saidingpuii 7

Dr. SAIDINGPUII (7)

Ziaktu: Toni Râlte

Ka harh chuan a lo eng iar tawh a. Ka hai chhulh mai. Ka mit lah a vai chum chum bawk. Ka nî ka hmu hmasa ber a, Tei ka hmu leh bawk. A tirah chuan ka bangbo deuh a, mahse, ka nî chuan, "Mampui, i lo harh tawh maw? I mu rei hle mai a.. I ril a tam em?" A lo ti sawk sawk a. Thawh ka tum chu ka lu na lutuk vangin ka thulh leh tawp. A nat dan chu ka luruh chhungah hian rannung seh na deuhin kher ngut ngut se, chutiang vel chu a ni. "Ka lu a na" ka ti sup a. 

"Tei, Rengi kha va ko rawh. Nachhawknain chiu leh mai rawh se" ka nî chuan a ti sawk sawk a. Ka lo maimichhing thung. U Rengi pawh a rawn thleng rang viau, min jection ta a, a chak bawk a niang. 10 mins hnu velah chuan ka lu na chu a bo ta hmiah a. Ka zangkhai ta deuh e. Mu chung chuan, "Nî, engtin nge ka awm a?" Ka ti a.

"Nizan khan i luhai lutuk kha nikhaw hre loin i tlu a, Tei ten min lo call a. Damdawiinah an dah lut nghal ta che a ni. Doctori'n a tlaivarpui che a. Tunah chuan ka chawlh hahdamtir rih a nih kha" a ti ta mawlh mawlh a. Ka tluk lai vel awm chu ka ngaihtuah chhuak thei tawh lo. 

"Chuan, ka damlo mi?" Ka ti hû a. 

"Nakinah i thisen te kan laktir ang a, i BP chu a lo hniam viau mai a. Thil dang pawh a awm a ni maithei. Mahse, ngaihthat lohna tur a awm lo a nia" a ti nem leh diai a. Ka ni a awm hi chuan ka thla a muang thin. Tun hnaiah hna ka thawkrim pawh a ni si lo va, ti nge ka bp te chu a lo hniam ngawt le? Ka rilru ka sêng nasa pawh a ni si lo. Ka bangbo hle. 

Ka ril a tam ta khawp mai a. Ka ni ka hrilh chuan a lawm hmel viau zawk. Tei'n rang takin chaw a han la a, tam phei chu ka ei thei chuang lo. Pum ruak lutuk a ziaawm a, a tha tho mai. Doctori'n min tlaivarpui ni khan a sawi a. Ka harh miah lo tihna a nia, ka khawngaih reuh mang e. Tin, ka dam loh tak vang nge ka ngai vawng vawng mai. Phone khawih theih dinhmunah ka ding bawk si lo. Chaw ka ei khamah chuan ka nî chuan, "Mampui, MHIP kan meeting dawn si a, Nupuii lo chho mai rawh se aw..kha awmpui pawh i ngaih vak loh kha.." A ti chuar chuar a.

"Tei a awm tho alawm. Nupuii pawh rawn chhoh a ngai lo. Zu hawng rawh. Kei pawh test te neih zawhah chuan ka rawn haw ve thei mai ang" ka ti a. Na em em ka nei chuang lo bawk a, helai damdawiin reh deuha mut kur chu ka duh vak lo. A khawharthlak dawn em mai. Ka nî chhuk hnu reivak loah Saidingi a rawn lut ta zan zan a. Doctor thuama a rawn inthuam vang nge vantirhkoh ni hial awma mawiin a duhawm a ni. Tlaivar tih hriat miah lohin a hmel a nung sárh a, a nui sáng bawk. ka chal a rawn dek a, a kut a dai thler mai. "I khawsik chu a awm tawh lo chuan ka hria. Pa Muana a rawn a kal tep ang, i thisen kan laktir ang a, i malaria a nih ka ring" a ti dam thlap a. 

"Ka lu a na lutuk a, nichin khan" ka ti a. 

"Umm, kha i lu na khan i khawsik a siam pawh a ni maithei. Chaw i ei a, ka lawm" tiin min rawn melh zauh a. 

"Nizanah i tlaivar em ni?" Ka ti sup.

"Tlaivar ti ila, ka muthlu zeuh zeuh. " a ti mai a. 

"U Rengi te pawh an duty tho a, tlaivar kher a ngai em ni!" Ka lo ti a. 

."Nang chu i danglam alawm" a ti zawi sap. Lawmin ka lo khat thung. 

"Chuan, ka kalsan rih dawn che. Vawiin OPD a ni sia, ka va thut loh chuan..ka rawn ngaihven leh vat ang che. " ka chalah a rawn fawp zauh a, a rimtui zet chuan ka hnar a verh ngei mai. Min chhuahsan chuan ruak huaiin ka inhria. Tlangvala pumpa, mahni tawka chak leh hrisel intih ve nak alaia han mut tlawn zur mai chu ka va lungawi chiah lo tak. Nimin chawhnu atang khan min tham er er kha ka ti reng a ni. Mut reng na nà na chuan mut a lo chhuak duh nge ni ka muhil zui ta daih a. Pa Muana tawng thawmin min kai harh a. 

"Kan driver sàp chu ti nge maw i lo damloh ve ni..i thisen la lawk ang aw" a rawn ti fiamthu hlut a. Ka lo nui ve ringawt. Ka thisen a la a, ka zun pawh test a ngaih avangin ka va zung a, burtêah tlem ka dah a. Ka pe a. Ka luhai pawn min kiansan ta deuh e. Khumah chuan ka thu mu a, Hlimi a rawn lut hlawl mai. 

A la cher kuam naa tlem chuan tisen te pawh a rawn nei ve ta deuh. A nui sáng a, "I lo damlo ve ringawt a, a zia lo em mai" a ti hlut a. 

"Ni ngawt mai. Hei ka ninzia hi a. Nang i chhuak tawh dawn mi?" Ka ti a. 

"Aw..chawhnuah kan khaw lamah ka phei ang. Zawlsei atangin min rawn lam phei dawn a" a ti a. 

"A lawmawm chu, va haw la..va in eithau rawh" nui chungin ka lo ti a. 

"Nia, a ngai tlat. Tak taka ka rawn let tawh lo thut maithei a ni. " thutak deuh zawk hian a ti a. 

"Ngati maw? Kan la mamawh che hi" ka ti vat. 

"Nuam ka ti tawh lo alawm. Samua ni se khati kha a nia..a hrehawm em mai" a ti zawi sap a. Dik tak chuan a lainatawm ve reng. Ama palbuakah tawlhthlu mah se; han diriam zui salh chu harsa ka ti. 

"Mahse, Samua pawh a la insiamtha ve thei tho alawm..kha pa i bialpa in khua ami kha chu a kut a ram mah mah ka ti" ka ti a. Ka bialnu hlui ang ni loin ka thiannu angin ka bia. 

"Samua pawn kut min thlak tho alawm. An danglamna a awm lo" a ti hmak a.

"Mipa tha tak i la tawng em em ang" ka ti ta ngawt a. 

"Nang lah ka chang phak ta si lo che a. Doctori ngaihzawn chu a nuam bawk maw?" Nui rah rah chungin a ti a. 

"Aa. A la zaidam lo va, a la nuam famkim lo" ka lo ti fiamthu ve a, han inthup khawmawi vel kha tul ka ti lem lo. Amah Hlimi ka runluih pawh a ni chuang lo va. 

"Lo dam tha vat rawh aw. Kan la inbe thin ang chu, min unblock tawh la..ka zuk insingsa ve dawn ang e" a ti zung zung a. Kan invailiam ta. Kei pawh ka theihnghilh ka hlauh vangin ka phone ka phawrh a, Hlimi chu ka unblock ta a. Inhuatzuia inhmelmak hi a puitling lo ka tih bakah a hlawkna a awm lem lo bawk nen, ani pawn min beisei zui ngam tawhin ka ring lo bawk a. Thiantha tak kan la ni thei maithei asin. 

Inentir an awm ve nak nak nge an thawm pawh ka hre thei. Chawhnu lam dar 2 a pel tawh tihin Apuii tawng láwng láwng thawm ka hre ta a. Min rawn kan dawn a ni ngei ang. Apuii ruhseh nei a ni a, chuvanga zirna pawh chawlhsan tawp a ni. Naupang ber tih takah duat rawn a ni ve a, a noin a pangchang bawk. A ruhseh ná a chhuah tawh chuan kan chhung buai thin. A rawn lut ta a, a hnungah ka beisei loh deuhin Daisy a rawn kal ve bawk. Polythene-in eng emaw an rawn khai teuh lehnghal. A va tul lem lo tak. 

"U Ruatpuia chu..ti nge i lo dam loh ringawt?" Daisy chuan a ti nghal thàwr a. Apuii nen hian kum khat chhuak an ni. Daisy awm bo hma kha chuan an inkawm ve nasa thin rêng a ni. 

"In lo kal chu ka va lawm ee. Ka khua a lo har lutuk a. " ka ti vat a. Nia, zep loh chuan kawm tur an awm hi chuan nâ te pawh hi a zia ve thei niin ka hria. Apuii chuan Apple a vel nghal mawlh mawlh a. 

Apuii chuan, "Daisy hian dawr a siam dawn a. Ka thawk ve dawn" a ti a. 

"Eng chu nge i thawh ve ang a?" Ka lo ti hû a. 

"Facial ka thiam ve alawm. Sam pawh pawh" a ti mai a. He lama tui mi tak hi a ni ve a. A han inzir deuh hlek chuan a thiam nghal maiin ka ring. Daisy melhin, "Khawiah nge dawr chu siam i tum deuh?" ka ti a. 

"Pu Faka te khan an dawr kha an luah tawh dawn lo va, ka pain min biaksak a. Karleh velah chuan kan luah thei ang" a lo ti sawk sawk a. Daisy te pawh kan rim rual chu a ni ta reng mai. Hmeichhia hi chu an han tleirawl chhuak hlawt hi an nula zui a, rim rual an ni nghal zel mai. 

"A tha alawm. Nu leh pate bula awm hi a tha" ka tih nghut laiin, Saidingi a rawn lut a. Kan lo en thap. 

"I lu na a la awm em?" Tiin ka chal a rawn dawm a. 

"Aih, nachhawkna khan min la chhawk a niang. In zo tawh mi?" Ka lo ti var a. 

"Aw zo thawkhat. Vawiin tlaiah Ayush doctor kha a rawn thleng dawn a" a ti a. 

"Tlaiah ka haw mai dawn mawni ka ti. Hei ka tha tawh tho sia, a khawharthlak em a, heta riah chu" ngen titih hian ka lo ti a. 

Min melh vang vang a. "Nia, mahse, i result te hre phawt ila aw" a ti sap a. Pawn lamah an rawn ri hak a, ani pawh a chhuak zui nghal. Reivak loah ka awmna ward-ah chuan ka la hmuh ngai loh mipa kei ai chuan a û hlek ang, bawrchhawr zet mai, meng â ruai mai hi an rawn kuah lut a. Ka khum ep ah chuan an muttir ta a. A chauh hmel viau. A nupui niawm tak nu hleitling leh thothang that hmel zet chuan, "Tikhan mu hle hle rawh aw. I tha vat mai ang" a ti mawlh mawlh a. Zuii a rawn lut a, "Drip khai nghal ang aw" a ti sap a. An han khaisak dawn a, vein an hmu zo tlat lo mai. A ni lah taka chupa ban leh kut te chu a vung puam ûl mai a. Mi mawl ber tan pawh damdawiin a inchiu ve thin tih hriat a harsa lo. Zuii chuan tihtakzetin a han zawng thin, a hmu thei bawk si lo. An buai rei khawp mai. 

U Rengi a va ko nge, an pahnihin an han bei leh a. Hriau an han vih luh pawn a block zel bawk si. Chupa lah chu a khat tawkin a rawn au leh nghek zel a, zu ngawlvei, nghei thut ramhuai hmu thin hi ka chan ber e. Chhun khaw en lai a ni na vang vangin, ceilingte chu kawkin, "Khi min lo nuih leh tawh. Kal bo r'u, in hmelchhe si" te a ti thul. Apuii leh Daisy chu an meng phàwk hra reng mai. Hlimi a rawn lut ve leh a, a han bei ve leh. A zawn a zawn hnuah te reuhte chu a hmu ta nge, fimkhur takin a vit ta a. A tlang ta mial e. Hlimi chu an zinga junior ber mah nise, a thiam riau a niang e. Chhuak nghal ta lo chuan ka khum bulah a rawn ding a. 

"Kha i tha tawh lutuk a nia. Kei pawh khaw chhung an rawn lut tep tawh e..ka lo haw leh hunah chuan lo dam chiang var tawh rawh aw" ngaihnobei tak hian a ti a. 

"Tehreng mai. Nang pawh tluang deuhin va kal rawh" ka lo ti ve a. A chhuak ta a. 

Pa Muana chuan ka result a peih tawh thu a rawn sawi a. Doctori cabin-a kal turin min ti bawk. Apuii te chuan min lo nghak a. Doctori roomah chuan ka va lut a. 

1 min vel ngawi renga min melh hnuah, "I zunkawng a tha,. I lo malaria ve a. Mahse, i dam har lo vang. In lama inenkawl nge i duh? Hetah" a ti siam siam a. 

"Ka hrethiam lo. In lamah chuan a buaithlak zawk ang em le..saw midang an lo lut tawh tho va, heta inenkawl mai pawh pawi ka ti lo" ka ti ve mai a. Ni e, damdawiina a hun leh darkar dik taka treatment inpek leh in lama mumal vak lo va inenkawl hi chu a inang thei lo va, in lam chu nuam zawk tho mah se, hetah ka bialnu uapna hnuaia enkawl nih kha ka thlahlel ve tho mai. Tun laiah malaria te chu a tlem tawh nen, engti tiha malaria ve ringawt nge ka nih ka inhre lo. Kan sazaw changte pawh kha a ni mahna le. 

"Aw a tha alawm. Nih chuan, i mamawh tur ang chu Tei ka lo dahtir mai ang. Khu lam chu rawn che buai lo law law rawh se. I inlengte an haw tawh em?" A ti nghal zat a. Min melh dan chu ka duh vak lo, lungawi lo tia sawi theih ni chiah si lo, lungawi tia pawm theih ni chuang si lo hian min melh. 

"Haw lo, min la ngaichàng a" ka ti sup a. 

"Hawtir rang rawh. Saw tleirawl hmel ka hmuh sawn ka awm a nuam lo ziah" a ti hlak a. 

"Daisy maw?! Aw nia, ka lo hawtir ang. Ka kal aw" tih leh thawh ka rual a. 

"An haw hnuah inah han inbual fai ang che. Nachhawknain a chhawk lai che khan" a ti dam thlap a. 

"Umm" tih leh chhuah ka rual nghal. Ka la damkawr rih bawk a, min hrawk lo mai mai niin ka hria. A thikthu a chhia tih chu kei pawn ka pawmsaka a theih chin china ka inven ve zel a ngaiin ka hre tawh. Apuii te bulah chanchin ka hrilh a, haw turin ka ti bawk. Daisy chuan, "Zanah a rem chuan kan lo kal leh dawn nia" a ti sap a. 

Ka lu thin pahin, " A ngai lo, ka tha reng alawm. Bakah khua a vawt tan a, in hritlang palh ang" ka ti a. A ruhlanga engkim sawi chi ni hek lo le. Doctori ina chhoh pahin ka va thlah ta a. 

Tei chuan tui a lo lum so deuh chiah bawk a, "Mahse, inthlakna ka nei si lo va" ka tih laiin..

"I bialnu hian a ngaihtuah kim tawp. Chhunah khan min zu laktir alawm" tih leh ka thawmhnaw fai rawn phawrh a rual a. Ka khi vur vur nia..a lang apauin min duatin min ngaihsak huam lo mah se; hetia a ruka min ngaihsakna hi hlu ka ti lutuk. Tuilum sa ver vawr chuan ka inbual fai a, ka harh kàwk mai. Ka inthlak laiin Saidingi a rawn lut a. 

"I u chu a inbual maw?" A ti làng láng a. 

"Aw a inthlak mek" Tei'n a lo ti a. 

Pindanah a rawn lut thut. Towel ka lo la veng tût a. Ka sam chu ka lo hruhul mek bawk. 

"Ayush doctor lo lawm nan VCP te inah chaw kan ei khawm dawn a. Tei nen chaw lo ei mai r'u aw. Ei tam theih loh pawn, antui te kha lo hawp vak vak ang che." A ti zung zung a. A cream bur lian zet va la lehin, a kutah a bun chhuak a. Ka chawn leh mal velte chu a rawn hnawih ta a. Naute, a nuin cream a hnawih ang mai a nih avangin a thisen lum zawngin a thawk ve lem lo. 

"Tuna lo lut te khu eng nge a natna?" Ka ti a. 

"Zu khawsik a nih khu..a awm rei lo vang" a ti mai a. Zu khawsik ka hriat vawikhatna a ni awm e. In ngai lo ta na nà na chuan hriat ngaihna awm ta lo chuan. 

"Ayush doctor chu tu nge?" Ka ti ta daih a. 

"Ramropuia a nia. Eng nge maw a an dawn ni? Mipa kan awm lo lutuk a, mipa in min uap kha a tha hrim hrim mai" a ti a. 

"Mipa maw?!" Rilru buai ru deuhin ka lo ti a. Saidingi aia ka thikthu hi a chhiat nepna a lo awm bik hauh lo a nih dawn hi. Chupa ka la hmuh ngai loh chu ka thîk nghal ut ut thei nia. Min rawn melh zawk a, "Mi pakhatah ka lungawi" a ti zawi sap. 

"I strict bawk a, ka strict ve dawn. A bulah zuk thu miah suh ang che. Chuan, khaw nge a luah dawn?" Ka ti nghut a. 

"Kan clerk awmna hlui khu a luah mai a ngaih hmel" a ti sep a. 

"Umm..a that chu. Insiam la nang pawh. Punctual hi a tha" a hma ngai takin ka ti a. 

"Umm..inha fel rawh nang pawh. Khumah hian mu lum rih la, Taka dar 4 a ri dawn. Jection i ngai tak asin" a ti hluai a. 

"Zuii ka zuk pan zuai mai dawn mi?" Ka tih chuan, "Ngai lo, Tei ka zuk laktir mai ang. Ka jection mai ang che" a ti thliam a. Ka inhak fel hnuah ka mu ta than a. Ka sam erawh a la hnáwng deuh. Tei chuan damdawi chu a zuk la a niang. Doctori chuan a siam zung zung a. Ka mawngtamah chiu a ngai sia, ka zak ve deuh. Ka nui ruh ruh a hmuh chuan, "I va ho tak" a ti hlak a. Ka kekawr chu a pawtthla zui nghal. 

A chiu luh lai pawh ka hre mang lo, a kut a dam reuh zêk mai. Ka kekawr min hak thattir pahin, "Mawng no" a ti sap a. Rum zeta han melhin, "Saiding.." Ka ti tuar. 

A nuih a za bawk si, kei ka inla mitak bawk si chu a insum thei ta lo nge a nui hawk hawk a. Kei pawh ka nuih ve tak ngawt kha. Ka chalah a rawn fawp zauh a. "Ka'n intifai ang e. I muthilh theih chuan muhil rawh aw. Chaw ei khamah duh leh i khum lamah i chhuk tawh dawn nia..ka rawn tlawh leh ang che" a ti a. Ka bu nghut. A chhuak ta a. 

Ka muhil dawn siar siar tihin ka phone a rawn ri a. Number hriat loh atangin a ni. "Hello" ka ti a. A reh vang vang hnuah, "Ruatpui, keimah Ruthi.." A rawn ti ta a. 

"Ehe! Ruthi, i tha zel maw?" Ka ti hlut a. 

"Aw..ti ila, hei damdawiinah min dah lut nghal a. Mahse, kan chhuah har ka ring lo, eng nge i tih?" A rawn ti làng làng a. A aw atang chuan a dam tawh hmel viau mai. 

"Engti hran lo ve. Ka mu mai mai" ka ti a. Ka dam loh thu vel kha chu sawi ka tum lem lo. A tul em em lo bawk a. 

"Chuan Samua te chu eng nge an chanchin ni ta?" A rawn ti a. 

"Police khan an hruai a, hei thawm dang kan la hre rih lo. Engmah i hre bik lo a ni maw?" Ka ti a.

"Hre nang, ka ngaihven duh rih lo bawk nen, ka pa te kha chuan FIR thehluh kha chu an tum a. " a ti a. A bialpa Bena chung chu a rip viau maithei a ni. 

"Nizan ti ila, tukin zing lam a ni zawk ang chu. Ka mumangah ka lo hmu che a, ka harh khan ka nunna min chhanchhuahsaktu a nia, ti nge ka ngaihven zui loh le ka tia, ka inthiam lo tawp a. Ka nu i number ka dil a..ka rawn be ta che a nih hi, hei hi ka number aw" a rawn ti bawrh bawrh a. 

"Aw le, ka lo save ang. Lo dam tha vat rawh aw" ka ti a. Sawi tur hi ka ván thei mai bawk siah.

"Nia, dam ang. Ka lawm takzet a nia aw. In khua kha a nawm hmel sia, ka dam that hunah ka lo la zin ang, min mikhual duh dawn chuan" nui chungin a ti a. 

"Keini ina i lo thlen duh dawn phawtte chuan lo zin ngei ngei rawh" ka ti a. 

"Hei min jection leh dawn a..ka dah phawt aw. Kan inbe thin ang chu tiraw?" Tiin kan inbiakna chu kan titawp ta a. Ruthi leh Hlimi dinhmun hi a inang deuh reuhin ka hria. Kan hmangaih turte ah hian duh kan thlang thei si lo va, ngawlvei an ni emaw, leplerh leh sihhnip tak an ni emaw kan hmangaih tur an nih miau chuan hmangaih loh ngawt dan a awm si lo. Hei tak hi hmangaihna hlutna a ni lawi si! Doctori hi ka hmangaih thei ang em? Ani pawh hian min hmangaih thei ang em? Kan inzawm dan ril lo zet ka ngaihtuah chuan, bultanna hi pawimawh ber chu ni lo mah se, chhan dang eng emaw inphum ru vanga inlaichinna nei kan ang riaua hriatna ka nei thin. Chu chu eng nge tih erawh ka ngaihtuah thiam hauh lo thung. 

Zanriah chu Tei nen kan ei dun a. A titi nasa mai. Saidingi fakna hlir a ni mai e. "Mam, a duh ve tak tak che aniang. Nizan te khan a rilru a hah hmel sia, a vei sek a, i khum bulah te khan a thu reng a. A en char char che..thlah miah suh ang che aw" a ti mawlh mawlh mai a. Thil hriat nuam lo tak a ni hauh lo. 

"Aman min thlah chuan ka chelh reng thei nang" ka ti a. 

." A thlah che ka ring lo. Chutianga mipa tikual chi a ni pawhin ka hre lo" a ti leh hmiah. Ngaihngam tak hian han awm ve phawt ila a tha mai e. Kan ei khamah damdawiin lamah ka chhuk a, ka zuk mu ta thán a. Doctori inah pawh riak duh ni ila a hnial bik chu ka ring lo. Mahse, thil mawi a ni lem lo va, a driver ka nih vang ringawta a ina enkawl ka nih bikna chhan tur kha a awm lem lo a ni. Tei a awm ve tawh pawh thenkhat chuan ka nî rél nan an hmang leh daih tawh. "Lapuii zawng mi han tlawn leh han biak te hi a thiam a, a fanu nuthlawi pawh doctori bulah a khawsaktir leh thei mai a, a vahpa lah doctori driver a nih theih nan thang a kam nual bawk" tia an sawina te pawh ka hre leh tho. Ka nui mai. Ka nî an hrechiang lo lutuk chuan ka nuih a tiza zawk. Tin, engkim miin min sawina leh puhna nazah zawng hi chu sawifiah kher hi tul ka ti lem lo, chapo vang an lo ti a nih pawhin ka chapo mai a niang chu. Mi zawng zawng bula kan dikna sawia puanzar chiam hi ka zak! A hretur ten an hriatchian chuan a tawk viau mai. 

Ka awmpuipa pawh a lo muhil a. Chaw pawh an la ei lo. Zote khua atanga lo kal an lo nia. An nu leh an pa nau nula in an awmpui a. Chutia awmho ta chu kei khawtual mi zawk chuan tiin ka be lumlam ve a, an nu chu Vani a ni a, damlo a pasal chu Buata a ni bawk. Kan veng ami Pu Sangtuala tupa a lo nia. Pu Sangtuala leh Buata nu hi unau an ni tihna a nih chu. Pu Sangtuala faten chaw pawh an rawn dah a, chhungkhat hnai tak an nei a, a lawmawm e. Khualkhuaa dam loh hi chu a hrehawm ve thin êm a. Vani chuan an pa chungchang vel chu min hrilh ve suam suam a, "U Buata hi kan inneih hma chuan fel lutuk, taima bawk si a nia. Kum 2 lai kan inngaihzawn hnuah kan innei a. Kan fapa u ber a pian atanga thla 7na vel atangin a danglam tan a. Khawpui thalai lamin an hnualsuat tawh damdawi chuan kan khua a rawn thleng ve ta a, kan khaw thalai tam zawk khan an buaipui a ni ber e. Kan pa pawh a la thalai bawk nen, zu han in zauh zauh a ching sa pawh engtia tih thu loh, damdawi zuna a han uai ve ta chu chhungkua kan buai chho ta khawp mai. In hrang kan la chang lo hlauh zawk a, ka nu leh pate hi an felin ka thlavang an hauh nasa thin êm a, chuti ni lo se chuan keia dawhtheihna ringawt kha chuan a tlin tawh lo vang. A nupui fanaute chu eng atanmah min ti lo a ni ber. Neihsa in daih reng thu awm hek lo le, ruk ruk a ching chho a, ka inhlawh vena te, ka nu leh pate pawisa thlengin a ru duh zel si a. Amah talin thawkchhuak nise enliam theih dante pawh a la awm mai tur a nia. Amah vang hian kan kawrawng vek tawh ti mai ang. Kan pa pahnihna a lo piang a, a la bawraw viau. Mahse, nikum hmasa khan kan khaw YMA lamin nasa taka hma lain ruihhlo chu an han do ta a. Thingtlang angah te chuan theihtawp chhuah chuan damdawi hi chu a lo do rêm theih khawp mai a. A zuar thinte kha warning an pe mai a, an mansak leh chuan Police kutah an hlan ta hmak hmak a. Tin, khawpui lama kal an hriatte chu tlaivar zak pawn an lo chang mai a. Khatiang taka thawkrim na na na chuan an do rem ve ta mai a. 

Kan pa pawh tih tur awm ta lo chu zu lamah a tuan chho leh ta a. YMA lam chuan damdawi ai chuan zu chu an lo ngaihthah zawk ve bawk a. Mahse, ruahmanna fel tak an siam thung. 'Zu tha, buh zu ngei zuar lote chu kan man a nih chuan an chung a rip viau ang. Khaw chhung atanga hnawhchhuah hial thlengin kan kal ang" an ti hmiah mai a. Aizawl lama yeast hlang awlsam taka siam chu kan khaw zu zuarte tan tih ve ngam a ni ta lo. Zu zuar saw an tam vak lo bawk a, an tan warning ni pah fáwmin zu zuar inla milian tawh te khan khawtlang hruaitu te thu chu zawm duh loin yeast hlang an lo siam a. An mansak ta ngei a,. Tuin nge kutthlaka tu ber nge puh tur tih hriat miah loh turin an in leh lo an han sáwi chho ta a. An sim vang vang mai asin. Buh zu ngei an siam ta hlawm a. Chutah pawh khawtlang hruaitu te chuan ruahmanna felfai tak an la siam cheu bawk. Damdawi ngawlvei an tamzia an hriat vangin zu chu inhnangfak nan an hman a la ngai ve rih tih hrethiam takin kan khawtlanga zu zuar te ko khawmin buh zu ngei siama thla 6 thleng zawrh theihna ruahmanna an siamsak a. Thla 6 hnua an mansak a nih chuan Thuneitu sang zawk kuta an luh tur thu nen. Zu zuar thenkhat chuan hei an sim hlen phah hmak mai lehnghal a. Tunah chuan chhungkaw hnih khat bak zuar an awm tawh lo. Chu pawh an nei reng lo bawk. Kan pa pawh zu ah a tuan chho ta kha a nia. Thil reng renga a nasa mi, a liluh chi tih takah mi aia nasa khan a luhchilh leh ta reng a. 

Tuna hetia a bawraw chhan chu thla khat liam taah khan a thianpain khaw thenawma thingzaipuiah a rawn sawm a. An va zai dun ta a, chuta an va zainnaah chuan zu chhia ka ti mai,. Chu chu an va birh nasa lutuk a. A pum nat vangin kan va la chhuak ta hial a. In lamah kan inenkawl ren rawn a. Zu a in tak loah chuan a buai chho ta a nih hi..kha zu kha eng zu tak ni ang maw ka ti..kan khaw zu a in in hetiang hian a bawraw ngai lo. Mahse, amah hian , "Sim ka duh. Min enkawl u la, ka tum ang. " a ti ve ta tlat a. Tihian damdawiinah kan rawn kalpui ta ngawt a nih hi. A sim hlen theihna a nih dawn phawt chuan hmunpui lam pawh kan pan hreh lo" tiin.

Buata chu ka va en a, kei aiin kum 3 chauhin a upa naa, kum 10 vel zetin kan inthlauh hmel. A thatlai leh vanglai, a thahrui ngah lai zawng zawng ruihhloin a chen daksak a, tunah chuan putar tih mai theih tur hial hmel a pu tawh. Ruihhlo hi chu a va huatthlalaawm tak êm. Zote khawtlang thiltih dan erawh chu fing ka tiin, kan khua angah te hian ti ve thei ila a tha awm mang e ka ti rilru neuh neuh a . Damdawi addict hi an tam lo hlauh a, damdawi lei tur a awm loh chuan ti lo thei mai an la ni fur bawk. Zu erawh a tam! Ni e, a senchi thlengin a awm a. Khaw lian ve tak a lo ni bawk nen, Khawtlang hruaitute tan pawh ngaihtuahna sen nasat chu a ngai ve khawp ang le. 

Buata farnu Hruaii chuan, "Ka u, hei Ruatpuia a awm tho sia, ka kawng na hi a zia hleithei si lo va, zanin chu ka riahpui lo mai dawn che u mawni le" a ti nuah nuah a. Vani chuan, "Aw..zu chhuk rawh. I u pawh hei a ngaihtuahawm tawh loh hi. Zuk mu hahdam rawh" a ti thliam a. An inpawh hmel bik hlein ka hria. Vani khan a pasala chhungte a fak nasa bawk a, Tei ka lo ngaihtuah daih. A pasal te chhungkuain an rem thei miah lo hi amahah pawh eng emaw hi chu a awm ve tho maithei a ni. Kan farnu a nihna laiah kan hmu duh lo lui ve te pawh a ni thei. 

Vani'n chaw a ei lai chuan Buata chu a rawn harh a. A thu hlawl mai a. A meng phawk hrû bawk. Vani chuan, "I lo harh maw? Chaw ei rawh aw" a lo ti nghal siam siam a. An nu melh run chung chuan, "No khat chiah min va lak teh" a ti ta a. Vani mitmeng a hnual rawih mai. Buata lah chuan a hmai a tuai nawk nawk a, a hnap fim te a tlain ka hria. Ka manganpui ve si, tih vak dan ka hre bawk si lo chu Zuii ka va kohsak ringawt. Zuii chu a rawn kal ve mai a. 

"Chaw hi i ei theih loh pawn ors tal hi in tum rawh" tiin a siamsa chu pek a tum a. 

"Zu ka duh" a lo ti hmuk. Vani chuan, "Khualkhuaah lehnghal engtin nge zu te chu kan hmuh theih ang a? U Buat, sim i tum kha" a lo ti a. Buata chuan min rawn enin, "Thianpa, min ngaihtuahpui dan i hre lo maw?" A ti ta a. Ka hrilhhai hle. 

Zuii chuan, "Mu rawh. Khawi ka chiu mu leh ang che. " tiin damdawi a siam nghal mawlh mawlh a. Hawi kual ruk rukin, "Chu min ko leh tawh. Ka kal dawn. " tih leh thawh a rual ta mai a. Vani a vir zawk, kei pawh ka va thleng phei rang kher mai. Kan chelh bet vat a, "Nge maw min chelh tlat le..saw tukverh atangin min rawn hui leh luap luap saw. Ka lo kir leh dawn alawm..no khat lek ka in ringawt dawn" a ti bual bual a. Zu ngawlvei te awmdan hi chiang taka ka la hmuh loh vangin kei chuan han tih vak dan tur ka bangbo hle. 

Kan inchai laih laih laiin Saidingi a rawn lut hlawl mai a. Kan buaina a rawn hmuh chuan, "Aw..pe mai ta che u mawle..nge maw in ui vak le..Buata, khaw maw thu la, zu maw i duh. Ka pe ang che. Lo nghak rawh aw" tih leh a bag atanga Fizz bur phawrhin Buata te no rawn kenah chuan bunchhuakin. , "Tui tlem pawlh ang aw." Tiin tui a pawlh a. 

Buata chu pek pahin, "Tlak nghal pawp rawh le" a ti a. Buata chuan khur dur dur chungin a lo la a, a thawkkhat piap. "Doctor fel tak i nih hi" a ti hawk a. 

"Kha..i rui tan ringawt a nih kha. Mu daih rawh aw" tiin a nem mu sawk sawk a. Buata pawh chu rui deuh ang hian a awm. A awmdan za sek kha a bo daih. A mu ve hlu hlu mai. Kei erawh Saidingi chuan zu tak tak a pe ah ngaiin ka lo lungni lo em em a, mahse, Vani chuan zawite hian, " A nachang ka lo hre lo reng reng" a ti sap a. 

"Tuisik hlang pawh pe la, zu i tih chuan zu angin a in mai ang. Mahse, chiu mut vat a tha. A rawn harh leh vat dawn" Saidingi chuan a ti a. Zuii chuan a chiu ta vat a. Saidingi idea chu tha ka ti viau mai. Min rawn pan a. A nui sáng bawk. 

"I puar em?" Ka lo ti a. 

"Puar ve mai. Min lo ngai tawh em?" Ka beng bulah a ti a. Ka melh ta reng a, ni e, ka thin a so tlat. Saidingpuii chuan zu rim a nam tlat alawm. Ka tûm ta hmuk chu a hrethiam nge, "Ka tihpalh" a ti sap a. Ka ngawi tlat. A hnuah phei chuan lehlam ka hawisan ta daih a. Kan inngaihzawnna a la rei loh tehlul nen, ka thinlung a na ngut ngut thei mawle. A in tawh dawn lo emaw tia ka ngaihthat em em laiin..pawi ka tih ber zawk erawh tikhan an chaw ei khawmnaah a zuk nam ham ham chu a niawm sia. Hre lo tur tur ten an hria ang a, an sawi darh leh nasat dan tur te, mipa mawlmang ve tak tak ten zu a in vanga an zuam ve ngawt dan tur te, Inla fel tak tak ten an diriama an hmusit tur te ka ngaihtuah a, ka ngaingam lo. Ka ná..ka bialnu a nih vang ai mahin, "Kan khaw Doctor nu chuan zu a heh lutuk. Damlo pawh zu rui chungin a enkawl thin" tia an sawi tur ka ngaihtuah hian Saidingi chu ka haw thei hial! Ti nge a insum theih loh. Ayush doctor thar pawh chuan engti ngaihin nge a ngaih ang? 

A kal ta a niang. Ka hawi sawn chuan a lo awm tawh lo va. Vani te chuan an hriatthiam ka hlau ve deuh bawk si, "Zial ka va zu lawk ang e" tiin ka chhuak a. Damdawiin thlang lama toilet an siamna bul kawt zawlah chuan ka ding a. Chhungrila ka nawm lohna chuan ka taksa pawh a tichau zo vek niin ka hria. Ka mei zuk pawh a lo thi daih a, ka tan tha leh a. Ka vai ruai ni maiin ka hria. 

Ka va luh leh chuan, Vani chuan. ,"I phone kha a ri a, mahse, a tawp hman chiah" a lo ti a. Ka en vat. Saidingi a ni. 

Ka call back awm hlei lo. Tei'n min lo text thung a. "Mam, In intithiam lo mi? Hei a pindanah a la tawm ngat ngat" a rawn ti. 

"Engmah chutiang a awm lo, a chau a niang" ka ti ta ngawt a. Kei atak pawh zan mut ka huphurh mang e. Khawhar hnemah tiin video ka en a. Whatsapp msg a lo lut zut zut mai a. Ka'n en chuan, Hlimi te, Ruthi te msg a lo nia. Hlimi chuan, "Kawng laiin min la dang a. Ril a tam tawh sia ninawm tawp..i tha zel em?" Tih a ni. Min la rawn ngaihtuah ve hram hram chu a zah loh vang nge ka laka a inthlahrun vang tih zawng ka hre lo. Min haw lo va min be hram hram duhtu te hi chu chhe taka lo dawnsawn ka duh bik hauh lo. 

Ruthi erawh chuan, "Min lo chhan ta lo ula, ka thi awm sia.." Tih te, "I lo zin hunah min lo tlawh ngei ngei rawh aw. Ka pu pawn a hmu chak khawp mai che" tihte a ni. An lawm thiam ve khawpin ka hria. Ni e, ka chanah ka han indah a, a lawmawm ve dawn khawpin ka hria. Saidingi msg erawh hmuh tur a awm lo va, biak hmasak êm chu ka hreh si..mahse, a laka tlawm lo thei loin kei aiin a ngawi thei leh dawna ka hriat vangin, "Engvangin nge zu kha i in?" Ka va ti ta a. A online hunah min rawn chhang ve mai ang chu maw. 

Dar 10 a ri ta thuak mai. Vani te nupa pawh an muhil tawh a, Vani chu Buata khum bula khum ruakah chuan a mu ve mai a. Kei erawh nghate rêp ang kar ka la ni. Thawm lah chu a'n reh em em khawp a. Hmeichhia chu ni ila nuam lo ka ti zual viau ang. Ear phone ka vuah a, video ka la en ngat ngat. A khat tawkin Ruthi ka va reply ve leh zauh a. Saidingi erawh chuan ka msg chu a seen a, min reply duh thak lo. He hmeichhia zet hi chu aw..ka lo inhamtang laklawh si, chuti hni hnea bansan chu ka tum lo ve bur thung. 11 a ri ta hial a. Ka lu a rawn ná tan ta a. Phone chu dahin ka chhing vang vang a. Mutchhuak erawh a awm chuang lo. Ka lu lah chu nat namên lohin a na a, ka kut pahnih chuan ka bek tawn tawnah vuanin ka hmet ngawt ngawt a. A ná a ni. Zuii koh mai ka rilruk a, a number ka neih loh vangin ka va phei a ngai. Hai leh rit bûrin ka tho a, ka then chak chak mai. Ka phone a rawn ri thut! Ka va phu chiang tak. Saidingi a lo nia! A va mak ve aw. Ka la lo thei lo. 

"Ka lu a na lutuk" ka ti nghal táwng a. 

"Ka lo chhuk" tih leh dah a rual nghal. A lo chhuk dawn tho chuan tiin thei leh thei loin ka mu thla leh a, ka inhup vawng vawng mai. Patlinga pumpa heti taka lu ná hi malaria vang ringawt zawng a ni thei dawn em ni? Ka vein puite hi a chat hial em mawni zawk le..ka beisei aia hmain a rawn lut a. Syringe a hum vá bawk. Min jection nghal ta mawlh mawlh a. Ka lo ngawi reng tawp. Nachhawkna chak tak a nih hmel,. 5mins pawh a ral hman lo ang tihin ka lu na chu lak ang huai a ni mai. Ka awm thiam lo lek lek zawk. Ka meng a, a lo thu reng a. Chiang fahranin min lo melh kiau a. A hmaa a laka ka tauhna leh ka lungawi lohna te kha chu amah ka thlahlelhnain a rawn luahlan vek, a kut chu ka ban vat a, ka humsak a. 

"Ka ngai che" ka ti ta thláwt a. Ka kut a hum ngheh sauh danah a dawnsawn dan ka hrethiam mai. 

"Min ngaidam rawh aw" a ti tham chhal a. 

"Ka hrethiam alawm" ka ti ringawt. Mahse, eng emaw talin sawifiah se ka duh tho. 

"Pawi ka ti lutuk. Vcp khan a roomah min ko lut a, 'uisa kan ei dawn sia, lem hlek ang hmiang" a tia. Ka lo ti thin tih a lo hre tawh a niang. Ka hnar phal ta lo a ni. Mi dang chuan an hriat ka ring lo" a ti ta a. Ka chil ka lem khawlh. Kan vcp pawh chu a lo lem ve zauh zauh a nih awm chu..

"I in hma khan min ngaihtuah lo mi!" Naupangchhia deuhin ka ti a. 

"Ka ngaihtuah vang che alawm ka in" a ti ta daih a. Ka pháwk viau, "Ngati maw?" Ka ti hluai a. Vani te an harh ka hlau bawk si. Ka kutphah chung fawh zauh pahin, "Ka ngaih vang chein" a ti sep a. Mahse, min en ngam loh danah dáwt a sawi niin ka hria. Inzawh zui zel chu buaina a tam mai mai dawna ka hriat avangin ka ngawi ta a. 

"Han chho tawh rawh. A tlai tawh si, kei pawh ka'n muhil ang e" ka ti a. 

"I lungawi tawh tih tal sawi phawt la" a ti a. 

"I in tawh dawn loh chuan ka lungawi" ka ti sup a.

"Ka ti tawh lo vang.." Tiin min rawn melh a. Ka lamah pawt hnaiin a hmuiah ka fawp ta zauh a. Ani pawn ka chalah a rawn fawp leh zauh a, a chhuak ta a. Ka ruak huai mai. Mahse, ka muhil zui ve ta daih a. 

Ayush doctor thar Ramropuia an tih chuan zingkarah ward a rawn fang ve a. Palian tak, thau lam lek lek, khawpuia cheng tih hriat ngawih ngawih hi a ni. A vunte chu a no surh mai. A fel thluam thluam viau naa, keima lam dik loh vang nge ka thîk tlat! Aw ni e, Saidingi min chhuhsak daih ang tih ka hlau a ni. Tukthuan chu Tei'n min rawn pe a. Ka rin aiin ka ei tam. Ka lawm ve hle. Ka nat dan hi a ninawm chi ang kha, a nat loh lai chuan dam tha pangngai ang chiahin ka awm a. A nà a chhuah lai chuan awmngaihna ka hre leh si lo. Damdawi erawh min pe tha bawk a, a hun takah zel ka eiin ka injection bawk a. Ka dam vat turah chuan ka ngai. Tukthuan ei khamah Daisy a rawn lang leh hlawl mai. Rawn lawr fo lo se ka duh asin le aw. Nimbu a rawn ken chu a bawl hluah a, Buata'n tui a ti khawp mai a, a ei hnem viau. A lawmawm lamah ngai ang. Doctori rawn luh lai chuan Daisy chuan serthlum a lo kheh mek a. Buata te chu a en hmasa a, chutia han enkawl vak ngai kha a ni bik lo va. An chhuah vat a rinawm. Ka bula a rawn kal chuan Daisy chu a melh daih. Ka lung a phu rang hle. Ka tisual miah lo naa, ka kimkî. 

"Ruatpui, hei hi em ni? I bialnu chu? A ngaihsak hle chein ka hria" a ti ta a. Ka ner sawk. 

"Ni lo..ka nau a nih hi" ka ti hmuk a. 

A nui hak a, a nuih a za vak lo tih erawh ka hrechiang si. Daisy pawh chuan hrilhhai fe hian a rawn melh ve a. 

"A ngaizawng che tih hrethiam lo khawpa mawl i ni hleinem. A dik em? Daisy. Ruatpuia hi chu maw a ruhlanga hrilh chi.." Tiin Daisy chu a melh a. A tawng duh dan kher kher chu aw..

"U Ruatpuia te chu ka û ang a nia,..i ngaih ang kha a ni lo" Daisy chuan a ti tak naa, Doctori chuan a awih vak hmel loh. Thiknain a khat tawh a, engmah a hmu thiam tawh pawn ka ring lo. 

"I lu na tih loh chu han khawsik leh nawm lohna em em i nei tawh lo bawk a. Zanin hi riak leh la, naktuk zingah chuan i chhuak thei tawh ang" a ti ta a. Vawi khatmah min melh loin min chhuahsan. Ka lawm hlawl lo. Daisy thleng chuan ka hmel huat dawn dawn mai, ani pawh engvanga rawn chho nge maw a nih le. APuii nen te chuan nise thuhran. Min ngaizawng chu ka ti ngam lo, û ang tak takin min lo en ve pawh a ni maithei. Ka bialnu a lungawi tlat si lo. Ninawm. Ka mood a chhe nileng a ni ber e. Daisy pawh a awm rei tawh lo. Nuam lo a ti ve deuh niin ka hria. 

Ka nî te ka bia a, chaw rawn dah turin ka hrilh. Doctori quarterah chuan ka ei duh tawh lo, ni lo, ka ei ngam tawh lo a ni zawk. Min be tha dawn lo tih ka hriatsa avangin..a la thinrim rih dawn a, thlem pawh ka tum rih lo. A daih hunah engkim a tha leh vek ang chu maw..ti taka a thikthu chhiat chhan hi Johny kha ka puh lo thei lo, a lo kawpin a lo phatsan tawh si a. Nupuii'n chaw chu a rawn dah a. Samua te chungchang a hriat ang ang ka lo zawt ve a. Samua leh Asanga te chu an rawn chhuah thu leh Sawma leh Ruthi bialpa Bena te erawh Central jail lama an dah tur thu a sawi a. Ruthi te lamin FIR an lo thehlut ve kher bawk nen, tualthah tum thubuai an awrh ngeiin ka ring. Sawma chu a zia lo ee, mahse, a tirah pawh khan Asanga ai chuan Sawma kha a nih ka ringsa deuh reng reng a, Nulat tlangvalna kawnga hlei ve angreng tak, uangthuang ve thei tak a nihna laiah pawisak vak a neih ka ring lo sa kha a nia. Ka ring dik ta reng a. A nu ho va khawsa niin an khawsak a harsat ve tehlul nen, hetia an tlangval ber a han awm chu a nu leh a farnute chuan na an ti viau ang le. Ruihhlo hi chuan eng thil tha mah a lo thlen lo a nih hi..

Nupuii hawn hnuah kei pawh chuan muangchangin ka ei ve ta a. Ka eitui lem lo thung. Ka a tui miau loh hi chuan tui ngaihna awm hek lo le. Rilru lam nuam lo bawk nen. Ka ei khamah mei ka zu a. Pawnah ka thu mai mai. Damdawiin tual hi a zau a, pangpar leh engilo an ching nasa bawk a, a hmun hi nuamin a hahdamthlak ve riau. Waiting shed-a ka thut lai chuan Ambulance a rawn tlan lut a. Hmanhmawh taka lo chhukin tu emaw hi an rawn zawn chhuak ta a. Ka lo thlir reng ringawt. Saidingi pawh a quarter atang chuan a rawn chhuk thla ve hlawk hlawk a, damdawiin chhungah damlo chu an zawn lut ta a. Tu tak ni ang maw? A serious hmel angreng sia. Chanchin va ngaichàng ve reng reng teh ang tiin tihtur em em ka neih loh bakah ná ka nei lo bawk a, ka va phei ve a. Hmeichhe ward-ah chuan an dah lut a, Ka va thlen phei chuan ka la hmuh ngai loh tlangval hi pindan pawnah a lo ding a. 

"A zia lo hle mai, tu nge in rawn phurh kha?" Ka ti ve táwng a. 

"Nia a zia lo tawp. Pi Zuali a nih kha, Zawlsei atangin" a ti ve mai a. Pi Zuali! Hmm..a hming chu ka hre tawh. 

"Eng na nge ni reng reng le?" Inthlahrung takin ka zawt a.

"Aa. Na tia han sawi fak theih pawh a nei chuang lo. A fapa a sûn atang khan damni hmel a hmu tawh lo tluk a ni. Tihian a bawksawp reng mai a, vawiin khan a tlahniam thut a, kan rawn tlanpui ta chûk chûk a ni" a ti dam thluam a. Tlangval fel tak a niin ka hria. 

Va luh ve chu tul berin ka hre lo. Let leh mai tuma ka inher lai takin Saidingi a rawn chhuak a, "Ruatpui" a rawn ti fiah kák a. Ka lehhawi vat. A mitmeng chu a ngui viau mai, ka lakah a la titauah ngaiin, "Nakinah ka lo…" ka tih mek laiin.."Rawn lut la, i nu saw vawikhat chauh tal ka nu tiin va ko ta che" a ti zawi raih a. Ka ding khawng lah a, ka kut ka hum nget nget bawk. Tlangvala pawh khan maktih hmel zetin min lo melh ve reng a. Saidingi lahin ka mitah tak a melh kar bawk. Chu damlo chau tak an rawn hruai chu ka nu maw lo ni..

"Khawngaihin..tun chauh" Saidingi chuan a ti leh a. Ka chesawn thei der lo. Ka ke leh chhuat chu a inchar bet emaw tih mai tur a ni. Thisena inzawmna, phatsan leh tihchah takin nghawng a neih thuizia ka hriat phah. 

"Keimah vang tal pawn" Saidingi chuan a ti leh a, a mittui a far nia! 

Ka insangmar a, chuti taka min ngenna chu hnar thiang pawh va ni suh. Ka lut ta a. Khum chu an lo kil taih a, a pasal niawm tak chuan a kut a lo vuan ran bawk. Min hringtu hmeichhia chu ruhro emaw tih mai tur khawpa cher leh chau hian a lo mu bal a. Chuti taka a taksa a lo chhe hneh chuan min deng ve dawt thei. Khum mawngah chuan ka ding run a. Tawng ka tum a, ka hrawkah hnawh a nih tlat avangin ka tawng ri chu a chhuak thei si lo. Ka aw ka thian hráwk a. Khuma mu chu melh vawng vawng chungin, "Ka nu" ka ti ta a..

A mitmeng buai niaih chuan min rawn melh a, mi dang zawng pawh chuan min melh thup tih ka hria. 

"Ka nu" ka ti leh a. 

Min hringtu hmeichhe mit atang chuan mittui a lo luang a..thei leh thei lo hian a inbengkang a, an lo pui vat. Aw khur dar dar hian, "Ka fapa..Bawiha.." A ti sep a. Kha aw ka hriat rual khan ka thinlung hi sawi thiam hleihtheih lohin eng thil emaw hian a rawn deng dawt niin ka hria..Kha chen ka nausen atanga vawiin thlengin , 'Nu" tia koh tur ka nei ve lo va, 'Ka fapa' ti tu ka neih chhun chu ka pa a ni thin. Tunah ka nu min hringtu diktakin ka fapa a tih khan nu ka lo mamawhzia leh ka nun lo khawhar rukzia ka hrethiam chiah. Ka tlawm a ni..ni e, ka tlawm vawng vawng mai. An sawi hi a lo dik a niang e, 'Nu leh fa inzawmna chu a thûk a ni' tih hi.

Ka farnu niawm tak chu a tap nghal zawih zawih a. "Nu, ka u pawn a pawm tawh che hi, dam tawh rawh aw..tihian hlim takin ka u te nen kan awm dawn alawm.." Tih thu a sawi chuan ka hnuk a tiulh ve lek lek hial. 

Ka nu chuan Doctori melhin, "Ka lawm e aw. Bawihi, ka tan chuan vantirhkoh i ni. Ka laka i thutiam i hlen a. Ka damchhungin ka rul zo tawh lo vang che" a ti ta mawlh mawlh a. Kei erawh ka lo hamhaih thung..Saidingi ka melh a, hlim vanga a mitmeng de sawr sawr te, ka nu lawm hmel te..engkim chu..Ka tawlh hnug dat a..ka insehruh nasa hle bawk. Saidingi chuan min rawn en a. 

A hmai bul chétah va dingin, "I thutiam i tlak ta a. Ka kal bo tawh ang e. Ka lawmpui a che" ka ti vawt raih a. Thinlung na vawng vawng chungin ka hnuchhawn ta..

Corridor-a ka phei chu min rawn phih let dawrh a. A ngaihna hre miah lo mitmeng hian, "Ruatpui, eng nge i sawi awmzia?" A tuar a. Tumah mi dang an awm ve lo.

"Ka nu laka i thutiam tihhlawhtlinna hmanrua mai chauh ka lo ni a. Ka lawm tho e.." Ka ti tham tuak a. Ka sa hulh hulh a ni ber e. 

"Eng a? Engtin nge chutiang chuan i ngaih theih?" A ti nghek.

Ka nui lui sak a. 

"Ka haw dawn" tih leh min vawnna thinthlak ka rual a. Ka kal nal nal..

Saidingpui, ka nun hi infiam nan i hmang a, i hre viau ang..

(Ha pui to tur hi kei ang hian a na ve reng em 🥲🥺