saidingpuii 9

Dr. SAIDINGPUII (9)

Ziaktu: Toni Râlte

Kan khuaah hian Field pahnih a awm a, pakhat zawk chu Vengsangah a awm a. A zim deuh avangin anmahni veng bil bakin an hmang meuh lo. Tuna Daisy awmna hmun hi kan khaw Field chu a ni zawk a, Vengthlangah a awm thung. Chu lam pan chuan ka inkhalh thla bap bap a. Dar 11 a pel tawh a, Daisy chu tun ang hunah chutiang hmunah chuan eng nge maw a tih ang le? Apuii nen inkawm thin lo se zawng ka kal lo chiang viau ang. Min ngamtlaka min lo ko ve ni bawk si chu han hnial tawp kha ka hreh ve deuh si a ni. Field ka tlan luh lai chuan dar 11:20 a ri tawh a. A chhungte pawn an ngaihven lo mawni dawn le..ka tlan phei zel a, field chhak lam zawlah chuan ke in ka han chho a. A reh vawng vawng mai. A vawt súk lehnghal. Flashlight on in ka phei zel a, Daisy chu ka ko pah bawk. 

"U Ruat' a rawn tihna lam chu ka ên vat a. Thingbuk hnuaiah a lo thu sawp niaih mai. A sam a thlah hniang a, a kawr par chu a themlem deuh vang ni maw vawt tih hmel deuhin a lo inkuangkuah hlan a. 

" Ti nge hetah tehdaih i awm?" ka ti a. 

"Lo thu phawt teh..a vawt lutuk" a ti khur dat dat a. 

"Thu khawmuang loin haw zawk ang, i chhungte pawn an ngaihtuah ang che..hawh le" tiin kaih thawh ka tum a. Min rawn pawt let dáwrh, ka lo inring tha thum si lo va, amah chu ka zuk bawh deuh rawk rawk a. Mahse, ka inbengkang leh vat. A nui hawr hawr a, a thawven hmel phian lawi si. 

"U Ruat , hetia awm hi ka duh bik lo asin. Zantirah khan Kimi te nen grape juice in ang u tiin tah hian kan chho a. Kan in a. Kan in mek laiin Danny te thianho an lo kal a, Zu pangngai an rawn keng a, Kimi te chuan an in sak ve ta mai sia. Ka la rui lo ve tho bawk nen, ka in ve a. Duh aiin ka rui ta a. Chuan, Kimi te chuan ka hriat loh hlanin min lo hawnsan daih alawm. Ka lo chatthla nge pawh ka hre lo, ka harh chuan tumah an lo awm tawh lo" a ti ta niah niah a. A va ho thin e aw. 

"Zia lo hle mai. Tunah chuan i harh deuh tawh kha, tirawh le,i haw ang" ka ti leh a. 

"ka haw ngam hleinem, ka nu ten engtin nge min tih ang? Min hlap duk vek ang" a ti leh nghat. 

"Apuii bulah i mu mai dawn nia, i pa te ka biaksak dawn che nia" ka ti ta zel a. He lai hmun reh lutuk a a fala hmeichhe awmpui reng kha dikin ka hre tlat lo a ni. A rawn ding pai khet khet a, a nuihzatthlak lek lek zawk. Hmai thal hàa min melhin, "URuatpui,.." tih leh min rawn kuah a rual a. Ka áwmah chuan ngaihngam hmel deuh hian a bei thlawp mai. Ka'n din vang vang hnuah, "Kal ang aw..kan inah i riak mai dawn nia" ka ti a. Dik tak chuan hetiang bel buala an ina dah chu ka zuam chiah bik lo, a nu a nasa ve angreng si a. Engtin tin emaw an bum theih mai turah ka ngai deuh. A rawn dak chhuak thut a, ka inrin hmain min rawn fawp ta mai a. Ka ding zúm zût ringawt..rei min fawh hmain ka nam kiang a, "Daisy, a dik lo. Hetiang chuan awm suh. I ú ka nih hi" ka ti a. Mipa thenkhat tana hnar a harsat dawn tehlul nen, keimahah feelings chhete mah a awm lo kha ka vanneihna niin ka hria. Ka kai lawk a, Scooty awmna lam ka panpui ta hlawk hlawk a, a rum leh nghat thin. Ka ngaipawimawh duh lo. 

"Nghet deuh khan min kuah rawh aw. I tla ang e" ka ti nghut a. Min rawn kuah thawk. Kan tlan chhuak ta nghal a. Zan a rei tawh bawk a, motor dang pawh kan tawk lem lo. Min kuah fet lek lek zel a, ka ngaipawimawh duh lo lui tlat! Doctori'n Daisy a lo thík viau kha demna em em ka nei ta lo. Kan Daisy hi a lo nula ve tawh tak tak a nih dawn hi. In kan thleng a, ka luhpui a. 

Apuii ka kai tho a. Phak zetin a rawn tho. Daisy nen min hmuh chuan a meng pháwk ngang mai. "I pain min lo call a. I awmna ka hre si lo va" a ti ta mai a. 

"Call leh rawh. 'Ka bulah a riak dawn, lo ngaihtuah suh u' ti rawh" ka ti vat a. Kan dinhmun hrethiamin a call ve ta vat a. A pain a rawn la a, "Pa Rin, Daisy chu ka bulah a riak dawn aw.." a ti a. 

"I bulah a awm lo emaw ka tia" a rawn tih chuan, zawitein sawi dan tur ka hrilh a. 

"Kimi te nen an inkawm a, zu an lo ruihsan vek a, Hei Mama nen kan han hruai a. A tlai tawh sia, ka bulah riak mai rawh se" a ti ta a. Pa Rinpuia tawng leh hmain a dah daih. Buaina a tam mai mai. Tikhan a tukah Daisy chu hau ve tawh mai rawh se. Daisy chu a uak a uak a, a luak dawn tih hriain hmanhmawh zetin bathroomah ka pawm phei a. A luak ta puat puat a. Harhvang tih takah ka ní a rawn tho a, a rawn hmu ve ta vek. Sawifiah ngai loin Daisy chuan zu a rui tih a hrethiam nghal. Apuii nen kan buaipui rei angreng khawp mai. A lu te kan tihuh thul, a tawng bial bial reng bawk si. A in hnem viau a nih ka ring. Mipa sual tak a tawng ang tih pawh a hlauhawm alawm le. A harh deuh hnuah chuan Apuii khumah kan muttir a. A chau tawngkhawng nge a muhil nghal bawrh bawrh. A rim a nat deuh vangin Apuii chu Nupuii bulah a inthawlh ve ta daih a. Pathian zarah kan unau hi ruihhloah kan fihlim tlang êm a, a rim pawh kan ti hleithei thin lo a ni. Kei pawh phone pawh khawih tawh loin ka muhil zui ve ta daih a. 

Ka ní tawng làwng láwng thawmin min kai harh leh a. A mak teh fó mang e. Mut ám ve deuh duh pawh hian. Tho chhuak duh rih loin an tawng chu ka ngaithla a. Mi dang tawng chu thinrim awrawl nia ka hriat vangin ka beng ka chhi ngun zual. 

"Lalnunsiam, rawn tho vat rawh. Engvangin nge i riah ringawt a?" Daisy nu aw niin ka hria. Ka inbengkang vat a. Ka va tho chhuak ve ta nge nge. Thutkhawmna pindanah Daisy nu leh Daisy nau Lawma te chu an lo thu ran a. Daisy nu chu a meng rum ngang mai. Ka ní chu Apuii te roomah lutin Daisy chu a zuk kai tho a niang. Keimah min hmuh rual chuan Daisy nu chuan, "Ti nge in lo riahtir ringawt a?inva timak ve" a ti nghal táwng a. Thu pehhel thiam lo tih takah, "A rui sia, in hauh kan hlau a" ka ti puat. 

"Ka va han awih hlei lo êm aw. Lalnunsiami a rui ngai lo e aw" a aw lah chu a ring hrep a! A fanu chu a ring tha ve hle mai. A tha, mahni fate rinhlelh reng ai chuan rinngam tluk a awm hleinem. Ka nui suk ringawt. Daisy chu a rawn tho a, Apuii'n a rawn zui bawk. 

"Engvangin nge i riah ringawt a? I zak lawm ni? Khumfa te kha i rawn hawn ang e" Daisy nu tawng duh dantê chuan thin a khei tlat! Ka tawng hmain an pindan atanga rawn chhuakin Nupuii ta pek hian, "In va bengchheng chel chul tak, haw vat teh u. Infanu ruih thin nen nen, a luak zawng zawngte saw mama leh apuii'n an thian vek aw. Pitar, khumfa kan nei lo aw. I fanu hi hawpui rawh" a rawn ti ta mai. Ani hi zawng khap hman a ni ngai si lo, a tawngkam lah a na thin si. A buaithlak a ni e. Daisy chu a ngaihna hre mang lo zet hian a awm a. A la kai deuh mawni ka ti hial. A nu chuan a kai lawp a, a chhuahpui ta nal nal. 

Ka ní chuan, "Ka hlauthawng reng ah, Mampui, nanga pawh va hruai haw mai tur a nia. Mahse, va hruai haw ta la, nangmah a puh leh tho ang che" a ti hluk hluk a. 

"A ho em mai, ngawihsan mai mai ru, tikhan" ka ti ringawt. Tukthuan ei laiin Nupuii'n, Apuii bulah, "A dawrah chuan i thawk lo chiang khawp ang..A nu pawh khan in inkawm a phal tawh lo vang" a ti a. 

"Aa..thawh pawh ka chak leh tawh lo e a. Daisy chu zu a in ve thin tih ka hre miah lo va, a nu kha ka hrawn peih lo e a" Apuii pawh chuan a lo ti a. Ni e, ka nî te nupa pawn Daisy dawra a thawh chu an phalsak ka ring lem lo. Kei erawh chuan engmah ka sawi lo thung. 

Chaw eikhamah damdawi te ka han ei leh te te a. Ka awm a nuam ta deuh bawk nen, In hnuai khawih chhunzawm chu ka rilruk deuh a. Hlawhfa atan Hruaia leh Zorina ka sawm ve a. Hlawhfa tihah rate pangngai aia hniam ka pe ang, min pui ve pah kha a ni dawn a. An ni pawn an phût hran lo bawk. Ban khur kan lai a, lei khawih lutuk chu ka dam a la pan sia tiin min awl hneh viau mai. Chawhma chhungin khur hnih chu kan peih thei ta a. In a san deuh vangin in hnuai tihah a hran ang deuh hlawk anga sak a ngai dawn. A chung erawh in chung chhuat a rin theih dawn thung a. Zau tak pawh tul ka ti hran lo. Ban kan han phun a, kan la zei vak lo naa a nghet ve tho turah ka ngai. Dar 1 pelhah thingpui in turin in chungah kan chho ta a. Nupuii'n kel ek chana a lo chhum hluai a, Apuii atta kan thar lam zet nen kan ei ta a, damkawr e ti lo chuan ka ei tui viau. Ka ei nghek mai. Thingpui sen hang kan dawm lai mekin ka nî bazar kal a rawn haw a. Eng dang sawi ta lo chuan, "Mampui, Daisy i lo hruai haw kher kher chu a tihchi loh hle mai. A nuin 'Ruatpuia'n a hrai rui a. A nau chhuanlama hmangin an inah a lo riahtir a' tiin a lo sawi darh nasa mai a. A zia lo êm mai. Ngawi ve mai mai se tu khawkhain an hre lo ni mai tur" a ti ta bawrh bawrh a. Ka pháwk hrû mai. 

"A va mak bawk ve mawle. Amah Daisy pawn thil awmzia sawi tur a nia" ka lo ti mai a. 

"Hetia a sawi vak nachhan nia ka hriat chu nizan khan in inphur lai kha Danny te hoin an lo hmu che u a niawm e. Kan inah i rawn hruai haw bawk nen, inru ang thawthangin alawm in than le" Ka nî chuan a ti ta a. Nizan khan min hmutu an awm lo emaw ka tia! Danny te chuan min lo hmu ru reng a nih awm chu! A zia lo mang e aw. 

"Ngawihsan mai mai ru, Daisy nu te chu khin chi a ni lo. A rapthlak si, mi hmuhsit a tina bawk si. Tikhan ngawi reng tawp r'u" Zorina chuan a lo ti ve nghut nghut a. Saidingpuii beng a thleng tawh ang em tihah ka lo buai thung. A têk nasa dawn lutuk hian ka hria a ni. 

Ka hlauh ang ngeiin in hnuaia kan chhuk leh tur chu a call ka dawng ta a. Ka la vat. 

"Ka thu hriat hi a dik em?" A ti nghal táwng a.

"Eng thu nge i hriat?" Ka ti sup. 

"Daisy i ruk thu hi mawle" a rawn tih chuan ka nui hawk. Teh tawp zel a!

"Nupui ka ru dawn a nih chuan nangmah ka ru ang che" ka ti nghet charh a. 

"Mahse, an va sawi darh nasa si ve. I hrai rui a, i hruai haw lui niin an sawi a. Chu chu Daisy sawi dan pawh a niawm e" a tih chuan ka ter ve deuh at, "Mai maia..an va timak bawk ve mawle. Nizan ka haw tur kha amah Daisyin min lo bia a, amah hruai haw turin min lo ngen a. Phur vak loin ka va hruai a nih kha. A rui em em lehnghal a, a haw ngam tawh loh vangin kan inah Apuii khumah ka muttir ta ngawt a nih kha.." Ka ti ta zung zung a. Thiam lohna engmah ka neih miau loh avangin hlauhthawnna chhete mah ka nei lo. 

"A nih chu mawle, kei pawn ka lo ring chiah lo va..hei damlo kan nei, ka rawn be leh ang che" a ti ta diam a. Thawk khat a veng e. A rawn thinrim chiam ang tih kha ka hlau ru deuh a. A kawlh lutuk rih lo ve. Ngaihngam tak chuan hna pawh ka thawk ve leh thei ta. Daisy te lam kamtam viau mah se, min ringtu te rinna chu a danglam chuangin ka ring lo. 

Pa Rema rawn haw pawn chung bak chu sawi tur a hre lo. Chutitaka an sawi darh chu eng nge maw a awmzia ni ang le? Apuii chu a lawm chiah lo nge, Zanriah ei khamah Daisy chu a call ta a. A ring ral ral mai. 

"Aw hello" a rawn ti dam thlap a. 

"Daisy, i nu tawng duhdan hi kan va lawm lo ve. Ti nge keimahni zawk min puh vek a? Eng nge awmzia?" Apuii chu a tawng nem tehchiam lo. Ka nî te pawn an khap lem lo, Daisy nu a kamtam ve êm a tin ni. 

"Engtin vak nge kan sawi. Thudik bak kan sawi chuang ami? U Ruatpuia pawh min hruai haw turin ka hrilh reng a, in inah min riahtir tálh a nih kha" a rawn ti ta mai a! Apuii a ling phat. "I va zak lo em em, i hawn ngam loh thu i sawi a nih khaa, chuan Mama hrai ruih angah che te i nuin a sawi a. Mama'n zu a in ngai lo tih a hre lo a ni maithei. Engkim a chinchhuaka kan sawi chuan in zak palh ang e aw. Danny te thianhoin an sawi dan che hi ka sawi darh ve palh mai ang" a ti ta nghat nghat a. 

"Engtin nge min sawi a? Sawi teh.." A rawn ti vat. 

"Ka sawi kher lo vang. Sawi pawh a tul ber lo, mahse, Kan chhungkua min puhchhiat zel chuan i thang mawi lo ve viau maithei a nia. Nanga zu rui kan lo buaipui che a, kan thlavang hauh tur ber zawkin min puh let hlauh a. I hre viau ang" Apuii aw chu a khur dat dat mai. A thinrim ve hle tih a lang. 

Kei erawh engahmah ngai duh lem lovin Ka bialnu rim turin ka insiam a. muangchangin ka tlan chho a. Damdawiin pengah chuan Danny te thianzaho an lo thu thap a. Ka ding duh ta lem lo. Tleirawl buainaa inrawlh ve zen pawh a zahthlak mai mai. Apuii khan eng thu tak hria ang maw..Daisy'n a hlauh danah khan eng emaw tak zawng a ni ngei ang. Saidingi in ka luh chuan ka beisei loh deuhin Ropuia a lo thu ve khur a. Ka hnual deuh, mahse, ka bialnu zawk alawm le ti rilruin ka intingampa lui a. Ka thu fel chiah tihin Tei'n thingpui háng a rawn chhawp nghal..a fel thin a nia. 

Ropuia chuan, "I lo chhuak ta daih sia, kha i zia viau tawh a ni maw!" A ti nghut a. 

"Aw.. Zia ve zel e, ka lu hi a rawn na leh zauh zel a, a bak chu awm nawm lohna em em ka nei tawh lo" ka ti ve mai a. 

Doctori lam hawiin, "Ka rualin Aizawlah chuan kal ve mai la..a hranpaa Driver inhruaitir kher te chu a buangbarthlak loh mi?" A ti leh sup a. Saidingi chuan, "Ka zin leh lawk dawn lo, ka naute an lo zin dawn, naktukah" a lo ti ve mai a. Ni dawn tak, Valtea te an rawn zin dawn tak e. A hlimawm viau ang chu..

Ropuia chuan, "Ruatpui, in khaw nula tihtlak deuh min kawhhmuh tur te i hre lo maw? Ka awlthawng angreng sia. " a ti sur sur a. 

"An awm nual asin. Kan khaw nulate hi an duai lo ve riau a nia. Venglai lam nula ho khu an chhe lon zual" ka lo ti ve sawk sawk a. 

"La zuk rim tur a nih chu..Saidingi rim reng pawh khawtual tlangval kan dîp palh ang che u" tiin a nui huah huah a. A tira ka lo thîk rukna kha a thêp deuh suai mai. Nia, Daisy te ho zuk rim se, Daisy nu pawn sawi nuam a ti ngawt ang chu. 

Ropuia chuan call a dawng a, pawnah a va bia a. Saidingi bulah ka insawn phei vut. Tei erawh Tv a en a, ka zah duh vak tawh lo. 

"Valtea te chu tlaiah mi an rawn thlen ang? Tu nen nge?" Ka ti a. 

"Puia nen an nia, aw tlaiah a niang. Motora rawn kal an tum naa, ka remti ta lo a nih kha..sumo in lo inthlah chhohtir mai rawh se" a ti ve mai a. 

"Chuan, Daisy vel chu eng tin nge i lo hriat ve?" Ka ti sup a. 

"Damdawi rawn lei hoin an sawi alawm. Mahse, 'Ruatpuia'n zu a in ngai lo va, chutiangin a ti lo tawp ang, amah Daisy hir her hi a za tlat a..sawimawi an tum ve nasa sia' an tih ve daih kha maw..an ring vak lo ni tur a ni" a ti a. 

"Nang pawn min ring tiraw?" Ka ti nghut a. Min rawn melhin, "Ring e..ka rin loh anga i awm chuan keimahah hriatna a awm mai ang" a ti sap a. Tei hmuh loh turin a kut chu ka humsak a. Tleirawl inngaizawngte pawh kan ang deuh e a. Ropuia pawh a rawn lut leh naa, "Kawn lamah ka zu chhuk ve mai mai teh ang. Lo inkawm ru, Ruatpuia lah lenpuia sawm ngam i ni si lo" awmze nei deuha min melh chung hian a ti a. Ka khi suk ringawt. A hre vek tawh a nih hmel. A pawi lo zawk. A chhuk hnu lawkah Tei chuan, "Mam, U muana'n nupui a rûk kha i hre tawh em?" A ti ta a. Ka pháwk kher mai. Chutiang thut thuta a neih chu ka ring lo asin le. 

"A va mak! Khawi ami nge a neih a?" Ka ti hluai a. 

"Zote ami mawle..a bialnu hlui a nia. A nute pawn an duhpui a niang" tiin za lo zetin a nui hak a. 

"I rilru a na em?" Ka ti vat. 

"Aa..na lo tawp chu a ni bik lo va, mahse, hetia amah zawk a inthiarfihlim hi ka lawm zawk. Tikha chuan engtin pawn awm ila min dem theihna a nei tawh dawn lo va. A tha zawk" a ti ro hak a. Tawrh zawng a tuar ve khawpin ka ring. Mahse, a luhlul a, a induhtawkna nena a hmachhawn chuan a hneh thei dawn tih ka chiang ngam. A pindanah a lut ta daih a, Movie a en leh dawn a ni maithei. 

"Tei chu ka lainat ngawt mai. Mahse, a sawi ang khan Muana hetia a awm hi a tha zawk. Nakin zel atan pawh" Saidingi chuan a ti a. 

"Nia..a tuar thei em em ang. E chuan! Ropuia khan a hria mi?" Awmze nei deuha melhin ka ti sup a. 

"Ka hre bik lo, a hria aniang chu ka ti mai. Hre rawh se a tha zawk" a ti mai a. 

"Mi zawng zawngin hria se pawi tihna i nei ang em?" Ka ti leh kher a. 

A nui sak a, "I va naupangchhia tak. Information mike atangin kan puantir mai dawn mi?" A ti a. Kan nui dun. 

"Min tibuaitu engmah awm tawh lo se ka ti..keima lam atang leh nangma lam atang pawn" ka ti leh a. Ka thutak viau. 

"Ka beisei chu chu" min melh ran chungin a ti a. 

"Zu hi i mutàn a nia. I kalsan hmak hunah phei chuan kan hlim ngawt ang" ka ti a. 

"Ka sawi tawh kha..nupa nih hunah chuan ka sawi thei lo va, hetia kan la inngaihzawn lai chuan eng emaw chang mut theih lohte, eng emaw tihpui nikhua angah te chuan a confi tawk vela lem hlek ka duh thin dawn. I hriat miah loha in thei ka ni nachungin dáwt sawi ka duh lo" a ti chhum ta hmak hmak a. Lungawi taka pawm hmiah chu har ngeng ngawng tak a ni. Ka tûm hmel a hmuh chuan, "Hre saa min ngaizawng i ni. Ka tiam a che. Ka mualpho lo vang. Mahni intimualpho duh khawpa mize hniam ka ni lo. Zu ka in tawh lo vang tiin tiam ta che ila, engtik hunah emaw in leh ta si ila..thutiam hlen lo ka ni ringawt dawn, ka duh lo. Ka insiamrem theih hunah erawh ka tiam che pawh ngai loin ka sim hmak ang" a ti ta charh charh a. Sawi mai tur ka ván. Ka lungawi hlawl lo. Mahni tawkah ka inla pa ve si, chutia ka bialnu pawh thunun thei lo ka nihna chuan min tiná, tlawm ka inti a ni. 

"Aw..a tha lawm..kan in dun zel anga a ni mai lawm" ka ti ta a. Min rawn melh háw, chhuat lam ka melh lui tlat thung. 

"I va in awm lo e aw. " a ti sak a. 

"Bialnu pawh kan thunun theih loh chuan in ve mai tur" ka ti nghut a. 

Ka biang a rawn chul a, ka bengah kaiin ka beng til a sik niap niap a. "Zu hi sualah i ngai tihna em ni?" A ti sep a. 

Melh zawk chungin, "Suala ka ngaih lam ni loin Zu in hian thatna aiin chhiatna a thlen tam zawk a. Sual chu a ni mai lo mi?" Ka ti a. 

."Kei chuan hahdam nan ka hmang asin" 

"Zu i la in a ni maithei, zuin a in let ve hunah che chuan tiang hi i ni hauh lo vang. A inte ngei ngei pawh hian a thatna sawi tur in hriat ka ring lo. Nizan thil thlengte kha ngaihtuah la, Daisy ruih vanga kei ngei pawh ka hmingchhiat dante..eng nge a hlawkna?" Ka ti ta duah a. 

A bu nghat nghat a. "A dik alawm. Han fak chiamna tur hi a awm hauh lo. Chhungkua a chawk buai a, mimal nun a tithuanawp a, kan nih tur ang min nihtir theih loh piahlamah mualphona leh hmingchhiatna a la keng tel chêu lehnghal. Mahse, maw a ruih hi a nuam sia lawm" a ti ta a. Hmeichhe dang sawi chu nise over ka ti ngawt ang. Ka bialnu a nih vangin ka ngaithla liam mai mai a ni. 

"I ruih chhung kha a rei si lo va" ka tih chuan, "Mahse, ka inchhir ngai chuang hleinem" a ti khauh. Hmm, he nu hi a pianthar phawt loh chuan kei tlangval naran tan hneh mai chi niin ka hre lo ve. 

"Ka zuk hawng ang e. A tlai mai dawn" ka tih mek laiin Call ka dawng a. Ka nî a lo nia! Min call ngai zen zen lo asin le. 

"Aw, nî" ka ti nghut a. 

"Mampui, hei a zia lo em mai. Daisy nu ten palai an rawn thlak a nia. A zahthlak em mai. Lo haw rang teh" a rawn ti ta mai. Ka rin aiin thil a kal thui tlat mai. Saidingi ka hrilh ve a, "Ka hlauhthawn ang chiah a nih chu..engpawhnise, a bul atangin engkim sawi vek la, a zu inpui te pawh kawm chian an ngai a nih chu. Engvang berin nge palai chu an lo thlak le?" A ti a. Ka hrethiam bik hauh lo mai. Eng nge tihsual ka neih le? Daisy ka va hruai haw chu thil tha tia ka inngaih laiin ka rin loh lamah thu an kalpui ta tlat mai si a!

Hawn dawnah kha chuan rilru ap tûn chung chuan kan infawh ve tho kha maw..ama chungchang hi chu ngunthluk taka la ngaihtuah a ngai a nih hi. Tunah chuan Daisy te hi ka hmehmih phawt a ngai. 

In ka zu thlen chuan Daisy te palai Pa Khuma leh Pa Zira te an lo thu ran a. An ni nen hi chuan kan innel ve reng..

"Eng nge thil awmzia ?" Ka ti nghal táwng a.

Pu Khuma chuan a aw thian kharhin, "Aa..hei Daisy nuin a zana zanin min rawn tir a nih hi. Daisy chungchanga thu lêng vakah tawngkam in lo cheh lu deuh nge ni, 'Daisy zu rui Danny ten an tih rawn" tih lam tawngkam in nei nge ni? A thinur ngang si a, min rawn tir teh poh a nih hi..ngaihdam min dil lo a nih chuan hei aia thui kan kal ang" an ti a niawm e. " a ti ta a. Ka nuihza insûm chu ka hmuhnawm teh ang chu..

"Chu chu tuin maw sawi a? Keiman maw?" Ka ti hû a. 

Pu Zira chuan, "Aw..nangma sawi chu an tia lawm. Daisy a hrai rui tete a, an inah a riahpui hnuah thiamchan nan Danny te a puh hlauh e an ti che a. In thu hi a saisa nuaih mai a, keini Pu Khuma nen phei chuan min tah awh takmeuh vang chauhin a ni kan lo kal. A hmeichhe thuhla han tihsak dawnin mipat hmeichhiatna rawng a kai ve deuh bawk si a. Engtia thu han tihfel chi nge maw ka hrethiam lo" a lo ti chuar chuar a. Palai meuh thlak ta chu keini lam pawh thutak a ngai tih hriain, "Ngawi teh u, thil a nih dan a bul rèt atangin ka'n sawi ang a. Nangni pawh chumi thu keng chuan in haw mai dawn nia. Tin, tuna in rawn kal chhan ber Danny te'n an sual rawn tih vel phei kha chu a rim ara pawh ka hre lo va, ka ka atangin vawikhatmah a chhuak lo e" ka han ti te tê a. Daisy min lo ngen dan leh field-a ka va hmuh dan, a tawngkam leh a chetzia engkim chu hmaih nei hlek loin ka sawi fai ta leng a. An ngaithla uluk khawp mai. Ka sawi zawhah, "Chutiang chu a nih kha ka ring deuh reng a. Ngawi teh, Ruatpui, Pi Puii saw a nasa ve lulai bawk a ni. A fanu tihdik loh hmu hmasa duh loin puhmawh tur a dap tlat mai a. A fanu saw a timualpho mai mai zawk a ni. Engpawhnise, tirh kan nih anga rawn kal mai kan nia. Kan thu hriat ang angte hi kan va thlen ve leh phawt ang e" tiin Pu Khuma chu a ding hluai a. Kan chelh duh lem lo. Thil thlen dan chu a zia lo lam a ni. 

Apuii bulah ,"Danny te chuan khatiang lam hawi khan tawngkam an lo cheh reng reng em ni!" ka ti vat a. 

"An sawi nasa alawm. 'A rui a chatthla a, kan thian thumin kan khawih rawn' an tia an uang nasa alawm. Ti nge nangmah an puh daih theih che le?" a lo ti ta hmiah a. 

"Chung vel chu Danny chuan i bulah a sawi reng reng em? Daisy i biak khan i sawi lang zauh sia, Daisy hlauthawng hian keimah min puh ta daih a ni lo maw?" ka ti ta a. 

A phone hmeh zat zat pahin, "Danny chuan tian a rawn ti. 'U Ruatpuia khan a rawn phur haw ta sia, an inru dawn maw kan tia..Daisy chu nizan khan a chahthlak laiin kan khawih hrep alawm. A rui nawi si" a rawn ti. " a ti a. 

."Mi bulah Danny uanna thu kha i sawi em? Tu emaw tak bulah" ka ti leh a. A lu thingin, "Sawi miah lo, a serious ve deuh vangin a tawpkhawkah ka sawi ang ka tia, Danny msg pawh ka delete duh lo" a ti ta a. 

Thil chu ka hrethiam tan ta deuh. Danny uanna thu vel an lo hre thawi ang a, an hlauthawng si chuan keimahah burbun an tum ta a nih hmel. An á hle mai. Bakah Pi Puii chu a á ka ti takzet, Daisy chungchangah khan ngawi hmak mai nise, hetiang thleng thleng hian thil a kal lo tur a nia,a fanu venhim a tum luatah a timualpho a ni ringawt. 

Muthmunah Saidingi nen chanchin kan inhrilh a. "Engpawhnise , fimkhur tawh la aw. Bum i nuam si" a rawn ti a. Ka nui ringawt. Ni ngawt teh tak e, mi hi ka lo ngai tluangtlam mah mah zel bawk a ni. Ka rin anga an awm lohin ka buai ve leh tho zel sia, fimkhur ve chu a tha viau mai. 

A tukah chuan boruak dang em em chu kan tawk ta lo nge, Venglai lamah kan va lawr lem lo va kan hre lo zawk tih erawh ka hre lo. Tukthuan ei khamah Hruaia nen nimin lama kan tih bak kha kan khawih zawm a. Khawtualah ngei Tile leh hmanraw dangte lei theih a ni tawh bawk a. Tukverh pahnih ka hawng ve ang a, a bak chu thil harsa em em a awm hran lo. Pindan tur a ni a, han pindan leh chhuar han siam vak a ngai lo bawk. Chokut chu U Thianga te siamsa kan va la a, kan vuah nghal. Darthlalang erawh an lo neih tawh loh avangin Aizawl ami chah mai a ngaih hmel. Hna a sawt phian a. A lawmawm. Hna kan bang dawn kan inseng hawi mek laiin ka nîin min rawn ko tuar tuar mai a. A aw ah thlabar aw a tel avangin Hruaia nen hmanhmawh takin kan tlan chho a. Ka beisei loh lutukin Police hmel kan hmu ta mai. Ka hamhaih ve khawp mai. Police pakhat chu ka hmelhriat, Huna a lo ni hlauh zawk a. A ngaihna hre mang lo va kan awm a hmuh chuan, "Thianpa, Daisy ten FIR an rawn thehlut tlat mai a. Kan hruai phawt che a ngai a ni" Huna chuan a ti ta a. Ka bíng ve mum mum thei. Ka beisei phak lo asin, hei em em chu. Kan thu leh hla a tawp mai dawn emaw ka tih laiin..

"A va mak dawn ve aw..thianpa" ka ti hul hak a. Min hrechiang ve tawk bawk a, "Min zui phawt la, kawng a awm mai ang. Lungngai suh" a ti nghet charh a. Ni e, ka lungngai hran miah lo, mahse, a zahthlak ka ti êm a ni. 

Ka ní erawh a thinrim a insum zo ta mang lo va. "Eng nge maw an hriat a? Chuti taka kan laka an han duh mai le? An pawi kan sawi azeng lah a ni lo va, hetiang em ema min tham lo chu kei ka ngaihdan a ni hauh lo mai" a ti ve ta phiar phiar a. Apuii pawh chuan, "Eng nge Mama chungah an tuan daih a? Danny te zawk kha va man ang hmiang. Mai mai a" a lo ti ve hlak hlak thung. A thinawrh ber Nupuii erawh chu mak deuhin a ngawi tlut thung a, a thinrim tih erawh a lang reng mai. Pa Rema pawh a rawn haw a. Kei pawh ka inbual sawk sawk a, ka inthlak pahin Saidingi ka bia a. 

"Aw ka lo hre tawh e. Medical exam in nei ang a, a chiang mai ang. Hetah hmanrua kan nei kim si lo va, kan tithei tlat lo. Zám hlek suh aw..Medical exam nei zo u la, an tihmualpho che avang hian case i file ve ngei tur a ni" a ti sak sak mai a. Ka mamawh lai bera ka lama a tan avang hian lawm tak ka ni. Lo titauin lo sual hle se ka mangan dan tur chu aw..ka vawikhat tawnna a ni si. 

Ka inpeih hnuah kan chhuak dawn a, Pa Rema'n min ko let lehin tawngtaina tawite a nei leh thlap a. Huna te nen chuan kan chhuak ta a. Venglai kan va thleng chu Daisy te in kawtah chuan an lo awm nual mai a. Zep nák emaw ka zak a ni. Nulat tlangvalna kawnga ka fihlim tehlul nen, hetiang ang thil ber khera ka hmingchhia hi...Kan thlahtu teah hetiang kawnga hmingchhiatna nei kan la awm ngai lo asin le. Daisy leh a nu pawh chu police motorah chuan an rawn lut ve a, Ka lo melh kar mai. Daisy chu a meng ngui raih mai a, a mitte pawh a bui làkin ka hria. Ka be chak hran pa lo bawk a, vawikhat ka melh a, khaw dang ka hawisan daih. Pi Puii erawh a túm búr a. A fanu hi a va timualpho tak êm. 

Police lamin thu min zawh dan atangin thil kalhmang chu ka hrethiam ta chiah a. Danny te uang thuang khan, Daisy ruih thu leh an mutpui thu kha an lo sawi nual hman a. Chu chu Pi Puii te beng a lo thleng a, Danny te zawk chunga thinrim ngam ta lo chuan, kei amah buaipuitu zawk chu pawngsual thubuai min awrhtir ngei tumin Danny te ka chu an lo hup zawk a lo nia! Danny te'n an mutpui tih chu hre tho mah se, Daisy chu hrai ruiha pawngsual anga lantir tàlh an tum a nih ber mai chu. A dangdai viau mai. Danny te ka hup nan eng zat chiah nge an insen ka hre lo va, Mahse, "Field-ah chuan kan leng ngei a, Grape juice chu an in. Mahse, a rui lo hrim hrim. Chuan.." U Ruatpuia nen kan inhmu dawn a. Min hawnsan mai ru" a tih vangin kan hawnsan a. A hnu fêah U Ruatpuia'n a rawn phur thla ta chiah bawk a, tah chuan Daisy chu a ruih hmel khawp mai. Tichuan, U Ruatpuia chuan an inah a riahpui ta bawk a. Daisy'in U Ruatpuia thiltih dan puanzar a tum takah chuan zan lama a bula awm ve keini ho chu Daisy mutpui angin U Ruatpuia leh a chhungte chuan an sawi darh ta ringawt a ni.." tiin an sawi. Tu remruatna nge tih leh tu sawitir nge tih erawh ka chiang ngang mai. Ka nuihte a za. Thu saisa zia Police hoin an han hriat pawh chuan thil a kaldik tawk lo tih an hrethiam ve niin ka hria. Daisy erawh chuan, "Danny ten min hawnsan hnua a rawn kal khan, ' A rim rehna' tiin botle ami min intir a, zu pangngai ni pawn ka hre lo. Ka rui ta em em a, engmah ka hre zui ta lo ti ila ka kawr vel a phelh lai chu ka hria" a ti! A nu a hlauh vanga sawi nge, kawng dang a neih loh vang. Nge a hma atangin kei hi min lo set up zawk? Kei chuan a tirte atanga a tawp thleng khan ka sawi tawp a. Sawi belh tur ka hre lo va, paih then tur lah ka hre hek lo. Engpawhnise, Medical exam chu kan hmachhawn a ngai ta a. Hei hi ka innghahna chu a ni mai e. Tun laiah hmeichhe humhalhna dan a tha nasa tawh mai si a, pawikhawih miah si lo hian ka tang lel ang tih ka hlau ve tho. Daisy chu an han exam a, mipa chi chambang chu a lo la awm ngei a. Risk an la huai te pawh ka ti mang e. Exam an han hmachhawn mai ngamte chu..chu mipa chi chu ka chi a ni lo tih an hre kur awm sia. Nge min puhthluk theih tho an ring ni. Kei pawh chuan a vawikhat nan exam chu ka hmachhawn ta a. Min examtu doctor chuan, "I hlauthawng em?" nui chungin a ti a. 

"Virgin lo ila chuan ka hlauthawng mahna" ka ti ve mai a. Min melh zawk mai. Ni e, Saidingi emaw Hlimi emaw te kha lo mutpui hman ta ila, Ka virgin tawh dawn si lo va, eng emaw ngaihthat lohna chuan min tuam ve maithei a ni. Mahse, ka chiang ngam a, ka inringtawk viau. 

Daisy te lam duhdan chu hetiang hi a ni. "Khaw khat kan ni a, mi hrang ang pawn kan inen lo bawk. Hetianga thil a kal takah chuan case siamsaka jail tantir em em kha chu keini lam pawh kan fanu a lo rui ve tho nen, tul kan ti ber lo va. Amaherawhchu, Kan fanu zahawmna a tihbawrhban avang erawh hi chuan pawisa a chawi ngei tur a ni. Chu chu kan ngaihhnathiam theihna sang ber a ni" tih a ni. Pi Puii át man chu a fanuin a seng dawn ta chu a nih hi. A pawi khawp mai. Pu Rinpuia hian a nupui a khap ngam loh rah a tel bawk ang. Ka dim dawn bik hlek si lo va. Medical exam result a rawn chhuak ta a. Daisy serha mipa chi chu pakhat chauh a ni lo tih leh mipa chi dang a la tel ve tih hmuh chhuah a ni a. Chuta chi pahnih sample leh ka chi sample chu a inan loh thu mai bakah kei chu mipa thianghlim, hmeichhia la pawl lo ka nih thu an sawi tel kher bawk. Ka fihlim chiang teh e. Fihlim leh zahawm an tum luatah an dai baw ta a, fing ziktluak lo na na na chu an mualpho dawn ta. Khawngaihna chhete mah ka nei lo. Tuhrah seng hi chu kan awm mek zel alawm.

Ka fihlim chian êm avangin min sezawl chhuah ta hmiah a. Daisy serha mipa chi neitute chu tu te nge tih an chhui dawn a nih hmel. 

Pi Puii bulah, "A tir atang khan ngawi ral daih la, i fanu hi zahna kawnah i dintir lo mai tur. I fanu tihzahawm leh tihfihlim i tum luatah i fanu saruak i pholang ta a nih hi..a pawi khawp mai. Min tihmualpho avang hian case ka file dawn bawk sia.. " ka ti hmiah mai a. Sawi tur a hre lo, mahse, a kawtawpa tang tih takah, "I sulhnu a awm tho a. I fihlim vek tihna a ni lo" a la ti hram. Ka nui tawp. 

Kan khuaa ka let leh ta chu ka rin phak bakin tantu ka lo ngah a. Kan veng chhungah ngat phei chuan min tan vek emaw tih tur a ni. Daisy te chhungkaw mizia an lo hre ve tawh bawk nen. Tin, ka lo la hriat ngai loh thil a awm bawk. Daisy phai zuk awm kha a zuk che ngan viau a niawm a, an rinthu an sawi mai mai nge chu ka hre lo va, Spa-a a thawhpui hmeichhe dangte aiin sum a lalut tam lawtlak a, a chhan dik tak pawh thawk ve dangten an hrechiang khawp mai an ti. Chutiang vel chu kan nia..tin, Danny te chuan an tanhmun a phet ta tih hrethiamin pawngsual case an awrh ang tih an hlau bawk si chu an inpuang fai ta leuh mai. Pi Puii'n pawisa a pek thu te nen lam..engkim chu hailan a ni ta a. Daisy ten an case an lakkir leh tak avangin Danny te chuan hremna an hmachhawn ta lo. Hmachhawn tur pawh an ni bik lo, Daisy duh lo chung an sual a ni si lo va. Min tihmualpho vanga case file ka tum chu Pa Rema leh ka ní ten min khap nasat em vangin ka ngawi zui ta a. Lehlamah ka dikna an hre vek tho a, sual han chhuah leh vak pawh kha ka inthlahrung ve deuh. Pu Rinpuia lahin ngaihdam min rawn dil chamchi reng si a, amah vang leh ka ni te vangin ka thulh ta a ni. 

Chutiang boruak tehnuai kan nih avang chuan Valtea te rawn zin pawh duh angin ka la chiauau hman lo va. Saidingi nen tak pawh kan la inhmu fal rih lo. Han len chhuah vak kha ka hreh ve tumhrang a, min vuipui leh min sawipui tum an lo awm ve sek bawk si. Ka tawmím phah viau. Mahse, in hnuai siam nan hun ka ngah phah ta hlauh a. Kan peih thawkhat a ni der mai. A chhuatah erawh thingphel kan hmang ta mai. Han slab kha a hautak ve riau dawna ka hriat vang a ni. Tun hnaiah sum lakluhna kan nei tha si lo nen, ka inthlahrung ve deuh a. Nakinah chuan kan la ti ve thei mai ang chu maw..

"Zanin chu rawn lang em em tawh teh." Saidingi msg ka chhiar chuan ka khi var var mai. Nia, han hmuh ka tum chiang khawp mai. A ngaihte pawh ka ngai ve tawh alawm. Ka insiam laiin Apuii'n, "Lo leng r'u" a tih làng láng ka hria. Valtea aw ngei mai hian, "Khaw nge i ú mi induh lutukpa hi" a ti lung lung a. Ka va chhuak rang tak. Puia nen an lo thu ran a. Ka va nuih vur vur ringawt. Lehlamah ka boruak an hre ve vek bawk a, chutin an vui tak tak hran lo. 

"Lo chhoh ka tum ve mek a" ka ti a. 

"Han leng rawh, inlen thleng rih mai ang u. I naute kan rim dawn" Valtea chuan a ti a. Ka khi vur vur..Min rawn len chhan chiah lo bawk a, ka bialnu hmu turin ka chhuahsan ta a. Venglai ka tlan phei laiin Venglai nuthlawi fing fel zet Duati te ina Ropuia nui khi vun vun ka hmu phei a. Duati zúnah a uai ngei dawn e ka ti rilru nuah nuah mai. 

Ka han thlen chhoh chuan Tei ka hmu lo va, ka ngaihtuahna hria niawm takin, "Zuii'n Damdawi dawr nghahsak turin a ruai a nih kha" a lo ti vat a. Hun thawl kan nei leh dawn ta. 

Insi chàtin kan thu dun a. "Vawiinah Daisy leh a nu chu an rawn kal asin" a ti sap a. 

"Eng nge an rawn tih?" ka ti nghut a. 

"Daisy khawsik an rawn entir mawle" a ti mai a. 

"A raino khawsik a niang a" ka tih chuan, "Ni mai mai lo. Raino tun angah a la lang lo vang. A rilru a hmang nasa a, a mualpho ta erh sia, a khawsik phah a nih hmel" a ti sap a. 

"Chuan, min lo ngai tawh em?" ka ti ta daih a. Nui hak chungin, "Ka ngaih lohin tuin nge ngai ang che" a ti hawk a. A biangah ka chukz zauh. 

"Thla tharah Aizawlah kan zin a ngai leh dawn aw" a ti a. 

"Umm, Taka Kan zin chuan Ruthi te kha va tlawh ve tur a ni. Min ngen nasa ve sia" ka ti vat a. A meng thim leh nghal, " A mak! Ruthi te chu chutiang a ni lo" ka ti nghut a. 

"Eng tiang nge a nih?" a ti khauh. 

"Aww..thian ang. A nunna ka chhanhimsak a, a lawm..a bak a awm lo" ka ti zung zung a. 

"Hmeichhe dangin ka mit leh rilru ang an lo pu ve thin hi ka duh lo. Keimah chauha pumbilh che ka duh" ka benga pawt chungin a ti a. Ner sak sak chungin, "I ta ka nia lawm..nge maw min rin theih miah loh le?" ka ti a. 

"Ruthi i hmuh chuan i mei ka ni dawn. Buai mah ila ka zui ve zel ang che" naupangchhia zetin a ti leh a. Topic dang chai vat a ngai. Kan inhnial leh vak dawn tlat. "Ka nu chanchin i hre hnai em?" ka ti ta a. Kan boruak tawn teh hrep avangin ka nu pawh ka lo ngaihtuah chang tawh lo a ni. 

"Hria e, kan inbe ziah alawm. I rilru tihbuai ka duh lo va, ka hrilh lo mai mai che lawm..ih maw, I nu chuan pumpui cancer a vei a ni. A damrei tawh dawn lo. Mahse, lungmuang taka a kal tur hi ka lawmpui" a ti ta duah a. Ka nu cancer thu a sawi lai khan ka nghing dawt nia! A sawi awlsam mai si. 

"A cancer maw?" ka ti leh ngat a. 

"Ka rinhlelhna a rei tawh, a fapa avang khan a chhel mai mai alawm. A fapa dam lai daih atanga intan tawh niin ka hria. " a ti dam diai a. 

"Ka va lainat e aw. A pasal pawh a khawngaihthlak mang e" ka ti sup a. 

"Mahse,nangmah vangin a thla a muang tawh alawm. Kei tak pawh i chungah ka lawm..i nu hi ka lainat zawng tak a nih piahlamah i nu a nih vang a niang ka ngaina lutuk" a ti leh duah a. 

"Kan inkar hi hre phei se chuan a lawm zual awm" ka ti nghut a. 

"A hre vek alawm.ka zep i ring em ni?" a ti sap a. Duh em emin ka lo melh thung. 

"Tak a! Naktuk tlaiah Ropuia'n a birthday a lawm dawn a, chaw ei khawm tur aw. Amah chuan a la hrilh tho dawn che a, a hmu fuh thei si lo che a, min chah a" a ti leh thut. 

A mita melh kar chungin, "Chuan?" ka ti nghut a. 

"Eng nge chuan?" a lo ti var. Ka melh nat vang nge a mit a lasawn a, mi pawh en ta lo chuan, "Ka in ka ring" a ti ta a. Ka ner sawk. A mak eee..

"I in dawn chuan ka rawn kal lo zawk ang e" ka ti hmuk a. 

"Tuman an hre lo vang. Chaw ei dawnte ah ka peg ang" tiin ka kut a rawn vuan a. Ka lo vaithla vat..

"Saiding, a tawk tawh viauin ka hria. I thu thua awm tura min duh laiin ka thu pakhat pawh i zawm ve duh lo va. Hetianga inngaihpawimawh lohna hi chu ka paidam thei tawh lo..i awm awmin awm rawh" tiin ka tho a. Ka zep lo, ka na tel tlat tawh. Min hmusit ni ten ka hre tawh hial. Ka duh em em naa min zahderna tlem tal pawh lantir ve nise ka lawm dan tur chu..

"Ruatpui" a aw chu a khur deuh. ..ka ban puamah a rawn chelh a.

"Tihluih che hi a nuam em a. Ka in ngam tak tak i ring em ni? Ka naute pawh an awm ve a. Min ngai sual mah mah " a ti leh lawi si! Hmm..

"Min tilui zel la ti nia. Chutia chhaih kual mai mai tawk lek chu alawm ka nih" ka ti nghat a. Ka lungawi lo laklawh rih tlat. 

"Ka in a nih phawt chuan min kalsan hlen vang vang dawn nia. " a ti zawi sap a. 

Amah hmachhawnin, "Aw le, ka kalsan theih nan che i in dawn tih pawh ka chiangsa e" ka ti ram hmarh a. A chek hlak, "I va ngai kawi peih tak. I á mi?" A ti hluai.

Za lo zetin ka lo nui a, "Zanin hi kan hun tawp a va ni mai awm ve" ka ti el vel a. A tûm bár mai. Ka thu leh a, "Hun tawp ber te a ni dawn sia, ka'n leng ám a nge" ka ti leh a. Ka tukhum samah a rawn tham chawt, a kut tet tet nen hian a tham nghet thei si. "Kawlh thei ee. Khaw maw ..mipa kut an thlak ngai lo" tiin a kut chu ka lakthlaksak a. 

"Hei pawh hi sim rawh. I kawlh lutuk hi..kut i thlak ziah a, mipa sual deuh i tawn hunah i duk cher chur mai ang" ka ti leh a. 

"Ka thu thu" a ti nghat. 

"Nia, engkim hi i thu vek zel alawm..thubernu, i lo thu ngawih ngawih e" ka ti ta zêk a. Ka nghal a chhuak ve ta a niang e. Ka la lungawi miah lo bawk. 

"I va han nghal ngawih ngawih tak. Haw rawh" a ti hlar a. 

"Kan hun tawp a ni sia. Tlaivar ila" ka ti sup a. Ner náng pahin, "Vanruatpui, i mawng nozia ka tlangaupui palh ange aw" a ti hluai a. A inrin hmain ka kuah bet lawp, a chala tin pahin, "Han sawi leh teh", ka ti chu..a insum zo ta lo nge a nui ta uar uar a. Ka intih mitak ve tehlul nen. Ka bula a nuih hawm hawm takah chuan ka insum thei ta bik lo. Ka nui ve ta huk a. Ani lah a za zual sauh a. 

A mittui te a tla phung mai. A insum theih hnuah, " Tlaivar lo ila, inthen lo zawk mai ang aw" a ti zawi raih a. Ka mal chungah a rawn thu teh áwt a, ka biang tawn tawnah a chelh bawk. "Vanruatpui, i ngam chuan min then rawh. Doctor tereuhtê thinrim rapthlakzia i hmu mai ang" a ti hap a. A mitmeng nung sárh chu tuar zo loin ka pawt kun a, ka lo fawp hmiah. Ti nge maw ka thinrim ve pawh hian lungawi taka ka haw lehzel ni..

Scooty ka start laiin Ropuia a rawn faifuk phei rût rût a, ka bul a rawn thlen chuan, "Ruatpui, Saidingin a sawi tawh tho maithei. Naktuk tlaiah ka birthday lawmna ruai i rawn kil ve a ngai aw..i lo kal loh chuan ka lawm lo viau ang" a ti surh súrh a. 

"Nia, lo kal ka tum dawn nia. " ka ti ve mai a. 

Nui sâwng chung hian,"Thil mak deuh kan thlentir dawn nia" a ti sup a. A mitmeng chu a verther hlea ka hriat ni..

"A va phurawm ve" ka ti ve sup a. Ka tlan zui ta nghal a. 

(A va vàwt si ve .🥴