupa inkar pawh a nghet lehzualin, nupa nun pawh hlim takin kan hmang thei a. Bawihteii mal khalh rih deuh kan duh avangin indanna erawh a ei reng thung. Ka nu leh Bawihteii an inawm a, dawrah Sangkimi pawn min rawn pui ve thin. Hnute pek a ngai lo bawk a, ka nute pawh an inawm thei viau. A changin a pute hian an la chho thin bawk. Duat rawnna karah a rawn seilian chho dawn chu a nia..engtin tak a hringnun hmang ve ang maw. Bti a rawn lang leh ta tlat. Sangkimi awm ve lai a la ni zui. "Induhpa" a ti nghal tháwr a, Ka nui ringawt. Numbrr dang atang khan min lo be ngei a, ka chhang ta lem hlei lo kha a nia. Kan buai chho ta bawk nen. Eitur a chah a, a nghah chhung chuan, "I cher deuhin ka hria, mahse, i duhawm daih zawk" a rawn ti leh a. Sangkimi a meng no tawh vak lo. 

"Chutia mawni le" ka ti leh tawp a. Eitur a han ei chu, "In dawra chawlh hi chu a manhla thin mang e. A sial tlat, a nghaktupa lo chhe lo tel ve zel bawk nen" a ti ta zel a. Tunlaiah chutiang hmeichhia boruak ngam tak mai chu an tam tawhin a rinawm naa, Malsawmi ai pawn zakthei lo ka ti. 

Sangkimi insum zo ta lo chuan,"Boruak i ngam hah hah hle mai a. Mi pasal ngaihzawn i hrat zêk lo maw?" A ti ta hmiah mai.

Bti lah chu a thinrim duh miah lo, nui chung hian, "In pa ka fak chu i ngaithei vak na nge? Thikthu chhe lutuk hi chu phatsan an ni duh cháwk a nia. Hotéah in pa hi i chán daih mai ang" a ti a. 

"Duhtawk r'u, Bt, nang pawh i awmdan hi tha ka ti lo. Rawn chawl tawh lo la a tha ang.." Ka va ti ta a. A tûm ta hmak mai. Esi te pawn an rel zui sap sap, zaktheilo ve êm a ni. Zanah kan nupa kan la innghirngho phah zui. Sangkimi chuan, "Khati em ema a ngam danah che khan ka hriat lohin i lo be thin a niang" a ti tlat si. Ka phone te chu ka'n entir a, a ringhlel tlat. "Hmeichhiain khatin mipa kan ti hmasa ngawt lo vang" a ti deuh hmak a. "I hre lo nih kha, hmeichhia hi in zak tawh lo, in duhnaah chuan pawisak in nei bik lo" ka'n ti ngial a. 

"I lerhkawh vang a nih hi Bawihteii pawh a dam loh..faten an tuar zel an tih kha" a tih chuan ka thin a khei ta deuh a, "A lo nih mai mai tak chu a..i ngaih ngaih khan ngai teh. " ka ti ve ta hmak a. Lehlam ka hawisan ta bawk. Engmah chu a sawi zui tawh chuang lo. Mahse, zingah pawh chuan a la lungawi lo tih ka hrethiam. Ka nute erawh pangngai takin a be vek tho a. Dawra ka kal tur chu, "I lo chhoh pahin Tei kawr i pek tur kha lo keng la aw" ka ti a. 

."ka rawn kal dawn awzawng lo, i lerhna ka dal a, a buaithlak, ka hnawk" a ti duah a. Ka nui hawk ,"I va á thin tak e aw. Lo chho rawh aw" tiin ka chhohsan a. Mahse, nilengin a rawn chho ta lo. Ka zuk call buai duh ta lo va. Bti vang vek a ni. Ka hawnah pawh Bawihteii a lo mutpui a, min lo ngaihsak thak lo. Nidangah chuan pindanah min zui lutin ka kawr a hlip a, ka inbual zawhah ka hak tur a lo dahsa diam thin. 

"I va titau rei tawh" ka ti nghut a. 

A ngawi reng. Bawihteii muhi lai chu ka chuk zauh a. "I tiharh anga sin.." A lo ti hlar. Ka inbualsan ta daih. Ka kawr pawh keimah ka inzawn a, min ngaihven nge ngaihven lo tih hriat nan kawr tawngchham zet, mar tung leh boxer ka ha a. Ka vei thuak thuak reng mai. A hmu thei ta ngang lo nge, "Zothantluang, va inthlak rawh. I thing lutuk" a ti ta hlak hlak a. Ka khi suk. 

."eng nge ka hak ang" pangchang deuhin ka ti a. 

Tûm bûrin a rawn tho a, ka kawr leh kekawr hak tur chu a va la chhuak ta a. Lungawi takin ka ha a, a kal leh tur chu pawt letin ka kuah thawk a, a tal nasa ngang mai. A duh lo chung chung ka fawp a, "Tihtauh pawn rei deuh tihtauh loh tur, hriselna atan pawh a tha lo. Chuan, hmeichhe dang hi chu thik tawh lo hram teh..ka phatsan dawn lo che. Eng harsatna pawh awm se ka then ngai lo vang che" ka ti nghet charh charh a. A ngawi reng naa a lung chu a awi zui ve ta a niang, Zanah bawihteii hruaiin a pite inah kan han leng a , a nuih ve tak awr awr kha. Pi Rengi pawh a lo haw tawh a, a pasal ve angreng deuh nen an khawsa a ni. 

Dar 9 velah kan haw thla a, U Mamawia te in leh U chhuana te in inkar thim lai kan tlan lai chuan Far thing bula a hmai thisen hlira khat hian Peka a lo ding reng mai le..Sangkimi a rak thawt a, ka balance a buai ta, sangkimi lo che nasa ve bawk si chu hreh zetin kan tlu ta a..bawihteii tap bawk..mahse, na engmah kan nei lo. Khur ru dar darin bike chu ka tung ding a, Peka chu a lo awm tawh lo. Sangkimi hlau lutuk chu a dáng vek thei mawle..

Zana kan mut hnu thlengin a la khur thei a. Ka khawngaih hle , a rápawm ve êm bawk a ni. Kan hmu rei lo hlauh zawk a. A thih dan khati kha a ni si a. A thlate pawh hráng se..a mak vak lo vang. Zan laia a rum tiah tiah reng avangin ka sawi harh a, phàwk zeta rawn mengin min rawn kuah nghal vat. 

."Peka'n min rehhlum a lo tum a" a ti ta a. Mumang ram thleng pawha a la tibuai chu Peka ka huatna a sosang leh ta..