Rinsangkimi 13

RINSANGKIMI (13)

Ziaktu: Toni Râlte

Sangkimi chuan a nu chu mak tih hmel zet hian a melh káwk a, a la rinngam chiah lo tih erawh a hmelah a lang thei. Min rawn melh leh a, ka thutakzia a rawn hre ta bawk si. "Tluang" a ti ta ringawt a. Doctori chu ka bulah rawn thuin a fanu chu duat takin a chûl a. "Bawihte, min ngaidam thei ang em? Ka lo tihrehawm rei êm mai che u a. Ka hma ka sial vang vek a ni e" a ti siam siam a. Sangkimi chuan a la hrethiam vak lo tih a lang. 

Pa Ruatpuia'n, "Tluanga te palai hmel kan hmuh veleh a ni leh thla kan ruat nghal ang. Inhmangaih takte kan lo hrem rei lutuk che u a, mahse, kan la siamtha leh hman e" a lo ti dam thluam a.

"Pa.." Lungchhia tih hriat takin Sangkimi'n a ti chuai raih. 

"I pa sawi ang khan engkim kan tifel vek dawn a ni. Tluanga nen hian in damchhung hun hmang dun turin eng thil mahin min dal tawh lo ve" Dr. Saidingi chuan a lo ti ve mawlh mawlh a. 

"Nu, ka mumang a ni lo tiraw?" A mit nuai chat chat chungin a ti leh a. 

"Sangkim, engkim hi a tak vek aw. Chuan, i dam vat a ngai..inti chak ang che" ka lo ti vat a. Hlimna avanga a mittui luang ngiai ngiai chu dimtêin ka hruksak a. A la chauh deuh vangin mut duhna damdawia chiuin a muhil leh ta a. Kei pawh ka haw ve ta nghal. Kawngka an lo kalh dawn avangin ka u ka call a, a rawn hawng a. Mak a ti viau tih a hriat, ka nu pawh a rawn tho a. Kan thil tawnte chu hre tura ka duh chin ka hrilh ve ta vek a. An thlabar hmel hle. 

"Nu, a rang lama palai kan tirh a tha aw. Engkim a tha vek tawh dawn" tiin ka tlip a. 

"A hma ang kha a ni leh mai lovang maw?" La ringngam chiah si lo hian ka nu chuan a lo ti a. 

"Amah Dr. Saidingpuii ngeiin ka hmaihmaa a sawi tawh chu a sût leh mai ka ring lo" ka ti nghut a. Ka insil fai thuak thuak a, ka mu ta a. Mumang mo thak khawpin ka muhil. Sunday mah nise, sawi tawh angin min thunun dawn avangin leh Rema te pawh lo nghah ngaia ka hriat avangin ka inkhawm ta lo. Ka pindan ka chingfel e ka tia, ka u hi sawi tawh angin a che peih bawk a. Han tihfel leh chuan vak tur erawh a awm mang lo. Hmun ka phiah dûrh dûrh laiin Rema pawh a rawn haw ve ta hlawl a. A rawn bawr angreng viau. Nizanah khan engmah han hawn then ka nei si lo nen. 

Sangha chu ka beisei ai daihin an man tam a, chawhtawlhah kan bun hnûr mai. Hralh then chi te pawh niin a lang. Rema chu a inbual a, ka nute pawh an rawn haw ve ta. Sangha an han hmu chu an hlim hle. Rema inbual zo pawh chuan, "Ka inchhir lo khawp mai. Ramhnuai hi kei ka ngaina a, thingtlanga awm ka chákna pakhat a ni ve a" a ti a. 

Ka u in , "Rema, i sangha hawn chu engtia tih nge i rilruk?" A lo ti a. 

Rema chuan, "E! In duh duh danin ti r'u, in ta a lawm.." A lo ti awlsam êt a. Nghalim ho chu kan chhum tawp a, ka nu leh ka ute chuan fridge-ah vawi hnih ei tur vel an dah that hnuah hnahthialin an fun a, fun 6 lai a la chhuak thei nia! Naktukah Dawr nghah pahin ka zuar dawn a nih hmel. Programme thilah ka nu leh ka u te chu an chhuak a. Rema bulah nizana thil thlengte chu ka sawi ve mawlh mawlh a. Mak a tih ve thu leh thla ái a hriat vawikhatna a nih thu a sawi ve hial. Zaninah han lenpui ngei ka tum e. An rawn haw kim takah chuan zanriah kan ei ta a, Ka û hi Rema bulah a lai tlat zel. Ka ngaihbel a nih ka ring naa, an inhmuh hmasak bera thil thlen dante ka ngaihtuah chuan an inkarah eng emaw chu a awm ve ngei a nih hmel e. Ka nu paw'n a hai ka ring vak lo. Chaw eikhamah rei mawi tawk kan thut khawmuan hnuah Sangkimi rim tur chuan kan chhuak ta a, Damdawi in atangin an inah a lo chho tawh a. A tha vek tawh niin a lang. Min lo dawngsawng vat a, a nu leh pate pawn min lo be ve siam siam. Rema pawh chu ka han hmelhriattir a, Sangkimi a á lo va, a be tlangnel thiam khawp mai. Reivaklo kan thut hnuah, "Ka kawng a kham tlat , min va zût teh" Pa Ruatpuia chuan an nu melh chungin a ti a. An inzui lut nghal. Rema pawh a insawn tharh a, phone a khawih nghal mial mial. Tu tak be ve ang maw? Sangkimi nen chuan kan insi chat a, Thingpui luma a thawh bak kan inhlat thei hlawl lo a ni ber e. "Palai chu naktuk zanah an rawn kal ang. Ka nuin a be fel tawh e" ka ti a. 

"A that nasat chu..hma deuh ruat se, buaina kan tawk leh palh ang" a ti a. Ka ngaihdan chiah a ni. Chutia kan inkawm mawlh mawlh lai chuan thawm ngaihnawm loh zet kan hre ta a, Rang takin kawngka chu hawngin kan zu thlir a, Peka rui buai a lo inhrosa nasa mai chu niin, A au ruah ruah a, pawr fe fe hian eng eng emawni a sawi pûng pûng bawk. Ruthi nuta Maruata pawh an lo chelh laih laih a, thil awmzia chu a hriat ta deuh. Ruthi pawh hmai hupin hrehawm tih hmel fê hian a lo ding khawng ve reng a. Zuk inrawlhna chi a ni lem lo bawk a. Luh leh mai tuma kan inher dawn lai takin a ri ta dawp mai a, Maruata tal chhuakin Peka chu a va bawhthlu a lo nia. Lei charah chuan an inbawh bet ta ran a. Maruata chuan a hnek mawlh mawlh bawk. Pi Rengi chu a rak tuar tuar a, a tap pûr bawk. An thawm a rin tak deuh avangin Sangkimi nu leh pate pawh an rawn tho ve ta hial a,Doctori chu zu chhukthla vein, a zuk thlen thlak chuan Maruata chu a thianten an lo chelh bet tawh a. Peka erawh tho tur a awm lo nge a mu zawi reng ringawt. Doctori chuan, "He lai hi medical compound a ni a, buaina siam ka remti hleinem, engvangin hetah buaina in rawn siam?" Tih bik pawh nei loin a ti chang fak a. Pa Ruatpuia'n zawi supa, "A kawlh a chhuak leh dawn tan e" a tih chuan min tinui lo thei lo. A nupui chu a hriatchian hmel kher mai. Amah pawh a chhukthla ve nghal a. Maruata chuan, "Ka pi, kan tihpalh a ni e. MAhse, insum a harsa êm a ni. Vanlalpeka hian ka farnu Ruthi chungchangah thil a lo sawi darh vak a, uan nan takte a lo hmang kual a, ka insum thei ta lo a nih kha. Pawi ka ti khawp mai" a ti a. Ani hi chu tlangval pangngai tak a ni ve reng reng bawk. 

Pi Rengi chuan, "I zak chai em? Ka fapa hian i farnu chanchin a sawi ngai lo, innei mai tur an ni tih bak engmah a sawi ngai lo. Zawnga, Hre rawh, FIR ka thehlut chiang khawp ang" ti hlawih hlawihin a fapa chu a ngaihven ta nghal a. 

"A swi chiang em mai. Ka thiante ngei pawh hian an hria. 'Ruthi chu a bungbu zei lo êm mai, innei mah ila, ka riltam a hnawhkhat zo dawn lo' tih vel..ani chákna hrikthlak nan mai mai ka farnu hi kan phal lo aw. An innei nguar ang" Maruata chuan a ti ve ta hmiah hmiah a. Peka tawngkam hman duh dan mai mai chu aw! Ka va khawih leh chàk tak. Peka chu Pi Rengi leh a bialpa ti tawh mai ang, khami te khan an inah an zawn lut ta a. Maruata te pawh an tin darh ve ta a. Keini pawh hawn lam kan hnaih chho tan. "Kan han haw ang aw. Naktukah i zia deuh chuan lo leng thla la" ka ti zauh a. 

"Nia, ka lo pui ang che" a ti sap a. Rema chu a fing zêk, a phone phawrhin tu emaw call-in pawn lamah a chhuak ta daih a. Ka nuih a za lek lek. Sangkimi chu ka lama kuai hnaiin ka fawp ta a, kan infawp lo rei leh tawh a, kan duhthawh dun hle. Thaw a chham lek lek mai dawn alawm le. 

Kan in mangtha ta a. Rema chuan, "A hmelthat reuh kha le. Mahse, a la naupan hmel..a hrisel lo tih pawh a hriat miah loh kha" a ti nuah nuah a. Ka lawm hle. 

"Nia, a la naupang ve alawm. Mahse, kei aia puitlin zawk changte a nei thin" ka ti ve nghut a. 

"Kha Peka kha i sawi kha em ni?" A ti a. "Nih mai mai kha" ka ti sup. 

"Khatia hmeichhe laka uan ching mipa kha chu rak tam lo tura an lei pawhdawhsak mai chi..mipa min timualpho" a ti ram hmuk hmuk mai. 

"Khatiang rîkràpna kha a la hmachhawn zeuh zeuh ang. A á peng pung êm alawm" ka ti mai a. 

In kan thlen chuan ka nute an lo la meng a, ka u pawh ka nuin puan thui a zirtir ve a, a lo thui ve ngei. Thingpui a va lum vat a, A mizia a dang leh tlat tawh. Rema pawh a zia a zawiin a tawng tam lo kher mai. Ka nu bulah ,"Palai chu i be fel tawh maw?" Ka ti a. Nui chung hian, "I phur mah mah thin. Ka be fel vek tawh e" a ti sar sar a. Ka helhhawlh nge ka za sek mai a. Mut pawh ka muhil har khawp mai. Zingah thawh ka hai ta chiah reng a, Ka u in min lo kaitho a. Lehlamah a hmaa ka dawr nghah lai ang khan thawh hma over a ngai tawh lem lo va, a zia viau. Rema chuan, "Thingzai lei la, khum chu ka cham chhungin dawh zawh hman tum ila" a ti a. Ka va lawm ru si tak êm. Ka nuin thingzai nei ho a lo hre hlauh bawk a, kan be nghal. Thliar tir leh te chu a la ngai dawn tho a. Mahse, Rema hi rin aiin a themthiamin ruahmanna a siam thiam riau a, min puih theih chuan a lawmawm viau ang. Kei lah mistiri hna ang hi chu ka til thenna an ni lo khawp a! Tukthuan kan bar zawk zawk a, dawr lamah kan inzui thla leh ta. 

Thingzai chu Hminga pickup hire-in kan va thliartir a, dawrah pawh kan awm hman meuh lo a ni e. Chawhnu lamah erawh in hnuaiah kan tamtàl a. Rema chuan ruahmanna a han siam zung zung a. Tih ve theih vak ka nei lem lo. Sangkimi a rawn kal ta a , in chungah ka chho ta rih. A lo khi sáng a, hmuh a va nuam thin tak. Kan thu dun ta reng a, Rema erawh tih em em tur a neih loh avangin in lamah a han chho ta a. Chance a zawng ve deuh niin ka hria. A ho lutuk. Ka u nen chuan ni ve mai mai teh se. Mikhual an rawn thleng tan a. Sangkimi pawh chuan Esi a pui ve nghal mawlh mawlh, a zeihawi phian lehnghal a. 3 sisters sumo driver, lerh ve tak Lalawma chuan Sangkimi a hmuh rual rual chuan, "Eheu! Bawihi, ná i nei miah lo em ni?" A han ti lung lung a. A ngaihna hre lo fêin sangkimi chuan, "Nei nang, ti nge?" A han ti a. 

"Van atanga i rawn tlakna lamah khan i insawh na hle lo maw?" A'n tih chuan kan nui dar dar mai. Midang zawng pawn Sangkimi chu an en duhin hmuh nuam an ti hle tih a lang. Esi hi chu an innel tlang tawh a, amah zawk zawk hian a lo chhaih let hrep ngam tawh a, chutia mi thar an han hmu ta chu an mit an la sawn hleithei mai lo a ni. Mikhual ho rem hnu deuhah chuan Sangkimi chu a haw ta a. Scooty a rawn keng tho va, thlah a ngai lem lo. Rema helper tur ka ngaihtuah mek laiin, Zorama a rawn lut hlawl mai a. Ani hi a hma chuan kan in hrik tih theih hial khawpa kan ina chengkual tam a ni ve a, ka u hi a ngaizawng thin. Ka uin artui a chhumsak atang khan a reh ta daih a, Ani Thaizawlah a lo zuk chhuk chu niin a pite bulah a lo zuk awm ngat ngat a niawm e. "U Tluangte, i dawrah hian min thawhtir ve la" a rawn ti leh tháwr mai a. Amah hi Pathianin ka tawng lo ngaidam se la, mi pangngai pha chiah lo, mi huihphai kan tih ang deuh kha a ni ve a. A nu leh a u te nen an khawsa ve a, a nu hian Shed-ah thei leh engilo a zuar ve thin. A u hi inhlawhna awm ang angah a inhlawh ve bawk a, Zorama erawh a meizial leh kuhva, sahdah man tur tuakin Hotel thenkhatah an thlengte sil sakin, an tuite a khaisak thin. Amah hi tu pawi mah sawi lem lo, mi dang tihlim thei tak a ni bawk. 

"Eng nge i thawh ve ang!" Ka lo ti a. 

"Ka hre nang, chhuat pawh ka nawt thiam, tui khai pawh ka chak rap" tih pahin an inla sek nghal ngawt a. Rema helperah tang se a tihtlak ve tho ang a ti rilruin, "Naktukah hnathawh thuamhnaw hain lo kal la, in hnuaiah khum in siam dawn nia. Misitiri'n ti tura a tih che apiang i ti zel dawn nia" ka ti a. A bu nghut nghut a, Nui vur vur chungin, "Phone hetia tiha hetia phen ve theih kha ka tuak ang aw" a ti a. 

"Aw i thawh that viau chuan ka leisak ang che" ka tih chuan hlim em emin a zuang kual a. Pathian thilsiam vek kan ni si a aw..

Dawr kan khar a, haw nghal loin Patea te inah ka peng kawi a. Zanin vel kha ka va sawi leh kher..Nuteii chuan, "I phur teh háwrh mang e aw.." A lo ti zauh a. Kan han nui leh rih. Phur loh theih ni bik hek lo le. In ka thlen chuan an ril a lo tam viau tawh a niawm a. Bual pawh inbual loin chaw kan ei zui nghal. Rema helper tur atan Zorama ka lak thu ka sawi chuan a u chuan, "Awii a thiam ve dawn mawni le" a ti sap a. 

"Thiam vak a ngai dawn mi? Tirhkah ang deuhin i hmang mai ang a" tiin Rema ka melh a. 

"Umn, a harsa lo vang. Han ti ve phawt ila maw" a ti a. Ani pawh hi a nuin a rawn be zeuh zeuh, a that thu leh a rilru dam huna a hawn tur thu a sawi mai zel a. A rilru chu a lian ve khawp mai. In hnuai a siam hi a thlawna min tihsak ka duh bik lo va, hlawh pawh neihtir ngei ka tum ve. A duh lo maithei thung. Cham ve reng se, Sangkimi nen kan inneih thlengte awm ve thei se a nuam ngawt ang. Ka thiante lah a kawm thei ve vek bawk si. Lengchhuak loin palaite kan lo nghak ta ran a. Mawnga hawlh ang maiin ka za sek a, ka tei ruai bawk. Ka zak ve deuh bawk si. A rukin min nuih tet tet mai. Dar 9 pelh hlekah Patea te chu an rawn lut ta a. Tun tum zawng an hmel hmuh a nuam ta e. 

"Aa..mizo dan angin chhungkhat kan lo inberawn ve ang e te kha an ti ve a, dan anga thiltih tumna mai mai a ni. Kan inrem ngei dawn nia" Pa Lawma chuan a ti dap dap a. Ka lungphu chu rang dup dup tak a ni. 

"Chuan, engtikah nge kal leh in tih?" Ka nu chuan a ti a.

"Ningani-ah hian anmahni lam chuan min lo beisei tur thu an sawi kha..Kimi, a hun a ni vel tur han duh bikte in nei em?" patea chuan calender melh chungin a ti a. Ka nu chuan min rawn melh ve zauh, duh bik ka nei hran bawk si lo. Ka u zawk chuan, "Thla khatte chu inbuatsaih nan hmang ve ila..A thlalehah ti ila" a lo ti a. A tha viau tak ang. Sum lamah kan la pachhe ve deuh bawk nen, Inbuatsaihna hun chu kan mamawh ve khawp mai. Thingpui an in zawhah muangchangin min hawnsan ta a. Roomah ka tlan lut a, zawitê hian, "Lalpa, ka lawm e. Harsatna awm tawh lo hram rawh se aw" ka ti mawlh mawlh mai. Rinsangkimi pasal ka ni ve thei dawn ta. Hmangaihna hi a lo chakin a lo huaisen êm a lo ni. 

A tuk atangin Rema chuan in hnuai chu a khawih chho tan ta a. Puih ve vak ngaihna ka hre si lo va, an mamawh lo lam khawmsak chu a ni deuh mai. Sangkimi nen kan inbe zeuh zeuh bawk, Kan zalen tawhin diptaltu kan nei ta lo bawk a. Hmalam hun atana kan duhthusam kan sawi kan sawi ta mai. Fa a awt hnem sia, a hriselna hian a tlin dawn mawni.."A tlem berah pasarih tal" a'n tia nih chu! Ka tlin dawn em mawni. "Dik tak chuan unau kan tlem êm a, a hrehawmzia leh khawharthlakzia ka hre tawh a. Chuvang chuan fa hi chu a theih chen chen neih ka duh" a ti ve a. A dikna chen pawh a awmin ka hria. Keini pawh unau pahnih chauh ve tho kan ni. Kan tet lai kha chuan tih dan dan a awm a, puitlin hnu hian a khawharthlak bik. A mak khawp mai. Amah a hringtu berin a tlin phawt a hnu fa chu nei teuh se la a tha mai alawm..

 Rema te pawn hma an sawn viau, khum pathum lai an dawh hman a. A lawmawm mang e. A pawisa dawn tur aiah, "Min show sak la a tawk. Thian inkarah hlawh tih vel ka duh lo" a ti tlat si a. Valtea ka bia a, ani hian a awmna a hre deuh a, Minpui lamah buh zu tha zet mai a lo hre khiau chu niin, Amah Valtea chuan ka bike hmangin a va la, kan in bathlarah thut ho pahin an in ta a. In chakna chu ka nei ve reng, mahse, nupui nei thei dinhmunah ka ding si a, ka in leh chuan lehpek awmtir ka hlau, ka insum tluan thei hram e. Sangkimi han rim pawh ka duh viau naa, Palai te rial chhunga han len tlut tlut kha ka la naupang ve tho nen, ka zak deuh tlat. Ani pawn leng tur chuan min sawm bik lo. A zak ve tho a niang. Taka Pi Rengi khan FIR a thehlut lehpek a, mahse, Ruthi pa hi pa thiltithei ve tak a lo ni bawk a, Maruata chu a táng lo hlauh. Peka inenkawlna senso erawh an tum thung ang. Ruthi nen an inneihna tur pawh an tichat ta nghal a. Peka chu a ma palbuakah a che chhe zel e. Khawngaihna ka nei hranpa lo hi ka rilru chhiat vang a nih pawhin ni mai teh. Ka khawngaih hlawl lo a ni tawp. Tichuan, a tawi zawngin aw..Ningani zanah chuan an han leng leh ta a, a hun leh ni thlengin an rawn tifel thei ta. Ruahtui tlak hma ngeia inneih kan duh si avangin 7th may an rawn ruat ta a. Khaw lum vanglai tak a ni dawn thung. Mahse, a pawi lo, hmangaihber bulah chuan a váwt leh thei mai ang. Rema'n hna a thiam bawk a, a taima bawk nen, mipa pindan lamah khum 7 a peih fel ta mai a. Hmeichhe lam erawh kan la khawih lo. A zim deuh zawk bawk a, mahse, bathroom leh inthiarna erawh siam belh ve a ngai ang. Mipa nen han intawm tir ngawt kha fel lo deuhin ka hria a ni. Patea te pawn min rawn pui ve nasa a, thiantha te an felin an tlawmngai em em bawk. Mahse, thiante an rawn thawh hi chuan tlai lamah thil ka show sak ziah. An tan a tawk fû a niang chu maw. Kan in pawh singsak deuh a ngai dawn niin a lang. 

 Ka puin, "Inneih hma ngeia in hnuai hi peihfel kan tum ang a, in rawn insawnthla zawk dawn nia" a ti ta hlauh a. Pathian hian mal min sawm bik hle niin ka hre thin. Min hmu apiangin, "Jail tang meuha i hlawhchhuah a nia, i lawmpuiawm ngei mai" an ti thin. A dikna chente pawh a awm ve awm e. Ni e, harsatna kha kan tawk nasa ve êm a ni. Mahse, Pi Rengi kamtam azarah Sangkimi nu chu nasa taka sawisep a kai ta a. Thudik leh thubul bal hre mang si loin titi berah an nei chho a, ka tan tak pawh a hrehawm thin hle. Pi Rengi lam tang kan khawtlang hruaitu thenkhat lah chuan, "Sawn chhuah kan dil lo hi a mak! Hetiang doctor kan duh hleinem" an lo ti ve sek a. Vcp erawh pa tha ngang, a dik a dawk thlu lo va ri ve pawp pawp chi a ni lo va. Pa Ruatpuia te inah a han leng chho a, thil awmzia dik tak a han zawt ta a. An lo hrilh vek si, a thawhpuite bulah, "Khual thuthang leh àr pân chuk tih ang deuhin mi hian an sawi uar mai mai a ni. Thudik tak hria ula, in khawngaih zawk ang. Chuvang chuan khitiang doctor thiam leh fel, damlo tana thlamuanpuiawm lutuk khi kei chuan sawn thiangah ka ngai lo ve" a ti ta hmiah mai a. Tuman an sawi ri ngam ta lo. Sangkimi pawn a nu chungchang an sawina te chu a lo hre ve lo thei lo va, hrehawm a tiin ka bulah pawh a tap hial tawh. Mahse, a nuten thudik an han hrilh chuan a nu chu a khawngaih leh ta em em a. Thudik zawk khawtlangin an hriat hnuah pawh Pa thenkhat nupui ngam inti deuhte chuan, "An pa chu a va nêp ve. Uire ni lo mah se; chutiang mipa dang hawlh hnu lawm taka a pawm leh thei chu..a tuiawm tawh awm lo e" an ti nang nang hlawm a. Mizo mipa thenkhat hi chu kan inla pa leh lutuk a, famkim ber ang ziazang hian mi vanduaina pawh namnul mai kan tum fô. Pa Ruatpuia hi a pa lohna reng reng ka hre hauh lo. Kei chuan ngaisang tak ka ni. Hun tam liam tawh hnu avanga a nupui then leh kual kha a chapo thlak ka ti, tin, a rilru chhiatthlak bawk. Doctori'n a nau pai lai a paih kha chu ni e, dem duh tan chuan demawm tak pawh a niawm e. A nihna nen a lo inhmeh tehchiam lo nen..mahse, ka farnu hi Peka hian pawngsualin a fa hial pai ta se titla tura nawr tur ber ka ni ve tlat. Hmelma fa kha kei chuan mihring ka nih angin ka hmangaih theih ka ring lo. Doctori pawngsualtu Liansanga kha engvang taka inawkhlum ni ang maw? a thiltih rapthlak tak ten an vaw lêt ve a ni mahna le.. Kan damchhung la la hian kan thiltih tawhte phuba kan hmachhawn thin. Ka nu hian a sawi fó,"Kan mihringpuite na lutuk leh beidawng lutuka siam te hi a tha ngai lo, a vuak let a na lutuk. " tiin. A dik khawp ang, Peka pawh hian midang kei kher lo pawh tihnat hi a nei nual tawh a. A chungah eng emaw tak a thlen hi ka la ring tlat. Ruthi pawh a ruk tak chuan ka khawngaih hle . A mualpho ve tingtang tawh bawk si. 

Inbuatsaihna a kal ve zel a, ka sawi hmaih hauh loh tur chu, Inrinni zan khan ka inthiar laiin ka u inkhawm bang a lo haw a, Ka nu erawh ka pute inah a peng kawi a. Ka va chhuah chuan ka hmu dun ta mai si lo va, ka towel zar seng tura thlanglam bathlara ka va chhuak chu, a sirah an lo infawp lai ka va hmu ta pek a. Ka lut leh zuk. Ka lo lai ve em em ringawt . An lo inngaizawng reng tawh a nih hmel. Rema hian min hrilh hreh ve a niang. An rawn luh leh chuan ka u chu a hmai a sen vek thei mawle..Ka lo fiam duh ta êm lo va. Boruak a nuam chho ta. Ka pute pawn hlawhfa an ruai sauh sauh a, in pawh chu an peih thawkhat dawn ta mai. Thla thar veleh kan insawn thla ta a, min puitu an thahnem hle, bungrua kan lo ngah ve deuh bawk nen. Valtea chuan, "Ka lawmpui tho rual che uin, kan inhlat ta dawn em a, ka khua a har lawk" a ti deuh reng mai. A ni ve bawk a. Mahse, inthianthatna hi chu a danglam thei ngai chuang lo vang. Ka pute in hnuai chu a lo zau deuh zawk bakah concrete a ni bawk a. Kan han inrem fel a, thlanglam ber chu ka room atan ka ti a, a zau deuh bawk. Ka u leh ka nuin room an intawm leh bawk. Ni 3 vel chu kan inbuaipui awm e. Rema a tangkai em em reng a, ka nu mit pawh a tlung hle niin a lang. Ka rin aiin a lo taimain rem a hre riau a. Ka tluk lo khawp mai. Ka u nen an nih ve tawh avangin zanah pawh ka len chhuahpui hleithei tawh lo. A nuin a rawn be reng thin ka tih kha. Ani pawn kan insawn thlaka kan han inpeih deuh chuan, "Hetia cham va reng pawh, i u nen kan inkar lah heti hi a ni a. Mualphote pawh a hlauhawm ka tia, ka zuk hawng ve tawh ang a, in inneih dawnah ka rawn chho leh ang. " a ti a. Ui ru viau mah ila, a sawi ang khan ka u nen an chesual dawn e tihna ni loin mi an kamtam thin si a, ka u zawk chu a hmingchhe êrh thei tih ka hria. Hna tam tak min thawhsak a, dawr hnuai lah a peih vek bawk. Bathroom siam chiah a ngai tawh. A lakah lawmthu sawi sen loh kan ba a ni. Ka nu in a ngaihna a hai lo bawk a, Rs. 3000 tal chu min laksak turin a ngen a, a duh lo teh naa, ka u-in, "La mai mai teh. Mahse, zu in nan zu hmang lo la.." A lo ti hlar a. A la ve ta chauh. A hawn thlak dawn zanah chuan Valtea bakah Thian dangte an rawn leng khawm a, ar kan hem hmin a, kan thlah ve a nih ber chu..sangkimi pawh a û nen an rawn chhuk ve. Sawmpuia pawh kan inneih dawn avangin a rawn haw phei ve a ni. Bakah a zirna a zo thawkhat tawh a niang. Ani hi a palianin a ngo suah mai a, a tuai lek lek em aw tih mai theih tur a nih laiin a aw hi a thum chhur mai bawk si. A nau ai mah hian a á zawk awm e, a ri ve phawng zel a, a lawmawm thei viau. Thiante nen kan ni bawk a, kan hlim dar dar hle. Rui lo hai miah lo hian a lo hlim theih em em a ni. Rema pawh ka u nen an inngaihzawn atang khan zu a in ka hre ta miah lo, ka u chu a zah ve hle niin a lang. Rema pawh a tukah Lunglei lamah a liam ta vuah vuah a. Ka u chu a lungleng ve ngawtin ka ring. Ngaihzawng a neih vawikhatna a ni hial awm e a. 

Dawra ka awm laiin vai ho in dunlop an rawn zuar a, ka nu ka ko vat. 6ft bial chu a chhah zawng pawh ka duhzawng tak mai a ni a, a hrana Lunglei lama zuk lei kual ai chuan lei mai ang tiin 6000 man kha, 4500-in kan lei thei ta hlauh. U muana'n a dawn thiam êm a tin ni. Chawhnuah Sangkimi a rawn chhuk a, mo kawr vel a rawn sawi a. Dantê-a innei tur kan ni sia, chutia tihpui viau pawh ka lo tum lo va. Mahse, Sangkimi chuan, "Dantê pawh nise, pui tawka tih ka duh. Apa pawn vawk talh tur a be fel vek tawh, vawk pahnih asin a talh dawn.." A ti tlat si. A va buaithlak e aw. 

"An hawh thin a ni lawm ni? Mo kawrte chu" ka ti a. 

"Thuitir ka duh ee kei chu" a tih chuan, "Em em a che a. Dantê mai maiah chutiang a ngai lo" ka lo ti hmuk a. 

"Nge api ten min tumsak dawn alawm le..pasal pakhat bak neih ka tum si lo va, kawl reng atan pawh ka duh alawm. I ninawm..i ngai holam si" a ti hlar bawk si. 

"Kei chu ka hawh mai ang. Thuitirna ka nei lo, kan retheih em hi" ka lo ti a. 

"Thing suh ,nakin zel atan suit te chu a tangkai dawn. Mo thian suit tur erawh i duh leh hawh la..nangma ta tur chu i thuitir ngei ngei a ngai" a ti leh zêk. Ka lu thak lo pui ka hiat nuah nuah ringawt. An khawsak a sang ve bawk si a, rilru a buai ru deuh. 

"Suit hi eng rawng nge ka tih ang?" Ka ti a. Min melh vang vangin, " A pawl tak dak hlarh hi i inhmeh dawn lutuk. I ngo ve tho a..ti ang che. Tu nge thianah i hman dawn? Valtea mi?" A ti a. 

"Nih loh ten, i á mi?" ka lo ti hlur a. A ner sak a, "Valtea chuan a inhmeh ve vak lo maithei. Mahse, a ho em mai. Mo thian a nia. Kartawpah Lungleiah zuk chhuk teh ang. Engmah hi i lei thiam dawn lo, i tlaw si" a ti leh hmiah hmiah. Kan nu tur chuan min va ngam tan deuh ve aw. A duhawm telh telh bawk si. 

"Aw..aw ninawm" ka lo ti a. Ka sam chu rawn thàmin, "I lu pawh hi mehtir hlek ang, a buk mah mah. " a ti leh daih a. Ka chhang tawh lo. 

"Aizawl atang pawn rawn tleh phei an tum a..Anunu phei chu rawn zin hma a tum tawp" a ti a. Anunu a tih hi Dr. Saidingi u, amah aia kum 10 vela naupang pasala nei a ni. Sangkimi putea hi Valtea tho a ni bawk a, Pa Ruatpuia nî fanu Nupuii an tiin ka hria, chu nen chuan an innei bawk a ni. An inchhung kual vek a nih ber mai chu. Keini lamah erawh khaw dang atanga rawn kal tur vak an awm lo, Niteii te leh Papuia te an ni deuh tlawng mai. Ka nute lamah chuan an buai ve bawk sia, kan nawr na ngamin ka ring lo. Dawr pawh a lun tial tial a, in hnuai hmeichhe dorm lama bathroom siam tur chuan U Valpuia ka chhawr a, ani hi a hna a chak bakah a kuthnu a mam bawk. Lian a ngai hran lo bawk a. In hnuaia hman atan bik sintex 1500 lts ka lei bawk a. Pathian zarah ka nu ac-a sum a dah kha a pung nen chuan a lo tam ve tawh riau a, kan hmang ve ta nual mai. Inneih hma ngeia riah theiha siam ka duh bawk sia. Dawr atanga kan sum hmuh bakah ka chawhmeh zawrhna atanga ka dah hran zel chuan ka pu sum ka puk zatve a lo daih ta hial a, pek ka tum chuan, "Inneihna lama hman atan in duh ang. In buai lutuk anga sin. Kha kha chu ka tanpui vena che u a ni mai. A zatve min la pe zawk dawn nia" a ti ta mai a. Ka lawm lutuk kha ka pu chu ka kuah chung chung mai. Ka pu Ngura te chhung hi rim taka thawhrah seng an ni a, midang tan an pechhuak tam bawk a, an ina tlulut chawt chawt hi an tam thin khawp mai. An lo tuamhlawm ve zel bawk nen, malsawmna dawng tur pawh an ni. An pek chhuah aia tam zel an lalut leh thin. 

Zanah ka nu bulah, "Vawk hi pakhat em ni? kan talh ang" ka ti a. Ka nu chuan nui chungin, "Ekhai! I va duh tlem ve, ka fapa neihchhunin harsatna tam tak karah i hmangaih ber i nei dawn a, vawk pahnih leh ar eng emaw zat kan talh ve loh ten le.." A ti ta mai a. 

"Lei tur i hmu tawh em ni?" Lawm ru deuh hian ka ti a. 

"Aw, Laltaia vawk ka hauh fel tawh e. Kan ar vulh lai bakah U thiangi te ar ka hauh bawk. Bawngsa te hi ti tel ve thei ila aw..mahse, a to ve bawk si" a ti vang vang a. Ka rin aiin ka nute pawh chuan tihropui an lo tum a nih hmel. Lawm ringawt phawt mai teh ang. 

Sangkimi min nawrna avang leh dawr lama mamawh pawh lamkhawm a ngaih tho vangin Lunglei lam chu sumo-in kan pan ta a. A hmaah kan thu dun a, a muthlu láwp láwp mai. Kan thlen rualin Puan thuina dawrah kan lut nghal. Puan thàn chu a han en kual a, a pawl duk deuh, nalh deuh hi a thlang ta chat a. Kan han inteh zawh chuan advance ka pe a, kan chhuak zui nghal. Bazarah mamawh kan lamkhawm leh a, Zungbun en leh a la ngai. To deuhte hi a duh leh roh ang a..A kutzungtang sei sal maia a han bun chhin vel chu ka lo thlir reng a, a biang a tai têk a, a nui sáng reng bawk. Lungtiawii a ni ringawt. A duh a hmu ta a, simple deuh a ni lawi a. Kei chuan bun ve ngaia ka inhriat loh nen, a teu hlar a. Ka en chhin leh ta nge nge, a lak ang chiah a size lianah chuan ka bun tawk a awm lo zel si. A len deuh loh leh ka tawt tung zel a. A tawpa tawpah a lak aia simple zawk mahah ka bun tawk chu kan hmu ta a, lak ka rawt ta a. A lo pawm ve mai. Mo kawr chu aizawlah a lo thuitir tak tak a lo nia. Aaa..a duh dan danin ti phawt teh se. Kan vak kual nasa deuh bawk a, sumo in min lo nghak reng tawh chu niin engmah pawh ei hman loin kan tlan chho nghal a. Kan bawr angreng bawk si..a riltam thu a sawi sek reng a, ka khawngaih ta deuh a. Thaizawla thingpui in ka rawt ta tawp a. Kan chawl ta a. Kan chawlh lai chuan sumo danga chuang ve Malsawmi a rawn lut hlawl mai a. "Zothan, in kal ve a ni maw? " a ti chul a. Chhunah hian dawrah an rawn chawl zeuh zeuh a, nupui nei mai tur ka nih avangin thian angin ka be liam satliah zel a, ani pawh min beisei ang zawng pawn a awm ta bik lo. 

"Nih hi, eng nge i tih ve zawk?" ka lo ti a. Kan bulah a rawn thu ve chat. "Ka haw lawk a, ka pa an zai a, chuvang mawle. " a ti a. Min rawn nghawk zauh pahin, "Nimin chu kan sulhnu ka chhui a, Lalroberta ina kan riah dunna te kha" zawi sap hian a ti a. Sangkimi ka melh vat, rum elkhen hian min lo melh. Ka mit ka la thla rang kher mai. 

"I ho e a" ka ti ta ngawt a. 

"Nge. A lungenthlakzia aw. Kha, Hostel chhaka kan innghahna thinah khan dawr a ding tawh bawk a, ka ui tak tak" a ti leh har har a. Sangkimi awm ve avanga chung chu sawi a ni tih ka hria. Ka ngei reuh ngei mai. Ka chawn a rawn na zawk, ka aiah nghal tuar a, Sangkimi'n min lo chhuih tawk chu niin, Malsawmi bawk chuan, "I nupui neih tur thu thiante ho ka hrilh ve a, 'Nangmah i ni lo va, kan awih lo' te an ti vel" a tih leh zet chuan, Sangkimi a ter ta at mai. A ding phat a, "Nangnu hi i mawl nge i á? A nupui tur ka awm ve lai rengin engvanga khatia tawng chiam nge i nih a? " a ti ta thak mai le..ka hawi vak vak ringawt. Malsawmi lah a lo phanchang ve tawh bawk a, Sangkimi chu hmai thal háa enin, "Ee..a nupui tur i lo ni maw? A dawra thawk thin kha i ni emaw ka lo tia lawm" a ti vel a. 

"Inhauh ka thiam ve lo .,insual ang" Sangkimi'n a tih takah chuan ka ding vat a, ka chhuahpui ta a. Malsawmi lah chu zah hre ta lo chu dawr atang chuan a rawn âng zui záwrh záwrh a,"Malsawm, duhtawk rawh. " ka va ti a. Sumoah kan luhsan. Dawra chawl ve te khan engtin tak ngai ang maw..Sangkimi chu a tûm kawngtluan ta. Tukverh bulah a thu a, a mittui a hru zauh zauh chu ka mitsirin ka hmu reng. A no si a, tihnat vak chi pawh hi a ni lo. A mittui hi a tla sam êm êm a, engdang a ni lo. A pa sawi ang deuhin a tette atanga kehthei dawma an dawm, tuman an hauh phal loh, a nu phei chu kawlh ve tak a nihna laiah amah Sangkimi lo haua a mittui titlatu te chu velh hial tum thin kha a ni ve a. Khatianga Malsawmi'n hnehsawh taka a tawngkhum vel kha ka laka a thikthu chhiatna nen a mittui a ko lo thei lo a ni e. Ka khawngaih si, Motor chhunga han thlem heuh heuh chi a ni bawk si lo. A kut chu ka va la a, a phihthla rang ngei mai. Ka tum lui duh ta rih lo va. Kan inah ka chhukpui mai ang ka ti rilru. Bazar kan thleng a, bungraw ho kan han hlang thla fel a, "Hawh, ka thlah leh mai ang che. Lo chhuk mai rawh" tiin ka va kai a. A lo hnial ta êm lo ve. In chhunga kan zu luh chuan ka nuin rawng a lo bawl a, Sangkimi chu lo enin, "I hmel a va dik lo ve, eng nge thil dik lo a awm em ni?" A lo ti vat a. 

Sangkimi chuan min rawn kawkin, "He pa hi alawm..a bialnu hlui nen an la inngaizawng a.." A ti ta mai a. 

"Akhai! Kan ni lo reng reng.." Ka lo ti vat. 

"I la duh alawm. Be tawh suh ka ti che a ni lawm ni? Suala, lerha, i chhe lutuk" a ti tán tán a. A mittui a hnám lehnghal. Ka nu bulah, "Malsawmi alawm, a rawn tawng chiam a, kei pawn ka ngei" ka ti a. Ka nu chu a nuih a za deuh tih ka hrereng, mahse, insûm tih hriat tak hian, "Bialnu hlui te chu biak pawh a ngai tawh hleinem,..Sangkim, ka lo hau hrep dawn nia..á leh lutuk" tiin Sangkimi samah a chul a. 

"Lo kal teh" tiin Sangkimi chu ka kai a, ka pindanah ka luhpui. Khumah ka namthu a, "Duatpui, ka hmangaih che ka tih chuan midang tumah ka hmangaih ve lo tihna a ni mai. Malsawmi te ang thîk kha i indah hniam zawk. Ka engahmah a thawk tawh lo. Thinrim tawh suh aw..ummm..i hmelthat kha" tiin ka kuai dák a. A la meng no lo viau naa, tlem chuan a zia deuh. 

"A biak che pawn bengngawng angin awm tawh ang che. I hria em?" A ti hlak a. 

"Lutuk, aww..he hmui hi a lo insum thei lo leh thin a. Ngawi tak rawh.." Tiin black tape ka la a, ka hmuiah chuan ka bel hnan ta a. Chutia ka han tih chuan a nuih a za leh si, mittui tla phungin a nui leh ta awr awr a. "Zothantluang, lulian" tiin ka hnungzangah a beng kawrh a. Black tape chu a rawn hlip a, Ka lo kuah vat, ka fawp leh ta chawt a. Ani pawn min chhanglet tha e. He hmeichhia hian ka thlarau thlengin min hmangaih a, ka tina thei ngai lo vang. Inbual hmain ka han thlah a. Zan lama inhmu leh turin kan inthlah a. 

Chaw eikham zial ka zuk laiin, "Nu, man eitur hi i tifel tawh em?" Ka ti pek a! Ka u nen makti zetin min rawn melh. A hnuah an nui ta chiam a. A ngaihna hre lo zetin ka lo melh hû thung. Ka nu chuan, "I va á tak..i nupui man i pe zawk dawn a, a eng chu nge kan eitir ve ang a" a ti ta a. Ka hrethiam chiah. A va mawl theih ve le aw. Ka nui ve ta hawk hawk a. Valtea'n nupui a neih dawn pawh khan thian man ka ei lo tiin a rukin ka vui a, "A thiana ka din dawn vangin min eitir lo a niang" ka ti leh ta kha a nia. Ka zak zawk e a. Inchhiar zau deuh ka mamawh hle mai. Sangkimi te inah ka han chho a, "Thianah tu nge i hman ve dawn?" ka tih chuan, "Daisy kha la dam se chuan ka hmang chiang dawn sa a..awii ka ngai. Anuin, nungi hmang mai rawh a tia. Ka hmang mai ang" a ti duah a. Daisy chu a la theihnghilh lo ve khawp mai. Pa Ruatpuia chuan, "Tluanga, Pa Ruatpui te hi min ti mai mai a, in inneih hnuah min pu i harsat phah ang e aw" a lo ti fiamthu a. Ni dawn tak e, a harsa ve riau maithei a ni. Doctori chuan, "A ho e,ka pa pawh ti che se la, pumkhat an ni tawh a, inpu kher kher a ngai lo" a lo ti a. 

Pa Ruatpuia chuan, "Nang lah hi a..ka duh ve reng reng lo e a. Pizawn puzawn te chu kan pi pu tur a ni ringawt. Midang chuan lo ti se, an duhthlanna a nia. Kei chuan ka pu tih kha ka duh ber..ka makpa a ni miau a" a ti nghut nghut a. Doctori chuan, "Inla pa ve siah" a ti hlak. 

"Pa min tih ber rêng kha..I drivera min lak chhan pawh min lo star ruk tawh vang kha a nia. " a lo ti zauh..kan khi thaw hlawm a. Doctori chuan, "Ve che hian aw..a ruka min ngaihzawn vangin min runluih nan Hlimi te i ngaihzawn vel kha a.." A lo ti ve vat. 

An nupa hi hmuh an nuamin hah hi an tidam ka ti mai. Thenkhat chuan Pa Ruatpuia hi thaibawih angin an ngai fó. Mahse, ka han chenchilha ka han lenluh tam takah hian a pa zia leh pa nih a tlinzia ka hmu chiang khawp mai. Nu Saii hi a thinchhiat bakah a kawlh êm a, diknaa tumah hlau ngai lo, aia upa pawh tawngkhum rap rap ngam chi kha a ni ve a, Pa Ruatpuia hian insum theihna neitur te hian a zilh nasa thin, tin, an nu that tawk lohna a hliahkhuh thiam em em a, Rorel hunah pawh pa a nihna a takin a lantir mai. Nu Saii pawh hian a zah hle tih ka hria, Sangkimi'n a sawi alawm, "Heta kan lo awm hma khan Anu hian Api te in hnuai luahtu an fanu kha a thik tlat mai a. Kha nu lah khan apa kha a lo ngaizawng ve deuh nge a lo text thin a niang, chu chu anuin a lo hmu sia. In hnuaiah chuan a zuk kalchilh leh hmiah. Apain a zuk hruai chhuak a, nasa tawkin an inhau ve ta a, thinrima an inhauh ka vawikhat hriatna a ni hial awm e. Apa chuan a chhang ve vak lo, Anu zawk chu a áng nasa mai a. Apa chu " Min duhkhawp loh chuan zu luhkhung rawh..kal rawh..Vanruatpui, lerha.." A ti hrep hrep a. Ka u nen kan lo ngawi reng ringawt. Apain a ngawihsan tlat rengah chuan Anu lah a thinrim telh telh si, Chempui a la lawk a, "Zoremi lu khu ka zuk la ang e" a ti ta mai a. Apain a kuah bet a, chem chu chhuhsakin, "Saidingpui, kan fate an awm hi. Insumtheihna hi ti nge i neih theih loh, i laka vawikhatmah ka la pelhe lo tih hretu pawh i ni. Zoremi khuan min lo duh ru a nih chuan hmeichhe vanduai tak a ni. Duhthlang thei se tlangval te a thlang ang chu, kei min duh hi a duh em em bik ring suh. Amah zuk hauh chiam chiam a ngai lo.." A ti ve ta a. 

Anu lah chuan, "Mitmei hmuh lo kha khatiang thu thlum kha a rawn thawn lo vang che. Kei aia i thlan zawk bulah chuan i kal thei. Englai pawn..kal rawh..kal ta che" a ti leh chiam chiam a, anu thinrim tak tak hi chu ramhuai ai pawn ka hlau zawk. Apa chuan, ben a tum a. Mahse, beng ta loin, "Fate awm lai ni lose chuan ka beng ang che. Chuan, duhtawk ang che. Ka thin i tirim dawn, Saiding" a ti ta a. A aw pawh a khur. Khatia Apain a tih takah chuan Anu chu a ngawi hmak mawle. Ngawi chiang tak a ni. Chuvang chuan Apa a nei hi ka lawmpui, mipa zaidam tawpkhawk ni lose chuan Anu kawlh lutuk vang hian an inthen daih tawh ang. Kut hi vawikhat chu a thlak, keimah vangin..kan inruk hnua palai in lo tirha Anuin apa tawng hmaa thutawp a lo sawi khan..an haw hnuah an inhau a, a biangah a beng ri thlawp mai. Anu chuan engmah a sawi zawm tawh lo" tiin. 

Pathian hian nupa kawpchawi turte hi a lo ruat thiam khawp mai a. Nu Saii leh Pa Ruatpuia pawh hi Pathian ruat dik tak an ni ka ti lo thei lo. An ni nupa ang deuh hi kan ni ve dawna hriatna te ka nei, Sangkimi hian a nu a chhunna a lantir ta zeuh zeuh bawk nen. A lunglenzia ka hre tawh a, mahse, inhauha tawng vak vak a thiam lo, Malsawmi pawh insualpuiah a sawm hmiah mai kha.. A kut hi ka tuar zeuh zeuh maithei a ni..hehe..