Saidingpuii 6

Dr. SAIDINGPUII (6)

Ziaktu: Toni Râlte

"Tikhan min en reng suh" a ti sap a. Ka harh zawk. Ka nui huk a, rum zetin min la melh zui. Ka lawm vanga nui ka ni reng sia. "Ka lawm e aw. Zanah ka lo leng ang" inla zei deuhin ka ti sup a. A bu ve nghat. Kan han lai dun tha leh vel a! Ninawm a..pheikhai zang takin in lam ka pan thla ta a, Kal kawngah Samua ka tawk. Pehhel ka duh tehlul nen, "U Ruat, Hlimi chu engtin nge a awm?" A ti a. Hrilh loh theih ni hek lo le, "Nau a chhiat a" ka ti ta ringawt a. A meng hnual nghal rawih. A dara vawn pahin, "Samu, nau a titla lo a nia , a chhiat zawk aw. Hrethiam rawh" ka ti hram a. Hlimi thlavang ka la hauh ve ngat ngat chu amah ka va duh vang lam ai mahin kha a bialpa ze thing zet nei ai kha chuan Samua ka duhpui vang zawk a ni. 

"Ka han hmu ang e" a ti sup a. Boruak eng emaw tak zawng an han nei ngei ang le. Hlimi chu a luck mah mah a ni e. Kei erawh ka fihlim hman a, ka lawm khawp mai. In ka thlen chuan ka ni leh Nupuiin mei an lo zial a, awmhmunah pawh hian an thu mai mai ngai lo, mei an zial reng a, tikhan an hralh chhuak ve leh a. Chawhmeh eng ilo a lo tum ve bawk nen, a zia phian. Apuii erawh chuan darthlalang a nawt a, a zai pah riai riai bawk. Ka inthlak sawk sawk a, in hnuai lam singsa tur chuan ka chhuk thla ta a. Hnawmhnawk kan ngah ve riau a, tihfai chhung pawh a rei duh viau. Ar in ka thiah mek laiin information mike atangin chhiat tawh thu an rawn puang ta a. Ka ngaithla uluk viau. Vengsang lam ami keini aia u hlek tur pathlawi U Chhuantea a lo ni reng mai! Mi deng ve dawt nghe nghe. A mak mang e. U chhuantea pawh hian chanchin ngaihnawm tak a nei ve a, a lainatawm ka ti ve thin. Nupui a nei a, fa pakhat an nei ve hman, an fain thla 6 a rawn tling tihin an nu chu khuaiin a zuk hlum a. Naupangtein nupui a sûn a ni. A nu leh pate an dam tawh lo va, a û te chhungkua a bel lo thei lo va, a fa sên lah chu a u nupui lah chuan a pawmsak duh si lo. An thenawm nuthlawi Mapuii lainat lutukin a pawmsak ta ngawt kha a nia. U chhuana lah an nu a sûn rilru na leh khawhar chu zu lamah a tuan chho a. Nileng zankhuain zu a tlan a ni ber e. Mahse, a fapain kum khat a rawn tlin ve takah chuan a rilru a siam ve ta a niang. A u te inah an tlangtla si lo va, a hmaa an nu nena an luah dun an in kha a fapa nen chuan an luah dun ta rak rak a. Mi khawngaih an hlawh a, a in siamthat hnatlangte kan neiin kan chhawmdawl pah reng bawk. A fapa pawh a hnathawh hlana awmsaktu tur an awm ve mai zel a. Mapuii khan pasal a neih ve leh tak si avangin mi dang kuta a dah a ngai si a. Mahse, mi hi kan tha khawp a, khawngaiha lainattu an awm ve zel mai. An veng ami Pu Liansanga pickup a khalh ta a, an pafa eikhawp chu a thawkchhuak ve mai. Tunah chuan a fapa pawh kum 4 lai a ni ta a. Mahse, a pain a kalsan ve leh ta chu a nia! Keimahah ka inchan a, ka dinhmun nen a inmil ka ti bawk nen, ka mittui a hnám sawk thei. Ka thiltih lai dahtha sawk sawkin ka chho a. Ka inthlak leh zung zung a. Apuii nen Vengsang lam chu kan pan ta a. A in an lo singsa mek a, eng nge a thih chhan ka han zawh chuan an bual in a siamthatna lamah a chartin kham rawn tla khan a delh a lo nia. A ring ruhah takah a zuk delh a niawm e. Ka pawh chhawn loin a boral nghal a ni. A rapthlakin a lainatawm mang e aw. A farnute chu an tap rawih rawih a. A farnu te hi chuan an hmangaih reng, marawhchu, in hrang leh pasalte in atanga han ngaihsak vak theih a ni bik lo va. A fapa erawh an duatpui ve khawp chuan ka hria. U chhuana chu an lo zalh tawh a. Mitthi hmel pawh a pu lo. A û U patea a rawn lut a, an nuin a rawn zui bawk. An nu rawn tap ve chuan boruak a tiheng vek niin ka hria. A damlaia ngaihsaka hmangaih eih si lo, thih hnua ui leh ngai ber niawma an tap ngam thin hi ka ten zawng tak a ni. 

An in kawtah silpauline kan zar a, thalai pawh kan pungkhawm chak viau mai. Lumen tur a ni bawk a, Apuii nen chuan kan haw leh ta phawt a. Kei pawh ka inbual fai a, zanriah kan ei zui nghal. U chhuana an khawngaihzia an sawi sap sap a. A u nupui an ngeizia te pawh. Ka nu ka lo ngaihtuah daih thung. Chaw ei pawh a tui nek lo ve. 

Doctori ka call a. "Mitthi lumennaa ka kal ve loh chuan" ka han ti a. 

"Nia, kha a zia lo em mai. Mahse, lumen hmain i lo chho zuai thei ang chu" a rawn ti hram a. Min thlahlel ve nia ka hriatna chuan min tilawm viau. 

"Nia, dar 9 velah daih ka kal tho ang. Ka lo chho dawn nia. Hlimi chu eng nge a an?" Ka ti a.

"Hei a zia tawh e. Thi chhuak pawh a tawp rih a. Mahse, an boruak a sang ru viau" a rawn tih chuan ka rin dan chiah a ni. 

Ka ha te ka nawhfai hnuah ka inthlak leh te te a, muangmarin ka inkhalh chho ta a. Ka han thlen chuan a reh hle. Hlimi ka va hmu phawt dawn em ni ang ka tih rilruk laiin Zuii hi a rawn chhuak a, "Hlimi chu a tha zel em?" Ka lo ti vat. 

"Aw..saw Samua'n a awmpui a. A thianpa pakhat zawk kha khawnge a kal pawh ka hre lo..a zia lo e..i chhuk hnu khan kan buai leh alawm. Samua rawn chho leh sia, A thianpa nen khan an insual hrep a" a ti ta duah a. Ka rindan sa a nih avangin mak ka ti hran lo. 

"a zia lo thin e..lo tha rawh se. A thianpa pawh chu khualkhuaah lehnghal, a khawngaihthlak tho mai" ka ti a. Khawiah tak thangbo ang maw..

Doctori leh Tei te chuan tv an lo en dun a. Tei chu a ngui hle. Min hmuh chuan a nui lui sáng a. Ka lainat reuh mang e. 

"Tuna thi chu ka khawngaih hle mai. A fapa kha kum engzat nge ni tawh" Saidingi chuan a ti a. 

"Kum 4 a ni ve tawh" ka ti a. 

"Tu nge awmpui ang le..an phal chuan lak daih ka va duh" a ti sap a. Ka melh vak ringawt. 

"Nge khatia min melh vak..rethei taka a seilen dawn ai chuan ka kuta awm chu a tha zawk lawm ni?" A ti a. 

"An phal ringawt bik nang. Thil hi ngai awlsam viau zel suh" ka ti hluk a. Kan inbiak dan chu reitak inngaizawng kan ang. Driver leh a pi han inngaizawng chu engchen tak daih ang maw..

"E taka! Mikhualpa kha i lo hmu mial em? " a ti leh thut. Ka lu ka lo thin khum a. Ngaihtuah zui tih hriat takin "Khaw nge a thangbo ang le? Lehlamah ka khawngaih tho mai. Serchhip atangin a rawn kal ve vang vang chu a ni sia" a ti sep a. Tei chuan kan awmdan chu a hrethiam nge ni, "Ka mu dawn, ka chau riau.." Tiin a roomah a lut ta daih a. Saidingi'n ,"Tei, ka laptop kha keng lut rawh. Movie ka ngah lutuk" a ti zui làng láng a. Ni e, movie te en se a ziaawm mahna. Tei luh fel hnu chuan ka va thu hnai a. A lai nge a nui pût pût a. Kei atak pawh ka lai lutuk, mahse, mipa zawk ka nia lawm tiin ka inhumsek ve a. Ka inla huai ve mai mai a ni e. 

Ka hnár ka len deuha a hriat vang nge a chawngkawr mita min melh rá chungin, "Zu ka in lo" a ti nghat a. Ka nuih tlawn ta vel. A nuam a, a nuam lo. A kut ka vawnsak ta chawt a. A la thla bik lo. 

"Mak an ti awm" ka ti sup a. 

"Midang care suh" a ti ro hak a. 

"Engvang nge..?" Tiin ka melh a. 

"Eng chu" a ti há.

"Kan inngaihzawn ringawt" ka ti sup a. Ka nuihza insûm chu ngei hmel zeta min melhin, "Kan induh a ni mai lawm..inngaihzawn i duh loh chuan ni leh lo ila" a ti nghat a. Ka bulah hian ti nge a no em em zel le. Mi dang chu pachang takin a hmachhawn ziah si a. 

"Ka duh a, ka lo chhoh hi" ka ti nghut a. Ka va ngheng chial bawk. 

"Nang aiin ka upa a nia aw" a ti leh a. Ka hmui ka tihpawrh khum zauh, "Rules siam ila" ka ti a. 

"Engtin" a ti vat. 

"Bialnu zu in ka duh lo phawt. Chuan, thinchhe lutuk tawh suh. Chu zawng chu a ni mai" ka ti a. A khi sak a, ka sama rawn tham pahin, "Zu chu ka in lo thei, zaidam erawh ka pianpui a ni ve lo" a ti a. A kut lakthlaksak pahin, "Ka zirtir ang che. Ka thu awih la..ummm" pangchang ru zet hian ka ti a. Ka inten vel e ka awmdan chu. 

"Nang pawn ka thu i awih ve a ngai. Hmeichhe dang reng reng a melh pawh i melh tur a ni lo. I farnute tih loh hmeichhia zung thei tawh phawt chu ka thîk vek. " a ti ta mai a. Ka nui hawk hawk. A biangah ka piai a, "Ka mit ka tuam zel mai dawn nia" ka ti a. 

"Chuan, zin chhuah leh eng emaw nikhua chuan ka driver i ni. A hun leh a hmun hrethiam tur i ni a, kha lamah chuan ka ngaihtuah lo che" a ti a. Ka hrethiam ve mah mah hei chu. Inti tatu taka mi hmuh laia hauh hiam hiam kha chu ka tih chi a ni lo bur. A zahte pawh ka zak. Fawh ka tum mek laiin, Tei a rawn chhuak thut a. Ka va lai tak e aw. Ani pawh a lai ve tho. 

"Mam, kawtah sawn u muana a awm a. A rui lehnghal. Haw tura ka tih pawn a duh si lo va" a ti ta a. Ka tho nghal hluai. Saidingi'n min lo chelh vat a. "Keiman le" a ti sap. Kawngka chu a hawng nghal a. Muana chu dithlifarfêmah a lo ding bu lûk lûk mai. 

"Hetah eng nge i tih?" Saidingi'n a ti vin thak. 

"Ka nupui ka rawn hmu dawn" a ti sehchilh nawk a. 

"Hetah i nupui a awm lo. Haw rawh" Doctori'n a ti leh a. 

"A awm..Lianzual, lo chhuak teh. I lo chhuah hma loh chu ka awm dawn a nia. " a ti lung lung a. Tei chuan a hmui a pet fan fan ringawt. 

"Lianzuali hi i nupui a ni tawh lo. Nang ang mipa nep leh tlaktlai lo hian i phu lo. I nu uite i ni a, ni zel rawh. " Saidingi chuan a ti hmak hmak a. A rawn lut a, kawngka a kalh zui hmiah. Tei chu chiang taka melhin, "Tei, kei chuan engmah tihluih theihna che ka nei lo. I duhthlanna a ni aw" a ti sap a. 

Tei chuan a kut hum ruhin, "Ka hmu dawn lo. A duh leh zankhua pawn awm rawh se" a ti zawi raih a. A roomah a luhsan leh daih. Muana zu rui lah chuan pawisak nei tawh hek lo le kawngka chu a chumin a rawn chum a. Saidingi chuan, "Muana chhungte number i nei em?" Tiin min zawt a. Pi Chawii number ka pe nghal vat. Pi Chawii chu a call ta a. 

"Ka pi, Keimah Saidingpuii, In khaw doctor kha ka nia. Hei in fapa Muanzuala hian zu rui chungin mi rawn pal tlat mai a. Kawngka te a rawn chum bur bur mai a, a ranglamin rawn hruai haw ta che u" a ti ta hmiah hmiah a. Pi Chawii tawng hmain a off leh daih. 

"Tikhan an fapa nepzia an hmu mai ang" a ti sap a. Pi Chawii te chu kan lo nghak a ni deuh mai e. Muana lah a au lung lung a. "Lianzual, Tei, Tebawih, lo chhuak teh..min hmangaih em kha..mawh" ti ten, a chang leh a tap deuh pur a. Khati tak khan ka farnu kha tina lo se zawng khawngaihte pawh ka khawngaih mahna le. Rilru a tihel laklawh tlat tawh si a. Reivakloah thawm kan hre ta a. Pi Chawii aw ngei mai kan hre ta. "Muana, Muanzual, khatah eng nge i tih? Rawn haw vat rawh. Zah pawh i zak na nge?" A ti láwng láwng a. Saidingi pawn kawngka a va hawng a. Kei erawh ka va inlan duh lo. Buaina a awm leh ka hlau. 

"Nang nu kha ngawi hmak rawh. Nangmah vangin ka hmangaih ber ka chán hi..nang ang nu ka nei che hi ka zak ngawih ngawih" Muana thusawi chuan mi dek ve deuh. 

Teremi aw hian, "I zak chai em? Khanglang a che. I tette atanga chawm seiliantu che i nu hi tiang khan tawngkhum reng reng suh. Eng nge hetah hian i tih reng reng a" a ti hmarh hmarh a. A rawn tel ve kha ka ring reng ah. 

Saidingi chuan, "Muana, zuk haw phawt rawh. Khu i nute pawh an mangan khu. I chantawkah lawm la, i duhthlannaah hian chiang ang che" a ti dam thlap a. 

"Doctor, khawngaihtakin Tei kha vawikhat chiah min hmuhtir rawh. Vawikhat chiah" Muana chuan ngenngawl zet hian a ti a. Teremi a têk nasa mai. "Awiii hetah hian Lianzuali a awm vang a ni maw i lo chhoh? Khaw nge Lianzuali pawh chu..lo chhuak rawh se, amah hir her khan a ko tih hriat reng" a ti hlaih hlaih a. An thawm hre phak ve nafam chu Tei chu a insum zo ta bik lo nge, chelh hman rual lohin a room atang chuan a rawn tlan chhuak a. Kawngka bula va dingin, "Ka koh lohzia chu Pathian khian min hriatpui e. In fapa hi eng atanmah ka ti tawh lo aw. Hruai haw vat rawh u, a nih loh chuan police ka ko dawn a nia" a ti ve ta thak mai. Thawm chu a reh deuh a, Muana chuan, "Tei, Tebawih,. Min ngaidam rawh. Ka then thei ngang lo che a ni. I duh duh danin ka awm ang. Min kalsan suh" a lo ti bual bual a. 

Tei chuan, "Pasal atan chuan mipa dik tak chauh ka nei tawh ang. U Muan, ka hmangaihna che kha a bo tawh. I phumbo vek tawh. Min hrethiam dawn nia" a ti khur dat dat a. Pi chawii chuan, "Lalmuanzual, i zak em? Khaw nge, Zela, han hnukthla teh. I nu hi min va timualpho ve. Nang pawh Lianzual, ka fapa hi mitmei hmuh lo la tiang hian a awm lo vang. Nangte hir hiar hian i be hmasa tih a chiang reng. Zela, han pawtthla rawh. Haw ang u" a ti bawrh bawrh a. Ka va chhuak ve chak tak. Mahse, ka insûm thei hram. Muana chu an makpa kan ti dawn nge an mo tilnei Zela chuan a kuah thla ta a niang, riat nawk nawk chungin an inphur haw thei ta hram a. Saidingi leh Tei pawh an rawn lut ve a. 

"Tei, chhel takin aw..i paltlang thei em em ang" ka lo ti vat a. A khi sak a, "Ka luhlulzia an la hre lo a nih kha.. Ka kir leh ai chuan ka thi zawk mai ang" a ti nghat nghat a. Saidingi pawh chuan a pawmpui hmel khawp mai. Dar 9 a lo pel tawh a, kei pawh lumenna lama ka kal loh chuan..ka ding vut a, "Ka han chho ve tawh ang e. Buaina a awm leh chuan min lo ko ula aw" ka ti a. Tei chu a zei reuh riau, roomah a lut nghal zuk. Saidingi chuan min zui ve mai a. Kawngka bulah chuan kan han ding dun ren rawn a. Kan insanhleih nasa ve ee..a cute daih zawk 😍 Ka chhuk melh run a, "ka chho ang aw. Mu nghal rawh nang pawh" inti neitu zetin ka ti a. 

"Umm..mu ang..nula han thutpui suh aw" a ti hram..a hnarah ka tuaisak zauh a. Chutah a khabe chawikansakin ka kun hniam a, a rawn dingdihlip bawk. Ka kiss ta a. Hlimi aiin a zei lo, mahse, a thlum zawk. Driver Ruatpuia hi Doctori bialpa ka ni ta. Ka va then tawh awm hlei lo é aw..

Ka inkhalh chhote chu mahniin ka han nui leh vur vur zel a. Min hmutu awm se mi á emaw min ti ngei ang. Ka han thlen chhoh chuan an lo awm nual tawh a. Pawn lama thu khawmuang loin ka lut zui ve nghal. Kawngka bul bangkil lamah ka thu a. Zai a nuam viau mai. Ka bula thu te chu an chhuak a, reivak loah nula pathum leh tlangval pahnih an rawn thu ta a. Ka bula mawng rawn hungtu chu ka hriat ngai mi a ni hauh lo. Mikhual a ni maithei ni. Lehlamah kan khaw chhung hi a zau ve a, kan inlenpawh em em vak lo bawk nen, kei lah motor ka khalh lai phei chuan ka awm tlem si a, tleirawl lam te phei chu an nu leh pate atang lo chuan ka hai zeuh zeuh tawh. Mikhual a nih loh pawn kan khaw chhung ami tuallim vak lo a ni maithei. Nula ka'n ti ngawt a, tleirawl ti ila a fuh zawk awm e. A sam chu a buang thûng a, a mit lah chu a meng nge a maimichhing tih pawh hriat loh khawpin a hnawih dum a. A hmui pawh a vam tha ham ham ngei mai. Hmelchhia tia sawi tur erawh a ni miah lo. A rim pawh a tui zêk. Ngaihsak mang lo chuan ka zai ve zel a. Ka zun a chhuah deuh vangin dar 12 rik hma deuh chuan chhuah ka tum a, ka insingsa a hmuh vang nge, ka bula thu chuan zawite hian,"I zun dawn chuan ka lo kal ve. A chhuak tawh lutuk a" a rawn ti a. Ka bu ve ringawt. Zai an tan veleh kan chhuak ta a. Thutna erawh min lo hauhsak ang chu maw. Zun in chu U chhuana te in piah kawi thim laiah daih an lo siam a. Kan inzui phei ta a. Kan zun zawhah , "Zial zuk lawk ka duh a..min lo va luhsan mai la" ka ti a. 

."Keimah chuan ka ngam lo" a ti tlat mai. Eng sawi zui lo chuan mei ka tan a. Khuangleng vaihlo ngei mai han pak khuk hliam hliam hi chu dam man hi a va awm chiang tak. Ka bulah a ding ve reng si. A hming takngial pawh ka hre si lo. 

."Ka hmuh ngai che pawh ka hre lo, mikhual i ni em?" Ka ti ta ringawt a. A nui hak a, a nui mawi zêk lehnghal. 

"U Ruatpui, min hre lo a maw? A awm ve tho mai. Ka awm khàt ém a. Nimin piah khan ka lo haw chiah alawm..keimah Daisy..venglai kha" a ti ta a. Khai aw! Pu Rinpuia fanu neihchhun Daisy , phaia eng emaw zuk zir kha a lo ni reng chu niin. A awm bo rei êm a, ka lo hre tawh lo pawh chu ka indem lem lo. 

"I danglam tawh êm a. Ka hai che alawm. I va fel ve" ka ti ve luam a. 

"Fel pawh ni lo,. A ngai sia lawm" a ti ve mai a. 

"Hetah i awm ve reng tawh dawn em?" Ka ti a. 

"Ka hre lo le..awm ve reng chu ka duh tawh. Ka pate thu thu ni mai" a ti diam a. Beutician lam a zir niin ka hria. Ka zu zo ta bawk a, "Lut ila" ka ti a. Min zui ve mai bawk. 

Eitur an rawn sem lai chuan, Daisy chuan, "Kan veng hi chu min sawi duh sia, inngaizawng emaw min ti leh ringawt tawh ang chu" a ti sar sar a. 

"Lo ti vel mai mai rawh se..kan nih loh phawta hnu tiraw!" Ka ti liam puat a. A nui ve ringawt. Phone ka khawih chuan, Saidingi msg a lo awm khiau a. Puipunna hmuna phone khawih ruk tih luklak hi ka hreh zawng tak a ni ve a. Eitur an sem buai chhung ka en ve zawk mai chauh a ni. 

"Ka ngai nghal che" tih a ni. Ka khi suk mai. Dawnsawn nuam lo a ni miah lo. 

A online tawh lo naa, "Kei deuhin" ka va ti ve a . Zingah a en dawn tih hriain, "Morning..ni hman nuam" ka va ti leh a. Phone pawh ka ak zui lehnghal. Private msg te hi ka dawng khàt nasa mai si a. Ka puar angreng viau, an siamtui bawk a. A khat tawkin U chhuana nau Nuteii chu a han tap leh rawi rawi thin a. A fapa erawh an muttir tawh a ni maithei. U chhuana te pawh mitthi an ni ta mai si a. Hringnun hi a mak mang e. Zing dar 3 bawr velah chuan mut a chhuak tan a, mawng a kham bawk si. Va intihharh ka duh ta a. Daisy chuan, "Kei pawh ka mawng a kham tawh lutuk.." A lo ti vat. A thiante ho nen chuan kan chhuak ta dial a..zial ka tan lehnghal, Kuhva leh zial bak ka tih loh avang hian ka heh viau a ni. Thingpui lumna sirah chuan kan thu thap a. Lawmi chuan, "U Ruatpui, kan doctori khian zu a in thin a mi a?" A ti thut mai a. 

"In pawh ka hre lo, ti nge?" Ka ti vut a. 

"An sawi a, ka ring chiah si lo va..nang a driver chuan i hriat chian ka ring deuh mawle" a ti ve mai a. An lo sawi darh viau tawh ang em aw. Rilru a tibuai ve deuh. A hmingchhiatna leh mualphona tur lak atanga ka venhim a ngai dawn si a. 

Daisy chuan, "Ka pum a nuam lo tawp..an sawhchiar kha mawni le ka ti.." A ti niah niah a. A ner náng bawk. 

Puia chuan, "Zuk haw mai ta che..ka zuk thlah dawn che mi?" A lo ti vat a. 

"Ke chuan ka peih tawh lo e. U Ruatpui, scooty i keng tiraw? Min zu thlah lawk peih em? Inthiar ka duh" tiin min rawn melh a. Vengsang leh venglai inkar chu a hla ve bawk a, ka hrethiam. 

"Aw keng e, kal ila ni mai lawm..i pum chu a zia lo hle mai" ka ti a. Ka tho nghal vut. A thiante nen an inthlah a, kan inzui phei ta nghal. Vengsang leh Theireh veng inkarah hian in a awm lo va, a la ngaw deuh khup lehnghal a, hmeichhe tan phei chuan chhun engah pawh a hlauhawm tham ve riau. Chu lai ruam kan thlen lai chuan, kham sang awih atang chuan, "Min pui r'u..min chhan r'u" hmeichhe aw hian a rawn ti ta mai le..au ri chu kan hrechiang khawp mai. Daisy chuan ka kawngah min rawn kuah nghal thlawp. Kei pawh ka balance a buai ve nak mai. 

A thlang deuh zawl laiah chuan ka ding ta a. "U Ruat, ding suh..ka hlau a nia. Tu nge kha kha?" Thlabar tih hriat ngawih ngawih hian a ti a. Tawng ka tum mek laiin chau taka rum ri leh thaw ri bawrh bawrh thawm kan hre leh nghal. Daisy chu a khur nghal hlawk hlawk. Kei pawh ka tukhum a za mar mar mai. Ruam lai vel chu a thim angreng bawk si. Mahse, mipa ka ni a, chuti maia kalsan teh tawp chu ka tlawmlakna zawng tak a ni ve bawk si nen, ka phone flashlight ka on a. Ruam lam chu va ênin, "Tu nge i nih?" Ka va ti tuar a. 

Chauh hmel tak hian, "Min pui rawh" a rawn ti leh. A aw chu ka hriat ngai pawh ka hre lo. Thlarau a ni emaw mihring a ni emaw fiah ngei thaa ka hriat avangin, "Daisy, hlau suh aw. Ka va en lawk ang e" tih leh kal ka rual a, min rawn zui nghal. Ka banah nghet zetin a vuan a, ka khawngaih deuh, a hlau si. Kei tak pawh chuan ka hlau lo hran miah lo. Ruam chu kan va thleng phei a, awih tlan lai chu ka zuk en kual ta a. Ka thil hmuh avang chuan ka hmulthi a tho sung sung thei nia. A hmai chu thisenin a bawm khat vek a. A sam chu a tla hniang bawk, kawr dum leh kekawr dum ni maiin ka hria, chu chu a ha a. A tet hrup lehnghal. Kham awih tlana thing zung vuan chung chuan a lo inhamtang ngar ngar mai a lo ni. Daisy buah, "Kha min lo ên rawh." Ka ti vat a. Thlarau ni lo, mihring a nih tak vang nge hlauhna chhete mah ka nei tawh lo. Fimkhur takin awih tlanah chuan ka kal thla a, vawn tur a vang angreng si, Daisy chuan, "Fimkhur rawh aw" a lo ti ve reng bawk a. Hmeichhe kut chu ka zuk vuan pha ta a, nghet zeta humin ka theihtawpin ka pawt ta a. Amah chu a chau tawh angreng si, a rit vak lo bawk a, engtin tin emaw chuan ka pawt chho thei ta hram a, ka hah viau mai. Ka pawm a, "Ka lo dáwm ang che. I chho thei ang em?" Ka ti a. Daisy pawh chu a rawn chhuk hnai a, "Ka lo kai ang che " a lo ti var a. Kawng atang chuan a thui tawh lo bawk a, bawkvak chung chuan engtin tin emaw a innem chho ve a, ka lo dáwm bawk. Daisy chuan a lo pawt ve bawk a. Kawngah chuan kan inla chhuak thei ta hram a. A mu hle hle mai. Ka phone chu ka la vat a, Kan Branch YMA president Pu Rinawma ka call ta nghal a, Daisy pawn a thiante a lo be mek bawk. Hetia kan muttir reng chuan kan chhan hman lo mai ang tih ka hlau deuh. Mahse, chanchin an hriat rualin an rawn lang ta hlawm a, thaw a veng huai e. Pu Rinawma motorin damdawiin lam an panpui ta a, Daisy nen chuan kan inphur thla ve nghal. 

"Ka pum na pawh a reh daih, Damdawiinah han tlang ve ila" a ti leh lawi a. Tlang kha chu ka tum sa hrim hrim tho a. Engmah sawi tawh lo chuan ka tlan chho ta nghal a. Kan han thlen chuan an lo awm laih tawh a. Doctorin a en mek thu an lo sawi a. Saidingi chu a che rang hle mai. Kha hmeichhia kha tu nge a nih hria an lo awm miah lo lehnghal. Thil mak tak a ni. Engtin nge khalaiah khan hliam tuara a lo awm theih? Khawi lam mi nge a nih ang? Darkar chanve hnu velah Saidingi chu a rawn chhuak a, chhuang zetin ka lo melh vawng vawng. Pu RInawma te ho bulah chuan, "A lu saw hmun thumah a kak a, an thui mek e. Chuan a nak veilamah sawn vihna hnuhma a awm a. Mahse, a thuk lem lo va, thisen chhuak chu kan titawp tawh e. Tunah chuan ngaihtuahawm a ni tawh lo ve" a ti dap dap a. 

Engtia ro han rel tur nge tih an han ngaihtuah a. Kei amah hmu hmasa bertu ka nih vang nge ka mawhphurhnaah an dah ta deuh a, chhiat kan tawh lai a ni bawk nen, Kei chuan chu nula chu ka lo buaipui rih mai dawn a nih awm chu. Nakinah a harhchian hunah thil awmzia te chu kan la hria ang a, tihdan dan a la awm mai ang chu maw..Pu Rinawma leh Hruaia te thianho nen nula chu kan awmpui ta a. Daisy pawh a la tel. Saidingi erawh inah a han chho lawk a, a rawn chhuk leh mai ka rin nen a rawn lang leh ta mai si lo. 

"Lo chhuk leh ta che" tiin ka han text a. 

"Kha nu kha phurh a ngai mi? I eng nge a nih a? Tikhan tlaivar dun ula, nuam inti zawk ang" a rawn ti ta mai. Ani Daisy a lo thík chu niin. A va hahthlak e aw. 

"Ka thlah haw turin nula kha kan hmu a, a rawn tlang ve a nih kha..thik tur a awm lo, ka nau te angin alawm ka en" ka han ti sasawi a. 

"Thlah pawh a ngai lo. I scooty-ah khan i farnute bak tumah an chuang tur a ni lo bur..ka mu dawn. Mang tha" a rawn ti. Ka nui ringawt. Ti taka a thikthu a chhiat chuan zaidawh a va ngai dawn êm aw. Kei lah ka zei hlawl bawk si lo. Chán ka duh loh chuan tlawm zel a ngai tihna a ni mai. Ka tlawm zel rih mai a niang chu. 

U Rengi a rawn chhuak a, "A harh tawh asin" a rawn ti a. Khua a var tan tawh. Kei leh Daisy chu kan va lut ta vat a. Daisy hian min belbul ve tlat sia! A ngaihna tak pawh ka hrethiam lo. Nula chu a lo meng diar diar a. Drip an khaisak mek bawk. A lu chu an tuam búr a. A khum bulah chuan kan va thu a, min rawn en ve vat. 

"Thiannu, i harh tawh maw? Nà i la nei em?" ka ti a. 

."Aih, nei tawh lo e" chau aw deuh hian a ti a. Biak vak pawh a la chau sia ka ti rilru a. Mu hahdam rih se, tukthuan ei kham velah han chho ta zawk ila ka ti ta a. 

Ka tawng hmain, "Min chhanchhuaktu kha i ni tiraw?" a ti sap a. A aw chu a ri chang chang a ni mai e. 

"Aw..ni e, i chau rih em mai. Muhil rih la, nakinah kan lo kal leh zawk ang. Tunah chuan i him tawh aw" ka ti a. A mit a khap sak sak mai. U Rengi a rawn lut a. 

"Kan zu hawnsan phawt ang a, tukthuan ei khamah ka rawn chho leh ang..mu hahdam rih phawt rawh se" ka ti a. A bu nghat. Daisy nen bawk chuan kan inzui chhuak leh ta a. In ka thlen chuan tumah an la tho lo, Apuii erawh a tlaivar ve a, a lo la haw lo a ni maithei. Han mut leh tingtang kha ka lu a na zawk ang tih ka hlauh vangin ka meng tlang ta a. Tui ka chhuang a, ka thawm vanga harh nge ni ka ní a rawn tho ve a. Chanchinte chu ka hrilh ve mawlh mawlh a. Mak a ti hle tih a hmelah a lang. In hnuai ka chinfel bak kha zingkarah ka zuk zo fel a, niminah khan Pa Thanga'n thing kha a zai tawh a, Thlan laih zawhah hlawhfa pahnih ruaiin kan va thiar tawh mai a niang chu. Thlan pawh ka lai thei dawn ta lo, kha hmeichhia kha ka mawhphurhna a ni tlat si a. Tukthuan chu ka namliam vel mai mai a ni e, ka ka a tui lo. Ka chhungrilah hian ka khua a sik tlat. Mi tham er er mai a, Ka sawi chhuak duh lem lo. Eikhamah ka intifai thuak thuak a, Damdawiin lam chu ka pan leh ta a. Nula chu a lo harh viau tawh mai a. A náka vihna hliam erawh chuan a khawsik a siam lo thei lo. Lu lam hi chu a dam hma a, ngaihtuahawm a ni lo. Duty an lo inthlak tawh a, Doctori pawh a office-ah a thuin ka hria. Kan inbe leh tawh rih lo va, Phone atang hi chuan thil sawifel a har a, ka chho anga hmaichhanah ka sawipui mai ang ka ti kha a nia. Nula chu kawm phawt thain ka hria. Ka va lut ta a. Min lo melh reng ringawt. A sam chu a sei mah mah em aw tih theih tur a ni a, a dum hlap bawk. A mitmeng chu ti deuh riai a, a buai deuh niaih bawk. A vun a ngo a, a mam bawk. Nula hmelchhe lo tak zawng a ni chiang e. 

"Eng nge i an ?" ka ti khawmawi a. Ka nui sáng bawk. 

"Hei ka tha tawh lutuk, ka nàk hi a la na deuh a. " a lo ti ve mai a. 

"Umm..i tha chho mai ang. Chuan, a hmasain Ruatpuia ka nia, engtin nge ka koh ve dawn che?" ka ti ta a. 

"Ruthi ka ni e. Ka lawm e aw Ruatpui, ka nunna min chhanhimsak a" a ti a, a hnuk a ulh tih hriat takin a ngawi dat a. 

"Aa..lawmthu sawi a ngai reng reng lo, ka tihtur ka ti ve mai chauh a nih kha. Chuan, pawi i tih loh chuan i chanchin min han hrilh ta che. Khawi atanga lo kal nge i nih pawh kan hre si lo va" ka ti a. A chil a lem khawlh a, chunglam melh leh vang vangin a bianga mittui luang ngiai ngiai chu a hru fai pàwk páwk a. 

"Umm..nia, a mak ngawt mai. In khua hi kei pawh ka vawikhat rawn kalna a ni. Englo a nia, kan khua chu Aizawl a nia. Aizawl Bawngkawnah sawn kan khawsa a. Nizan zantirah khan ka bialpa nen kan rawn tlan dun ve rawih a,..(a ngawi vang vang a, a heh a pet nasa hle bawk. Ka lo ngawi reng thung) ih, ka bialpa hi ka chhungten an duh lo hlawm tawp a, a chhan pawh addict a ni a. Duh tlak a ni lo ve bawk a. Mahse, ka hmangaih tlat si. Tichuan, amah ka bialpa chuan in khaw thenawm Zawlseiah sawn a ní te an awm thu leh chuta tlan dun chu a rawt ta a. Ka hmangaih êm vangin ka hnar thei thlawt si lo va, ka chhungte laka ka thinrim lai ni bawk nen ka zui ta tawp a. Bike-in Aizawl atangin kan rawn tlan ta vang vang a. In khua kan thlen hian, 'Ka thiante an awm alawm. Zanin chu riak ila. Naktukah kan kal mai dawn nia' a ti a. A thiante chu a bia a. In khaw tawntirhah sawn kan lo nghak a. A thiante chu an rawn kal a, tute nge an nih pawh ka hre ve lo. Ka phal lo chung an inchiu leh phawt a, A thianpa lah chuan, " Ka mark a chhe rih lutuk a. Ka hruai haw ngam lo che u. Riahna tur ka zawnsak ang che u. Thlamah a nia" a ti a. Ani ka bialpa rui phur tawh laklawh chuan Aizawl atanga a zu ken te chu la chhuakin an han in ho leh te te a. Kei chu min hrechang tawh lo hrim hrim. Mahse, ka tur tak sekah chuan a thianpa sawina hmun thlam lam chu kan pan ta a. Kan thlen chuan an inchiu leh a, an á vek tawh ka ti mai. Damdawi leh zu an tihpawlh bawk si,. Ka bialpa lah chu a phur tulh tulh a, a thianpa thianpa ve lehchhawng bulah te chuan, "Kan nu hi ka sawr dawn" te a tia..ka rilru na lutuk chu ka ngawi reng tawp. Ka bialpa thianpa chu Samua a ni a, Samua thiante lehchhawng chuan damdawi an ti ve lo. Zu kha chu an in thei khawp mai. Damdawi ti thinte hi chuan hmeichhia hi an mamawh em em lo va, ka bialpa pawh chuan min ngaihsak chang tawh lo. Samua thianpa pakhat zawk chuan ka hlauh ang ngeiin min beisei ta tlat mai a. Ka bialpa bula ka sawi lah chuan, "A hek chuang ami? Khilai ve mai la" a ti a nih chu! Ka thinlung na lutuk chuan ka beng nghe nghe. Chutiang taka min hmangaih lotu ka lo hmangaiha ka lo zui ta chu ka inchhir ngawih ngawih a. An hriat loh hlana relhruka mi khawngaihna dil tawp ka rilruk ta a. Zu an in leh lai takin ka tlan chhuak ta a. Mahse, an thianpa khan min lo hmu hman si. Ka bialpa chuan, "Va umzui la, i ta a ni mai" a ti a niawm e. Min rawn umzui a, ka sawi hmaih pakhat chu ka bialpa vang hian ka chhungten ka phone pawh min chhuhsak vek a, kan tlan dun dawn pawh khan kan in hnuai nula phone atangin kan inbia a ni. Thim zingah khaw lam nia ka hriat chu ka rawn pan ve zel a, khuang rikna lam kha ka rawn pan ve tawp mai a ni. Mahse, ka kal chak thei si lo va, a thianpa chuan min rawn umpha ta a, min sual ta a. A chak ropui si, mahse, chutimaia tlawm ka tum bik lo. Kan insual a ni mai e. Ani zurui pawisak nei tawh lo khan chemte a rawn phawrh ta mai a, mahse, ka tlawm duh chuang lo. Min vit ta a, ka lu hi chu ka lumna lama ka tihnat a nih ka ring. Ka hriat hnuhnun ber chu khama min nam liam kha a ni. Ka insawh thla bawp bawp a, nikhua ka hre lo zui a. Ka harh chuan a lo la thim vek a, ka lu a na ngut ngut a, ka nak lah chu chet ngamloh khawpin a na bawk. Mahse, ka hmalamah chuan ka rin chhoh ve tawp a, thawm ka ngaichang a, khuang ri kha ka hriat leh takah chuan beiseina ka nei thar leh a, tikhan ka rawn inhamtáng hram hram a nih kha..a bak chu i hmuh ang kha a ni mai" a ti ta mawlh mawlh a. A sawi zo chu a khuh bawrh bawrh, tui ka pe vat a. Ka rilru a kalthui kher mai. Ruthi sual tumtu chu Asanga emaw Sawma emaw a ni ngei ang. Samua'n he mi te pahnih bak a kawm ngai tlat lo. 

"A nih Ruthi, in awmna thlam chu a awmna lai awm vel i sawi thei ang em?" ka ti a. 

"Thei lo, a thim sia, mahse, bike khan kan tlan a, bike leng tawk velin kawng chu a awm. Huan a niin ka hria" a ti a. Ka ngaihtuah a, Vengsang lama huan neite ho, ka rilruah Pu Manliana a rawn lang hmasa ber. Vengsang leh Vengthar inkalpawhna bul lawkah an huan peng a awm a. Thlam pawh tha tak an nei. Tin, Pu Manliana chu Samua pu, a nu ú a ni bawk. Ngaihtuah ran vat chi nia ka hriat vangin , "Ruthi, min lo hrethiam lawk rawh aw. Kan hruaitu te ho ka'n be lawk ang e. Hetianga titu che hian hremna a hmu ngei tur a ni" ka ti sawk sawk a. Ka chhuak zui nghal. Pu Rinawma ka call a. Chanchin ka hrilh ta zung zung a. Tunah thlamah Samua te chu an la awm ngeiin ka ring a, nizan lamah pawh an hmel kan hmu miah lo kha a nia, kei chuan Hlimi a awmpui ni turah ka lo ngai a. Pu Rinawma ka biak zawhah U Rengi inah ka chhuk a, "Nizan khan Hlimi khi Samua'n a awmpui em?" ka ti a. 

"Zantir lam thleng kha chuan a awm a. Mahse, ka thiante an lo kal a tia ..a chhuk ta a nih kha..ti nge?" a ti a. 

"Ka hre duh mai mai , anih Hlimi chu tuin nge awmpui?" ka ti hram a. 

"Tuman, keimahniin kan vil deuh ringawt. A thianpa lah kha a rawn lang tawh miah lo lehnghal, a haw daih a niang" a ti ta a. Ka chhohsan leh ta phawt. Pu Rinawma chuan mi dang a be kual a, hruaitu thenkhat te chu Pu Manliana thlam han enfiah tur chuan an kal ta hlawm a. Kei erawh damdawiinah ka la táp rih. Doctori pawh a rawn lang a, kan inkar thil chu sawi a la hun lo bawk a, Ruthi chungchang chu ka hrilh mawlh mawlh. 

"Man vat an ngai a nih chu, a bialpa pawh chu a va tenawm em em ve" a ti nghal rêng a. Ruthi awmna lam chu kan pan dun a. 

"I chhungte i be duh em?" ka tih chuan a bu nghat a. Ka phone ka pe nghal. A hmet mawlh mawlh a, a ring ta ral ral mai. 

A nu ni ngei tur hian a rawn hello ta a. Ruthi chuan tap insum teuh chungin, "Nu, min ngaidam rawh u, khawngaihin.." a ti tiau a. 

"Khaw nge i awm?" a nu chuan a rawn ti a, Ruthi chu eng han sawi thei a nih loh avangin Saidingi chuan phone chu laksakin fiahfai takin a awmna hmun leh a thil tawn chu a hrilhsak ta a. Ruthi nu chu a chek hlak hlak mai. "Kan rawn kal nghal ang e. Awiii, ka fanu chu ka va khawngaih em aw.." a rawn ti a. Nu hmangaihna zet hi zawng a thúk bik a niang e. Ka tan erawh pa hmangaihna a thúk zawk thung. Ruthi pawh a rilru a nuam ve ta deuh a, nachhawknain an jection leh a. A muhil ta siai siai mai. A bialpa tlaktlai lo zet chu ka hneksak chak mang e aw. Tiang taka hmangaihtu hi a tawng leh ngút ange maw. 

Saidingi inah kan inzui chho a. Hlimi pawh a muthilh rih avangin ka va hmu ta lo mai. Tei'n thingpui a lo lum mek a, thil awmzia te chu min lo zawt ve luam a. A khawngaih ve hlein ka hria. Thingpui a lum zawhah a inbual ta daih a. Ka bialnu nen hun thawl kan nei leh ta. A thutak leh tawh..ka va hnaih a, "I la titau mi?" ka ti sup a. 

"Min tlawn suh" a ti hmak. 

"Daisy kher kha chu thik lo teh, Apuii te nen pawh an inkawm ve thin. Naupang a nih kha" duhthawh deuhin ka ti a. 

"Phurh kher kha eng nge a tulna?" a ti khar khar a. 

"Aww..min thlah rawh a tih tlat chuan aih lo tih tlat kha thil mawi ni hek lo,u te angin min en ve a.." ka ti kual a. 

"A melh dan che kha ka duh hlawl lo. " a ti leh hmiah. 

"Aw..engtinpawn min lo ngai se, ka duh ve chuang hleinem..a mak, ka thiam ve lo inthlem hi, Hlimi bak bialnu ka la nei lo tih i hriat kha" ka ti duah a. 

"Zuk nihpui leh rawh. I la ngaihven danah i la duh a nih kha" a ti leh tlat..a va buaithlak e aw. 

Ka kuah thut a, a inrin hmain ka'n fawp tak tak mai a nih kha. Tawngka chuan ka thlem thiam tawh si lo a. A tirah chuan a tang nasa ve lutuk, ka fawh nghek nghek takah chuan a tlawm ve ta nge a nem ve ta a. Duhthawh deuh chuan kan infawh ve leh tak kha..

"Taka..zu in tawh suh aw. Sawi thawm a awm a, ka duh lo a nia. I hmingchhiat hi ka phal lo bur" ka ti a. 

"Nghei tawp te chu ka phal lo. Eng emaw chang chuan ka in tho dawn.." inthlahrung tho si, luhlul deuh tho si hian a ti a. Ka thinrim tak tak lo naa, a nun siamthat ka duh chuan amah aia luhlul a ngai dawn tih ka hriat vangin, "I thu thu le..kei chu ka bang mai ang" tiin ka ding thut a. A hrilhhai teh e. Mi melh vung vung a.

"I á mi?" a ti hú mai. 

" lo..bialnu zu in ka duh lo ka tih kha" ka ti pawr hlur a. 

."Thu teh. Vanruatpui,. " tiin min pawt thu te tè a. 

"Ka in i duh loh chuan, ka bulah awm tam rawh" a ti thawp sap a. 

"I driver ka nia, ka awm tam lohin" ka ti hmuk.

"Ka driver ang ni loin ka bialpa angin" a ti nghat a.

"Aw tiang chuan" ka ti mai a. 

"I va serious lo tak" tiin min melh ràw a. 

"Engtin nge ka awm ang?" ka ti hê haw a. A nui put put ringawt. 

"Aw haw phawt teh. Chanchinte zuk hrechiang la, min rawn hrilh ve la aw. Zanah khawhar inah i kal lo vang. Ka bulah i awm ang" thupe aw vek a ni leh tawh. 

"Aw le..pi" ka tih chuan mi rawn kuk fawk, "Nghala" a ti hlak a. 

"A nih aw le, Saidingpui" ka ti leh kher a. Ka biangah a rawn fawp zauh, ka hamhaih deuh. "Kal rawh" a ti sap a. A hmel duhawmzia kha..kei hi ka mumang vek a ni ang tih ka hlau eee..Tlangval naran, engmah neih nei lo ve mai kha Doctor bialpa ka ni ta mai chu a nia. Mahse, eng nge min duh chhan ni ang le? Mipa a mamawh vang hrim hrim chu niin ka ring si lo. Hmalam hunin a la hril ang chu maw..

Ka chhuk thla ta a. Kawnah chuan an lo awm khawm laih a, Pu Rinawma ka va hmuh avang chuan ka ding a, ka va pan ta vat a. 

"Samua te chu in hmu em?" Ka ti a. 

Buk nghut pahin, "An inah an awm" a ti sup a. A sawi zawh rualin Police an rawn thleng a, mipui pawh kan pungkhawm chak hle. Samua te in atang chuan YMA hruaitu te chuan Samua te thianho chu an rawn hruai chhuak ta a. Ruthi bialpa pawh chu ka hmu thei ta. Tlangval hmeltha tak a ni. Mahse, a bialnu a treat dan khan min tilungawi thei mawlh lo va, a farnu te chunga thleng ni ta se, a pawmzam theih ka ring lo. Police chuan an vai chuan an hruai ta phawt a. Asanga emaw Sawma emaw chu an case a rip deuh maithei a ni. Ruthi bialpa pawh chuan hremna nasa tak hmachhawn se ka duh. Samua pa hi pa chapo lo tak mai a ni a, a fapa te an hruai pawh chu, "Ee! In tih dan dan khan ti rawh u. Thil sual lian tak an ti a, hremna pawh an hmachhawn ngei tur a ni" a ti hmiah mai. Samua tak kha chuan engmah a tisual ve pawn a lang lo. Damdawi leh zu a rui kha a ni mai a. Ruthi bialpa leh Ruthi namthlatu chung erawh a rip dawn a nih chu..

Pu Rinawma chuan lawmthu te min han hrilh luam a. A zahthlak zawk e a. Kan in lam ka pan ta daih a. Ruthi chhungte pawh an lo thang mekin ka ring. Lehlamah Ruthi pawn a bialpa nihna dik tak a hria a, a rilru a let thei ang a, a tha zawk mai. Khawngaihthlak viau mah se..

Ka chhungril khawsik er er chuan ka lu a tina ta deuh a, tuiluma ka inbual zawhah nachhawkna ka hmawm ve ta ringawt. Ngati nge mawni dawn ni. Ka men rim vang a ni maithei. Zanriah ei a la hun chiah lo bawk a, ka mu lum ta daih a. Ka muhil zui ta a niang, chaw ei dawnah Apuiin min lo kaitho a. Hai burin ka tho. Chaw pawh tihtham ka ei lo, ka ka a tui hlawl lo. Pathian zarah ka hriselna hi a tha a, mutpui tham khawpa na hian ka la awm lo tluk a ni. Chuvang a niang khatia ka khawsik ve deuh pawh ka tawrh deuh riau ni. Eikhamah phur fahran loin ka insiam a. Zep nák emaw mut daih ka chak. Mahse, ka bialnu thinrim ka hlau si. Damdawiin tlang lam chu ka pan leh ta vang vang a. Ruthi ka va hmu nghal, chaw a lo ei peih ve a, a lawmawm hle. Hlimi pawh a lo thu harh peih tawh a. A rilru lam vang nimaw hmuh theih khawpin a tlahniam nia. Hlimi pawh hi lainatawm tak a ni. Ka haw thei miah lo. Ka duh chu a ni chuang lo. 

"Naktukah ka awm hahdam ang a. A tuk lehah ka haw ang. Ka tan he lai hmun pawh a nuam tawh lo" a tih chu ka pawmpui hle. Samua te chanchin a lo hre ve bawk nen. An khuaah a nu leh pa bulah va awm hahdam se, rilru thar nen lo kir leh se a tan a tha ber ang. 

Ruthi chhungte an lo thleng a, Saidingi a rawn chhuk bawk. An fanu ka lo chhan avangin lawmthu sawi nan pawisa min pekte an tum a, a zia lo tak tak a ni. Ka tihtur ka ti a ni reng sia. An lawmthu an sawi mawlh mawlh reng mai. Mi pangngai tak chhungkua an niin ka hria, Ruthi pa pawh a dam thlup mai. Ruthi u mipa a rawn kal tel ve bawk a. Ani pawh a fel duam duam khawp mai. Rei awm loin Ruthi chu motorah an zawn lut a, Aizawl lam panin an tlan liam leh ta a. Thawk khat chu a veng ta huai e. Mahse, ka awm a nuam lo. Ka sahàl. Saidingi nen a in lam kan pan lai chuan ka pai nawk mai a, ka luhai dan chu a mak zawk. Ka rit bur bawk si, makti takin min en a. Amah te chu ka hmu vai deuh riai mai.."Ruatpui" a ti tuar a. Kei erawh ka áwn riai riai a..a thim ta mup mai. 

(Ka lû a na )