Malsawmpeka 1

MALSAWMPEKA (1)

Ziaktu: Toni Râlte

"I rawn tho dawn nge ka rawn hnuk tho dawn che. Nula ve lai si, mu tluk tluk mai. Rawn tho rang rawh" ka nu áng ri chu beng hupsanin, ka hriat tawk lekin, "Ninawm..games ka khel tlaivar alawm le aw" ka ti sap a. Ka nu chuan ka nau a rawn tir leh ngei ang. Nia, ka ngaihtuah chhungin ka nau chuan, "U, lo tho rawh. Mama a thinrim a nia" tiin ka room kawngka a rawn beng dawt dawt a. An au chhung zawng ka mu lui peih. Tho hma ho hi ka hua, an áng peih si, tui taka muhilte min hmu thei bawk si lo. Ka nu tawng leh hmain khawvela pa fel ber ka pa tawng ka hre ta. Ka khi sak a. 

"Mu mai mai ang hmiang, vawiinah programme a nei chuang em ni? Zoi, ka file hi a dik lo zawk ka lo keng a nih hi, min va lak teh" a ti dam thlup a. Ka nau thawm pawh a reh ta. Mahse, hetia min tihharh tawh hi chuan muthilh leh hi a har tawh thin e. Ka phone ka ban a, ka'n hmeh ên chuan dar 8:50 chiah chiah a ri. Dar 9-ah tukthuan kan ei thin a, thawh veleha chaw ei ai chuan an ei kham hnu vek dar 11 vela tukthuan kil ka duh zawk. Ka nu mitmeng ráng ka hmu lo bawk ang. 

Ka hming chu Thansangzuali a ni a. Ka pa hi Ephrame Zothanpuia niin ka nu erawh Zomuansangi a ni thung. Ka pa sumdawnna avangin mi hausa fanu duatsual tia hriat lar ka ni. Unau pathum kan ni a, ka upa ber, ka naute chu mipa ve ve an ni a, ka nau chiah Rosangzuala nen hian kum 5- laiin kan inthlau. Kan te ber Remruatpuia pawn kum 17 a rawn tling ve chiah. Kum 24-na ka hmang thung. Nikumah khan Nehu University atangin M.A (Eng) ka chhuak chiah a. Ka pa hian a sumdawnna kawnga min kaihhruai a duh luatah kuminah MZU atangin M.com bei tha leh turin min beisei pek a nih hi. Ka nu erawh house wife a ni a. Nu hmeltha tak, ngo zet mai leh thinchhe bawrlawk zet a ni. Ka pa Ephraime hi apa chu Arab mi niin, a nu erawh mizo a ni thung. Ka pa aia hmeltha mizo mipa zingah ka la hmu lo. A fanuin kum 24 ka tling tawh chungin la nalh tak a ni. A smart em em reng bawk. Hnamdangte nen an insumdawn tawnnaah nasa takin hma a sawn a. Ka nu sawi danin ka piantirh bawr vel hian ka pa chu Mizoram MLA Election-a candidate ni tura sawm te pawh a lo ni ve hial tawh a niawm e. Mahse, "Langlo lam atanga lo remdik ka thlang zawk e" tiin chu sawmna chu a hnar ta a. Minister leh MLA te hi a thiantha te deuh vek an ni nghe nghe. Tin, ZCP, tuna sawrkarna chelh mekte hruaitupa a lo ni tawh thin bawk. Chuvang chuan ka chhuang a, ka pa fanu ka ni hi ka inchhir ngai lo. Vun rawngah ka nu ka chhun a, ka mitmeng erawh ka pa chiah chiah a ni thung. Ka sam hi tihkir chawp ngai loin a kawi deuh hniang a, ka nuin color a phal miau loh avangin a dum hlap thung. Ka hleitling a, 5'6 ft ka hawlh pha ve zán. Mizo nulaah chuan zep nák emaw a sang pawl ka ni ve mai awm e. Ka hnute bu hi ka nu ka chhun nge ni a lian over lo naa, a kawh lah thung. Mahni infak hi nuam ka tia, Ka mawngbawr pawh ka squat nasa bawk a, khal tírh têrh tak a ni. Ka kawng a fèk rát a, ei ka duh ve paw'n ka nu hian ka eitur zat min bituk ziah. Kum 18 ka tlin hma kha chuan ka nu hian min hrual mum a ni ringawt e. Mahse, kum ka tlina nula pangngaia chhiar theih ka nih tak hnuah chuan keimahin thutlukna ka siam ve ta zauh zauh e. 

Ka pa tan naute ka la ni reng a. A fanu a duatsual an ti hi thudik a ni. Mahse, ka pa thatna erawh ka nuin min zilha min hrín chuan ka nu a support thung a, a hunah over khawpin min duat leh thung. Fanu mal ka ni bawk nen, ka awhzawng leh ít zawng hi chu ka hmaih meuh lo. Ka nuta te pahnih erawh ka nu fapate an nia! Rosangzuala hi kum 19 ve lai tawh si a la naupangchhia viau, MSW a zir mek a. Kan te ber Remruatpuia erawh class xii a la kal ve thung. Ani hi chu kan doctor tur a nia. Mi chut, mi á, biak tawng zawh loh a nih hi. Aizawl dai tihah khawpui atanga hla lotêah kan in lianpuiah kan khawsa a. A hmeichhia berin bike ka hawlchhuak thin. Nikum ka birthdayah ka pain Desert storm bullet bike min present a. Lawm mai mai tak ka ni. Ka nu chuan Gucci handbag min pe thung. Handbag ka ngainat lohzia a hre ve kur sia. Ka lawm tehchiam lo. Arab thisen kai ka ni bawk a, ka huaisen a, ka luhlul bawk. Ka duh lohnaah tuman engtikawng mahin min nawrlui thei ngai lo. Ka tetlai chu ka hre lo va, nikhua ka hriat theih atangin vawi hnih chiah ka tah ka la hria. Vawikhatna chu ka pa accident tumin, a thi tawh emaw ka tih vangin..a vawihnihna chu ka thiantha ber Dave-a pa thih tuma Dave'n min tahkhumin. Chu zawng chu. Ngaihzawng ka nei nual tawh a, hmeichhe zakzum ka ni lo bawk a, ka duhzawng mipa chu ka bem tháwr mai zel. Min lo duh ve zel bawk sia. Hmeichhia ka kawm tam lo va, ka kawm ve chhun chu Nunui a ni a, hmeithai fanu, rethei leh chawhmeh zuar thin a ni. Kan in hi sawi tawh angin khawpui daifem deuha awm a ni a, Nunui hian êm phur chungin chawhmeh min rawn zawrh ngat ngat zel. Ka khawngaih a, ka nu hriat lohte hian ka lei zawhsak vek a, Rosangpuia vawk vulhte ka pe ru leh thin. Ka nu leh Rosangpuia hian vawk an vulh tih ka la sawi lo tak e. Vawk farm zau deuh an nei nufa a, an intithei thin khawp mai. Nunui chu a haw turte hi ka thlah fo a, amah hi hmeichhia ka kawm ve deuh ber chu a niawm e. Tunah hian MZU-ah chuan admission kan la fel tawh a, Class kan la tan lo thung. Ka pa min ngenna ka ngaihpawimawh êm vanga Comnerce hi la tha leh ka ni. Ka tui tehchiam lo tih a hrethiam duh lo hi tlem chuan ka ngei deuh. 

Tukthuan an ei kham hnu fêah, ka pa pawh a chhuah tawh hnuah ka va tho chhuak ve a. Ka nu chuan thleng a lo sil zo deuh chiah. Awmpui lak a duh lo va, engkim a khawih, kei pawh kum ka tlin hma khan zirtirna min pe nasa. Buh thlei, eirawngbawl, in chhung chet..ka va hne thei tak êm..mahse, tunah chuan khang thil kha ka hmang vak lo. Ka thatchhia a, ka room pawh a felfai vak lo. Ka naute hian ka awm loh hlanin min tihfaisak thin. Ka nu pawn min enliam deuh tawp tawh niin ka hria. Shillong-a ka zuk awm khan mi tithatchhe vek a ni ber e. 

"Thansangzual, chaw ei la, vawiin chu in chung room khi tifai ang che" ka nu aw chu a chang leh hle. Fawk fawk zel hian, a fate hi min ko duat ve hluak lo. Ka pa aiin fate enkawl kawngah a khauh zawk. 

"Rosangpuia a awm lo mi?" ka lo ti a. 

"Vawk ho vaccine pek a ngai. A hman lo" a ti leh hmak. Ka ner sak a, "Remruata tal" ka tih chuan ka hmaah a rawn ding a. 

"Ani chu nang ang lo takin doctor tur a nia, hun kan pek a ngai. Min hnial buai lo mai rawh" a ti fiak thak. 

Túm búrin, "Nuhrawn i ang si" ka ti hlak a. A sir zawngin a nui sak lai ka va hmu thei. A ngai haw duh thak si lo. Chaw chu ka ei a, chaw lah hi ka heh roh zêk a. Nula chawheh nih mai maite chu pawi ka ti lo nasa mai. Ka chawhmeh duh ber Vawksa rêp chhum a awm zui, a sehhmehah baibing leh sawhbawl..awii, ka puarzia mai chu. Ka irh uk uk a, thleng chu ka sil nghal sawk sawk. Ka nu min hrawk leh hmaa ka duty ka hlen a ngai. 

Remruata tui rawn la chu a rukin, "Bawihte, ka room saw nakinah min tihfaisak la, i duh ber ka lei ang che" ka ti sur sur a. 

"I ti ve ziah, min lei ngai tak tak lo" a ti hlur a. Ani leh ni lo angin a tawng ve mial e..ka nuih tlawn a. Ú te thu hnial ngai miah lo a ni a, a ti leh dawn tih ka chiang. Ka room a zau sia, ka ning alawm. In chung hi chhuah chhoh chiahin In leng kawmna pindan kan lut a. In hnuai aiin engkimah a changkang lawtlak, ka pa sumdawnpuite awmkhawmn a ni deuh ber. Pindan pahnih a awm leh a, Pakhat chu ka pate room niin, pakhat erawh ka pa private room leh Library room a ni. Kan unau hi chu kan chho zen zen lo. In hnuaiah kan unau thum room bakah mikhual room zau hek hawk leh Remruata Laboratory room zau vak lo a awm. An duat bik si, ninawm ah..

In chung chu han tihfai em em tur a awm lem lo, ka nute room phei chu fai hin hen tak a ni. Inleng kawmna chu ka tifai a, Carpet ka thlak a, dawhkan ka hru thuak thuak. Sofa erawh hruk a ngai lo. Zaninah an hmang dawn a ni maithei. In chung ka tihfai zawh meuh chuan dar 12 a pel leh thuak tawh a. Tihtur reng reng ka nei leh ta lo. Ka nu leh Sangpuia te erawh an vawk an buaipui a niang, an reh riau. Remruata lah a Lab roomah a tawm leh tawh a nih hmel. Ka room ka luh chuan ka khi var var mai, A lo fel leh duak tawh. Nau thuawih deuh neih hi chu a nuam riau. Movie en hi ka peih viau a, Games ka khel zauh zauh bawk. Ka inbualfai ser sawr a, Movie ka en ta daih. Hmeichhe pauràu, kawlh ve tak leh nghal tak ni mah ila, ka sawi ve duh pakhat chu ruihhlo ka ti ngai lo. Ka ti ngai lo ti ila, chaw eikham leh ka stress deuh hian Cigaratte ka zu ve thin. A bak zuk leh hmuam dang ka ti lo bawk. Shillongah te khan zu kha min in luihtir an tum sateh a, ka hnar fithla thak. Beer erawh kan fridge hmun lailum a luah reng thung. Ruihtheihthil huangah kan seng lut ve lo va, ka nu pawn a in thin. Keiman ka heh ber thung. 

Hun a kal a. Zirna ka chhunzawm hun tur pawh a lo thleng ta reng mai. Zep miah loh chuan Dave a kal ve tawh dawn si lo va, ka phur teh chung lo. Thian siam ka harsat ve ropui si, maltlat nun ka zu hmang mai a niang chu. Ka bike pawh fai takin ka sil a, mawi hi ka va ti tak. Ka nuin tukthuan ei laiin min zilh leh tawh. 

"Nghal takte khan zuk awm lo la, thian hmeichhia ngei zu kawm bawk ang che. I chetdan engkim i nau hi ka zawt leh vek dawn a nia" a ti malh malh a. Ka ngawi reng. Chhanin awmzia a nei lo. Ka inchei duhdan pawh hi ka nu mit tikham chi a nia. Ka pa chuan a enliam thei mai. Thawmhnaw themlem lam ngaina ka ni. Ni e, taksa nalh tak ka nei a, ka pian a mawi a, mi hmuha langsar taka pholan hi nuam ka tia. Miin min fak se, mawi min ti se ka duh thin. Mipa híp nan leh min ít se tih vang chuan a ni leh miah lo. Tin, ka inchei nu em em lo bawk. Vawiin chu ni hmasa ber a ni bawk a, Tie dye pants leh hoodie ka ha a, ka simple reuh. Ka ang lo tawp keimah. Ka nu pawn min melh zui vawng vawng mai. Sawisel tur a hre bik lo ni hmiang ka ti mai . 

Campus ka thlen chuan an lo zi nak nak a. Kan department chu ka hriatsa tawh avangin ka pan ding nghal a. Bank kawtah an lo ding khawm laih a, kawng min kian lo deuh nia a hriat avangin horn ka pe tuar. An phu dual a, min rawn en thup..hmalam ka bih ngar thung a. Kan department kawta bike ka park dawn lai tak chuan ka sir maiah Scorpio dum tle zak hi a rawn ding dat a. Ka bike hunna a rawn dal deuh nia ka hriat vangin signal ka pe zauh a. Mahse, ka bike nêk zawng chuan a la rawn lir zui a, ve a..tiin ka bike chu ka park a, ka chhuk daih. Ka bike-in a dal si avangin a glass chu downin, "Thiannu, a piahah sawn i hung lawk thei em?" a rawn ti a. En pawh en mang lo hian, "A piahah sawn i hung thei zawk em?" ka ti nghat a. Melh pawh melh zui loin kan class room lam ka pansan daih. 

A hnungber kilah ka thu chat a. Kal an la tam vak lo. Ka phone ka khal leh mai mai. An rawn lut ve nak nak a, mi thar vek kan ni bawk a, en bik nih loh hram ka duh. A tu amah chu ka la hre ngai si lo va, ka ngawi reng ringawt. Ka bulah chuan mipa kei aia sang hret tur, rimtui zet hi a rawn thu ve ta a. Min rawn melh rulh, a hmel chu a tuai lek lek a, a ngo hlung bawk si. 

"Thu tur an awm lo tiraw?" a ti a. A aw erawh a tuai lem lo e. 

"Aw awm lo" ka ti ve mai a. 

"Benjamin ka nia, Bena tiin min ko thin" tiin a kut a rawn pharchhuak a. Lo vawn ve pahin, "Thangzuali, Sangzual tiin min ko thei ang" ka ti ve sap a. Kan innuih ve sak kha. Class room pawh a khat ta. Kan ri deuh nuai nuai a, ka ning deuh. Hmeichhia kan tam vak lo, 12 kan niin ka hria. An rawn nalh hlawm viau, hmeltha tak tak vek an ni bawk. Bakah thenkhat chu an lo inhre sa tawh nge an innelin an nui ho dar dar reng a. Ka pate vang vek, Mizoramah College min kaltir lo va, hmelhriat ka neih tlem phah. Bena pawh chuan hriat a nei nual, kan inkawm thei ta viau a. Mipa kawm thang ka ni bawk a, ka buai hran lo. Zirtirtu a rawn lut a, Roll te a'n call a. Ka hming a rawn lam ruala ka present chuan mi rawn en vung vung a. 

"Tlar hmaah rawn insawn rawh. A hmeichhia ber a kil bera i thut?" a ti thur thur a. Ka ner sak. 

"Ni lo ve, sir, hei hi ka permanent seat a ni tawh" ka ti nghat a. 

"Rawn insawn mai rawh" a ti leh a. University ve lai a ni tawh a, hetianga inforce hi ka duh thak lo. Ka ngawi hmak a. Ka thu ngat ngat bawk. Tihngaihna a hre bik lo nge, a chhuak zui ve ta daih a. Khata tang chiah khan a niin ka hria, kan class ho chuan min en bik tak ni. Ka sual hmel te pawh a ni mahna le. A ho em mai a. 

Chhunah chuan ka ril a tam khu leh ruai tawh a. Canteen lah chu an khat mup mai si. Bena chuan, "Gate pawnah khan eitur tui deuh an siam asin. Han chawl ila" a ti a. Ka lawm kher mai. Ka tho nghal vat a, Bena thianpa Rpa te nen kan pathumin Bena car-in kan chho ta a. Bike chu hawl chhuah kher tul ka ti lo. GAte pawn thingpui dawr chu a zau tha viau naa, an lo tam hle tho mai. Kan vanneih asiamin a laihawla chawlte chuan an lo eikham deuh chiah a, kan va thu ve nghal chat. 

Paratha hlai hlep hlawp leh soup ka chah a. Ka tui tihzawng tak a ni tlat. Sachek erawh ka nu siam loh chu ka ei ngai lo. Tui ti fea eitur ka ei bawrh bawrh lai chuan kan hmaa thu hmeichhia te chu an ri hak a. An nui har har bawk, ka hawi chhuah chuan kawngka lo kan mek mipa sang zet lam chu an mit fukna a ni tih ka hrethiam nghal. Chupa chu 6'2 ft vel bawr a ni maithei, a bek sam a káwng a, a chhipsam erawh buk over si lo hian a zuah a. A mitmeng chuan ka mit a la ve deuh, a cool mah mah riau a, a mitmu a dum tha hle bawk. A hnar a zum bakah a bang pawh a sang, vai hmel lek lek a pu ka ti. A biang chu hmul tlem tawitein a bawm ve a, a khabe hmul erawh a chhah ve hlek bawk. A san deuh vang nge a cher lek lek em aw tihtheih tur a ni a, mahse, inphelh ta se a cher chuang miah lo thei. Kei hi ka sawi tawh angin ka lerh a, mipa hi ka enchîk thin. Chu pa pawh chu khawi hmunah mah ka hai tawhin ka ring lo. Dawr neitunu chuan a lo nuih var var a, an inhre tha hle tawh niin a lang. A hoodie hak sakhi rawng tak ngák leh a vun rawng pawh a inchawih mawi viau..

Rpa chuan zawi sup hian, "Mala a nih saw, Boss Amanda fapa" a ti sup a. Awiii! Boss AManda te chu ka hre hnehsawh lutuk. Sawpa saw a fapa maw lo ni a?! Ka pa leh Amanda chu thiantha tak an ni a, Vawi 3 vel chu Amanda te nupa chuan chaw an rawn ei tawh. Mahse, Saw pa saw a la rawn kal ve miah lo. Amanda te hian fa pakhat chiah an nei tih chu ka pa ka atangin ka lo hre tawh a, he pa lek hi maw lo ni. Nia, Pa Sama nen pawh an inangin, Amanda mitmeng leh a mitmeng pawh a inang chiah chiah tak alawm. Amanda thusawi ka la hriatreng chu, "Ka fapa nen kum khat chhuak in nia, nang hi a thlain i naupang zawk thung. " a tih kha. Ti nge an lo hruai ve ngai loh le..

"Amanda chu ka hre lutuk alawm. Mahse, a fapa saw ka la hre ngai lo" ka ti a. 

Bena chuan, "A inlar tam vak lo an ti. Kei pawh ka hriatna a la rei lo, ka naute hian an star khawp a, an sawi zarah ka hre ve chauh" a lo ti nghut nghut a. Kan dawhkan ep chiahah thuthmun a rawn rem ve a, a tu amah chu a en lem lo. A phone a khawih nghal. 

Hmeltha ka ti a. Ngaihzawn ngei ka duh. He pa , Ka mi ngaihsan em em Amanda fapa hi ka bialpa ka nihtir dawn. Ka rilruin ka intiam rauh rauh mai. Kan ei zo kan chhuak tur chuan dawhkan ke ka pal palh (?) a, Mala chu ka va bawh thuak pek a! Ani pawh a phu ve zuk mai. A coffee in lai chu dawhkanah a baw nuaih mai. 

"Ka tihpalh lutuk" ka ti tuar a. Coffee a luan avangin a kekawra a kai loh nan a ding vat. Kei ai chuan a sang fe mai. Mitmeng thim raiha min melhin, "A tha vek e" a ti sup a. A aw chu a pa hrâk mai. Ka nuih a, a nui ve lo. Hmm, a tihmawh zêk dawn a nih hi. Engtin emaw biak khawtlai ka duh si. "I coffee man ka lo tum ang e" ka ti a. 

"Aw le, ka lawm e" a ti hmiah. Ka va hrilhhai si êm. Biak leh ngaihna ka hre tawh si lo va, Bena te an kal tawh bawk si, ka chhuak ve ta vut a. A coffee man erawh ka peksak kha. Ka pa bulah Amanda te chhungkua chaw eia sawm turin ka ngen dawn, a fapa hi a rawn tel ve ngei ngei tur a ni. He pa, hmeichhiate star rawn, an thlir rawn hi ka ta ka nihtir dawn chiang lutuk. Hetiang game hi nuam ka ti viau a ni. Sawi leh sawi hnu insawitheih dawna Shillong sawi ziah ngai hi nuam chu ka ti vak lo naa, Ka MA zir lai pawh khan Naga tlangval hmeltha leh kan University-a lar ber pawl Denis kha ka bem hmiah mai a. Min hnar awkawng lo. Thla 2 chhung kan inngaizawng, ka lar phah rêng bawk a. Mizo tlangvalte mit pawh ka tikham hman viau. Mahse, ka tan enjoyment leh game a ni tel a, ka pawisa lo. Nula thianghlim, virgin ka nih chhung hi chuan mi min sawina holam te te chu ka kalpah hmiah hmiah zel. Mipa kei ka ni inti chinte ngat hi hnehsawh taka kaihleh ka chák thin a, ka chapo vang pawh a ni maithei. Mahse, ka hlawhtling vek bik lo. 

Class boring tak a la ni lo bawk a, a zia ve zel e. Ni 4 zet class ka kal ve takah chuan Bena leh Rpa te chuan Davea ai an awh a ni deuh tawh mai. Dave erawh ka best friend a ni reng tho ang. Ani chu a nu duhthusam angin sawrkar hna lamah a inhnimphum ta a. Hna zahawm tak Zirtirtu hna a thawk mek a ni. Ka lawmpui teh e. Bena te nen kan inzui ve ta det det zel a. Kan mizia kan inhrechiang ta hlawm bawk a, ka kawm chi tak an ni. Malsawmpeka, Mala tia an koh erawh ka hmu leh ta ngai miah lo. IG lamah a pic ka va like ve zuk zuk zel a. Thlalak lah chu a'n ngah lo laileng khawp a. A active lo ropui si. Ka pa bulah , "Ti nge Pa Sama te'n chaw an lo ei hian an fapa hi an rawn hruai ve ngai loh?" ka ti ta tawp a. A ngawih vung vung hnuah, "Amahin a indang tawh alawm. A nu hna avang hian Amanda hian dinhmun hlauhawmah a din a hlau a. Mahse, an intlawhpawh reng tho" a ti ta a. Mak ka ti viau. Lehlamah a dik ve tho mai. Kan ram inrelbawlnain hma sawn viau mah se, ram hruaitu hlui te leh an vua leh vangte khan ram lak let leh tumin theihtawp an rawn chhuah ve mek zel a. Tualthahna lah a thleng deuh reng bawk si, Amanda case lak hi a turu thin si a, a chhungkua te dinhmun hlauhawma an din chu a phal lo khawp ang le. 

"A nih Mala chuan eng nge a zir ve a? Mzu-ah vawikhat ka hmu tawh a" ka tih chuan,"Ph.D a zir mek alawm..I va ngaihven ve, i mipa duhzawng tak a ni em ni?" a ti ta thut a. Ka lai teuh lo, ka pa hian min hrechiang ve êm a. 

"Aw..ka bialpa nihtir ngei ka tum a ni" ka ti sap a. A khi suk mai, ka chhip sama tuai pahin, "Ka naute, tum buai lo la a that ka ring, Malsawmpeka'n hmeichhia a ngaihven lo" a ti ta a. Ka phur sawt tih a hre miah lo niin a lang. 

Nitin maiin Mala chu hmuh tumin ka hawikual thin. Ka hmuh atanga ni 6-naah chiah ka hmu leh ta a. Suit nen a induang thlap a, a suit pawl tak zet leh a vun rawng inchawihzia chu. Park sirah a pen thoh thoh a, hmalam a bih ngar bawk. Park laia rose par var sar mai chu va thliak ru zauhin Mala chu ka tlan khalh a, Bena te'n min lo thlir tawp. Eng nge maw ka zah vak ang le? A hmaah tak va dingin, pangpar chu ka lek kang a. 

"Hmanni avanga ka thupha chawina?" tiin ka nui var var a. Min melh zawk a, hmalam a melh leh nghal, "Tu nge i nih!" a ti nghut a. Ka ding ngil awt. Mahse, inthunun leh hramin, "I bialnu tur mawle" dak vah hian ka ti a. A khi suk..a la vei nuih zui a! 

"Tum buai suh. " tih pahin rose chu a la a, a hním a, a lu thing nur nurin kan piaha dustbin-ah chuan a paih daih. Hmela mai mai chu le. Ka va umzui leh ngat, "I nu leh pa te ka hria a nia" ka ti a. 

"Tupawn an hria alawm" a ti leh hmuk a, chak zetin a kal vang vang. Ka beidawng dawn chuang lo. Ka seh tawh ka thlah mai mai lo vang. A cheap pawh ti eng ang mah se, ka tan tlawmna a ni ve lo, chona a ni tlat. 

Bena te pawn ka rilru an hria, "Mi dang startu che an tam aw. Geography Professor Dr. Muanawma te hi duh zawk ta che. Mipa mah ni ila he pa hi chu a smart ka ti ve thlawt" Bena chuan hmeichhia deuhin a ti bawrh bawrh a. 

A sawi pa chu ka hre ve hauh lo thung. Malsawmpeka ka zui laklawh a, he mipa ngeng zet thinlung hi nêm takin ka siam ngei ngei dawn. Mipa dang tan hun ka nei rih lo ve. 

"Thansangzual, i nau vawkte khu engvanga chhuah nge i nih a?! Khaw nge a awm va zawng vat rawh" ka nu aw chu a fiak leh thak thak tawh ngei mai. Tlaia ka walk kha an farm lam hawia ka din laiin vawkte pakhat chhuah chaka za zek zek ka zuk hmu fuh pek a, chuti taka chhuah chàk chu tiin ka zuk pawm chhuak a, a tlan ter ter a, a lawm hmel khawp mai. Farm-ah cctv an vuah vek tih ka lo theihnghilh a tin ni. 

"A lo haw ve mai ang. " ka ti puat a. 

"Zu zawng mai rawh. Ti nge maw hetianga i nun tlat le?" a ti leh chiam a. Ka pa a awm lo bawk a, a rap ring leh viau tawh. 

A thim thet thet tawh si, "Thimah a mu ngam lo vang a, a haw ve mai ang. " tiin inbual turin ka luhsan daih. Ka inbual zawhah ka va chhuah chuan Sangpuia leh Remruata'n vawkte chu an zu zawng dawn tih a lo sawi a, min hau leh nghal bawk. Ka pa a lo haw a, a lo welcome a ngai si, a ngawi zui ta a. Ka nu ka fakna em em chu ka pa hi engtik hunah pawh lo haw se, thiltih laklawh eng ang pawn nei mah se; a dah a. Ka pa a lo welcome vat thin. Nupa inhmeh ber chu an va ni chiang tak. Ka naute vawkte zawng chu an rei phian a, tlemin ka inthiam lo ve deuh. Dar 6:30 hi kan zanriah ei hun a ni a. Chumi hma chuan an lo thleng thei hram e. Ka thaw huai mai. Ka nu a rap zui ta lo. Rapper tha ber zawng a ni chiang alawm. Zanriah kan ei a, Zanriah ei lai hian chhungkaw thil pawimawh an sawi thin. Kan ngaithla thap zel. 

Malsawmpeka number neih dan tur ka dap ngun bawk a, ka nei thei ta hlauh e. Min petu pawh tu dang ni loin Ph.D scholar ve tho, Bena cousin U Vena a ni. Ka be hmiah mai. U Vena nen hian an lo inkawm ve zauh zauh a niawm a, a lawmawm khawp mai. Zanriah ei khamah Rosangpuia leh Remruata'n thleng an seng fel a, thleng ka sil thung thin. Hei hi chu loh theih loh a ni tawp mai. Zing lamah erawh kan chhuah hma deuh thin avangin ka nu kut a ni thung. Thleng ka sil zawhah chhung inkhawm kan nei leh te tê a, Kei leh ka pa hian vawi khat ve ve chiah ka hriat phak chinah kan la hmang. Inchhun pafa ve tak zawng kan ni e. Chhung inkhawm zawhah chanchinthar kan ngaithla tluan leh parh a, chumi hnu lam chu kan zalen tawh. In chhungkhur enkawl bakah fate enkawl hi ka nu mawhphurhnaah ka pa hian a dah tawp mai. Vawi khat Sangpuia'n zu a lo in ve a, chumi tum erawh chuan ka pain a zilh. Ka pa zilhna chu ka nu áng hrep aiin a thawk chak zawk a, mahse, a fate hi min zilh zen zen lo thung. Ka naute hi chuan ka nu hi an hlau viau. A thu pawh an awih. Kei pawn a tawpkhawkah chuan ka hlau ve tho, mahse, a nazawng hi chu ka palliam. A fanu neihchhun ka ni a, min duat lutuk tih ka hre ve kur tho a. 

Khumah bawkin Mala number ka save chu ka hmet chhuak a. Whatsapp a khawih ve naa, Dp pawh a nei lo. A last seen a off bawk. Ka va be awm tho e aw. 'Hi" tih tê ka va thawn a. A tuk nilengin a seen lo! Hrep taka! Mahse, ka hrechiang chakin ka belchiang chak telh telh thung si. 

"Eng anga inla value pawh ni la, min biak hun a la awm tho ang. Malsawmpek" ka va ti leh hram. Chu zawng zingah min rawn reply ve ta hram e.

"Eng nge i duh?" tiin. Teh tawp a! Nulain ka be ve em em a. A nerd hle a nih dawn hi. 

"Nangmah mawle" ka va ti a. Ka nui vur vur mai. Ka zaktheilo lutuk hi ka nu hian hria se min kek hrep duh ang. 

"Ka duh lo che" tih thuin min reply. Ka nui sak a,. Ka reply tawh rih lo. Tukthuan kan ei laiin ka beisei loh lutukin Amanda a rawn lut hlawl mai. He nu hi chu aww, ka nu tih lohah chuan mizo nu-ah hmeltha ka ti ber awm e. A hleitling si, a invawng tih hriat takin a tar thei thlawt lo ni berin ka hria. Pi Rebecca Saimawii vanglai ang mai a ni e. Ka nu chuan a lo dawngsawng vat a. 

"Insuam chungchangah helamah kan rawn vak kual lawk" a ti sap a. Ka pa chuan, "Khawi hmunah" a lo ti vat. 

"In in atanga mel khat vela thil thleng a niawm e. Tukin dar 4 bawr vela Kolasib atanga rawn tlan chho an ni a. Hmaituam pahnih silai keng ten an lo suam a nih awm chu! An neih zawng zawng an laksak a" a ti dap dap a. Remruata'n a lo bengkhawn leh viau tawh, Amanda hnuchhui chanchin a pasal Pa Sama ziah kha a chhiar nasa bawk a. A ngaisang mah mah chu a ngeiawm zawk.

"A va zia lo ve aw. Tute nge niang le?" ka nu chuan hlauthawng fê hian a lo ti a. Ani hi chu hman ata tawh hetiang thin thawng lam a awm hian a pháwk hrâ reng zel. A chhan pawh ka hre bik lo. 

"Rin dan kan nei rih lo. Pawl anga ding nge mi pahnih inthurual tih erawh chhuizui deuh a ngaih hmel" Amanda chuan ka pa a en daih thung. Ka pa chuan, "Thla liamtaa inrawknaah khan engzat nge in hnamhnawih kha?" a lo ti vat a. 

Amanda chuan, "Pali lai chu an nia. Kha phei kha chu nunna an inchán têp chu a nih kha" a lo ti var a. Kei erawh Amanda melh zak zak chungin Malsawmpeka ka lo mitthla daih! A fapa hian a lo chhun viau a nih hi. Mahse, vun rawngah pa Sama a chhun zawk. Ka lo melh reng tih a hria ni maw, "Sangzual, vung vung a che..eng nge ka hmelhmaiah dik lo a awm em ni?" a ti ta thut a. Ka phu uih. 

"Aih, awm lo, i fapa ka hmu a. In inang êm a" ka ti ta ringawt a. Zahpah lo leh namnul takin Amanda hi chu ka be ngam lo. 

"Zaninah chaw kan ei chhuak dawn alawm. Lo kawm ve la, a maltlat roh si" a ti hlut a. 

"A tlei hmel êm mai. Miin an star rapthlak" ka ti a. Ka nui rah rah bawk. Ka pa pawh a khi suk mai. 

"Bialnu te hi nei ve se a tha ang. Mi a anglo dawn takngial" a ti ve a. A sawi dikin ka hria. Mahse, hmeichhia a mamawh lo. A gay zawk em mawni..ka ngaihtuahna avang chuan ka nui hawk a, Sangpuia'n makti fein min melh. Amanda chu chaw eiah an sawm naa, hna a neih thu sawiin min chhuahsan ta a. Kei pawh chaw ka ei khamah ka insiam zui nghal. Zing karah hian ka inbual ziah thin, ka nu min tihhmuh a nia. A nuam bik. Fresh zetin class kal tur chuan ka tlan leh ta vang vang a. VAwiin chu Mala ka be leh ang ka ti rilru mawlh mawlh. Ka bike ka hun that lai chuan ka class ni hmasa bera scorpio dum tle zak kha a rawn thleng ve chiah a. Kalpelh mai ka tum laiin Malsawmpeka a rawn chhuak luau mai. Ka ding cháwih a, amah lek maw lo ni a. Kan inhmachhawn ran a, ka kal tlai deuh avangin mihring dang hmuh tur an awm tawh lo. 

"Mala, i nu i chhun" ka ti hap a. Kan inhmuh thut avangin sawi tur ka haihchham ve tlat. 

"Mala tia min ko tur khawpin nang nen kan la innel tawk lo tlat" a ti hmuk a. 

"Malsawmpek,." ka ti nghek. Ani pawh a hamhaih deuh niin ka hria, "Nang hi" a ti nghut a. 

"Gay i ni em?" ka tih leh phei chuan a insangmar ru hle tih ka hre thei. Kei lah hi ka frank ropui sia. 

"I lakah chuan ni e" a ti sup a. Min va run tak. A phone a rik vangin a kal sawn ta daih a. Ka ke ka per dat a, sehchilh nak hian, "Hmela, i hre dawn" ka ti zawi sap a. 

Kan senior te'n Fresher social min hmanpui dawn avangin inpuahchah nan vawiin hun chu kan hmang a. Kan class chuan hla rem an rel a, ka tuipui ve meuh lo. Ka zai vak ngai lo, a chhan chu ka zai ve apianga ka nu a thinrim thin vang a ni. Kan CR Zotea chuan, "Sangzual, nang i aw a lian deuh a, contralto part sa rawh aw" a ti a. Contralto pawh chu eng nge a nih ka hre hauh lo. Zai tlawng bak engmah music lamah hriat ka nei lo. Zai hi ka ngaithla tam lo hle bawk, ka ngaihthlak ve pawn vai zai ka ngaithla thin. Lung a tilêng ka tia. 

Msi nen min din duntir a, Msi hi kan Asst. Cr a ni a, hmelchhe lem lo tak, fing fel zet mai a ni. Kan han zai ta a, Msi aw a ring tha bawk a, a zai ang chuan ka zai ve ta a. Nia, ka aw hi a lian riau a, a lo lang mah mah zel nge ni, kan conductor John-a chuan, "Sangzual, zai zawi deuh teh, msi aw i hliah vek, i aw a lian mah mah a" a ti a. Ka ngai haw hran lo. Mahse, tlar hmaa ding Rini chuan, "Ani chu bass sa tur a ni lo mi?" a ti khanglang a. Huatthu chhe ve tak ka nihna a lang, a tukhuma nam pahin, "Tetaktê" ka ti hlak a. A tê reng bawk a. Te takte tawng zat zat chi, a tawng paha mipa melh kual zaih zaih, ka mihring mil loh chi a lo ni kher bawk a tin ni. Hma lama a buk dáwrh avang chuan an nui hak a. Túm bár chungin a rawn ding tha leh a. 

"Lian thlawn" a ti ve sak. Ka chhan leh hmain kan zai leh ta a. Ka zai zawi ta viau. A tih ve theih mai dawn hi, a ropui e. Special item nei turin Rpa an thlang a, ani hi talented deuh a ni ve a, min tihlim viauin ka ring. 

Kan ban chuan Msi'n, "Sangzual, pawi i tih loh chuan min lo phur haw ve mai teh a. Ka thiannuin min hawnsan sia, bus chuan kan rei dawn sia, damdawiina pen ka duh a" a ti a. Ka phur hreh hran lo. A fel bawk a. Ka bu nghat a. Bike lam kan pan nghal. Helmet ka khum dawn lai chuan Malsawmpeka a rawn lang ve zat. Msi a hmuh chuan, "Lo haw ve nghal la,. " a ti a..ka melh kul ringawt. Msi erawh fing fel tih takah, "Hei Sangzuali nen hian kan lo haw ang. Nidangah aw, Hospitalah pen ka duh sia" a ti siam siam a. Inhre sa, innel tak an ni tih a lang. 

"A ni maw? Eng nge a an tawh?" Mala chuan a ti a. 

"A la ngai reng, mahse, chhunah kha chuan a rawn harh zawk thu an rawn sawi a" Msi hmel chu a ngui deuh. A chhungte tu emaw tak an damlo a ni maithei. 

"Okay, naktukah ka rualin haw la, ka rawn kan ve dawn nia. " Mala chuan a ti a. Keimah min rawn en lehin, "FImkhur takin khalh ang che" a ti hriam hraih. Ka lei ka lo chhuah khum nghek. Thawk la hawkin a motorah a lut a, a tlan zui daih. Keini pawh chu kan tlan chhuak ve ta nghal a. Mi dang ka phur ngai mang lo va, ka thiam vak lo. Ka confi lo ka ti mai. Vawikhat ka nu ka phur tawh a, ka mal a hmet duk, duh aiin ka lo tlan chakpuk a! A na asin aw. A sim chiang khawp mai. Ka chhuah dawnin amah ngeiin helmet min khumtir thin. Ka chetsual a hlau thin êm a ni. 

Msi chu ka kawmngeih a ngai niin ka hria. An inbiak danah an inngaizawng lo tih a lang a, ka thík lo. 

"Kha pa kha Amanda fapa kha a ni em?" ka'n ti te te a. 

"Ni e, i hria law? Malsawmpeka a nih kha. A fel ania" a ti ve mai a. 

"Amahin a awm hrang an tiin ka hria, in innel hmel sia, in ni chiang" ka ti a, ka nui bawk. 

"Awihawm loh eee, ú angin alawm ka en. Kan in bul maiah a khawsa a, aw amahin a awm. MAhse, a nute nen an intlawhpawh reng tho. A nu fimkhur vang a nia. " a ti ve ta duah a. Ka la duhkhawp chuang lo. 

"A luck ve zêk dawn chu! Amanda fapa a nih vang pawn" ka ti a. 

"Umm, luck angreng, kan Professor zingah pawh hian rawn lenchilh an awm thin. Kan model pakhat phei chu a rawn kal zing thei tawp..mahse, ngaihzawng a neih awm hi ka la hre miah lo" a ti ta a. Ka phur dan chu mak tak a ni. Ka sosang ti mai teh ang. 

Min ngaihdan a danglam ang tih hlauin, "Damdawiinah chuan tu nge kan i tum?" ka ti a. 

"Aw ni tak, ka phirpui hi coma-in hun rei tak a awm tawh a. Kar hmasa khan a rawn harh tan a, chu chu mawle.." a ti a. A sawi zawng pawn a unaunu chu a ngaihtuah hmel hle.

Damdawiin kan thlen chuan han kalsan nulh kha mawiin ka hre si lo va, ka nu bulah sawi ila, "I va á tak, kan ve law law ta che" min tih dawn avangin Msi chu ka zui lut ve a. A lawm ve hmel hle. A phirpui nen chuan an inang kher mai, mahse, damlo na na na chu a cher zawk a, a dáng deuh bawk. A lo harh lo va, Msi nu niawm tak leh hmeichhe pakhat an lo thu a. 

"Nu, hei hi ka thiannu Sangzuali, Sangzual, hei ka nu, chuan hei hi ka niteii" Msi chuan a ti zung zung a. 

Kan inchibai tak kha. Awm ve reng kha sawi tur ka hre si lo, 15 mins vel ka thut hnuah ka hawnsan ta a. In ka thleng a, walk turin ka insiam nghal. Eirawngbawl hi chu ni e, nêp pawh min ti mai r'u..ka ti peih thlawt lo. Class ka kal hnuah erawh ka nu thupek angin zing dar 6-ah kan tho zat zat a, Thawh veleh Gym room ka belbul nghal a, 7:00-atangin in chhung ka tifai a, pawn ka phiatfai vek bawk. Dar 8-ah ka inbual fai vák a, tukthuan ei hma chu ka nu rawngbawl ka pui ve leh zawk a. Tlai lamah erawh ka nu pawn min phút bik lo aniang, engmah a sawisel ngai lo. Ka walk loh hi chuan ka mutui thei ngai si lo va. Khawpui lo lam hawiin ka kal hnak hnak a. Tui ka in pah zeuh zeuh. Kan in atanga mel chanve awm vel ka kal hnu chuan tukina AManda sawi, insuamna vel kha ka hrechhuak zawk a. Ka hawi nghal hrú! Mi dawihzep tia sawi ka ni ngai lo naa, ka huaisen falua lo. Ramhuai ka hlau thin. Mihring aiin thlahrang leh a kaihhnawih hi ka hlau ngawih ngawih, hei hi chu ka pa pawn min simtir thei lo. 

Ka ngaihbel nge ni min zuitu an awm tlatin ka hria a, ka lehhawi vat. Tumah ka hmu lo. Nuam ka tih chiah loh avangin in lam panin ka let leh ta daih a. Ka sawi hmaih loh tur chu hetia khawpui daifêma kan awm avang hian chhiat thatah kan lang ngai lo tihna a ni lo. Chhiat tawhah phei chuan kan unauin kan kal dial zel. Motor kan kawl bawk a, thil harsa a ni hran lo. Ka nu hian mizo nunzia leh nunphung min hrilh nasa bawk a, Mix ni mah ila, mizo pure aiin mizo culture ka hre zawk maithei a ni. Sangpuia farm ka thlen chuan vawk chaw a lo chan mek a, ka khawngaih deuh nge ni ka zu chhuk a, ka chanpui ve a. 

A phone a rawn ri ral ral a, phun hluk chungin a la a. "Eng nge?" a ti táwng mai. A mood a fuh vak lo nge mawni dawn ni. 

"Aw..a tawk, i ngaih ngaihin ngai rawh ka tih kha. Thudik i hriat hunah inchhir suh, ka kal tawh hnuah ka lêt ngai lo ka tih kha" a ti thur thur a. Ka man thiam deuh. A phone a dah hnu chuan, "In inthen elo?" ka ti sap a. 

"A nih kha, Miss Kimi nen min ringhlel tlat a. Miss Kimi te a lo va be vel a, min tizak lutuk" a ti hmuk a. Rosangpuia hi a tleirawl chhuah ti ila kum 17 a nih atangin bialnu a nei tan a. A lerh ve riau. Hmeichhia lah hian an lo duh thei em em lehnghal. Nikum kum tawp lam atang khan tuna a then tak Naomi nen hian an inngaizawng a, an induh ve viau. Naomi pawn chaw a rawn ei tawh. A hmeltha a, a fel viau bawkin ka hria, Sangpuia aiin kum 2-in a upa a, Nurse a ni nghe nghe. 

"Nang pawh rinhlelhawmin i awm a niang chu" ka ti a.

"Awm lo, miss kimi hi laklawh thilah vawi khat ka phur a, an veng a lo inang kher bawk nen, min ringhlel ringawt alawm. A thík a nih pawn ka hrethiam, a lo va be vel khan min tizak lutuk" a ti nghut nghut a. 

"Miss Kimi chuan a duh che a niang, chuti taka Naomi'n a thik chuan" ka ti lehzel a. Ka mita min en kelkawl chungin, "Min hriatchian kha, ngaihzawng ka kawp ve ngai lo, Miss Kimi chuan min lo duh ve pawh nise Naomi nen kan nih chhung chuan ka kawp lo vang" a ti nghet charh a. Hei hi chu ka nu leh pate min zilhna vang a nia. Tleirawl kan hriat phat atangin sex education, mipa mawhphurhna, hmeichhe mawhphurhna, Mo fel awmdan, Makpa awmdan tur..engkim zawng zawng min hrilh vek tawh. Ka nuta te pahnih pawh hi an a virgin thlap. Kei ber hian hmeichhe mawhphurhna hi ka hlen zo lo êm a, ngaiah min nei ta deuh ringawt a nih hi. 

"In neih duh loh tur chu ngaihzawn loh tur, laklawh a awm thei. Mi fanu duatlai khawih chhiat loh tur, in farnu hi tu emaw te fapain khawih chhia se in lawm lo vang. Kan thu zawm lo va hmeichhia inchetsualpui neih a ngai anih chuan inhmangaih emaw hmangaih lo emaw in nei dawn. Chiang u la, hrereng ang che u. Sangzuali pawh ngaihzawng chu neih tur, mahse, i pasal tur angin mitthla la, iai rukna i neih chuan beiseina siamsak loin bansan nghal ang che. Tuma thinlung hi na taka hliam loh tur, a vuaklet a na thin. Tin, eng anga hun remchang leh i hmangaih em em pawh nise, i pasal a nih hma chuan sex i hmanpui tur a ni lo" tih thu hi ka nu leh pate thurolum a ni. Chuvangin ngaihzawng kan neih ve pawn kan kawp ngai lo, kan phatsan tawp ngai hek lo. 

"Tha takin sawi dun rawh u. Inthen ringawtte chu" ka ti a. 

"Nia, ka tlawm theih hunah le" a ti nghut. Ka nau mah nise, puitlin kawngah ka tluk vak lo. Ka chhohsan ta daih a, ani mood chhe deuh bula táp reng kha ka peih teuh lo. 

Ka inleih tleng thuak a. Zanriah ei a hun leh ruai a ni mai e. Ka pa erawh an hna a laklawh thu ka nu a rawn hrilh a. Kan unauin zanriah kan ei. Ka nu chuan ka pa a nghak lo ngai lo. Ka nu chhungte lam nen hian kan inpawh tehchiam lo, Ka pu Pu Liantawna hi thawkkhat lai chuan sumdawng lian tak a lo ni ve tawh thin a niawm e. A nupui hi ka nu nuhrawn a ni a, a mitmeng a thîp ka ti mai. Tunah chuan an tlachhe titih a, ka pu Pu Liantàwna boral atangin kum hnih a liam ta. Kan intlawhpawh lo ti tawp mai teh ang, ka pi chu a makpa te bulah a khawsa a. An in, ka pu damlaia an khawsakna kha an harsat êm vangin an hralh a niawm e. Ka nuin heti taka a tlawhpawh loh chhan chu an in an hralh dawn khan, "Ka pa sulhnu awmchhun a ni tawh a. Hralh lo mai rawh u, sum leh pai ang zawngin kan tanpui mai ang che u" tiin a ngen a niawm e. Mahse, ka pite nufa chuan a thu ngaichàng loin an hralh ta hmak a. Ka nu lunglian tak mai chuan, "Mai maia..inzawmna kan nei ta lo ve" tiin an inlaichinna a chhu chat ta a ni. Ka pa lama kan chhungte nen erawh kan inpawh ve fú ka pa nu Ka pi Mary nuta leh a laizawn fate nen pawh kan la inlenpawhin keini aiin an khawsak a lo harsa nen, kan pui nasa ve hlein ka hria. 

Zanriah ei khama chanchinthar kan ngaihthlak chuan, Ruang chhar thu an rawn puang leh ta tlat mai! Chu ruang chu Lalliana ,kum 58 bawr vel, sawrkar office pakhata an peon a ni awm e. An office piah maia tuichhe paihnaah a ruang chu hmuh a ni. An hmu har nge a khawng vek tawh a niawm e. Ka nu chu a chek hlak a, hlauthawng hmel a pu leh tawh. 

"Amanda a che leh ngei dawn e" Remruatpuia a ni. 

Ka pa motor thawm kan hre zui nghal a. Ka nu a inpuahchah vat. Ka pa pawh kar loah a rawn lut ta a. 

"Ruang an chhar leh tawh. Pu Lalliana kha pa fel tak a nia sin mawle" a rawn ti lut nghal a. Ka nu chuan a bag lo laksak vatin a biangah a chuk zauh a. "I hmelhriat em ni?" a ti sap a. 

"Hre lutuk e. An office ka va dawr tumin kan inkawm hrep alawm. A thattu hi ka hre chak khawp mai" ka pa chuan a ti nghut a. Ka ngaihbel nge ka nu chuan thawveng sawt hmel a pu. Ka pindan ka pan hnu chuan Malsawmpeka ka rilruah a rawn lang lehnghal. 

Ka phone la chhuak vatin, "Malsawmpek' ka va ti tháwr a. A lo online ve vú avangin a seen ve vut. Typing a rawn lan avang chuan ka khi sak a. 

" Eng nge i la duh fó?" tih a ni. 

"Dp nei rawh" ka ti vat a. 

"Ka thu thu" a rawn ti. Ni e, i thu thu chu a nia lawm.

"Tun laia Dp pawh nei ngam lo mipa dawihzepte han nih! A gay thlak eee" ka va ti a. Emoji nui uar uar lem ka dah tuar bawk. Min reply tawh lo. Lehkha ka zir zawha ka mu turin ka phone ka bih leh chuan Malsawmpeka chuan Dp a lo nei vah mai. A ui a ni ngei ang, Husky niin ka hria, a pawm a, hahdam hmel zetin a thu. Inbual zo hlim fai vàng a ang. Ka sawi vanga Dp nei a ni lo a nih pawn ka ngai lui tho tho dawn. Ngeiawm chhuahin, "Nice Dp, thuawihpa" ka va ti a. Ka data ka off nghal daih. Ka mumang erawh a tha vak lo. 

Ka nu nen kan lo bazar a, Remruata pheikhawk tur kan lo en niin ka hria. Kan en mek laiin Amanda leh Sama an rawn kal a, ka nu bulah chuan, "Khawiah nge a awm? Ani khan mi tam tak nunna a la a ni" an lo tia. Amanda lah chu a thinrim hmel nasa si, ka nu chu a hawi á nasa mai a. Kei lah ka lo buai ve em em bawk. Ka nu chuan, "A thi tawh. Keimah ngeiin ka that " a lo tia. Sama hian kan nufa chuan min lo pawt dawr dawr mai a. Ka harh hlawl mai. Ka thlan a lo tla hliam a. Khatiang mumang kha ka mang ngai lo asin mawle. Dar 3:24 chiah chiah a lo nia. Ka va zung a, ka mu zui leh daih. Ka vannei a, mut harsat mi ka ni lo hlauh. Rosangpuia hi kan buaipui nasa thin, muthilh a harsat em em mai a, pills te pawh ei chang a nei hial thin. Tun hnu hian a zia ta deuhin ka hria. 

Inrinnni zing a nih angin ka nu nen bazar turin kan chhuak a, Remruata'n eirawng a lo bawl ang. Kei aiin eisiam a thiam zawk miau a. Sangpuia car kan keng a, ka nu bulah nizan lama ka mumangte chu ka sawi ta mial mial a, hlauthawng hmel a pu leh tawh. Nu derthawng tak niin ka hre si lo. 

"Mumang hian awmzia a nei ve thin asin. A mak hle mai, i mumang chu" a ti sap a. 

"Aa..awmzia a nei awm lo em mai. Tu nge an rawn zawn pawh ka hre chuang hleinem" ngaihsam zet hian ka ti a. A ngawi zui ve mai. Sawi hun lai tak nia ka hriat avangin, "Nu, Nu Amanda fapa Malsawmpeka hi ka star a. Ka duh ee.." ka ti ta hlawl a. Chutiang thil chu kan chhungkuaah sawi zahthlak a ni lo. 

"I type a ni lo" a ti hmak mai. Min tihnual deuh naa, "Keimah vangin Dp pawh a nei aw. Ka kherh thlu tho ang" ka ti hmiah a. 

"A mawi lo zawngin khawsa hauh suh ang che" a ti thak a. Hei hi chu ka tum lem bik lo. Mahse, mi dang thinlung hneh tur hian mawihnai leh zahawm taka chet loh theih loh hun a awm ve thin tih erawh ka pawm. 

Bazar kan thleng a, chawhmeh kan en mek laiin, "Nu Zo, teh hlawl che chuan" Malsawmpeka aw ngei mai chuan a rawn ti ta a. 

Ka lehhawi rang kher mai. Min hmuh chuan ani pawh a danglam ve deuhin ka hria. Ka nu chuan nui sáng chungin, "Mala nang i ni maw? Kan va inhmu khat ve aw. E taka! Hei ka fanu Sangzuali, Shillonga awm ka tih kha" tiin min han hmelhriattir zaih a. A zei ve reuh lutuk. Phur fahran loin min chibai ve tak kha maw. 

A inkhai bawr ve lúk mai. Mahse, kan dinho laiin , "Mal, ka zo, kal ila" Hmeichhe sam sen tháng mai, hmeltha uluk zet mai hian a rawn ti a. Kei aiin chu hmeichhia chu a naupang tih ka hre bawk. Mala chuan lo nuih sukin, "Aw le.. anih Nu Zo, kan kal phawt ang aw" tih leh kal an rual ta nghal a. Ka enzui vawng vawng chu hmuin, "I type a ni lo ka tih kha" ka nu chuan a ti zawi sap. 

Ka ner sak a. "Ka type a ni thung alawm. Ka tlawm dawn lo" ka ti chang rát a. 

To be cont. 

Comment hmuh hi a nuam ve a, infak hluak lam a ni lo. Sel kan ngaihna, advice kan ngaihna te hi hriat kan mamawh ve lutuk a nia aw 🥰