malsawmpeka 15

MALSAWMPEKA (15)

Ziaktu: Toni Rálte

Chu pa chu ramvachal ve tak niin a lang, a vun a uk kharh a. Ka pa ai chuan a nau hlek maithei. Lukhum sen hlui tawh lam khumin, kawr ban tluan dum da tawh zet a ha bawk a. A heh vel chu a kuhva eina avangin a sen huam bawk. Silai a pu a, iptepui ung khek khawk a ak bawk. 

"Tu nge i nih a? Mami" a tih leh takah chuan ka harh ta zawk a. 

"Ka pu, khawi lai nge ka awmna ram hi le? Thansangzuali ka ni a, rukbo ka ni. Ka rawn tlan chhuak a, hei kawng ka bo a nih hi" ka ti ta zung zung a. A rawn lut ta a. A palian vak lo naa, thlam a awngrawp tawh êm vangin a mi dîp a na deuh. 

"A ni maw? He lai chu Tuirial ram a ni e. I bo thui awm hle mai. Kei ka bengvar lo khawp a, chanchinthar ka lo ngaihven lo bawk nen, i bo thu vel ka lo hre ve miah lo va. A zia lo hle mai. " a ti ta suam suam a. Ka thla chu a muang huai huai a ni ber e. Beisei nei takin, "Ka pu, phone i ak mial em le? Ka chhungte ka be duh lutuk a" ka ti a. 

A iptepui chu a zen rak rak a, saranga intuam phone hi a rawn phawrh ta mial a. Ka lawm lutuk chu ka au vak vak chak. Ka lo la vat a, signal pawh a lo awm và e. Ka nu number ka hmet chhuak ta zung zung a, a ring ta ral ral mai. 

"Hello" a rawn ti zawi sap a. A aw atang pawn a lungngai hle tih a lang. 

"Nu, keimah Sangzuali," ka tih rual rual chuan, "Eng a?! Ka mumang a ni lo tiraw?" A ti ta chul a. Ka naute hming a lam nghal chul bawk. 

"Khaw nge i awm? Naute" a rawn ti a. 

"Tuirial ramah, chul thlamah ka awm. Hei min pui turin ka pu a rawn lang hlawl mai a, a phone atangin ka rawn bia che u. Nu, min lo hruai thei nghal ang em?" Ka ti ta chung chung a. 

"Aw, Mala leh i naute an rawn kal nghal dawn e. I awmna hmun kha lo sawn rih suh aw. A theih chuan ka pu chu ka lo be ve ang chu" a rawn ti a, a chiàina a bo leh vek tawh. Ka pa atanga a chhawm ka ti mai. Ka pu ti tawh mai ang, mikhualpa chu phone ka pe ta vat a. An inbiak dan erawh ka hre lo. An inbiak zawh chuan, "Sava chang tura kal chu ka ni naa, tihian ka awmpui rih mai ang che. Nangmah rawn hruai turte biak an ngai dawn sia" a ti ta a. Ka inthlahrung hle naa, ka lawm tho bawk si. 

"Pathianin a rawn tir che a niang, ka pu" ka ti ta thlawt a. Lawmawm duh tak a ni. Ramhnuaiah tu khawkha hriatpui lohin tal ve ta u la, i mihringpui nangmah pui thei tur hmu ve ta chiah ula in lawm dan tur chu aw. 

"Pa Lawm tiin min ko rawh. I pu rual êm zawng ka la ni bik lo ve" tiin a nui suk a. A chaw fun rawn phawrhin min la eitir zui, chaw pangngai chu tui hliam hliam tak a ni. Chutia chaw ka bar tên tên lai chuan chul mawng lamah thawm kan hre ta tlat. Namthlak atang chuan a thlir thla vat a, "Khai aw! Kan kal a ngai, khu mi pali lai an rawn chho tlat mai" a ti sur sur a. Anmahni lang phak mah se an rawn chhohna a leithil ve bawk a, chutimai chuan an rawn thlen ran a rinawm loh. Chaw chu a fun tha sawk sawk a, a ak leh a, kei pawh ka hmanraw ho chu ka lo lakhawm ve leh vat vat. Mipa ka awmpui ta bawk a, a hmaa ka thlabar ang em em kha chuan ka thlabar tawh bik lo. Thlam chu kun zauh zauh chungin kan chhuahsan ta a. Thlam chhak lawka kawng pengah chuan peng lutin kawng chho ulh ve deuh a lo awm a, hah pawh sawi loin kan pen chho ta hlawk hlawk a. Chutia hmanhmawh phelenga kan chho chu min rawn hmu fuh ta nge, kan hma lawka khiang kung lian zet chu silaimu hian a rawn verh ta sàwt mai. A tlanin kan tlan ta a. Min thah mai pawh pawi an ti ta lo niah ka ngai. An tawmbuk ka lo hre ve hman tingtang bawk si nen. Kawng zawl lai kan thleng a, "Heti ringawt chu a dik dawn lo, kawng chhakah hian i lo biru zawk teh ang" tiin a hawi kual a. Kawng chhak lam chu hrui nei chi hnimin a bawh khat lúk a, a rualrem lo chung chung chuan kan peng chho a, Zawngte pipu lo uai thla hnulh, a hrui pholengin a bawm khah phênah chuan kan thu ta khar a. Kar loah min zawngtute pawh chu an rawn lang ve nghal, an hah hmel ve hle. Hnarkawma kha a inhrosa kúk kúk a, "Khaw thim hma ngeiin kan hnungkhirh a ngai, thupek a nih chu..a nih loh chuan kan hmabak a duhawm lo viau ang" a ti nghek nghek a. Kan birukna lai pawh chu an rawn thlek dúk dúk naa hnim hnah a zám nasat êm vangin min hmu lo niin ka hria. Kawngah chuan an kal ta zel a, an thawm a reh diak hnuah zawi muang leh thawm dim thei ang berin kan chhuak a, chutia kawnga kan chhuah leh dawn lai tak chuan a phone a rawn ri ta tung tung mai. Ani pawh a hamhaih nasa hle. A phone phawrh tuma a ipte a zen laiin min zawngtu te thawm kan hre hnai leh ta, pen sawn tuma kan inher lai takin, "Che tawh suh u" a rawn ti teng chhuai a. Kan ding cháwih. Pa Lawma pawh chuan a phone chu a chhang ta bik lo. Pawi tak a ni. Min hnungkhirh ve ve a, "Pa Lawma hian engmah tihsual a nei lo, ani hi chu chhuah rawh u" ka ti vak vak a. 

"Mahse, a hria che alawm" an ti hmiah mai. Pa Lawma erawh a ngawi reng thung. Dinhmun hlauhawma din tawh chuan rilru a chak an ti mathlawn loin kei pawh chuan ka ngaihtuahna ka hmang nasa mai a. Heng mite hi ka tihkhawtlai ngei an ngai a ni. Mala ten min rawn nangchina min chhanchhuah theih nan. Thlam lam pana kan chhuk leh lai chuan kawng thlangah ka tla hawlh ta thut a, ka rak nghal tuar bawk. 

"Ka ke ka ke..a tliak niin ka hria" ka ti tuar tuar a. Pakhat chuan min rawn tung tho lawp, mahse, ka ke chu ka rap ngam meuh lo, ka ner sak sak a. Hnarkawma chuan an zinga palian ber chu, "Paw mai rawh" a ti nghut a. Min paw thla ta. Thlamah chuan min nghat a, ka ke chu a zút bawk. Kei lah a khawihna lai apiang chu na tiin ka lo rak thawt zel a. 

"Eng tin nge kan tih ang? Na a ti sia" pakhat chuan a ti a. Hnarkawma chuan a phone phawrhin tu emaw a call nghal a. "Hei kan hling leh thei e. Mahse, a ke a tina hlauh mai a, kan rawn thleng hma theiin ka ring lo. Kawng lah a rualrem lo sia" a ti ve ta zung zung a. Pa Lawma nen chuan kan thu dun ran a, ani chu a ngawi reng. Biak rukna chance a vang em em si, a phone a rawn ri leh ta hlauh mai. Hnarkawma chuan lo laksakin , "Tu nge?" tiin lo calltu number chu a hmai bulah a rawn lek va a,Sangpuia number a ni tih ka va hre nghal. Pa Lawma chu hnunglam atangin a kut ka va sik váwt a, a hrethiam ve nge, "Ka ui doctor a nih kha. Vawiinah vaccine la tura hruai turin min tia" a ti ta ringawt a. Hnarkawma chuan nui vun vun chungin, "Pick up la, ramah i kal tih hrilh rawh" a ti ram hmak a. Pa Lawma hmai bulah phone chu a rawn dah a, a pickup nghal bawk. Sangpuia'n, "Hello" a rawn tih rual chuan, "He lai thlamah hian min riahpui mai a ngai ang, ka ke ka hmang thei si lo va, kan khawtlai mai mai zawk. " ka lo ti thuai thuai a. Ka bul lawka thu chuan ka hmui a rawn hup nghal vat, phone pawh hnarkawma chuan a hmet hlum nghal. Nui huah huah chungin, "Mipa leh hmeichhe thluak chu a la inthlau deuh a nih kha..i thiltum kha hre lo turah min ngai em ni? Thlam hi kan chhuahsan ngei a ngai" a ti ta hmuar hmuar a. Mahse, tisualah ka inngai lo, Sangpuia ten tikhan kan dinhmun an hria a, Pa Lawma phone no atangin kan awmna lai vel an rawn chhui luh theih mai ka ring. 

"Khai le! Kal ang u le. " A ti ta mai a. 

"Ka ke a nat hi," ka lo ti hlar. 

"He lai thlama in pahniha thih i duh loh chuan, i kal a ngai. I hrethiam em? Khaw thim hma ngeia kan awmna kan thlen a ngai" a ti ta thak thak a. Palluih chi a ni lo tih ka hrethiam. Pakhat chuan min pawm tho a, bai auh auh chung chuan thlam chu kan hnuchhawn a, ka ke ka tina der laklawh si, han bai auh auh chu a hahthlak duh viau, mahse, kan khawmuan phah hle thung. Chu tak chu ka tum pawh kha a ni ve reng reng a. Chul mawng kan thlen chuan ka thu hnawk a, "Ka kal thei tawh lo" ka ti tham tiak. Tui min rawn intir a, Pa Lawma pawh chuan a in ve a, ni lah chu a sa nasa mai si. Chauh a na zual. Lui kawr angreng deuh kha kan zawh thla leh ta a, A rukin chul lu lam chu ka han melh leh zauh thin. Kan hnu an rawn chhui theih nan eng emaw ka tih a ngai tih ka hre leh. Mahse, hmanrua a vàng hle. Hnahthel ro chu an tla niaih naa, sulhnu han hnutchhiah nan chuan min man rang dawn bawk si. Kawi khat kan kal chuan ka thu leh ta hnawk a, lungpui nghengin ka thaw hliam hliam a, meizuk te an han siam ve a, hun chu ka paihral ve hlek hlek e. Kal an tiha an insingsak buai lai takin ka lungpui nghenah chuan fei lem te takte ka ziak zauh a. An hmuh loh teh chuan aw..chutianga kawi tina ka thut hnawk zel avang chuan ka ke pawh chu a na tak tak angah an ngai ve tanin ka hria. Pakhat chuan a rawn hmet leh a, chutia a hmeh lai meka kawr lu lam ka han melh chuan eng emaw che zauh ka han hmu ta a. Ka thaw a rang hle. Pa Lawma chuan zun a lo dil ve bawk a, Changel hmun lamah pakhat chuan va hruaiin an va inzuntir ta a. Pa Lawma te rawn let leh hma, Hnarkawma'n a pheikhawk hrui a suihthat mek lai chuan, "Che tawh suh u" Malsawmpeka aw ngei mai hian a rawn ti ta mai le..an che suau ni maiin ka hria. Mahse, Mala, Ruatsanga leh Sangpuia ten silaiin an lo tin thap tawh a, an tan chet ve ngaihna a awm ta lo. Mala mitmeng chu a thim raih a, thinrim inup, phurrit tak phur a ang ka ti mai. Ruatsanga pawh lungawi hmel a pu lo. Sangpuia chuan ka kut an phuarna chu a rawn phelh sawt sawt a, Pa Lawma te rawn phei mek pawh chu a phelhsak ve nghal bawk. Min rubotu te chu an thut tlartir thap a, an hmanrua zawng zawng an laksak bawk. 

Mala chuan Police a be ta nghal a. Ruatsanga leh Sangpuia ten an lo phuar hlawm ve hlawm bawk. Hnarkawma chu a inla ngeng hle , "Tihsual kan nei lo. Hetia min tih avang hian in chung a rip viau ang. Kan chunga thute hi in hre lo a ni" a ti vel a. Mala chuan a ning ta deuh nge, a bekah a hneh ta siah a, a let hlawm tawp mai. 

"Tupawh tawng leh apiang chuan ka kuttum in hmachhawn zel ang. " a ti vawt raih a. Midang ho chuan an hlauh hmel hle. Police te an che rang bawk a, kan nghak rei vak lo. An rawn thlen chuan chung mite chu hruaia hawnpui nghal mai an tum deuh a. Ka ngaihdan a ni ta lo deuh, "Heng mite tawmbukah hian No. 4 pawh an stock nual mai. Tin, an ni hi chu rawih mai an nia, min rubotu tak tak te hi in man tur a ni dawn lawm ni? An tawmbukah a tu emaw ber kha va inhruaitir u la, in va luhchhuak vek thei ang. " ka lo ti ve hmiah hmiah a. 

Mala chuan, "Ka ngaihdan chiah a ni. Pahnih khat khan Sangzuali leh kan pu bakah mi tángte hi han hruai haw u la, keini lamin he mihring hruai hian an tawmbuk chu kan va phindarh ang e" a lo ti ve a. Police ho chu an inmelh kual a, "Order kan hmuh loh chuan kan tan chet a thiang hleinem" pakhat chuan a rawn ti ta a. Ruatsanga chuan, "Tunah khan order chhuah turin ngenna i siam nghal mai dawn lawm ni? Tun baka chance tha in nei tawh lo vang" a lo ti hmiah. 

Mahse, chu pa bula mi chuan. "Kan va luhchhuak dawn a nih pawhin civil mi chu in kal ve thiang lo vang. Kan hna a ni tlat" a lo ti hmanhmawh a. A dik reng tho naa, an huphurh kual vel lutuk chuan min rinhlelhtir lo thei lo. Mala ten an tur sek vang nge an hotute an be ta nge nge a. Mahse, vai ram ang chauh kan ni ta. 

"In va luhchhuah chuan titi a tam dawn bakah mi pawimawh thenkhat kan hlin tel a ngai dawn. In mi mante kha rawn hlíng haw u la, ruahmanna thar nen a bak chu kan ngaihtuah dawn nia" a rawn ti. A sawitu pawh tudang ni loin Thanchungnunga a ni. Tihtheih dang awm hek lo le, Kawngpui lam panin kan inzui chho ta thám thâm a. Ka thin a rim thlawt. Ka pain khatiang inrelbawlna a lo haw lutuk pawh kha ka dem ta hlek lo mai. Chul atang khan kawngpui chu mel thum vel a ni maithei. Kawngpui ka lo hnaih ve hle a nih chu. Mala chuan min chhawm a, thil sawi vak pawh a la rem chiah si lo va, kan ngawi hle hle mai. Police motorin misualte chu an phur a, keini Pa Lawma nen Sangpuia carah kan chuang thung. Pa Lawma chu khuaah kan va thlah te te a, Report thehluh a ngaih avangin kan thu khawmuang rei lo, amah vang liau liaua ka chhungte leh thenrualte hmu leh thei ka nih avangin Pa Lawma te chu engtin emawa la puih ve ngei ka rilruk a ni. Nupa reka khawsa an lo ni lehnghal a, an nu pawh a upa ve khat tih a lang. An chhungkaw chanchin han inzawh vak chi pawh a nih rih loh vangin inbe zui tura inchah lawm lawmin kan inthlah zui ta a. 

Motora kan han lut leh chu Mala chuan min ngheng chawt mai a. Kei pawn ka lo ngai ve tawh a niang e, ka zak buai peih tawh lo. Min hrenbeh dan leh min dáwp dante chu ka sawi ta malh malh a. Ka ke hliamte chu a en kual a, a chek hluk mai. "Hmelho mai mai chu aw..an va la chák dawn lo rua êm.." A ti nghut nghut a. 

Nancy chungchang ka sawi chuan mak ti awmin a awm lem lo. "Ka rindansa deuh a nia, khatia min hrai ruih pawh kha I pa awmna hriat a duh vang leh lehkha pawimawh ka kawl em tih a en duh vang zawk a nia. Tin, A hming hi Nancy a ni lo maithei. Kan la hre chhawm zel ang chu" a ti a. 

"Ka pa la dama an rin tlat chhan hi ka hre chàk" ka ti sap a. 

"La dam ta se, i lawm ang em?" Tiin min rawn melh a. 

"Ka damchhunga ka lawm ber hun a ni ngei ang" ka ti hmiah. 

"Tun dinhmunah chuan i pa kan mamawhna hi a sang khawp mai" a ti a. Kan ngawi dun rauh rauh mai. In kan thleng chu Pa Tluanga te, Amanda te leh U Loicy te chhungkua bakah ka thian thenkhatte an lo awm khup mai a. Min lo lawm thiamin ka hmel an han hmu leh thei chu an lawm ve takzet tih a lang. Ka nu nen kan inkuah vawng vawng a, a tap faih faih bawk. "Dama ka hmu leh che ka lawmzia hi ka sawi thiam lo zawk" a ti a. Kei pawh ka mittui a hnám. Kan han thu thlandai a, engkim a chin chhuaka hre chak hlir an ni bawk nen, Engkim chu a bul atang chuan ka sawi fai ta vek a. Min dawp lai vel ka sawi chuan ka nu chuan ka kut a rawn hum nghet hle. 

Ka sawi zawhah ka nu chu melhin, "Min rukbo ni kha mumalin ka hre tawh lo, nangmah kha engtinmah an ti lo che mi?" Ka ti a. 

A chil a lem a, "Khatihlai khan ka kut an phuar tlat si a, i naute lah an rawn lang thei si lo. I pa document thenkhat kha lak chhuah an tum a, code ka hre ve si lo. I rawn luh khan ka rawn au tuar hnu khan ka bekah an hlap a, nikhua ka hre lo ve nghal. Ka harh chuan an lo hruai tawh che a ni" a ti ta dap dap a. Kei chu tawktarhah min hmang tih a hriat hle. Ka nu a him phah chu ka lawm tho bawk si. 

Ka han intifai ve a, Kan chhungkaw thiante chu chaw ei ve nghal tura ka nuin a sawm avangin haw lo chu a tam zawk an ni. Police lam pawh an rawn lang ta bawk a, khang mite lakah khan case ka file ta bawk. Anmahni ruaitu te zawk hi an man leh duh pawh ka ring chiah lo. Amanda lah case an laktir duh der si lo. Kan ram pawh hian buaina nasa zawk a la hmachhawn ngei dawn niin ka hria. Zanriah pangngai tak ka han ei leh thei chu ka lawm tak tak a ni. Ka ei teuh mai. Pa Tluanga chuan, "I pa chu la dam turah an ngai tlat mai chu a ni sia, hetiang ngaihdan hi engtia nei thei nge maw an nih ang le? " a ti chuar chuar a. 

"Ka hrethiam tawh bik lo. La dam ta se, jail-a khungbeh reng an duh a niang" ka ti ringawt. Dik tak chuan ka pa chu lo la dam ta pawh nise, a thiltihte avanga man a ni leh nghal dawn tho a, kan bulah a khawsa thei dawn chuang lo. Chutiang ka ngaihtuahna avang chuan ka pa chu dam tawh lo zawk se, hahdam tawh zawk se tih rilru put chang ka nei ve lek lek zel. Mahse, nunna hi a hlu êm mai a, la thawk ve tek tek hi chuan thla a muang thin. 

Reitak an leng a, min zawn nasatzia te an sawi a. Ka nu chuan Rempuia kha a lo ringhlel sa tawh reng reng a, mahse, a awmna chin an hre bawk si lo. Police lam lahin hmalak an tum vak lo a nih hmel. Chhungkhat leh thenrualte inthurualin min pawng zawn ve tawp mai a, hmuh mai chu ka lo har dawn a nih kha. Police lamin Rempuia te chunga kut an lek loh chuan keimahte nena an tawmbuk va thlithlai reng reng chu kan tum a, ka nu erawh chuan, "Mi hrang in awm lo bawk a. Ka'n sawi mai ang a. I pa vangin khati khawp khan kan lo ralti rei tawh a, eng emaw tawk thut thei dinhmunah kan ding reng thin. Kei phei chu thinthiin ka muhil ngai mang lo a ni e. Tunah i pain min kalsan ta a, a thi hi ka lawm ni hauh loin thlamuang taka awm vea khawsakho ve theih hi ka thlahlel tawh a ni. Buaina dangah chuan inrawlh lo hram rawh u" a ti thung. A sawi awmzia ka hrethiam lutuk, mahse, kan ram dam nan thil tha lo chu kan do ngam turah ka ngai ve a. Ka pa khan tikhawp khan Zoram a hmangaih a, Zoram tan chuan thih pawh huamin zalênna a sual a nih kha. Thangkhat a liam leh hnuah tihian ka pa thurualpui thinte tho khan phatsan lehin keini a nupui fanaute thlengin min la tibuai zui zel a, hetia tawrh tlawk tlawk ai chuan huaisen taka lo hmachhawna lo dolet ve mai hi a tha zawkin ka hria. Mahse, fimkhur taka kan chet erawh a tha khawp ang. 

Mala haw tur chu ka va thlah a, "Naktukah chuan khawiahmah i kal lo vang, ka bulah i awm ang. Ka duat nileng ang che" a ti sup sup a. 

"Yes boss" ka ti ve mai. Inhmu dawn lo mah ila, dawra kal emaw hnathawh kha ka la tum buai lo. Ruatsanga a rintlak em em tho bawk a. Ka khumah ngei ka han mu leh thei ta chu ka lawmin ka ni hûih mai a, a chang leh ka khi leh vur vur thin. Ka helhhawlh atalàngin mut pawh ka hmu tha mang lo. Zingah pawh ka nu chuan min kaitho hma duh bik lo va, ka va thawh chuan, "Sangpuia nen kan lo sawi a. Security guard hi lak ve mai tha kan ti deuh, kan awmna a fàl si a, buaina tawh leh a hlauhawm êm mai" a lo ti var a. 

"Tha in tih ang kha a ni mai. " ka ti ve mai a. 

"Pahnih nise ka duhdan a nia. Private a nih dawn avangin an hlawh pawh tisang deuh ila, hetah ei in ve mai se, emaw farmah khuan an duh chuan an inbawl hrang thei tho a. Pakhat chauh chu a hah lutuk palh ang" a ti niah niah a. 

"Sangpuia'n lo zawng se la" tiin intifai turin wash room ka pan a. Ka va chhuah leh chuan ka nu chuan kawngkapui a hawng mek a, Awii! Reporter thahnem tak mai an rawn ther fur mai le. Ka bo rei ve deuh vang khan chanchin hre chak tak tak an lo kat nuk a niawm a. Ka va sawifiah peih tawh lo tak. Ka va inthlak ve thuai a. Reporter ho hmaah chuan ka bo dan, ka bo chhante chu ka sawi ta a. Ka pa a la dam emaw an tih vanga min rubo ang chuan ka insawi lo thung. Pawisa vanga min rubo angin ka sawi ta mai. A chhan chu zawhna a kual zel dawn a, ka chhang peih lo. Zoram titi a tling leh ngei dawn si a. Tukthuan ei hun awm velah kan hnar haw thei ta hram a. Ka thaw huai mai. Tibuaitu leh zuirutu nei tawh lo ila, zalen takin nun hmang ila ka duh ber mai. 

Mala nen kan inhmuh tur thu ka sawi a, ka nu pawn a hrethiam viau. Ka insiam laiin ka roomah a rawn lut a. Sawi duh nei hmel a put avangin, "Ka ngaithla" ka ti puat a. 

"I pa hi kei pawn a la dam emaw tih chang ka nei rum rum zel asin" a ti ta mai a. 

"maw?! Engvangin" ka ti hliai a. 

"Ka hre lo, ka chhungrilah hian awm a awm. Ka sawi thiam chiah lo. Mahse, i pa Tluanga te ber an bangbo si avang hian ka ngaihruatna mai maiah ka ngai leh thin" a ti sar sar a. A bula va thu vein, "Nu, engpawhnise, thudik kan la hre vat mai ang. Sawrkar lam hian ka pa dahbo an duh luatah thil an zeldin vak pawh a ni thei. Hunin a la rawn hril mai ang" ka ti ve ta dap dap a. Ka sama rawn chulin, "I pa nen hi chuan in va inchhun fuh tak êm..va kal la, hlim takin hun in va hmang dawn nia. Mala hi kei chuan ka ringtawk tawh viau a ni" a ti ta daih a. Kei pawh ka khi sak mai. Mala chuan min rawn lam a, Ka rin loh deuhin a in lam kan pan. 

"Ka in hi a him ber ang. Nilengin i awm ang a, i zanriah siam kan ei dun nghal ang" a ti a. Eirawng ka bawl thiam vak loh avangin ka inthlahrung deuh. 

Sofaah insi rialin kan thu dun a, ka kut chu humin a chung chu a fawp zauh a. Min fawh a tum lai takin Rogera'n a rawn call, "Aw bro" a ti zat a. 

"Zaninah chuan em ni? Thil chu" a rawn ti sur sur a. 

"Aw..Sangzuali pawh a tel ve ang" a ti sup a. Hrethiam lo takin ka lo melh vak, "A that chu, a thawn loh ka beisei. Duat viau ang che vawiin chu" a rawn ti a. A dah zui nghal. Ka mitmenga zawhna avang chuan Mala chuan, "I hre mai ang. Kan thianhoin thil kan plan a" a ti nghut a. 

"Surprise hi ka ngaina lo a nia" ka lo ti nghat. 

"I ngaina ngei ang tih ka ring a ni. " inringtawk zet hian a ti a. Min rawn fawp zui zat. Kan infawh zawhah, "Roger hi a timak ka ti, Min ngaihzawn laite khan Hluteii a lo be char char tho sia, kum khat zet alawm a lo biak tawh..min bum ve tihna a nia. Nang pawn i hriatpui ngei awm si a, ti nge engmah i sawi loh?" Ka ti ta nghat nghat a. 

A nui suk a, "Ka hria alawm. Mahse, ka sawi loh kha a ngai miau sia" a ti hluai a. 

"Min kawp tih hrereng chungin i zeppui a maw?! In lo inang reng a nih chu" ka ti nghek. Ka ban rawn vawn leh pahin "Thinrimin inhnial lo teh ang. Khawmaw, i ke chu ka'n en leh lawk" tih leh ka bawp chu a mal chunga hlan a rual a, ka kekawr a hlim chho nghal bawk. Chutia duat deuha min han sawngbawl leh si chuan min tino zo leh ta vek. Mahse, ka lung a dam thei hlawl lo a niang e. 

"I mak ve thlawt, Malsawmpek, tunah pawh hian nang pawh hian min lo kawp reng lo maw?" Ka ti hmuk hmuk a. A chek hlak a, ka bianga rawn piaiin, "Fiahna leh inbumna chu hrethiam rual i nih ve tawh kha. Roger hi ka thianthaber tih ka hrilh ngai lo che em ni? Ka thian a nih angin ka hna min thawhsak mai a ni" a ti ta a. Ka meng zau káwk. 

"Sawi chiang rawh" ka ti thawt a. 

"Aw a dik, Roger nen i chungchang kan sawi dun a. Ruatsanga pawn min hriatpui. I pa avanga min rinhlelh chhung chu hahdam taka i awm ve ka phalsak che a. Mahse, mipa dang daih lakah i intheh dere ka hlauh avangin Rogera ka pun ta ngawt a nih kha. Ani lah Hluteii vanga a rilru hrehawm lai lo ni bawk nen, in innang fuh khawp mai. Mahse, a fight vak che kha chu kan ruahmannah a tel ve lo" a ti ta thluam a. Ka melh reng ringawt, hmela te mai mai chu aw. 

"Roger kha ka ngaihzawn zui zel i ring lo em ni?" Ka tih chuan, "Ka ring lo mai ni loin ka hria. A chhan chu kei hi i tana mipa hmasa ber, tihtak taka i duh leh i vei ka ni miau a. I tana ka hlutna tarlang tur tawk lekin Rogera lahin lemchan a lo thiam si. I duhawm takzet a ni" a ti a. Ka biangah a rawn fawp zauh, "Misualho, in hre ve khawp ang. Rogera pawh chu a chák lo ang. " ka ti tán tán a. Chawplehchilhin Rogera ka lo ngei rukna leh ka lo ngaihdan te kha a bo duak nia. A thianpa tana a lemchannaah chuan a hlawhtling viau e. Ni e, kan inzawm ve chhung reiloteah khan Roger khan Mala hlutna leh a ze duhawm tak kha a lemchan thiamna avangin min hmuhtir zel si a, A tawpah Mala chu ka pa vanga ka rinhlelhna te bo zoin ka bialpa a ni leh thei ta chu a nia. Kan chhungkaw buaina leh hun tawn avangin mite angin romantic takin kan che dun ve thei lo naa, Mala ka bula a awm tawh chuan ka thla a muang thin. 

Ka ke la na deuh thuam thuamte chu a zut heuh heuh a, ka lam rawn hawi thut pahin, "Engvangin nge a hma khan kan inhmuh ve ngai loh i hre chak em?" A ti a. Ka lo bu nghat. 

"Ka ngaihzawn vang che mawle. Vawikhat Loicy te dawra i pa nen in chawl ka hmuh atang khan tihtakzetin ka vei che a, mahse, i nungchang kha ka ngaina lo a ni. Tin, ka nu dinhmun avangin hmeichhe lam hawi thei nia ka inhriat loh avangin ka pumpelh zel che a. Nang hian khatiang tak khan min veiin min duh ang tih ka ring thiam ngai miah lo" a ti ta hmiah hmiah a. 

"Pathian ruat kan ni a nih chu" ka lo ti hmanhmawh. Ka hnarah a rawn tuai zauh a, "Ni tak tak se ka ti. Ph. D ka zo ang a. Kan innei ang" a ti nghet charh a. Ka lo hmanhmawh ve lem lo thung. Chutah thutak deuh zawkin, "Mal, zep a tul tawh chuang lo va, dik takin sawi la, sawrkar hi i thawhpui tak tak em ni?" Ka ti ta a. A ngawih dat hnuah, "Ka sawi tawh ang khan an tana thawk anga lang siin ZCP tan a kul ataiin ka thawk thung. Ri ret ret a awm atang khan ka nu nen inhmuthiam lo anga lang derin ka indang a, Sawrkar ka belbul a. Min rinna hlawhchhuah nan ka nu ngei ka chhui ruk thu te ka sawi a ngai a. In ina ka rawn kal pawh kha min rinna hlawhchhuah nana ka tihtheih awmchhun a nih vang a ni. " a ti dap dap a. 

"A nih RInpuii kha!" Ka ti leh hram. 

Rum nghutin, "I thîk viau em ni?" a ti ta a. 

"Thik ve e" ka ti hmiah. Dawt sawi kual vel ka peih lo. 

"Inspector Thanchungnunga fanu a nihna avang chauha belbul ka ni. A pa kha kawmngeih ka duh vang a ni ber, ka hnaih thei ta rêng a. Mahse, pa fimkhur tak a ni" a ti ta a. Ka thêp suai suai mai. A nghawngah ka va kuah chial a, "A nih Mala, i la virgin em?" Ka ti ta a. Ka thutak hle lehnghal. Hnai taka min rawn melhin, "Ka tan a hmasa ber ni la" a ti thawp sup a. Min rawn fawp zui hmiah, sofaah chuan kan inbawhbet ran a, A hmui a laksawn chhungin, "Ka awih lo, La virgin si hetiang hian i zei thei lo vang" ka ti khur dat a. Ka thaw ham ham bawk. A tho nulh a, tui va lain a in khawlh khawlh a. "Doctor kan la hmu mai dawn nia. Rinna tlachhamnu" a ti hmuk. Kei pawh chu thoin ka intuai mam a. 

A sawi ang ngeiin kan hlim dun ve khawp mai, hna leh thildang sawi a remti miah lo va. Ka thusawi hote te vel erawh a ngaithla peih reng thung a. Chawhnu lamah phei chuan sawi tur ka hre mang tawh lo chu inngheng dun rial chungin movie kan en dun ta ngawt a. Kei nizan lamah ka lo mu tha vak lo nen, ka mut a chhuak ta hial a. Ka lo muhil daih. Ka mumangah ka nu hian chawhmeh tui hmel em em, rimtui zet hi a lo siam a, ka ei chak lutuk chu ka chilte a lo pût vel. Cooker phit ri niawm takin min kai harh a. Awii! Ka chilthli te a lo tla vel. Mala inah ka lo la awm a, choka lamah cooker chu a phit mek bawk. Kei hi eirawngbawl tur ka ni asin le. Rang takin ka tho a, ka va lut phei ve nghal. Min hnungchhawn zawngin eng emaw a lo chan a. 

"Min kaihthawh tur che alawm. I á mi?" Ka va ti nghek. Muangchangin a rawn lehhawi a, "I mutui reuh sia, ka kaitho ta lo che a nih kha. Zanin chu ka eisiam ei zawk mai ang. Hundangah nang chu aw" a ti dam thlup a. Ka va duh hluah hluah tak. Ka zak buai peih lo a, a hnung lam atangin ka pawm bet a, a thil siam rimtui zet chu ka hîp vang vang, ka pum a rawn ri nghal ruk ruk. 

"Khatia ka taksaa bei thlap reng lo khan ka coffee siamsa saw lo inthlit rawh, i pum ruahzia kha" a ti nghut a. Coffee chu ka va la inthlit ta vat a, ka duh aiin a tak mah mah. Mala chuan bawngsa ruhkawl a lo chhum hluah a, Vawksa naksah a curry bawk. Ánhlîng a lo buhchiar bawk a, ti nge maw engkim hi a hnehsawh viau ni. Salad siam ve ka tum a, a phal lo. "Va intifai rawh. Roger leh Ruatsanga an rawn thleng tep ang" a ti a. An rawn kal dawn tih ka hre miah lo. Ka va intifai thuak thuak a, tihpalh thilthuin ka kekawr leh kawr tlang ka la tihuh zui. Min rawn hmuh chuan a chek hluk a, a pindanah min nawr lut nghal. A tshirt dum chu ka haksak ta ringawt, a hnuaiah panty chiah ka ha. Ka kekawr a huh tel sia, mahse, a tshirt chu a len avangin panty chiah ka ha tih a hriat loh. Min khuh hlup sia. Bakah a thiante vek tho an nia, hmeichhe enin min en dawn lo tih hriatsa a ni bawk a, ka care duh lem lo. Ka sam chu sang takah ka tawn vah a, ka chawn leh mal vel cream ka hnawih lai chuan a rawn lut leh a, min melh vung vung. 

"Tihian awm hlen ve tawh mai la.." A ti sup a. A thutak viau. 

"In hi a te si, hmanah ka sawi tawh kha. Innei pawh ni ila hetah ka awm duh lo ka tih kha " ka lo ti hlar a. Nui chungin ka sam tawn kawh chu a rawn hum a, "Malsawmpeka awmna hmun apiangah i awm ang. Chu tah chuan chiang rawh" a ti hniam raih a. 

Ka ner ringawt. Ani pawh intifai turin bathroomah a lut zui a. Kei erawh thutkhawmna lamah pheiin ka movie en zawh hman loh kha ka en leh. Tihtur dang awm hek lo le. A rawn chhuah phei leh chuan, "I nu bia la, dar 9 velah i haw tur thu hrilh rawh, a lo mangang ang" a ti a. Ka nu ka be nghal. 

"Fimkhur rawh aw" te chu a la rawn ti hram hram a. Ka khawngaih zawk. Khua a thim tawh a, Roger te nghah pahin tv kan en dun leh. Ka chanchin pawh an rawn puang ve ulh ulh mai. Tv-a ka lan tak avang chuan uangthuang zetin. "Celeb ka ni ta" ka ti a, ka nui hawr hawr bawk. 

Thutak fé hian, "Ti nge sum vanga rukbo anga i lo insawi le aw? I pa chungchang kha sawi vek zawk la, kan misualte ngaih a tha zawk tur" a ti ta mai a. Bo fêin ka lo melh ,"Khatia i pa chungchang i sawi tel loh avang khan thup nei angah an ngaih phah thei che. Mahse, i sawi tawh a, tihngaihna a awm tawh lo. " a ti a. 

"Tihpalh. Ka lo ngaihtuah phak lo reng reng, ka pa vel ka sawi chuan zawhna dang an ngah dawn lutukin ka hria a" ka ti ta ringawt a. 

"I chhel lutuk zawk a nia,.Ka chhuang takzet che a ni. Sangzual" ti leh daihin min rawn hnaih nghal ruak a. A vawi tam takna atan kan infawp leh vawng vawng. Ka mal te pawh a zût ve nasat kha. Mahse, A doorbell a ri ta tlang tlang a. 

"Hun lo thei" ti hluk chungin a tho a. A va hawnsak ta. Khi thaw chungin Roger leh Ruatsanga te chu an rawn inzui lut a, "In laklawh chiang, Sangzuali mitmeng hi a la dava riai tlat" Roger chuan a ti lung lung a. 

"Kal teh" ka lo ti hlar thung. Rei an thut hmain chaw ei kan siam ta a. 

"Sangzuali'n in tana a lo bawl ve ngat a nih hi, ei teuh ang che u" Mala'n a tih rual rual chuan, an pahnih hnih chuan, "Ka awih lo" an ti rual thawt. An va chhe dun e aw. Zanriah ei lai chuan eng em em kan sawi lo, Ka kham tawh hnuah Rogera'n, "Engkim peihsa vek maw?" A ti sup a. Ngaihven lo awm deuhin ka lang naa, ka ngaihven ru tho. 

Mala chuan, "Aw..a tha vek e" a ti ve bawk a. Eina vel chu ka han tifelfai a. An ni erawh an lo titi thung. Nu Arini strict zia Rogeran a sawi a, ka lo nui ka lo nui mai. Ruatsanga pawh chuan, A bialnu Ruatdiki nu Isabella khirhzia a lo sawi ve tho bawk a. Mahse, duh loh vanga khirh an ni lem lo bawk a, a zia tho. Tunlai khawvelah chuan engkima fimkhur tluk hi a lo awm lo ve bawk nen. Ka intifel fai zawhah ka thu ve rih a, 20 mins velah Mala'n inthlak tura min tih angin ka va inthlak a. Engtin emaw ka awm.,. Kan chhuah hma chuan, "Khawiah nge kan kal dawn tih tal chu sawi ve u la, min rukbo in tum em ni? Ka peih tawh lo a nia" ka ti ve a. 

Mala chuan, "A hun hmaa sawi chu a ho zo thin. I hmachhawn ang a, thidang lo la a tha mai" a ti hmuk a. Awii! A den hmel bawk sia aw. Rilru a hah. Mala carin kan kal ta a, Melthum kan thlen phei chuan ka hawi ka hawi tawh mai. Ka bangbo lutuk chu Rogera te chuan min lo nuih vel thul, "Mala bialnu kan hmu dawn alawm..In insual hrep dawn nia. I lamah ka bet e" a ti vel thul, min va tihrilhhai thin tak. Ruatsanga lah chu a ngawi ngul reng a, biak a chakawm fahran loh. Mala pawn hmalam a bih uluk khawp mai. Trinity Hospital atangin veilamah kan peng phei a, "Mala, kawng awm chhung i tlan dawn mi?" Ka tih mek laiin in fál ve deuh tak te fel rin ren kawtah a ding dat a.

"Kan thleng e" a ti nghut. Chu in chu assam type a ni a, A kawtah chuan Eco van a ding ve ran bawk. Kan chhuk sap sap a, boruak a vawt lek lek mai. Mala chuan min rawn kai a, "Hawh le" tih leh in lam min panpui a rual a, Roger leh Ruatsanga erawh an hawi kual thung, mahse, min rawn zui ve nghal zat tho a. Kawngka chu Mala chuan a kik kauh kauh a, Reiloteah an rawn hawng nghal. Chu pa hmel ka hmuh chuan hmuh tawhna nei thánin ka inhria. Ka hrechhuak thei mai tawh lo. 

"Lo lut ru" tiin a tawlh hnung a. In chhungah chuan êng pakhat chiah an chhit avangin a ên dan a fiah lo ka ti mai. A ti deuh ruai a. Thlanglam tukverh lam hawiin chairah mi pakhat hi a thu run a, kawngka min lo hawnsaktu leh chu pa bak midang reng reng ka hmu lo. 

A ngaihna hre lo taka ka din khawng reng lai chuan Mala chuan tukverha dak vung vung lam chu panin, "I fanu pawh a rawn tel ve asin" a ti zawi ta sup a. Ka ding mar nghal zawt. Chupa chair-a thu chu a ding a, a lian kher mai. Muangchangin a rawn inher a, Thla êng chu chhumin a hliah avangin leh êng inchhi hliah zawng taka Mala a din avangin a hmel erawh ka va hmu fiah thei lo thung. 

Ka aw hriat than em em hian, "Ka naute, i lo dam em?" A ti dam ta thlup a..