Saidingpuii 8

Dr. SAIDINGPUII (8)

Ziaktu : Toni Râlte

Ka khum lam pawh pan tawh lo va, kan in lam ka pan nghal avangin Tei ka call a. "Te, hei ka haw thut a. Ka bungrua ho kha khawngaihin lo khawm ta che. " ka ti khur dat dat a. 

"Ngati nge? I hawn ringawt?" A rawn ti ta ngei a. 

"A ngai tlat" tiin ka dah nghal. Ka chhungril sahal avang chuan ka khur hlawk hlawk mai a. Kan in thleng turin kal thui a la ngai si. Vanneihthlak takin damdawiin pengah chuan Venglai ami Lalnuna tuiphur hi a lo ding hlauh mai a. A tui chawi a lo pe fel deuh chiah bawk nen, "Lalnun, ka awm a nuam lo lutuk a, min va thlah zawk mai teh a" ka ti ta ngawt a. A tlawmngai ve bawk a, bakah ka motor khalh lai khan a chungah ka tha ve êm a, min hnial ngam lo turah ka ngai. Kan tlan chhuak ta nghal a.. Khua a thim chiang tawh a, ka dam that loh vang nge vawt ka ti angreng viau. Kan in kawtah chuan kan ding ta chat a, lawmthu te ka hrilh zawhah ka chhuk a, muangchangin kan in lam chu ka pan ta a. 

Ka va luh chuan zanriah an lo ei mek a. Phâwk zetin min lo en thap. Ka nî chuan, "Eng nge awmzia? Mampui, ti nge i lo hawn ?" A ti ta vat a. 

"A tul tlat a ni" ti supin ka pindan lam ka pan zui nghal. An hrilhhai viau ang tih chu ka ring. Mahse, tunah chuan keimaha awma inngaihtuah rih ka duh tlat. Ka buai nuaih nuaih a, ngaihtuahna fim hman hleihtheih pawh a ni lo. Khumah chuan ka mu zangthal a, Nupuii a rawn lut. "U, thil dik lo a awm mi?" A ti sep a. 

"Ka tha,.chaw va ei rawh. Nakinah ka rawn chhuak ang. Tunah chuan tumah rawn lut rih su aw" ka ti hmawk hmawk a. Ka awmdan leh mitmeng atangin thil nih dan a hai bik lo nge a chhuak ve mai a. An sawi ruk ngei ka ring. Lo sawi rih mai mai teh se, an bula inbunruah dan tur pawh ka hre rih lo. Zial ka tan a, ka pak vak vak ringawt. Tukverh chu ka hawng a, thlifim a rawn thaw lut nghal hak. Ka dak ta reng a. Ka nu hmel leh Saidingi hmel ka mitthlaah a inlar chhawk zut zut mai. Ka nuin Saidingi lawmthu a hrilh ruala ka thinlung deng dawttu kha zawhna ka chhan hleihtheih loh, ka rilrua awm reng si kha chhanin a awm ta niin ka hria. Ni e, Doctor Saidingpuii'n kei a driver ve mai, thiamna leh duhawmna pawh nei lo min thlang ve ringawt kha..chhan tha tak a awm ka ring reng a. Kei min thlan chhan chu ka nu lawmthu sawi khan a rawn tichiang taah ka ngai. Ka nu avanga Saidingi nen kan inbah zinzia leh thinrim engphiara kan inhnial nasat thinzia te ka chhut a, ka nu leh Saidingi chu keiin Saidingi ka hriat ve hma hauhin an lo inhriain thu an lo intiam hial tawh tihna a nia. Tichuan, a tana kawng tiawlsam turin a driver ka han ni ve leh kher bawk a. Chetlak a nuam ngawt ta ve ang. Ka rilrua a lan dan chuan, ka nu khan Saidingi khawngaihna a ngen ang a. Ani Saidingi lah chuan ka nu a khawngaih luat vangin, "Ruatpuii hian a pawm ngei theih nan che theihtawp ka chhuah ang. A pawm ngei ang che tih ka tiam bawk e" tiin ka nu a lo tiam ang a. Kei chu a mipa duhzawng ka nih vang pawh ni loin ka nu laka a thutiam vang zawkin a bialpa min nihtir a, zawi zawia ka rilru hneh chhoha ka nu nen nufa min nihtir chu a tum ta a ni. Chu chu a ni Doctori'n kei min ngaihzawn chhan chu..

A ná ka ti! Ni e, ná ka ti ngawih ngawih, ka nat luat vang alawm Saidingi ka tlanchhiatsan mek. Ka chapo ve theihna zawng zawng nen lam min tlawm a, a laka induhtawkna tur leh inngaihhlut theihna tur engmah nei thei lo turin Ani khan kha hun reilote chhung khan min chingzal a nih kha..chuvang chuan ka na a, ka thinrim bawk. Saidingi hian mipa ka nih angin min duh ve tak tak se, min ngaihzawn chhan hi mipa ka nihna vang nise ka duh ber laia chhanna dang ka hmu hian min tilawm thei thlawt lo a ni. Tin, ni e, a thutiam vang mai maia min ngaihzawnte chuan engah nge keia thu ve mai pawh chu a awih ang? A awih lo va, zu pawh a in mai rêng kha..a tan ngaihpawimawh tlak ka ni miau lo va..

Ka nî-in ka pindan kawngka a rawn kik dat dat a, "Mampui, lo tho teh. Eng nge thil awmzia ni reng reng?" A ti láng láng a. Min ngaihtuah dawn tih chu ka hriatsa a ni. 

"Nî, keimahin min awmtir rih rawh u" ka ti tham tuak a. 

"Thil tha lo te kha i ti ang e aw.." a rawn ti hram. Ka nui hawk ringawt. Min ringngam ta nge a ngawi zui ta a. Mahnia awm pawh chu a sawngsawhlawtna vak ka hre chuang lo. Mahse, mi dang bula inthup kha ka peih lo a ni ber. Ka phone a rawn ri ta a. Saidingi a nih ka beisei tehlul nen, Ruthi zawk a lo nia! Phurna reng reng nei miah lovin ka pick a. 

"Naktukah ka chhuak tawh dawn a.." A rawn ti sar sar a. A hlim hmel khawp mai. 

"A va lawmawm ve aw" ka ti ringawt. 

"I va cool ve, i mood a chhia law?" A rawn ti ta chiah rêng a. 

"Aa..ka chau deuh a. Chuvang mai mai" ka ti puat a. 

"Hmm..i bialnuin a ban che ni maw?" Tiin a nui zui leh kar kar a. Ka nui ve thei reng reng si lo. 

"Ban tur pawn bialnu ka nei lo" ka ti hul hak a. 

"Eng a?! Bialnu i nei lo maw? A van mak" a ti hluai a. 

"Eng nge mak?"ka ti nghut a. 

" Bialnu i neih that viau ka ring a. I single chu a mak em alawm.." A rawn ti a. Ka rilruah erawh Saidingi a awm reng thung. 

"Tuman min duh ve lo" ka ti tawi leh tak a. 

"Duhtu che ka hria.." A rawn ti khauh. A uang tih a aw atangin ka hrethei tho naa, "Tu maw?' Ka ti ve mai a. 

" ka insawi zak" a rawn tih chuan ka nui ve hawk. Ani pawh a nui leh kar kar a. 

"Ka lo ru ve mai dawn che mi?" Ka ti a, tawngsual erawh ka hlau deuh. Mahse, a rilru a zau phian a.."Thlamah min riahpui ve dawn loh chuan pawi lo" a rawn tih chuan kan nui dun ta hawk hawk a. Ka rilru na pawh ka lo theihnghilh deuh hman alawm le. 

"Hei min jection leh dawn. Ka nau a lo kal bawk sia, ka dah rih aw..kan inbe leh dawn nia" tiin a dah zui ta a. Ka mal leh ta tlawk tlawk mai. Whatsapp ka luh chuan Tei'n ,"Mam, eng nge in awmzia hi? Doctori hian chaw pawh a ei lo, a roomah a tawm leh char char tawh a nia" a rawn ti a. A mangan hmel ve deuh.

"Nakinah engkim ka la hrilhfiah ang che. Ka nu kha an rawn dah lut a, eng nge a an hriat lo tum teh aw" ka ti ta a. Ka nu tia ka lo koh tawh avangin a dam leh a dam loh chungchang ngaihven ve theihna chu ka nei tawhin ka hria. 

Hlimi lah hi min rawn text ve sek a. Tun dinhmunah chuan ka lung a tizîng zual. Ka hne deuh a nih ber chu. Ka seen sak lo law law tawp mai. Ka lu rawn na leh riai riai chu ka hre thei. A nat tak tak hmaa nachhawkna hmawm khalh ka duh avangin ka pindan atang chuan ka chhuak ta nge nge a. Nachhawkna chu APuiin min zawnsak a. Pahnih ka hmawm hmiah. Luh leh mai kha nuam ka tih chiah loh vangin ka thu ve a. Ka nî chuan min chîk ru hle tih ka hria. Pa Rema erawh khaw nge a kal ka hre lo. 

"Kha i la dam chiang si lo va, engvang tak chuan lo haw ang che maw?" Beidawn hmel fe hian ka ni chuan a ti a. 

"Ka nu an rawn dah ve a. Zantir khan" ka ti sup a. 

Ka ni chu a pháwk ve deuh. Mahse, "I nu vang ringawt chuan maw i lo hawn? Em em ana, Mampui, thih leh dam kara a len tawh laia hetia hel tlat hi chu Pathian pawhin êm êma a ti ve maithei a nia" a ti ta duah a. Ka nu vang a ni lo tih sawi ka duh a, mahse, Doctori laka ka tlawmna chu mi dangin hre ve lo se ka duh bawk si. 

"Chutiang vang em em pawh a ni lo. Ka riak peih tawh lo lawm" ka ti ta ringawt a. Doctori nen kan inngaizawng tih hi chiang taka ka la sawi loh vangin kan inthen tih phei chu sawi nuam ka ti dawn lo nasa. Zawh zui vak chi ka ni lo tih a hrethiam nge engmah chu a sawi zawm ta bik lo. Rei pawh ka thu lo, ka mutsan ta daih a. Doctori last seen check reng pawh ka kham ta. Min biak a tum tawh bik lo a niang e. Tei ka be ta a, nep chu ka inti ru reng. 

"A la tawm em ni? Pindanah chuan" ka va ti a. 

"Aih, U Ropuia kha a lo leng a, an inkawm" a rawn tih chuan ka puakkeh lo chauh. Mahse, ni e, an inphutawk khawp alawm tia thinrimna nen ka dawnsawn leh takah chuan, Ngaihpawimawhtlak ka loh nih lohzia, ka thinrim pawh atan eng he hu a lo nih lohzia ka hrethiam ta zawk a, chuvang chuan a hmanrua ni leh tawh lo turin ka hna pawh ka bansan ang a, A tul anih chuan Aizawlah patea te bulah hrehawm tawrh pawh huamin ka han intuak ve mai aniang chu. Kam khat pawha min be zui duh lo, hetiang taka induhtawk hmeichhia hi kei tlangval naran, tawnhriat nei lo hi chuan ka phû zo ve lo a ni e. Phone ka switch off hmak a. Ka maimichhing ta vang vang a. 

Ka harh chuan zing dar 5:09 a lo ri chiah. A vawh sûk avangin ka la tho peih lo va. Zana harh miah lo va ka muhil thei chu ka lawm viau mai. Ka lu na pawh a awm rih lo va, khawsik thuartham pawh ka nei lo. Ka rilru chawl lo leh thin tithawng deuh deuh ka tawn avang khan ka damlo thut mai mai a niang. Malaria kha chu a ve chauh zawk a nih ka ring. Ka lo chhing leh zawk a, Ka nî tawng lawng lawng thawmin min kai harh leh a. Dar 7 a lo ri tawh. Ka tho chhuak ve ta a, rit bur leh hai bur ang kha a awm tawh lo. Ka lawm ru hle. Ka nî leh Pu Zaia nupui Pi Hriatpuii te an lo titi a lo nia. Min hmuh rual chuan, "Ruatpui, i nu dinhmun khi a tha lo telh telh mai a. Vawiinah Aizawl lama phurh chhoh an tia, ka rawn hrilh ve reng reng che a. A kal hmate chu han hmu ve hram la tiraw?" Pi Hriati chuan ngenngawl takin a ti a. 

"A va zia lo ve aw. Nia, aw le ,engtika kalpui nge an tum deuh?" Ka ti ve mai a. 

."Tukthuan ei kham lamah a niang. Han tih chûk chûk pawh kha a buangbar an tia..tukthuan ei khamah i remchan hram chuan lo chho ve la aw" a ti leh a. Ka nu tan chuan mo fel tak a va ni êm. 

"Aw le, ka lo chho dawn nia" ka ti a. A ngaih a tha ta a niang, a haw phei ve nghal a. 

Tukthuan pawh ni dang aiin kan ei hma a. Ka nî chu hmeichhia a lo ni bawk nen, ka nu chu chutia thi leh dam kara leng a han nih takah chuan a khawngaih hnuhnawh leh viau mai a. "Eng tham ni lo mah se, hei hi ka kan ve nan i lo pe dawn nia" tiin Rs. 1000 lai min kentir a. Ka nî hi chu ka va chhuang thin tak. Apuii ka phur a, Daisy te in kawtah a chhuk thung. Vawiinah dawr bungrua vel an thiar lut dawn niawm tak a ni. Kei pawh ding takin ka tlan chho a, ka nu chu a natna dik tak hriat theih nise a lawmawm viau ang. Enkawl ngawt dan a váng si a. Ka han thlen chhoh chuan Pu Zaia te bakah ka nu unau dangte leh an chhungkhatte an lo awm tiai tawh a. Min lo melh hrek hrek mai. Ka ngaipawimawh duh lem lo. Ka nu mutna lam chu ka pan nghal a. A that lai leh vanglai chhung zawngin a fapa nih duh lo mah ila, a tawpna te a nih tak thutin tiin tunah chuan ka nu a ni tih leh a fapa ka ni tih hi thinlunga pawm thei turin ka infuih ru ve mawl mawlh a ni. Ka va luh chuan Saidingi'n a lo bawihsawm mek a, ka farnu khan a lo vuan tlat bawk. Mahse, chutia ka nu chu kal mai tur hmel erawh a pu hran lo. Ka va ding ve ta reng a. Ka awm ve tih pawh an hre kher lo mai thei. A makpa leh tlangval pahnih an rawn lut a, "Zawn lut dawn tawh ila" an rawn ti a. An rawn hawi chhuah rualin kei pawh chu min hmu ve chiah niin ka hria. Ka nu chu a meng zau deuh káwk a. Saidingi erawh ka en duh lo lui tlat thung. Ka va pan hnai a, a ban te taktê hmer pahin, "Ka nu, tluang deuhin in han kal dawn nia aw. Dam takin in lo hawng leh ang a. Chuan, hei ka nîin a kan vena che " tiin pawisa kha a kutah ka hmehbel a. A tawng tur chu a hmui a khur dar dar a, mittui tling piau chungin, "Lapuii hi chu ka va tluk lo tak êm. A hnenah pawh hian lawmthu sawi sen loh ka ba a ni. Ka fapa min enkawlsaktu a ni si a. Ni e, Bawiha, dam takin ka lo haw leh em em ang. Dama ka lo haw a nih chuan, khawngaihtakin Zawlseiah zan khat chauh tal lo riak ve rawh aw" a ti tham tiak a. Ka farnu chuan a mittui a lo hru chawt chawt. 

"Tehreng mai, ka lo riak ngei ngei ang. Tunah chuan kal tawh rawh u. Rilru hahdam takin va awm ang che aw" ka ti dam thlup a. An rawn buaipui ta hlawm a. Ka nu chu tiang chuan kan thlah ta a. Kei pawh awm khawmuang lo va hawn vat tumin scooty lam ka pan vat a. Mahse, kotu ka nei. A ring lo naa ka bengah a fiah viau thung. Ka inher a, Saidingi rawn kal phei hnalh hnalh chu ka lo nghak ran a. A duhawmna leh a hmelthatna te chuan ka thin a tiur lek lek zawk. Ka ta liau liau nise ka tih vangin. 

Ka bul a thlen chuan a ding dat a, min melh kar chungin, "Sawi dun tur kan nei " a ti sap a. 

"Eng thil maw?" Ka ti bung nghut. 

"Kan inkar chu i kutah awm se, i nu chungchang hi a tir atanga a tawp thleng i hriat ve a hun tain ka hria" a ti zawi sap a. 

"Hriat vek kher a tul tawh hleinem, kha tikhan ka pawm tawh alawm..in pahnih duhthusamin" ka ti ngat a. 

Ngui angreng tak hian, "Ruatpui,. I rilru vak kual nasa lutuk leh i zeldin thu kha thutak nihtir mah ta che. Insawifiah ka tum hran lo. Mahse, Remsiama leh Johny te hnu lama ka nuna mipa hmasaber i ni. Ka chiang tawk viau, nangma lam chu i duhthlanna a ni e" a ti fiah kák a. Sawi tur pawh ka hre lo. 

"Ka zuk haw phawt ang e" ka tih chuan, "Zanaha lo chho ta che. Vawiin chu report ziah ka ngai a. Ka hman chuang lo bawk a. Chuan, damdawi pawh engmah i hawn thla si lo va. U Rengi bulah va lam rawh ka hrilh tawh kha." A ti zung zung a. Ka hrilhhai letling. Thil a ngaihtuah kim thin lutuk chu. Ni e, ka nu chungchang ka hriat ve an duh em em chu huaisen taka ka dawnsawn a ngai dawn ta a nih hi. Ka nu a nih angin vawikhat tal ka ngaihthlak hi chu tupawn min hriatthiam ka ring ve. U Rengi bulah damdawi chu ka lam a, a ei hun leh ei dan tur min ziahsak thlap hnuah ka la, a man pek ka tum chuan .."A pe tawh" a ti sap a. Ka then sak ringawt. A va tul lo tak e aw.

Ka ni bulah chanchinte ka han hrilh ve zung zung a. Ka la damkawr ve rih nen, eng han tih zai pawh ka rel hran lo. In hnuai siam pawh kei ka hetih leh si vangin an thulh rih a. Thingzai erawh an rawn thiar zo tawh thung. Pa Rema pawh Pu Vunga te in sakna lamah a inhlawh ve leh a, Apuii lah Daisy dawr lamah a tuan bawk. Nupuii chu a insu a, ani in in a nghah hi chuan ngaih a tha. Ka niin mei a zial thung. Ina awm reng pawh chu tiin Hruaia te in lamah ka leng phei ve a. A nu chuan min hmuh rual rualin, "Ruatpui, i bialnu thar ka hria nia aw" a ti hlut a. Ka nu Thari hi chu hetia a fate rual chhaih zuk zuk hrat hi a ni hrim a. Ka nui ruh ruh a, "Tu nge ni leh ta pek?" Ka tih chuan, "Phai lam return kha mawle.. Saw a rawn nalh haw ropui mai sia, nimin pawh ka chhaih a, a haw duh der lo" a ti ta bawrh bawrh a. Daisy daih a ni a sawi ni. Doctori a sawi dawn emaw ka lo tia! 

"Daisy maw!" Ka ti vut a. 

"Chiang e.. A zei riau, Apuii a belbul chat mai a. Mahse, fimkhur rawh aw. A nu saw a mit a sang ve fû ania" a ti leh hmiah hmiah a. A va hahthlak e aw. Daisy pa Pu Rinpuia hi Kohhran upa a ni a, khawtlanga a inhman lai pawn YMA president hlun a ni thin. Pa fel leh zaidam, mi pawi sawi hreh tak mai, mi dik em em ni bawk si a ni a. Nu Thari sawi ang deuhin Daisy nu pi Numami erawh an pa letling a ni daih. Inla ve tak, an neihnun chhuang ve tak, thenawm khawvengte pawh dah hniam ang chi, a aia liante tlawna ti thiam leh em em si ang kha a ni thung. A pasal hi nei lo phei se mi huat a hlawh viau ang, an pa hian a hliahkhuh hneh êm zawk a. Daisy hi sawi tawh angin fanu mal a ni a, an upa ber hian nupui nei ve tawhin a nupui leh a nu an inngeih hlawl loh vangin an indang a. Chumi nau leh chiah mipa erawh Law lam a zirin ka hria, Aizawlah a awm thung. Daisy hi a ni leh a, Daisy nau mipa erawh an chhungkaw black sheep ve ti mai ang zirna pawh a chawlhsan tawh a, Zu a duh ve riau a, damdawi erawh a ti loin ka hria. Lehlamah Pu Rinpuia hi Middle School Headmaster pension a ni a, a chhuahpui pawh kha a tam tham viau reng a. Han inlaa an neihnun chhuang thei pawh an ni ve tho mai. 

"Daisy te chu ka nau angin alawm ka en. I ti ang lo" ka ti nghut a. 

"E taka! Nizan kan khawhar in leng chu, Chawii te nen kan haw ho va. A tawng duh barh barh khawp mai a. 'Tuna kan doctor thar hi lo ngai reng rawh u, Lapuii leh Ruatpuia te hian Lianzuali an tihpui loh atakah. Ruatpuia lah doctori driver a nia, a kawmngeih dawn ngei ngei a. An tum hi ka hre lawk vek alawm ' a ti bawrh bawrh mai a. An pain a khap nghe nghe alawm.." A ti leh ta duah a. Hruaia u U Mawipuii chuan,"Pi chawii chu a mangang tan zawk a nih chu tiraw Ruatpui" tiin a nui a. Ka nuihte pawh a za kei pawh. Pi Chawii te rilru zet chu aw. Kan rilru lo pui min puttir tlat zel mai chu a nia. 

Nu Thari pawh chhang tawh lem lo chuan Hruaia guitar chu lain ka han herh dik a. An bathlar thlanglama chhukpuiin ka zai ta mai mai a. Khua a dur deuh a, chhum a zing deuh bawk nen, lung a leng ve deuh a niang e. Hruaia pawh a rawn thu ve vat a, min rawn zaipui ve ul ul a. Zai hi ka thiam lem lo naa, thianho zingah na ná na chuan a laktlak pawl ka ni maithei. Ka chawlh lailawk laiin, Hruaia chuan, "Kan Hlimi chu mak ka ti reuh tak tak a ni. Ka rin a ang lo ee. Samua te kha rinhlelh nachang ka lo hre lo reng reng a. I lakah pawh ka inthlahrun phah tawp" a ti sur sur a. 

"I hre sa bik miah lo a ni maw?" Ka ti nghut a. Ka ringhlel hran lo.

"Hre sa teh nang, min bum chiang tawp. Nangmah a star lai vel che khan nau a lo pai daih tawh tihna a nia. A huaite pawh a huai reng reng ka ti" a ti ve mai a. 

"A dinhmun kha a khirh ve bawk a nih kha. Samua lah damdawi a la ti ve reng bawk sia. " Hlimi sawi chhe duh lo chuan ka la ti hram a. 

."Nang kher a lo tawng che hi a tan chuan vanneihna a ni. Mipa sual deuhte chu tawng se an timualpho duh ngei ngei ang. Samua lah addict a ni tih loah chuan a lo pangngai ve bawk a. Tihian khaw pum hriat miah lohin an inchingfel thei ta chu a nia. " a ti mual mual a. A sawi dikna chen a awm ka ti. Mahse, sawi zui vak kher tul ka ti lo. Hlimi phei chu ka ngaihven lo nasa mai si a. Hmeichhe pakhat bak ka rilruah a awm lo. Saidingpuii chauh lo chu..Sawi chhuaha puanzar lung lung chi a ni bawk si lo. Ka hah. Ka haw a, ka inbual a. Ka lu na a awm tawh rih miah lo, ka lawm viau. Damdawi pawh ei hunbi-ah alarm ka set thlap a, ka dam vat tur a ni. 

Apuii a rawn haw a, ka nîin chanchin a lo zawt vat. 

"Awii a nuam dawn reuh tawp. Monday atangin kan luah lut tan ang. Kei pawh ka hlawh tur velte kan sawi a, customer kan neih dan azir kan tia ." a ti sar sar a. Nupuii chuan bai chawh rawk rawk pahin, "I lerh vaih chuan i thawk lo vang" a lo ti bal bal a. 

."Lerhna tur a awm lo. " Apuii'n a lo ti vat. An tet lai khan Apuii pangchang, kan duat rawn ni ve bawk si hian a û hi a hlauh loh phah thin a. Ani Nupuii lah mipa naupang bak kawm ngai lo, rilru pa bawk si hian a dawhtheih loh tawpa han keha han chhipthlak mai te a ching thin a. Ka thelh zing thin teh e. Inchhangbung tih takah an inngeih lo ve bawk si. Mahse, an han nula chho a, Apuii hian a û chu a zah thiam chhoin Nupuii pawn a nau chu a duat ve ta viau a. Tei hi Nupuii nen an inthlau hlek bawk a, keimah nen kan inpawh zawk mah. Nupuii hi chu ze pa viau e ti lo hian a nu leh pate awl bertu, an thu pawh hnial khàt ber a ni chho ta daih a. Pa Rema phei hi chuan a duat ber nghe nghe. A tleirawl thleng khan , 'Duata' tiin a ko thin a. A nulat ve takah chuan a mawi lo em mai kan tihsak a. A hmingin a ko ta chauh a ni. 

"Mam, Daisy hian a star chein ka hria. Vawiin pawh a sawi reng che a, ka ning tep" Apuii chuan a ti leh zung zung a. Ka khi suk ringawt. 

Nupuii chuan, "Star e mawle. A hmaa in inkawm thin lai pawh khan a lo len apiangin Mama awmna min zawh ziah zel kha. Mahse, Mam, Daisy chu bem miah suh. A nu saw ka ngei a nia" a ti leh hmiah. A rilrua awm ang ang hi a sawi mai zel bawk sia, kan naui hi chu a buaithlak a ni. 

"Ani te chu a nei tha eee..Doctori nen an ni. Tiraw? Mam" Apuii a ni. Hei te hi a lerh ve reuh bawk a, kan mitmei leh awmdan atang hian a lo man thiam ve a ni maithei.

"Ni lo ni lo..in ninawm" ka ti hluk a. An nui dun hawr hawr mai. 

Zanriah chu ka duh ang pawn ka ei lo, ka helhhawlh nge mawni dawn ni. Ei kham rualin ka insiam nghal a. Ka kalna tur pawh ka sawi chuang lo. Damdawiin pawh ka thleng hma ngang mai. Doctori ina luh chu ka'n hreh thar leh vel a, ka tawi ka tawi a. Mahse, mipa alawm ka nih le, aman alawm min ko tiin ka insangmar a. Ka chho ta a. Chaw an lo ei kham deuh chiah a, Tei'n thleng a lo sil mek. Saidingi erawh a lo thu diai a. A hma zawn sofaah ka mawng ka hung ve nghal. 

"Ropuia chu a chhawrtlak dawn viau e. Lirthei a nei bawk a, a tlan zung zung thei ang a. Nang pawh i hahdam phah phian ang" a ti a. 

"Nia..driver pawh i mamawh kher tawh nang" ka ti nghut a. Min rawn melh ráw a. 

"I bang dawn tihna em ni?" A ti nghat a. 

"Ka ban mai lohin, mamawh ka ni tawh hleinem" ka ti ve ta ngat a. 

"MAmawh i ni tawh lo tih tuin nge sawi a?" Cho zeta min melhin a ti a. 

"Hmanrua chu hman a nih tawh chuan tangkaina a nei tawh hleinem" ka ti nghut a. Tei a rawn lan tak avangin kan ngawi rih. 

"Zanin chu Tei hi a rawn riakthla dawn a. Tei, Tuin maw rawn lam dawn che!" A tih zawm zat a. 

"Zorina a nia, a rawn chho tep ang." A ti ve mai a. 

"Tei, ka ni te bulah engmah sawi a ngai lo aw" ka ti vat. Hrethiam takin a bu ta nghat a. Zanin ber khera a rawn riahthlak chhan pawh ka hre ve si lo. 

."Ti nge i rawn riahthlak dawn?" Ka ti leh a. 

"Hun thawl in mamawh dun sia,. Bakah ka nu ka ngai ve deuh tawh a" a ti mai a. Saidingi erawh a phone a hmet malh malh thung. Tei chu a insiam nge a roomah a tawm a, Kar loah Zorina tawng thawm kan hre ta bawk. Tei chu a rawn chhuak vat a, "Ka kal aw.. Nih phawt u" a ti sap a. A chhuak zui nghal. Saidingi chuan kawngka a va kalh ta khap a. Tunah chuan kan pahnih chiahin kan awm ta. 

Ka hmaah tak a rawn thu leh chat a. Ka lo melh ngat ngat. A lai eih lo thung. 

"Chuan" ka ti chhum hmuk a. 

A pindanah lut lehin a rawn chhuak leh thuai a. Lehkha intel, tam vak lo hi min pe a, "Chhiar rawh. Engkim a awm" a ti sep a. 

Ka lo la ve mai. Lehkha inzial chu ka phelh a, ka han pawt mar leh te te a. 

A aw thian kharhin, "I chhiar chhung chu damdawiinah ka zuk chhuk rih ang e..nangmaha awm i duh rih ka ring" a ti nghat a. Ka inrin hmain, "Ropuia bula awm i chak chhuanlam a nih chu" ka lo ti nghut. Mi rawn melh ta reng a. 

."Eng nge mi melh vak? Ka sawi dik lo em ni? A rawn lan atangin i danglam a. ZU te kha zuk in dun u la, a quarterah zuk riak nghal law law rawh. Ka haw dawn" tih leh thawh ka rual vut a. A vir zawk, ka hnunglam atangin min rawn kuahbet thlawp a. 

"Mi á pa, ti nge i ngaihtuahna kha a tak tak emaw i tih a? " a ti tham tiak a. A hnuk a ulh deuhin ka hria. Kei lah ka inla luhlul laklawh ve tawh bawk si. Chuti maia nem chu ka hreh tumhrang tawh si, "Nang pawn Daisy te pawh i thik a, na tak takin min tawngkhum alawm. Ropuia a nih vangin ka thik ve thei lo vang maw?" Ka ti hniam raih a. 

 Min pawh nasat em vangin amah hmachhawn zawngin ka ding a. Ka chhuk melh run mai. 

"Daisy kha chuan a ngaizawng che alawm. A mitmeng atang khan kei hmeichhia ve bawk hian ka hre thei a, ka thîk a ni mai. Ropuia chuan min ngaizawng ve lo..Tin, Ruatpui, min then tak tak dawn lo tih ka hriat avangin ka lawm tho bawk. Ropuia i la thîk a, kan a tawp lo tiraw!" A ti ta dap dap a. Sawi leh mai tur ka va ván tehlul ém. A sawi dik tho bawk si. 

"Ka nu chungchanga ka ngaihdan kha engmah i sawifiah hleinem" ka ti ta a. 

Min pawt thu leh ta nge nge a. "Kha lehkha kha i chhiar phawt ka duh vang a nia ka insawifiah loh. I nu laka ka thutiam hlen nan ka ngaizawng lo che a, ka mipa duhzawng i nih vangin ka ngaizawng che. Min then mah la, ka then ve loh che chuan tu hmeichhe bulah mah i hlim dawn lo bawk. Kan inthen dawn lo tihna a nih chu..tikhan ka sawifiah tawk em?" A ti ta chat chat a. A chiang tawk viau naa, a hmaa ka lo tawrhna zawng zawngte ka ngaihtuahin chuti maia nem nghal ngawt chu ka tlawmngai tlat. 

"Mahse, ka tana ngaihbel theih turin min ngaipawimawh ve tlat lo va, zu te i in leh a.." Ka ti a. 

Ka kut a rawn vuan a, "Kha kha chu ka tihpalh liau liau a ni e. A thleng leh tawh lo vang" a ti nghet charh a. Ka thinlung chu nem tawh tak a ni. Ka lo thlahlel ve bawk si, keia rilru let but khan ka then thei emaw ka lo ti mai mai zawk a ni. 

"Aw le, engpawhnise ,ka nu lehkha chu ka'n chhiar phawt ang e. Zuk chhuk rawh. Ka rawn call rual chein rawn chho nghal ang che" ka ti ta a. 

"Aw le..apa" a tih chuan a nui duh hlek si lo, ka nuih a za deuh si, a bengah ka pawt a. "Apa, a na" a ti leh kher..mi run lutuk a, ka lo ngai lutuk tawh si nen, ka lamah ka pawt hnai lawp a, ka fawp ta mial mial a. Ani pawn min reply tha e. 

Min chhuksan hnu chuan hahdam thei ang bera thuin ka nu lehkhaziah chu a phek indawt dan atangin ka chhiar tan ta a. Hei hi ka nu thurûk chu a ni..

"U Rina ka hmangaihna leh duhna, a tana ka inpek pumhlumna zawng zawngte engmahlo maia chantirtu ka pa leh ka patea te hi van khian engti kawng mahin a pawm theiin ka ring lo. Ka damchhunga ser nung min siamsaka min tina nawn fo tur hliam min hnutchhiahtu te hi thih tha pawn an thi ta lo reng a. An chantawk a ni. Ni e, an phutawk chiah a ni e. 

Kan unau hi pali kan ni a. Kei hi a naupangber dawttu ka ni. Ka nau mipa hi luhlul leh tihmawh em em a ni a. Ka u chiah hmeichhia lah leplerh leh sihhnip tak, a ruka rawltharte inzirna tia an sawi ruk thin a ni bawk. Kan upa ber lah ka pa uite a ni a, ka pa sawi leh tih tawh chu hnial ngam eih lo a ni bawk. Ka pa chu dawrkai lian ve pawl a nih avangin a chapo a, nei ve a inti tawk thin. Ka nau leh ka u chiah hmeichhia te pawn an chhun a, Kei erawh ka danglam lawtlak. Ka nu ka chhun a, ka nu chu ze zawi leh inngaitlawm tak, mi pawisawi hreh em em a ni. Kei pawh amah ang hi ka ni a, School kan kal lai pawn tuman an kawm that duh loh hmeithai fate a ni ka kawm thin ni. Kan pian ve hma hian thil thleng danglam deuh a awm a. Chu chuan ka nun a vawchhe ta vek a ni. Chu thil thleng chu ka nu min hrilh a ni a. Tu khaw khain an hre vak lo. Ka hmangaih ber nena kan fapa min lakbosak zan khan ka nuin min hrilh a ni. 

Ka pa Thanghrima nau ka patea hi Lawmthanga a ni a. An tlangval lai hian hmeichhe duh em em a nei a, a atchilh thawthang a ni ber e. Mahse, chu nu chuan a mizia leh a nungchang avang ten a lo duh ve si lo va. Bakah chu hmeichhe nu leh pate chuan ka patea chu an lo iai ve tho a nih hmel. Chu hmeichhia chu Sangthangi a ni a. Ka mipa hmangaih ber U Rina nu hi a ni. Pi Thangi chuan ka patea hnawlin Pu Zatluanga a nei ta a, Tichuan, U Rina te unau hi an lo piang ta a ni. Patea chuan nu a nih tawh hnu thleng pawn pi Thangi chu a la hmangaih si a, Pu Zatluanga pawn a hre ve vek a ni. Patea pawn nupui a neih hnu kum li-na velah ni khat Pi Thangi feh chu a rawn haw thei ta tlat lo mai a. Hetih lai hian Pu Tluanga chu a ke dinglam hi panchhiain a bawh a, feh pawh feh thei loin in a lo nghak thin a niawm e. Chhungkhat hnaite inko khawmin an han zawng ta a. An thlam hnuaiah saruak vekin an va hmu ta a niawm e. A lo thi khawng reng bawk. A ngaihna an hre lo tlang hle mai a, khaw pum titi a tling hial! Chutihlai chuan U Rina hi kum 7 chauh a la ni nghe nghe. Chutianga Pi Thangi thattu niawm chu tuman an hre si lo, rin ruk erawh an nei a. Mahse, tuman an sawi ri ngam lo. Ka patea chu an ring ru fur a, khami ni khan a chhuak ve kher bawk nen. Pu Zatluanga pawh chuan Ka patea chu a ring nghet tlat mai a. Fiahna a neih si loh vangin a ngawi ta rih a. A thinlung erawh a dam tak tak thei lo a ni. Tichuan,U Rina te unau chu an te ber pawh kum 2 chauh a la ni a, a pa hoin rethei takin an seilian ta a. Pu Zatluanga thinlung dam thei lo chuan tum lian tak a lo nei ve niin, Buh seng ramriah laiin ka patea chu an riahna bulah a lo chang ran a. Patea rawn haw chu bawh thutin vau lamah a hnuk phei ta a, Pu Tluanga chu chutih laia an khaw pa chaka sawi kha a ni ve reng reng a. Tichuan, ka patea chu Pu Tluanga chuan a dáwp ta a, thisen chhuah mai pawh hreh awma a lan loh avangin patea chu a inpuang ta a. Pi Thangi chu a hmangaih piah lamah a huat tel vangin a laka phuba lak nan a pawngsual thu leh a thah zui thu a puang ta a ni. Pu Zatluanga rilru na lutuk chu a tap zawih zawih niin ka nu chuan a sawi. Mahse, ka patea chu a khawih ve hauh lo va, "Khuanuin phuba chu min laksak ang. Ka fapa ngei hian a nu thattu te lu chu a la rawn la ang" tiin a kaltir ta a ni. 

Patea chuan ka pa bulah engkim a sawi fai ta leng a. Pu Tluanga chet dan chu mak an ti viau nghe nghe. Police te mantirin hremna te hmachhawntir zawk nise a mak lo zawk tur a nia. Chutiang chu engmah a ti si lo. Chu a thuruk, a nupui thattu pawh chu mi bulah a sawi ngai miah lo bawk. Ka pa leh patea te chuan Pu Tluanga awmdan avang chuan hlauhthawnna neiin remchang an zawng ta ran a. U Rina'n kum 16 a rawn tlin kumah Pu Tluanga mau pu chu ka patea chuan umzuiin, chesual anga lantirin lum hlum angin khamah a nam liam ta a. Khawtlang pawhin lum hlum angin an ngai ta a ni. Mahse, tualthattu te chuan an thiltih chu an theihnghilh ngai hauh lo thung. 

An hlauhthawn ruk ang ngeiin kei leh U RIna chu kan inhmangaih ta a. Lehpek awm thei lo tur khawpin U Rina kha ka hmangaih a ni. Ka pa tuithlar huamin zui pawh ka ngam. Mahse, kei aia chak leh thiltithei zawk ka pa leh ka patea te chuan U Rina'n min ngaihzawn chhan chu a nu leh pate thattu chunga phuba lak a tumnaah ngaiin hmuh chu sawi loh biak takngial pawh min phalsak si lo va. Kan chhungkaw thuruk engmah ka hriat ve loh vangin u RIna chu an fahrah vanga duh lo angin ka ngai thung. A pa an thah hma khan kan inhmangaih tawh a, Keimah vangin a nia u Rina pa kha a thih ni. Mahse, a pa thih hnuah pawh kan inhmangaihna chuan kiam lam aiin san lam a pan zel si a. A tawpah a fa hial ka pai ta kha a nia. Kan inneih ngei ka beisei laiin ka pa leh patea te chuan thutlukna rapthlak tak an lo siam thung si.

Ka fapa a lo piang a, kuah chu sawi loh hnute pawh ka pek hma hauhin puanhlapa tuamin u RIna an ve pe ta a. Khalai hmuna ka thi ve nghal lo kha a mak zawk. Ka nu chuan min lainat em em a, ka pate chhungkaw thurûk chu ka pain hrilh tura a tih angin min hrilh fai ta leng a. Mahse, hun kal tawh chu hun kal tawh a ni, khatih laia ka manganna ber chu U Rina kha ka laka a rilru lêtin kei hi a damchhungin min haw tawh ang tih kha a ni. Kha baka hlauh kha ka nei lo. Ka nuin engkim min hrilh hnuah ka pa leh ka patea te chuan min rawn hmu ta a. 

"Tualthah mai pawh pawisa lo kan nihzia chu i hre tawh ang a. Saw mite chhungkua vua leh vang hrim hrim saw i hnaiha i fapa pawh i ngaihven tih kan hriat rual rualin Rina leh I fapa saw mitthi khuaah kan nawrliam nghal ang. Tin, khang kan chhungkaw thuruk kha tu emaw bula i puangzar eih a nih chuan, i nunna ngei pawh hian a tuar ve bawk ang. An chhungkua leh kan chhungkua chu a rem ve lo. Pawm ang che" tiin min vau ta a. An mitmeng leh hmelah an sawi ang chuan an ti duh tak tak dawn tih ka hria. Ka la naupang a, ka la huaisen tawk lo bawk. An thurûk ka puanchhuah an hlauh luatah ka nu kha entirnan an la hmang zui a! Ka nu khan tumah mi dang a hrilh miah lo chungin, "Thil a hre tam mah mah" tiin ka pain an fehnaa tuiah a namthla a nih kha..tuar ber leh ui ber niawmin ka nu thih lai te khan a awm a! Ka tenin nunrawng hi ka va ti em. Ka pa duhber chu hmingthanna, sum leh pai a ni. Sum leh pai a neihna tur a nih dawn phawt chuan dan bawhchhiatte mai mai chu engahmah a ngai lo. A dawrkai chung khan kan huanah zu a bilhin a hralh kal reng tih pawh ka hre vek. Mahse, engmah ka sawi ngam lo. Thih kha ka la duh bik lo va, ka hmangaihber u Rina leh ka fapa an thih pawh ka duh hek lo. 

Thisen a luan tawh avangin U Rina nen chuan engtikahmah kan awmdun thei ngai dawn lo tih ka pawm a. Mahse, chutimaia an hun kal tawha an tihsual vanga keiin ka tuar ve daih chu ka palliam thei bik lo va. Eng emaw tak tih ka duh ve a ni. U Rina leh Ka fapa chu hnaih chu sawi loh a biak pawh ka be ngam lo hrim hrim. An nunnain a tawrh dawn ai chuan tiin thinlung na takin ka thlir liam thin. Pasal ka neih hnua ka fa hmasa ber rualbanloa a rawn pian chiah atang phei kha chuan ka pa leh ka patea te chunga phuba lak chakna hlirin ka khat ta a. Tichuan, kan khuaa kan rawn zin laiin ka patea te chhungkua nen chaw kan ei ho a, Patea hi pawnlama tha ber anga lang siin Zu hi a rukin a la in reng a. Ka hre ve kar bawk. Ka pate rooma a zu thuhrukah chuan sazu tûr ka pawlhsak ta a. Ka pa hi chuan zu a in lo thung. Tichuan, kan chaw eikham atanga reivak loah patea chuan zu chu a va in ta ngei a. Reipawh a in hmain a pum na lutuk vangin damdawiin kan panpui ta a. Thisenin a luak a, mi dang chuan zu chhia a in tiin an sawi sep sep. A chhan dik tak ka hre kar si. A hnukchah dawn darkarah khan a chalah ka va dawm a, min rawn melh tawk tàwk a, a beng bulah ,"Pate, U RIna laka i thiltih phuba a nih hi. Thlamuang takin chawl rawh" ka ti sap a. Engmah sawi thei tawh si loin hreh em emin a thi ta a nih kha. Ka nuna hling zum tak pakhat chu ka dahbo ta phawt. Min hringtu ka pa nunna chunga rorel kha chu ka thei ta ngang lo va. Mahse, kei ka chet ngai lovin tikhan hunin phuba chu a rawn la ta a nih kha..ka pa kha mittui far khat pawn ka sûn lo. 

Bawiha, I hmingte hi a mawi ka ti. Nang chuan min huain i nu hi hmelma angin min en si a. Kei chuan engtiklaimahin ka theihnghilh ngai lo che asin. I hmelte hi tha ka ti a, kan lo zin changte hian a rukin ka thlir vawng vawng zel che. Min huatna thinlung i pai tawh miau avangin ka be ngam si lo che a, thinlung na ngawih ngawih chunga ka fapa thlir hi ka chantawk tura Pathian ruat a nih chuan ka pawm mai ang a, mahse, ka fapain thudik engmah hre lo va ka liam thlenga min haw zui tur hi ka ngaingam thlawt lo va. Ka fapa enkawltu, Aizawla kan inentir changa kan pan ber Dr. Saidingpuii kha Darpuiah a thawk dawn tih ka hriat rualin a bulah ka inbunruak ta vek a. Min khawngaih em em a, theihtawp a chhuah tur thu leh ka fapa nen nufa anga kan awm theih ngei nan hma a lak tur thu min tiam ta a. He nula hi ka tan chuan vantirhkoh a ni. Kan tana a thatna leh ka fapa rualbanlo tana a tihtheih a tih zawng zawngnaah Pathian hian malsawmnain vur mawlh mawlh rawh se..

Bawiha, ka ngai chein i nu hi vawi khat chauh tal, "Ka nu" tiin min ko la., lungmuang takin ka liam mai tur, i pa nen chatuan rama kan inhmachhawn hun tur hi ka nghakhlelin engkim hi hrilh ka va chák tawh tak êm..Bawiha, bawihte , ka fapa, i nu hmangaihna hi hnawlin pawm duh lo mah la, engtiklai pawhin ka hmangaihna che hian a zuiin a venghim zel ang che. " 

Ka lo insangruh nasa mai a lo nia. Ka chhiar zo chu ka thaw hawk a, ka hah vek thei. Ka melh ngai ka melh tlawk tlawk ringawt. Ka nu ruhro ang maia cher kuam tawh, mitkhur tla dúk tawh leh ka pa mual liam tur hmel kha ka mitthlaah a inlan chhawk zut zut a. Ka sahal leh ta. Ka ding a, ka thu leh thul. Kha putar Thanghrima ka kut ngeia ka lo that hman lo kha a va vannei si êm. Ti nge ka pa khan a thih hma khan engmah min hrilh loh? Ka nu kha vawikhatmah a demna thu a chhak chhuak lo va, hei vang hi em ni ang? Ka nu nunna kha a lo venpui ve zawk em ni ang? Ka pu khan engkim a hrilh ang em? Ka buai nuaih nuaih mai. Ka nu patea thih lai khan kei chu chhim lamah load laa ka zin lai a ni a. Ka nu patea a thi tih ka hriat khan ka thengthawngah engmah a thawk lo rêng bawk. Ka nu thah maw lo ni..thisen a va luang nasa si êm. Ka nu leh pate vanduaizia leh misualten hamthat chang an neih sizia ka hriat chuan Pathian meuh pawh ka dem lek lek nai dawn alawm le. 

Fridge ka hawng a, tuivawt chu la chhuakin ka in khawlh khawlh a. Tunah chuan kha chen keimah vanga rilru retheia awm ka nu tuamhlawm chu ka mawhphurhnaah ka ngai ta. Ka ní te pawh ka hrilhfiah vek mai ang chu. Ka nu chu damin a lo haw leh ang em tih erawh ka hre lo. Ka nu ka tih vanga a lawmna mittui kha zat a luang thei a nih ngai chuan, kei hian ka nu fapa nih ka zak tur a ni bik lo e. 

Ka phone ka phawrh a. Saidingi number hmetchhuakin ka call ta a. "Lo chho rawh" tih chiah ka sawi. A rawn lang rang kher mai. Zial ka lo tan mek a, thutthlengah chuan duhdah zeta thuin chunglam melhin zial chu ka híp kàwk káwk a. Ka bulah rawn thu vein a ngawi reng thung. 

"Saiding" ka ti sup a. 

"Eih" a ti teh tawp.

"Innei ang" ka ti hlawl mai a. A che zawk mai. Min rawn melh vang vang a, "Aw le" a ti ta mai a. He nu hian min va tihrilhhai thei tak. 

Ka kuah a, ka kokiah a lu a nghat a. 

"Ka nu i lo puih tawhnaah lawmthu ka sawi e" ka ti leh a. Ka kut chu vuanin a hmet niap niap a, "I nu kha nu sual a ni lo alawm. Mahse, i nu vanga ngaizawng che ka ni lo" a ti hram a. 

."Ka hria e. Ka hria" tiin zial ka nawr hlum sawk sawk a, "Lo hawi teh" tiin a lam ka hawi a,min rawn melh chho háw a, a va hmeltha tak. A bianga dawm pahin duhthawh zetin ka fawp ta vawng vawng a, ani pawh chu insiamrem hret hretin a thiam ang angin min chhanglet ve a. Ka rilru mang leh buai vang nimaw ka thisen a lum ta tlat! Ka kuah hnai tial tial a, ka taksa si thlapa ka kuah phei chuan ka thaw a mumal lo sáwt hle. Ani erawh a danglam ve pawn ka hre lo. A taksa ka chul ka chul a,. A ngai haw si lo. A tukhum sama thámin, "A va harsa ve" ka ti thám tuak a. A in la hrang ta vat a. 

"Ruatpui, nuthlawi ka ni a, ka virgin tawh lo. Mahse, nang tal chu virgin rawh. Kei hian ka venhimpui ang che. Hmeichhe dang bula khatianga i awm chuan nêp phal lotu che i la tawng em em ang. Chuvang chuan keimah chauh i ngaihzawn a ngai tihna.." a ti chat chat a. Ka chil ka lem khawlh. 

"Ka va duh tak che ém" ka ti ta thlawt a. Ka kuah leh thlawp. Nghet zeta min kuah ve danah a lawm ve hle niin ka hria. Ni e, he hmeichhia hi ka lo ngai dik loin ka duh luatah ka zeldin thubawl ka lo ring zawk a. Tun atang chuan ka ta chauh a ni tawh ang. Neih ngei ngei ka duh. 

"Tei a awm si lo va, i hlau lo mi?" beisei nei zetin ka ti a. 

"Hlauh tur a awm mi?" a ti zawmah a. Hmm..ka sawi awmzia a hre ve reng sia..sual lutuk mai.

"Nih ka zuk hawng ang e" tiin ka han insiamrem a. 

"Hun ka tihah chuan i haw mai ang. Cheng chawng a che" a ti leh tlat si..

"Nih eng nge kan tih ang?" ka ti hú a. 

"Tian kan titi ve ang, hmalam hunte pawh kan sawi ve ang a..E taka! Valtea te lo zin an tum tak asin" a ti hluai a. 

"Lo zin teh se. Ka'n ramvah pui ang e" ka tih chuan a meng ráng nghal, "Nih luiah ka kalpui mai ang" ka ti leh zuk a. 

"Ka chhungte ka hrilh tawh a. Engkim..engtikah nge i chhungte i hrilh ve dawn?" a ti ta a. 

"I mitmei ka ven vangin ka la sawi lo va. Zaninah an lo la men chuan ka sawi dawn nia" ka ti a. A nui sen sen mai. Duhawm lutuk mai a!

Ka haw tur vawi 3 zet min thulhtir..kei lah ka thu leh nge nge zel a. Thlemsama ka ni ringawt. A tawpa tawpah kan inthlah ve thei ta hram e. 

Scooty-a ka chuan hmain ka phone a ri a. Number ringawt a ni. Doctori chu lut tura ka tih avangin a lut tawh a. Ka pick up rual rual chuan, "U Ruatpui, khawngaihtakin min lo hruai..khawngaihtakin" a rawn ti bual bual mai a. 

."tu nge?" ka ti hú.

"Daisy.. Hetah field chhak zawlah khan ka awm..ka kal thei tawh lo, ka hlau a nia. u Ruatpui, min lo hruai rawh" a ti tiau a. Zu rui aw tih erawh a hriat ngang mai. 

Phone ka dah hnuah, "Saidingi'n a hre tur a ni lo" ti supin Field lam pan chuan ka tlan ta vang vang a. .

(🥰🥰