malsawmpeka 10

MALSAWMPEKA (10)

Ziaktu: Toni Rálte

Kha mitthi kha Zorampianga niin, Jail atanga a chhuahna kar khatna chiah a ni. Thil ruk vanga jail tang a niawm e. Aizawl salem venga khawsa niin a nu leh a farnu te pahnih nen an cheng a, amah hi zu leh pills rui thin a niawm e. A jail tan hma pawn an inah hian a cheng tam lo hle a, a chhungte pawn ngaiah an nei deuh tawh a nih hmel. Tin, a ruih changa ruihsual ching tak a nu leh a farnute rikrap ching a ni a, vawi hnih phei chu khawtlang hruaitute pun hial ngai khawpin a lo ríkrap tawh a ni. Mahse, ka ngaihtuah a, eng mi pawh nise thih phú hi kan awm lo ka tia, mihringte hian kan nunah vawikhat tal chance hi chu kan nei ve vek ka ti. Engvanga kan farmah khan thi ringawt nge a nih ang le? Tu pawi nge a sawi tak ang aw. A thattu an chhui chhuah ngei ka beisei. Mala ka ngaihtuah a, ka ngaihtuah chhuah rualin Ruatsanga ka text nghal, "Nizan khan Mala chu taxi nen an lo insu thawi deuh a ni maw? A zia lo e" ka va ti a. Ka rilru chhungril taka ka ringhlel tlat hi a mak ka ti! Mahse, ka tireh ngawt thei si lo. 

Ruatsanga chuan,"Nia a zia lo khawp mai. Taka! In farm-ah rawn thi ringawt chu a zia lo hle mai" a rawn ti a. 

"Nia an chhui chhuak vat turah ngai ang" ka va ti a. Mala ka lo ngaihdan chu a dik lo tih ka hre ta phawt. Bakah ti nge a thah a nih ang? Thah ngawtna chhan tur a nei lo. Mitthi chungchang titi a tam sia, nuam pawh ka ti lo. Hawn vat vat ka chak. Class lah chu an la rei phian a. Roger msg a rawn thleng a, "Lunglei kal kha ka thulh leh. Gauhati ka zuk chhuk lawk a ngai thut a" a rawn ti. A pawi lo, lehlamah fimkhur a tha bawk nen. Last period kan kal laite chuan ka za sek mai a, ka helhhawlh ve ringawt, a chhan pawh ka hre chuang lo. A tawpa tawpah kan bang ve hram. Mala pawh hmuh buai tum lem loin ka inkhalh haw nghal a, ding takin kan in ka pan nghal. Ka nute chu farm lamah an lo awm a, Amanda pawh a rawn lang ve. Kha pa thihna case kha a la dawn a ni maithei ni. 

Ruang chharna lai te chu an han endik leh a, hmuh tur em em a awm lo. Postmortem result ka hriat ruk danin reh hlum niawm tak a ni. A rektu chu palian lam deuh a nih a rinawm nghe nghe. Zorampianga chenna hmunah te pawh an va kal tawh a, sawi tawh ang khan jail atanga chhuak hlim hlawt, chhungkaw tana tangkaina nei tampui lo tak a ni tih bak an va hre lem lo. Mahse, mak ta ber erawh kan farm house-a a rawn thi ringawt kha a ni. Zanriah kan ei laiin ka pa chuan Sangpuia a zilh malh malh a, Naòmi chu tha taka enkawl tur leh a fa paitu a nih hrereng turin. Sangpuia erawh a ngawi reng thung. Remruata erawh a ruang hmuh khan a la nghawng deuh nge a ngawi run run reng mai. 

Zanriah eikham hlim hlawtah Pa Tluanga a rawn lang hlawl mai a. Ka pa nen in chungah an innawr chho nghal. A pawimawh viau a nih hmel. Rogera pawn rawn len a tum thu leh a rawn chhuah dawn mek thu a rawn sawi a, ka nuin, "I zirna tibahlah khawpte khan in inzui ang e aw" a ti hlak. Ka ner khum ringawt. Kar loah Roger chu a rawn thleng a, a thut rualin farm house-a ruang chhar chungchang a sawi ve nghal. 

"Fimkhur deuh ula a tha ka ti. A den tlat" ka nu en pahin a ti a. 

"Ni ngawt mai, i bialnu kha a fimkhur lo ber" ka nuin a ti nghat. Roger chuan mi rawn melh a,"Zanah phei chuan nangmahin chhuak miah suh" a ti nghut a. Ka bu ve ringawt. Pa Tluanga a rawn chhuk a, rei pawh thu khawmuang lovin a haw nghal vut. Eng tak sawi dun ang maw? Ka nu pawh a chho ve nghal a. Ka naute pawh an pindanah an awm. 

Roger nen chuan kan thu dun ran a. Kan insi chát mai. Ka kut a rawn vuan chut a, "Lunglei kal dun kha ka chak asin le" a ti sup a. 

"Hun dang a awm mai ang" ka ti a. 

"Chuan maw, Sangzual, thil eng emaw hriat ka nei a" thutak fê hian a ti a. 

"Eng thu nge?" ka melh nghal háw a. 

"Englo a nia, ih, i pa hi sawrkar lamin a rukin an veh niawm taka sawi a awm a. A sumdawnnaah hian sawrkar phal loh thil a awm te an tia, ka chiang bik lo. Chu chu nia tuna Zorampianga thihna nen pawh hian a inzawm ang em aw ka lo tia" a ti ta a. Ka ngawi dat. Ka pa chungchang chu ka rin aiin a darh chak dawn tlat mai a. 

"khawi atangin nge i hriat?" ka ti sap a. 

"Ka nu leh pate titi ka hriat ruk atangin a nia. Mahse, a sumdawnna hi chutiang lam a ni bawk si lo" a ngaihna hriat loh hmel fe hian a ti a. 

"Nia, kei pawn ka lo hre tawh alawm. " tih chhanna bak ka pe thei lo. 

"Engpawhnise, engkim a tha leh vek ang. Beisei ang. " a ti a. Ka kut a hum vawng vawng. Ka thla chu a timuang deuh. Mala chungchang ka zawt chak hle, ka ngam chiah si lo. Mahse, amah zawk chuan, "Mala pawh Rinpuiiah hian a nghet ve riauin ka hria. A tha..tihian nei ve rawh se" a ti ta a. 

"Rinpuii hi eng ang mi nge a?" ka ti a. 

"Nang ai chuan a te hlek ang, a hmelchhe lo, a felin a hawihhawm bawk. Mala nen hian eng titiha inchhar nge an nih pawh ka hre lo, Pu Thanchungnunga atangin a ni maithei" a ti a. Ka zawt zui ngam tawh lo. Dar 9 velah Roger chu a haw ta a. Kei pawh mu turin ka intintuah. 

Ka mut hnuah Nunui msg ka dawng a. Rilru a hrehawm duh hle mai.

"Sangpuia chu ka dem lo a nia. Mahse, ka block rih ta mai. Min lo be reng sia, ka tan a hrehawm mai mai. Nupa hlim tak ni rawh se. In chhungkaw laka ka rilru erawh a la ngai reng aw" a rawn ti a. Chhan dan tur ka bangbo riau. 

"Nunu, keini pawn pawi kan ti lutuk asin, mahse, ka nu leh pate hian kan tette atangin thutlukna fel tak an lo siam tawh sia,Naomi ai chuan nangmah i tla na zawk" ka va ti ringawt. Roger nen kan inmangtha zui a. 

Kei pawh phone dahin ka pa hmalam hun tur ngaihtuah chungin ka muhil zui ta a. Zing karah ka nuin min rawn kaitho hma angreng. Ka va chhuah chuan, "Vawiin chu class kal loin dawr lamah hun i va hman a ngai. Ruatsanga'n a rawn lam dawn che" a lo ti nghal zat. Ka va phur lo ber tak. 

"Ngati tehthut nge?" ka ti hú a. 

"I pa duhdan a ni. Zirna i chawlhsan thut pawh a ngai maithei. A lehkhabu pek che kha i chhiar tawh em?" a ti thut a. Hamhaih zetin,"Ehe! Ka la en mang lo reng reng" ka ti chul a. Min melh no lo khawp mai. Ka intifai sawk sawk a, Tukthuan kan ei laiin Ruatsanga a rawn lut. Suit nen a rawn induang zaih mai a. A palian sia, a inhmeh tak tak a ni. Ka nuin, " Nang pawh i khawlai dress te kha i inbel leh ngawt ang e, Ni deuh thlap ang che" a ti a. Ka va peih lo tak e aw. 

Ka insiam a, Pawnfen chhing dum ka feng a, Ka nuin ka kawr hak tur min lo thlansak. Huiham..ka smart ve thei hram e. Ka va chhuah chuan Ruatsanga chuan nui suk chungin, "I ang lo hle mai" a lo ti a, ka lei ka chhuah khum zuk. Ka nuin kawtkai thleng min thlah leh thlap. 

"I pa kha nizan khan a va pawimawh awm em em, a rawn kal thut sia" ka ti a. 

Thawk la hawkin,"Kan hriatpui ve loh thil a niang" a ti nghut a. 

"chuan, Dawrah chuan eng nge ka tih ber dawn?" ka ti hê háw a. 

"Dawra hnathawkte i hmu ang, Zirna chawlhsana i thawh thut a ngaih hun atan i pain lo inhmakhua lawk la a duh a ni" a ti ta a. Nia, ka pa sumdawnna hi a len deuh avangin hnathawk pawh a ngah, ka hre sêng kher pawn ka ring lo. 

"Chuan, i Asst. Thar ka ni tawh tih i la hriat loh takin" a rawn tih chuan ka hawihai hle. 

"Ka pa sawi em ni?" ka ti vat a.

"Umm..keiman engkim ka hrilhfiah zel ang che. Ka pi" a tih chuan mi run deuh nge ni a bengah ka va pawt a, "Kut thawh ziah suh. Mala pawn kawlh a tih teh che kha" a ti a. Mala a sawi chuan ka thu tha vat. 

"bialnu a nei tak tak em ni?" ka ti nghat a. 

"A nei ve chu a nih hi, Rogera i kawpsan tak si-ah chuan" a ti a. Va melh hráwkin,"Keimah vang a ni teuh lo" ka ti hlar a. 

"I awih tura sawi pawh ka ni chuang lo a nia" a ti mai a. A va ngeiawm reuh tak. Dawr kan thleng a, Main-ah hian thawktu an tam ber a, kei tak chu vawi hnih chiah ka la kal. 

Kan han chhuk chu ka pheikhawk heel a thlawn daih! A man a to tehlul nen aw. Ruatsanga chuan,"Engtin nge maw i rah bik le?" ti chungin a heel bung chu a zu chhar a. Kei erawh ka lo ding reng ringawt. Chutihlai tak chuan nula hmeltha leh no zet mai, model ni mai awma pian dik leh a thiannu ten min rawn kalpel fua a. Rawn let lehin kei chu ngun zetin min rawn melh a, ka ke an melh lai chuan ka lo îp deuh. Nula hmelthai chu a nui sak a. 

"Boss fanu i ni tiraw? Sangzuali kha" a ti a. A aw pawh a mawi hle. 

"Aw ni e" ka lo ti ve mai a. 

A kut rawn phar chhuakin,"Mimi ka nia, ka thiannu hi Ahlimi. In dawrah hian kan thawk ve mek a ni. Kan lo lawm a che" a ti a, ka lo vuan ve chat. Ahlimi chuan nui sen sen chungin, "I heel a tla a ni maw? " a ti a. 

Ruatsanga chuan ka kuta rawn kaiin, "A nih hi, lut phawt ang. Tihdan a awm ang" a ti sup a. Kan vai chuan kan lut ho ta a. Thawktu te an fel hlawm kher mai, min lo lawmin hmel hlim tak min lo hmuh zel a, Mimi bik chu Customer care cabina thu a lo nia. Customer te han biaka han tihtlangnel a thiamzia Ruatsanga pawn a sawi ve fuk fuk mai. A lawmawm thin e. Ka pheikhawk pawh an lo siam tha a, zangkhai takin ka vak leh thei ta. Department tin te kan han fang kual a, engkim chu a nih dan tur ang thlap a ni e. 

Chhunah in hnuai cafeteria-ah kan chhuk a. An eitur siam pawh a tuihnai hlawm kher mai. Ruatsanga chuan call a dawng a, a va bikbo hnuah a rawn lang leh a, ka ngaihbel nge a hmel a thim deuh tlata ka hriat ni. 

"Engkim a tha maw?" ka ti a. 

"Zorampianga thattu niawm tak an man thu ka dawng a. Sawrkar mi rawih a niawm e. " a ti ta a. Mak ka lo ti hle. 

"Eng nge a awmzia?" ka ti hluai a. 

"Zorampianga kha i la hriat loh takin jail chhungah khan ZCP lam ten spy ang deuhin an hmang thin a, sum a mamawh avangin a lo thawhsak thin a niawm e. Jail atanga a lo chhuah khan i pa bulah information pek tumin a rawn kal a ni maithei. Mahse, chu thil chu lo hre ruin sawrkar lamin an dah tha ta a ni mahna. Mahse, thuchiang a la awm lo. Zorampianga taksaah samzai an hmu a, chu samzai atanga an sample lak atangin rinhlelh an nei rih chauh" a ti ta duah a. Ka hriat ve loh lam hlir hi ti nge maw ka tawn reng le..

"Tu nge lo bia che?" ka ti a. 

"malsawmpeka" a ti nghut. Ka ngawi ta daih a. 

Chawhnu lam chu inzir nan ka hmang a ni mai e. Ka thluak pawh a chawl mang lo. A khat tawkin Zorampianga rilruah a rawn lang ve leh zauh thin. Ka hne. Ruatsanga'n min thlah haw leh thlap a, rawn pengkawi loin a tlan haw leh nghal. 

Zaninah Sangpuia palaite an va kal tawh dawn a. Titi dang rawlhna chi pawh a ni rih lo. Sangpuia lah hi a nguaiin a túm búr reng bawk si. Zirna a tan leh tawh a, a ke pawh a hmang thei tawh viau. Thleng ka sil laiin ka pain Amanda hnen atangin call a dawng ta a. 

"An rawn kal. Man tur chein" a rawn ti! Kan ngawi ta thap mai. Ka pa hmel erawh a dam thlup reng a, hlauthawng leh chiâi hmel a pu lo. Ka nu erawh tahchhuak insum tak angin a awm a. Ka naute erawh an pháwk hle. Amanda nen an inbiak atanga darkar chanve velah kan kawngkapui chu an rawn kik ta a. Keiman ka va hawng, Police uniform ha mi pahnih an lo ding ran a. Ka la hmuh ngai loh an ni. An rawn lut a, kan awm vek laiin ka pa bulah, "I hun kal tawha i mi thah tawhte avanga man i ni e" pakhat zawk chuan a ti a. Kutkawl a rawn phawrh nghal. Ka nu chuan a hmui a lo hup ngawt ngawt ringawt. Ka pa erawh chuan a wheelchair chu kawkin,"Min zawn chhuah a ngai ang" a ti sup a. 

"Pa" ka lo ti nghek. Min rawn melh a, ka nu a melh leh. "I nu leh i naute hi tha takin lo enkawl ang che. Dawr pawh i kutah a awm rih e. Ruatsanga khan engkim a hrilhfiah zel ang che. Chuan, Sangpuia palaite pawh in lo ngaicháng dawn nia" a ti mawlh mawlh a. Ka ngaingam thlawt lo. Ka pa tel loin engtin nge nun bul kan tan tak ang? Ka pa an zawn chhuak lai chu kan lo thlir thap a, lung a chhia a, mang a ang a ni. Ka pa chu an phur liam ta vung vung mai. Ka nu chuan, "A ukil be nghal rawh" a ti a. 

Ka pa ukil Pu Vanneia number ka hmet chhuak nghal. 

"Ka pu, ka pa an man" ka ti teh tawl a. 

"Ka lo hria e, lo lungngai suh u. Naktukah ka va hmu dawn e" a rawn tih chuan ka thêp suai suai mai.

Remruata lah chuan,"Ka pa chuan tunhmain tual a lo that tawh a maw?" a lo ti ve sek a. Ka pa document engmah an la hmu ve si lo va, an bangbo viau pawh a awm reng mai. Ka nu nen erawh hrilhfiah pawh kan tum chuang lo. Sawi thui a ngai rih dawn êm mai. Rogera'n min lo call a, "Ka thuhriat hi a dik em? An rawn puang zo chiah, i pa an man ta a maw?" a rawn tih chuan ka lung a rawn chhe thar leh. 

"Aw an kalpui tawh" ka ti sep a. 

"Lo kal turin min duh em? Meeting chu ka nei nain" a rawn tih chuan,"A ngai lo, mahnia awma inngaihtuah ka duh" ka ti a. Tumah ka kawm peih rih lo. Ka nu pawh in chungah a chho a, a han lungngai viau maithei a ni. Ka vei ka vei a, eng nge ka tih ang ka hre lo. Call ka dawng a, Mala ni lo se chuan ka la lo vang. 

"Hello" ka ti sap a. 

"Engkim a tha leh vek mai ang. Evidence phawrh tur an nei lo, lo lungngai lutuk suh u" a rawn ti nghal hmiah a. Engkim a hre vek tawh tihna a ni. 

"Eng nge ka tih ang ka hre lo" ka ti sep a. 

"Engmah tih a ngai lo, tikhan awm tawp rawh. A tha em?" a rawn ti dam thlup a, ka lung a chhe lehzual sawt.

"Ka nu leh ka naute hi an lungngai si" ka ti tiau a. 

"Nang tal chu i chhel a ngai, a ni lawm ni? I chhel em em ang, Sangzuali i nih kha. Naktukah in dawrah ka rawn kal ang. " a rawn ti zung zung a, eng ruahmanna tak nei ang maw? Ka mu pawh ka mu nghet lo kher mai. Msg ka dawng nasa hle bawk, ka pa chungchang an hriat vanga keimah min hmelhriattu te zawhna a ni. Thenkhat chuan min deusawh bawk, Dave msg pawh a awm naa, ka chhang duh rih lo. Nakinah ka hrilhfiah ang. Tui taka muthilh bawrh bawrh ka chak ber mai. A harsa thlawt bawk si a. 

Ka harh chuan dar 7 a lo pel hlek a, thawm a reh hle. Tumah an la tho lo mawni ti rilru chungin ka va tho a. An lo tho thap tawh. Sangpuia tana kan palai va tirhte kha zingah an rawn kal dawn avangin ka nu chuan tukthuan a bawl kep ve nghal a. Ngaihtuah tur thildang lo awm ve chu lehlam zawng tak chuan a tha phian. Dar 8 pelh hlekah an rawn thleng ta a, inhre sa tawh kan ni bawk a, ka pa chanchin an lo hre ve bawk nen, tawngsual an hlau ve hlein ka hria. Mahse, ka pa a khati chung khan an va palaina lamah an va che tha phian a. Mi te tihdan ang thoin chhungkua kan lo inrawn ang tih chu a ni mai a, an fanu a rai tawh ber si a, inneih loh an tih ka ring lo ve tawp. 

"Nu, ka pa hetiang hi a ni rih sia, inneih in tih pawn tun tut tutah lo aw" Sangpuia chuan a ti a. Ka nu pawh a bu ve nghat. Nia, ka pa tel lo chuan engmah hian awmzia a nei lo ve bawk a ni. Kei pawh dawra kal tur bawkin ka insiam leh a, Ruatsanga nen kan chhuak dun leh. 

"I pa vang khan danglam phah miah suh aw. Hnathawk te'n an zuam palh ang che" tiin min fuih a, ka bu nghat. 

"Ka pa hi jail-a a luh i ring em?" ka tih chuan a lu a thing a. "A mi leh sa hi chuti takin an la tlem hleinem, Jail-a nawrlut tur khawpin evidence phawrh tur chiang tak an neih ka ring lo" a ti nghut a. Ka lo muang ve huai huai mai. 

"Mala pawn min rawn hnem ve a" ka ti satliah a. 

"Ka rin dansa alawm. Venhim che a duh a, i pa pawh venhim a duh, mahse, laklawh takah a tàng ve rih si a nih hi" a ti a. A sawi chian fak duh loh vangin ka zawt dilchhut buai peih lo. Dawr kan thleng a, hnathawkte mitmeng atang chuan danglamna chu ka hmu deuh, mahse, ka inrintawk ngaiin ka inringtawk reng a, ka pa aiawhzo ni thei tur khawpa ka tui vak lohna lam kawng sumdawnna pawh chu a beiha beih tak tak ka tum rilru ta hial mai. Chhun chawlh hma deuhin Amandain min lo be hlawl mai a, "Sangzual, i pa i hmu duh em? Tuna a hmuh theih lai hian rawn hmu rawh" a rawn ti a. 

"Ka nu i bia em?" ka tih chuan, "I nu chu a derthawng thin êm mai, tunah chuan hmu rih lo se a tha" a rawn ti ve mai. A dik ve reng, Kan va kal tur thu ka sawi mek laiin Malsawmpeka a rawn lut ta a. 

"I nuin min lo be zo chiah a, Police stationa va kal ka lo tum asin" ka ti var a. 

"Ka va hruai ang che. Ruatsang, lo enpui mai rawh aw" a ti zung zung a. Dawr neitu ni zawk awm tak a ni. Kan tlan chhuak dun ta nghal a. A hmel a tak ngal a, a banrek pawh a la tuam. 

"i ban chu a la na viau mi?" ka ti a. Thutak run kha boruak a rit èm a tin ni.

"Na viau lo e, ka tuam lum mai mai" a ti mai a. Kar loah station pawh chu kan thleng a, ka pa hmuh chu kan dil nghal. Ka pa awmna kan pan mek laiin a ukil Pu Vanneia nen kan intawk a, a hmel a thim khuih mai. 

"Ka pu, engkim a tha em? Ka pa chu a chhuak thei dawn em?" ka lo ti vat a. A lu thing nur nurin, "Pawi ka ti lutuk, min tlankhalh hneh nasa lutuk a. MAhse, theihtawp ka chhuah ang. " a ti bung nghut a, ka hnual rawih mai. Ka pa chu kan va hmu ta a. A chairah a lo thu ran a, a hmel hmuh pawh a hrehawm lem loh. 

"Pa, eng nge chanchin?" ka ti hram a. 

"Tlaiah central jail-a min phurhthlak an tum a niawm e. Min hrenbeh hi an tum êm a, a sarhu lai chuan kan dolet hneh lo a ni" a lo ti ve hmiah hmiah, tlem chuan a rilru a tàwt ve ta deuh tih ka hrethiam mai. 

"Chutin an ti ngawt thei em ni? Finfiahna pawh an nei hleinem" ka ti hluai a. 

"Thiam loh min chantir ngei an tum dawn a, court lamah kan la inbei ang chu..lo lungngai suh u. Zorampianga vang khan an hmanhmawh phah a nih dawn hi" a ti ta a. Kha thil kha zawh chian ka tum rilru kha a nia, mahse, thil thleng a awm leh tak avangin ka zawt hman ta lo kha a nia. 

"Zorampianga kha in mi rawih a ni tihna em ni?" ka ti a. 

"Rawih tih lemah Jail chhung lama an mi leh sate lo thlithlai ru tura kan biak ruk a nia. A rawn chhuah khan information pawimawh tak min pek a tum a ni ngei ang. Mahse, min tlan khalh ta sia. " a ti hniam raih a. 

"Mahse, pa, bail te hi a theih ang em?" ka ti daih.

"Ka ring lo" a ti nghut a. Lehlamah a thil lo tih tawhte kha phawrh fai ta vek se, ka pa chuan inkhaihlumna dawhsan a pan ngei a ngaih ka ring. Ka pa a nih vang chauha la ring phal lo ka ni. 

Mala chu melhin, "I nu hi i theih chin chinah lo venghim rawh aw. An hnaih sàwt viau a nia ani pawh. Mahse, keimah min man hi a thatna a awm. I nu ka sawi fihlim thei dawn a, he lama i nu a la awm theih chuan kei aiin kawngro a su zawk ang" a ti leh mawlh mawlh a, ka bulah pawh zêp neih tit tet kha a peih ta bik lo niin a lang. 

Mala chuan, "Lo ngaihtuah miah suh. Kan chingfel thei em em ang" a ti nghet charh a. Inkan hun an rawn tihtawp tak si-ah chuan duhkhawp lo zetin kan invailiam ta phawt a. Station kan chhuahsan dawn lai mekin Pa Tluanga leh Pa Sangpuia te ka va hmu, ka pa an hmu ve turah ka ngai. Tihtheih nei se ka va duh tak êm aw. 

Mala motora kan thut leh hnuah, "Hmun thawveng deuhah kal lawk ang aw. Hahdam i mamawh, khatiang hmel dâng lutuk nen customer leh i hnuaia thawkte i hmachhawn thei lo vang" a ti bawrh bawrh a, ka lo ngawi reng thung. Ka ngaihtuahna chu a tawi tup a, ka rilru a mang ka ti mai. Mala chuan khawi lam nge min panpui pawh ka hre lo, ka harh leh chuan búng lianpui hnuai kawngpuiah kan lo ding ran tawh a. Chhuk turin min mitmei a, kan chhuk zui nghal. Búngah chuan tumah an lo awm lo va, thlifim a tamin boruak a dai sawng sawng mai. Búng zung thlárah chuan kan thu dun a. Coke rawn phawrhin min hawnsak a, ka lo in ve mai. 

"Fanu upa ber i ni a, i pa thachhang dawltu i ni. I derthawn viau chuan i nu leh i naute chu chhe rup thei an ni. I pawimawh hle a nia" a ti nghut nghut a. 

"A harsa asin. Ka la naupang si" ka lo ti a. 

"Puitling tur hian kum hi a lo pawimawh ber lo. I pa sumdawnna pawh i koah a tla ta chu a nia, tha takin thawk ang che. I pa an man hi lehlamah in tan chuan a tha, in him tawh dawn alawm" a tih chuan ka thin a khei zak mai a. Rum zeta melhin, "I á em ni? Ka pa hetiang dinhmuna a awm lai hian tiang thu kha engtin nge i sawi theih?" ka ti hliai a. 

A khi suk a, "In himna hi i pa pawn a duh ber a nia sin" a ti sup a. Ka chhing sawk,. "Mala, tihtheih i nei lo em ni? Enteh, i bialnu pa kha inspector a nih kha, sawipui dante a awm lo mi? Mawh? Ka pa tel lo chuan engmah kan ni lo" ka ti ta chiam chiam a. Ka mangang ve êm a ni. 

Min rawn kuah thawk a, "Khatin hmeichhe chak lo berte angin awm suh, i inhmeh ve lo. I pa hi ka tihtheih phak piah lam atanga hrenbeh a ni a, Kei chuan ka lachhuak thei lo a ni" a ti dam thlup a. Ka mittui a hnám..

"I nu tal hian tihtheih a nei ang chu" ka ti leh hram a. 

"Ka nu pawh a kut phuarsak tlat a ni alawm. Tihtheih nei nise a ti daih tawh ang. A case IO hi pa khirh ber leh eng lai maha ZCP support ngai lo a ni tlat a. Ka nu pawh a do hle lehnghal, Tunah chuan a ukilah innghat tawp phawt mai ang" a ti leh thluam a. Min la kuah reng bawk, min kuah fet chuang lo bawk a, ka inla hrang phal lo. 

"Roger nen khan zin dun in tum em ni?" a ti thut a. 

"Kan thulh leh daih" ka ti ringawt a. 

"Sangzual, Roger hi a rintlakin i hria em?" a ti leh sup a. A thianthaber a ni sia, engvangin nge chu chu min zawh le?

"I hre zawk lo em ni? " ka ti ta chiah a. 

"A chang chuan ka hrethiam lo fò thin. Mipa tha tak, rilru zau leh kawm nuam tak chu a ni. Mahse, a chang hian a nunráwng deuh thin èm aw tih chang ka nei. Kut a thlak che chuan min hrilh hmasa ber ang che" a ti ta mawlh mawlh a. Mak ka ti ru viau mai. Rogera nungchang a sawi chu, dawt a sawi hauhin ka ring lo bawk. 

A phone a rawn ri ta hlauh a, Rinpuii a ni. A hming lawng lawngin a save, mite chu Honey, Babe tih vel ten an insave thin a ni ngai a. Ka nuih a za deuh. 

"Aw Rinpui" a ti nghal zat a. Lehlam tawng ka hre pha lo. 

"Aw le, tunah chuan ka thiannu nen kan awmdun..zanin chu ka hman ka ring lo, tu emaw bulah ka awm a ngai dawn a. Aw le..aw bye" a ti zung zung a. Amah pawh en lem loin, "Tu bulah maw?" ka lo ti há .

"I bulah mawle. Ka bula i awm hian i hahdam alawm, a ni lawm ni?" a ti ta khauh a. Ka hamhaih bakah ka hrilhhai letling, a sawi dik lo hran miah lo. A hma kha chuan a mi uap kha a na thin êm a, a hahdamthlak loh ka ti thin kha a nia. Tunah erawh kan lamtang tak tak anga ka hriat tak vang nge a bulah chuan him riauin ka inhre tawh a ni. 

"Rinpuii khan min thik ang" ka ti zauh a. 

"Ani thik mai mai, a na lo e. A thik ngam lo bawk ang che" a ti mai a. Melh kàwk chungin, "Hmeichhia te hi infiam nan hmang miah suh aw. Rinpuii pawh i duh tak tak dawn loh chuan beiseina siamsak suh" ka ti ta sak sak a. 

A nui mai a, min rawn melh ve lehin, "Rinpuii hi ka bialnu emaw i lo ti tak tak em ni? I á biang buang siah.." a ti ta zêk a. Ka lo tum khum búr thung. A bialnu ni lose a va rim a va rim lo vang e. Mahse, inhnial moodah ka chen loh avangin ka sawi zui peih lo. Reitawk fang kan thut hnuah kal ka rawt ta a. A lo ding ve thuai. 

Dawr kawt thleng min thlah a, rawn pengkawi tawh loin a tlang ta nghal a. Zana rawn kal a tum thu erawh a sawi hram. Ka lo hnial lem lo, mahse, Rogera hi rawn len a tum ngei ka ring a. Buaina a chhuak leh maithei a ni. Dawr ka luh rualin Mimi chuan nel takin min lo bekbawr nghal bawrh bawrh a, "Malsawmpeka kha..awiii a number min lo pe ve..ka duh êm mai" tiin. Ka ner ru sak, mahse, ka nei ve khiau sia, han inpek loh ngawt kha nuam hek lo. Ka pe ta a. A mitmeng a nung sárh mai, Mala nen ding dun se an chhe lo dun sia, an inhmeh ngawt ang, ka rilrua thikna rawn lut chu hmehmih tumin Mimi chu ka kalsan ta vut a. Vawiin lam chu kan hahdam deuh e. Ka pa bak rilruah a awm thei si lo va, a hrehawm mang e. Tlaia ina ka haw pawh chu in chhung a lo ngui ruai mai. Ka nu bulah ka pa chu central jail-a an dahthlak tur thu ka sawi a, a lo hriat tawh thu chiah a sawi. Ka inbual mek laiin ka nu tawng làwng làwng thawm ka hre ta a, mahse, ka ngaihven duh lo lui. Ka inbual zo, ka inhruk hul laiin ka nu chuan, "Sangzual.." tap aw tiau hian a rawn ti a. Ruatsanga tawng niawm tak ka hre nghal. Eng nge maw thleng le, bathrobe nen ka va chhuak a. Ka nu hmel phelh phang leh ka naute thlabar hmel ka va hmachhawn ta mai a. A ngaihna ka hre lo kher mai. 

Ka nu chuan mittui tling piau chungin, "Prison van a accident a..i pa an la hmu lo" a ti khur hlak hlak a. Ka ding khawng reng ringawt. Chutihlai tak chuan TV-ah an lo puang ve mek bawk. 

"Vawiin tlai dar 4:30-a central jail lama táng tur phurtu, Prison van chu Sakawrtuichhun thlen hma kawng kawiah Truck full load nen insu in, Prison van hi kawngthlangah nekliam niin tunah hian guard pali leh Jail tàng mi 5 hmuh an ni tawh a. Nimin lama an man Ephraime Zothanpuia leh Lalmuansanga te erawh hmuh an la ni lo thung. Guard pahnihte hian an lu-ah hliam na tak tuarin, jail tang tura phurhthlak Mi pahnih te pawh hliam na tak an tuar a, heng hliam tuarte hi damdawi in panpui nghal an ni. Nunna chán an awm em tih hriat a la ni lo. Tunah hian midang pawh zawn mek an ni. Chanchin kan lo update zel ang" tiin an rawn puang a. Ka tha a khurh nasat bakah ka zawi hnawk mai. Ruatsanga chuan min rawn kalpel fuain, "Va inthlak la, kan han chho ve dawn nia" a ti nghut a. Ka harh zawk. Ka roomah lut lehin khur zawih zawih chungin ka inthlak a, ka va chhuah leh chuan Ruatsanga chuan chiang zeta min lo melh kualin, "I pheikhawk kha va thlak rawh" a ti hmuk. Ka'n inen nak chuan a khing inang lo ka lo bun chu niin, ka mangan èm vang pawh a ni ange. Ka va thlak tha leh sawk sawk a, ka nuin call a dawng mek. 

"An hmu maw? Awiii! Chuan..Lalpa leh?!" a tih tak chiamah chuan kan melh thap a. Hlauthawng hmel kan pu vekin ka ring. 

"I pa chu nikhaw hre loin a awm mek. Damdawi in an panpui mek" a ti ta a. Ka váwt leh ta sung sung mai. Ruatsanga nen ka nu nen hmanhmawh takin kan chhuak ta a, Sangpuia te erawh farm house ngaihven a ngai ve bawk si nen, in an lo nghak a. Ruatsanga pawh a tlan chak vut vut kher mai. Kan thleng hma viau, kan thlen chuan ka pa chu ICU-ah an lo dahlut fel chiah. An che rang khawp mai ,an ni lam pawh. Rogera leh Mala te an rawn thleng rual deuhthaw a, thla an timuang viau mai. Ka nu erawh a dáng bai a, milim te pawh a ang lek lek hial, a hlim hlawl lo tih a lang reng mai. Police lam lahin ka pa bakah midang an dah luhte chu an rawn veng thlap a, an rawn thawkrip phian lehnghal. Mahse, ka ngaipawimawh duh lo. Ka pa chu a thih loh nan nasa takin ka tawngtai ve a, tawngtai dan vak erawh ka thiam lo. "Lalpa, khawngaihin ka pa nunna min laksak suh" tih bak. Ka thinlung leh tihtak zeta ka tawngtai avangin Pathian pawn min ngaithlain ka ring. Ka pa thiante pawh an rawn lan belh zel a, kan tlim hmúr mai, chutiang taka ka pain ngaihlutu a lo nei chu ka thinlung takin ka lawm a ni. Zing dar 1 a ri ta hial a, thenkhat chu ka nu ngenna avangin an haw tawh a. Ka thianthate erawh an la thu ve khap. Ka nu chu a chauh hmel êm avangin haw mai turin ka ti a, mahse, a duhin a duh lo bur. Mala'n coffee a zuk la a, Roger erawh min intitatu takin ka bulah a thu a, a changin ka kut a rawn vuan thin bawk. Midang mit tihkham ka hlauh avangin ka dawngsawng tha duh vak lo. 

Zing dar 3 a rik meuh chuan thiante pawh an muthlu deuh tan a, an demawm loh khawp mai. Keini erawh nghate rêp ang karin kan la harh tha hle. Mala leh Ruatsanga chu haw turin ka ti a, "Va hahdam ru" ka tih chuan, Mala chuan, "Heti ringawt chuan ka kalsan dawn lo che" a ti hmiah. Roger pawh a awm ve reng, a meng rúm deuh nghal chu ka melh zauh zauh ringawt. Mahse, engmah chu a sawi bik lo. Damlo awmpui kan ni bawk a. Dar 4 velah Doctor leh nurse rawn inzui pheiin ICU-ah chuan an lut a. Kan lo ngaicháng thap. An rei ta phian a, an rawn chhuah chuan doctor chuan ka pa chu ventilator hmanga thawktir hram hram a ni tih a rawn sawi a. Ka nu a inhup nghal chàwih. Mala chuan a darah a lo vuan chat a, kei pawh ka dinna lei a nghet ta lo nge ka vir muai muaiin ka hria. 

Doctor chuan, "Ka pi, a dinhmun saw a tha lem lo khawp mai a, Engpawhnise, Pathian kan nei a, amahah innghat phawt mai ang u.." a ti dap dap a. Ka nu chu a bu nghat nghat ringawt. 

Kei chuan ka pa hmuh ka lo dil thung. "A mal te tea in va hmuh chu phalsak in ni e" a ti a. Ka nu chu ka mitmei zauh, mahse, a lu a thing nar nar a. Intipachangin kei chu ka pen phei ta pàwk a. 

Ka pa chu ventilator vuahin a lo mu bal a, a hmel a dáng bai mai. Thisen a hloh hnem a ni maithei. A khum bulah chuan dingin, "Pa" ka ti tial ruan a. Ka mittui tling avang chuan engkim ka hmu phe ruai mai. Ka mittui chu hru hulin ka pa taksa chu ngun takin ka en kual a, a kut te chu a che em tihte ka en uluk kher mai. Che engmah a awm si lo, "Pa, thi suh aw. Thi thei i la ni lo a nia" ka ti leh a. Ka tawngte chu a hre thei ang em le? Boruak a rih êm vang leh ka pa na tuar hmuh reng chu ka thei ta ngang lo va, ka chhuak leh ta nghal. Ka nu lah a lut ngam der lo va, va tah mualpho a hlaute pawh a niang e. Ka va pawh leh hnu chuan Davea'n min lo kai chawtin, "Tlem tal chhing rawh. I chau dawn lutuk" tiin thutna awl lam min panpui a. Rogera a rawn ding nghal zat. Davea'n ka kut a kaihna chu rawn thingthlain "Ka awm ve bawk e" a ti ram hmak. Dave chuan hrethiam lo zet hian,"Maw?!" a lo ti hú a. 

"Ka bialnu hi keimah chiahin ngaihsak ka duh a ni" Roger chuan a ti hniam raih. Keia thin tàwt phurrit bawk si chuan ka ngaithei ta em em lo va, "Pangngai takin awm teh, Roger, Dave hi ka best friend a ni tih i hriat kha. Ka ning, i awmdan em em hi" ka ti ta hmarh hmarh a. Roger pawh a ding khawng reng ringawt , a kut humruh danah a thin a rim tih erawh a hriat. Mi dang an awm ve bawk nen, a zak ve te pawh a ni maithei. Thikthu chhe bawrlawk ang chi ka la ngaizawng ngai lo va, ka thiam vak lo a ni maithei. 

"A nih chuan ka pawimawh tawk lo a nih chu..ka haw dawn" a ti ta hmuk a. Tlangval tha pui si, a va smart lo tak. Ka lo hrechiang tawk lo a nih dawn hi. 

"Haw daih rawh, Min tihrehawm zual, tupawh thik tur chuan rawn lang malêk rawh. Hei midang an tam" ka ti ve ta hmiah a. Puitling deuh ho erawh ka nu hoin an thu hrang a. Kan tawng an rawn hre phak chiah lo maithei. 

Roger chuan min rawn hnaih sauhin, "Tute maw tam a?" a ti vawt raih a. Ruatsanga leh Mala rawn hnai deuh chu ka mitsirin ka va hmu bawk. Dak vahin, "Mala te Ruatsanga te, hei Bena te ho pawh" ka ti lar lar a. 

Dave chuan, "A tawk inhnial tawh suu, i pa damloh lai laia..Roger, nang pawh chintawk nei ve deuh rawh. A rilru a hrehawm tawk tawh" a rawn ti ve chu Rogera'n a kawr àwmah a rawn thàm ta mai a! Mahse, a hnek hmain Mala'n a kut a lo vawnsak chat. Roger chu mitmeng na fahrana melhin, "Thianpa, i harhfim meuh maw? Tharum zawng chuan ni lo ve" a ti zawi sup a. Mala a nih vang nge Roger pawh chu a inbengdai nghal a. MAhse, a la lungawi chiah lo hle. Davea thutna hluiah chuan ka thu thla a, nghenchhan chu nghengin, "Ka'n muthlu lawk ang e, tihbuai ka duh lo aw" ka ti hmak a. Ka maimichhing zui nghal. Ka mut a chhuak lo, mahse, ka phur a rit a ni, ka ipik ngawih ngawih. Ka pa chu thi ta se...ni lo, a thi thei lo. Thi thiang a ni lo. Thawm a reh deuh hnu chuan ka meng ta a, Roger chu a lo awm tawh lo. Mala leh Ruatsanga te pawh ka piahah an thu a, Dave pawh ka bulah. 

"ka tha a nia, min ngaihtuah suh u" ka'n ti ngawt a. An hmel thutak lutuk chuan ka rilru an tihrehawm zual. 

Khua a var takah chuan thiante pawn min hawnsan ta rih a, ka nu pawh hahchawl rih turin ka ngen a, a duh bawk si lo. Keimah zawk chu haw tur leh Sangpuia rawn tir chho turin min ti a, han en mai pawn ka nu chu a chauin a chak lo tih a lang reng mai si, ka lainat ngei mai. Mahse, a thu ang zela kal a nih avangin a thuawihin ka haw ta phawt a. Kan chhungkaw chunga chhum dum chhah tak hi eng tikah tak kiang ang maw?! Ka pa chu ka la dem phal chuang reng reng lo thung. 

Sangpuia leh Remruata te chu an chho ve leh a, An lo accident lehzel bawk nen, ka pa chu a lar zual phah viau. A hming pum nen an puang ulh ulh reng a, Social media lamah phei chuan hrechiang inti fe fein ka pa chuan mi a thah tam tawhzia te, Hmeichhia a pawngsual tawh thute'n zuk comment a! Ka lo ss nghauh nghauh thung. Thiam loh chantir èm pawh a nih hmaa thu an duh rum leh a nih lohna thleng thlenga an sawi chuan thin a vit ve deuh. Khawvel changkang zelah mihringte pawh kan changkan tawh tehlul nen, Social media hmang thiam tak an tam rualin a thiam lote thawm hi a la ring fú mai si a! A buaithlak khawp mai. Keimahin in ka nghak ta chu a nia, Davea'n, "Zanriah ka rawn ei ang a, zanah kan chho leh dawn nia" a rawn ti hlauh a. Midang chu ka tibuai ngam chiah lo, mahni buai buaiin kan buai ve hlawm tawh si a. Rilru kalding lutuk tur ven nan tiin chawhma lam chu in ka tifel fai a, Farm lam erawh ka zuk dikdak lo. Ka pa avang hian ka fimkhur ve vek tawh bawk nen. Ka intihfel zawhah tuilum sa ver vawrin ka inbual a, ka harh deuh sawt e. Ka inthlak laiin door bell a rawn ti tlang tlang a, tun ang hunah tumah inleng ka beisei hauh lo asin le. Ka hawnsak duh ta lo va, mahse, ka inthlak zawh rualin call ka dawng, Rogera a lo nia. 

"Kawngka lo hawng la..nizan avang khan ngaihdam dil che ka duh a ni" a rawn ti a. Ka khua a lo har ve tho bawk nen, ka va hawnsak ta a. Pangpar bawr a rawn keng ngei a, a lawmawm ve tho e. Kan thut fel hnuah, "Nizan kha ka tihpalh. I hrethiam lovang, i laka ka thikthu chhiatzia hi..min hrethiam hram rawh aw" a tih mawlh mawlh takah chuan kei pawh chuan,"Kei pawh ka lo ipik ve bawk nen, tiang khan ka tawng ta mai a nih kha..ka hrethiam che alawm" ka ti a. A nui var var mai. 

Min rawn hnaih a, "A lawm nan" tih leh min fawh a rual nghal a. Kei pawn ka lo chhang let ve tho a. A duhthawh telh telh mai, thutthlengah chuan min nam mu thlawp a, a chak angreng si, kei lah tun hnaiah chaw ka ei tha lo, taksa chak loh lai ni bawk si chu ka lo zawi deuh nge ni..mahse, ka duh aiin a koham ta a, ka kekawr phihthlak a tum chuan,"Ni lo..Roger, ka duh lo" ka ti tuar a. 

Ka hmai bula chiang zeta min rawn melhin, "Thansangzual, ka ta i nih ka duh, ka ta, ka nula i nih phawt loh chuan ka thla a muang ngai dawn lo. I duh emaw duh lo emaw ka ta i ni dawn" a ti ta mai a! Ka mur sung sung mai.