Rinsangkimi 12

RINSANGKIMI (12)

Ziaktu : Toni Râlte

"Umm, Sangkim, i nu hi engtikahmah a danglam ka ring lo a ni. Tha takin kal hrang zawk mai ang aw" ka ti chuai raih a. 

"Tluanga, i ti tak tak lo tiraw?" tah chhuak insúm deuh hian a ti a. 

"Ka hmangaih che a, mahse, i nu min hmuhsitna hi mihring ve tho ka nia, tawrh harsa ka ti" ka ti thláwt mai. 

"Ka nu vanga min then i tum a nih chuan i thei ngai lo vang. Ka kaltir dawn reng reng lo che" a ti chang fak a. 

"Inru leh pawh ni ila a danglam ka ring lo" ka ti tham tuak a. 

"I beidawng ta mai elo? Ka la beidawng ve hleinem..Tluang, beidawng lo vang" a rawn ti a. Huiham..ka rilru a hah. Rilru a chawl lo ê..

A tukah phur fahran loin dawrah ka chhuk a, Esi chuan Tei chu a lo be ta a niang, a rawn join nghal. Ani hi a thlawina a la rei lo va, Tawipui north 2 lamah pasal zuk neiin fa an nei hleithei lo va, chuvang chu nge an pa chuan ngaihzawng a lo neihsan pek a, a rawn haw ta a ni. Ralte tih takah bengchheng ve deuh, tawng duh leh kawm nuam tak mai a ni a. Ajei nen pawh an inkawmngeih nghal mai. A lawmawm thin e. Rilru a ipik em mai a, dawr lamah rilru ka pe hleithei lo. Lal Esi chuan puan tha vak lo a rawn veng tút a, "Va inthlak rawh, hmuh nuam deuhin inchei ve hlek la" ka ti a. Nui chungin a chhuak. A rawn let leh chuan a rawn dik ta zaih mai. Mikhualho pawh an rawn thleng tan ta a, kan buai chho ta a, rilru pawh a peng thei ta deuh. Nizan khan, "Engpawhnise, ka tel lova nun hman zir la, kei pawn theihtawp ka chhuah ang" ka ti ta kha a nia. Inthen hming chu kan pu a ni ta mai. Mahse, beiseina erawh kil khatah a la thu ve ran tho. Sangkimi hi a beidawn ka ring vak lo. Mikhualte chu ka lo chiau au ve a, Esi'n a lo be bawrh bawrh bawk. Kan thil neih a lo class ve deuh bawk a, a to pawh a to ve deuh. Pawisa min rawn pek pahin nu lian leh hmeltha tak hian, "A tui khawp mai. Rawn chawlh ziah tur a nih hi, a thianghlim bawk si" a ti a. A lawmawm duh khawp mai. Chhun lam hi chu motor veivak an tam lo bawk a, a reh thin viau. Malsawmi leh ka Kan HSS principal Mahruaii te an rawn lut hlawl mai a. 

"Dawr thar kan rawn lawm dawn" Mahruaii chuan a ti a. A nui sáng bawk. Mahruaii hi tuikhur veng lama awm an ni a, an khawsak pawh a vantlang tawk vel a niawm e. A felin a nungchang a tha em em a, mi pawi a sawi lo khawp mai. A hmel pawh a tha, mahse, ngaihzawng nghet a neih avang hian tuman beisei enin an en lem lo a nih hmel. "Ee..lo chawl teh u.." ka lo ti vat a. Malsawmi chuan, "Tlangval hausa chu i ni ta reng mai a" a ti a. Ka nui ringawt. Ka rilru retheihzia a hre lo chu a lawmawm. 

Eitur an chah a, an ei mawlh mawlh pah chuan, Malsawmi bawk chuan, "Ha ka tat hriam tawh a nia, engtik nge sa free kan ei dawn" a ti leh a. Chhan dan tur ka haihchham deuh. 

"Aa..kan hmanhmawh lo" ka ti ta ngawt a. An chhuah dawna pawisa min pek pah chuan, "In chu ka luah hrang tawh dawn a, lo leng ve thin la aw" a ti sap a. 

."Tu te in nge?" ka tih chuan, "Saw U Hlimpuia te in hnuai saw..a zia tawp" a ti a. 

"Nia, ka rawn la leng dawn nia" ka ti ve mai a. An chhuak zui nghal. Lalesi ka bulah rawn thuin, "Awii kei chu kan zirtirtu thar hi ka mil lo , a zakthei lo ka ti tawp. A awmdan vel hi ka ei lo tawp" a'n ti teh ngawt a. Hmeichhe ho tak hi chu aw..

"A fel em kha" ka ti khawmawi a. Ner sak chungin, "A mit a nghal ka ti mai, a tawng zawng hian mipa a melh ang zuk zuk a" a ti leh hmiah. Ka nui vak ringawt. Hmeichheho tenrawn mipa nih hi ka hlau tawp,. A hrehawm viau ang. Chawhnu lam sumo rawn thlen bawr velah chuan kan han buai leh ta nak nak a, buaina manhla ka ti mai. Sum pawh ka hmuh ve nual kha. Chawhmeh a rawn thleng a, bazar bul hnaia awm ho ten an la zo lehnghal vek, kan eitura ka dah hran pawh min chhuh daih. A va ho thin tak e aw. Khaw thim hma deuhin ka haw ta hnak hnak a, a chang chuan ka inkhawngaih thut thin. Ka hmangaih em em nen kan inru ve a, miin engtik nge kan inneih dawn tih min zawh hian chhan dan tur ka bangbo thin. A rem lo bur mai si. Ka inkhawngaih. Ka inbual a, ka zia a zawih êm avangin ka nu chuan, "Mama, hrehawm i ti viau a ni maw? Ka hrethiam che. Mahse, mipa takin hmachhawn rawh. A theih chuan bansan tum rawh aw" a ti mawlh mawlh a. 

"Ka tum alawm, Nu, mahse, a harsa khawp mai" ka ti sup a. Min lainat hmel tak hian min melh vawng vawng mai. Ka u pawh chuan, "Ti taka min duh lotu chu neih luih tum loh ve mai tur, tih tak êmah chuan an fanu hrisel loh loh nen, i lo tuamhlawm duh chu lawm hle zawk awm" a ti hlak hlak a. Ani hi zawng ri phawng phawng zel chi a ni ve a.

"Late, insûm thin rawh, i á thin peng pûng êm mai. Kan michhiat êm hi" ka nu chuan a lo ti vat a. Ka ngawi reng thung. Rema'n min lo call teh mial a, "Thianpa, Lo zin i phal em? Tun lai chu ka pa nen kan inhmu thiam lo deuh a, zin bo na tur ka duh deuh a" a rawn tih chuan, "Tehreng mai, lo zin rawh. Dawrah min pui ve ang a" ka ti vat a. Lo zin teh se..Rilru ipik pawh a tiziaawm ve deuh mahna. Ka nute bulah ka sawi a, ka u chuan, "Mikhual neih hi ka peih vak lo asin. Inthup ngai nun hi" a ti leh nghat a. 

"I mak teh zawng a nih hi..i nau lo duata an inah pawh inthlahrung lo va a awm theihna te an nih kha mawle.." Ka nu chuan a lo ti a. Kei erawh bathlar thlanglamah thuin ka ngaihtuahna ka kawm mai mai a, Dr. Saidingpuii tawngkam tinte ka han chhuikir a, hetiang taka a danglam thei hi mak ka ti, tu ten a bulah min sawichhia ang le? Ka nun ngei pawh ka inbih chiang ve a, mahni inhmuh sual hi chu a har ve pawh a niang, ka zu in leh Peka ka khawih kha chanchin ka neih deuh chu a ni mai a. Mami min puhna lah a dik lohzia an hre vek tawh si..ka chhing vang vang a, kan inruk laia kan hlim dunzia leh sex kan hman dan thlengin ka ngaihtuah a, ka mittui a hnâm thei hial nia! Sangkimi ka ngai lutuk. Kuah leh vawng vawng ka chák..tunah te hian engtin nge a nun a hman ve ang le..min ngaihtuah ve ang em le..Hringnun hi khalh ngil a har hle a lo nih hi. 

Video call ka dawng a, vid call hi ka la zen zen lo, thiantha te bak chu. Sangkimi a lo nia. Ka decline a, a rawn tih leh chuan ka la ta nge nge a. Khumah a mu bawkkhup a, ear phone a vuah bawk. A nui naa, a nuih a za reng reng lo tih ka hrethiam. "Ti nge tah khan i thut?" A rawn ti a. Ani chuan chhunah pawh min lo text a, inthen miah lo angin a ni min la biak ni. Awmdan thiam a har hle. 

"Ka thu mai mai" ka ti a. 

"Ka ngai che" a rawn tih chuan ka thaw hawk ringawt. Ka ngaih vezia ka hrilh chuan harsatna ka insiam nasa mai mai dawn tih ka hria. Hnip taka awm ka duh lo bur. "Min ngai tawh suh" ka'n ti ngawt a. 

"Ka thei hleinem..Naktukah ka rawn chhuk dawn. Engmah ka pawisa vak tawh dawn lo" a ti hmak hmak a. 

"I nuin a rawn zawng leh che ang a, kan mualpho mai mai" ka ti a. 

"Mualpho te lek lek, a ho ee.. Eng atan mah ka ti lo" a ti hmiah. 

"Sangkim, ka dah aw..ka mu dawn. Muttui le" ka ti a. A tawng hmain ka dah. Ka mu ta nghal bawk a. Min rawn text naa, ka seen duh tlat lo. Amah ka khawngaih loh leh hmangaih loh vang ni loin a nu hian a fanuin min hmangaihzia hi hria se ka duh ve êm a, bakah khatiang taka induh lohna lantir kha mihring nih ve chuan dawnsawn a harsa ve khawp mai. Mipa ka la ni zui bawk nen. 

Ka mut tlem avangin ka tho tlai viau. Ajei hian chabi spare a kawl tho a, a lo zuk kal hma thin. Chaw pawh ka ei peih lo. Ka nu chuan, "Mama, zu ah te khan i tuan leh hlauh ang e, nangmah intichhe duh miah suh. Hmasawn nan hman tum zawk rawh" a ti lawm lawm a. Zu hi chu in a chakawm fo mai. Ka nu sawi anga mi tlachhia tia min sawi ka duh loh avangin ka hlat hram hram thin. Rema a rawn chho dawn bawk nen, intihharh tum takin dawr lam ka pan a. An buai zualpui a lo reh tawh zawk a. Zing tawkah ei in hi chu an siam sa vek thin. Siam chawp ngai erawh a awm ve a. Ka'n thu ren rawn a, lut chhuak apui hi kan ngah ve a, khaw chhung mi hi an rawn chawl duh viau bawk, a lawmawm thin khawp mai. High school lamin canteen nghaktu an neih tak loh avangin an rawn order thin tawh dawn bawk a. A lawmawm. Chawhma lamah vai sipai ho an rawn lut huk mai a. English an thiam si lo, kei lahin hindi ka thiam bawk si lo. Zaizirin kan inbe ta nawk nawk a. Eitur te pawh an duhzawng kan lo nei ve bawk a, an tam tham nen, kan hlawk phah reuh hle. Hlim takin kan invai liam ta a. An kal fel deuh chiah tihin Sangkimi a rawn lang hlawl mai. Ka phu zawk nghe nghe . ka beisei miah lo kha a nia. Ka bulah a rawn thu a, ani chu rilru hah leh na hmel pawh a pu vein ka hre lo. "I inhralh tha em?" a ti a. 

."Aw a zia ve reng mai" pangngai takin ka lo ti a. 

"Dhoi kha in nei tiraw? Ei ang aw" tih leh thawha fridge va hawn a rual nghal. Fridge hi ka pate ta , a chhiat mai an hlauh vanga patea ten an lak phei kha ka la phei ve leh a ni. A lum bawk a, dhoi chu kan nei duh a. Sawi tur ka hre vak lo. Amah zawk chuan, "Khatin thlawk chhuak mai tur hmel kha pu ûl reng lo teh. I hlauhawm" a ti hlak hlak a. 

Melh háw chungin, "I nu a rawn kal ang e" ka ti hmuk. 

"Lo kal se a ho ee..i hlau mi?" A la ti zui! A zia chu a danglam tlat. A thawveng halh mai bawk si. "Ti nge tihhian i awm?" Ka ti ta nghe nghe a. 

A nui hak a, "Nge a ho.. I lungngai lutuk a nih kha" a la ti zui. Ruih a nei mawni aw ka ti hial. Mahse, eng rim mah chu a nam chuang lo va, ama rim ve reng rimtui tak bak rim dang a awm lo. Ka kut chu a ruk deuha rawn vuanin, "Tluanga, i beidawng tak tak em ni?" A ti a. Za lo zeta nuiin, "Beisei tur eng nge la awm a?" Ka ti nghut. 

"A tam mai. Kei chuan beidawn ka tum lo. Ka nu pawh ka hneh ngei ngei ang. Min ring rawh" a ti sak sak a.

"Tum buai tawh lo mai rawh. Tihian thinrim lovin intha then ila a tawk mai alawm" ka tih chuan a ding hluai a, "I va mak teh fo e aw. Inthen chu i duh tak tak a maw? Midang i nei anih kha tiraw? Chhuanlam siamin inthen thu i sawi reng a" a ti ta hlaih hlaih mai. A te reuh sia, a aw lah chu a ring zêk, a meng ling hlar bawk a. Esi te bakah Tei te pawh an rawn dak huang mai. Ka pawt thu leh a, "Insum rawh. Dawr a nih hi..midang ka nei lo. Neih tumna pawh ka nei rih lo" ka ti nghet charh a. Dawhkanah a kiu nghatin a indawmkun vang vang. 

"Kan inru hial tawh a, a tawp thlenga min kalpui i peih lo a nih chuan inruk ka rawt khan rawn kal lo mai ta che" a ti hmiah hmiah a. 

Customer kan nei zui ta si, ka theihtawp chhuahin inbengdaihtir ka tum a. " I mak khawp mai. Mahse, kei chuan ka then lo che. Ka thianghlimna ka hlan tawh che a, eng harsatna pawh awm rawh se, ka nei ang che" a ti fiah kâk a. Zahawm ka ti, ka duhna leh hmangaih a a bo si lo. Thinrim zetin min hawnsan ta a. Esi a rawn kal a, "A thin a va rim awm ve" a ti a, a nui bawk. 

"A buaithlak a nih hi maw" ka ti ringawt. Ni e, Sangkimi khan sawi dik loh a nei lo, ka pa tawk lo te pawh a niang. Peka te ang pawh an inruk tawh chuan an duh lo viau mahse, an rem thei. Ti nge kan lo hawn kher kher ni aw. Mipa tan chuan ruk tawh hnu neih theih loh chu a zahthlak ve duh khawp mai. Tlaiah Rema pawh sumoah a rawn chuang vûk vûk a, kan han inhmu chu ka hai têp alawm le. A lo inmet fai vang tawh a, hmuh a nuamin a lang naupang hle. A palian bawk a, a aw lah hi a pa si, Tei te chuan an en duh khawp mai. Ni dang aia hmain kan inkhar a, kan haw chho ta a. 

A pa nen an inhmuh thiam loh dante chu a sawi ve nuah nuah a. "ka farnu khan palai hmel a hmu ve tawh a, min ràwn der miah lo va thutlukna an siam kha ka vui thu ka sawi ve dêk dêk a, 'He in chhungah hian i thu lo ber, i chhungte tihmualpho bak thiam i nei lo' mi ti khanglang a. Ka la na riau alawm le..ka nu phei chuan ka pa pawh a khak nghe nghe. Lehlamah kei pawh ka dik bik lo va, ka sual ve thin êm a, mahse,in chhunga buaina siam ching ka ni lem lo. Insual lamah hian ka hming hi a langsar ve thin a, ka timualpho ve bawk a ni. Kan inbe thei ta der lo va, ka ning lutuk ka rawn zin ta tawp a nih hi" a ti a. A pa pawh chuan a timak ka ti ve deuh. Kan in kan thlen chuan ka nu chuan a lo be nghal bawrh bawrh a, ka u inthlak zo rawn chhuak leh Rema te han inhmu chu ka ngaihbel nge eng emaw hi a thleng tlata hriatna ka nei. An inchibai laite chuan min khap miah lo hian an inmelh dun reng mai a. Sangkimi nena kan inhmuh hmasak bera kan awmdan kha min hriatchhuahtir..ka nuihte pawh a za deuh. Rema inbual zawhah ka inbual ve a, zanriah pawh kan ei tlai deuh. Ka u chu a tawng tha ngam mang der lo va, Rema leh ka nu erawh an inkawm bawrh bawrh mai. Chaw ei khamah, "In nu chu min rimpui ve dawn em?" a ti a. Engmah a chin chhuakin ka la hrilh lem lo va, bathlarah chhuahpuiin ka hrilh ta vek a. 

"An va timak bawk ve mawle..in innei vat turah ka lo ngai ringawt asin. Thianpa, a ho em mai. Mahni tawkah induhtawk ve larh tur, min duh lotu na na ná hi chu umzui huam huam loh a tha. Hmeichhia te chu an tam em mai" a ti bawrh bawrh a. A ngaih lah hi a sam thin sia. Mahse, infuihna tha tak a ni. Valtea a rawn thleng a,vawiinah a aiawt chiah a lo en chu niin chakai min rawn pe ve nual mai. Rema nen pawh chuan an inkawm thei nghal mai a. Lui kalte kan sawikai a, Rema lah chuan a lo chak sakhai bawk si nen, kan sawi phur ta hle..naktuk inrinni zana zan khat riaka kal kan ti ta a, Sunday ka inkhawm thei dawn ta lo a nih hmel. A pawi vak lo, min thunun dawn sia, ka zak ve deuh. Valtea hawn hnu lawkah mut zai kan rel a, khua a lum bakah ka khum a lian vak si lo nen, Rema chu ka khum ka kian naa a duh tlat si lo. Thutthleng seia mut a tum ta a, ka u chuan a sin tur leh lukhamte a va laksak a, ha ka nawh lai chuan zawitea an inbia chu ka va hmu a, eng nge an sawi erawh ka hre pha lo. An inkarah hian eng emaw tak zawng a awm chiangin ka hria. Awm mah se ka pawiti lem lo, Rema hi misual a ni hran lo bawk a, an khawsakte a lo tha ve bawk nen. Ka mut hnuah Sangkimi msg ka chhiar loh ho chu ka chhiar ta a. 

"Aizawla min dah phei a tum leh tawh a, Mahse, ka hnial fithla thak. A danglam thei a nih chuan ka danglam ve thei tih ka entir dawn a ni. Tluanga, ka nu avangin i na a, min hlat i tum ka hria..ka dem lo che a nia. Mahse, midang nei suh aw. " a rawn tih ngawih ngawih takah chuan ka khawngaih leh ta êm êm a. Midang hi chu ka nei thei rih dawn lo hul hual. Hlat ka tum tak tak tih a hrethiam ta chu thaw huai tur ka nih laiin ka ipik tho mai. Ka lo hmangaih hle a lo ni. Mahse, Dr. Saidingi tawngkam tinte khan min rawn chhun na leh thin si. Ka ngaihtuah a, Peka ten min khawih rawn pawh khan Pa Ruatpuia thinrim em em laiin Nu Saii erawh a ngawi tlat a. Peka'n a fanu a blackmail tih a hriat hnuah pawh hma a la hek lo, he thil pawh hi min tina tham a ni. Engvangin nge a fanu thlavang hauha ka chetna chuan dem a hlawh bik a? A fanu vanga ka zu inna chu a mitah a len bik viau? A tirtê a tang khan min lo duh lo tawh a nih ka ring rum rum. Tin, U Zuali te ka atangin Pi Rengi nen pawh an inbe tha hle tho a, Pi Rengi lah a leng reng reng bawk. Khati khawp khan Peka'n a fanu a tina chung pawha Pi Rengi a la titha thei hi a chhan hriat a chakawm. Esi'n miin an sawi dan thenkhat che chu maw tia min hrilh, "Tluanga te chu a pa a chhun em mai, a pa pawh a hma zawnga zu in ngai lo tikhan a ngaihzawng vangin a in a, Tluanga pawh chuti tho. Nupui pawh nei se a pa ang thoin ngaihzawng a neihsan ang" tih vel te kha ka ngaihtuah a, Sangkimi ka neih theih lohna tur chhuanlam tling ka ti ve thei lo. Nge thingtlang mi ka nih vang hrim hrim hian min hnualsuat zawk? Hmeithai fapa ka nih vang em ni ang? Huiham..chhanna min pe theitu chu Dr. Saidingpuii chauh a ni. 

Malsawmi lah hian min rawn be ve sek lehnghal a. Ka chhan that peih loh paw'n a rawn ti reng peih tho. Min neih let leh hi a tum viau tak tak em mawni..ka duh tawh teuh lo mai si a. Baby pawn, "In inneih nia ka hak tur kawr mawi tawk ka thuitir dawn" a rawn ti a. Ani hi kan HSS a thawk Vanlala nen an inzui ve tawh a, a fel thin teh e. Sangkimi thlaktu atan chuan kan khuaah na na na chuan laktlak ka ti ber awm e. A tukah chuan Rema nen dawr lamah kan chhuk a, ani hi ka rin loh deuhin mistiri hna a lo thiam phian mai a. In hnuai lama zawimuanga khawih atan kan tih khum siamte chu ka sawipui chuan, "A hautak dawn lutuk, khum siam chu, chu ai chuan dawhkang ila mi pakhat mutna lengin, hostel ang deuhin pin hran pawh a buaithlak, hmeichhia leh mipa room awm hrang se a tawk reng" a ti ta a. Kan lo ngaihtuah chhuak miah lo. "Zuk en chhin la, han ruahman vel teh" ka ti a. A zu chhuk ta a. Mikhual ho ka lo dawngsawng thung. Vawiin chu customer kan ngah ve hle. Esi ka pui zak zak mai. Ka pu pawisa ka puk hi rul zo vat ila, ba neih hi hrehawm ka ti. Ka aiawha thawk ta Dinmawia pawh a fel viau a niang, ka pu pawn a fak ve hle. A hlawh pawh an tihsan ve hlek kha. Zan lamah luiah kan kal dawn bawk nen, kan inkhar hma deuh a. Sangkimi'n min rawn be ta miah lo va, mak ka ti deuh. Mahse, a tha min hlat theih phawt chuan..hun hian kan ná te chu a thawidam ve leh mai zel e. Rema nen chuan kan insiam sawk sawk a, ka u-in buhfai leh tul dangte a lo siam fel bawk. Valtea chu kan sawm chho a, ani pawh a lo inpeih at tawh. Kan kal ta nghal a, Lui kan zu thlen meuh chuan khua a thim chhulh tawh, kan kal chak viau naa, a hla tham ve bawk a ni. Hmanhmawh takin riahbúk kan sual a. Valtea a ramvachal bawk a, changel a va pu bawr lúk a, keiin riahbuk bulah eirel ka lo buatsaih thung. Chaw ka chhum ta phawt a, a hmaa an riahna hlui a ni bawk a, thuk pawh a awm sa. Rema'n thing a lo fawm ve thung a, ani pawh khawpuia awm a ni naa Hauruang luiah te pawh kal hrat ve tak a lo nia, a zei lo miah lo. Valtea nen chuan búk chu kan han sual fel a, khua a lum tho a, a bang erawh kan kan uluk tehchiam lo. Chingpirinu a hram a hram a, hmana ka mumang, Sangkimi a nuin a hnuh hawn kha ka hrechhuak zawk. Kha mumang kha tunah hian a thleng dik ta mai em ni ang? Ka lu ka thing nur nur a, ngaihtuah loh hram ka tum. Luiah chuan signal a awm lo bawk a, phone pawh a tangkai nêp viau. Dar 8 bawrah chaw chu kan ei hman hram. Ril a tam tlang tawh bawk a, kan hai kaw duak duak mai. Chaw eikhamah zial zuin kan han thu khawmuang a. Len khang zar turin lui mawng lam kan zawh thla ta a. Kan zar pah zel bawk. Kan kal thui ta viau mai. He lui Nghasih lui an tih mai hi sangha an lian deuh a, a panna a hlat tham vangin lehlanga kal an awm ngai mang lo thung. Lengkir kan thlen takah chuan kan thu ta rih a. Dar 10 a lo pel tawh. Chutia kan thutkhawm dal lai chuan kan thlang lengkir atang chuan pa pakhat aw hi aw tial ruanin a rawn au ta mai a. Kan phu dual hlawm mai. Valtea chuan meichher chuan a zuk ên a, a ên thui loh êm avangin tumah kan zuk hmu lem lo. A hnu lawkah, hmeichhe aw zawk hian, "Min chhan r'u, min tanpui r'u.." a rawn ti leh ta. Valtea nen kan inmelh zawk mai. A rual deuhthaw hian, "Sangkimi" kan ti thawt a. Hlauhthawnna namên loin min tuam nghal. A rang a rangin lengkir hmawrah chuan ka zuk dak a. "Sangkim" ka ti ta nghek. 

"Min tanpui r'u.." Sangkimi aw chu kan bul lawkah a rawn ri ta. Valtea chuan, "Sangkim, nangmah tiraw? Hlau reng reng suh aw. Hei Tluanga nen kan awm a nia. Kan bulah rawn kal rawh. Tluanga kapkar hi rawn bel rawh le.." A ti tuar tuar a. Rema erawh a ngaihna hre lo zetin a lo ding reng ringawt. Kei chu hlauthawnnin ka tha a tikhur a, Sangkimi'n eng nge a tawn tih ka hre si lo. Mahse, inti pachangin, "Sangkim, lo kal rawh le..Ka venghim thei che. Kan hawnpui ang che aw. Lo kal rawh, tuman an tina lovang che. " ka ti nghut nghut a, ka tha khur leh ka hlauhthawnna te pawh a reh nghal duak mai. 

Sangkimi thawm chu a reh ta a. Kan bulah a thla chuan min uap tih erawh ka chhungril hian a hria. Valtea chuan, "Tluanga, eng dang tihtheih a awm tawh lo. Len khang lah kan lo zar hman tawh si, nangman Sangkimi kha han hawnpui la, khua i luh hunah tumah i be tur a ni lo aw. Chak takin kal ang che. Kal rawh u le" a rawn ti ta a. Kei pawh ka pen nghal páwk páwk, sangkimi pawh chu ka hmaah a kal ve zel niin ka hre tlat. Ka rilru hahzia leh buaizia tak kha aw..ka tah a chhuak lutuk. Ka hmangaih ka duat em em chuan thihna a sual mêk chu a ni sia maw? Engvang teh thut nge? Keimah vang em ni? Nge a natna a chhuak leh zawk? Ka kal chak thawkhat a niang, Valtea te huan pawh ka hriat loh karin ka lo kalpel daih a, hah lah ka hre lo reng reng. Khaw chhung chu dar 11:40 velah ka lut ta a, kan inah pawh peng loin damdawi in tlang lam panin ke bawk chuan ka chho nal nal, mi ka tawk zeuh zeuh a, min lo bia, mahse, tumah ka chhang lo. Damdawi in tlang ka thleng chho a, khawiah zawk nge kal tur tiha ka buai laiin damdawi ina Pa Ruatpuia vei thuak thuak chu ka va hmu a, ka pan ding nghal. Ka va luh rual rual chuan, Doctori aw hian, "Awii a mar a rawn phu leh e. Lalpa, ka lawm e. Ka lawm takzet e" a ti ta chul a. Midang ho chuan min lo en hrek hrek hlawm. Ka va pan nghal rawp a, a kutah vuanin, "Ka duatpui, thihna i lo sual a maw? Ka va lainat tak che êm. Thlamuang takin awm tawh rawh aw. Ka hmangaih che" ka ti nghal mawlh mawlh. Doctori chu a rawn tap chhuak hawm hawm mai, makti zetin ka melh a, "Tluanga, Tluangpui, min ngaidam lul teh aw. Engkimah khan..pawi ka ti lutuk. Ka fanu i hmangaihna hi a lem a ni lo tih ka fiah ta khawp mai. In innei ang, in innei dawn khawp e. " a ti ta hliam hliam mai a. Aw.. Thu ngaihnawm ber a va ni tehlul èm. Pa RIna chuan, "Hnathawh thawmhnaw nen i ni tup sia, eng nge awmzia? Ramah i kal em ni?" ngaihthat hmel vak loh hian min lo ti a. Kei chuan, "Luiah lenkhang zara riah kan tum a. Nghasih lui mawng lengkir sang ve deuh kan thlen khan kan duhtawk ta a. Chutih lai chuan lengkir atangin pa pakhat hi a rawn au ruai ruai a, meichher nena kan zu ên vel pawn tumah kan hmu si lo, a hnu lawkah Sangkimi thla ài ri kan hre zui ta a, hmanhmawh takin ka rawn hawnpui ta a nih hi" ka tih chuan an chek ta tlat tlat a. Pa Ruatpuia rawn kalin mittui khap per sak sak chung hian ka darah a rawn hmer a, "Tluangpui, i lei tam tak kan ba ta. Mateii damna i ni, kan fanu nunna chhanchhuaktu i ni ta..i rawn luh ruala Mateii mar phu tawh lo a rawn phut leh khan mak ka lo ti tawh rêng a ni. Kan lawm takzet aw" a ti vawng vawng a. 

"Ka pu, Lawmthu sawi a ngai lo, ka tihtur diktak ka ti zawk alawm. Amah venhim hi ka mawhphurhna a ni. Mahse, engtia damlo thut nge a nih reng reng le" ka ti a. Doctori nen chuan an inmelh zawk, "A lungphu a rawn buai leh thut a mawle..a la na ta riau a. " a ti mai a. Chutiang lo deuh chu a nih ka ring rilru deuh. An hmelhmaiah. Sangkimi bulah ka thu leh a, a thaw pawh a pangngai, ka chul ka chul a. Pi Rengpuii chuan, "Doctor, ka be lawk duh che" a rawn ti a. A lamah kan hawi leh dual, Doctori chu a ding nalh a. "Aw le..Ruatpui, lo awm r'u..Tluanga, i duh leh han inthlak rawh. A that tawh viau kha..hlauthawng suh aw" a ti hram hram a. Nurse thenkhat bakah awm ve dangte pawh chu an kalsawn ta rih. Pa Ruatpuia nen chauh chuan kan awm ta a. 

"A nat dan i sawi kha tak tak em ni?" ka ti ta a. A chil a lem khawlh a, a hawi kual deuh bawk. Tumah midang an awm ve lo tih a hriat hnuah zawi deuh zawk hian, "Dar 8 bawr velah A u a pindan atanga rawn chhuak khan, " Mateii room atangin eng emaw ni a rawn ri thawk mai a. Ka ngaih a tha tlat lo, amah ka koh lahin a reh bawk sia" a rawn ti a. Tunhnaiah in inkar avangin a danglam em em bawk nen, hlauthawng takin kan va lut a, a room kawngka pawh kan nek chhe ringawt alawm. A kalh tlat sia, Mateii chu thlanglam tukverh parda zarna chunga thir khamah hrui lo thlungin a lo inkhai ta mai a. A u nen kan va pawm kang vat. A nu erawh doctor a ni naa, kil khatah a lo khur zawih zawih ringawt. A áwmte nemin tihharh kan tum nasa a, eng a an theih loh avangin damdawi in lamah kan zawn thla ta a, midang bulah chuan a lungphu tha lo chhuak angin kan sawi tawp mai a ni. A mar chu a rawn phu ve leh ta a, mahse, muang em em a, phu lo ang vel a ni. A zawi bawk si. Tluanga, Pathianin a ruat ngang che u a niang e, in lui kalna khera a thla rawn ái te chu..a mak ka ti khawp mai" a ti ta a. Karei! Sangkimi'n inawhhlum a lo tum a maw? Kan va chhan hman lo teuh ther ther êm. 

"Ka pu, min hrethiam la, A nuin khati taka min duh ta lo kha chu ka beidawng leh induhtawk khan inthen ka rawt a, ka hnaih duh ta lo va, chung a rilru buai leh a nu in min duh bawk si lo kual vel vanga ti a nih dawn chu. Rilru fim pu se a ti hauh lo vang. Chutiang mi a ni lo" ka ti nghet charh a. 

A bu nghut a, "Ih e, Tluangpui, i nu Saii hi hrethiam teh. Kei takngial pawn heti taka a danglam hi ka hrethiam lo. Chhan tha tak a neih vangah ka han ngaihsak a, Mateii hmel ka hmuhin ka khawngaih bawk si, muthmunah pawh vawitam kan inzilhhau tawh. 'A nei thei lo alawm. ' tih bak sawi tur a nei ngai lo. Nupuite rilru hmin lo chung chunga ka fanu kaltir chu ka hreh ve tho bawk si. Mahse, kha zaninah chuan amah ngeiin a sawi tawh kha..palai pawh in rawn tir tha leh mai a niang chu" a ti dam ta thlup a. Ka hlimnain van a tawng ka ti thei ang. Sangkimi ka nupui a ni dawn, chu thu ringawt chuan vawi leh khatah pawh min tinui thei nghal nia. 

"Nia, kan rawn tir leh anga a ni mai lawm..a hma lamah ni thei hram se kan inneih dawn pawn. A rial rei lutuk chuan harsatna dang kan tawk leh ang" ka ti a. Ka zak duh tawh bik lo. "Ni rawh se, harsatna hi hote anga lang pawh nise…" a tih mek laiin Dr. Saidingi thinrim awrawl kan hre ta mai a. Kan bengkhawn vat, "I duh duh ti rawh. Rengi, hei chen ka tuar tawh, nangni nufa phiangsen vangin ka fanu ka chân phah têp a, i ngam ngam ka ngam e. Finfiahna leh thuhretu pawh i nei lo bawk. Ka inneihtir dawn a ni mai. A bak a awm lo" a ti ta bawrh bawrh mai a. 

Kan chhuak ve vat, Nau neihna ward bulah chuan Pi Rengi nen an lo indinchilh ran mai. Pi Rengi chuan, "Aw ka ti ang, finfiahna ka neih a ngai lo, ka makpa SP a nia lawm" a ti páng páng a. A makpa SP hi a hlu awm mang e, a sawi teivet reng mai. Eng vang tak chuan inhau ni maw? Kan bo hú mai si. Pi Rengi chuan awmkhawmte lam chu rawn hawiin, "He doctor Saidingpuii hi tualthattu a nih hi. Sangkimi chhangtu tur a chhiat anga in hriat kha ama thah ngei a ni e. Darpuia a thawh lai khan kei pawh ka thawk ve a, an upa ber a rawn piang a, A chhang tur a pai leh hma hian Ruatpuia hi a kál that loh vangin Aizawlah reitak a han awm a. Chumi chhung chuan Saidingpuii hian ngaihzawng neiin chu a ngaihzawng chu Ayush Doctor rawn awm thar Liansanga a ni. An pa a awm si lo va, Liansanga nen khan hun thawl an ngah dun thin khawp ang. Nau hial a pai ta a, an pa bulah a han zin ta vat a. An pain a fa anga a ngaih theih nan a ni tehchêk ang chu. Mahse, an rawn hawn leh hnuah damdawi chi khat naute in an huat em em, nau tlakna a tan pawha an hman ve thin a ei lai ngei ka hmu ta a, vawi khat mai pawh ni lo, vawi 3 lai ka hmu. Nau neih a lo hun a, Keimah ngei hian ka chharsak bawk. Mahse naute a lo duk vek a, a lo thi fel der tawh. He mihring hian a that tih hriat reng reng. Police hrilh ila an man nghal ang. An pa a rawn awm atanga reivakloah Liansanga pawh chu ama inah inawkhluma chhar a ni ta a ni. Kha pawh Saidingi thiltih a ni lo tih tu nge hria? He doctor hi mi hlauhawm, uirenu, tualthattu a nih hi" a ti ta hlawih hlawih mai le. A biang a ri nghal thlawp, "Uirenu ka ni lo hulhual e. Liansanga nen khan eng inzawmna mah kan nei hek lo. " a ti vawt raih a. Pi Rengi chuan elsen zeta nuih pahin, "A nih chuan i fanu leh Tluanga i inneihtir dawn a nih chuan khang thu kha ka thehdarh ang tia ka vau che khan engvangin nge ka thu i awih si a? Mawh?" A ti ta tuar tuar a. Pa Ruatpuia chu va kal hnaiin a nupui chu a melh tlawk tlawk a. "Ka thu hriat hi a dik em?Saidingpui" a ti rum ûl mai. Doctori chu a thu hnawk a, bang chu a ngheng bawk. A tap ta hlawp hlawp a, a hmai a hup bawk. Pi Rengi lah chuan, "Kha maw..thudik lo ka sawi lo ..tikhan he nu mize diktak hi in hre tawh ang chu" a lo ti vel a. Kei pawh ka thu hriat chuan min deng na ve khawp tho mai. Ka rin loh lam lutuk a lo ni bawk nen. Doctori chuan a hmai hupna chu la thlain, a pasal chu a melh chho a. 

"vawi tam hrilh che ka tum thin. Ka huaisen ve tawk emaw ka tih laiin i bula sawi êm chu ka ngam ngang lo a ni. Min ngaidam miah suh. Mahse, Rengi thusawi kha a dik tawk lo a ni. Thudik chu hei zawk hi a ni. Liansanga nen khan kan inngaizawng lo va, pasal ka nei tawh a, ka pasal tan ka damchhunga rinawm ka tum bawk. Nia, Aizawla i han awm bo hlan khan Liansanga hi a rawn leng lut fo a, Mama pawn a ngaina ve hial hman a ni. Mahse, zan khat chu Liansanga a rawn kal leh a, Mama pawh kar loah a muhil a, kan inkawm bawrh bawrh a, amah Liansanga kha a mawngte a lo zàngin a fel duam duam viau a, mipa hna ka tih ve theih loh angah te pawh min puitu ber a ni thin. Mahse, ka laka rilru chhia a pu ang tih reng ka lo ring phak lo. Thingpui ka va siam a, Mama a tah avangin pindanah ka va tlan lut a, hnute ka va pe a. A mu ve leh mai. Ka va phei leh a, thingpui pawh chu ka in ve nghal. Ka thingpui inah khan damdawi a lo pawlh chu niin rilru harh tho siin ka taksa chu a che thei ta reng reng lo mai a. Ni e, Ruatpui, Liansanga khan ka chet theih miau loh avangin kan in chhungah ngei khan min pawngsual ta a ni. Ka fel loh lai tak a lo ni bawk nen, ka hlauthawng takzet a. Ka rilru a na bawk. Liansanga chu vawikhatmah rawn kal tawh lo turin ka ti a. Report thehluh ka tum ut ut naa, khaw mi ten an hriat chuan min ngaihdan zawk a dan phah vek ka hlau ve bawk si, report kha lo thehlut ila a tha mai tur. Ka ngaihtuah tawi deuh a ni. Tichuan, ka lo rin ruk ang ngeiin ka rai ta a! Ka manganzia kha aw. Aizawlah rawn kalin nang pawh ka hruai thla ta che a. Min uap loh chuan Liansanga khan chet a lak leh mai ka hlau êm a tin ni. Ani pawh a rawn lang ngai tawh lo va, phone atanga min rawn biak a chin avangin ka block ta vek bawk. Nang nen nupa nun kan hman loh rei tawh avangin ka nau pai chu Liansanga fa ngei a ni tih ka hria a, neih ka duh lo a ni. Tichuan, Rengi sawi ang khan damdawi ka ei ta a. Ni e, in duh chuan min dem thei ang. A hmel ka hmuh apianga huatnaa ka khahna tur naute chu rawn piang lo zawk se a tha zawk tih ngaihdan ka nei a. Nau a tlak mai loh avangin ka ei leh nghe nghe. Mahse, vanduaithlak takin naute a lo insiam hman tawh a, thi sain ka hring ta a nih kha..doctor ka ni a, midangte nunna chhanhima thlamuantu tur ka nih laiin ka fa ngei ka titla a, dem theih ka ni e. Mahse, ka pasal fa ni lo va min pawngsualtu fa chu hlim tak leh hmangaih taka ka pawm theih ka ring lo. A rawn pian chhuah khan ka lainat lutuk, mahse, tihtheih a awm tawh lo. Tichuan, Liansanga'n ka nun a lo tihhrehawm dan te ka ngaihtuah a, zalen taka a leng leh a hlim ka hmuh chuan tihnat ve ka duh a, mahse, engmah a chungah ka ti lo. Ka chet ve hmain chunglamin phuba min rawn laksak ta zawk a, a inawkhlum a nih kha. A inawhhlum chhan kha ka hre hauh lo. Mahse, a thih khan ka lawm..Kha thil kha Rengi hian zeldin kualin tunah tlang hriatah leh ka pasal hrilha min vauin Mateii leh Tluanga te inneihtir lo turin min ti a. A thu hriat dan dik tawk lo kha khawtlang leh kan pa ngei pawn hria se, min hmuh dan tur leh Doctor atang hial pawha ban ka ni thei tih ka inhriat avangin Mateii te lakah pawh ka khauh tlat reng a nih kha, nula tlangval an ni a, an la inthen leh theih mai ka beisei a ni.Tin, Peka'n nikhaw hre lo va a awmtir leh a mutpui anga a lo insawi te pawh hmalak ka duh em em, ka thinrim lutuk. Mahse, he mihring bawk hian ka kawng a lo dal zel si a, ka pasal ngei pawh khap daiin hma pawh kan la ta lo a nih kha. Ka hma ka lo sial êm a, tuar lo tur tur ten in tawrh phah a. Min ngaidam thei lo a nih pawhin demna che u ka nei reng reng lo…" a ti khur ta dar dar a. A hmui a pet leh fan fan bawk. Pa Ruatpuia chu a ding khawng reng a, a mitmeng buaizia chu aw..

Pi Rengi'n, "A insawithiamna mai mai a nih kha. Liansanga a thi tawh a, thudik tuman kan hre lo" a lo tih chuan, Pa Ruatpuia'n , "Saidingpuii'n dáwt min hrilh ngai lo" a lo ti hmiah mai le. Chutah thu vein a nupui inthlahrung ngawih ngawih chu a mittui a hruksak a, a àwmah a kuah bet ta thlawp.."Nangmahin i lo va tuar rei ve, ti nge ka bulah i zêp? Ka then daih che i lo hlau em ni? I rinawmzia leh min hmangaihzia hi ka hai ngai hleinem. A tirtêah min hrilh nila Liansanga pawh jailah kan dah thei tur..mahse, a nih nih a ni vek tawh..Saidingpui, ka ngaidam a che, ka ngaidam thlap che. Ka tel loin engmah i tuar tawh tur a ni lo.." A ti nghut nghut a. Ka hnuk a lo ulh ve lek lek nia! 

Pi Rengi rawn tawng tum chu Pa Rina'n, "Ngawi rawh, Rengpui, nangni nufa hi mi hnawksak in nih hi. In rilru chhiat dan em em te hi, khawtlang pawn an ngaithei tawh lo che u, Mi inhmangaih lai ngawih ngawih pawh then tuma chuti taka hma te i lo lak le? Mai mai che hian, vawikhatmah mi nunah inrawlh tawh suh. Thiante u, kan thu hriat kha kan zêp tlat tur a ni. Thenawm khawveng, thawkho vek kan ni a, kan pi felzia leh taimakzia, damlo te tana a thlamuanpuiawmzia te, a staff te tana a inpekzia leh hrawn a nawmzia hretu te vek kan ni. Kan pi hi dáwt hmanga tihmualpho a ni tur a ni lo hul hual. Khawiah emaw sawi rik a awm a nih chuan in rethei viau ang. Hre rawh u" a lo ti hmiah hmiah mai le..ka va tan tak êm. Midang pawh chu an lo bu ve nghat nghat hlawm mai. Pi Rengi chu thinrim zetin a kal tau ta daih a. Kei pawh Sangkimi bulah ka thu leh tawh. A rawn rum tiah tiah a, ka ngaihven vat, rawn meng diar diarin min rawn hmu chu a meng fiah káwk, "Tluanga thlarau i ni lo tiraw?" A tih chuan ka nuih a za deuh, a kut chu vawnsakin ka fawhsak zauh a, "Keimah ngei ka ni e..Duatpui, i dam vat a ngai. Kan innei dawn" ka ti sup a. 

"Dawt hmangin min hnem kher suh" a ti nghat a. 

"I nu paw'n a phal tawh.." Ka tih chuan a rawn kàng awk a, "Hei..tak tak em? " a ti nghek. 

"Tak tak ni e, In nei dawn..Bawihte" ka hnung lam atangin Dr. Sadingpuii chuan a rawn ti láng láng a..