saidingpuii 4

DR. SAIDINGPUII (4)

Ziaktu: Toni Râlte

Ka zing tho chu ka phak chuap mai. Tei leh ka nî an lo tho tawh a, thingpui ka in laiin call ka dawng lehpek! Saidingi bawk. A tho hma thei awm thin hi ka tia!

"Aw" ka ti puat a. 

"Motor hi rawn sil rawh aw" a rawn ti nghat a. Ka ner nasa ngang mai. 

"Min ban tawh emaw ka tia" ka ti sup a. 

"Aw i bang dawn emaw dawn lo emaw sil mai rawh. A man chu ka pe ang che" a ti hmarh hmarh a. 

"Aw le, pi ber" ka ti kual vel a, min ngei ngawt ang. Tukthuan ei khamah scooty-in ka han tlan chho a, a lo bal ve êm bawk a ni. Verandaah a rawn chhuak a, min rawn thlir reng. Ka han melh duh lo lui tlat thung. A rawn chhuk ta nge nge a. "Khaw nge i sil ang?" A ti a. 

"Tuikhurah a ni mai lawm" ka ti hmuk a. 

"Ka insu duh a, ka lo kal ve ang" a ti leh lawi si! He nu zia zet hi chu aw. A thawmhnaw bal ho chu air bagah a dah a, kei pawh khan suk tur tlem azawng chu ka keng ve reng. Hlimi a rawn chho a, nurse uniform-a a inthuam chuan nalh zeih zawih tak a ni. Min rawn pan a, "Insuk ve ka ngai asin le aw. Tui hi kan dawng tha si lo" a ti sap a. 

Doctori chuan, "Kha inpa kha insuktir rawh" a lo ti nghat. Ka va melh nghek ringawt. Mahse, min suktir êm lo ve. Insuk hi chu ka thatchhiatna lam tak a ni ve a. Zep loh chuan. 

Kan inkhalh chhuak ta a. Kan khuaah hian tuikhur lian deuh deuh pathum a awm a. A lian ber hi chu a lun thin vangin vengthlang lam tuikhur lam kan pan a. Kan tlan mek laiin Teteii'n min lo call teh mial a! Whatsappah chuan kan inbe ve zeuh zeuh tho a, an ngaihawm ve reng. 

"Ruata, naktukah in khuaah kan rawn sumdawng dawn. Thawmhnaw lam.." A rawn ti har har a. 

"A va tha ve, Valtea te pawh lo kal ve se" Saidingi ner sak lai melh chung chuan ka ti a. 

"An ni chu an hna an laklawh deuh a, ni dangah an lo kal dawn. Chuan, U Saidingi kan be ngam si lo va, in inah kan lo thleng mai ang aw" a rawn tih chuan ka nuih a za deuh. Saidingi an be ngam lo a nih chu! Ni e, a thinchhe êm alawm. 

"Lutuk, vawk ka lo talh ang che u" ka ti a. A nui har har mai. Lo thleng tak rawh se, boruak an tinuam ve alawm. Tuikhur kan thleng a, ani a insu nghal. Keiin motor ka sil thung. 

"Machine te lei mai ta che. Nih loh pawn insu tur hlawhfa ruai la" ka ti puat a. 

"Ka thawmhnaw chu keimah chauhin suk ka duh" a ti hmak. Ka thawmhnaw tam vak lo chu ka phawrh a. Inthlahrung lo zetin, "Min lo nuaisak ve mai la" ka ti a. Min melh rum ngang mai. Ka nui vur vur thung. 

"Nge khatin min melh suh. Ka bang daih dawn sia, ka tana i tihtheih hnuhnung ber a nih kha" ka ti nghut a. Ka ngampa chu ka inti ve reng. Mahse, nizana kan inhauh chiam vang kha nge ka thawveng sawt a, Saidingi min uap runna lak atangin ka talchhuak niin ka hria. Engmah sawi lem lo chuan ka thawmhnaw chu a nuai ve ta mai bawk a. Misual tak hi chu a ni bik lo mawle. Motor ka sil zawh dawn lamah Hmuna leh a thianpa Zuala te an rawn tlan a, Doctori an hmuh vang nge an ding dat a. Ngeiawm zet hian, "Khawpui nula leh doctor ni bawk chuan insuk te a thiam ve a nih hi" Hmuna chuan a ti lung lung a. Chhan enah kan ngai lo nge kan ngawi reng si. A la na deuh a niang, "Ruatpui, doctor mutpui chu eng nge a an? A nawm dan a danglam em?" a ti leh a. Ka va pan hnai a, "Mi pangngai ni teh" ka ti nghut. Zuala erawh chu a zak deuh nge kal a rawt ta chung a. An kal liam hnuah, "Hman zan khan eng nge thleng? A rawn thinrim nasa sia" ka ti ta a. 

A insuk lai dah meuhin, "In khaw mi leh sa a ni lo tiraw? Mi mawl a nih kha. Pangngai takin min rawn rim nise pangngai takin ka treat ang. A kamnam khan duh duha bawlzan theihah mi ngai khanglang a nih kha..hmelchhe ropui si" a ti ta nghat nghat a. Ka nui hawk hawk. Rum elkhena mi melhin, "Eng nge nuihzatthlak awm a?!" A ti hmak a.

"I sawi dan kha a hmelchhiat hmel ngawih ngawih" ka ti a. Ani pawh a nui ve ringawt. Kan inhrawn chhung reiloteah hian thil tam tak a thleng ve hman tlat! A changin kan inhau a, a changin kan intawng el a..ka haw hran lo naa, a tawngkam meinei hi ka ba duh bik thin lo a ni. Insuk chu kan tleng dun a, zawi sap hian, "Nizan khan a va thleng teuh ve" a ti a. Ka melh hû ringawt. A sawi awmzia ka hriat hnu erawh chuan ka khi suk a. 

"I lo lang timing lo ve khawp mai" ka ti a. A nui hak, "Timing ber zawk alawm. Virginin nupui i nei ang chu.." a ti dam diai a. Min tawng el ni pawn ka hre lo. 

"A harsa ve ang" ka ti ringawt. 

"Hlimi mitmei zawk kha ka veng lutuk a, a hrehawm" hmeichhia deuh hian a ti a. 

"A ho em mai. Hun dang a la tam alawm" ka ti puat a. Nizan kan inmangtha dawna a thusawi kha zawh chian chu ka chak hle naa, ka nu chungchang a nih avangin ka ngaihven duh lo lui tlat! Chawhnu herah kan insu zo thei hram e. Kan hawn lamah kan in tlanpelh tho a ngai bawk nen, pen ka rawt a. A remti ve mai. Tei te unau an lo awm a. Min hmuh chuan an meng pháwk hle. Thingtlangah chuan Doctor te chu mi ngaihsan leh mi mit latu an ni a, kan in meuha lo chuangkai ve ta chu mak an ti ve a ni maithei. 

"Te, thingpui lum la..Hei Saidingi pawn a duh ve ang" ka ti a. Nupuii'n ka insuk sa a zar chhuak mek bawk. Tei chu a che nghal vat a. 

"Tei te chu in inthen hlen dawn ta a ni maw?" Doctori chuan a ti sap a. Engtin nge maw a lo hriat ve ni..

"Aw a nih hi" Tei chuan a ti sep a. Zep thu a cheng lo, kha chen lo inzuia lo innupa hetianga chhungte vanga an han inmihran ta hi Tei paw'n a tuar lo thei bik lo va. A mu tlem hle tih a hmelah a lang. Ka lainat reuh hle. 

"Ka bulah lo awm daih ta che. Enteh, eisiam hi ka thiam lo lutuk a, in min nghahsaka eirawng min bawlsaktu tur ka mamawh tawp..lawmman te kan inpe ve ang a" Kan doctori chu ka va melh háw ringawt. Tei pawh chu a bangbo hle. 

"Aa..ka hre lo le..ka nute thu thu" a ti ve mai a. Thingpui leh zo chhang a rawn chhawp a. Apuii chuan, "Mam, Tlaiah Scooty saw khalh min zirtir ve rawh aw" a ti ham ham a. Ka bu nghut ringawt. Ka nî leipui kal a rawn haw ve chiah bawk a. Thlai hnah a rawn hawn leh nual mai. Doctori pawh chu maian leh behlawi te a hawntir ve a, a lawm thiam ve khawpin ka hria. 

Kan inphur chho leh ta a. Motor ka hun that hnua chhuk mai ka tum lai chuan, "Naktukah School kan tlawh dawn kha aw. I lo hriat loh takin" a rawn ti leh lawi a! Hmeli hi min ban emaw ka tia..

"Aw.le..ka pi" 

Ka chhuk nal nal. Mahse, ka hlim ru riau. Saidingi min ban loh vang nge a chhan ka hre bik lo. Zanriah ei hma deuhin Hlimi ka call a, a busy ngat ngat. Keia luhlul laklawh chuan vawi 12 tehmeuh ka'n call a nih kha. A busy zel avangin ka dah ve ta nge nge a. Tu tak bia ang maw. Kan chaw ei laiin min lo call leh lawi a, ka la duh lo ve ngat. 

Teteii te lo zin tur thu ka sawi mawlh mawlh a. Motor lian ka khalh lai khan thiante chaw ei apui hi kan ngah thin a, a changin an rawn riak ve leh lawp lawp zel bawk a. Chuvang chuan mikhual neih hi chu enghelh thamah kan nei tawh meuh lo. Tei chuan inthlahrun hmel takin, "Muana'n min lo be leh a. Tlan dun a rawt a" a ti sap a. Nupuii a ling leh hmain, "Eng nge i rilru?" Ka ti vat. 

"Dik tak chuan amah hi chu misual a ni lo va, khawngaih pawh ka khawngaih. Min indanpui ngam tawh dawn chuan zui mai pawh ka pawiti lo." A ti ta a. A rilru tur chu ka hrethiam. Muana zawk hi rintlak a ni ang em tih zawk a ni. 

Pa Rema chuan, "Ni e, kha chen in lo innupa tawh a, hetia tawp hlen mai hi chu a zahthlakna chente pawh a awm ang. Mahse, amah Muana hi a rinngam takzet em tih a pawimawh thung. Ka sawi fo thin kha in duhthlanna chu ka zahsak ang che u. In thlan sual leh in vanduai a ni mai a,. " a ti dam thlup a. Kan chhungkua hi a nawm riauna chu engmah sawi hreh leh zep kan nei ve ngai lo. Ka nî te nupa lahin min zilh kal reng bawk a, Chhiatnia ka thlan lai tur te hi, "Mampui, thlan khur chhunga luh ngei tur aw. Fai pik piak te khan i lo haw ang e" tiin min thlah ziah. Kan unaua hnatlan nikhuaa kan chhuah dawn lahin, "A zawmthaw pawlah va tang suh ang che u..tihtheih tawk tih zel tur" a ti ziah bawk. Vawi khat ka la hriatreng chu mitthi kan neih tum hian, mitthi buhfai leh thing khawn a ngai si, khatih lai kha thalai tam zawk kha YMA conference-ah an kal si a. Kan indaih lo mai si. Kan te ber Apuii hi hnute pawh la um mang lo a ni naa, ka ni chuan mitthi buhfai khawn tur chuan a tir chhuak ta a. Kawmthlang tleirawl amah ang rual tho hi a zuk sawm a. Kawmthlang pa chuan, a fanu bulah, "I kal chuan inleng neih i ngam tawh tihna a nia. I thu thu" a lo ti nia! A kal ngam ta lo reng a. Thenawm hnai rawlthar ho nen an khawn ta ringawt a ni. Tunah erawh YMA chhang kan tihte hian he lam hi chu an rawn hma ta a, khatihlai khan ka ni khan Apuii kha tirh nachang hre lo ta se, kan section kha kan mualpho maithei a ni. Chhiat thata kawnga nu leh paten an fate an zirtirna pawh a lo inang lo thei khawp mai. Kan khuaa ka awm lai a nih phawt chu khawhar in riak loin ka awm ngai lo, Ka nî hian min tir zel..mahse, hmingthat lak duh vang lam ni loin mizo zia leh culture chawinun zel a duhna zawk a ni. 

Ka'n sawi ta duah a, nia, ngaihzawng te pawh sawi bawrh bawrha infiam nak nak thin kan ni a. Hruaia pawn, "In chhungkua ang hi ka awt ve. In inkawmhlim thei si" a ti hial tawh. Tei pawh chuan Muana nen an inkar chu zep nei loin a sawi ta rêng a, a duhthlanna a ni. 

Ka nî chuan, "Muana hi kei zawng rinngam a nih ka ring lo. Lehlamah kan hriatthiam ve tho pawh a ngai, a nau mipa lah sawti saw a nia. A nu leh pate tan chuan a hlu ve bawk a. Mahse, min hmusittu te in chhunga i lawi leh chu ka remti tawh dawn lo thung" a ti ta a. Tei bulah Muana kawm ve hrim hrim ka duh thu ka sawi a, chuta tang chuan thutlukna pawh kan la siam ang chu..

Hlimi msg a lo tlar dul mai. 

"Ka nu nen kan inbia a, kan chhungkua kan buai deuh nen..zanah lo chho rawh aw. Ka night dawn lo" tih vel..a tam mai. A tira ka ngaih ang he huin ngaihzawng neih pawh chu nuam ka ti leh hran miah lo. Ka kalpah titih deuh ringawt. Mahse, Ngaihzawng nei chunga mi dang kawp emaw biak emaw hi chu ka tum lo ve bur thung. A theih chen chenah rinawm zawk nih ka tum..ka ha ka nawt zawk zawk a, Hlimi rim tur chuan ka chho ta nal nal a. Muana chu remchang hmasa berah ka be mai ang. Hlimi chuan thleng a lo sil mek a, a lo khi var var mai. Nizanah lah khan a tawp kan thleng teuh sia, kei chu ka lai deuh roh! 

Ka rin loh deuhin Venglai ami Samua te an rawn leng ve tlat mai! Samua hi Aizawla zirna avanga awm reng reng, kan khua angah chuan awmthei pawl an ni a. Keini ai chuan a nau deuh thung. A hmel pawh a chhe lo, veng khat ni lo na ná na chu kan inbe tam tehchiam lo va. Misual erawh a ni lo. Hlimi nen chuan inhresa, innel tak biakin an inbe bawrh bawrh a. Hlimi bulah a thu chat nghe nghe. 

"U Ruat, motor lian i khalh tawh lo mi?" A ti a. 

"An hralh ta daih sia, khalh tawh lo" ka ti ve mai a.

"Taka! U Tepuii khan min lo biak rawh a tih kha..thingpui dawr neitu kha.."a ti leh a. Ka nui ringawt. 

Hlimi'n thingpui a lum laiin a phone a ri leh ta. Hubby bawk! A lo la save tha chuang lo a nih hmel. Samua te pawn an hmu ve vek a, ka ngaihbel deuh nge Samua hmel chu a tak ta ran mai, lungawi chiah lo hmel a pu niin ka hria. Kei erawh ka inthunun hram hram a. Thingpui ka in zo anga ka haw ang ka ti rilru..kan in mek laiin Samua chuan," Tu nge i hubby chu?" No vak lo va Hlimi melhin a ti ta a. Thil ka manthiam ve tan e. 

"Awii, ka ex ka tih kha..ka hnezia hi aw" Hlimi aw chu a ring mah mah. Mahse, a khur deuh. 

"Ex te Hubby an la nih theihna khawvel hi a ho mang e" Samua tawng hma chuan ka ti ta nghut a. Ka ding nghal hluai bawk. Samua makti hmel phênah Hlimi kimki hmel ka hmu bawk. Samua thianpa Asanga chuan, "U Ruat, la haw suh. A nuam ve lawm" a lo ti vat a. A fel reuh mang e. 

"Mi biak tur ka nei a. Ka hawnsan phawt ang che u. Muttui u le" tiin hawilet miah loin ka chhuahsan ta a. Ngaihtuahna a tawi ve tûk thei nia! Tawnhriat ka la nei der si lo. Ka zak a, ka tlawm vawng vawng mai. Samua kha chuan Hlimi kha ka rim satliahah a ngai a, thik enah min en lo a ni mahna. Kei erawh chuan Samua leh Hlimi Hubby chu ka thîk a ngai tlat si! Hlimi chu ka rin a ang lo viau mai. 

"A ho mang e" ka ti sup a. Ka ngaihtuahna ka lo phun chhuahpui a lo nia. 

"A mak vak em ni?" Rawn titu lam ka va en chuan ka pháwk nghal hrû..ka scooty dahna bul maiah a lo ding ve reng chu niin. 

."Hetah eng nge i tih?" Ka ti bung nghut a. 

"Tu emawin bum mêk ka en mawle" a ti nghat a. Kohzui hman lohin a quarter lamah a chho leh nal nal. He nu tehhrep pawh hi a. Vung zetin ka inkhalh thla a, In ka thlen chuan ka beisei ang ngeiin Muana a lo awm a. Ka ni te leh Tei tih loh chu an mu tawh aniang. Tei bula ka sawi tawh ang khan Muana chuan min lo nghak niawm tak a ni. Ka farnu diktakte ni lo mah se; an nu leh pate hian ka kutah an nghat ngamin ka zilha ka hauh paw'n engmah an sawisel ngai lo. Ka hmangaih vang a ni tih an hre ve tho bawk a. Ka mood chu chhe viau mah se; A pawimawh si a tiin Muana bulah chuan ka thu thla a. 

"Muana, nia hei ti hi in ni ta si a. Dik tak chuan in chhungkaw tan pawha i hlutzia kan hai hauh lo. Chutihrualin i chhungte lamin ka farnu hi an hmusit tlat si a! Inpui luah tur i ni lo bawk a, luah tur pawh lo ni ta tehreng la, Tunlaiah in hrang atang hian inhmangaih te, induhsakte hi a awlsam tawh zawk. In khata chenhoa inngeih lo leh inhal ru reng renga hun hman ai chuan, In hrang atanga inenkawl hi a fuhna chin a awm ve tawh a. Tei hi i la hmangaiha i then phal si lo a nih chuan chutiang ang zawnga i ngaihtuahna pawh i sen ve a ngai dawn a ni. Keini lam chu in ina lut leh tur chuan tlawm kan inti tawk tawh a ni" ka ti ta mawlh mawlh a. A khuh kharh a, Tei erawh chuan thingpui a lum thung. 

"A dik alawm , ni e, ka lo ngaihtuah tawh fo thil a ni e. Tei hi kei chuan sawiselna lai tur ka hre lo, a thawkrim a, kan chhungkaw khaidingtu a ni hial zawk. Teremi hian ka nu a fuih khawlo vek a, an nufain an tangrual tlat si. Lehlamah chuan in ina rawn leng lut ngam tur pawh hi ka ni tawh lo naa, amah Tei hi mi dang tan chuan ka phal thei lo va. Amah a inhuama retheih a ngaih pawha a inhuam phawt chuan a nih nih nih mai ka huam tawh e" a ti ta charh charh a. Lung zawng a dam ta deuh e. 

"Chutiangte i inhuam dawn a nih chuan rethei bakberh chuan inkhawsa lo tawp ang. Nupa in nia, in inhmangaih bawk a. Mi dang inrawlh vanga in inkar chhe vek tur chu kan ngaingam bik lo. Tunah hian ka fuihpawrh che ni loin i chhungte bulah pawh thinrim loin sawi la, i nu pawh tha taka sawipui tum la..chanchin kan inhrilh leh dawn nia. " ka ti ta a. Tei thingpui háng min pek chu ka in a. 

"Nia, ka lo sawipui ve leh hrim hrim dawn nia, chuta min chhan dan azirin Tei pawn rilru lo siam la. Heta awm a tul a nih leh ka rawn lut rih mai ang a, Tei hi kei chuan ka then thei lo a ni" tlawm takin Muana chuan a ti a. Inhmangaihte inkara kan lo tlazep ve sek thin hi chu a pawi a ni. Tlakzehna tur chi hi chu a awm ve tho naa, kan inrawlh mah mah zel hian a tha lam aiin a chhe lamin nghawng a nei thui zawk thin si. An pahniha an inkawm fal theih nan kei pawh thingpui ka in zawhah ka mutsan ta a. 

Phone ka khawih lo vang ka ti zet naa, ka khawih lo thei bik lo. Hlimi miscall pahnih leh whatsapp msg 3 a lo awm a. Ka open lo thei bik lo. 

"I mak ve e. Ti nge awmze awm lo va i thinrim ngawt a? Amah i la be dawn nia ka tih kha" tih te, "Samua te kha i lo thik ang e, ka nau bialpa a nih kha" tihte a ni. Eng nge rina rin loh tur ka hrethiam lo reng reng. Mawl pawh min ti mai r'u..chhan ve hrim hrim tha ka tih vangin, "Muttui phawt" ka ti a. Phone ka dah nghal. Doctori khan min lo enthla tak tak em mawni le?! Eng nge he nu zia hi ka hrethiam tawh lo. Kan inkarah Driver leh pi nihna bak eng inlaichinna mah awm si lo hian nizante khan ka vei em em sia! Ka ngaizawng tihna em ni ang? A mak awm..

Kan khuaah hian Higher Secondary thleng a awm ve tawh a. High School leh Higher kan tlawh dawn a ni. Hlimi leh Pa Muana an tel ve bawk. Hlimi chu ka ngaihbel nge a hlim thlawt lo niin ka hria. Ka be hmasa duh der si lo. High School kan tlawh hmasa a, Hlimi leh Pa muana te'n damdawi an pe a, Doctori erawh report a ziak thung. Kei chu an canteenah ka thu daih a, canteen nghaktunu hi damdawiin tlang lam mi Nu Seni , phawk zet mai, hram tlahawlh ve thei tak a ni a. Eisiam erawh thiam tak a ni. Thingpui hàng kan in dun a, a nau fanu a chhawr te nen bak kan awm lo. 

"Ruatpui, Hlimi nen hian in ni ve deuh tak tak ami a?" A ti zawi sap a. 

"Ngati nge?" Ka lo ti hû thung. Sawi duh nei ,sawi hreh si hmel a pu. 

"Sawi rawh" ka ti leh ngat a. 

A aw a thian te te a, "Aa..a kamtamthlak viau nain, Samua hi a rawn riak thin niin ka hria a, kei hi ka tho hma thin si a, Hlimi in atanga a lo chhuak zing kara a haw tur hi vawi thum lai ka hmu tawh. Ka ringhlel deuh mai mai mawle" a ti ta a. Ka lo rin ruksa mah nise, a taka han hriat chuan a mi den dan a dang ta deuh. 

"Nia, ka ring alawm" ka ti ta ngawt a. 

"Bakah a dang pawh a la awm" a tih mek laiin Hlimi te ho an rawn lut thut sia, titi dang a vawrh ta daih a. Eng thil dang tak la awm ang maw? Hlimi chu ka bulah a thu a, inthup tum tih hriat taka a titi vel chu ka ei thlawt lo. In ei loh tih vel hi a hmeichhe zia deuha ka hriat vangin ei loh neih hi ka duh ngai lo va, Hlimi erawh a dan a dang tlat. Eng thil dang nge a la thup chêu tih pawh hriat ngei ka duh. A bultan hmasak hi tha takin a tawp a khar ngei tur a ni. Higher section lama kan awm laiin Teteii'n min lo call a. Saidingi'n min lo hmu reng a niang, "Zu hmuak zuai la, hei kan la zo chuang hleinem. Ke te pawn kan haw ve mai ang chu..mikhual an ni sia, nuam lo an ti palh ang" a ti thliam a. A duhnaah chuan a fel leh hle sia. Kei pawn ka hnial hran lo, Teteii te chuan khawchhung an lo lut tawh bawk si nen, ka inkhalh thla ta a. Hlimi pawh a tûm lian ngang mai. Ka thengthawngah a thawk mai mai lo e a.

Teteii te chu sumo counterah an lo thu ran tawh a. An bawr ngang mai. Kan han nui leh rih phawt. Nuih heh deuhte bula awm hi chu a nuam a ni. Muangchangin kan in lam ka panpui ta a. Ka ni te pawh an lo awm a, ka han inhmelhriattir sawk sawk a. An ni khawpui mi lehkhathiam, polite an ni bawk a, ka ni te pawh an be nghal bawrh bawrh a. Apuii te nen pawh an inkawm thei viau dawn e. An inbual chhungin Doctori te chu ka han lam leh ta hram a. An lo zo fel chiah bawk,. Kan tlan laiin, "Teteii te chu nge maw min rawn biak ngam loh le aw. Lo thleng se nuam an ti ve tho awm sia" Saidingi chuan a ti a. 

"I den êm alawm" ka tih chu a huat ka rin nen, za deuhin a nui hawk hawk a. 

"Zanah rawn lenpui rawh aw" a ti a. Ka buk ve nghut kha. Lehlamah Teteii te nen chuan an inkawm lem lo a, an thleng hreh pawh ka hrethiam. A mi uap hi a na ve reuh si a. In ka thlen chuan chaw ei an lo siam mek a, ka inbual sawk sawk a. Ka kil ve nghal. Pa Rema te man Zu pawl (sazu) an lo fry ro thet a, Teteii te chuan an ei duh loh ka hlauh vangin, "Artui inkang lo va.." Ka ti a. 

Thari chuan, "Buai suh, kan duh vek. Lei hawn tur awm se kan lo tih hi" a lo ti diam mai a. Ka hrilhhai letling. A duh tan chuan zu pawlte hi chu tui ve tak a ni rêng a. 

Kan ei khamah an han che sang sang a, Nupuii hi kan chhungkaw thlengsiltu a ni kumhlun thin. Nu vak lo mah se; in chhungkhur chetah Apuii leh Tei hian an tluk miah lo bawk. Teteii te pawh chuan puih ve an han tum sateh a, a phal lo bur. An zawrh tur rawn kenho chu an chingfel ta ngawt a. Kan khua leh a chhehvelah kan khua hi thil hralh kalna ve ber a ni hrim a , an hralh nual ka ring. Hlimi'n a lo call a, "I lo chho dawn lo mi? I mikhual nulate chu i va ngai awm ve" a rawn ti kher a.

"An ngaihawm ve lawm. Doctori inah ka rawn lenpui dawn..ka rawn peng zuai dawn nia" ka ti liam puat a. Inzawmna nghet tak tisa tak pawha kan la neih loh vang nge Hlimi awmdan avang chuan han awm nawm lohna em em ka nei hran miah lo. Apuii inlengte an rawn luh takah chuan Teteii te nen chuan Saidingi tlawh tur chuan kan inphur chho ta a. Ani pawh a lo awm a, hahdam hmel zeta thuin tv a lo en a. Damlo an awm lo bawk a, an áwl viau. 

"In lo thleng mai lo a.." A ti nghal táwng a. 

"Aa..Zin thut te i ngai thin sia, kan tibuai hreh che lawm" Tetei'n a ti ve mai a. An sawi zawm tawh lo. Rei ka thut hmain Hlimi insawithiamna ngaithla ve reng reng turin ka chhuahsan ta a, ka chhuah dawn chuan Doctori chuan, "Mi á" a ti sap a. Teteii te chuan an hre pha lo vang. Ni e, ka á alawm. Mahse, khati taka min tizaktu kha tihnat let ve ka duh tlat a ni. Hlimi chuan a thawmhnaw vel a lo remtha mek a. 

"I zin dawn mi?" Ka tih chuan, "Ka haw dawn ka tih kha.." A ti nghat a. 

"Samua te an rawn leng dawn em?" Ka ti ve leh ngat. Min melh miah loin, "Ka hre lo. Eng nge an rawn len ngawt ang a?" A ti khur dat a. 

"Aa..chuti zanrei lamah em ni? A rawn kal dawn?" ngaihpawimawh loh hmel zetin ka ti leh a. A meng alh phat mai. "Eng nge i hriat a?! Samua chu ka nau bialpa ka tih kha..chuan, nia zan thum chu a lo riak tawh. A chhan chu tunhnaiah thawm ka hriat thin vangin ka hlau a, ka sawm a nih kha. " a ti tán tân a. Ka nui suk ringawt. 

"I duh leh min ring la,i duh leh min ring lo la..i thu thu aw" a ti leh a. 

"A nih ti nge min duh a?" Ka ti thut chu a hamhaih ngei mai. Kan sawi lai nen a intuha lo ve bawk a ni. 

"Ka duh che a ni mai lawm..chhan dang a awm kher a ngai mi?" A ti ve mai a. 

"Nih chuan ti nge i hlauh chuan riahpuiah min sawm zawk loh? I bialpa ka nia" ka ti dam duai a. 

"Miin min sawi duh dawn asin. Ka mualpho i duh mi?" A ti há a. A sawi dikna chen a awm ve tho. 

"Samua chu ka bia ang aw..i ngam em?" Ka tih chuan mitmeng buai nak hian, "Biak kher a tulna ka hre lo. Bialpa thikthu chhe lutuk neih hi ka kham" a ti hlaih hlaih a. Ka tawng leh hmain a phone a rawn ri. Hubby bawk! Teivet a! Ka nui hawk ringawt. 

"Pick rawh. Speaker on la" ka ti ta ngat a. A tawp thlen law law mai hi a tha e. A pick up lo ngam si lo, a khawngaihthlak zawk. Nuam ka ti telh telh mai sia. Ka cheap chu ka inti reng, mahse, ka ngaihzawng neih vawikhatna a ni a, ka la deal thiam tawk lo bawk a ni. 

"Hello" Hlimi'n a tih rual chuan, Mipa aw thum lam hian, "Ti nge vawiin nilengin call i lak theih loh?" a rawn ti nem duai a. 

"Kan buai alawm" a ti nghat a. 

"Msg tal hnutchhiah ve thin la..chuan naktuk tuklehah maw i rawn phei dawn" a rawn ti a.

"Aw" Hlimi chu a tah a chhuah hmel hle.

"A that chu, Ka ngai tawh em mai che. Chuan, nangmahin i phei tawh lo vang.." A rawn ti ta a. Hlimi chuan a off daih. Beidawn hmel zet hian a thu hnawk a. A thaw hawk bawk. 

Nui chungin, "Kei min tawng hi i vannei ti tawh mai ang. I mualpho lo vang. Mahse, mipate hi infiam nan hmang tawh suh. Samua pawh thudik hrilh ang che. " ka ti nghet charh a. Ka melh ran bawk. A heh a liak a, "Ka ning, engkim hi..Ruatpui, ka laklawh vek tawh a nih hi. Min ngaidam rawh. " a ti hul hak a. 

"Aw ka ngaidam che lawm. Nun tha pangngai takin nung tawh ang che. Tihian thian kan ni zel dawn nia" ka ti a. Ka ding hluai,.mi rawn kuah vat. Ka hamhaih ve deuh, "Khawngaihin..Ruatpui, kal suh. A tawp nan riak rawh..umm..mipa ka tawn tawhah ka la duh ber che asin. Ka dinhmun hi a hrehawm takzet a ni" a ti tiau a. A mittui a tling pam mai. 

"Ni lo ve. Kei chuan ka mutpui thei lo che. Mi hmeichhe duhlai ka khawih thei lo. Inenkawltha ang che" tiin min vawnna kut chu ka thlah a. Ka chhuahsan ta. Ka záng hawk zawk mai. Hlimi hi ka tan a vawikhatna a nih vang erawh chuan ka hre ve reng tawhin ka ring. Mahse, a fel tehlul nen, a chhungril nun chu a lo buai ru ve tak tak pawh a ni maithei. Hriatsak vek ka ba tawh lo va, ka puih theihna awmchhun chu tihmualpho loh a ni mai. Mipa ka nih angin ka hlen ngei bawk ang. 

Teteii te chu ka han lam a. Doctori min melh ngunzia chu ka hai lo. Ka melh duh lo lui ve tlat! Ka zak tlat a nih chu..mutthilh a har zêk..Hlimi msg lah a lo thleng reng a. Seen loin ka delete tawp tawp mai. Ka seen a, a insawi khawngaihthlak vak chuan ka nem ka hlau. Chuvang chuan ka hnawl rih a ngai tlat. Ka mut a chhuak tan tihin Doctori msg a lo thleng a. 

"I na em ni? " tihte ringawt hi. A va ho e aw. Min ngaihtuah ve niawm fahran chuan. 

"Ka tha" ka ti ve mai a.

"Ih maw.." A rawn ti te tê a. A va naupangchhia leh si e. 

"Umm" tiin ka reply a. 

"Deal neihpui che ka duh a. " a ti ta a. Tlemin awmzia a nei ta deuh. 

"Eng thilah?" Ka ti vat. 

"Min nei rawh" teh ngawt a! Ka mengpháwk ngang mai. A â tawh a niang, he nu hi. 

"I rui leh tawh mi?" Ngaihtuah mang lo hian ka ti a. 

"Ka harhfim kâk e. Min nei dawn, chu chu hre phawt teh" ngat ngat mai a! Ka hmeichhe tawnte hi an dangdai thei e. 

A rui a nih ringin ka reply ta lo va. Ani pawh a ngawi zui ve mai. 

A tukah Teteii te chu Apuii'n a zawrhpui a, zingkarah ringawt pawh an inhralh nual mai. Arpui tuilai an rawn pawm haw ngei bawk. Min nuih sáwng pahin, "Vawk ka talh ang che u a ti ve sia, vawktê sa chu kan ei duh bik lo" Thari chuan a ti a. 

Ka nîin ,"Aww..a ngai lo asin le aw. Talh che u ka lo rilruk tho asin. Tlai lamah..in á mai mai mang e" a ti zêk a! Huat vanga sawi a ni lo bawk a, an nui tlang leh ham ham tawh. Chaw eikhamah chuan lai leh laiah inthenin Nupuii leh Thari an kal dun a, Teteii leh Apuii an kal dun thung. Ka farnute pawh hi an fel ve ngawt mai. Kei pawh tihtur em em ka nei si lo, Hlimi lah ka rim duh tawh bawk si lo. Ka nî nen vawk chaw dawl la turin leipui lam kan pan ta daih. Pa Rema erawh insaknaah a inhlawh leh a. Tei'n in a nghak a nih chu. Ka nî nen chuan kan titi nasa a, Hlimi nen kan inthen thu ka sawi chuan thawk la hawkin, "Ih e, Mampui, ka sawi hreh a, ka sawi lo mai mai a nih kha..Hmanniah i nu Thangi'n Hlimi thawhna hmasaa Hlimi an sawina vel mi hrilh hrep alawm. Chhim lamah sawn a lo thawk tawh a niawm e. An VC te leh khawtlang tangrual hialin sawn an dil ngai khawpin buaina a va thlen a nih awm chu! Amah vangin mi nupa kar a chhia a, a bialpa va zinin khawlaiah a khawih mualpho hrep bawk an tia. Khatiang hmeichhia kha chu mo atan êm chuan eng ni lo mah ila, ka lung a dum zán lo deuh a ni. In inthen tawh tho va, ka sawi ta mai a nih chu" a ti dap dap a. Ka rin phak bak a ni. 

"Mahse, Nu Thangi chuan tu ka atangin nge a hriat?" Ka ti a.

"Ka hre lo, mi hi an kamtam khawp a, lang lo tura thuhrûk reng reng hi a lo awm thei lo bawk nen. Hriat dan a mual mual an nei a ni mahna le..hetia a landan mai chuan a fel viau asin le" ka nî chuan a ti mai a. Sawi tur ka vàn deuh. Lehlamah chuan Hlimi ka va tan lam ni miah lovin, mi tu emaw chuan a nunhluiah tihsual leh amah ngei pawhin theihnghilh a duh ngawih ngawih thil a lo ti tawh a ni thei. An tun huna phawrhsaka tihhmingchhiat leh kher hi a tulna reng reng ka hre ve lo. Nun thar an neih theih phei chuan an lawmpuiawm em em zawk. Hlimi pawh chuan chanchin ngaihnawm tak a neih ka ring tlat! Chutin ka diriam ve ngawt thei lo. Min ngenngawlna nasa takte kha..ka lo ngaithla ve mai lo va ti ten ka ngaihtuah neuh neuh a. 

Kan in kan thlen phei hmain Hruaia hi chak zetin a rawn phei a, a hmelhmai a dik loh deuh vangin kan lo thlir reng ringawt. Kan bul a rawn thlen chuan, "Ee! Saw Muana chhungte an rawn thawk a, a zia lo khawp mai. Hmanhmawh teh u " a rawn ti ta mai. Ka ni nen chuan chak zetin kan phei ta hlawk hlawk a. Ka hlauh ang ngeiin thil a thleng ta niin ka hria. A nih nih kan ni tawh mai a niang chu..Kan in kawt Nuhnûn kung bulah chuan, Muana nu Pi Chawii chu a lo ding khawng lah a. A lo áng phiar phiar bawk. Ka nî a hmuh rual rual chuan, "Zawngi, nangni nufa rualho hian ka fapa in lo fuihpawrh a, in va zak thei lo em em ve. Ka fapa hi kan lak atanga lak hrante in lo tum a, a teuhin a hnaisai lo vang." Tiin a kawk sawk sawk mai. Ka nî hamhaih lah chu a ding zum zût ringawt a. Ani hi zawng áng buan buan chi a ni ve lem lo. Verandaah Tei leh Muana bakah Teremi leh a pasal an ding a, Teremi pawh a hmai a sen teuh mai. Tei erawh a tap deuh par a. 

"Eng nge thil awmzia le aw?" Inthunun takin ka ti a. Teremi pasal Zela chuan pawr fahran hian, "I farnu hi zilh deuh rawh. Pasalte lak hran tum mo tha an awm ngai lo" a lo ti a. Ka ner nawk. 

Pi Chawii chuan, "Ka fapa hi in la hrang dawn lo, chu chu a ni mai. Lianzual, hre rawh. Nang lo pawh hi nupui tur an tam mai, vawikhatmah ka fapa hi a biak pawh lo be tawh suh ang che. Muanzual, rawn kal rawh" a ti leh hlawih hlawih a. Tawngna hun min siamsak ve bawk si lo. Ka nî ngaihdan ni lo lutuk chuan, "Ni e, Muana, va haw la..vawikhatmah kan in hi rawn rap leh tawh ngai suh ang che. Lianzual, nang pawh lut rawh. He mipa hi i hmu leha i be leh a nih chuan i nu hi ka nasa hle ang. Marawhchu, Chawii, hei hi lo hria la, i fapa hi kan fuihpawrh reng reng lo. Amah zawkin in hrang chan piahlamah heta rawn luh hial pawh a inhuam thu a sawi vanga Tei pawh khap lo mai zawk kan ni. Kha chen nupa an lo ni ve tawh a, an inhmangaih a, keini an chhungte vanga an inzawmna chat ringawt tur chu ni theia kan hriat loh vang chauh a ni e. Ni e, kan duhtawk ang. Min hawnsan rawh u" a ti ve ta nghat nghat a. A aw erawh a nêm lek lek zawk. Teremi chuan, "In chhungkua leh kan chhungkua hi chu kan inhnimhnai leh tawh lo vang. Kan unaupa hian nu leh pa aiin hmeichhia a thlan ring suh u" a ti deuh kher a. Tei'n chhan a tum chu mitmeiin ka khap vat. 

Pi Chawii chuan, "Ni e, nupui chu tam tak a neih theih, nu leh pa erawh a dang an awm thei tawh lo" a lo ti ve a. Tei chu a insum zo ta lo nge, "Ni e, Ka pi, pasal pawh a dang an awm e. " a ti zawi raih. Zela lah chu a rui phur nge mawni dawn ni, "Chhungkaw pangngai tak in ni emaw tih nak alaiin pasalte lak hran lo tum reng reng" a lo ti ve sek a. 

Kan vawk in chhakah lo ding ve reng a farnu Malawmi chuan, "Nang kha rawn haw vat rawh. A zah pawh i zak na nge? Nang tluka nupui ten an lak hran leh thaibawih an awm em ni? Tenawm nupa lutuk.." A lo ti ve nek. Teremi ling phat chuan boruak a siam dik lo zo dawna ka hriat avangin, "Ekhai! Min hawnsan tawh r'u, buaina kan duh lo ve" ka ti ta vat a. Zela phei chu a nawrin ka nawr deuh, zak ve thei mihring a nih chuan a zak ve lutuk turah ngai ang. Khaw pumin an nupa kan hrechiang si a. Muana kal tur chu a tawi deuh hrat hrat a, a nu lahin a lo ko chhen tawh si. Tei chuan Muana mitah enin, "U muan, min lo hmangaih emaw ka ti a. Ka chhungte mitmei pawh veng zo lo khawpin ka tlawm a. Mahse, a tawk tawh e. I nu leh i farnute duhzawng ngei i nei dawn nia. Kei chu engtikawng mahin ka rem leh tawh ngai lo vang. A tawp hmak e" a ti nghet charh charh a. In chhungah kan luhsan ta dial a. A lo inngaihtuah ve tawh mai a niang chu. Kan dem vek thei lo naa, a tawp thleng ngam si lo va tiamtu mipa hi kei chuan ka ngaisang ngai lo. An haw darh ve ta a niang an reh ta a. Thenawm ho an rawn lut sap sap, Pi Chawii rapthlak an tihzia te an ngum khak an hmuh lohzia te a ni an sawi ni. Ka nî erawh chuan thu tam a sawi lo. "Ngawi teh u, Teremi pawh saw dem suh u. Amah hringtunu in hmuh sawn thilmak vak a ni hleinem" tih thu chauh a sawi. Mahse, a ril riau thung si. Tei chu a luhlul chi a ni bawk a, a thei dawn khawpin ka ring. 

Apuii te rawn hawin thil awmzia an han hria chu Nupuii tlan chhuah a tum a, Pa Rema'n a chelh vat. Ani hi zawng a tharum zawnga chetlak mai hi a duh zel a. Khap deuh a ngai thin. Tei'n chiang kek kawkin, " Ngawi ila, a tawk. Ka be tawh dawn lo, ka block fai vek tawh e. Eng nge maw min duh lotu te chhungkuaah chuan ka luh kher ang le?" A ti ta a. A chiang e. Mikhual kan nei bawk sia, inbengdaih a ngai. An va sumdawng chu an inhralh zo titih der mai lehnghal a. A lawmawm mang e. Zanriah ei khamah Teteii te chuan an thawmhnaw zawrh ban atang chuan ka nî leh ka farnute chu an duh ber an thlantir a, a tul lo a ngai lo ti eng ang mah se; an lawmthu sawi vena a ni a, an thlansak ve ta mai. A tuk maia hawn an tum lehnghal. Engdang a ni lo, Teteii û hi reitak dam lo, silàwng tawh a ni a. A dinhmun a tha vak lo a niawm e. Kei pawh chuan ka lensan duh ta lo va, lenna tur ka hre chuang lo bawk nen. Kan veng tlangval an rawn leng ta sap sap a, mikhual hi chu an la langsar ve bawk a, an ni lah hmelchhe zawk zawk an lo ni lo bawk nen..Inleng kawm lah chu an thiam zêk a. Tei erawh hma deuhah a mu a, ka khawngaih reuh mang e aw. Kan mikhualte bakah ka farnute lo rim ta chu ka hnawk ta riaua inhriain Tei mutna lamah ka phei ta ringawt a. Lukhamah a hmai a lo phum a, a tap niin ka hria. Zawitein ka ko a , a rawn hawi chhuah chuan a mit a sen rám mai. 

"A hrehawm ngawt ang tiraw? Mahse, tawrh a ngai sia.." Ka ti ringawt a. 

"Tun tum chu ka thin a rim tel tawh a, a zia tawh zawk. U Muana hi a lo nêp em a nih hi..ni e, a chhungkua kha kalsan turin ka ti miah lo asin le" a ti hawk a. 

"Inchhir hun a nei a nih pawhin nang chu i let tur a ni lo aw" ka ti bung nghut a. 

"A teuh lo. Ka let leh ai chuan ka dam lo zawk mai ang. Kan hlim tawh dawn chuang lo" a ti ve hmak mai. 

Hlimi'n a lo call teh tlat a! Biak tawh loh ka duh asin le aw. Mahse, vawiina ka ngaihtuahna te avang khan vawikhat tal chu ngaihthlak ve ka duh a, ka laksak ta a. 

"Ruatpui, lo chho lawk la..naktukah ka zin tawh dawn sia" inthlahrung tih hriat ngawih ngawih hian a ti ta a. Ka khawngaih ta tlat a nih chu! Min lo bumin ka lakah lem a lo chang pawh a ni thei. Mahse, ka hnenah hian eng emaw sawi duh a nei niin ka hria, a hnenah ka let leh dawn tihna ni miah loin. ,"Aw le..ka lo chho e" ka ti a. Kan dah nghal. Dar 9 a ri têp tawh. Khawlai pawh a reh viau mai. Ka han thlen chhoh chuan U Rengi night duty chuan, "I va tlai ve" a rawn ti láng làng a. 

"Nia, kan buai deuh a" ka ti mai a. 

"Hlimi khu a lainatawm lutuk, zuk pui teh" a ti zawi sap a. Mak ka ti ru hle. Rilru buai ru deuhin Hlimi in luah lam chu ka pan thla ta chhat chhat a. 

Kawngka ka kik dat dat a, a rawn hawng ri rak. Ka hmu chiah chu ka pháwk hle. A biang chu a lo vûng bûr mai a, a tap nasa tih hriat zetin a mit pawh a bui lák mai. Kan indinchilh ta ran a. Khawngaihthlala zet hian min melh a, "Eng nge thleng?" Ka ti sup a. 

A insût hraih. Thutthlenga thut hnawk pahin, "Ka tuhrah ka seng a nih hi..ka chawh ngawt mai tiraw?" A ti tham chhal a. A bulah thu ve vatin, "Sawi teh" ka ti leh nghut. 

"A hmasa berin Doctori hian a ngaizawng che tih i hria em?" A ti ta daih a! Ka beisei loh lutuk zawhna ka dawng chu ka hmelah pawh a lang nge ni, a nui hul hak a. "Tichuan, kei pawhin ka duh che. Pasal atan pawh ka duh che" a ti leh tawp..eng nge maw a awmzia le?!

"Hlimi" ka ti nghek ringawt.

"Tunah pawh a rawn ko leh têp tawh ang che. Nang leh keia inkawp hi a remti lo va, tlakzeh dan a zawng char char alawm. Ka thiam loh thil tam tak a awm nachungin ani pawh khian tel vena a nei a ni" a ti ta sak sak a. Min deng dawt dawt a ni ber e. Eng ber nge a sawi tum pawh ka hre si lo. 

"Eng nge sawi i tum?" ka ti a. Ka dawhthei lo lek lek tawh. 

"I innocent lutuk a, engmah i hrethiam lo a nih hi. Tuna ka taksa duk leh vûngte hi Doctori vanga ka neih a nih hi.." A ti ta mai a! Ka àn zuau laiin min khap vat, "Min sawisa turin Samua te a ruai alawm. Tikhan thil awmzia i man em? Samua hi ka bialpa a ni lo. Mahse, ka bialpa anga awm turin a ruai a, nangman min rinhlelh theih nan tawng thei deuh deuh Nu Seni te ho bulah ni lo pui puiin thil a sawi bawk a. Tichuan, serchhipa ka bialpa hlui a va be pawp bawk. Tikhan i lo len lai taka min call turin a hrilh lawk thlap a, Kan awmdun ve apiangin kalna tur hmanhmawh a nei ziah bawk. Tunah pawh a ko tep ang che" a ti ta zung zung a. Sipai báng ka bo ta map mai le..chutianga chiang taka Hlimi'n a sawi theih chuan Doctori chuan inrawlhna a nei tak tak a ni thei ang em? Nge kei hi bum kual ka ni leh zawk. Huiham

.

"A nih fiah i ngam em?" Ka ti chang rût a. 

"Lawk aw" tih leh ka thla lak a rual a, statusah a hmang nghal hmiah. 

"My love " tih caption-ah a la hmang zui! Hlimi chet dan tereuh chu aw..

"Lo ngaichàng rawh aw.." Inringtawk zet hian a ti a. Ka lo ngawi reng thung. 

4mins vel a ral tihin call ka dawng ta chiah. Saidingi call chu..! Hlimi chuan cho zeta min melhin, "Tikhan i chiang em? Pick rawh le" a ti ta a. Ka kut te chu zuk khur deuha mawle! Thil inlumlet dan chu ka hrethiam tehnuai lo êm a ni. 

Ka pick up ta a. 

"Samua thiante thinrim i tâwng ngam a nih loh chuan, khalai hmun atang khan kal chhuak vat rawh" a rawn ti vawt raih a. Ka dinna lei a nghet ta lo nge, ka vir deuh muaia ka hriat chu ni..

"Engvangin?" Ka ti tham tuak a. 

"Hlimi hmel landan atang khan an pawisawi chu i chak vakin ka ring lo. Nangmah mai chuan i hneh dawn hauh lo a nia" a rawn ti hriam leh hraih a. 

"Engkim ka hrethiam vek tawh e. Nang hian i plan vek" ka ti rum ûl a. 

A nui hak a. 

"Vanruatpuia hi bum nuam tak a lo nih hi..Mi mawlpa, an thawm ka hria a nia. Chhuak rawh" a rawn ti chang ta rât a. Ka hamhaih ve ta deuh, Ka hlau chu a ni lo. Ka mumang te pawh a ang ka ti. Eng thilah nge ka tan ka hre lo. 

Phone ka dah a. Hlimi melh chungin, "Hmaichhanah ngei Saidingpuii chu ka'n bia ang e" ka ti hul hak a. Ka pen nghal páwk, "I thluak a su hneh viau ang. Mahse, min rin loh chuan i thu thu" Hlimi'n a tih chuan..

"I sawi kha thudik a nih takzet chuan tihtheih ka nei ang.." Ka ti nghut a. Ka chhuak nghal vut. Hlimi min kohna ri pawh ka hria, hmalamah ka pen chho páwk páwk a. Ka rilru a buai êm a, awmngaihna tak pawh ka hre lo. Saidingi verandaa ka din lai chuan ka thlang kawnga Samua te thian thum lo kal phei chu ka zuk hmu a, ka zu chhuk dawn em mawni ka tih mek laiin kawngka chu a rawn inhawng khap a. Doctori chu ka hmaah lo dingin, "Lo lut rawh.." A ti zawi raih a..

(Hmmm🥱