Rinsangkimi 14

RINSANGKIMI (14)

Ziaktu: Toni Râlte

A tukah kan dawr hnuai bathroom pawh chu U valpuia chuan a peihfel ve ta a. A lawmawm khawp mai. Mahse, insensona tur a la awm nual dawn. Àwngphah te, bed sheet leh rizai te pawh la tih loh vek a ni. Ka nuin, "Mama, i ti lutuk deuh a ni. Inneih zawh lamah ti tawh mai rawh. Kan insêng nasa dawn mah mah tlat" a tih takah chuan kei pawh chuan ka dah ta rih. Dawrah kan tluang hlauh a, nitina sum lut hi Sang nga atanga sang riat te a ni ve thin. Bakah kan hlawh lehzualna chu Police out post tur sakna lama hnathawkte'n order an rawn siam thin a, nitin kan han pek takah chuan kar tawpah a tlingkhawm chu a lo tam ve tawh thin a, hei hian min tiziaawm khawp mai. Hotel siamte hian thingpui dawr an siam tel tho naa, ka hawn ve atang chuan an bansan ta deuhin ka hria. Ka dawrah chaw ei lo tur chu an rawn kal zel tawh sia, Hotel lam pawn min ngei ru viau maithei a ni. Nge mawle mahni tana chakai khawrh theuh theuh. Tlaia ka inbual laiin ka u chu tu emaw nen an inbia a, Rema a nih ka ring, a thinrim viau mai a, a tawng pawh a vin hlar mai. "Ka in tawh lovang i ti a ni lawm ni? I va tenawm ve a" a tih takah chuan Rema a ni tih ka chiang ngam ta.Ka va chhuah hnuah pawh kei pawh chu min zah zo loin a áng hlak hlak reng a, a tawpah phei chuan, "Min lo be tawh suh. Zu ka huatzia i hrereng a, i in lui lehzel a. Inthen mai ang, ka peih tawh lo" a ti ta hmak mai le. A dah hmak bawk. Ka inthlak zawh velah ka phone a rawn ri ta , Rema a ni. Ka khi suk a. Ka la vat a, "Thianpa, i u khan min rawn then ringawt a nia" a ti a. 

"Ngati nge?" Ka ti khawmawi a. 

"Englo a ni, kei pawh ka thiam lo ve bawk a, zu ka in leh a, a hre leh sia..a hrehawm. Lo sawi ve teh, ka then dawn reng reng lo a nia" a rawn ti a. 

"In tawh loh tum la, ka u hian zu hi a haw ve êm a ni, ka nu leh pate inthen chhan pakhat kha a ni ve bawk nen" ka ti duah a. 

Thaw hawkin, "Ka hria alawm, zu a huatzia chu..nia in tawh loh ka tum a, ka dry reng alawm, mahse, ka cousin a rawn zin a, a in reng sia, ka ti ve leh ta mai mawle, a zia lo tak tak a ni. Lo sawi hram rawh aw. I u hi chu Azuali (pastor fanu carin a suthlum tak a bialnu kha) avanga ka natna min la chhawk thei bertu a nia. A danglam bik, nupui atan pawh ka duh asin" a ti a. 

"Nia, ka lo sawipui ang, lungngai lo la..chuan inneih kha i rawn kal loh chuan ka lungawi lo viau ang aw" ka ti a. 

"Inneih hmain ka lo zin ang, in buai ve dawn sia, bakah i u ka ngai tawh" a ti sup a. Ka nui ringawt. Ka u hi ka u a nih vang hian han fak vak hi ka hreh ve deuh a, Late ti hian an ko mai zel a. 5'3ft vel a ni maithei, sa nghet lam, khal ve tawk tak a ni a. A hrisel vak loh nen hian a chawrche lem lo, a ngo a, hmelah ka nu a chhun viau bawk. Hmeltha fai vang kan tih ang kha a ni. A lerh lo chi tih takah make up hi a uar lem lo va, thawmhnaw lamah erawh a mit a lerh ve hle a, a thawmhnaw hak hi a inhmeh thlarh zel. Rema'n a lo duh ve viau pawh hi a mak lem lo. A nungchang hi chu sawisel bo tawp chu a ni bik lo naa, kan khuaah chuan nungchang thaa sawi a ni ve thin. Ka nu hian a zilh nasa bawk a. Zuk leh hmuam pawh engmah a ti lo a ni. Zanriah eikham ka nu ka pute ina a chhoh lawk hlan chuan ka sawi ta a, a teu hlar mai. "Ka hrilh reng a, a in leh kher a nih kha" a ti a. 

"Aw..chutin a nghei hmak theih bik hleinem, a khàt tawka an lo in ve zeuhte chu enliam chinte pawh neih ve a ngai..amah pawn hrehawm a tih êm kha.." Ka ti ve a. A ngawi reng. An inthen hlen hi chu ka ring hran lo. 

Ka suit tur te leh mamawh lamin ka zu Lunglei leh a, Valtea suit hak tur pawh ka hawh fel ta bawk. Inneih hi a hautak êm mai, tihnawn fó chi pawh a ni lo a nih hi..ka ngaihtuah phak loh lah hi hmeichhe lam hian an lo hre thei phian zel a, papuia te leh Niteii ten eng emaw zatin min rawn tanpui thei hlauh a, a lawmawm tak tak a ni. Sumo atanga bungrua kan hlanthlak laiin Nu Rami a rawn lang hlawl mai a. Zu a nghei ve deuh nge a thau bakah a hmel pawh a zia ta viau. Ka dawr chu a han thlir vel a, thinrim em em hian, "Mi rilru chheho, ka in hi dawr atan te in lo hmang vel a maw? Tenawm lutuk. A rang thei ang berin in la chhuak ang che" a ti ta bawrh bawrh a. Ka la buai deuh avangin ka chhang hman lo. Chutah dawrah chuan lutin dawhkan a nam thlu ta thuai a, Esi a rak nghal tuar bawk. Ka va tlan lut vat a, choka lam a pan mek..ka va chelh a, "Eng nge i tih a?" Ka ti hlur a. 

"He in hi ka phalna tel loin dawr atan i lo hmang a maw? I va zak theilo ngai ve a" a ti leh hmuar hmuar a. 

Ka rum nghut, "Awm mai mai teh" ka ti ringawt a. 

"Ka duh lo reng reng, court-ah ka khing dawn che u, in sumdawnna atan ka in hi ka phal lo" a ti leh hlawih hlawih. Esi'n a pa a va ko nge , patea a rawn lut a. "Rami, eng thil nge i tih leh tak? Buaina hi rawn siam reng suh" a ti nghut nghut a. 

"I zak em? Ka in hi engvanga luah nge an nih sawi rawh, ka fapa i awmpui avang khan thu i nei ta tihna a ni lo a nia" a ti leh ta hrep mai. Patea chuan, "A nih nangin thuneihna i nei em?" Ti êl lek lek hian a ti a. 

"Engvangin nge ka neih loh ang a? Ka pasal in chu ka in alawm..a boral tawh a, ka ta a ni mai. Bena hmingin awm mah se, a nu ka nih angin thuneihna chu ka ta vek a ni" a ti leh piap piap a. 

Patea a nui hawk hawk mai. "Ka pasal a?! Ka u kha i pasal hlui nge i pasal? A sawite hi a zah pawh i zak zawk lo em mawni le..i pasal mitmu êm pawh a la keh hmain pasal i nei a, i bungrua nen Thingfalah in phei daih tawh kha. Chuvang chuan he inah hian thuneihna chhetemah i nei tawh lo ve. Rawn kal pawh rawn kal tawh suh. Khaw nge i pasal hi a awm reng reng a?" A ti ta hmiah hmiah a. 

Nu Rami pawh a dang titih. Tawng tuma a an zuau laiin a pasal a rawn lut a, "Ramlian, rawn kal rawh..haw ang. Eng nge hetah i tih a?" A rawn ti a, a pawr angreng fû bawk. Nu Rami chu kaiin a chhuahpui ta a, kan thaw huai hlawm mai. Tikhan a rawn hawn apiangin buaina a siam fo dawn chu a nia. Thingfalah awm reng se a tha ang. A hneawm tlat. A fanu Mami kha Singapore-ah a kal ve ta daih a, a tan chuan a tha zawk daih. Fate pawh hmangaih zo lo va pasal thlang zawk nute hi ka dem, dem tak ka ni. Nu hmangaihna a thûk bik tih zingah an tel ve lo a niang. 

Zana Sangkimi te ina ka han chhoh chuan Sawmpuia an lo zilhhau nasa mai a, nuam ka va ti lo tak. Pa Ruatpuia chuan, "Tluanga, Kan Malsawmpuia han laktlak lohzia hi aw..sáwn ka thlak e a lo tih chu, chuta karah ka nei duh lo e ek e bal e a la ti zui a..zahpuiawm tak a ni" a lo ti duam duam a. Sawi ve tur váng ka ti hle. 

Doctori chuan, "Malsawmpui, hre rawh. I nei ang. I nei chiang khawp ang. I nauin pasal a neih dawn avangin kuminah erawh in innei thei lo ang a, nakkumah kum tirah i nei ang. Kan zilh ngai lo che pawh a ni lo va, Insumtheihna reng reng nei lo mai. I pa i chhun loh dan hi" a ti hlaih hlaih a. 

Sawmpuia erawh chuan, "Naa..nu, ka nei duh lo ee. Nupui ka nei duh rih lo. La tlangval ka duh, duh leh naute chu kan la ang a, kan enkawl mai dawn alawm" a ti a. A ngui nghiai mai. 

."A teuh lo mai. Mi fanu nun i tichhe dawn tihna a nia sin. Bakah nau a lo piang ang a, pa nei reng si, pa nei lo anga awmtir kha ka duh lo reng reng" a nu chuan a ti hmiah. 

Sawmpuia a pindana a luh tak daih avangin an sawi zui tawh lo. "I pa Rina makpain sanghal a kap a niawm a, kan zu leng ve ang e" tiin an nupa chuan an chhuak ta daih bawk. Sangkimi bulah, "Tu nge a sawn thlakna chu ni reng reng a?" Ka tih chuan, "Ka hre ve chiah lo nain a sawi hmangah inngaizawng pawh an ni lo a niang, hei flirt ang mai mai kha. Chuvang a nia neih a hreh em em" a ti a.

"Nau a piang ang a, a duh ve maithei asin" ka ti ta ringawt. 

"Enteh, Tluang, khawih lawk teh he lai hi" tiin a nghawng chu min khawihtir a, dinglamah bàwk kal relh relh a awm. A lian hran lo thung. "A na em?" Ka tih chuan, "Na ve deuh e. Anu erawh ka la hrilh lo" a ti a. 

"A nat chuan a ngaihthatthlak chu, tonsil te a ni thei zawk ang em?" Ka ti a. "Ka hre lo le, ni ve maithei..mahse, báwk hrim hrim hi chu ka hlauthawng vek tawh a" a ti a. Ka hrethiam hle. 

"Entir hrim hrim chu a ngai a nih kha..ka kalpui dawn che nia" ka ti a. Ka biangah rawn chuk zauhin, "Inneih zanah khan ka period tût maithei a nia aw. Ka chhut hian ka p8 lai vel a nia" a ti sap a. 

"Inneih zanah hian mutdun kher kher tur tihna pawh a ni hleinem..ka nghak thei alawm. I p8 zawh veleh kan ti ang a, i rai nghal ang a" ka ti zawt zawt a. Ner sak chungin, "Chhe siah, fa neih thuai thuai ka la duh rih lo. Kum chanve chhung chu chimbuaitu awm lo va awmdun ka duh rih. Bakah p8 zawh hi rai hun a ni hleinem, kei chu ka menstrual cycle chu ni 14-16 vel hi a nia.." A ti a. Ka bo êm avangin ka zawt zui tawh lo. 

Inneih a hnai tual tual a, ka zám telh telh lehnghal. Sangkimi te pawh an inlei nasa tan ta viau a, A rawn chhawm nghek ang tih ka hlau deuh. Ka pindan a zau over si lo va, amah chu ka hrilh tawh tho a, Amah paw'n, "Apa ngaihdan chiah a ni. Chhawm teuh ka tum lem lo. " a ti ve tho. Keini lam pawn lei ngai ang chi chu ka nu te zuk bazarin an rawn lei kim thawkhat viau. Sangkimi chuan a hrawk bawk a tih kha a sawi leh ta lo va, ka zawh leh chuan " Damdawi ka ei a, a na tawh lo.." A ti ringawt. A chungah hian engmah thleng tawh lo se ka duh takzet a ni. Ka u leh Rema te pawh an tha leh tawh a, Rema pawh a fel chho viau a niawm e. A lawmawm ka ti. Inneih hma kar khat la awmah a rawn zin ta a, ka lawm takzet a ni. Ka u hmel hmuh pawh a nuam leh tan ta. Sawi an kai ang tih erawh ka hlau ru deuh. Sangkimi nu unaute ho pawh an rawn thleng tan a, Min hmuh hmasak bernaah chuan, "Mateii mipa duhzawng tak i ni chiah a nih hi, i figure zawng zawngte " an han ti a. A zahthlak rualin a lawmawm duh viau. A putea te fanu á phiang phuang hian min nel khawp mai a. Mi si reng mai. A la naupan aiin a lian a, mahse, â tak a ni. Pawnfen te, kawrfualte a hah duh thak lo va, Mipa inchei lo chuan a inchei ngai lo. Sangkimi'n, "Piteii nulat lai a chhun a nih hi, Piteii hi a nulat lai chuan a pa lutuk a, patil erawh a ni lo" a tih chuan mak ka ti vak lo. Tunah pawh Pa Ruatpuia nî fanu, Sangkimi putea nupui Pi Nupuii chu a la nu hnêp chuang miah lo, a hmel erawh a chhe lo viau thung. An chhungkua an inkawmngeih leh an titi sap sap thin chu hmuhnawm ti takin ka lo thlir ve thin. Sangkimi pi leh pute pawh kum upa tawh mah nise, an rawn tel thei hram a. Keima lamah pawh Niteii te chhungkua an rawn thleng a, Patea te inah an innghat thung. 

Kan palaiten man an han hlan a, Man hlan tlaiah Sangkimi pain vawk a talh a, khaw pum deuhthawin an ei a ni. An tiropui khawp mai. A tuk chu inneih a ni ta a, Ka zung sek reng tawh. Ka zám a ni. Ka phur tho bawk si. Papuia te pawh an rawn thleng ve a, kan inah an innghat thung. Khua a rawn var a, ka harh hma ngang mai. Ka harh ruala ka rilrua rawn lang chu, "Sangkimi ka nupui a ni dawn" tih a ni. Harsatna tam tak kara kan invawn rengna, kan rinawm tawnna chuan rah duhawm tak a rawn nei ve dawn ta e. Pathian hi chu a tha teh e maw..

Chawhma dar 11-ah inneih hun tan tur a ni a. Min chei tu tur Nancy pawh a rawn kal ta. Mipa hi chu chei kan ngai ve tehchiam lo va, Valtea erawh a vun rawng a tak ve deuh avangin engtin tin emaw a sawngbawl ve tak kha..Kan Kohhran Sunday School Hall-ah Mo nghakin kan thu ta ran a, Dantê mahnise; Dan puitlung aiin a behbawm vel chu a ropui zawk mah awm e. Rinsangkimi chu a pain a rawn kai lut ta a. A va nalh tak êm. Lo melh reng kha a mawi si lo, ka en ning hleithei lo a ni e. A lo sawi tawh ang ngeiin, "Veil hi chu virgin khim tur a ni a, ka khim lovang" a tih angin a luah veil a awm lo va. A sam chu bàwkin a chalsam erawh a tla hniang a. A kawr pawh simple tak a ni. Kan Bialtu Pastor Rev. Lalchhanchhuaha'n hunserh chu hmangin inneih thutiam min chhamtir a. Sangkimi aw chu ka bengah a va mawi tehlul êm..Zungbun kan inbuntir dawn laiin kan che chhe ta tlat. Valtea khan a lo ak mai tura ka ngaih laiin ani a lo ak reng reng lo chu niin, a han indap thin. A kawr leh kekawr ipte zawng zawng a lepse vek hnuah pawh a hmu ta si lo. Pastor chu a va bekbawr sur sur a, Hall kawta awm Romawia te chu a va hui lauh lauh a, a hrilh ru sur sur mai. Romawia chu a tlan thla ta nal nal a, kan in leh Biak in hi a inhlat lem lo va, thaw hluam hluam chungin a rawn tlan chho leh a. Zungbun chu a rawn lek ta va va..ka buntir thei ta. Boruak uap churh pawh chu kan chetchhiatna chuan a ti dai ta deuh a. A hlimawm thin e. Kan han bang a, shooting nei turin khaw hlui lam kan pan leh nghal. Kei lah hi thlalak vela in pose thiam lo lutuk ka ni si a, min nuih min nuih mai. Ka hah , ka chau. Kan chhuk thla, motora ka lut chiah chu ka beng bulah, "Ka p8 lo" a rawn ti sep a. A nui deuh bawk, va melh zawkin, "Ka chau..zanin chu skip mai ang" ka ti a. 

"Ka chau feee" a lo ti a. Awmdun reng e ti loin kut kan invawnsak reng mai. Thenkhat tan chuan kan over ve ngawtin ka ring. Mo lawmna a hranin kan nei lem lo. Dawrah ruai tur chu fatu ten an buaipui a. Inkhawmte kha kan michhiat tehlul nen an thahnem a, min lawmpuitu khati zozai kalkhawm khan ka hnukte pawh a tiulh lek lek hial alawm le. Tichuan, tlai lamah mo chu an han hruai ta a, Lawichal atana kan hman hi Pu Hrangkima , pa phawk zet a ni a. Sangkimi chu melh run runin, "Ani hi engtin nge i koh dawn?" Tiin ka nu a kawk a. 

."Nu ka ti ang" Sangkimi'n a ti sap a. Ka u a kawk leh, "Û a ni leh mai" Sangkimi'n a ti leh. Keimah min rawn kawk a, "Zothantluang ka ti ang" a tih chuan kan nui ham ham mai. "Khai leh, Mo neitu khan mo hi i puah luh a ngai tlat mai" a tih chuan ka va kal hnai a, Sangkimi chu ka paw lut ta a. A zàng dirh derh hle. Rinsangkimi chu Pathian leh Kohhran hriatpuiin ka nupui a ni ta. Kei aia hlim hi an awm thei ngai dawn em ni? A behbawm velte chu sawi kilh kelh lo mai ila..

Mut hun a rawn thleng ta, Nungi leh Valtea te nupain min phahsak khumah chuan kan thu dun ran a. Kan inbual zo chiah a ni. A lum nàmen si lo va e. Kan inru tawh naa inneih tak tak zanah meuh chuan a lo zàm theih ve riau a ni. Cream a inhnawih mial mial a, "I lai tiraw?" Min hnungchhwn zawng hian a ti a. Ka chil ka lo lem khawlh, "I lai ve tho" ka'n ti ngawt a. A nui har har a, "Zanin chu skip tak tak ang aw" tiin min rawn melh a. Chhuna ka chauh nen tunah chuan ka inbual bawk nen,ka harh leh vák tawh si. "ngai lo" ka ti teh tawp a. 

"Ka ke te hi a kham ut ut asin" a ti a. 

"A rei lo vang" tih leh ka lama pawh hnaih ka rual a, ka fawp ta mial mial..nia, inneih zante hi awm ve tak mai hi a nia. Zing dar 1 vela a va zung zo chu, "Zan 3 i nghei ang" a ti sap. Ka lo khi suk ringawt. 

Sangkimi nen chuan khawvel kan hmachhawn dun chho ta a. A à lo bawk a, ka chhungkua bakah ka nite leh patea te ho te chu a kawm thiamin a dah pawimawh thiam em em a, a la naupan nen mak ka ti ru zawk thin. Ka nu chu, "Ka nu tia koh hi chu a mi hrang ka ti..Nu ka ti ang che" a ti leh hmiah. Ka u te chu a ko mawlh mawlh reng a, kei aiin a u zawk ni mai awm a ni. Ka nute pawn an duat reng bawk a. Kar khat kan han chenho meuh chuan Sangkimi thatna leh duhawmna ka hmu tam tulh tulh mai. A chhung ten an duat em vangin in chhung sekrek khawihte hi a tih peih vaka ka rin loh nen, ka u a awl hneh kher mai. Eirawngbawl erawh ka nu hian a khawngaih nge ni, "Ka la dam ve têk têk chhung hi chuan keiman eirawng hi chu bawl ka tum" a ti mai zel a. Han puih ve láwp láwp chang erawh an nei. Zingkarah in leh a vel zawng zawng a tifai vek a, tukthuan eikhamah dawrah kan phei a, Esi a pui nileng ve zak zel. A hriselnain a tawrh ka hlau deuh thin naa, pasal neih a ngeih nge ni a thau ve hmàn mai a. Mite pawn, "Pasal neih i ngeih a nih hi, i tha suah mai" an ti thin rêng a ni. 

Sunday tlaiah a nu leh pate inah chaw kan han ei a. Bawngsa ruhkawl an lo chhum teuh a, Sangkimi han nghalzia chu aw.. Sa tuiháng chu bawl-a min suahsakin, a chhungte awm lai lai chuan, "Kha i mamawh lutuk, hawp zo vek ang che. Chhunah nen zanah nen i thawkrim si" a'n tia nih kha. Rum zetin ka melh a, Ka pi a lo nui awr awr bawk. Ka pu pawh a khi ve suk suk mai. 

"Mi melh rum vak suh, i mamawhte chu ka hria alawm..i rihna pawh a tlahniam tlat, kha sati hi ei teh" tih leh min suah a rual lehnghal. Min va tizak thiam reuh tak, thinrim chi a ni mang si lo. Amah lah chu a nui duh thak lo lehnghal. Ka pi chuan, "Fa te hi engtik vela neih ve nge in rilruk deuh!" a ti a. 

Ka sawi hma hmain, a fanu chuan, "A tir kha chuan neih rih loh kha ka duh a, tunah chuan nau pai ka chak leh tawh. Ka nu khu a khua a har thin sia, a khawngaihthlak, ina a lo awm ve atan neih ka duh" a ti leh zung zung a. Ka pu chuan, "Chutin duh hun hunah nau a pai ngawt theih loh. Pathian thu thu a ni" a lo ti ve a. 

Sawmpuia'n, "A nih mate, nau pai ta la i neih hunah hetah mi i neih ang!" A tih chuan, "Ka duh teuh lo mai. Nurse hoin an hmuh ka duh lo, kan inhre tha sia, ka zak" a ti a. A va buaithlak thin e aw. Kan haw thlak lamah, "I nghalzia kha aw. " ka ti a. 

.

"Ho tuk..dawt ka sawi pawh a ni lo va" a la tizui!

Chutiang chuan thla khat zet chu nupa kan lo ni ve ta reng mai. A sarhu lai a la nih vang nge kan inngaiin kan inthlahlel em em reng a, kan awmdun tawh chuan tudang kan ngai tawh ngai lo. Thiante pawh ka lakah an vui hial, "Nupui i nei a, i inla patling nghal em em a..mi pawh i kawm hman tawh lo" tiin..ka nupui ang hi nei ve se ka awmdan ang tho hian an awm ka ring. Bakah Sangkimi hian min veng ru ve deuh a, zu ka in leh a hlau em em tih ka hria. Mihring chu tlu thei, pelhe thei kan nihnaah thiantha te bula ka tlata ka chettlat ve reng chuan zu in mi an ni si a, hnar reng harsa tih chin ka la neihte pawh ka hlau ve tho bawk a. Bakah dawrah hian kan buai ve êm a ni. Ka sawi hmaih hauh loh tur chu dawr hnuai kha kan peihfel tawh a, khang awngphah leh rizai vel leina tur kha Sangkimi puin min pe hlauh mai a! ,"Ka tunu duat pasal neih ka lawmpui vena che u a ni mai" a ti miau si. Mahse, a hnua ka hriat leh danin Sangkimi hian a lo sawi thawi deuh a niawm e. Nuam lo ka ti lutuk a, a tirah phei chuan..pek let leh hial ka tum. Nupui chhungte purbuai hmuhin min hmuh ka hlau a ni. Mahse, sangkimi'n, "Amah ka puin, 'Eizawnna mumal tak in nei lo ve ve si a, dawr ringawt khu chu a hlawkna a tam vak dawn si lo va, a hnuai riah theiha in siam chuan a sum hráwm pawh a na deuh ang a, in nupa tan liau liau in mamawh chu ka tum ve ang. Pawisa hmanna tur hi keini ang putar hi chuan kan nei vak tawh lo" a tia lawm. Chuvang chuan pek let hi a ngai reng reng lo" tiin min khap tlat si a. Chutiang na na na chu tiin ka pawm ta hram a. Riahna pawh chu kan peih fel ta vek a ni. Kan hawn fel atanga kar khat chhung chu dawrtu kan hmu mai lo va, mahse, a hnu lamah erawh kan hmu chho ve ta nawlh nawlh mai. sumdawng te, Motor chhiat vanga tangkhang te, Siaha lama kal tur te ho an ni ber. Ka pu sum zatve ka la bat pawh ka rul zo thei ta bawk a, tunah chuan ka dawr hlawkna pawh ka tel ve thei tan ta dawn e. 

Thla hnih zen zawn kan inneih hnuah zan khat chu, "Tluang, fa neih ka chàk tawh" a ti thut mai a. Nia, mak ve deuh chu inneih hma chuan chutiang khatiang chuan kan ti phawt ang tiin duhthu kan han sàm a. Kan innei chiah a, Rilruah fa a rawn lang nghal hmiah zel. Pathianin chi thlah turin min ti bawk nen. 

."Kei pawn ka duh alawm..indanna kha ei tawh lo la" ka ti a. 

"ka ei lohna a rei tawh. " a lo ti. 

."kan thawhrim deuh a ngai dawn a nih chu" ka ti a. 

"Style dang vel kha ka peih lo a nia" a ti vat a. Ka nuih a za hle. Ka uang chak tlat a, "Aww..nupa kan ni tawh a, style ngai hlir chu a ninawm ve lawm.." Ka ti a. 

."Zothantluang, hur suh" a ti hlar a.

Kan inneih atanga thla lina kan chuankai hma chiah tlaiah a inbual zo chu "Tluang, lo kal teh, vat" tiin ka inchhut buai lai chu min rawn ko a. A pawimawh hmel deuh avangin ka va lut ve mai a. Khum chu kawkin, "En la" a ti a. Pregnancy test kit a lo nia. Rin sen pahnih a lo inrin kalh mai le. A awmzia chu ka nupui a rai! Towel-a a la intuam chung chuan ka va pawm lawk a, ka virpui ta chiam a. "A mak. Naupangchhia viau suh" a ti a. Mahse, a lawm ve takzet tih ka hria. Zanriah ei laiin ka nute bulah kan sawi a, ka nu hmel hmuh a nuamin ka u pawh chuan, "Awii ka va'n lawm, in fa hmasa ber hi chu ka ta a ni dawn sa" a ti a. Zanriah eikhamah ka nuin lawmthu sawi tawngtaina a nei nghal bawk. Ka pi leh pute pawh kan han hrilh ve a, a zan azanin an rawn leng thla a, kan hlim tlang a ni e. Sawmpuia fa kha chu a pian a hun tep tawh a, mahse, Sawmpuia hian neih a hreh ngang rih sia, bakah Sangkimi a chhuak bawk nen, kum khata lut leh chhuak chu a tha lo an tih avangin kum thar kha an nghak hrim hrim kha a nia. Kan fa chuan duat rawn a hlawh khawp ang le..

Zantin mut dawnin a dul ka tehsak ziah a, a ning thin. Chuvang chuan kar tawpah zel ka tehsak ta thin a. A len belh ve zel a, a raino pawh a rawn tuar tan ve ta. Ekhai! Thiante u, Rinsangkimi raino han tawrhhlelhawmzia chu e.. Mipa zaidam ve tawk tak ni lo ila chuan tawrh theih loh chang ka ngah ang. Amah pawn hrehawm a ti a, a tap tawp zel. A tirah chuan a luakchhuak leh thei a ei chak kha a ni mai a. A hnuah chaw rim a tithei lo va, a nghei tawp zel mai a ni. Mahse, Noodles leh thil dang hmangin a inhnawhpuar thin a. Chaw a ei ve theih hnuah a ei chàk zawng a maksak thei si, Chengkawl a chak huam huam a, kan khuaah zuar mai awm hek lo, Lunglei ami kan chah a, Buarpui chempai a ti leh, Chhim lamah a awm ve si lo, Aizawl atangin an rawn thawn a. Uchang bawp a ti thul, Valtea nen kan zu vehsak..Theitê rah a hun tawh loh laiin Theitê chákin a za ruai a, mang a va tiang tak. "Va lei rawh, i lei loh chuan ka haw ang" a ti thul, theitê khawiahmah lei tur a awm si lo. Heng a chák hi chu a zia zia a la awm. Vanduaithlak zetin kan thenawm pa , rawn leng peih ve deuh Pa Sanga chu ngei namên loin a ngei leh a, a hmel a hmuh rualin hmunphiah a chuh nghal rap a ni mai. Pa Sanga pawh chuan a hrethiam a, a rawn dîkdàk duh ta lo. Tawngkam eng emaw hleka tihte hi a la na riau zel a, kan nuihpui mai mai pawh lo huat tlat te a ching thin. Zan khat ka chau ve deuh, ka mu hma chu a rawn lut a. A hmelhmaiah a tau tih ka hrereng, a chhan pawh chhunah dawra ka awm laiin, "Lo haw lawk teh" a rawn ti a. Kan buai rih em vangin ka haw lo va. Chung vel chu a ni. A zawng zawngin ka ngaihsak thei bik si lo a. A thu tau chawrh a, mu ta mai lo chuan a thu ngawi reng a, chhuat lam a melh ran bawk. "Lo mu la. Duatpui" tiin ka va pawt a, ka kut a thing per lawp, "Min ngaihsak dawn lohte chuan ti nge min neih?" A ti nghat a.

"Ka theihtawp chu ka chhuah ve alawm" ka ti a.

"I chhuah lo, chhunah pawh mikhual nula thlir i duh vangin i rawn haw lo" a ti a. Ka nui ringawt. A án hi chuan ngawi reng ila a ináng zo ve mai zel. Mahse, ka rin loh deuhin a hnu deuhah chuan a tap ta mai a. Ka tho vat, "Ka tihpalh a ni. Kan buai êm a, vawiin kha chu.." Ka ti a. A tap zo chu rawn hawiin, "A ni lo, keimah hi ka inhua a, ti nge ka sual em em le..ka duh vang a ni lo asin. Ka inthunun thei thin lo a ni." A ti ta a. Ka kuah vat, a lu-ah chulin, "A reh têp ang, tiangte chu hmeichhe dang chungah pawh a thleng ve thin alawm.." Ka ti mawlh mawlh a. 

"Ka insiamtha ang, tlaiah pawh ka nu ka vin a, hrehawm ka ti lutuk. Ngaihdam min dilsak rawh aw" a ti hliam hliam a. Amah hian hrehawm a ti leh zel si, inthunun hi a harsa viau a ni ngei ang le..a tuk atang chuan a zia ta viau mai. Zanah a nute inah kan han leng chho a, A awmdante chu a nu bulah a sawi a. Ka pi chuan, "Ka raino lai ang chiah a nih chu, kei phei chuan i pa hi ka hmel huat asin. Ka haw lutuk kha tlawh hrepte ka chak thin. Mahse, Bawihte, a inthunun theih, raino tih vanga ngaihzam mai mai loh tur. Khatianga i thin a rawn thawh leh dawn veleh khan , 'Ka insum thei' ti rilru chungin harsa tak pawn hmachhawn la, a rei ang a, i zia sawt sawt mai ang. Tluanga tan pawh a hrehawm lutuk ang a sin" a lo ti keuh keuh a. Sangkimi pawh a bu nghat nghat mai. 

Ka pu chuan a aw then kharh pahin, "Eekhai! I u a pai tirha min huat lai chuan maw awmngaihna min hriattir hleinem . Khabe hmul ka zuahin kel tar i ang a ti, ka ziah lahin Mel mul che chuan a ti bawk si. Zanah pawh khum khatah kan mu dun thei reng reng hleinem. Mahse, a awmdan chu tha bera a hriat loh avangin sim hret hret a tum a, a reh chho ve mai. Mahni inthunun hi a harsa viau naa, tih theih erawh a ni" a lo ti nghut nghut a. 

Sawmpuia leng rawn haw chuan, "Naute a nei tawh a nih chu, Julie chuan" a rawn ti lut a. 

Ka piin, "Mi eng nge?" A lo ti vat. 

"Mipa a nih chu..in inang te chu min la ti zui a. Ninawm" a ti leh tûn tûn a. Ka pu chuan, "A va lawmawm ve aw. Tluang taka a nei thei chu, i putea te nupain va en ve se la a that chu..Saiding, nakinah phone rawh aw" a lo ti a. 

"Pa, Sawn man hi pe mai ang u. Ka nei hreh ê, bialnu ka nei ve reng asin le" Sawmpuia chuan a ti nuah nuah. Ka pi chuan, "Ti ziah suh. I bialnu kha mi tha niin ka hre lo, a mitmengte reng reng kha a thîp rám mai a, bakah an khawsak a sang si, kan phu lo. Julie hi i nei dawn, mipa fa a nei lehnghal a, kan thlah kal zel tur.." A lo ti hlak hlak. 

Sawmpuia a chek hlak a, A roomah a lut ta daih. 

Sangkimi nau pai pawn thla nga hmel a hmu ve ta reng mai. A raino huatte a reh fel tawh bawk a, a hrisel loh ngaihtuahin nau pai chu a haw vak lo hle. Damdawi a ei that bakah a hun chat chatah vaccine a la bawk a. Chaw a rawn ei thei chho tan chu kan chaw bel a fai thak thak zel mai. Ka nu a lawm em em a, "Ei tûn tûn teh..naute tan vek a nia" a ti thin. A la inzo lah lah bawk a, dawrah pawh a rawn kal ve thin. Exercise atan chet ve pawh kha a tha hrim hrim a. Raipuar hian rim an nei hran ve a, chuvang ni maw Zing tawkah a tho a, kan in atanga tuikhur veng thleng kalin exer a la a, a rawn haw a, in leh a vel a tifel leh a, fai takin a inbual thin. A rim ka hre ngai lo reng reng. Tlai lamah erawh ka u in a awl ve thung a, eirawngbawl phei chu an phalsak lo hrim hrim. Chhungkaw hlim tak kan ni ve zel chu a nia. 

Peka pawh Ruthi nen an inneih tak si loah chuan Hermon ami tleirawl hmel tha tak, Mamuani a hel leh tan a. Peka hi a hmelte a lo chhe lem lo bawk a, tleirawl lamah a tla na phian zel. Mamuani pawh chuan a lo duh ve deuh a niang, an inphur ka hmu zauh zauh. Pi Rengi erawh ka hmu khát khawp mai. Khawtlang mipuiah a tla na tawh lo bawk a, sawn chhuah a dil vat ka ring mah zawk. Doctori te nen lah an inhmelma tawh bawk si, a thawhpui dangte lahin an kawm tha duh vak bawk si lo. A la chawh telh telh dawn ni te pawn a lang. Valtea te pawh an fanu a lian ve viau tawh a, Diki hian a rawn pawm thla thin a, naute hmeltha tia sawi theih ni lo mah se, a lawmawm bakah chhawnchhaih a nuam a, Sangkimi phei chuan a pawm reng zel. A atchilh thawthang a ni ringawt. Tlai khat Tuikhur veng kham pheiah Truck bangsang a chhia a, kawng a dal tlat si, he lai kham phei hi a kham a san deuh vangin kawng hi a te deuh hrim hrim bawk a. Han chawisawn chi rual lah a ni bawk si lo. Sumo an tangkhang ta teuh mai a. Kan tan hlawkna a lo ni ta zel mai. Mikhual riak tur kan nei ta nual mai a, khumin a daih meuh si lo, a then chu chhuata mut mai pawh hreh lo an ni nawk mai. Mikhual kan neih chauhin chaw hi kan siam ve thin a. Tei leh Ajei te pawh an buai hle, ka nuin a rawn pui ta hlauh zawk a. Sangkimi chuan mikhual ho a lo chiauau vat vat a, kei in hnuaiah ka buai thung. Mara nula hleitling deuh, hmai hlai phek phuk, hmelchhe lo tak mai hi a tel ve a. Riahna tur khum a chang ta si lo, a mangang nasa mai a. A tap lek lek mai. "Khawngaihtakin min riahtir dan ngaihtuah hram teh u" a ti leh thin. Khawtlang hruaitu ten a ngaihna an hai lo va, sumo tlan let lo ho te chu va kalchilhin mikhual riahna chang tawh lo chu an sem kual ta a. Mahse, mara nula Emy inti chuan, "Mi ina riak chi ka ni lo, ka ten chhiat bakah ka zakzum lutuk a" a tih tlat avangin Lawngtlai nula hmel fel rin ren, hmai fai veng mai chuan, "Hetah riak la, hmun dangah ka riak mai ang" a ti ta reuh a. Sangkimi'n, "Kan inah riak mai rawh. Hmun dang pan ai chuan" a lo ti ta vat. Chu nula chu Bti a nia, Lawngtlang Vengpuia khawsa niin dawr an nei ve a, a dawr bungraw thenkhat Lungleia tangkhang ho chu a va la a niawm e. Kan han intihfel zawh chuan kan haw thla a. Bti pawh chu a inbual a, inthlakna tur pawh nei hek lo Sangkimi thawmhnaw a ha ta ngawt a. A felin a tawng duh a, a tlangnel nghal mai. Hunpui a hnai tawh a, khua lah chu a vawt chho viau tawh bawk. Zanah chuan kei pawh chhuak loin kan nu bulah ka tawlh hruah hruah a, Hma deuhah kan mu ta mai. Bti chu sitting room thutthleng seiah aman a duh tlat avangin a mu a. Zan laiah ka zun chhuakin min kai harh a, ka va zung a, Bathroom atanga ka chhuak chiah chu Bti a lo ding sia, ka phu nasa lutuk. "Ka tihlau che elo?" A ti sap a. 

"Ka phu ve deuh chauh ringawt" ka ti ringawt a. Bathrooma a lut tur chu a inchhuih nge bathroom bang a va tauh bur mai a, ka va kuah vat. A chal chu a dawm vang vang a, "I tha em?" Ka ti a. 

"Aw..ka inchhuih alawm le" tiin a insiamrem a, mahse, aw thian khak ri kan hriat avangin kan lehhawi vat. Sangkimi chuan ngunthluk em emin kan pahnih chuan min lo melh a. A hmelhmaiah engmah a lang lo thung. Kan mut leh hnuah pawh engmah a sawi chuang lo ka lo hlauhthawn ruk deuh nen, min rinhlelh kha ka hlau a, a thikthu a chhe bawk si. Mahse, engmah a sawi lo chu a mak letling. A tukah Motor pawh chu an siam tha thei ta a, Bti te pawh an haw thei ta. Riak kan ngah bawk a, kan hlawk ve hle. 

Nilengin dawrah ka awm a, kan lun ve tawh êm avangin khawi danga peng hman pawh hi ka ni bik lo. Zanah ka inbual dawnin phone ka charge a, ka inbualsan a. Ka inbual zawha ka inthlak lai chuan ka thawmhnaw hak tur rawn dah chhuakin, "Ka ngawi hlen ang ka ti naa, ka sawi lo thei lo. Bti nen khan eng inlaichinna nge in neih?" A ti ta mai a. Bangbo deuhin ka lo melh hu ringawt.

"Eng nge awmzia?" ka ti a. 

"A rawn biak che saw..innel tak biakin a ni a biak che. Nizanah te khan eng thil nge thleng?" A ti leh a, thinrim awrawl pawn a sawi lo. 

"A va mak ve, ka hmuh vawikhatna a ni sia" ka ti ringawt. Ka phone chu min pe a, ka lo en vat. 

."Hi, keimah BTi, ka no hi lo save la, i fel ka ti lutuk a,.ka rawn peng ziah ang" tih te, "In nu khan a phu lo che" tihte a ni nawk mai. Ka ner nawk ringawt. A va timak ve le aw. 

"Block daih rawh" ka ti a. A block ve hmiah bawk. 

"Tluang, ka thikthu a chhia tih i hria, nau ka pai lai phei chuan min tina suh aw" tiin ka bulah a rawn thu a. 

"Ka hria alawm, Duatpui, tihnat che ka duh reng reng lo. I tan ka rinawm tlat reng dawn alawm" ka ti a. Kuah hlu hlu mai. "Chuan, Malsawmi rawn chawl ve ziah pawh hi ka mit a tikham, ti nge he nu hian a beisei reng che le" a ti a. Ka nui tawp, "Ngaih khatah ngai tawp rawh. Nang nen inthen pawh ni ila he nu hi chu ka thlang chuang lo vang" ka ti dam thlup a. Ani pawh a khi ve sak mai. Bti rawn tih dan teh tawp kha mak ka ti viau, a rukin min lo star a ni mahna. 

Zanriah kan ei laiin U Muana te fapa u zawk Lalmama a rawn tlan lut a, "U Tluang, Peka kha a thi an ti!" A rawn tih chuan kan phàwk hrû mai..

."Ngati nge a?" Ka lo ti vat. 

" An sawisa hlum an ti" a ti leh ringawt. A tlan chho lehnghal. YMA information mike atangin thawm a rawn chhuak mêk bawk.