Rinsangkimi 1

RINSANGKIMI (1)

Ziaktu: Toni Rálte

"He hmeichhia hian ka thlarau thlengin min hmangaih a, ka phatsan a nih chuan thih hnu piahramah pawh ka nuamsa hlei lo'ng e" 

Thianpa Valtea chuan, "Tluanga, i hman tawh em?" A rawn ti lung lung a. Bathroom atangin, "Ka inthiar lawk" ka va ti ve lung lung a. 

"E reng mai a" a tih chuan ka nui suk. Ka inthiar zawha ka va chhuah chuan ka nu bulah a lo tawlh leh hrut hrut a, ka nu vaihlo zial lai chu pakhat a la zauh a, a tan nghal bawk. 

"Khawi zawkah nge in kal dawn?" Ka nu chuan a ti a. Valtea chuan, "Pi Hmingi te inah zawk, Pu Ruata te chu inleng an ngah thin tho" a lo ti a. Ni e, mitthi pahnih a rualin kan nei a, Pi Hmingi te hi an veng hla zawk mah se, an michhe deuh a, inleng an ngah vak lo an ti deuh nen, Zanin chu va len ve kan tum a ni. Nizan lamah zan len kan deng daih sia, kan leng tawh bawk si lo nen. Ka insiam zo a, kan chhuah dawn chuan, "Mama, Pu Thanghluta te khan huan sam chu engtik nge an tih lo zawt nghal teh aw" a ti láng làng a. Ka e aw liam ringawt. 

Zothantluanga ka ni a. Zothan tiin emaw Tluanga tiin emaw min ko thin. Ka nu leh ka farnu Lateii te nen chauh kan khawsa a. Tuna kan awmna Tawipui south hi Mizoram chhim lama awm niin, Lawngtlai thlen hma deuha awm a ni. Lar vena deuh kan neih chu kan khaw hotel-a an eisiam a tui hi a ni. Nia, Hotel awmna khua a ni a, Hotel pawh a awm nual. Branch YMA hi pathum awmin, Mt. Hermon, Minpui leh Bazar Branch te an ni. Keini chu Bazar huam chhung IB road kan ti mai a, chutah chuan mi in hnuai luahin kan khawsa ve a. Kan chhungkaw chanchin sawi hi thil nuam tak a ni hran lo, mahse, sawi loh theih loh a ni bawk si. Ka nu leh ka pate hi kum 3 liamtaah khan an inthen a, a chhan pawh ka pain ngaihzawng dang a neihsan vang leh ka nu kutthlak a chin êm vang a ni. Ka nu leh pate inneih lai chuan hotel an siam ve thin a, Ka nu hi eisiam thiam tak, mawng zàng tak a ni bawk a. Customerte lo biaksawm dan a hriain an vanglai chuan an lun ber maithei a ni. Kei leh ka u hi chu Lungleiah school kalin hostelah kan awm thin a. Ka pain ka nu a treat dan chu engkim kan hre vek thin lo. Ka nu hi Tlabung khua a ni a, Tawipuiah hian chhung leh khat tumah a nei lo. A pa zawnte an ni deuh mai. Ka pa erawh Tawipui khaw tuiliak, an chhungkua pawh hung ve pangngai tak an ni a. Ka pa nu hi a la dam bawk a, an sawi hmangin ka nu hi an inneih tirh phat atangin a duh lo va, a thiantha tak fanu leh ka pa chu innei zawk se a lo ti ru viau a niawm e. Mahse ka pa khan ka nu chu a duh ve êm a. Ka nu hi ka nu a nih vang ni loin nu hmeltha , te fel ran mai a ni a. A hawihhawmin mikhual chan pawh a chang rei lo, mi ngainat a hlawh rang viau a niawm e. Hotel an siam hnu chuan Hotel hnuaiah an riak ve mai zel a, in hrang kan chang a nih ber mai chu. Ka pate unau hi paruk lai an ni a, ka nite pahnih chuan Tawipuiah tho pasal neiin, ka niteii erawh Aizawlah a nei thung. Ka pate u chiah hi Thingfalah an khawsa a, ka pate unau zinga naupang ber ka patea leh a nupui fanauten inpui an luah thung. 

A tawi zawngin sawi ila, pawl 12 ka pass kum khan ka pa chuan ngaihzawng a nei ta a. Chupawh ka piin a hmaa nei tura a lo duhpui thin em em, a thiannu fanu Nu Rami a ni. Thingkahah pasal neiin fa pakhat an neih hnuah a rawn let leh a, kan chhungkaw thian anga lang siin ka pa nen chuan a rukin inlaichinna an lo nei ru reng a lo nia. Ka nuin a hriat ve meuh chuan an lo kal thui tawh hle. Kan hriat tirh chuan rawlthar, engkim hrethiam ve vek ka nih avangin ka zakin thian pawh ka kawm ngam ngai meuh lo. Ka pa chu kan unauin kan han khak ve ngial a, A hmaa a chin ngai reng reng loh zu in a lo ching ta bawk nen, pawisak a nei der lo va. Ka nuin a han hauha a ankhum pawn a thiam zawk ang maiin ka nu chu kut a thlak thin. Zan khat junior TKP ten hla kan zir zo ka haw chu ka u hi tap chungin a rawn tlan chhuak a, min hmuh rual chuan, "Mam, ka pa sawn ka nu a sawisa hlum thei takngial dawn..va dang rawh u" a ti tiau a. Ka thiante pahnih Valtea leh Zuala te nen kan tlan lut nghal. Ka pa chuan ka nu chu bangah a lo rek bet a, ka nu chu a mit te pawh a sen rûm tawh. Kan pathum chuan ka pa chu kan dang thei ta hram a. Ka patea te leh ka pite an rawn lut ve chiah bawk, ka u khan a va ko a lo nia. Ka patea chuan ka pa bulah, "I zahpuiawm lutuk, ka u mah ni la, i chetdan hi ka ngaithei tawh lo. Kimi leh i fate khawngaihthlazia hi.." A ti ta hrep a. Ka pa rui bawk si chuan ka patea lehzel pawh chu khawih a tum a, mahse, zu in ve ngai lo ka patea chuan a lo nam leng lawp mai. Ka nu chu bang kilah thuin a tap khur zawih zawih a, ka pi lah chuan, "Kimi pawh i pasal i zah lo ve bawk alawm. Mi thusawi mai mai i la thutak a, pasalte tan chuan nupui áng reng neihte chu tuin nge duh ang? A dawhthei ngawt zawk che alawm" a lo la ti zui. Ka va melh hràwk a, ka u zawkin min tawng khalh. "Pi, anu hian ka pa hi a ankhum khàt teh asin. Khatianga tawngte kha i zak zawk lo mi? Nu Rami pawh ka pa nen i tihpui tih kan hre vek, pitar rilru chhe lutuk" a lo ti ve hmiah mai. Ka pain, "Vanlalruat," tih leh ka u chu velh a tum a. Kan lo dang vat. Kan thawm a ring bawk a, thenawm khawvengte pawh an rawn dak hiang hiang hlawm. Tuman ka pa an thiam lo, ka nu mizia hrechiangtu leh a dawhtheihzia hretu an ni bawk a. Ka pa chuan , "Min chhuahsan rawh u, Kimi, ka nei peih tawh lo che a ni e. Rami ka lalut dawn. Kan ti ta sa sa, a tawp thleng law law ang, i fate pawh i hruai thei ang" a ti ta khur khur a. Min hnawtchhuak lo mah se, ka nu dinhmun a hlauhawm tak êm avangin chhuahsan daih kha ka lo rilruk sa hrim hrim a. Ka nu pawn vawitam hnawhchhuah tawkin hmelhmai hmuh tlak loh khawpin ka pain nghaisa thin mah se, 'Fate avang tal pawn' tia tuar ngat ngat thin a ni naa, khami zanah kha chuan engmah a sawi bik lo. A ding nalh a, a fate chu min koin, "Bungrua chu naktukah kan rawn la mai dawn nia" a ti sap a. Min chhuahpui ve ta hmak. A rilru a lêt ta a ni ngei ang. A pazawn Pu Ngura te inah kan tlan lut ta a, Pu Ngura te hi Tawipuiah chuan khawsa thei pawl leh mi zah kai an ni ve a. Dawr lian tak an nei bawk. Kan va lut pawh chu mak an lo ti vak lo, a hma pawn Pu Ngura nupui Pi Sangi hian, "Kimi, i dawh rei tawk tawh e. In nufain in dang ula, kan zarah pawh in rethei bik lo vang" tiin ka nu a lainat luatah a lo fuih ru ve hial tawh a ni. Tichuan, chumi zan chuan ka pu ti tawh mai ang aw te inah chuan kan riak ta a. Muthilh a har duh khawp mai. Zingkarah ka nu te chuan bungrua an va la ta a. Ka pate chuan an lo dang lem lo. Nu Rami pawh a lo thu ve ran a niawm e, khamini atang khan Nu Rami chu a tenin ka ten tawh. Ka pa chu sawi loha lum ni ta se. Tichuan, kar khat vel zen zawn ka pute inah chuan kan awm ve a, ka nu chuan in luah tur a zawng ta a. IB road lamah Pu Vana te in hnuai a lo ruak hlauh a, an ni pawn ka nu an lo khawngaih bawk nen, kan indang ve ta rup a. Thiante an fel a, min rawn puitu an tam hle. Chutiang tehnuai chu kan chhungkaw dinhmun chu a ni ta a. Ka nu hi a nu leh pate an dam tawh lo va, Tlabungah let leh dawn se a tuitla tak tak thei tawh dawn si lo nen, keini a fate hmakhua a ngai ve bawk si. Chutia kan nufa thuma kan han indang ta chu a tirah chuan mi khawngaihna kan dawng nasain chawhmeh engilo te pawh min pe khawm liam liam a, kan harsa vak lo. Bakah ka nu hi a lo mawl bik lo va, Ka pain ngaihzawng a nei tih a hriat atang khan rilrua tum nei ve ranin an sum thawhchhuah atang chuan a ac-ah tlem tlem a lo dah ve hlek hlek a. Chungte erawh chu khawih chet a phal rih lo. Nakina kan zirna senso a tan a ti ve a ni. Ka u chu a hrisel lo chho riau bawk nen, bakah hmeichhia na na na chu an rilru a lo puitling deuh bawk a. BA a chhuak tawh tho a, zirna chu chawlhsan a duh ta a, ka nu chuan remti vak lo mah se, a tum bur si. Vanneihthlak takin Tawipuia English medium awmchhunah zirtirtu atan an lo sawm ve hlauh mai a, min khawngaih vang ka ti lo thei lo. Hlawh chu a chuti lua lo naa, tlem azawng a lo thawhchhuah ve pawh a hlu tiin a thawk ve ta a. Kei erawh BA 5th sem ka kal ve mek a. Kan unau hi kan vannei a, lehkha kan thiam ve viau, a rualpawl tawk kan ni ve thei zel a, ka nu pawh a hlim thin khawp mai. Ka nu chuan kei chauh tal chu MA tal zo turin min duh a, mahse, Ka chak vak lo. Academy line ngawr ngawr hi sawrkar mi pawimawh hmelhriat neih loh chuan hna hmuh a harsa êm a. Han tui viauna lah ka nei si lo, Sipai lam lah ka nuin a remti der lo va, a hmuh phak loha ka awm tur kha a ngaingam lo a ni teh chêk ang chu. Ka pu Ngura chuan, "BA hi zo la, MA te chu IGNOU atangin i pass ve leh mai zawk ang a, sumdawnna lam hi kal teh. Kan dawr khu i enkawl dawn nia, i U Muana hian a tui vak si lo. " a ti thin a. Ka rilrem zawng tak a ni. Ka nu erawh chuan a ngaihna a hrethiam vak lo thung. Ka pu Ngura te hian fapa pathum leh fanu pakhat an nei a, an vanduai a an fanu neihchhun hi rualbanlo ti mai ang, rilru lama chiang vak lo a ni a. An upa ber hi Aizawlah hna tha tak neiin a nupui fanaute nen an khawsa a, a dawt leh chiah chu U Muana chu a ni. A nupui leh a fate pahnih nen a pate inah an khawsa a, an te ber erawh tlangval senior lam ni ve tawhin sumdawnna lam tui eih lo a ni a, an motor lian a khalh thung. U muana nupui U Ruati hi kan khaw damdawi inah nurse a ni a, an fate erawh phaiah zirna avangin an awm thung. BA ka chhuah chuan ka pu sawi ang chuan an dawrah ka thawk ta a, a tir chuan ka zei lo nasa; Hardware lam pawh an khawih tel vek avangin a hautak viau mai a, U muana'n ni hnih vel chu min han enpui a, ka zia ta deuh. An dawr hi Bazar luh chiahah a awm a, a hranpa ngata an sak a ni. Hotel hnaih a nih bakah thil an nei chikim a, lun thei mep mep tak a ni. 

Valtea'n, "I nu sawi kha i theihnghilh a mi? Pu Thanga te in kan pel dawn a nia" a rawn ti thut a. 

 

Ka ngaihtuahna ka lo kawm nasa deuh a ni. Pu Thanga te inah chuan ka va peng a, ka nu thu min chah kha ka sawi a. "Naktuk tuklehah ni mai rawh se." an nu chuan a lo ti a. Ka u nen hna thawk tawh lo va in lo nghak mai mai tura kan tih pawn, "taksa ngeih tawk tala thawh hi a tha" a ti zel a, mahse, ka pa nen an inthen hlim lai ai kha chuan hahdam ve tawh tak a ni. Pathian zarah hausa lo mah ila, kan eikhawp hi chu kan hmu ve ta zel a, ka pute lahin hlawh min pe tha si, ka u nena kan hlawh ka nu kan han hlan lai boruak aia nuam hi a váng ka la ti rih,. Ka pa tel lo pawn kan hlim ve ta e. Ka pa te kha sawi tawh ang khan an innei zui a, Nu Rami chuan a fanu a chhawm tel nghe nghe. An inneih hlim hian in puiah ka pa chuan hruai luh a tum ngawt mai a, patea a lo têk viau a niawm e, "He inah hi chuan in rawn lut thei lo vang, hetiang mo hi kan duh lo ve" a lo ti hmiah. Ka pa a thinrim viau a, ka pi pawn a lo thinrimpui. Ka pi bulah Patea chuan, "I duh leh va zui ve rawh. Ka pa kha Kohhran upa, a hunlaia mite ngaihsan leh pan rawn a ni thin. Hetiang thil tenawm hi a ina awmah a duh lo vang" a ti leh hmiah. Tihngaihna dang awm hek lo, Patea in a ni tawh miau bawk si a. Ka pate chu hotel an luahah let lehin a tirah chuan hotel chu an chhunzawm naa, Nu Rami a thatchhe si a, an kawrawk mai dawna a lan avangin an titawp a. Eichawp dawr an siam ta zawk a. Ka pi erawh nikumah khan a boral ta , a thih niah ka nu hoin tumah kan lang lo. Ka sûn lo nasa a ni. Patea te nen erawh kan la inhre thain amah pawh hi a rawn leng chho fo thin. Min en hrang lo na na na chu keini pawn kan lo thlahlel ve bawk a. Chhungkhat kan ni reng tawh ang. 

 Khawhar in kan thlen chuan pawnah an lo thu nual a, an khat tawh mi le ka ti rilru. Mahse, YMA hruaitute chuan min rawn hui luap luap a, Kun deuh chhal chungin kan va lut ve a, tlar hmasa ber dawttuah kan la thu chut zui. Kei hi mize harhvang vak lo, zakzum ni chiah lo, ngurchuai an tih ang deuh chi ka ni a. Biak hmasak loh chuan lungtum an tih ang chi deuh, sawi tur hre vak lo ka ni. Ka sawi duhzawng tak sawihonaah erawh ka tawng thei ve fu tho. Ka landan hi chu mahni insawi hian a fiah tawk lo thin. Ka pa te lam ka chhun a, ka paté chhe lem lo, ka pa hi an tlangval lai chuan Tawipui khuaah a sang ber a ni thin. Ka pa erawh ka chen lo thung. Ka cher chhe lo bawk a, exercise ka la ngai lo naa mipa hi chu kan inphut mawi ve leh thei mai zel. Lu meh kawn hi mawi ka tih tehlul nen, ka nu hian a phal tlat lo va. Ka sam pawh a buk lam deuh a ni zel. Style-ah ka buai ve vak lo bawk. Ka hàng lo va, ngo hlung erawh ka hlau thei viau. Ka ruhrel a len vang nge ka ruakhau riau hian a lang a, chaw ka ei tam loh vang erawh hi chuan tlangval chak tak ka ni miah lo thung. Zirna avanga ka awmbo vang vanga kum tawpa ka haw chang hi chuan tleirawl te te hian min lo star ve thin. Nikum hmasa khan Tuikhur veng ami Ruthi nen kan inzui ve zuai hman a, ani pawh hmun danga awm thin a ni. Mahse, kan han kalbo a, kan inthen zui leh daih. Lunglei Govt College-ah khan ka chhuah dawn tawh lamah ngaihzawng lak lungrun ve deuh chu ka nei ve a, Malsawmi a ni. A zui pawh kan inzui nasa, zep thu a cheng lo chance kan nei nasa bawk a, Ka nuin min zilhna zawm zo loin sex hial kan hmang a ni. Kha vang kha ni maw then harsa ka ti viau a,ani pawh a chuti ve tho. Kan han graduate a, kan khaw lamah ka haw ta. Kan inbe zui zel naa, thla hnih vel a liam takah chuan min be tha peih ta vak lo va, min kalpah ka ti mai. An veng ami ka thianpa ka zuk zawt ta hmiah a. Ani lah zep tit tet nei ta lo chu, "Chanmari ami a ex nen an renew leh alawm, an inphur hi ka hmu fuh thei em em lehnghal, in inthen tawhah ngaiin ka rawn hrilh duh lo che a" a lo ti ta mai a. Kei mahni tawka induhtawk ve tak chuan " Mai maia" tiin Malsawmi chu ka be zui duh ta lo va. A tirah chuan ka danglam thut chu mak a ti deuh nge min rawn be zawrh zàwrh a. 

"I ex nen in ni leh tih ka hria a, duhtawk ang. " ka ti ta hmiah a. A reh zui ve ta hmak. Chu zawng chu ngaihzawng lama ka sulhnu a nih ve chu. Kan duhzawng tak an nih avanga an mitmei pawh hmu miah lo va hmeichhe bem ngawtte hi ka tlawmlakna lam tak a ni a, han biak ve zauh zauh te chu ka nei naa, inhmuh loh chuan a ho riau. 

Ka han dak chhuak a, mipa leh hmeichhia hi kan thu hrang thin. Ka hma zawn khuangpu hnung chiaha hmeichhe tleirawl lam deuh lo thu nen chuan kan mit a intawng sak nia! Ka mit ka va la rang tak. Mahse, ka va en nawn leh a, min rawn melh ve leh chiah. Tawipui hi khaw zau leh lian ve tak ni mahse, a mi chengte hi kan inhre deuh vek zel a, chu nula chu ka hmuh vawikhatna a ni tlat. A bula thute chu Minpui veng lam Teteii te thianho an ni a. Ani saw Minpui lam a ni tihna em mawni le. Nge mikhual a ni zawk. Hetia en mai pawn hmeichhe lian tak a ni bik lo tih a hriat hle, a ngo em em thung. A ngo vang nge. a bul chiaha thu Teteii ngo ve tawk tak pawh chu a lang háng vek niin ka hria. A sam chu a thlah hnàp a, a dum hlap bawk. A lai takah bari a then a, chu chuan a tilang zahawm riau, a mitmeng chu a zauin a lian tha viau bawk. Kawr dum a ban laklawh ka ti mai,simple deuh hi a ha a, a puan bih chu a hring duk lam a niin ka hre bawk. A va hmuh vek theih bik si loh a. A zai rin vak loh hmel, a àng zau lo em mai. Zahzum hmel tak anga lang siin a kun ve ngul lo va,. A sam vel a khawih ve sek lo bawk. Chuti taka ka chîk ta chu mak ka inti ru hle. 

Valtea ka nghawk zauh a, zawi deuh hian, "Khuangpu hnunga thu saw mikhual ami? Ka va hmu ngai lo ve" ka ti sur sur a. A va melh ve zawk a, "Kan Doctor fanu a nih saw. Tu nge a hming kha aw..e Rinsangkimi an tiin ka hria" a rawn ti ve sur sur a. Hmm, Doctor thar kan neih kha thla khat liamta a ni, amah Doctor pawh ka la hmu chuang lo. Mikhual ang nisi, kan khaw mi ang ni tho si a nih tak ber chu. 

Banna hla saa kan han ding chu kan khuangpu Pu Vala a lian tha bawk a, Rinsangkimi chu a hliah ta vek mai, ka lunghnûr viau. Kan han chhuak sang sang a, Rinsangkimi te erawh an la thu khawmuang. Pawn kan thlen rualin, "Valte, a va chhe lo reuh ve" ka ti ta thàwr a. Min rawn melh vut a, "Ve tak che chuan, hmeichhia i hlau a ni lawm ni?" A la ti zui. Ni e, ka lerh loh ve ém vang hian fiamthuin hmeichhia a hlau min ti thin. 

"An rawn awmna a rei tawh nen, engtin nge ka hriat loh theih le?" Ka ti nang nang a. 

"Tu vak mahin an la hre lo vang, a chhuak ngai hleinem. Kei pawh Hminga te atangin alawm ka hriat" a ti ve mai a. A hmel kha ka mitthlaah a cham zui tlat lehnghal. Ka la hmuh ngai loh vangte pawh a ni ang e. 

 Valtea chu a rawn peng zuai a, a tukah thingzai an thiar dawn avangin thawh hma a ngai tiin a haw ta a. Valtea te nen hian kan inhlat vak lo, tette atanga inkawm tawh kan ni bawk a. Kan inthlah thei lo chu a nih ber hi maw. Thian dang nei nual mah ila, ani nen hi chuan kan inzawmna a thûk bik. An khawsak hi a harsa ve a, zirna pawh pawl 10 thleng bak a kal lo. Hna a thawk nasa a, a ramvachal hle. Zirnaah lungrual ta lo mah ila, ka hawn chang chuan ani nen bawk hian kan inzui leh nge nge thin. Ka nu bulah Pu Thanga te thusawi kha ka hrilh a, Ka u zung zo chuan, "Nu, Sumo chu min biaksak ta em?" A rawn ti a. 

"Khaw nge i kal dawn?" Ka lo ti hû. 

"Lungleiah mamawh lama zuk kal lawk a ngai. Puanthui khawl kan dawng ve dawn bawk a,.chungte chu zuk lak a ngai" a ti siam siam a. Ka nu hian puanthuikhawl a nei lo nachungin in chungte khawl hmangin kawr leh cushion case tih vel hi a thui ve thin a. Hlawk tak ni lo mah se, a zia ve phian. Chutia khawl a dawng ve tur chu ka lawmpui hle. 

"A that chu,. Ram hnathawk vak vak tawh loin puan i thui thei tawh ang a" ka nu melh chungin ka ti a. A nui ringawt. Kei pawh mu turin ka inbuatsaih a, kan in luah hi a zau viau lo naa, room hnih zim tetein kan pingdang ve a, room pakhatah ka mu a, pakhat zawkah ka nu leh ka u an mu thung. Ka pu ten an in hnuai ber an siam mek a, an siam zawh veleh luah thlak kan tum rilru deuh. A len deuh zawk bakah luah man chawi a ngai dawn lo pawh kha a manhla hrim hrim. Mut hmain Chcha varte leh Jenshow channel te ka hmet chhuak leh a, ka en duh leh ngaihthlak duh ho ka select leh nghauh nghauh. Ear phone ka vuah sauh sauh a, ka play ta a. Ngaithla lo chuan ka muhil hleithei tawh lo a ni ber e. Nula biak vel chu a lang vak lo. Mahse, zanin chu ka kànghlang riau, kha hmeichhe hmel kha ka mitthlaah a rawn lang leh thin. Ka ngaizawng em mawni le..Doctor fanu meuhte chu ka tan chuan a sang lua deuh a ni. Kar loah ka lo muhil ve ta a. Mumang a bo thak mai. 

Dawra ka awl ve lai takin Vengthlang lam ami ka nu nena inkawmngeih deuh, Nu Pari a rawn lut a, "Tluangpui, ka ke ka rawn bilh a, ka kal hleithei tawh lo. I U Muana bike saw hawh la, Damdawi inah hengho hi min han lamsak hram mai teh" tiin lehkha zawr angreng tak hi min pe a. A ke chu a sawi ang khan a bal nian a, a kal pawh a ti auh auh mai. Chairah a thu a. Customer reh lai tak a ni bawk a tiin ka chhuahsan ta a. U muana chu chabi ka va dil a, a bike hi a hmang rim lem lo bawk a, a tulah hi chuan ka hmansak ve mai zel. Ka pu phei chuan, "Intuak la, i la leichhawng daih dawn nia" a ti nghe nghe. Damdawi in awmna hi a han tlang deuh a, kawng erawh VC te hmalaknain a tha pur pur viau. Damdawi dawr hi Damdawi in canteen ni lo chu a awm ve tho naa, an nei kim thin lo deuh a. Dawr ka han thlen chhoh chuan a nghaktu U Zaii chiah a lo awm a. Lehkha chu ka pe nghal a zawn buai chhungin damdawi in lam chu ka va hawi vual vual a, Doctor quarter hi a chhak deuh han penhlelhah a awm a. Damdawi in thlanglamah nurse leh damdawi ina thawk ve dangte quarter a awm bawk. Nurse hi pali kan nei a, 4th grade hi pathum an awm bawk. Lab technician pakhat leh clerk pakhat an awm bawk. Ambulance pawh a lo ding van a, Doctor bial hi a zau phian a, heng khua Bualte, Thaizawl, Thualthu, Tawipui North 1&2, Mualcheng south, Mamte leh Thingfala bakah Thlengang te an ni a. Nau nei tur hi nitin deuthaw an rawn awm ve ziah. Ka va hawi phei lai tak chuan Doctor ward fang zo niawm tak chu a rawn chhuak a, A te ve reuh hle. A fanu khan a chhun a ni ngei ang, an ngo dan pawh a inang vel awm e. A hlat deuh avangin a hmelhmai tak ka va hmuchiang thei lo va. Nu hmeltha tak zawng a ni ngeiin ka ring. U Zaii chuan, "Kha le" a rawn ti a. Ka phu uih. 

"U Zai, kan doctor saw a thar ami?" Inti hre lo derin ka ti a. 

"Aw thla khat dawn an awm tawh" a ti mai a. 

"kan doctor hmasa nge fel tuna mi saw" ka ti leh a. 

"Ka hrethiam lo, an la awm rei lo em a, kan doctor thar saw chu biak chu a nuam zawk, mahse, a strict hmel" a ti ve mai a. 

"Fa engzat nge an neih?" Ka ti leh hram. 

"Pahnih lek..an fanu lah khi a khawngaihthlak, a hrisel lo reuh a. " a ti mai a. Zawh leh vak kha nuam ka tih loh vangin ka tlan haw leh ta a. Nakinah Pa Zara ka zawt ang ka ti rilru a. 

Ka û pawn puanthuikhawl chu a rawn hawn ta rup a, ka nu hmel a hlim kher mai. Zanriah kan ei tlai deuh a, khawhar in kal pawh ka tum ta lo mai. Valtea pawh a rawn thleng tawh a, "Naktuk zanah chakai zu chhit ang hmiang" a ti a. Ka nuin, "Chakai ei a chakawm khawp mai, lei mai tur lah a váng si" a lo ti ve vat a. Kei pawh ka hreh loh zawng tak a ni. Ram hna hi zirna avangin ka thawk tam lem lo va, ka ramvachal tehchiam lo. Mahse, Valtea ka zui tam ve tawh bawk a, lui lama chettlat hi chu ka hnehsawh ve tawh viau. 

"Zanin chu Doctori fanu han rim ve ila" a tih chuan ka melh kul a. "Ka zak e a" ka ti hluk. 

Ka u chuan, "Tun chawlhniah hian Kohhranah lawmluhna an neih dawn tak kha. " a lo ti ve vat a. Ka chhinchhiah ru kar mai. 

"An va inlawmluh hartir reng reng ve, an awmna a rei tawh ni lawm ni?" Ka ti a. 

"Nia, mahse, an chhungkaw kim lai kha an duh sia, an fapa a rawn haw ve deuh chiah a" ka u chuan a ti ve leh mai a. 

"An fanu hi a hrisel vak lo an ti tlatin ka hria, chuvangin zirna pawh a chhunzawm thei lo niawm tak a ni" ka nu pawh chuan a lo ti ve a. U Zaii pawn a sawi tawh tak kha mawle. Eng ang hrisel lohna tak nei ang maw? Ka nuin hmarcha chi tur a mal mek laiin patea'n min lo call a. 

"Tluangpui, i pa a tha vak lo va, thiin a luah bakah nikhua a hre vak lo va, i u nen khan a theih chuan damdawi inah in lo chho ve dawn mawni le?" A rawn ti a. Tlem chuan min thawng ve deuh, a dam loh thu pawh ka hre miah lo. Ka nute bula ka sawi chuan ka nu chuan, "Han lang ve ula, chutia i patea meuhin a rawn sawi chuan a tha lo takzet a niang" a ti a. Ka u pawh chu pate na na na chu a ti ve nge, a va inthlak vat vat a. Kea kan veng atanga kal tur chuan a chhukchho ve deuh sia, U Hminga rickshow hman mai kan tum ta a. Kan thenawm lawk an ni bawk a. Kan chhuak ta nghal, U hminga ho chuan kan tlan chho ta a. Valtea pawn min rawn tawiawm thei e. 

Kan han thlen chuan chhung leh khat an lo awm nual tawh a, Patea nupui Nuteii rawn chhuak chuan, "Va lut rawh u, tunah chuan an chiu muhil a" a ti sep a. Kan lut ve nghal. Ka pa chu a lo mu bám a, zu a in nasat êm vangin putar hmel a pu tawh a, a cher em em bawk. Patea te bakah patea faten an lo kil taih a, Nu Rami ka hmu lo. Ka pate hi Bazarah awmin keiin dawr nghak mah ila, kan inhmu zen bik lo. An in lamah ka va kal ngai vak lo bawk nen. Kan inhmuh chang pawn ka be ngai lo. Ser min hnutchhiah tawh avangin ka be chak hlawl lo a ni ber e. Marawhchu, a chhe ber thlen theih a nih avangin tun hunah erawh ka induhtawkna leh ka pa ka huatna te chu ka thup hram hram a ngai tih ka hria. 

"khaw nge a nupui" patea bulah ka ti a. 

"An rawn chho ve lo, in nghah a ngai a ti tlat a" a ti ringawt. A pasal thichhawngin a awm mek a, a rawn lang eih lo chu a nia! Eng ang nupui tak ni ang maw? Ka pa leh Nu Rami te hian fa pahnih an nei ve leh a. Nu Rami fanu chhawm luh nen khan kan inrual chiah. Doctor a rawn lut a, ka hmu chiang thei ta, Rinsangkimi hmel chiah chiah a ni mai e. A zahawmin a hmeltha ka ti kher mai. Fanu khatiang rual nei tawh si, a la tituaiin la mam nalh tak a ni. Ka nu ai chuan a nau hlek maithei. Ka pa chu a en leh a, "A rawn harh hunah nurse saw in lo hrilh dawn nia, duh ang hmanrua kan neih loh avangin tunah chuan han inenkawl vak ngaihna a awm lo va. Tlema a that deuh hunah Lunglei lamah khawl tha zawk nen test nei turin in kal dawn nia" a ti mawlh mawlh a. Damdawi a chawh bawk. 

Han hawnsan ngawt chi a ni bik lo nen, kan menpui ve ta reng a. Ka pa chu a rawn phu leh uih thin a, a rum leh tiah tiah zel bawk. A zu in nasa lutuk nghawng a ni mai ang chu. Mawngte a kham tak deuhah chuan kan chhuak ta rih a. Waiting shed-ah chuan mei kan zu a, Valtea chuan ,"I pa nupui hi chu a mak ve ngawt mai. Sawtiang tawhah te chuan rawn lan ve awm." A ti hluk a. 

Ka nui a, "Mi pasal a chhuhsak ngat kha a ni sia tiraw?" thinlung na ru fê chung hian ka ti a. Chulam chu kan sawi zui ta lo. Ngawi renga phone kan bih dun mawlh mawlh laiin kan Lab technician Pu Rina fanu Nungi leh a thiannute hi an rawn kal phei a, ka va melh zawk chuan Doctori fanu a ni tih ka va hre thei ta. Nungi te in lam an pan dawn a ni maithei. Valtea ka nghawk sawk a, ka mitmei nghal. Nungi te nen chuan inkawm ngai lem lo mah ila, han inhmuh changa inbe ve thin kan ni bawk a. 

"Lalrinnung, zanah vak dàw dáw zel suh" A va ti lung lung a. Nungi te chu an rawn hawi phei rang kher mai. Ka ngaihbel nge Rinsangkimi chu a lai deuhin ka hria. Nungi chuan a kai a, kan thutna lam chu an rawn pan ta a. Ka lung a phu rang viau. Rinsangkimi chuan pyjama a ha a, tshirt dum a ha bawk. Crocs a bun bawk a, a sam chu a chhipah a bawk khawm a, thi silver hrawl lek lek hi a awrh a, chubak tlereuh a inbel ka hmu lo. 

"Eng nge in tih a?" Nungi chuan a ti nghal tàwng a. 

"Hei Tluanga Pa hi a awm a, kan rawn menpui ve" Valtea chuan a lo ti vat a. Sawi tur ka hre ve bawk si lo, "A va pawi ve, tunah eng nge a an?" Nungi'n a tih takah chuan, "A muhil a" ka lo ti vat. 

Valtea a zei tlat, "I thiannu hi ka van hmu ngai lo, mikhual ami?" A ti ta a. 

Nungi chuan, "Kan Doctor fanu a nih hi, Sangkimi a nia. Sangkim, hei Tluanga, chuan Valtea" tiin min han inhmelhriattir ve nghal zat a. Sangkimi chu ka buk khum nghut ringawt. Ka lai chhe lutuk chu ka inngei zawk, pa lo ka inti lutuk. 

"Chuan khaw nge inkal dawn?" Valtea chuan a ti a. 

"Kan inah kan chhuk lawk dawn,kan kal phawt ang, chanchin kan inhrilh dawn nia" Nungi chuan tiin an inkai thla leh ta a. Sangkimi chu vawikhatmah a tawng lo. Mahse, chiang taka a hmel ka hmu thei kha ka lawm. A hmeltha takzet, a nu hnáp a, a hrisel lo an tih vanga ka ngaihbel nge a hmai kha a dáng deuh a, mahse, a hmelthatna a pawlh dal eih lo. A kawng fek rat hnuaia a mawngbawr vawng lah leh a hnute lian lem lo takte kha a inchawih mawi tawk em em si. He hmeichia hi ka vei dawn chiang. Vei àwm tak pawh a ni reng a. 

Ka pa chuan eng ém a ti ta bik lo bawk a, dar 1 velah kan hawnsan ta mai. Han men tlangpui pawh duh viau mah ila, Nurse berin hawnsan r'u, a tha vek e a tih avangin kan hawnsan ta ringawt. Rilruah erawh a awm ve deuh. Ka nu pawh a lo la meng a, phone atangin chanchin kan hrilh tho nain a muhil thei bik lo a nih ka ring. Ni e, a chhungte remti vak lo chunga ka pa kha nei a ni ve a, a hmangaih hle tihna a ni mai. An inthen hnuah pawh ka pa rêlna thu hi a chhakchhuak ngai lo. Ka pi erawh a rêl ve. Nu Rami chanchin pawh a sawi ngai miah lo. A awm ve tawp tawp a ni ber mai. 

Kan menrei vang nge a tukah chuan ka rit bûr mai. Customer lo chiauau ngai ve bawk si, nachhawkna ka hmawm ta ringawt. Ka pa pawh a zia ta deuh a, a tuka Lunglei lama phurhthlak an rél tak kha. Bungraw lo thleng thar ka lo chhinchhiah laiin ka pa leh nu Rami te fapa mipa naupang fel tawh tak hi a rawn lut hlawl mai a. Ice cream a rawn lei, "I nu damdawi inah a chho em?" Ka lo ti a, "Aih, a u a chho" a ti ta reuh a. A u hmeichhia hi chu a fel ve tawh viau a, nula tia sawi theih erawh a la ni chiah lo thung. 

"Eng nge i nu chuan a tih?" Ka ti leh a. 

"Thingfalah Au Mami nen an kal" a ti ta mai a. Pasalte natna khuma an mut laia zinsan chu a pawimawh viau a ni mahna le. A fapa chu ka lainat ta deuh a, Chiki ka lo pe a. Lawm takin a tlan chhuak, ka thlir zui vawng vawng mai. Nu hrang mah ni ila keini pawn kan lo ngaihthah ve deuh em ni aw ka ti rilru a, mahse, han ngaihsak dawnin ka pa leh Nu Rami te ka huatna hian min dal leh thin si. An ni ka naute lah hian unau kan ni tih an hre miah lo em mawni, min hria ang hian an awm ngai miah bawk si lo. A buaithlak a nih hi a. 

Chawhnu lam dar 3 a la ri lo deuh tihin ka beisei loh lutukin tlangval lian thelh thawlh, ka u nena inrual khat vel tur , khawpui mi tih hriat ngawih ngawih leh Sangkimi te chu an rawn lut hlawl mai. Mipa chuan basket a khai a, Sangkimi pawh bag a ak puar làng mai. An mamawh chu an lam zung zung a, Sangkimi vanga ka laih luatah lo biak lumlam nachang pawh ka hre pek lo, mawl min ti ru fu ang. An han inpack fel a, Mipa chuan, "Serthlum chu ka va en lawk ang e, pawisa chu lo pe fel rawh aw" tih leh chhuah a rual ta mai a. Kan pahnih chauh chuan kan awmdun ta ran mai. 

An thil lakte chu ka chhutsak a, chetsual hlau reng rengin ka awm a, ka hah vek thei. A hmel pawh ka en ngam meuh lo a ni e. Kan han inchhut fel chuan pawisa min pe a, biak ve hram ka duh si, ka zahtheih lohna zawng zawng sawmkhawmin, "Ani kha i u chu mi?" Ka ti ta ráwih a. 

"Aw ni e, i hria mi?" A lo ti sap a. A aw chu a tham deuh. Aw chhangte pawh a ang lek lek. 

"Hre lo ve, ka ring deuh a, in inang ve deuh bawk nen" ka ti ringawt a. 

Pawisa kir tur ka lak lai chuan, "I pa chu eng nge a an tawh a?" A ti a. 

"A zia ve tawh kha chu an tia, naktukah Lungleiah an phur thla ang" ka ti duah a. 

A hawi kual a, "Nangmahni dawr ami? " a tih chuan nuam ti vak lo hian, "Ni lo e, ka pute dawr a nia, ka nghahsak a nih hi" ka ti nghut a. Pawisa ka kir a, a chhuah dawn chuan, "Lo len i phal em?" Ka ti ta tawl mai. Khatihlai khan ka sen tûnin a nia ka rin ni. 

A nui sak a, "Phal e, mahse, inrim ang chu ka zak a" a ti ta a. A chhuak zui nghal. Ka thaw suai suai mai. U Muana rawn lut chuan, "Kuhva i rui mi? I hmai a va sen ve" a la ti zui! Ngawi teh u, thiante u, nêp leh pa lo min ti maithei. Hmeichhia ngam tak ka ni ngai lo reng reng sa a, mahse, ka duh vak loh leh ka rilrua tla na vak lote bulah hi chuan chuti em emin ka lai chhe ngai bik lo a nia. Sangkimi bula ka awmdan ka ngaihtuah hian ka duh niin ka hria, mahse, ka tana cho ngam rual loh hmuha ka hmuh bawk si avangin ka zám chhe lo thei lo a ni ber.

Zanah pawh chuan lenna tur vak kan hre leh ta si lo chu, Sangkimi ka hmuh leh takmialin tiin damdawi in lama chhoh ka rawt leh a, U Muana bike ka hmansak ta mai. A ui lem lo bawk a. Ka u erawh a period a, a tai nat vangin a rawn tel ve peih lo. Ka u atang hian hmeichhe thi nei tur ho hi ka hlauh phah vek. A la na thei si, a thinchhe em em a, a huatthu a chhe thei bawk si. A vir thin lutuk te, hotea a mittui tla ringawt zelte avang hian hmeichhehoin PMS an tih fo hi mipa tan chuan hriatthiam a har hlein ka hria. Hmeichhia zawng zawng an ni vek em chu ka hre lo naa..

Ka rin loh deuhin Nu Rami leh a fanu Mami te pawh chu an lo awm ve mial a. Nuteii a lo awm bawk. Nuteii bulah ka pa chanchinte chu ka han zawt a, "Chaw a la ei thei lo va, drip hi an khai tawp mai a. Mahse, thiin a luak tawh lo" a lo ti var a. 

Nu Rami chuan, "Tluanga te unauin zu kalpui se la a tha ang, keini kan buai sia" a lo ti a. Ka melh na ngang mai. 

Ka tawng hmain Nuteii chuan ,"I ti ang lo e a. Engmah buaina tur a awm lo, kei leh nangin kan zu kalpui ang chu..Mami'n a naute chu a buaipui thei vek tawh, buaipui ngai em em an ni tawh lo bawk a" a lo ti ta hmiah a. Nu Rami lah dang duh hek suh. "Aw..an pa a nia buaipui ve ang hmiang, keini buaipui vek tur a ni hleinem, pawisa pawh ka nei tawh lo" a lo ti bawrh bawrh a. 

"Pawisa chu tlem azawng ka nuin a pe thei ang che u. " ka lo ti nghut a. Nuteii tawng tum chu mitmeiin ka khap vat. Ka pa chu a rawn meng diar diar a, Nuteii chuan a lo be vat. A zun a chhuak a lo nia. Zun bur chu ka va la a, Nu Rami chuan a zuntir ta a. A mut that leh hnuah, "Tihian ani zu in mai mai hi ka buaipui a, thawhchhuah nei bawk si lo, min tirethei êm mai. " a ti leh hlawih hlawih a. Ka sawi tur a awm ve lem lo bawk a, ka ngawi tlat. Ka nu nen an inneih laia neih loh hlaua zarbuaia ti huam huamtu kha a nia., a phutawk a hmu taah ka ngai hmiah. Tihian insawh insawh mai mai teh se. 

Ka pa chuan min rawn melh vung vung a. Min hre lo deuh niin a lang. Zawitê hian, "Tluanga i ni em?" A ti ta a. Ka lo bu nghut ringawt. 

"I va fel ve, i rawn lang thei a. " a ti ve a. Ka chhang lo. Sual pawh min ti maithei, ka huntawn ang kha tawng ve ta ula, tha tak leh inhawng taka in biak suam suam bik ka ring lo. Mahse, ka pa min thlahtu a ni miau a, ensan hlen chu a har ve. A tep chap chap a, a muhil zui leh ta mai. 

Dar 11 thleng kan thu ve a, Nu Rami chu a chhuak sek a, phone a be deuh reng mai. Nuteii pawh a lungawi hmel vak loh. Mami lah chuan phone a khawih char char a, a nui leh vur vur a, ka pa natna chuan an nunah nghawng a nei ve tehchiam lo a nih hmel e. Kan haw dawn chuan Nu Rami chuan, "Tluanga, pawisa chu zinga kan kal hmain min rawn pe thei ula a va tha ve" a ti hram a. Ka hráwk têp a ni. 

"Nuteii kutah ka lo dah ang" ka ti ve ngat a. Kan chhuak nghal. An khatihlai kha chuan ka pa kha hotel lun ber neitu a nih avangin a hausa ve thawkhat a, amah a lo hmelchhe lo bawk nen, Nu Rami mai ni lo a chhungte thleng khan ka pa kha an zar nasa a. Tunah chuan hotel pawh siam thei tawh loin tihian a rem rem thawk leh zu in reng rengin a khawsa chho a, han duh viauna chhan tur chu a awm lo maithei, mahse, Nu Rami pawh mi pasal luahlan a nia, heti ringawta ka pa a en hràng leh a ngaihsak lo hi ka thiam thei thlawt lo a ni e. 

A tukah chuan zanah chakai chhit kan tum avangin bungraw lo thleng pawh ka dah fel vat vat a, nidang aia hmaa hawn ka tum vang a ni. Zinga ka chhuk khan ka nuin min pek Rs. 5000 chu Nuteii kutah ka dah bawk. Ka inpeih thawkhat hnuah sum lut zat ka chhiar leh te te a, U Muana nupui U zuali a rawn lut a. Ani hi sawi tawh angin nurse a ni. Sangkimi te chanchin vel zawh ka chak si, ka ngam chiah si lo. Min fiam loh hram beiseiin, "Sangkimi khi engtia hrisel lo nge a?" Ka ti ta chawt a. 

"Heta an lo awm hma khan a TB a, chuan ruhseh a nei bawk. A lung a tha lo lehzel bawk a, a khawngaihthlak reuh tak tak a ni. Anu hian heta rawn thawh hi a dil a niawm e. Thingtlanga awm kha an fanu tan pawh a that zawk an rin avangin" a ti ta mial mial a. Sangkimi tê chu aw..ka va lainat reuh. 

"A u mipa kha tu nge? A lian angreng sia, a la naupan hmel tho bawk sia" ka ti leh a. 

"Sawmpuia a nih kha,. Ani kha chu Aizawlah a pite bulah lehkha a zir a, a rawn haw ve zuai chauh" a ti ve leh mai a. A dang ka zawt ngam tawh lo. Ka haw chho a, Chaw ka bar nghal sawk sawk. Valtean ka inthlak laiin min lo sawm a. An huan mawng luikawrah chakai chu kan zu chhit dawn a ni. An huanah hian balhla bakah nimbu leh kuhva rahte an ching ve a. A hlawkna pawh an tel chho ve tan, mahse, a zuk hla ve deuh a. A hahthlak viau ang. 

Lui kawr kan thleng a, khua a thim fel ta bawk a, lui mawng lam atangin kan chhit chho ta a. A sawi ang khan an lo tam viau mai a, Tawipui rama chakai hi a tlangpuiin Aifiar kan tih a sen ang kha an ni a. An thau thei phian bawk. Kan man ta nual a, Dar 9 velah chuan hawn a rawt ta a. Hawn tumin kan insingsa a, ka pheikhawka chirh kai chu ka va tifai a, chutia ka tihfai mek lai chuan, Valtea hian ring zet hian, "Tluang, kha rûl" a rawn ti ta mai a! Ka chawnpuar thip zawk chu ka hre nghal, Valtea rawn tlanpheiin rul zawn buai lai chuan ka thaw a rawn chham titih ta mai a, ka lu pawh a hai tan..ka tlu tur chu Valtea'n min rawn pawm vat a, mahse, vaukamah chuan kan tlu dun ta a.