malsawmpeka 8

MALSAWMPEKA (8)

Ziaktu: Toni Râlte

1st period ka zuk nang hman chiah chiah, Sir Maliana class a ni a, ani hi a tui thei hluam hluam viau. A chhuak chiah tihin Msi a rawn kal nghal var a. 

"I pa chu a chhuak tawh maw?" a ti a. Ka bu nghat, Rpa erawh kan lam hawi chu sawi loh hmeichhe pahnih inkarah thuin a titi suah suah a. An boruak tur awm ang chu ka hrethiam ta deuh. Msi bulah zawi deuh sap hian, "Saw pa sawn TT a khel mi?" ka ti a. A nui naa, a nuih a za vak lovin ka hria. 

"Min la be duh lo hrim hrim, hman zan avang khan. Bena pawn hman zan kha a ngaihna a hre bik lo" a ti a. Bena a rawn kal lo bawk si, Rpa lah inla hrang bawk si, kan boruak a nuam vak lo. Lunch pawh Msi nen chauh kan ei a, Bena ka call ta a. Ani a ni fate Thingtlang lam atangin an lo zin a, inentirpui an ngaih si vangin a lo kal lo a lo nia. Rpa awmdan velte chu ka sawi a, "Kha pa kha a ngaihna ka hre bik lo, tun lai hian an chhungkua an buai riau a. Ka lo bia ang" a ti zung zung a. Kha chen lo inkawm tawh an ni bawk a, Bena hian tihtheih chu a nei ngei ngeiin ka ring. 

"Nia, a mipa hna lo e. Hetia tih deuh nghat chu..inrukna chhan tur an nei pawh a ni lo va" ka ti a. Msi pawn min lo thláwp hle. 

"Umm, nia, a rilru a hah ve deuh a niang. Naktukah ka lo kal ang a, a dik vek mai ang" a ti a. Kan dah ta rih. Mala a lo kal lo nge ka hmu lo, hmu mah ila danglam ka tum lo. A mak tehzawng a nih hi, mihringin thu kan tiam nasat thinzia leh kan bawhchhiat nasat sizia hi. Mala pawh vawi tam bansan hlen ka tum a, a tawngkam khat chauh vangin ka lawmin ka na a, a laklawhah kei leh kei lo angin ka cham rei hle a nih kha. Mahse, Tum mumal tak ka nei ta bawk a, Roger ka mitthla lui char char. Ka hmanrua angah in ngai maithei, mahse, Roger hi ka hmangaih theih inbeiseia risk lain ka zui a ni. Ka hmangaih thei a nih chuan mipa sual a ni lo va, fapa mal a nih piahlamah a pa sumdawnna hi tunah chuan aman a khawih titih tawh a, khawvel hausakna leh ropuina ang zawngah pawh Aizawl khawpuia tlangval neinung pawl a ni. Amah a zahawmin, a fing bawk nen, a lo hmeltha tel kher bawk si. Han iaina chhan tur ka nei hran lo. A tirah khan Mala runluih nan emaw a rilru hneh nana hman ka tum kha a nia. Tuna ka rilruah erawh Ruatsanga thusawi, "Tumah hian hmanrua nih kan duh lo" a tih kha ka hrechhuak, Roger hi hmanrua ni ringawt tur chuan a te lo va, Mala aiawh tur zawk hian a tling tawk a ni. Mala chu nakin zelah buaina zakhua thleng se, ka pa rilru ka hliam tel a la ngai dawn tlat! Amah theihnghilh leh pal liam nana Rogera ka dinpui ve hi chu amah Roger pawn hria se, a lak nat ka ring hran lo. 

Ruatsanga ka lo hrilh lawk tawh bawk a, a rawn lang ta lo. Kan bang pawna ka chhuak chu Rogera car a lo ding ran tawh a, A car bulah a lo ding zan bawk. Hmeichheho mit a lakzia chu ka hai lo, nuam ka ti sauh mai. Min lo nuih sâng a, Roger hi Mala nen an intiat viau ang, Mala aiin tlemin a sa a tha deuh zawk bawk a. A hma chuan a sam hi a zuah thin a, mahse, A nuin tihtakzeta a ngen avangin a sam tanin a lu pawh a mawi tawkin a mêt tawh bawk. Nu Kimi chuan a la buk mah mah ti mah se; a mêt duh tawh lo. Sawi tawh angin mizo an lohna riau a nei a, ka pa thlah niawm zawk tak a ni. A pa hrák mai tih hian a hmel landan sawifiah thei se ka duh mai e a. A car kawngkhar chu min hawnsakin ka lut zui a. Mipa a nih piahlamah hmeichhe care hi a thiamin, a bialnu an ni emaw ni lo emaw a chhuahpui tawh chuan a care em em vek. Hotê anga lang ka han thailan hram duh chu, vawikhat kan inbiak tirh hian min bazarpui a, an sumdawnna thilah kawnga kan kal laiin an lo call a, a laklawh viau naa a pawimawh si avangin a be lo thei lo. Kawnga kal chung chuan a bia a, min hrechang tawh lo emaw ka tih laiin min tawk zawnga mipa pahnih meng ráwp zet rawn phei mekte nen kan intawh dawn lai tak chuan veilamah min kai pheiin chumite tawk lo zawng chuan min sawn a nih ber chu, Chuan vawi khat leh pawh U Loicy te dawra kan chawlh laiin hmeichhe pakhat amah be ve thintu hian kei min thík vang ni maw a juice in lai chu tipalh ang deuha min buaktir a tum a, ROger chuan a juice no chu a lo man chat tawh bawk. Ni e, Malsawmpeka awm lo se mipa tha ber tur a ni. 

A rawn luh ve hnu chuan,"Ka thlah phawt dawn che em?"a ti a. 

"A ngai lo. A rei mai mai" ka ti a. 

"I rilru i thlak leh thut chhan hi hre duh ta ila" a ti nghut a. 

"Malsawmpeka lakah ka beidawng mawle. A bak vak a awm lo" ka ti nghat a. Zep tît têta inthup vel kha ka peih lo, a hrethiam ru vek tho. A nui hawk a, "Hmeichhe luhlul tak pawh Mala lakah chuan an lo beidawng ve thei a nih hi" a ti a. Mala hming sawi zen ka duh loh avangin, "Khaw nge zanriah chu kan ei dawn?" ka ti a. 

"Bai Bêl-ah kan va ti ve dawn mi? A taste hriat nan pawh. Pa Sangpuia te nupa siam a lo ni bawk a" A ti a. Bai bêl hi Zo Choka tih lohah chuan Aizawl Restaurant zinga a lar pawl a ni ve a, a neitu Pa Sangpuia hi ka pa thian tho, ZCP member ni thin, an vanglaia jailah pawh tang ngat kha a ni. A nupui Nu Hmangaihzuali, Naute tia an koh thin nen hian kum inthlau ve tak chu an niin ka hria. An fanu Hmangaihsangi hi Sangpuia nen an inrual chiah a, Hmangaihsangi nau Lianthangpuia hi Remruata aiin kum khatin a nau bawk. Chu bak fa dang an nei lo a niawm e. Pa Sangpuia hi a hma chuan zirtirtu a ni thin a, chuta tanga an nu nen pawh intawng an ni. A hna a zawm leh theih tak si lohah chuan tihian Restaurant siamin Zo choka hian an puibawm nasa bawk a, an changtlung sáwt hle. Bai Bêl tih takah mizo chawhmeh lam an thlur bing deuh a, Tourist hoin an bawr mah zawk thin. Aizawl chhim lam daiah a awm a, chu lam pan chuan kan tlan zui ta vang vang. Kan va thlen chuan, an Receptionist hmeltha tak maiin min lo welcome a. An uniform pawh a nalh kher mai. Dawhkan kan lo hauhsa tawh loh vangin in chung lamah chhoin dawhkan 7-na kan kil ta a. Mi dang pawh an awm ve nak nak mai. 

"Kar tharah khian ka zin dawn a, Malaysia-ah. I lo kal ve duh em?" a ti sup a. 

"Class chu kal lo ila a chakawm khawp mai. Class hi ka pa hian a ngaipawimawh viau sia" ka ti ringawt a. 

"Kar hnih dawn lai ka han thang hmel sia, i ngaihawm dawn mang e" a nui deuh naa, a mitmengah chuan intihderna ka hmu lo. 

"Taka tleirawltê biak lai i nei em ni?" ka ti a. Ruatsanga thusawi ka hriatchhuah vang a ni. 

"Nei deuh roh e, mahse, ka duh aiin a fing a, nangmah ang maia luhlul a ni bawk" a ti ve mai a. 

"U Loicy kha" ka ti zauh a. 

"Bialpa tha tak a neih ve tawh kha. Bakah ani chu nau anga ka en a nia" a ti a. Eitur an rawn dah a, kan ei dawn tan tihin kan piaha dawhkan kiltu zinga pa hmeltha lam, ka pa aia naupang hlek tur palian tak hian dawhkana thleng leh eitur an chhawpte chu chhuatah a paihthla ta vek mai a. A meng sen rúm bawk. A ngaihna hre mang lo va kan en reng laiin a nupui niawm tak, nu hmeltha ver leh te lam deuh hian, "Mapui, engkim a tha aw. I damdawi ei rawh aw" tih leh a bag atanga damdawi bur lak chhuah a rual a, damdawi chu a pasal chu a pe a. A pasal lah chuan, "Tu nge i nih?" a lo ti tuar. A nupui hrilhhai hmel chu a khawngaihthlak hle. In hnuai atangin Restaurant neitunu Pi Nauteii a rawn lang vat a. Mipa chu chelh vatin, "U, ti nge tihian i awm leh thin? U Sasai pawh i tihrilhhai thin lutuk. Tha deuhin awm rawh aw" tiin tawngkam nem takin a ú chu bengdaih a tum a. A ú chuan, "Ka nau, khaw nge ka nu? Ka nu bulah ka kal duh" tih leh pawna chhuah tumin a pen páwk a. Pi Nauteii chuan a u chu a kuah bet thlawp, a nupui pawh chuan a rawn pawt ve bawk a. An fate niawm tak kei aia nau hlek tur rawlthar leh a nau tleirawlte chuan an mittui an lo hru chawt chawt bawk. Pi Nauteii chuan lungchhe aw tak hian,"Ka ú, ka nu chu nikumah a boral tawh kha..ti nge hetia i awm leh thin aw" a ti vawng vawng a. Ka lo lainat ve hle. ENgtin tin emaw in hnuaiah an inkai thla ta a. A reh ta duk mai. 

"Ka hria alawm, an ni kha. Mipa kha pi Nauteii ú pu Mapuia a nia, Pu Mapuia te pa Pu Lawmsanga hian natna váng tak thluak lam natna chi khat a vei a, a fapaah a kaichhawng ve a nih hmel. An vanduai ngawt mai. A nupui Pi Sasai pawh kha a chhel an ti khawp asin. " ka ngaihtuahna hria niawm takin Roger chuan a ti mawlh mawlh a. Kei pawh thawkte lain eitur lam chu ka hawi tan a. 

"Tunlai Pa Zira te an dam a maw? Ka hmu khát e" ka ti a. 

"Ka nu nen hian eng nge maw an hriat ni..tunlai chu ka nu pawn chawlh a la a, an inawm heuh heuh reng mai" nui chungin a ti a. Pa Zirsanga hmel ka mitthla a, He pa hi chu pa a ni tawh chung leh a fapa pawh heti tiat a ni tawh chung hian a hmelthain a man reng mai chu a nih hi a. Nu Kimi nen hian an va inhmeh tak. 

"Chuan, Sangzual, ka thikthu a chhe viau a nia. Ruatsanga ngei pawh hi ka hmu mawh maithei a nia" Rogera'n a tih chuan ka bai hawp tur ka thulh phah. 

"Ani te chu i thian a nia lawm" ka ti sap a. 

"Thiante pawh thik mai a awl, hmeichhe nalh leh mipa cho tak i ni miau si a" a ti sup a. A mitmu uk kharhah chuan fiamthu a lang miah lo lehnghal. 

"Ka pa ka hnial ngam hleinem, min ven tul a ti tlat sia lawm" ka ti ta ringawt. 

"Hnaih lutuk lo la a tha mai. Ven i ngaih chhan hi chu ka zawt tawh lovang che. Tul i tih hunah i sawi mai dawn nia" a ti nghut a. Ka dar ka lo san ák ringawt. Romantic lam hawia ka mood hi thlektir ka duh, inchhui inenthlak tih vel hi ka kham thawkhat tawh. Thil chu a nih dan tur angin ni zel mai teh se. Malsawmpeka call ka dawng a..lak loh ka tum zet naa, vawihnih lai a lo call tak avangin ka la ta a. 

"khawiah nge i awm?" a rawn ti nghal táwng. 

"A pawimawh viau em ni? Ka chhuak" ka ti nghat a. 

"Tu nen?" a ti rum ul a. Ka nui hawk , "Ka pa i ni em ni? Engkim i hriat ve a ngai em ni?" ka ti hlar a. Roger chuan tuisik a in mek thung. 

"Roger kha hmanruaa hman i tum a nih chuan i hlawhchham dawn aw. " a rawn ti teh ngawt a. 

"I mangang ta mai elo? I laka ka beidawn kha i duh hle sia" nui hak chungin ka ti a. 

"A nawm chhoh viau dawn kha. Chuan, haw tawh rawh" a rawn ti chang rút. Ka hmet tawp hmak. Malsawmpeka antena thatzia hi aw, Ruatsanga hian report a pe leh a ni maithei. He pa hi hauh deuh a ngai a ni. Mahse, hre vek mah se a pawi hran chuang lo. Kan inhnawhpuar zawh chuan awm khawmuang lovin kan chhuak a. He Restaurant bul chiah hi Bar a ni nghal a, a lun hmel kher mai, a location a fuh ve bawk a. Rogera car lam kan pan laiin Rogera chu an rawn au a. Kan han lehhawi nak chuan Malsawmpeka leh Hmeichhe pakhat, cher sang ít êt, chhe tungturut ve deuh hi an lo nia! A chhuahpuite ho hi an dangdai thei. Chu nu chu Pharoa hun lai a mi niawm tak a ni, a chalsam a tan rual hmurh a, amah a ngo tehchiam bawk si lo, a hmai a sin angreng si, a ring a sang er ur bawk nen, han fak vak ngaihna a váng riau. A la túm ang hmên zui a. 

"He lam daih daihah te.." Roger chuan a ti a. Mala awm ve vang nge ka kut a rawn chelh zui hmak. Ka lo thingthla duh teuh lo. 

"Nia mawle, hei Elina hi interview ka neihpui lawk a..I thlah haw dawn em ni?" tiin Mala chuan min rawn melh zawk a. 

"Aw a nih hi..a nih kan kal phawt ang. " tiin Roger chuan a buk khum nghut a, Mala chu ka va nui ve sáng bawk. Ani erawh chhungrila thinurna pai, thup tum si inhmuamûp ang hian ka hmu. Kan kalsan dawn thlengin min thlir. 

"Khatia melh uluk vak kher kha a ngai em ni!" Roger chuan a ti hmuk a. Ka rin aiin a thikthu a chhe dawn tlat. 

"I ngaihbel a nih chu" ka ti ringawt. 

"Engkim ka ngaihbel zel tawh dawn. Sangzual, ka thutak a nia. Tunah hian inlamletna hun ka siamsak ang che. Ka ta liau liau ni thei lo tur leh a thinlunga mipa dang dahtu nen inzawmna neih ka duh lo. " a motor pawh a tiding tawp. A thutak lutuk chuan ka awm a tinuam miah lo. Mahse, mihring hi kan mak khawp a, ka induhtawkna leh inrintawkna te chuan Mala lam hawi tawh lo va ka thluakin min hrilhna lam kawng zawh turin min nawr a, ka thinlung leh ka thluak duhdan erawh a inang ta lo. 

"Roger, hmeichhe hlim takah min siam la a tawk. min hrechiang a ni lawm ni?" ka ti ta a. Ka insanmar nasatzia erawh a hriat ka duh lo. Ka rilru kil khatah erawh, "Sangzual, i tithei ang maw? Nangmah inbum suh" a lo ti ve chamchi a. Mahse, ka pa avangte, Mala hnathawh vangte pawn inlamlet ka tum ta bik lo. Ka thei tluantling lova ka lo tlu ta a nih leh ka chantawkah ka lawm mai tur a ni. Rogera chu ka tichhe pha lo turah ka ngai. 

"A nih chuan ka fáwp dawn che a nia" tih leh ka lama rawn thlek a rual a. Ka lo dawh mawl ve tawp. Mi rawn núl thuak a, a tawpah ka hmuiah a fu ta chat, Mala fawh nge nuam ROgera tih compare loh hram ka duh laiin ka lo ngaihtuah hman tho. Rogera chu a zei..hmeichhia a fawp nasa tawh bawk a ni. Ka thaw hak a, ka biang tawn tawna rawn dawmin, "Ka ta liau liau i nih hi" a ti sup a. A mitmeng a de sawr sawr mai. Rogera hian ti tak hian min lo duhin a lo thutak a ni maw? Kir leh pawh tum ila awlsam tak chuan min kaltir hauh lovang le. Kan in lam kan pan ta a. Thil thar nei ang deuh ka inchan a, a hlimawm zawnga ngaihtuah luiin ka bula mipa chu ka va melh zauh zauh a, a pa zawng a pa thlawt a ni. 

Chhungkaw tawngtai hun ka nang chiah chiah. Ka nu a ding a, "Hei vawiinah i pa nen kan han sawi dun leh a. Thla thar lamah i pa taksa te hi han chak chho deuh se, Delhi lamah liam thlak kan tum deuh a. I pa dinhmun chu kan hre vek tawh a, sawi leh vak pawh a ngai tawh hran lo. Pathian kan auh tama kan ngen nasat a tul hle a ni. I pa hi a kein a kal thei ta lo a nih pawhin, Kan hnual vek kher a tha lo. Pathianin in lama hahdam taka awmturin rem a ruatsak te pawh a ni thei. Chutihrualin Sangzuali pawh fa ú ber i nih piahlamah i pa sumdawnna te pawh i chhunzawma i inzir chhoh lehzual chu a ngai dawn a ni. Tikhan in rilru kha lo siam ve u la" a ti dap dap a. Motor hmanga an sumdawnna hi ka tuipui pha tehchiam si lo, mahse, ka pain a hnungzui tura min duh chuan ka tibeidawng thiang lo. Ka zir ve mai a niang chu. Kan tawngtai zawhah ka pa chuan, "Naute, min nawr chho la, thil sawipui lawk che ka duh a ni" a ti a. In chung lamah kan innawr chho ta a. A sumdawnna lam min sawipui duh a nih ka ring. In chung thutkhawmna pindanah chuan a hmaah ka thu ran a. 

"Rogera chu i date ta em ni!" a ti nghut a.

"Umm" ka ti ringawt. 

"Malsawmpeka chu i hnuchhawn thei ang maw?" a ti leh a. 

"Ka beisei" ka ti sep. 

"Mi tumruh tak i ni a, i beiseina kha a hlawhtlin ngei beisei ang aw. Rogera pawh mipa tha tak a ni a. A pa lah ka thiantha tak a ni bawk. Mala hi a rilru kalsual lo nise pasal tha ber a ni ngei ang. MAhse, nakin zelah hun hian a pawh then hun che u a la awm ka ring" a ti nghut nghut a. Ka ngawi reng ringawt. 

"Chuan, Ka naute, sumdawnna chungchang chu i nu sawi tawh ang khan M.com i zir zawh hma ngeia ka ai i awh pawh a la ngai thut maithei. Ka dinhmun heti hi a ni si a. Chuvang chuan lo inzir lawk la ka duh a ni" tiin dawhkan chunga lehkhabu chhah zet pahnih chu a ban a, ka lo pui vat. Ka pa hi Car Dealer niin, Company pathum lian tak tak a thawhpui a ni. A sumdawnna huang zauh belh zel tumin leh Foreign lam thleng pawha inzawmna an neih chho tan avangin a tan pawh an tang a, Mizorama Car dealer-ah ka pa aia lian an awm lo. Hnathawk pawh a ngah rêng bawk a ni. Kei erawh zep nàk emaw sumdawnna lam hi ka tui mang lo va, Force lam hi ka tui mah zawk em aw ka ti. Ka tetlai kha chuan Doctor nihtir kha min tum ve deuh a, a ngaihna thlawt ka hriat loh avangin min tilui duh bik lo. Sawrkar hnathawh hi an ni chuan an aim ber hran lo, a hlawk em em lo bawk a. Sumdawnna kawng chu zawh chak vak lo mah ila; ka pa thachhang dawltu nih ringawt pawh ka tan chuan inchhuanna tham a tling ve bawk a ni. Chuvangin hnar thiang ka ni lo. 

Ka pa lehkhabu min pekte chu ka pawm thla a, ka nu nen kan intawk, "Thawkrim hle ang che. I pa beiseina hi tithlawn suh aw" a ti sap a. Ka bengah a ring khawp mai. Lehkha zir lam pawh a lang lo. Rogera msg a lo awm ran a. He pa hian a ti mai mai lo tlat. 

"Kar leh zin ka tum kha ka thulh leh. Ka thianpa Manuna nupui neihnaa ka lan ve loh chuan dem ka hlawh dawn sia" a rawn ti thlap mai. 

"A that nasat chu, i ngaihawm lawk sa sia" ka va ti ve ngial a. 

"Tak tak a la ni ngei ang" a rawn ti daih. 

Ka pindan kawngka an rawn kik dat dat a, ka nu aw hian thlabar hmel angreng deuh hian,"Sangzual, lo hawng vat teh"a rawn ti a. Hlauthawng ru deuha ka va hawn chuan,"Ruatsanga nu a chau zual a, tunah hian rawn thlawk haw turin ruahmanna an siam mek a niawm e. Remruata nen va lang ve rawh u" a ti ta mai a. Ka lo phu zawk nghe nghe. Nu zoi chu rei a dam dawn lo tih ka nu thukhuh dan atang chuan ka hrethiam ve nghal. Rogera ka call nghal a, ani pawn min lo biak a tum chiah thu a rawn sawi ve bawk. A lo hre ve chiah a niawm e. Remruata nen Sangpuia car-in Ruatsanga te in lam chu kan pan ta a, Tunah tut tut chuan an rawn thlawk haw theiin ka ring lo. Ruatsanga te inah hian vawi khat ka kal tawh a, chu pawh ka tleirawl chhuah hlimin. Ruatsanga u birthday kan lawm tumin a ni. Thenawm khawveng bakah Nu Zoi chhungte lam an lo thu ve a. Nu Zoi nu Pi Zohlupuii chu a meng sen rám a, a tap fe tawh niin a lang. Nu Zoi natna chiah hi ka hre bik lo, a buai thut thin an ti mai a, Chhul lam chiang lo te pawh a ni maithei. Amah hi a dawldangin a che reng reng hi a harhvang lo thin êm a. A damlo pawh a mak vak lo. Mahse, chutia thi ringawt tur chuan ka ring phal lo. Mak ka ti dawn êm mai. Pa Tluanga pawh a lainatawm takzet. Ruatsanga chu an bathlarah a thiante ho nen an lo thu thap a, an lo hnem ve a ni maithei. Malsawmpeka pawh chiang takin ka va hmu. Rogera pawh kar loah a lo thleng a, ka bulah a rawn thu ve nghal. Mahse, "Va hnem ve rawh, a lungngai viau ang" ka tih avangin Ruatsanga kawm tur chuan a chhuak ve a. Nu Zoi pu Pu Valtea nupui Pi Dorothy chu a la nalh zek zawk hle, hranghlui zaithiamah chuan ka ngaihthlak nasat pawl a ni maithei. Sawi tawh angin zai hi ka ngaithla tam lo êm zawk a. Ephraime-a fate kan ni tih an hriat vangin min lo be nghal siam siam a, ka pa chanchinte pawh min zawt ve luam mai. 

Thingpui lumte a ngai sia, an thenawm nula Mathangi tia an koh nen kan va lum a, a fel thar thar hle. Kei ai chuan a ú hlek ang. Mi pawh an pung ve zel a, Ruatsanga te thianho pawh an rawn thu lut ve tawh. Ruatsanga nau Ruatpuia an villa lama tamtal pawh a hmel ka hmu ve ta. Ruatsanga nen chuan unau an ang lo viau, Ruatpuia chu a ramvachalin hna a thawk nasa tih a hriat ngawih ngawih mai. Thahrui pawh a nei khawp ang le. Thingpui ka sem lai chuan Pi Zohlupuii phone chu a ri ta tlang tlang a. "Tluanga a nih hi" a ti hliai a. Hlauthawng takin kan lo ngaichang thap. 

"Aw ,tluanga, eng nge in an zel" a ti a. Ani pawh thlaphang hmel a pu. 

Pa Tluanga tawng kan hre phak lo naa, Pi Hlupuii hmelhmai atang chuan thu lawmawm lam a dawng lo tih a hriat nghal ruak mai. A hmai a hup a, a tap khur ta ngawt ngawt mai. A pasal chuan a kuah vat a, insút hraih chungin, "Ka fanu a awm ta lo. Zoi, Zochhingpui, ka bawihte. . a pawi a ni tiraw? Hmeichhe vanduainu, i nu hi min ngaidam rawh aw. Keimah vang a ni, keimah vang vek a ni" tiin a rak tuar tuar a, a pasal àwmah a lu phumin a tap khur hlawk hlawk mai. Mi dang zawng pawh chu an tap nghal chuah chuah a. Ruatsanga ka va en vat, a lo indawmkun tlawk tlawk a, a bula thu Mala chuan a hnungzangah a lo chul hliau hliau bawk. Kei pawh ka lung a chhe deuh, tah êm erawh ka hreh êm thin a. Choka lamah ka phei vat. Mathangi khan a mittui a lo hru ve mial mial a, "Nu Zoi chu ka va ui tak êm. Thenawm tha ber a nia sin, engmah ui leh i nei ngai lo, kan tan vantirhkoh a ni thin asin. Nu Zo, i va vanduai chungchuang em" tiin a phun sêp sep a. Ti nge vanduai an tih viau le? A natna hi ka hre fuh ve lo em ni zawk? Ka nu ka call ta a, chanchin ka hrilh vat. Ka pa pawn a tuar ru ve viauin ka ring. Nu Zoi kha a nau ang thawthangin a en thin a, kan tetlai phei chuan ka pa farnu emaw kan ti thin. 

Chutiang a nih teh nuaih avang chuan thalai lam pawh rawn pungkhawmin hman ata tawh Mizote nuna bet leh mawi em em Tlawmngaihna chu an rawn pholang leh ta a. In te chu an han singsa a, singsak em em pawh a ngai lo, an in chu a zau sa bawk nen. Tih ve vak tur ka hre si lo, ka din reng laiin Mala a rawn kal phei fua a, ka beng bulah, "Hmun hi phiat rawh" a ti sup. Kei pawh harh chhuak zawkin hmuphiah ka chuh ta vat a. Ka awmna atang chuan ka phiat zui nghal. An tap tuar tuar reng a, Pi Hlupuii thu chham dan lah chuan lung a kuai si. A then erawh ka hrethiam lo thung. Pu Valtea pawh chu bathlara va dak vang vangin, "Bawihte, Ka naute duat, i nun a va tawi tehlul êm. Reitak dam turin ka duh che asin, mahse, i phurrit kha a rit êm a ni tiraw? Tunah chuan Pathian angchhungah thlamuang takin chawl hahdam tawh rawh aw" a ti vawng vawng a. A tunu chuan a rilru a luah hneh hle tih a lang. Ruatsanga erawh a ngawi reng a, a rukin a mittui a hru leh chawt chawt thung. Ruang lo la thleng lo mah se, thalai tlawmngaite rawn lut zelin nu leh pate pawh an awm nual. An veng chhungah an lo langsarin an lo fel bawk nen, uitu a ngah kher mai. 

Pi Hlupuii bawk chuan,"Bawihte, kha hunah khan let leh thei ila tunah pawh i la dam tur, i nu hi min ngaidam mawlh rawh aw. Ka lo á em a ni" a ti leh thin a. Eng nge a awmzia hre lo mah ila, eng emaw tak zawng a awm ngei niin ka hria. Remruata nen chuan kan chhungkaw aiawhin kan tlaivar ve a. Ruatsanga chu hnem ve chak viau mah ila, la hun rih lo deuha ka hriat avangin ka enliam rih. A sarhu lai chuan ná hi a na uchuak êm a ni. Thihna ngat phei chu ka la tawng ve chiah bawk si lo va, han inhnem dan tur a vàng ka ti. 

Kan han zai chho a, Rogera pawh ka bulah a rawn insawn leh tawh. Thalai zinga hmeichhe lam chuan Mala nen an en duh hlein ka hria. An langsar dun ve êm bawk a tin ni. Ka beng bulah, "I mawng a kham tawh em? Va chhuak ang hmiang" a rawn ti sur sur a. Zep loh chuan a kham ve thawkhat tawh viau a ni. Bakah ka ril a tam, eitur an sem har si. "Umm" ka ti vat a. Kan inzui chhuak ta a. Pawn boruak chu a lo vawt vur mai. Ka inha lum vak bawk si lo nen, vawt ka ti viau. Bakah Ruatsanga te in awmna lai hi a dám ve deuh bawk a. An in kawt maia in ding ve store vel atana an hman ni awm takah chuan thalai thingpui lum chu an lo ri ve laih laih bawk. Remruata pawh ka bulah awm duh bik loin a kal hrang daih a, ka hmuh leh awm pawh ka hre lo. A haw bik êm lovang chu maw. Ruatsanga te in chhak lawkah dawr niawm tak a awm a, lut chhuak an awm deuh bawk nen, "Ka ril a tám, eitur an sem har sia, hawh thil han lei ang" ka ti a. Kan kal zui nghal, ani pawn zial a tan nghal. Dawr chu a lo ni ngei a, mahse, a kawrawk angreng. Han inhnawhpuarna tur em em an lo nei mang lo va, lei vak tur ka hre lo, nihawichi te ka lei ta ringawt. Kan chhuah chuan, "I ril a tam viau chuan, Loicy te dawrah va phei mai ila" a ti a. Riahchilhtu an awm vang hian an ni chu kaihthawh theih an ni reng thin. Mahse, chutia va pen bo daih chu mawi chiaha ka hriat loh avangin, "An sem ve tep ang. Nghak law law mai ang" ka ti a. Dawr thlanga tanky chungah kan thu rih a, ka inkuah hlan a hmuh vang nge a jacket hak lai chu phelhin min rawn khuh a, tlemin a zia ta deuh. Ani chu vawt ti ve hmel pawh a pu lem lo. 

"Ruatsanga chu a zia lo khawp mai, Nu Zoi ka uizia hi aw" a ti vung vung a. 

"Kei pawh, a mak e tiraw? Dam takin an lo haw leh ka ring a nia" ka ti a.

"Aa..kei chu hetiang hun hi a thlen chu ka la ring ru tho. A natna kha a dangdai bawk êm a ni. Pa Tluanga a lainatawm, amah chauhin a nupui ruang a dawmhlum dawn chu a ni awm sia" a ti a, Ka rilrua awm reuh reuh kha sawi chhuah hun nia ka hriat avangin, "Pi Hlupui tah hla kha kei chu ka hrethiam lo reng reng. Vanduai kha an ti em em a, a natna hi eng natna chiah nge le?" ka ti ta a. A thaw hawk a, mi rawn melh zauh, "Natna maksak tak a ni" a ti sup a. Ka lo melh reng, "Chutiang chuan ngai tawp mai rawh" a ti leh daih a. Ka hrilhhai deuh. Mahse, inzawh zui vak chi a ni lo a niang tih ka ring thiam ve nghal a. Nakinah ka nu la zawh atan tiin ka ngawihbopui ta rih a. Ruatsanga leh Mala te rawn inzui chhuak chu ka zuk hmu a, kan lam panin an lo chho zel bawk. Kan zawn an lo thlen chuan, Lawmkima Drose te fapa chuan, "Ruatsanga ippik lutuk tur tihthawven nan kan chhuak vák dawn a. Lo tel ve ula" a rawn ti a. Rogera ka melh zauh, "A pawi hran hleinem, ka bialnu hian rem a tih chuan" tiin min rawn melh hlauh zawk a. Ruatsanga mitmeng ngui zet ka va hmuh chuan, "Aw..nia, a pawi hleinem" tiin ka ding a, Rogera a rawn ding ve nghal zat. Malsawmpeka ner sak lai chu ka va hmu chiang tak. Street light chuan a chhun chiang mai si a, a va hmeltha tak. Ni lo, kei hi tianga awm tur ka ni lo. Kan inzui chho ta thám thâm a. An ni pathum chu Mala carin an kal a, keini Rogera nen. Khawi lama kal ta lo chuan Bar lam an pan ta. Ka rin ruk tho chu a ni naa, mahse, zu rui vak lo se ka duh. A mualphothlak dawn em mai, midangin an hriat chuan. Bar nghaktute chu an hmelhriatsa an ni nge ni an kai tho a, khawlai pawh reh tawh tak a ni. Reiloteah an rawn hawng a, an lo inhre sa ngei e, an inbiak danah. Pindan ril lamah kan inzui lut a. Room nuam leh zau hek hawk, thawveng halh maiah chuan thuthmun kan rem ta a. Rogera'n ka beng bulah, "I la hriat loh takin he bar hi Lawmkima te ta a nia" a ti ta a. Ka lo hre ngai lo a nih chiah chu. Eng zu nge an lam pawh ka hre lo, Ka tan beer cane khat an lam ve a. Kei chuan ruih ve pawh ka tum lo, ka nu warning kha ka hre ve kur bawk si nen. Eitur an rawn la ta a, zah pawh dawn loin ka lo ei sawk sawk. Riltam hi tawrh a har ve bawk êm a ni. An cool lutuk a, boruak pawh a uap churh ni maiin ka hria. Ka ning ta deuh a, "Ruatsanga tihlim turin kan chhuak a, kan ngui nghuai hlawm a, a phurrit kan belhchhahsak mai mai. Tawng rawh u" ka ti ta a. 

Zu chu an han in ta a, Roger erawh Mala hriat theih tur ngeiin, "No khat kha a tawk aw. " ka ti sep a. A bu nghut. Ka chumi sawi vang chu ni maw Mala chuan a lam belh leh ngat a, midangin an inpui tawh loh hnuah pawh a birh tlut tlut mai. Boruak pawh a zangkhai ta deuh a, Ruatsanga chuan, "Inti lawmawm khawp mai. Mahse, ka dam a nia thiante u, ka nu kha ka sunna a rei tawh alawm. Dama an lo haw leh hi ka ring lo ve tawp a, ka ring dik a nih hi" a ti a. A hnuk erawh a ulh lek lek tih a lang. 

Mala chuan, "Mipa diktak tan pawh thihna hi kalpah chi a ni lo alawm. A na ang, a nat ang ang khan awm la, chhel tum viau duh suh. A hunlai chuan sún la a tahte pawh tap bawrh bawrh rawh. Nute aia hlu hi an awm lo a nia" a lo ti ve nghut nghut a. Lawmkima pawh chuan a lo hnem ve hluai. 

Pum ruah laia beer ka in vang ni maw ka pum a let a, a no riau. Ka luak a chhuak ta deuh tlat. Wash roomah ka va lut a, ka va uak tuar tuar a, luak mah ila pawi ka ti vak lo. Ka pum chuan min hàm tlat si a. Tlemtê chu ka luak thei hram e. Ka chhuah dawn chuan Remruata'n min lo call a, "Ú, thian ka nei bawk si lo va, ka haw mai dawn. Bakah ka lu a na reng a" a rawn ti a. Bathlar thlanglamah chhuahpuiin, "Aw le, fimkhur la aw" ka ti a. Thlifim thaw heuh heuh chu dawngin khawvawt pawh hre vak lo chuan ka han ding ren rawn a, ka mutchhuak deuhte pawh an reh tan e. 

"I pa eng nge a an?" ka phu chiang lutuk, ka hawilet zawk a. Mala chu a zu no keng chungin a lo ding run mai. Lehhawi leh hmak pahin, "A tha" ka ti nghat a. 

"Chuan nang i tha em?" ka dinna bula rawn din ve pahin a ti nghut a. Amah pawh melh duh lo luiin, "Min hmuh hi, ka tha" ka ti ram leh hmak a. Ti nge maw ka thin a rim leh dawn ringawt ni. 

"I tha lo takzet a nih zawk kha" a ti daih. Ka va melh káwk a, mawi zeta nui chungin mutchhuah hmel lek lek hian min lo melh a! 

Hlauthawng thutin, in chhunga luh ka tum a. Min dal chiang kher mai. "Rogera'n min rawn hmu ang e..a thinrim ang" ka ti a. 

"Ka hlau ve hleinem" a ti thum dút a. 

"ka hlau thung alawm" ka tih chuan na zet hian min rawn melh a. A lu thing nur nurin,"Aw le, kal rawh. Dawihzepnu" a ti hniam raih a. Ka pen chiah tihin kawngka bulah Roger a rawn lang ve chiah. Kei chu min melh lo, Mala a ni a melh ni. An inmelh tawn ta reng a, an inanna chu an mitmengah thinrimna hmuh tur a awm miah lo. Mahse, an awmdan chuan ngaih a titha bawk si lo. 

"Phei tawh ang u" Rogera va kaih tuma ka tih lai chuan,"Eng nge ka bialnu bulah hian i tih?" Roger chuan Mala melh chungin a ti mai a..a dik dawn hauh lo mai. Mala chuan a zu no ken chu lek kang zauhin, "Bathlarah zu ka in. I bialnu a lo awm remchang a" a ti dam thluam a. 

"Mala, nizanah chiang takin ka sawi tawh. Min pallui miah suh" Roger aw chu a chang mah mah a ni. 

"Ani ka biak hian i lo na zawk zawk zel tihna a ni maw? Wow! Chuti taka ka lo ropui pawh chu ka lo hre hleinem" Mala aw ah chuan tiêlna a tel chiang. 

"Ka thiantha ber nih i la duh a nih chuan i kuang lo chu nawr suh. Hmeichhe chungchanga ka thikthu chhiatzia hretu i ni" Roger aw chu a khawngaihthlak lek lek. 

"Roger, i hmeichhia hi ka chhuhsak hauh lo vang che. A duh a nih erawh chuan min rawn pan thei e. A chiang em? " Mala aw chu dam viau mah se, a hlauhawm ru riau. Ka tuar thei ta lo va,"Duhtawk ru, bungrua ka ni lo a nia" ka ti a. 

Ka pen nghal páwk páwk. Roger chuan min rawn zui vat. Kan boruak hrethiam takin Lawmkima chuan, "Roger, nang pawh naupangchhia viau zel suh. Kei aiin i upa zawk naa, i thikthu hi mualphopui teivet suh. " tiin a lo zilh malh malh a. Ruatsanga erawh chuan min melh kur ringawt. Mala pawh a rawn thu ve leh a, Phei ka rawt sek avangin kan phei leh ta dial a. Motora kan luh hnuah, "In inthianthatna talte chu zah ve ta che, Engtinmah kan awm lo" Rogera bulah chuan ka ti nghat a. 

"Ka thianthaber mah nise, ka bialnute bula awm turin ka duh lo. Kha kha ka warning a ni tih nang pawn hria ang che. Mi thikthu chhia ka ni" a ti nghut a. Lehlamah ka khawngaih letling. 

"Min duh tak tak em ni? Roger" ka ti sep a. Hmalam ka melh ran bawk. 

"Aw..hman atang tawhin. Ka birthday zana i mipa duh i sawia ka thinlung natzia kha i hrethiam pha ngai lo vang. Ka thianthaber a ni bawk si..Sangzual, neih che pawh ka duh a ni. Ka hmeichhia ni reng la ka duh" a ti duah a. Hman a tih chu khatia kan inbiak tak tak hma College ka kal tirh dawn Shillonga ka chhuk hma hian Pa Rosangpuia'n chawhlui min buatsaihsak a, chumi tum chuan Roger pawh a rawn kal ve a, chu chu chiang taka ka hmuh vawikhatna a ni. U Loicy rooma kan awm laiin a rawn lut ve a, Rose par sen kuang khat hi min pein,"Hei nen hian in inang" a ti sup a. U Loicy te an lo nui vak vak a, kei pawh lai viau e ti lo chuan ka nui ve nasa. Ta tang khan innel chhoin tun hi kan thleng ta chu a nia. Khatihlai pawh khan min lo duh tawh a ni mahna. Engpawhnise, chuti taka min hauha min thlahleltu chu mipa dang vanga tihnat loh hram ka tum ang. Malsawmpeka thusawi zawng zawngte erawh rilruah a cham reng tho. Hmeichhe lelo tak anga duh pahnih neiha pakhat kalsan hlen thei si lo, pakhat beiseina siamsak reng lawi si ang kha nih ve ka duh lo va, Mala laka ka lo nunrawng ta deuh a nih pawn ani chuan min hnawlin ná min lo siamsak tawh a, a chantawk ve rengah ka ngai thei ang. 

Zing dar 4 bawr velah chuan ka meng hleithei ta thlawt lo va, Rogera dar nghengin ka lo muthlu nasa mai. Ani erawh zu te kha a in vang nge a meng tlang parh thung. Dar 5:30-ah kan inah min thlah a, Remruata khan car kha a hawn daih si nen. Ka nu pawn phiatfai chuan rawn hmuin, "Roger, i va lo leng duh lo ve" a ti làng làng a. 

"Ka buai ve thei lutuk a, ninawm khawpin ka la rawn leng dawn alawm, Nu Zo" nelawm takin a ti a. Kan inthlah ta rih. Mut leh zuai ka duh, ka mit a thîp êm mai. Nu Zoi ruang chu dar 12 velah a rawn thleng dawn chauh bawk nen. Ka mutui bawrh bawrh ngei mai. Ka nuin min rawn kaitho a, Dar 10 a lo pel tawh. Phak zetin ka tho a, mahse, awm nawm lohna ka nei hran lo. Chaw chu keimahin ka ei a, ka pa thu angin kan chhungkuain Nu Zoi chu kan va thlah ve dawn a ni. Ka eikhamah ka inbual a, ka insiam zui nghal. Puan bih hi ka zei tehchiam lova, mitthi vuina a ni tho e tiin kawrfual dum ka ha hnulh a, ka te chhe lem lo bawk a, ka inhmeh ve viauin ka hria. Kan han inkuah chhuak hlawm a, Sangpuia chu a kal thei ta viau. A dam ang tluk a ni mai e. Keiman car ka khalh thung. 

"Nu, Nu Zoi natna hi eng nge a nih chiah le? Ti nge mi zawng zawng hian vanduai an tih le?" ka ti ta a. Ka vei ru ve ngang a niang e. Ka nu chuan,"Hun kal tawh a nia. Tuna tharthawh leh vak chi pawh a ni lo" a ti mai a. 

."sawi ve mai la" ka ti tlat. Ka pa zawk chuan,"Zoi chu a vanduai ve bawk a ni. In pian hma daih, kei pawh Mizorama ka rawn chhuah chhoh hma hian Zoi chu a piang a. A hun lai khan sawrkar pawn a buaipui nasa viau reng a ni. A nu leh pa fate saw ni mahse, a thisenah virus chi khat kahluh a nih avangin a taksa a danglamin ramsa hlauhawm tak angin a khawsa thin a, ZCP vanglai khan kan tan a thawk thin a, kei ngei pawn a damna tur ka ngaihtuahpui nasain doctor tam tak ka rawnsak a, a chhawkna damdawi bak an hmuchhuak lo nge, a dam hlen zo ta lo chu a nih hi..I Pa Tluanga hi a chhelin Zoi kha a lo hmangaih khawp mai." a ti ta a. 

."chu! Warewolf-ah a chang thin tihna em ni?" Remruata chuan a rawn ti vat, a ngaihven zawng tak a lo ni bawk a.

"Ni chiah chuang lo, mahse, a thawh dan chu a inang thuak. Mahse, Zoi danglamna chu a hmangaih leh a lainate la hriat hran ve theihna rilru fim a la pu ve thei a,tin, mihring sa a ei ngai lo bawk" ka pa chuan a ti leh a. 

"Khatih chhung zawng kha a lo inthup tihna a nia. An va thei zawk, a chhungte pawh" ka ti hluai a. 

"Ekhai! Hun harsa tak tak an paltlang zing alawm. I Pa Tluanga hian an in hnuaiah room thim tak, tuma tlawhpawh theih loh tur leh thawm hriat theih loh tur a siam ru a, I nu Zoi a damloh apiang khan chutah chuan a khung thin a, sa hring a pe thin. An lainatawm nupa asin. Tiang thil rapthlak hi chu Zoramah chuan thleng tawh lo hram se a lawmawm ngawt ang" ka nu chuan a ti duah a. Pa Tluanga ka lainat ta hle mai. 

"Virus kap luttu chu tu nge?" Sangpuia a ni. 

"A nuin naute a pai lai tawha an kahluh a nia, Science thiamna hmanga tih nimahse, Khatih laia pawl pakhat ding khan an lalram zauhna hmanrua atana hman an tum a, a ven pawh an veng uluk..Zochhingpuii chanchin hi chu thui fê sawi tur a awm ang, An chhungkua leh an pawl din rúk chanchin inziahna 'Thurúk' tih kha ka la kawl alawm. Remruata hian la chhiar teh se.." ka pa chuan a ti a. Remruata a phur hmel viau. Kei erawh chuan ka chhiar chak lo,. 

Ruatsanga te in kan thlen phei chuan an lo tam tawh khawp mai a. Mi zawng zawng chu an ngui nghiai mai. Ka pa chu wheelchairah kan thuttir leh te te phawt a, mi mit kan chungah a fu nasa hle. 

."Khawi ka lo nawr ang e" Mala a ni. Ka pa chu zo zetin a nawr lut a, Roger erawh ka la hmu ve lo. Kan chhungkaw thutna tur bika an zuah niawm takah chuan kan va thu ta thap a. Zai a nuam viau mai. Ruatsanga te unau pawh hmel ngui takin an thu ran a, a hnu deuhah Mala leh Roger ten an rawn thutpui ve. An thianpa chu thlahthlam an tum lo khawp mai. Dar 1 a ri dawn tihin Nu Zoi ruang chu an rawn zawn lut ta. Tap riin in chhung chu a khat a, chuti taka uitu leh súntu a ngah chu a mak lo. Ka hriat ve theih chinah Nu Zoi kha nu nunnem, tu pawimah sawi lo a ni tlat a ni. Ka nu pawh a tap nasa mai a, ka pa erawh a thu ngil at a, thil eng emaw ngaihtuah hmel a pu. Kuang mawi takah an zalh a, Ka pangpar ken ve ka va dah chuan Nu Zoi chu ka thlek zauh a, nu hmeltha tak a ni. Mahse, a dana a danzia chu aw..Nu Zoi chu ni lose mi ráp viau ang. A thisen zawng zawng an hipkansak emaw tih mai tur a ni. Mitthi mah nise a dán dan kha a danglam bik tlat a ni. Ka ngaihbel te pawh a ni maithei. 

Pi Hlupui, Nu Zoi nu mawlh chu a ni. A fanu ruang chu a kalsan thei hlawl lo va, a kuah leh ngawih ngawih thin. "Ka fanu,bawihte, ka thin hi a va rim tak êm..kei hi thi zawk ila tiraw..a pawi lutuk a ni" a ti tuar tuar mai a. A pasalin duat takin a lo chul heuh heuh bawk. Pa Tluanga hmel hmuh erawh rin aiin a nuam thung. A lo sûn hrep tawh a ni mahna le. Ruatsanga te unau pawh ri si loin an tap khur ngawt ngawt a, ka hnuk an va tiulh nasa tak êm aw. Nu an nei ta lo ringawt chu a nia. 

Kan han invui fel ta a. Kan hawn dawn chuan Pa Tluanga'n min thlah a. A tar sawta ka hriat ni. Ka khawngaih takzet a ni. 

In kan thleng chu ka nu nen rawng kan bawl nghal zung zung a. Chutih lai chuan TV-ah news an rawn puang a. Hetiang hian, "Biakdiki thattu chu man ni tawhin, amah hi Biakdiki pasal Lalropuia a ni a, Zu ngawlvei a ni. A nupui hi a hma pawhin vawi tam kut a thlak thin a, taksa hmuh tlak awm lo khawp khawpa khawihte pawh a lo nei tawh thin tih an thenawm khawvengte chuan an sawi a. Lalropuia hi custody-ah dah rih niin, Naktuk zingah Central jailah phurh thlak tur a ni. khamini Biakdiki ruang hmuh ni zingkarah khan nasa takin a nupui nen an inhau a, Biakdiki hian chhuahsan tumin a thawmhnawte pawh a khung a, mahse, chung a thawmhnawte chu a sah sawmsak vek bakah kawngka inkalh hnanin nasa taka a nupui a sawisak hnuah, Lalropuia hian a nupui chu a dulah vitin an kawmthlang luikawrah a zuk paih ta a ni. A nupui hi zu man tur a dil a, a pek duh si loh avanga that niin a insawi. " tiin. 

Ka ding khawng ta reng mai. Khamini Biakdiki te in niawm taka kan va luh tumna hmun min rawn hrilhtu kha Biakdiki a ni ang em le? Min lo betu Biakdiki kha Biakdiki tak tak a ni ang em?!

Biakdiki number kha hmetchhuakin ka call ta a. A ring ral ral mai. Reivakloah hmeichhia hian a rawn la a. 

"hello" a ti nem diai a. Nutling aw a ni. 

"Ka pi, Biakdiki number tiraw hei hi" ka ti sap a. 

"Aw ni e..eng nge ni ta?" a rawn ti a. 

"Tu nge i nih ka pi?" Ka ti ringawt. 

"A nu ka nia, tu nge ka biak aw?" A rawn ti ta a. 

Ka phone ka hmet hlum daih. Thil hi a dik lo a ni. Eng ber nge dik lo ta le?!

(Hehe