Saidingpuii 5

Dr. SAIDINGPUII (5)

Ziaktu: Toni Râlte

(Adds aw 🥰

Saidingi hmel chu a thutak ran mai a. A meng thim raih bawk. Sawi hmasak ber tur pawh ka hre lo. Zanina ka thil tawn teh hrep chuan min chawk buai hneh ve khawp mai. Tlangvala pumpa ka bîng mup mup mai alawm. 

"Engvangin nge hetiang hi i tih?" Ka ti ta nge nge a. Thutthleng a melh zauh a, ka thu thla nghal. Ka hma zawnah tak a thu ngil at a. A harhfim tih ka chiang bawk. 

"Eng maw ka tih?" A ti zawi sap a. Pawisawilo ber niawma a awm te chu ka huat tawk a tling. 

"Hlimi nen kan inkara i lo tlazep hi mawle. Samua te kha rawih a ngai em ni? Serchhipa a ex te kha va hrilh hriat a tul em ni? Kan awmdun ve apiangin kalna tur pawimawh i nei ziahte, engkim ka hre tawh" ka ti buan buan a. Ka boss a ni tih lam reng ka ngaihtuah tawh lo. A nui hul hak a, chiang kek kawka min melhin, "Tawnhriat nei lo hi chu in heti cháwk! A mak lo ve. Chutiang zawng zawng chu ka tih vek maw lo ni a?! A va ropui ve aw" elsen zet hian a ti hlut a. Ka ner khum nghek ringawt. 

"Dawt a nih ka ring ve lo" ka ti sup a. A ding hluai, "A nih chung chu ka tih ni ta se engvangin nge ka tih ang?" Tiin min melh kiau a. Ka chil ka lem khawlh. 

"Mawh, han sawi teh. Engvangin nge chung thil chu ka tih ang?" A ti leh a. 

"Min ngaihzawn vangin" ka ti nghut a. Za lutukin a nui hawk hawk mai. A kut te a beng thul. A awmdan chu a mak zawk, keimah chu ka hrilhhai letling. 

"Kei hian ka ngaizawng che a maw? Engtin?" A ti ta sek sek a. Kei ka hrilhhai tawh si, min ngaihzawn thu a sawi ngai bawk si lo. Mahse, ngaihtuahna hi a chak ve a, "Hlimi'n a hmakhalh che pawi i tih thu pawh i sawi tawh kha..chuan hman zanah nei tur chein min ti bawk" ka ti ve ta hmiah hmiah a. A nui lai a tawp a, thutak angreng taka min melhin, "Ruatpui, i bultan nana Hlimi ber kher i thlang hi pawi ka ti chauh zawk a ni. Inneih kha chu Johny vanga ka rilru buai thut vangah ngai mai rawh. Harhchhuak rawh. Kamtam nih ka duh lo va, mahse, mipa tha tak i nih avangin bul i tanna hi a pawimawh a, hmeichhe tha tak tawng la ka duhsak che a ni. Hlimi hi i tan hmeichhe tha tak a tling zo tlat lo" a ti ta a. Ka nui lui a. Min melh ngar mai. 

"Hlimi chu eng nge a that lohna? Vawiin thlengin a that lohna sawi tur ka la hre hleinem. Chuan, Samua te chu i ruai tak tak em? I ruai a nih chuan ka boss mah nila, i nunrawn man ka pe ve ngei ang che" ka ti a. 

Ka bulah rawn thuin, "Chuti taka min ring lo a nih ngai chuan fiahna a awm reng alawm..kal ila, i zuk hmu ang hmiang. Engkim kan hailang dawn nia. Zak miah suh ang che" a ti ta sak sak a. Ka kut hum ruhin rilru buai tak chungin, "Aw le..kal ila" ka ti sup a. Kan chhuak ta. Ka lungphu lah chu a rang nasa mai a, ka zám viau a nih dawn hi. Thudik kan hre vat dawn alawm le. 

Hlimi in lam chu kan pan thla ta tham tham a, a la eng pap danah a la meng tihna. Kawngka chu chhunglamah a inkalh a nih hmel. Kawngka bulah chuan kan ding dun a. Tawng lo turin mitmeiin min khap a, ka bu ve ringawt. Thawm kan ngaicháng ta reng a. 5 mins zet kan din hnuah thawm ngaihnawm loh zet kan hre ta a. Ka meng phawk teh e. Samua aw pawr zet chuan, "I ngam phawt chuan titla rawh. Nurse i nia, nau tihtlak dante chu i hre khawp ang chu. Mahse, eng nge ka tihtheih i hre khawp ang. Tun aia nasa hian i hmel hmuh tlak loh khawpin ka siam ang che" a ti ta chher chher mai. Ngik faih thawm a rawn chhuak a. Hlimi chu a tap a ni ngei ang. 

"Naktukah ka haw ang a. Ka rawn let tawh lo vang. Duh leh ka bang mai ang. Samu, ka nun i tihhrehawmzia hi, a tawk tawh. "Hlimi chuan a ti tiau a. 

Samua chu a nui lui nghek ni maiin ka hria.." I tenawm dan hi a uchuak êm a ni. Ka fa i pai a, U Ruatpuia puhthluk ngei tumin i ngaizawng der a, a then tak che avangin serchhipa i bialpa i be tha leh a. Kei chu nawmchen nan lek min duh a, a dik em? " Samua chuan a ti ta sak sak a. Ka lungphu chu a thlawk chhuak dawn emaw ka ti hman. Doctori erawh a ding ngawi ngal a, a hmel erawh a thutak viau. 

"Dik tak chuan damdawi ti thin lo la, neih che hi ka pawiti lo. Ruihhlo ngawlvei nei tur chuan ka inphal bik lo a ni. " Hlimi aw pawh tlemin a fiah ta deuh. A dinhmun khirh a tih kha a rai vang lek a lo ni awm a nih chu! 

"Aizawl atanga inkawp tawh, a tirah pawh ka ti thin tih hresa vek i ni. Tun ataka ka duh lo e ek e bal e i ti leh hi e..eng dang a ni lo, i tenawm vang a nih kha" Samua chuan a ti khur dat a. 

Thawm chu a reh leh ta vang vang. Ka inrin hmain Doctori chu ka va kai a, ka chhohpui daih. A tang bik lo. Thudik engkim ka hre ta bawk a. Va luhkhunga Hlimi va tihzah nawn leh kher kha tul ka ti lo a ni. A in thleng ka thlah thlap a, "Ka lawm e. Tunah chuan thudik ka hre tawh a..engkim a tha vek ang" ka ti sup a. A bu nghat a, ngawi rengin min luhsan daih. Kei pawh rilru rit ru deuhin ka inkhalh haw ta a. An lo mu thap tawh. Mut hmunah chuan ka inngaihtuah nasa mai a, U Rengi khan engvangin nge Hlimi kha pui tura min tih ang le? Thudik a hre ve lo tihna em ni ang? Ka buai ru viau. Mahse, rilru ka siamfel ta a. Hlimi leh a kaihhnawih thilah chuan ka inhambuai tawh lo vang tiin. Mutthilh erawh a har reuh zêk. Zing karah Teteii te haw turin min tiharh bawk nen..ka mit a thial urh mai. Sumo counter thleng ka va thlah a, rawn zin leh intiam chungin kan invai liam ta a. An ngaihawm ve reuh dawn khawp mai. 

Hlimi pawh a haw ta nge, haw ta lo nge engmah ka hre lo. Mipa tiha mawi loin ka block vek a, a zei si a, engtin tin emaw min hneh leh mai ka hlau a ni. Doctori pawn programme a nei lo nge ni a ngawi a. Ka lawmah a lo tla thung. Kan in hnuai hi siam ve thain ka hria a, ka pindan tur atan pawh, nakinah nupui chhia thate ka neih ve hunah in chung chu a chep ve mah mah ka tia..In hnuai hi siam dan a la awm tho bawk a tiin Pa Rema nen thing zai tir kan tum ta a. Kan thingzai thin ber Pa Thanga a hman loh lai tak a lo ni si. A khawl hawh a phal tho a tiin ka hawhsak a, Pa Rema nen kan leipui hrula Lawng thing zai tur chuan kan chhuak ta a. Pa Rema hi mistiri puitling chu a la ni chiah lo nain, kan khua angah chuan mistiri an tam loh vangin chhawr pawlah chuan a tang ve thin. A hmun kan thlen thlak chuan dar 12 a ri lek lek tawh. Thing chu kan zai nghal a, chartin leh char char-a chhuah tur erawh chuan hisap thiam ve ta lo chu Pa Thanga hman hun atana khawih turin kan rem tha ta vek a. Muangchangin kan hawnsan ta rih. Hawn kawngah Pu Zaia ka nu û te nupa nen kan la haw rual zui a! Ngati ziah nge mawni le..Pa Rema chu pa tha tih takah Pu Zaia chu a titipui hlut a, Kei erawh ka ngawi ngul ringawt. Khaw luh hma deuhin, Pu Zaia chuan ding meuhin, "Ruatpui, i u chu rál i tum lo em ni?" Min ti a. Ka ding chawt .

"U ka nei hleinem" ka ti hmuk. 

"I rilru tur hi chu ka hrethiam lutuk a nia. Mahse, i nu hian thawnthu danglam tak a nei ve tho a nia. Sawtiang kumah chuan a rilru tihnat belhchhah lo teh" a ti nghut a. A ngampa mah mah ka ti. 

"Eng nge a lo nat ve ngawt? Chhungkua ka nei alawm, ka mamawh lo, ani pawn min mamawh suh se" ka ti bung nghut a. Chak zetin ka kal nal nal. Pa Rema erawh a tawi khawmuang a ni maithei. In ka thlen chuan ka rin loh deuhin Saidingi a lo thu reng mai. Ani leh ni lo ang takin a lo titi ve siam siam a, kei lah mood uih deuhin ka haw si. Ka be mumal lo. An titi laklawh bawk a. Pa Rema a rawn thlen chuan ka nî chuan, "Paa, hei Doctor hian Tei hi a bula awm turin a rawn sawm a. Eisiam leh in chhung chet vela pui turin,. Ani Tei chuan pawi a ti hran lo va, eng nge i ngaihdan?" A ti chuar chuar a. 

"Amah berin pawi a tih lohte chuan awm ang hmiang, A rilru kal khat lutuk tur te pawh a danglam phah maithei asin" Pa Rema chuan a ti a. 

Ka nî chuan mitmeiin min rawn a, "Nia, a awm duhte chuan a pawi hleinem. Doctori bulah chuan him pawh a him zawk ang chu" ka ti a. Doctori chuan ner sak chungin, "Hming ka nei ve a, ka nihna hi chuan min ko tawh lo teh u. Tak taka Tei chanchin ka lo hriatin ka lainat zawng tak a nia, tunah hian 4th grade lak runpui a awm leh dawn a. Class xii kha a pass tiraw? Dil ve se, induhsak dante pawh a awm ve dawn a. A pasala chhungte hmuhsit theih loh tur hian invawrh lah se ka duh a ni" a ti ta a. A ti tak tak ni pawhin ka hria. Eggvanga ka farnu chu duhsak viau nge a nih erawh ka hre lo. An thil tawn a inan deuh vang pawh a ni mahna le..a tuk atanga Tei chu awm chho turin thutlukna kan siam ta a. Doctori pawh haw tumin a intintuah a. Ka nî polite pheng chuan, "Mampui, a driver tho i nia, han thlah lawk mai rawh" a ti pek a. Ka phur tehchiam lo asin le. Bakah ka la inbual lo va, thlan rim ka nam nasa si, a nuam vak lo. Ka hnial ta chuang lo va, scooty chuan kan inthlah ta a. 

"Thingpui lo in ta che" a tih chuan, "In lo vang, hei ka inbual duh tawh" tiin ka hnathawh thawmhnaw chu ka kawk zauh a. 

"Hlimi pawh a haw lo" a ti daih. 

"A ho" tih leh tlan thlak ka rual a. A hrilhhai ve maithei a ni. Ka inbual hmain Zorina a rawn lut a, "Ruata, sazaw chu kan zu chang dawn mi? Zan lam programme te i nei em?" A rawn ti a. 

"Nei nang, mahse, silai hi kan kawl ve si lo va" ka ti nuah nuah a. 

"Ka patea ta i hmang dawn nia, keiin ka pu ta..mi dang sawm pawh a ngai lo. Kan chang chhuak tawh ngei ngei ang" a ti a, a phur viau mai. Ka ni te pawn rem an ti mial a! Sa pelh tih vel hi chu an remti mang mang lo, thangkamte hi chu an enliam ve mai zel a. Ka phurzia an hmuh vang ni maw engmah an sawisel lem lo. Inbual ta lo chuan zanriah ka bar sawk sawk a, ka mamawh tur vel te ka han lakhawm leh zung zung a. Khaw thim thet thetah Zorina chuan silai pahnih akin min rawn sawm ta a. An huan lam chu kan pan dun ta thoh thoh a. 

Pa Rema sihdet ka ken chu a eng tha pup pup ngei mai. An huan mawng hi a hla lem lo bawk a, Hmawng kung lian zet awmah chuan tanhmun ka siam a. A piah lawkah Zorina pawh a thu ve ran mai. Sa ka chan vawihnihna chauh a ni a, kan hlawhtlin pawh ka ring em em lo. Sazaw sa hi chu thau se, rêp ila a tui ka ti ve mai mai. Dar 8 a pel tawh a, ralkhatah sihal a û ruah ruah mai. Thla chu a de chang chang a, êng kan nei tha tho tiin ka ngaimawh duh lem lo. Dar 9 rik nan 10 mins a la awm ang tihin thawm a rawn awm ta a. Ka thutna piah maia rah tlan mek sazaw chu fiah lo ruai hian ka va hmu a, a lian fu roh mai. Ka sihdet chu phawrh zál zálin, ka hmet êng thut a, ka silai ka tinzawn nghal bawk. A rawn meng de thê a, A hamhaih ve deuh a niang e, ka silai a puak ta dup mai. A let tawp a, han rian leh salh ka duh nen ka tihmelhem zo vang tih ka hlauh vangin ka kap nawn ta lo. Hmanhmawh zetin ka tlan phei a, Zorina pawn thawm a rawn nei vat. Ka sazaw hmuh tawha la lian ber chu a tlu zuah mai a, Zorina nen kan lawm kher mai. Silai ah bawk, iptepui lo awm bawk nen, kan zawn ta ringawt a. An huan a hla lo ka tih tawh kha, kar loah kan thleng chho a, silai puak thawm kha an lo hre ve bawk nen, Sazaw kan han zawn lut pawh chu mak an tih vak hmel loh. Zorina pa chuan a tarmit siamthat pahin, "Ka sazaw hmuh tawhah a la lian ber awm e. Ruata, i vannei hle mai " a ti chuar chuar a. Ka nui ringawt. A sa chu kan chan nghal ta sawk sawk a, Zorina te chuan hmun thuma thena hmun khat chiah an la lehnghal, ka hnawn luih ngial pawn, "I kah alawm" an ti tlat mai si. Zorina patea lo awm ve lah chuan, "Ka silai kha i duh leh kawl rawh. I misa dawn riau mai, tikhan sa i kah changin min hleh ve anga a ni mai. Ka hmang tangkai chuang lo" a ti thên a. Ka lawm ru khawp mai. 

Pa Rema a rawn thleng phei ta bawk a, kan phei dun ta ral ral a. Ka nî te pawh an lo la meng a, ka sa hawn chu a then rêpa a then chu ka niin hralh a tum lehpek. Hralh tham êm chu a ni si lo. Ka ni tak hi chu aw. Tuilum sa ver vawrin ka inbual a, ka ril a tam deuh reuh avangin chaw tlem ka bar leh a. Ka mu daih. Ka phone ka'n en chu, Doctori miscall 7 a lo awm! A thinrim teh ang chu. A tlai viau tawh naa ka call back ta tho. 

"Engvanga call la thei lo nge i nih a?" A ti pawr hlar a. 

"Sazaw kan chang daih a, phone ka keng lo alawm" ka ti dam thlup. Tlawn ve deuh a ngaiin ka hria. 

"Ramsa kah hi bansan rawh, thangkam te..a nunrawnthlak" a ti ram hmarh a. Min biak dan vel chu a eng emawti nawm riau. 

"Aa..a nuam ve lawm, bakah a sa a tui a" ka ti a. Ka nui deuh bawk. 

"Naktukah meeting kan nei dawn" a ti nghat a. 

"Aw le, boss" ka tih chuan a têk lehpek e, "I nute khuaah a nia. Tin, raipuar vaccine pek pah a ngai bawk.. Kan riak maithei" a ti leh nghat nghat a. Ka nute khua?! Hmm..ka va ning e aw. 

"A tha lawm. Kan riak anga a ni mai lawm" ka ti ve mai a. Ka aw erawh a chang deuh. 

"Aw..muttui le. Tei chu zingah i lo hruai ve nghal mai dawn nia" a ti sap a. A dah zui nghal. Kan khaw thenawm tam tak awm renga ka nute khua ber khera kal zen hi ka duh lo asin mawle. Mahse, a hnuaia thawk ka ni miau si a. 

Samua msg a lo awm vung mai a. Ka open rang teh e. 

"U Ruatpui, Hlimi nen hian in chesual tawh em?" Tih a ni. Ka nuih te lam lam a za. Samua hian a duh ve riau dawn a nih hi. Hlimi pawn neih ve mai awm hi a nia, an khawsa thei tho si. 

"Chesual lo" ka ti a. A seen rang viau. 

"Tunah hian ka fa a pai mek a, i hriat tawh tho chu ka ring a, mahse, ka rawn sawi leh hrim hrim. Huatna che ka nei lo a nia. Amah Hlimi'n a lo biak che pawn chhan dan lo thiam la aw" a rawn ti vei thlup a. A pangngai viau mai. 

"Aw, ka hre tawh alawm. Lungmuang deuhin awm rawh. Ka kalsan tawh alawm" ka va ti ve duah. Hlimi chu a haw lo a nih si chuan Samua nen an innei dawn a ni mahna. Nau tihtlak êm chu a ngam lo a nih hmel. Ni e, thil rapthlak tak a ni si a. Aizawl atanga lo inkawp tawh an ni si a, a hmaa ka len ve laite khan Samua te chu an rawn lang ngai si lo..an inbreak ve zuai laite pawh a ni maithei a ni. A tha vek e, Hlimi chu hlim se a tha mai e. Ka na lem lo, ka zak zawk. Min bum chiang lutuk leh Doctori hming hial a lamri ngam kha. Ka awih theih dan ber tura sawi a ni bawk nen, ngaihbel tur tingin Doctori lah a lo awm ve bawk si. Ka nep tawh tur a ni lo tiin ka intiam mawlh mawlh ringawt. 

Tukthuan ei kham veleh Tei nen kan inphur chho a, Zawlseia zan kan riah thut takah Tei chu kan in lamah zanin chu riak leh phawt se kan ti a ni. Thawmhnaw pawh a keng lo, Doctori in leh a vel tifai tur chauhin a kal. Saidingi pawh a lo insiam mek a, hmeichhe dang ang lo takin a insiam rei ve lem lo. A sam chu a tawn khawm leh a, Tei hriat phak loh tur hian, "I sam i thlah hian i nalh" ka ti zauh a. Min melh ráng ngei mai. Tei chu tihtur a hrilh zung zung a, a harsa lem lo. A rilru chawl lo se tih kha kan duh ber a ni bawk a. Kan kal dawn tep tihin a pindanah a va lut leh zawk a, A rawn chhuah leh chuan a sam a rawn thlah ta hnáp mai. A hmuh lohin kei pawh ka khik vur vur kha. Kan inhrawn rei ve ta deuh bawk a, a zia pawh ka man ve tan deuh tawh. A no a, tihnat a awlsam a, a thinchhia a, a tih tawh loh chinah tumah zahpah nei lo leh luhlul lutuk a ni bawk..a mood off lai chuan biak buai loh a him tihte chu ka thinlungin ka vawng ve rauh rauh tawh. Zu a la in reng em tih erawh ka hre lo. A thing rim a nam ngai si lo va. Motor ka start mek laiin Hlimi a rawn lang hlawl mai. Ka melh duh lo lui tlat thung. Doctori chu a rawn be ta a, "Ma'm, vawiinah hawn ka tum a. Ka rawn hrilh tha leh che. Nimin khan ka chhuak hman ta si lo va" a ti sar sar a. 

"Aw le, tluang deuhin i kal dawn nia, he lam chu rawn ngaihtuah suh" Saidingi chuan a ti dam thlap a. Hlimi chuan min rawn enin, "Ruatpui, a nih aw. Lo inenkawltha la" a rawn ti a. 

"Aw le..nang pawh le" ka ti a. Ka tlan chhuak nghal. Saidingi'n, "A lainatawm zawk e a" a ti sap a. Ka chhang lo. Ka thinrim lo va, ka lungawi em em chuang lo bawk. 

Zawlsei thlen hmain kawng chhak atanga tui mau hmanga an dawhna bulah kan ding a, tuite chu kan in a. Zialte ka han tan a, ani pawh amah ang lo deuhin a lo inselfie ve! Ka melh run run ringawt. Ka bulah a rawn ding a, "Lo hawi lawk" a ti a, ka hawi rualin a capture nghal. Ka lang chhe ngawt ang. "Ka'n status te'ng" a la ti zui!

"A tul lo" ka ti hmuk. Min rawn melh háw a, "Engvang chuan" a ti he haw a. 

"I bialpa emaw min ti ang" ka tum loh deuhin ka tawng. A hmel landan danglam hlek lo hian, "With my driver" tih captionah ka hmang dawn nia" a ti sap a. Ka chhang tawh lo. Ka zuk zawhah kan tlan chhuak leh ta a, "I nu nen lo inkawm r'u aw, kan meeting chhungin" a tih chuan ka meng rum nghal ûl a. Ka ngawi tlat. 

"Ruatpui, vawikhat tal chu chance pe ve teh, i hriat ngei ngei tur thil a awm ka tih kha" a ti leh a. 

"A ninawm" ka ti nghut. 

"Mi makpa" a ti ta thlawt a. 

"I mak fe zawk. Reuh che hian a" ka ti nghut a. Kan nui duh der si lo, "I chapo lutuk a nih hi" a ti leh ringawt. 

"Mahni tawka kan chapo ve loh ten" ka lo ti si. 

Min chhan ngaihna a hre tawh lo mangang chuan, "I chhe lutuk" an ti ngawt a! Ka nui chhuak ta nge nge a. A tum bár mai. 

"Saidingpui, nang hian min duh tiraw?" Ka ti ta a. Awii, a mena a men rumzia chu. 

Tah chhuak hmelte pawh a pu telin ka hria. "Mi nghal lutukpa, i va tenawm tak" a ti tuar a. 

"Min ten tak tak loh kha" ka ti zel si. Ka duh chuan ka lo chimawm thiam ve tho a nih dawn hi, nge ama min chhaih kawlh hmasak a nia lawm le. 

"ka duh thlawt lo che. Ka driver i nih hi, i zak em? Ti nge khatiangtea min biak a?" A ti leh nghek a. A biang a tai têk tawh, "I duhawm reuh ém a" ka ti leh a. Ka samah a rawn kek ta..ka ding ta ringawt. 

"Kawlh lutuk mai" tih pahin a kut chu ka la thla a. 

"Vanruatpui, hmela, Min zah rawh. I dam loh pawn ka enkawl dawn lo che..i hre viau ang" a ti tàn tán a. A thinrim tak tak bik lo va, a rukin nuam a ti tih ka hre ve tlat! He hmeichhia hi a no mah mah a ni. 

"I driver angin ka be tawh ang che maw..aw le, pi, ka tlan thei tawh ang em?" Ka ti a. 

"Tlan rawh. Ngawi hmak tawh ang che" a ti ram hmak a. Chimawm chhuah zelin a sawi ang khan ka ngawi ta char char a, khua kan luh chuan, "Khaw nge an VCP te in" a ti a. Ka ngawi reng si. 

"Ka biak che chu.." A ti vin thak a. 

"Ngawi hmak rawh i ti a nih kha" ka ti sup a. 

"Va han chhe tak" a ti zawi sap. An VCP te in lam chu ka pan pui ta a. Kawtah a lo ding vang a. A fel thar thar ngei mai. Zawlsei khua hi an fel khawp mai, Ambulance an lei a, Damdawiinah an rawm donate thlap a ni. Chuvangin kan damdawiinah pawh an inngai mikhual bik lo va, nau neih leh dam loh nikhuaah pawh damdawiina thawkte pawn an ngaipawimawh thin viau a ni. Dar 12-ah meeting an tan dawn a. A rei lo turah ngai ang. An meeting chhungin VCP te in bul maia eichawp dawrah chuan ka thu lut a. A nghaktu nu lah a lo fel, a hmel ve ai nge min be nghal siam siam mai a. Doctor thari fel a tihzia leh a rawn ngaihven peihzia te, an khaw hoin an fakzia te min fah hrep. A hmaa kam doctor kha chu keini khaw chhung ngei ngei tan pawh khan biak a hrehawm thin a, a inlak zahawm tum luatah tumah khan kan ngaina lo a ni ber. Damlo tam zawk pawn hmunpui an pan phah fo a ni. Tunah hian ri ret ret a awm a, Ayush doctor thar kan neih leh hmel a, mahse engtikah nge a rawn join dawn ka hre lo thung. Kan changtlung tan viau e. 

Dawr nghaktu chu Jenny a nia, khal ve deuh, nau chaw bawm pawh lian tha nelh nawlh tak a ni. Mahse, a hmel chu tha ka tih chi a ni lem lo, a kareh a zau mah mah, bakah a hmai chu a bial mui bawk sia. Hmai bial cute deuh hi chu an awm a, mahse, hmai tung lam hi chuan hmeltha tih an hlawh nge nge zelin ka hria. Kan doctori hi a hmai a tung hran lo va, a bial em em lo bawk. A te fel êt vek a ni ber e. Jenny chu a tawng duh barh barh viau, Kan inkawm reng laiin thil leiin naupang pakhat a rawn lut a. 

"Apui, i pi chu a la tho harh peih lo em ni?" A lo ti siam siam a. 

"Aw..a mu reng" a ti mai a. A chhuak leh vut. 

"Apuia pi chu ka khawngaih ngawt mai. Hmanni mai khan a fapa a boral a, a tuar na lutuk a, a bawksawp phah ta reng a nih khi. Lehlamah an fapa kha rualbanlo a nia, khatia hrehawm taka awm reng ai chuan a kal kha a tha zawk ka tia..mahse, nu leh pate tan chuan fate hi chu an lo hlu êm a lo ni" a ti bawrh bawrh a. Chu hmeichhia a sawi mek chu min hringtunu a ni tih ka chiang khawp mai. Tlem chuan min dek deuh. 

"A va pawi ve aw. An fapa boral zan khan doctori hruaiin ka rawn kal ve alawm" ka ti ve luam a. Ka insawi duh hran lo thung. 

"Nia, bakah mi sawi ka hriat danin a fa hmasa hi in khaw mi a nia. A fapa chuan a haw lutuk a, chungte avang pawh chuan pi Zuali nun hi a hrehawm lutuk an tia..ka hre chiang ve vak lo " a ti leh niah niah a. Sawi thui ka duh loh vangin , "Taka..kan khuaah i lo zin tawh em?" Ka ti ta daih a. 

Dar 1:30-ah chuan meeting pawh an bang ve ta hram e. Thil an ei dawn chuan min rawn ko va, ka ril a lo tam ve tawh tho nen, an ar sawhchiar ka va ei nghek kha. Kan in eipuar hnuah Centre lamah pheiin raipuar ho chu a en leh dawn a ni. An lo nghak thap tawh a. Nui sángin a be hlawm a, hetiang kawngah chuan a ngaihsanawm thin mang e. A hna a hrechiang bawk a. Kei erawh phone te ka lo khawih mai mai. Raipuar lah chu an tam zêk a. Pakhat phei chu a rai puar ul tawh a, a fa a paw pur bawk. An va chhangchhe tak. Ka bula thu tlema inchei parh ve deuh, a dul pawh la puar em em lo hian, "Kan doctori hian zu a in thin an ti tlat" a ti ta mai a! Ka phu zawk mai. 

A bula thu chuan a sahdah hmuam pen per pahin, "Khawpui mite hi chuan an in thei deuh vek lo maw?" A ti a. Ka ner deuh. 

"Ka hre chuang lo, mahse, doctorah pawh hmeichhia lehnghalin zu han in chu, kei chu nau ka neih dawn pawn Aizawl pan ka duh" inchei parhi chuan a ti a. 

"Aa..nurse ten alawm min khawih dawn..ani te chuan a khawih dawn hleinem" a bula mi chuan a lo ti vat a. 

An bula thu ve tho ngawihchawi hmel deuh hian, "Dingi, i hriatchian loh thil hi sawi vak zel teh suh. Tuin nge a zu in lai hmu? A rui lai hmu an awm tawh mi? Hre ta se a lawm vak lo maithei ania. Kei ka fak êm mai, biak a nuam si, a kut a dam bawk si. Awm reng se ka duh a nia" a lo ti ve a. Dingi a tih chuan,"A lo awm tirha Lalrova damlo kan va kan khan kan pain zu rim a nam a ti tlat a ni..in lo na ná na chu nam thu awm hek lo" a ti leh bawrh bawrh a. Ka inrawlhna tur a ni chiah lo naa, a driver ka nih ang pawn a thlavang hauh ve thaa ka hriat avangin, "Ka pi, in hresual a niang, a motor ka khalhsak a. Vawikhatmah zu rim a nam leh a in ka la hre lo" ka va ti ve ta ngawt a. Chutia a driver meuhin ka han sawi takah chuan an ngawi tlang ta a. Ka rilruin Doctori pawh zilhhau thain ka hria, a hnuaia thawk ka nih angin a zahawmna ka duh a, Thingtlangah chuan hmeichhe zu in mi chu mi maktih, a ruka an sawizui thin, ngaihnep an la ni reng a. Mi nawlpuiin an hriata an sawi pun hma ngeia zu hi in tawh lohtir a ngai a ni. Tihtheih erawh ka nei tam lo maithei. A luhlul ve phian si a. 

Thim thet thetah an zo ta hram. Ka nina ka ninzia chu aw..lenna tur ka hre bawk si lo. Zan chu kan riak ngei dawnin ka hria. Ani pawh chauh hmel angreng takin a rawn chhuak a, mitmeng dul hnakin, "Riah i duh em?" A ti zawmah a. 

"Khaw nge kan riah ang a?" Ka lo ti vat. 

"Ka hre lo. Vcp te in pawh a theih a, Pu RIna te inah pawh a theih. Mahse, i tih dan dan" a ti lawi si. Riah loh chu ka duhthusam. Mahse, ril a tam ve tawh bawk sia. 

"Ka hrethiam lo, riah loh hram chu ka duh a, mahse, ril a tam tawh bawk sia" ka ti ta ringawt a. 

"Lawk, Pu Rina ka'n bia ang e. Chaw min lo chhum kep se, chaw ei khamah muangmarin kan haw mai dawn nia. Kei pawh riah êm chu ka chàk lo." A ti ve a. Pu Rina a call nghal. An in lam panin kan tlan ta nghal a. Ka nu te in kan tlan pelh lai chuan, "Rál ve ka duh asin" a ti sap a. 

"Nangmaha i kal hunah le" ka ti tlat. Min nawrlui ngam lo a niang, a ngawi ta daih a. 

Pu Rina te pawh chuan rawng an lo bawl zo ve deuh chiah a. Kan insilfai thuak thuak a. Zanriah chu kan ei nghal. Kan ei laiin an nu Pi Puii chuan, "Ruata, ngaih loh lamah lo ngai lo la, i nu khu hmu ve la a tha lo maw? A dinhmun a tha vak lo a nia" a ti ta a. Saidingi erawh a kun daih. 

"Aa..nia..la hmu ang" ka ti bah nak a. Sawi zui ka duh tawh lo. Pa Rina chuan, "Hun kal tawh chu hun kal tawh a nia. He khuaa ka thawh tirh atang hian an fapa natna vang hian min belbul ve chawt mai a, i chanchinte hi a sawi nasa thin asin. " a ti suam suam a. Ka sawi chàk ngang lo tih Saidingi chuan a hrethiam nge, "Hawn lamah kan peng dawn alawm..taka, Pa Rin, kan Ayush doctor thar kha in chhungte a lo ni maw?" A ti ta daih a. Ka lawm ru hle. 

Eikhamah kan han thu khawmuang ve leh a. Zialte ka zuk hnuah kan khaw lama haw leh tur kan ni si a, kan inthlah liam ta a. Ka nu te in kan tlanpelh chuan chak zetin ka tlan a, a rum nghat mai. Mahse, engmah a sawi chuang lo. Zawlsei leh kan khaw inkar hi 13 kms vel a ni a, kawng erawh a tha ve pangngai a, kan thleng hma thin viau. Pu Khuma teak huan kan thlen chuan a thi ta thut mai. Ka va mawl tak! Ka zak zawk. Petrol a zo! Ti nge ka lo check miah loh le? Driver laktlak loh tak ka ni. Saidingi chu ka hrilh a, ka inthlahrunzia a hria nge min hau duh bik miah lo. "Kei pawn ka lo hrechang tawh miah lo va. A zia lo ee..call mai tur i hria ang em?" A ti a. Motor veivak lah an tlem tawh si. 

Hruaia ka call ta ngawt a, a pick thei miah lo lehnghal. Zorina ka be leh, kan harsatna ka sawi chuan, "Ehe! Tunah chuan Zoteah balu phurin kan kal daih asin. Kan riak dawn a" a rawn ti! Mai mai chuan aw. Biak tur han ngamtlak ka nei bawk si lo, Pa Rema ka be ta ngawt a. "Hei Lawmkima te hi ka'n be chhin ang e. " a ti a, ka thaw huai mai. Lawmkima chu a u fapa a ni a, pickup driver a ni. Min rawn biak hun nghakin kan thu ta vang vang a. Min rawn be leh lawk bawk si lo. Ka call leh ta ngawt a. "Lo call che ka lo tum chiah a, Lawmkima chu Lawngtlaiah a kal daih a nih chu..tlawmngai thei tur ka han zawng ang e aw. Lo nghak hram hram ru" a rawn ti dam thluam a. Thawk khat chu a veng leh deuh e. 

Seat chu a kuai awn a, hahdam hmel zeta thuin, "Motorah hian riak mai ang hmiang. " a ti hap a. Ka melh nghek ringawt. 

"Motor lo tlan pawh a awm mai ang. Ka lo chàng ang" ka ti a. Dar 9 a pel hlek tawh. Zanriah kha kan ei tlai ve deuh bawk nen. 

Pa Rina call ka dawng leh a, ka pick vat. "Mampui, a va buaithlak e aw. Zingkarah petrol a lo thleng dawn chauh an tia. Pi Mali te erawh ka la be lo va, engtin nge maw ni dawn le?" A rawn ti chuar chuar a. Thin a rim tûn tawh. Kan khuaah petrol zuar pahnih chiah an awm bawk si. Motor kawlho lahin a awm zen zen loh vang hian lak chhawn an phal vak ngai bawk si lo. Saidingi chuan ka phone chu rawn lain, "Pa Rem, min lo ngaihtuah suh u. Motorah kan riak thei alawm. Zingah rawn dahtir mai rawh" a ti dam diai a. Ka lo tum bûr thung. 

"Aw le, a tha e. Zingkarah ka lo ngaihven nghal ang e aw" a rawn ti a. A dah zui nghal. Saidingi chu a chhuk a. Back seatah lutin motor hnunglam chu a va dap rak rak a, saranga intuam hi a rawn phawrh nawlh. Front seatah rawn thu lut lehin, "Kha sin rawh" tih leh Bangla blanket min pek a rual a. Ani pawn pakhat a sin zui nghal. Riah chu a tum ngheh hmel hle. Kei pawn tihtheih dang nei tawh hek lo le, ka sin ve ta mual mual a. Ka lungawi lohna ber pawh hre si loin ka lungawi lo ve ringawt. A hrethiam nge, "Ruatpui, i mawhphurhna i hlen loh vanga lungawi lo zawk tur ka nih laiin nangmah zawk i lawm lo daih a" a ti zawi ta sap a. Ka inthlahrung nghal ngawih ngawih. 

"Nia, ka tihpalh, ka laktlak loh ngawt mai" ka ti a. 

"A ho lutuk. Kan hriatreng tur thilte pawh a ni maithei asin" a ti sap a. A cool leh riau tawh. 

"Hriatreng tur a awm em ni?" Ka ti hû a. 

"I nu chungchang te" a ti dam diai a. 

"Ka pi, ka boss chu i ni..khawngaihin hei hi chu sawi dun tawh lo vang. " ka ti hriam hraih a. 

"aw le, ka sawi lo vang. A nih chuan ka'n muhil ang e, ka chau" a ti ta hmiah a. A inher sawk sawk a, a inkhuh ta hlan mai. Ka hrilhhai letling. Ka mut lah a chhuak ve eih si lo. Thawm chu a reh tlawk tlawk a, sava hram takngial pawh hriat tur a awm lo. Ka chhuak a, zial ka zu leh a. Dar 11:30 a pel tawh. Ka luh leh hnu chuan muthilh ve hlek tumin ka'n intintuah a. Ka chhing siar siar tihin rum tiah tiah thawmin min tiharh ta a. Ka meng chiang ngang mai. Saidingi lu thle tawn sek leh a rum nasa lutuk chu mangchhia a mang niin ka hria. Ka va khawih a, a rawn meng ve hlawl mai. A thlabar hmel viau bawk. 

"I tha em?" Ka ti vat a. 

"Aw.." A ti tham tiak a. A mit a nuai chawt chawt bawk, "Back seatah hian va mu rawh. A hrehawm ang khatah chuan" ka ti a. Thuawih zetin a tho a, a va inhnawhlut a. 

"Muttui aw" ka ti sup a. Min rawn melh káwkin, "Ruatpui" a ti sep a. A awah chuan eng emaw a awm. Ka hriatthiam si loh, ril ru deuh a inphûm. 

"Umm" ka ti a. 

"Deal siampui dawn ta che ila i duh ang em?" A ti ta a. 

" Eng deal maw?" Ka lo ti dam thlup. 

"Theihnghilh rawh. Ka sawi ve mai mai a nih kha" a ti leh lawi si! A va buaithlak tak. 

"A mak thei" ka ti ringawt a. 

"Muhil tawh rawh. Muttui" tiin a puan chuan a inkhuh daih. Ka rilru a kalthui hle mai. He hmeichhia hian ka lakah duh a nei niin ka hria, a sawi ngam bawk si lo. Min ngaizawng ni chuan ka hre bawk si lo. Ka rilru pakhatah erawh ,"A inthup a nih kha..che rawh, mipa i ni lawm ni?" A rawn ti thung a. Keima tawkah ka buai ru ve tawp. Puan chuan ka inkhuh ve hlun a, mutchhuak reng reng a awm thei si lo. Ka thaw leh hawk thin. Zial zuk leh tuma ka chhuah dawn lai chuan, "I rilru tihbuai dan tawk hi chu ka thiam ngawt mai" Saidingi chuan a rawn ti thawp sap a. Ka phu zawk nghe nghe. 

"I sual êm alawm" ka ti ringawt. Kawngka chu ka hawng a, chhuk lo chuan zial chu ka tan a. Ani pawh a rawn thu chhuak ve leh hlawl.

"I sual fe zawk" a ti hniam raih a.

"Eng nge ka sualna?" Ka ti hmuk. 

"I mawl" teh tawp zel a. 

"Min duh tiraw?" Ka ti ta ráwih a. A then sak. 

"Duh lo" a ti nghat. 

"A nih ti nge hetia i awm?" ka ti si. Kan inhnial leh tan dawn e. 

"Engtin nge ka awm a?" A ti nghek.

"Min duh ang deuhin i awm" ka ti ta ringawt a. A nui hak hak, kei pawh ka nui. Zah theih loh chhuahin back seat-ah chuan ka va thu lut ve a. A lo inherrem ve mai. Hlimi atangin ka lo inzir silawng ve nual tawh tho va, Saidingi hi bem thawr mai ka duh. Min duh tlatin ka hria. 

"Saidingpui" a beng bulah ka ti sup a. 

"Hawrawppuiin min ko suh" a ti pawr hlar a. A bianga fawh zauh pahin, "Ni ang" ka ti ta a. A ngawi dat a, min rawn melh. 

"Engvangin?" A ti ta khauh mai a. Ka hamhaih lek lek. 

"Ka duh chein ka hria" ka ti ta tawp a. Chhan dan tur ka bangbo em a ni.

"Ka duh ve chein i hria em ni?" A ti lehchhawng a. Kan va naupangchhia leh si.

"Ka hre lo. Aa..min duh loh pawn a pawi lo. Tihpalh" tiin ka insawn chho leh daih. Ka zak tlat alawm. Inla pa tawkin ka bem ve ringawt a, ka hnàr ka hmu lian hle ringawt. Min duh lo va, min chhaih kual mai mai a nih dawn hi. A ngawih tak rengah chuan kei pawh ka maimichhing a. Ka hriat loh karin ka lo muhil ve ta a niang, ka phone riin min tiharh a, Pa Rema a lo nia. Dar 6 a la ri lo deuh. 

"Hei, Zara te ka rawn tir e aw. Litre 2 ka rawn kentir e" a rawn ti a. Ka inthing harh nghal. Doctori erawh a te a tein a hnar sák sák mai a, a lawmawm reuh tawp. Tihharh hlau takin kawngka chu ka hawng a. Zing karah chuan kan awmna hmun chu a dàm bawk a, a vawt sûk mai. Tui ka in a, hmai pawh ka phih ta lo mai. Doctori pawn thawm a rawn nei ve a, a tho phang hmel pawh a duhawm viau. Ti nge hetia ka en tlat ni..ninawm. Ka duh tur a ni lo. Ka duh phak a ni lo ve. 

Zara te chu kan lo nghak ngat ngat mai. Biak pawh kan inbe vak lo. An rawn tlan chak bawk a niang, ka rin aiin an lo thleng hma. Petrol chu kan han thun sawk sawk a, Zara te chu Doctori chuan pawisa a pe a. An tlan zui nghal. Keini pawh kan tlan haw ta vang vang a. Kan inbe vak lo, ka zak tawh. Nia, ka zah rûn tawh tlat. 

Damdawiin kan thlen chuan, "Tikhan hawn mai rawh. Hman a tul leh ka rawn ko mai ang che" a ti a. Scooty ka dahsa kha Tei'n thiam leh thiam loin a lo khalh thla ve bawk nen, kea chhuk chu a peihawm loh êm a ni. Kan in lam ka pan ta a. A la hma bawk a, sumo thenkhat pawh an la ding. Counter-a Hlimi thu pawh ka va hmu. A ngui nghiai mai. A lainatawm rualin a che dangdai ve deuh a, a tuar ve tur pawh niin ka hria. In ka thlen chuan an lo tho vek tawh a. Nupui'n savun a lo kang puak mek, savun hi a duh khawp a, amah vang hian kan hauh teuh zel. Vawiin lam chu kalna tur kan neih loh hmel bawk a, in hnuai pawh khawih tan a ngai tawh a ni. Pa Thanga'n thing a zai hman tawh turah ngai ila, in hnuaia kan dah, hnawmhnawkho remfel leh tihfai ka tum. Tukthuan ei khamah Tei pawh a thawmhnaw nen ka han thlah chho ta a, Doctori bula awm ve mai a duh chhan nia ka rin chu kan lakah a inthlahrung niin ka hria. Bakah Doctori khan hna te kha a lo sawi hmawrhmuh ve bawk nen, a pasal leh a chhungte laka phuba lakna remchang tak niin a hre ve a niang e. Engpawhnise, kan ina a awm chuan a awl si a, a nau te an che peih si. A inngaihtuah leh vak zel a, hna te thawk bawrh bawrh se a ngaihtuahna te pawh a dang ve deuh ang a ,a tha zawk. Doctori chuan chaw a lo ei mek a, chawhmeh a nei lo mai mai, Alu fry leh dal kan leh hmarcha rawt a ni deuh tawp. A zah hmel lem loh, Tei chu a be bawrh bawrh a, a room tur te a kawhhmuh zung zung bawk. Kei chu eng nge ka tih dawn min zawt a, in hnuai kan siam tur thu ka sawi a. 

"Umm, kei pawh vawiin chu ka'n hahdam ang e. Naktukah nau nei tur kan nei a, a insiam dawn sia..ka chet a ngai ang" a ti zung zung a. 

"Rawn chhoh ve kher a ngai lo tiraw?" Ka ti zauh a. 

"Eng nge i tih ve ang? Tun hnaiah kan zin tam deuh a, tun kar chu i awlthawng deuh dawn a nih chu" a ti mai a. 

Ka tho a, "Kan inhmu khàt dawn hle a nih chu..i lawm ngawt ang" ka'n ti ngawt a. Engvanga sawi nge ka nih pawh ka inhre lo e a. Tei erawh a roomah a insingsa mek a. Kan tawng thawm chu a hre lo vang. A rawn hawi zawk a, "Nia , a lawmawm alawm..mihring tum lian deuh hmuh reng hi a khamawm hranpa ve a" a ti a nih chu! Ka va ngei tak. Nghal lutuk mai.

"Doctor ve si, tereuhtê han nih..a nih aw " tiin ka chhuahsan nal nal. Min ngei lehpek ang chu aw. Keimahin ka nui thla vur vur mai. Mahse, ka nui rei lo. Damdawi dawr ka thlen rual chuan Hlimi in atanga rak tuar tuar thawm ka hre ta thut a! Damdawi dawr chu a la inkhar avangin mihring dang rawn lang ka hmu mai si lo. Ka ding ren rawn a, a rawn te leh tuar tuar a, mipa thinrim inhrosa thawmin a rawn zui bawk. A quarter piah luahtu U Rêngi leh nurse dang pakhat Zuii te chu an rawn dak nghal hiang a. Kei pawh chutiang taka hmeichhe thlabar chu tiin ka chhuk zui ve zat. Hlimi in kawngka lah chu chhunglamah a inkalh tlat si! Ka kik a, a hnuah phei chuan a chumin ka chum ta a. Hlimi tap hlawp hlawp bakah Mipa phun bul bul thawm bak kan hre thei si lo. Doctori a rawn lang ve hlawl mai, U rengi ten an call a ni maithei. Kawngka chu kikin, "Hlimi, keimah Saidingi, rawn hawng teh" a ti tuar tuar a. Reivakloah kawngka chu a rawn inhawng ta a. Ka thil hmuh chu ka duh lo kher mai. Hlimi chu chhuatah a lo thu niaih a, a sam a thur bum a, a hnar thi chu a lo hup táwk táwk bawk. A tap nasa tih hriat takin a mit a bui lák mai a. Lainatawm tak a ni. Doctori chuan thutak zet hian, "Eng nge thleng a?" Tiin mipa lo awm ve, ka la hmuh ngai loh chu a zawt a. Chu pa chu kei aiin a hniam hret maithei, a tût deuh bawk a, hmelchhia chu a ni lo. Mahse, a mitmeng chu a nunràwn hmel ka ti. A hnar a tuai puat a, "I hmu reng alawm. He mi tenawmnu hian a chantawk a hmu a nih hi" a ti ram hmak a. 

U Rengi leh Zuii ten Hlimi chu an zuk kai tho a, a din rual chuan a pum a dawm ngawih ngawih mai. Chutah a kekawr tlang atang chuan thisen a rawn luang ta nguah nguah mai le..U Rengi chuan mangang takin, "Nau i chhiat a nih hi..chho vat teh ang. Khitah" tiin kalpui a han tum a. A pum na ti lutuk chu a kal thei si lo. 

"Khawi ka lo pua ange" tiin ka va pan vat a. Mipa khan min rawn dinchilh rap, "Kalpui a ngai lo. Hetah ka enkawl thei. Ka fa pawh ni hlei lo chu chhiat ang hmiang. A phutawk a hmu a nih hi..nang hi em ni a fa paina chu" tiin min melh rum nghal ûl mai a. A thinrim hmel pawh a tha fahran bik lo khawp mai. 

."Ni lo, ka ni lo. Mahse, Hlimi hian enkawl a mamawh. Ka hruai dawn..hei na a tihzia hi i hmu alawm" tih leh Hlimi puak ka rual a. Min rawn dawm vat, "Ka phalna tel loin in hruai ngawt thei lo vang" a ti vin thak a. Mahse, a biang a ri thak mai. Saidingi kutphah te takte hi a ben a na ve zêkin ka ring a ni. Chu pa melh kar chung chuan, "Nang hi i zak miah na nge? He lai hmunah rawn kalin ka staff kut i lo thlak ngam a maw? I va huaisar em em ve.." A ti khur ta dat dat a. A thinrim takzet tih a lang chiang khawp mai. 

"Ve a , tu nge i nih ka hre lo ve. Hlimpuii hi ka bialnu ka nupui ni mai tur a ni a, mahse, mi dang fa a lo pai a. Engvangin nge ka sawisak loh ang a?" A ti tûn tûn a. 

"Police ka ko dawn a. Lo kal bo hlek suh ang che. I nupui emaw i fanu emaw i farnu tupawh ni rawh se, hmeichhe kutthlak theihna i nei tlat lo mai. Hmelphak, hremna i hmu chiang viau ang" a ti sak sak a. Kei erawh Hlimi puain ka chhohsan ta daih a. A thi nasa sia, ka kekawrah te pawh a kai. Mahse, tlawmngaih a ngai miau si. Hlimi pum na lutuk chu a thlanin a bual huh vek a, tah pawh a tap thei lo. Zuii chuan hmanhmawh takin nachhawknain a chiu ta a. A thawmhnaw vel te chu U Rengi'n a thlaksak thung. Doctori pawh a rawn lut tawh a,a la tai hlar mai. Kha pa pawh kha rawn lut ve lehin Hlimi chu a pan nghal a, "Ka tihpalh..duati, ka rilru nat êm vangin pawisak nei loin ka lo che a. Min hrethiam rawh. Tihnat che hi ka duh lo asin" a ti hluam hluam a, ka va ten tak e aw. Hlimi erawh a tawng peih lo nge a be peih lo, a ngawi reng thung. A haw dawn emaw tih nak alaiin engtin nge chutiang chu a thlen leh daih theih ni. Nakinah kan la hre ve mai ang chu maw..

Ka hawn dawn chuan Saidingi'n min rawn thlah a. 

"Nizana i zawhna chhanna kha tunah ka pe ang che. Aw kan ni ang" a ti zawi sap a..ka melh vawng vawng ringawt. 

(Kut hi kut hi..awiii🥺🥺