malsawmpeka 6

MALSAWMPEKA (6)

Ziaktu: Toni Râlte

Chu pa nunrawn hmel zet ka hmuh rual chuan Davea kutah ka chelh lawk a, chak zetin chu in veranda atang chuan ka chhuahpui ta hlawk hlawk a. Dave chuan a ngaihna a hre mang lo, ka hmanhmawh êm vangin a kal ve hlawk hlawk a. Hmun him chin nia ka hriat kan thlen hnu chuan kan ding a. Kan thaw hlawi hlawi mai. Dave chuan, "Eng nge a awmzia?" a ti hluai a. Ka lu ka thing ringawt. Ka phone a rawn ri ve chiah a, Mala bawk a ni. Ka la vat a. 

"In him em?" a rawn ti hniam raih a. 

Hah zeta thawk la hawk hawkin,"Aw..him chuan ka hria, eng nge a awmzia?" ka ti a. 

"Haw nghal rawh. Khawpui hi chhuahsan la, in in kha chhuahsan tawh hlek suh. Tlaiah ka rawn kal ang" a rawn ti nghet charh a. Tunah chuan Mala thu zawm mai bak duhthlan tur ka nei lo. Dave nen chuan ka motor parkna lam kan pan a. A la hrethiam mang lo tih a mitmeng atangin ka hre thei. Ka la hrilhfiah duh lo. Motora kan luh hnu chuan,"Ti nge engmah i sawifiah loh?" a ti ta chiah a. 

Motor tihnun pahin, "Smuggler an lo nia, kan tan mi hlauhawm tak an nih vangin ka pain kal leh lo turin min rawn bia a nih kha" pehhel zetin ka ti ta a. 

"I thiannu chu?" a ti nghut a. 

Nia, Biakdiki chungchangah chuan buaina ka nei neuh. Amah chhanchhuah tuma va kal kan ni sia, hetia hawn leh ringawt chu ka ti rilru a. Mahse, Mala ka biak leh phawt loh chuan ngaihdan siam mai ka duh lo. Biakdiki chu dik lo taka rin ka duh lo viau naa, min target tute nen an lo inthurual a ni thei ang em? Min koh chhuaha chance ka siamsak theih nan tikhan a chanchin kha min hrilh ta chiam a ni thei ang em? Mahse, Biakdiki'n ka chunga thil tha lo a thlentir theih ka ring phal si lo. Ka rilru chu buai tak a ni. Dave ka thlah phawt a, rawn chhuk ve chu a duh viau naa, ka remti lo. Mala rawn kal a tum sia, engkim a chinchhuaka a hriat ve loh chu a tan himna a nih ka beisei zawk. Ka duhsak vang zawk a nih chu. In lam ka pan hmain Remruata ka call a, ka hawn tur thu ka hrilh lawk loh chuan an chetbuai ka hlau deuh. 

"I va lo haw hma dawn ve" a ti nang nang a. 

"Ka nuin haw turin min ti alawm" ka tih takah chuan a hnial ngam ta lo. Ka nu hi an hlau ve bawk a. Damdwiin pawh tlawh tawh loin kan in lam panin ka inkhalh thla ta nghal a. Dar 1 a pel tawh. Ka ril pawh a tam ve deuh. Dawr lian pakhatah lutin eitur ka lei nual a, pawn chhuak lo va awm thut a ngaih takin tih thuah thahnem ka ngai viau. Ei duh tih takah. Kan in thlen hma kawiah Remruata leh hmeichhe tleirawl inphur ka tawk ta a, a ding lo. A zak a ni mahna. Ka nui hawk a. In ka thlen chuan Sangpuia pawh a lo inbual zo chiah a, a lo inmet fai vang mai. Ka pa an chhun a, hmul an ngah riau a, inmeh fai an ngai deuh reng mai a ni. Ka eitur hawn chu ka siam nghal a, ani pawn engmah a lo la ei bik lo a. Kan ei dun ta a. 

"Remruata te chu ka rawn tawk a, eng nge a bialnu chu a an ve?" ka ti a. A nui vur vur mai, "A chhe lo reuh lutuk, engtin nge kan naua hi a duh zawk ni..mahse. A la naupang tih erawh a hriat..a roomah an tawm deuh chawt a, ka belchiang hman vak lo" a ti mai a. 

"Chu! Farm lam pawh a zu en na nge?" ka ti a. 

"En nang, bakah en a ngai lo bawk a. Tlaiah erawh vawk chaw chhum a ngai dawn, chuan kel chaw tur ka chah a rawn thleng dawn bawk a" a ti a. Ka hna tur a ni tih ka hai lo. Ka nute awm lo chu ka tuar hle dawn mai, mi mah thatchhiat nak alaiin. Kan ineipuar zawhah farmah chuan ka chhuk a, Lehlamah mei chhem a ngai hran lo a, ka ti ve thei mai ang. Sangpuia chuan a pawlh dan tawk ka thiam lo vang tih a hlau khawp mai a, rawn chhuk ve dawn se, step te kal a ngai sia, a hliam a zual leh phah ka hlau ve bawk si. Mahse, a ziak te ka han chhiar a, ka ti ve thei zel e. Farm-a ka la awm laiin an kel chaw tur hnim hring thahnem tak chu an rawn hlang thla a, Kel chaw hi chu a awlsam mai zel. Vawk chaw hmin thleng ka awm a, ar leh uite ho chaw ka pek hnuah khawsak rel turin in lam ka pan leh ta a. 

Remruata pawh a rawn thleng ve chiah. A khi hui mai a, a lai lutuk chu fiam pawh ka fiam duh ta lo. Kimchi a siam ta mual mual a, a kimchi siam hi a tui thei a nia aw. Kei chuan buarpui chempai, ka chawhmeh duh em em mai ka kheh a, ka chhum dawn a ni. Buarpui chempai hi chhim lamah chuan an hre ve vak lo, hmar lamain Pelh kan hre vak lo ang hi a ni mai. Hruizik te nen hian unau an ni ti mai ang. A kha ve fek a, a tui ka ti tawp a ni mai. Tin, kan chhungkua hian ka nu vangin mizo chawhmeh kan ngaina zual. Ka pa hi chuan buh tak hi chu a la ei tam mang lo. A ei ve pawn bowl khat hi a ni deuh mai. A lo thanhnan tawh a nih piahlamah buh hi chuan min tithau hma èm mai a, a insum ve a ni mai. Kei erawh buh hi ka duh khawp a, ka lim nghek zel. Mahse, sawi tawh angin ka nu hian min rehbun hun a nei thin. Ka pian a mawi loh hi chu a hlau ve viau a ni. Samtawk ka pum chhum bawk a, bai hi chu tihngaihna lam ka hre lo va, ka siam ta lo ringawt. Vawksa thing a la awm bawk a, a tih ve theih mai ang chu maw. Ka inbawl zawhah exer pawh la tawh loin ka inbual zui a. Ka inbual zo ka inthlak tur chu Malsawmpeka a rawn thleng ve chiah. 

"Lo thu rawh, ka'n inthlak lawk ang e" ka ti láng láng a. Sangpuia nen an lo inkawm leh mai a niang chu. Ka inthlak sawk sawk a, ka sam pawh ka khuih lem lo, ka va chhuak a. Sangpuia chu a ná a chhuah leh deuh vangin ka jection leh te te a, a roomah a mu ta rih. Remruata erawh gym roomah a awm thung. Thutkhawmna pindanah chuan kan inhmachhawn ta ran a. Zawhna tam tak ka ngahzia a hre êm ang chu maw. 

Min rawn thlek deuh hàwin,"Nula hmeltha tak hi chu i ni" a ti ta mai a. Ka beisei loh lutuk a nih avangin ka hamhaih deuh, mahse, zám vak lo hian.."ka hria" ka ti nghat a. Kan nui dun. 

Thil dang a sawi leh hmain,"Zawh duh che ka ngah nasa a nia" ka ti nghal táwng a. 

"Ka ngaithla e" tiin a thu tha a. 

"Engtin nge kha tiang kha a nih theih? Ka thiannu chhanchhuah tuma kal kan ni sia " zawh dan tur ber pawh ka hre lo. A aw a thian kharh a. 

"Vawiin chhuna ka hmeichhe rawn kalpui kha i hria em? CID hotunu, Maggie a nih kha. I pa enthlak hna thawk tura damdawiina kal kan nia. Mahse, engmah chu kan va hmu lo. An hriat duh ber tu ten nge tlawha eng thil nge an sawi tih pawh kan va hre ta lo. Mahse, Maggie phone hmang chuan, " A fanu tluka tawktarh tha an awm lo. Kan ruahmanna ang khan thil a kal dawn e, Maubawkah chuan a thiannu hmu turin a va kal ngei dawn a. In lo hupbo nghal mai dawn nia. Mahse, tina miah suh u, pem leh hliam pawh a nei tur a ni lo" tih thu a sawi ta a. Ka rin phak bakin sawrkar lam hian i pa hi an lo tlankhalh tawh a lo nia. Tichuan.,ka ngaihtuah che avangin bathroom ka pan a. Ka rawn be ta che a nih kha..rinhlelh ka kai maithei. Ka rintlak leh rintlak loh min fiah an tumna pawh a ni thei bawk. Manchhuah ka nih chuan kei pawh ka dinhmun a chhe hle ang" a ti ta a. Ka chil ka lem khawlh ringawt. CID lam chuan ka pa chu an lo vehthlemin an lo chhui ngat ngat a maw?! Ti nge a thawhpui thenkhatte ngeiin ka pa chu an beih tak le?! Ringhlel zetin Mala chu ka melh a. 

"Rin che hi ka duh viau naa, Mahse, Mala, Amanda fapa i ni tih hrereng chunga hetianga an zinga i khawsa thei mak ka la ti reng. Engvangin nge an rin che?" ka ti ta a. A nui naa a nuih a za vak lo niin ka hria. 

"Chu zawng i la hre vat ang" a ti hul hak a. Chiang zeta va melhin,"Sawi rawh. Tunah. Nangmah ka rin theihna tur chhan pawimawh tak sawi rawh" ka ti leh ngat a. Ka ringhlel telh telh ta mai. Nia, a mak em alawm. Ka hmuhdan chuan ka laka rinawm anga lan duh si, mahse, a ruka min vehthlem si ang hian ka hmu. Ka pa document a zawn atang khan ngaihngam taka rin chu a har alawm. Malsawmpeka hian eng nge a tum ang le?! 

"Tunah chuan ka sawi thei rih lo" a ti hniam raih a. A mitmengah chuan eng emaw inphúm a awm. Ka awm a tinuam thei mang tlat lo. 

"Nang hian hmanruaah min hmang tiraw? Ka pa chhui nan" ka ti hawk a. Ka tahte pawh a chhuak deuh, kan inbiak dan romantic lo zet avang chuan romantic mood chu phumbo ang vang vang a ni. 

"Hmanrua atan i tha tawk lo. I pa ka phatsan chuan ka nu phatsan ang ka ni dawn asin" a ti ta a. 

"Mahse i nu leh ka pate hian ti nge an hriat ve theih loh? Hrilh vek la, chet a awlsam zawk dawn asin" ka ti nghek. A kut a humruh zauh chu ka va hmu thei. 

"Sangzual, a tawk. Ka kawng hi tiping suh. Nang leh keiin kan hriat hi a tawk rih" a ti hriam hraih a. Ka ngawi dat. Mahse, ka ngaihtuahna a buai telh telh. 

"Nih leh tunah hian veh ka la ni reng em?" Ka tih chuan, "Ka hre lo" a ti hul hak a. Sawi leh tur pawh ka hre lo. 

"I lo kal hi ka rilru i rawn tibuai mai mai zawk a ni" ka ti nghat a. Ka lung a awi vak lo. Beisei mitmeng hian min rawn melh a,"Thil dil che ka duh a ni. " a ti nghut a. 

"Eng?" Ka ti vat. 

"I pa safe hawnna passcode" a ti ta a. Ka ding hluai. 

"Malsawmpek, engkim hi i nu leh ka pa ka hrilh vek dawn. A tawk tawh, min kaikual rei tawh e " ka ti tuar tuar a, Remruata a rawn lut ve chiah. Ka tawp ta chawt a. Mak tih hmel deuha min rawn enin,"Û, eng nge a?" A ti hû a. 

"Eng ni lo ve. I û thikthu hi a chhe mah mah zel a nih hi..I tha zel maw? Ka nau" Mala chuan a lo ti dam thlup a. Ka hamhaih deuh. Remruata pawh chuan ngaihthat lohna nei miah lo hian, "Aw hei ka tha tawh lutuk. Chaw ei ve la, U mal" a ti ve a. 

"Aih, ei lo vang. I u eisiam a tui awm lo em mai" a tih chuan ka lo ner khum nghek. Remruata a pindana a luh hnu chuan, "Ka pa chu ka'n call ang e" tih leh phone lak ka rual a. Ka phone chu a rang arangin a rawn phihthla a, thinrim hmel erawh a pu lo. "I ti miah lo vang. I pa hi dinhmun hlauhawma dintir leh i duh em ni?" A ti fiah kák a. Ka bangbo hle. 

"Dinhmun hlauhawmah a ding mek tih ka hrilh zawk dawn mawle.." Ka tih khum a. 

"Sangzual, Ni e, min rin theihna chhan tur hi hmanrua ka pe tha tawk lo che tih ka hria. Mahse, min rin a ngai. Chu chu a ni mai. I pa leh ka nu ten an hriat chuan a siruk lain an rawn thawk ang a, tumah an zuah lo vang che u. Chung thil a thlen hma chuan ka hna min thawhtir rawh. Khang document kha ka hmuh a ngai, ka phumbo theih nan leh finfiahna atana ka hman theih nan" a ti ta bawrh bawrh a. A duhthawh ve hle mai. Beidawng zetin ka thu hnawk a. Mala awmzia reng reng chu ka hrethiam tawh lo a ni e. Amah aia thiltithei zawk a nu leh ka pa ten phiarruk an nih thu chu hria se, an chingfel thei ngei dawn tih ka chiang si, chung thil an hriat a rem tlat si lo lai chuan a ni min tibuai ta em em. 

"Passcode ka hre bik lo. Ka pa ka zawt ngam hek lo" ka ti sep a. Ka mittui a parawl tih ka hria. Ka kutah a rawn hum a, a lum thar thar mai. 

"Aw le , lo inenkawltha ang che. In hi chhuahsan suh" a ti sup a. Min ngaihtuahna awrawl diktak a nih avangin ka hnuk a ulh zual sauh. 

A chhuah hnu pawh chuan ka thu ta reng a. Ka mang vek mai. Kan chhungkua chuan eng thil tehhrep nge maw kan tawn le? Zalen takin kha chen kan lo khawsa tawh a, veh leh enthlak nih chu ka zo dawn hauh lo mai. 

Zanriah pawh ka eitui mang lo. Ka naute pawh chuan engmah min zawt lo. Ka mood chhiatzia an hai bik lo a niang. Remruata'n min awl ta vek a. Ruatsanga rawn thlen lai pawh chuan ka lo chiauau mang lo va. Sangpuia nen an inkawm leh, ka chau, ka zawi. Ka phone pawh ka khawih peih lo. Ka nuin min lo biak pawh chu mumalin ka hre lo. Ka pa hi tu nge a nih ang le? Engvanga tuna chhuia enthlak leh phiarruk a nih leh tak ang? Kan pian hma lam hunah khan thilsual lian tak a lo ti tawh em ni ang? Chung a thiltih finfiahna chu Mala khan a zawng chu a ni lawm ni kha? Ti nge ka pa nen an sawiduna an thawhdun mai loh. Ka rilru chuan thu ka intiam ta mawlh mawlh a.

"Malsawmpeka hi ka ringin a thu ka awih leh tawh ngai lo vang" tiin. Amah ka duhna leh ngaihzawnna te pawh zawi zawia thinthlak ka tum ta a ni. Amah hi rinhlelhna hlirin ka khat tawh tlat. Ama nu ngei pawh chhui duh mihring chuan thinlung a nei ve lo a ni mahna. Ka pa hi engtikawng mahin an rapbet ngai lo ang. Ka tihtheih a tam emaw tam lo emaw ka theih chin chinah ka venghim zel ang. 

Ka naute leh Ruatsanga te mut reh tawh hnu vekah thawm dim takin in chungah ka chho ta a. Ka pa private roomah lutin kawngka ka khar nghal khap. Passcode chu ka risk dik theih mai ka beisei a ni. A chhan chu ka pa fav. No chu 34 a ni a, ka nu erawh 7 a ni. 3407 ka hmet a. A dik lo, 0734 ka hmet leh , a dik thei chuang lo. Ka chek hlak a. Ka pa chaira ka thut rual chuan, ka pa nen Football en-a kan kal dun ni ka hrechhuak zawk. Class Xii ka pass hlim, ka tleirawl vanglai tak kha a ni a. Car khalh min zirtir pah bawk. Hlim takin kan pafain Inkhel en tur chuan kan inzui ta a. Khatih laia lar em em Aizawl Fc te fans ruhkawl ka ni thin. A chhan pawh an last defender Chhandama kha ka star em em thin vang a ni. Ticket pawh a to ber chu kan la a, kan pafa chuan kan en dun ta a. Ka beng bulah, "Naute, lo thlir reng rawh, Jersey no. 34 hatu khuan mawi takin a pet goal dawn a nia" a rawn ti sur sur a. Kei chuan, "Pa, pet goaltu ai chuan vengtu an pawimawh aw. No. 21 khuan a lo dang chat zel dawn" ka lo ti bawk. 

"21 hi i fav. No a nih vang nge ,a hatu vang?" A tih chuan, "A ni ve ve" ka ti a. A nui suk. 

Ka pa chair atanga tho vatin, book shelf lam chu ka pan leh ta a. Khur dar darin, 3421 ka hmet ta kauh kauh a, a dik lo. Ka chhing sawk a. Ka hmui petruhin, 2134 ka hmet leh a. A inperh zek a. Book shelf lian zet kawngka chu a rawn che ta tual tual mai. Ka khur nasa lutuk chu ka hmui ka hup ringawt. Lehkhabu chhah zet zet intiang urh chu ka melh reng a. A hnuai ber dawttu-a file chi hrang hrang lo inbawhthuah far lamah chuan ka mit ka len ta zawk a. Tuman min hmu lo mah se; ka zám a, ka khur ru zawih zawih thei nia. File chi hrang hrang chu categrory felfai taka inthenin a lo dah fel thlap a. Ka duh ang ka hmu lo. Ka zawn ber ka hre chuang lo naa, ka thinlung hian zawn ka nei tih min hrilh si. Chung file tam zawk chu a sumdawnna chungchang vel a ni. A thawhpuite profile te pawh a tel. Book shelf hnuai ber chu a zim deuh a. Thingthiin ka bih ta a. 

File thenkhat chu ZCP hunlai ami kha an ni a. A pawimawh tho ka rin avangin pahnih chu ka pawt chhuak. A sir berah chuan savuna tuam, kang mai mai thei lo tura uluk taka tuam a kawm dum hi a lo bawk run a. Ka lak rual chuan a dang ho aiin a rit bik tih ka hre thei. Ka pa dawhkan lamah pawm pheiin chairah chuan ka thu sauh sauh a. ZCP file chu ka keu thuak thuak phawt. Eng vak mah a awm lo, an ruahmanna leh ram kalsiam vel a ni. Savuna tuam ngei mai chu ka phelh ta a. A chhungah file pan te te a lo awm teuh mai a lo nia. Pakhat chu ka han lek kang a, LALCHUNGNUNGA tih hnuaiah rawng senin Confirmed tih a lo inziak. Ka lungphu a rang sauh. A hnuai lehah Lalchungnunga chanchin tlem azawng a inziak a, Police Inspector niin a hna a tlin viau a nih hmel. Ka keu leh a, Agreement inziahna lehkha a lo awm a. 

"Lalchungnunga chu a hnawksak zual tak avangin amah dahbo turin He Professional Killer Ephraime Zothanpuia hi rawih niin, ani hian Ni 12, 09, 2015 khan a dah tha ta a ni. He inthenfainaah hian mawhphurtu ka ni a, Ka intiam ang ngeiin Ephrame Zothanpuia hnenah Rs. 250000 ka pe tih ka nemnghet e. " tih thu niin, a hnuaiah ka pa leh a tirtu Lalpianfela te signature a chuang bawk. 

Ka luak chhuak ut ut avang chuan ka file ken lai chu thlauhin ka uak tuar tuar a. Ka khua a sik a ni. Ka chhungril chu a sa huam huam a, chu thil sa chuan ka taksa pawn lam thlengin a rawn kangkai tan niin ka hria. Ka zawi nghulh a, ka thluak a let but but bawk. Sa chhuak vek e ti lo chuan ka taksa pum chu a khur hlawk hlawk bawk a ni. Ka tah a chhuak a, ka mittui chhuak tur a awm si lo. Ka nuin, "Sangzual, mittui meuh pawh a tlak hleihtheih tawh lohna thil hi chuan nasa takin min tina tihna " a lo tih thin kha a dik awm hle mai. Ka pa private room chhuatah chuan ka bungbu vû a. Ka rum ka rum ringawt. Ka thil hmuh leh hriatte chuan chemte zuma chhun ang zawk zawk a nain hliam min pe mek a ni. Ka pa chu Professional Killer maw a lo nih?! Ka lo mangphan thin mangchhia te kha a tak vek maw lo ni dawn le? Ka nu pawn a hriatpui vangin a ni ngei ang, inthahna a thlen apianga hlauthawng leh thlabar hmel a put thin ni. Ka tho a. Inpetruhin, file dang chu ka keu ta zung zung a, Ka pa mi thahte chu Mizorama pa challang leh nihna langsar nei vek an ni. An vaiin mi 34 chiah chiah! Ka pa leh! I fanu hi i va tihrilhngai ngai ve le. A na ka ti lutuk. Proffesional killer fanu nih ka duh lo asin. Ti nge min piantir ve?

Dar 2:30 a ri ta. Ka pa room chu ka la chhuahsan thei lo. ZCP file zawng zawng ka en chhuak leh vek a. ZCP ten an lo talh tawh mihringte pawh chu sawrkara nihna pawimawh tak nei vek an ni. Zoramah thisen an luantir a, dik lo taka ram roreltute chu an paihthla ta a. Mahse, tunah a vulhtu kut ngei rawn seh leh tumin ruahmanna hrang hrang an nei leh lawi si! Ka pa ngei chu an veh leh ta bawk si. Rilru mumal lo zetin File ho chu a awmna ngaiah felfai tak chuan ka dah ve leh a. Pindan chu awm rengna chi ni pawn ka hre lo. Pindan ka chhuahsan a, ka khumah ka mu. Ka mut erawh a chhuak awzawng lo. Eng nge ka tih ang a? Engtin nge chung thil chu hre lo angin ka awm dawn tihah ka buai a ni. Ka pa hmel ka hmu ang a, a mi thah tawhte hmel kha ka hmu tel zel tawh ang a. Engtin nge ka pa chuan tiang kha a tihtheih? Ka pian ve hma thil chu ngaihtuah buai a sawt lo tih hriain..Engkim ka hria tih chu ka pa hrilh vek mai ka duh ta a. Ka inthup rei thei dawn chuangin ka ring lo, Mala'n a veh dan leh AManda ngei pawh an bitum dan zawng zawng sawi vek law law ila..Kan chhungkua ka chhanhim thei ang em ka ti ta a. Kha savuna tuam dum ren run khan tu emaw chuan hmu se ka pa chu jail run thimah an nawr lut ngei dawn tih ka chiang. Hremna chu ka pa hmuh tur mah nise, ka pa fanu ka nih angin ka thlentir thei lul lo vang. Ka pa reng reng pawn engvangin nge kha file kha la dah thaa la tuam uluk em em nge maw a nih ang le? Miin an hmuh hlauh chuan a chhe vek thei tih a inhre ve tho awm si a. 

Ka awm a nawm loh ém vangin nachhawkna ka ei a, Chokaah pheiin tui ka lum a. Ka nawm loh deuh hian tuilumah khawizu leh ser tui pawlhin ka in thin a. Ka zia hawk zel. Ka tuilum in tur ka siam rak rak lai chuan mikhual room atang chuan Ruatsanga a rawn chhuak luau mai a! Ka lo meng phawk hle a niang.

"Ramhuai i hmu em ni?" Nui chungin a ti a. Ka inthlahdul vat. Ka bulah rawn ding hnaiin ka chal a rawn dek zauh a, a kut chu a vawt thler mai. Ka lo thle sawn vat a, "I tha lo a nih hi..i khua sik em ni?" Min ngaihtuah hmel tak hian a ti a. 

Amah pawh en mang lo chuan ,"Ka tha" ka ti sap a. Tuilum chu ka in zui nghal. Min melh reng avang chuan,"Ti nge i lo thawh?" Ka ti khur dat a. 

"Sangzual, thil hmuh i nei em ni? Nangmah i ang lo, i var vek..i mitmeng lah a buai si. I tha miah lo a nia" a lo ti daih. Ka thu hriat leh hmuhten min nghawng natzia lah chu ka hrilh thei si lo. 

"Mangchhia ka mang a" ka ti ta ngawt a. Ka aw pawh a zawi hle. Thutkhawmna lamah pheiin ka thu a, tuilum chu ka in ta a. Ka ngaihtuahna erawh a chawl lo reng reng. Malsawmpeka min bumna avangin nà ka ti takzet bawk, ka lo rin ang chiah a ni. Ka pa an hlin theih nan evidence an mamawh a, chu finfiahna chu ka pain a la kawl ringin zanah inah a rawn lut ru a. Mahse, ka han nangching a, chutah min ngaihtuah niawm takin ka thil tih tur leh kalna tur te min thulhtir a, ka laka insawi rinawm a tum poh leh ka ringhlel tawh tih hriain min duh anga lan a tum a. Ka thinlung hneha ka pa nunhlui phawrhna hmanrua atana min hman a tum tihah hian ka chiang tur a ni. He Malsawmpeka, sawrkar uisathiam hi ka hnaih leh tawh tur a ni lo. Ka pa chu ka pa a nih ang pawn ka venghim ngei tur a ni. 

Ruatsanga zung zo chu rawn thut a tum a. "Va mu rawh, keimaha awm ka duh" ka lo ti nghat. Ka landanin a zir bawk a niang e, Mikhual room lam chu a pan leh ta a. Keimahin zing dar 4 thleng ka thu. Ka mut a chhuak lo va, ka chhungril nawm lohna pawh a kiang tan e. 

Thut ngawt ngawt chu tiin rilru lakpenna ni pahfawmin tiin mu chungin TV chu ka en ta a. A engahmah chuan ka rilru erawh ka pe tak tak thei lo, mahse, thut reng ai kha chuan a zia deuh e. 

"U, hei û.." Remruata aw niawm tak ka hria. Ka meng a, amah a lo ni tak tak a. Mak ti hmel a pu, "Ti nge hetah i mut? Eng nge thleng?" A ti ta chiah a. Thutkhawmna pindanah rizai pawh sin lo vin Tv en chungin ka mu a nih tak kha. Mahse, puan chu ka lo sin lawi a! Ka nau chu ka melh hû a, "Aa..ka muhil thei lo va, tv en pahin ka va mu a" ka ti ringawt. A awih ve mai nge choka lamah a phei ta a. Puan chu tu min sintir tak ni ang maw? Dar 7 a lo pel tawh a. Za lo zetin ka tho a, ka lu a na tluk tluk mai. Ner sak sak chungin ka pen nghawr dat dat a. Ka ka lah chu a tui lo satliah lo, a háng dup ka ti mai. Ka han intifai a, ka ha te ka nawh zawh chuan tlemin ka harh ta deuh. Eirawngbawl a ngai lo va, Sunday zing a nih avangin ka naute chu chawhmeh tuihnai deuh hmeh se ka duh avangin ka order sak ta ringawt kha a nia. A rawn thleng tep tawhin ka ring. Ruatsanga pawh a rawn tho a, "Puan kha min sintir em ni?" Ka ti vat. 

"Vawt ti hle si, puansin tur te chu ken chhuah tur che alawm" a ti hluk a. 

"Ka lawm e" ka ti sep a. Ka chauhzia a hmu thiam a niang. "Va mu hahdam rawh, ka lo pui ang" a ti dam thlup a. 

"Hetah chaw ei i ei a ngai aw. Ka order kep tawh che" ka ti táwng a. 

"Khatiang hmel dawldang lutuk pu chunga ka kalsan che chuan i pa ka hmachhawn ngam nang. Vawiin leh zanin ka awm tluan ang" a ti nghet charh a. Ka va melh zawk a, min rawn melh ve váwt. A mitmenga eng emaw inphum chu a cham rei lo kher mai. Bawnghnute ka in zawhah, "Farm-ah ka zu kal ang e. Eng vak mah kha tih a ngai lo, kan eitur order a lo thleng tep ang" ka ti a. Sangpuia a lo tho ve mek bawk . Farmah chuan ka chhuk zui ta nghal a. Vawkpui hi an ril a tam hma bik nge mawni dawn ni, an lo rak leh ruai ruai tawh a. An chaw tui tur tuilum ka chhuang nghal a. Dai diaka pek te chu an eitui bik teuh lo. Vawk hi ka tleirawl chhuah lai khan Nanai tia kan koh mai, sen thir ther, lian lutuk lo hi inah kan kawl thin a. Sangpuia hian kawrte haktirin a bualfai peih bawk a.A pu Sangpuia khan a kaihruai peihin a enkawl peih bawk a, Kan ui khawi ho ai mah khan a fing zawk nia! Vawk IQ sang deuh hi an tam mai. Ran lam ka ngaihven loh vangin ka hre thui lo va, Ka ui Lovely pawh a chhawih riau reng a. Ka naute angin ka hrinin khawi fin ve vak ka tum ngai lo, ka khawngaih zel a. Chuvang chuan Lovely chu ka awm loh hlan phei chuan ka nu hian an inah a kalh hnan hmak zel. Ka tahpui lo chauh thin, mahse, a mawl ve ém bawk. Thil seh chhiat a ching si , ka makeup te a lo seh chhe thul..ka bed sheet pawh a lo chhaihna lamah a lo ham thler nuaih a. Chumi tum chuan ka vaw ve. Mahse, lungngaih hmel taka min melh hian ka lainat zel a. "Á mai rawh se ani hi chu" ka ti ta ngawt kha a nia. Ka nau ar vawi hnih a seh tawh a, chumi tum chuan ka pa pawn hralh emaw mi dang pek a rawt a. Ka phal lo bur bawk si, ka roomah a in tur ka dahtir ta a. Inthiar velah erawh a fel em em thung. Kan pitu khawvel chu ka room chu a ni mai. Chutia ka roomah chiah awm ka phal tak chinah chuan a mimawl zia pawh a paih ve ta hlek hlek a ni. 

Vawk chaw ka pek zawhah ar ho ka pe leh a, Kel chu pek an la ngai lem lo. Vawk chaw hap thawih thawih lai chu ka en reng a, ka rilru erawh Aizawl Hospital Cabin pakhat chhunga ka pa bulah a awm thung. Ka pa hian engvangin nge khatiang hna kha a thawh? Tih hi ka hriat chak ber a ni. 

"Malsawmpek, i game hi ka hre tawh. I chak dawn lo" ka ngaihtuahna ka lo phun chhuahpui leh pek! Ka hnung atang chuan, "Eng game maw?" a rawn ti thut a. Ka hawilet rang teh e. Ruatsanga chuan uluk zetin min lo melh a, a zahawm mah mah. 

"Engmah engmah..eitur chu a lo thleng tawh em?" ka ti ta zung zung a. 

"Thleng chiah, i rei ta sia, i lo inkhai reng a niang tiin ka rawn ngaihven che a" a ti a. Ka va melh hráwk, a lo nui sáng a. A fiamthu chu a den mah mah.

"Mahni leh mahni inkhai tur khawpin ka la beidawng ve lo" ka ti nghat a. A ner suk ringawt. Kan chho dun ta a. Remruata'n dawhkan a lo buatsaih mek. Inkhawm ka tum lo va, ka hmanhmawh lo. Tukthuan chu ka beisei aiin ka ei tam daih. Ka lawm hle. Sangpuia hian a heh ber mai awm e. A damlo ve hi a thau mum kúng mai. Vawiin chu a bialnu pawh a rawn lan tur thu a sawi kha maw..Eikhamah ka tifel vek a, Remruata chu inkhawm turin a insiam a, Ruatsanga pawn motor a sil. Ka bike ka siltir ve nghal a, a phun bik lem lo. Ka intihfel zawhah ka nu ka bia a, "Naktuka chhuah a ngen a. I pa hian a ning thawkhat tawh a ni. A result a hre tawh bawk nen, Phai lam min refer turin kan ngen a, mahse, 'awmzia a awm lo' an ti tlat sia. I pain, 'Keimahni thuin kan kal mai dawn nia. Doctor hmelhriat nei lo ka ni hleinem" a ti hmak sia..naktuk chu class i kal thei lo aw" a rawn tih chuan ka lawm zawk daih. Ka pa hmel ka hmu vat tur chu. Damdawiin leh ka pa hi an inhmeh lo hrim hrim. 

Chawhma chhung chu chet hah ka duh avangin in chhung ka tifai a, Ka nute room pawh ka tifai vek. Ka pa private room ka luh chuan ka lum leh pup nghal a, mahse, ka tuar lui. Chhuat ka nawh laiin thil ka hrechhuak zawk. Ka pain cctv a kam tih ka lo hrechang miah lo..room kil hnihah cctv chu a lo bei ran mai. Awmzia a awm tawh lo, nizana ka chettlatna footage kha ka nawtreh thei tawh lo. A hmu dawn a ni mai. Hmu se pawi tihna vak ka nei lo. Mahse, a thawng ve deuh maithei. Engkim a puangzar lo thei lo zawk ang a, ka tan pawh zawhna zawh vak a ngai lo vang. 

Mikhual room lam ka tihfai mek laiin Remruata leh Nunui te an rawn lut a. A u bialnu a rawn phur thla ve tihna a nih chu. Sangpuia'n a lo chiauau vat a, kei erawh ka laklawh deuh vangin ka va chhuak ta lo law law. Ruatsanga a rawn lut a, "Ka tshirt kha min lo ban lawk, khalaia a var kha..ka'n inbual ang e" a ti a. Motor a sil zo a ni bawk a, a huh hliam mai. 

Ka va pe ve mai a, "Che zo la, inbualfai la,inchei teh. Ramhuai hmu ang reng i ni" a ti nghut a. Ka landan a lo ngaipawimawh leh tawh. 

"Ninawm" ka ti hlak a. 

"Mala pawh a rawn kal dawn kha" a tih chuan ka phu zawk. 

"Eng nge a rawn tih dawn?" ka ti hlar a. Ka tum nghal vuàu bawk, "Ka hre lo, a rawn kal tur thu a sawi ringawt" a ti satliah a. 

"Ka hmu chak hran hleinem" ka ti nghat a, chhuat chu ka nawh zawm a. 

"A hmu chak thung che alawm" awmze nei zeta kiai sak chung hian a ti a. Ka chhan leh hmain a chhuak vut. Malsawmpeka lo kal dawn vang nge ka che chu ka hmanhmawh riau mai a, chet zawh vat vata inbual chu ka thlahlel ni maiin ka hria. Mahse ka han ding ren rawn a. "Engvangin nge a lakah feelings ka la neih fo ang? Ani chu ka hmelma, ka hnaih ngai loh tur a ni" tiin ka phun sep a. Chuti chung pawn ka chhungril erawh a hmanhmawh tho si, He pa hi ka duh satliah ringawt lo a ni maithei.

Ka chet fel zawhah ka inbual ta nghal a. Ka sam ka chhemro lai te chuan Mala bawk ka lo ngaihtuah leh tawh. Ka laka a duh chu ka pa document chauh a ni tih vawitam ka inhrilh chung pawn, hman zana min fawh luihna te, a hmui nem leh lumzia te, a taksa dehna chin hriatzia te kha ka ngaihtuah chhuak lo thei lo. Min sual ngei dawna a lan avanga ka la thianghlim thu ka sawia a tho nghal vat te kha..Hmeichhia, a hmanraw satliah ang ringawt chuan min en bik lo niin ka hria. Mahse, ka beisei san vang pawh a ni mahna emaw ka laka lan that leh intih rinawm a duh vang a ni thei. 

"Thansangzual, tlawm suh. I hmachhawn thei" tiin darthlalanga ka thla lo lang chu ka va fuih a. Inchei tih dawna inchei vur nisi lo inchei lo tih dawna ni chuang bawk si lo hian ka awm a. Ka lungawi viau. Nunui'n chhun ei tur a siam a, kan lo innel tawh bawk nen, a zak em em tawh bik lo. Ruatsanga awm ve erawh chuan tlemin a tikhawr ve deuh niin a lang. A titi siam siam a, tu emaw hming a lamrik hun ka lo nghak ni maiin ka hria. A lam ri si lo, ka hrilhhai ru viau. Eitur kan ei laiin Malsawmpeka ngei mai chu a rawn thleng ta a. Remruata chhuak tur chuan a be hlut mai. A ngaisang nasa mai sia aw..a buaithlak. 

Nunui ei siam sa chu ka va suahsak ve hram a, keimah min rim tur niawm taka lo kal a ni ve miau si a. Ruatsanga nen pawh an inbe bawrh bawrh a. Davaea'n min lo call avangin choka lamah ka phei a, "Saroni ka rawn lenpui dawn a, zanriah kan ei nghal dawn. A rem ang tiraw?" a rawn ti a. 

"I tante chuan boss" ka ti hlut a. 

"Hei ka chhuak dawn chiah, kan rawn thleng har lo vang" tiin a dah a. Kei pawh ka duh hun hunah an inah chaw ka eiin ka riak thin. Thiantha kan ni miau a. Bialnu a nei thar leh ta chu a nia, eng tak ang leh ang i maw..

Thutkhawmna lama ka phei leh tur ka inher chiah chu Mala nen kan insu dawt, ka banah a rawn vuan nghal chat a. Thutkhawmna leh Choka inkarah darthlalang chhah chi kan hung a, kan thawm an hriat loh bakah min rawn thlek dúk dúk te a nih loh chuan min rawn hmu lem lo vang. 

Ka bana a hmerna chu ka kut lehlama paihthlak ka tum a, a hmer na hrep, hnai takah min rawn chhuk melh run bawk. A mitmeng chu ka chhiar thiam lo. 

"Min thlah rawh" ka ti vin thak a. 

"Engvangin?" a ti kher..hmela chu a. 

"Engvangin nge min chelh zawk a?" ka ti ve ngat a. 

Ka beng bulah zawi sup hian, "Kan inngaizawng tawh aw" a ti a. Ka ner sawk, "Ka duh tawh lo che. I toy ka ni lo tlat. Min thlah vat rawh" ka ti leh hlar a. Ka mitmeng pawh a thíp rám tawh ang ka ring. 

"Tihian le.." tih pahin ka beng bul leh ka nghawng velte chu a rawn núl thuak a, ka mur uai uai mai. Mahse, insangmar vatin, "Tenawmpa,. Kal vat teh. I hmanrua nih ka duh tawh lo, nang hian min hmang leh tawh lo vang" ka ti ta tuar tuar a. Ka tawng ri chu an hre phak ta nge ni, Sangpuia chuan, "Ú, in thawm a va ring ve" a rawn ti ta a. 

Mala chu ka khabeah chawiin min kuai dak vah a, "Hna leh mimal nunah i buai ve ta maw? Tikhan mipa vawt tak ka nih chhan i hrethiam tawh ang chu.. Mahse, tun tuma ka lo kal chhan erawh ka bialnu ni tura sawm che ka tum vang a ni. Hna vanga rawn kal ka ni lo. " a ti dam thlup a, a mitmeng pawh a zawldawh ngawih ngawih mai. Sawi tur hre mang loin ka hawihai a, ka melh reng ringawt. 

"Min duh tawh lo a nih chuan i thu thu aw. Ka inthunun leh thei mai ang. Zan 2 chhung nangmah vangin ka mu mang tawh lo" a ti ta a. Mak ka ti deuh. Mahse, ka tawng leh hmain Ruatsanga a rawn lang a, "Lo phei teh u, Sangpuia ngaih a tha vak lo a nia" a rawn ti a. Ka thaw hawk a. Mala min chelhna chu paihthlain thutkhawmna lam chu ka pan ta a. Boruak engmah awm lo ang maiin hun kan hmang chho leh thei hram. Mala chu a tak run lo va, a titi nasa ber berah a tang a, titak hian a lo tawng duh ve ang tih ka lo ring pha ngai lo. Ka pa chhuah tur thute pawh ka sawi ve a, "Phai doctor emaw foreign in pan chuan kawng a awm maithei asin. Beiseina hi han nei phawt zel ila" Mala chuan a ti a. Sangpuia chuan a lo pawmpui hle. 

Dave te pawh an rawn thleng chawpchilh ve nghal a. Saroni chu kan inchen thuak awm e, a hmai a tung a, nula hmeltha tak pawh a ni. A kareh a zau lek lek em aw ka tia, mahse, a inhmeh viau tho mai. Lo awm ve te nen ka han inhmelhriattir nak nak a. A nelawmin a changkang a ni tawp mai. 

Dave chuan, "Chawhmeh eng nge kan siam ang!" A'n ti nghal táwng a. 

"Vawksa leh arsa la siam loh a awm. In duh zawk zawk a ni mai. Nunui'n bai siam se , ei a chakawm..i peih em? Nunu" tiin ka va melh a. Mala chuan a tawng hmain,"Nunui bai in ei chuan kan monu ni se in ti nghal ang. Thiam tak a ni" a lo ti var a. Nunui pawh a nui sen sen ringawt. Mala chu melhin,"I ei ve nghal ang tiraw!" Ka ti khawmawi a. 

Ngaihsam hmel zet hian,"Ka ei lohin, a changtupa ber" a ti! Ka melh rum viau naa, min en duh der si lo. 

Dave chuan,"Uisa ei a chakawm. Sunday a ni bawk sia" a ti hluai a, Sangpuia'n, "Hmanni khan kan ui pakhat kan lo hralh daih alawm le..kan han talh mai tur a nia" a lo ti ve a. 

Saroni chuan ner sak chungin,"Uisa te lo la ei..a nunrawnthlak em mai" a ti hlak a. Ui a ngaina ve viau a nih ka ring. 

Ruatsanga chuan,"Khawvelah uisa a tui ber, a dawtah a thing" a lo ti lung lung a, kan han nui leh rih. Saroni chuan,"Uisa ei ho hi chu hmuh dan tawk ka nei kei chu, hmeichhia ngat phei chu uisa ei ngat zingah hian zu in lo tumah an awm ka ring lo. " a ti leh ta nghat a. A la na viau em mawni dawn le..

Nunui chuan, "ZU chu ka in ngai miah lo naa, uisa chu ka ei thin asin" a lo ti sap a. Saroni chuan meng ling hlar chungin,"Ui i vulh lo va, i hrethiam lo a nih chu. Uisa ei ho hi chu a tlangpuiin pawisak nei lo, mi hurherh tak an ni duh" a ti ta zel a, duh aiin a tawngkam a na ta. Dave pawh chu a meng buai nak mai. 

Mala chuan,"Kei uisa hi tui ka ti, ei reng erawh ka duh lem lo va. Ui chu ka vulh a, ka duat viau. Mahse, mi uisa ei ringawt helh tur tingin ka duat over ve lo a nih hmel" a lo ti ta nghut a. Saroni a ner sak, Sangpuia lah helam sawi chuan sawi tur ngah ber pawl a lo ni nen, "Kei aia ran ngaina hi an awm pawn an tam ka ring lo va. Farm te hial siamin ui pawh tunah 7 lai ka vulh a. Mahse, a sa hi ka ei tho. Dog lover inti thenkhat te extreme dan em em hi chu kei dog lover ve tho hian ka ngai thei mang lo. Nikum khan ka ui vulh pakhat a chhuak hlauh mai a, a kawlh ber leh thunun harsa ber kha a ni bawk nen, ka mangang khawp mai a, Ka hlauh ang ngeiin naupang a lo seh a. A naupang pa chuan ka ui chu a lo vawhlum ta rêng a. Ka thian thenkhat extreme fal deuhte chuan report thehlut turin min ti nasa, mahse, ka ui thiam loh a ni miau a, naupang enkawlna pawh ka pe vek a ni. Tin, ka uite hi Zo ui deuh vek an ni bawk a,. A fin pawh an fing ve riau asin" a ti ta duah a. Saroni an kahna vek a ni tih ka hria. Boruak tihdaih nan, "Dave, zanin chu a tui lamte i duh dawn em?" tiin ka va melh a. Inthlahrun hmel deuh hian,"A pawi hleinem..mi dang pawn an duh ang" a ti a. 

"Zanin chu a nuam dawn e. Riak ve daih ula" ka tih chuan, Dave chuan Saroni hnunglam atangin a kut chu a vai vak vak a, amah Saroni chu ner núng chunga kawkin a lu a thing nur nur bawk. Ka nuih a za si, chokaah ka va nui ringawt. 

Rawng kan han bawl tan a, mipa lam an fel. An che súrh súrh mai a. Nunui'n bai a siam mek bawk. Kei ka awlthawng letling phian a. Min mawlhtu thil eng emaw chu la awm tho mah se, ngaihtuah loh luih ka duh rih. Mala pawh a awm loh laia ka huat nen, ka hnaiha a awm chuan ka namnul thei hlek lo. 

Saroni pawh han tum lian viau mah se; ka han biak tak sekah chuan a tawng duh ve leh ta hle a. Ui a hmangaih leh khawngaih over vang khan ka va demin ka va hnualsuat ve lem lo, mihring rilru a inang lo miau a. Hmeichhe sual tak niin ka hre lo. Farm te chu ka zu fanpui a, ui chetla pawh a hmu duh khawp mai. "In neihin a tlin tho sia, zo ui lo hi vulh ta che u" a tih chuan, "Ka nau hian a ngaina tlat sia ..ka thu ve lo" ka ti mai a.

In kan thlen chhoh rual chiah chuan Sangpuia hian ring zet hian,"Ruang an chhar leh tawh. A va mak tak" a ti lung lung a. 

Ruang chhar?! A va mak teh fo em..

"Tu nge?" Nunui'n a tih lai chuan kan tv on laiah chuan an rawn puang ve chiah a. Kan en thap mai. Mitthi ruang hmel ka va hmuh rual chuan ka tawlhhnung dáwrh a, ka khur der der mai. Saroni chuan mak tih hmel deuh hian,"Ti nge a? I tha em?" a ti hliai a. Mi dang ho pawh chuan min lo en thap. 

Ka chil lem khawlhin, harsa ti zet hian,"Ka thiannu Biakdiki a nih khi" ka ti tham tiak a.