malsawmpeka 13

MALSAWMPEKA (13)

Ziaktu: Toni Râlte

Amanda chu ka melh káwk a, a fapa a ngaihtuahzia a hmelah a lang thei. Doctor chuan Mala chu a mit chu keusakin a endik a, Mala erawh chu a zawi hle. "A rawn harh tep tawhin ka ring." Doctor chuan a ti a. A chhuak nghal. Mala lo awmpui vetu chu AManda chuan melhin, "Nancy, i duh chuan i haw thei tawh ang. Hei Sangzuali a rawn kal tawh bawk a, chuan a lawmawm e" a ti a. Nancy ..hmm, nizana Mala hawnpui kha a ni chiah mai. A nupui hual ang khan a insawi lehnghal a, Mala hian min lo bum ru reng tihna em ni ang?mahse, amah Mala ka atang ngeia ka hria a nih loh chuan he nu hi ka rinzawng a ni mang tlat lo. Rilru chu a na ve deuhin tlawmthlak ru viau mah se, Mala harh hun ka nghak hram hram a niang chu. Amanda rawn thu bulah chuan,"Engtik atang nge tihian a awm tawh" ka ti a. 

"Doctor sawi dan chuan nizan lam vel atangin a niawm e. Mahse, chutia nikhaw hre lo khawp chuan a la awm chiah lo va. Vawiin chawhnua ka va biak pawh khan a tawng dan kha a dik tawk loin ka hrereng a, mahse, zu a in a niang ka ti mai a. Chuan, Nancy hian min rawn bia a, an research beih mekah Mala nen eng emaw buaipui tur an nei a niawm e . Mala inah va kalin tihian a va hmu ta mai a nih hmel. A mak khawp mai" a ti ta dap dap a. Hriatchhuah zawk ka nei, sawi chi a ni em ka hre lo va, mahse, Nancy ka rinhlelh êm vangin, "Nizana kan inbiak lai kha chuan Nancy nen hian an awmdun tawh sia" ka ti ta a. Nancy chu ka ngaihbel nge a thu ngil awt hian ka hria, Amanda pawh chuan mak tih hmel angreng deuh hian, "A ni maw? A dik em? Nancy" tiin Nancy a melh a. 

Rilru buai hmel zet hian,"Ni nang, nizanah ka chhuak lo hrim hrim" a lo ti niah niah a. 

"I kal kha kan inbiak lai pawn i lo tawng zuah zuah kha" ka lo ti si. Ka hmai zah peih vel tawh lo. 

"Midang an niang, Min hriatpawlh a nih ka ring, nizan chuan dar 11 velah ka mu tawh. Ka nuamsam vak lo nen" a ti leh a. Mahse, Amanda chuan a melh ngun kher mai. Dawt a sawi tih a hriatthiam ngei ka beisei. Nizana Nancy a awm tawh chuan amah Nancy hian a hrai rui angah ka ngai hmak. A awmdan te zik zek hi ka ei hlawl lo.. Nancy bulah bawk chuan,"Nih vawiinah chuan engtin nge i luh theih, chabi i kawl tihna mi?" Ka ti a. 

Hawisan deuh vah pah hian,"Aw kawl e. Ka duh hun hunah ka lut thei" a ti hmak a. Mala ka ngei ta riau, kei pawn chabi ka kawl loh laia he nu a lo kawltir bik chu. Kan va intlak nat hleih awm ve le. Mahse, ka inthup hram hram thung. Amanda chuan Nancy nen kan inkara boruak alh phat chu manthiam vatin, "A rawn harh hunah a chiang mai ang. " a ti ta ringawt a. Sawi tur a vang tawh khawp mai. Remruata a rawn lut a, Amanda nen an inbe hlut a, a mitmeng á ruai mai, chutia a lo fim ta kák chu hmuh nuam ka ti viau. Buai tawh lo se ka duh takzet a ni. Ka nuin min lo call a, Remruata bulah a ruk deuhin, "Lo chhuak miah suh aw..i hrethiam em" ka ti sar sar a. Nancy chu ka ring zo lo a ni tawp, engtin emaw Mala chu a khawih ka hlau. Ka hmuh vawikhatna atang khan mak deuh maiin hnambei lohna riau ka nei nghal a, ka thik vang chu a ni lul lo. Ka nu bulah chanchinte chu ka sawi ve siam siam a, a rawn harh hma chu kan hawn loh tur ka hrilh nghal bawk. Ani pawn min hnial lem lo. Pawna ka la din laiin Ruatsanga a rawn lang ve nghal var a, ani hi zawng a tlawmngai thei thin a nia. Ruatsanga chu a luh hmain, ka kai dawr dawr a. Mak a tih hmel hle. 

"Enteh, Nancy i hre ngai em? Mala thiante zingah" ka ti a. A ngawih dat hnuah, "Hre miah lo" a ti a. 

"Ngaihtuah rawh, i hria ang, hmu la chuan..hmelchhe vak lo a nia" ka ti leh a. A hawihai deuh, "Hre ta pawh ni ila, eng nge chu chu?" A ti hû a. 

Engkim chu thiam vak lo hian ka hrilh ta mawlh mawlh a, Nancy ka rinhlelh dante bakah Mala nupui hual anga a insawite chu..a chek hluk a. "Mala hian kan hriatpui lohin nupui hual a neih ring duh suh, tin, a bialnu hmasa ber i la ni" a ti ve nasa mai a. A thianpa ka dem chu a hlauh hmel kher mai. 

"Chu chu lawm, rawn harh vat se ka duh êm mai, mi tham lo vel lutuk saw ka ngei a nia" ka ti hmarh hmarh a. Cabinah chuan kan lut zui nghal. Ruatsanga'n Nancy a hmuh chuan a hriat ngai mi a ni lo tih a mitmeng atangin ka hre thei. Ka lo lawm ve ringawt. Amandain Nancy chu hawa va hahchawl tura a tih pawn," Rawn harh phawt teh se" a ti ve tlat mai a. Hnial tang tang kha nuam hek lo le. A thu ve ta reng a. Kan inbe thei der lo thung. Mala lah chu a mu chiah chiah reng bawk si,.a taksaah pem leh hliam vel engmah a nei lo chu lawmawm ka ti. Nge a kawchhung lam hi a lo khawih pawi viau mai a ngah. Chutiang chu thleng lo hram rawh se. Pa Sama pawh a rawn lang ve a, ka rin aiin ka pa thihna khan a vaw na a, Amanda ai mahin a tuar zawkin ka hria. A lawmawm lamah ngai ang. Ruatsanga nen pawh an inbe hlut a, midang vak an la hrilh hriat loh avangin Mala thian dangte chu an rawn lang rih lo. Nancy pawh chu a la thu ve ngal a, Mala lu vel chu a chul leh zauh zauh bawk. Dar 8 a ri dawn tih velah Mala chu a rawn che telh telh a, kan lo phu suau mai. A lu chu a thletawn sek a, engin emaw a mang lamah a tibuai a ni maithei. A nu chuan a ko mawlh mawlh reng a, Nancy pawn a ko ve char char bawk. Reivak loah Mala mit chu a phu dar rar a, fiah lo ruai hian a rawn meng ta mai a .Mahse, a chhing leh nghal daih.Pa Sama chu doctor ko turin a chhhak ta a. Mala chu a rawn meng leh diar diar a, a mitmeng chu a fim lem lo khawp mai. A nu chu a melh vung vung a, Amanda chuan, "I tha a nia aw. Engtinmah i awm lo vang" a ti sep a. Nancy lam a hawi leh a, a melh ta vung vung a. Nancy chuan lawm hmel tak hian, "Ka va lawm tak êm.i lo harh chu" tiin a biangah a chul a, kei chu min rawn melhin sawi duh nei hmel a puin ka hria. Mahse, tawng chu a la harsat hmel deuh chu a ni. Lo biak lumlam dan tur ka hre mang si lo. Ka buk khum nghat ringawt. Doctor leh Pa Sama an rawn inzui lut a, Doctor chuan Mala chu a han en tha leh a, "A taksa a la chak lo viau mai a. Drip khai ila, chuan hei hian jection bawk rawh. Damdawi chambang kha a that fai thei tawh ang" tiin nurse a melh a. Nurse chuan engmah sawi lem loin a tihtur chu a ti nghal mawlh mawlh. Drip a khaisak zawhah a chhuak leh nghal a. NAncy chuan, "Va hawnsan r'u, ka lo riahpui ang" a ti ham ham nia! 

"A ngai lo, keiman ka riahpui dawn" Ruatsanga'n a rawn ti hmiah. Boruak a reh ta duk mai. Amanda chuan, "Nia, Ruatsanga hi ka va ko a. Riahpui mai rawh se, Nancy, va hawnsan rawh. Sangzual, nangni pawh haw tawh r'u, vengkar a hla si" a ti mawlh mawlh a. Mala a rawn harh tawh tho bawk a hawn ka lo rilruk sa ve deuh reng reng bawk a. Amanda chuan kawngka thleng min thlah a, a bengbulah, "Saw nu saw ka ring lo a nia. Amah chauhin awmtir miah suh u" ka ti a. Ka sawi chhuak lo thei thlawt lo a ni. Ka thik vang a ni pakhat bawk ang chu. A bu ve nghat mai. Remruata nen chuan kan in lam kan pan zui ta nghal a. 

"Rwmruat, i dam loh lai khan i mumangah Zorampianga kha i hmu thin maw?" Ka ti a. Hmalam melh ranin,"Zantin deuhthaw mawle, a mak khawp mai. Amah khan alawm ka pa kha thah a nih thu sawi thin. Mumanga hmuh reng leh a sawi ngai a sawi ziah kha chuan rinloh ngawt kha a har ve êm a ni" a ti ta a. Mak ka ti viau mai, "A mak hle mai. Nia, dik tak chuan ka pa khan hmelma a nei ve nual sia, an accidentna phenah khan tu emaw chu a awm ve thei tho. Mahse, mitthi khinte chu hnehna chan a harsa si a, hetia a nih anga kan pawm thiam mai hi a ngai a nih hi. Hun a kal ang a, rilru pawh a dam chho ve mai ang, bakah ka pa kha thah a nih chuan thudik chuan rawn lan hun a nei em em ang" ka ti ve mawlh mawlh a. Ani erawh a ngawi leh tawh, a ngaihtuahna a kawm a ni mahna le. In kan thleng a, Amanda ka be nghal. Mala muthilh tawh thu leh an ni pawh hawn an tum mek thu a rawn sawi a. Kan dah nghal. Ka nu a lo la meng a, han sawi belh em em tur a awm lem lo. Mu turin ka inpuahchah zui a, naktukah dawr lama hun ka hman leh a ngai dawn si. Ka tuizawng a ni vak lo naa, ka pa avangin ka tui chawp ve thei mai dawnin ka hria. Ka pa ai awh zo lo mah ila; a duhthusam tihpuitlin hi ka duh ve hrim hrim. Ka mu a, msg pawimawh em em ka dawng lo bawk a, phone pawh ka khawih lo. Ka mutui phian mai. 

Zingkar atangin ka nu nen kan buai nghal a. Inbual hman ka duh bawk si nen, ka pui vak hman lo. Tukthuan kan ei laiin Sangpuia chuan an inneihna thil vel buaipuia Naomi nen an chhuah dun tur thu a sawi mawlh mawlh a, ka nu chuan, "An sawi hmangah an ni lam khan tihropui an tum viau mai a, keini lah in lo puklawk tawh vangin tih bûng bûng ang kha kan lo tum ve vak si lo va, an lungawi vak lo maithei a ni" a ti a. 

Sangpuia'n, "A ho mai mai, tihropui vak kha ka zah zawng tak a ni. Dan thianghlimte chu ni se thuhran. In tih ang ang khan ti ru, an mitmei veng suh u. Naomi nu hi lansarh duh ve chi, ropuina lam uar mi a ni ve a" a ti bawrh bawrh a. Ka nu chuan,"Leh ngawt zel a che. An lo hre reu reu ang e, an fanu neihchhunte a ni ve a, an neihin a tlinte chuan tiropui ve ang hmiang" a lo ti vat a. A lungdum loh zawk nupuia a neih a ngaih si avang hian ka nau mood hi a fuh hleithei thlawt lo a ni e. A thinte a chhiat bakah a huatthute hi a chhe ta riau a, kei chuan ka hrethiam viau. Mahse, hetia insawh insawh hi a hun chiah tawh lo, a lo thleng ngei ngei dawn tho sia. 

Vawiin chu bike ka keng a, ka khalh loh rei deuh vangin ka ngai ve deuh tawh a ni. Dawra ka chhoh hma khan Ruatsanga ka han bia a, Mala chu nizan a muhil kha a la harh loh thu a rawn sawi! Em em a na. Chu chen chen han muthilh mai chu. Dawra rawn kal hram a tum thu a sawi chuan, "Vawiin chu tikhan awmpui rawh. Kan buai vak lo ang. Chawlh hahdam pawh i mamawh" ka tih tlat avangin ka sawi chu a pawm ve ta ringawt. Dawr ka thlen chuan ka bike chu mipaho chuan an lo thlek dauh dauh mai, mawi an ti ve viau a nih ka ring. Inzirna hun atan vawiin chu ka hmang ang, ka rin aiin zir tur hi a lo tam a! Sawi leh sawi hnu ka tui loh lam zawng a nih avangin a harsa zual ve bawk a ni. Mimi tawng lang lang ri ka hriat rualin ka dawhkan lam pana pa pakhat, zahawm leh hleitling tak mai rawn phei chu ka va hmu nghal. Ka la hmuh ngai loh a nih bakah a hmel chu vantlang chunglam deuh nia ka hriat avangin ka lo en duh viau a ni maithei. Ka bul a rawn thlen chuan a nui sak a, "Hello, Sangzual, i dam em?" Tiin a kut a rawn phar va a. Hamhaih ru deuh chungin ka lo vawnsak ve nghal. Ka mitmeng buai deuh chu a hrethiam nge, "Nang chuan min hre kher lo ang. Kei erawh chuan ka hre nasa che. I pianlai pawh ka hria, i pa thianpa Rempuia ka ni e" a ti dam thlup a. A aw pawh ka pa angin a pa riau a, a che vel reng reng chu a felfai thlurh mai. 

" a ni maw? I va fel ve. Lo thu hahdam rawh" ka ti ve ta vat a. Theitui ka chah nghal bawk. A ke sei thlurh chu a khawkherh a, hahdam hmel zeta thuin, "I pa chu i ngai em?" Tiin min rawn en a. Ka bu nghat ringawt. 

"Ani pawn a ngai ngawt ang che. I pa fanu kha i ni ve miau si a" tih pahin a nui huah huah a. Theitui chu ka pe a. 

"Ka rawn kal chhan chu thildang daih a nia. I pain he company a din dawn khan share holder zinga pakhat ka ni a, a lo hetih tak siah chuan ka share rawn lak ka tum ta deuh a ni. Keimaha indan ve ka tum ta a ni" a ti ta a. Ka ngawi dat. Share holder zinga ka hriat loh awmchhun a nihna chuan rinhlelhna min siamsak lo thei lo. Ka chil ka lem khawlh a, "Ka pu, min lo hrethiam la, kan company-a share holder nei hi an vaiin 11 an ni a, ka mihriatte vek an ni. Nangmah hi ka hre miah lo che. I lo tel ve a nih pawhin midangte nen kan sawihoa lehkhate pawh siamfel a ngai dawn a, hun min lo pe la, kar tharah min lo ngaichàng leh mai ta che" ka ti ta a, ka insangmar nasa hle. Hetiang taka puithu leh puitlinga mi dang hmachhawn hi ka tan thil awlsam a ni lo. 

"Ka hria alawm, ka hrethiam che. I fimkhurna leh i pa ai i awh theih danah hian i pa pawh a lawm ve ngawt ang le. " a ti thluam a. Boruak uap churh pawh a zia ta huai huai e. Rei pawh awm loin kalna tur dang a neih thu sawiin min chhuahsan ta a. 

Ka sawi hmaih loh tur chu ka pa te chuanna prison van sutu Truck driver kha Police lamin an la nghal kha a nia. Mizo vai kan tih ang chi, a nu mizo a pa vai a ni a. Rinhlelhawm chu a ni hran lo, kawng kawia an han intawk thut an hamhaih kual kha an thunun zo ta lo a ni ber. Amah pawh khan a chalah hliam a tuar ve a, a mah zuitu a u fapa erawh a pang a him thung. Thil dik lo leh a phena awm engmah a awm lo nia a lan avangin Police lam pawn an chhuahtir a, pawisa erawh chawi tura tih a ni naa, ka nuin a laksak duh ta lo. An hausa tehchiam si lo va, ani pawisa tel lo khan kan tha thawkhat tho bawk nen, rilru a tina mai mai a tih avangin ka nu chuan a ngaidam ti mai ang, sawi zui tur awm tawh loin an inrem thei ta a ni. Mahse, midang zinga ka pa ber kherin nunna a chán bik kha chu a fair lo tia Pathian dem rum rum chang a awm lo thei lo. 

Tlaia ka hawng tur ka bike ka nawrsawn lai takin ka tum em em pawh ni loin Nancy kha ka va hmu hlawl mai. Mipa sa nghet tlet tlawt, hàng lam deuh nen an inkai dun rial mai a. Nancy chu a hlim hmelin a tawng siam siam bawk. Min hmu ve lo bawk a, ka thlir reng mai. A ma sawi danin a pasal hual natna khumah a mu a, tisawn thawveng takin a la tawng ham ham thei chu a ni sia. An kal liam hnuah damdawi in lam panin ka tlan zui ta nghal a. Ka va thlen chuan Ruatsanga a lo awm tawh lo. Amanda a lo thu ran a. Min hmuh chuan a lawm hmel hle. Mala pawh ka luh rual deuhthawin a lo harh ve a, ka va lawm tak. A la meng fiah vak lo naa, nizan ai kha chuan a zia deuh. 

"Nancy kha a lo kal leh em?" Ka ti a. 

"Kal nang, lo kal tawh lo mahse a pawi lo, ka ngaina thei hlek lo" Amanda chuan a ti a.

"Chuan, Hrai ruitu chu rinhlelh te i nei tawh em?" Ka ti a. Mala chu a rawn hawi à pheu mai. 

"Hei a rawn harh ve leh chiah sia, han rinhlelh pawh ka nei lo. Vawiinah a inah chuan ka va kal a, a zu no pawh exam turin ka la nghal e. Kutze thla a awm bawk a" a ti malh malh a. Mala chu tui kan intir a, a chauh hmel takzet a ni. Doctor a rawn lut a, Mala harh a hmuh chuan, "I mu rei hle mai. I zia zel mai ang" a ti luam a. Mala chuan a chhang lo. A awmdan chu mak a tih hmel tawp, a hrethiam lo niin ka hria. Doctor chu a chhuak leh vut a, 4 mins hnu velah nurse rawn lutin syringe a rawn hum a, Amanda chuan, "I Jection leh dawn mi!" A lo ti a. Nurse chu a bu nghat. Mala banbul a tin mek laiin Amanda chuan, "Lawkin, min lo hrethiam lawk teh, nizan pawh khan kha tho khan in jection tawh a, nileng deuhthawin a harh loh phah a. A chau reng tho bawk si, eng damdawi nge ni reng reng a?" Nelawm vak lo hian a ti a. Nurse chuan,"a kawchhunga damdawi la cham bang thahna a nih bakah mut duhna a tel bawk a" a ti ve mai a. 

"Min hrethiam la, tun tum chu jection rih lo mai teh. Ka ngaih a tha lo tlat" Amanda chuan a ti hmiah mai. Nurse chuan, "Mahse, ka pi, doctor thu anga kan chiu a ngai alawm" a ti ve tlat si. 

"Zirchianna ka nei phawt ang. Doctor bulah i chiu thu i sawi dawn nia. Kan sawi miah lo vang" Amanda chuan a ti khauh fun bawk. Nurse chu a phun niah niah a, Amanda chu a che zawk a, syringe chu va laksakin bang kilah a va kap ruak ta vek a. Nurse pawh a hamhaih nge engmah a sawi bik lo. 

"Tikhan kan inrem em? Ka fapa hi biak ka duh a, zawh duh ka nei. A muthilh reng avangin hma pawh ka lak theih loh hi" a ti hriam hraih a. Nurse chu a chhuak zuu nghal. Ka bula rawn thut leh pahin, "Ka chhungrilah dik lo eng emaw a awm tlat a tin ni. Ka fapa hi harhfim lo se duhtu an awma hriatna ka nei " a ti nghat a. Kan rilru a inang chiah mai , ka sawi ve kher lo pawh a. 

Mala chuan ngawi rengin min lo melh reng a. Amanda chuan a kut va vawnsakin, "Mala, i thil hriat hnuhnunber eng nge?" A ti ta a. 

Ceiling a melh vang vang a, a heh a liak zauh bawk. A ngaihtuah nasat hmel kher mai. Chutah a aw thianin, "Nancy kuta zungbun ka buntir lai" a ti ta hlawl mai a. Ka lungphu a rang duh ngei mai. Ka lo ngaichàng uluk kher mai. 

"Eng zungbun nge?" A nu chuan a ti leh a. 

"Inhualna" a ti sup a. Ka lo chhing sawk. 

"Tihluihnain em ni?" A nu chuan a ti leh a. 

"Mumang ang mai a ni. Engmah a fiah lo. " a ti ringawt. 

"Niminah khan i chhuak lo tiraw? Inah i awm tiraw?" Amanda chuan a ti leh a. Mala chuan a nin tawh hmel hle, mahse, "Aw, ka rui alawm. Rui tak ka ni" a ti nghut a. 

"Chuan, Nancy chu i bulah a awm ve zel em ni?" Tiin a zawt leh a. 

"Aw zanah nen.." Mala aw pawh a fiah chho ta deuh. Amanda nen chuan kan inmelh ralh ralh a, Nancy chu kan rinhlelh ang tak kha a lo nih chu. Mahse, engvangin nge chutiang chuan a chet theih? Eng nge a chhan ni ta ang? Mala chu a ngaizawng ve tihna em ni? Ka buai tulh tulh mai. Mala chu a la chauh êm vangin a muhil leh a, zawite hian, "Nancy hi a hmain i hre tawh ngai em?" Ka ti a. 

Amanda chuan,"Hre tawh e. Mala ngeiin min hmelhriattir tawh alawm. A thiannu a nih thu leh Ph. D scholar a nih ve tho thu a sawi, a bak an inkarah a awmin ka hre lo" a ti ve mai a. Kei pawn a sawi chu ka ring. Mala'n Nancy lakah khatiang rilru kha a put ka ring lo, amah Mala ka va rin em em vang pawh ni loin. Kei ngei pawh min rawn hrilh thlap a nih kha. Nimin lama a reh nilen chhan pawh Nancy'n a la hrai ruih zel vangin midang han be thei chi ziazang a ni lo a ni. Nancy mai mai chu aw. Ka la awm mek laiin hmeichhe pahnih an rawn lut ve a, Amanda chuan Rinpuii leh Lapuii an nih thu sawiin kei pawh chu ka hming a sawi a. Rinpuii chu Mala an dembel ve thin kha a ni. Ka hmuh tum ang em ema hmeltha a ni lo. A ngo hle tih mai a ni. Mahse, Nancy ai chuan a fel hmel zawk, a tawng siam siam a, Lapuii pawh a fel viau. Kei chu ka nuin min ngaihtuah leh viau palh ang tih hlauin hawn lam ka hnaih ta a, Mala chu ka va thlek leh hram. A mutui suk suk hle. 

Remruata leh Chhanhimi te ka la hmu zui. Dawr pakhat atangin an lo chhuak ve mek a, eitur an khai nual bawk. Chhani chu a hawi valh valh mai a, a hmel hi zawng a tha a ni. Mahse, Makimi sawi kha thudik a nih chuan ka nau hi then tura tih vat a ngai a ni, a tal àwk ang tih a hlauhawm tlat. A nghet nasa mai si a, Chhani hian a hmang tangkai mai mai ang tih ka hlau. Sex te an lo hman ve hlauh chuan ka nu rilru a na dawn êm mai. In ka thlen chuan ka rin loh deuhin Police pahnih an lo thu run mai a. Sangpuia pawh a lo haw tawh. 

"Ti nge a?" ka nu bulah ka ti a. 

"Kan in an rawn dap a nih hi, i pa kha kan thukru emaw an tia" a ti ta mai a! Ka phu zawk mai. Police te melh kualin, "Inva ti ang lo em em ve a, min hmusit zawk a mi? Ka pa chu kan vui liam tawh. Engvangin nge kan thuhruk ang a?" Ka ti ta hrep mai a. Ka zah duh bik lo. Ka nu chuan mitmeiin insûm turin min ti naa, ka thinrim lutuk tlat. Mahni lo maha ka pa kan chán hrehawm tih tawh nak alaiin. Police pakhat zawk chuan, "Inbengdai rawh, thupek kan hmuh angin kan che mai zawk a ni. I pa kha in thukru kan ti reng reng lo, kan hotuten eng emaw fel lo a awm nia hriain endik turin min rawn tir a ni" a ti ve luam a. Ka thinrim tur angin ka thin a rim tawh tho. 

"Thi tawh na na na kan thukru lul lo vang. A death certificate in en duh em? In hotute chu lo hrilh rawh u, vawikhatmah hetiang hian chet la tawh suh u" ka ti ta phiar phiar a. Sangpuia pawh a lo rum ve ngal ngal mai a, Police te chuan chhuahsan ta a. Tu nge lungawi ang, khatiangah te le. Mood chhe zetin ka inbual fai a, ka mittui a rawn tla thei hial! Ka pa ka ngai lutuk a ni. A awm tawh loh hnuah pawh tikhawp hian an la buaipui chu a ni sia! Ka lung hi a awi thei thlawt lo a ni. Zanriah pawh ei loh mai ka tum zet a, ka nuin min ngen nasat êm vangin ka kil ve hram. Sangpuia chuan kan boruak hrethiam takin vawiin lama an chhuah dunna vel a sawi luam a. Naomi te chu rin ang ngeiin tihropui an tum hle a lo nia. 

"vawiin kan chawlhnaah pawh kan inhnial hrep a, keiin khatiang bûng bûng kha ka duh si lo va, ka zak bawk nen, an ni lam erawh ruaitheh nen sawm tam pawh an lo tum nasa mai a. " a ti bawrh bawrh a. Ka nu chuan,"Inhnial nana hman kher a ngai hleinem, tlin lo pawh kan ni lo va, kan tiropui ve a nga a ni mai lawm. Buai mah ta che u" a ti dam thlap a. Kan sawi zui ta lo. Remruata chu melhin, "Chhanhimi hi i hrechiang em?" Ka ti ta a. Naute bialnu vela inrawlh hi ka duh miah lo naa, Chhani chu ka iai ve a ni ber ang chu. 

"Hrechiang ve tho e, ti nge?" A lo ti hû a. 

"An sawi dan hi a dik em? Officer hmei an tia, in lo mu dun tawh lo maw?" Ka ti tháwr a. 

A nui a, "La mu dun nang. Ka duh hleinem, U Sangpuia ang hian ka talbuai ve palh ang" a ti fiamthu a. Sangpuia pawh a nui ve ringawt. 

"A tha e, a sawm che a nih pawhin mutpui hlek suh ang che" ka ti leh a. 

"Mi hian an sawi duh ve mai mai alawm, an sawi ang tak tak a ni lo ang. A fel asin" a ti ve hram hram a. A bialnu thlavang hauh chu a tina ve reuh zêk mai. Ka hnial zui duh ta rih lo. Ka intihfel zawhah ka nu bulah Pu Rempuia lo kal thu leh a thil sawite chu ka hrilh a, a ngawi vang vang a. "Rempuia chu ka hria alawm. Englaimahin i pa thian a ni ngai lo. I pa vehthlema a chetchhiatna chang ran thin a ni. Mahse, i pa thluak leh thiltihtheihna kha pha ve mawlh hek lo, a boral pawh hi a lawm viau ang. Min hrilh vat chu a lawmawm e. Kan company-ah share engmah a nei lo" a ti ta mawlh mawlh a. Ka rin ruksa mah nise, a hmel landan zawng zawng nen a inhmeh tehchiam lo hle mai. Bakah chutia awlsam taka min bum theih a ring pawh chu a timak ve reng reng, khatiang thil pui thamah te ka lo rin nghal mai a ring a ni teh chêk ang chu. Mi bum i khaw lo vang e. 

Amanda nen kan inbia a, "zanin chu keiman ka riahpui dawn a. Lo ngaihtuah suh" a rawn tih chuan ka thaw huai mai. 

"Tunah eng nge a an tawh?" Ka ti a. 

"Chaw tlem a ei ve a, a lawmawm tak tak. Tunah chuan a harh ve a, mahse, a thil tawnin a la nghawng deuh nge ka la be tawng zo rih lo" a ti mial mial a. 

"Nancy a rawn kal leh em" ka tih chuan kal loh thu a sawi. A remchang ka tih em vangin police ho rawn kal thu leh an thil rawn tih dan ka sawi a, a ngawih dat hnuah, "Ka hriatpui ve miah lohin thil an kalpui leh nih pek chu! Engmah ka hre lo, an fimkhur hle a niang" a ti a. A hriatpui kha ka ring vak lo reng a. Hria se ka nu emaw kei emaw min hrilh tawh ang. 

"Eng ang ngaihdan nge maw ni ngai le ka ti. Tu idea tak ni ang maw" ka ti hluai a. 

"Sawrkar lam atanga nawrna a ni maithei. I pate accident pawh khan sawi kha a awm tawh hrim hrim a. An rawn dikdak ngam tawhin ka ring lo." A ti ve mai a. Ka thin a rim tawh em em lo bawk a, ka sawi zui duh tawh lem lo. Mala ka ngaihtuah a, bul kan tanna a la rei loh nen , romantic tawk pawn kan la awm ve thei lo chu a nia. Nancy hian ka rilru chu a tibuai em em hran miah lo nia! A chhan chu Nancy hrai ruih a nih chuan tihluihna hmangin zungbun kha a inbuntir a nih ka ring. Mala duhthlanna tel miau loh chuan ka rilru a na em em lo. Amanda khan Nancy chu man mai a rilruk kha a nia, mahse, amah Mala rawn harhchiang phawt se a duh avangin chet a la leh ta rih lo kha a nia. 

Rogera msg ka dawng ve nawlh. Kan inbe lo rei deuh a, a mak ve deuh. 

"I bialpa chu naktukah i va kan ang aw" tih a ni. 

"I rawn haw tawh mi?" Ka ti vat a. 

"Tlaiah khan ka rawn thleng chiah. Ka awm loh hlanin kan Malsawmpeka lah dinhmun hlauhawmah a lo ding bawk si" a rawn ti duah a. 

"Hluteii sawm ve ila" ka va ti zauh a. 

"Sawm chiang e. Ruatsanga leh Ruatdiki te pawh an rawn tel thei dawn e" a rawn ti a. A nuam dawn e. Thiante nena inhmuhkhawm hrim hrim hi thil nuam lo a ni hran lo. A hranpaa inhmuh a harsa thin si. Zingkarah an vawk ngêk nghek nghek avangin ka harh hma phah. Phun hluk chungin ka tho a, ka nu a rawn lut ve chiah. 

"Ngati chiam chiam nge?" Ka lo ti hlar a. 

"Vawk hriin a rawn nang ve ta tlat mai. Pahnih chu kan vawhlum ta mai. A pawi tak tak a ni" a ti a, a hmel atang pawn pawi a ti tak tak tih a lang. Ka khawngaih ta deuh a, "A va zia lo ve. Chuan a dangho an la him rih mi?" Ka ti ve thluam a. 

"Aw..pathum kan khung hrang a, a dang khu chu an him hram beisei ang" a ti ve mai a. Ka intifai zui nghal. Tukthuan ka ei sawk sawk a, nidang aia hmain ka chhuak. A chhan pawh vawiinah phai atangin mikhual kan neih dawn vang a ni, ka ha ka nawh lai khan ka hrechhuak chiah! Thlen hmaa engkim a nih dan tur anga lo buatsaih thlap ka duh a tin ni. Ruatsanga pawh a rawn kal thei tawh dawn a, ani a awm loh hi chuan ka phur a rit zual tlat zel. Ka thleng a, hnathawkte pawh an hna ngai an lo thawk leh mawlh mawlh a. An vai chuan ka ko khawm a, mikhual kan neih tur thu leh engkim peihfel ngai chu ang chu lo peihfela ka dawhkana rawn dah turin ka ti ta zung zung a. An bu nghat nghat hlawm mai. Mimi pawh a rawn nalh leh viau. Ka rin aiin phai lam mikhualte chu an rawn thleng hma. Mahse, kan lo inpeih fel hman tho. Guest room lamah kan inzui lut a, Ruatsanga leh Mimj te an rawn tel ve bawk. Inbiakna te chu kan han nei chho a, sumdawnna huang zauhna lam a nih avangin kei chuan idea ka nei tha lutuk lo, Ruatsanga leh Mimite an tangkai kher mai. Mikhualte pawh chu lungawi takin an chhuak ta a. Ka pa puihna tel miah loin sumdawnna huang kan zauh thei chu ka hlim veng veng nia. Khawvela kan chen chhung chuan sum hi a hluin ngaihpawimawh loh theih loh a ni si a, kan phak ang tawka kan thawhchhuah ve zel hi a tul tlat a ni. Kan inhnawhpuar zawhah reivaklo ka thu hahdam a. Mala kan turin Roger ten min lo sawm a, Ruatsanga'n Ruatdiki a va hruai bawk. Hluteii nen chuan kan inbe hlut mai, Roger nen an inhmeh lutuk chu ka thik lek lek zawk e a. An lianin an hmeltha dun sia aw. Mahse, Mala nen kan inhmeg ve tho. Kan va thlen chuan Pa Sama zawk a lo awm a, Amanda chu a haw lawk thu leh vawiin lama inlakchhuah an inbeisei thu a lo sawi mawlh mawlh a. Mala chu ka rin aiin a harh tha. 

A mitmeng pawh a fim ta kák mai. Roger chuan, "Ka awm loh hlanin i lo thi tep a ni maw?" A ti hlut a. 

"Ekhai! Nupui hualte ka lo nei vel mawle" fiamthu tih hriat zet hian Mala chuan a lo ti ve a. Chutia Nancy chungchang a fiamthupui chuan min tilawm viau. Engah vak a ngai lo tih ka hriat phah alawm. 

"I bialnu Nancy chuan a rawn hmu leh che em?" Ka ti nghat a. 

"Tunah chuan Police te hmaah a insawifiah mek ang" a ti ta mai a. 

"Ehe! An man elo?" Ka ti vat a. 

"ka nu ngeiin a man mawle, min enkawltu Doctor kha Nancy patea a lo ni reng alawm. Eng nge ka lakah an duh erawh ka hre lo" a ti ta mawlh mawlh a. Mak ka tiin, ka bangbo khawp mai. Mala a duh vang ringawt chuan chutianga a chet chu ka ring em em si lo. Nge Nancy hi a á deuh mawni dawn ni. Nancy ringawt buaipui chu hun a uiawm ka ti a, thiante nen chuan thil dang kan sawi ta a. 

Ruatdiki melhin, "Innei tawh ru, Pa Tluanga a khawngaihthlak. Naute nei ula ,a khawhar pawh a zia vat mai ang" ka ti ta phawng a. Ruatdiki a lai ngei mai, Ruatsanga pawh chuan,"Kei pawh ka lo ngaihtuah thin asin. Ka pa hi a khawhar ruk ruk thin êm a, ka u leh naute lah hian an ngaihsak der si lo" a lo ti ve a. A thutak viau bawk. 

"Aa..U Sangzuali te hi innei phawt rawh se" Ruatdiki chuan a ti a. Ka nui dar dar mai. Mala uang lah chuan,"I U Sangzuali hi chu nula senior tur a nia, bakah ka neih ngam pawh ka ring lo. A kawlh si" a lo ti. Rogera melhin, "Tak taka ana Roger te hi an hmasa khut maithei a ni. Pa Zirsanga te nupa reng saw tu an awt em mai, Roger pawh a tang rei thei lo vang" a ti leh a, Roger chuan, "Inneih mai pawh ka hnial lo. Mahse, fanu leh fapa mal ve ve kan ni hi Nu Arini te nupa khuan an la ui ve lutuk a" a ti nuah nuah a. A dik ang, Nu Arini phei hi chuan Hluteii hi a atchilh a ni deuh ber, a la upa hran lo bawk nen, pasal neihtir ringawt chu a remtih mai ka ring lo. 

Chutia kan titi mam mam lai chuan Amandate nupa an rawn lut a. Rogera'n chanchin a lo zawt vat. 

"Nancy sawn a tleirawl chhuah atangin Mala hi a lo atchilh tawh a niawm e. Amah vang liau liauin Ph. D te pawh a zir ve leh niaawm tak a ni. A nu leh pate hi chu Pune-ah an awm daih a, a patea bulah a rawn khawsa a. An awmthei thawkhat bawk. Remchang a chuh ve ngar ngar a, rilru fim pawh a hmang thei tawh lo a ni maithei. Khatiang ngaihdan kha a movie en atanga a neih a nia, Mala chu hrai ruiha inhualna neihpui a tum ta a ni. Tichuan, videoin a cover vek a, Mala te ang mipa rilru nghet chuan a hnawl leh mai mai a ring lo a niawm e. Damdawi inah a patea'n Mala chu a lo hrai ve zel bawk a, Mala rilru fimsa kha tihnut belh zela video kha tidarhin keini nupa pawn inneih lam kan hawi theih an lo beisei a nih hmel..mahse, an inpuanna phenah thil dang a la awm maithei bawk. Hmangaihna hmachhuana khatianga chetna kha chu a tak ramah thil awm theiah ka ngai vak lo. Kan la hre chho zel ang chu" a ti ta mawlh mawlh a. Kan ngawi thap mai. 

Ruatsanga'n, "Nancy pawh chu a lainatawm zawk a nih chu a. Pawisak a nei lo hle mai" a lo ti sup a. Ni e, hmangaihnaah chuan mi pathum an tel ve a rem si lo va, tuartu zawk an awm a ngai miau mai si. 

Mala chuan,"A chetdan , min biak dan hrim hrimah hmeichhe dang hi chu a ang lo alawm. Ka chetzia hian ka hnar zel zawk a, nia a lainatawm angreng zawk" a lo ti ve a. Ka tan chuan sawi tur a vang duh khawp mai. In lama inenkawl chhunzawm turin chumi tlai chuan an in la chhuak ta a, Amanda te in lamah zawk an phei rih. Amaha awm chi ni nghal lo chuan. A tuk Inrinni tlaiah chaw eikhawm an rawt bawk a, kei pawh ka kal ve leh a ngaih hmel. 

Thawveng takin in lam ka pan a, ka zai play chu ka sakpui ve vak vak. Tuman min hmu lem lo bawk a, a auin ka au a ni mai e. In ka thleng a, garage-ah ka tlan lut nghal. Ka nu hian min rawn hmuak var zel sia, vawiin tlai chu a reh tlat. In chhunga ka luh chuan tumah an lo awm lo! A va reh e ti rilru chungin ka roomah ka lut a, towel ka bih a, inbual nghal mai ka tum deuh. Mahse, ka thulh leh, engkim chu a dik lo tihna riau ka nei. Ka haw thawm kha ka nuin a hre ngei tur a ni sia, ti nge a rawn lan miah loh le. Ka va chhuak leh a, chokaah ka phei. Eirawngbawl sa a lo awm thlap a,. A reh dan em em chuan ka ngaih a titha hlawl lo. Zawi muangin in chung ka pan a, ka thawm ka dim ve ringawt. In chung pawh chu a lo ruak hiai a, ka nu auh tuma ka an lai takin ka pa private room kawngka chu a rawn inhawng a, thawmhnaw dum veka inthuam, hmai tuam leh silai keng hi a rawn chhuak ta a. Ka ding cháwih..min rawn pan mek laiin ka nu aw hian ring zetin, "Sangzual, tlanchhe rawh" a rawn ti tuar a. Ka inher tur chiah chu ka tukhum a ri dup a, a thim ta vek mai le..