malsawmpeka 7

MALSAWMPEKA (7)

Ziaktu : Toni Râlte

An vai mai chuan min lo melh thap a. Hlauthawng takin TV lam ka en thung. An puan dan chuan, Biakdiki chu Lawipu thlanga lui kawr kamah a ruang chu hmuh a ni a, Tukin zing dar 3-4 inkar vela thi a nih a rinawm thu an sawi bawk. A dul dinglamah vihna niawm hnuhma a awm a. A thisen chhuak erawh a khang tawh thung. A bak hliam dang a neih hriat a nih loh thu an rawn puang. Kei chu ka sahal vek tawh. Engtin nge Biakdiki chu a thih theih? Keimahah inthiam lohna a rawn lut nghal zung zung a, keimah vanga thi angah ka ngai ringawt. An inah khan va kal lo ila tiang hi a tawk ang em? Emaw kan va kal khan khatia let leh nghal lo khan lo luhchilh law law ila, kan chhanhim thei zawk ang em? 

Mala chuan min rawn pan a, ka banah kaiin ka room lam min panpui. Lo awm vete bulah chuan,"Min lo hrethiam lawk teh u" a ti nghut a. Kei pawn thuawih takin ka zui. He thil hi a la sawifiah miah lo tak alawm. Khumah min nam thu a, ka la sahal deuh avangin ka rilru a mang hle. Chairah a thu a, chiang deuha min enin,'Nangmah vang a ni lo a nia aw" a ti sup a. A awka a dam thlup mai. 

"MAhse, kan chhanchhuak thei asin" ka ti thám tiak a. 

"I thei lo, kan thei lo. Khalai hmunah khan va lut lui ni ula, tunah hian mi bo zawnin kan zawng luih luih tawh ang che u" a ti leh a. 

"Biakdiki khan an eng pawi nge a sawi? Ti nge an tihhlum kher?" ka ti tiau a. Hmeichhe thinlung hi a lang lo thei bik lo chu a ni. Ka thiannu chu ka lainat êm a ni. A chil a lem khawlh a. Ka lu chu kuaikunin a dar min nghentir a, "I upa zel ang a, khawvelah hian pawisawi lo tam tak te, misualte kuta thi i la hmu fo ang. Mak ti suh. " a ti sup a. Min diriam leh elsenna aw a ni lo tih ka chiang. 

"Keimah zawk kha lo inmantir ila, Biakdiki hi a la dam tur" ka ti leh a. 

"I pa engtin nge a awm ang? I tel loin" a ti tham tuak a. Ka pa hmel ka mitthla a, kan dinhmun khirh lutuk leh ka pa sulhnu bakah an phiarrukna te chuan ka rilru chu an tibuai takzet a ni. Kawng zawh tur ka hre lo va, hawina tur lam ka hre hek lo. Keimah vanga mi dang nunnain a tawrh ka duh lo hulhual bawk. Biakdiki chu an hmanrua a nih si chuan ti nge an thah mai ang le?! 

"Engpawh nise, I thiannu chunga thil thleng hi ka nu ngeiin a case a lak ka ring a, i thiannu hmang hian i pa an phiarrukna te pawh hi kan hailang thei maithei asin. Chumi hma chuan i him a ngai, khawiahmah chhuak lo la ka duh, class i kal a nih pawhin Ruatsanga tel ve zel rawh se" a ti nghet charh a. Ka pa ni mai awmin a tawng a ni. Mahse, lo hnial tumna ka nei hran lo. Buaina mai mai. 

Midang an ngaih a tha lo vang tih hlauin kan chhuak a. Biakdiki thihna chu a nihna ang anga pawm ka tum ta mai. A thlarau erawh ngaihdam ka dil mawlh mawlh thung. Mi dang zawng an hlim leh phur laia ngui bik nih ka duh lo va, ka intiharh hram hram. Nunui leh Sangpuia ten ar an puah dun a, Saroni erawh nalh deuhin a thu. Kan phût ngam vak lo te pawh a niang. Remruata a lo la haw pek lo va, tiang hunah chuan ngaihtuah an na thin si, ka call a, vawi 3 lai a ring ral. Ani hi tih loh lohte hi a ti ve em mawni dawn le. Ruatsanga leh Davea te nen salad kan siam a, an phur sûrh sûrh hle. Mala erawh phone a hmang. Biakdiki vel kha a ngaihven a ni maithei. He pa hi rin ka duh a, ka rinngam bawk si lo. Laklawh deuhah ka ding. Ar chu a pumin kan hem hmin a, Dave leh Ruatsanga te tan ka pa zu dahna ami Brandy ka laksak a. Saroni pawn a in ve. Keini midang erawh chuan beer kan in thung a, Nunui chuan coke a in. Khua pawh a tlai chho tan a, Ruatsanga te chuan farm lama changel hnah ngei maia chaw ei an rawt leh ta. An phur si. Ar pum pahnih hem hmin bakah vawksa fry, Salad leh Nunui bai thak tui hmel deuhte chu farm lamah chawi thlain an farm house kawt zawlah kan dah a. Mala leh Ruatsanga'n changel hnah an lo sat thung. 

"A hygene lo e, tiang vel hi ka ngaina" Saroni chuan a ti hmarh hmarh a . 

Dave lah chuan," chaw ei a tui duh alawm. I ei teuh mai ang" a ti thur thur. An kai nam ve tawh bawk nen, boruak pawh a nuam chho viau e. Remruata a rawn haw ta bawk a, call a lak theih loh chhan ka zawh chuan,"Accident an awm a, kan buaipui ve a mawle" a ti mai a. Ka zawt zui tawh lem lo. Farm house kawt zawlah hian grass an phah duai a, thutthleng pathum an hung bawk. MAhse, phulah chuan kan thu far a, chaw kan la chhum hmin lo deuh. Ka nu call ka dawn avangin ka kal hrang deuh a, "Chanchinthara an lo puan kha i thiannu kha a ni tiraw?" A rawn ti nghal táwng a. A nih thu ka sawi chuan,"a zia lo em mai. Engpawhnise, lo fimkhur u la aw. " a ti a. Mi hi a ngaihtuah thei siah. 

Ka va thut phei leh chuan ka bulah Mala a rawn thu ve chut. Midang ho ngaihah chuan inngaizawng kan ni. Ka sawifiah peih lem lo bawk. Nunui leh Sangpuia chaw vil chu an rawn chhuk a, cooker an rawn khai thla bawk. Tlai dar 5:30 a ri ve mek a, khua pawh a unau hmelhai tan deuh. Dave chu ka rin aiin a kai a, a au leh lûng lûng thin. Saroni pawh a phelh phang tawh mai. Chaw ei kan han siam tan a, mipa ho an che peih khawp mai. Kan kebai ber Sangpuia pawh a che sûrh sûrh mai. Kan han kil dawn chuan, Saroni ta pek chuan,"Ka kil ve lo vang. Thlengah hian ka ei ang. Khatiangah ka ei duh lo" a ti hmuk mai a. Dem ngawt chi pawh a ni bik lo, ten zawng a inang lo ve a. Kan sirah a ei hrang ta a. Changel hnah ngei maia kan han ei chu kei nuam ka tiin, beer kha ka lo in ve hlek bawk nen, chaw chu lut duh hek hek tak a ni. Ka la ei dawn chauh emaw ka tih laiin Mala chuan ka beng bulah,"A tawk, i dul a kiar vak ang e. Chawhehnu" a rawn ti sup a. Ka tawp chawt. A va ngeiawm e aw. Mahse, bar hnih vel chu ka bar leh hram. Kan tlai e, kan puar e. 

Kan han intihfel zawhah chuan Remruata'n a u guitar a han la sauh sauh a. Farm kawt zawl thla engin a chhun riainaah chuan thu kualin kan han zai ta a. Sawi tawh angin ka zai thiam ve si lo, ka zai ve chak bawk si chu a key ni lo loin ka lo be ve a, Ruatsanga'n min lo nuih khiah khiah mai. Farm house hi a in hualin ka nu pangpar leh plant ten an hual a, a mawi chu thuhran a nuam em em a ni. Kan zai rei telh telh a, Dave leh Ruatsanga lahin an tauh mawlh mawlh mai si, Dave phei chu ka duh aiin a rui tawh. Ven deuh ngaia ka hriat avangin beer pawh ka in duh tawh lo va. Ka mitmei ru deuh reng mai. Nunui chuan rin ai daihin zai a lo thiam a, ngaihthlak a nuam viau mai. Ka phone a rika ka han lak rual chuan Mala leh Saroni te kan bulah an awm lo tih ka hrechhuak chiah. Kan zai tui a talángin kan lo ngaihven vak lo a nih hmel. Msi hnen atangin call ka dawng a, Farm house hnung lamah ka phei a, pangpar buk bulah dingin Msi chu ka bia a. Lehlamah an la zai puak thuai thuai bawk. 

"Rpa'n inrukpuiah min sawm ngat ngat a, a rui deuh niin ka hria, ka rilru a hah tawp" a rawn ti a. Ka nui huk. 

."Eng nge a awmzia? A á tawh nih chu" ka'n ti ngawt a. 

"Chu chu lawm. Kan in chhak kawngpuiah ka lo nghak ang che a tia.." a rawn ti a. 

"Kal suh. Ka lo be ve dawn nia, zirna a la laklawh, bakah inruk ngawt chhan tur in nei lo " ka ti a. Ka tih pahin Farm house hnung lam ka pan pah bawk, ka inher tur chiah chuan farm house hnunga lo inpáwt chát chátte chu ka va hmu ta mai a! Msi aw chu a hla duai mai. Thla eng lah chuan a chhun fuh nasa si. Ka beisei loh tawp ka hmuh avang chuan ka hamhaih a, thawm pawh nei loin hrui zam phena ding chung chuan ka melh ta reng a. 

Malsawmpeka chuan Saroni kut chu lakthlaksak pahin,"Saron, Dave pawisawi ka duh hauh lo a nia. Min tikhawtlai tawh suh. Phei rawh" a ti chang rût a. Saroni kai nam tawh lah chuan pawisak a nei reuh si lo, Mala nghawngah chuan kuahin a uai ngáwng ngáwng nia. "Mal, tun baka hun tha hi ka hmuh leh ka ring tawh lo, Ka rilru zawng zawng i hriat vek tawh kha. An ni ho saw chu engahmah ngai suh. An rui vek tawh. Kan awm lo tih pawh an hre lo vang" a ti hiam hiam a. A itawm zawng a itawm thlawt e. Mala chuan Saroni kut pahnih chu phih chawrhin, "Ka nunah hmeichhia ka la lut dawn a nih ngai chuan, Thansangzuali chauh a ni ang. Min hrethiam teh" tiin amah zawk chu ka lama rawn phei a rual a, bang hrulah ka bet thlawp. Min hmu lo hram se ka duh a ni, ka thinphu ranzia lah chu mak tak a ni. Ka lawm nge ka lungngai nge, ka ni hû mai. Ka zauthau ka ti mai. Hrui zám chuan min lo hliah ve bawk nen, Mala lah hmalam en run chunga kal a ni bawk a, min kalpel thei hlauh e. A kal hnu pawh chuan Saroni chu a la ding ran a, thinrim hmel a pu. Kei aiin Saroni hian Mala hi a lo hre hmasa tawh a ni maithei. An inbiak dan atang khan. Ka thianpa bialnu nisi, chutia a awm ve reng laia mipa dang a han ngen huam huam chuan ka thin a tihrim piah lamah min tina tel bawk. Dave tluang lo lutuk chu ka lainat ngawih ngawih. Fel deuh, Nunui te ang ka la zawnpui ang. Ka thiannu Biakdiki boral mah se; hlim ruk riauna ka nei hi mak in tih loh ka beisei a ni. Ni e, Malsawmpeka khan engtin nge Saroni bulah khan a tih kha.."Ka nunah hmeichhia ka lalut dawn a nih chuan, Thansangzuali chauh a ni ang" a tih kha mawle. A awmzia chu Mala hian min duh lo hlawm tawp a ni lo. Eng emaw vangin rem lo a la awm mai mai niah ka ngai. Ka pate buaina hi a ni ngei bawk ang. Ka nghak chhuak thei ang em aw?! Tum zawng ka tum ang.

Ka va let leh chuan in lama chhoh tumin an lo insangsa mek a. Dave pawh a rui viau tawh nain hawn lam a hnaih. Chutiang chunga motor khalh tur chuan ka hlauthawng si, Saroni lah chuan, "Ani khan khawi lai mah min thlen lo vang e. Malsawmpeka motorah ka haw mai ang" a lo ti sek. 

Ka ngei ve deuh si khan, "Aw le, haw mai rawh. Dave chu riak mai rawh se. " ka ti ta hmak a, Mala ner sak chu ka va hmu thei. Engtin mah an han awm ka ring tawh lem chuang lo va, an lo awm a nih pawhin ka tihtheih phak bak a ni. Saroni chu ka ngei êm a tin ni. Dave pawn a zir lo, a rui ve mah mah bawk a. 

Ruatsanga'n Nunui a va thlah a, Mala leh Saroni an haw dun bawk. Engtin tak han awm ang maw. Ngaihtuah zui loh hram ka tum. Dave chu mikhual roomah ka kuah lut a, ka thlak fel a, a chatthla a ni mai e. Ruatsanga erawh a duh angin thutkhawmna pindanah a riak dawn a nih hmel. Kei pawh mu tur chuan ka intintuah a, ka chau nghulh ve mai. Mala chu an chin ka hre chak ngang si, ka insum zo ta mang lo va. Ka call ta a. Ka rin aiin a la hma. 

"I thleng tawh em?" Ka tih chuan a nui huk a, "Khawpui chhung kan lut chiah, Saroni ka thlah phawt ang" a ti tha ve mai a. 

"Kha hmeichhia kha ka best friend bialnu a ni tih i hria tiraw?" Ka ti sak. 

"Hre tehlul e a" tiel lek lek hian a ti a. 

"Khawih suh aw" ka aw chu a khawngaihthlak tawp. Tlawm ka inti mang e. 

"Aw le" a ti nghet charh a. Ka bialpa a la ni miah lo naa, ka bialpa anga ngaiin ngenna ka siam chu a ni bawk si. He dinhmun laklawh kual lutuk hi ka va duh lo tak êm aw. Ka mutui tehchiam lo. 

A tuk khua a lo var a. Ka pa a lo haw dawn tih ka hre hmasa ber. Ka khi sak a, a dam emaw damlo emaw kan bula a khawsak kha ka duh hrim hrim, ka nu pawh a khawngaihthlak. Riah chhawk a duh bawk si lo. Zing kar atangin ka nu hauh dalah in zawng zawng leh pawn thlengin ka tifai vek a, ka nau ten rawng an bawl thung. Dave erawh a la tho lo la, Ruatsanga'n motor a tleng fai leh thuak thuak. Tukthuan pawh kan ei hma vak lo. Eikhamah ka insiam a, kei leh Ruatsanga kan han chho dawn a ni. Remruata erawh chawlh ve duh viau mah se; test an neih vangin a kal hram. Dar 11 velah Ruatsanga nen chuan kan chho a, "Roger khan a atchilh hman viau che asin" a ti hlawl mai. Ka bangbo deuh hman naa, ka khi sak. "A hmel hi chu a tha alawm. MAhse, tluk loh a nei" ka ti a. 

"Mahse, Roger chu a zei alawm, a caring si. Loicy pawh hian a duh asin" a ti nghut a. 

"ka hria alawm, ni daih se, an inhmeh ngawt ang" ka ti a. 

"Aih, Unau ang deuhthawa lo inen tawh an nia, Roger hian a thiam lo vang. Tunah chuan tleirawltê mai a be mek. " tih pahin a nui a. "in lerh hlawm sia maw" ka tih chuan, "Lawmkima a lerh ber, kan zingah chuan. A bialnute an chhe lo thei bawk sia" naupangchhia deuh hian a ti a. Kan nui ringawt. Kar loah damdawiin kan thleng a, ka pa room kan pan ding nghal. An lo insangsa ve mek a, ka pa erawh a kala kal chi ziazang a nih loh avangin wheelchair-ah an zawn lut a. Ka nuin a nawr thla a, kei leh Ruatsanga'n an bungrua kan khai thung. Ka pa chu han en mai pawn damlo hmel pawh a pu hran lo, tlemin a cher ve deuh tih mai a ni. Motor hnungah an zawn lut leh a, wheelchair pawh lei nghal a ngaih dawn avangin kan va lei nghal law law mai. Eng chen nge a ke a hman theih loh dawn kan hre si lo va.

In lam pana kan tlan laiin ka pa chu tu emawin a rawn bia a, "Chutiang chu thil nihdan a nih chuan, Abigail pawh enthlak zui deuh a ngai dawn a nih chu! Chuan, Pu Rintluanga chu an kutah hlan law law rawh u, zaninah kan inbe tha dawn nia,. Ka nupui fanaute bula hun hman rih ka duh e" a ti chhum hmak hmak a. Kei chuan thil ka lo zeldin leh vak vak. Ka pa chuan a nihna dik tak ka hre vek tawh tih a hre dawn ngei si a, engtin tak min dawngsawng ang maw? in kan thleng a, kan han indah fel sawk sawk a. Ruatsanga a tangkai thin teh e, amah tlangval chak tak a lo ni bawk nen, ani chu awm lo se keini nufa ngawt chuan ka pa chu in chhungah pawh kan dah lut thei awm si lo. Sangpuia lah kebai mai a ni rih si a. In kan thlen meuh chuan eirawng bawl a lo hun leh ruai tawh a. Ka pain Ruatsanga chu heta ei ve tura a sawm avangin min pui thei dawn bawk. Ka nuin ka pa chu a bual a, an hahdam ve deuh hlek tawh ang chu maw. Bawngsa ruhkawl kan chhum a, ka pa tan a tui hàng chu a tha dawn êm mai a. Bai erawh Ruatsanga'n a siam a, ka rin aiin a thiam daih. Ka en reng tih a hmuh chuan,"Ka nu hi a fel a, unau mipa vek kan ni bawk nen, eirawng leh in chhung chet hi min tihtir hma alawm" a ti mai a. 

"Pa Tluanga te an zin sia, i u lah phaiah awm bawk si ,i nau lah ramhnuaiah. Nangmah chauhin em ni i awm?" Ka ti ta hlawl a. A hmain ka lo ngaihtuah ngai lo ve reng reng bawk a. 

"Ni mai e. Heta chaw ka rawn ei loh hi chuan ka pu ka nu putea te inah ka va ei thin. Ka pu nupui chu Dorothy, hranghlui zaithiam kha" a ti zung zung a. 

"Pa Tluanga chhungte nen in inpawh vak lo mi!" Nuam ti vak lo hian ka ti a. 

"Aw. Ka pa hian ka nu a neih avangin an tuithlar alawm. " a ti awlsam êt a. A sawi awlsam em avang chuan a engahmah a thawk vak lo a nih ka ring. 

Zanriah ei hma exer lak zuai tuma ka inthlak laiin ka pa call ka dawng a. In chungah a awm avangin min koh ri ka hre lo a ni maithei. "Lo chho rawh" a ti nghut a. Le..a hun a thleng ta, ka pa chuan ka rin aia hmain ka thil tihrûk a man chhuak rang. Hlauthawng thinphu dep depin in chung kailawnah chuan ka pen chho chhat chhat a. Ka nu nen kan intawk, a mitmengah thil danglam engmah ka hmu lo. Ka pa chu a private roomah a awm avangin chu lam chu ka pan ding nghal a. Ka dangte a ro huam huamin ka hria, zàm lo tur leh engkim sawi vek turin ka infuih mawlh mawlh mai. Kawngka ka kik a, lut tura min tih hnuah zawi muanga kawngka chu hawngin ka pen lut ta a. A chairah a lo thu ngil at a. Ka mitah chiang takin a melh bawk. A hmaa chair pakhat zawk chu a kawk zauh a, khur ru dar dar chungin ka thu ve nghal. 

"Sawi rawh" a ti hraim hraih a. Ka chil ka lem khawlh. Mangang zet hian,"Eng maw?" Ka ti sap a. 

"Ka roomah lutin document thenkhat i hai chhuak a, eng nge tih i tum sawi teh le?" A ti ta nghut a. Intihuaisen lui hram hramin, "Pa, ka duh vang reng a ni lo. Min ngaidam rawh" ka ti thei táwk. 

Zaidam zet hian, "Ka hria alawm naute, engkim ka hria. Mahse, khang document i hmuh khan engtin nge i awm min han hrilh teh?" a ti ta a. Ka tah a chhuak hle. Mahse, ka insûm a. 

"Na chu ka ti. Mak ka ti bawk. A chhan ka hre duh a ni" ka ti ve thung a. A kutzungtang sei sala dawhkan tlir zauh zauh chungin,"I pa hian tual ka that thin tih i hria a..ka fanu nih reng i la duh em?" Tiin min melh káwk a. 

"Engvangin nge chutiang thu chu i sawi? I fanu ka ni a, ka ni kumkhua bawk ang. Mahse, Pa,khang thil kha a chhan ka hre duh a ni" ka ti ta hluai a. Ka laka a thinrim loh vang leh Killer a nih avanga a insitna chuan min tihuaisen nge pawh ka hrethiam lo, ka zàm rukna te kha zawi zawiin kan bo ve mai. 

."Thawnthu sei tak a ni asin" a ti sup a. 

"Ka hre vek duh. Chhan tha tak a awm ka ring a ni. " ka tih chuan ,"Khang thil i tih chhan kha Malsawmpeka tana ti i ni em?" a ti ta mai a! Ka thlawk lo chauh! Ka pa chu a fing tih ka hria, mahse heng em em chu ka beisei pha lo. 

"Aih, a ni lo" rang fe hian ka ti a. 

"Sawi la" a ti nem duai a. Chutah chuan Mala nen kan inbiakna, ka pa phatsana a awm mek dante, a sulhnu hmanga Zoram mipuite thinlunga huatna tuh an tum mek dante chu ka sawi fai ta leuh a. A hmel a danglam lo reng reng. Mangang leh rilru hah hmel pawh a pu lo, milim hi ka tehkhin ber mai. 

"Malsawmpeka hi i ring em? Naute" tiin a rawn kun hniam ta a. 

"Ka..ih,. Ka hre lo. Tu nge rin tura tu nge rin loh tur" ka ti bah nuaih a. 

"Amah i duhna khan i mit a tidel a ni maithei. Ama nu ngei pawh hian a ringhlel tan mek asin" a ti ta a. Ka darh chhawk ni maiin ka hria. He mihringpa chetdan leh thiltih mak tak tak te avang hian ka á lo chauh tawh chu a nih hi. 

"Chu chu engtin nge a nih theih? Ka bulah chuan nang leh a nu chhanhim a duh vanga tianga che hi niin a insawi asin" ka ti a. 

"Kei leh Amanda hian tu venhimna mah kan mamawh hleinem. Mi dang venghim thintu zawk alawm kan nih. Hei hi hrereng tawh ang che. Tunah hian Malsawmpeka hi sawrkar hlui te nen inzawmna nghet tak neiin keini ZCP te hi min vuak chhiata thuneihna chan mek an tum a ni. Mahse, i hmeichhiatna rilru tiderthawnga amah ring duh tur khawpa venhim dan tawk che a thiam ang. Khang o document hmuhte leh Amandain hun kal tawha ZCP min thlàwp tawhna te hi mipui hmuh theiha an pholang a nih chuan,keini chu kehchhiat hmabak kan ni dawn. Hei vang hian alawm in tet laia thu lo tiam dun tawh anga inneih pawh kan rawt..mahse, ka fanu hmangaihna hnawla a awm chu ka hmu thei hlawl lo va, i nu bulah beidawnsan tura fuih tur chein ka ti a nih kha..Naute, Mala hi misual a ni lo, mahse, mahni hmasial tak a ni" a ti ta dap dap a. Ka pa tawngkam tinte chu mak ti em emin ka lo ngaithla. Nizan maia ka hlim dante ka ngaihtuah chuan na ka ti. Mala chu enthlatu, min tihchhiat vek pawh hreh lo maw a lo nih a?! Mahse, ka duhna te chu an bo fai duak thei si lo. 

"Pa, ka bansan ngei ang. Ka tiam a che. Nang i himna a nih chuan pasal pawh ka nei lo mai ang" ka theihtawpa insangmarin ka ti a. Min lainat hmel kher mai. Mahse, mi khawngaih nih ka duh lo. 

"Chuan, i pa hi insawithiam leh insawifiah ka tum hran lo a nia. I hmuh leh hriat ang khan kei chu Professional Killer ka ni thin a. Ka hming lemah Amos tih ka hmang thin naa, hun a rei khan ka inthup thei ta vek lo a nih kha. Khang min ruaitu te kha a tam zawk chu an thi tawh a, a la dam chhunte erawh chuan eng document mah an nei tawh lo. Kei chauhin min man theihna lehkha pawimawh ka la kawl a ni. Engvangin nge i tihral mai loh i ti a nih chuan, Tawngka ringawt hmanga thiam loh min chantir duh khawp min ruaitu la damte zingah ka hria a, anmahni insawi fihlima kei min hnungkhirh an tum huna pholan atan a vaiin ka la kawl tha vek a nih kha..kei hi keimah ngawt zawngin ka liam dawn lo. " a ti nghet charh charh a. Bangbo takin,"Chuan pa, killer chu engvangin nge i nih?" Ka ti sep a. Ka chau , ka zawi. 

"Phuba mawle. Ka nu, i pi Mary khan ka pa a hmangaih avang ringawt khan tuithlar a tawk a. A chhe theihtawpa sawizui a ni bawk a. Cancer a vei a nat zual tawh hnua a tawngvaih changa Mizoram a lam ri thin te, a chhungte a hmu chak ngawih ngawihte khan ka thinlung hliam tawh saah chi an phul belh zel a. Ka nu boral hnua ka intiamna chu Mizo a tam thei ang ber nunna lak a ni ta a ni. Mahse, chu kawng chu zawh ringawt ila kar loah min man ang a, a hlawkna lah ka tel dawn lo tih hriain profesional killer niha Mizo zinga hnawksak leh thih phu ngeite thah chimih kha ka thlang leh ta zawk a. Ka inzir chho ta a nih kha..

Mahse, Naute, ka tiam a che. Pawisawilo mi pakhat ka thah atang khan ka nun a nuam ngai lo va, mi tha tak a ni tih leh Zoram tana pa tangkai leh hlu tak a ni tih ka hriat hnu atang phei kha chuan ka za lo va, bansan ka tum hial nghe nghe. Mahse, min rawn nangchin dawn takngial si a, i nu nen kan lo inhmangaih tawh bawk si. Inspector kha ka nuai bo leh ta hram a. Chumi hnuah chuan hlawh neiin tu nunna mah ka la ta ngai lo. ZCP ka din chhoh chhan pawh kha pa Journalist tha tak, pawisawilo Pu Zoliana ka thah avanga ka thupha chawi nan, Zoram mipui rethei leh rahbeha awmte khai chhuah ka tum a. Ka din ta a ni. " a ti a. Ka pa chu ngaihsan tur nge ngaihnep tur tih pawh ka hre ta lo. Thil pakhatin ka rilru a luah ngut ngut tih chauh lo chu..Ni e, Malsawmpeka ka hlat dawn tih chu. Min lo bum a, a rukin min lo chhui reng si. Nizan avang khan a chungah rinna ka nghat ngam ve tep tawh asin le. Ka ta a ni thei ngai dawn lo a nih hi.

Ka chhuah hmain, "Pa, Mala chu i chiang maw? Chuan ka hmuin ka be tawh dawn lo em ni?" Ka ti hram a. 

"Bia e, hmuh pawh i hmu ang. Mahse ka fanu hi tawktarh i nih ka duh lo thung. A lakah inveng la, i thusawi fimkhur la, inlaichinna siampui lo la a tawk. Tunah hian kan mi leh sate kan inchah khawm ve leh mek a, he thil tenawm tak hi kan hmehmih vat a rinawm. " a ti a. Ka bu nghat ringawt. Ka pa pindan atang chuan chhungril khawsak huam huamin ka chhuak a, ka luakte pawh a chhuak tel leh tawh. 

Ruatsanga te hian engmah an hre ve lo em ni? Nge an hre vek a, an inthurual? Nge Ruatsanga hian a vehthlem ve zawk..ngaihtuah loh duh teh mah ila, thil dang ka ngaihtuah thei si lo. Keima tawkah rilru hahna tur hlir ka hmu a nih hi a. Zanriah pawh tihtham ka ei lo, ka nu ngaih a tha lo tih ka hria. Mahse, ka tilui thei ngang lo a ni e. Eikhamah kan tawngtai a, ka hul hle. Pathian hi a awm tih ka hria, mahse, tihtakzeta ka auh chu ka chhungkuaah eng emaw harsatna a awm chang leh keiman buaina ka tawh chang chauhin a ni. Pathian tan pawh chhan ka chakawm loh thin ngawt ang. Zanin erawh hul viau e ti lo chuan, "Lalpa, Mala leh ka pa hi inremtir rawh" tiin zawitêin ka chham. Chubak sawi tur ka hre lo, ka pa damna atan pawh ka dil lo. Ka awm a nawm loh bakah ka pindana tawm tlawk tlawk chu ka á mai dawna ka hriat avangin, "Nu, Ruatsanga nen kan chhuak lawk ang aw. Kan rei lo vang" ka ti a. Ka nu chuan a phal lo deuh dawn a. Ka pa zawkin, "Intih thawven an duh ve a niang chu..va kal r'u, Fimkhur ula" a lo ti thluam a. Ka nu chuan a hnial zui lo. Ruatsanga pawh chu ka awmdan a serious em vang nge zawhna pawh nei bik lo chuan kan inzui chhuak a. Motora kan luh hnuah, "Khaw nge kan kal dawn?" A ti sup a. 

"Bar-ah" ka ti sap. A makti hmel chu ngaipawimawh duh lo in, "Ka át i duh loh chuan kal nghal rawh" ka ti nghat a. Engmah a sawi zui tawh bik lo. 

"I tha lo a nih kha" a ti nghut a. 

"Ka pawm e" ka lo ti. 

"Amah vang em ni?" A tih chuan Mala a sawina a ni tih ka hrethiam chiang. 

"Ni a, ni vek lo bawk" ka ti ringawt a. 

"i la naupan nen, buaina i tawk ve nual a nih kha. I pa te chungchang pawh a telin ka ring" hmalam melh chungin a ti a. 

"I hre vek em ni?" Ka ti há a. 

"ka hriat tur chin chu hre vek e" a ti mai a. 

"Mala hi i hria maw?" Ka ti nghek. 

"Ka thian a nia, Sawrkar lam nen inzawmna an nei tih leh ZCP an dodal tih ka hria" a ti nghut a. A tawi viau naa, A funkawm vek lawi si. 

"Ti nge i la kawm reng si?" A ngaihna hre lo zet hian ka ti a. 

"Ka thian a nihna a bo chuang hleinem. Ani pawn a thiante chhungkua leh a laichinte chhiatna chu a duh hleinem. " a ti awlsam êt a. Sawi tur pawh ka hre tawh lo e a. Khawpui luh tirhin Bar a awm nghal a, tlan thui vak a ngai lo va, a zia phian. Dar 12 thleng an inhawng thin. Mizorama Bar leh wine shop an hawn dawn vel hian kum 14 ka ni ve tawh a, mipui leh Kohhran lam atangin duh lohna leh dodalna a nasa viau, mahse, Sawrkar lam khan a chhiah an it vang lam ai mahin zu hi kan nuna bet tlat a nih vang leh zu tha law law a in mite tana hun chhuahsak an duh vangin an kalpui lui a. A dik ve bawk a, Zu dawr awm hma khan mizo mipa tam zawk thih chhan kha zu chhe in nasat vang a ni. Yeast hlang ngawt kha an zuar bawk nen, taksain a lo ngeih lo nasa si. Zu dawr hawn atanga kum 2 vel kha chu mipui lam pawn a ruih dan tawk leh zalenna hman dan tawk an la hre lo va, mahse hei tunah chuan tumah khawlaia rui duh leh buaina siam duh an awm tawh lo. Thuneitute an strict bawk a, kum tling lo te chu an man hmiah hmiah zel a, kum tling lo zu dawra hmuh tur an awm ngai lo. Tin, thil pakhat tha deuh bawk chu hman lai pi leh pute hun lai ata tawh an nuna bet tlat, a tel lo va chawn leh lam tihtheih miah loh ZUPUI kan tih ang kha sawrkar ngeiin siam phalna a tichhuak ta bawk a. Buh zu ngei, thla khat vel an up kha chu pum lam pawn a lo haw mang reng reng lo va. Ram dangah te hial an thawn chhuak thei ta a, Tourist te hípna tha ber pawl a ni ta chu a nih hi. 

Bar-ah chuan kan lut dun a, special cabin bookin mipui zi nuai nuai chu kalsanin in chungah kan chho a. Zu pangngai ka in ngai loh avang hian Cabin em em chu ka la book ngai bik lo. Zanin chu in ka tum nge ka hrethiam tawh lo. Bawng thin kan chah tel bawk a. Ruatsanga'n scotch a chah a, Kei chuan zu chi hrang hrang list intlar thla duat chu ka bih reng ringawt. 

"Beer em ni ang?" Bartender chuan a ti a. 

"I pain a hria ang e aw. Sangzual" Ruatsanga a ni. A hlauthawng a ni maithei. Ner sak chungin, "Bourbon hi a ni mai aw" ka ti sap a. Ruatsanga a meng zau káwk. Tui hmel ka tih ber ka chah ve tawp. Bartender kal hnu chuan,"Wine te i duh zawk lo em ni?" a ti leh a. 

"I awm a, rui viau pawh ni ila eng nge pawi? Zanin chauh chu ka pa pawn min hrethiam ang" ka ti hmak. Eng chu a sawi zui tawh bik lo. Zu chu an rawn dah a, Beer ka lo chah zawk lo va chu ka ti leh deuh. Ka luah ka hlauh deuh vang a ni. Bawng thin chu ka ei a, "Thawk khat pawp la, i luak lo a ni mai" Ruatsanga chuan min ngaihtuah hmel fe hian a ti a. 

"Ka hre ve" ka ti hmuk. Nge maw ka thinrim ringawt le. A sawi ang chuan ka no-a zu tlem awm chu ka in ta pawp a. A tui tehchiam lo hle. Sa thin chu ka thial leh ta vat a. An siam thiam phian, sa kawchhung hi ka ei ngai mang lo va, a rim avang hian. Mahse, Ruatsanga'n, "Zu pangngai in chuan sa ngei hi sehhmeh a tha. Taksa a veng bik" a tih avangin ka lo pawmpui ve ta mai kha a nia. A tui ve tho mai e. Zu chu ka in ka in a, tlem te tein. Ruatsanga erawh min ven vang ni maw a in tha duh vak lo. 

A darah ka lu ka va nghat a, "Chhuak ila ride ang" ka ti ham ham a. Ka thawveng halh leh ka záng riau chu ka awm thiam lo lek lek. A sana a bih zauh a, "Ka pa chu ka be mai ang" ka ti leh a. 

"Kan fimkhur a tha a nia" a ti sup a. 

"Ka hre vek. E taka! ruatsang, silai i pai em? Khaw maw ka lo en" tih pahin a kawng ka dapsak thut a, a phu uih mai. 

" i va á tak" a ti nuah nuah a. 

Pistol chu ka lek kang ang ve vaw a, ka hma zawn chu ka va tin ta siah a, ka mit te chu ka siai vel. Rang lutukin a rawn la a, a kawngah a zep lehnghal. 

"Kal ang" a ti nghut a. Ka lo nuam chiai chiai tawh viau. Min kai hlawk hlawk a, min chhuahpui ta a. Pawn khawvawt chu ka nawmna te kha a chhem bo duak ni maiin ka hria. Motora luh leh hma chuan, "Va lakbelh rawh. Ka rui a reh vek" ka ti niah niah a. Phun hluk chungin a va lut leh. In lam pan ka duh bau si lo va, khawpui chhungH chuan kan han tlan kual a, kalna tur lah kan hre lo nasa bawk si. Bakah a fimkhur em a, ka tilui vak ngam bik lo. 

Hmun thengthaw lai deuah a ding a. Zu ka in leh, miin a tawlhpanal an tih hun kha ka thleng tawh a, ka in thei nasa mai. "Haw tawh ang aw"/ ka in zawh chuan a ti a. A rui ve pawn ka hre lo. 

" noo, ka awmdan hi ka mutbopui phal lo.." ka ti ham ham a. Ka bante chu ka phar a, ka aw chhepui nen chuan ka han zai tak chiam chiam a! 

"Mala i hmu duh em?" thutak fêa a tih chuan, "A awm ve mi?" ka lo ti hú. 

"a inah va leng ang hmiang" a ti a. 

Ka chhia leh tha hriatna chu zuin a ei hlum mek si avangin Malsawmpeka hmuha ankhum chiam chu ka thlahlel ta ngawih ngawih a. A inher lai takin ka phone a ri. Amah Ruatsanga zawk chuan a lo la vat a, "Mala a nih hi" tih leh amah chuan lak a rual a. An inbiak dan pawh ka hre fumfe tawh lo. Khami hmunah khan darkar hnih vel chu ka tibo chiang, ka hriat leh chuan Mala inah a sofaah ka mu tih chauh a ni. 

"Sangzual, hei..i harh em?" Mala aw hian a rawn ti a. Ka meng diar diar a, ka awmdan nuam deuh kha a bo tawh. Ka ni churh churh mai. Ka thu vat a, ka lu a hai tlek tlek hle. Ruatsanga chu choka atanga rawn pheiin tuilum mawni hi a rawn keng phei mek a, a rui ve lo a niang. 

"i pain min lo bia a" a ti sup a. Mala erawh ka hma zawnah fel takin a thu. 

"Chuan" ka ti nghat a. 

"I that thu ka hrilh, zanin chauh chu i duh duh dana i chet a phal" a ti a. Ka thaw huai mai. 

"Zu ka duh" ka ti tham tiak a. An inmelh dun vut, "Khawi vatin" ka chal dawm pahin ka ti a. In belh ila ka awmdan teh churh chu a zia ka ring. Mala chuan,"Pe mai rawh. A pentawng a nih saw" a ti nghut a. 

Ruatsanga chuan a va thli a, A tam hran lo. Ka lo in zo leh vek a. Tuisik ka in nghal khawlh khawlh ,tui han tuizia mai chu. Ka ni leh ta chiai chiai mai. No 3 dang ka in leh hnu phei chuan ka phusa leh tan ta. Mala bulah ka thu phei tharh a, Ruatsanga erawh Mala laptop em mawni chu chu a bih daih. Mala sama kekin,"Nangpa hian min lo bum ve char char a tiraw? Tenawmpa, zanin hi kan inhmuh hnuhnun berna tur aw.." ka ti bah nak a. Ka harhfim laia ka thin titáwttu leh ka phurrit te kha an rawn inpawngawzial tup tup mai. Mala chu a ngawi reng a. 

"Malsawmpek, thuneih i duh vang maiin ka pa leh i nu ngei pawh tihchhiat i hreh lo va. Ka tihtir dawn lo che. Kei hi min paltlang a ngai ang" ka ti leh phiar phiar a. Zaidam zeta min melh tlat si avangin han thinrim chiam chu a va har si êm. Ka thinrim chak bawk si. 

Ka lung a chhe tan a. "Dik tak chuan ka hmuh phat atang chein ka lo duh ve em em che a, mahse, nang chuan hmanruaah min lo hmang char char zawk a. Misual tak i ni. Chuan, bialpa ka nei dawn a, min lo tibuai tawh suh ang che" ka han ti leh piap piap a. Min tibuai ngai tawp si lo. 

Ka kutah dam thlapa rawn vuanin,"I thu hriat leh hmuhte hi an dik vek kher thin lo. Thansangzual, vawikhatmah zu in tawh suh ang che. I in leh chuan i mawngtamah ka vaw tawh ang" a thusawi inpersan tak si te a lam dan awki pawh a inang lo. 

"khatin naupang angin min treat suh, kan inrual reng. " ka ti hlar a. 

"Zaninah pawh i zu ruih vangin tlema tlemah in accident lo chauh a nih kha. " Ruatsanga lam chu a hawi zauh a. Ka lo bangbo thung. "Eng nge a awmzia?" ka ti há a. 

"Ruatsanga steering i va vawnpui ve sek a, ko pang in sut teuh phah khawp mai. Ruatsanga i timangang lutuk. Khatiangin awm tawh suh. A tha em?" a nau ang maiin min tawngkhum leh tawh. 

Ka zu in kha ka hneh ta hlawl lo nge, Mala nen kan tawng dun reng emaw ka tih lai kha ka bo leh daih a. Ka harha ka men chuan ka hmazawn bang laia sana intar chu ka han hmu a. Dar 1:34 a ni. Zing lam a ni turah ka ngai. Ka dang a ro huam huam avangin ka room emaw tiin tui ban mai ka tum a, a lo awm ikhaw si lo. Ka inbengkang a, awii ka luak chhuahzia chu. Ka thut rualin Choka lama mipa pahnih zawitê têa tawng ri chu ka hre ta a, ka mu leh vat, ka rilru a fim tan avangin ka beng ka chhi ta kar a. 

"Rogera hnaiah phei chuan awmtir hlek suh ang che. A melh dan hi ka hai lo a nia. Tunah chuan a pain a rilru a hmin mek tih ka hria..mahse, engkim a la hrethiam vek mai ang. I kuta awm a ni a, venghim ang che" Malsawmpeka aw ngei a ni. Tu a sawina nge ni ta ang? 

Ruatsanga aw hian,"Ka hria e. Nang pawh fimkhur ang che. " a ti sup a. Ka lo inring lo deuh nge inhamtan hman loh hauh lohin sofa atang chuan ka tla thla pek a! Ka thawm an hre lo thei ta lo. Tui ka in a, "Haw ang" ka ti sap a. Ka harh ta deuh bawk nen, ani pawn a hnial ta lo. Mala chu, "Mangtha aw" ka ti puat a. A lungawi chiah lo niin ka hria. 

Hawn kawngah ,"Ti nge Mala inah min kalpui?" ka ti sap a. 

"I duh tlat a nih kha" a ti hawk a. 

"Darkar hnih vel ka tibo, engtin nge ka va awm chiah sawi teh" ka ti a. A aw a thian leh te tê a. 

"Kan inbiak khan kan awmna min zawt a, lo kal a tum a. A ngaihtuah che avangin. Mahse , nangmah zawk khan a ina va kalchilh i rual tlat a. Ka va hrilh leh a, min lo nghak a. A inah ka kuah lut che a, i kal hleithei tawh si lo. Chutah ka silai i phawi thut a, Mala chu i tin ta a..

'Ka chhungkua i tihbuai vang leh kei min tihnat avangin i thi ngei tur a ni' i ti a. Mahse, Mala chuan engtinmah a ti let lo che. I silai ken a lakthlaksak che a, a roomah a kai lut che a. I va ankhum hrep. Engtin chiah nge in awmdan ka rawn hmu si se lo" a ti ta a. Ka íp cháwih. 

Ka kap ka dap a, engtinmah a awm lo. Ka thil ngaihtuah chu a lo hrethiam nge, "A mipat hmeichhiatna ang zawnga khawsakpui theih pawh i nih loh kha, hlauthawng suh. I body guard ka awm hi" a rawn ti ta thluam a. Ka thaw hawk mai. 

"Mala chu ka lo kap hlum mai lo ni" ka ti nghat a. 

"Kahhlumna chhan tur i nei hleinem. I tan misual a ni lo" a ti hniam raih a. 

"I thian a nih vang a nih kha" ka lo ti hmak. 

"a ni mahna. A ni lo thei bawk" a ti mai a. A tlan chak bawk a, in kan thleng hma angreng. Ka thluak a nu but tawh lo naa, ka lu a la hai piahlamah zu rui ve ngai lo nafam chu ka kal pai nasa mai a. Min rawn pawm lawp a, ka pindanah min luhpui nghal. Khumah min nghatin, "I inthlak dawn em?" a ti sup a. 

"Aih..aw..chhuak phawt la" ka lo ti a. A nui suk , ka chhipa tuai zauh pahin, "Mala savano chu ka khawih ngam ring suh" a ti nghut a. A chhuak nal nal. Khumah chuan ka thu ngawi ta reng a. 

Zingkarah thlan thla bawrh bawrhin exer ka la a. Zan lama ka zu ruih thing zawng zawng kha ka thlanah an kal ral zo ta niin ka hria. Ka inbual fai vâk bawk. Vawiin chu class ka kal dawn. Tin, Ka tan ni thar a ni. Malsawmpeka chu a duh duh danin lo nung se, kei chuan Rogera ka chhai leh dawn a ni. Malsawmpeka'n ka laka feelings a neih hi ka cho chhuak dawn, ka cho chhuah hnuah ka pa chungchangah ka hneh ang a, buaina hi ka titawp ang. Keia hmeichhe ngaihdan mai chuan awlsam hmel tak a ni. Chung thil ka ngaihtuahna chuan mak takin phurna min siamsak a, Ka pa buaina leh Mala inrawlhna lam chu ngaihtuah lo turin min thunun thei tlat a ni. Tukthuan ka ei laiin ka nuin,"Nizan kha a tawpna ni rawh se. A chiang em?" a ti ta fak a. 

"Ka chiang e" ka ti sap. Ka eikham veleh phur fahranin ka insiam a, ka crop top hak chu ka nuin a ngaihmawh loh nan ka bagin ka lai zawn vel ka hliah tút tút a. Ka bibo thei hram e..bike erawh ka la keng thei chuang lo. Ruatsanga nen kan titi pawh a dang ta deuh, vawiinah a star Ruatdiki a va rim dawn thu a sawi chuan, "Chanchin lawmlawm deuh hriat ka lo beisei ang" ka ti a. 

Rogera ka text bawk. "Date i nei ta em?" tiin. 

Rang taka chhan ka ni. "Nei lo. Ti nge?" a rawn ti vat a.

"Date tur ka mamawh a" ka va ti puat. Rogera nui suk lai hmel tur ka mitthla pah bawk. "Mala?!" a rawn ti a. Ka ner sawk. 

"Ka give up ta mai. Ka type a ni lo" ka va ti . 

"I hria alawm ka rilru chu? Zaninah hmaichhanah kan sawi dun thei ang chu" a rawn ti ta chiah a. 

Ruatsanga lam hawiin,"Tlaiah min rawn lam suh aw. Date ka nei. Min venghim thei bawk" ka ti fiah kák a. A mitko a san ák ringawt. Ka pa number hmetchhuakin, "Pa, date ka nei a, amah chu i hriat ka ring. Pa Zirsanga fapa Roger a ni. Zaninah dinner kan ei dun dawn" ka ti nghal sar sar a. Ruatsanga hmel chu ka va mitsir a, hmuhnawm tak a ni. 

"Mahse, Naute, fimkhur.." a tih mek laiin,"I fanu hi min ring ta che ka pa,. Eng mah a thleng lo vang. Chuan, ka duh ang leh ka hlim dan tura ka nun ve min phalsak rawh" ngenngawl takin ka ti a. 

Dam duai hian,"Ka ring a che. Ka naute, nangma tan i hun kha hmang ang che" a rawn ti a. Ka khi sak mai. 

Ruatsanga chuan, hmalam bih ngur chungin,"I tithei lo. Roger ber kher" a ti nghut a. 

"Heng buaina maksak leh dangdai tak takte hi ka hne tawh. Keima tan ka nung ve tawh dawn. Min hnial thei i ni lo. Ruatsang" amah pawh en lo chuan ka ti zangkhai vah a. 

Zawi sup hian,, "Buaina chu a punlun zawk ngei ang le" a ti a..ka khi var var thung. 

(A tirah rin leh beisei dan in nei sa a. A buaithlak thin..lo chhiar hram hram phawt teh u 😍