malsawmpeka 5

MALSAWMPEKA (5)

Ziaktu: Toni Râlte

Ka beisei loh lutuk hmel ka hmuh avang chuan ka aw pawh chhuak tur a awm lo. Ka thaw a chham lo chauh bawk nen. Ni e, he tah hian hmuh ka lo inbeisei hauh hleinem. 

Ani erawh chuan hamhaih hmel a pu ve lo thung. A landan chu a nghet tlut a, lungpui ni mai awm a ni. A kutzungchal a hmuia dahin min rawn pan a. Ka che thei lo, ka ding khawng reng ringawt. A mitmeng hlauhawm ru riau chuan min luh ka ti dawn nge, ka chhungril chu a sa ham ham mai. Ka bul a rawn thlen chuan,"Zuk mu leh rawh" ka beng bulah a ti sup a. Ka chhing sawk. Insangmarin theihtawpin ka inhum ruh a. "Hetah hian eng nge i tih?" Ka ti tham chhal a. Ka aw chu a ri chang chang a ni ber e. A khi suk a, " Engmah i hre lo va, i hmu lo bawk. Zuk mu leh rawh" a ti hniam raih a, a aw chu a hlauhawm ru riauin ka hria. Ka lu ka thing nar nar a, "Engvangin nge he thil hi i tih? Tu nge i nih!" Ka aw pawh a chhuak tha thei ta deuh a, duh aiin ka rawl a ring. Ka hmui a rawn hup vat a, bangah min nem bet thlawp, "Keimah ka ni. Malsawmpeka..ka kawng dal suh. Tihnat che ka duh lo" a ti vawt raih a, Thlabar takin ka lo melh thung. Mahni tawkah ramhuai lo chu hlauh ka nei lo tia inla sehhel taka lo khawsa thin ka ni. Mahse, ka hmaa mihring lian leh mitmeng hlauhawm tak avang hian ka te chem chem mai. 

"Engvangin nge he thil hi i tih i sawi loh chuan i hna chu i thawk bik hauh lo vang" hlau chung chungin ka ti a. Ka aw khur chu thup ka duh hle. 

"Mi mawl tak anga lan tum suh. Eng nge ka tih i hria a? A chhan i hre nghal mai lo em ni?" a ti ta a. Ni e, ka pa private roomah hian eng dang mah a rawn len chhan lo. Document eng emaw a zawng a ni. Mahse, chu chu tu tihtir nge nia engvang nge tih ka ngaihtuah thiam tlat lo. 

"I nuin a tir che em ni?" Ka ti ta a. Dawhkana paper lo let reng lekkan pahin,"Ani pawh saw ka chhui mek a ni" a ti ta mai a. Mak tiin ka tawlhkir dáwrh. He pa hian eng nge a tum? Eng thilah nge a inbarhluh tak? 

"Malsawmpek" ka ti tuar a, ka hmui a rawn hup leh vat, "Tawng zawi rawh. I nauten kan thawm an hriat chuan buaina a chhuak palh ang e" a ti zawi sup a. Ka tal vak vak a, ka hneh hlawl si lo. A kutah chuan ka seh ta a, na tiawm pawn a awm lo. Ka seh thi ta hial a, a kut a lakthlak rualin ka beisei loh lutukin min rawn fawp ta a, ka hamhaih lutuk chu ka meng phawk hrû ringawt. Ka hmui erawh ka chip tlat thung. A rawn fawp bawrh bawrh a, ka theihtawpin ka lo nam ve ngat ngat, a chak si..a tawpah min thlahin,"I duhtawkin au rawh." A ti hawk a. Au pawh ka tum hran lo. Engkim chuan ka hrilh an tihai ngawih ngawih a ni ber mai. Ka tahte pawh a chhuak. 

"Chhuak rawh" ka ti sap a. Ka mittui tla têp chu ka khap per sak sak a. 

"Ka duh ka la hmu lo" a tih leh ngat phei chuan ka Arab thisen kawlh zet a chhuak ta nge, a samah ka han kek ta a, a lo inring bik lo nge chhuatah chuan ka kek thlu ta a, ka theihtawpa naa kekin ka tlawh bawk, ka kut chu nghet zeta rawn chelhin a lasawn ta a. 

"Kawlh lutuk" a ti hluk. Chhuata ka thu sawp niaih chu min rawn bawh thuakin,"Min duh tiraw? A dik em?" Tih leh ka hmuia rawn fawh leh a rual nghal a, ka tal awt awt mai. Mahse, ka kut pahnih chu a kut lianpui chuan hum kawpin ka lu chungah min phar chhohtir a, ka bawp pahnih chu a bawp lian zet chuan a delh hmiah bawk. Ka tan chet lak ngaihna reng a awm lo. Ka lu ka thing vak vak a, engahmah a ngai lo. Min sual ngei dawn niin ka hre ta a, ka mangang ta deuh,amah chu ka mipa duhber ni mahse, inpawngsualna hi ka hua. Tin, chutianga ramsa koham ang maia che turin Malsawmpeka chu ka phal lo bawk. Ka thlek sawn pah chuan,"Khawngaihin..ka la thianghlim ania" ka ti tham tiak a, ka aw chuan khawngaihthla a la hliah hliah mai. A tawp chut a, zo zeta min kaithoin, ka sam chu a tuai mam a. 

"Chhuk rawh" a ti sup a. A hmaah chuan nula chak lo ber angin ka ding ta reng a. 

"Kei pawh ka chhuak ang. Engmah i hmu lo va, engmah i hre lo bawk aw" a ti leh nghut a. Pindan chu a chhuahsan nghal. Kei erawh ka ding zum reng ringawt. Ka tah hi a chhuak ta em em mai a, chhuatah chuan thu sawpin ka tap ta hlawp hlawp a. Ka intap thawl ka ti mai, ka zia hawk mai. Chutah harh thutin ka pa dawhkan lam chu ka pan ta a. A pawhdawh chu pawh chhuah ka tum a, a inkalh tlat! Safe chabi lah ka hmu si lo, eng lehkha pawimawh mah Mala pawh khan a hmu bikin ka ring lo. Ka pa dawhkan sirah bookshelf sei tak a inhung a, mahse, passcode hmanga hawn a ngai. A dawhkan chungah eng lehkha mah a awm lo, a awmchhun pakhat lah Mala khan a la bawk si. Computer pawh chu ka on peih lo law law, password ka hre dawn lo bawk a. Ka pa private room ka enthla kual tih ka ngaihtuah zawng pawh chuan ka zak ngawih ngawih. Kimki takin in hnuai lam ka pan thla ta chhat chhat a. Thil ka hrechhuak thut, kawngkapui lam ka pan vat a, a lo inkalh lo. Mala chu a chhuak tawh ngeiin ka ring a. Ka kalh ta nghal a. Ka buaina erawh tuin nge kawngkapui kalhna hi va hawng tih a ni. Mikhual pahnih kan nei a, Davea chu a nih ka ring lo hul hual, Nunui hi le..a muhil lai chu ka melh vang vang a, mut dawna Malsawmpeka felzia leh an tana a hlutzia min fah teuhte kha ka hrechhuak leh. Ka zawh ni miah lo va a rawn sawi chhuah danah Mala tan kawngka a hawnsak a ngaih avanga a inthiam lo ru si, Mala puih loh hreh bawk si khan a intlawhkhalh lawk a ni mai lo maw?! Pawisawilo hmel a pu si a. Mahse, ni e, Nunui hi thiam takin Mala khan a bum ve thei tlat. Chu zawng nakinah ka la hre mai ang chu maw..

Ka mu tlem bawk a, ka harh chuan Nunui pawh a lo tho daih tawh. Class picnic a nia, ka pa a heti chunga lo va picnic kha ka duh lo hul hual. Ka hmanhmawh ta vak lo. Ham bai bai chungin ka va tho chhuak a, Nunui chuan vawksa a lo chhum mek a, Tiau antam tuihnai tak nen, a rim pawn ril a titàm vawng vawng mai. Min rawn hmuh chuan,"I nuin vawksa hi siam turin min tia" inthiam vak loh hmel hian a lo ti a. 

"I riak tih a hria law.." Ka tih mek laiin, mut dawna ka nu nen kan inbiak khan Nunui lo riah tur thu ka sawi tak kha mawle..nui chungin, "Ka ril a titam" ka ti leh ta zawk a. A awm a nawm hmel leh ta deuh. Dave erawh a la mu a ni maithei, ani hi zawng delhhlum sa eitum thin ngang kha a nia. Sangpuia erawh a ke na avangin a harh hma thin, Remruata nen hian a harh zawk zawkin kan jection mai zel. Remruata'n a lo jection diam tawh a, Thutkhawmnaah a rawn thu ve peih. Remruata erawh a u farmah a u tih ai a zuk ti a nih hmel. A û ber hi ka laktlak si loh. 

Dave chu ka va kai tho ta nge nge a, A inlukhup tlat chu va hai hawngin,"Tho rawh. Em em a che" ka ti thawt a. A rawn meng sur sur a, ka inrin loh laiin ka banah pawtin a lamah min kuai phei dáwrh mai. Ka rak thawt a, nghet zetin min pawm bet a, a awmdan chu mak ka ti deuh, hun tam takah khum khatah te hial pawh kan lo mu dun tawh thin. Mahse, hmeichhe enin min lo va, kei pawn mipa enin ka en ngai bik lo. 

"Ka thaw thei lo a nia, tho teh..khawi maw" ka ti tuar tuar a. 

"Reilote..lawk, Sang, tihian reilote" a ti su su a. Ka hrethiam lo. Second reilote min pawmbeh hnuah ka tal pit zawk a, ka ding thei ta. Ka sam tuai mamin, "Dave,i tha em?" Ka ti nghal a. 

"Ka tha..i lakah feelings ka nei em tih ka intest lawk a nih kha. Ka lo nei lo nasa a nih kha" tih pahin a kap a kawk a, a bianga na zeta va piai pahin,"I chhe lutuk" ka ti nghek. A rawn tho a, a va intifai. Kei pawh ka inthlak fel hnuah Farm-ah ka chhuk ve a, Remruata'n vawk chaw a lo pe mek. Ka pui ve zat a, Ar pawh kan pe nghal. Kel hi chu ka ngainat loh em vangin Remruata kutah ka dah. Ina ka han luh leh hnu lawkah tukthuan kan ei ta a, Ka ngaihbel nge Nunui chu a zumin ka mitah a en ngam mang tlat lo ni hian ka hria a, mahse, engmah hre lo niawm takin ka tawng bawrh bawrh thung. 

Thleng ka sil laiin Nunui chu a rawn kal hnai a, "Tukina tu nge tho hmasa ber?" A ti ringawt. 

"Ka hre nang, nangmah ni lo mi?" Ka lo ti hû a. A chil a lem khawlh. Amah ngeiin kawngka a lo hawnsak tih ka hrethiam ta. A hlauhthawn luatah amah leh amah a inpuang tihna a nih ber chu, mahse, ka dem ngawt thei lo. Thil nihdan engkim ka hriatchian phawt loh chuan. Nunui hian kan lakah rilru chhia a put ka ring lo hul hual. Mala an tana a hlut ém vang chauh a ni ngei ang. 

Ngaihtuah buai loh hram hram tumin ka intihfel zawhah ka nute kan tura chhuah ka tum a. Remruata erawh school kal tura ka nawr tlat avangin a kal dawn. Sangpuia leh Nunui te tan chance kan siamsak tihna a ni mai. Dave nen kan inphur chho leh a, tlai lam chu Ruatsanga ka be mai aniang chu. Ka nuin a ngai lo a tih avangin chaw erawh ka kensak lo thung. Ka va thlen chuan an eitur order a lo thleng ve chiah a, ka pa erawh thisen chaw an pe mek thung. Tukin zing dar 4 bawr velah a rawn harh a, tunah a muhil leh mek tawh. Ka nu chuan eitur chu a ei mawlh mawlh a, eng anga hun harsa leh hrisel lohna pawh nise chaw thlah loh hi a fate pawh min fuihna a ni. Chuvangin a eitui vak lo chung pawn a ei lui hram hram tih ka hmu thei. Nizana thil thleng kha ka sawi chak viau naa, nasa taka nizan ka mut hnua ka inngaihtuah hnuah, an rilru tihah zualtu mai a nih dawn avang leh ka pa natna a zual ka hlauh vangin ngawihbopui rih mai ka thlang ta a. Keimah ngei hian Malsawmpeka thiltih hi eng nge a nih chiah chhui ve ka duh bawk a ni. 

Ka nu bulah Nunui ka fak chiam a, fel a lo ti ve khawp mai. Sangpuia pawh ngaihngam takin ka chhuahsan theih phah a. A nu tanpui vel ka nu bula ka sawi chuan,"Nuam lo an ti ang e..Engtin emaw pe la, an hriatthiam loh turin" a ti a. A tha viau ang. 

Ka pa bulah ka táp chawt a, Ka nu pawh min chah angin inthlakna ka kensak bawk a, a va inbual fai vâk a. Ka pa pawh a rawn harh veleh hrukfai a tum. Chawhnu lam a ni ruai tawh tihin Amanda a lo lut hlawl mai. Ka nu chuan a lo dawngsawng nghal vat a. Ka bulah a rawn thu ve chat. "I pa damloh hun chu a timing ka va ti lo tak êm aw. Thil tam tak a thleng sia" a ti sap a. A sawi duh loh a sawi nge ka zawh chian pawn a sawi nawn duh tawh miah lo. An mi man inpuangte chungchang kha ka nu chuan a lo zawt a, "An thah a nih ka ring lo. Hmanrua an nih ka ring, mahse, an nunna an tháp bawk a, anmahni vaua thamna petute hming an lam hma loh chu jail-ah hun an hmang ang" a ti chang rât a. Hrethiam lo zet hian, "An inpuan ber tawh chuan an thah a ni mai lo mi?" Ka ti a. 

A nui mai a, "Naute, i la naupang a. He khawvel tenawm leh rimchhe tak hi i la pal tam tawk lo a nih kha, khang mi pahnihte khan Pu Chhinga te thahna chhan tur an nei reng reng hleinem. Tin, tualthat ngam tur khawpin an huaisen tawk lo bawk. Pawisa hmangin tu emaw ten an aiawha chang turin an tham a nih kha..jail atanga lakchhuah vat intiamin. Mahse, an la chhuak dawn lo, ka tang tlat dawn" a ti ta bawrh bawrh a. Ni e thil tam tak a lo paltlang tawh a, kei ai chuan a hre fe ngei ang le. 

"Anmahni ruaitu te chu tu te nge ni ta ang?" Ka ti leh hû a. 

A chek hlak a, "Ka hre bik lo. Rindan erawh kan nei. I pa nen pawh kan sawi dun tawh. Ani tihian a awm leh bawk si" a ti ngui riai a. Ka pa damlo chu pawi a tih hmel takzet a ni. A fapain ka pa a chhui ru tih kha sawi mai tur em ni ang tih ka ngaihtuah ut ut a, mahse,amah Amanda ngei pawh a chhui ruk thu a sawi si. Chu lai takah chuan ka buai ta em em a. Malsawmpeka ka duhna leh venhim ka duh tluk zetin ka pa leh Amanda chhui ruka enthlak an ni chu ka duh bawk si lo. Ka buai nuai nuai mai. Ka sawi tawh lo ta sa sa a, ngawih rih zel chu ka tum ta a, Malsawmpeka ngei a fala ka biak leh hunah ngaihdan thar ka nei mai ang chu. 

Ka hawn hmain ka pa a rawn harh hlauh mai a. Ka lo vuan chat, a rawn nui hram hram a. Ka nuin tui a tulh vat. A che thei der si lo, a result te hi a hre ve tawh ang em le? 

"Zoi, hetah hian ni 3 bak awm ka tum lo a nia" a ti hawk a. Ka nu a meng hnual rawih mai. 

Min rawn enin ka pa chuan, "Ka naute, i naute i enkawl tha maw?" a ti sup a. Ka lo bu nghat. 

"Ka dam vat dawn alawm. Hetia chak lo tak anga min hmuh hi ka duh lo a nia, lo kal tawh suh aw. Ka rawn haw vat ang. Zanah khawiahmah i naute chhuahsan suh" a ti zawi sup sup a. Ka bu leh nghat nghat ringawt. Ka hnuk a ulh deuh a tin ni. Ka pa chuan a result a la hre lo a nih ka ring. Ka nu ka va melh a, inngaihtuah muk tak hmel a pu. A rilru a hah ve khawp ang. Mahse, la puitling tawk lo tih takah kei chuan ka pa chu dam leh vat turah ka la ngai fan a. Phai mai ni lo, Foreign doctor tha tak tak kan panpui chuan a dam leh ngei dawn niin ka ngai. Pawisa kan ngah a, Ka pa hmalam hunah ka lungngai lutuk lo. Tuna ka hnukulh erawh ka pa ka khawngaih vang a ni, Pa fit leh thothang tha tak mai, hetia damdawiin khuma a mu bul ka hmuh hian ka khawngaih êm a ni. 

Ruatsanga ka biak dawn laiin Malsawmpeka call ka dawng ta a. Thawk la hawkin ka la ta hram. 

"Damdawiin kawtah lo awm rawh. Ka zuk thlah ang che" a rawn ti nghal táwng. Engtin nge damdawiinah ka awm tih a hriat le?! Ka chhan hmain a la dah daih zui. Mahse, sawi tur ka neih ve tho avangin ka hnial duh lo. Ka nu bulah Mala'n min thlah tur thu ka va sawi leh a, ani erawh a thla a muan hmel tawp. Mala thiltih engmah an hre ve si lo. Damdawiin kawta waiting shed-ah chuan ka thu vang a, mi dang pawh an awm ve. 

"Sangzual, i ni tiraw?" a rawn ti teh ngawt a. Ka'n en nak chuan College ka kal laia kum khat chhung ka roommate Biakdiki kha a lo ni reng mai. Ka la hai lo nasa, mahse, a hma ai khan a cherin a hmaite chu a la naupan nen a duk thluah tawh mai a, a háng deuh tawh bawk. 

"Biakdik" ka ti ve hluai a. Kan inchibai zui. Ka bulah rawn thu vein, "Tunah eng nge i thawh?" a ti ta a. Ani hi zawng tawng duh leh kawm nuam tak kha a ni thin rêng a. 

"Engmah ka la thawk lo, Ka pa thu angin M.com ka zir leh a" ka ti a. 

"I pa chu a la thu reng a ni maw?" tiin a nui hak a. Ka nui ve ringawt. 

"Chuan,hetah eng nge i tih?" a tih chuan zawhna a ngah luat hlauin, "Ka thiante ka kan a. Nang zawk?" ka ti ve mai a. 

"Kei chu ka inentir, nau ka pai alawm" tiin a dul a khawih zauh a. Ka meng zau kàwk. "Awii! Ka va lawmpui che em aw. Thla engzat nge? Chuan naute pa tu nge?" ka ti ve leh ta zawt zawt a. Chutia ka zawh chuan a ngui deuh tlatin ka hria. Zawitê hian,"Thla 4 a ni ve tawh, a la puar vak lo a nih hi. Naute pa chu ka sawi thei lo" a ti ta a. Sawi duh tam tak nei hmelpua min en laiin, Mala aw hian, "Sangzual, kal ang le" a rawn ti ta si. 

"Bd, ka kalsan phawt ang che. Ka number ka pe che ang a, min lo be rawh aw. Hawn ka ngai sia, kan la inkawm leh dawn nia " ka ti sawk sawk a. Ka number ka pe bawk. Engmah a sawi lo, kei pawh Mala motorah lutin kan tlan zui ta nghal a. Rei kan tlan hmanin ruah a rawn tla phuar phuar mai, a rawn baw ta hawk hawk a. Pawn lam chu thlir hleihtheih pawh a ni lo. 

Aizawl khawpui pela kan in lam kan pan takah chuan motor dang kan tawk ta mang lo va. 

"Sawi rawh" ka ti ta a. Mi rawn melh zawk a, hmalam a melh leh thuai. 

"Sawi tur neiin min hria em ni?" a ti ta hú a. 

"I nu emaw ka pa emaw ka hrilh lohna chhan tur tha tak ka hriat a tul" ka ti ve ta ngat a. Min palzam mah mah ka ti ve deuh a ni. A thutak ta ran a, a aw thian kharhin, "Kei hian a rukin sawrkar ka thawhpui a ni" a ti ta a. A tawng zawi viau naa ka bengah erawh ring tak a ni. 

"Mahse, Sawrkar mi leh sa tam zawk hi ka pa thiante vek an ni si a" ka ti a. Ka hrethiam vak lo a ni. 

A nui hak a, "A tam zawk hian an phatsan ti ta ila a thawng viau che ang em?" a ti ta a. Ka meng phawk hrá mai. 

"Chuan, nang pawn ka pa leh i nu ngei chu i phatsan a maw?" ka ti tuar mai. Ka thin a ur takzet a ni. 

"Chutiang lo lam zawng chuan ngaihtuahna seng rawh" a ti nghut a. Ka buai nuai nuai tih a hrethiam lo em mawni le. Hmela hi. A steering vawnna kut chu ka va mansak chawt a, "Malsawmpek, sawi chiang vat teh. Tu ten nge ka pa chu phatsan? Keimah ngei hian ka bitum duh a nia" ka ti tuar tuar a. A kawi deuh zawk. Mahse, a ding ta a. 

Chiang taka min rawn melhin, "Chu chu ka la sawi thei rih lo. Ka nu leh i pa ten an hriat chuan Zoram hian chhiatna nasa tak kan hmachhawn thei. A laklawhah ka ding a, I chhungkua leh ka chhungkua chhanhim ka duh avangin ka nu leh i pate hi ka do an ngai rih a ni. Chu chu hria la, ngawi rengin lo nghak tawp rawh" a ti nghet ta charh a. Ka khur deuh. A vawt hran miah lo, mahse, ka chhungril a khawsik niin ka hria. Motor chu a khalh zui leh nghal a. Kan inbe tawh lo. Ka chhuk dawn chuan, "Sangzual, tumah ring lo la ka duh. I hrethiam em? Hlauhthawnna i neih chuan min rawn be nghal ang che" a ti sup a. Min ngaihtuah tak tak hmel ka hmu thei nia! Ka kum rualpui mah nise, kei ai chuan a puitlingin a patling ngei dawn a nih hi. Mahse, khang thu a sawi zawng zawngte kha thudik a nih leh nih loh ka hre bik hauh lo. A ruk arala che lo va kei min hrilh vek ni se, engkim a fel hma zawk tur a nia. Hriatchhuah thut neiin, "Nizan khan Nunui kha engtin nge i thlem?" ka ti thut a. A hamhaih ve deuhin ka hria. 

"Nangmah nen inhmu ru tur angin ka insawi mawle. I thianpa i venthawn vang leh i naute mitmei i ven vanga a ruka inhmu tur angin ka insawi a, Min pui ta a nih kha. Chuan. Nang leh kei chu kan inhmu ta a..fawh pawh i nuam khawp mai" a ti ta duah a, a nui deuh bawk. 

"I tenawm" ka ti hlak a. 

"Ka hria" a ti ve mai. Rum zeta melhin, "I sawi zawng zawng kha dawt a ni lo a nih chuan ti nge a tirte khan min hrilh mai loh? Kan inneih chungchangte kha ti nge buai hmel tak khan min zawh?" ka ti ve duah a. 

"Hmeichhia i nih hi..thil tam tak i hriat chuan i chiái dawn a, Ka hna ka thawk thei hek lo vang. A bak zawhna dang ka duh tawh lo aw" tiin chhuk turin min mitmei a, a hmel pawh a rum leh sawt tawh. He pa mizia hi ka hrethiam hlawl lo ve a. 

In ka thlen chuan Nunui a lo awm tawh lo va. Remruata a la bang lo bawk. Sangpuia chu tv hmaah hahdam zetin a lo mu a. 

"A haw ta ni maw?" ka ti puat a. 

"Aw, a nu a ngaihtuah ve a nih kha. A pawi lo, a zakzum sia, a khawngaihthlak" a ti mai a. 

"I lo tha em?" ka ti ve ngial a. 

"Umm, ka zia sawt khawp mai. Mahse, ú, nichin lawk khan ka vawktê pakhat khu a rawn ngêk vak vak a, tiang nen chuan ka inhawl thleng thei dawna ka hriat loh avangin ka ngaithla liam ringawt a, i hman veleh zuk en hram teh a" a ti a. Inthlak pawh inthlak tawh lovin farm lam chu ka pan nghal a. Ka hawi kual zak zak bawk. Lehlamah min vehtu te hian min thah an tum loh mai bakah an fimkhur ve niin a hria a, chuvang chuan ka hlauthawng tehchiam lo. Farm ka zu thlen chuan vawktê ho chu ka en kual a, thil danglam zawng a awm chiang e. Vawktè ho an dah khawmna bikah chuan vawkte pakhat hi a laiah a lo let hlawm reng a, a unaute chuan an vêl thar thar bawk. Ngaihtha vak loin ka va dap a, a thaw ka han ngaichang a, a thaw lo tih ka hre ta. A taksa te chu ka'n bihchiang a, eng hnuhma leh sulhnu mah ka hmu bawk si lo. Ka pawm chhuak a, Farm chhung hi a zau angreng a, hnuhma eng emaw hmuh tumin ka han zawng kual a. Ngaihbel tur thil engmah ka hmu lo. Vawkte lah chu a pang a him pial bawk sia, a pum ná vanga thi a niang ka ti rilru ringawt. An vawk chaw chhumna bulah chuan ka dah a, ka chho leh a. 

"Vawkte pakhat a thi, hliam engmah a nei lo " ka nau bula ka tih chuan a ngui rawih mai. Ran hi a va hmangaih tak. 

"A ngèk vak vak ka ti reng a. Mahse, hliam engmah a awm loh chuan ti nge niang le?" a ti nuah nuah a. 

"A pum a na aniang, a nih loh pawn a lu a na emaw a stroke thut a niang" ka ti puat a , rum zeta min melhin, "Û" a ti tuar. 

"A dang an la tam khu. Hri a kai pawh a ni thei. Remruata kan phumtir dawn nia, eirawng ka bawl dawn" ka ti zung zung a. Vawkte chuan ka ngaihtuahna an luah pha tehchiam lo. Remruata pawh a rawn haw ve a, a inthlak veleh vawkte chu a zuk phum ta a. Kan unau thumtê chuan kan che ve rak rak a. Remruata'n savun a bawl phuan suah suah a, ka chil a tipût. Sangpuia erawh awmhmunah mei a zu khu reng thung. Ka pa chu awm se a zu ngam miah lo vang. Kei hi chu min hlau vak lo ve a, bakah tlangval an ni ve tawh a, ka hau duh bik lo. Remruata erawh chuan zuk leh hmuam engmah a ti lo thung. Zanriah chu kan ei ta a, ka ei hnem leh ber e. Remruata thleng ka siltir a, a sil ve mai bawk. A thleng sil laiin tv bula a phone charge chu a rawn ri a, ka lo awm hnai bawk nen, ka va laksak a. 

Hmeichhe tleirawl aw ngaihnobei zet hian, "Khaw nge Remruata?" A rawn ti a. 

"Thleng a sil a" ka tih mek laiin Remruata a rawn kal phei vut a, ring zet hian, "Ka sil lo, ka inbual zo chiah a" tih leh phone min chhuh a rual. Thleng sil kha a lo zak vel..ka nui vak vak a. A bialnu ve deuh reuh a niang. Kan naupangber pawn a nachang a hre ve der tawh mai. Chu chuan min tilang senior riauin ka hria. Kum 24 chauh alawm ka la nih le..ka la vanglai dawn chauh. 

Bena'n min rawn call a. A rui deuhin ka hria. Mahse, rui chhia erawh a ni lo. 

"vawiin i rawn kal ve lo chu ka thinrim lutuk, awm ve la ka tihzia hi aw" a tih chuan, "Thil thleng a awm em ni?" Ka ti vat a. 

"Awm chiang e. Ka zak lutuk hi ral daih ka chak. Sawi tawh angin Linda kha nizan khan i sawi ang khan thutlukna siamfel turin ka tia, 'Nangmah ka thlang che. Mahse, ka ex ah rau rau pawh U Siama hi chu ka duh ber a ni ve a, han hriatchhuah chang ka nei ve ang, min hrethiam la" a ti ve thlap a. 'Ka hrethiam che lawm' ka ti ve mai. Chuan, picnic tur pawh khan ka phur a, kan hlim dun ve reng. A hmun kan thleng a, tuite kan chenho hnuah Siama leh a thiante chu an rawn lang a. An rui bawk si nen, Linda chu Siama chuan a kuah bawrh bawrh a, Lindai chuan a haw ngam miah lo a nih chu! Mipa inti ve tan chuan a tlawmthlak deuha ka hriat avangin, 'Linda, sawtah kal ila' tiin va kaih ka tum a. Siama chuan pawr fe hian, "A eng nge i nih a? " a ti a. 

"A bialpa" ka ti ve mai. Linda chu a en a, ring leng lawng hian, "I eng nge a nih hepa hi? " a ti ta khur khur a. Linda chuan hreh hmel zetin, "Amah hian min ngaizawng a, kei chuan ka duh loh thu pawh ka hrilh reng alawm" a ti a nih chu! Ka darh lo chauh. Rpa pawh a lo thinrim ve khawp mai a, kei chuan, "Linda, i ti tak tak maw?" Ka ti ve ngat. Siama melh zak zak chungin, "Aw" a ti ta a. Kan senior te bakah kan batch ten min thlir thup si, ka zak lutuk chu choka lamah ka tlan chho a, Rpa leh msi ten min rawn zui vat. Kan inthlak sawk sawk a, chaw pawh ei loin kan haw ta vang vang a ni. Mahse, kan ina lut hmasa loin bar-ah kan lut ta zawk a, ka lem ve ta nual a nih hi. Tunah chuan kan inah ka awm tawh e" a rawn ti ta a. Ka sa ve kher mai. Lindai hmel ka mitthla a, a fel hmel tehlul nen, ka va kek hrep chák e. 

"Chuan, Linda chuan a rawn be leh tawh chuang lo che mi?" Ka tih chuan, "Nichinah kha chuan min lo call ngat ngat a, ka reject ve zat zat bawk. Ka be peih lo. A tawp vek, a tenin ka ten" a ti bawrh bawrh a. Mahse, ngaihtuahna dang ka nei. 

"Lawkin, Ben, Linda kan mawhpuh vek ringawt a, Siama khan Linda ka hupna tur eng emaw a kawl zawk a ni mai lo maw? A hlauh danah" ka ti ta hluai a. A ngawi ve dat, a irh uk uk a. "Ka hre lo e a. Chu pawhnise, Bialpa hlui ten an vau zám theih khawp hmeichhia ka ngaisang lo. Eng ang nunhlui leh sex video hial pawh lo siam se, min hrilh ang hmiang. Ka pui mai dawn alawm..kei min duh tho si, Siama awm laia tilang ngam chuang si lo ang kha chu ka peih tawh lo" a ti ta hmiah a. A hmel a tuai lek lek naa a rilru erawh pa ka ti kher mai. 

"A dik chiah, ngawi tak rawh. Karleh atangin a dang kan zawng ang. Ka awm alawm" ka'n ti sasawi ve a, mi ka sawipui ve tawh an inngaihzawn tak ka la hre miah lo. A chhan chu ka thiam lo. 

Dar 9 a lo pel vah tawh a. Ka nu nen kan inbe zuai, "I pa pawh a tha e. A harh tha viau. Ruatsanga ka rawn tirh kha a rawn thleng tep ang. In unau chauha in riah ka remti lo" a rawn tih chuan, "Min va ring lo tak" ka ti hlar a. 

"Rintlak ni hek lo che, i mutui thei si, i naute tan i thlamuanpuiawm hlawl loh" a rawn ti a. Ruatsanga chu ka nghak ta law law. A rawn thleng ve mai bawk a, Awmhmun thawmhnaw nen a rawn kal a, a inbual fai tawhin zanriah a ei tawh bawk. Sangpuia nen an inkawm ta daih a, an inkawm thei phian. Mikhual roomah a riak ang. Ka mut hmain uluk takin kawngka chu ka va kalh ve ta khap a. Ka naute chu ka mangtha zui nghal. Mut a la chhuak em em lo bawk a, phone ka bih mai mai. Number hlang atangin, "Keimah aw..Biakdiki..swi tur ka ngah lutuk, sangzual" rawn titu chu ka save nghal a. Vawiina kan inhmuh khan sawi duh nei hmel a pu tlat tak a ni. Ngaihzawng moodah ka awm lo bawk a, Biakdiki hringnun chu ka hre chak ta riau. Sawi tawh angin kum khat chhung kan inroommate ve hman a. Kan zia pawh kan inhre hman viau. Kei aiin kum khatin a upa hlek a, Zep nak emaw zu a in nasa a, Beer te chu eng atan mah a ti ve lo. Club leh party eng emawah a chhuak zantin thin. A chhungte pawisa rawn thawn kha a khawpkham lo fô a, ka pawisa pawh a puk nasa, a puk ral ta chu a nih ber hi. Khatianga khawsa ta na na na chu a zirnain a tuar lo thei ta lo va, kum tawp lamah phei chuan hostel chhuahsanin Naga tlangval nen an cheng dun ta a. Chawlh hmang pawn a haw ta lo. Mahse, kan zuk thlen thlak leh khan Mizo Welfare lam mit a lo tikham ta nge, Mizoramah an thawn haw ta kha a nia. A chanchin ka hre zui ta lo. Zu a duh leh mipa a um kha chu dah tha ta ila, amah ngau ngau hi chu kawm nuam leh a neih ang ang ui ngai lo, nuih heh em em, lamtang atana tha em em a ni. Tin, a rilru a chhe miah lo tih ka hre bawk. Tumah a rêl ngai lo va, a chanchin miin an sawi pawn engah teh vak a ngai lo bawk. Insawithiama insawifiah vak a tum hranpa ve lem lo, Ama hlim dan leh nuam tih dan khan a awm a, tu pawi a va sawi hran ka hre lo. 

Min lo call ta a. Ka la lo thei lo. Zawi deuh sap hian, "Sangzual, kei zawng ka tuhrah ka seng a nih hi" a ti a. Ka lo lainat ve hle. 

"Pawi i tih loh chuan engkim min hrilh rawh" ka ti a. 

A insút hraih a. Tihian a chanchin chu a sawi ta a. 

"Mizorama ka hawn atang khan engmah a dik lo a ni mai. Ka nu leh pa an inthen a, ka nu bulah ka awm a. Ka pa erawh vanduaithlak takin ka nu nen an inthen atanga thla 3-naah an lungrem chimin a delh hlum a. Ka nu erawh chuan pasal dang neiin, A pasal te inah kan nufa chuan kan awm ve ta a. A pasal chuan fa pahnih a nei a, a upa zawk nen chuan kan inrual chiah. Mipa leh hmeichhia an nia, mipa chu a upa zawk a ni. Ka pahrawn chu No.4 zuar a lo ni reng mai a. A lo khawsa nuam viau pawh chu mak ka ti lo. A fanu chuan min ngaithei lo khawp mai a, mahse, engah teh vak ka ngai lo. A pain ka nu a duh ve èm mai a. Bakah kei chu i hriat angin ka duhna lamah chuan ka fin ve theih em kha, ka pahrawn chu ka tithiamin ka duat thiam bawk a, min duat ta viau mai. A thui lutuk loh nan tun hnaia thil thleng sawi mai ang. Tikhan kei pawh zu ka la in zeuh zeuh tih bak nunphung pangngai takin ka awm ve a, mi dawrah ka inhlawh ve ta bawk. Mahse, ka nu hriselna dinhmun a hniam chho ta a, ka pahrawn faten an hmumawh tan ta a ni. Ka nu chu chhul cancer a lo ni reng mai a. A lo taidarh nasat hman tawh avangin zaiin awmzia a nei tawh lo. Kumin kumtirah khan min peih lohsan ta nge nge a. Nu leh pa ka nei ta lo a nih chu. 

Ka pahrawn fanu chuan min tirethei chho ta viau a, mahse, anmahni bak belh tur ka nei si lo. Ka pahrawn erawh pa sual tak a ni lo bawk a, min la duat ve viau. A fapa pawh hi addict a ni naa, ka chungah a sual hran lo. Inah a awm tlem êm a, kan innel vak lo. Bakah homeah a awm deuh reng bawk nen. Tichuan, zan khat chu ka nau ti tawh mai ang, Ziri a zin a, ka pa nen chiah kan awm a nih chu. Sawi kual duah lo mai ang, ka pa chuan zu min pe a, ka hnar thei ta lo va, ka ruih hnuah min sual ta a ni. Nia, nula virgin ka ni tawh lo va, bakah ka lo rui ve bawk nen, ka pa pawh ka dem vak duh lo. Ka nun khan awmzia a nei lo êm a. Ruih reng mai kha ka duh a ni ber. Ta tang chuan ka pahrawn chuan a hmei ang deuha min ngaiin min mutpui ta fo a, ka tenawm ngawt mai. Duhthlan tur dang nei chuangin ka inhre lo. Min duat a, eitur leh thawmhnaw thar min leisak reng a, tihlawm ve kha pawi tihna ka nei lo. Mahse, a fapa Lawma Home atanga a rawn chhuah atangin thil a danglam ta a. Lawma chuan a pa nen kan khawsa dun lai min lo hmu ru nge ni, ka pa awm loh hlanin min vau ta a. Ka mutpui loh chuan ka pa nen kan khawsak dan chu sawi darhah min vau a ni. Zu rui mai mai mah ni ila, a hman nazawng pawl theih khawpa hur ka ni bik lo va. Ka tang ve ta tlat! Rapthlak ka ti ve bawk nen. Eng êm chu a thleng rih lo phawt. Mahse, thla khat a liam hnuah ka pahrawn chuan, " Mama thu kha zawm la a tha ang. Kan mualpho hmain" a ti ta a. Min shock khawp mai. Chutiang ai chuan tiin chhuah ka tum a. Mahse, an pafa chuan min phuar bet a, dimdawihna tel reng reng loin min mutpui ta a ni.

Rapthlak ka ti a, ka intenin thih mai ka thlang hial. Mahse, min veng reng a, Ziri lah ka chungah a sual bawk si. Mumal lo takin ka awm ta a. Zu chu ka chaw a ni ber e. Ka ruih tawh chuan pawisak ka neihna a tlem tawh bawk a, an pafa hmei chu ka ni ta a nih ber chu. A tawpah nau ka pai ve ta hlawl mai! Mahse, tu zawk nge a pa ka hre hauh lo. An ni pawn an hre hek lo. Mi dang bulah chuan mi dang daih puh turin min tia..tihtlaktir min tum zet a, mahse, thla 3 lai a lo nih tawh avangin ka paitlang lo thei ta lo a ni. Tunah hian he hremhmun atanga chhuah hi ka duh takzet a ni..Min Pui rawh, Sangzual.." tiin. Biakdiki tap zawih zawih ri chu ka ngaithla kar a, ka lung a chhe lo. Ka thin a rim. 

"Naktukah i awmna tur sawi la, ka rawn hruai ang che. " ka tih mek laiin thawm a rawn awm thut a, Biakdiki chuan a off nghal daih. Ka call duh lo, a pahrawn emaw a fapa emaw an lo kal tih ka hrethiam mai. Ka insawh ka insawh a. Biakdiki chu chhanchhuah ngei ka tum ta a ni. 

Dar 11 a lo ri dawn ta hial a. Biakdiki chanchin avangin thil dang ka ngaihtuah thei ta lo va, a lawmawm lamah ngai ang. Mala call emaw msg emaw ka dawng lo va, Ka va be duh bik hek lo. Mutchhuakin min zêm a, ka muhil ta bawrh bawrh mai. 

Ka harh chuan dar 7 a lo ri tawh a. Hmeichhe awmchhun ka ni bawk nen, ka tho ta vat a. Ka va zá lo tak. Eirawng ka bawl nghal a, Ruatsanga a rawn tho ve bawk. Ka lo wish a, a khi suk ringawt. 

"Ruatdiki chu lo la lenpui teh" ka ti a. 

"Kan la ni lo" a ti teh tawp. 

"I bem ngam lo mi!" ka ti hú a. 

"Ngam a, ka la mood lo" a ti hmuk. 

"Mood ta che. I á mi?" ka tih chuan, mi melh run run a, "I á fê" a ti ve nulh. Ka chhan hmain bathroomah a lut ta daih a. Ruatsanga hi ka ngaina ve ta khawp mai. Nau ang deuhin ka en niin ka hria. Remruata rawn tho chu a za sek mai a, eng emaw helhhawlh nei ang chiah hian a awm. Ka hai der si lo. Kawt te chu a va phiatfai ve luklak a, a inla fel riau mai. Sangpuia erawh a la mu a. Ka kaitho duh lo. 

"U, vawiinah i chhuak ang tiraw?" Remruata chuan a ti a. 

"Chhuah dawn pawh ka hre lo. Ngati nge?" ka ti há a. 

"Chhuak rawh, Apa han kan la.." a ti hmuk. 

"Nge ka chhuah chu i duh viau.." awmze nei zeta melhin ka ti a, a laih hmel kher mai. 

"I over" a ti ta daih. Ka nui hawk hawk a. Naupangber tih takah naute anga kan la en a ni a, tlangval a rawn hre ve tan hi a hlimawm riau. 

"Mawh, sawi la. Tu nge? Hetah hruai i tum chiang" ka ti leh ta zel a. 

"I ninawm..vawiinah chhuak la a ni mai. Duh leh tlai deuhah pawh lo haw mai rawh. Eirawng ka lo bawl vek ang, i room pawh ka tifai vek ang. U Sangpuia pawh ka lo enkawl ang" a ti ta duah a. 

"I tih loh vaih, farm te i enkawl thei ang maw?" ka ti a. 

"Thei vek thei vek. Awm lo la a ni mai. A hmu ngam lo che a" a ti ta a. A va ho tak e aw. Ka hlauhawm nge min zah ve vang. An la nau ve êm a, a awm ve tho mai. Ka nu erawh chuan hria se ngaihzawng neih a la phal ka ring lo. Remruata phei chu a chut sia, a serious dawn chiang. 

Ruatsanga pawn tukthuan a ei ve nghal a. Ei khamah ka pa dawra thawk turin min hawnsan leh nghal. Khaw en lai hi chuan misual leh huai lam pawh an inlar vak duh lo ve bawk a, a hlauhawm nêp angreng. Kei pawh Remruata min nawrna vang pawh ni chuang loin Biakdiki kha han ngaihven ka duh deuh. An awmna veng lah ka hre si lo va, engtin nge ka tih dawn ni. Davea sawm ve ila, a zia deuh ang tiin ka han sawm a, ka tan hi chuan hun hi a insiam ve thei zel mai. 

Sangpuia lo thawh thleng ka awm a. Chaw ei te ka siamsakin ka tihfelsak leh vek a. Ani pawh zia tawh tak a ni. Chhuat dungah chuan a kal thei viau tawh e. Remruata chu tha taka in lo nghaka a u ngaihven pah reng tura chah mawlh mawlhin khawpui lam pan chuan ka inkhalh chho ve leh ta par par a. Sangpuia car ka keng thung. Bike chu a rem teh teuh lo. 

Biakdiki call chu ka chang ngar ngar a, a rawn call thei bawk si lo. Damdawiin lam ka pan leh ta phawt a. Ka nu ka hrilh lawk si lo va, min hmuh chuan a pháwk deuh. Ka pa pawh a lo harh tha viau. Remruata chungchang chu ka sawi ta a, ka pa chu a nui ruh ruh mai. Ka nu erawh chuan, "Ngaihzawng nei rual a la ni lo reng reng. Ani phei chu a chut si, a la na dawn tih ka chiang. Ngah nge maw i rawn kalsan le? Farm te chu engtin tehlul nge a enkawl ang a..i á sia" a ti leh hrep. Ka ngai haw lem lo, ka rinsa kha a ni tho a. 

Mahse, thutak deuh zawkin Biakdiki chunga thil thleng leh ka puihna a mamawhzia te chu ka sawi ta vek a. Ka nu hmel pawh a danglam ta. 

"A va khawngaihthlak ve aw. I be leh thei tawh si lo anih chuan engtin nge i chhanchhuah ang?" ka nu chuan a ti a. 

"Ka call tawp mai dawn mawni ka ti" tiin ka pa ka ráwn a. Mitmeiin call turin min ti nghal. Ka phone ka phawrh a, Biakdiki chu ka call ta a. A ring ral tep tihin mipa hian a rawn la a. 

"A inthiar a, nakinah lo be leh mai ta che" a rawn ti dam thluam a. A pahrawn a nih ka ring. 

"Biakdiki pasal i ni tiraw? Hei phai atangin ka rawn haw ve chiah a, ka hmu chak lutuk a, in in awmna lai tak ka hrechiang tawh si lo va" ka ti ta a. Ka nu leh paten min lo thlir reng ringawt. 

"E aw..a ni maw? Aw, an pa chu ka nia. Ka lo hrilh dawn nia aw. A rawn be leh mai ang che" tiin a dah daih. 

Ka nu chuan, "Police hrilh mai chi a ni lo maw?" a ti a. 

Ka pa chuan,"Hrilh lo va tihdan a awm ang. Police hrilh chuan finfiahna a ngai dawn sia, an pafa an tangrual dawn a, I thiannu tawrhna a zual mai mai ang" a ti a. 

"Engtin nge ka tih ang?" ka ti sap a. 

"A phone location kha en teh" a ti a. Ka en vat, Ti nge a nachang ka lo hriat loh ni. Maubawk a lo nia. Mahse, Maubawkah chuan va kal ngawt ila, A pahrawn hming takngial pawh ka hre si lo, No.4 zuar va ti teh ngawt ila tu khaw khain an hriat a rinawm bawk si loh. Ka buai ru hle. Dave a rawn thleng a, ka nu nen an inkawm bawrh bawrh. Ka phone ka bih sek lai chuan sms a rawn thleng nawlh. Ka hawng vat a, "Maubawkah. H/no. 184.." tih ringawt a ni. Biakdiki ngei a ni thung a. Ka khi sak mai. Ka pa ka hmuh vat a, a nui ve suk e. Ka pa chu lo dam tha vat tura duhsakna hlanin ka thiannu tanpui tur chuan Dave nen kan chhuak ta a. Damdawiin gate kan pel fel chiah tihin Malsawmpeka leh Nula chalsam nei hi an rawn inzui phei a, chu nula chu a sangin thunei hmel tak a pu a. Hmeltha tak erawh a ni lo. Hmuh tawhna chu ka neiin ka hria. 

Min rawn kalpel thuak a, min hmu reng sia, min be miah lo chu mak ka ti deuh. Ka va lehhawi vat a, Mala chuan min hnungchhawn zawngin fuck you sign min lo hmuh nia! Ka ter at hman a. Mahse, ka insum hram. Hmela chu aw. 

Maubawk lam pana kan tlan laiin Dave chuan,"Sang,.chawlh kan neih veleh zin teh ang. Zin ka mamawh" a ti teh hluai a. 

"Kan tum dawn nia" ka ti ve ringawt. H/no. 184 chu kan zawng tan ta. Maubawk veng chu a zau ve bawk si, a harsa dawn mang e. Mahse, Biakdiki tap ri kha ka bengah a cham reh thei si lo. 

A tawpa tawpah kan hmu ta hlawl mai. In mal tlat ti mai ang, a fal deuh hleka ding, concrete building te fel ren rawn a ni a. An inkhar thap bawk. Muangchangin kan pan a. Ka thinphu a rang ve deuh, thawm hriat tur a awm lo va..a reh tlawk tlawk mai. Kawngka chu ka kik ta a. Dave pawh ka bulah a ding ve ran..Kawngka kalhna hawng ri rak ka hriat rual chuan ka phone a rawn ri a, Ka ken sa avangin ka en vat, Malsawmpeka a ni. 

Ka benga phone ka dah rual chuan, "Lut suh. Sangzual, tlanchhe rawh" a rawn ti tuar..mahse, kawngka chu rawn inhawngin Pa sang tak, hang ren run leh mitmeng thíp zet nen kan inhmachhawn ta ran a..