malsawmpeka last

MALSAWMPEKA (LAST)

Ziaktu: Toni Rálte

Ka vir muai muai a, ka tlu tur chu Ruatsanga'n min lo pawm vat. Ka thil hmuh leh thu hriat ten min thawng lutuk a, awmngaihna reng reng ka hre lo. Ka pa a la dam maw? Engtin?! Thutthlengah min thuttir a, tui an rawn la a, ka lo in vat. Ka pa chu a ding a, a kein a kal ta mai a! Ni lo,ka pa kha chu a ke a zéng a nih kha..engtin nge a kea a kal theih? 

"Naute, a thawng viau che tih ka hria alawm. Mahse, engkim i hriatfiah hunah i hrethiam vek mai ang. Mahse, tunah chuan sawifiah nan hun kan nei tam tawk rih lo. Kan kal a ngai" ka pa anga inchhal chuan a ti leh zung zung a. Mala ka va melh, a thutak ngang mai a. Ka chechang thei mai si lo chu Ruatsanga bawkin min rawn kaitho a, "Ka pa i ni lo" tiin ka pa anga an sawi chu ka lo melh daih. Ka aw pawh a khur nasa mai. A nui hak a. A hmel pawh ka hmu chiang thei ta deuh, ka pa hmel a ni lo hrim hrim. Mahse, pa hmeltha tak erawh a ni, a len dan, a kal dan leh a aw thlengin ka pa nen an inang êm a, ka pa angah ka ngailui mai mai a niang ka ti rilru a. Mahse, chu pa bawk chuan, "Bawihte, i haw ang aw. Kan inah i nu leh i naute bulah ngei..in vaia ka ngaih tawhzia che u hi hria nila khatin mi hrang angin min en lo vang" a lo ti dam thlup a. Ka tah a chhuak ut ut, a tawng dan chuan ka pa min hriatchhuahtir lo thei si lo a ni. Mala'n min rawn kai a, "Tihhrilhhai che ka tum lo a nia. Mahse, a thawng che kha a mak lo. Kal ang" tiin min kai chhuak ta a. Ka pa ti tawh mai ang, chu leh kawngka min lo hawnsaktu te chu Eco vanah an lut vut a. Keini Mala carah kan lut leh. Dar 9 a ri lek lek tawh a, motora kan luh rualin ka nu call ka dawng ta zat bawk. 

"I va rei si ve, ka ngaihtuah che a nia" a rawn ti láng láng a. 

"Aw hei kan lo haw dawn mek e" ka ti ringawt. Ka pa chungchang vel chu phone atanga sawifiah chi a nih loh avangin ka sawi duh lo law law mai. A dah nghal a. Kan tlan zui nghal bawk. Eco van chu kan hmaah zel a tlan a, kan in lam panin kan her liam ta. Ka ngaihtuahna a buai êm avangin min biakna pawh engmah ka hre lo. Rogera'n ring angreng tak hian, "Sangzual" a rawn tih thawt takah chuan ka phu zawk a. Ka hawi let vat. 

"Khatin i rilru tibuai vak suh. I pa a ni tihah chiang la a tawk mai" a lo ti nghut a. 

Mala ka melh, ani pawh chuan, "ROgera sawi kha a dik" a lo ti ve sup a. Ka maimichhing tawp. Ka awmdan chu ka sawithiam chiah lo, ka pa hmel a pu si lo va, ka paah engtin nge ka pawm theih ang. Eng game-ah nge kei hi ka tluk luh leh tak le? Ka ning, ka hne tawh. Hetianga rilru sên reng ngai hi. Nula hawiharh ve tak ka ni a, Inngaihzawnna lam pawh hawi hleithei loin tihian min kai kual sek a, ka ning zozai tawh lutuk a ni. Mahse, ka titawp ngawt thei si lo. Kan in kan thleng ta. Eco van pawh a ding ta chat a. Ka lungphu a rang ngei mai. Kan chhuk ta, Eco van ami te pawh an chhuk ve a. Kan in lam kan pan ta thám thám mai. 

Ka pa anga insawi chuan kan in kawngkapui password chu bahlah hlek lo hian a chhu mawlh mawlh a. A inhawng ta khap, kan chhungkua bakin password hi kan hre lo. Engtin nge he pa hian a hriat theih. In chhungah chuan tv enin an lo thu thap a, kan va lut huk chu mak tih hmel angreng takin min lo melh hlawm a. Kei chu ka tawng thei lo, ka kha a chih vek. 

Ka pa anga insawi chuan, "Zoi, in lo dam em? In va ngaihawm tehlul ém" tih leh ka nu bula thut a rual a. Ka nu chuan makti em emin a lo melh thung. A mitmeng buaizia pawh ka hmu thei, nia ka pa aw chiah chiah a ni miau si a. Ka nu hamhaih chhung chuan Mala chuan, "Nu Zo, zanin hian thil tam tak sawifiah ngai a awm a ni. Ani kha I pasal Ephraime ngei kha a ni e" a ti ta a. Ka nu chu keimah ang bawka hrilhhaiin a thu ngil at a, Mala leh ka pa chu a melh tawn sek bawk. 

"Sangpui, Remruat, in lo dam maw? Ka lo kir leh chu in va lawm loh hmel ve" ka pa chuan ka naute melhin a ti leh a. Ka naute pawh tihdanglamin an awm ka ti mai. Tawng nachang pawh an hre lo va, ka pa chu an melh kul ringawt. Ka pa phurtu pa kha rawn tawng vein, "Kei hi min la hria em? Sangzual, min han en vang vang teh. ICU-a i hmuh doctor kha ka ni asin" a ti a. Ka va melh vak ringawt. Ka hmuh tawh hnu a ang ka ti reng a. Doctor lek kha maw lo ni. 

Ka nu chu kan inrin hmain chhuatah a tla thla ta tawp a, a thidang zui nghal. Mipa ho chuan an buaipui nghal vat vat a, ka pa chuan zo zeta pawmin thutthlengah chuan a muttir a, "A thawng deuh mah mah a nih hi" a ti sup. Mahse, ka nu chu an buaipui nasa bawk a, a thidang rei lo. A rawn harhchhuah leh chuan mitmeng à ruai hian, "Ka awih thei lo, engkim sawifiah r'u" a ti ta a. 

Ka pa chuan a chanchin chu hetiang hian a sawi ta a ni. 

"A hmasa berah chuan kei hi ka thiltih tawhte avangin man ka la ni vat dawn tih leh englai pawha chhui ka nih avangin khami ni stepa ka lum atang khan engkim plan sa vek a ni. Ka ke kha a zêng tak tak lo va, Doctor zingah kan mi leh sa an la awm bawk a, Ka spinal chord chhia angin min sawi ta a. Tichuan, kan rin ang ngeiin man ka ni ta a. Kan accident kha tihpalh thilthu a ni lo va, Central jail-a min dah luh dawn nia Mala leh Sangzuali te lo kal khan Mala hian lehkha them min rawlruk zauh a. . Prison van chu tihluihna hmanga sua kawngthlanga liamtir an tum thu leh kei chu nikhaw hre lo va awm der turin min ti a. A sawi angin ka awm ta ringawt. Truck driver kha pawisa tam tham tak an lo pe a niawm a. Risk takmeuh a ni bawk a, kei pawn hlauhthawnna ka nei ve. Mahse, ka lo inchelh nghet bawk a, hliam ka nei lem lo. Mahse, ICU-ah min dah lut a, ka nupui fanaute ka tihrilhhai che uin rilru hrehawm takin ka awmtir che u a. Mahse, engkim ka hrilh sa loh chhan che u chu, inven sen loh kan hlau a ni. Ka rintawk loh vang che u a ni lo va, engkim a tak tak ang veka kaltir a ngaih si avangin ka chhungte ngei bulah pawh ka zêp ta a nih kha. Tichuan, Hei doctor Sapa hian ruahmanna a lo neisa diam tawh a. Mitthi ruang thenkhat, hlawmtu nei lo, anmahni pawh tu nge tih hriat loh an lo la kawl nual a, chung zinga palian leh keimah ang thei ber tur chu lo dah hrang sa thlapin OT-ah a lo nawrlut sa thlap tawh a. Tichuan, chu ruang hmai vun chu hîkin ka hmel ang taka an lo siam tawh sa chu chupa hmaiah chuan a bel ta a. ICU-ah a nawrlut leh ta a. Keimah ang chiah hmel a pu ta a ni. Tikhan thi angin ka thang ta a, Ka ruang phurh haw tuma in buai vel lai khan, Doctor hian ICU atanga min nawr chhuakin Mala te thianho hian hmun him lamah min hruai ta a. Ramhnuaiah ni khat leh zan khat ka khawsak hnuin min rawn hruai leh a, Delhi lamah ka liamthla leh ta a ni. Surgery ka hmachhawn a, Hmel thar ka nei thei ta. Mahse, chutimaia hawng thei ka ni lo va, inenkawl chhung a rei ve deuh nen,. Ka cham leh ta hlek a. Mahse, ka fanu an rubo tih ka hriat khan rawn haw lo thei lo niin ka inhria a, Doctor remti vak lo chung ka rawn thlawk haw leh ta a. Mel thumah sawn In fal deuh tak ka lei sa tawh a, chutah chuan ka rawn thleng a. Doctor Sapa hian min rawn enkawl pah bawk. Tichuan, zaninah rawn haw ka duh tak avangin tihian Mala te ruahmannain ka rawn haw leh thei ta a ni. Zoi, pawi ka ti lutuk, ka bum che a ni lo a nia. Hmeichhia in ni a, tawng sual palh te in nei palh ang tih ka hlauh êm vang a ni. Ka hmangaih takzet che u. Chutimaia thihsan che u hi ka duh lo. Ka hmel thlenga thlak hial a ngai hi hrehawm ka ti, mahse, keimah min hmuh rualin Man ka ni nghal dawn a, thih nen a danglamna ka hre lo. " tiin. Ka pa chu kan melh tlawk tlawk ringawt. Ka mittui a rawn tla a, ka thinlung chu lawmna hlirin a khat bawk. Ka va bawh rawp a, ka tetlaia thil ka ngen changa ka awmdan ang chiahin a mal chungah ka bawk a, "Paa.." Tiin ka tap ta hlawp hlawp a. Duat taka min lo pawmin min kuah hlu hlu a, ka pa rim pawh ka hre leh ta. Ka nu pawh a rawn tap chhuak thut, a inhnît hlawp hlawp a, "Lalpa, ka lawm e" a ti khur zawih zawih. Ka pa nen an inkuah lai chu hmuhnawm ti takin kan lo thlir a. Ka naute pawh an insût ve tliar tliar mai. 

Ka harh chhuak ta thut a, "Mahse, pa, kan ina i awm chuan an man chhuak dawn che asin" ka ti a. 

A nui suk a, "I patea ka nih mai a ngai a nih chu. Dubai atanga rawn kal, i pa aiawh tura Company rawn enkawltu tur Amos ka ni tawh mai aniang chu" a ti awlsam êt a. 

"Mahse, an ringhlel tho ang che" Sangpuia'n a lo ti ve a. 

"Rinhlelh vang ngawt chuan min manin jailah min khung ngawt thei hleinem. Tin, in hi ka chhuahsan mang lo vang. Inthlanpui lo awm turah beihpui kan thlak dawn a, ZCP hi a tharin ka din tha leh dawn a ni" a ti nghet charh a. 

Ka nu chuan, "Ephraime, a mak zozai êm mai. Tihian tumah tibuai lo leh tuma mitmei veng loin kan khawsa ho thei tawh lo em ni?" A lo ti tiau a. Ka pa chuan duat taka a lu chulsakin, "Zoi, ka sawi tam tawh. Kan fate hmakhua hi ngaihtuah ta che. Kan ram hi ram nuam leh hmasawna kan siam theih chuan kan tu leh fate tan sulhnu tha tak kan hnutchhiah tihna a ni. Hei, Mala te thianho hian kan ai an rawn awh chho ang a, kan fanu kan fapate pawh hi ram hruaitu an la ni lovang tih a sawi theih loh. An tan kawng kan sah ên a ngai a ni" a ti dap dap a. Ka pa ka ngaihsanna leh zahna chu a pung deuh deuh mai. 

Roger chuan, "Sangzuali an rukbona hmun pawh kha sawrkar uisathiamte hian an va umzui leh ngamin ka ring hlek lo, ZCP hmalaknaa kan va chet mai a ngaiin ka hria" a lo ti a. Ruatsanga pawh chuan, "Ni 3 vel han ngaichàng ila an la reh chuan va phindarh vek ila a ni mai lawm. " a lo ti surh surh a. 

Ka pa chuan, "Naktukah Tluanga leh Sangpuia te ka ko dawn a. Kan pawl pawh kan inthliar that loh chuan rinngam chu mi tlemte bak ka nei tawh lo, ruahmanna kan siam dawn nia" a lo ti ve a. Ka nu sawi anga thlamuang taka chenho chu chakawm teh mah se, ka pa hi kan dang zo mawlh si lo. Doctor Sapa tih loh chuan min hawnsan ta a, ka va thlah chuan Mala bulah, "Ka lawm e aw. Ka pa in rawn hruai kir leh a, ka damchhungin ka theihnghilh tawh lo vang" ka ti sap a. 

"ZCP ka nih vang lam ai mahin i tana ti ka nihna hi a buk a rit zawk. I pa tel lo chuan Sangzuali i ni thei si lo va. " tiin ka biang a rawn piai zauh a. 

"Mala, ka hmangaih tawh chein ka hria" ka ti tawp. A nui hak a, a hmeltha mah mah a ni. 

"I inhre har zawk mang e. Kei pawn ka hmangaih che. Ka nei vat dawn che" a ti nghut nghut a. Kan inthlah liam ta. Ka awmdan chu a ni hûih mai a, ka awmthiam lo, ka za sek. Ka nu pawh keimah ang tho a ni. 

Remruata'n mut dawnah ,"Ka sawi reng kha..ka pa hi a thi lo ka tih mawlh mawlh kha" a ti nuah nuah a. A buai dante ka ngaihtuahin a mang lama hrilhtu an lo awm pawh kha a awm ve thoin ka hria. Sangpuia'n fiamthuin, "Lo inawkhlum hman la, ka pa pawh i hmu ve leh dawn si lo" a lo ti zauh a. Remruata ber ber chu a nui ring ringah a la tang zui. Chhungkua kan kim leh ta. 

A tukah chuan Remruata te chawlh lai a ni bawk a tiin Pa Lawma te kha zuk tlawhpuiah ka sawm a. Mala chu a zirlai avangin Chhim lamah zan 2 riakin a zin dawn a niawm e, zinga min hrilh chauh chu ka lawm lo viau naa, ani pawn a thawh hlima a hriat chauh thu a sawi ve bawk si. Ka titau peih ta vel lo. Pa Lawma te chu chawhmeh leh an mamawh tur nia ka rin ka leisak nual a, kan inkhalh thla ta vang vang. An nupain an lo awm hlauh mai a. Min lo lawm thiam hle. Ka thil leisakte ka han pek bakah pawisa eng emaw zat ka nu min kentirte chu la hlan a. An nu mittui a tla hial! Pa Lawma erawh zopa tih takah a lo tlawmngai viau mai a, "Phutlet neiin ka pui lo che asin le aw. A lawmawmin a zahthlak mang e" a ti chuar chuar a. Mahse, a lawm takzet tih a mitmengah a lang tho. Thingpui kan in lai chuan fa an neih leh neih loh ka zawt ta tawp a, an nu Nu pari chuan, "Aa..zep buai pawh a tul chuang lo a. Fa hi pathum kan nei a, a upa ber hi sipai niin Shilongah an khawsa a. A nau chiah mipa bawk hian kum 3 liam taah khan nupui nei vein kan khawsa ho hleithei ta lo va. Min chhuahsanin an nute in lamah an phei ta a, kan te ber hmeichhia erawh pasal neiin Siaha lamah sawn an khawsa daih a. Tihian kan nupa hian kan khawsa ve naw naw a ni mai e" a ti charh charh a. Keia lei veng hman lo chuan, "Ti nge in fapa nupui nen chuan in inngeih loh? A va pawi ve" ka ti leh vut a. Remruata'n min lo melh káwk, ka sawi zo tawh si. Pa Lawma zawk chuan, "Han sawi hi chuan rêl chan kan chang zel si a. Englo a nia, Hei I nu Pari hi an inneih hlim thla 3na vel atang khan a saitica a chhuak a, kal pawh kal tha hleithei loin reitak a bawksawp a, Eirawngbawl takngialah pawh kan monu khan awl duh hek lo, thawmhnaw nise an pa nen an thawmhnaw bak a su duh lo va, sunday tlai tin deuhthaw an in lamah chaw an va ei phei bawk. Kei lah inah ka awm tam si lo va, an awmdan zawng zawng ka hre vek si lo. Nikhat ka ramvak haw thim thet theta in ka lut chu i nu pari nen an lo inhnial nasa mai a. Kan monu chuan, " In tawp si, in eirawngbawl ka ei ten vang alawm ka nute inah kan va ei phei thin. Tihian i hnathawk peih lo i damlo der a, i tenawm ngawt mai" a lo ti hlawih hlawih mai a. Chuti taka pasala nu a han hau ngam chu nasa hi ka ti khawp a. Mahse, amah ni loin kan fapa zawk chu la zilh ta hrep a. Chu chu huain an chhuak ta ringawt mai a ni. Tunah phei chuan saw kan fapa chu a inchhir tawh lutuk, hna a thawk nasa si a, a nupui chhungte mitmei ven a ngai bawk si. Mahse, lo haw rawh kan ti duh bik lo, a peih loh tawpah a rawn haw ve mai ang chu. Kan nupa hian kan hlim daih zawk, marawhchu, i nu pari hi a bawrhsawm ta êm a. Kan buai phah ve deuh" a ti ta chuar chuar a. Awiii! Mo zaktheilo tak a nih chu ka ti rilru char char. Tun lai khawvelah chutiang mite an lo la awm chu mak pawh ka ti deuh. Thingpuite kan in zawhah Remruata chuan hawn a rawt sek si a, kan hawnsan ta rih. Ka la tlawh fo ang, ka lainat tlat. An fel nupa si. 

"U, Chhani chu nizan khan ka then daih" hawn kawngah chuan a ti a. 

"Ngati nge" ka ti vat. 

"Aaa..ka zak deuh tlat. Ih maw, a thiannu Tei bulah, 'Remruata chu a pa lo em mai. A fit hmel nen nen, khawih pawh min khawih ngam lo. Nep lutuk" a lo tia. Ka virgin velte hi fiamthu thawh nante a lo hmang a niang, ka hre leh vek sia. Ka then daih. An sawi ang kha a lo ni tak tak a niang. Tukinah Johnya'n ,'Nizanah Chhani leh Officer lar ve deuhte ka hmu dun a. Then thei la ka ti" a rawn ti ve a. Nizanah ka then chauh a, mipa dang a chhuahpui leh thei nghal a nia." A ti nuah nuah a. 

"I tuar em?" Ka tih chuan a lu a thing a, "Chhe lo deuh mai ka star alawm. Amah chu maw U Lawmkima nau Amuani kha a nia" nui vur vur chungin a ti ta a. Drose te fanu a lo star pek a nih awm chu. Amuani chu an la nau ve lehchhawng bawk a, ka hrechiang lutuk lo. Lawmkima tak pawh hi kan inhmu khat deuh nen, ka hrechiang em em lo. Mala thianpa a nih vang erawh chuan ka ngaina thung. 

In kan thlen chuan in chungah Pa tluanga te chu an lo la awm a. Ka pa a la dam tih an hriat chuan a shock ve khawp ang le. Farmah ka nu ka pui a, ka inbual hmain ka pindan ka tifai leh zuai. Ka zai rat rat bawk. Rilru a hlima thaw a ven hi chuan zai te hi a awlsam. Rilru a riha min mawlhtu a awm tlat chuan zai ringawt pawh harsa tak a ni thin. Sangpuia rawn haw chu a mood a chhiat hmel lehpek hle. Ka lo zawt vat a, "Kei chu ka ning, Naomi te intihropui tum lutuk saw. A nu lah saw a..a kawr hak tur hlir a sawi, Naomi pawn mo kawr hawh lova thuitir a tum a, an thui zawh hman tawh dawn loh vang chauhin a thulh leh. ". A ti bawrh bawrh a. Ka nu chuan, " A mak! I huatthu a chhe lutuk, an pawisa a nia, sawi ve theih kan nei hleinem." A lo ti vat a. Naomi te a rêl duh miah lo. 

Kei pawh chuan, "Nia, en liam mai mai rawh. An duh phawt a hnu..kei pawh ka kawr hak tur thuitir a ngai a ni.." Ka lo ti ve a, min melh no lo khawp mai. 

Ka nu chuan zawi sap hian, "Naomi hian i pa a la dam tih a hrechhuak ngei dawn sia, a lei a veng hman lo ang tih la lo lungkham zawk" a ti a. 

Sangpuia lah chuan, "A ngam chuan sawi chhuak se la, a chhuak vang vang a ni mai" a lo ti hmanhmawh. 

"Aa, nu, Ka patea ang chuan sawi tawp mai ang u. " ka ti ta ringawt a. Ka nu chuan a chal a chuar nàng ringawt. Pa Tluanga te leh ka pate an rawn chhuk a. Kan lo ngawi thap. Pa Tluanga chuan ka nu chu melhin, "Zoi, chaw kha min chhum kep leh ngawt em? Kan ei hman lo a nia aw" a ti nghal a. 

Ka nu chuan, "Ka la chhum hman lo chiah chiah..ei ve mai u la" a lo ti a. 

"Aih, hna kan ngah dawn sia, inhmakhua lawk a ngai. " a lo ti thung. Ka pa chuan kawngka thleng a va thlah a. A rawn let chuan min ko khawm a, ka nu pawh chaw a chhuankai zawhah a rawn thu ve nghal. 

"Hei i pa Tluanga te nen kan han rêl a. An hlauthawng tlat mai a, Naomi lah a rawn lut ve tep bawk nen, man chhuah ka nih mai loh nan eng emaw chen chu ramhnuai lama ka khawsak a ngai dawn a. Zoi te Villa bul lawka ka thlam sakah khan ka zuk khawsa rih dawn a ni. Hun hi han liam leh deuh se, ka rawn chhuak chho ve leh mai ang. Mangang lo ula, i nu hian ka bula chen ve a duh leh kartawpah te rawn kal ve lawp lawp se la..rei nghah a ngai lo vang" a ti ta a. Ka nu hmel chu a ngui rawih thei, kei pawh ka pa awmbo leh daih tur chuan min tilungngai, mahse, lehlamah fimkhur tluk a awm si lo va. Ka pa thutlukna chu hnial chi a ni lo va, tuman hnialna thu kan sawi lo. Zanriah kan ei lai chuan, "I pa Tluanga te bakah Mala te hoin ZCP member rinngam tur an lo thliar fel dawn a, misualho tawmbuk pawh ZCP hminga kutthlak kan tum ta a nih kha, Police lam chu an che lo vang" a ti a. 

"Ka kal ve a ngai dawn a nih chu, ka hruai lohte chuan an hre dawn si lo va" ka ti a. 

"Nia, i kal ve a ngai ang. Mahse, an lo inralring ve viau thei a, a hmunah i kal thleng ve lo thung ang" a ti dam ruih a. Ka nu chuan , "Heng buaina zawng zawng hi zo vek tawh se ka va ti tak êm..ka hne tawh lutuk" a lo ti chuai raih a. Tuman kan chhang lo. Ka nu hi khawngaihthlak tak a ni. Hmeichhia ka nihnaah ka hrethiam lutuk tlat. 

Ka pa sawi ang khan ani chu ramhnuaia thlamah a zuk khawsa ta a. Eitur thahnem tham tak kan dah khawl vek bawk a, a buai lutuk loin ka ring. Tin, Sangpuia khan ka pa lo hawn avangin guard kha a zawng ta lo kha a nia. Ka nu pawn tul a ti leh vak ta lo nge, kan sawi leh tawh lo. Ka pa chu kan thlamuanpui tih a hriat kher mai. Police lamin kut an thlak duh miau si lo va, sawrkar lama mi pawimawh ZCP member ten hma an la ta a. Misualho tawmbuk chu kan pan ta hum hum mai. Zan thima tlanchhuak ka nih avangin a awmna lai tak ka hrechiang bik hauh lo naa a chhui theih mai ka beisei. Rin ang ngeiin changel hmuna ka mutna atang khan hmar lam kan zawh ta zel a, kar loah an tawmbuk chu kan va pawh ta hlawl mai. Khamizan khan min rawn zawng se chuan min hmu vat dawn a nih hmel, ka mut ngawtna hmun nen a inhlat lo êm a ni. Kei chu hmun him nia an hriatna laiah min awmtir a, fimkhur takin in chu an va hual ta. Luhchhuak turin mi pahnihte chu an va kal phei zán zán a, mahse, in chu a lo ruak vek tawh! An lo hre lawk vek a nih hmel. Bungraw thenkhat an lak loh danah hmanhmawh taka tlanchhuakte pawh an nih duh hmel. Damdawi ruih theih chi hrang hrang a lo awm nual a, ZCP chuan an halral ta vek. Tihngaihna awm hek lo, man tur ber awm ta lo chu hlawhchhamin kan haw ta a. Mahse, a hnua kan hriat leh danin Sawrkar lam ten kan zuk luhchhuah tur thu information an lo pe a niawm e. Tu ber nge tih erawh hriat a ni ta lo, ZCP mi leh sa ngei pawh an ni mahna le. Pa Sangpuia pawn, "Kan pawl hi kan fir tawk tawh lo, inthlan that kan ngai nasa" a ti nang nang mai. Sum leh pai leh thuneihna duh vanga mahni pawl phatsan mai theite hi ka mihring ten zawng tak an ni. ZCP ten an va luhchhuah thu erawh tlangthantir loh law law an duh a, mi nawlpui chuan engmah an hre lo. Tin, min rubotute mi rawih police in an man takte kha bail-in an lo chhuahtir vek bawk. Mak tak a ni. Police tam zawk hian sawrkar an thlàwp bik lo, mahse, an hotu lian zualte hi sawrkar lamin an thunun tlat si a, an tan chet lak vak ngaihna a awm bik lo a ni. Kan ram chu ka pate vanglai ang maiin a chîri leh zo ta a, chhantu a ngai a, hmangaihtu tak tak a mamawh leh ta. Mipui lam pawn sawrkara an lungawi lohna an auchhuahpui tan a, ZCP mi leh sa an tam avangin ZCP ang zawnga demna pawh a nasa hle. "Thuneihna leh lalna an duh vang chauhin ram hmangaihber niawmin pawl an din a, an hel kual vel a. Tihian a tawpah min ching leh si" tihte chu an tawng duhdan a ni. Chutak chu Opposition te duhthusam a ni ta chiah a, tan an la nasain ram hmangaih ber niawm takin thiam tak takin an tawng chhuak a. Inthlan a lo hnai ta bawk nen, boruak pawh a tang ru kher mai. 

Kei erawh ka zirna bansanin dawr lamah rilru ka pe ta law law a. Ruatsanga leh hnathawk fel tak takte zarah mualpho bik loin ka la awm ve thei zel a, ka pain thurawn min pe reng bawk. Ka nu pawh ka pa bulah weekend a zuk hmang thin. Sangpuia pawh nupui a nei dawn bawk nen, farm lam enkawl a tul bawk sia, class a kal tha tehchiam lo. Zawh ve hram erawh a duh a, ani hi chuan eizawnna a nei sa ang a nia, a ngaihtuahawm loh. Remruata hi chu doctor tura kan hual lawk a ni bawk a, a zirlaiah rilru pe leh tanin, a lab-ah a awm deuh reng mai. Experiment eng eng emaw a ti deuh reng a, a hlawhtling nge tling lo tih a sawi zui tawh ngai lem lo. Mala nen pawh kan inhmu khat deuh, ZCP vangin an buai tlang a. Mahse, friday tlai tin dinner kan ei dun ziah thung. Mipui hmaah inpholang ve vak vak lo mah ila, kan nghetin kan inringtawk a, kan inhau ngai lo ti mai teh ang. Keimah hi ka thikthu vang leh ka pangchan vanga han tauh deuh nghat chu ka nei ve thin. Mahse, min dawhthei a, a tawpah kan nui dun leh nge nge zel. Amanda pawh a uaithla lam a lo ni ve ta bawk a, A chawl ve thei dawn ta. Mahse, a hna atangin chawl mah se, a thluak erawh ZCP tan a hmang reng thung ang. 

ZCP pawh inthlifim chhoin ka pa a la dam tih hria erawh Pa Tluanga leh Pa Sangpuia bakah Mala leh a thiante bak an ni lo. Palh a awm thei tih thu hlaah an fimkhur em em vek a ni. Inthlan a hnai telh telh a, ZCP lam pawh an intuaitharin thu leh hla an nei chho a. An pawl phatsana pawl dang zawm te chu inthamna lehkha bakah an inbiak rukna thlenga an chhuichhuaha an man tak avangin mipui lamin an demna pawh a nep ta deuh..ka lo lawm ve thei viau. 

Sangpuia te inneih pawh ni hnih chiahin min dang ta. Engkim kan peih fel tawh a, An ni lam pawh an inpeih thawkhat. Sangpuia pawn thinur reng a sawt lohzia hriain a chantawka lawm thiam a tum chho tan a. A hmel hmuh pawh a nuam ve ta deuh e. Kei pawh ka kawr hak tur an thui zo ta a, ka ha chhin deuh reng mai. Inhmeh hi ka inti hlarh hlarh lutuk a. Sangpuia te inneih dawn zan, man inhlan zanah ka pa a rawn riak chho ve a. An inneih ni tak erawh a tel dawn lo a ni. Palaite hawn hnuah kan thukhawm thap a. Ka pa chuan, "Hei le Sangpuia chuan nupui a nei ve dawn ta reng mai a. A la hun lo ti rilru mah ila, ka tu te fahrah ka remti si lo. Mo kan nei dawn ta a, ngun takin lo ngaithla rawh u. Zoi, hmeichhe fel tak i ni tih ka hria , mahse, kan inneih khan ka chhungte i hrawn lem lo va, mo nihphung leh awmzia i man vakin ka ring lo. Mizo society-ah chuan mo te kan ngaihdan hi thlak danglam a harsa khawp mai a, mo tha chhawr te hi kan la tia, mo hian a hranin tha an nei bik lo tih hriat tur. Kan thawh peih loh thawk tur te, mo an nih tak avanga engkim tihtir turtea kan ngai thin hi mawlna chi khat a ni. Zoi pawn hria se nu ber i ni a, ka awm rih loh avangin pa chan i chan a ngai tel bawk. Naomi pawh hian an in chhuahsana kan ina rawn awm thut hi a chak huam huam bik lovang tih ring u la, Zaidawh leh thinnel takin lo dawngsawng ang che. Kan chhungkaw tihdan bikte pawh a la hre dawn lo, hrilh keuh keuh la, kan chhungkua a nih tawh dawn avangin en hranna i nei hlek tur a ni lo. Zilh a ngaihnaah Sangzuali i zilh angin zilh bawrh bawrh la, hau bawrh bawrh rawh. A lo ngai huaa a lo lana a nih chuan a chhungkua angin min en lo tihna a ni mai. 

Nauteii pawh i thinchhe lutuk te, i tawngkam dengkhawng angreng takte hi la hrechiang lote tan chuan a na dawn a nia. Ze thup a tha ka tihna ni loin hawihhawm hi zir tur, I laizawn a ni tawh dawn a. Nangma puala thil thar lei tûn tûn te kha a fuh tawh dawn lo aw. Naomi i lei kep ve zel tawh ang. 

Remruata lo hriat atan i u nupui a nih angin i u thlap ang a, i u i zah angin i zah bawk tur a ni. Tin, nang hi tawngtam lo, biak hmasak loh chuan lungtum ang chauh i ni a, hengte hi insiamrem ve hret hret a tha. Midang tan i nelawm lo hle thei. 

A tawp berah Sangpui, i pawimawh lawtlak dawn a nia. In inthen hnuah i fa a pai avangin in innei dawn a nia, a tana nuam lo leh inthlahrunna turin a thawi tham pawn awm hlek suh ang che. I bulah i nute avanga a lo vui ve a nih pawhin buk lung rual takin khai la; Nupuite thuawiha tlawm duai duai mipa an zahawm tak tak thei lo ang bawkin, i nu leh i unaute i tan luat vanga i nupui i ringchhe nghal a nih chuan pasal laktlak tak i ni bik lo tihna a ni. I nupui i ngaihsak tur a ni bawk, i chhuahvah changin eng ilo ho thamte pawh hawnsak ching la, nau pai a ni a, a ei chak zawng pawh i nute bulah a sawi ngam lo thei. I zawt thin dawn nia. Tin, I pawisa hlawhchhuah atangin hmun thum atangin hmun khat chu i nupui kutah lut se la, hmun khat i nu kutah, hmun khat erawh i pual ve atan ni rawh se. Nupa chu engtianga awm tur nge tih chu kei leh i nute hi min en la, a tha mai e. I nu tluka pasalte zahthiam leh ngaihsak hi an tam lo vang. Ka sawi leh hram duh chu i thinrim viau pawn kutthlak hauh suh ang che. " a ti ta dap dap a. Kan ngaithla uluk kher mai. Ka pa hi ka tan chuan hero a va ni chiang tak êm. Mala hi ka pa ang ni ve se ka ti. 

Inneih ni pawh a lo her chhuak ta a. Boruak a nuam hle. Zingkar atangin fatu tura kan sawmte ho an rawn lang tawh a. Farm lamah an inkulh thung. Kan Kohhran Sunday School Hall-ah an invuan dawn a. Sangpuia chuan a thianthaber Freddyan a boralsan tawh avangin Ruatsanga thianah a hmang dawn. Make up artist a rawn thleng a, Aizawl mai ni lo, Mizorama make up artist thiam bera an sawi U Zami a ni. Ka naute chu a chei phawt a, mipate hi chu chei vak an ngai lem lo bawk a, a rei lo. A dawtah ka nu a chei ve leh a, ka nu pawh hmeltha tak a ni. A kawr lah a inhmeh si. Kei chu a tawp berah min chei ta a. Min chei zo darthlalanga ka han inen chu ka rak chul mai. Ka innocent hmel ngawih ngawih, Ka mize letlingin min chei ka ti mai. Mahse, ka hmeltha thlawt. Kan inpeih hnuah Hall lam panin kan inzui ta thliah thliah a. Naomi te lam pawh an rawn thahnem kher mai. An nalh hlawm bawk si. Mala'n hall kawtah min lo nghak ran tawh a, ani pawh a suit hak chu a inhmeh ngawih ngawih. Kan pahnih chuan kan lut dun ta zàn zán a. Ka nu te erawh Amanda te ho nen an thu, Pa Zirsanga te chhungkua pawh an rawn tel vek a. Roger pawh a bialnu Hluteii nen an thu dun. Mi zawng zawng chu kan nalhin kan hmeltha em em vek. Tiang chuan Sangpuia leh Naomi te chuan inneih thutiam chhamin nupa an lo ni ta. A lawmna hranpa kha kan siam ta lem lo va. Gift pe duh tan erawh hun tlem an hawng zuai. Shooting nei turin nupa tuakthar te chu an kal ta daih a. Kan haw leh sang sang. Kan han inthlak fel a, Mala nen kan in piah lawka phul hmun nuam deuhah kan va leng daih. Kan thu dun rial a, ka kut hi a vuan reng zel, ka kalsan ang tih hi a hlau thin a niang. 

"I nalh takzet, vawiina kalkhawm zingah khan i langsar ber" a tih chuan ka nui awr awr a, "Nang aia tha hi ka phu i tihna mi?" Ka ti a. A meng rum nghal, "Han sawi leh teh" a ti nghut a. 

"Aih..i tha ber ka tihna a nia" ka lo ti thung. Ka bianga rawn fawpin, "Kan inhmuh hi chuan lipstick inhnawih tawh suh, fawh che ka inthlahrun phah thin" a ti sup a. 

"Fawh hi ka nuam em?" Ka lo ti sar sar. 

"Nuam mah mah, inneih vat ka chak phah thin. Nakkumah innei mai ang" a ti leh ngawt. 

"Em em a che. Nulat ka la kham lo, bakah ka nuten an la phal lo vang" ka ti niah niah a. 

"Ka mamawhna che hi a sang tawh asin..Tisa thil tak pawhin" a ti a. 

"Sex maw?" Ka lo ti hû. 

"Aw..nupa niha zalen deuha mutdun ka chak tawh. Nge nupa nih hmain kan ti ve mai dawn?" A ti a. 

"I zak em? Roger ang khan ka then ve che ni mai" ka ti hlar a. 

"Roger kha a mak ka ti, a hnua a sawi leh danin khamini khan tlem a lo lem hlek a niang, a hur tawk velin. A ît ta tlat che kha a nia. A inthiam lo teh asin" a ti ta a, ka nuih a za deuh. 

"E taka! I pa hi ZCP hmingin a ding ve dawn tak asin. CM se ka ti e" a ti thut a. Ka lo ka hó mai. 

"Miin an hre dawn asin" ka ti vat a. 

"Hriat loh dan a awm alawm. ZCP mi leh sa hi an hre vek lo va. " a ti mai a. 

"Aa..ding lo se ka duh zawk. An bei leh nasa dawn si, bakah kan chenho a ngai tawh ang a, miin an hre dawn tho tho" ka ti a. 

"I pa thutlukna a zir a ni mai e. " a ti ve mai. Ka nuin min lo call avangin kan phei ve ta a. Fatu ho pawh an buai zualpui a reh tan. Catering koh mai ka rawt kha a nia, Ka nuin, "A zo nge nge e, hetia fatu sawma ruaitheh hi" a ti deuh tlat sia. Ka hnial hneh ta lo a ni. Mo hruai turin kan han inbuatsaih chho a, Mala car zawkin kan kal. Naomi te pawh hi khawsa thei tak an ni a, an tiropui ve khawp mai. A thuamchhawm lah chu a'n turu hlawm khawp a, a ngai teuh teuh lo asin le. Awmpui êm a rawn chhawm lo va, lawm phawt mai teh ang. Tichuan, Naomi chu a rawn lawilut ta rup a. Mo kan nei ta. 

Inthlanpui lo thleng tur lamin boruak a vaw hot zel a, titi dang a leng meuh lo a ni e. Kan minister zahawm tak tak bakah MLA thenkhatte chu ZCP lamin an thil tih dik lo lai an rawn thur ta chat chat a, A tir lama boruak an neih san ang he huin an ropui ta lo khawp mai. Mipui rilru sukthlek pawh a danglam tan ta viau. Ka pa chu a ding dawn ta lo a niang, ZCP hminga ding tur zingah Pa Tluanga, Pa Sangpuia, Pa Ngura te an langsar viau. Mi dik an ni a, ka pain a rinngam an ni bawk a, kei pawh ka lo tang ru ve nasa. An list-ah ka hming chu chuang lo mah se; Ka lo ZCP viau tawh a lo ni. Keini chhungkua pawn tibuaitu kan nei rih ta lo va, ka pa chu a thi tak takah an ngai a ni mahna. Naomi pawh a fel thar thar khawp mai, ka nu a kawmngeih a, a fing tlat. Ka nu nen in nghaktu ber an ni bawk a, an inngaina nufa tawh khawp mai. Sangpuia pawh ka pa zilhna kha a zawm tha viau, mahse, tlai khat ka hnathawk haw Naomi rai kawr tur ka leisak kenga an pindana ka va lut chu Naomi a lo tap tlat mai! 

"Engtizia nge?" Ka ti vat a. 

"Ka zep tawh lo mai ang. Sangpuia hian ngaihzawng a neiin ka hria" a ti ta mai a. Ka pháwk hle.

"Tu nge chu chu?" Ka ti vat a. 

"a hming ka hre lo, Zantin an inbia a, a phone ka khawih hlek pawn a teu hlar zel a. Sangzual, kei chu hrehawm ka ti.." A ti ta mawlh mawlh a. Ka thinrim viau, Sangpuia chuan engtin nge chutiang thil chu a tihtheih? 

"Ka nu ka'n hauhtir ang e. Lungngai miah suh, a sim em em ang. Nau pai lai i ni sia, rilru haha awm chi pawh i nih loh hi" ka ti ve a. Ka nu bulah engkim ka sawi ta vek a, a chek tlat tlat ringawt. A lungawi tehchiam lo tih a hriat khawp mai. 

"lLo haw teh se, a hre khawp ang" a ti ta chiah reng a. 

Zanriah kan ei laiin ka nu chuan a sawi chhuak ta hmiah mai. Sangpuia chu a phàwk deuh a, a inthunun leh vat. A ngawi reng a, inthiamlo hmel chu a pu ve. Naomi pawn chaw a ei tlem kher mai. Mut hma deuhin Sangpuia chu ka roomah a rawn lut a, zum deuh hian a ding a.

"U, ka pa hrilh suh aw. Ka sim hmak ang. Khawngaih takin ka nu bulah min sawisak teh. Ka pa hrilh lo turin" a ti ta a. 

"tu nge ni reng reng a? Engtin nge i nupui raipuar laiin ngaihzawng i neihsan theih?" Ka ti ta hrep a. 

A aw thian kharhin, "Nunui mawle. U, ka lo hmangaih tawh êm a ni. Ani chuan inbiak te hi a duh lo, min block thin, mahse, ka ngen nasat theih em avangin min unblock leh zel a. Min lo thlahlel ve tho bawk si, Naomi hian fa nei se inthen ka duh a. Mahse, U, ka pa in hrilh dawn loh chuan zanin atangin ka titawp vek ang. Ka tiam a che" a ti ta zung zung a. Mak ka ti hle, Nunui ber kher. 

"aw le, ka hrilh lo vang. I sim loh erawh chuan i chan a chau viau ang" tiin ka han vau khar khar a. Ka nu bulah sawi lehin ka pa chu kan hrilh ta rih lo. Sangpuia pawh chuan a thutiam kha a hrereng a ni chêk ang chu, A awmdan pawh a thlak ta a. Naomi pawh a nui leh thei ta. Nupa hlim tak ni zel se ka duh khawp mai. 

Kan inthlang chho ta a. Kan bialah Pa Tluanga chu a tling chiang var var khawp mai. Pa Sangpuia leh Pa Ngura te pawh an bialah hneh takin thlan tlin an ni ta bawk. ZCP chuan sawrkarna a la leh ta chu a nia. Opposition lam thawm a zawiin an ral ta emaw tih mai tur a ni. Pa Tluanga chu a lu ber a nih ngei ka beisei a ni. A nihna takah chuan Pa Tluanga thu leh hla chu ka pa atanga chhuak an ni deuh vek a, Pa Tluanga phênah ka pain ro a rel dawn a nih ber chu. Mala nen pawh kan inhmu zing thei ta deuh, a nu a chawl ta bawk a. Inthlante a zo ta bawk nen, an inpui lamah a let leh tawh a. Competitive exam hmachhawn turin a inbuatsaih char char a, Ka bialpa hi IAS a ni ngei ngei tur hi a ni ringawt. Remruata leh Amuani te pawh engtik atang khan nge an lo inzawm ve ni, An inzui dat dat reng mai a. Amuani chu a nu hnàp lo, a ti deuh thûng a, A nu Drose tleirawl lai a chhun an ti mai zel. Mahse, a rilru a thain keite hi min ngaina ve em em a, Remruata hian a thlang sual dawn lo niin ka hria. 

Naomi pawn nau a nei hnai chho ta a. Hmeichhia chu an tlakna leilung azir tih takah kan chhungkaw inrelbawlna te chu ngaiah a nei chho ve tawh a, an in lamah an leng khàt lutuk a, a nu in a rawn hau hial tawh. Chuti taka kan in a ngaina leh kan chhungkua a hmangaih chu ka nu nen kan sawi dun thin a, kan lawm thei viau. Ka pa chungchang pawh hrilh ngam niin kan hre ta a. A pasal Sangpuia ngei pawn a ringtawk viau. Ka pa kan rawn leh thlap hnuah ka nuin ka pa chungchang chu a hrilh ta vek a. Mak a tiin a thawng ve khawp mai. Mahse, "Chutiang thil serious lutukte ka sawi chhuah chuan ka damchhungin ka inthiam thei lo vang. Ka sawi miah lo vang" a ti ta a. Kan ngaih a ngam ta. Tichuan, ka pa pawh a birukna atangin a rawn chhuak a, chhungkua kan inhmukhawm leh thei ta. Nun hi pangpar ang mai a ni. A par vul reng thei lo a nih pawhin a vuai chang pawn a thi mai ngai bik lo. 

Mahse, ka pa chu a chhuak mang mang lo. Kan ina a rawn awm ve takah chuan hretu leh hmutu an lo awm lo thei lo va, Zawhna kan dawng ta zauh zauh. "Ka pa nau" tih chu kan chhanna a ni. A thenin ka nu chuan pasal dang a nei emaw an lo ti thul. Police lam beng pawh a thleng ve leh ta a, mahse, chet an rawn la miah lo. An chunga awmte kha ZCP an ni ve tawh tlat a tin ni. 

Remruata pawh MBBS zir turin phai lam a pan dawn ta. A kal dawn niah inthlahna kan nei a, Amuani pawh a rawn tel ve thei. An lungleng dun reuh ngawt ang le. 

Zirtawpni a ni a. Vawiin tlai chu Mala a hman dawn loh avangin dinner kan ei dun thei dawn lo. Chawhma chhung zawng ka buai a, chawhnu herah ka thu hahdam ve zuai, Customer kan ngah vanglai a ni a, buaina manhla tak erawh a ni. Rogera a rawn lut hlawl mai a, min rawn kai tho lawp, "Sawtah kal ang" a ti ringawt a. Ka lo hamhaih deuh, "Kal ang" a ti leh a. 

"Roger, eng nge a awmzia? I va á tak. Kan la buai alawm" ka ti nghek a. Ruatsanga a rawn kal a, "Va zui rawh, ka lo buaipui ang" a ti dam thlup. A ngaihna hre lo zetin Roger chu ka zui a. A carah min nawr lut, hnathawkte pawn min thlir thup mai. A ngawi ngul bawk si, mak ka ti takzet a ni. Khawi dang mah pan loin Zo chokaah min luhpui a, Dawra chawl an lo awm nual mai. Chutia min kai lut dawr dawr chu min lo en duh hlawm viau. A lai takah min dinpui a, "Le.." A ti fiak thak a. Min hnuchhawn zawnga thu mipa chu a rawn ding chhuak a, min rawn pan ta zán zàn mai. Malsawmpeka ngei a ni. Hrilhhai zetin ka lo melh ran a. 

"Thansangzual, ka nuna i lo tel ve avangin ka lawm e. Ka damchhung hun hi nang nen hman ka duh a, ka ta ni reng la, ka tan rinawm reng la ka duh a ni" a ti sup sup a. Ka lo melh hû ringawt. Chutah ka hmaah a thingthi ta, ka hmui ka hup tawp, A ipte atanga bawm te takte lachhuakin a hawng a, Zungbun mawi zet, manto tih hriat ngawih ngawih hi rawn lek kangin, "Sangzual, min nei duh ang em?" A ti hniam raih a. Ka khur deuhin ka hria. Ka beisei miah loh thil a nia sin. Dawra chawl ve te chuan, "Aw ti rawh..aw ti rawh" an lo ti tliar tliar a. Mittui tling pam chungin, "Aw..tehreng mai" ka ti sep a. Kut beng riin a khat nghal. Zungbun chu ka kut zungte u-ah chuan a rawlh lut ta a. Ani pawh a khur ve nia! A rawn ding chhuak a, ka hmuiah a rawn fawp zauh. 

Kei Thansangzuali hi Malsawmpeka nupui hual ka ni ta..khawvel hi a mawi takzet a ni. 

A TAWP TA.