malsawmpeka 4

MALSAWMPEKA (4)

Ziaktu : Toni Râlte

Sangpuia chuan laih hmel zetin Nunui chu a lo melh a. Nunui zak lah a sen awp awp bawk. Kei lah Mala vangin ka ni hú bawk si. Kan boruak tehzet chu aw. 

Sangpuia chuan, "I va fel ve, Nunu, i lo leng a" a lo ti ta var a. Kan zia ta hawk e. 

"Fel vang pawh a ni lo. A zia lo em mai, dam vat rawh" a ti hap a. 

Sangpuia roomah hian semi sofa kan hung a, tah chuan kan thu dun a. Mala erawh a la tawng lo, Sangpuia chuan kan boruak hrethiam takin, "Hei U mala hian ka chanchin a hriat veleh min rawn kan a" a ti ta a. A fel ve khawp mai. Naute angin a en ve nghal thei a, Remruata lah tikhan a rawn hruai haw bawk. Ka awmdan a laih hú avang chuan , "Thingpui ka va lum ang e" tih leh thawh ka rual a. 

"Coffee ka lo in ang" Malsawmpeka chuan a ti nghut. A ina ka len tuma ka biak dan vel kha ka hrechhuak. Ka nui hak a. Engmah sawi zui tawh lovin ka kal nghal. Ka pa a chhuak a, ka nu erawh tv a lo en a. Fridge ka hawn chuan han siam mai tur ka van deuh a, chhang ka ei peih si lo, Ka nu chuan, "Noodles a awm kha,. Siam mai rawh. Tithak vak lo la" a rawn ti láng láng a. Ani leh ni lo ang hian noodles lam hi a ngaina ve phian, kei pawn ka ngaina. Noodles ka siam rak rak lai chuan thutkhawmna pindana Mala rawn phei chu ka va hmu a, ka nu ep zawngin a thu a. Ka nu chuan eng emaw a sawi, an tawng ri ka va hre phak chiah lo thung. Mala chu a bu nghut nghut a. Thil eng emaw an inzawt a ni maithei. Ka siam zawhah thingpui ka va pe hmasa hlawm phawt a, Noodles chu bowl-a dah lehin ka va pe leh hlawm a. Noodles na na na hi chu ka siam thiam ve bawk a, tui an tih ngei ka beisei. Mala erawh a duh angin cofffee ka pe. Nunui te chance pek pahin tiin thutkhawmnaah chuan ka thu ve a. 

"Sangpuia a hliam na lutuk lo chu a lawmawm, thah an tum lo tih erawh a lang" Mala chuan a ti a. Ka lo ngaih ve dan chiah a ni. Mahse, tu te nge tih ka la ngaihruat thiam lo. 

"Remruata hrai ruitute tho kha an nih ka ring" ka ti sap a. Ka nu erawh hlauthawng hmel pu hran lo hian,"Mihring leh mihring hi an inkap palh ve fo alawm. Ralkhat atangin ramsa emaw an ti a ni maithei asin" a ti siam siam a. A thu lak dan tehdaih chuan min tihrilhhai. 

"A dawihzepthlak em mai a, Ramsa nge mihring tih pawh fiah ngam lo khawpa dawihzep chuan silai kah loh ngam tur" ka ti nghat a. Malsawmpeka khi suk ka va hmu thei. Ka eisiam an ei zo tihah Nunui chuan Sangpuia nen an eina thleng ruak vel chu a rawn seng a, "Nunu, lo dah tawp rawh, ka lo sil ang" ka tih pawn a duh bau lo. A sil ta vek a. 

"Nunu, thingpui kan in zo chiah nain haw phei ang hmiang. Ka thlah haw nghal ang che" Mala chuan a ti a. Ka ner ru sak. 

"Ka inleng a nih hi..nge i lo inrawlh ve" ka ti hmak a. 

" I inleng a ni lo, Sangpuia inleng asin" naupangchhia zetin a lo ti! Ka nuih a za deuh. Nunui lah chuan,"Nia, kan va haw phei ang e..A remchan veleh ka rawn tlawh leh ang" a ti ve bawk si. Kal poh teh se. In kawt thleng ka va thlah a, An tlan liam hnu chuan ruak huai anga ka inhriat chu a! Ka nu ka hrilh a, chík zeta min melhin, "A type i ni lo ka tih khan chhan tam tak a nei. I duh chuan kan thu delhkilh kha kan sút leh thei. Mala hi a rawlthar chhuah phat atangin mipa danglam tak a ni a, A nunah hmeichhia hian hmun an chang ngai meuh lo. Amah i hmuha i duh tih i sawi khan i luhlulna vangin hneh i tum ngei dawnin ka hria a, I pa nen pawh kan sawi dun tawh. Na taka hliama i awm kan duh lo va, inneih kher hi in duh loh chuan kan thulh thei aw" a ti ta dap dap a. Ka ngawi dat. Thukhuh takin thil a sawi tih ka hria. Malsawmpeka'n min duh ngang lo tih an hria a, beidawnsan mai turin thurawn min peah ka ngai. Ka nat chu an duh hauh lo tak ang. Ni e, hmangaihna avang ngat phei chuan ka nat an duh lo hul hual dawn. 

"Ka lo inngaihtuah ang" ka ti sap a. Ka pindanah ka lut. Ka inngaihtuah ve nasa mai. Nia, beidawnsan tur thil hi ka beisei tlat em mawni le? Malsawmpeka ka hmuh phat atang khan ka duh a, ka duh hluah hluah a ni ber e. A bialnu nih ngei ka tum ta bur a nih kha. Mahse, zahtheih loh chhuaha ka beihna te khan awmzia a nei mawh viau. Amah Mala hian hmeichhia a mamawh tlat lo! Tin, kan chhungkua leh an chhungkaw thuruk hian a tibuai ve riau bawk. Mi dang ta ni tur chuan ka phal bawk si lo. Tihian la text ta a. 

"Ka tana mi hlu tak hnen atangin thurawn ka dawng a. Beidawnsan tur chein..chu chu ka thlentir i duh em?" tiin. Inngaihbel theihna tur engmah ka lakah a la ti ngai lo, chutih a hnekin min la elsenin min la runluih char char bawk. 

Zanriah ei khama ka phone ka bih chuan min lo reply ve tawh a. 

"Aw..beidawng rawh" tih a ni. Ka na ve zawk thei. Chuti em ema duh loh han nih chu, kei ang hmeichhe induhtawk tan chuan tawrh harsa tak a tling a ni. 

"Aw le..ka beidawng e" tiin ka reply leh hram..naupangchhia taka thu thlum leh thu tam ziak kur duah chi ka ni lem lo. Ani pawn a seen a, Like min rawn pe a. Ka reply ta lo. Malsawmpeka ka ngaihzawnna chu ka thiat dawn ta. Ka pindana ka luh hmain ka nu leh pate bulah ka thutlukna ka hrilh ta a. Ka nu chuan makti hmel a pu lem lo. A lawm hmel lek lek zawkin ka hria. Ka pa hmel erawh a danglam ve hlek. Mahse, engmah a sawi hran lo. Amanda te pawh hrilh turin ka ti a. Ka pindanah ka luhsan ta. Mala nen inlaichinna engmah la nei lo mah ila; chutia ka han tawpsan tur chuan min luah ve deuh nge, a hmel mitthla reng chungin zan hun ka hmang liam a. Kan inngaizawng lo va, ka tawrh vakna chhan tur erawh ka hre lo. Sangzuali ka la ni reng a, ka ni reng bawk ang. A ranglamin bialpa ka neih vat a ngai tih ka hria. Min be thintute zingah ngaihzawn chak ka nei si lo. Ka rilruah Ruatsanga a rawn lang zawk! "Ni lo" tiin ka phun sep a. Kei aia a naupan bakah ka guard a nia, mahni body guard ngaizawng duh tur khawp nih ka duh lo. Hmalam hun chu hunin hril tawp mai teh se a. 

Test kan neih dawn vangin ka hmanhmawh angreng. Ruatsanga pawh ka ko hma a, eng chen nge min guard dawn ka hre lo. Zalen lo riaua ka inhriatna chuan ka mood a tichhe lek lek zel. Motor chhungah test turte chu ka'n bih leh zung zung a, 1st period-ah kan test dawn vangin chhiarna hun ka ngah tawh lo a ni. Commerce hi ka tui vak lo nen, ka tihthat em em pawh ka ring lo. Bena te pawn an lo chhiar nasa mai a. Miss Zodini class a ni bawk nen, ani hi nula kum 40 bawr vel tur, invawng leh zahawm zet mai a ni. Vawikhat ka dress vangin min hau tawh, ka lai lang kawr ka hak vang a ni. Mahse, ka zawm chuang lem hlei lo va. A rawn lut ta a. Paper a sem a, kan test chho tan ta. Ka zir ho a lo kal ve hlauh mai bawk a, ka lawm teh e. Ka chhang ve vek mai. Ka ziak zo ka dak chhuak chu tlar laia thu Mawizuali leh Jenny te chuan an lo entawn nasa mai a! Thing ka va ti tak. Thiam lo eng ang mah ila, entawn kher hi chu ka tih ngai loh tur a ni. Mak deuh chu an entawn vang khan ka lo ngaihdan leh hmuhdan a hniam phah daih. Hei hi mihring rilru a ni a, tumah indem ngawt chi a ni lo. Kum 16 ka nih lai khan khatihlaia lar tak Miss Mizoram title hial lo la tawh kha, a bialpa nen an inkiss lai video a viral a. Inkiss ringawt chu a hoh viau rualin a bialpa kha Department pakhata hna sang tak chelh a nih piahlamah mi pasal a lo ni reng mai a! Chu chuan titi a siamin Miss Mizoram demna leh ngaihnepna kha hmuh tur a tam hle a ni. Public figure te tana nun uluk a tulzia leh tawng thleng pawha insumkar a ngaih nasatzia ka hrethiam chiah. Mahse, ka seh tawh chu ti deuh tlat mi ka nih avangin hmeichhe pakhat, zaithiam lar takin hmingchhiatna a tawh vak tum erawh chuan chhete mahin ka nghing lo. "Mihring a nia, tisual ve thei a ni" tih tanin ka tang tlat lawi a! A chhan chu kha nu kha ka ngaihsan êm vang a ni. Amah ka ngaihsanna engmah a la bo chuang lo bawk. Sap celebrities thenkhat an fans ten an thlavang an hauhsak ang chiah khan a thlavang kha ka hauh char char a ni. Mihring rilru hi a mak ka ti fó! Lo ngaihtuah ve mah teh u. 

Bena te pawh an thaw huai a. Msi pawh a chhang tha thawkhat a niang e. A nuih var var danah. Lunch ei tura kan chhuak tur chu kan department office pakhat atanga Malsawmpeka lo chhuak mek chu ka va hmu thei a. Msi'n min lo kheuh zeuh, a beng bulah, "Ka give up tawh" ka ti sap a. Hrilhhai takin min melh. Nia, ka duhna kha ka lantir huam zel sia, chutia vawi leh khata ka han tawpsan thut chu mak a ti ve a ni maithei. Mala chu kan hmaah a tlan a, Gate bulah a chawl ve leh dawn a nih hmel. Hmanni an buai atang khan Apuii ka hmu leh tawh miah lo. Mala hmachhawn zawng taka thuthmun rem a ngai sia, nuam ka ti vak lo. Mahse, pangngai taka awm ka tum. Kan eitur chah a lo thlen chuan ngawi rengin ka ei nghal mial mial a, Bena'n, "Sangzual, i va hot lo ve, vawiin hi" a ti ta chiah. 

"Cool chang a awm ve bawk ang chu" ka ti mai a. Chutihlai tak chuan Pol.sc lam professor Miss Tei'n Mala dawhkan a kil ve chiah. Ka va en kher bawk nen, ka nghilh dupin ka hria. Mahse, ka nui lui hak a, "Picnic kha engtik nge?" ka ti ta daih a. 

"Kar tawpah an tih kha

.ka che na viau ang" Bena chuan a ti a. 

"Taka! Linda nen khan eng nge chanchin in nei zawm lo mi?" ka ti sar sar a.

"A ngaihna ka hre tawh lo. Min duh thu chu a sawi a, mahse, a ex a la hlauh bakah a la care tlat. Khatiang kha chu ka thiam ve lo" a ti ta a. 

"Mahse, inla inbe reng tho sia" Rpa'n a lo ti vat a. 

"Nia, ka biak loh deuh chuan min lo be zel bawk sia lawm" Bena chuan hawihai fe hian a lo ti a. Linda awmdan chu tunlai hmeichhe thenkhat awmdan a ni. Mipa pawh an bang lo vang chu. Mahse, "Picnic hma ngeiin thutlukna fel tak siam turin ti la, a siam theih loh chuan bansan ang che. A dang an tam lutuk" ka ti hmawk hmawk a. 

Msi'n, "Nangmah ber hi ngaihtuah a ngai. U Mala i bansan bawk sia" zawi sap hian a rawn ti a. Ka nui vak, "Kei chu ka lo inngaihtuah ang. Nang leh Rpa hi ni phawt r'u" ka ti leh hmiah. Msi zak chu a sen ap ap a. Rpa erawh chuan,"Hrilh che kan tum reng a, i rawn sawi ta sia..kan ni tawh alawm" a ti ta a. Ka va lawmpui tak. Anmahni vangin ka mood pawh a dik zaih mai. 

Mala te erawh ka va melh ru zauh zauh a, an inbe múk hle niin ka hria. Miss Tei chu a chhe loin a zahawm a, tin, a la upat hmel vak loh. A sam buang tháng leh kawi mawi takte, a vun mam leh a hmui sexy zette chu mipa tan mai ni lo hmeichhe tan pawh a hmuhnawm a ni. Ka thík phak a ni lo e. Ni mai mai teh se, min duh lo va min hnawltu hi ka um ka um tawh dawn lo. 

Last period laiin Ruatsanga msg ka dawng. 

"Sangzual, hei hna avangin kan laklawh thut a, i pa pawh ka hrilh tawh. Bus-in lo chho la, heta tangin inah chuan ka thlah mai ang che" a rawn ti! A pawi hleinem. Bena car a lo chhe bawk nen, Busin kan haw ho dial dial mai a niang chu. Kan ban chuan, Ka beisei loh deuhin ruah a lo tla fuap fuap mai. Tam phei zawng a ni lo naa, ruah ka do hlek chuan ka vual vak zel avangin ruah hi ka hua. Bathlarah chuan kan ding thap a. Nihliap keng kan lo awm mang lo va. Kan department kawta Malsawmpeka phei thauh thauh chu kan en thap mai. Nihliap a keng bik lo. A car-a a luh hma chuan a rawn hawi zawk a. Keini pali chu min rawn melh kualin, "Lo kal ula" a ti nghut a. Kan inmelh ralh ralh ringawt. Msi ber a kal tak avang chuan kan zui ve ta dual. Msi lah a hnungah a thu lut hmak si. Bena te lahin an zui lut nghal. Front seat-a thut ka ngai ta tlat. Ka hreh viau, a hma ang kha chu nise ka lawm viau maithei a ni. Mahse, tunah chuan eng emaw boruak a awm tlat tawh a ni. Aizawl kan chuan chhuah chuan, "Kei chu Temple-ah ka chhuk ang" ka ti sap a. Kalkawng tluan khan tumah kan tawng lo. Amah Mala lah hmalam a bih ngur a, biak a chakawm loh nasa si, Msi takngial pawn a be ngam lo a ni maithei. 

"In thleng ka thlah ang che" a ti nghut a, ka va melh hráwk. 

"I thiante hi kan thlah phawt ang " a ti leh a. 

"Ruatsanga'n min nghak alawm" ka ti nghat a. 

"Ka thlah dawn che tih hrilh mai rawh" a ti a. Thupe aw tak a ni. Min rawn melh zawk chuan a mitmeng chu a buai niaih mai a, eng emaw sawi duh nei hmel a pu. Kan chhungkaw chungchang bawk a ni leh ang chu. Msi te leh Bena te kan thlah zawhah Ruatsanga chu ka be ta nge nge a, "Hei Malsawmpeka'n min thlah dawn a. I hna kha thawk chhunzawm mai rawh aw" ka ti a. Ani pawh chuan, "A that nasat chu, i him ang" a ti ve mai a. Kan dah zui nghal. Kan in lam kan pan takah chuan a tlan muang ta deuh a. 

"I lo ngaihtuah chhuak tawh em?" a ti ta sup a. Ka hawihai deuh. 

"Eng chu" ka ti hú a. 

"Kan chhungkaw hnih thurúk chu?" a ti leh ringawt. 

"Hriat belh tur a awm em ni? Kan inhualna tur ka titawp tawh a, a tawk reng alawm. Chhui zui vak a ngai tawh lo" ka ti hmak a. A khi suk, "Nang leh keia chungchang ka ngaihven lo. Mahse, i pawimwh viau thung. Kan pian ve hmaa thil thleng te kha engvangin nge enlet tur awm miah lo va document pawimawh zawng zawng phumbo a nih ang? Chutah chuan ka nu leh i pa hi a fawng vuantu an ni asin" a ti ta a. A sawi awmzia hrethiam vek lo mah ila; ngaihbel theih tur tinga thil thleng a awm ve zel bawk si. 

"Kan pian hma thil thleng chu hriat vek kher a ngai lo tihna a ni mai alawm" ka ti ringawt a. Ka buai ve deuh bawk a ni. 

"Tuna tualthahna thleng zauh zauhte nen hian inzawmna an nei tlat si a ni" a ti leh a, ka va melh háw ringawt. Min melh ve chuang lo hian, "Mak ti viau suh. Thil thleng a awm apiangin Nu Zoi thlabar hmel i hmu ziah a ni lawm ni? A dik em?" a ti ta a. Ka phu zawk mai. 

"Malsawmpek" ka ti tuar a. Engtin nge chung thil chu a hriat theih?

"Nangmah an target che a, mahse, body guard rinawm tak i neih avangin chance an nei lo va, warning atan i nau malpui an kap hliam ta a..han ngaihtuah teh, i pa sumdawnnaah buaina a awm lo, sawrkar phal loh thil a ti hek lo. Mahse, engvangin nge i pa chu an rawn bitum chat? Eng pawi nge a lo khawih tawh ang?" a ti ta hmawk hmawk a. A tlan chak sauh bawk, ka ngaihbel nge ni a thisen zámte chu a pawng táwlh tawlh niin ka hria. A thinrim ringawt em ni ang?

"Mala, tu nge i nih?" ka ti thawt a. A ding deuh dawt. Min rawn enin, "Amanda fapa ka ni. Ka nu hnungzui tura inzir mek ka ni bawk" a ti thawp sup a. A mitmeng chu a hlauhawm riau. 

Mahse, zámna tilang loin, "Chu chu i buaina a ni. Kan chhungkua hi i lo ngaihven ve chiam a ngai lo. " ka ti nghat a. 

"Ngaihven loh theih lohin thil a thleng sia lawm le. Aw le, ka sawi tawh lo vang. A tha em? Chuan, min bansan chu eng nge a an?" a ti dam ta thlup a. A danglam chak lutuk chu mak ka lo ti. 

"Ka tha. Ka hlim khawp mai" tiel zet hian ka ti sang vah a. 

"I mitmeng chauh lo chu an hlim pawh a ni mahna" a tih tak supah chuan ka ngui rawih mai. Amah ka duhna tizual tur hian a awm zel bawk si. Mipa mak tak a ni e. Kan in kan thleng a, ka chhuk dawn chuan, "Bialpa tha tak nei rawh. I phú" a ti a. Ka va melh a, min lo melh ve chiah. Ka ner khum a, hawisang vah hian,"Ka nei tawh alawm" ka ti ta a. A tlan liam thleng ka thlir zui. In chhunga ka luh chuan ka nuin rawng a lo bawl mek a. Kei erawh ka chau nghulh mai. Ka inbual sawk sawk a. Intiharh luiin ka nu ka va pui ve a, ruah a la tlak sep sep avangin exer pawh ka la peih ta lo. 

Sangpuia pawh a zia chho ve zel a, amah hi a chhel chi a ni bawk a. Nunui nen an inkar vel chu ka bulah chiah a la sawi. Inzawmna an neih tak avang chuan ka lawm ru viau. Mahse, ka beisei loh deuhin zanriah ei kham tv kan en laiin Naomi leh a thiannu an rawn lang hlawl mai. Khaw nawm loh nen chuan aw. Ka nuin hawihhawm takin a lo dawngsawng zung zung a. Sangpuia erawh a roomah a lut leh tawh kha a nia. An ni pawh amah kan tura lo kal an ni bawk a, Sangpuia pindan lam chu an pan zui ve ta zat a. 

Ka pa hi tunhnaiah ka hmu tar riau! A la upa hauh lo naa, thil a ngaihtuah nasa nge a tar deuh sawt hian a lang. Ka nu erawh a pangngai reng. Hlauthawng hmel kha chu a pu leh tawh lo thung. Engtin nge a hlauthawng thin tih Mala khan a hriat ang le? Nia, ka nu leh paten kan hriat tur china an duh min hrilh chu, ka pa chu hel pawl hruaitu a ni thin a. Zoram sawkar kalphung mumal lo lutuk tihngil nan thisen te pawh a luang a niawm e. Sawrkar paihthlain Hnehna an chang ta a, vawiin thlengin ka pa chuan mi zah a la kaiin sawrkar mi pawimawh tak takte nen pawh an inthian that phah a ni..he thil bak hi hriat kan nei lo. Ka zawh lah khan khati kha min chhanna a ni bawk si a. Ka zawt ngam tawh bawk si lo. Tualthahna a thlen apianga Amandain a rawn hrilh hre ve zel te hi, ka pa chu Police mi leh sa a ni bawk si lo. He lai tak hi chu ngaihtuah zui deuh chu a ngai niin a lang. 

Ka pindan ka pan dawn lai chuan Sangpuia room atangin thinrima inhau thawm a lo chhuak ta tlat mai! Ka pháwk hrú a, ka lo ngaichang deuh. Sangpuia phun bul bul thawm chu hriat a harsa deuh a, mahse, Naómi'n ring lenglawnga, "Midang i nei leh thei nghal mai hi i rapthlak ka ti. Min then kha i lo chak ngawih ngawih zawk a nih dawn kha" a tih ri erawh ka hria. Ka nu ka va melh a, ngaihven angin a awm duh hauh lo. A fate leh midang buainaa inrawlh ngai lem lo, a pawi tur chin erawh hre tak a ni thung. Kei pawh inrawlh ka tum hran lo. Sangpuia chu a inchingfel thei ngei ang. 

Thinrim zetin Naomi te chu an lo chhuak a, ka nu chuan, "Thingpui in u la" a lo ti dam diai a. Túm búr chung hian, "Aih, in fapa saw a tenawm khawp mai" a ti nghat a. Koh zui hman lohin an chhuak daih. Sangpuia thusawi kha a dik hmel ta hle. Naomi chu a zia dik tak kan hmuah ka ngai, a thinrim a nih pawhin keini thleng thlenga min tum khum ngam tur niin ka hre lo. Hmeichhe nasa tak chu a nih hmel e. 

Ka mut hnua phone ka en leh chuan, Thil mak deuh ka hmu ta a. Kan Health Minister Pu Rintluanga eiruk thubuai chungchang a ni. Evidence felfai tak nen Opposition lamin tanhmun an rawn siam a, Insawifiah ngei tura ngenna an nei bawk. Pu Rintluanga chu Apuii pa kha a ni. Kan inah pawh vawi hnih vel chu a lo kal tawh awm e. ZCP mi leh sa tho ni khan a lang si a, engtin nge chutiang thil fel lo chu a tihtheih? Pa tha duam mai, hmel pawh chhe lo tak a ni a. A nui huah huah zel. Ka pa pawn a hre ve tawh ngeiin ka ring. Comment ka en thla diat diat a, Pa valai niawm tak comment chuan ka mit a la deuh. 

"ZCP vul lai a tawp tan ta chu a nih hi. Kum 23 liamta kha a ngaihawm zo ta a nih hi. Tumah hi sum leh pai leh thuneihna duh vang hian thlem thluk zawh loh an lo awm lo a nih hi. Tunah chuan ZCP te pawh an vuai tan a, an sawrkarna pawh hian a tawp a thleng ngei dawn e. " tih a ni. Kum 23 liamta chu ka pa te vanglai a ni. Kum 20 dawn a liam takah chuan kawng pawh a rualrem lo chho leh ta a nih dawn hi..ka ngaihtuah buai laiin Mala ka rilruah a rawn lang a. Ka la ngaizawng em em, mahse, ka tlawmsan ta kha a nia. Ka chapona ten an tuar thei tawh lo a ni ber, mahse, amah ngaihven erawh ka la sim chuang lo. A mak khawp mai, mipa tam tak ka lo hmuin ka lo hmachhawn tawh, Malsawmpeka anga huháng nei lian hi ka la tawng miah lo. Amanda fapa a nih bik vang nge tih phei chu ka hre lo. A mitmeng fin hmel lutuk te, a ngeng lutukte hian amah min atchilhtir a ni ber mai. 

Ruatsanga pawh a rawn lang leh ta váng e. Ka nu chuan a nu chanchin a lo zawt vat a. "Ka pa kha chuan a zia deuh chu a tia, amah ka nu erawh ka be lo" a ti mai a. 

Ka pa pawh chuan, "A tha vat ang. Ngaihtuah lutuk suh u. German doctorin a enkawl dawn alawm" a lo ti a. A thlamuanthlak thin mang e. 

Tukthuan ka ei khamah Ruatsanga nen kan chhuak zui ta a. Sangpuia erawh class kal thei ziazang a nih loh avangin ka pain zirtirtu a rawihsak a, Darkar 5 chhung in lamah zirtirna an inpe thin. Amah pawh ka la hmu lo, ka hawn hi chuan a lo haw ve hman daih zel a. 

"Naktukah kan picnic dawn a. Bike ken ka duh sia, chhuanlam siam teh a" ka ti a. A nui ringawt. 

"Mawh, mahnia theuleu ka chak ve tawh viau a nia" ka ti leh a. Kan innel thawkhat tawh a, ka zah tit tet peih lo. 

"I pa ka ngam dawn em ni? Ka lo sawipui ang e" a ti ta a. 

"Bialpa tha deuh ka duh. Min zawnpui bawk la" ka ti leh a. Thli thaw chuan ka sam a chhem leng siau siau mai. Min rawn melh zawkin, "Tu runluih nan maw?" a ti nghut a. Music a man chak riau chu ka ngei deuh. 

"I hria alawm" ka ti nghat a. 

"Niminah in inthlah sia, in hlim viau ka lo ring asin" a ti leh a. Ka ner sak. Kan hlim lohzia ka ngaihtuah nghal. 

"A boring lutuk" ka ti sap a. 

Thutak angreng taka hmalam melh chungin,"Mi dang theihnghilh nan mi dang hman loh tur. Hmanrua nih hi tuman kan duh lo" a ti chhum hmak a. Thinrim te pawh a ang deuh. A sawi dik tho bawk si. 

"A nih Malsawmpeka hi ka hneh theih i ring em?" ka ti sep a. Ruatsanga chu ka lo ringngam tawh hle a ni mahna. 

"Buana hmaa i kherh le? I bei tawh reng reng em ni? I duh thu hrilh ngawt kha a tawk hleinem. Tilang ta che" a ti ta mawlh mawlh a. Ka ngawih det hnuah,"Ka tilang ve tho asin. Pangpar te ka pe a, a inah pawh ka kal tawh. Mahse, a lakah zaktheilo nih bak ka hlawh lo. Chetlak vak dawnin amah hi hmuh mai a harsa ve bawk sia" ka ti ta duah a. 

"Hmeichhe dang lakah chuan i la che nèp a nih chu. Apuii kha i hria em? Kha nu khan a bialpa hun rei tak a vawn tawh thlah hmakin Mala chenna inah te va kalchilhin eirawngte a bawlsak thin asin, a khum a tawm lo chauh..a lo tawm ve zauh tawh maithei bawk" a ti ta a. 

"Engtin nge chung zawng zawng chu i hriat?" ka ti hawk a. 

"Rogera, Mala bakah Lawmkima te nen hian thian tha tak vek kan ni" a ti mai a. Lawmkima chu Drose fapa a ni. Kan innel ve vak lo thung, ka hmu ngai mang lo bawk. Kei aiin a naupan bakah a hmel chu a nu deuh em aw ka tia, a pa Joshua a chhun tehchiam lo. 

"I sawi ngai si lo va" ka ti ringawt a. 

"Rogera birthday kan lawm khan i hrethiam vek emaw ka tia..nia, Mala hi chu a danglam alawm. Thil vei lian tak a nei a, a chinfel hma chu kawng dang a zawh theiin ka ring lo" a tih chuan min nghawng deuh. Vawi tam min zawh thin thil kha a vei chu em ni ang? 

"A nih Ruatsang, bialnu i nei em?" ka ti ta daih a. 

"Ka sawi tawh kha, ka nei ve tawh a. Ka nei leh rih lo. Mahse, hual ruk chu ka nei" a ti a, a mitmeng chu a phur deuh. 

"Tu?" ka ti vat a. Ka beng zat thinzia hi aw. 

"Nakinah ka la hmelhriattir ve ang che. Mala atanga ka hmelhriat tho a nia. A pa chu i hria ang, Amanda te nena thawk thin Imanuela kha a nia, a nu pawh Isabella.." a tih chuan ka nui hawk. 

"Ehe! Ruatdiki maw?!" ka ti hluai a. A khi suk. 

"A duhawm i ti ve em?" a ti sup a. Ka nui nasa. Ruatdiki chu ka hre nasa, Ka zia ang deuh ze nei ve, frank zet, ri phawng phawng chi a ni a. Kei aia a naupan deuh vangin kan inkawm tam lo zawk. A hmel erawh tha tak a ni. 

"Ni ru, a hmeltha ka ti thlawt. A nu a chhun bawk si" ka ti hluai a. A lawm ve hmel hle. Mite chu tihian an duhzawng an hmu a, a rem thlup zel bik sia. Ti nge kei hi ka chuan bik? Ka bitumpa thinlung hi a sak mah mah chu a ni. 

Kan thlen dawn hnaiah chuan,"A nih Mala chuan eng nge a vei?" ka ti sap a. Ka thutak ngang mai. 

"Kan hre lo. A chang chuan min hre miah lo niawm te hian a awm thin. Kan hriat miah loha zin daihte a ching a. Hmeichhia hi a mamawh lo ni berin ka hria" a ti ve ta thláwt a. A beidawng ve deuh niin ka hria. 

"A thuhrimin in inhre sa reng sia, Ti nge ka bulah inhre ngai lo anga in awm kher a?" ka ti há a. Inthiam loh hmel deuh hian, "Min ngenna vang a nia. Khatia ka awm kha a duh a ni. A chanchin min zawh vak a hlau a ni mahna..mahse, tunah chuan a pawi tawh lo turah ngai ang. Chuan, Sangzual, nitin mai hian fimkhur ang che aw. Kan ram hi a him lo mek zel a nia" ka mitah tak min rawn melhin a ti ta a. Ka chil ka lem khawlh. Mahse, Malsawmpeka nen inhre tha hle si, min lo bum kual vel kha ka lawm vak lo. Chhan tha tak a awm lehpek mahna. Engmah ka ngaihtuah peih lo e a. 

Zirlaiah rilru ka pe thei hlawl lo. Bena te pawn ka awmdan chu mak an ti. Ka za sek a ni ber, kei pawn a chhan ka hre lo. Ngaihtuah tur thil ka ngah lutuk a, ka zo lo a niang chu maw. Lunch pawh ka ei tam lo. Ka puar viau lawi a. Mala leh Miss Zodini te rawn luh lai pawh chuan ka chechang lo. Melh pawh ka melh hek lo. Ka chhungrilah hian sawithiam theih loh buai rukna eng emaw a awm. Thil hnawk tak chinfel harsa tak niin ka hre bawk. Hengte hi Mala vanga ka neih a ni bawk. 

Kan chhuah hmain ka nu call ka dawng a. 

"I pain accident a tawk.." tih thu chauh rawn sawi mah se; ka thaw a tawp lo chauh. "Eng a?!" ka ti tuar a, mi zawng zawng mit ka chungah a fu thup mai. Khur zawih zawihin ka nu thusawi chu ka lo ngaithla a, ka hriat loh laiin ka mittui a rawn luang. A accident tawh vawikhatnaah pawh khan ka tap tawh. A vawihnihnaah phei chuan insum a harsa zual..ka vai vek a, ka zawi nguai bawk si. Ka thiante chuan min zawt sap sap a. 

Malsawmpeka phone ri ve mek pawh ka hria. 

Ka thiante bulah chuan ka pa accident thu leh ka hawn a ngaih thu ka sawi a. Ruatsanga call ka tum lai takin, "Sangzual, lo kal rawh" ka banah a rawn kai a. Ka hamhaih chhungin pawnah kan lo chhuak tawh. A car kawngkhar chu hawngin, "Lut rawh" a ti nghut a. Vai ruai chungin ka thu lut ve. A rawn lut a, kan tlan zui nghal. Tawng nachang pawh ka hre lo va, sawi tur ka hre hek lo. Ka nu thusawi zawng zawngte kha hriat a lawi ka nei mang lo, "I pa chu a thisen a chhuak nasa hle a, Tunah zai tura buatsaih mek a ni" a rawn tih bak kha chu, a accident dan engmah ka hre tawh lo. 

"Engkim a tha leh vek ang. A thi lo vang" Mala chuan a ti dam thlup a. Mittui tling teuhin ka va melh, "Ti nge ka pa kher?" ka ti tiau a. A vawihnihna a ni miau a ni. A vawikhatna kha chu Gauhati-a a zin tur Truck nen an insu kha a nia. A na lutuk lo naa ka hlauthawng viau tho. 

"Hahdam tum rawh" a ti leh a. Engtin nge hahdam se min tih le?! Kan tlan mek laiin ka nu call ka dawng leh a, ka pick up ngam ta tlat lo mai! Ka tha a khur a, ka pa thih thu min rawn hrilh dawn tlata hriatna ka nei. 

"Pick rawh, Sangzual" Mala chuan a rawn ti hráwk a. Ka lu ka lo thing nar nar. A ding ta a. Ka phone chu min laksakin ka nu chu a be ta a. 

"Aw, hei ka rawn chhohpui mek e. Lo ngaihtuah suh. Aw le, " a ti zung zung a. Ka pa chu a la thi lo e. 

Phone min pek leh pah chuan, "Thinlung nèm lutuk" a ti sup a. Hmalam ka bih ngar thung. A hnuah ka rilru a fim deuh hnuah ka pa accident dan ka nuin a rawn sawi kha ka ngaihtuah let thei ta a. 

Ka pa chu warehouse-a a chhukna lamah a lu a hai thut a, stepah a lum a nih tak kha. A luah hliam a tuar a, thisen a chhuak nasa bawk. Tin, a hnungzàng a sawh bawk a, chu erawh eng nge a an dawn kan hre lo. Mala chu a tlan chak bawk a, Damdawiin pawh kan thleng hma viau. Min kai lawp a, min luhpui ta a. Ka nu leh Remruata bakah ka pa thian thenkhat te an lo awm nual mai. Ka nu mit chu a lo sen rám a, nu chhel tak mah nise a pasal hi chu a hmangaih êm a, a tap lo thei lo vang. Remruata pawh a ngui hle. 

Ka nu bulah Mala chuan chanchin a zawt a. "OT-ah an nawr lut deuh chiah, a lu atanga thisen chhuak kha an titawp hleithei lo va. A hnungzàng ruh pawh result kan la hre lo" felfai takin a ti a. A kut ka va vawnsak ringawt. Keia tak pawh hi hnem ka ngai lutuk a ni. Ka pa fanu duat ka ni a, ka hmangaih em em a ni. Ka pa an zai chhung chu kan nghak ta ngat ngat a. Mala pawh a awm ve char char, coffee te a zuk la a, a bengvarin a hawihhawm hle. A nu leh ka pa inthianthatna a zah vang chauha hetianga awm hi a ni awm si a. Mahse, chu pawh chu nise a lawmawm em em tho e. Msi leh Bena te pawh an rawn lang ve hlawl mai. Dave a rawn kal ta bawk a. Tin, Ruatsanga pawh kan thlen hnu lawk khan a lo kal zawk a, Hnathawh tur a laklawh deuh avangin ka nu thu angin dawr lamah a phei leh ta zawk a ni. Dave chuan ka kut a chelh ran a, a bulah hi chuan ka thla pawh a muang thin. 

Khua a thim lek lek tawh ang tihin ka pa chu an rawn nawr chhuak ta chauh a. Chuti taka an sawngbawl rei chu mak ka ti deuh. A zaitu Doctor chuan ka nu chu a ko fal a, eng emaw a sawi mawlh mawlh mai. Ka nu hmel tak ran leh ngui zet avang chuan thu tha lam a dawng lo tih a lang reng mai. Ka pa chu Cabin-ah kan nawr lut a. Nghaktu then leh rual a ngah khawp mai. A la harh rih lo a. An zai zo ta bawk nen, a tam zawk chuan min hawnsan ta a. Msi te pawh haw tura ka tih vangin an haw a. Mala leh Dave te erawh an la awm. Amanda a rawn lang miah lo chu mak ka ti deuh, mahse, a hnuah a case chhui lai avangin Aizawl khawchhungah a awm lo tih ka hre leh. Ka nu chuan, "I nau hi zuk hawpui mai rawh. Kei chu ka tha. Sangpuia a ngaihtuahawm bawk si. " a rawn ti a. 

"Nu, Doctor khan eng nge a sawi?" ka lo ti daih thung. Mi hrang chu Mala leh Davea chiah an awm tawh a, ka zawt tawp mai a ni. Ka nu chuan a heh a liak zauh a. 

"A lu ruh a khi a, a spinal chord a chhia niin an hre bawk. I pa hi kein a kal leh thei ang em kan hre lo" a ti ta a. Dáwt a sawi lo tih a insanmar danah ka hre thei. Ka bu nghat a, ka heh ka pet fan fan bawk, ka pa chu a kal thei tawh lo vang maw? Pa viak tha, pa chak leh huaisen hian a damchhung nun wheelchair-a a hman a ngai tawh ang maw? Ni lul lo ve. Pawisa kan nei a, ka pa damna a nih dawn phawt chuan a vai pawn kan seng mai ang. Ka pa damkhawchhuah lehna hi kan tan a pawimawh ber. 

"Remruata hi zuk haw se, kei chu ka awm ve ang" ka ti tlat a. Ka nu chuan,"A ngai lo, keiman ka tifel thei. I nau a ngaihtuahawm. Sangpuia pawn zanriah a la ei dawn lo tihna a nia." A ti a. 

"A nih chaw kan rawn pe dawn che em?" Ka ti a, ka nu thu hnial a harsatzia ka hriat vang a ni. 

"Aih, ka order mai ang. I Nu Dingi te dawr ami. Chuan, chawhmeh kha chhuanlum a ni mai, a thar siam a ngai lo. I naute hi lo enkawl tha ang che" min ringtawk zet hian a ti a. Ka inringtawk ve sawt mai. Ka pa chu ka va hmu leh hram a, a thisen a chhuak nasa bawk a, a dang bái mai. A biangah ka chul zauh a, "Pa, lo harh vat rawh aw" ka ti sep a. 

Mala chuan, "Ka zuk thlah ang che. " tiin min rawn kai a. Davea'n min pawt ve bawk, "Ka zuk thlah zawk ang. Ka riak nghal mai ang. An unau leka awmtir ka duh lo" a ti ve fun a. Min ngaihtuahzia ka hria. Ka lawm thin. Ka nu erawh ka pa bulah a awm tawh a. 

"Ka enkawl thei. Va hahchawl zawk rawh. Kal ang le, Sangzual" Mala chuan thupe aw zet hian a rawn ti leh a. Eng nge ka hriat ka hre lo, Mala chu ka ngei thut. Dave lam hawiin, "Kal ang, Dave, Remruat, nang pawn min rawn zui la. " tiin Mala chu ka kalpel a. A ding khawh lah mai. Ka ngaipawimawh duh lo, Dave pawn min rawn zui ve mai a. Mala runluih nan ka hmang a nih ber chu. A hma zawnga min duh lohna lantira tun ataka min ngaihtuah ber niawma a che hi ka hua. Ka nute bula inlak mark that a tum vangah ka ngai. Bakah a mi uap a na sia, ka hah vek zel a, ka peih lo a ni pah bawk. 

Gate kan thlen chuan, "Sangzual" ka hnunglam atangin a rawn ti vawt raih a. Ka lehhawi chuan a kekawr ipte zen chungin a rawn phei a, "Hei hi i duhdan maw? He pa hian hlauhawm lakah a venghim thei takmeuh ang che u maw?" Tiin Dave chu a melh zauh a. Dave chu a ngaisang hranpa lo tih a hriat ngawih ngawih. Ner sak chungin,,"Nang ai chuan ka ring zawk. Hlauhawm a thlen tak leh i thianpa Ruatsanga ka be mai ang. Ka body guard a nia lawm" ka ti sak a. A khi suk, "A tha e. Inchhir suh ang che" a ti nghut a. Hawilet tawh loin a kal nal nal. Dave chuan,"A chapo ve hle mai maw?" A ti ta chiah a. 

"Engahmah ngai suh" ka ti puat. Dave motorah ka lut nghal a. Remruata pawn kan hnungah min rawn zui ve. Sangpuia ka bia a, "Min ngaihtuah lutuk a nih kha, Nunui a rawn phei a, hei eirawng a bawl vek" a rawn tih chuan ka thaw hawk mai. Nunui chu fakin awm rawh se. Ka chau nghulh mai a, ka za lo takzet a ni. Dave pawh chu a ngawi run a, Mala vang khan a la lungawi chiah lo a ni mahna. In kan thlen chuan Nunui chuan chaw a lo chhum mek a, min hmuh chuan zak hmel a pu. "Nunu, i va tilawmawm ve,. Ka'n intifai ang a, ka rawn pui ve ang che. Riak ve nghal rawh aw" ka ti zung zung a.

"Aa..riah em em te chu" a ti sap a. Ka pindanah ka luhsan. Dave pawh Sangpuia thawmhnaw hawhin a inthlak a, ka inbual zawhah ka nu ka be leh phawt. A hlauthawng thin si a, hetia report pek zel hi a ngai. Dave leh Nunui pawh an innel ve nghal mai. Zanriah chu dar 7 pelhah kan ei ta a. A damlo ber Sangpuia hian chaw a heh tawp, vitamins a ei bawk nen. Remruata erawh a ngawi leh reng a, a rilru a hah ve a ni maithei. Eikhamah kan han tifel zung zung a. Nunui chu a chefel kher mai, ka thiannu mah nise, ka nau nen an inngaizawng chu ka lawm takzet. Eikhamah chuan tv kan en ho mai mai a, ka pa chetsual thu pawh an rawn puang ve e. Khatia a lum kha a hnathawk zinga pakhatin hmuin a zuk bawihsawm vat a, ani thisûk a lo nei chu niin a lu a hai zui ve nghal nen, mi dangin an rawn hmu leh hlauh zawk a, chuti ni lo se chuan an pahnih khan an let dun reng maithei a ni. Tin, thu thar pakhat lawmawm tak an rawn puang bawk. Pu Chhinga leh Pu Sangvela thattu nia an rinhlelh mi pali zinga pahnihte chu an inpuang ta niin an rawn puang a. An thah chhan erawh an sawi duh lo thung. Engvang tak ni ang maw? Man zel hlawm teh se, min tiralmuang lo tan tlat! Nunui chu haw tumin a ding ta hluai a, "Riak mai rawh, i nu chu ka be mai ang" ka tih pawn a hreh ngang si. Lehlamah ka hrethiam, bialpate ina riah ve ngawt kha ani ang nula pawisawilo lutuk tan chuan zahthlak tawpkhawk a tling tlat a ni. Remruata a rawn chhuak a, "U Nunui chu ka va thlah ang e, Thil lei ka duh pah a" a ti a. Ka lo pawm ta mai. Remruata bike chuan an inphur chhuak ta a, Sangpuia chuan, "Ka pa chetsual thu a hriat veleh min lo bia a, keimahin ka awm tih a hriat chuan taxi a rawn hmang a..min awmpui char char alawm..Ka hrechiang telh telh a, ka duh tulh tulh mai" a ti nuah nuah a. Ka lo nuih tháw ringawt. 

Dave chuan a phone a khawih mual mual reng a, biak a nei leh tawh a nih ringin, "Tu nge ni leh ta?" Ka va ti thut a! A va phu chiang tak. Rum deuha min melhin, "Hmeli" a ti hluk a. 

A phone ka bih rual chuan a hmet thim daih. Ka ner khum a, "Saroni a nia, Venghlui..Chapchar kut miss te pawh lo ni ve tawh a nia" a ti ta a. A lerh ve sia aw. A tluang lo thei bawk si. 

"Hriati khan a rawn be tawh lo che mi?" Ka tih chuan, "Ka block vek alawm. Khatiang gold digger lutuk mai..ka ten a nia" a ti leh hluk a. 

"Kei khan sawi lo ila i la then awm si lo va, keimah vangin i him a. Eng nge min lei dawn?" Ka ti a. 

Ka bianga rawn piaiin, "Kawrfual aw" a ti nghut a. A samah ka kek nghal. Kan nui ta uar uar a. Ka pa dam loh pawh kan hrechang meuh lo. Thianthaber bula awm hi chu a nuam a ni. Dar 9 rik dawnah Remruata bike thawm kan hria a, Nunui nen bawk an rawn luh chuan makti fe hian kan lo melh thap. 

Nunui chuan zah hmel deuh hian,"Ka nuin, 'Nang tehlul an thlakhlelh che chuan va riahpui rawh. Rawngte pawh zingah i bawlsak an ngai ang chu. An khawngaihna che hi i rulhlet ve a ngai alawm' a tia. Ka inthiam vak bawk si lo nen, ka lo kir leh ta mai. Mahse, Sangpuia bulah ka mu dawn lo a nia" a ti ta a. 

"Sangpuia bulah mu la" ka ti zauh a, "Anuin a remti lo. A mawi lo lawm, miin an hriat phei chuan" a ti a. Riahtir tak tak ka tum bik lo. A rilru thianghlimzia ka hria. A lo awm ve hian ka nau pawh a dam sawt sawt zel bawk a, ka pa damloh chhung hi chu inawm heuh heuh mai se, a nu chu pawisa ka pe mai ang ka ti rilru a. Engkim hi pawisa hmanga chinfel theih emaw ka ti tawh a nih hi a. 

Dar 10 a rik takah chuan mu turin kan inpuahchah ta a. Dave-a chu mikhual roomah a riak ang a, Nunui erawh ka bulah a mu ang. Muthmunah Nunui chuan Malsawmpeka an chhungkaw tana a hlutzia a sawi ta mial mial a. Ngaihnawm ti takin ka lo ngaithla a. 

"Ka u A boral hnu atang phei kha chuan kar khatah vawikhat tal mi rawn tlawh thin a, pawisa tam tham tak min rawn pe thin. Ka nu hian ka u ang thawthang hian a ngai tawh a, kei pawn ka ngaina em em. Mi chuan mi luhlul, mi vawt tak niin an sawi thin. Mahse, a mi khawngaihna leh min lainatna hi keini chuan kan hmu langsar ber thung." Tiin. Mala ka lo ngaih thin dan pawh tlem chuan a dang ta deuh. Misual tak chu a ni lo. 

Tiharhtu awm ang maiin ka harh hlawl mai! Hetiang hun a thlen hian ka pa sawi ka la hriatreng chu, "Harh thut chhan kan nei tihna a nia, eng emaw thil hlauhawmin min hual mek a ni thin" a tih kha ka hrechhuak zawk mai. Ka bul maia mu Nunui chu a hnar barh barh reuh a. A inhmeh lo mang e. Ka zun a chhuak deuh bawk nen, ka va zung leh te te a. Dar 3 a pel hlek. Tiang hun hi huai leh hrángte inlar hun a ni cháwk. Mahse, ka hlau hran lo, Nunui ka bula a mut ve vang a ni maithei. Mut leh ka tum lai tak chuan ka chung zawn chiah in chung chhuata tei thawm niawm tak chu ka hre ta a. Ka pindan chung chiah hi ka pa private room a ni. Slab vek a ni naa zan reiah chuan thawm a ring hma ve a, ke pen thawm niawm tak pawh chu a reh leh daih. Mahse, ngaihthat lohna lian takin min bawm a, ka hlau deuh bawk. Dave-a ka va kaitho mai dawn mawni ka tih laiin kan thawm a hria ang a, a tlanchhe hman ang tih ka hlau bawk si. Englai pawha ka room-a ka dah ka chemte chu va la chhuakin thawm dim zetin in chung kailawn chu ka zawh chho ta a. 

Ka thaw ngam lo a ni ber e. Ka pa private room chu a lo inkau deuh a. Khur ru der derin ka va pan a. Thawk la hawk leh inla huaisen luiin thih leh thih tiin kawngka chu ka nam hawng thut a, chemte lekkawh chungin ka va ding lut nghal. Ka thil hmuh avang chuan ka chemte ken ka thlauh tawp a..ka khur ta zawih zawih mai...