Rinsangkimi 11

RINSANGKIMI (11)

Ziaktu: Toni Râlte

Ka thu chhuak hlawl mai a. Ka harh kêk kàwk viau bawk. "Khaw nge i awm?" Ka ti nghut a. 

"Inah..ka pindanah, mahse, min lo hruai rawh. Naktukah ka nuin Aizawla min dah phei a tum, rawn kir leh tawh lo turin" a tih chuan ka mur er er thei. Nghet zeta phone hum chung chuan, "I lo chhuak thei dawn em ni?" Ka ti a. 

"Thei ang, kawng dang kan nei lo, Tluang.." A rawn tih chuan, beidawnna awràwl te pawh ka hre tel thei. Ka chhing sawk a, "Ka lo nghak ang che" a ti zawi sap a. A dah zui nghal. Ka ding a, ka lu chunga ka kut pahnih chu suihin chunglam ka melh a. "Lalpa, eng nge ka tih ang?" ka'n ti ngial a. Hmeichhia engmah pawisak nei zo tawh lo khawpa min hmangaihtu hi ka tina thei dawn em ni? Mahse, ka mipatna chuan, "Khatiang khawpa hmusittu che fanu kha i tuamhlawm ang maw?" A rawn ti bawk si. Ka thaw hawk a, ka nu ráwn mai ka rilruk ta nge nge a, Sangkimi'n min lo nghah reng chuan ka muhil thei bik dawn chuang lo. Ka nute chu ka va kaitho ta ngawt a. Hàm bai bai chunga rawn thoin, "Eng nge ni ta?" A ti a. 

Thutthlengah ka thutpui sauh sauh a, zanina thil thlen dan zawng zawng leh Sangkimi'n min nghah thute chu ka sawi ta vek a. A ngawih reng hnuah, "Chuan, Ruk chu i tum deuh tihna em ni!" A ti sap a. 

"Ka hrethiam lo chu tak chu. Ru pawh ni ila, Doctori thinrimna kan tihpunsak mai mai bakah kan inrem loh phei chuan Sangkimi nun ka tichhe ve thei tlat bawk si. Nu, eng nge ka tih ang ka hre lo a ni" ka ti ta a. 

A aw a then leh kharh hnuah, "Mama, mipa i ni a, fim takin ngaihtuah la, i thutlukna ang ang kha kan pawm thei vek a nia. Sangkimi pawh a dinhmun a khawngaihthlak tho mai. Mahse, i sawi ang khan inrem hleithei si lo hian laklawh deuha in awm chu a hlauhawm tho bawk" a ti ta nghat nghat a. 

"Ka hrethiam lo, ka chapo vena hi chuan a nu avang sawn hnaih tawh lo turin min ti a. Mahse, ka thinlungin Sangkimi tihnat ka duh bawk si lo" ka ti a. Ani pawh chu a rilru a buai ve hmel hle. "Mama, ka hrethiam tawh lo. Lehlamah Aizawlah phei ta se i thlah hlen theih chuan a tha a ni mai a, i theih leh si loha i buai chuan keini thleng pawh kan buai dawn a. Inngaihtuah chiang rawh" a ti ve leh ringawt tawp. 

"Nia, nu, va mu leh rawh. Ka'n inngaihtuah ang e" ka ti a. Min ngaihtuah hmel deuhin a lut ve leh mai. Sitting roomah chuan ka thu ta reng a. Valtea ka be buai ngam rih bawk si lo. Ka tawngtai lahin a reh vung vung bawk si. Msg ka dawng a, amah ngei a ni. "I lo kal em?" A rawn ti leh ta. Ka tho vut a, "A hmeichhia zawk pawn a ngam chuan engvangin nge ka ngam loh bik ang le. Doctori hian a fanuin min hmangaihzia hi hre ve hrim hrim rawh se" ka ti rilru ta a. 

"Ka rawn chho dawn chiah e. U Mamawia te in bulah lo awm ta che." Ka han ti ta a. An in thlenga ka tlan chuan ka bike ri atanga min lo man ka hlau deuh a ni. Khawiah nge ka tlanpui ang tih ka ngaihtuah chhungin damdawi in peng ka thleng ta mai a. Ka ngaihtuah nasat vangin ka lo tlan chak deuh a ni maithei. Ke in U Mamawia te in lam chu ka pan chho ta them them a, thingbuk hnuai a thim laiah chuan ka hmangaih ka enchimloh Rinsangkimi chu a lo thu khar mai. Ka kai tho vat a, bag khai a ak puar ve luah mai. A rukin a inpuahchah ve hle tih a lang. Chutiang taka Sangkimi a tumruh avang chuan tlawm pawh ka inti ta bik lo va, Bansan leh kalsan thei niin ka inhre ta bik lo. Min zui ngamtu ka hnutchhiah a nih chuan mipa ka inti ngam tawhin ka ring lo a ni. Kan in lamah kan inphur chho leh phawt a. Ka nute pawh an rawn tho ve leh. Dar 3 a ri têp tawh a. Mahse, kan khuaah hima kan inhriat loh avangin Thingfalah papuia te inah kal mai ka rilruk ta deuh a. Ka u in ka thawmhnaw thenkhat chu a lo khung khawm ve mek bawk. Engkima min thláwp tlat thin chhungkua ka nei hi ka va lawm tak êm. Sangkimi chu a men sen rám danah a tap nasain mut a hmu miah lo tih ka hre mai. Tichuan, Zing dar 4 bawr velah Thingfal lam chu kan pan dun ta vang vang a. Ka nu khan, "Doctori a fing si a, Thingfalah in kal ngei a ring sa dawn, chuvang chuan i papuia te huan lamah in kal zawk dawn nia" a ti sa kha a nia. Papuia te hian huan tha tak an nei ve a, a puzawn sahthlaksak a ni nghe nghe. Papuia kha kan be lawk tawh tho a, ngaihngam takin kan tlan thei ta. 

"Muhil rawh, nghet takin min kuah la" ka ti a. 

"Ka tla deih ang a sin" a tih chuan, "Deih a awm lo, daih tih tur. Hmang tawh suh" te chu kan han inti leh rih. Ka kawngah a rawn kuah thlap a, min rawn bawh deuh bawk. A chau ngawtin ka ring. Dawr pawh ka nuin a lo hma rih mai a ngaih hmel. Nupui ka ru ve ta chawm chu a nia! Hmalam hun ngaihtuah thiam a har khawp mai. 

Kawng a tha bawk a, kan tlan chak lo viau nain dar 5 pelh hlekah khua kan lut a, Papuia te hi veng tawp lam deuhah an awm. Kan va thlen chuan Papuia nupuia nu, an awmpui pitar tawh tak mai hi a lo tho tawh a. A beng a chhet tawh avangin biak rin a ngai deuh. Papuia te nupa pawh an rawn tho ve nghal a. Kan dinhmun tlangpui te chu ka han sawi zung zung a, Nu Ziri chuan, "Huan lam chu pan phawt ula a fuh zawk ang. Bakah Ramliani ten an hmuh hlauh che u chuan an kamtam leh dawn si" a lo ti vat. Papuia pawh chuan, "Engle khawle, in han ti ve poh chu a ni sia, inru kher lo va kawng dang a awm ngang lo ve bawk nen, ni e, huanah sawn engkim kan chhawp sa ve vek a, tui lah a hnianghnar bawk. Marawhchu, chawhmeh engilo chu keng ve ula a pawi lo, ni engzat nge in khawsak dawn hriat a ni si lo va" a ti a. An fapa rawlthar, min ngaina deuhtu Bawihpuia chu dawrah lei tur ziahsa kengin ka tir ta nghal. Artui plate khat, dailuah leh alu bakah sangha tin tih velte ka leitir ta a. Buhfai erawh a la tam thu leh bawlhhlo pawh an lei thar chauh thu an sawi a. "Dilah khan sangha te pawh an len ve tawh viau kha. Nghakuai pawh ka dah sa kha, in lo chiah ve dawn nia. Tunkar chhung chu Lawngtlaiah pute zui an ngai dawn a, huan lamah hnathawk an rawn awm lo ang. " Papuia chuan a ti a. A nau fapa ka nih angin min hmangaih bakah ka nu hi an lakah a that ve êm vangin min tichhe ngam ngai lo. Nu Ziri pawh hi nu sual a ni hran lo bawk. Bawihpuia a rawn kir leha thingpuite kan han in zawh meuh chuan dar 6:30 a lo pel tawh a. Chabi min pek pahin, "I bike hi i thukru deuh dawn nia aw" a ti sup a. Huana kal tur chuan kan chhuak leh ta a. 

Papuia te huan hi Thingkah leh Thingfal inkara awm a ni a, khua atangin a hla ve deuh bawk. Sangkimi chu tawng pawh a tawng peih meuh tawh lo. A chau tawngkhawng ve tawh a nih ka ring. Ka be bik lo bawk a. Huan pengah kan tlan lut a, kawng an lo laih zau belh tawh lehnghal a, tlan a nuam viau. Huan pawh chu kan zu hmu thei ta. Ka bike chu huan luh dawn dinglama hnim buk karah ka thukru a, chutin a bo vek thei lo. Han thuhruk vak ngaihna kan hre lo a ni ber. Thlam kan zu thleng a, Sangkimi a hawi hrek hrek. A reh ve êm bawk a ni. Thlam chu ka han hawng a, a bang dáp, a chung rangva hmanga sak a ni ve a. A tha ve thawkhat viau. Khum pawh an lo dawhkang ve a.,.zau erawh a zau lutuk lo. A fai viau bawk. Kan han in dah fel a, kan bawr ve reuh bawk si. A mitmeng ka hmuh chuan, "Va mu hahdam rawh. Ka chau ve lo kei chu" ka ti vat a. A inthlahrung nge, "Ngai lo..ka duh bik lo' a ti sasawi a, ka kai phei a, mutbu an tel khawm chu phah thain ka muttir ta hmiah a. " Ka damdawi ka la ei lo" a ti a. A bag chu ka han dapsak a, damdawi chi hrang hrang a lo ak rûih mai. Ka phawrh ta vek a, mum sen te takte chu a dawlh a,"Min hrethiam mai rawh aw. Ka chau lutuk a" tiin a mu a. Ka khawngaih reuh mang e. Kei pawh kan chawhmeh ken leh kan thawmhnaw ken te chu ka'n rem fel a, Thlam bul lawkah tuikhur a awm bawk a, a thlangah dil pahnih lian lutuk lo a awm bawk. Ka nu leh pate inneih lai kha chuan chhungkaw picnic nan te kan hmang ve thin. Ka kal lohna a rei ta deuh a, an thlai leh thei te pawh an lo puitling ta hle mai. Kuhva pawh an lo sang ta viau, Serthlum, Nimbu, balhla bakah Nu Ziri huan thlai thenkhat an ching bawk a. Khanghu te, zawngtah te pawh an awm. Thei lam hi chu theitê leh theihai a ni deuh mai. Theitê pawh a lo rah tiar mai a. Sangkimi'n a duh ngawt ang. Tui te chu ka va chawi a, eirawng ka bawl zui nghal a. Nu Ziri khan maian leh antam min kentir tel a, maian chu bai ila Artui kang leh tawp ila ka ti rilru a. Mahse, Chawm tur a awm lo tih hriain dailuah chu ka kang ta phawt. An sawi angin bawlhhlo chu a lo chikim viau mai. Hnathawk chhawra a changa riak reng reng an ni bawk a, in ang thawthanga cheibawl a ni rêng a ni. Sangkimi chu a muhil bawrh bawrh a. Ka nuin min lo call chuan pawnah chhuakin ka va bia a, "An chhuak chiah. Sangkimi pa leh a u an rawn kal a. In awm loh thu leh in kalna ka hriat loh thu ka lo sawi tawp mai" a ti mawlh mawlh a. 

"A that nasat chu, hei huan kan thleng tawh aw. Sangkimi phei chu mut a hmu lo nen a muhil bawrh bawrh mai" ka ti a. 

"Umm, nia, in ti ta sa sa, a tawp thengin le..dawr lam chu lo ngaihtuah reng reng suh" a rawn ti thliam a. Nu a zawnga nu tha leh min hrethiamtu ka nei hi ka va lawm thin tak êm. Doctori ten min lo call ka hlauh avangin ka phone pawh ka off ta daih a. Ka batery a tam vak tawh lo lehnghal a, ramhnuaiah chuan charge ngaihna awm hek lo, min be pawp thei lo thuai ang. Cooker te takteah chuan buhfai no hnih ka thlak a, chaw ka heh leh tak avangin ka'n chhum àm ve deuh a ni. Maian hih pahin dailuah ka vil a, chaw erawh chhuan mai theihin ka siam sa bawk. Ka phone ka off ringawt kha papuia ten chanchin min rawn hrilh theih loh ka hlau deuh sia, ka on leh a. Sangkimi chhungte zawng zawng ka block ta tawp mai. Nuam chu ka ti vak lo. Sangkimi tawngvai niah niah avang chuan ka phu zawk a, ka'n ngaihthlak chian nak chuan, "Amah bak hmangaih ka nei lo..ka duh lo. Nu, ka duh lo, kal teh" tiin a lu chu a thle tawn sek mai. A mang lamah lehzel pawh tihbuai a la ni zui zel chu ka lainat ngawih ngawih. Hmeichhe derthawng leh ze zawi em em, rilru tluang leh tha tak, bawrhsawm tak maiin hetiang harsatna a tawk hi pawi ka ti..ka tel ve zel lo thei bawk si lo. Kei tehlul min hmangaih vanga a chhungte kalsana min zuitu hmeichhia hi ka tan chuan a tha ber reng zel ang. Ka tan chuan hmeichhe chak leh huaisen tak a ni bawk. 

Dailuah a hmin a, chaw ka chhuang a. Thuk pakhat zawk chu ka han siamrem a, Maian tui tur ka chhuang kai ta bawk. Lehlamah Valtea zarah hetianga ramhnuai lama chettlat hi ka zeihawi ve viau tawh a, ramvachal erawh ka ni lo ka tih tawh kha. Hetia eirawng han bawl te, chawhmeh engilo han dap te chu ka thiam ve tawh lutuk. Tin, hmanah ka rawlthar chhuah tirh hian kan khaw daia farm-ah khan kan khua ami U Zuia leh Thaizawl khua ami te an inru a, nawm hmel hi ka lo ti thin khawp a, Nupui ka neih dawn chuan ramhnuaiah ka ru phawt ang te ka lo ti ve thin. Chu chu a takin ka tawng ta a, ka nupui ruk lah ka hmangaih ber a ni bawk nen, nuam ka ti ru viau zawk. Doctori te lam chu ngaihtuah loh hram hram ka tum thung. 

Cooker phit ri avangin Sangkimi pawh a rawn harh ve ta a. Dar 8 a ri dawn hnai tawh hrim hrim bawk a. A rawn tho a, mutna vel a siam that hnuah, "Min kaihthawh tur che alawm" a ti sap a. 

"I chau em a, ka khawngaih che alawm. Chhunah kan mu leh dawn nia" ka ti a. Kei pawh zep loh chuan mut mamawh ve tho ka ni. Maian a hmin a, artui kanna turin thirbel te takte chu ka va sil rawk rawk a, "Ka lo kang ang, ka thiam zawk ang" a lo ti vat. A tihluih tlat avangin ka tihtir ta a. Kei erawh papuia ka va bia, "I patea nen kan inbe zo chiah e, chanchin an lo hre ve a. Mahse, khawiahmah an sawi chhuak lo vang. Vawiinah thingfalah chuan Sangkimi chhungte chu an rawn kal ka ring" a rawn ti a. 

"Ka phone hi a low tep tawh a, min biak theih loh chuan Sangkimi numberah rawn ti mai r'u aw. " tiin Sangkimi number ka pe a. Ka va luh leh chuan, "Ka chhungte ho i block em?" A lo ti vat. "Umm " ka ti a. 

"kei pawh ka block vek tawp. Power bank ka keng alawm, va charge rawh" a tih chuan, melh vung vung chungin, "I va ngaihtuah kim reuh" ka ti sup a. 

A nui hak a, "Hmeichhia ka ni miau alawm" a ti mai a. Artui a kan zawhah chaw pawh chu kan ei zui nghal. Ramhnuaiah a la chetla ngai lo va, a zeihawi dawn lo tih ka hria. Kan ril a tam tawh nge ni chaw chu kan fai thak mai. Chawhmeh pawh dailuah chiah a bang. Ka maian bai chu tui a ti khawp mai a, a lawmawm duh viau. Thleng vel te chu tuikhurah a va sil rak rak a. A rawn luh leh chuan, "A nuam ka ti" a ti ringawt. 

Zial tan pahin, "Kei pawh" ka lo ti ve mai a. Chaw eikhamah chuan tihtur a váng ta raih mai. Tihtur chu kan nei , inru kan nia, inru tawhte chuan in hrethiamin ka ring. Mahse, chhun chhuna han chet kha ka tîm tlat. Bakah kan chau dun si, a duh pawn ka ring chiah lo. Khumah chuan in ngheng rialin kan mu dun a, "Zanah ka che dawn sia, inbualfai rawh aw" a bengbulah ka ti a. Laih hmel zeta min rawn enin, "Ka zak ee.." A'n ti ngawt a. 

"Kan tih ve a ngai alawm" ka ti a. 

"Tih kher kher a ngai tih a inziak ami? Ka zak alawm" pangchang zet hian a ti a. Nui hawk hawk chungin, "Chaw bêl bula min tamchhawl tir i tum tihna mi?" ka tih chuan hrethiam lo fê hian, "Eng nge a awmzia?" A ti leh hé haw a. 

"I ril a tamin chaw bel hawngin chaw i ei thin a ni lawm ni? Riltam taka i awm laiin chawbel kha hawn theihin awm lo tlat se a hrehawm i tih i ring em?" Ka'n ti kual vel a. Ka inten têp.

"Ee. Ka hrethiam leh si. Hmmm..i tenawm" tih pahin ka banah a rawn sîk vàwt váwt a, "A naaa" ka ti tuar tuar. Ka bula lungmuang taka a nui hmel duhawm lutuk chu tuar zo loin ka fawp ta thut a, a tirah a hamhaih deuh naa min rawn chhang let ve,. Dipdaltu nei ta lo chu insum a har ta hle mai. Chet ka'n lak dawn tak tak chuan a ngaingam chiah lo nge, "Naa, khua a eng vek si, a zahthlak lutuk..ka duh lo" a ti leh tlat a. Ka tum buai leh ta lo. A theih chin chinah mipa ka nih angin a duhthlanna hi zahsak ka tum ve a ni. 

"A nih muhil ang. Kan tlaivar sia..umm" ka ti sup a. Ka ban lukhamin min rawn kuah hlán a. Kan maimichhing ta vang vang mai. Kan mutui bawk a niang, ka harh meuh chuan dar 2 a lo ri vah tawh nia. Ka ban chu a kham ut ut mai. Zawitein ka la thla a, a mu chuah chuah, ka hmet vak vak a. Tui taka a muhil sêk sêk chu a chalah fawp zauhin inbual harh turin ka thawhsan ta a. Ka phone ka'n en nak chuan papuia miscall 4 lai a lo awm a. Patea pawn min lo call ve. Papuia chu ka call back ta vat a, reivakloah a rawn la, "Kan lo muhil daih a,. Eng nge chanchin?" Ka ti vat. 

"An lo kal a, mahse, heta in lo kal loh thu kan lo sawi a, an haw ve leh mai" a tih chuan ka thaw huai mai. 

"A that nasat chu..chuan, hetah hian ni engzat nge kan awm ang?" Ka ti he haw a. 

"Ka hre bik lo, tul i tih chen chen a ni mai. Sangkimi kha a chhungte biak theihin awm rawh se..chuta in inbiak dan azirin rawn haw hun chu a hriat mai ang" a ti ta a. A dik ang. Hetia tawmbo ngawt ngawt pawh a ni ber lo tlat. Kan inbiak zawhah ka va inbual ta phar phar a, tui a vawt reuh zêk a, mahse, ka harh phah hawk e. Ka inthlak laiin a rawn harh ve nghal a, Papuia nen kan inbiakna te chu ka hrilh a, "Ka'n unblock ang e" tih leh a phone lak a rual a. 

"Va inbual harh ve rawh" ka ti a. A tho nghal. Tuikhurah chuan a ding vang vang a, "Ruak vek lo chuan ka inbual ngai lo asin" a rawn ti láng láng a. 

"Aw ka en lo vang che" ka ti a. 

"I zak lo" a'n ti ngawt a. Ka nui huk. A bra leh panty nen chuan a inbual ta a. A en loh theih loh. A taksa ngozia leh vun nalhzia piahlamah tlema a lo thau ve deuh tak avanga a pian dik sàwtzia ka hmuh chuan, he nu hian min hmangaih tak tak a maw? Tih mai a awl. Min hnungchhawn zawnga thu chung chuan, "Eirawng kha bawl rawh, min en reng suh" a rawn ti leh hlar a. Kei pawh ka che nghal vat. Antam ka tlak a, alu chu fry turin ka chan bawk. Bai tur chi a awm si lo va, tlak a awm tho ka ti ta mai. Antam ka chawh rawk rawk laiin a rawn lut a, a han inthlak fel a, min rawn pui ve lehnghal. Alu min chanpui lai chuan a phone a ri ta a. A va en chuan, "Ka pa a nih hi" a ti a. "La rawh" ka ti vat. A la ve mai bawk a. Speaker a on nghal bawk. 

"Mate, khaw nge in awm?" Pa Ruatpuia aw chu a dam thlup mai. 

"Ka sawi thei lo, pa.." sangkimi chuan a ti sap a. 

"Bawihte, i nu rilru i tina hle a ni. Hei chaw pawh a ei thei lo. Roomah a tawm a, a tap reng mai. Lo haw mai rawh. " a rawn ti leh a. 

"Ka duhdan a ngaipawimawh duh lo a nih kha..vawitam a bulah ka sawi alawm. " a ti ve hmiah. 

"Ni e, i nu hi i tan chuan a demawm ang, mahse, i hriatthiam a ngai, kei pawn ka kawm tawh a. A inchhir lutuk asin. Hetiang thleng thleng i kal ngam a ring lo va, mimal takin Tluanga kha a haw lo a nia. I hmakhua a ngaih vang zawk a ni. Mi thenkhat lahin thu an lo veivir ve sek bawk si a" a rawn ti duah a. 

"Aa..pa, kan inru ve chauh a, kan la awmdun rih duh, kan mualpho tawh tho tho. Ni hnih hnu velah kan lo haw ang, mahse, intiamkamna nen ni thei se" a pa chu a kar thiamin a ngam viau mai. A pa hian a duat ve bawk a, Sangkimi paw'n ,"Thinrima min hauh hi vawikhatmah ka la hre lo" a ti hial rêng a ni. 

Pa Ruatpuia pawh chuan, "Ni tuk e.. I nu pawh ka lo kawm tha leh dawn nia. Tluanga kha ka lo be lawk ang e" a tih chuan phone chu a rawn dah hnai a, "Aw Pa ruatpui" ka ti nghal a. 

"Tluanga, hetiang thil hi a thleng ta si a, a zia lo khawp mai. Engpawhnise, ka fanu kha lo enkawltha rawh aw. A nu pawh ka be dawn a, lo hawpui vat thei la a lawmawm viau ang" a rawn ti dap dap a. 

"ni e, a zia lo khawp mai. Mahse, kan dinhmunin a zir lo miau si a. Min hrethiam hram teh u. Tha takin ka lo enkawl ang" ka ti nghut a. 

"Aw le,. A rang lamin rawn haw hram r'u aw" a rawn ti hram a. Pa fel tak zawng a ni chiang e. Min haw miah lo va ngenna a siam te chuan a tizahawm ngawih ngawih. Sawi tawh angin thingtlangpa ve tho a ni a, min hriatthiamna rilru a pu ve pawh a ni maithei. 

"Anu chu a tap tak tak ang em le?" Alu chan mawlh mawlh pah chuan a ti a. 

"Ka hre lo le, tap ve ang, a tahte pawh. A fanu duatlai kha i ni ve miau a" ka ti a. 

"Mahse, ka duhna a ngaipawimawh hleinem" a ti nghat. Sangkimi hi hmeichhe derthawng tak anga lang siin a luhlul ru zêk tih a lang. A pa pawhin a sawi tawh tak kha, a nu a chhun ve tho a nih dawn hi. Amah zawkin inruk a rawt a, engkim kalsanin min zui hmiah mai a nia. Hmeichhe ropui tak ka tan chuan a ni lo thei lo. Alu chu a fry a, kei pawh thiante nen kan inbe ve luam hlawm a. Kan awmna lai tak erawh Valtea chiah ka hrilh thung. Ani chuan engti kawng mahin a sawi chhuak dawn lo va. Eirawng kan bawl zawhah namthlakah thu dunin ni tla tur kan thlir dun a. Boruak pawh a nuam tawk viau. Sava an chiar nak nak reng a,. Ka phone a rawn ri leh pek, teh sek a ti rilru chunga ka'n en nak chuan number ka save loh atangin a ni tlat! Lak loh ngawt chu a pawimawh ka rin avangin ka pick a, "Zothantluang, nupui i ru a maw!" A rawn ti nghal táwng a. Speaker ka on si avangin Sangkimi chuan ngaihthat loh hmel fe hian min rawn melh a. 

"Ru ve e..i lo hre ve ni maw? Tu nge aw?" Ka ti ve mai a. 

"Ee. Keimah Malsawmi,. Mak ka lo ti lutuk a. Ka lo awm veleh han ruk kher?" A ti nghat a. Nge maw a lungawi loh ve ngawt ni. 

"I awm vang pawh a ni hran lo, kan laklawh lutuk a. " ka ti ta ringawt a.

"Bul kan tan thar leh theih ka lo beisei ania" a rawn tih chuan Sangkimi chuan ka rin loh deuhin ka phone chu min chhuhsakin, "I duhthusam a nih chu, lo be tawh suh" a ti hmak a. A off daih. A thikthu ve te reuh hi chu aw..

"Block rawh..tunah" tiin ka phone chu min pe a. A thu chu hnial ngam hek lo i, ka block ta a. A thikthu chu chhe ve hle dawn mai. Kei pawh fimkhur deuh a ngai dawn a nih hi. 

Zanriah chu kan han ei leh ta a. Kan ei leh teuh mai. Sangkimi dam tumzia chu, damdawi ei tur a ngah a nia. A hun chat chatah a ei zel. Thenkhat hi chu kan han dam deuh a, damdawi kan thlah lehnghal zel a, a tawpah kan na leh a, a bul atanga ei a ngai leh thin. Damdawi hi chu a course ei tlin ngei ngei hi a tha. Zan lamah chuan tih leh vak tur a awm lo hle. Patea ten laltin an dah chu kan chhi ve teng teng a, thla a eng êm a, a khawharthlak lek lek zawk. Phone kan khawih dun mial mial a, Malsawmi avang khan a mood a la tha vak lo nge mawni dawn ni, ka biak pawn a rul tawk bakin min chhang lo. Ka thlem thiam mang bawk si lo va. Whatsapp ka luh chuan kan thianho groupah ka chungchang an lo sawi a, ka nui vur vur reng mai. "Tunah te hian eng tak ti ang maw" tih vel mai mai, awmze nei siin an rak an rak a. "ngawi mai mai r'u" ka va ti. Malsawmi chu whatsappah ka lo block si lo va, "Zothan, In khuaa lo thawh ka duh chhan chu nangmah vang asin..i mak ve e" a rawn ti ta. Sangkimi chuan a hmu em tih ka en vat, a phone a lo bih daih a. Malsawmi msg chu ka clear nghal vat. Hmeichhe ho tak hi chu aw..kan duh laiin min duh loin min kawp a, kan han move on a, nà an ti leh hle sia. Mipa pawh kan bang bik chuang lo. Lehlamah Malsawmi hi chu ka sex hmanpui hmasak ber a ni a, ka nunah chuan pawimawhna chu a nei ve reng tawh ang. Phone chu ka dah ta daih a. Dar 8 vel a niawm e. Sangkimi chu ka va kuah thawk a, a lo teu hlar mai. Ka kuah lui zel tho a, a phone chu laksakin lukham hnuaiah ka dahsak ta a. Ka kuah nghet bawk nen, a tal chhuak zo lo. "Thinrim tawh lo teh" ka ti nghut a. 

"I lerh em alawm" a ti hlar a. 

"Malsawmi nen kan inthenna a rei lutuk tawh. A number pawh ka save loh kha.." Ka ti ve hram. 

"A beisei theih turin i la awm a nih kha" a ti hmak a. A tûm hmel pawh a duhawm tho, a bianga chuk zauhin, "Hmelthanu" ka ti sup a. A ner sak a, "Min tlawn suh, Zothan" a'n ti ngei a! 

Ka fàwp hmiah. A tal nasa mai a, mahse, a tawpa tawpah chuan a hmui pawh a nem ve leh ta thlap mai. Kan infawp na tial tial a, ka insumtheihna a tlem telh telh bawk. Ani pawh a thaw lak dan atangin a danglam tih ka hai lo. Zawimuangin ka che ta a, sawi tawh angin a hnutê an paihsak tawh avangin hnute hmur chiah nei ang mai hian chhete hian a rawn lawr ve a. Ka îtna leh duhna a bo phah miah lo. A zàm takzet tih ka hria, kei pawh eng ruai ka ni bik lo. A chhan chu hmeichhe thianghlim a ni miau a. A thawmhnaw ka hlihsak laite chuan a chhing tlat a, "Min en rawh, chhing suh" ka tih paw'n, "Aih" a ti tlat. Kei pawh inphelh ve nghalin, Ka nupui tur atana ka rûk, ramhnuaia ka hruai luh chu ka ta ka nihtir ta. Nà a ti hle tih chu ka hre thei mai. Ka zei em em bawk si lo. Engpawhnise, Rinsangkimi chu dan ang thlapa ka neih ni lo mah se, ka nupui a ni ta. Tuman min laksak thei tawh lo vang. A va tho a, a va insil. A kekawrte pawh a thlak. Thisen kha a chhuak hlek bawk nen. Ngaihtha zetin zial ka lo zu hlat hlat thung a. Chumi zan chuan vawi khat chu ka tho leh..a bak zawng chu muthilh nan kan hmang ta a. Thawh kan la hai zui. Sangkimi phone rik vangin kan harh ve chauh. 

"Aw Pa" a ti tial rian a. 

"Mate, lo haw tawh mai r'u, i nu pawh ka be fel vek tawh e. A rilru a thlak tawh" a rawn ti a. 

"Engti zawngin maw? Rin harsa ka ti" a ti sap a. 

"Hetiang in thlen tawhte chuan lak hran chi in ni tawh hleinem. Palaite an rawn tir ve ang a, a rang lamin inneihna kan buatsaih mai a ngai a nih hi" Pa Ruatpuia chuan a rawn ti thluam a. Thla a muang ta e. Sangkimi pawh ka hrilh angin, "Aw le, rawn haw kan tum ang. Mahse, eng emaw a awm leh vaih chuan ka nasa viau ang" a ti a. A tih duh tak tak pawh ka ring. He hmeichhia hi a lung a lian êm mai. 

Kan tho va, tukthuan chu kan bawl ve leh hram. Chaw eikham lamah muangmara hawn zai rel kan tum a ni. "Palai ka rawn tir vat ang a, engkim a tha vek mai ang" ka ti a. 

"Nia, ka pa hi chuan dáwt min hrilh ngai lo va. Ring rih phawt ang" a ti ve mai a. Kan han ei kham a, thlam chu kan tifai leh vek a, mutbu pawh kan tel tha leh thlap, tawp deuha hnutchhiah kha a mawi lo ve bawk a. Theihnghilh kan nei êm lovang chu maw..kan chawhmeh leisa kan ei hman tak loh erawh kan hnutchhiah ta ringawt, hlawhfa an chhawr leh têp tawhin ka ring. Nghakuai pawh kan chiah hman ta lo, Sangkimi'n a chàk nen..mahse, mahni in luma hawna engkim tihfel kha a tha ber mai. Kan tlan haw ta vang vang a, Papuia te inah kan peng zuai, kan thil hnutchhiah vel te chu ka sawi a. Nu Ziri chuan, "I patea i be leh phawt lo va, a him tak tak em tih hre phawt r'u , be rawh" a tih takah chuan patea chu ka call ta a. 

."Aa..engmah kan hre ve thei hleinem. Amah Doctori lah kan hmu ngai bawk si lo. Chutia sangkimi pa berin a tihte chuan a hlauhthawnawm dawn em ni?" A ti mai a. Risk lak phawt chu a ngaih hmel ta a ni e. Tawipui lam pan chuan kan inkhalh phei leh ta a. Kan tawng tam lo dun kher mai. Kan in lamah kan tlang ta phawt a, an rawn hruai ve tawh mai a niang chu. Ka nu ka hrilh lawk tawh avangin dawrah ka u zawk a lo kal a, an exam chawlh lai a ni bawk a, a tihzia hle. Ka nu chuan Sangkimi chu a lo be siam siam a, Sangkimi pawh a mawl bik lo va, ka nu nen chuan an inkawm thei viau. Sangkimi inbual hlanin ka nu nen kan lo inkawm a. 

"Zaninah an rawn hruai ka ring a. Lo dan pawh a tul hran lo. Palai turte pawh ka be fel vek tawh, i patea leh i pa Lawma te han kal se ka tia. I pa Lawma hian tawngkam a thiam deuh bawk a. A rang lama tirh dan kan ngaihtuah dawn nia" a ti melh melh a. 

"Nia, kan mualpho tawh ta sa sa, rial rei lutuk pawh an ni lam tan pawh a ngaihthatthlak loh ve thei alawm. Lo rem ta lo se engtin nge niang?" Ka ti let zawk hû a. 

"Ka hre bik lo le. Amah Sangkimi inhuam dan azir te pawh a ni ve tawh ang chu..mi pangngai chhungkua an nia, an rem mai chu ka ring" a ti ve ringawt. Sangkimi inbual zawhah ka inbual ve nghal a. Zanina an rawn hruai chuan ka khua a har ruk ruk viau ang. Ka inbual zo ka va chhuak chu Valtea a lo thu ran tawh. An ni pawh kan inruk tuk khan an chhuak ve a, Diki pawh a zia ve tawh thu leh naute tleizia thu a sawi mawlh mawlh mai. 

Zanriah ei hmain chhung inkhawm kan nei a, ka nu a ding a. 

"Hei le, Mama leh Sangkimi te pawh in dinhmunin a zir loh avangin in han tlan dun ta hial chu a nia. Sangkimi nu leh pate rilru pawh a na hle ang tih ka ring, ka dem reng reng lo. An fanu neihchhun leh an duat em em, kehthei dawma an dawm che i ni ve a, nang pawn i chhungten an lo hau che emaw an lo zilh che a nih pawhin ngai haw reng reng suh. An hmangaih vang che a ni tih i hre dawn nia. Keini lam chuan harsatna kan nei lo va, englai pawhin kan welcome reng che tih hria la; kan dinhmun erawh i hria a, mite angin i nuamsa tawk lo maithei, mahse, in lo inrema in lo innei thei ta te a nih chuan Mama pawhin theihtawp a chhuah ve ang a. Rim taka kan thawh loh chuan hlawhtlinna hi a awm lo tih kan hrereng dawn nia. " a han ti dap dap a. Sangkimi pawn a ngaithla tha hle. Tawngtaina a neih zawhah zanriah chu kan ei ta a. Nula zakzum awm taka lang ni mah se, a hunah chuan zaklo thei leh nelawm tak a ni thiam zel a. Ka u nen te chuan an titi bawrh bawrh mai. Lung hi a va awi hleuh hleuh tak êm. Chaw pawh ei zah tih vel kha a nei lem lo. Ka nu han koh mai erawh harsa a la ti ve nge, a pehhel hram hram zel a. Hei hi chu hriatthiam ve te pawh an ngai. Zantirah thiante an rawn leng khawm ta a, Sangkimi chu an chhaih an chhaih mai a, a rukin mi rawn sik leh váwt thin. Dar 8 velah Pa Ruatpuia leh Pa Rina te an rawn lang ta a. Thiante pawh chuan hrethiam takin min hawnsan ta rih. Sangkimi pawh a insiam a, ka lo pui ve bawk. Ka nu chuan, "Pu Ruat, rei kan rial dawn lo a nia, palai kan rawn tir nghal mai dawn asin" a ti a. 

Pa Ruatpuia pawh chuan, "Ni e, Aa..kan hetih tak siah chuan inrem vat mai a tha e" a lo ti ve duam a. Ngaih a ngam ta deuh e. An haw hma chuan roomah ka kai lut a, ka'n fawp leh vawng vawng phawt a. "Naktuk zanah palai chu lo tirh kan tum dawn a..theihtawpin lo kar ve la aw" ka ti a. 

"Umm, ka tum alawm. A rem ngang lo a nih leh kum khat chhung vel kan inru dawn nia" a ti ta mai a. Ka nui tawp. A tumruhzia ka hmuhin ka hmangaihna aiin a hmangaihna hi a sang mah ang a ka ti hial mai. Tichuan, a pate chuan an hruai haw ta phawt a. Khua a har nghal veng veng mai. Muthilh pawh a har, bakah an chanchin ka hre ve chak bawk nen. Dar 10 velah min rawn call ta a. 

"Engkim a tha e. Ka nu pawn min hau lo. Inleng neuh neuh an awm ve a, ka rawn be thei lawk lo che a nih kha.. Ka nu pawn min be tha lutuk" a rawn tih chuan ka hlimna chuan van a tawng ni hialin ka hria. Ngaihngam takin ka muhil thei ta. Mumang pawh a bo thak mai. 

A tukah dawr lam pawh ngaihven a ngai tawh nen, ka zuk ngaihven ve a. Min fiam neuh neuhtu an awm a, nuih bak tihtheih a awm vak lo. Kan dawr chu sumo hoin an rawn bawr tan ta bawk a, Kan lun chho ve viau mai. Ka u in min rawn pui ve leh thei bawk a, Ajei chu a indaih vak lo deuha ka hriat avangin eisiam dang rawih tur ngaihtuahsak a ngaiin ka hre ta deuh. Eisiam thiam tak tlawngawl deuh ka ngaihtuah leh a, Esii chuan, "Ngaihtuah vak a ngai lo. Saw U Tei saw a thiam lutuk, a hma pawn an inah a siam a, chhunah a zawrh thin kha. Ka lo zawt ang" a ti ta reuh a. A kutah ka dah hmui ta hmak. Chawhmeh erawh ka awm tak loh avang khan kan chah leh ta lo va. Naktuk tlaia rawn thawn turin ka chah leh ta a. Ka pu sum hi rul zo vat ila, in hnuaite pawh zawi zawiin siam ila ka ti deuh. Mikhual riahna tur mamawh hi an awm ve leh nawlh zel a. Kan dawr chu a tul chuan chaw pawh ei maitheiha siam zui te pawh a la ngaih hmel, mikhual riak kan neih chuan. In hnuai khu in chung nen a zau dan a inang thawkhat viau a. Ka pa te bungraw tam zawk chu Nu rami khan a chhuahpui bakah a hralh nual a, a kawrawng hle. Khum eng emaw zat chu a len ka ring a, bathroom a awm tho bawk a. Hmanhmawh ut uta chet chi erawh a a ni lo. 

Zanah chuan Patea leh Pa Lawma te chu ka nupui tur dil tur chuan Pu Vanruatpuia te in lam chu an pan ta a. In lamah kei pawh chhuak loin zauthau ru deuh siin ka lo awm ve kar. Ka tei sek chu ka nu chuan, "Mama, i zàm deuh em ni? Ngaihtha takin awm rawh" a ti a. Ka nui ringawt. 

Ka chhungrilah hian mawlhtu a awm tlat. Ka sawi thiam lo, ngaihthat lohna eng emaw hian min tuam tlat a nih chu! Sangkimi han biak mai te chu ka duh rum rum a, mahse, phi cheng anga lan ka hreh ve si. Dar 9 velah amah zawk chuan a rawn call ta a. 

"Hello" ka ti a. A reh veng veng. "Sangkim" ka ti leh a. Insút hraih thawm ka hre ta mai a..

"Eng nge thleng? Sangkim" ka ti leh. 

"Min lo bum mai mai alawm. Ka nu chuan a rilru a lo la thlak awzawng lo mai. Ka pa nen an inhau hrep mai. Ka pa pawn engmah a hriatpui lo, lem a lo chang mai mai zawk a ni" a rawn ti ta mai a! Ka phone ka paih lo chauh. 

."nakinah kan inbe dawn nia, ka pa thinrim hi ka'n bengdai lawk ang e" a ti a. A dah nghal. Ka khur der derin ka hria. Kan palaite pawh an rawn lut ve nghal zat. An hmel ka hmuh chuan ka zah ngawih ngawih. An hlawhtling lo tih a hriat hle bawk. Ka nuin a lo dawngsawng vat a. Patea chuan, "Doctori chu a mak ka ti hle mai. Eng thil nge a hriat ang aw ka ti..Kan fapa a nih vang pawh ni loin Tluanga hi tun hnaiah eng emaw vangin a hming a hliau ve deuh a ni mai a. Mi hi an tawng tam mah mah zawk em mawni le..Aa, Kimi, kan han hlawhchham chiang lutuk a, a zahthlak khawp mai. Pu Ruatpuia pawh a khawngaihthlak. Pi Saidingi khan a pasal kha a ngaichàng lo reng reng. " Ka fanu hi pasal neih kan la remti lo a ni" a ti tawp mai. Kal nawn leh tur pawn min ti lem lo bawk a, kal nawn leh pawh ngaiin ka hre tawh lo" a ti ta a. 

Ka nu hmela tawrhna lo lang chuan min tilungngai hle. 

"A va mak awm ve aw. Engkim tha vek ang khan an sawi si a. An thangkam lek a lo nih awm chu a" a ti nghat a. A lungawi vak bik lo tih a hriat. Pa Lawma pawh chuan, "Tluangpui, ka fapa ang thoa ka en che i nia. Khitiang taka amah hringtunuin a duh loh che chuan nang pawn rilru siam la, Kalsan zawk mai rawh. An fanu khi i tel lo va a awm theih lohzia lantir ve rawh. Tichuan, an hrethiam mai ang. Pu Ruatpuia erawh demna ka nei lem lo, a tha thluam a, an nu a hlau pawh a ni lo. Kan han sawi dêk dêk kha Doctori chuan tikhan a rawn ti nghal tháwr si a, a tan han thluaithlum leh vak dan kha a váng ve êm a ni. An nupa pawh an innghirngho phah hlein ka ring" a ti ve ta chuar chuar a. Ka ngawi reng thung. Rilru chu a na duh khawp mai. Ka eng chanchin nge a hriat a, chuti taka min duh loh tak mai le? Kan chhungkuain a pawi kan sawi awm ka hre bawk si lo. A mak tehzawng a ni e. 

Thingpui an in zawhah an haw thla ve leh ta a. Ka nute pawn sawiho an duh tih ka hria. Mahse, ka hul..engmah sawi tur ka hre lo. An mu ta ringawt a. Thlanglam bathlarah thuin vengthar lam chu ka thlir vawng vawng ringawt..zu ruih ngheka ka hlawhchhamna hi theihnghilh daih ka chák, Valtea ka dil mai dawn em ni aw ka tih mek laiin ka nu ka ngaihtuah a, Sangkimi a rawn lang ve zat bawk. An ni pahnih avang pawh hian ka khawvel hluia kir leh thei niin ka inhre si lo. Ka na chu ka tuar ta tlawk tlawk mai. 

Call ka dawng a. Amah a ni. Lak loh ka tum zet a, mahse, ka ngaingam leh ta lo va, ka pick up ta a. 

"Tluang, engtin nge kan tih dawn? Ka nu hi a danglam dawn lo" beidawng zeta a rawn tih chuan, hul zeta nui chungin, "Kan tihtawp mai a ngai ta a nih hi" ka ti sup a. 

"Eng a?!" a rawn ti tuar..ka hmet hlum ta daih a.