Malsawmpeka 2

MALSAWMPEKA..(2)

Ziaktu: Toni Rálte

Fresher Social kan neih ni chuan, Kha sam sennu kha kan senior a ni tih ka hre chiah. Mi hi ka chík lem lo va, ka mi duh leh ka zir chian duhte tih loh chu. Ka. Department pawh kan batch ringawt pawh ka hre kim lo a nia. Bena leh Rpa ka hre hlur a, E taka! Msi pawh kan inkawm ve chho tan. Thian dang a lo nei bik lo nge ni, kan bula chettlat chu a hreh bik lem lo. Fresher social pawh kan hmang nuam viau mai. Kei tih loh chu an hlim mahna le. Kei erawh lunch kan ei zawh atang khan ka dik ta meuh lo. A chhan pawh Malsawmpeka a rawn lan ve vang a ni. A rawn lang chu a lawmawm viau laiin samseni nen an awmdun tlat si a! Mit an tikham. Msi chuan a rukin, "Kan Health Minister fanu Apuii a nih saw, Mala hi a duhna a rei tawh bawk a, a kherh thlu thei ta a ni maithei" a ti sar sar a. Ka na zawk zawk thei. Apuii chu kei aiin a duhawmin a hmeltha zawk miau a! Mipa zawng zawng tihtheih deuhthawte mit fukna a ni. Amah lah chu kei chuan ka ei lo viau nain, mi induh leh inla tak awmin a awm bawk si lo. A thiante pawh a hausakpui an nih vak hmel loh. Mala chu a nek salh salh reng a, an nui dun deuh reng bawk. Chutia ka lo hual ruk reuh reuhin hmeichhe dang a hawi tlat tak siah chuan chulai hmun chu nuam ka ti ta lo va. Ka hne ta riau mai. Bena bulah ka haw tur thu ka sawi zauh a, kan tawng ri hre phaka thu Mala chuan a bula thute bulah, "Programme-eng emawa awm tluan peih lo ho hi chu mi teirei peih tak an ni lo tlangpui" a ti sup a. Min va run tak. Vei tak chuan aw. 

Ka ding hliai a, Msi leh Bena te bulah chuan,'Tihtur pawimawh lutuk ka nei sia, ka haw phawt ang. Nih u" tiin ka buk khum nghat a. Mala nena chhungrila kan indo dan chu an hrethiam kher lo vang. MZU chu ka chhuahsan ta vang vang a. Ka beidawng turah in lo ngai ang e, ka tan chona a ni. Apuii lak ata hi ka ru bo dawn chiang e. Malsawmpek hi ka bialpa ka nihtir loh chuan ka hming hi Thansangzuali a ni lo vang. Ka nuin min lo call teh sek a, mood chhe zetin, "Aw" ka ti hlar a. 

"Rawn hma deuh rawh aw. Amanda te inah chaw kan ei chhuak dawn" a rawn ti a. Mood chhiat nak alaiin aw. 

"Chuan" ka ti nghat. 

"A tel ve dawn" a rawn ti sap a. Tu nge tih chu sawi kher a ngai lo. 

Ka pa ka be nghal, "Pa, zanina ka thawmhnaw hak tur leina i lo thun a ngai' ka ti nghal táwng a. 

Ka sawi hmaih loh tur chu kan unau ac theuha sum awm hi kan khawih che ngai lo, ka pa hian thla tin inzat chiahin kan ac-ah pawisa a thun thin a. Mahse, thil danga hman a remti lo, kan credit card pawh min pek chhuah hun a nei thin. Chutin kan hmang ngawt thei ngai lo. Chu chu kan chhungkaw kalphung a ni. A chhan chu kan hun lo la awm zel tur atana rem min ruatsak vang a ni. Tunah hian in pakhat theuh pek kan ni tawh a, kan chantawkah kan lungawi hlawm viau. A upa ber hi ka duhám ber a, mahse, ka pa ka pallui ngai lo. 

" I tan a va pawimawh awm ve" a rawn ti ve thlup a. Ka nuin muthmunah a lo hrilh thlip thlep tawh tih ka hai lo. 

"Tun dinhmunah chuan a pawimawh ber" ka ti ve hmiah. 

"I nu nen in lo en dawn nia" a ti a. A dah nghal. Ka nu duhdanin ni maw ka inchei leh dawn. Huizz..taksa lang tlem thei ang ber kha a ni a thlan leh dawn. Kei erawh chuan a over mah mah an tih tur ang chi zel ka thlang thin si. Kan chaw eikhawm chhan chu Pa Sama piancham a lo nih vang a lo nia! Chuvanga Mala pawh rawn ei ve tur a nih chu..ka nu leh ka naute nen Amanda te in chu kan pan ta vang vang a. AManda hi a hma chuan Nu Amanda tiin ka ko thin, mahse, rem teuh lova ka hriat avang leh amah pawhin a duhdan a nih vang zawkin Amanda tiin ka ko ve ta mai. Kan va thlen chuan an chhungkuatê chuan an lo thu thap tawh a. Hmeichhe dang ka hmu lo va, ka lawm. Apuii kha a rawn hruai ka lo hlau hman tawp a. 

Cake zaina hun kan hmang phawt a. Mala chu min hria angin a awm duh thak lo. A ho em mai. Dar 7-ah zanriah chu kan ei ta a, ka ngainat em em sea food a lo tel ve bawk nen, Nula chawheh nih ka zak leh ta lo. Ka puar ngei mai. Ka pa chuan Mala bulah, "Ph.d te chu i zir hranpa leh kher a. I nu hna hi chhunzawm la ka lo tih nen, in nufa thluak hmangin hnehna in chang zel thei dawn asin" a ti a. 

"Nia, chhunzawm loh theih loh hunte pawh a la maithei asin. " Mala pawh chuan a lo ti ve mai a. 

Pa Sama chuan, "Zaninah hian thu pawimawh tak mai, kan chhungkaw hnih thuruk ti mai ang..chu chu sawina hun kan hmang dawn a. Ephraime nen kan inbia a, ani pawhin hun a ti ve ta bawk a. Sangzual, Mala ,ngun takin lo ngaithla r'u aw. In pian hma atanga kan chhungkaw hnihte thu vuakthluk a ni a. Kum 27 in tlin hunah kan chhungkaw hnihte inremna leh inthlah chhawn zelna atan in innei dawn a ni. Tun atanga thla khatna ni 13 khi in birthday a ni a. Inhualna kan nei nghal bawk ang. Keini nupa leh Ephraime te nupa inremna thu vuakthluk a ni a. Min hnial loh hram kan beisei" a ti ta dap dap a. Ka thu hriat avang chuan ka thaw a chham lo chauh. Kei ang bawkin Malsawmpeka chu a thawng ve tih ka hre thei. A meng thim raih a, a lawm lo tih a lang reng mai. Ni e, mi hausa te hian tiang hian an fate an inneihtir thin a, an thlah kalzelah pawh hetiang remruatna dangdai tak hi an lo nei fo tawh thin tih ka hria. Mahse, keini pahnih ber kher! Tette atanga inkawm duna, thanglian dun ni ila chuan ka la hrethiam deuh.

Mala chu a ding hluai a. 

"Ka pawm ve lo' a ti tham tuak a. Amanda mitmeng tak ngák leh ka pa mitmeng thim raih chu ka lo melh tawn sek thung. 

" Engvangin?" Amanda aw chu a fiak thak mai. Mala chuan tissue paper-a a hmui hrufaiin, "Ka bialnu a ni lo tlat" a ti hul hak a. Pa Sama chuan min rawn melhin,"Sangzual, nangin i pawm em?" a ti dam thlap a. 

Ka tawng hma hmain Malsawmpeka chuan,"A pawm ang. Min ngaizawngsa alawm" a lo ti hmiah. A tihdan teh hlawl chu ka lawm lo. 

"Kan pahnih duhthlanna tel lo chuan pawm lo" ka ti ve hmak a. 

"Ka type a ni lo a ni, Ka pa..min lo hrethiam teh u" tih leh Mala chuan chhuah a rual. Kan hrilhhai tlangin kei phei chu ka chapona neksàwra a awm avang chuan ka zak hluah hluah. Ka chhungte leh Amanda te nupa chu ka zah thar leh riau a, nangni pawh ni ula in lai ve hú tho ang. Ka sen tàn tánin ka ring a ni. Ka ding ve hluai a, "Ka haw dawn" ka ti ro hak a. Chelh zui hman lohin ka chhuak ve nghal. 

Zana ka chhungte rawn haw pawh chuan kha thil chungchang kha engmah an sawi lem lo. Ka zak tih an hrethiam a ni mahna. Mahse, ka mut dawnin Amandain min lo call a. 

"Sangzual, i beidawng viau em ni? " a rawn ti! Ka rilru engkim a hre tlang vek tih a hriat reng. 

"Beidawng turin min duh em?" ka ti thung a. 

"Duh tehnang aw. I beidawnsan ka hlauh vangin alawm ka lo biak che. Ka fapa rilru hi kahpathir a ni bik hleinem. Hneh hun i la nei em em ang. " a rawn ti duah a. Lawmawm viau mah se; a zahthlak tel. Ka tlawm ngawih ngawih hian ka inhria. Amah Mala pawh ka ngei phah. Min duh lohna a tilang nghal chiam chiam kha. Tin, ka ngaihtuah leh bawk chu ti nge kan inneih kher a ngaih le? Ka pa te hian engvangin nge he thutlukna hi an siam ang. Chhungkaw inthianthatna vang ringawt chu a nih ka ring chiah lo. 

Class kal pawh ka phur loh phah vek. Kha Samsenu nena an inlaichinna kha Msi la zawhchian a ngai a ni. An inngeih hmel èm mai. Bena a rawn kal lo va, a khawharthlak angreng. Lunch kan ei laiin Msi bulah chuan ka zawt ta ngei a. 

"Ka hrethiam lo. Mala hi chu single ang hian a awm tho sia. Apuii hi chuan a kherh ngat ngat thin tih chu ka hria. A zak vak lo ve bawk a" a ti mai a. Apuii chu a ei tehchiam bik lo niin ka hria. Ka hlauh ang ngeiin Apuii leh Mala te chu an rawn chawl leh tawh. A care hmel ropui sia, mit an tikham. An chhiat loh dun êm vang nge mi lah chuan an en duh nasa sia. Kan eina man kan pe tur chu Apuii ke khamah ka inpal hlauh mai. A rawn dah sir ve deuh bawk nen, a Dhoi ei lai chu a kekawrah a tihbuak phah ta a. "Fimkhur ta che" a ti tuar a. 

"I ke kha a dahna turah dah zawk ta che" ka ti let ve salh. 

"Ka ke a nia ka thu thu" tiin ngeiawm zet hian a nui sáwng a. 

"Kei pawh ka ke a nia, ka duh duh ka pal ang" ka ti ve leh. Kan inhauh dan chu naupangchhia viau mah se, kan inkara meipui alh hi an hrethiam lo a ni. Malswmpeka chuan zawi sup hian,"Che thing thei" a lo ti khanglang a. Na theihtawpa amah melhin, "Mipa ve si..hmeichhe buainaah te lo inrawlh" ka ti ta zêk a. Rpa ten min lo kai bawk nen, ka kalsan ta a. Ka sa leh viau hman. Ka thinawrh lutuk hi chu a tha lo ve reng. Chawhnu lam chu ka mood a chhe tluan thak. Ka haw tur pawh tumah ka be lo. Ka tlan haw nal nal, ka tih fó angin min hmu thei an awm lo ta maw tih atangin ka phun nghal hlak hlak a. Ka tih fó dan a nia. 

"Hmela,, samsenu thlavang ka hauh e te i ti maw? Lo ngawi tak rawh. Thansangzuali tihtheih hi i la hmu mawlh ang. Ka hmaah i la thingthi ang" tihte chu ka phun duh dan a ni. Min lo hre phatu awm se an nuih ka tihzat viau loh pawn mak min ti viau ang. Ka thinrim hian ka tlan chak ngei ngei bawk, hei chu mi tihdan vek tho a ni. In pawh ka thleng hma viau. Ka túm hmel a hmuh vangin,"Eng nge thleng a?" ka nuin a lo ti nghal. 

"Engpawh" tiin pindanah ka luhsan. Ka zah loh vang a ni lo, ka chhang chák rih lo a ni mai. Ka inbual zawh chuan ka zia ta deuh e. 

Rosangpuia a rawn rak lut chul a, "Nu, Thingtumi khuan nau a nei dawn hnaiin ka hria. Tui lo lum ta che" tiin. Ka ner sak. An vawk hi hming hran hran an han phuah ngei ah. Ka nu pawh a phi leh ruai tawh. Ka pa a lo haw hnai tawh si, ka pa lo hawn laia lo awm loh a hreh bawk si khan, "Sangzual, i nau zu pui rawh. " a ti láwng láwng a. Ka va peih lo tak. An buai ve bawk sia, ka hnial duh ta bik lo. Sangpuia chuan a vawkpui rai puar úl dul chu a lo zút mek a. Lehlamah an bual fai peih a, vawk rimchia leh tawp an ni lo hlauh. 

"Eng nge ka lo tih dawn?" ka ti hú a. Min rawn melh zawk, "Tuilum khan lo dep rawh" a ti vut a. Ka dep ve mai. Vawk lah chu ná a ti ve a niang, a nguk hruih hruih a. Vawk hi an khawngaihthlak ve reng, tawng ve thei se sawi tur an ngah ngawtin ka ring. An in lah hi a ping bawk si lo, thli leh ruah a lo thawhte hian a hrehawm ve thei ngawt ang. Ka thil ngaihtuah mai mai chu'h. 

Ka pa a lo haw ta nge ka nu nen an rawn chhuk ve a. Vawkpui pawh chuan note panga lai a nei ta. An him dam a, a lawmawm. Sangpuia leh ka nute chuan a note chu an buaipui chhunzawm ta a. Kei erawh ka chho leh daih. Ka ril a tam. An rei nek sia a. 

Lehkha ka zir zawha ha ka nawh laiin msg a rawn thleng a. Ka la seen duh lo. Msg nazawng hi milar ho ang mai hian ka seen vak lo. Mahse, msg tone khan ka beng a tivir, Malsawmpeka msg tone atana ka download liau liau a ni tlat. Ka mut fel te te hnuah ka chhiar ta a. Ka va ner nasa si êm.

"Nangmah letling hmeichhia hi ka duhzawng an nia. I mizia kha i sim thei dawn lote a nih chuan kei chu i tan mikhual ka ni kumkhua ang" tih thu a ni. Ka mizia hi harsa taka ka neih a nih hi, ve a. 

"Tu emaw vangte, eng emaw vangtea ka mizia leh nunphung thlak hi ka tum ngai lo va. Ka tum ngai lo kumkhua bawk ang" tiin ka reply. 

"Aw le" tih chiahin a rawn reply. Lehlamah amah hi ka mipa duhzawng tak a lo nih piahlamah a chapona te chu tihtlawmsaka min duh ngawih ngawih tura siam ka chàk ve tho. Mahse,ka mizia hi ka duh bawk si a ni. Amah vanga ka nih loh ang puia lan ai chuan duh leh min lo hnawl mai mai ang hmiang. Ka pindan kawngka an rawn kik a, mut tawh hnuah hi chuan kan intlawh pawh zen zen lo. A pawimawh a ni maithei. Ka va hawn chuan ka pa a lo nia. A rawn lut a, chairah a thu a, kei khumah. 

" Ka naute, Malsawmpeka nen chuan eng nge in chanchin zel?" a ti ta a. Chhuna min tihthinurzia atanga tanin zanina a msg thlengin ka sawi fai ta kelh a. 

A bu nghut nghut a. 

"I thutlukna chu ka pawmpui a che. Nangmah hi nangmah ni reng rawh. I pa fanu i nih hi..Tin, tuna i mizia nen ngei hian Mala chu i hneh ang. Hmeichhe chakzia ka hria alawm. I hrethiam em?" a ti a. 

"Pa, kan inneih ngei ngei hi a ngai em ni? Sumdawnna kawngah kan inzawm bawk si lo, thil dang a awm zawk em ni?" ka ti a. 

Ka hre chak êm a ni. 

"Chutiang lam a awm lo. Amanda bula ka intiam dan a nia. Ka nunna min chhanchhuahsak a, a nunna ka chhanchhuahsak bawk. Chuvangin intiamkamna kan nei ta mai a ni" a ti ta a. Ka pain dawt min hrilh ka la hre ngai lo va, ka lo awih hmiah mai. Kan inmangtha hnuah ka pa chuan min chhuahsan ta a. Ka muhil lawk thei lo. Ka pa min fuihna ang khan ka nihna ang ang hian Mala chu ka hneh ngei tur a ni. Leilung dan kalha ka che a nih ngawt loh chuan ka pasal hual ni mai tur lakah hian ka duhtawkin ka che mai tur a ni. 

Saturday a ni bawk a. Ka workout lo. Sunday nen ka chawl thin. Nunui'n chawhmeh a rawn zuar leh vang vang a, a hawna tur a hla si a, ka va thlah ta vang vang a. Phutlet ka nei hran lo. An inah pawh vawi hnih chiah ka la lut. An khawsak a harsa ve êm a, a tan damkhawchhuah pawh a harsa ve ngawtin ka ring. Nunui te in peng kan thlen chuan a chhuk a, lawmthu min hrilh leh zauh. Kei erawh chuan kan lam pana kea rawn phei mek Mala ka va melh daih thung. Ka beisei loh lutukin Nunui leh Mala chu an inbia mawle! Innel tak lehnghalin. Ka chhuk ve mai dawn mawni ka ti hman a, mahse, ka lam an rawn pan avangin ka thulh leh. Nunui chu a rawn dak a, Mala erawh a kekawr ipte zen chungin a ding vung thung. 

"Sangzual, hei hi U Mala a nih hi..ka u boral ta U Sawma thianpa kha a nia. U Mal, hei hi min khawngaih thin em emtu Sangzuali a nih hi, ka thian a ni bawk" a ti siam siam a. A kut a rawn rawlh a, ka lo vuan ve mai. Nunui hriatthiam theih si loh hian ngeiawm zetin a nui a. 

"Thian i va nei changkang ve" a ti nghut a. 

"Nia, kei angte min kawm duh a, a fel tak tak. Chuan, u mal, thingpui lo in la" Nunui chuan nui var var chungin a ti leh a. Nunui chu ka thík lem lo, ka va ngaihnep vang ni loin, Unau anga an inen nia ka hriat vangin. 

"Nunu, ka kal ang aw. Tihtur ka la nei sia" ka ti a. Ka tlan zui nghal. Ka pa car ka ken vangin ka tlan chak ngam meuh lo. Mahse, Mala hmel ngeiawm zet avang khan ka insawh leh hle tho. A la khirh dawn chauh a nih hmel sia. Vawiin chu In check up kan neih ni a nia. Khawi hmun dangah mah kan peng thei lo. Thla khatah vawikhat kan incheckup ziah thin. Ka pa hian a ngaipawimawh êm a tin ni. 

Damdawiin kan thlen chuan nghah a ngai lem lo. Ka pa hian a hma niin a lo be lawk tawh thin bawk a. Kei chu ka tha, Sangpuia pawh. Remruata erawh a ha pui totur intham chu a rawn to chhuak thei mai si lo va, a hahni an thaisak. Ka nu a tha a, ka pa erawh tun hnaiah a migrane a chhuak nasa a, damdawi an inchawh leh tak kha. Ka restaurant ngainat ber Zo Choka-ah Lunch chu kan ei a. He dawr neitu Rosangpuia hi ka pa thian a ni. An dawr hi a thang nasa bawk a, Zo choka ringawt pawh veng 6-ah hun a ni tawh. A main ber hi nu ber Nu Dingi'n a vil a. Hotel hi District tinah an nei bawk. Hausa tak an ni. An fanu U Loicy nen pawh kan inngainain min duat thei viau. A nau chiah nen hian kan inrual chiah a, Thawkkhat lai khan min ngaizawng ve deuh. Mahse, thian nih ka thlang ta zawk a nih kha. 

Kan ei mawlh mawlh laiin Pa Rosangpuia thianpa Pa Zirsanga fapa Roger leh a thiante an rawn lut a. Roger hi ka star thin, Malsawmpeka ka star hma kha chuan. Mahse, Mala ka tawn atangin ka mipa biakte leh ka lo notice ruk deuhte ka thlah fai vek. He pa thiltihtheihzia hi chu a. Roger pawn min rawn hmu ve a, amah chiah hi fa an nei a, a khawsa nuam viau. A chang chuan Pa Zirsanga leh Nu Kimi fa hi a nih duh loh hmel ka ti thin. Inanna reng reng an nei lo miau a. Roger chu vai hmel pu lek lek, Man tak a ni. 

"I va reh ve, tunlai" a rawn ti nghal a. 

"Nia, class kan kal tawh a" ka ti ringawt. 

"Taka! Karleh Friday kha ka birthday a nih kha aw. Hetah lawm kan tia. In rawn tel loh vaih" a ti leh zung zung a. 

"Yes boss" ka lo ti chhak a. A nui hmel hi a mawi thin. U Loicy pawh hian a chang chuan a star thin niin ka hria, unau ang mai an ni bawk sia. A sawi ngam lo mai mai niin ka hria. 

Hawn veleh Sangpuia leh ka nute farmah an chhuk nghal. Kei pawn in ka tifai a. Remruata erawh a mu. Ka intifel zo ka thu hahdam chiah chu call ka dawng a. Number ringawt a ni. 

"Hello" ka tih rual rualin, "Nang hian Malsawmpeka i lo ngaizawng a maw? A nupui hual nih i lo tum vel a maw?" a rawn ti nghal chiam chiam mai. 

Ka hamhaih ve deuh. 

"Tu nge?" ka ti táwng a. 

"Keimah Malsawmpeka bialnu mawle. I msg te engkim ka hmu vek aw. " a rawn ti leh hlar a. 

Ka nui hak.

"chuan" ka ti tawi tak a. 

"Ka bialpa hi lo be tawh suh. Ka chanpual a nih hi" a rawn ti leh. 

"I rui mi?" ka lo ti thung. Thinrim zet hian,"Hmeli, nang ang ka ni lo aw. Malsawmpeka hi ka nei dawn..in nu leh pate thutlukna chu engpawh ni rawh se. Ka ta a ni dawn tho tho" a rui tak tak mawni le. Mahse, engtin nge inhualna chungchang a hriat theih? Mala a rinhlelhawm ta hle mai. Engtin nge chhungkaw hnihte thutlukna chu pawnlam mi a hrilh theih? 

"I duh tawkin hauh rawh. Ka chak zawk tho ang. Malsawmpeka nupui tur ka nih hi. Hrereng ang che" ka ti sak a. Ka dah nghal. Mipa vanga ka hmeichhiatpui hauh vel hi ka tih ngai loh a ni. Mahse,a rawn ngam bawrh bawrh êm a. Ka diau duh ta bik lo a nih kha. Apuii a ni ngeiin ka ring, a number chu ka save a, dp a dah lo. Hriat ngaihna a awm lo, a display name-ah lah milem a hmang bawk si. Ka la hrechhuak tho ang. 

Zanriah kan ei laiin Sangpuia chuan Naòmi nen an inthen thu a sawi ta a. Ka lo hriat thawi tawh avangin mak ka ti hran lo. Ka nute erawh an pháwk viau thung. Naòmi chu an hre thain kan inah pawh chaw te hial a rawn ei ve tawh avangin an lo ngaina ve hman a ni maithei. Ka pain a chhan a zawh chuan, "Miss Kimi nen min ringhlel a, Miss Kimi te a lo be vel a. A zia kha over ka ti ta a nih kha" a ti ta a. Miss Kimi chu ka la hmu chiah lo naa, a la upa vak lo a ni maithei. Tawng mawh bera kan neih Remruata chuan, "Miss Kimi chu nihpui daih la" a lo ti ve sup a. Ka nuin a melh râng ngang mai. Ka pa erawh a khi suk duh chauh. Kei erawh engvak ka sawi peih lo, Ka mood a dik lehpek lo nen. Mut pawh ka mu hma khawp mai. Mahse, ka muthilh hmain Mala chu biak ve reng reng ka duh ta a. 

"I bialnu inti mawl zet kha lo hrilh la, min lo tibuai tawh suh se. " ka va ti a. A seen lawk duh lo zui! A tawpa tawpah a seen ve ta hram. 

"Tu ber?" a rawn ti nia! Eheu! Kan Malsawmpeka hian bialnu a va ngah awm em em. 

"Ka hre phiangsen lo. Khati bawrh bawrha a rawn tih danah hmeichhe fing tak chu a ni lo vang" ka ti ta hmiah a. 

"Ka bialnu anga inchhal hi an awm nual alawm. Ka lo ngaihven ang e" a rawn ti tha ve mai a. Ka la thinrim chak si, a rem vak tawh si lo. Ka insawh tau nghawng nghawng mai. Min ngenna angin chu nu number chu ka va pe a. A reh vang vang hnuah, "Dinthar nula a nih hi..engtin nge i number a neih le?" a rawn ti ta mai a. 

"I pe a ni mai lawm" ka va ti hmuk. 

"Ka pe lo. " a rawn ti teh tawp. 

"Va hau rawh. Mawl si" ka ti leh hram.

"A khawngaihthlak zawk alawm. Nangmah ang tho va min atchilhtu a nia" a rawn ti khanglang a. Ka ter at mai. Mahse, ka inbengdai leh hram a. 

"Hre rawh. Thla tharah ka pasal hual i ni dawn. Thansangzuali tihtheih hi i hre dawn. Muttui" ka va ti a. A double tick rualin ka data ka off nghal. Min chhan dan tur ngeiawm zet ngaihtuahin ka nui rah rah mai. 

Chawlhni hi chuan thleng ka sil hman lo fó! Lehlamah kan awmna a lo hlat ve deuh avang hian hmanhmawh a lo ngai ve bawk a. Kohhran thlahthlam erawh ka nu leh paten an remti lo bur. Sunday zing leh zanah hi chuan inkhawm ngei ngei a ngai. Ka insiam laiin ka pain horn a pe leh sek tawh. Ninawm lutuk. Sam huh hniangin ka tlan chhuak a. Ka nu hian inchei vul chúk a remti ngai lo bawk a, kan kohhranah chuan a simple pawl ka ni ziah. 

Zan inkhawm tura kan chhuak chu kan kawtkai maiah Amanda a rawn ding ve chhak mai a. Ka pa nen an han inbe leh rih, ka pa chuan, "Eng emaw thilah inbiak lawk kan ngai sia. Zanin chu inkhawm ka thulh rih ang e" tiin in chhung an pan dun a. Ka nu ka en leh vat, hlauthawng hmel kha a pu leh tawh. A mak thei e. Ka naute erawh chuan an hrethiam leh chuangin ka ring lo. Inkhawm chhung zawng Malsawmpeka ringawt ka'n ngaihtuah chu! A va zahthlak tak. Thusawitu melh kuau chung pawh hian suangtuahna chu thlawk hla vawn vawn thei tak a lo nia. A buaithlak. Ban veleh tawi khawmuang loin kan tlan haw nghal a. Ka nu phei chu a hmanhmawh hmel hlein ka hria. Remruata phone bih mual mual chuan, "Inthahna a thleng leh tawh. Mi pahnih lehnghal" a rawn ti hlawl mai. Ka nu hmai dâng sáwp sáwp chu haider harsa ka ti viau..

"Tu te?" ka ti vat a.

"Upa Lianchhinga, P&E department-a an director a nia, pakhat leh hi Sangvela, PWD-a thawk a ni bawk. An ruang hi mi pakhat thah a ni maithei, Pu Lianchhinga ruang atanga hla vak loah pu Sangvela ruang an hmu" Remruata chuan a ti chuar chuar a. 

"Mi tha tak an ni em?" ka nu zawhna tehdaih chu aw!

"Chu lam chu sawi a tam vak lo, e lawkin hei comment lamah chuan an hnaah an tuiin an mawhphurhna an hlen tha hle a. Eiruk thubuai an la nei ve lo bawk" a ti leh a. Ka nuin a áwm a dawm vang vang chu melh loh harsa ka ti. Ti nge tualthahna a thlen apiang hian a buai em em zel le?!

In kan thlen chuan ka pa leh Amanda an lo awm lo! Ka nuin ka pa chu a call nghal. A ring ral thak si. Keiman ka call ve leh a, a ring quit tho. 

"Tualthahna velah khan Amanda kha a va kalpui a niang" ka ti ta ringawt a. 

Malsawmpeka msg ka dawn chu ka seen nghal var. "Kha nula khan ka phone a lo hack khanglang alawm le" a rawn ti teh ngawt! Zingah khan a msg hmuh ngei ka tum naa, min rawn chhang ta miah lo kha a nia. 

"E" ka va ti ve ringawt. 

"Tunah chuan a tha tawh e" a rawn ti ve leh hram a. Insawifiah a tumna chu a lawmawm nge lawmawm loh pawh ka hrethiam lo e a. 

"A lawmawm e. Khatianga min rawn biak leh chuan ka kek duh mai ang" ka va ti a. Min rawn chhang tawh lo. 

Ka pa chu kan lo nghak thap a. Dar 10 velah a rawn haw ta a. Ka nuin a lo chiauau vat. 

"Tualthahna hmunhma vel kha ka va enpui ve lawk alawm le. Pu Chhinga leh Sangvela te chu an uiawm riau mai. An thih chhan hi eng nge niang aw" a ti vung vung a. 

Ka nu chuan tím lek lek hian, "He lamah hi chuan inrawlh ve vak lo la ka duh. Buaina tawh a hlauhawm" a lo ti a. Ka pa a khi suk, "Amanda hian phungbawmah min sawm ve mauh zel sia lawm le..bakah Kum 23 liamtaa jail tang ho an lo chhuah pheuh pheuh hnu hian inthahna leh insuamna hi a thleng duh riauin ka hria. Chhui chian chu a ngai deuh a ni" a ti leh a. Nia, ka paten ZCP vung taka an kalpui lai khan sawrkar mi leh sa tam tak, rinawm lo leh dik lo taka che thinte kha hnungkhirhin jail-ah an lo nawrliam tawh a. Tunah an rawn chhuak leh ta nual a. Ngaihbel tur ting chuan thil thleng a awm ve bawk a ni. 

Kei chu ka mu ta a. Ka mumang rapthlak tak avangin zing dar 2 bawr velah ka harh hlawl mai. Ka khur dar dar thei hial mai. Ka mumangah chuan ka pa leh Mala hi thi hnuang hian pindan pakhatah an lo mu dun a. Amanda hi rawn lutin ka pa nghawngah chuan syringe lian zet hi a vit lut ta pawk mai a, A fapa chu kai thoin Apuii te nen an pathumin pindan chu an lo chhuahsan a. Ka pa kaihthawh tuma ka auna lamah ka au chhuak a, ka harh phah ta a nih hi. Ka nu chu hrilh ila a phi leh sek tawh maithei a ni. Zing dar 4 bawr velah ka muhil leh thei chauh. Thawh pawh ka hai ta chiah a. Ka mitmeng atangin mut ka hmu tha lo tih an hrethiam nge min hau miah lo. Tukthuan ka ei sawk sawk a, class kal turin ka inkhalh thla leh ta vawn vawn a. 

Msi te nen lunch kan ei laiin, "Ms, Malsawmpeka hi ka bem dawn" ka'n ti tháwr mai a. A hrilhhai hmel angreng, mahse, nui chungin, "A chanchin i ngaihven danah i duh a nih ka ring rengah. Theihtawp ka lo chhuahpui ang che" a ti dam thlap a. Ka lungawi hle. Mahse, vawiin chu Mala hmel reng reng ka hmu lo. Ka zawn nasat nen. Apuii pawh ka hmu chuang lo. Tlaiah Msi chu an inah ngei ka thlah ta a, Mala in chu min kawhhmuh nghal zat. Pawnlama a inkalh loh danah a awm tih ka hre thei. Nge mawle..ka ti ta sa sa..

Door bell ka hmet ri tlang tlang a. Ui bauh ri niawm tak ka hre nghal. Reivakloah Mala ngei mai chuan a rawn hawng ta a. Ka hmel a hmuh chuan mak a ti ve deuhin ka hria. Ka nui sak a, amah chu kalpelin thutkhawmna pindanah ka lut nghal. Tumah mi dang an awm ve lo tih ka hriat avangin ka ngampa sawt mai. 

"Eng nge i lo tih dawn?" a aw chu a nelawm vak loh. 

"Ka lo leng dawn" ka ti nghat a. Ka thu thla nghal. Mitmeng thim raiha min melh chungin, "Ka inleng turte chu ka sawm thin" a ti sup a. Ka nui hak ringawt. 

"Chhuahna tur ka nei" a ti leh a. 

"Mipa chenna in si a va felfai reuh ve, i hmeichhe khawi thin ten an tihfaisak thin che mi?" hawi kual pahin ka lo ti daih thung. Elsen zet hian a nui hawk a. 

"Ka hmeichhe khawite zinga pakhat chu nih i chak ve em ni?" a ti nghut a. 

"Kei chu i nupui tur alawm ka nih. Mahse, i in hi chen dun nan ka duh lo, a te mah mah. Ka pa in min leisakah kan cheng ang" ka ti hmawk hmawk a. 

A hmel a rum úl tawh. Chhaih a nuam mek zawk sia. "Chhuak rawh" a ti thawt a. 

"Coffee ka ngaina lo, cold drinks i neih chuan ka lo duh ang e" ka lo ti sap a. Nui chungin ka melh ran bawk. 

"Hmeichhia ka hriat tawhah i la zak thei lo ber.." thaw hawk chungin a ti leh a. 

"Zahna hi a hnawksak chang a awm. Zaktheilo ni loin zak lo thei alawm ka nih" ka ti leh hram. Min melh run run a, phun sup chungin a pindanah a lut daih. Ka hawi kual a, Mala in chu a te fel át a. Luh chiah kha choka niin choka cabinet pawh a changkangin a felfai viau, Choka dawt chiahah sofa pali simple zet zet a inhung a. Center table a dah ve thlap. A carpet dup pawh a quality a tha viau ang. Thutkhawmna pindan dawt thlang lamah a pindan a luhna kha a awm a. Room chhak lam hi a mikhual room emaw a study room emaw a ni maithei. Painting manto tih hriat zet nen kan inhmachhawn a, a bul chiahah a nu leh pate nen an thlalak fiah zet a tar vá bawk. Chubak engmah cheimawina dang a awm lo. A bathlar thlanglamah chuan pangpar te pawh a khawi ve mahna. Pangpar..ka nuih a za, a inhmeh lo lutuk chu. A va tawm rei ta phian sia, min tihrilhai ve mai dawn alawm le. Ni e, ka zakthei lo tih hi ka hai reng reng lo. Ka mipa duhzawng tak hi engtikawng zawng pawha hneh ka tum dawn a ni mai. Sex erawh a tel lo thung ang.

Ka bag atangin ka notebook ka phawrh a, "Min lo dawnsawn danah ka lawm e. Lehpekah chuan coffee pawh ka in duh tawh ang aw. Love: I nupui hual" tih ziakin dawhkanah ka nem bei a. Thawm dim angreng takin ka chhuahsan ta a. A vawikhatna chu a harsat lutuk loh kha a, a ngen poh leh ka luhlul ve ting a ni mai. 

In lam ka pan ding nghal a. Ka thlen chuan ka pa leh ZCP mi leh sa thenkhat an lo inhmu khawm a lo nia! ZCP hi a tirah hel pawl anga din ni mah se; tihian an thawhhona avangin party ang thawthangin an kal tawh a ni. Tunah hian sawrkarna fawng vuantu an ni a, party dang tlem tlem chuan an pawlh ve bawk. Kei chuan politics tih vel hi ka ngaihven peih lo. Ka hne. 

Ka nuin min tirh angin thingpui ka lum sak a, Ka han pek lai chuan ka pa thian hnai tak, Pa Thangpuia hian, "Sangzuali pawh a hralh tham tawh a nih hi. Pasal neihtir tawh r'u" a lo ti a. Ka nui ringawt. Mizo society-a hmeichhia kan endan hi a danglam mawh khawp mai. Thenkhat lahin Women empowerment changchawiin mipa thenkhat tal awh an lo tum ve bawk nen. Hmanlai hunah kha chuan hmeichhiate hi ran ang lekin an hralh thin a, an duh loh zawng pawh nise an nu leh paten an tirlui mai thin. Hmeichhe dinhmun a rawn kàng ve tan a, kan man Rs. 420 a tlem ti pawl an awm a. Man neia inngai kan la awm hi a pawi! Kei chu man leh mual hi chu Mizo Customary law a nih anga hmang angin ka inngai. Bungrua anga hralha man neih ka duh lo hulhual. 

Mitthi pahnihte thattu kha chhui mek zel a ni a. Sunday ber kherah an thi bawk si. Pu Lianchhinga leh Pu Sangvela hi thil pawimawh taka inhmu tur an lo ni a niawm e. Chumi an va inhmuhna hmunah chuan thah an ni ta si. Anmahni leh anmahni an inthat a niang tih ngaihdan pawh a awm laiin, an ruang bula chemte let rengah an kutze thla a lan loh bakah kutkawr an bun lo va. Tin, insuamna a ni lo bawk, a chhan chu an sum pai leh an thil neihhlutte laksak an ni lo miau a. Awmhmunah ka phak ang tawkin ka lo chhui ve nasa mai a. Ka tuina ber chu a ni lo naa, Ka pa leh Amanda te tuipui thil a nih vang hian ka ngaihven lo thei bik lo a ni. Msi'n a lo call teh mial a, "IG-ah lut la, U Mala pic post saw va en teh" a rawn tih chuan tlemtêin ka thinphu a rang. Ka en ta vat a. Apuii nen zanriah ei chhuak tura an kal dunna , car chhunga an lak a lo nia. A captionah, "Ka nupui a la ni lovang tih tuin nge hria?" tih a hmang a nih chu! A va frank ta pawp pawp êm. Comment a off a, like erawh a hmu nual. Hmuh an nuam dun lahtak a. Ka beidawn nana ti a nih chuan a ring sual ang. Ka luhlulna a kaitho daih zawk. Zanriah erawh ka ei tui ta vak lo. Ka nu dawlrêp bai ka hawp vak a, ka puar ringawt. Chanchinthar kan ngaihthlak zawhah ka nu chuan ka pa bulah, "Hman ang khan Zoram hi a kal leh dawn niin ka hria" a ti sap a. Hman hun chu ka hre ve lo. 

"A ni mahna. " ka pain a ti nghut. 

"Tualthattute hi chhui chhuak vat se" Sangpuia'n a lo ti ve a. 

"Rin aia hmain an chhui chhuak thei maithei a ni. Pu Chhinga phone kha a thlang kawrah an chhar hlauh mai a. Ta tang khan chhui dan a awm ang. " ka pa chuan a ti a. Kan ngawi ta thap. 

Whatsapp status ka en thla diat diat a. Malsawmpeka chuan status a nei ngai lo naa, a lo nei ve. 

"Beidawnsan tur thil a awm ve" tih chauh hi. Min sawi chhan a ni mahna. A chang chuan ka chapona te hian bansan mai tur chuan min nawr ve thin. Mahse, amah hi a duhawmin ka mipa duhzawng tak a ni tlat si a. Ka ta liau liau nise ka duhna chuan min tlawmtir leh lo thei thin lo. Ka hui pap a, amah chiahin a hmuh theih turin, "Ka tlawm lo vang" tih thu hi ka status ve ta a. A seen ang nge maw..Min be ve rengtu U Loicy thianpa Asanga pawn min rawn text leh tawh. He pa nen hian kan inang viau, a beidawng duh lo va, kei lah Mala lakah ka beidawng duh bawk si lo. Asanga chu ka khawngaih letling. Kan duh ten min duh lo va, kan duh loh ten min duh lawi si! Induh suau suau thei ila a nuam zawk ang em le?! 

Vawiin chu class ka kal peih ta lo. Zingkar atangin ka lu a ná a, lu na leh pum ná hi ka tawrh theih loh ber a nia. Ka zuk kal peih ta lo law law. Damdawi ka ei a, ka mu leh daih. Bena te'n chhun chawlh laiin min lo video call a, Ka tel lova an khawharzia velte an sawi ve kha. A lawmawm thin e. Msi msg pawh ka dawng, "U Mala chu Apuii nen bawk an inzui leh tawh" tih a ni. Ninawm a. He Apuii hi ka thingthla thei ang em aw. Ka nu min zilh fo angin mi inkara inrawlha tlakzeh ka duh si lo, a tlawmthlak ka ti bawk. Ka nghak chawrh chawrh dawnte pawh a ang. Nge mi dang ka nei kual ve rih dawn ni. Dar 4 velah Gym roomah pheiin hah hnêpin ka va che a. Ka lu na pawh a bo tawh. Ka inbual zo ka inthlak laiin ka nu a rawn lut thut a. Manganna nasa tak nei hmel a pú, "Remruata a lo la haw lo" a ti teh ngawt a. Nia, tun ang hunah chuan ka pa tih loh chu kan kim thap tawh thin. 

"I be lo mi?" ka lo ti satliah a. 

"A switch off alawm" a aw a tial tan. 

"A thiante nen an leng kawi ve a ni lo maw?" ka lo ti leh a. 

"Chutiang mi a ni lo tih i hriat kha" a ti sep a. A mitmenga hlauhthawnna chambang avang chuan kei pawh ka awm a nuam ta vak lo. 

"Kan va zawng mai dawn em ni?" ka ti a. 

"I pa lo haw phawt rawh se" a ti hul hak a. Ka pa motor thawm pawh kan hre zui nghal e. Ka nu chuan chanchin a lo hrilh ta vat a. Ka pa erawh a dan pangngaitein a dam leh thlup thung. 

"I chiái hma thin. Dar 7 thleng nghak ila, a lo la haw loh chuan kan zawng dawn nia, an School i call tawh em?" a ti a.

"A nachang ka lo hre miah lo. Lawk aw..an class master hi ka'n bia ang e. " tih leh ka nu chuan a phone hmeh a rual a. Speaker a on bawk. 

Hmeichhe aw hian, "Hello" a rawn ti a. 

"Remruata nu ka nia, hei a lo la haw lo va, eng nge maw a awmzia le? In stayback pui em ni aw" ka nu chuan a ti khur dar dar a. 

Chu nu chuan,"A va mak awm ve aw. Ka hmuh lai ngeiin a rawn inkhalh haw kha..a lo haw daih tawh" a rawn ti a. Ka nu manganna a zual sauh. Ka pa mitmeng pawh a danglam tan. 

Dar 7 nghak ta lo chuan kan vai mai chuan ka nau zawng tur chuan kan chhuak ta a. Han zawn vakna tur erawh kan hre lo kher mai, thian pakhat a nei ve a. Johny a ni. Chu lah chuan a haw thu bak sawi tur a lo hre bik bawk si lo. Ka nu phei chu a tap pur tawh. Police station kan pan ta nge nge a. Ka pa chuan thil awmzia a han sawi a, darkar 24 a ral phawt a ngai si. Han intur vak chi pawh a ni lo. Ka nau chu khawi hmunah tak awm ang maw. Amanda pawh kan va hrilh hre ve a, case buaipui lai a nei rih sia, va tihbuai vak pawh a inthlahrunawm. Ka pain ka nu chu a hnem a, ka nu erawh fate ngaihtuah chi a ni bawk nen, a tap pur tawh. Keia tak pawh tiang thil hi ka la tawng ngai si lo va, ka awm a nuam lo khawp mai. 

Zan dar 11 bawr velah ka pain call a dawng ta a, mak tak maiin Malsawmpeka hnen atangin a ni tlat. 

"Remruata hi hei hetah Falkawn daiah rui em emin ka hmu hlawl mai a. Ka rawn hruai haw dawn e" a rawn ti! Remruata mai mai chuh! Mahse, ama rilru puakchhuak a nih ka ring lo leh si. Kan lo nghak ta thap a. Rin aiin an rawn thleng hma, Sangpuia leh Mala te'n Remruata chu an va zawn lut a. Biak tlak a ni meuh lo, a bike erawh an hnutchhiah ta rih. Ka nu chu a han thinrim dawn a, ka pain a khap dai vat. A fapa chu ngun taka dapin pem leh hliam a nei em tihte a enchhuak dap a. Remruata nghawngah chuan hriau vihluhna a lo awm phát mai. Mala chuan a hmuh dan a sawi ta a. 

"Falkawnah kan thianpa nu a boral thut sia, kan va tlan rum rum a. Kei chuan ka lo hmu ve lo, kan haw lamah ka bula chuang ve kan thianpa nau chuan kawngsira Remruata tlu reng chu a kawk ta zauh a. Tunlaiah inthahna a thleng zeuh zeuh nen, hlauthawng taka kan va en chuan ka beisei loh lutukin Remruata a lo nia. Amah lah a biak tlak bawk si loh." tiin. Ka chil ka lem khawlh. 

Ka pa te'n lawmthu an hrilh zawhah chuan a ding a. Ka lo ding ve ringawt, kawngkapui thleng ka va thlah a. "Kan lawm e aw. Muttui le" pangngai takin ka ti ve a. Thuk zeta min rawn melhin, "Nang pawh muttui le. Beidawng duh lonu" a ti sup a. A inkhalh liam thlengin ka thlir zui..Ka va luh leh chuan Remruata chu a pindana muttir tumin ka pa leh Sangpuia te chuan an zawn a. Ka nuin a lo pui ve bawk. 

Kei erawh ka pindan lam ka pan nghal a. Ka chau deuh nghulh mai. Mu turin ka inpuahchah a. Phone pawh ka khawih peih lo,. Mahse, ka muhil siar siar tihin call ka dawng ta tlat! Number ringawt a ni leh tawh. Ner nak chungin ka la a. 

"Hello" ka tih rualin, "A dawt lehah chuan a pa fanu duat aw" mipa aw thum lam hian a rawn ti ta mai a!