malsawmpeka 14

MALSAWMPEKA (14)

Ziaktu: Toni Rálte

Ka nu aw niawm tak hian ral hla tak atangin min lo ko a, "Sangzual, tlanchhe rawh. Sangzual, kal rawh" tiin. Au chhuah ka tum a, ka aw a chhuak thei bawk si lo. Ka nu aw chu a hla tial tial a, kei chuan ka rilruin, "Nu, min kalsan suh, khawngaihin" ka ti mawlh mawlh thung. Mahse, ka nu aw chu ka hre pha ta mang lo va, ka sawithiam danin hmun hnàwng leh thim reih ruihah keimah chiahin min dah se, chutiang vel chu ka awmdan a ni. Ka bangbo kher mai. Ka tukhum lah chu a na ngut ngut mai bawk si.Ka awmdan chu ka ngaihtuah let a, hetianga ka awm tanna kha. Ni e, Ina ka haw kha an lo reh thap a, in chungah chhoin hmaituam, a dum veka inthuam khan min vua a nih tak kha mawle. Men ka tum a, ka meng chuan ka hre naa, engmah ka hmu thei bawk si lo. Ka awmna hmun thim vang nge ka mit ka meng lo zawk le?! Ka theihtawpa insangmarin thawh ka tum a, mahse, phuarbeh ka ni tlat! Chutah ka mit tivai chum chum khawpa êngin ka awmna hmun chu a rawn êng ta a. Ka mit a na thei hial! Mahse, ka theih ang angin ka hawi kual ve a, thil hmuh theih erawh ka nei tampui lo kher mai. Ka mutna hmun chu inzaina dawhkan sei pût mai a niin ka hria a, ka taksa chu hmun thumah dawhkan nena phuarbeh ni bawkin ka hria. Chet ngaihna awm hlawl lo khawpa nghet a ni. Chutah ka la hmuh ngai loh mipa sang zet, hnarngul kawm vun mai, mithmul buk zet hi a rawn lang ta a. A hmel landan chauh pawh a rápawm tawh sa tehlul nen, syringe lianpui a hum run a, a kawnga a silai pai chu ka hmuh loh a hlauh hmel viau bawk. 

A nui vur vur a, a nui hmel chu nunràwnnain a khat ka ti mai. Ka lo melh run run ringawt. Intihuaisen luiin, "Khawiah nge ka awm?" Ka ti sap a. Ka tawng ring thei lo. 

"Hmun himah" a ti nghut ringawt. 

"Tu nge i nih?" Ka ti leh hram a, "I himna duhtu" a ti leh tawp. Eng nge maw thleng ang le? Min tina dawn lo nia ka hriat avangin, "Khawiah nge ka chhungte?" Ka ti leh a. 

"An ni pawh an him e" a ti leh tawp. Tawng tam chu a hreh hmel kher mai. Syringe-ah chuan damdawi a hip lut a, "A na deuh maithei aw, mahse, chawlh hahdam i mamawh" tih leh ka nghawnga rawn vih a rual a, ka rak tuar. Mahse,ka mit sulh sulh a, nikhua ka hre lo zui lehnghal. Mumang rapthlak tak maiin min tibuai zui zat a, ka mumang nge a tak tih erawh ka hrethiam tawh bik lo. Ka pa ngei mai kha inzaina dawhkanah a ke pahnih tan bulhin a lo mu a, a hmai pawh a thi nasa hle. Mala nupui hual anga insawi Nancy khan chemte sei riang ruang lek chungin, "I hun tawp a thleng e"tiin ka pa chu vih hlum a lo tum a, tihtheih nei si loin ka lo mangang ve ngawih ngawih, ka aw a chhuak thei bawk si lo. A tawpah phei chuan ka thidang ta hial a..chutiang mangchhia indawt chho zut chu ka hmu chho mawlh mawlh ringawt mai. Harhsan daih ka chak a, ka harh emaw ka tihin a ngaite bawkin mumang tho ka lo nei leh zel a, mangang tak ka ni. 

Ka harh chuan ka awmna hmun hnàwn vang nge a lo vawt súk mai a. Ka hawi kual ruk ruk, A hmaa pindan êng tak kha ni tawh loin dim light a lo inchhi tawh a, ka awmna hmun min sawn emaw ka ti hman. Mahse, pindan chhunga thil awmte an la ngai vek avangin min sawn lo tih ka hre leh si. Min phuarna lai bawr vel chu a na nget nget tawh a, ka pum lah a ri ruih ruih bawk. Kawngka niawm tak a rawn inhawng ruai ruai a, nichin ami bawk kha a rawn lut leh, basket hian eng emaw a rawn khai lut bawk a. Ngawi rengin min phuarna chu a phelh nghal mawlh mawlh. Tawng pawh ka tawng peih tawh lo achha a ni e. 

Min tung tho a, " Ei rawh" tiin basket chu ka hmaah a rawn hung dawt. Basketah chuan chaw bakah soup niawm tak leh ar bawp pahnih an lo awm a. Ka ril a tam tawh êm vangin ka luhlul peih lo. EItur chu ka hap bawrh bawrh a ni e. Ka hmaa chair-ah chuan hahdam hmel zeta thuin min lo melh ran bawk. Ka ineipuar zo chu ka irh uk uk a, tui min rawn pe vat. Ka lo in leh khawlh khawlh a, ka taksa na leh kham thêm thúmte pawh an zia huai huai mai alawm le. Mihring tana chaw leh tui pawimawhzia hi aw,. 

"Ka haw duh" inti huaisen luiin ka ti leh a. A nui huk. Ka sawi thiam dan chuan a nui riah khan, "Tum buai duh suh" tihna awka a telin ka hria. Mahse, ka beidawng dawn lo. Hetia min hren beh chhan tal hi hriat ve ka phuin ka hria. 

"Mawh, min kaltir rawh. Pawisa i duh chuan ka nu be rawh" ka ti leh nghat a.

"Kei chuan min ruaitu thu ka zawm a a ni mai. Thuneihna ka nei ve lo" tlema min lainat hmel ve deuh hian a ti ta a. 

"Tu nge chu chu?" ka ti vat. 

"I pa thianpa mawle..ni lo, thian hlui" elsen rawngkai lek lek hian a ti a. Tu tak ni ang maw?

"Eng nge a duh?" ka ti vat a. 

"Company" a ti chhum hmak. Ka ner sawk mai. Kha pa Rempuia inti kha ka mitthlaah a rawn lang nghal nia. Eng laimaha ka pa thianpa ni ngai lo kha. Heng hi a ma bultan vek a nih rinna ka nei lian takzet a ni. 

"A nih thil pakhat chauh, ka nute an him em?" ka ti a. 

"Him e. Nangmah zawngin an buai mek ta ve ang" a ti liam puat a. 

"Ni engzat nge min hren tawh" ka tih chuan, "Ni 3-na chiah a ni e" a ti ta a. Ka thaw hawk ringawt. Ni 3 lai min phuar tawh a, ka nu ten ka awmna an la hre lo chu a ni si a. Min zawn ngei ka ring a, Police lam pawh an hrilh hre tawh ngeiin ka ring. 

Chu pa chhuah hnuah chuan min phuar tawh lo bawk a. Dawhkan atang chuan ka chhukthla vat a, ka taksa chu a nà thúm mai. Dawhkan vuan chung chuan ka ding sai hlak hlak a. Room chhung chu a zau lem lo viau. Sawi tawh angin damdawi chi hrang hrang te chu a awm rum a. Chhuar pakhatah chuan parcel lian fe fe pathum a inhung tlar bawk. Tukverh pakhatmah a awm lo va, chair pahnih inhung vein ka mutna dawhkan zawn chiaha kawngka niawm tak chu ka va hawng a. Toilet a lo nia. Ka uak nghal tuar tuar, a tawp lutuk tlat. Kawngkapui ber chu ka han sawi a, a ngheh hmel kher mai. Chet pawh a che eih lo. Pawnlam thawm engmah ka hre pha lo bawk. Han dah chhuahna tur engmah àwng a awm der bawk si lo va, engtin nge he lai hmun atang hian ka tlan chhuah theih ang aw. Chutia bangbo zeta ka awm lai tak chuan ka ngaihbel nge ka awmna pindan lehlamah chuan tawng lawng lawng thawm ka hre ta a, ka beng ka chhi ngun kher mai. Hmeichhe tawng lawng lawng thawm a ni chiang mai. Mahse, a hnu lawkah a reh zui leh ta daih a. A reh rualin ka awmna pindan kawngkapui chu a rawn inhawng nghal. Ka rin ang ngeiin Rempuia kha a rawn lut ta zan zan mai le. Ka lo melh ve ran a, a zàm lo hle tih a lang. 

"Engvangin nge hetia min hrenbeh ringawt, ka haw duh" ka lo ti nghal táwng a. A nui suk duh chauh. Dawhkan seipuiah chuan a thu a, kei erawh chair vuan chungin ka ding ran mai. 

"Engvangin nge mite hi an inrukbo thin" a ti ta a. 

"Eng nge i duh?" ka lo ti zawi sap. 

"Ka share mawle. I pain min ruksak tak kha " thinrim hmel zet hian a ti a. Ka nui hawk, "Share i nei lo. Engmah chan i nei ve lo" ka ti a. 

"Chu zawng tuna ka buaina a ni lo. Sum hi ka thupui ber a ni lo e. He lai hmunah hian thil tam tak sawipui tur chein kan khalh lut che a ni. Tu te emawin an ka an àn nan" a ti ta zel a, ka bangbo takzet tawh. A sawi awmzia pakhatmah ka hre miau hleinem. 

"Eng nge i sawi ka hre lo a nia" ka ti a. 

Chair chu kawkin, "Thu rawh" a ti nghut a. Kan dawra a lo kal nia a hmel nelawm tak kha chu mitthla ngaihna pawh ka hre tawh lo. Ramsa kawlh zet hmel a pu hra tawh tlat a ni. Ka thu ve mai a. Ka lo ngaicháng a. 

"Khawiah nge i pa in thuhrúk?" a ti ta a. Ka thu ngil awt. 

"Khatin hre lo niawm takin hamhaih der khanglang suh. Khawiah nge i pa a awm?" a ti leh thak a. A aw pawh a nelawm fahran tawh lo hle. 

"Ka pa chu a thi tawh" ka ti ve ngat. 

"A thi lo tih leh a ruang an thlak thleng tih hretu kan ni alawm. Nang a fanu hian i hriatpui ngei tih kan hre bawk e" a ti leh ta hmiah hmiah mai. Chutiang thu ka hriatin min nghawng natzia chu hria se engmah ka hriatpui lo tih a hrethiam mai tur. Suahsual chhuahin, "Chutiang a lo ni tak tak a nih chuan ka va lawm dawn em, ka pa a la dam maw?" ka ti chul a. Runluih rawngkaiin ka nui ar ar bawk. 

Rum elkhena min melhin, "I ka i la àng ngei ang. A nih loh pawhin a fanu hian hmel tih tlak a nei dawn tawh lo tih a hriat chuan, Ephraime chu a rawn lang ngei ang" a ti ram hmak a. Ka nui tawp hmak. Min sawisa dawn tih chu a lang chiang ta hle. Mahse, ka pa avang chuan ka hmachhawn ang. Ka pa chu a la dam tak tak ang em le? Min hrengbettu te hi tu te nge tih ka chiang ta hle bawk. Sawrkar mi leh sate ngei an ni. Mahse, ka buaina zawk chu ka pa chu tu ten nge a ruang lo thlak thleng ta ang le? Ka nu takngial pawhin a hriatpui loh khawpa thurúk ril chu tu te ruahmanna nge ni ta ang? ZCP maw? Mahse, ka pate accident ni ka ngaihtuah let a, ICU-a ka pa ka va hmuh laite, khatah khan ka pa chu ka pa ngei a ni bawk si. Engtik laiin nge an lo thlak thleng hman ang? Tu tute nge inrawlh ang. Hei erawh ka chiang, ka pa hi a la dam tak tak a nih ngai chuan ZCP vanglai ang khan huaisen takin a rawn kir leh ngei ang. 

Pu Rempuia lakah sawi tur ka neih loh avangin thinrim takin min chhuahsan a. Eng chen nge hetah hian ka khawsak dawn ka hre si lo va, Toiletah chuan lutin ka hmai ka va phih a. Midang lo luh veleh inbual ka dil ang ka ti rilru a. Boruak a dai hlauh zawk a, ka balh hmel over lo. Tihtur dang nei hek lo i, chhuara parcel an hunte chu ka la thla ta a, damdawi hlirin a khat. Parcel pakhat chuan ka mit a la zual, thil dip var, tam vak lo va pack thliah thliah a ni. No. 4 ni ngeiin ka hria. Ka awmna hmun tal hi hria i la aw. Tlai lama chaw rawn dahtu bulah chuan inbual ka dil ta tawp a , "Naktukah" a ti ringawt. Eitur min pek chu a chhe em em lo bawk a, nakinah chak nan ka la mamawh dawn tih hriain ka ei lui hram hram a. Ka ei khamah toiletah va lut lehin bucket khaina thir chu ka va thlawn a. Ka awmna pindan chu kal hualin chhuat chu ka pheikhawk chuan ka han khawng kauh kauh a. Ka mutna dawhkan hnuai chu a ri a danglam deuha ka hriat avangin bucket khaina hmawr chuan ka rin ta a. Min chhanchhuaktu tur te Lo sakuh ser nghah tlawk tlawk ai chuan ka tihtheih tawk tih ve chu ka bat ni pawn ka hria, ka tlan chhuak thei ta lo a nih pawhin hmanrua eng emaw kawl ve chu tangkai hun a la awm ka beisei tlat a ni. Ka awmna laiah chuan camera kam ruk a nih hlauh erawh chuan ka chhe vek a ni mai. 

Zan a ni tawh a, thawm ka hriat avangin ka hmanrua chu mattres hnuaiah ka rawlh lut vat. Rempuia leh ka beisei loh lutukin Nancy te an rawn inzui lut ta mai a. Nancy chuan ngeiawm zetin min la nuih sàwng zui. 

"Min hmu hi mak i tih loh ka beisei" te chu a ti khawmawi ve a. 

"Ti hran lo e. Ka rindan sa alawm" ka ti ve hmak. 

"I bialpa chu a mangang viau a niang, Zan 2 lai a mu tawh lo" nui sàng chung hian a ti a. 

Ka ngawi reng. 

"I pa awmna i sawi phawt chuan Malsawmpeka i hmu leh vat dawn a nia, kei chu ni ila ka sawi tawh ang mawle" a ti leh a. Chhuatah a vei kual bawk. 

"In hriat duh ka hre tlat si lo lai hi a pawi ngawt mai. Lo hria pawh ni ila, nangni bula ka sawina chhan tur ka hre lo" ka ti ve ngat a. Rempuia insum zo lo chuan mi rawn nek sawk a, chhuarah mi nawr bet bawk. He pa hian hmanhmawh riauna chhan a nei pawh a ni maithei. 

Ka rin ang ngeiin, "Sawi vat mai rawh. Inlak ngenna hun a ni lo a nia. Nangmahni vangin dinhmun laklawhah kan ding vek tawh. Sawi la, i pa chu kan tina lo vang" a ti tuar tuar a. Ka ngawih avanga an lo tuar ve a nih phei chuan ka ngawi hlen hmak ang, Ka pa awmna hriain sawi ta ila, ka pa nunna chhat tur te an ni a, engtikawng mahin ka tihtir lo vang. Anmahni ruaitute atangin nawrna a nasa tawh si a, kei lah ka la ngawi bawk si nen, a thinrim hle tih a lang. 

Nancy chu thluak lam hmang chi tih takah, "I nawr leh lutuk a nih kha. Ngawi tak rawh se, zanin khawvar hma ngeiin A nu leh a naute ngei kan rikrap chuan he hmeichhia hian a ka a ang ngei ang" a ti nghat nghat a. Min tihhlauhthawn a tum dan chu ka hrethiam ve vek, ka nu leh ka naute chu tunah an khawih phakah an awm lo tih ka hriat phah a, ka thla a muang sawt mai. Ngeiawm zeta nui lui vein, "A nawm dawn chu le..inrikràp hi ka ngaina asin" ka ti ve hliai a. Nancy mitmeng a danglam zawk. Mahse,a rei lem lo. 

" I nu leh i naute taksaa thisen chhuak i hmuh hunah chuan i ngainat zawm ka ring chiah lo" a ti tak naa, engahmah ka ngai lo lui ve tlat si. Min vau bak tihtheih nei hek lo le, "Naktuk lam atangin i tan hremhmun a intan chiah ang" Rempuia chuan a ti a. Min chhuahsan ta a. 

Ka hna ngai ka thawk leh nghal char char, Bucket khaina chu ka taksa tlin tawk thleng chhuata ka han rin takah chuan a hriam tawh ngei mai. A lum vut vut bawk. Tlan chhuah ka tum si chuan ka tha ka ui ve bawk a, ka mu hahdam ta rih. Ka thluak rawn fim chho zel te avangin thil tam tak ka ngaihtuah a, Ka nute an him nia ka la hriatna chuan min la tithawveng ve deuh. Mahse, engtin nge an him theih le? Khamini atang bawka chhuikir leh kha a ngai thin. Ka nu kha ka va hmu miah lo naa, engtin emaw ríkràp chu a niin ka hria. A him ta lel si leh kei min la bawk si chuan ka ngaihtuahna erawh a kaipeng deuh. Ka chhuah theih hunah engkim a la chiang vek mai ang. 

Ka pindan chu light hmanga ên ringawt a nih avangin khawvar leh var lohin awmzia a nei vak lo, lei hnuaiah daih a awm zawk em mawni. Nge dark room atana an hman ve hrim hrim ka hrethiam lo. Nimin tlaia chaw min rawn petu bawk khan min rawn pe leh a, Towel a rawn keng a, "Inbual rawh" a ti nghut a. 

"Sawtah sawn maw?" ner náng chungin toilet ka kawk a. 

"Duhthlan tur dang i nei lo" tih leh sabawn dah a rual a. A chhuak daih nia. Tui lo fein ka lut a, tui ka herh haw nghal. A tih ve theih naw naw e. Ka va chhuah leh chuan dawhkan seiah khan school naupang hostel uniform niawm tak cotton tial rek ruk hi a lo awm a. Ka ha ve mai. Ka thawmhnaw kha a rimtui vak tawh lo bawk nen,chutia thawmhnaw thar te ka han hak takah chuan ka thar ve sawtin ka hria a. Ka awm a nuam ve deuh. An eitur rawn dah chu ka ei zo leh thak a, ka ei kham fel chauh tihin mi pahnih an rawn lut a, Parcel pathumte kha an chawi chhuak a, No. 4 pawh kha an thehthang dawn a ni ngei ang. An reh leh ta veng veng a, keiin ka hna ka thawk leh char char. Chawhnu her vel a ni maithei, Nancy leh Rempuia an rawn lut ta a. Eng sawi set set loin dawhkanah chuan min nem mu thlawp a, ka ke lam chu phuarin ka ke phah hnuai chu an vaw ta mai a. Ngawi renga an chet avangin a tirah ka hamhaih deuh, mahse, min dáwpna hun an tan tih ka hrethiam chho ve mai. Zep thu a cheng lo, Na tawrh lamah hian ka chhel tawk lo khawp a, pem leh hliam hlekah pawh pangchang em em thin ka ni. Ka ke chu a na ka ti a, ka insehruh nasa khawp mai. An han chawl deuh a, an duhtawk ve ta a ni maw ka tih rilruk laiin ka ngal chu an han roll leh ta mai a! Chu phei chu kei ka insawitheihna ni lose, no ve tak, vun nem tak nei tan chuan tawrh a harsa khawp mai. Rempuia chuan min rawn dinchilhin, "Thansangzual, khawiah nge i pa a awm?" a rawn ti kúk kúk a. 

Ka heh pet fan fan chungin, "Ka hre lo" ka ti tuar. Sarang hlai hlep hlawpa ka hmai rawn tuam hlupin ka hmaiah chuan tui an rawn phuh leh ta..ka thaw a chham mai dawnin ka hria, mahse, mak takin chutia thichhawng lek leka tui háka ka awm lai chuan ka pa hmel hi a rawn hnai tial tial a, "Ka fanu, huaisen takin aw" ka beng bulah hian a rawn ti niin ka hria a. Ka na tawrh leh la boruak khamkhawp lote chu ka hrechang zui ta lo. Tu emaw hian mi rawn thing nawk nawk a, ka àwmah an nep sawk sawk bawk. Tawng ri chu a rik nuai nuai avangin tu tawng ber nge ka sawi fak thei lo. Zawi zawiin ka thaw chu a rawn lêt leh ka ti mai, ka hah hi a dam vawng vawng nia. Ka thi ve hman zuai em mawni aw ka ti hman. 

Ka han men chuan dawhkanah khan ka la mu reng a, mi pakhat hmai tuam hian ka kephah leh ka chawn vel te chu damdawi niawm tak a lo hnawih mawlh mawlh bawk. Ka tawng peih thlawt lo. Tui min rawn tulh a, ka nghawng a rawn thip zawk a, mutchhuakin min zem chiai chiai a, mumang bo thak khawpin ka muhil leh ta vang vang a. 

Ka harh chuan basket a lo awm leh ran tawh a. Mahse, ka tho nuam lo, ka taksa na khan ka khawsik a siam nge mawni, ka chhungril a nuam miah lo. Eitur pawh chu ka ka a tui lo nen, ka eitui mang hlek lo. Ka ei zo thei ta lo va, Kawngkapui chu ka va chum bur bur a. "Ka damlo a nia, ka tha lo takzet" tiin ka au tuar tuar a. Ka thawm chu an hre pha a ni ngei ang, reivakloah an rawn lut ta a. Ka la hmuh ngai loh mipahnih an ni. 

"Nachhawkna ka ei a ngai" ka lo ti hlar a. 

"Jection rawh" pakhat chuan a ti a. Pakhat chuan syringe lek vain, "Bawkkhup rawh" a ti nghut. Na tawrh ai chuan tiin thuawih takin ka bawk ve mai a, ka ngumah a rawn chiu ta a. A na lem lo, mahse, a kut a la tur chuan ka mawngtam chu a rawn sáwk kher a, ka ngaihdan a ni ta lo. "Hmela, i va ngampa ve" ka ti nghek a. A thianpa mitmei a veng ve nge engmah sawi zui lo chuan an chhuak ta a. Ka hna ka thawk leh ta. Reife ka rin ka rin hnuah chuan ka khawsik pawh ka lo hrechang tawh lo va. Ka thaw sa nen, ka khawsik pawh a awm ta rih lo. Darkar engzat chiah nge chhuat chu ka rin ka hre lo, Ka hmanrua chu sawi ngaihna awm lo khawpa hriam a ni ta. Chhuat chu laih chi ni hek lo, chu ka thil hriam kawl ve hmang chuan ka damkhawchhuah nan ka beih a ngai dawn ta. Ka muhil leh ta phawt. 

Ka tan ni eng leh zan thimin mumal a nei lo bawk a. Ka muthilh loh chuan hmanrua ka dap a ni ber e. Chhuar leh pindan kil khawr velte chu ka dap ka dap bawk a. Ka khawsik chhuanlamin min jection leh turin ka ngen a. A hma ami te bawk kha rawn lutin, ka vanneih asiamin pakhat zawk chu a chhuak ta vut a. Min chiutuin ka mawngbawr a dap kual leh lai chuan, "Pawisa i duh em? I duh zat zat ka pe ang che. " ka ti ta a. A thaw hulh a , "Pawisa ai chuan hei zawk hi" tih pahin ka mawng a sáwk leh a. Rum nghatin, "Remchang a awm loh hi. " ka ti nghat. 

"Zaninah an chhuak dawn hlawm a, golden chance kan nei tihna..a ni lawm ni? Mi hausa fanu ka la mutpui ngai lo va, ka damchhung sawi a tan he lai dawhkan chung hi a remchang mai ang" a ti huah huah a. Ka va ten tak, a thianpa rawn luh leh hmain, "Ka lo nghak ang che" ka ti sap a. Ka chhungril a nui bawk. Eng nge a sawi kha..zaninah an chhuak dawn a tih kha..a awmzia chu zaninah ngei hian ka lo intuaihhriamna kha ka hmang tangkai ang. 

A thianpa rawn lut chuan min ringhlel deuh nge, "Zanin chu tui deuhin i muhil dawn nia. Naktukah beihpui an thlak dawn si a" a ti sur sur a. Ka chhang lo. Zaninah ngei ngei nunna thápa ka tlan chhuah a ngai. Ka tawngtai mawlh mawlh mai. 

Eng chena thui nge ka tlanchhiat dawn ka hriat loh avangin luak chhuak chung chungin chaw chu ka ei lui a. Chhuna pindan ka dapna lama ka hmuh chhuah, syringe hlui chu ka la chhuak a. Parcel-a damdawi chi thumte chu ka chawk a, Ka thun fai ta vek a. Engtiangin nge a thawh dawn ka hre bik miah lo. Mahse, engtin tin emaw a thawh ve theih mai ka beisei. Ka thate a khur nia! Ka helhhawlh ka ti mai. Ka hmanraw zum leh hriam zet chu ka mutna hnuaiah ka rawlh tha diam tawh bawk. Kha mihurpa lo nghah tawp bak tihtur ka nei lem lo. Pawnlam thawm ka hre ve thei bawk si lo. Kawngka a ri rak a, ka phur tawh nen, Nancy zawk a rawn lut hnalh hnalh a. A mitmeng chu ruih nei a ang. 

"I pa thukrutu te chu zaninah an kut kan phuar fai vek dawn e. I pa nen pawh in inhmu thei têp e. Mahse, vanduaithlak takin i pa chu a vawi hnih nan a thih leh a ngai dawn a ni" a ti nghat nghat a. 

"A va lawmawm dawn ve. Thi nawn leh dawn pawh nise, ka pa vanga in buaina hi thihpui tlak a ni tawh alawm. Ka pa chalah chil in hnàwm a, in ngam leh si lo va. In chawh" ka ti hrep. A ho e, ka tlan chhuak tawh dawn tho, he hmeichhia pawh hi ka khawih chak khawp mai. Tunah chuan ka la insûm a ngai si. A ding a, "Mala kha a zei khawp mai, khumlaizawlah a tan a hmasa ber ka ni..Ka hmakhalh che" min tiel zet hian a ti kual a. 

"Hmeichhe cheap tak i ni. Ka pa awmna i hriat duh vangin Mala i belbul a, a lak atangin engmah i hre bawk si lo, tihian ka lakah hriam in lek ta ringawt a. Tihtheih engmah in nei tawh lo" ka ti ta piap piap a. A thinrim hmel kher mai, mahse, a tir bera ka hmuh, hnar kawm deuh pa kha a rawn lut a, an inzui chhuak ta nghal. Thawm chu a reh leh ta tlawk tlawk mai. 

Nancy rawn kal atanga darkar khat vel dawn a ni maithei. Kawngka chu a ri ta rak a. Dawhkanah ka mu nghal vat. Kha pa ngei mai kha a rawn lut ta zan zan a, ka lungphu chu a inthum rawn tluk tluk mai. Ka mutna zawnah a rawn ding ta chat a, nui huah huah chungin, "An kal ta, hun tha ber kan nei e" a ti a. A aw chu tar hur aw ka chan, a tenawm hlek hluak lutuk. 

"Mahse, lawkin a hmasa ber tur i ni sia, hmanhmawh lo ila" tiin ka thu chhuak a, a ban puam vel chu ka zût pah bawk. Ani tisa chakna hlira khat a ni tawh bawk a, ka thanga awh ka tumna chu a hrethiam miah lo niin a lang. Ka kawngah rawn vuan chatin a lamah min pawt hnai dáwrh, "A hmain ka lo hmu fo tawh che alawm, duhawmnu..Ephraime fanu meuh ka khawih thei tur hi ka thiante chuan hria se min ît teh ang chu" a ti sur sur a. A rukin ka ner nasa mai. Chutia inkuahtir pah chuan ka mutna lu lama syringe ka dah chu ka zuk la ru ta zàl zál a, chetsual palh ka hlauh êm avangin hmanhmawh khuk ruai ka tum lem bik lo. A hnungzàng chu ka ban dinglamin ka chul kual vel pah a. Ka nghawng leh ir bawr vel a rawn nul thuak thuak takah chuan chet a hun taah ngaiin ka sir lamah ka kuai àwn deuh a, a nghawngah chuan syringe chu ka vit tlum ta pàwk mai. A hamhaih avangin chet nachang a hre eih lo zui, a kawnga a silai zeh tát chu rang takin ka la ta vat a, ka tin nghal rap. Mahse, tin rei pawh a lo ngai lo. Ka damdawi chiuna kha a thawk rang a niang chu maw, a àwn riai riai a, a tlu tup mai. Ka bucket khaina hriam leh zum ver vawr chu la chhuakin , ka thawmhnaw pangngai ka inbel ta vat vat a. Silai pawh ka kawngah ka zep, silai hi chu a theih chen chenah pumpelh rih ka duh, ka thawm an hriat phah dawn si a. Fimkhur takin kawngka atang chuan ka chhuak ta a. Ka rin ang ngeiin lei hnuai a lo ni. Step thim ruih hi a lo inkham ruah a, thawm dim zetin ka chho ta zàl zál a. Êng a lo inchhi pheuh pheuh a, ka awm mekna lehlama tawng thawm pawh ka hre thei ta. Thir kawngka sang vak lo hi step tawpah chuan a lo awm ta a. A inkalh lo bawk a, awlsam takin ka chhuak thei ta. Mahse, chumi hnu lama step indawh chho chuan in chhung a han pawh dawn tih ka hrethiam. Awm ve dang an awm si a, engtin nge ka paltlang tak ang aw. Chutih nak alaiin in hnuai lam pana lo chhukthla thawm ka la hre zui! Ka hawi kual a, step bak han penbona tur pindan tepen dang reng reng a awm bawk si lo. Ka mangang lutuk chu ka tlan thla leh ta ringawt. Min khungna pindan piah lawka kawngkhar hlui fê lo awm lam chu ka pan ta a. A sak pawh a lo sak deuh, mahse, ka lut hman hram e. A chhung erawh min dahna pindan ang deuh tho kha a lo nia. Parcel a tam khawp mai. Chulai pindan zawk chu an sumdawnna bungrua an stock-na hmun a nih ka ring. In chung atanga rawn kal thlate kha ka rin loh deuhin min khungna pindan hnuaia step la awmah chuan an chhuk thla tlang ta daih a. Ka thaw huai mai. Ka awm lo tih an hriat chuan min zawng ngei dawn si a. Dimtêin ka chhuak chho leh ta a, a hmaa ka lo hmuh loh, ka pindan chung chiah dinglama corridor thui lotêah chuan ka peng zauh a, Chu corridor chuan balcony a va pawh ta hlauh mai. Mahse, thil buaithlak tak a awm. Balcony chu thirlen hmangin an hung phui vek. Lawn liamna chi lah a ni bawk si lo. Ka awm lo tih an hriat hma ngeia ka tlan chhuah a ngai. Duhthlan tur dang nei hek lo le, nunna thàpa risk ka lak a ngai. Min khungna pindanah bawk khan ka zuk chhuk leh a. A lo la muhil tui hle. A thawmhnaw chu ka phelh ta sawk sawk a, chung thawmhnaw chu ka ha ta a. Ka thawl deuh chu a ni. A mask chu ka vuah nghal a, lukhum ka khum nghal khap bawk. Min enchîktu tan chuan keimah ka ni tih hai rual a ni lo vang. Mahse, tuman min enchîk loh hram beisei tawp mai ang. In chunga ka chho leh tur chiah chu ka pindan hnuaia chhukte kha an rawn chhuak chho thut mai. Mahse, chak mangtarain ka theihna zawng zawng sawmkhawmin ka pen chho ta páwk páwk a. 

In chung ber luhna tur kawngkapui bulah ka ding ta ran mai. Pindan penhleh kha ka zawng ru nasa a, ka hmu bawk si lo. Rilrua tawngtai chunga kawngka hawn ka tum mek laiin ka pindan atang khan thawm a rawn chhuak ta tlat mai! Ka awm lo tih an hre ta. Min dang kawlawk tawh ngei dawna ka hriat avangin nichina balcony an hung phui tlat lamah chuan ka peng kawi ta zauh a. An rawn lan hma ngeia thirlen chu tihchhiat ka tum a ngai ta. Ka hmanraw neihchhun kha hriam viau mah se, thirlen han tihchhiatna chi ziazang a ni bawk si lo. Min rawn nanchin hun ka nghak ta tawp mai. Thirlen pawn lamah chuan êng pakhatmah ka hmu lo. Ramhnuaiah kan awm a ni mahna. Ka awmna lam pana rawn pen thlap thlap ka hriat chuan, "Lalpa, tualthah ka duh lo, kawng dang awmtir rawh" ka ti rilru a. A rawn chhuak ta luau mai. Min hmuh rual chuan kawng dang ka nei ta si lo va, ka hmanraw hriam zet chuan a hnute zawn awm velah chuan ka vit ta thawih a. A hmui ka hup nghal vat. Thisen chu a rawn chik thei nia! Ráp thei pawn ka mawi tawh lo. Midang rawn lan leh hma ngeiin duty niawm takin chak zetin stepah ka tlan chho a, kawngka chu inngaihtuah buai miah loin ka hawng ta. An lo buai nuai nuai tawh a, ka chetlak hun kha a fuh tih ka hre mai. Ka silai chu hum ranin keimah ngei chu ka inzawng ve ta. Kawngkapui, pawn lama chhuahna chu hawngin thim zingah chuan ka petek ta nawk nawk a. 

Mipa aw téng lam hian, "Kan zingah a awm. Hmanhmawh rawh u" a rawn ti tuar tuar a. Kei erawh in chu helin bikbona tur ka melh ran a, an ke pen thawm ka hriat tak avangin in piah lawka kawldai buk lian tak tak hnuaiah chuan ka bawk phék ta vat a. Ka awmna lam an rawn pan lo hlauh, ka hmazawna ka tlan an rin vang nge in hma lamah chuan a tam zawk chu an kal ta a. Ka lungphu a va thlawk chhuak teuh êm. Khur dar dar chungin ka birukna atang chuan ka bawkvak chhuak a, êng ka nei ve si lo. Thla lah chu a êng nêp em em bawk si. An thawm awm lohna lamah chuan thim zingah ka inpal phei ta buan buan a. Ramhnuai a ni chiang e, mahse khua a hlat ka ring vak lo. Hetia thim zinga kal ngawt ngawt ai chuan biru ila, kawl a en hunah mumal deuh zawkin kal ila ka ti rilru ta a. Changel nge balhla hmun niawm tak ka thlen chuan a hnah chuan ka inkhuh a, ka mu tawp mai. Ka chauin ka taksa nà lah a rawn nasa zual si a, ka chhungrilah ka khua a sik ser ser bawk. Arsi chu hla tak atangin an rawn de sep sep a, ka mittui a rawn tla. Ka pa ka ngai a, ka nu pawh. An fanu hi hetiang hian min rawn hmu se an rilru a va na dawn tehlul êm. Mahse, ka pa vanga ka tawrhna a nih chuan pawi ka ti lo. Misualte kut atangin him damin ka chhuak thei alawm le. Ka chhungte ka hmuh hunah emaw kan in ngeia ka let leh hunah khang misualho tawmbuk kha chinglet turin Amanda ka ngen khawp ang. 

Ka lo muhil daih a niang, ka harh chuan ka ke a lo mu churh churh a. Dai tlain min han tihuh chu vawt ka ti ta hle. Khua pawh a lo var tawh a, ni pawh kawl bulah a rawn lang dêt dêt mai. Pindanah ka awm ta lo tih ka hriat chuan ka khi sak a, Tunah chuan ka chhungte hnen ka thlen a ngai ta phawt. Ka awmna hmun tal hi hria ila a tha tur. Ka thlang lawk chu kawrte a lo nia. Ka tui a hal bawk a, ka zuk in khawlh khawlh a. Ka harh huai nghe nghe. Ka hmuh phak chin chu thing leh changel hmun an ni mai si. Ka pa thusawi ka la hriatreng chu ka rilruah a rawn lang ta a. "Ramhnuaiah kawng kan bo a nih chuan, ni chhuahna lam hawi emaw luikawr hnar lam hi zawh tawp ila, kan bo hlen lo nge nge zel" a tih kha. Lui hnar lam chu ka zawh chho ta tawp a, misualho khan min rawn nangching leh ang tih erawh ka hlau deuh. Ka kal rei hnu chuan ril pawh a tàm tan ta a. Pum a thîp vung vung mai. Ka pa avanga ka hriat tho, changel laimu chu ka kheh a, ka ei ta a. A phak deuh naa, chakna ka mamawh si. Zep thu a cheng lo, ka tetlai khan ramhnuaiah kan chetla nasa a, ka hlau vak lo. Sapui emaw rul emaw hmuh erawh ka hlau ve deuh. Luikawr pawh chu ka zawh rei ta viau, nakin deuhah chuan tui pawh a awm ta mang lo va. Lengkir ve deuh niawm tak, hulhar deuh si hi a lo awm ta tlat a. A helna ka han zawng a, ka hmu mai thei si lo. Lawnkai mai a ngaih hmel, ka han tum chhin a, ka lung rah ka rap pial pek a, ka tla thum dawt mai. Ka hnang deuh a. Mahse, ka inbengkang leh vat. A vawi hnih nan ka han tum leh a, tui a awm lo bawk a. Theihtawp chhuaha ka han tum ngar ngar takah chuan ka lawn chhuak thei ta mial e. Ka chau kher mai. Ka chhak deuhah thawm ka hre zui ta bawk nen, hah pawh sawi loin ka piah dinglama phaiphek hmunah chuan ka perkai a, ka thu tlum ta thàn mai. Khawpui nula, mi hausa fanu nisi ramhnuaia thil nung hming a van hria min lo ti maithei, ka pa hnung ka zui nasa thin ka tih tawh kha. Vawmbal te hi thenkhat tan mi kang na thei tak, min tihrehawm em em thei a nih laiin santen leh kawthalo tan a pil thatzia te ka hria a, kangthai leh thakpui te hi zun in tan te a thatzia te pawh ka hre ve vek a ni. Mahse, vawikhat ka nau Sangpuia ek chhuak, thakpui hnaha a mawng hru kha chu nuih pawh kan nuih ngam lo, a na ti lutuk ka nuin a lainat vanga a tahpui ve ngawt te kha aw..hmm, ka chhungte ka va hmu chak tak êm. 

Thawm lah chu a rawn ri hnai zel a. Mipa tawng thawm a niin ka hria. Ka zawn an rawn thlen chuan ka va melh táwk táwk a. Ka hriat ngai an ni lo. Hnathawh thawmhnaw an ha a, pakhat chuan lukhum parh a khum bawk. Va pawh tuma ka thawh dawn lai takin a chhak atangin mipa khat hian, "He lam kawng chu kan fang chhuak tawhin ka hria, a thlang khu lengkir a nia. Lui mawng lamah a kal a ni maithei" a rawn tih chuan ka thu leh rang ngei mai. Chu pa chu hnarngul kawm deuh kha a ni tlat! Hetiang lai thleng thlengin min lo zawng tawh a ni maw? Min hmuh chu an tum ruh hmel khawp mai. An pathum chuan an let leh ta dial a. Mahse, an thawm reh hnuah pawh darkar hnih dawn chu ka la thu ngat ngat. A rukin min lo chang khiau thei tlat. Ka che chhuak ve leh ta a, kawi ka pelh chiah chuan chul ram niawm tak thlaite pawh fere zet zet awmna ka pawh ta hlawl mai. Lawm tak ka ni. Kawng awm leh awm loah ka inhamtang chho a, thlam ka thlen dawn chuan thawm ka ngaichang leh tê tê a. A reh diak avangin ka pawh ngam chauh. Thlam lah chu a lo rawp tawh viau mai a, a neitute an kal khàt tawh a ni mahna. Mahse, tawm hulna ka nei ta pawh chu ka lawm viau. Eitur ka dap nghal a, engmah a awm lo. Chul chu ka fang ta ngawt a, maipawl leh bawkbawn tang rah bakah pangbal hnah zikno ka la ta ringawt a. Engtin tin emaw a ei ve theih ang chu maw. Ka vanneih asiamin ka kawr hak thlengpa khan a kekawr ipteah meitalh a lo ak khiah mai a. Ka tap lo chauh. Chung ka chawhmeh lakkhawmte chu bel ûng zetah ka chhum ta hlauh a. Chi tlem a lo awm ve a, zanin chauh na na na chu ka tamchhawl tur a dal ve ka beisei. Tlai ni tla tur chu thlam namthlak atang chuan ka thlir dauh dauh a, ka lung a lêng, ka inkhawngaih bawk. Chutianga ka riang leh ka mal lutuk chu. Ka ril a rawn tam ta a, vaua sava chiar nak nak thawm a reh fel ve deuh chiah bawk. Ka thil chhum chu ka thutpui ran a, ka ei chak hlawl lo. Mahse, ka intihchak a ngai si. 

Bawkbawn chu ka keih tan chiah ang.."Ehe! Tu nge le?" Tih paha thlam kawngka rawn hlam duai nen chuan kan inmelh dun ta reng a.