malsawmpeka 12

MALSAWMPEKA (12)

Ziaktu: Toni Rálte

Kha mangchhiaa ka mi hmuh kha tudang ni loin Malsawmpeka a ni tlat! Remruata khan engtin nge a sawi kha, "Ani sawn ka pa kha a that a ni" a ti a nih kha. Ka tha a khur zawih zawih a, ka mut lah chu a chhuak tawh eih si lo. Ka nau buaina hi a ril dawn riauin ka hria a ni. Doctor han hmuhpui phawt mai ila, tihdan tur chu a rawn inhawn ve mai ka beisei. Khawvar hnaih lamah ka lo chhing ve leh hlek a. Ka pindan kawngka an rawn kik tak sekah chuan ka harh ve leh a. Dar 8 a lo ri têp tawh. Ka tho vat a, ka va chhuak nghal. An lo tho vek tawh a. Ka nu pawh a hmel hmuh a nuam ta deuh. Min hmuh rualin, "Intifai vat la, han chho hma rawh u. Chawhnu lamah ZCP lamin rálna hun an rawn hmang dawn a, in awm ve loh chuan" a ti zung zung a. Thuawih takin kei pawh ka intifai nghal sawk sawk. Ruatsanga'n min kalpui thei dawn a, Mala erawh ka thawh hmain a lo haw tawh. Tihtur pawimawh a nei a ni maithei. A buai ve thin bawk sia, a awm ve reng e. Tukthuan pawh chu ka nam liam vel mai mai a ni e. Remruata pawn a ei tlem kher mai. Ka ngaihbel nge mawni han en mai pawn buaina lian tak leh helhkam lianpui nei hmel a pu run reng a, a melh ngai a melh leh vung vung thin bawk. Ka lainat ru hle. Ka nuin Remruata ngawi reng leh chechang lo chu a roomah a kai lut a, a lo thlak fel thlap. Kei pawh inchei vur si loin ka va insiam a. Dar 10 rik hma deuhin kan chhuak thei hram e. Back seat-ah Remruata nen chuan kan thu a. Ka be mawlh mawlh naa min chhang lem hlei lo va. 

Khawpui kan chuang chhuak tep tihin, a hawi vual vual a, bangbo zet hian, "Ú, eng nge kan tih dawn? Khaw nge kan kal dawn?" a ti ta mai a! 

"Doctor kan hmu dawn a. I tha vak lo va, kan hruai che a nih hi" ka ti ve mai a. A phun nuah nuah a, "Exam a hnai tawh asin" a ti leh daih. 

"Karleh atangin School pawh i kal tawh dawn alawm. Tunah chuan i dam tha rih lo em mai" ka ti ve leh a. 

A ngawi leh vung vung. Damdawi in kan thlen chuan a chhuak duh leh ta tlat lo mai a, mahse, Ruatsanga chuan, "Ka kalpui zel dawn che alawm. Hawh.." tiin a kai a, Ka lo thlem ve bawk nen, hreh zetin kan hruai chhuak thei ta a. A phun nuah nuah reng a, eng nge a sawi erawh hriat theih a ni lo thung. Kan doctor hmuh tum Dr. Zirkima ka call leh a, Clinic-a a awm thu a rawn sawi avangin chu lam pan chuan kan kal leh a. Dr. Zirkima hi Psychiatrist lar tak, pa fel leh pan nuam em em mai a ni a. Dr. Hrekima junior tih khawpin a lar ve a ni. A thiam pawh a thiamin enkawl dam pawh a ngah narawh e. Zoram pawh kan intodelh chho ve zel a, Psychiatrist pawh kan ngah ve ta viau e. A clinic kan thlen chuan lut tlang tura min tih angin kan pathum chuan kan va lut ta a. A lo nelawm leh hle, a hmaa ka biakin thil awmzia ka lo hrilh hre tawh bawk a, ka nau pawh chu a lo be thiam khawp mai. 

"I pa thihna kha kei pawh hian ka tuarin ka sún ve nasa a nia aw. Ka ui tak tak a ni. Remruata'n heti taka i tuar pawh hi i demawm loh, mahse, mihring kan nih chhungin thihna hi kan hmachhawn theuh tur a ni si a, kan pawm thiam mai hi a ngai a ni" a han ti te te a. Remruata erawh a ngawi ran thung. 

A hriselna lam dinhmunte min zawh chuan chaw a ei tlem deuh thu bak sawi tur ka hre lo. Vitamins a chawh phawt a. Remruata chu melhin, "Ka nau, buaina i neih zawng zawng kha han sawi fai vek teh le" nelawm tak hian a ti dam thlup a. Remruata chuan a heh a liak zauh, a darah hmerin, "Sawi vek rawh, ani hian a tanpui dawn che a ni" Ka lo ti ve a. A hawi kual leh ruk ruk a, chutah "Apa kha thah a ni" a'n ti phawt a! Ka lo inhumruh deuh. 

"A ni maw?! Tuin nge lo that ta mai le?" Doctor chuan pháwk hmel fê hian a ti a. Remruata chu a phur ta deuhin a lang. 

"Ka hre lo, Prison Van accident chhan kha thildang a awm vang alawm..Truck Driver khan a hria ang, Dáwp rawh u. Truck nena insu tur khan tu emawin Driver hnenah khan pawisa a pe alawm" a ti ta mawlh mawlh a. Ka meng zau káwk. Chutiang daih daihte a sawi chu mak ka ti. Ka lo ngaihtuah phak miah loh thil a ni si a. 

Doctor pawh chuan mak a ti ve deuh niin ka hria. Mahse, "A va fiah kilh kelh ve le aw. Mahse, Bawiha, chu chu engtin nge i hriat theih le?" a han ti leh a. 

A chil lem khawlhin, "Ih, ka mumangah ka hmu alawm. " a ti zawi sup a, ka lo thaw hawk. Doctor chu a nui vur vur a. "A ni maw? Mumang hi a tangkai cháwk reng asin. Mahse, Bawiha, Driver chu mantir ta ringawt ila, finfiahna kan nei dawn si lo va, thiam loh kan chantir thei dawn em ni?" a ti a. 

"Ka hre lo, chutiang lam chu. Mahse, ka pa kha an phiarru alawm" a la ti hram a. Ka nau buaina chu chutimaia reha fel chi a ni lo tih a hrethiam nge, damdawi thahnem fê a chawh a. Kartin vawiin ang huna thla 3 chhung chu pan turin thu min ràwn bawk. Damdawite kan lei fel zawhah peng khawmuang loin kan haw ta nghal a. Remruata chu car tukverh atangin a dak vauh vauh a. Biak pawh a hre lo. Ruatsanga chuan,"Eng emaw dik lo a awm tak tak em mawni le? Ka ngaih a tha tlat lo" a ti a. Ka chhang lo. Kei pawn nuam tih loh rukna ka nei, mahse, sawi kher ka tum hran lo, a buangbar mai mai. Ka pa ber a kal tawh a, hmalak dan tur ka bangbo. Bakah Doctor sawi ang khan finfiahna kan nei bawk si lo nen. Remruata chu a zia chhoh mai ka beisei ta ringawt. In kan thlen chuan ZCP lam pawh an la rawn lang lo va. Chanchin min lo zawt sap sap a, Remruata a pindana a kal hnu chuan ka sawi fai ta vek a. Ka nu ngaihtuahna ka tibuai ang tih erawh ka hlau deuh, mahse, ka rin loh deuhin ka nu chuan, "A rilru a dam hlawl lo a nih hi. A suangtuahna leh zeldinna te hi a tak tak emaw a ti a ni ngei ang. Ka lainat ngei mai. An exam a hnai tawh sia aw" a ti vawng vawng a. 

"Term exam chauh a la ni tho bawk a, an zirtirtu te pawn an hrethiam ve tho ang ka ring. Kan dil dawn nia" ka ti a. Inbual turin ka kalsan ta hlawm a. Ka inbual laia bathroom darthlalanga ka inmelh lai chuan ka rilruah nizan ka mumang kha ka hrechhuak zawk. Malsawmpeka kha engvanga hmu ringawt nge maw ka nih le? Ka lu ka thing nar nar a, "Mumangte eng nge maw ka buaipui vak le" ka ti sap a. Ka inbual chhunzawm nghal. Ka inthlak zawha ka va chhuah chuan an lo awm nual tawh a. Ka hmelhriatho chuan min lo be ve sap sap mai. Ka pa thiante leh thawhpuite hmel hmuh pawh ka pa min hriatchhuahtir zeltu a nih avangin nuam ka ti vak lo. Farm lamah thingpui leh a tul dang buaipui turin ka chhuk ta rih a. Ka thlen thlak rualin Nunui leh a thiannu Makimi te an rawn lang ve hlawl mai a. Kan inbe nghal bawrh bawrh. ZCP ten an rawn rál dawn tih an hriatin thingpui vel min lumpui turin an rawn kal ve a lo nia, an fel tak tak a ni. 

Sangpuia pawh Nunui te a hmuh vang nge a rawn thleng thla ve a. An lai dun hle. Inhuatna engmah nei si loin an inkalsan a ngai tlat bawk si a. An lainatawm dun mang e. Hmaichhana sawi duhte an neih takin tiin Makimi bulah ran chaw min pekpui turin ka ngen a. A lo tho ve nghal zat. Kan chhuak zui ta nghal a. Ar chaw ka pek laiin ka phone a rawn ri a, Mala a ni. 

"An lo thleng tam tawh em!" a rawn ti a. Ka sawi a. 

"Rawn tawiawm ve a that nen, Ka thesis ziah laiah mi rawn ka ngai sia, Naktukah a zin dawn si nen, ka rawn lang lo mai ang. Zanah ka rawn chhuk hmanin ka ring" a ti zung zung a. 

"Umm le" ka ti ringawt. 

"Min ngai em?" a rawn ti sup a. Ka lai ve ringawt. Lei chhuah zukin, "Ngai hran lo" ka la ti zui. A rum nghut a, "I va sual tak. " a ti hluk a. Ka nui vak vak. Remruata chungchang kan sawi dun leh zuai hnuah kan dah ta a. Ran chetla vel chu hmuhnawm ti takin Makimi nen chuan kan thlir a. 

"Awii, Sangzual, in hausa e" a'n ti hluai a! Ka nui hawk hawk. 

"A nia lawm, nui ringawt suh. In awmna hi a fuh bawk si, tiangah hian ka awm ve chàk tawp. Keini saw chu ..awii thenawmte nen kan insi deuhthaw a, a chep si, step kal thui ngai bawk si, ka ning a nia" a ti hlut a. 

"Nia, khawpuia chêp deuha awm ai chuan nuam chu a nuam" ka lo ti ve mai a. Zawi deuh sap hian,"I naute hi an la nau deuh a ni. Kei ai chuan ú se ka kherh hrep ang" a ti sur sur a, a nui nghal awr awr bawk. Makimi hi kei ai chuan a ú hlek a, Kan Kohhranah Nunui te nen kan pathum hian kan inzui ve deuh a. Kei ka inhman tam lutuk loh vang hian kan inkawm tam vak lo zawk. Phawk deuh, frank deuh mai a nia. Kan kohhran nulaah erawh a fel pawl leh inhmuamup ni si lova zahawm thlap mai a ni thung a. A ngainatawm em em bawk. 

"Remruata hi lo kherh la, a easy viau ang" ka lo ti uang ve a. A ngawi dat a, sawi hreh hmel deuh tho si hian,"A kamtamthlak viau nain, Naute anga ka lo en venaah Remruata bialnu hi chu ka va duhpui lo tak. Kan te ber te nen hian an inkawm ve thin a. Sawisep a kai ru tlat mai a. Then thei se ka ti, Remruata lah a nghet chi a ni sia, a kaikawi mai mai ang tih ka hlau" a ti ta a. Sawi tur dang awm lo bawk nen, thuthmun rem pahin, "Tu nge a bialnu pawh ka lo hre ve hleinem. Sawi chiang law law teh" ka ti a. 

Rawn thut ve pahin, "Chhanhimi kha mawle, engtin nge i hriat ang aw..a pa chu kan Kohhran chairman kha. Chhani chu a hmeltha alawm that chu, an neinung bawk a. Mahse, an sawi ruk danin officer thenkhatte hmei a ni der tawh an tia. Amah hi sawi leh sawi hnu a hrisel loh vanga zirna pawh bansan kha a nia, mahse, chupawh hrechiangte sawi danin a zirna chawlhsan chhan pawh an schoolah an zirtirtupa nen an tawmdun lai an phàwk a, an hnawtchhuak an tia. A la naupan nen a mak ka ti tawp. A hmelthat tehlul nen" a ti ta mial mial a. Hmannia Remruata phurh kha Chhani a ang ka ti reng a ni. Chhani chu ka hre lutuk, Remruata ai hian kum 2 velin a upa maithei. A hmeltha a, an chhungkua pawh kohhrana inhawlh lawr tak, hausa ve thawkhat tak mai an ni. Makimi sawi dan anga a awm a nih chuan awih harsa ka ti viau ang. 

"An hrechiang mawni le..Chhani chu a va inhmeh awm lo ve" ka ti ve mai a. 

"Nia tiraw? Hrechiang inti ve tawkte sawi a ni bawk sia. An sawi hmangin kum 11 vel lek a la nih lai khan an ina awm ve thin a nu nau a putea khan a pawngsual an ti. Ta tang khan mipat hmeichhiatna kawngah a harh tha hle an tia. A putea pawn an in a chhuahsan ta daih kha a nia. Ngaihbel ve theih tur chu a awm nual. Sum mamawh vang pawh ni loin Officer bakah a bialpa te thlengin amah zawk hian a sawm thinte an tia, mi hi an tawng duh ve bawk a, thenkhat hi chu a dik vek ka ring bik chuang lo" a ti ve leh lawi a. Mak ka ti hle. Mahse, thil hi kan hriat loh hian a thleng ve thei tho bawk a. Chutiang mi a lo ni tak tak a nih chuan Remruata hi a la tal àwk ang tih ka hlau ru deuh, a mizia lah heti hi a ni ve bawk sia. 

Nunui'n "Nangni pahnih kha rawn phei tawh r'u, thingpui a so tawh" a rawn ti lang lang a. Keini pawh chu tho vutin kan phei dun nghal a. Thingpui kan siam zui nghal. Sangpuia erawh a lo chho tawh a. Nunui chu ka ngaihbel nge a tap deuh mawni a mit te chu a sen rêm reuh a. An inbiakna chu a tha lam a ni lo a ni maithei. Kan siam zawhah kan han sem a. A hmeh atana chawhma lama an lo siam, Arsa sawhchiar chu kan sem nghal bawk. Ka rin aiin an lo thahnem a. Pa Tluanga'n thu a lo sawi mek a. An pawl thiltum leh ruahmanna te a lo sawi mek, nia, sawi thar ve fo hi chu a ngai. Tunah pawh thenkhat chuan an phatsan tawh chu a nia. Taka ka sawi hmaih loh tur chu Sangpuia palaite khan thu lawmawm tak an rawn hawn a. Inneih ni tur nen lam an rawn tifel nghal vek a. Sangpuia tan chuan hlimawm lo mah se, ka pa khatiang khawpa a chhe zawnga a lara a boral leh takzel hnuah pawh min iai lo va an fanu neih an la phal chu a lawmawm ka ti. Naomi hi rai kher lo se chuan an phal bik kher lo maithei ni. Ka nu thingpui ka pek pah chuan, "Remruata chu a lo chhuak tawh em?" ka ti sap a. A lu a thing ringawt. Ka nau hi a á tak tak ang tih ka hlau ru viau. Farm lamah kan chhuk leh a. Makimi a awm ve si avangin Nunui chu engmah ka zawt ngam rih lo. A sawi duh bik kher lo maithei a. Lo zawh vel pawh ka chàk lem lo.

Thil vel min senghawipui zawhah an haw leh ta a. Makimi scooty-in an rawn kal kha a nia. Kei pawh tihtur dang awm tawh hek lo, inah ka chho ve nghal a. Ràlna pawisa ka nu an lo hlan mek. An ban hnuah pawh la thu khawmuang tawk chu an awm a. Sangpuia te inneihna thil vel an sawi ta daih. Sangpuia chu a roomah a awm a nih ringin ka va lut a, a lo awm chiah bawk. Khumah thuin guitar a lo perh a. Ka va thu ve a, a hmel ngui zet chuan min tihrehawm hle. 

"Nunui te chu an haw tawh mi?" a ti a. 

"umm, a tap tlatin ka hria" ka ti a. A guitar chu hung thain, hahdam zetin a thu a. "Tap e. Ka khawngaih khawp mai, ani aiin ka la khawngaihthlak zawk lehnghal a. Thian anga in en zui zel turin thutlukna kan siam ta ringawt a nih kha. A pawi vawng vawng a ni e" a ti vang vang a. 

A kuta va vawnsakin, "Ka nau, engpawhnise ka pa duhdan a ni si a, kan bulah a awm tawh bawk si lo nen. Fate in han nei ang a, i hlim chho mai chuan ka ring. Chhel takin awm hram hram rawh aw" ka ti a. 

"A bul chu keimah tho a nia. Sex kha lo hmanpui lo ila a tha tur a nia. Amah Naomi lahin min lo hnar seng bik bawk si lo nen, rai kha a tum sa ve hrim hrim mawni aw ka ti zawk. Nurse a nia, a fel loh laite chu hriat ve awm tak a nia" a ti hram a. Ka nui ringawt. Neih loh hram hi chu a duh ve ngawt mai. Kawng dang a awm der bawk si lo. 

Zanah chuan inleng tihah Ruatsanga leh Mala tlawng kan nei ve leh a. Dave pawh an la buai deuh nen, thupha a rawn chawi deuh reng mai. Ruatsanga leh Sangpuia'n chess an khel a, ka nu erawh in chungah a chho leh tawh. Ka nu hi ka ngaihtuah deuh avangin in chung lama riah ve mai ka duh. Amah chuan a hnial leh tho chu ka ring a. A sarhu lai a la ni bawk a, a la chhel viau, hun a kal a, a fate pawh eng emaw ti tiin kan han buai chho ang a. A khua a la harin a lung a la leng dawn chauh niin ka hria. 

"Zorampianga thattu niawm an rinhlelh lah kha a lo ni si lo va" Mala chuan a ti sup a. Ka lo ngaihven tawh miah lo. Thildang a aia pawimawh a thleng nasa rih êm a ni. 

"Tu nge niang le? Kan farm khera an that hi chuan ngaih a titha thlawt lo" ka ti a. 

"Ti daih ila, hman deuha Remruata hrai ruitu hmeichhia kha Remruata hian a la hre thei ang em aw ka ti" a ti leh daih a. 

"Ngatan" ka ti vat. Mak ka ti deuh. 

"Aa ..ka hre chak mai mai, sawrkar lam hian hmeichhia an hmang tangkai thei riau a. Ka pian hlima min rubotu pawh hmeichhia alawm, ka nuin min hrilh a nia" a ti ta zel a. Rukbo a ni tawh tih ka hriat vawikhatna. 

"Ti nge a rukbo che a?" Ka ti há a. 

"A tam mai, ka nu leh pate inkar a that vak loh lai a niawm e. Chumi thil vel vang bakah sawrkar lamin ka nu rilru lakpen nan an ti bawk a niang" a ti ve mai a. Ka zawt zui tawh lo. A pawimawh lem pawhin ka hre lo bawk nen. 

"I nu pawh hi a chawl ve tep tawh lo maw?" Ka tih chuan , "An pawhseisak leh alawm. Amah hi chuan chawlh ve tawh hi a chak lutuk" a ti a. Ni e, upat tawh lama thluak hman reng chu a ninawm ve khawpin ka ring. Tualthahna lam hlir a ni bawk si. 

"Chuan, Mala, Rinpuii kha" ka ti dêk dêk a, "Ninawm, a fel vek tawh" a ti hmuk. Ka ner khum nghek ringawt. 

"Roger nen in inhmu em?" Ka ti ve hmak a. Min melh no vak lo. 

"Hmu lo. A zinin ka hria" a ti nghut a. Sawi tur ka hre tawh si lo va, thingpui ka va lum ta ringawt. Ka rik rak rak laiin ka hnung atangin min rawn kuah thut a, ka îp chàwih mai. Ka chhipah a khabe a nghat a, "I taksa deh hi chu a nuam a ni" a ti dam thlup a. 

"Kal teh, chet i tikhawr" ka ti hlar a. 

"Aih, tian a nuam rih, tuman min hmu lo. Ka bialnu ka kuah ve a ni mai a" a ti sup a. A ruk chuan nuam chu ka ti ve reng. Mahse, naupangchhia vak tawh lo mah ila, ka lai ve deuh tlat. Kha chen ka lo hêl tawh ka bialpa a han ni ta mai hi ka zo chiah lo pawh a ni mahna. Min kuai her a, kan inhmatawn ran mai. 

"I pa nen hian in va inchhun tak e aw. Lawk,." tih leh min rawn fawh a rual a. Ka lo chhanglet ve thuai. Reitawk fang kan infawh mial mial hnuah ka nu aw thian kharh kan hria a, kan inthen phawk. Ka va zak tak. Mi zakthei lo ve tak chu ni mah ila, hetia bialpate nena kan infawp lai emaw inkuah lai emaw chhungten min hmuh hian ka zak chem chem zel. Ka nu chu a rawn lut phei a, a hmel a danglam lem lo. Mala pawh a lai ve deuhin ka hria. Ka nu chuan, "Thingpui kha a sen hàng ka lo duh ve ang aw" tih pahin fridge a hawng a. Tuivawt chu a in khawlh khawlh a. Ka chhang lo. Mala pawh thutkhawmna lamah a phei ta daih a, ka nu chu ka bula rawn dingin, "I kawp elo?" A ti ta a. Roger nen kan inkar engmah ka la hrilh lo va, zawhna awm tak pawh a ni. 

"Roger nen kan tawp tawh alawm" amah pawh en lo chuan ka ti a. 

"Engvangin" a ti vat. 

"Ka tan mi tha a ni lo alawm. Min khawih chhiat a tum a" ka ti sap a. 

"Chuan Mala nen in inngaizawng leh ta a" a ti ta khauh a. 

"Umm, nimin atangin..Nu, dik tak chuan ka duhna a rei ve tawh sia, ka hnar thei bik lo a ni" ka ti mawlh mawlh a. 

"Hmm, ka hria e ka hria e. Tha takin ni rawh u, I pa pawh khan Mala hi a ngainain a ringtawk alawm.." A ti ve ta thluam a. Ka thawveng sawt mai. 

Mahse, "Nu, in chungah ka lo riak ve tawh dawn mawni ka tia" ka ti a. Min rawn melh haw in, "Ka ngaihtuahawmin i hre deuh em ni?" a ti sap a. 

"I khua a har dawn em a. Ka khawngaih che alawm" ka ti mai a. 

"In chung khi chu i pa nen kan sulhnu engkim a awmna a nia, midang rawn tel ve ka remti lo. Keimaha kan lo nun tawh dan chhuikira sûn ka duh" a ti ta a. Ka dem lem lo. Nu mak ve tak kha a ni hrim hrim a. Ka nawrlui tawh lo bawk. Thingpui ka siam zo a, ka keng phei nghal. Sangpuia te chess khel lah chu an han tang dun mai mai khawp a, biak pawh an hre lo reng reng. Ka nu chuan thingpui no chawi va chungin Remruata room lam a pan a, a va endik dawn a ni mahna. Mahse, reife kawngka chu a kik a, a rawn hawn theih loh avangin beidawngin a rawn kir leh a, mawlhtu eng emaw tak a nei niin ka hria. Mala chu melhin, "Hun dangah chuan tawmbo thin mah se, min hawnsak zel thin asin le aw. Ti nge maw ngaihtitha lo deuh hian a awm tlat ni" a ti a. Mala chuan, "Ka va tum ve chhin ang e. Zawh duh pawh ka nei tak alawm" a ti a, a ding nghal zat bawk. 

A va kik ve ta kauh kauh a. Chhangtu aw reng reng a hre bik lo. Ka nu chuan zawi sap hian, "Sangzual, ka ngaih a tha thei mang hlek lo mai. Ani rilru sakhat hian tih loh lohte hi a ti a niang a" a ti ta a. A hmel atang pawn a hlauthawng tih hai rual a ni lo. 

"Ti dawn mi? Chutiang mi chu a ni pawn ka hre lo" ka ti tak naa, ka awm a nuam chiah bik lo. Ka nu chuan Sangpuia leh Ruatsanga te chu pun ve lehin kan vai chuan Remruata pindan lam chu kan pan ta a. Kan han chum dawt dawt a, thawm chu a reh ngawih ngawih mai si. Ka nu chuan, "Kawngka hi tichhe mai rawh u, ka hlauthawng tlat" a ti ta hial a. Nu ber thupek a ni bawk a, hnial lem lo chuan tihchhiat chu an han tum a, a sak nasa mai si. An pathum chuan an han innek chhawk hlawm a. Reife an beih takah chuan chhe thei lo ni bik hek lo le, kawngka kalhna zawk chu an nek chhe thei ta a, Mala a lut hmasa ber.

"Khai aw! Remruat leh" tih leh bang thlang lam pan a rual a, ka nu a rak nghal tuar bawk. Karei! Ka nau Remruata chu ceiling fanah hrui suihin a lo inkhai reng mai le! Ni lo, ni lo, remruat..Ruatsanga leh Mala te chuan chiái miah loin Remruata chu an pawm kang nghal vat a, Sangpuia erawh a hamhaih deuh nge a ding zum zût ringawt. Mala chuan, "Sangzual, chemte emaw bahcheh emaw va la rawh, vatin" a rawn ti tuar a, ka tlan chhuak nghal vat. Chemte ka va la a, ka khur zawih zawih bawk. Mala chuan, "Sangpui, chair kha dawh la, hrui hi han zai chhum rawh" a rawn ti leh a. Sangpuia pawh a phu uih a, a che ve nghal ta phat a. Hrui chu zai chhumin Remruata chu chhuatah an muttir nghal a. Mala'n a mar a endik vat, "A la phu a nia, Kan tlai chhe lo e. Chiái suh u" a ti mawlh mawlh a. Ruatsanga'n a awmah a nem sawk sawk a, Remruata erawh a chechang eih lo. A hnu deuhah chuan a ka keu angin a hamsak ta a, vawi 3 vel a tih hnuah Remruata chu a rawn che ta a. Ka nu erawh bangkilah a hmai hupin a lo tap khur ngawt ngawt. Tuia a lu leh a taksa thenkhat an han tihhuh leh phei chuan Remruata chu a rawn pangngai leh thei ta a. "Lalpa, ka lawm e" ka rilruin ka ti mawlh mawlh mai. Khumah an zawn chho a. Men pawh a meng tha peih lo, a chau hle tih a hriat mai. 

Ka rin loh deuhin Sangpuia chuan a nau chu a hau ta hrep mai a. 

"Tikhawp hian kan buaiin kan hun tawn avangin awmngaihna kan hre lo a. Nang lah kan rilru buaina belhchhah turin i khawsa reng a, ka nu saw enteh, a khawngaihthlak zia saw. Engtin nge tiang thil hi i tihtheih zawk? I lo â em mai. Ka pa kan sûn pawh tih tawh nak alaiin i nunna hlu tak kha lak i lo tum vel a maw? Mai mai che hian, ka thin i tirim takzet a ni" a ti ta piap piap a. Kan ngawi thap hlawm mai. Sangpuia pawh dem lohna chin ka nei, fapa u zawk a ni a, ama tawkah a rilru a buai dawn em em a, chutiang kara a nau hetia a lo khawsa ve sek chuan a phur a tirit zual ngei ang le. Remruata pawh chuan a chhang ngam lo nge , a ngawi ve reng mai. Chutiang teh nuai kan nih avang chuan Sangpuia chuan a riahpui dawn a ni. Ruatsanga chuan a tlawmngaih theih thu sawi mah se; A inthlahrunawm tlat. Ka pa boral hma atangin Ruatsanga hi chu kan chhungkaw tan hlu tak mai a ni. Mala pawh rei a awm ta bik lo va, rilru a dahlau deuh tlat tawh si nen, ka chelh duh bik lo. A haw tur ka va thlah chuan, "I nu hi ka khawngaih, A tawrhna hi a la intan dawn chauh si a. Nang tal chuan tawiawm tha ang che" a ti a. Ka bu nghat. Ka biangah a rawn chuk zauh a, a inkhalh haw ta nghal a. Kei pawh mu turin ka inpuahchah ve nghal. Ka nu pawh a chho tawh a, a han tap leh ngei ngei ang. Kei pawh ka mut a chhuak reng reng lo va, ka pa ka ngai ngawih ngawih. Chutia inngaihtuah lungpuam reng ai chuan tiin ka phone ka khal ta a. Ka rin loh deuhin Hluteii, Nu Arini fanu khan min lo text a lo nia. "Ka u, ka no. Hi lo save ve rawh, Keimah Hluteii" a rawn ti thlap. Ka save a, "Lo leng leh rawh mate" ka va ti a. 

"Rogera zin hawnah kan lo leng ang, ka hmu leh chak che. " a rawn tih danah Roger nen an inkarah eng emaw a awm tawh a nih ka ring ta a. 

"Roger nen khan in ni em ni? In inhmeh lutuk" ka va ti a. 

"Umm, min duhna a rei ve tawh sia, ka chhang ta mai. Ka nu hi chuan a duh vak lo va, mahse, ka duhthlanna hi a ngaipawimawh a" a rawn ti ve zel a. Zawh chian ka chak ve ta deuh tlat, ka thik vang pawh a ni hran lo. 

"Chu! A lo bem ngar ngar tawh che ni maw? Roger chu a va inzep thei ve.." ka va ti kual a. 

"Nikum atang khan min bem tawh mawle..a lerh hmel ka tih bakah min tihnat ka hlau a, ka chhang duh lo reng a. Mahse, a beidawng duh bawk si lo hian min hneh ve tawh a niang" a rawn ti ve duah a. Roger chuan min lo bum ve tho tihna a va nih mai hmel ve aw. 

"Nih chu, mi tha tak niin ka hria. Fapa mal a ni bawk nen. I vannei dawn" ka va ti hram a. 

Kan Roger Zothansanga tehreng chu aw! Ti nge Hluteii a biak lai rengin min nihpui le? Min duh ber niawm fahranin a thikthu lah a chhe turu bawk si. Mahse, Ka mipa duh ber Mala ka nei tawh a, ka chhui kual vak vak peih lo. Thian kan ni tawh tho ka ti mai. Bena msg pawh a lo awm ve khiau a, "I ngaihawm tawh e. Mahse, i dinhmun khati kha a ni bawk sia..ka khawngaih che. Chuan, bialnu ka nei ve tawh aw. Ka lo la lenpui ang" a rawn ti duah a. Ka nui sak. Kan inkawm rei vak lo naa, Bena hi mifel tak chu a ni vein ka hria. 

Midang msg ho erawh ka seen ringawt hlawm a, Naomi msg pawh a lo awm khiah a! "Sangpuia hian min neih a duh lo tiraw? " tih a ni. Ka chhang ang nge chhang lo vang tihah ka buai deuh, mahse, chhan ve ngei chu thaa ka hriat avangin, "Duh lo se palai kan lo tir nang" ka va ti a. A online tawh loh avangin zingah a hmuh chauh ka ring. Mala'n a lo call a, "In ka thleng chiah, ka haw chho kha intibuai an lo awm pek a! Kan thelhna lamah ka khawtlai phah vek" a rawn ti a. A hah hmel hle. 

"Nih chu, a va zia lo ve. Ka mu tawh kei pawh" ka ti a. 

"Umm mut tam i mamawh, muhil rawh. Phone pawh khawih tawh suh aw. Mumang nuam deuh i nei dawn nia..Hmelthanu" a tih lai mekin hmeichhe aw hian, "Zingkarah ka haw peih lo a nia aw" a rawn ti lang lang a. Ka inbengkang vat, ka meng lian viauin ka ring. 

"tu nge?" Ka ti khur dat a. 

"Nancy mawle..min zui hawng a" a ti zawi sup a. 

"Tu Nancy maw?" ka ti hlar a. 

"Inbengdai rawh, Ka scholar pui ve tho a nia , a thesis ziah laiah ka puihna a mamawh alawm" a ti nghut a. 

Nancy aw chuan, "I ti tak tak lo vang" a rawn ti zauh, a awah nuihzatna a lang bawkin ka hria. Mi deng dawt a ni ber e. 

"Malsawmpek, a nih tak kha. Hlim nuam u. Ka bang" tih leh hmeh hlum ka rual a. Ka sa hut hut thei nia! Ka hlim ve dawn chauh a, ti nge buaina bawk le..ka hne tawh. Mala chu amaha khawsa a ni a, a inah tun ang zan reiah hmeichhia a hruai lut a maw?! Chutah min la rawn be zui! Ka rum nghat a, mut leh hnawk pahin, "Ni mai mai teh se..engkim hi ka hne" ka ti sap a. Ka chhungril erawh a sosang viau thung. Rogera thikthu chhia mak ka tih khawp ang thikthu kha Mala lakah ka nei ve tlat si. Bakah thik awm tak ka thik niin ka hre bawk. Khatiang thik lo ila ka pangngai lo tihna a ni dawn asin. Ka heh ka pet fan fan a, ka hriat loh karin ka mittui a rawn tla nia! Lukham sawh táwn tàwn pahin, "I la hria ang, Malsawmpek" ka ti sehchilh nawk nawk a. 

Mutui lo tak ka ni. Thinthi diaia mutna chi a ni lo bawk a, ka phu zawk zawk reng mai. Hlauh ka nei chu a ni lo. Ka harh zing lutuk chu zing lamah phei chuan ka ning ta hial a, ka tho ta ringawt. Gym-ah kalin thlan tla zawih zawih khawpin exercise ka va la a. Ka ngaihtuahna kalbing lutuk erawh a danglam phah lem lo. Mala khan nizan khan min rawn call nawn ta miah lo va, an inchentawn nasain an duhkhawp an hmu hle a nih hmel. Ka tho hma bawk a, ka riltam chu ka khu ruai reng mai. Vawiin atangin dawr kan hawng leh tawh dawn a. Kei pawh inah ka awm mai mai thei tawh dawn lo. A tha zawk ka ti, rilru lakpenna tur lo awm ve kha. Rilru a hah emaw vei neih te hian hna hi thawk bawrh bawrh ila, kan ziaawm ve huai thei zel. Hnathawh hi taksa ngeih tawk chuan thil tangkai leh hlu tak a ni. Tukthuan ei khamah ka pa car ngeiin Dawr lam chu ka pan ta nal nal a. Ka zàm deuh, mahse, Ruatsanga a awm a, engkimah a rintlak bawk nen, tlem chuan ka thla a timuang deuh. Dawra ka luh rual rualin hnathawk ten ka pa thihna avanga min tawrhpuina thu an lo chham tliar tliar a, lung an tihchhiat piahlamah an hlutawm tho bawk si, awmdan vak pawh ka thiam lo e a. 

Nileng deuhthawin customer kan nei lehnghal a, a hlawk tho rualin ka thluak an tina deuh. Mimi leh Ahlimi an fel ngaiin an la fel reng a, biak an nuamin mi chhawnchhaih an thiam si, an hmeltha bawk si. Ka lung an tiawi kher mai. Ruatsanga nen pawh kan inbe hman mang lo, ani pawh a virbuai ve viau mai. A hna a tlin bawk a, a lo awm ve hi ka lawm takzet a ni. Mala msg leh call ka dawng lo va, ka be bik lo bawk. Mahse, ka rilru chuan ka hre rauh rauh thung. A laka ka lo tlawm zing tawh a, tlawm nawn emaw va ti hmasatu nih kha a duhin ka duh tawh lo hrim hrim. Dar 4 velah dawr ka chhuahsan a, in lam ka pan hmain Dave te in lam ka pan phawt, a nuteii pawh damdawi in atangin a chhuak tawh a. Ka tlawh khat ve deuh tawh nen, tlawh ve thaa ka hriat vang a ni. Ka va thlen chuan Dave nu Nu Muani chuan min lo be nghal siam siam a, Dave erawh a inbual mek a niawm e. Ka pa thihna min tawrhpuizia te a sawi bakah a nau damloh vanga a rawn lang thei lo hrehawm a tihzia te a sawi ve chul a. Rawn ral reng reng erawh a tum a niawm e. Chhan vak ngaihna pawh ka hre lo. Dave a inbual zo a, a roomah kan inzui lut nghal. A inthlak laiin a movie ka en chak ho ka lo la ve mek bawk a, Movie ka en khat ta deuh a. En ve leh tan a ngai tawh. Mala nen lah tikha kan ni leh ta mai bawk si. Hun awl hnahkhahna tur ka mamawh a ni ber. Dave chuan sundayah a rawn kal tur thu a sawi mawlh mawlh a. Ka lo e aw liam vel mai mai ringawt. A inthlak zawh hnuah ka bulah rawn thuin, "Kei chu bialnu neih pawh ka peih tawh lo, hmeichhe rinawm hi an lo awm lo a nih hi" a ti nghut a. Ka hrethiam, a bialnu te apiangin natna an hnutchhiah zel hi kei pawn a zozai ka ti tawh lutuk. Ka khawngaih rualin han tih vak ngaihna ka hre chuang si lo. 

"Tha deuh kan zawng dawn nia" ka'n ti ngawt a! 

"Ka chawl rih dawn ..ka ning tawh" a ti nghat a. Ka hnem thiam leh chuang bawk si lo. 

In ka thlen chuan Naomi leh a thiannu te an lo awm ve a. Chaw an lo ei dawn a niawm e. Remruata ka va hmu nghal a, a lo tha tawh reng, "I damdawi i ei em?" Ka ti a. Mitmeng fim taka min melhin, "U, ka tha tawh alawm. Tibuaitu ka nei tawh lo. Exam turin ka inbuatsaih char char" a ti a. Ka phu zawk mai. 

Lawm em emin, "Tak tak em ni? I tha tawh maw? Awii ka van lawm" ka ti hluai a. 

"Kha mitthi Zorampianga ka hmuh atang khan ka dik tawh lo vek alawm. Ka mumangah ka hmu ziah bawk sia" a ti felfai thlap a. Chutia a pangngai ta mai chuan min thawng ka ti mai, ka hamhaih zo vek tawh. Mahse, inthununin, "Ka va lawm tak, fel deuhin awm tawh rawh aw" tiin a luah ka va chul a. A nui ve suk mai. Thawveng takin ka inbual sar sar a, ka zai pah rat rat bawk. Ka va chhuah leh chuan ka nu chuan rawng a lo bawl zo tawh a. Naomi te nen an lo inkawm mek a, Sangpuia pawh nuam ti vak lo hmelpu hian an bulah a thu ve ran a. Ka nuih a za deuh. 

"U Sangzual, in dawrah hna ruak te a awm lo maw? Esi hi thawhtir ve teh" Naomi chuan a thiannu melh zauh chung chuan a ti a. 

"Ka va hre mai lo ve aw. Ruatsanga ka lo zawt dawn nia" ka ti ve mai a. 

Esi chuan, "Nikum khan MA ka zo ve chiah a, thawh tur a vàng sia mawle. Awm mai mai ai chuan tlem azawng lo thawhchhuah ve pawh kha a hlu êm a" a ti niah niah a. 

"Ni ngawt mai, a awm maithei sin, ka lo zawt dawn nia" ka ti a. Zanriah ei a hun ta bawk a, kan che ta sang sang a. Remruata pawh hmel felfai takin a rawn chhuak a. A tawngtam loh bakah a zakzum ve bawk nen, An biak loh chuan Naomi te pawh biak ngaihna a hre vak lo. 

Naomi rai no lah chuan ka nu saisu bai chu a pumbilh ta emaw tih mai tur hian a ei hlawih hlawih mai a, ka nu lahin a lo bai thiam ve bawk nen, a tui tihzawng chu ei bawrh bawrh mai teh se. A puma naute awm mek saw ka vah a ni ve tlat. Lo piang vat se, ka nu khawhar pawh a chhawk ngawtin ka ring. Thleng ka sil laiin ka phone a ri a, ka nuin a la a. 

"Aw..eng a? Ehe! " a tih tak chiamah chuan ka ngaih a tha ta lo va. 

"Nuu, eng nge a?" Ka va ti lung lung a. 

"Mala nikhawhre loin a awm a nih chu.. Tunah Damdawi in an panpui mek" a rawn ti ta mai a! Ka thleng sil lai pawh ka tawp chawt mai. Eng nge ka nu khan a sawi tak mai le?! MAla maw? Ber kher a. 

"Tikhan dah mai rawh, Remruata nen rang takin han chho nghal rawh u" ka nu chuan a rawn ti a. Ka hamhaih zo vek tawh. Ka insiam laite chuan ka tha te a khur a, ngati teh thut nge ni ang? A mak em alawm. Motor pawh chu ka khalh hleithei dawna ka hriat loh avangin Remruata ka kian ta a. Inbe miah loin damdawi in kan thleng a. Kan tlan chho hlawk hlawk. Amandain pawnah min lo hmuak a, ka chiài zia a hmuh chuan, "Engkim a tha vek e. A thluak hmang nasa lutuk a heti zo a nih hi. A tha leh vek ang" a lo ti sawk sawk a. Kan va luh chuan Mala chu a lo mu bám a. A bulah hmeichhe te fel át, ngo vir ver hi a lo thu ran bawk. Ka va thu ve a, "A la harh lo em ni?" Ka ti sap a. 

"A nih hi" a ti nghat a. 

Mala kuta va vuan chungin. "Mala" ka'n ti ngawt a. 

A reh veng veng. Hmeichhia chuan, "A eng nge i nih a?" A ti a. 

Inringtawk takin, "A bialnu" ka ti hap a. A nui nghek a. Mak ka ti deuh. Amanda leh Pa Sama erawh pawnah an la awm a. 

"A nih nang a eng nge i nih" ka tih chuan, a ngawi det a. Chiang kelkawla min melhin, "A nupui hual" tih pahin a kut zungte û-a inhualna zungbun nalh zet chu ka hmai bulah a rawn lek kang vah a…

Doctor leh Amanda rawn inzui lut ka hmuh avang chuan engmah ka sawi lo. 

Amanda chuan , "Ka fapa hian nasa taka hrai ruih a tawk a ni. Sangzual" a ti vawt raih a. Ka lo bangbo hle thung si.