malsawmpeka 11

MALSAWMPEKA (11)

Ziaktu : Toni Râlte

Ka leng bat bat a, ka hlauthawng deuh. A chak ropui sia. Min bawhbet a, ka kut lah a chelh hneh si, ka ka a la hup chut zui. Ka meng rum úl tawh a. A tha thlah lai ka chang ru ta ran a, Ka naute lah an mut tawh bakah an room atang chuan engmah an hre thei dawn si lo. Roger lah chu a sen tún tawh a, a thisen zàm a rawn pawng tawlh tawlh bawk. Ka hmui a hupna kut chu ka theihtawpa insangmarin ka sehsak ta a, a la thla rang kher mai. Ka theihtawpa ringin, "Chhuak rawh. " ka ti tuar a. Mahse, kawngkapui inhawng thawm ka hre tlat, vawi leh khatah Rogera chu chhuatah a let thla hlawl mai a. Ka thaw hawk mai. Malsawmpeka taksa lian zet ka han hmu phe ruai. Ka thu chhuak tur chu ka tha a khurh nasat luat vangin ka tho hleithei lo. Mala chuan min rawn pawt tho ta lawp a. Rogera rawn ding chhuak ve mek nen an inhmachhawn ta ran mai. 

Roger chuan thinrim zet hian, "Hetah eng nge i rawn tih?" a ti thum chhak a. 

Mala chuan, "Amah venghim tur hian" tiin min kawk zauh a. 

"Ani hi ka ta a ni. Ka venghim thei bawk" Roger awki chu a sang hran miah lo, mahse, a hlauhawm thawkhat viau. 

"I ta chu ti nge khawih chhiat tuma i pawngsual si a?" Mala aw pawh a dam thlup mai. Buaina lian zawk a chhuah ka hlauh deuh avangin ka ding a, Roger chu enin, "Ka rin i ang lo. Mipa mak tak i ni. Khawngaihin min chhuahsan ta che. Chuan, kan inkar a tawp bawk aw" ka ti khur dat a. Phawk fêa min rawn melhin, "Wow! Malsawmpeka a rawn lan takah chuan i danglam leh ta maw? Kan inkar hi i duh duha i tihtawp theih a ni lo ve. Ka thu thu aw" Roger chuan a ti ta lung lung a. 

Mala chuan, "Chhuak rih mai la a that zawk ka ring" a ti hriam hraih a. 

Roger chu thinrim fe hian a chhuak ta a. A motor thawm a reh hnuah, Mala chuan ka sama rawn tuaiin, "I tha em?" a ti nghut a. Ka bu nghat, ka lung a chhe deuh. Rogera chetdan chuan min thawng ve êm a ni. 

"Engtin nge khatiang khan a chet theih? Mipa dik tak angah ka lo ngai asin" ka ti tiau a. Ka mittui far tur chu ka hru pàwk bawk. Tun hnaiah hian ka tuidul riau mai a, ka pa vangte, kan chhungkaw dinhmun vangte hian ka mittui hian chhuah a chak fo a nih hi. Hmeichhia ka ni tlat alawm le. 

Kan thut hnuah, "Nangmahin i awm tih leh Rogera a rawn kal tih ka hriat rualin ka rawn tlan thla nghal a ni. Rogera hi mipa chu a ni, mahse, a atchilh dan che hi a hlauhawm rawng a kai tan a nih hi..a aiawhin ngaihdam ka dil e" a ti thluam a. Ka insút faih. 

"Lo kal lo ta la" tiin mittui tling piauin ka va melh a. A nui a, "I inveng thei tih ka hria alawm. Thansangzuali i nih kha" a ti dam thlup a. 

"Chuan, i chhungte engtik nge an rawn hawn dawn?" a tih zawm nghal zat a. 

"Ka hre bik lo, ka nu hian chawlh hahdam a mamawh khawp mai" ka ti sap a. 

"Nu Zoi chu kan hruai hran theih pawh ka ring lo. A luhlul êm mai, bakah i pa dinhmun a la tha lutuk bawk si lo va" a ti a. 

"Mala, ka pa hi a thi lo vang tiraw? A thih i ring em?" ka ti sek sek a. 

Chhuat lam melh ranin, "Ka hre lo, Sangzual, engpawh thleng se Pathian kuta tlukluh hi a him ber mai " a ti nghut a. 

"Pathian chuan ka tawngtaina chhang se ka ti" ka ti sep a. Ka hnual lutuk chu min tihhlim tum takin, "Ka ril a tam, eitur siam ang hmiang" a ti ta daih a. Ka lo meng á ruai ringawt. 

"hawh, ka eisiam lai i la hmu lo tak ang" tiin min kaitho a. Ka kal ve mai. Choka lamah kan inzui phei a. Fridge a hawng a. Noddles a la chhuak nghal. Pack hnih chu a kheh nghal a, Gas-ah tui lo chhuang turin min ti a, ka chhuang ve mai. Apron a ha te te a, kan bawlhlo chi hrang hrangte chu la chhuakin a duhdan ang takin ei chu a siam ta a. Ka lo thlir reng ringawt. Eisiam lam pawh a lo timi phian a nih dawn hi..a che reng reng lah a felfai thlarh bawk si, Noodles chu a thlak ta a, a han sawngbawl tak tak chu a tui hmel ta hluam hluam hle mai. Kimchi a va la chhuak a, cooker hawngin chaw thing a va la chhuak bawk, ka nui tawp. Chaw thing nen a lo ei ve thin chu. Dawhkanah a chhawp ta thap a, ka pum a ri raih raih mai. 

"Ei ang le" tiin chair min laksak a. Ka thu ve vat. Kan ei dun ta a, a tui kher mai. Ka duh aia tam ka la ei zui. 

"Hei ai hian thau hlek mah la a pawi lo, hmeichhe cher lutuk chu an itawm loh" a tih chuan, "Dulkiar pawh" ka lo ti hlak. 

"Dul kiar chu khawih a nuam alawm" a la ti zui. Ka hriat loh karin Mala bula awm chu nuam ka ti ta hle. Roger nen kan buaina pawh ka hrechang ta meuh lo. Ka pa erawh chuan ka chhungril ber a la luah tho thung. Kan ei khamah kan eina thleng vel chu a sengfelin a silfai leh vek. A hnungah ka ding zúm zút ringawt a, "Tihian i inah khan ei i siam thin em ni?" ka ti a. 

"Aw..nuam ka ti alawm" a ti ve mai. Call ka dawn avangin thutkhawmna pindanah ka pheisan a. Sangpuia a lo nia. Ka la vat. 

"Ka pa hi a hniam zual riau mai a. Ka nu lah a biak tlak bawk si loh, i lo chho ve mai dawn mawni le" a rawn tih chuan phone ka thlauh lo chauh. Ka chhing sawk a, "Engtin chiah nge a awm?" ka tih chuan, "Nichin mai pawh khan a lung a phu tawh lo va. Ventilator hi an phawi phei chuan ka pa chu a kal nghal a ni mai" a rawn ti tham tuak a, ani pawh a tap ve fe tawh niin ka hria. 

"Aw Mala nen kan lo chho nghal ang aw. Ka nu kha lo buaipui r'u" ka ti sawk sawk a. Mala rawn phei mek bulah, "Ka pa a tha lo zual, chho ang" ka lo ti vat a. 

"Va insiam rawh" a ti nghal vut. Kei pawh ka pindanah tlan lut nghalin ka inthlak sawk sawk a, ka hmai pawh ka chei lo. Ka hriat loh karin ka mittui lah a rawn tla ve sek bawk nen, helai dinhmun harsatzia hi chu mahni nu leh pate chán tawh chauhin an hrethiam ang. Kawngka ka kalh tur pawh chu ka kut a khur nasa lutuk a, ka hlawhchham. Mala'n code chu min rawn hmehsak ta tawp a. Chak takin damdawi in kan pan ta nghal. 

"Sangzual, ka sawi tawh ang khan, chhel takin aw. I bulah ka awm reng ang. " a ti nghet charh a, ka lungchhiat tizualtu mai a ni si. Damdawi in pawh kan thleng rang ngei mai. A tlanin kan tlan lut a, kan han thlen chhoh chuan ka hmelhriat leh hmelhriat loh tam tak an lo thu thup nia! Amanda pawh ka va hmu. Ka nu a lo buaipui mek a, Sangpuia erawh ICU room bulah a lo vei sek, Remruata ka hmu lo thung. Ka nu bulah kan va tlan phei ve nghal a. Min hmuh rual chuan min rawn kuah thlawp a, a tap khur ngat ngat. Ka nu zawk mahnise ka hnem a ngai si. A va hrehawm ngai êm. 

"Nu, a tha vek ang. Pathian a awm alawm" ka ti tham tiak a. Ka mittui a baw ve nghal záwih. 

Amanda chuan, "Sangzual, a kal hma ngeiin i pa chu i nu hi va hmuhpui rawh" a rawn ti hniam raih a. Amanda tawng dan chuan ka thin a thawng takzet a ni. Meng â ruai chungin ka nu chu ka kai tho a, "Nu, hawh ka pa va hmu ang" ka ti sap a. A lu a thing nar nar a, Amanda rawn ding ve vatin, "Zoi, chhel hun lai tak a ni e. Ephraime lungin hna a thawk tawh lo a ni. I pasal hi a damlai ngeiin va hmu rawh. " a ti dam thlap a, a thusawiin min den natzia chu ka sawifiah thiam lo zawk. Ka nu chu mi â ang maiin a ding khawng reng a, ka kaih ngial pawn a che duh der si lo. Mala a rawn kal hnai a, ka nu chu rawn kuahin, "Nu Zo, keimah nen aw. Hawh le..hlauh tur engmah a awm lo a nia" tiin a hruai ta a. Ka enzui vawng vawng ringawt. Amanda bulah ka thu hnawk a, "Tak tak em ni? Ka pa a kal dawn maw?" ka ti a. Ka mittui erawh a hul hlauh thung. Ka sam rawn huihkiangin, "Sangzual, i pa fanu i nih kha..nang lehzel khatin awm suh. I pa hi Doctor te chhan theih tawh loh khawpin thihnain a lem zo têp tawh a ni. Kan kaltir mai a ngai, i hrethiam em?" a ti seuh seuh a. Ka hrethiam dawn lo, engtikahmah ka hrethiam ngai lo vang. 

Ka hma lawka Police duty lo dingte chu ka va pan hnai set sawt a, "Nangmahni ho vang hian ka pa chu a kal dawn a nih hi..nangni ho vang vek a ni. Ka pa khan tumah a that lo, ti nge in man a? Mawh? Man lo ula inah thlamuang takin a la awm ang. Hrereng rawh u, ka pa a kal rualin ka pa phuba ka lakna kawng a intan ve chiah ang. Ka pa nunna in lak ang chiahin a mal tetein in nunna ka la ve ang, in hria em?" tiin ka au tuar tuar a. Tu emaw hian min rawn chelh bet a, Dave a lo ni. 

"ka thian, a na ang. Mahse, insúm a hun..khatin tal suh..khawngaihin" a ti keuh keuh a. Police ho erawh chu an ngawi reng, nuam ti lo hmel erawh an pu ve deuh. Dave áwma hmai phum chuan ka tap ta hlawp hlawp a,ani pawh a pa thih nia ka tahpui ang chiah khan a tap khur ve hlawk hlawk mai. Ka pa, ka la phal lo che asin le..Ka banah Mala'n a rawn chelh a, "Dave nen i pa chu va hmu ve ru le.." a ti dam thlup a. Dave chuan min kaiin ka pa an dahna lam min panpui nghal. 

Nizan ai khan ka pa hmel chu a lo dáng tawh zawkin a lang tar hle bawk. A kutah ka zuk vuan a, fawp vawng vawngin, "Pa, i kal thei lo, min ngaihtuah rawh..mawh..Pa, sumdawnna te hi engmah ka thiam lo, ka nu hi i tel loin a nung thei dawn lo..Pa, khawngaihin" ka ti khur hlawk hlawk a, Min chhang thei hmel reng a pu si lo. Ka darah tu emaw hian a rawn vuan a, Remruata a lo ni. A hmai a sen vek a, a mittui a tling khat vek bawk. Tahchhuak insúm si hian, "Ú, Apa hi dang rawh. Chelh tlat rawh" a ti a. Ka nau kut chu vuan let vein kan pahnih chuan kan tap dun ta tlawk tlawk a. Doctor a rawn lut, "Lo va chhuak tawh r'u le" a ti a. 

"Doctor, ka pa lung hi a thlak theih loh em ni? Ka pe ang, keiman. Kei ai chuan a la dam ve hi a tul zawk" tiin a áwma chumin ka ngen a. Ka kut chu zawitea la sawnin, "Mami, i pa i hmangaihna hi ka theihnghilh tawh lo vang. Mahse, i pa hi harh chhuak tur a awm tawh lo a ni. Min hrethiam hram rawh aw" a ti sup a. A lungchhe ve hlein ka hria. Zawimuangin kawngka a va hawng a, "Hmu ve lo ula a tha e" ka dara nghet zeta rawn hmer pahin a ti sup a. Min chhuahtir ta. Kei chu ka thu hnawk ringawt, ka thaw a hah a, boruak chu ka khawpkham meuh lo. Dave chuan ka awmdan a rawn hmuh rualin rang takin min rawn pawm tho a, Thutna lo awm hnai berah chuan min muttir a, "Sangzual, hei i tha em? I tha tiraw?" a ti sek sek a. Ka sam chu chunglamah a hui chho vek bawk. 

Ka mutna bulah Mala a rawn ding a, "Dave, keiman ka lo buaipui ang e. " a ti sup a, zo zeta min pawmin room pakhatah min luhpui ta a. Ka meng phe ruai vek a, midang an awm ve leh ve loh ka hre lo. Ka hriat chhun chu ka nghawng a rawn na zawk a, a thim nghal vek a ni mai e. Chiu mutin ka awm a nih tak ber mai chu. 

Ka harh leh chuan zai thawm niawm tak ka hria. Ka meng a, ka thil hmuh pawh a fiah ta deuh e. Ka roomah ka lo mu reng a, ka khum bul chair-ah Mala a lo thu run bawk. Ka rilruah ka pa a rawn lang nghal a, ka thu chhuak rang kher mai. Mala chuan, "Sangzual " a rawn ti thawt a. 

"Khaw nge ka pa" ka ti vat. 

"I thawmhnaw thlak ila, i pa chu kan va hmu dawn nia..tui kha in phawt teh" a ti a. Ka khum bul dawhkana tuisik lo awm chu ka in ta khawlh khawlh a. Ka harh deuh huai nghe nghe. Ka closet a lo va hawng a, Thawmhnaw dum rawn la chhuakin, "Kha hei hi ha rawh" tiin a rawn theh thla a. Kawrfual dum a ni. Eng sawi set set loin ka thawmhnaw hak lai chu ka hlip sawk sawk a, "Sangzual" a rawn ti leh thawt. Ka va melh hú a, "A..a ngai lo e" tiin lehlam a hawi daih. Ka kawr chu ka ha nghal a, pheikhawk min rawn laksak chu ka bun bawk. Darthlalang hmaah min nam thu a, ka sam chu a tham khawm a, nghet deuha vial khawmin ka chhipah a bawk ta a. Ka hmai dáng lep chu ka lo melh ngawt ngawt mai. 

"I pa kan thlah niah chuan smart taka i lan a ngai" a ti zawi sup a. Eng cream emawni hi ka hmaiah chuan a rawn hnawih a, ka lo dawh mawl ve tawp, lipstick ka hmai dáng zet nena inrem tak, rawng tak lam chu ka hmuiah a rawn hnawih bawk. Tlemin hmuh ka nuam ta deuh e. 

"Hawh le".. Tiin min kaitho a. Romol min pe thlap bawk. Ka pa a thi tih ka la pawm thei thlawt lo chuan min ti á lo thei lo va, Mala pawh chu mi á ang maiin ka zui mawl ve tawp mai a ni. Thutkhawmna pindan lamah ka pa chu kuang mawi deuhah an lo zalh a. Ka nuin duh taka a order sak suit pawl duk an haktir a, Aw..ka pa chu a ni ngei mai si a! A va mak ngai ve mawle..pa kan nei ta lo ringawt maw? Ka nu chu ka pa lu lamah lo thuin ka pa hmel chu a thlir ning thei lo va, a mittui chu tla leh tur chuang pawh a awm tawh lo a ni maithei. A meng bùi lâk thung. Ka pa ruang chuan kiltu a nei hraw hlawm viau. Kan CM meuh pawh a thu ve run a, Amanda pawh ka pa ke lamah a thu ran bawk. Amanda chu a tap nasa hle tih a hriat mai. Mala chuan thutna awlah chuan min thuttir a, Ka pa chu ka melh vawng vawng ringawt. Engtin nge a kal ngawt theih? Engtin nge a nupui fanaute hi min kalsan theih? A biang chu ka chul a, a dai thler mai. Mitthi a ni ta mai chu hetia a ruang ka khawih chung pawn awih harsa ka la ti. Chhungkaw aiawha thusawi turin ka nu chu koh a ni ta a. Derthawng tak anga lang si kha zahawm takin a va ding chhuak a. Ka lo insangmar nasa hle. 

" He lai hmuna ka pasal vuina min rawn hmanpuia súntu te zawng zawng chungah lawmthu ka sawi hmasa a. Ka pasal chanchin hetianga ka sawi a ngai ta mai hi ka tan thilmak a ni a, ka mumang ramah pawh ka suangtuah phak ngai loh thil a ni. Ka pasal Ephraime Zothanpuia hi a pa mizo ni lo mah se, a nu erawh mizo diktak a ni a. Mahse,rei tak Shillongah an khawsa a, a nu boral hnuah Mizoramah rawn chuang chhuakin tuna kan awmna hmunah hian in a sa a. A khawsa ta a. Kei nen kan intawn dan hi min zawtte in awm leh nawlh thin, Kei hi Liantawna fanu ka ni a. Ka hmangaih miah loh pasala nei tura nawr ka nih avangin ka tlanbo a, A tawi zawngin Ephraime bul hi ka thleng ta a. Ani chuan min zawngtu te lakah min humhim ta a ni. Khatia mipa leh hmeichhia, tuma chimbuai loha khawsa ta na na na chu kan inkarah hmangaihna lo piangin, Tihian kan lo innei ta hial a. Kan inneih hnuah kum 2 chhung chu Shillongah kan khawsa a. Kan fa u ber Thansangzuali ka pai lai hian Zoram kan rawn chuang chhuak leh ta a ni. Ka pasal hi in hriat tawh angin Zoram Chhantu Pawl hruaitu a ni a. Ama din leh remruatnaa kal an ni. Dinhmun hlauhawm tak taka din chang pawh a nei thin a, kei pawh ka hlauthawng thin. Mahse, ZCP ten hnehna an chang ta a, Tihian kum hei leh chen chu kan lo kal ta. Mahse, tun hnaiah ka pasal phatsana an pawl phatsantu thenkhat an awm ta a, chung mite chu hmang tangkaiin sawrkar hmasa lam ten ka pasal chu man tuma vehin dik lo taka puhin an man ta hial a. Jail lama an phurhthlakna lamah chesualin a nunna hial a chán phah ta chu a nih hi. Ni e, ka pasal kha a hun lai chuan hel pawl hruaitu a ni a. Mahse, khatihlaia kan ram dinhmun la hria te chuan kan pa dikzia leh Zoram a hmangaih vanga nunna thápa a beih nasatzia an hriat ka ring. Ka pasal a nih vang ni loin Ephraime kha ka ngaisang a, ka zah a, ka hmangaih bawk. A tel lo va damchhung nun kan hmang tur hi engtia ngaihtuah tur nge pawh ka hrethiam rih lo. Ka fate pathum Sangzuali, Rosangpuia leh Remruatpuia te nen kan khawsa chho dawn chu a ni a. Vawiina lo kal thenrualte tawngtaipuina leh phungbawmna pawh kan mamawh takzet dawn a ni." tiin. A sawi chhung zawng a tap lo va, a chhel hlein ka hria. Ka nu chu ka chhuang takzet a ni. 

Vuina hunserh hman hmain Pa Tluanga bakah Pa Sangpuia te an ding ve leh a. Ka pa fakna an rawn chham chhuak a. Ngaihthlak a nuam. Ka pa chanchin chu sawi reng se ka ngaihthlak nin theih ka ring lo ve. Vuina hunserh hman zawh chuan ka pa kuang chu an chhin dawn ta. Ka nu leh midangte chu an tap vawng vawng a. Kei erawh ka hul ! Milim angin ka thu ngil ut a. Ka pa ka melh ngawt ngawt. Awm tawh lo tura khawvel a chhuahsan chu ka la pawm tluantling thei lo va, ka la sún thei rih lo a niang e. Davea'n ka beng bulah, "Mate, tap rawh, tap bawrh bawrh rawh. I pa hi i hmu leh tawh dawn lo a nia. A hunlai chuan insum loh tur" a rawn tih pawh chuan ngawhngawl ka chhuah tlat. Ka nu leh ka pate duhdanin ka pa chu kan farm house sir, a hma atanga kan chhungkaw thlan a tana a lo voh tawh hmunah chuan an phum dawn a ni. Farmah pawh kan zui thla zel a. A tawp nan tak taka ka nuin ka pa hmel hmuh a dil chiah chuan ka chhungrila thil inup, mang rapthlak tak ang maia min uai rittu chu a rawn puak keh ta a. Ka pa chu ka bawh a, ka biang leh a biang insiktirin, "Pa..paaa...ka hmangaih che. Ka ngai dawn che êm mai. Ka la phal lo" tiin ka tap ta zawih zawih a. Ka pa hmeltha tak, pa hrak maite chu engtikah nge ka hmuh leh theih ang le? A kuang an chhin leh a. Thlan khura an thlak thla tur chu Remruata rawn dawk zawkin, "Phum lo mai rawh u, lo nung leh ta se..a hrehawm a ti dawn asin" a rawn ti ta. Chulaia awm ve a hmei a pa tap lo reng an awm lo, Dave leh Mala pawn an mittui an hru an hru mai. Ka nuin Remruata chu a kuah a, an han baw dun leh hawk hawk a. A va hrehawm ngai êm. Ka pa chu an zalh ta a, an phum fel ta. Nâ hi a na mang e. 

Ka chau a, ka zawi em em. Ka nu chu an chiu muhil ta a. A chau tawh êm a ni. Kei pawh Mala chuan chawl hahdam turin min nawrlui tlat a. Khawsak rel leh inleng lo chiauau vel chu an kuta dah turin min ti a. Ka hnial zo ngang lo nen, Dave nen ka pindanah kan inzui lut ta nge nge a. Ka khumah kan pahnih chuan kan mudun a, Taksa a chauh tak tak chuan men kar chu a lo harsa bawk a niang. Dave nen inkuah dun rialin kan muhil ta bawrh bawrh a. 

U Loicy'n min rawn kaitho a. Ka harh chuan a lo thim tawh. Ka tho vat a, inbual phawt tura min tih angin tuilumin ka va inbual ta phawt a. Ka inthlak fel hnua ka va chhuah chuan an lo awm nual a. Zanriah pawh an lo peihfel tawh. Lehlamah engkim midang kuta kan han dah ngawt chu nuam ka ti chiah lo naa, min hrethiamtu ngawih ngawihte vek an ni bawk a, ka inthlahrung lutuk duh bik lo. Ka nu erawh a mut theih chhung mu se an tih avangin kan kaitho duh lo. 

Chaw chu kan chawi a, kan chaw eina bulah chuan ka hmuh tawh hnu nu valai, hmeltha tak hi a rawn thu ve a. "Sangzual, hmuh loh karin i lo va lianin i lo va hmeltha ta êm..min la hria em?" a ti a, a aw a fiah tha kek kawk hle. Ka hmuh hnu chu a nia, tu nge a nih erawh ka hrechhuak zo chiah tawh lo. Nuam ti vak lo hian,"Ka hmuh tawh hnu chu i ang" ka ti ringawt a. A nui sak a, "A dik ang, kan inhmuh lohna a rei ta êm a ni. Rinsangi, Arini tia koh ka nia, ka pasal chu saw Ruatfela saw. Chuan khawnge Mateii hi aw.." tiin a hawikual a. Ka hrechhuak ta. Nu Arini maw lo ni a? 

"Awii, Nu Arin, ka hrechhuak leh si che, a van mak..khaw nge in awm daih a?" ka ti ta chul a. Chutihlai tak chuan a fanu niawm tak leh Roger hi an rawn inzui phei a. Pi Arini chuan,"Nia, Chhim lamah kan va khawsa daih a, nikum khan kan rawn let leh a, mahse, Tanhril daiah kan awm leh daih sia..inhmuhna remchang a la awm lo êm a ni. Chuan, Mate, hei I U Sangzuali kha aw..Sangzual, hei hi kan fa neihchhun Rochanhlui kha a nih hi. Sangpuia nen hian an inrualin ka hria" a ti ta zung zung a. Rochanhlui chuan min rawn nuih seih a, ka hmeichhe hmuh tawhah chuan a la hmeltha ber mai awm e. A tetlaia ka puaka ka thlauh tum kha ka hrechhuak nghal uai uai. Roger nen an lo inhre tehdaih chu mak ka ti deuh. A tleirawl sawi kha Hluteii chu a ni em mawni dawn le? An inhmeh viau bawk si. 

"Hlute, min la hria em?" ka ti a. 

"Hre deuh, mahse, thil hi ka hre rei lo thei tawp a. " a lo ti ve thliam a, a hmelthat ang bawkin a aw pawh a nalh. Roger chuan min rawn melh zauhin, "Unau pawh in an kha le" a ti ve sup a. Ka pa thihnain min nangzui ta nen, kan inkar pawh sawizui awm lem loin tihian a tawp chu a ni ta mai a, rawn tharthawh leh a tum loh hram ka beisei. Tunah chuan mipa ngaihsak hman pawh ka ni chiah lo, ka pa ai ka awha ka pa sumdawnna ka chhawm nun zel a ngai dawn si a. Mipa ka ngaihven leh a nih ngai chuan a tir atanga ka tuiralna Malsawmpeka chauh ka belbul tawh ang, min treat danah sawisel tur pakhatmah ka hre lo. Min duat chu thuhran, a bula him hliah hliaha ka inhriatna hi engtik atang khan nge ka neih ka hre bik lo. 

Ruatsanga leh Ruatdiki te pawh a che buai pawlah an tang ve a, thiantha te hi an va hlu tak êm. Chaw te kan eikham fel hnu chuan inleng te lo hmachhawn turin ka inpuahchah ru ve deuh a. Thalai lam an rawn lut tak tak a, mi kan làwm loh tehlul nen min ngaihsaktu chutizata tam an awm chu lawmawm ka tiin mizo nih nawmzia ka hriat thar leh phah. Nunui pawh a rawn lang ve a, mahse, mipa nen an rawn kal dun ve. Sangpuia nen an inhmu lo a niang. Chhunah khan Naòmi pawh a rawn lang ve a, zan lam erawh raipuar a ni bawk nen, a rawn kal thei ta bik lo a niang. Thingtlang khaw hla tak atangin Pa Ngura leh Nu Judy te nupa an rawn lang ve hlawl mai a. Pa Tluanga te ho nen an han inhmu chu an inchibai nak nak mai. Pa Ngura hi ZCP mi leh sa a ni thin a. Mahse, Aizawlah an khawsa lo thung. Nu Judy nen hian fa pahnih an nei a, ka la hmu lo thung. Hmelhriatte vek inhmu khawm ta chu an hlim phian a. Ka pa sún tura lo kal mahnise, an tan chuan inhmuh lehna chance a ni ve bawk nen, mit an tikham hran lo. Thalai lam an zaithiam em em a, an hla sak apiangin ka mittui a lo hnàm hman ziah bawk. Chhungkaw aiawhin Sangpuia'n lawmthu a sawi a, ka rin aiin a puitling daih mai. Nia, tlangval kha a ni ve tawh reng reng a, ka nau a nih vangin ka la ngai naupang mai mai pawh a. Ka pa chhungte lam pawn min tawiawm tha ve khawp mai. Ka pa khan a ngaihsakin a pui nasa bawk a, ka nu chhungte lam erawh tumah an rawn dikdak lo. Kan vui hran lo, kan mamawh lem lo bawk nen. Thalai an tin hnu pawh chuan kan mal lo khawp mai. Min riahpuitu an awm nual bawk a. Mala leh Ruatsanga pawh an riak ve. Roger erawh ka hmu lo. Ka lo zawng rilru ve deuh em mawni dawn ni, Hluteii nen khan ni daih se, inrem takin tiin duhthu ka lo sàm sak. Mahse, keimah anga Hluteii a treat dawn a nih chuan Hluteii ka lainat viau ang. Roger hi misual chu a ni lo, mahse, a hma a sial bakah tharum thawh a duhna hi a thunun hman thin lo a ni ber. Tu tak chhun ang maw? Pa Zirsanga tlangval lai hian insual te hi a lo hrat viau em mawni dawn ni? Em em lutuk a. 

Ka intihfai zawha ka mu tur chu Mala'n, "Nangmahin mu tawh ang che" ka beng bulah a rawn ti sup a. Ka hawihai deuh, mahse, tlaia Dave nen kan mudun kha min rawn hmu a ni maithei. 

"Umm" ka ti ringawt a. 

"i awm a nawm loh chuan min lo bia ang che. Lut rawh le" tiin ka pindanah min nawrlut a. An ni ho chu mikhual roomah leng vek hek lo, chhuatah an mu dawn a ni. A nuam phianin ka ring. Hmeichheho erawh an haw deuh vek a, U Loicy leh Ruatdiki an la awm. An ni pahnih chu mikhual roomah an riak thung dawn a ni. Sangpuia pawh chhuatah a va mu ve daih. Remruata erawh chaw eia a rawn chhuah bak kha a pindan a la chhuahsan leh miah lo. Ka mut hma khan ka nu kha ka han en a, a la mutui hle. Amanda te nupain in chungah an riahpui ve dawn thung a, a va thlamuanthlak tak êm. Mahse, a tawpna erawh ka pa a awm tawh lo tih a ni zel a. Ka rilru a mangin a pik leh ngawih ngawih thin. Tlaia ka muthilh vang ni maw ka mut a chhuak reng reng lo mai a, Phone lah ka khawih tha peih bawk si lo. Ka let ka let a, Chutia awmze nei lo va mut tlawn reng ai chuan tiin ka pa lehkhabu min pekte kha ka chhiar ta mai mai a. Hriattur pawimawh a tam ngei mai. Mahse, a taka ka hmanchhuah hunah ka bel viauin ka ring. Ka chhiar zawh hmain ka lo mutthluksan daih a. Ka harh chuan a lo vawt suk mai a. Puan pawh ka lo la sin reng reng lo chu niin, ka han sin tha leh te te a. Ka chhing leh ta vang vang a. 

"U,úu..lo hawng teh" Sangpuia aw tial ruan ka hriat rual chuan ka inbengkang vat a. Dar 4 a lo pel tawh. Hmanhmawh zetin kawngka ka va hawng a. Sangpuia hmel chu a dang var pap mai. 

"Eng nge?" ka ti vat a. 

"Rem..Remruata a awm lo" a ti sehchilh nak a. Ka vawt nghal sung sung mai. 

"Ka nu i hrilh lo tiraw?" ka ti hawk a. 

"Aw..ka hrilh ngam rih lo. Engtin nge niang?" hlauthawng tih hriat ngawih ngawih hian a ti a. 

Midang pawh chu an lo harh vek tawh a. Remruata thawm reh lutuk leh rawn dikdak lo lutuk chuan Mala ngaih a titha thei ngang lo nge ni, Sangpuia chu Remruata room enfiah turin a tir a. An hlauhthawn ang ngeiin a lo awm ta si lo chu an lo hlauthawng em em a lo nia. Kei pawh ka hlauthawng kher mai. 

"ka pa thlan in en tawh em?" ka ti a. An bu nghut hlawm. Khawiah nge a kal ang aw. Mahse, ka chhungrilah hian ka nau chu kan bulhnai maiah a awm tih hriatna ka nei tlat mai a. 

"Farm khu entha leh teh ang u. A awm ka ring tlat" ka ti a. Kan chhuak ta dial. Farm-ah chuan Remruata chu kan zawngkual ta a, A zauh ve deuh vangin kiltin fang lawr turin ka ngen a. Kei pawh farm house hnunglam panin ka kal nghal. In hnung lamah chuan tumah ka va hmu lo. Mahse, ka din reng laiin Ruatsanga hian, "Hetah a awm e" a rawn ti ta lauh lauh a. Ka inher nghal zawk. Remruata chu kel in hnung lama Theihai buk hnuaiah a lo thu ngawi reng chu niin. Kan va hmuh lai pawh chuan a chechang eih lo. Ka ko a, a ngawi hmuk bawk si. Ka va kal hnai a, a hmaah thuin, "Remruat, ti nge hetah i awm? Haw ang" ka ti a. A kutah ka vuan nghal bawk. Ka kut chu a thingthla vat a. 

"Apa kha lo nung leh thut se, a hrehawm dan tur saw..Ú, I khawngaih ve lo mi? Apa saw chhanchhuak ang u" a ti ta mawlh mawlh a. A mitmeng reng reng pawh a á ruai mai a, ka nau hi a dik lo tawp mai. A mizia ngaihtuahin chutianga a awm chu a mak vak lo, Doctor rawnsak a la ngai ngeiin ka ring. 

"Ka pa chu a thi tawh alawm. A awm tawh lo, vanah a awm tawh. Hawh, haw ang" tiin kaih ka tum leh a. 

"Aih, enfiah phawt ang" a ti leh tlat. Mala chuan, "Ka nau, Lungngai mah ta che, mu hahdam la, zingkarah mi ka lo enfiahtir vek dawn nia. Tun ang zan thimah chuan chet ngaihna a awm lo alawm" a lo ti vat a. Remruata chu a tung tho a, a tang deuh naa, a tang na ta vak lo. Ruatsanga nen an kuah chho ta a. Sangpuia nen an hnungah kan thlir zui vawng vawng a. 

"Doctor hmuhpui ngei a la ngai dawnin ka hria" ka ti sep a. A bu nghut. "Vawiin hi chu ngaichàng ila, a tul tak leh naktukah i han chhohpui dawn nia" a ti a. In lam kan pan ve nghal. Remruata chu Sangpuia'n a riahpui ta ringawt a. Kei erawh ka muhil leh tawh lo. Ka pa rauhsan tak kan in chhung chu a ruak ngawih ngawih niin ka hria. Tawngtai dawn lahin ka hul hlauh bawk si. 

Tukthuan chu ka nu pawn a rawn ei peih ve tawh a. Ni 2 kar lekin a hmel a tla dáwk a, a tino sen siah te kha an dáng bai mai a, a cher kuam bawk. Thlan nghah ni mah nise, Khawpuiah chuan mi kan buai tawh avangin programme hranpa siam a ni tawh ngai lo va. Chhung leh khat bakah thenrual thate an rawn leng khawm tho a, Ka nu pawh a inbual fai sar hnuah a rawn lang ve leh a. A hmel pawh a harhvan hmel ta deuh e. Inlengte pawh a lo dawngsawng peihin a lo chiauau peih ta a. Rilru pawh a nuam huai e. Remruata pawh a rukin kan vil ran hlawm a. Tukthuan pawh a ei ve mai. Mahse, mi nawlpui bulah a khawsa thei lo niin ka hria, a buai dawn lek lek zel a. Farm lamah ka hruai thla ta ngawt a. Thalai deuhte chuan min rawn tawiawm bawk. Farm house-ah hian rawng kan bawl hrim hrim bawk a, a remchang phian mai. Dave pawh a hna vangin a haw rih a. Zanah a rawn kal leh ang. Ka pa thih sarhu lai chuan dawr hawn loh kan tih avangin Ruatsanga a la awm a, Mala pawh hna a neih vangin a haw. Kan tibuai tam tawh a, chawlh hahdamte pawh a mamawh ve tawhin ka ring. Chawhnu herah ka rin loh deuhin ruah a rawn baw hawk mai a. In chhungah kan tlan lut hlawm a. Remruata chuan,"Ú, Apa thlanah sawn nihliap dah ang u, vawt a ti dawn lutuk" a rawn ti leh ta. Sangpuia nen kan inmelh zawk. Thuawih takin nihliap lian deuh hi ka pa thlanah chuan ka va dah ta a. A lungawi ta a niang, engmah a sawi tawh lem lo. Ven ruk erawh a ngaiin ka hria. Tlema ruah a han deuh lai chuan Roger hi farm house lamah a rawn chhuk thla ve hlawk hlawk a. Ruatsanga'n ka beng bulah, "Sangzual, tlawm miah suh" a rawn ti teh ngawt a. Mak tiin ka lo melh hàw ringawt. Roger chu ka bulah a rawn thu ta chat a. Hmel pangngai ka pu lui hram hram a ni e. 

"A la sarhu sia, i rilru tihbuai ka hreh a. Rawn lan vak pawh ka duh lo nain vawiin chu ka ngaihtuah deuh che a" a ti zung zung a. A tawng hmangah chuan min la ngaihzawng treat deuh niin ka hria. 

"A pawi hleinem, i buai dawn nen..rawn lan kher a ngai lo a nia" ka lo ti ve mai a. 

Midang hriat phak loh tur si hian, "I la lungawi lo reng em ni?" a ti sup a. 

"Kan sawifel vek tawh kha.." ka lo ti sap. 

"Thinrim laia thutlukna siam a tha ngai lo" a lo ti daih. 

"Ka la ding nghet reng e. Nang leh kei chu thian aia thui kan kal thei tawh lovang. Min hrethiam rawh" ka ti ta a. Kei pawn midang hriat ka duh bik loh vangin ka tawng zawi ve tho a. A nui lui hawk a, "I mak mang e. " a ti a. Ka nui ringawt. 

"Mipa dang vang a ni lo tiraw?" a ti leh a, ka lu thingin, "Tun dinhmunah ngat phei chuan mipa ngaihven thei ka ni rih lo. I hriat kha" ka ti a. Pangngai taka kan sawidun thei chu ka lawm ru hle. A thinrim leh vak chuan a mualphothlak dawn êm a. A thik ber Mala a awm lo bawk a, a zia e. Tlai lamah zanriah tur kan bawl laih laih a. U Loicy leh Ruatdiki hi ka va fak tak êm. Min tihhlim dan an hre bawk si. 

Khaw thim hnuah Mala pawh a rawn lang leh hlawl mai. Min rawn kai hrang nghal hmak a, ka lo hamhaih deuh, Farm house pindan ril lamah min pawt lutin, ka kut chu na fê hian a hmer a. 

"Rogera bulah eng thil tehchiam nge i sawi? Ka duh loh dan lutukin thil a thleng asin" a ti ta mai a. Ka hrilhhai kher mai. 

"eng nge a awmzia?" ka ti nghek a. 

"Bar atangin ka va hruai haw alawm. A ruih dan chu pui tak a ni. A na hle niin ka hria" a ti ram hmak a. Ka thinrim thut, "Engmah ka sawi lo, chuan ani chu ka then tawh a, a bak a awm lo. Eng nge chutah chuan i lo buai ve?" ka ti ta bawrh bawrh a. 

"Roger hi ka thian a ni alawm..lainatna leh khawngaihna ka la pianpui ve a nia. Khati taka inngaihzawnna a lak nat kha ka la hre ngai lo va, ka lainat a ni. Sangzual, mihringte hian chance vawikhat tal chu kan phu vek asin" ka mita melh ran chungin a ti ta a. Ka na zawk zawk mai. 

"Chu! Roger chu ngaidama kir leh turin min duh tihna maw?" ka ti tuar. 

"A sim tawh beiseiin ka sawi" a ti hul hak a. 

"Malsawmpek, a tawk. Nang leh i thiante hi ka mamawh lo che u, min fiamkual hun chu a liam tawh. Ka duhtawk e" ka ti sap a. Chhuah ka tum chu min pawt let dawrh a, ka eu zawk nghe nghe. 

"Hei hi ka hrethiam lo. Roger hi ngaidam la ka tih rualin a tihnat leh che ka hlau bawk si. Ni lo, Sangzual, Rogera tan hian ka phal pumhlum bawk si lo che a, Ani ka thian a ni bawk si. Min ti á takngial dawn" min sawi nawk nawk chung chuan harsa tih hmel zet hian a ti khur ta dat dat a. 

Mittui tling pam chungin, "Mala, ka la duh reng che. Ti nge hnawk kan insiamsak tawn zel a?" ka ti ta a. Ka aw chu a zawi kher mai. Thúk zeta min rawn melhin, "Ka lak atangin thlawk chhuak tawh lo la tiraw?" a ti zawi sup a. Ka bu nghat ringawt. Ka lungphu erawh rang tak a ni. Ka tah a chhuak tel bawk. 

"Mahse, Rogera hi dam phawt rawh se" a ti dam thlup a. Hrethiam lo takin ka lo melh, "A dam vat ang. Mipa chak tak a nia lawm. A hliam tipunlun zawnga kan khawsak khum chuan ramsa rilru a pu palh ang e" a ti leh a. Ka hrethiam e. 

"Ka chhuak dawn nia" ka ti a. "Lawk" tih leh min rawn fawh a rual a, ka lo chhing tawp. Mala nen kan infawh vawi hnihna a ni. 

"Kal rawh, ka rawn chhuak nghal ang kei pawh" tiin min nam chhuak a. A tuamah chuan min lo úksak lo hlauh a, ka lawm angreng. Zanriah pawh chu kan ei ta vat a. Ka nu pawn rin aiin a ei tam ve. Remruata erawh khua a thim rual khan a hawi a hawi a, a mitmeng pawh a buai leh tan. Sangpuia nen kan mitmei ru reng thung. Chaw eikham kan intihfel laiin U Loicyin min rawn ko tuar tuar a, ka va chhuak vat. Ka thil hmuh avang chuan ka ding khawng reng ringawt. Ka nau Remruata chuan ruah mal tla fuap fuap karah ka pa thlan a lo hai mek chu niin. Ka nute ho pawh an rawn chhuk thla lo thei ta lo va, ka nuin a fapa awmdan a hmuh chuan a tap leh ta rawih rawih a. Sangpuia nen Remruata chu kan va dang vat, mahse, a mitmengah chuan eng emawni a awm, a hlauhawm riau bawk. A bawngtuthlawh ken lai chuan min tin ta ur ur a, "Tumah rawn kal hnai suh u. Ka pa hi nangmahni vanga thi a nih hi, phum ka phal lo chung in phum lui a. In tuar ve khawp ang" a ti ta piap piap mai le. 

"Ka nau..duhtawk teh" ka ti thei táwk. Chauh hmel em ema ka pa thlan vúnga thu thla hnawkin, "Kha pa khan min hrilh vek alawm, ka pa chu a rawn nung leh dawn tih..mahse, lei hnuaiah in phum daih a, tunah chuan a thi tawh ang" a ti chuai raih a. Ka nu chuan tap chungin a rawn pawm thlawp a, kei erawh ka chechang thei meuh lo. Tu nge kha pa a tih chu ni ta ang le? Ka pa thihna chuan ka nau ze nghet cherh chawrh, rualpawl lo leh tuallim lo tak chu a nghawng na hle tih a lang. Tin, eng emaw tak tibuaitu a nei tlatin ka hria. Ruatsanga leh Mala ten an va kuah tho vat a, In chhungah kuah lutin, am chiu mu ta tawp mai. Naktukah chuan doctor hmuhpui ngei a ngai dawn a ni. 

Kan ngui riai hlawm mai a. Han phur hluaina chi pawh ni lo chuan. Farm chu chhuahsanin inah kan chho ta hlawm a. Kan boruak uap churh tihdanglam tum takin Pa Tluanga chuan, "Sangpuia te inneih hun tur sawifel turin naktuk zing lamah kan va leng leh dawn chu a nia. Kei a sarhu lai hian ti nghal búng búng ila ka duh mai. A rei chuan kan huphurh zel si a" a ti chuar chuar a. 

Ka nu pawh chuan, "Nia, ka lo ngaihtuah ve chiah, lehlamah han rial dawnin Naòmi lah naupai a ni tawh a, a khawngaihthlak ka tia. Khalam kha chu in thu thu a ni e " a lo ti ve thliam a. Sangpuia erawh a ngawi reng. He pa pawh hi a khawngaihthlak ka ti, a hmangaih loh a bansan tawh hmeichhia kha a neih a ngai miau si a le..lehlamah ka nute thutlukna hi thain dik viau mah se; an fate nun an tichêp thei ve thoin ka hria, an inthen leh daih phei chuan a ho duh viau ang. Ka nau dik loh chu ni mahse; ka nau a nih angin ka khawngaih lo thei bik si lo va le. 

Thalai leng pawh a tawp zan a ni bawk a, an rawn thahnem viau mai. Zai pawh a nuam e. Mala nen kan thu dun rial a, ka kut chu mi hmuh theih si lohin a hum vang vang reng a, ka lasawn phal bik lo. Dave erawh a nuteii BP sang vangin a rawn lang thei ta lo va, a ngaihawm viau. Thalai an hawn hnu chuan, Remruata chungchang chu khunkhan deuh zawkin kan sawi ta a. Keiman ka han chhohpui dawn a, Ruatsanga emaw Mala emaw ten min kalpui ang. Pa Tluanga hi ka pa thianpa a nih angin pa ang thawthangin kan en bawk a, eng emaw chenah kan chhungkaw thutlukna pawh min siampui a ngaih vena chin a awm. A lo awm ve hi a thlamuanthlak khawp mai. Mu tura kan han insingsak hnu chuan, kei pawh ka pindan lam ka pan a. Ka inthlak hnuah ka mu nghal thlawp. Eng em em ti si loin ka chau em em ringawt mai a ni. Ka phone chu ka'n hmet ve leh thuak a, Rogera msg pakhat a lo awm ve khiau, "Sangzual,. I duh angin le. Ka tihsual rah chu ka phur ngam ang. " tih a ni. Mipa a ni ka tih tawh kha. Status ka view laiin msg a lo lut a, a tone avang chuan ka en nghal vat. Malsawmpeka chuan, "Kawngka kha kalh kher suh aw. Buaina eng emaw a awm takin" a rawn ti a. 

"Rawn luh i chak vang a nih kha" ka va ti a. 

"I zak lo. I beisei vang a nih kha" a rawn ti. 

"I zak lo fee, ka kalh tawh. I lo nek hawng mai dawn nia" ka va ti el leh a. 

"Thansangzual, mu rawh. Muttui..mumang tha lo lakah ka lo veng ang che. " a rawn tih chuan ka nui sak. Mala hian ka pa vanga ka tawrhna nasa lutuk tur hi min chhawk ka ti lo thei lo. Ka lo duh hi ka inchhir hauh lo mai. 

"Ú, amah kha alawm ka pa thattu..amah kha" Remruata mitmengah chuan thlabarna a chambang a. 

"Tu maw?" ka lo ti hú a. 

"Saw pa saw mawle..saw pa saw" tiin kawng thlang lam chu a kawk vú a. Ka va thlek chuan, Mi pakhat hian min lo en reng a. A hmel ka hmuh chian rual chuan ka rak thawt a, Remruata chuan ka beng bulah, "Amah ngei sawn ka pa nunna kha a la a ni. " a rawn ti leh sur sur a. Ka beng hupin ka rak tuar tuar a, Remruata chuan ka beng hupna chu lakthlak tumin a lo vuan ve nasa mai bawk a, kan inelh ngat ngat hnuah Motor atang chuan ka lum chhuak ta hlawl mai a. Ka harh nghal káwk..chhuat daiah ka lo mu reng mai. Khum atangin ka tla thla a lo nia! Chu mangchhia zet chu!