malsawmpeka 9

MALSAWMPEKA (9)

Ziaktu: Toni Râlte

Biakdiki khan min lo bum nge? An vau zawk ni ang le? Pasal a nei reng sia, ti nge dawt muhlum kha a sawi ang le? Kan lo inkawm ve tawh thin tih hria an awm a, an tawktarh a ni ngei ang. Thudik chu eng nge tih ka hre chhuak thei ngai dawn lo a ni mahna le. Ka ngaihtuah zui peih lo. Biakdiki erawh ka rilru chhungril takin ka lainat tho mai, hmanrua pawh lo ni se; kei min huat vang leh min tihchhiat vek a duh vang chu a ni miah lo ang. Ti lo thei lo tura nawrna a hmachhawn a nih ka ring. 

Thleng ka sil mek laiin Rogera a rawn lang thut. Ka pa nen an inkawm a, Ruatsanga te in lama kalpuiah min rawn sawm a lo nia. Kal ve ngei chu a tha. Ka insiam nghal zung zung a, inchei vur si loin ka inthuam. Kan chhuak zui ta nghal a, Kan tlan mek laiin a phone a ri a. A chek hluk a, a hmet hlum daih. A rawn call leh a, ka lo melh ran mai. Hmeh hlum leh a tum lai chuan "La rawh" ka ti sap a. A la lo ngam lo nge ni a pick up ta a. Speaker ka on tir bawk si. 

Hmeichhe aw sin lam hian, "Khaw nge i awm?" a rawn ti a. 

"Eng atan nge i tih?" a ti hmuk. 

"I lo kal dawn lo em ni?" a rawn ti zangkhai vah a. 

"Dawn lo, khawhar inah ka kal dawn" a ti chang leh rút. 

"I la thinrim reng em ni a? EM em a" a rawn ti nghat a. 

"Thinrimna chhan tur ka nei hleinem. Ka dah rih aw" tiin a off zui ta a, ka ngaihbel nge a hmel a pha dui mai. 

"wow" ka ti ringawt a. 

"I ngaihdan ang kha a ni lo" hmalam melh chungin a ti a.

"ngaihdan ka nei hleinem" ka ti nghat. 

"I nei alawm, i mitmeng kha" a ti dam thluam a.

"kei hi hmanrua ka lo ni ve tihna mi!" ka ti a. Dik tak chuan kawp nihte phatsan nihte hi a tlawmthlak ka ti êm a, ka duh lo bur. 

"Hmanrua i ni hauh lo. Kha hmeichhia kha ka ex hnuhnung ber a nih kha, ka kalsan tawh" a ti nghut a. 

"Kan hre zel ang chu" ka ti a. Inhnial ka peih lo, bakah thikthu chhe deuh anga lan ka duh lo, amah ka va duh huam angah a ngai palh ang. Min lo kawp a nih erawh chuan ka lawm lo viau thung ang. Ruatsanga te in kan thlen chuan an lo tam tawh viau, an veng thalaite hi an tlawmngaih bakah Ruatsanga te hi an lo challang ve bawk a, lenpuitu an ngah thei viau. Ka sawi duh pakhat chu hman kan pian ve hma lamah khan YMA , Young Mizo Association tih hi a ding thin a, an ni hian thalai atanga pa la upa lo deuhte thlenga khaikhawmin chhiatni thatniah inkaihhruaina dan fel tak an zam a. Mizorama pawl lian ber an ni bawk. MAhse, Politics a inrawlh nasat bakah central YMA hruaitu thenkhat te chetdan chuan mipui mit an tlung tawk lo va, duhkhawp lohna a lian chho ta viau a. Ramri chungchangah te, Sawrkar thiltih dik loh chungchangah te aw an chhuah ngam loh piah lamah a hruaitute pawh a ruka inhnamhnawih an nih tak furah chuan pawl ding lai chu thiah niin, Mizo Thalai Pawl rawn dingin an ni hi chuan huaisen takin thil dik lo an dodal a, ruihhlo leh a kaihhnawih pawh thenfai hna chak taka thawk zelin tun thlengin an la ding ta chu a ni. Ruihhlo a bikin damdawi an do nasa a, thalai tam tak bakah chhungkua thlenga a nghawng pawi bik êm avangin a thim a var thlu loin an do a, an do rem titih chu a nih hi. Kan ram siamchhuah ni lo, ram dang atanga kan lakluh thil tha lo hi chu do rem dan a awm ve a, mipui supportna erawh an mamawh khawp mai. Zu erawh sawi tawh ang khan zawrh chhuah a ni ta chu a nih hi. 

Ruatsanga'n min lo dawngsawng vat a, in chhungah kan lut ve nghal. Mala ka hmu lo, ti nge maw ka lo zawn ruk dáw dáw zel ni. Zai pawh a nuam leh hle. Chhungkaw aiawha rawn ding Nu Zoi pu Pu Valtea chuan hetiang hian a tunu vanduai tak natna chu a rawn sawi ta a. A vui nia Pa Tluanga ding kha chuan an zuk inenkawl dan leh a thih dan velte chauh kha a sawi a, a natna tak pawh a sawi lo a ni. 

Pu Valtea chuan,"Kei hi thenkhat chuan min hre tawh maithei a. Zochhingpuii nu nau hi ka ni a. Zoi hi a tetlai chhung zawng ka bula khawsa a ni. Ramhnuaiah Villa kan nei a, chutah chuan ka nu leh pa leh Zoi te nen hian reitak kan khawsa a, Zoi a pianhlim khan a nu Ka u Hlupuii hian khatih laia an pawl mi leh sa ten an rawn lak mai hlauin tlanbopui nghal turin min ngen a, Zoi pian zan la lain Ramhnuaiah kan tlan chhe ta a ni. Kan in pawh halral vek a ni a, mi zawng zawngin kan chhungkua chu kan mang thak angah ngaiin kan dam an ring tawh lo rêng a. Keini erawh Zoi pian hmain a rukin ramhnuaiah kan mamawh tur thil tam tak kan lo thiar lut tawh a, tichuan kan palitê chuan kan khawsa ve ta rek rek a. Zoi a rawn tleirawl chhuah khan Villaa kan khawsa bik chu mak a ti fò thin. Khawpui hmuh ve a chak a, mihring dang hmuh ve kha a thlahlel ngawih ngawih thin a ni. Tichuan, hun a kal a, Zoi rawn lak tumtu pawl tenawm takte khan a rukin min la zawng reng a, kan thih tak tak kha an ring lo a ni mahna. Ka u Hlupuii pawh a hmelhmai thlakin an pawl mi leh sa zinga an chhawr rim ber a ni ta a. Misualte chuan ka nu leh pate chu min thahsakin Zoi nen chauh kan awm ta. Kan him ta lo tih ka hriatin Aizawl khawpuia awmhmun bengbel ve turin kan rawn chuang chhuak ta a. Buaina tam tak kan tawk putu thin. Hlupuii'n min rawn zawng chhuakin an nufa chu an han inhrechhuak ta a. Thil tam tak a thleng ti tawh mai ang. Tichuan, khang pawl mak takte khan ka tunu chu ru chhuak lehin mizoram awmbet tura chher hriam an tum ta a. Ka tuna thisenah virus an kahluh avangin ramsa hlauhawm tak angah a chang thin. Hei hi mak intiin awih harsa pawh in ti ang. Mahse, a dik miau si a. A tawi zawngin chu pawl chu Hlupuii leh a thuihruai ten tichhiain an pawl mi leh sate pawh jailah khung an ni ta hlawm a. Zoi leh a nu leh pate chu Villaah an let leh ta a ni. ZCP a rawn ding a, Zoi chuan a thawhpui ta a, an tangkaipui hle nghe nghe. zCP hotupa Pu Ephraime khan Zoi damdawi pawh a chahsak ta a, mahse, dam hlenna ni loin a chhawkna ringawt bak an la hmuchhuak si lo. Tluanga nen intawngin an innei a, fapa duhawm tak tak pathum an nei a. Mahse, a natna khan a kiansan tak tak thei si lo va, an chhungkua khan harsatna tam tak an tawk thin. A fapa upa ber Ramropuia doctor zir chhan pawh hi a nu vang a ni. Mahse, hei a chhanchhuak hman ta lo chu a nia. Heng thu ka han sawi duah chhan chu Zochhingpuii kha misual a ni lo va, a duh vang ni miah lo va khatia natna rapthlak tak a nei kha a vanduai takzet a ni. A beidawngin thih te pawh a tum hial thin. Keini tan erawh vantirhkoh ang mai a ni reng tawh dawn a, a damlaia inpawisawina a lo nei emaw in rilru a lo hliam a nih chuan lo ngaidam hram teh u. Ani zawng thlamuang takin a chawl ta a, a kalsan tak a pasal fanaute hi khawngaihin in tawngtainaah in lo hre ve reng dawn nia" tiin. Kan ngaithla uluk hlawm kher mai. Nu Zoi chu aw ka va lainat lehzual êm. Nui var var chunga, "Sangbawih, Ramropuia nen hian innei teh u, ka mo niawm tak i ni" a tih laite kha ka mitthlaah a rawn lang uar uar a, vengte a lo inhlatin mi kan lo buai tawh nen, intlawhpawh rengte a lo harsa a. A damlaia ka lo hmu leh hram lo kha pawi ka ti ngei mai. 

Nizan lam tlaivarte a ni bawk a, kan bang har lem lo e. Ruatsanga'n min lo thlah a, "I bike i khalh leh thei tawh dawn a, i lawm awm" a ti sup a. 

"tak tak em? Ka pain a sawi mi?" ka lo ti hú. 

"Chhiat kan tawk ta sia, a sarhu chhung chu ka hruai thei dawn si lo che a. Fimkhur la aw' min ngaihtuah hmel tak hian a ti a, ka bu nghat. A ngaihawm ve phian ang, kan lo inhruai nitin ve bawk nen. Kan hawn lamah Rogera phone a ri leh sek, ka ning ta deuh a. " min thlah la, rawn pengkawi lo mai rawh. Va hmu la, va sawifel rawh. " ka ti chang ta fak a. Min chhang lo. Thinrim hmel erawh a pu lem lo va, ka tauh deuh vangin a rawn lut ngam ta lo nge kawt thleng kan inthlah ta a. Ka hmai ka phih laiin Bena'n a rawn call teh mial a. 

"Video ka lo thawn ang che. I sawi kha a dik chiah, Linda chuan video tenghneng zet a lo nei reng alawm" a rawn ti a. A dah leh nghal daih. Video chu a rawn thawn ta nghal a. Ka'n en nák chuan Linda leh a hmel lang lo mipa khawsadun an lo nia! Linda chu a zei hlarh hlarh ngei mai, kan pawnlam landan leh khumlaizawla kan khawsak dan hi a lo danglam takzet a nih dawn hi. 

Fiamthuin,"Ngaidam la" ka va ti a. 

"sawi lo teh" a rawn ti. Lehlamah mipa tan chuan a tuiawm loh ve dawn êm a ni. Mahse, thinrimna erawh ka nei, mipa hmel a lang lo va, mipa lak a ni tih a hriat bawk. Mipa sual leh rilru chhe tak a tawng chu ka lainat tho mai, tikhan mi hur chhuahin an chhuah ang a, mipa erawh demtu an awm leh mang lo vang. Sex video siam hi a tha miah lo, mahse, mualpho bik leh hmingchhe bik an awm thin hi a dik lo. Linda hian ngam se report thehlut se chuan mipa hian jail bang a zút ngei ang. Tenawm lutuk. 

Mala msg a rawn luh chuan ka phu leh uih, a mak thei e. "Thudik i hriatthiam huna i rilru nat dan tur ka hmuh hian ka khawngaih che" tih a ni. Eng thudik tak sawi ang maw? 

"eng chungchangah" ka ti a. 

"A vaiin" tih ngawtin min reply. 

"Ka hriat hun nghak lovin tunah sawi la" ka ti a. 

"I awih rih dawn chuang lo, a tak ngeia i hmuh a ngai" a rawn ti leh. 

"Mi makpa" ka va ti ringawt.

"Ka mak lo têp. Muttui le" a rawn ti a. Ka reply duh tawh lo. Roger pawn a rawn text a, "Kha nu kha ka ngaihven tawh lo. Thinrim suh" a rawn ti. 

"A rim lo. Mahse, chingfel rawh" ka va ti a. 

"Aw le, hmelthanu" a rawn ti a. Ka mut a chhuah êm vangin kan inmangtha ta a. 

Bike ka hrukfai hlarh hlarh laiin ka nu a rawn chhuak a, "Fimkhur hle ang che. Kalkawngah ding lo la. Ban rualin rawn haw nghal bawk ang che" a ti leh thak thak a. 

"Yes boss" ka lo ti vei hluk. Tukthuan pawh ka eitui e. Ka phur em em a ni tawp mai. MZU lam pan chuan ka inkhalh thla ta vang vang a, ka thlen chuan a la hma viau, ka phur luatah ka kal hma ve deuh a ni. Msi te ka lo nghak ran a. An rawn lang ta sap sap. Linda erawh a rawn kal lo, a khawngaihthlak zawk hle mai. Rpa pawh a la induh deuh tho naa, tlem chuan a rawn hnai ve tan deuh. Bena nen an inkawm lo thei lo si lo va. Msi nen erawh an la inbe thei lo a chha a ni e. Mahse, lunch kan han ei chuan, "Rp, i mak ve e. A thuhrimin inrukna chhan tur in nei pawh a ni lo va, i rui mi?" ka ti ta a. A khi suk ringawt. Bena pawh chuan,"Thil hi ngaihtuah chian tur, entirnan in chhung ten inneih phal lo se, inru u la ka hrethiam, thawh lawka inru ang tih ringawt" a lo ti ve mawlh mawlh a. Msi erawh a ngawi reng. 

"Nia, tak taka khami zan khan ka rilru a buai thut a, ka chhungte nen kan inhnial ve deuh bawk nen, ka rui sual a nih kha" tiin Msi a melh zauh a. 

Msi chuan,"A ho em mai sawi tawh s'u, bialnu tha deuh a nei tawh alawm" tiel lek lek hian a lo ti ve a. Rpa chuan,"Ka nei bawk lo ve a, ka runluih ve che nih kha" a lo ti chut. Kan han nui leh rih, boruak a nuam chho ta e. Gate kan kal pelh dawn lai takin Malsawmpeka leh Miss Kimi te kan tawk. Mala chuan min melh eih lo, ka lo melh nasa deuh nge Miss Kimi nen chuan kan insu ta chawrh a, "Sorry. Miss" ka ti chul a. A lo fel hlauh a, "A pawi lo ve" a ti thliam a. Keimah pawh min melh lem loin Mala chuan, "Sangzual, in ban hunah lo la haw lo teh aw. Ka be lawk duh che" a ti vut a, an kal nghal. Msi chuan min rawn sik zauhin,"Ehh..nuam awm bik" a ti zauh a. Ka ner khum nasa mai. Eng chungchangah nge min biak duh ang le? Ka hre chak ve tho sia, chawhnu lam class chu rilru ka pe lo angreng khawp mai. Ka helhhawlh ka ti mai. Mahse, kan inbiakna a romantic leh lo ngawt ang chu. Kan bang ve ta hram e. Msi te ho chuan min hawnsan a, Rpa nen an inphurh ve leh tak nge nge kha. An lawmpuiawm e. Bena bialnu tur hi la zawnpui a ngai a ni. Ka bike bulah ka ding ran a, Reivakloah Mala pawh a rawn chhuak ta a. A kamiz chu a inhmeh kher mai. Eng dress pawh a inhmeh a nih hi a. A figure hian a zir ve bawk a. Ka bul a rawn thlen chuan, "I bike hmang mai ang" tih leh chabi min dil a rual a. Ka lo pe ve mai. Kei pawh ka chuang nghal a, Helipad lamah kan tlan thla. Rogera chuan min hmu se, a sa teh ang chu. Kan zu thleng thla a, tlema fal deuh laiah kan chhuk leh a. A ding ta a. 

Phul hmunah chuan thu dunin a sawi tur chu ka lo ngaichàng a. 

"Sangzual, I pa nihna dik tak i hre tawh em?" a ti tê tê a. Ka phu zawk. 

"Ngati nge" ka ti khur dat a. 

"Tunah hian nasa takin a nunhlui pholang turin beihpui an thlak mek a ni. I pa hian hremna a hmachhawn dawn. Chutah chuan tel vena erawh ka nei lo" a ti ta a. Hlauthawng takin ka melh a, " Engtin nge an hriatchhuah?" ka ti nghek a. 

"Amah ruaitu pakhat an chhui fuh palh a,ani pawn hremna a hmachhawn ang" a ti a. Ka lung a chhe nghal ut it, ka sa ham ham bawk. 

"Kawng dang a awm lo em ni?" beidawng zet hian ka ti a. 

"Awm lo, sawrkar mi leh sa inrawlh an tam bawk si a, sawrkar hluite lam lah an thawkrip si. Huaisen taka hmachhawn tur chein ka duh a ni" a ti nghet charh a. Ka mittui a tla! "Eng hremna nge a tawh ang?" ka ti tiau a. 

"Ka hre lo, damchhung jail tan emaw khaihlum emaw a nih ka ring" harsa tih hmel zet hian a ti a. 

"ti nge tunah an tharthawh leh? A rei tawh sia" ka ti a. 

"RInhlelh a kai avangin case kha an pharh tha leh alawm. Case latu pawh a hraw viau, Thanchungnunga a ni. I pa leh a hoten a pa an lo thahsak tawh kha a nia" kawlkil lam hawiin a ti a. 

"AMandain tihtheih a nei lo em ni?" ka ti a. 

"A neih ka ring lo, ani pawh ZCP avang khan chhui mek a ni si a" a ti a. A lungngaih hmel ve hle. 

"Mala tu nge i nih a? Eng hna chiah nge i thawh?" ka ti ta hlawl a. 

A rum nghut a. "Eng hna mah ka thawk lo, Ph.d scholar ka ni. Mahse, sawrkar mi pawimawh tak tak ten he thil hi a rukin an kalpui tih ka hriat khan ka nu leh i pa chhanhim nan ka intatlut ve a, ka nu te lak atanga indangin kan inzawmna chu chhia leh khi angin ka lantir ta a. Ka theihtawpin enthlak hna ka thawk bawk, Amanda fapa ka nih avangin an rinna hlawhchhuah a har hle a, kei pawh hi enthlak ka ni reng tho. Engkim zawng zawng ka hre bik lo bawk, tin, i thiannu Biakdiki chungchanga information ka rawn pek che avang khan min man chhuak chiah lo mah se; rinhlelh ka kai nasa a. Ka bulah engmah an sawi duh tawh lo. Tuna i pa chungchang pawh hi an private rooma recorder ka dah ruk atanga ka hriat a ni. Tunah chuan tihtheih ka nei bik lo. I pa chuan kei hi min ring lo turin a ti ngei ang che. Mahse, ka tiam a che, i pa man a nih rualin inhnamhnawih ve tho ka nu pawh an kal kan dawn loh avangin eng dawt thu mah ka sawi lo. Ka tih loh tawp tur ka ti a, ka talbuai mek chu a nih hi" a ti ta dap dap a. Mak takin Mala thusawi chu ka ring thlap nia! Dawt sawi hmel a pu lo bawk nen. Ka rilru kap tlattu erawh ka pa chu engtikah nge man theihna thupek an chhuah ang tih a ni. Tihtheih reng reng ka nei bawk si lo va. 

"Tihtheih a awm chuan si loh chuan ti nge ka rilru tibuai tura ka pa chungchang hi min hrilh si" ka ti a. 

"Amah i pa hrilh la, kawng dang a hriat tak mialin ka ti a ni. Kei chu rinhlelhna mitin min en tlat tawh si a" a ti a. 

"I nuin a hria em?" ka ti vat. 

"Hria e. Ka nu chuan min ring alawm. Bansan turin min ti bawk. Nia, ka bansan ang. Sangzual, lo ngai reng rawh, kan ram hi a buai leh ngei ngei dawn. In chhungkua hi in him hlawl lo, lo chîk la, ZCP din tirha inhnamhnawih langsar deuhte kha dinhmun hlauhawmah an ding zel ang. Tuna ZCP phatsana sawrkar hlui zawmtute hi i rin aiin an hrawin an hlauhawm ang" a ti vawt raih a. Ka tim sung sung thei. Mahse, kan ram buaina vel chuan ka rilru zawng zawng a luah pha teuh lo. Ram ka vei lo pawh a niang. 

Khua pawh a lo tlai duai tawh a. "Haw tawh ang le. Fimkhur la, khawiahmah peng kawi suh" a ti dam thlap a. 

"Kei chu ka inveng thei" ka ti sap a. A nui a, "I thei lo. I hnungah ka rawn tlan ang" tiin a tho a. Kan chho leh ta vang vang a, ka sawi ang chiah khan kan inkawmna chu a romantic lo leh ngei mai. Mahse, a pawimawh thung. Ka pa ngaihtuah rauh rauh chungin ka tlan haw a, Mala'n min zui ve zel bawk. In ka thlen chuan khua a thim lek lek tawh. Ka nu a lo za leh ruai tawh. Mahse, min hau êm lo ve. Ka hmelhmaiah ka serious zia a hmu a niang chu. Zanriah kan ei laite chu ka pa chu ka melh zauh zauh a, a chaw ei a tui si, rawn man ta se, a kal thei bawk si lo. Ka chaw ei pawh a tui ta lo. Ka ei tlem lutuk chuan ka nu ngaih a titha leh pek lo va. 

"I va thutak ve, Sangzual, eng nge vawiinah thil thleng a awm em ni?" a ti ta chiah a. 

"Awm lo e. Thil ka ei nasa lutuk a, ka la puar a niang" ka ti ringawt. Ka pa chu engtikah nge ka biak ang aw..thleng ka sil zawhah zan lama kan tihtur kan ti leh zung zung a. In chunga an chho chu ka zui chho ve ta a. Ka nu pawh awm ve mah se, pawi ka ti lo. A hriat ve a ngai tho. An roomah ka zui lut ta zel a. Ka nu chuan,"Eng nge ni ta?" a ti sap a. Hlauthawng hmel a pu. 

"Thil sawi ka duh a ni" ka ti tè te a. 

Kan thut fel hnuah Mala nen kan inbiakna zawng zawng chu ka sawi ta vek a. Mahse, ka beisei ang he huin ka pa chuan makti hmel a pu miah lo. Lo hre sa vek tawh a ang. Ka nu erawh chuan a hmui a hup a, a meng phawk hle. 

Ka pa chuan,"Vawiinah Amanda hnen atangin ka lo hre tawh e. Zoi erawh ka la hrilh duh lo va" a ti ta a. Mala khan a nuin a hriat ve vek thu a sawi tak alawm. 

"Mala chu i ring tawh mi?" ka ti a. 

"A tirah pawh ka ring lo hran hleinem. Mahse, i rilru a lak atanga a let nan tiang khan ka sawi ta mai a nih kha. Dinhmun hlauhawma i din ka duh loh avangin. Keimah vang pawha in dinhmun a derthawn tawh laia Mala vanga an target che kha ka duh lo a ni. " a ti a. Ka nu chuan ka pa melhin,"Engtin nge kan tih ang? Ka hlauh ang ngeiin maw? A pawi em mai. " a ti vawng vawng a. 

"Ka tawrh tur a nia lawm. Engtikah emaw chuan khang ka thiltihte khan min la rawn nangching dawn tih ka ngaihtuah fo thin. Ka nu avanga ka phuba lakna khan rah tha a chhuah kumkhua dawn lo miau a" ka pa chuan a ti mai a. 

"I hlauthawng eih na nge? Chutiang chu thleng ta se engtin nge kan awm ang a? I tel loin kan chhungkua hi engmah kan ni hleinem" ka nu awah chuan thinrimna a tel. 

"Zoi, intipachang ta che. Nauteii a awm ve hi, khatin thlabar hmel pu suh. Kan tana chunglam ruat chu kan pumpelh thei hleinem. Zoram tan sulhnu tha tak ka hnutchhiah a, thi pawh ni ila ka tihtur ka ti zo tawh. Engmah hi thup hlen theih a ni lo alawm" ka pa chuan a ti dam thlup a, zàmna awka leh mitmeng hmuh leh hriat tur a awm lo. A dam ruih reng mai chu a nih hi. 

"Kawng dang a awm ngei ang, Minister te bia la, CM pawh be mai rawh. Tihtheih an nei em em ang" ka nu chu a hmanhmawh ta thut niin a lang. Ka pa chu a nui hawk hawk a, "Minister leh MLA zingah tu nge kan lam tanga tuin nge min phatsan tih pawh kan hriat theih tawh loh hi..chutianga ka tih chuan buichhia laih lohin ka inpuang dawn tihna a nia sin." a ti a. 

Ka nu erawh a tah a chhuah hmel kher mai. A dik ang, nu azawnga pasala innghat leh ka pa chu a pa ang thawthanga a en vangin ka pa lakboa a awm a nih chuan awmngaihna a hre dawn lo. Nu chhel tak mah nise, ka pa hmachhawn tur hremna chu hahdam takin a hmachhawn ve thei lul lo vang. Ka nute chu an inbiak fal ka rin avangin ka chhukthlaksan ta a. Ka pa awmdan thlamuang leh hahdamthlak zet avang chuan a hmaa ka awm nuam lo zet kha a bo duak nia! Ka nu angin chiái ve ta se, ka mangan dan tur chu aw. Ka pa nge nge.

Test tur kan neih avangin ka en ve puat puat a, rilruah erawh a lut mawh viau. Rogera'n min lo call a, "Vawiinah khan Malsawmpeka nen khan khaw nge in kal?" a rawn ti nghal táwng. Ka mengphawk deuh a. Engtin nge a lo hriat le? 

"Helipad-ah " ka ti ringawt a. 

"Eng nge in tih?" a ti rum ul a.

"Chhungkaw chungchang kan sawi a. Engtin nge i hriat?" ka ti mai a.

"Spy ka dah vek alawm. Tu nge i hmuha tu nge i biak tih ka hre vek zel. Mala kher chu hmu tawh suh ka ti lo che em ni?" a ti hawk a a. Ka rum nghat. 

"em em a che. Roger, i nupui êm pawh ka la nih loh hi" ka ti vin hlak a. 

"Ka nupui i ni vat dawn alawm. I mit a del lo, Malsawmpeka hian a duh ve che tih pawh i hria, ti nge ka awm loh remchan laia i hmuh kher?" a ti nghut nghut a, a lung chu a awi loh hmel kher mai. 

"Min duh lo, kan thusawi hria la tiang hian min ti lo vang" ka ti chang rát thung. 

"Ka ta i ni, ka thil neih lakah chuan thuneihna ka nei" a ti sup a. Ka ner sawk. Roger ka lo zui hi ka tisual ta mai em ni ang? Ka duh aiin a thikthu a chhe mah mah tlat. Ka ngawih dat laiin, "Tu nge i biak?" hmeichhaw aw hian a rawn ti no niak a. Ka tawng tur pawh ka tawp chawt. 

Roger phone chu a thi hmak. Ka bih vung vung a. Awmze nei loin ka nui hawk. Hmela mai mai chu aw. Rinawm ber niawm takin tiang khan min han tawngkhum vel a! Ani pawh engmah a ni tawp si lo. Ka call duh ta bik lo va, a ngaih erawh a tha vakin ka ring lo. Ruatsanga msg ka dawng teh nawlh a, Ruatdiki nen an thlalak a ni. Ka melh reng a, an va inhmeh dun tak e aw. Ka rilruah thíkna a rawn awm ngawt lehnghal, amah Ruatsanga ka va ngaihzawn lam ni loin an ni chu an duhberte nen tiang hian an inhnaih thei mai a, mipa ka duh ve em em nen eng emaw vanga kan inhnaih thei miah lo hian ná min siamsak.

"A zin a rawn haw chiah a, naktukah kan inah ka pain chawhlui buatsaih a tum a, in chhungkua pawh in rawn kal a ngai ang. Ruatdiki hian a hmu chak che a" a rawn ti duah. 

Nia, kan inhmu khát ta deuh a ni. Veng kar a inhlat chu thuhran, class ka kal a nih loh chuan ka chhuak ngai lo ve bawk êm a. 

"Nia, kan lo kal ang. In hlim dun bik si" ka va ti a. Smiley a rawn dah tuar. Ka lawmpui e, an inphu dun bawk si. Mut tuma ka intintuah laiin Sangpuia a room atanga a rawn bai chhuak ka tawk a, "A na leh mi?" ka ti mai a. 

"Naomi a rai" a ti hmuk. Ka ding chawt a, makti zetin Sangpuia ka melh a, ka thin a rim bawk. Ka nute bulah a la virgin thlap thu a sawi sia! Engtin nge dawt a lo sawi theih? 

"Eng a?! Tu fa maw?" ka ti nghek. 

"Keimah" a ti chuai raih a. A inthlahrun hmel ngawih ngawih mai. Ka dinchilh sauh sauh a, "Rosangpui, nang hian ka nute bulah dawt i sawi a maw? Hmeichhia i la mutpui loh thu i sawi zuah zuah sia" ka ti hlawk hlawk. Remruata pawh a mit nuai chawt chawt chungin a rawn tho ve a. A bangbo hmel hle. Sangpuia chu a kun reng a, a inthiam loh hmel bawk si, "Ka tihpalh..u, nangman ka nute min hrilhsak thei ang em?" a ti ngui rawih a. Ka chek hlak. 

"ka nu leh pate thutlukna i hria, i neih ngei a ngai dawn a nih chu. Nunui a khawngaihthlak dawn hle mai" ka ti nghat a. 

"Ka nei duh lo" a ti nghut a, "I tang lui thei chuang lo vang. Va mu rawh. Naktukah ka lo sawipui dawn nia" ka ti a. A lut ta hnu hnu. A khawngaihthlak tho bawk sia, mahse, ka thin a tirim. Piangsual emaw mi á emaw pawh nise an neihtir ngei ngei dawn sia aw, Nunui hlir ka ngaihtuah thung. A tuar reuh ngawt ang, an dinhmun zawng zawng nen. Sangpuia te avangin ka muhil lawk lo lehnghal. Roger pawh a reh ta veng veng mai. Naktukah rilru fim taka sawidun a ngaih hmel. 

Ka va thawh chuan ka la hmuh ngai loh pa pahnih an lo thu run a. An thutak viau bawk. Ka nu hmel chu lungawi lohna hian a khat a, ka pa erawh a dam leh thlup thung. Chung mite hawn hnu chuan ka nu chuan, "Rosangpui, rang takin rawn chhuak teh. I thiltih hi i hrechiang a maw?" a ti vin thak a. Sangpuia a rawn bai chhuak auh auh. A hmel a pha dai mai a, ka lainat lek lek zawk. Ka nu chuan, "Naòmi te palai an nih kha sawn man min rawn thing a nih kha. Engvangin nge dawt min hrilh? Hmeichhia i la mutpui loh thu i sawi zawt zawt sia" a ti hlak hlak a. 

"Nu, tihpalh. " Sangpuia chuan a ti ringawt. Ka pa chuan thutak deuh zawkin, "Engpawhnise sawn man chu kan pe ta rih lo a nih kha, a rang lamin palai kan va tir dawn nia, in inneih mai a ngai ta a nih kha" a ti dam thluam a. 

"pa, neih ka duh lo. A mizia ka sawi vek tawh kha. Hmeichhe tha a ni lo" Sangpuia chuan tah chhuah hmel zet hian a ti a. 

Ka nu chuan vin thakin, "Engmi pawh nise in nei ang kan tih tawh kha. Ani pawh tu te emaw fanu duatlai ve tho a nia sin. Bakah kan tu leh fate tihfahrah ka duh lo" a ti hmak mai si. 

Ka pa pawh chuan,"Ni e, engmah hnialna ka pawm lo. Hmeichhia chu an tlatna leilung a zira danglam thei an nia lawm. Kan chhungkaw zia a la kai vat mai ang,. " a ti a. Chu chu ka nus pate thutawp a ni tih kan chiang bawk a, tuman kan hnial ngam lo. Sangpuia chu a kun chhal a, a lungawi loh bakah tihtheih a nei si lo chuan a tithinur tih ka hre thei mai. Nunui'n a hriat hunah engtin tak dawngsawng ang maw? Chaw ei pawh a tui nek lo ve. Ka kal hmain ka nuin, "Tlaiah i pa Tluanga te inah chaw kan ei dawn a, rawn hawn hma i tum dawn nia" a ti a. Ka bu nghat. Ka pa chungchang kha muthmunah an sawi dun ngei ka ring a, tunah Sangpuia ten boruak an rawn nei ve leh ta bawk nen, rilru buaina tur an ngah hle dawn mai. Ka khawngaih zawk e a. 

Vawiin chu ni pangngai a ni mai e. Zingkarah khan Rogera'n min rawn wish a, ka chhang ta lo kha a nia. Nizana a awmpui hmeichhia kha tu tak ni ang maw? Tlaiah chaw a rawn ei ve ka ring a, tha taka sawi fel a thain ka hria. Hetianga inkawp emaw inthlim tih vel ai chuan thiantha ni leh mai ila a tha zawk awm e. A thikthu a chhe ropui bawk si. Ban veleh ka tlan hawng nghal a. In ka thlen chuan an lo inpeih diam tawh hlawm a, ka inbual sawk sawk a, ka insiam zui nghal. Keiman car ka khalh leh a, Ka nuin, "Sangpui, Nunui i hrilh hre tawh em?" a ti a. 

"Umm, a na a ti khawp mai" a ti nghut a. 

"A hun lai chuan a na ang a, mahse, hmeichhe tha tak a ni a, mipa tha tak a la tawng em em ang. " ka nu pawh chuan a ti ve a. Ka ngawi reng thung. Pa Tluanga te in kan thlen chuan motor a lo ding khup tawh a. Car ka park lai takin Mala pawh a rawn thleng thla ve chiah. Ka pa chu Ruatsanga leh Rogera ten an rawn kuah chhuak a, in chhungah kan lut zui nghal. Ka hmelhriat deuhte vek an ni hlawm a, han zah em em tur an awm lem lo. 

"U Sangzual" ka hnunglam atangin a rawn ti a, ka lehhawi chuan Ruatdiki a lo nia. "Awi mate" ka ti hluai a. Kan inkuah thuak thuak mai. A thang duh bawk a, kan inchen deuhthaw tawh, a hmel lah chu thlalak aiin a tha fe zawk bawk. A nu Isabella hi a hmeltha êm bawk a ni. Keini a thalai lam chu in chung zawlah kan chho ta diak a, Roger pawh ka bulah a thu leh run tawh. U Loicy a rawn tel ve bawk a, kan hlim phian. 

"Sangzual, inzep theinu, Min hrilh hmasak ka phút ve em em a,." tiin a nui har har a. Roger nen kan chungchang a sawina a ni. Ka nui a, "Amah hian a hrilh che ka rin vang alawm" ka ti a. 

"Kan Malsawmpeka pawn a neih ve tak kha .. A rawn hruai ve lo mawni" a tih chuan na takin min deng dawt thei nia! Ka hmelhmaiah lantir loh hram tumin,"Awi a ni maw? Tu nge?" ka ti nghek a. 

"A pa chu Inspector Thanchungnunga hi..i hre ngai em? Chuan a bialnu hming kha tu nge kha aw.. Ee..Rinpuii a niin ka hria. A chhe lo, mahse, Mala aiin a upa" a ti siam siam a. Ka na zawk zawk thei nia. Mahse, a nei ve bawk ang chu, tlangval a nia. Roger chuan min lo en chík lehpek viau ni tur a ni. U Loicy ten thla an lak hlanin, "Malsawmpeka ngaihzawng nei chuan a la nghawng det che a nih kha tiraw?" a ti ta chat a. 

"I buaina tur a ni lo" ka ti hmak a. Ka thinrim ringawt. 

"chuan, Roger, sawi dun tur kan neiin ka hria. Nizan chungchangte" ka ti nghal zat a. 

"Ka sawifiah thei" a ti nghut a. Ruatsanga leh Ruatdiki an rawn thu ve ta sia, kan sawi zawm leh thei ta lo. MAla erawh chuan phone a be daih a, an inbe rei tawh khawp mai. Kan titi nak nak hnuah chaw ei turin in hnuaiah kan chhuk ta dial a. Roger nen kan thu dun a, ka hmaah tak Mala a rawn thu bawk. Ka melh duh lo lui vel, Kan eikham dawn hnai tihin Mala phone chu a ri a. 

"Aw.." a ti puat. 

"Umm le, hei kan eikham tep. Chabi i kawl kha .. Min lo nghak mai rawh aw..aw le, bye,." a ti zung zung a. Roger chuan, "A rawn rim leh dawn zawk che a ni maw?" a ti hlut a. 

"An in hi a free lo thin êm a, keimah hian ka peih lo alawm" a ti ve mai a. Sawi tur pawh ka hre lo. 

Kan eikhamah Bathlarah chhuakin mi dang an awm lo bawk nen, "Sawifiah tawh rawh le" ka ti ta a. 

"Amah kha min lo be thintu chu a nih kha. Zarmawii a nia, nizan khan min lo tibuai tawh lo tura hrilh tumin inhmuh ka rawt a. Ka hrilhfiah tawh e. A rawn lawr ngam tawh lo vang" a ti ta a. Ka rilru a pawnlang riau, rin tur nge rin loh tur ka hre lo. 

"Bum ka nih chuan ka nasa a nia. Roger" ka ti hul hak a. 

"Ka hria alawm, ka bum ngam che ring suh. E chuan taka! Tun inrinniah hian Lungleiah i va láng zuai ang hmiang. Keimah chauha kal chu ka phur vak lo va" a ti hluai a. Rilru tihthawven nan pawh a tha dawn riaua ka hriat avangin, "Ka nute ka lo dil ang aw" ka ti ve mai a. A bu nghut. 

Call a dawn avangin a kalsawn deuh a, ka phone ka bih mual mual laiin Mala meizu tur a rawn chhuak ve a. Engah mah ngai lo niawm takin ka lo en tha duh lo vel. 

"A thawng viau che tiraw?" a ti sup a. Ka lo hawihai hman deuh. 

Ka ner sak a, "min tibuai lo ve" ka ti nghat a. 

"Rogera hmeichhia ni mah la, lo him la a tawk mai. " a ti leh nghut. Tawng ka tum lai takin Roger a rawn phei ta si, ka melh rum vak ringawt. 

"Mal, hawn i tum hnai em?" Roger chuan a ti a. 

" umm, min nghak tawh bawk sia, a changtunuin" a ti kher a. Ka va ei lo tak. 

"Kei pawh zanin chu ka'n zui hawng ang e" Roger chuan a ti a. An intawng el dan chu a va naupangchhia tak. Thian an ni tho bawk sia. An hahthlak reuh e. 

Ka nuin min lo ko a, hawn lam kan tintuah. Sangpuia cool lutuk hi ka khawngaih zo vek tawh. Naòmi chu zep loh chuan mo atan ka awt hran lo khawp mai, mahse, nu leh pate thuneihna hnuaiah kan la awm miau sia le. Kan hawn kawngah Inrinnia Lungleia kal an remtih leh remtih loh chu ka zawt a. 

"Va kal rawh, intihthawvente pawh a tha alawm. " ka nu chuan a ti ve mial a, ka lawm hle. Zin hrim hrim hi chu a lo nuam ve bawk nen. Roger pawh kan hnungah a rawn tlan ve zel a, min rim a tum ve khawp mai. In kan thleng a, ka nute in chungah an chho nghal. Kei pawh ka inthlak a, Roger nen chuan kan thu dun ta rial a. Sangpuia chungchangte chu ka sawi ve a, "A ngui ka ti reng a. Lehlamah duh vak loh nupuia neih chu a huphurhawm viau ang. A hlim pawh an hlim dawn mi?" a ti ve a. 

"Ka nu leh pate thutlukna a ni sia. An fa lo piang tur tan zawk a nia" ka ti mai a. 

"A dik ve reng. Lehlamah fate tihfahrah ngawt kha a tha bawk si lo va" a ti a. A thu rei telh telh a, a kut pawh a hlei tan. A fawh lah kan infawp zing, over tih dawna ni chiah si lova chet dan tawk a thiam riau. Kei atan tak pawh han ngaihhuat theih si loh hian a zei em em tlat a ni. Mahse, "Ka intiam tawh a. Pasal ka neih hma chuan sex ka hmang lo vang tiin. Nang pawn khalam hawi zawng khan ngaihtuahna pawh seng buai duh suh" ka ti hmiah a. Mipa pangngai a ni bawk a, tawp hun a hria. Tun laiah hmeichhe duh lo chung chung an sual tung tung ngai tawh lo bawk a, ka him viau. 

Ka zing tho chu ka rit lúk mai, ngati nge mawni dawn ni. Pathian zarah incheckup reng kan nih avang hian kan chhungkua hi kan hrisel tlang a, tlang hrileng tih vel hi kan vei khat khawp mai. Ka va tho chhuak a, ka nu bulah, "Ka rit búr mai, a mak tawp ka awmdan hi" ka ti nghal a. Ka chal a rawn dek vat. Ka dai thler bawk si. Ka han intifai a, ka lu pawh a na tel. Chutihlai tak chuan Remruata vawk chaw pe hi hmanhmawh zetin a rawn tlan chho hlawk hlawk a, meng phelh phang hian, "Nu, farm house hnungah khuan mi pakhat a let hlawm reng mai, a thi niin ka hria" a ti a. A thlabar hmel kher mai. Ka nu pawh lungngaihnain a tuam leh nghal a, kan pathum chuan hmanhmawh zetin kan tlan thla ta a. 

Ka nu chuan a thut chilh a, a kuai let nghal. Ka la hmuh ngai loh a ni. Khabe hmul buk tak, hmai eng puap mai a ni a, a cher hle bawk. A mitkhur chu a tla dúk bawk. Ka nu chuan khur der der chungin a mar a han dek a, a lu thingin "Police call r'u, a thi tawh" a ti tham tiak a. Remruata chuan a phone a phawrh nghal. Chu pa ruang chu a vawh vek bakah a khawng ut tawh bawk. A thihna a rei tawh a ni maithei. Ka nu nen chuan a taksa chu kan dap ta a, hliam a neih awm kan hre lo reng reng. Thisen chhuak hmuh tur a awm bawk si lo. 

"Tu nge a nih ang le?" ka nu chuan a ti sap a. 

"A mak hle mai. Ka la hmu ngai lo reng reng" ka ti ve ringawt. 

Kar loah Police pawh an rawn lang a, an han endik nghal sap sap a. Post mortem turin an phur chho ta a, a ruang hmu hmasa ber tu Remruata chu an han kawm a, Remruata vawk chaw pe, In hnung lama kel tla darhte va endik a tumna lamah a va hmu a lo nia. Farm house hi kan kalh thlap thin a, mahse, mak deuhin nizan khan kan chaw ei chhuak atalángin tlaiah an lo kalh theihnghilh hlauh a ni. An kalh loh zanah ber kher tiang thil hi a thleng ta bawk sia. A mak mang aw. Ka class kal tur pawh ka tlai phah vek. Rilru bet lo zetin ka chhuak ta a. 

Ka zu thlen thlaka ka bike ka hun that laiin Mala a rawn tlan lut ve a, A rawn chhuk rual chuan, "Sangzual, in farm house-a thil thleng chu a va zia lo ve" a ti nghut a. 

"Ni ngawt mai. Ngati nge i kut chu?" ka ti a. A kut veilam a tuam vang a ni. 

"Nizan ka haw khan taxi nen kan intauh deuh a,. A na lo nat chu" a ti mai a. 

Kan lut rual a. Kan inthen dawn chuan, "Ni hman nuam aw" a ti sup a. 

"Nang pawh le" ka ti ve sap. 

Mahse, ka ngaihtuahna avangin ka ding leh chawt a, ka va lehhawi leh hram. 

"mala" ka ti a, ani pawh a ding. Ka va pan leh a, mahse, ka inchhuih tawk a, amah chu ka va bawh ruak. Kan inpawm titih a, "Tihpalh,.englo a nia, I bialnu kha min hmelhrattir ve dawn em?" ka ti a. Ka nui bawk. 

Min melh run run chungin, "I va ho e aw. " a ti sup. Kei pawh intuaimamin, "Ka hmu ve duh alawm" ka ti a. 

"Va lut phawt teh" a ti sup a. Ka kal nal nal. Mahse, hei hi ka hria. Malsawmpeka hian a kut veilam hi a hmang tha ngam miah lo. Nizanah taxi nen an intauh tak tak ang em? 

"Mala, tual i that thei lo a nia. " ka hriat phak lekin ka ti sep a. Ka ngaihtuahna maksak zet chu thleng dik lo se ka duh a ni. 

(Le le le...