Rinsangkimi 10

RINSANGKIMI (10)

Ziaktu: Toni Rálte

Sangkimi chuan ka kut a rawn vuan chat a, kan ding rual thàwih bawk. "Nu, duhtawk rawh" a ti ve sak a. 

Doctori chu a nui hul hak a, a fanu rawn phih dáwrh pahin, "I nu ka ni..ka fanu i nih chhung chuan i chungah thuneihna ka nei" a ti hriam hraih a. Kei atan inrawlh a mawi si lo. Sangkimi duh lo chung chhuahpui a tum lai chuan, "Ka pi, ani nen khan kan inhmangaih a ni" ka ti ve ta ngat a. Rawn lehhawiin, "Jail tàng chhuakin hmangaihna chungchang sawi ve suh" a ti hmak. Sangkimi nen chuan an chhuak zui ta nghal..thawk la hawkin ka rum zui nghut ringawt. 

Doctori chu rilrua pai rún loh hram tumin dawr bungrua ka chingfel a, hnawk ngaitheilo tih takah bungrua ngah mah ila, kan dawr hi a felfai thlarh reng zel, hei hi U Muana paw'n min duhna chhan a ni ve pakhat a. Ka inchinfel mawlh mawlh laiin ka phone a ri ta a. Dinmawia a lo nia. Ka la ta vat, "Ka pa leh ka u te nen kan sawi ho a, tha kan ti tlang a. Engtin nge ni dawn le?" a rawn tih chuan ka lawm ru hle. 

"A lawmawm e. Ka pu te sawi dan hmangah chuan kar khat vel chu keima bulah training angreng deuhin i rawn kal ve phawt ang a, hriat tur leh chhinchhiah tur hi a awm ve nual bawk nen, tichuan, chumi hnu lama i zei hawi dan azirin kei chu ka bang ang" ka ti ta a. A tuk atanga kal turin kan inbe ta nghal a. Tlai banah patea te inah ka peng kawi a, Ka pate in chu restaurant atana luah ka duh thu ka sawi ta a, Bena a la naupang a, luahtu awm lo reng ai chuan luahlumtu an awm kha tha an lo ti ve tho bawk a. An phal nasa khawp mai. Vanneihthlak deuh bawk chu ka pate hotel siamna bungrua kha ka pate hian an la kawl vek a, eng emaw zat chu ka hmansak thei nghal dawn a ni. Ka nu nen an inneih laia an lei vek a nih avangin Nu Rami khan a chuh buai ngam lo a ni. Rilru hlim leh phur takin ka hawng a, Ka nute pawh ka ruahmanna ka hrilh ve zung zung. Min phurpui ve hle. Hman deuha Burma atanga raltlan, tuna kan awmna hnuai chiah luahtu Ajei tia a hming kan phuahsak an nuthlawi hi eisiam thiam tak a ni a. Khi lama an awm lai pawha Restaurant siam thin a ni bawk nen, ani hi eisiamah chuan la ta mai ila, ka nuin a pui thei bawk ang a ti ten ka ngaihtuah a. Hmabak erawh a la kó hle. Restaurant satliah ka duh lo va, Class ve deuh tak, thianghlim bawk si, menu pawh tam tham ve deuh ka hisáp ve a, chutianga ka tihtheih ngat chuan Lawngtlai leh Thingfal tih vel hi chu ka híp vek thei ang. Highway a rawn kal tak avang hian Lawngtlai atanga lo kalte hi chuan chaw ei tawh loin thingpui leh a hmehte an ring deuh tawh mai a. Siaha lam bak chaw ei chu an awm meuh tawh lo. Chuvang chuan restaurant siam chu a hlawk ka ring ve deuh a ni. Ka pa te in a lian tha ve pangngai bawk a. Eichawp dawr emaw za dawr emaw siam tel tho ka tum deuh bawk. Chutiang chuan boruakah in sang ka sa ve nasa a. Hlawhtling tak ang i maw? Ka nu paw'n, "I puin a puktir phal che leh a tha a ni mai a, ka ac pawh kan la khawih che mang hleinem, sumah chuan lungngai lutuk suh" a ti a. A hahdamthlak thin e. 

Zanah lenna tur nei hek lo, Ajei chu ka zuk belbul ta ngawt a. Kan inlenpawh lutuk lo naa kan innel viau tho. Ka thiltum dante chu ka sawi ve a, "A that dawn chu..nia, thawh tur a vàng sia, ka thawk duh alawm" a lo ti awlsam êt a. Rin aiin ka tluang,. Hlawh pawh mite aia sang deuh hlek kan inpe thei turah ngai ang. Ka haw chho chu kan in panna stepah chuan zial zuk pahin ka thu a, phone ka khawih pah bawk. 

"Danny chu a rawn thleng a..ka be duh si lo va, ka nuin min melh no lo thin khawp mai. " a rawn ti a. Ka ner sak. Doctori pawh chuan a ti mah mah em aw ka ti. Min duh loh ngawih ngawihna chhan tur nia ka hriat chu ka zu in leh jail ka tan kha a ni a , mahse, kha pawh an fanu ka hmangaih luat vang a ni tih a hrethiam lo em mawni le..

"Be rawh, biak loh ngawt kha a dik lo. Danny chuan eng nge a thawh renh reng?" ka ti a. 

"Higher secondary-ah chu pawh private-ah a inhlawh ve mai mai. Nge maw ka nu hian a ngaihsan viau ni?" a ti a. 

"A ngaihsan vang a ni lo vang, ka laka i rilru pawhpen nan a hmang a nih kha" ka ti a. 

"Ka mu dawn, Danny hi ka hne" a rawn tih chuan ka nui hawk. Danny chu ka hmu ve chak mang e. Kei pawh in chhungah lutin ka mu zui nghal daih a. Ka mut erawh a chhuak tehchiam lo hle. Dar 12 a ri têp tihin Valtea'n min lo call a, phak chuapa ka lak chuan, "Thianpa, ka tibuai che a pawi ka ti khawp mai. Kan nu a tlan a. Tunah mai khan..kein a kal bawk sia, ka ngaihtuah riau mai a. Kan va umzui dawn em niang le ka ti" a rawn ti ta mai a. Ka thu nghal zawt. Thawh phah nei hlek loin vawi tam min pui tawhtu ka thianpa tan chuan ka tho a, ka insiam nghal mawlh mawlh. Ani pawh a rawn chhuk thla nghal a, bike chuan kan tlan chhuak nghal. Diki chu bazar kawnah tak kan zu nang a. Ani rai puar teuh tawh bawk si, chutiang ang huna kea a kal chu a lainatawm hle. A chhan pawh kan la inzawt hman lo kha a nia. 

Kan dang ta vat a, "Diki, hetiang chu ti suh, hei a tlai tawh si a, a zia lo em mai. Tawhsual te i tawk ang a sin" ka ti a. A tap nasa tih a mitmengah a lang. Eng nge an buaina ka hre lo chu a buaithlak lai a ni ta. Valtea pawh chuan, "Nia, DIkte, hawh haw ang. I haw duh ngang leh kan va thlah ang che" a lo ti a. 

"Ani a awm chhung khi chuan ka rawn haw tawh lo vang. Ka peih tawh lo. " Diki chuan a ti ta hmak mai le. Tu tak a sawina ni maw? Valtea chuan hrethiam takin, "Ni e, ka hrethiam e..ka thiam loh pawh a ni, hnathawkin ka chhuak reng si a, in lama thil thleng ka hre ve ngai lo a tin ni. A nih chuan kan va thlah ang che aw" a ti dam duai a. DIki a bu nghat. Kein Diki chu an in lamah kan va thlah ta a. Nakinah Valtea'n an buaina chu min la hrilh turah ka ngai. Diki nute chu kan kai tho a, mak an tih hmel hle. Valtea chuan patling takin, "Ka pi ka pu, Dikteii hi he lama rawn awm rih lawk a duh a. Inthen tur kan ni lo a nia. Keima thiam loh vek a nia, ni 3 hnu velah ka rawn lam leh ang. Khawngaihin ngaih loh lamah ngai suh u aw" a ti thlap mai. 

Mi pangngai chhungkua tih takah an lo hawihhawm em em a, A chhan pawh an zawt lem lo. Rei awm khawmuang loin kan haw leh ta a. A chhan chu ka zawt ta ngei. 

"Ka u alawm, an rawn zin a. A inti lal em em a, a fate lah an thatchhe si, phone an khawih reng ringawt a. A fanu tleirawltê kha Diki pum nuam loin thleng sil chhawk ve turin a ngen a. Ka u chuan Diki a lo hau hrep a niawm e. 'Nanga chhawr turin ka rawn zinpui lo. Kan raipuar lai pawn engmah kan thulh phah lo, i zuau leh thatchhiat vang a nih kha' tih velin. Diki chuan ka bulah takngial pawh a sawi duh lo. Mahse, ka u (mipa kha) hnen atangin ka hre leh vek sia. Inah ka awm tlem si, a in nghak ber ka nu leh DIki an nia, Ka u khian a hmumawh em em reng a, a han thu chawl ve pawh a hmu thei lo. A tir kal reng a, eitur tuihnai an in lei tún tún a, kan nu lah an pe ve phal chuang si lo. 'Nu leh pate inah chuan kan lal ve tur alawm. Mo kan nei a, engmah ka ti dawn lo' tih chu a tawng duhdan a nia. Nizanah phei chuan ka beng têp nghe nghe a ni. Diki nu te khan naktuk tlaia vawiin tlaia chaw ei turin min rawn sawm a, ka u bawk chuan, 'Makpa chhungkhungin awm law law rawh. I nupui i hlau em mai. Nupuite in lama kal zut hi a mawi pawh a mawi lo' a tia. 

Diki insum zo ta bik lo chuan, " Ka u, mo-ah chuan kan in lama leng khât ber pawl ka nih ka ring. Ka leng lo lutuk hi ka nute pawn min hau fiam zawk thin asin" a lo ti ve kha, "Nang kha lo tawng ve suh, mo i nih kha. He in chhungah hian engmah thuneihna i nei ve lo" a ti ta zêk a. Ka pain, "A tawk e. Nangni nufaho hian kan chhungkaw hlimna in rawn ti tiau ringawt alawm. Haw vang vang ang che u. Hetiang hi i nih chuan i pasala chhungten an sawina che pawh awih loh rual a ni ta lo ve" a ti ve ta hrep a. Ka ben loh phah alawm. Ka pa hauhna kha a tihtauhpui a, a tap kual vel a, nute na na na chuan hmu thei hek lo, ka nu pawn a thinrimpui ta a. Chaw pawh kan ei loh phah. Diki nu ten min rawn be ta chiah a, kan inbiak lai laiin, "A pasala chhungten kan remti lo a ni mai. " ka u chuan a rawn ti záwrh záwrh a, ka insum zo ta ngang lo va, ka beng ta a nih kha. Diki nen hma deuhah kan mu a. Ka u thinrim lah chu a áng kal reng a, Ka pain a khap hnuah pawh ngawi duh hek lo. Ka u-in, "Lalnunmawi, ngawi hmak rawh, anih loh chuan ka hem pawp dawn che a nia. In ninawm nufa lutuk" a ti a. 

 Diki chungah tuanin ka awm lai rengin ka nupui chu chhuak turin a ti ta a nih kha. Ka awm loh hlanin a lo ti fo tawh nge ni, Diki rilru let but kha a chhuak ta ngawt a nih kha..U te an nia, kan thlakhlelh ve nen, a lo mak khawp mai. Engvangin nge Diki hi a huat em em ka hre lo" a ti ta mial mial a. Valtea te upa ber U mawii hi Bualtea pasal nei kha a nia. A nulat lai chuan a fel riau asin mawle. Mak ka ti khawp mai. 

"Aa. Engpawhnise, in nupa intih thiam loh vang a ni lem lo bawk a, lungngai suh. I u a haw ang a, engkim a tha leh vek mai ang" ka ti ta ringawt a. 

"Ka nute khi a fuih khawlo vek dawnin ka hria..ka rindanin hetia a awm chhan hi a mona hrehawm lutuk vang a ni maithei. A pasala chhungte hi an tha vak bik lo va, an in dan hma zawng khan a tuar dai ve thak a, Hetah a rawn zin a, Diki kan duat ve zia vel a hmuh khan a thik te pawh a ni maithei" a ti a. 

"Thil ni thei a ni ve reng" ka ti ringawt. Kan inmangtha a, kei pawh ka mu zui ve nghal. 

A tuk atangin Dinmawia chu a rawn kal ta a. Mi zakzum tak, inthlahrung hmelpu reng a ni a. Heng te hi dawr nghah dawn chuan a paih ve hret hret a ngai ang. Bungrua ho chu ka en kualpui a, nilengin kan inbuaipui a ni ber e. Mahse, kan innel phah sauh a, kei aiin kum 2 velin a nau awm e. Thu a awih a, a mawng a zang hle bawk. Ni 2 chhung kan han inbuaipui takah chuan ka beisei ai daihin a zeihawi ta a, customer biangbiak kawngah tlem a la inzir leh deuh a ngai tih lohah chuan a tha thawkhat viau e. Kei pawh ka hun awlah ka pa bungraw la kawl ho te chu ka va en kual thin a. Bungbel ho chu a la hman theih ang a, bowl bera zawk hi a thara thlak ka duh. A changkang dawn lo tlat. Dinmawia chu kar khat kalpui a ngai ta lo bawk a, Lunglei lamah pawisa lak chhuah paha mamawh zuk lam khawm ka tum rilru ta a. Sangkimi nen kan la inbe tha reng a, Danny erawh ka hmuh hman lohin a haw leh ta a niawm e. Ka tana Sangkimi a rinawm chhung chuan inhmuh lohte mai mai chu eng thamah ka ngai lo. Ani pawh a hriselna lam a tha chho ve zel a, nia, engpawh hmachhawn dawn ila hrisel taka a awm hi a ngai a ni. Ka nu nen mamawh lam khawm turte chu kan han buaipui tan a, rilru a buai duh mep mep viau. Ka pu pawn sum thahnem tham tak min puktir thei ta a, Kar tawpah zan khat riak turin Lunglei lam chu ka pan ta a. Bsa te inah ka riak a, mi hi a ngai der thiam ve a, a chhungte nen kan inhre sa vek bawk a, han inthlahrunna tur a awm lem lo. Rema pawh ka bia a, "Puihte i ngai em? I ngaih chuan sawi rawh aw" a rawn ti a. A thlamuanthlak thin e. A tukah ka mamawh ka la lei hmabak ho chu ka lei kual leh ta a, ka hah hle. A lum bawk sia. Ka inlei kim thei chuan ka hria. Ka bawr dawn ngei mai. Kan hawn kawngah Peka leh Ruthi te chungchang bakah Higher secondary-a thawktu thar an lak tur thute an sawi ho a. Peka leh Ruthi te chu an lo inruk mualpho ve si avangin tlan koh ang deuha insuih an tum niin an sawi. Ruthi pa erawh a la hel hle a niawm e. Nia, Ruthi hi kan khaw nulaah chuan a chhe loin a changkang pawl a ni ve a, ka rilru te tein, "Peka nen an innei dawn tih hriata lo englo zeuh tur a nia aw" ka ti vawng vawng mai. Ka ngaihtuahna vang chuan ka khi vur vur lehnghal. Kan HSS-a lo thawk thar tur chu mipa leh hmeichhia an nih thu leh Lunglei lam mi ve ve an nih thute an sawi a. "Mikhual nula hi chu hlah loh phawt tum ang" driver Zodina chuan a ti leh lung lung a. Kan han nui leh rih. 

."Nge mawle, Zuala paw'n miss Mamawii a zim a zim takah chuan, hmeichhia leh uitê tih takah Mamawii zawk zawk hi a awm thei lo a nih tan der tawh hi" Kuhva heh zet tlangval phanchang tawh lam Chhunga chuan a lo ti ve a. Ni dawn tak e, Zuala khan Mamawii kha a bem thlu tak e. A inah a tawlh hreuh hreuh reng a, a duh chu a hmu mai tak alawm le. Tikhan innei pawh nise Mamawii hlawh a tam tham tawh ang a, an rethei hran lo vang. 

"Tluanga, nang pawh ru ve tawp rawh. In nu khi.." Zodina chuan a rawn ti a. 

"Dinhmun kan la siam ve phawt ang chu" fiamthu thutak deuh hian ka lo ti ve mai a. 

Pi ziki'n, "Khitê khi ka khawngaih reuh ngawt mai. Mite anga hrisel tha han ni ve se zawng, nula hmeltha elkhen tur mawle. A hrisel lo chung pawn tikhi a la nia" a lo ti ve zauh. Sangkimi nen kan tha leh tih an hre leh vek tawh a nih dawn hi. An titi ngaithla zo peih loin ka mutthluksan ta daih a. Khua kan luh lai pawh ka hre lo. Bazarah ka u leh Romawia ten min lo hmuak a, Bungraw ho thiar a ngai dawn si. Ka pa inah kan zawn lut hlawm a, in pawh ka u-in a lo phiatfai vek a, rawng erawh hnawih thar tur ka hawn. Thianten min pui liam liam thei dawn a, a tihzia thin mang e. Inrem fel lem loin kan haw chho ta phawt a. Ka chau ve hle mai. 

"Valtea pawn a va hruai hawn leh tak kha..Mawii te an haw ta bawk a, rawn zin tawh lo se a tha viau ang" ka u chuan a ti nghat nghat a. An lo in hruai hawng leh thei chu a lawmawm hle mai. Kei lah ka buai buaiin ka la buai ve si. 

Sunday te a ni bawk a tiin a tukah chuan ka inkhawm ve hram. Sangkimi pawh ka hmu. A nalh lehpek e. A nu a awm ve run sia, ka melh ngam tâwk. Mahse, thingpui in laiin amah zawkin min rawn pan nalh mai a, a nu meng ling hlar chu kei pawn ka hmu lo der hmiah. 

Dawr velte chu ka hrilh thuak thuak a, a hmain kan lo sawi dun nual tawh bawk a, min phurpui thin khawp mai. Hetianga supporttu neih tlat chuan tha a tho lo thei lo a ni. Chutia kan inkawm melh melh lai chuan, "Zothan" tia min kotu an awm avangin ka hawi let a. Karei! Malsawmi zuk ni reng chuan! Hmana ka bialnu, sex hial ka lo hmanpui tawh ngei kha..a va mak tehdaih ve. 

"Malsawm, hetah tehdaih? I dam maw?" ka ti hlut a. Kan inbiak lohna a rei ta êm a, a number pawh ka nei tawh pawn ka hre lo. 

"Khawvel hi chu a zim a ni tiraw? In khaw HSS-ah ka rawn thawk dawn alawm.." a ti ta mai a. Sangkimi hawihai chu melhin, ka inhmelhriattir ta vat a. Malsawmi chuan, "In nu mi?" a ti sap. 

"Ka nupui a la ni chiah lo va, ka bialnu a nih hi" ka ti nghet charh a. Malsawmi chu ka ngaihbel nge a meng hnual deuha ka hriat ni. Nunhlui chu nunhlui a ni tawh si a. "I va nei chhe lo si êm" te chu a ti lawi a. Sangkimi pawh a nui ve sen sen mai. 

"Chuan, tunah khaw nge i innghah? " ka tih chuan, "Pu Lawmkunga khu ka nu putea a nia, an inah ka innghat. Ka'n awm rei deuh ang a, in luah ve te pawh ka rilruk, min lo zawnpui ve deuh la aw" a ti zung zung a. Pu Lawmkunga fapa chu hman deuha elsen taka min tawngkhumtu Dailova pa a ni. An khawsa thei ve viau. "Tehreng mai, kan veng lamah khian in ruak chu a la awm maithei" ka lo ti var a, Dailova farnuin a rawn koh tak avangin a kal ta a. Ralkhata mitmeng fing zeta min lo melh rengtu Dr. Saidingpuii ka va hmu thut chu ka hamhaih deuh. A fanu hi a veng ve khawp mai. 

"Zaninah inkhawm la, inhmuh tum teh ang. " ka ti a. 

"Ka nu te phal leh phal loh aw. Ka u a tel ve dawn chuan an phal ka ring a" a ti a. Ka bu nghut ringawt. 

"Ani nen khan eng emaw a awm tawh thin chiang" awmze nei zeta min melh pahin a ti zauh a. Nui hawk chungin, "Nia, i bulah ka zep lo vang. Ka ex a nih kha" ka ti ta a. A mitmeng a vàwt nghal, "Vawikhatmah hmu tawh suh ang che" a ti hniam raih a.

"Aw le boss" ka ti ringawt.. A nuin a rawn koh tak avangin min kalsan ta a, kei pawh ka haw zui ve nghal. Sangkimi nen kan dinhmun a chutih tak avang nge ka rilru pawh hian puitlin lam a hnaih chho tan ta viau a. Dr. Saidingi rilru thlaksak ngei hi ka tum bur mai a ni. Ka inrintawkna pawh a pung ve deuh deuh mai. Ka nu te nen dawr chungchang bawk kan sawiho leh a, Ajei leh ka nuin ei siam se, mi dang chu a tla chawpa lak mai chi a ni ang em tihte kan ngaihtuah a. Thawk duh tur chu an awm nual ang a, mahse, duhdan bik ka nei ve tlat! Tlema hmelkêu ve deuh, vun ngo lam leh hmel hmuh nuam deuh, che fel tak ka duh dawn a ni. Waitress atan pakhat la phawt ila, a indaih ngang loh leh pakhat dang lakbelh ila tiin thutlukna kan siam a. Menu tur te chu kan han duang lawk vel a, Ajei a rawn chho ve bawk a. A ni pawn kan tih ang ang chu a pawm ve vek mai. Naktukah ka pate in chu rawngte hnawih thara chhuar te siam a ngai dawn a, thiante pawh ka sawm a, Valtea pawh a hman turah ka ngai. 

Rin aiin thian tha ten min rawn tawiawm tha a, Holiday a ni bawk a, ka u pawh a rawn kal ve. Rawng chu kan hnawih thar vek a, chhuar pawh an lo siam thiam hlawm khawp a. A hranpaa choka kha pin hran ka duh avangin plywood kan hmang a, Ka nu nena kan bungraw leisa pawh kan rem fel thei ta a. Thukte pawh kan siam belh bawk. A tir mai a la nih avangin engkim vawi leh khata tih vek theih a ni dawn lo va, Mikhualho híp tura Dawr hming pawh chu phuah ve ka duh viau a. Ka ril lo nasa si. Hriatpuia'n ,"Ril vak a ngai lo. ZT Restaurant ti tawp mai la, a thar a nia, rawn chawlh an chak em em ang" a ti a. A dik viau mai. An sawi ang chuan ka dawr hming tur te chu kan print leh zawk zawk a, menu pawh la tih a ngai. A hmaa ka pa ten hotel an siam laia an lo hmansa dawhkan leh chair kha chu eng emaw zat a la awm ve bawk a. Chair erawh an hlui deuh tawh avangin a thar lei vat ka rilruk deuh, dawhkante chu rawng kan kap ta vek a. A lang thar ve ta vúk mai. Ni khat thawk leh ila, a luah luh theih mai ka beisei. Mi thenkhat rawn dak lut chuan, "Hotel law law i ti zawk lo va" an rawn ti hlawm a. Mahse hotel chu a tam tawk tawh. Hotela awm ve lo a ni zawrh ka tum zawk ni. Ei leh in tur ka chah ho pawh tlai sumo-ah an rawn phur thei hlauh a, kan han inhláng thla ta a. Kan haw ta phawt. Ka phur lutuk chu ka nuin, "I hlawhchham mai ang tih ka hlau mang e. Hlawhtling tur chuan teirei peih a ngai a nia aw. I pu pawisa i pûk kha ngaihpawimawh hmasakah nei la, rul zo vat ang che" tiin min fuih mawlh mawlh a. Ka ngaihdan chiah a ni. 

Zanah vawiin lama kan chet nasat deuh avangin ka chhuak peih lo va, ka muzal ta mai mai. Sangkimi nen kan intext zauh zauh bawk. A nu chungchang chu a rawn sawi leh tawh rih lo va, Khaw hmuna awm reng si, kan inhmu thei lo chu hrehawm a tih thu a sawi nasa. Kei tak pawh hian hrehawm ka ti takzet a ni. 

"Tluang, thudik tak sawi rawh aw" a rawn ti tê tê a. 

"Aw..sawi la" ka ti a. 

"Innei ta ila, natna eng emaw te lo vei leh ta si ila min phatsan ang em?" A rawn ti. A naupanna hi a lang ve leh zauh thin. 

"A teuh lo, ka duat viau ang che" ka ti vat a. 

"I chhungte tan ka iaiawm dawn e..hetiang mo neihte chu" a rawn ti leh a,a inthlahrun vang a ni tih ka hrethiam reng. Mahse, "Ka nu leh ka u te hi chuan ka duhthlanna hi an dah pawimawh ve viau asin. I rin ang kha a ni dawn lo, an duat viau ang che" ka ti ta mawlh mawlh a. 

Sangkimi nen kan intawn atanga harsatna kan tawh chhoh dante ka ngaihtuah mai mai a. Mite hian tiang hi an tawng ve ang em le? Kan harsatna tawh hi a harsa bik ni ten ka hria, jail bang hial ka zût phah a, zu ngawl ka vei phah bawk. Tihian ka sim leh thei ta hlauh zawk a. Sangkimi lah rilru rethei reng rengin hun a lo hmang bawk. Kan tawpna chu hlimawm hram se ka duh takzet a ni. Sangkimi hi Tawipuia a awm reng chuan lo inthen pawh ni ila hmeichhe dang lakah rilru ka pek theih ka ring lo. Ani pawh a nih ve tho ka ring. Ka chau deuh bawk a, ka mutui hle. A tukah chuan Ajei nen ka nu te nen patea faten min rawn tawiawm thei bawk a, eitur vel te chu dahfelin bungraw la rem fel ngaite chu kan han rem fel leh thuak thuak a, Ka pate in chu sawi tawh angin a zau ve deuh bawk a, dawrtê la hawn theihna khawp chu kan ping hrang ve thlap bawk. Ka rilru ka thlak a, chawhmeh zawrh ka tum. Hralh a kal ber dawn tlat. A dang ho chu nakinah hlêp te kan neih hunah a tlachawpa ngaihtuah a tan ka ti a ni. Kan dawr tur chu engkim kan peih fel ta a, ka nuin, "Chutia ngawi renga luah luh ngawt ai chuan, Naktukah i puin tawngtaina te nei ve reng reng se, kan hawng dawn nia" a ti a. Ka pawmpui viau. In hnuai kha chu patea thurawn min pek angin mikhual riah theihna tur atan siam kan rilruk a, mahse, chutia peih fel ngawt chi a nih loh avangin muangchanga khum leh tul dangte ngaihtuah kan tum a ni. Chutia tan ka la thar viau chu mi pawn mak min ti deuhin ka hria. Ka rilru an hre lo va, hrilh kher pawh a tulna ka hre hran lo. Baby pawn min rawn pui ve láwp láwp a, he hmeichhia hi fel ka ti ngawt mai. Zakthei lo tia sawi theih a ni hauh lo va, a nelawm piahlamah a zahawm ru riau bawk si. Tlaia kan hawn kawngah Malsawmi te nen kan intawk leh ta hlawl. Sunday-a kan inhmuh bak kha kan la inhmu leh ta miah lo kha a nia. "In va bang tlai ve" ka ti a. 

"Khitah Hermon-ah chaw kan rawn ei nghal a" a ti a. Kalpelh mai ka tum laiin, "Khawi i number min lo pe teh" a ti a. Ka pe ve mai. Ka number a lo nei tawh bik lo a niang. Ka'n inbual fai a, A chang chuan lung a leng thin. Han inbualfai ver vawr hnua han lem sak hi a chakawm duh riau, lo haha lo chauh ve phei chuan. Mahse, ka kalpel tawh a, let leh erawh ka tum hran lo e. Diki'n nau a vei thut a niawm a, Valtea'n min rawn bia. A neih a la hun lo deuhin ka hre sia, ka hlauhthawnpui deuh. Rang takin ka u nen kan tlan chho a, Damdawi in pan tumin an lo inpuahchah mek, An kawmchhak te motor a lo remchang hlauh bawk a, a zia e. Diki na ti lah chu a vial ngawlh ngawlh tawh si, hmanhmawh takin kan tlanchhohpui ta a, Valtea nen kan laitat a, kan in lam kawng hi kawng a la tha lutuk lo nen, kan insawh khawlo ang tih ka hlau deuh. Diki chuan a hmui a pet fan fan a, a rum leh dat thin. Hmeichhe nau vei leh mipa lo vat chu hlàng chunga chuang ang an ni tih upa ten an lo sawi thin kha a dik viau awm e. Keini mipa tan nau vei chu a natzia hriatthiam a har. Mahse. A na ang. Kan tlan chak bawk a, kan thleng hma viau. Zawn a duh bik loh avangin kan kuah lut a, nau neihna ward-ah kan luhpui nghal tawp. Pi Rengpuii duty zan ber kher a lo ni zui a! Ka va hmu peih lo ber tak. Ka rin ang ngeiin a rawn lut a, "Hetah hian lut rawh u, ka ti em ni? Engvanga nau neihna ward-ah hian luhpui nghal ngawt nge in nih a?" A ti vin thak a. Valtea mangang ve tawh si chuan, "Min hmu reng a, min rawn ngaihsak lo a nih kha" a lo ti ve tuar. Pi Rengi chuan Diki dul chu a va khawihsak a, "A neih a hun tawh reng reng em ni?" A ti leh a. A awka chuan ngaihno a bei lo thei khawp mai. "Thla leh khi niin kan hria a, mahse, hei a na ta thut sia" Valtea chuan aw dam deuh zawk hian a lo ti a.

"San a la pe lo, nghak rih rawh u" a ti hmak a. A chhuak ta daih. Kan hrilhhai angreng hle. Sangkimi ka call a, Valtea ka biaktir, "Sangkim ,i nu ka be thei ang em?" A ti a. 

A nu a pe ta vat, "Doctor, hei ka nupui hi a nau neih a la hun chiah lo niin kan hre naa, a pum a rawn na ta vak sia, Nurse duty lahin min ngaihsak si lo, engtia han tih chi nge le? Na a ti tawh sia" a ti ta hmiah hmiah a. A thin a tawt thawkhat tih a lang reng mai. Doctori chhanna erawh ka hre pha lo. Phone a dah hnuah, "A rawn chhuk dawn e" a ti sup a. A nupui thlan te chu a va hrukfaisak a, Diki chhungte ka biaksak bawk. An hamhaih ve êm avangin engmah thildang an ngaihven hman bik lo a ni. Dr. Saidingpuii chu a rawn lut ta ngei a, a hmel hi zawng a tha, mahse, tunah chuan a hmelma ka ni rih tlat. Diki chu a han dap vel a, a bp te check sak lehin, "Tlaiah eng nge in hmeh le? Ei sualte hi a nei zawk a ni lo maw?" A ti nem leh diai a. 

"Eng em em kan hmeh lo, sangha chhum, dailuah leh alu fry a ni deuh mai. Amah tak hi chu a pum a nat deuh riai riai tawh avangin tam pawh a ei lo" Valtea chuan a lo ti vat a. 

"Aw le, a nih chuan nau a hnaih leh hnaih loh hriat nan zen lawk a ngai dawn a, lo va chhuak rih ta che u" a ti ta a. Kan chhuak nghal vat. Diki chhungte pawh an rawn lang ta a. An ngaihtuah hmel kher mai. Doctori pawh kar loah a rawn lang a, "A mak hle mai. Nau a hnai tlat, in chhut sual a ni maithei. Nurse ka'n hrilh ang e, san a rawn pe tan tlat" a ti a. Pi Rengi a ko nghal bawk. Tûm bûr chungin Rengchhiai chu ward-ah chuan a lut ta a, Pa Zara'n tuilum nen a zui lut bawk. Diki chu a chhel hle a niang, a na tuar te thawm kan hre lo. Valtea chu a vei sek a, a hlauthawng hle tih ka hre mai. Hnem vak dan ka hre bawk si lo. Diki lah chuan a vei rei hrep lehnghal, Pa Zara tuilum rawn la tur chu Valtea chuan lo pawt dingin, "A la nei lo mi?" A lo ti vat a. 

"Aw a rawn lang tep tawh e, hlauthawng suh" a ti a. A kal leh vut. Valtea chuan ka hriat phak tur chauhin, "Saw Zawngrengi saw ka ring zo hlawl lo. Eng emaw a thleng a nih vaih chuan a chák lo ang" a ti nghut nghut a. "thianpa, engkim a tha vek ang. I ngaihtuahna kha chawlh hahdamtir rawh" ka lo ti vat. Darkar hnih dawn kan nghah hnuah Pa Zara chu rawn chhuakin, Valtea bulah chuan, "Fanu i nei e" a ti ta a. Khata Valtea mitmenga hlimna kha ka la tawn ve ngai loh thil a nih avangin hmuhnawm ka va ti tehlul êm. Hmanhmawh takin kan va lut a, Naute tap ri ngàk ngak pawh kan hre ta. Pi Rengi chuan puana tuamin Diki bulah chuan a muttir a, nau neih pangngaia a nei thei chu a lawmpuiawm hle. Mahse, rei kan awm hmain, Pi Rengi bawk chu rawn lut lehin, "A inhliam nasa viau mai a. Kan thui ran loh chuan" a ti a. Kan kaltirh ai kha chuan a aw pawh a nem ve ta deuh, Doctori kan koh thlak leh a hlau a ni mahna. Sangkimi'n min lo call a, "A nei tawh em?" A rawn ti var. A lo ngaichàng ve reng tak e. Ka'n hrilh chuan a nui hak a, "Ka va lawmpui êm aw. " a ti hliai a. 

"Keini pawh kan la nei dawn alawm" ka ti fiamthu a. 

."Nia, ka chak tawh" te chu a rawn tih ve niah niah kha. Thleng ngei teh se. Valtea'n a tuka kan programme a hriat avangin hawnsan turin min ti tlat a, Diki chhungte an thahnem tho bawk a tiin ka hawnsan ta a. Eng em an ti lovang chu maw. 

A tukah chuan ka nu duhdan thlapin ka puin kan dawr hlanna hunserh chu a hmang a. Pathian hnenah a hlan ta thlap mai. Ei leh in chu kan la siam tam duh rih lo va. Chawhmeh ka chah pawh tlaiah a rawn thleng ang. Tlawngah hmelhriat tha tak ka neih ka hmang tangkai a nih hi. Aniin Tawipui sumo-ah a lo thawn diam tawh a ni. A thar a ni bawk a, customer kan la nei tam falua lo. Khaw chhung mi rawn chawl an tam zawk mah awm e. Ajei'n a thiamna a pholang tha nghal bawk a, chawlh nawn fo tlak a nih hi an tih ve hlawm kha maw. Nula kan la hmuh mai loh avangin ka nu nen eitur chu kan sem mai a, kan buai em em rih lo. 

Tlaia Patea lo kal chuan, "Essi saw thawhtir ve mai ula, engmah a ti ngai chuang lo. Amah pawn a hreh loh kha" a ti a. Esii chu a fanu upa zawk kha a ni. A hmelchhe lem lo bawk a, bakah mi biangbiak a thiam reuh phian bawk nen, a hreh loh phawt chuan pawi ka ti lo nasa. A tuk atanga thawk tan turin kan intifel leh ta diam e. Ka rin aiin ka tluang a, mi ten buangbar taka bul an tan laiin felfai takin ka han tan thei a, ka nu tawngtaina rah a ni ka ti lo thei lo. Chawhmeh rawn thleng pawh chu a tam lem lo bawk a, khawchhungah a zo nghal vek. Lawm em emin ka haw ta a. Sangkimi pawh ka han hrilh ve a, min lawmpui ve hle. Hah pawh sawi loin zanriah ei kham veleh damdawi inah Valtea te han kan turin ka tlan chho ta nghal a. Diki chu tuilumin an thuina hmuamhma vel a lo dehsak mek a. Naute lah chu a muhil sêk sêk reuh a, a pa a chhun vak lo, a ngo sen chek mai. Valtea chu pa a ni ta bik chu a nia. A awhawm mang e. Diki laizawnte an fel thar thar khawp mai. Engkim an buaipui a ni ber e. Naktukah chuan an chhuak thei tawh mai ang chu maw. 

"Chhuanlam siam la, lo chhuk ve zuai la, kan inhmu lo rei tawh sia" Sangkimi bulah ka han ti a. 

"Ka tum char char alawm. Zan chhuah a remti lo bur sia, mahse, tihdan ka lo dap leh ang" a ti ta a. Nghakhlel takin ka lo nghak. 20 mins velah thil eng emaw khai chungin a rawn lut ta zan zàn a. Ka va lawm ber tak êm. Awm ve te chuan kan inkar an hresa vek bawk a, zah teh tût pawh a ngai hran lo. "Engmah ka lei hman si lo va, hei hi Aizawla ka lei, Ka thiante naute en nana ka tih a nia. Ka en leh thei ta si lo va, ka pe mai ang che u. Tawipuiah chuan lei mai tur a vang sia, min pawmsak mai r'u aw" a ti siam siam a. Diki nau chuan a lo en vat, naute pianghlim kawr leh kekawr, mawza leh lukhum a lo ni reuh a, a tê reuh sia, a lawmawm reuh tawp. Diki leh Valtea te chuan lawmthu an sawi mawlh mawlh mai. Chance neih ve hram kan duh si, Kan nel em em U Feli inah ka chhukthlakpui ta ngawt a. A hnial bik lo. U feli pawh ka beisei angin amahin a lo awm a, ka thaw huai mai. Min lo be nghal bawrh bawrh a, "Tluanga, tang nasa rawh aw. Nangmah ertu che leh sawichhetu che hi i rin aiin an tam a nia. " a tih chuan mak ka ti vak lo. Engtin tak min lo sawichhe hlawm ang maw? Kan pahnih inkar boruak hrethiam rual a ni bawk a, "I pa Rina te inah ka sahdah ka theihnghilh daih, ka va la lawk ang e. Lo leng reng r'u aw" tih leh chhuah a rual ta a. Kawngka ka kalh hmiah. Hlauthawng reng renga inhmuh chu ka zeihawi vak lo. Eng sawi set set loin kan inkuah vawng vawng a, kan infawp duhthawh hle bawk. Zep loh chuan ka jail tan avang khan ka fit em em a, ka tha lah a za bawk. Chutia ka hmangaih leh duhber ka bula a han awm takah chuan ka insum thei ta mang lo va, duh aiin ka lo kal thui lek lek thin. Amah zawkin, "Tluang, kan nghak thei. " tiin min hnar zel a. Amah pawh a biang a tai hlar a, a mitmeng pawh a da riai mai. Mahse, a duhthlanna ka zahsak a, ka insum ta zawk. Ka phone a rawn ri ral ral a, Valtea a ni tlat! "Doctori a rawn chhuk" a ti ta mai. Sangkimi nen kan che buai ta. Kan hamhaih chhungin kawngka chu a rawn sawi ta a, "Rawn hawng vat r'u" a rawn ti ta tuar mai. 

Intipachangin ka va hawng ta a. A mitmeng chu a linin a ling vâwt vâwt a ni ber e. Min beng mai duh hmel a pu. Mahse, min kalpelin a fanu lam chu a pan a, Sangkimi a beng tur chu a ban ka va chelhsak hman, "Ka pi, khawngaihin kut chu thlak lo hram rawh. Keimah hi min thlak zawk rawh" ka ti zawi sup a. 

"Mi tenawm pahnih, mi inah tawm dunin fianrial hun in lo hmang dun vel a maw? Ka ring rêng a, Rinsangkim, rang takin rawn haw nghal rawh. Naktukah Aizawlah i phei nghal ang. Zothantluang, ka sawi tam tawk tawh a ni lawm ni? I chanchin ka hre tam tawk tawh a, ka makpa ni tur hian i tling tawk lo. Mi che thei tawh lo nghaisak vanga jail bang zut tawh hi ka fanu ka neihtir ang maw? A teuh lo mai. Eizawnna mumal pawh nei lo hnenah he mihring bawrhsawm lutuk hi ka kaltir ang maw? Ngaihtuah pawh ngaihtuah duh suh. " a ti khur ta hlawk hlawk a. A thinrim takzet tih chu tawng lo mah se, a hriat reng mai. Chutiang taka min hmusita a fanu ka hmangaih vanga ka buaina te pawh min diriam duh hmeichhia chu Sangkimi nu mah nise, ka tuar thei ta ngang lo va. 

"Aw le..ka pi, i fanu nen kan inkar hi ka titawp nghal e. Mipa tha tak, i duhthusam ngei i neihtir dawn nia. Ka bansan e. " ka ti chang ta fak a. Kal ka tum chu Sangkimi ka hnungah a rawn bei thlawp. A tap zui nghal hlawp hlawp a, a harsa a ni tiraw? Duatpui.. 

.

"Aih, inthen ka duh lo, Tluang, ka thei lo. Khawngaihin..ka dam tawh alawm" a ti táwk táwk a. Doctori pawn a lo melh ve tlawk tlawk ringawt. Pen a sak talh thei nia. Mahse, Sangkimi min kuahna chu la thlain, "Khawvel dangah zawk aw. Sangkim,." Ka ti sup a. Mittui khap per sak chungin ka chhuahsan ta. Ka tlawm ta, ni e, Zothantluanga hian ka chapona ka hneh zo ta lo. Mihring ka ni ve miau si a. Bike ka tih nun lai chuan Pa Ruatpuia a rawn lang hlawl mai a. Ani hi zawng min hrethiam thintu a ni a. Zahawm ka ti em em. Ka bulah rawn dingin, "Tluanga, i beidawnsan thiang lo. A nu khuan a fanuin a chhun tih a hrethiam miah lo a ni. Sangkimi hi a beidawn ring suh. Kei chuan ka fanu hlimna ka duh ber thin..i hrethiam tiraw?" Tiin ka dar a rawn hmer sak a. 

"ka pu, ka lawm e. Mahse, ka tel lohna hmunah i fanu hi a hlim zawk maithei asin. Kei chuan ka hmangaih takzet e. " ka ti nghut a. Ka tlan chhuak nghal. Ka thin a rim a, ka zak a, chak lo ka intiin dem tur leh puhmawh tur ka dap kual a. Ka bike khalh lai pawh chu ka hrechang meuh lo a ni e. In erawh ka thlenpui ve thei hram. Ka nute chu an lo mu tawh hlauh a, ka lawm khawp mai. Ka hmelhmaiah ka thil tawn teh hrep khan min timualpho dawn tih ka hai si lo. 

Dar 12 a pel ta. Ka la meng kar. Ka ngaihtuahna erawh a tawi tup a, engmah chu a nuam hlawl lo. Ka va zung a, ka hmai te ka phih thul. Tumah ka be chák bawk si lo. Ka phone rawn nghawr dat dat ri chuan ka ngaihtuahna ram atangin min rawn kai harh a, Zing dar 1 a ri lek lek tawh. Sangkimi'n tun angah engvangin nge min lo call le?! 

Ka lak rual rualin, "Tluang, min rawn ru chhuak rawh. Tunah" a rawn ti zawi sap a.