Malsawmpeka 3

MALSAWMPEKA (3)

Ziaktu : Toni Râlte

Ka tho nghal hlawl mai. Ka tawng ve hmain a tawp daih zui! A number chu ka dial lehnghal a. A tlang tawh lo. A rawn tih danah khan kei chu an target ka va nih mai hmel ve aw. Ka nau an hrai rui a; A thil neih engmah an laksak lo thung. Tu te nge ni ta ang? Engvanga kan chhungkua chu min tibuai nge an nih tak ang? Keima tawkah ka rilru a buai ve khawp mai. Mut pawh ka muhil leh lawk lo. Ka thawh veleh ka pa ka be nghal a. Number chu kan han dial leh ngial a, a thi hmak tawh si. Ka nu hlauhthawnzia ka hmu thei. Hlauthawng awm pawh a ni rèng bawk a. Remruata lah a la harh lo bawk. Nimin lama class ka thulh tawh si avangin class kal ka duh sia, ka nu chuan a remti lo thung. Tukthuan ei hma deuhin Remruata a rawn harh ta a. Ka pain a awmdan a lo zawt ta vat, kan ngaithla thap mai. 

"Kan in pana ka rawn tlanna kawngah nula pakhat chhe lo deuh hian min lo phar ding a, 'Ka bialpa in min sual a, ka tlanchhia a, khawngaihtakin inah min hruai haw thei ang em?' a tia. Kan ina rawn hruai haw phawt ka duh laiin a bialpa hmuh leh a hlauh tawh em vangin an in lam nia a sawi, Falkawn lam chu kan pan ta a. Mahse, Falkawn thlen hma khan, 'Lawkin, ka chhungte ka'n be lawk lawk" tiin ding turin min tia. Ka ding ve mai a. Kawngsirah kan phei dun a. Ka nu rawn call tumin kei pawn phone ka la chhuak a, mahse, ka call dawn chiah tihin ka nghawngah a rawn chiu tawp mai a ni. Ka ruih tak tak hmain ka phone chu min chhuhsak a, a off bawk. Pawisa min dil lo va, engmah min laksak lo bawk. Mahse, a kal dawnah, 'Warning a ni tih i chhungten hrethiam ngei rawh se" a ti ringawt a. Car pawl a rawn tlan a, a chuang ta daih a ni. A bak engmah ka hre zui lo" a ti ta a. Mala sawi hmangin a lo mut ngawtna kha kawng hnaih em em a nih loh bakah a bike khan a lo hliah ve deuh bawk nen, Unau hmelhai awm hun velah chuan tu khaw khain an lo ngaihven lo a ni ngei ang. Ka pa chuan a chal a chuar náng a, ka nu erawh a meng pháwk leh hru tawh. 

"Eng ber nge an duh ang aw? Ka chunga an tuan takah chuan an thil duh hi kan hriat a ngai" ka pa chuan a ti a. Ka nu erawh chuan, "Politics leh i sumdawnna hi bansan la a tha a ni mai. I sumdawnna tel lo pawh hian damchhungin kan nuamsa tawk tawh" a lo ti nghat thung. Kan pian ve hmaa thil thleng kan hre lo va, hriat kher ngai pawn ka hre lo. Mahse, hetia veh kan nih rúk takah chuan ka pa hian thawnthu ngaihnawm tak a neih ka ring ru ta tlat. Ka zawt tawp ngam bawk si lo, ka nu chuan min hrilh duh dawn lo sa bawk. 

Intithawven luiin, "Min man ve awm lo em mai. Ka inringtawk" ka ti hawk a. Ka nuin min melh no fahran lo. An fanu neihchhun ka ni a, veh ka ni mek chu nu leh pate tan ngaihthatna chi ziazang ni hek lo le. 

Ka nuin a remti ngang si lo va, ka pa pawn class chu thulh leh rih mai tura min tih avangin ka kal ta lo. Sangpuia farm-ah ka nuin min chhukpui a, An kel damlo damdawi kan zuk pe, ar chaw te pawh ka pek ve kha. Ar sual huai hi tunah hian 27 lai an nei a. Sangpuia hian a hausakpui angreng, an ngam huai nasa si a. Mahse, tunah chuan hralh tham an la ni meuh lo thung. Ran hrim hrim hi ui tih loh chu ka ngaina tehchiam lo, zawhtê phei chu ka ning. Kap lum an rawn bel chawt lehnghal a. Ui erawh ka tette atanga vulh kan ni a, ka pa chinghne ui Huntera thlah kalzel kan la chhawm a, Huntera kha kum upa tawh tak a nihin a boral a, ka pa hian a tuar viau. Mahse, ui pangngai nen an inpawl hman hlauh a. A note 4 lai chu an dam a, Ka ui bik hi chu ka duat bawk a, a hmingah pawh , 'Lovely' a ni deuh tawp. Ka hawn laia a awm loh chuan ka hawi vak vak zel. 

Ka nu eirawng ka bawlpui a, Tlai walk ka tum pawh a phal lo. Hawi khawthawn mai mai ka chak nen a aw. Nimina an lei nge ni chakai lian deuh deuh kan chhum a. Zanriah ei hmain a bawppui ka khel fai deuh vek, ka nauten a bawppui an zawng rak rak a, ka nuin , "I mak tehzawng a nih hi..khek ve ta che" a tih leh hlar tawh kha. Ka nuih tlawn ta ringawt. Phone call emaw msg danglam deuh emaw ka la dawng lo va, kei chu ka ngaih a tha leh hmiah tawh. Class kal loh chuan a khawharthlak duh sia, a hrehawm. Zing ka thawh hlimah ka workout phawt a, tuilumte ka'n in hnuah ka inbual leh sar sar a. Vawiin chu class kal ngei ngei ka duh. Tukthuan ei hma deuhin tlangval lian leh sek lam,hmelchhe vak lo, palian zet mai hi a rawn lut a. Ka nuin a lo dawngsawng vat. 

"I bodyguard atana i pain a lak thar a nih hi..ani hian i class kal leh haw a hruai zel tawh ang che" a ti ta mai a. Ka tau ta ngát mai. Khawi lama mi hausa ber fanu niawm fahrana guard lo neih kha ka zak a ni mah zawk ang chu, thiante kher lo mi dang pawn makti ena an en nih ka duh lo bawk. 

Ka pa chuan dam thlup hian, "Chân che kan la duh hleinem. Thil kan chinfel hma chu kan thu i awih a ngai" a ti a. A thu chu thutawp a ni. Ka lung erawh a va awi lo tak. Túm búr chungin chu pa motor khalhah chuan ka chuang a. A hming kha Ruatsanga an tiin ka hria. 

Ka lawm lo tih a hriat vang nge, "I pain min ngen tlat sia" a ti sup a. Ka ner sak. 

"Sawi a ngai lo ve. " ka lo ti hmak. 

"Miss, i chanchin hi ka hre viau asin. IG-ah pawh ka follow che lawm, Aizawl nula nalh ber top ten-a tel phak kha i nia. A takah chuan i lo tha fe zawk a nih hi" a ti ta a. Fakna hi dawnsawn nuam ka ti ka tih tawh kha, chawp leh chilhin ka lungawi loh rukna pawh chu a reh ta duak a. Mahse, chutia fak lawm vak anga lan ka duh loh avangin, "Nang chu ka bodyguard i nih kha..hrereng rawh" ka ti ringawt a. Ka hmusit deuh te pawh a ni mahna. Mi dang hmuhsit hi ka duh ngai bik miah lo thung, kei aia dinhmun hniam leh thing ve tak tak ka kawm ve zul theih danah mi dang hmuhsit hi chu ka tina vak lo a nih ka ring. Ka best friend erawh sawi fo tawh angin Dave a ni. 

"Ka hria alawm. Chuan an sawi leh dan che chu maw..a chapo, a zak lo..an tia" a ti leh ta zel a. Ka nui hawk hawk. Mi zakzum ti hi chuan tuman min sawi ngai dawn lo a nih hmel, pawi tehchiam hleinem.

"An va sawi dik ve" ka ti mai a. A tawng zui ta lo. Dave-in a lo call tehmial a, "Zanin tlai chu zanriah kan kil dun a ngai. Bialpa i neih loh pawn tu emaw rawn hruai rawh. Ka bialnu thar ka hmelhriattir dawn che" a rawn ti nghal zung zung a. A va mak thin e aw. Hruai tur ka nei hleinem le. Ka ngaihtuah vang vang a, Roger leh Asanga ka rilruah an rawn lang nghal. A tawp berah Mala! Ka lu ka thing nar nar a. Ani chuan engti kawng mahin a duh ka ring lo. Roger chuan programme a nei maithei, Asanga chu ka tan ever ready a ni thin. Mahse, chaw ei chhuah chu ka nu ten an phal ka va ring si lo êm. 

Dave chu ka text a, "Ka nute ka lo dil phawt ang. Tunlai an strict thar a" ka va ti ta ngawt. 

Dave hi sawi tawh angin hna nei thar hlim a ni bawk a, kan inhmu khát riau a, a hrana han inbiak lumlam vak hi kan tih dan a ni thin lo. Mahse, kan inhrereng tho. Hmeichhe lamah hian a vanduai ve thin a. Vawi 3 ngawt a bialnu ten an phatsan tawh a ni. A hnuhnungber ami phei kha chu a tuar na reuh khawp mai. Mahse, Dave that vena chu a hun laiin a tuar vak a, a intuar dam a, a dam chiang thei viau zel. Phatsan a nih zel chhan hi chu kei pawn rin ngaihna ka hrethiam lo, a caring si, a bula awm a nuam bawk si, engtin nge maw an phatsan phal zawk ni. 

Ruatsanga chuan min drop a, kan ban hun tur a hre sa bawk a. Min hawnsan ta rih. Tikhan ka pa hnuaia thawk a ni tho a, hna hnih nei ang a ni dawn a nih chu. Kan department kawta ka chhuk chiah chu Malsawmpeka a rawn lang ve zat a, ka lungphu a rang deuh. Mahse, ka inthunun ta vat a. Min kalpelh pah chuan, "A chhiat hran loh saw" a ti sup. Ka hamhaih laiin a kal bo hman. Ruatsanga chu a lo hmu ve a ni ngei ang, ka bialpa emaw a ti pek a nih dawn kha. Pawi lo, a ho mai mai. Khatia min lo notice ve ringawt pawh kha a lawmawm lam a ni. Ni 2 lai ka chawlh hnua ka kal leh takah chuan Msi te Bena te ho an lo lawm ve ngang mai a. Thil thar an lo hre lehpek bawk. Kan class ami Dini leh kan professor Chama te indate thu bakah Sir Chama nupuiin Dini a hauh thute chu Msi chuan a sawi sar sar a. Sir Chama chu ka class tannia tlar hmaa insawn tura min titu kha a ni. A mitmeng hre hraw kha a lerh hmel ka lo ti reng a. Dini te ang thak ve hir her tan chuan hnar a harsa ve phian ang chu. Zai kan zir atang khan ka ei lo laklawh a,ani pawn min be ngai lo. 

Bena'n, "Linda sawn min lo be ve deuh a" a ti sur sur a. Linda chu nula lian ve lam, háng ngaihnobei, dam dup mai hi a ni a. Kan classah pawh a thiam thei pawl a ni maithei,. 

"Be tha ve la, a fel hmel ka ti" ka ti ve sar sar a. 

"Mahse, kan senior-ah a ex a awm a, a la hauh lutuk an tia" a ti nuah nuah a. 

"A ho! Ex chu ex..amah Lindain a duh phawt che a hnu. Tuman sawi buai theihna an nei lo" ka ti hmak a. A buk ve nghut kha. Lunch kan ei laiin Linda te thianho chu an rawn lang ve a, awmze nei zet hian Bena chu a rawn melh ralh. Kan lo nui thaw hlawm thung. Kei chuan, "Msi leh Rpa pawh hi ni ve law law u la.." ka ti pek a. 

Msi zak chu a sen ap ap mai. Rpa erawh mi uangthuang tih takah, "Aman min duh chuan ka duh" a lo ti vat a. Kan nui vak vak. Mahse, kan nui rei lo. Te tuar tuar thawm kan hriatna lam chu kan hawi thup a, kan chawlhna kawt maiah chuan an lo intibuai a niawm a. Hawkdák tih takah ka va bih chiang leh kher chu ka rin loh lutukin Malsawmpeka ka va hmu. A thinrim hmel viau lehnghal. A hmaah Apuii leh tlangval pakhat an ding ran bawk. Mala te intihbuaina a nih vang nge kan lo thlir ta thup a. 

Apuii bula ding tlangval chuan,"Ka nula a nih hi..i dinhmun leh ka dinhmun chu a inthlau lua e naua..lo inhmu tawh lo ula a tha mai e aw. Tun tum chu ka ngaidam ang che " a ti chhar chhar a. Apuii bialpa atan chuan hmelchhia ka tih bakah a patê mah mah. Apuii a hmelthain a nalh sia. 

Mala chu a nui hul hak a. 

"I nula kha ka tan engmah a ni lo ve. A bak ka sawi zel chuan kan buai palh ang e. Apui, i tlangvalpa kha kalbopui vat rawh. " a ti ta a. A awah hlauhthawnna engmah a awm lo. 

Apuii chuan a bialpa kut chu vuanin, "I zahpuiawm khawp mai, Ramthanpui, min tizak lutuk aw. Haw rawh. Haw vang vang rawh" a ti tán tán a. A zahthlak duh ve khawp ang. Apuii chuan Mala chu ngenngawl deuha melhin, "Mal, pawi ka ti lutuk. Kei chuan engkim kha...a.." a tih mek laiin Mala chuan a lo tawng khalh a. "Ka hmeichhe duhzawng i ni lo. Ka thian i ni. A bak awmtir suh. I bialpa pawh hrilhfiah rawh" a ti ro halh a. A kalsan ta daih. Apuii hrilhhai hmel chu a tha leh viau naa ka khawngaih leh chuang miah lo. Lawm rukna riau ka nei a nih chu! A chhan chu Malsawmpeka leh Apuii an inngaizawng lo tih ka hre tlat alawm. Apuii leh a bialpa chu Security Guard ten engtin tin emaw an hnar haw ta a. Boruak pawh a dai ta. 

Msi chuan, "I lawm awm" a ti sap a. Nui vur vur chungin, "Ka phur hiam hiam tawh e" ka lo ti. Bena leh Rpa te hian an hre vek bawk a, sawi zahah ka nei chuang lo. 

Kan ban dawnah Dave msg ka dawng. Ka lo mangnghilh daih chu ka inthiam lo kher mai. Hria se a thinrim ngei ngei ang mawle. Ban rual rualin ka nu ka call a, Dave vel chu ka hrilh a. A chek hluk. A ner nasa leh viauin ka ring. 

"Tu nge hruai i tum?" a rawn tih chuan ka thaw huai mai. Dave nen kan inthianthatzia an hre ve a, an ngaipawimawh ve hle a ni. 

"Ka la hre mai lo va" ka ti ban chhalh. 

"Ngaihtuah vak a ngai em ni? Ruatsanga kha hruai la, in rawn inthlah haw leh ang a a ni mai lawm" a ti ta thên a. Ruatsanga ber kher, vawiin kan ni hmasa ber a ni si. Mahse, lehlamah Roger leh Asanga pawh hrilhna hun a tlai ve deuh tawh mah mah chu a ni. Vawiina ka thu hriat vangin ka lo hlim vel awr awr lutuk a, chuvang vek. Ruatsanga chu hruai poh mai ang. Kan department kawtah a lo ding ran tawh a. Ka thu lut ve nghal, Mala rawn chhuak mek pawh ka va hmu. Mahse, a mood a chhe dawn a, biak buai ka tum rih lo. Dave-a tan hun ka hman a ngai rih. 

"Ruatsang, zaninah ka bestfriend leh a bialnu te nen zanriah kan kil dawn a. Ka bialpa anga i lo kal ve mai a ngai aw. Min hnial hlek suh" ka ti nghal tâwng a. A hmelchhe lo va, a lian bawk nen, a zahpuiawm lem loh. 

"Ka hriatreng tawh tur a nih dawn chu" a ti nghut a. A tawngkam hman duh dan hi ka ngei thei. Min tièl kual vel niin ka hria. Ngawi rengin kan tlan chho a,. Tlan chak vak lo turin ka hrilh bawk. A chhan chu ina haw lo va tlang kan tum sia, kan hma lutuk ka hlauh vang a ni. Dave nen kan inbia a,an ni pawh an rawn chhuak fel ve chiah. Loicy Hotel-ah kan ei dawn a nih awm chu. An manager Joshua hi an star thei rap! Mahse, a nupui Drose hi a duh hleuh hleuh khawp a. An hmuhnawm thin. Dave chuan min lo hmuak a, Ruatsanga chu ka hmelhriattir nghal. 

A bialnu ka hmuh chuan ka khi sak a. Kei aiin a te ang a, a háng zawk bawk. Mahse, a hmel tak chu tha ver vawr reuh tak a ni. A hming chu Hriati a lo nia. Bungkawna khawsa an ni. Ruatsanga pawh chu ka'n hmelhriattir ve leh a. An inchibai laia Hriati mitmeng chuan ka mit a la deuh, Ruatsanga chu a melh no mah mah tlat! Ka tan ni loin Dave tan ka thikthu a lo chhia. Eitur kan chah a, Hriati chu ka lo ngaihven loh vang nge Social media influencer zinga pakhat a lo ni ve a. Inchei pawh a thiam khawp mai. Dave nen hian eng ti tiha intawng nge maw an nih dawn ni. Eitur an rawn dah apiang chu a thla a la, IG-a post-ah a ti a niang chu. Ka rin loh deuhin a che bawk, Dave zun lawk hlanin ka bek sam ka kilh khawmna, Ka pain Dubai a zin tuma Diamond -a chei bakkilh min rawn hawn a ni, chu bakkilh chu la thla lawk tura min ngenin ka lak thlak rualin a samah a vuah a, a inselfie nghal. Ruatsanga nen kan inmelh rulh rulh mai. Thing tih rukna riau ka nei. Eitur a tuihnai bawk a, kan puar tlang e. Dave chuan call a dawn vangin bathlarah a va chhuak lawk a. Kei pawh wash roomah ka va lut zuai. Ka chhuah leh chuan Hriati chuan Ruatsanga chu a lo inselfie pui lehpek! He nu chu aw, a va fake reuh awm e ka ti rilru deuh. Ruatsanga lah chuan a ngaihsan loh hmel nasa sia. Dar 8 pelh hlekah kan haw ta a. 

"Hriati nen khan in inhre sa mi?" ka tih chuan, "Hre sa nang, a chet dan kha a thing" a ti ta mai a. 

"I follow ve em?" ka tih chuan a lu a thing nur nur. 

Kan tawng leh tawh lo, Tlangval tawngtam lo ve tak chu a nih dawn hi a. In ka thlen chuan chanchinthar an lo en zo tawh a, ka chau deuh nghulh bawk nen, report tawite ka pe thuak thuak a, ka pindanah ka lut nghal. Hriati chu IG-ah chuan ka follow ve ta a. Followers chu a lo ngah phian mai. Mahse, a pic post ho chu mi híp chi a ni miau a. A ti deuh kêng kúng bakah zanina kan eitur te, ka bakkilh te kha a lo dah leh diam tawh. A ta emaw tiin an faksak sup sup lehnghal. A va zak lo tak. Mahse, ka nuih a za deuh tlat. Dave ka be ta nge nge a. 

"Hriati kha then la ka duh a ni. A fake lutuk" ka ti nghal tháwr. 

"Engti zawngin" a rawn ti nghek. Lungawi lo chu a ni chuang lo. 

"Aa..amah kha ka ngainat chi a ni lo. Bum i nih leh hmain then rawh. A tan cheng engzat nge i insen tawh" ka ti ta a. Engkim a chinchhuaka hrilh kher chu ka tum hran lo. Mahse, ka thianpa hi vanduai tawh lo se ka duh a ni. 

"A denim man atan 3500, a pheikhawk atan 7000, a bak pawh a la awm nual. Mipa ka nia, ka tih ve tur alawm" a ti a. 

"Mipa i nih vang khan engkim i leisak tur a ni hleinem. Influencer a nia, hlawhte pawh a nei ve tawh ang chu, a dig che niin ka hre tlat. " ka ti nghal zung zung a. A ngawih vung vung hnuah, "An in phei chu hmu la mak i ti ang. Mi in hnuai an luah a,. Mahse, Sang, sex kan hmang tawh a, a zei sia, min hîp tlat tawh" a ti ta a. Ka ner sawk. 

"Pawisa i neih loh veleh a kalsan ang che. Kan fiah dawn nia. Naktukah bazarpuiah sawm la; i credit card theihnghilh lui la, amah pektir han tum teh. A lang kuar mai ang. Hetiang ho chinfel hi chu a harsa lo" ka ti mial mial a. Ka lo phur ve em em ringawt. A nihin a ni lo alawm, Hmeichhe thenkhat mak ka tihna em em chu..mipa thenkhat nen han inhnial deuh se, 'Mipa tihtheih ang kan ti ve thei vek. Danah sang leh hniam bik an awm lo' an ti páng páng a. A sum hráwm chi ang chu mipa mawhphurhnaah an ngai leh daih tho si. Mahni inchawmzo tak tak si lo hian kan mit hi a sang ve fú roh a! Ka infak vena ngaihzawng ka neihten ka tan pawisa an la sêng lo. Ka duh lo a ni tawp, ka chapo vang a ni mahna. Thil kan ei ho pawn zat leh zat tala pek ka rawt zel. 

Malsawmpeka ka be chak leh ta tlat. A number ka hmeh chhuah lai chuan zámna a awm ve deuh, mahse, ka intihuaisen lui a. Ka call ta a. A ring ral ral mai. 

"Hello" a rawn ti puam tâlh a. 

"I tha maw?" thawveng zetin ka ti a. 

"Ka that lohna chhan tur a awm em ni?" a rawn ti. 

"Vawiin lam boruak a fuh vak si lo va, hnemte i ngaih takin ka tia" ka ti a. 

"A ngai lo, ka lawm e. Min rawn diriam i tum ve deuh em ni?" a ti nghut. 

"I ngaihawm a" ka ti hmiah. Ka lei ka chhuak zuk zuk mai, "Mu teh" tih leh dah a rual. Mahse, ka khi var var. A hmelhmai chiang taka mitthla chungin ka muhil ta a. Ka mutui kher mai. 

Ruatsanga nen pawh ni 3 lai kan inzui ta. Friday tlai hi Roger birthday party a ni tak e. Ka nu ka hrilh a, Ruatsangaa tel ve dawn chuan a remti. A ninawm, he pa hi an ring si. A rinawm ve fu roh bawk si. Roger lah chuan ka kal loh a hlau khawp a, min rawn text sek. Ka body guard nen kan kal dawn tih ka sawi chuan a hnual êm lovang chu maw. Ruatsanga chu Rogera gift lei turin ka be nghal a. Ani hi chu suit nen a ni deuh zaih zel a, Nectie ka leitir ta mai. Ka pa pawisa ka hmang bik lo e. Party tih hrim hrim hi chu a lo nawm hmel bawk a niang, chawhnu last period-ah chuan ka za sek tawh a. Malsawmpeka pawh ka ngaihven vak lo. Khami zan ka va call zan atang khan kan la inbe leh miah lo. Ka lo buai ve bawk nen, bakah phone ai chuan hmaichhana thil sawi hi ka thlang zawk thin. Ka sawi hmaih loh tur chu Dave khan ka thurawn ang khan Hriati chu a lo bazarpui ngei a, an tawpna chu ka hriatsa a ni. Hriati'n a ankhum hrep bakah an awmdun lai ngeiin a bialpa dang a biak khumsak a niawm e. "Ka lawm e, i thurawn vangin" Dave chuan a rawn ti thlap mai. A la na vak lo turah ka ngai. 

Ruatsanga nen kan inkhalh chho mek a, party vel chu ka hrilh leh sar sar. A nui hawk a, "I nun hi a awhawm mang e" a ti hmuk ringawt. 

"Ruatsang, i chanchin min han hrilh ve teh. Thian kan nih tawh hi" ka ti ve ta a. A rin loh deuha ka awm chu a hamhaih deuh niin ka hria. Mahse, a insiamrem leh vat a. 

Hmalam bih ngur chungin, "Ka pa leh i pa chu ZCP tana lo thawk dun hrep tawh an nia. I hre maithei, a hming chu Lalthantluanga a nia, ka nu erawh Zochhingpuii. Kei hi an fapa naupangber dawttu ka nia, fapa pathum min nei a nih chu, mahse, tunah hian ka nu chu nasa takin a damlo a ni" a ti chuai raih a. Pa Tluanga fapa maw a lo nih le?! Kei aiin a la naupang zui! Khai aw! Thangtharte hi an lo lian mang e. 

"Hre lutuk e. Chuan, Nu Zoi chu tunah khawiah nge a awm?" ka ti vat a. 

"Vellore-ah nimin piah khan ka pa nen an thlawk thla ta a nih kha. A natna hi a dangdai êm a" sawi hreh nei tih hriat zet hian a ti a. 

"A nih bialnu i nei em?" ka ti thut. A nui suk a, "Nei thin a. Ka nei rih lo. Eizawnnaah ka buai rih a" a ti mai a. 

"A tirte khan insawi vat ta che. " ka'n ti ngawt a. Lehlamah kan ni hmasaber kha a fuh lo ve bawk a tin ni. 

"Chuan, ka pa hnuaiah i thawk tho a tiraw? I unau ten eng nge an thawh ve" ka ti leh a. 

"Kan upa ber chu MBBS zirin phaiah a la awm a. Kan teber erawh ka nu te villaah farm house siamin a buai hle thung. Zirna pawh a chawlhsan tawh, ramhnuai a ngaina tlat a. Ka pi leh puten an duat bawk si" a ti ve mawlh mawlh a. Chutia ka pa thianpa fa ka han hre thar lehzel chu lawmawm ka ti. Ka tuallim loh luatah ka pa thiante chang ka hria a, an fate hi ka lo hre vak lo a ni. Zo choka kan thleng a, Ka chhuk tur chu Ruatsanga chuan min lo dang chawt. "Lawk, saw mite saw kal phawt rawh se" a ti sup a. A hawina lam chu ka va en ve a, suit dum ha mi pahnih hi Zo choka gate bul maiah an lo ding reng mai. Ruatsanga fimkhur chhan ka hria a, a thu pawh ka awih. Reivakloah car a rawn ding a, chumite chu an lut ta a. 

"Le, chhuak ang" a ti nghal. Dinhmun hlauhawma din hi ka duh lo asin le aw..ven leh vil ngai nih phei chu. Heng thil hi a bul rát atanga hriat a la ngai dawn a nih hi. Kan va luh chuan an lo kim thap tawh a, Roger chuan min lo dawngsawng vat. Ka beisei loh deuhin U Loicy leh Ruatsanga chu an lo inhre tha viau mai. Chuan, dawhkan kil bera thu chuan ka mit a la nghal bawk, Roger nen an lo inkawm ve thin a maw? Min rawn melh rulh a, hmun dang a hawi leh daih. 

"Zanin chu a hard ti ve rawh aw. Ruatsanga a awm tho, veng tur che" Roger chuan ka beng bulah a ti sur sur a. Ka ner sak. Beer bak ka mamawh lo. Zu an in chho ta a, Ruatsanga pawn tlem a lem ve. Malsawmpeka pawn a in thei phian. 

Roger chu rawn ding chhuakin a mal malin inhmelhriattirna min nei a, Mala chu, "Ka best friend a nih hi" a ti ngat nia! Engtin nge kha chen kha an inthian tha em em tih ka lo hriat loh theih. Eitur pawh a tuihnai e. Keimah chiahin beer ka in a, ka in hnem ve bawk nen, ka ni chhulh tawh mai a. Pum lam lahin a rawn nawr nen, ka luak a chhuak ut ut mai. Hmanhmawh takin wash room ka pan a. Min zuitu an awm! Nia, body guard ka nei tak alawm. Ruatsanga chuan ka chalah a rawn dawm vat a, ka uak tuar tuar ringawt. Luak chhuah tur a awm bawk si lo. 

Kawngka bula rawn dingin, "Ka lo buaipui ang e, Loicy nau sawn kawm che a chakin ka hria" Malsawmpeka'n a rawn ti nghut a. Ka melh peih táwk. Ruatsanga lah chu kal mai ta bik lo chuan,"Ka tihtur alawm" a ti ve tlat. 

"Khatin hmeichhe rui an buaipui ngai lo. Ka lo ti ang. Kal rawh" Mala aw chu a chang riaua ka hriat ni. Ruatsanga min dawmna chu la thlain a kutzungtang sei zet chuan ka dang a rawn kawm ta mai a! Ka luak ta báwrh mai. 

"Hmela" ka ti bah nak a. Ka dáng a thip deuh bawk si. 

"Beer mai mai ruia zawi nguai hi a zahthlak" a ti sup a. 

Ruatsanga chu a lo kalbo tawh. Mala huhàng a zo bik lo a ni maithei. Ka luah zawh meuh chuan ka harh ta deuh a, ka hmai te phihin ka kamte ka thuah a. Ka hmai ka hrukhul hnu chuan min rawn melh vung vung a, "Effect hman ve chu a ngai lo tak a nih kha. " a ti hluk. 

A ngeiawm viau naa, kan inhnaih ve hret hret tih ka hrethiam ve alawm. 

"Beer ka duh leh, min va laksak teh" ka ti nghat a. 

"Bartender ka ni lo. Mahse, ka laksak ang che" a ti hmuk a. Kei pawh chhuakin, an lam hut hutna ep dawhkan kilin ka thu a. Ka hmaah beer hawnsa a rawn hung a, ka lo in khawlh khawlh. 

"Sangzual, engvangin nge body guard i neih?" a ti thut mai. Min tiphu tep alawm le. 

"Ka hre lo" ka ti nghat a. A awih lo tih erawh ka hria. 

"Ven ngai khawpin tihsual i nei em ni?" a ti leh a, hetiang lo lam sawi ka chak nen chuan aw. 

"Remruata hrai ruitute khan min target alawm, ka duh vang pawh ni loin ka pain guard min rawihsak a nih hi" ka ti ta a. Ka rinngam vanga sawi ka nih piahlamah ka beer in a thawh leh mek vang a ni bawk ang chu. 

"Engvangin nge in chhungkua chu an enthlak che u le?" a tih lehzel takah chuan, "Ka hre si se lo, ninawm. I boring si" ka ti ta piap a. A khi suk duh chauh. 

"Engvangin nge nang leh kei hi kan inneih kher a ngaih? Ti nge tualthahna a thlen apiangin ka nu hian i pa phungbawma a sawm thin? I ngaihtuah ngai em? Kei chuan chhan tha tak a awm ka ring a ni. " a ti ta bawrh bawrh a. Ka lo hrilhhai letling. Chu thil chu kei pawn ka lo ngaihtuah ve fò tawh alawm le. Mahse, ka namnul zel a, serious deuh chu a ngai a ni. 

"Kan pian ve hmain thil thleng a awm a niang" ka ti ta ngawt a. 

"Chuan, min neih chu i la duh tho em ni?" a ti ta daih. 

"Eng nge i sawi tum?" ka ti vat. 

"Ka hmangaih lo che a, nang pawn min hmangaih hek lo. Kan nu leh kan pate hian kan lakah eng nge an thupa kei hi engvanga ka chhungkaw bula khawsa ve thei lo nge ka nih tihte hi ka chhui chhuah dap hunah kan la innei dawn nia. Tunah chuan, i duh duh ngaizawng turin zalenna i nei e" a ti hmiah mai. Sawi tur reng reng ka hre lo. Ka rin aiin a hmel a thutak bawk. Min kalsan hnu pawh chuan ka thu ngawi kar a, ka ngaihtuahna erawh a buai nuaih nuaih thung. Ni e, eng emaw zep hi chu an nei a ni. ZCP an din lai khan eng nge thleng ang? Ka nu hi engvanga hlauthawng hma em em nge a nih? Naa, ka ning a. Beer cane khat ka va la leh a, ka in miah miah mai. Roger a rawn kal a, ka kawngah a rawn kuah hnáp.."Ti nge min biak duh tak loh?" a ti thum chhak a. 

"Min lo be bik em ni?" ka lo ti thung. 

"I danglam tak vang alawm. A dik tiraw? I danglam, tun hnaiah" a ti mawlh mawlh a. Thlanglam tukverh atanga electric eng de iar chu ka thlir vang vang a. 

"Aw nia, ka danglam a ni. " ka ti sap a. Malsawmpeka khan ngaihzawng nei tura zalenna ka neih thu leh engkim a chhui chhuah vek huna kan inneih tur thute kha a sawi tak kha..

"Engvangin nge i danglam? Tu vang nge?" Roger mitmeng chu a tak ran a. 

A mita chiang zeta melh let vein, "I best friend Malsawmpeka hi ka duh a ni" ka ti ta a. 

Ruatsanga min phurh haw lai chu ka la hre vek, in kan thlen lai tak erawh mumalin ka hre tawh lo. Beer rui ber pawl ka la niawm e. Mahse, a tuk zinga rizai hnuaia ka ngaihtuah let lehin Roger bula Mala ka duh thu ka sawi hnu lawkah Mala chu ka hmu lo zui a. A haw tawh aniang, engvang ber nge ka hriat si lohin ka thinrim a, ka rui sual a ni ber e. Tu emaw samah pawh ka kek hrep mai. Ka zak chu ka lei ka chhuah tet tet a, ka va rui thing tak. Malsawmpeka vang vek a ni. Inrinni a ni hlauh a, class kal a ngai lo bawk nen, ka zia huai e. Thlan thla khawpa exer ka lak hnu phei chuan zia tak ka ni. Ka nu leh Sangpuia bazar an lo haw a, Eirawngbawl a ngai vak lo bawk nen, ka inbual fai a. Tukthuan kan ei nghal. 

Thleng ka sil laiin Pu Chhinga leh Pu Sangvela te thattu niawma rinhlelh mi pali an man thu an rawn puang a. Nizan lama Mala min tawngkhum dan ka hrechhuak chiah. Ka nu chuan, "Engvang takin that ang maw? Thleng tawh lo se a lawmawm ngawt ang" a lo ti ve hliai a. Ka pa erawh a ngawi reng. Remruata pawh a tha tawh a, a nun nguai tawh sa nak alaia damdawi hmanga hrai ruih a han ni leh phei kha chu tumah khan kan be tawng zo lo a ni ber e. Ka pa nen doctor an han hmu a, kha damdawi kha no. 4 a lo nia! Remruata te ang tan chuan a thawk na khawp ang le. Sangpuia erawh a farm lamah a buai leh tawh. Ruatsanga nau nen khan inkawm se an inkawmngeih ngawt ang. An tuizawng a inang si. Ka nu pangpar ho kan sawn kual a, pangpar hi mawi lo ka ti pawh a ni lo. Mahse, ka khawih vel thiam tlat lo a ni. In chungah kan pahnih chauhin kan awm bawk a, ka nu chu hnaihin, "Nu, kan pian hma khan eng nge thleng? Ka pa leh Amanda te hi an thawk dun thin em ni?" ka ti ta chawt a. A meng pháwk teh e. 

"Ti nge chu chu min zawh?" a ti ram hmak a. 

"Ka hre ve chak, Malsawmpeka nen innei tura thutlukna in lo siam ngawt dante kha" huangtau chhuahin ka ti leh a. 

"I pain a sawi vek tawh kha. A bak a awm lo. Chuan aw i pa leh Amanda te chu thawk dun thin e. I pa ZCP hotupa a nih lai pawh khan Amanda chu sawrkar lam mi ni mahse, i pa kha a thlawp tlat a, an thawk dun ta zel a ni" a lo ngaihtuah lawk hrep tawh sawi ang par par hian a ti ta a. Ka dang titih. 

"ZCP hotu a nih hmain ka pa hi eng nge a nih? ZCP hotu a nih thin vang em ni? Vauna kan tawh?" ka ti leh ta mawlh mawlh a. 

A thaw hawk a, ngun deuha min melhin, "I pa hi a hausa miau a, a sum an duh vang a niang chu..a bak engmah a awm lo. A sumdawnna lah sawrkar phal loh a awm si lo" a ti chuai raih a. Thil hlui tak ngaihtuah hmelte pawh a pu deuh e a. Ka ngaihbel a niang. 

Chaw chhun atan tia chow mein ka siam laiin farm house lamah silai a rawn puak thuai mai le! Rang lutukin kan tlan thla nghal. Ka nau Sangpuia chu vawk in bulah a lo let hlawm reng mai a, a malpuiah kah a ni. Thisen a chhuak nasa hle, ka nu chuan ka pa a be vat. Chiái ber tur si kha ka rin ang he huin a chiái mang tlat lo. Remruata nen Sangpuia chu kan kuah chho a, Keiman motor ka khalh. Hmanhmawh takin Damdawiin kan pan ta a. Mahse, kawng laklawhah ka pa call kan dawng, "Kalpui suh u. Doctor ten silaia kah tih an hre dawn asin. In lama enkawltu tur doctor ka rawn hruai haw ang" a rawn ti ta tlat. Ka pa thu chu hnial ngam hek lo i, kan let leh ta a, Sangpuia chu a ner ve sak sak mai, thisen chhuak chu kan tawnkhalh tawp ringawt. Ka nu chuan a hrufai bawk a, nachhawkna a hmawm bawk. Nat chu a na viau ang le. Thil thlen dan ka zawh chuan, "In rawn hmuh ang kha a ni mai. Engmah hriat ka nei lo, vawk ho ka buaipui laiin a rawn kap tawp mai a ni" a ti. A malpuia an rawn kah danah thah an tum lo chu a nih hmel, mahse, ka nau chu reitak kein a kal thei lo thung ang. Ka pate pawh an rawn thleng rang viau mai. A doctor lo hruai chuan a buaipui nghal vat vat a, silaimu pawh a lak chhuahsak e. Ka pa chuan silai mu chu a bih vang vang a. A hnuah phei chuan a la bo ta daih a. Doctor hawn hnu chuan ka insum thei ta lo. 

" pa, Eng nge kan dinhmun hi sawi chiang teh u. Engvangin hetia enthlak kan nih?" ka ti ta a. Ka nu nen an inmelh ralh. 

"Sum vang chauh a ni" ka pa chuan a ti sup. 

"Sum vang nise Remruata kha an kidnapp ang chu, tunah Sangpuia an rawn kap leh a. Tute nge an nih? Ti nge police kan hrilh loh?" ka ti leh ta khak khak a. 

"Police te hriat ve loh tur thil tam tak a awm vang a ni ti mai ang aw. Kan duhtawk thei em?" chutianga ka pa a tawng tawh chuan tuman kan chhang let ngam tawh ngai lo. Lungawi lo zetin ka pindanah ka lut a. Thup hi chu an nei a ni. Ka pa hian sawrkar pawi a khawih lo tih erawh ka chiang, a nih chuan a hmaa a lo hmeh mih tawhte ho khan an rawn beilet tihna em ni ang? 

Zan laiah Sangpuia'n min lo call harh a, ani a na a lo chhuak leh chu niin, Nachhawknain ka jection ta a. A bulah ka thu ve nghal. 

" U, tlaia i zawhna kha kei pawn a ruka ka lo ngaihtuah thin a nia sin. Ka nu leh pate hian eng emaw thup hi chu an nei a ni" a ti tham chhalh a. A thisen chhuah nasat vang a niang a dâng nghal bai mai. 

"Nia, mahse, hun an tih hunah min la hrilh ve mai turah ngai ang. Chuan, Naomi nen chuan in tawp chiang ta mi?" tiin a rilru lakpen ka tum a. 

"Aw, Thla tharah Miss Kimi'n pasal a nei dawn sia, Naomi chuan a tihsual pawizia a hre ve ang chu" a ti mai a. 

"Nang pawh thu i duh lu deuh a ni. Hriatthiam ve tur che alawm, hmeichhia chu kan thikthu a chhia a" ka tih mek laiin, "Aih, Naomi chu kan ni rei a, ka type a ni lo telh telh. Ka thian mipa a melh dante, mi dang amah aia dinhmun hniam a dawnsawn dante hian ka mit an tlung zo tawh lo. Star deuh ka nei alawm. Mak i ti viau ang" a ti ta a. 

"Tu maw? Ka hre ve mi?" ka lo ti vat. A nui suk a, "Nunui mawle, a nun tlawm leh ze zawi raihte hian min hîp rukna a rei tawh alawm" a ti ta mai a. Mak ka ti hle. 

"Be ta che" ka tih chuan,"Kan inbe reng thin alawm. Mahse, amah hi a insit lutuk a, min ngaizawng ngam lo. Nangmah hian lo la sawipui deuh teh" a ti a. 

"Lutuk, naktuk inkhawm banah lengah ka lo sawm ang. " ka ti hluai a, ka phur hle. Tin, ka nau chu ka ngaisang ru viau bawk. Zep nák emaw mi hausa fapa a ni, amahin farm a nei bawk a. Sum chu kan unauah pawh a ngah ber maithei. Chuti chunga hmeichhia a thlir dan chuan ka lung a tiawi. Mite angin sual ve duh nise, a thei ve, hmeichhe chhe lo tak takte pawn an hnar hauhin ka ring lo. Mahse, Nunui a duh chu ka ngaisang, a dik alawm, Nunui chu an rethei a, a dinhmun a hrechiang bawk a, ngainatawm tak siin a zuamawm ngai lo va, tupawh hlim tak leh inngaitlawm takin a be thin. A bula awm pawh a hahdamthlak vawng vawng zel. Kan monu atan ka iai lo nasa. Dinhmun hi chu engahmah ka ngai lo. 

Ka muhil hleithei lo chu ka let sek a. Ka phone te chu ka'n hmet eng leh ringawt a. Chat chu a tlar dul, ka seen chak loh te vek an ni. Roger erawh ka seen hram.

"Mala chu ka sawipui asin" tih a nia. Ka ner sak, ani mi sawipui a ngai lo. 

"A tul ber lo aw. Chuan, nang pawh U Loicy hian a duh chein ka hria" ka va ti chawt. 

"Ka 1st choice chu i nia, mahse, mi dangah pawh ka thianthaber i lo duh sia, Hmeichhe dang ka melh tan dawn" a rawn ti ve mai a. Lehlamah kan inbiak lai khan chutia inngaizawng ang chuan kan inbe ngai lem lo, mahse, inbiak reng chuan inngainatte feelings neihte a lo awl thin a. Chutiang moodah chuan kan awm ve hman zuai. Mahse, Roger te ang chu an fin bakah an zau a, a ngaihthiam loh ka ring hran lo. Khatia sawi bawl mai kha ka duhdan a ni bawk a. 

Asanga pawn a rawn bei thlum leh viau, "I hmangaih hi chu ni thei ila, ka hlim lutuk hian phak lo chungin arsi lak ka tum ngei ang" tih vel a ni. Tiang tawngkam hi ka tenzawng tak a ni roh a! Tawng chhawrthlapui ka ti mai. Ka ngaina hlawl lo. 

Midang ho chu ka seen peih ta rih lo, Movie ka en ta daih a. Ka entui leh sia, dar 2 ka thleng! Ka nuin hria se a sa leh teh ang chu. A tuk sunday a ni tih ka hriat vang a ni ve pakhat a. 

Ka nuin Sangpuia a lo awmpui a, mi dang zawng kan inkhawm. Inkhawm banah ka sawi lawk tawh angin Nunui chu ka bekbawr sur sur a. A lai viau mai. Kan insawm chhuak thei hram e. Inthlak phawt a duh avangin an inah kan peng a. An in chu a zau lo va, a chep mah mah. Mahse, engkim chu a dahna hmun turah a awm thlap vek, a fai bawk si. He nula hi a tha dawn e. A nu pawn min lo be ve siam siam a, an ngainatawm nufa a nia. A inthlak zawhah kan in lam kan pan ta a. Nunui chu ka nuin a lo chiauau vat. Ka nu pawh hi tiang lamah chuan fel thei tak a ni. Ka va inthlak ve zuai a, Nunui chu melh zauhin, "Hawh, va hmu ve la, Nu, thingpui chu ka rawn lum ang" tiin Sangpuia pindan kawngka chu ka hawng a. Sangpuia khum bula lo thu run ka va hmuh chuan, ka thinphu a rang leh det, Ngati ziah nge mawni le?! Malsawmpeka chu khunkhan zetin a lo thu ngawi run tlat a tin ni.